% Text title            : raghunAthashatakam
% File name             : raghunAthashatakam.itx
% Category              : raama, shataka
% Location              : doc\_raama
% Author                : Swami RamabhadrachArya
% Transliterated by     : Vishal Pandey
% Proofread by          : Vishal Pandey
% Acknowledge-Permission: Shri Tulasipitha Seva NyasaH, SwAmi RamabhadrachArya
% Latest update         : September 12, 2024
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Shri Raghunatha Shatakam ..}##
\itxtitle{.. shrIraghunAthashatakam ..}##\endtitles ##
|| shrIH ||
|| namo rAghavAya ||
atha mahAkavimahAmahopAdhyAyashrIchitrakUTatulasIpIThAdhIshvara\-
jagadgururAmAnandAchAryasvAmirAmabhadrAchAryapraNItaM
shrIraghunAthashatakaM prArabhyate |
|| shArdUlavikrIDitam ||
shrIsItAnanachAruchandrachaTulo.acha~nchachchakoraprabho
sItAnetrachakorapArvaNavidho vishvendra vishvagvibho |
sItAsatpriyayA sahaiva vilasatkoTyashvamedhinhare
sItAshrI raghunAtha rAma ramase shrIchitrakUTe.avadhe || 1||
AnandAtmatanuM vikArarahitAM brahmasvarUpAM shubhAM
sachchitsaukhyamayImapAstasamalAM guNyAM supuNyAM sadA |
dyantImutpalashakraratnavanamuktApichChadUrvAmadaM
mUrtiM shrIraghunAtha rAjasi vahansanmAnaseShvanvaham || 2||
nIlendIvarakAntayA kamanayA lAvaNyalakShmIpuShA
sItAlochanabhR^i~NgajuShTasuShamAmAdhvyA sadA saumyayA |
dIvyaddevatayeva labdhapadayA shrIsanmanomandire
mUrtyA shrIraghunAtha mUrChayasi vai koTIrmanojanmanAm || 3||
kausalyAsukR^itAbdhisomasuShamAM mAdhuryamandAkinIM
mAheyIsumanomahomahamahIM saundaryasArachChavim |
ramyAM lochanaputtalIM dasharathasyAjermanodevatAM
mUrtiM svAM raghunAtha maddR^igatithiM kAruNyatastAM kR^iNu || 4||
yAmindIvarasaubhagAM bhagavatIM netraistribhirdhUrjaTi
rdIpitabhaktibhirvitanute nIrAjayanma~Ngalam |
shyAmA pAramahaMsasiddhigarimA kAruNyakAdambinI
sA mUrtI raghunAtha mUrChayatu me kAmAdikAMstAvakI || 5||
shAshvaddharmasuvigrahA padajuShAM sa~NkalpitAnugrahA
vedhovishvavilakShaNA guNachaNA vAtsalyavArdhiH shuchiH |
sItAnetrayugaprapA kR^itakR^ipA pApApahA pApinAM
deyAtkaM raghunAtha nAthitamalA mUrtistava shyAmalA || 6||
brahmAnandaghanA prasannavadanA sampuShTaniShki~nchanA
bhaktishrIsadanA kR^ipAmR^itadhanA saMsvardhunI dhanvinI |
tUNIreShudhanurdharA karakarA vAtsalyadhArAdharA
mUrtiste raghunAtha ma~NgalamayI jUrtiM balAddhantu me || 7||
bhAsvanmUrdhni hiraNyahemagujayaprakhyaM sumauliM vahan
dhatse mAkarakuNDale shravaNayorhAraM haraM vakShasi |
pANau bANasharAsane kaTitaTe pItAmbaraM sveShudhI
nUnaM te raghunAtha bhUShaNadhR^itisteShAM rucho vR^iddhaye || 8||
