% Text title : Shrirama Pattabhisheka 1 Gita Press version % File name : shrIrAmapaTTAbhiShekasargaH\_GP.itx % Category : raama % Location : doc\_raama % Proofread by : N Seshadri % Latest update : June 10, 2025 % Send corrections to : sanskrit at cheerful dot c om % % This text is prepared by volunteers and is to be used for personal study % and research. The file is not to be copied or reposted for promotion of % any website or individuals or for commercial purpose without permission. % Please help to maintain respect for volunteer spirit. % \documentstyle[11pt,multicol,itrans]{article} #include=ijag.inc #endwordvowel=.h \portraitwide \parindent=100pt \let\usedvng=\Largedvng % for 1 column \pagenumbering{itrans} \def\engtitle#1{\hrule\medskip\centerline{\LARGE #1}} \def\itxtitle#1{\medskip\centerline{\LARGEdvng #1}\medskip\hrule} \def\endtitles{\medskip\obeyspaceslines} %% \begin{document} \engtitle{.. Shrirama Pattabhisheka 1 ..}## \itxtitle{.. shrIrAma\-paTTAbhiSheka ..}##\endtitles ## || shrIrAma paTTAbhiSheka sargaH || ##Gita Press version## shirasya~njalimAdhAya kaikeyInandivardhanaH | babhAShe bharato jyeShThaM rAmaM satyaparAkramam || 1|| pUjitA mAmikA mAtA dattaM rAjyamidaM mama | taddadAmi punastubhyaM yathA tvamadadA mama || 2|| dhuramekAkinA nyastAM vR^iShabheNa balIyasA | kishoravad guruM bhAraM na voDhumahamutsahe || 3|| vArivegena mahatA bhinnaH seturiva kSharan | durbandhanamidaM manye rAjyachChidramasaMvR^itam || 4|| gatiM khara ivAshvasya haMsasyeva cha vAyasaH | nAnvetumutsahe vIra tava mArgamarindama || 5|| yathA chAropito vR^ikSho jAtashchAntarniveshane | mahAnapi durAroho mahAskandhaH prashAkhavAn || 6|| shIryata puShpito bhUtvA na phalAni pradarshayan | tasya nAnubhavedarthaM yasya hetoH sa ropitaH || 7|| eShopamA mahAbAho tvamarthaM vettumarhasi | yadyasmAn manujendra tvaM bhartA bhR^ityAn na shAdhi hi || 8|| jagadadyAbhiShiktaM tvAmanupashyatu rAghava | pratapantamivAdityaM madhyAhne dIptatejasam || 9|| tUryasa~NghAtanirghoShaiH kA~nchInUpuraniHsvanaiH | madhurairgItashabdaishcha pratibudhyasva sheShva cha || 10|| yAvadAvartate chakraM yAvatI cha vasundharA | tAvat tvamiha lokasya svAmitvamanuvartaya || 11|| bharatasya vachaH shrutvA rAmaH parapura~njayaH | tatheti pratijagrAha niShasAdAsane shubhe || 12|| tataH shatrughnavachanAnnipuNAH shmashruvardhanAH | sukhahastAH sushIghrAshcha rAghavaM paryavArayan || 13|| pUrvaM tu bharate snAte lakShmaNe cha mahAbale | sugrIve vAnarendre cha rAkShasendre vibhIShaNe || 14|| vishodhitajaTaH snAtashchitramAlyAnulepanaH | mahArhavasanopetastasthau tatra shriyA jvalan || 15|| pratikarma cha rAmasya kArayAmAsa vIryavAn | lakShmaNasya cha lakShmIvAnikShvAkukulavardhanaH || 16|| pratikarma cha sItAyAH sarvA dasharathastriyaH | Atmanaiva tadA chakrurmanasvinyo manoharam || 17|| tato vAnarapatnInAM sarvAsAmeva shobhanam | chakAra yatnAt kausalyA prahR^iShTA putravatsalA || 18|| tataH shatrughnavachanAt sumantro nAma sArathiH | yojayitvA.abhichakrAma