nyastAnarthavarUthataH kathamime.anarthAnvihanyurbalAt
saundaryAmR^itasAgare kathamamI dadhyushChavervipruShaH |
AdhikyaM kimu tanyatAM niradhike tasmAdapArthAH same
nUnaM svaM raghunAtha dhAtumanaso bAbhAnti te vigrahe || 9||
|| vaMshastham ||
jayatyasheShainasatUlapAvako
mahAparAdhA.ahijatArkShyashAvakaH |
suradrumArAmasamo.abhikAma
tavivaidyavarNaM raghunAtha nAma te || 10||
jayatyajeyaM dvibhujaM jarajvaraM
guNAkaraM nirguNamIDyamaishvaram |
payojapAthojasarojasundaraM
varaM nR^irUpaM raghunAtha te.ajaram || 11||
jayanti saMsArasamudrasetavaH
svalokalIlAH svasukhaikahetavaH |
kupAtakAlAtakadhUmaketavaH
shrutIDyagAthA raghunAtha he tava || 12||
jayatyaghaughaughavinAshachAturI
tvarAkamAnandamayaM suchinmayam |
sadAtmakaM brahmavibhUti rAma te
nirAmayaM shrIraghunAtha dhAma te || 13||
jayanti jAgrajjanadiShTasatpathAH
sadaiva maryAditamAnavaprathAH |
purANarAmAyaNagA gatavyathAH
shlathatchChlathAH shrIraghunAtha te kathAH || 14||
jayanti rAmAyaNakoTikoTiShu
shrutAni gItAni munIndrasUribhiH |
charanti chaityaM charitAni sevinAM
punanti pApaM raghunAtha te.anagha || 15||
jayatyadabhraM shatakoTivistR^itaM
suramyarAmAyaNamAdikAvyakam |
sadaiva vAlmIkimukhendusomakaM
jagattraye te raghunAtha shAshvatam || 16||
jayatyado rAmacharitramAnasaM
surAmagAthAshatakoTisArabhR^it |
dalaM tulasyAstulasIritaM yathA
sadAnavadyaM raghunAtha te.amalam || 17||
jayatyanalpAghavinAshakAriNI
vihAriNI sajjanamAnasAjire |
prahINaga~NgAshuchitA shuchipriyA
sadaiva kIrtI raghunAtha te.anaghA || 18||
|| vasantatilakA ||
sItAmukhAmburuhama~njulacha~ncharIkaM
sItAhR^idamburuhapAvanapuNDarIkam |
sItAkarAmburuhalAlitamavyalIkaM
sItApatiM raghupatiM raghunAthamIDe || 19||
sairadhvajInayanachAtakavArivAhaM
saundaryasArajitamanmathakoTikoTim |
mAdhuryadhuryamaparAjitamaprameyaM
vande.anavadyacharitaM raghunAthamIsham || 20||
shR^i~NgArasArasarasIbhavachitrabhAnuM
bhAsvatkulAmburuhabhAsvarachitrabhAnum |
uddaNDachaNDatarachaNDanachitrabhAnuM
nAthaM praNaumi raghunAthamanAthanAtham || 21||
indIvarAmbudharanIlamaNiprakAshaM
kandarpadarpadalanAdbhutakamrakAntim |
kAntAlakaM lalitahAsamudArakIrtiM
shrIsharvarIshavadanaM raghunAthamIDe || 22||
dantaprabhAvijitadADimabIjarAjiM
rAjIvalochanamaghaughavimochana~ncha |
kodaNDamaNDitakaraM shritachaNDakANDaM
yAmo vayaM hi sharaNaM raghunAthamAdyam || 23||
prAtardivAkarakaropamapItavastraM
vakSholasattulasikAvanamAlamIsham |
AjAnubAhumajapautrasutendurAhuM
taM vai vrajAmi sharaNaM raghunAthamAryam || 24||
shrIjAhnavIkaraNakAraNakAraNA~Nghri
pAthoruhaM munivadhUduritaghnapAdam |
lokeshvaraM janakanandinIpUtapANi
padmaM vrajAmi sharaNaM raghunAthamenam || 25||
he hemashailatanumArutimodakArin
he hemaparvataniShaNNamanovihArin |
he hemabhUShaNasharAsanabANadhArin
kShipraM sanAthaya janaM raghunAtha rAma || 26||
tvatpAdapadmamakarandamadhuvrato hi
svapne.api naiva labhate bhavato nakAram |
tanmAM vasiShThakulajaM kila yAchamAnaM
mA mAM nirAshaya hare raghunAtha bhikShum || 27||
|| vaitAlikam ||
navanIlatamAlasundaraM subhagaM bhImabhavAbdhimandaram |
dashakandharashatrumanvahaM raghunAthaM sharaNaM samAshraye || 28||
sharaNaM karavANi sAdaraM saralaM sarvahitaiShiNaM harim |
sharaNAgatavatsalaM prabhuM raghunAthaM tamanAthasaMshrayam || 29||
sharaNAgatavajrapa~njaraM sharaNaM sarvanR^iNAM samAshrayam |
sharaNAgatarakShaNavrataM sharaNaM shrIraghunAthamAshraye || 30||
sharaNaM sharaNAmi shAshvataM maraNatraM sharaNaiShuNAM nR^iNAm |
karuNaM kalaka~njalochanaM raghunAthaM naranAthavigraham || 31||
na dhanaM na balaM na bAndhavA na hi mAtA na pitA na vA suhR^it |
nirupAya udastasambalo raghunAthaM sharaNaM shrayAmyaham || 32||
na japo na tapo na sAdhanaM nahi vidyA na vichAraNA shubhA |
kugatiM kumatiM cha mAdR^ishaM raghunAthAva janaM janArdana || 33||
raghunAtha kR^ipA hi tAvakI suravallIsadR^ishI shrutau shrutA |
kimaho mama bhAgyaviplavAtkR^ipaNA sA nirapatrapAbhavat || 34||
gaNikAshabarIjaTAyuSho vimalA yatra sarityathAbhavan |
mayi sA raghunAtha kena te karuNA devadhunI nyashoShi bho || 35||
na hi mAdR^isha enasAM nidhirna bhavAdR^ikkaruNAnidhiH kvachit |
vidhidattamidaM hyananvayaM raghunAthAva na nAthyatAM janaH || 36||
|| shikhariNI ||
smaraM kakShaM gu~nja madhupamaravindaM jaladharaM
lalAmaM sautrAmaM gaganamavijAtoyamuDupam |
hariM hAraM hAraM haratanayahAraM haridhanuH
kaviM jIvaM saumyaM jayati raghunAtho.adhikudharam || 37||
dadhAnastUNIraM dhanuratha gabhIrasvanamayaM
prakANDaM vaikANDaM dalitadashakaNThATavivanam |
vasAnaH kausheyaM balamaparimeyaM vilasayan
ghanashyAmo rAmo jayati raghunAtho.adhikudharam || 38||
vidhuH shrIkausalyAsujaTharapayodherguNanidhi
rdashAsyAbdheraurvo dasharathamakhApUrvamanaghaH |
tamAlAbho lAbho dhR^itamadhuramUrtirdR^ishimatAM
svamaryAdAtantUnvayati raghunAtho.adhikudharam || 39||
kR^ipAsindhurbandhurvinatajanatAnAM haraharo
harirhR^iShTaH puShTaH satatamatha sItAsahacharaH |
mahAtmA pUtAtmA prathitaparamAtmA padajuShAM
nR^iNAM doShAndUraM nayati raghunAtho.adhikudharam || 40||
juShANaH shrIsItAvadanavanaruksAramamalaM
puShANaH pArthivyAH paramarasarADbhAvamanagham |