rathaM sarvA~Ngashobhanam || 19|| agnayarkAmalasa~NkAshaM divyaM dR^iShTvA rathaM sthitam | Aruroha mahAbAhU rAmaH parapura~njayaH || 20|| sugrIvo hanumAnshchaiva mahendrasadR^ishadyutI | snAtau divyanibhairvastrairjagmatuH shubhakuNDalau || 21|| sarvAbharaNajuShTAshcha yayustAH shubhakuNDalAH | sugrIvapatnyaH sItA cha draShTuM nagaramutsukAH || 22|| ayodhyAyAM cha sachivA rAj~no dasharathasya cha | purohitaM puraskR^itya mantrayAmAsurarthavat || 23|| ashoko vijayashchaiva siddhArthashcha samAhitAH | mantrayan rAmavR^id.hdhyarthamR^id.hdhyarthaM nagarasya cha || 24|| sarvamevAbhiShekArthaM jayArhasya mahAtmanaH | kartumarhatha rAmasya yad yanma~NgalapUrvakam || 25|| iti te mantriNaH sarve sandishya cha purohitaH | nagarAnniryayustUrNaM rAmadarshanabuddhayaH || 26|| hariyuktaM sahasrAkSho rathamindra ivAnaghaH | prayayau rathamAsthAya rAmo nagaramuttamam || 27|| jagrAha bharato rashmIn shatrughnashChatramAdade | lakShmaNo vyajanaM tasya mUrdhni saMvIjayaMstadA || 28|| shvetaM cha vAlavyajanaM jagR^ihe paritaH sthitaH | aparaM chandrasa~NkAshaM rAkShasendro vibhIShaNaH || 29|| R^iShisa~NghaistadA.a.akAshe devaishcha samarudgaNaiH | stUyamAnasya rAmasya shushruve madhuradhvaniH || 30|| tataH shatru~njayaM nAma ku~njaraM parvatopamam | Aruroha mahAtejAH sugrIvaH plavagarShabhaH || 31|| nava nAgasahasrANi yayurAsthAya vAnarAH | mAnuShaM vigrahaM kR^itvA sarvAbharaNabhUShitAH || 32|| sha~NkhashabdapraNAdaishcha dundubhInAM cha niHsvanaiH | prayayau puruShavyAghrastAM purIM harmyamAlinIm || 33|| dadR^ishuste samAyAntaM rAghavaM sapuraHsaram | virAjamAnaM vapuShA rathenAtirathaM tadA || 34|| te vardhayitvA kAkutsthaM rAmeNa pratinanditAH | anujagmurmahAtmAnaM bhrAtR^ibhiH parivAritam || 35|| amAtyairbrAhmaNaishchaiva tathA prakR^itibhirvR^itaH | shriyA viruruche rAmo nakShatrairiva chandramAH || 36|| sa purogAmibhistUryaistAlasvastikapANibhiH | pravyAharadbhirmuditairma~NgalAni vR^ito yayau || 37|| akShataM jAtarUpaM cha gAvaH kanyAH sahadvijAH | narA modakahastAshcha rAmasya purato yayuH || 38|| sakhyaM cha rAmaH sugrIve prabhAvaM chAnilAtmaje | vAnarANAM cha tat karma hyAchachakShe.atha mantriNAm || 39|| shrutvA cha vismayaM jagmurayodhyApuravAsinaH | vAnarANAM cha tatkarma rAkShasAnAM cha tad balam | vibhIShaNasya saMyogamAchachakShe.atha mantriNAm || 40|| dyutimAnetadAkhyAya rAmo vAnarasaMyutaH | hR^iShTapuShTajanAkIrNAmayodhyAM pravivesha saH || 41|| tato hyabhyuchChrayan paurAH patAkAshcha gR^ihe gR^ihe | aikShvAkAdhyuShitaM ramyamAsasAda piturgR^iham || 42|| athAbravId rAjaputro bharataM dharmiNAM varam | arthopahitayA vAchA madhuraM raghunandanaH || 43|| piturbhavanamAsAdya pravishya cha mahAtmanaH | kausalyAM cha sumitrAM cha kaikeyImabhivAdya cha || 44|| tachcha madbhavanaM shreShThaM sAshokavanikaM mahat | muktAvaidUryasa~NkIrNaM sugrIvAya nivedaya || 45|| tasya tad vachanaM shrutvA bharataH satyavikramaH | haste gR^ihItvA sugrIvaM pravivesha tamAlayam || 46|| tatastailapradIpAMshcha parya~NkAstaraNAni