muShANo mAheyI manasijatataM lakShmaNasakho
varo vai vaidehyA vasati raghunAtho.adhikudharam || 41||
vapuH svIkurvANaH shubhadaguNaratnAkaramaho
lasatsvechChArUpaM kShapitabhavakUpaM paramayA |
mayA yukto muktochitavigatamAyo.apakaraNo
jayankAmaM rAmo lasati raghunAtho.adhikudharam || 42||
kvachitsItAvakShoruhakalashapATIrarachanA
rasaM shantanvAno vilasitavidhAno rasapateH |
sama~nchan shR^i~NgAraM prathitamupahAraM mahibhuvo
raho rAsaM rAsaM rasati raghunAtho.adhikudharama || 43||
kuTIre vAnIre vidhuvimalanIre susaritaH
sutIre saddhIre shishiritasamIre tR^iNamaye |
virAjan rAjanyo bhuvanakuladhanyo.avanijayA
prapanneShu preShTho dravati raghunAtho.adhikudharam || 44||
kR^ipAdR^iShTyA vR^iShTyA kalitasukhasR^iShTyA trijagatAM
tudaMstApaM pApaM bhavabhayakalApaM kalapadaiH |
bhavAnIjAnIShTo vibudhavinateShTo nijagirA
janAnandasyandaM chyavati raghunAtho.adhikudharam || 45||
|| puShpitAgrA ||
abhinavavanamuktatamAlanIlaM
nigamamanuShvabhigItasaumyashIlam |
janakanR^ipasutAvaraM varArhaM
sharaNamahaM raghunAthamemi bhaktyai || 46||
manasijashatakoTikAmyakAntiM
manasijashatrunisR^iShTashiShTashAntim |
manasijatatataptatApatAntiM
manasijakaM raghunAthamAshrayAmi || 47||
karuNamanasamadbhutasvabhAvaM
praNatajanAvanadIkShamArtarakSham |
raghukulakumudendumIshvareshaM
sharaNamahaM raghunAthamAvrajAmi || 48||
bhavadavadahanena dahyamAno
vipinakarIva karAlakAlakAlyaH |
hariNatR^iShikR^ishaH kulaulyalobhaH
sharaNamaye raghunAthasattaTAgam || 49||
viShayaviShabhuja~NgadaShTasattvo
madanamanorathabhUtakAbhibhUtaH |
maraNabhayata Aturo mumukShuH
sharaNamaye raghunAthagAruDIkam || 50||
jahi jahi raghunAtha vAsanAhiM
na kuru vilambamanAthanAtha kekin |
tvayi khalu vimukhe subAhushatrau
harishishumenamashiShyatIha bhekaH || 51||
nahi mama japayAgayogashakti
rna khalu samAdhividhau cha me pratItiH |
gatadR^isha iva yaShTirArtabandho
tvamasi sadA raghunAtha me.avalambaH || 52||
jagati janimatAmavamAnanADhyaH
shunaka ivAsmi kuTumbato nirastaH |
kalikalilagato yathA jaradgau
khanamahaM raghunAthato.apyapekShe || 53||
guNagaNajaladhe kR^ipaikamUrte
bhuvanapate praNataikakAmapUrte |
raghuvara varaNIyashIlasindho
svajanamimaM raghunAtha pAhyanAtham || 54||
|| upendravajrA ||
tava svabhAvo raghunAtha IdR^i
ggR^ihItarAgA ripavo.api yatra |
na baddhavairo.api dashAnanastvAM
kadApi nindAspadamAtatAna || 55||
na ko.api mitraM nahi ko.api shatru
stavattrilokyAM raghunAtha rAma |
ato jagau shrIkavikokilo.api
muhU ripUNAmapi vatsalaM tvAm || 56||
vahannakekAnpratilomalokAM
stathApi mAtuH payasi spR^ihAvAn |
dhruvaM svabhAvo raghunAtha te.aya
maNoraNIyastvamayaprakAshaH || 57||
samastalokeshvaralokapAlA
yadAj~nayA svaM charitArthayanti |
sa eva gAdheyavashaMvado.abhU
tsa kassvabhAvo raghunAtha chitram || 58||
tvadIyapAdAbjarajo.abhimarshA
dbabhUva pUtA hyaghavatyahalyA |
tathApi pashchAttapase.abhimR^ishya
padaspR^ishe tvaM raghunAtha pApam || 59||
nirAgaso.apyAha vivAsanaM te
pitA samAtrA pariNoditaH san |
tathApi no vivyathiShe na nindAM
chakartha ruShTo raghunAtha mAtuH || 60||
chakAra pApaM jaDadhIrjayanto
bibheda cha~nchvA charaNau kujAyAH |
tathApi no roShavashaM jagantha
kiyAnmR^idustvaM raghunAtha shIlAt || 61||
vihAya rAjyaM suradurlabhaM tvaM
suvarNamAyAmR^igamanvadhAvaH |
na veda yatnAdapi te svabhAvaM
svabhIShTanAkaM raghunAtha vAkam || 62||
babandha paulastyasutAvameho
bhavantamugraiH kila nAgapAshaiH |
bhavAnapImaM prajighAya nAkaM
kiyadvichitraM raghunAthashIlam || 63||
|| indravajrA ||
ye nAma japtvA munayo durantaM
saMsArabandhaM tarasA tudanti |
sa tvaM kathaM shakrajitA nibaddhaH
kIdR^iksvabhAvo raghunAtha te.ayam || 64||
yatpAdapa~NkeruhasevayA vai
sarvaj~natAM yAnti munIndravaryAH |
mUDho yathA shatrumR^iterupAyaM
pR^ichChasyaho shrIraghunAtha mitram || 65||
sItAgatiM bho raghunAtha pR^ichCha
syeNAdikAnaj~navadArtachittaH |
muktiM kathaM rAsi jaTAyuShe vai
kIdR^igvirodhIva tava svabhAvaH || 66||
sUryasya sUryasya hi saurimitraM
viShNoshcha viShNoH kapayaH sahAyAH |
lakShmyAshcha lakShmyAH raghunAtha kaShTaM
sarvaM svabhAvasya sama~njasaM te || 67||
sItA virAjatyatha mAnase te
la~NkAM tathApi prahiNoShi vAtim |
nUnaM laghUnvardhayituM taveShTA
cheShTA vishiShTA raghunAthadR^iShTA || 68||
sa~Nkalpato yasya vira~nchisargo
jAgrajjagatyAM yasha Atanoti |
sa tvaM kathaM shoShayituM samudraM
sandhAtumaichCho raghunAtha bANam || 69||
durvAryakAlo.asti dhanuryadIyaM
saMvatsarAtmA yadamoghabANaH |
sa tvaM kathaM rAkShasanAshanAya
nirdeShTumaikSho raghunAtha kIshAn || 70||
nUnaM svabhAvo raghunAtha te.asau
sa~NkrIDase yallaghubhishcha kIshaiH |
mitre cha sugrIvavibhIShaNau te
putro vayaH shrIhanumAMstvadIyaH || 71||
taM te svabhAvaM parito nishamya
shrutvA tvadIyA~ncha dayAlutAmbho |
tvanniShThachittaH sharaNaM prapadye
tvamAturaM mAM raghunAtha rakSha || 72||
|| upajAtiH ||
yatsachchidAnandavapurbibharShi
svaprItaye shrIraghunAtha ramyam |
tadeva dR^iShTvA pratibimbabhAve
mugdho narInartsi kiyadvichitram || 73||
na modase tvaM padapadmadhUlyA
pApAmahalyAmapi tArayitvA |
chekhidyase vai raghunAtha tatke
pAdaspR^ishe kIdR^igaho svabhAvaH || 74||
vibhajya chApaM tR^iNabha~njamAje