cha | gR^ihItvA vivishuH kShipraM shatrughnena prachoditAH || 47|| uvAcha cha mahAtejAH sugrIvaM rAghavAnujaH | abhiShekAya rAmasya dUtAnAj~nApaya prabho || 48|| sauvarNAn vAnarendrANAM chaturNAM chaturo ghaTAn | dadau kShipraM sa sugrIvaH sarvaratnavibhUShitAn || 49|| tathA pratyUShasamaye chaturNAM sAgarAmbhasAm | pUrNairghaTaiH pratIkShadhvaM tathA kuruta vAnarAH || 50|| evamuktA mahAtmAno vAnarA vAraNopamAH | utpeturgaganaM shIghraM garuDA iva shIghragAH || 51|| jAmbavAMshcha hanUmAMshcha vegadarshI cha vAnaraH | R^iShabhashchaiva kalashA~njalapUrNAnathAnayan || 52|| nadIshatAnAM pa~nchAnAM jalaM kumbhairupAharan | pUrvAt samudrAt kalashaM jalapUrNamathAnayat || 53|| suSheNaH sattvasampannaH sarvaratnavibhUShitam | R^iShabho dakShiNAttUrNaM samudrAjjalamAnayat || 54|| raktachandanashAkhAbhiH saMvR^itaM kA~nchanaM ghaTam | gavayaH pashchimAt toyamAjahAra mahArNavAt || 55|| ratnakumbhena mahatA shItaM mArutavikramaH | uttarAchcha jalaM shIghraM garuDAnilavikramaH || 56|| AjahAra sa dharmAtmAnilaH sarvaguNAnvitaH | tatastairvAnarashreShThairAnItaM prekShya tajjalam || 57|| abhiShekAya rAmasya shatrughnaH sachivaiH saha | purohitAya shreShThAya suhR^idbhyashcha nyavedayat || 58|| tataH sa prayato vR^iddho vasiShTho brAhmaNaiH saha | rAmaM ratnamaye pIThe sasItaM sa.nnyaveshayat || 59|| vasiShTho vAmadevashcha jAbAliratha kAshyapaH | kAtyAyanaH suyaj~nashcha gautamo vijayastathA || 60|| abhyaShi~nchannaravyAghraM prasannena sugandhinA | salilena sahasrAkShaM vasavo vAsavaM yathA || 61|| R^itvigbhirbrAhmaNaiH pUrvaM kanyAbhirmantribhistathA | yodhaishchaivAbhyaShi~nchaste samprahR^iShTaiH sanaigamaiH || 62|| sarvauShadhirasaishchApi daivatairnabhasi sthitaiH | chaturbhirlokapAlaishcha sarvairdevaishcha sa~NgataiH || 63|| brahmaNA nirmitaM pUrvaM kirITaM ratnashobhitam | abhiShiktaH purA yena manustaM dIptatejasam || 64|| tasyAnvavAye rAjAnaH kramAd yenAbhiShechitAH | sabhAyAM hemaklR^iptAyAM shobhitAyAM mahAdhanaiH || 65|| ratnairnAnAvidhaishchaiva chitritAyAM sushobhanaiH | nAnAratnamaye pIThe kalpayitvA yathAvidhi || 66|| kirITena tataH pashchAd vasiShThena mahAtmanA | R^itvigbhirbhUShaNaishchaiva samayokShyata rAghavaH || 67|| ChatraM tasya cha jagrAha shatrughnaH pANDuraM shubham | shvetaM cha vAlavyajanaM sugrIvo vAnareshvaraH || 68|| aparaM chandrasa~NkAshaM rAkShasendro vibhIShaNaH | mAlAM jvalantIM vapuShA kA~nchanIM shatapuShkarAm || 69|| rAghavAya dadau vAyurvAsavena prachoditaH | sarvaratnasamAyuktaM maNibhishcha vibhUShitam || 70|| muktAhAraM narendrAya dadau shakraprachoditaH | prajagurdevagandharvA nanR^itushchApsarogaNAH || 71|| abhiSheke tadarhasya tadA rAmasya dhImataH | bhUmiH sasyavatI chaiva phalavantashcha pAdapAH || 72|| gandhavanti cha puShpANi babhUvU rAghavotsave | sahasrashatamashvAnAM dhenUnAM cha gavAM tathA || 73|| dadau shatataMvR^iShAn pUrvaM dvijebhyo manujarShabhaH | triMshatkoTIrhiraNyasya brAhmaNebhyo dadau punaH || 74|| nAnAbharaNavastrANi mahArhANi cha rAghavaH | arkarashmipratIkAshAM kA~nchanIM maNivigrahAm || 75|| sugrIvAya srajaM divyAM prAyachChanmanujAdhipaH | vaidUryamayachitre cha chandrarashmivibhUShite || 76|| vAliputrAya dhR^itimAna~NgadAyA~Ngade dadau | maNipravarajuShTaM taM muktAhAramanuttamam || 77|| sItAyai pradadau rAmashchandrarashmisamaprabham | araje vAsasI divye shubhAnyAbharaNAni cha || 78|| avekShamANA vaidehI pradadau vAyusUnave | avamuchyAtmanaH kaNThAddhAraM janakanandinI || 79|| avaikShata harIn sarvAn bhartAraM cha muhurmuhuH | tAmi~Ngitaj~naH samprekShya babhAShe janakAtmajAm || 80|| pradehi subhage hAraM yasya tuShTAsi bhAmini | atha sA vAyuputrAya taM hAramasitekShaNA || 81|| tejo dhR^itiryasho dAkShyaM sAmarthyaM vinayo nayaH | pauruShaM vikramo buddhiryasminnetAni nityadA || 82|| hanUmAnstena hAreNa shushubhe vAnararShabhaH | chandrAMshuchayagaureNa shvetAbhreNa yathAchalaH || 83|| sarve vAnaravR^iddhAshcha ye chAnye vAnarottamAH | vAsobhirbhUShaNaishchaiva yathArhaM pratipUjitAH || 84|| vibhIShaNo.athapi? sugrIvo hanumA~njAmbavAMstathA | sarve vAnaramukhyAshcha rAmeNAkliShTakarmaNA || 85|| yathArhaM pUjitAH sarve kAmai ratnaishcha puShkalaiH | prahR^iShTamanasaH sarve jagmureva yathAgatam || 86|| tato dvividamaindAbhyAM nIlAya cha parantapaH | sarvAn kAmaguNAn vIkShya pradadau vasudhAdhipaH || 87|| dR^iShTvA sarve mahAtmAnastataste vAnararShabhAH | visR^iShTAH pArthivendreNa kiShkindhAM samupAgaman || 88|| sugrIvo vAnarashreShTho dR^iShTvA rAmAbhiShechanam | pUjitashchaiva rAmeNa kiShkindhAM prAvishatpurIm || 89|| vibhIShaNo.api dharmAtmA saha tairnairR^itarShabhaiH | labdhvA kuladhanaM rAjA la~NkAM prAyAnmahAyashAH || 90|| sa rAjyamakhilaM shAsannihatArirmahAyashAH | rAghavaH paramodAraH shashAsa parayA mudA | uvAcha lakShmaNaM rAmo dharmaj~naM dharmavatsalaH || 91|| AtiShTha dharmaj~na mayA sahemAM gAM pUrvarAjAdhyuShitAM balena | tulyaM mayA tvaM pitR^ibhirdhR^itA yA tAM yauvarAjye dhuramudvahasva || 92|| sarvAtmanA paryanunIyamAno yadA na saumitrirupaiti yogam | niyujyamAno bhuvi yauvarAjye tato.abhyaShi~nchad bharataM mahAtmA || 93|| pauNDarIkAshvamedhAbhyAM vAjapeyena chAsakR^it | anyaishcha vividhairyaj~nairayajat pArthivAtmajaH || 94|| rAjyaM dashasahasrANi prApya varShANi rAghavaH | shatAshvamedhAnAjahre sadashvAn bhUridakShiNAn || 95|| AjAnulambibAhuH sa mahAvakShAH pratApavAn | lakShmaNAnucharo rAmaH shashAsa pR^ithivImimAm || 96|| rAghavashchApi dharmAtmA prApya rAjyamanuttamam | Ije bahuvidhairyaj~naiH sasuhR^ijj~nAtibAndhavaH || 97|| na paryadevanvidhavA na cha vyAlakR^itaM bhayam | na vyAdhijaM bhayaM chAsId rAme rAjyaM prashAsati || 98|| nirdasyurabhavalloko nAnarthaM ka~njidaspR^ishat | na cha sma vR^iddhA bAlAnAM pretakAryANi kurvate || 99|| sarvaM muditamevAsI tsarvo dharmaparo.abhavat | rAmamevAnupashyanto nAbhyahiMsan parasparam || 100|| Asan varShasahasrANi tathA putrasahasriNaH | nirAmayA vishokAshcha rAme rAjyaM prashAsati || 101|| rAmo rAmo rAma iti prajAnAmabhavan kathAH | rAmabhUtaM jagadabhUd rAme