rna vA sma darpaM raghunAtha yAsi |
svayaMvare jAnakijaitramAlAM
gR^ihNAsi namro vinayaH kiyAMste || 75||
kuThArapANeH paruShAkSharANi
svIkR^itya vAkyAni yathAshiShastvam |
na roShamAgAH kR^itapAdapUjo
lokAtigaM te raghunAtha shIlam || 76||
guhaM nigUhanbharatanbhujAbhyAM
chakartha mitraM nanu mitramitraH |
svapAdapAthojamarandatoyaM
kaivartakebhyo raghunAtha rAsi || 77||
chakAra yadyapyahitaM priyAyAH
kAkAyamAno jaDadhIrjayantaH |
tathApi tasmai dadithAsudAnaM
vilakShaNaM te raghunAtha shIlam || 78||
pituH kriyAyAM bharataM niyujya
jaTAyuShaH shrAddhamaho chakartha |
tasmai hyadAH svIyagatiM cha bhaktiM
kIdR^iksvabhAvo raghunAtha te.asau || 79||
ambAtraye jAgR^iti vatsalADhye
yadbhillabhAmAM jananImakArShIH |
idaM hi te shrIraghunAtha nUnaM
divyasvabhAvAnugaNaM charitram || 80||
svayaM samartho.atiratho.api vIraH
sugrIvamukhyAMshcha vibhIShaNaM cha |
chakartha mitrANi nijAnsahAyA
ntadeva te shrIraghunAtha shIlam || 81||
|| indravaMshA ||
taM te svabhAvaM parimR^ishya shatruha
nsaMsArasindhau patito.atipAmaraH |
pApI prapadye tava pAdapallavaM
dInAnukampin raghunAtha rakSha mAm || 82||
yadyapyahaM jAtu jaDo.atijAlmako
mAyApishAchI paribhUtasatvakaH |
kintu tvamapyArtiharo harArchita
stasmAtprapannaM raghunAtha pAhi mAm || 83||
naivAsti mAdR^igbhuvaneShu pAtakI
tvAdR^ichcha naivAsti jagatsvaghApahaH |
ityAvayorbrahmakR^itaM hyananvayaM
trAyasva yatnAdraghunAtha mA tyaja || 84||
jAnannapi svaM duritaikasAgaraM
vAtsalyavArdhi~ncha bhavantamIshvaram |
tyaktvA trapAM tvAM sharaNaM samAshraye
nUnaM vrataM no raghunAtha hAsyase || 85||
yasyAM kR^ipAdevasarityanekashaH
krUrAnnR^ishaMsAnprapunAsi pApinaH |
tasyAM kathaM pApashiromaNiM hi mAM
pUtaM vidhAtuM raghunAtha lajjase || 86||
ekatra garjankalikAlaku~njaro
madbuddhivallIM prasabhaM jighatsati |
anyatra mAmAdhipriyaM pishAchinI
netuM vinAshaM raghunAtha nAthate || 87||
yadyapyahaM krUrakukarmapApa
bhugdaNDyo bhaveyaM nahi nAtha vismayaH |
kintu tvada~Nghrau patitasya pIDayA
lokApavAdo raghunAtha te bhavet || 88||
kAmaM vrajeyaM narakeShvanekadhA
pApachyamAnaH kaTukarmajAgninA |
kintu tvada~NghryambujabhAvanAsavo
mA mAnasAnme raghunAtha hIyatAm || 89||
mA yAhi dUraM patitaM punIhi bho
mA dhehi dhIman janadUShaNaM hR^idi |
mA dehi dInaM kalaye kadAchana
mA pAhi pApaM raghunAtha pAhi mAm || 90||
|| drutavilambitaH ||
marakatAmbujavAridasundaraM
samarakarkashakANDadhanurdharam |
vigatakalmaShadivyaguNAkaraM
tamadhunA raghunAthamahaM bhaje || 91||
kamalalochanamAdhivimochanaM
jalajarochanarochanarochanam |
kudharashochanashochanashochanaM