rAjyaM prashAsati || 102|| nityamUlA nityaphalAstaravastatra puShpitAH | kAmavarShI cha parjanyaH sukhasparshashcha mArutaH || 103|| brAhmaNAH kShatriyA vaishyAH shUdrA lobhavivarjitAH | svakarmasu pravartante tuShTAH svaireva karmabhiH || 104|| Asan prajA dharmaparA rAme shAsati nAnR^itAH | sarve lakShaNasampannAH sarve dharmaparAyaNAH || 105|| dashavarShasahasrANi dashavarShashatAni cha | bhrAtR^ibhiH sahitaH shrImAn rAmo rAjyamakArayat || 106|| rAmAyaNa phalashruti dharmyaM yashasyamAyuShyaM rAj~nAM cha vijayAvaham | AdikAvyamidaM chArShaM purA vAlmIkinA kR^itam || 107|| yaH shR^iNoti sadA loke naraH pApAt pramuchyate | putrakAmashcha putrAn vai dhanakAmo dhanAni cha || 108|| labhate manujo loke shrutvA rAmAbhiShechanam | mahIM vijayate rAjA ripUMshchApyadhitiShThati || 109|| rAghaveNa yathA mAtA sumitrA lakShmaNena cha | bharatene cha kaikeyI jIvaputrAstathA striyaH || 110|| bhaviShyanti sadAnandAH putrapautrasamanvitAH | shrutvA rAmAyaNamidaM dIrghamAyushcha vindati || 111|| rAmasya vijayaM chemaM sarvamakliShTakarmaNaH | shR^iNoti ya idaM kAvyaM purA vAlmIkinA kR^itam || 112|| shraddadhAno jitakrodho durgANyatitaratyasau | samAgamya pravAsAnte ramante saha bAndhavaiH || 113|| shR^iNvanti ya idaM kAvyaM purA vAlmIkinA kR^itam | te prArthitAn varAn sarvAMrvAn prApnuvantIha rAghavAt || 114|| shravaNena surAH sarve prIyante samprashR^iNvatAm | vinAyakAshcha shAmyanti gR^ihe tiShThanti yasya vai || 115|| vijayeta mahIM rAjA pravAsI svastimAn bhavet | striyo rajasvalAH shrutvA putrAn sUyuranuttamAn || 116|| pUjayaMshcha paThaMshchainamitihAsaM purAtanam | sarvapApaiH pramuchyeta dIrghamAyuravApnuyAt || 117|| praNamya shirasA nityaM shrotavyaM kShatriyairdvijAt | aishvaryaM putralAbhashcha bhaviShyati na saMshayaH || 118|| rAmAyaNamidaM kR^itsnaM shR^iNvataH paThataH sadA | prIyate satataM rAmaH sa hi viShNuH sanAtanaH || 119|| Adidevo mahAbAhurharirnArAyaNaH prabhuH | sAkShAdrAmo raghushreShThaH sheSho lakShmaNa uchyate || 120|| evametat purAvR^ittamAkhyAnaM bhadramastu vaH | pravyAharata visrabdhaM balaM viShNoH pravardhatAm || 121|| devAshcha sarve tuShyanti grahaNAchChravaNAt tathA | rAmAyaNasya shravaNe tR^ipyanti pitaraH sadA || 122|| bhaktyA rAmasya ye chemAM saMhitAmR^iShiNA kR^itAm | ye likhantIha cha narAsteShAM vAsastriviShTape || 123|| kuTumbavR^iddhiM dhanadhAnyavR^iddhiM striyashcha mukhyAH sukhamuttamaM cha | shR^itvA shubhaM kAvyamidaM mahArthaM prApnoti sarvAn bhuvi chArthasiddhim || 124|| AyuShyamArogyakaraM yashasyaM saubhrAtR^ikaM buddhikaraM shubhaM cha | shrotavyametanniyamena sadbhi\- rAkhyAnamojaskaramR^iddhikAmaiH || 125|| || ityArShe shrImadrAmAyaNe vAlmIkIye AdikAvye yuddhakANDe shrIrAmapaTTAbhiSheko nAma aShTAviMshatyadhikashatatamaH sargaH || ## Proofread by N Seshadri In some prints, the adhyAya numbering divisions are different (131 vs 128). \medskip\hrule\obeylines Please send corrections to sanskrit@cheerful.com Last updated \today https://sanskritdocuments.org \end{document}