tamadhunA raghunAthamupAshraye || 92||
paramakAruNikaM karuNArNavaM
navalanIradanIrajavigraham |
dasharathAtmajamAttadhanushsharaM
sharaNadaM raghunAthahaM shraye || 93||
janakajAnanachandrachakorakaM
bharatamAdhiharaM bharatAgrajam |
lalitalakShmaNalAlitalAlasaM
tamanishaM raghunAthamahaM bhaje || 94||
mahitamArutima~njulamAnasaM
mahitamArutima~njulamAnasam |
mahitamArutima~njulamAnasaM
tamanaghaM raghunAthamupabruve || 95||
bhavabhavaM sharaNAgatavatsalaM
bhavabhavaM sharaNAgatavatsalam |
bhavabhavaM sharaNAgatavatsalaM
tamamalaM raghunAthamahaM shraye || 96||
janakajAmahitaM mahitAhitaM
janakajAmahitaM mahitAhitam |
janakajAmahitaM mahitAhitaM
sukhakaraM raghunAthamahaM gR^iNe || 97||
harimahaM raghunAthamimaM bhaje
harimahaM raghunAthamimaM bhaje |
harimahaM raghunAthamimaM bhaje
harimahaM raghunAthamimaM bhaje || 98||
harimayaM raghunAthamupAsmahe
harimayaM raghunAthamupAsmahe |
harimayaM raghunAthamupAsmahe
harimayaM raghunAthamupAsmahe || 99||
|| rathoddhatA ||
nIlaka~njanavaka~njasundaraM
bhImadustarabhavAbdhimandaram |
sarvasadguNamanoj~namandiraM
bhAvayAmi raghunAthamAdarAt || 100||
shAr~NgasAyakaniSha~NgadhAriNaM
satprapannabhavabhItihAriNam |
maithilImahamanovihAriNaM
mAnayAmi raghunAthamanvaham || 101||
tATakAsubhujadarpahAriNaM
kaushikAdhvaravikAsakAriNam |
aishvareNa munidAratAriNaM
taM sadaiva raghunAthamAshraye || 102||
vIramIshvarapinAkabha~njanaM
bhArgavendramadagarvaga~njanam |
jAnakIjayamasheShara~njanaM
rAmameva raghunAthamAdriye || 103||
chitrakUTashuchishailavAsinaM
jAnakIhR^idayasadmakAsinam |
tApasaM harisutaikashAsinaM
rAmamatra raghunAthamemyaham || 104||
jAnakIshamavivaMshabhUShaNaM
bhagnaghorakharamastadUShaNam |
eNanAshanamanarghyapUShaNaM
chintayAmi raghunAthamIshvaram || 105||
shIlatuShTashabarIjaTAyuShaM
bhAvapuShTahanumadvanAyuSham |
rAvaNAntakavibhIShaNAyuShaM
rAmabhadraraghunAthamIDmahe || 106||
rAmabhadracharaNAmbujaM shraye
rAmabhadramanishaM samAdriye |
rAghavendrasuguNAvalIM bruve
rAghavaM cha raghunAthamAhvaye || 107||
rAmachandracharaNAbjaki~NkaraM
jAnakIcharaNachAruchAraNam |
girdharaM giridharaM girApate
darshanena raghunAtha nAthaya || 108||
iti shrIraghunAthasya shatakaM devabhAShayA |
shrIrAmabhadrAchAryeNa gItaM syAttuShTaye shriyaH ||
|| shrIsItArAmArpaNamastu ||

iti shrItulasIpIThAdhIshvarajagadgururAmAnandAchArya\-
svAmirAmabhadrAchAryapraNItaM shrIraghunAthashatakaM sampUrNam |

|| shrIrAghavaH shantanotu ||
##
Encoded and proofread by Vishal Pandey

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}