% Text title            : Ishvaraproktam 2 Shivalinge Pushpapatrarpanopadesham
% File name             : IshvaraproktaM2shivalingepuShpapatrArpaNopadesham.itx
% Category              : shiva, shivarahasya, upadesha, advice
% Location              : doc\_shiva
% Transliterated by     : Ruma Dewan
% Proofread by          : Ruma Dewan
% Description/comments  : shrIshivarahasyam | mahAdevAkhyaH ekAdashamAMshaH | adhyAyaH 9 puShpAdhyAyaH | 57\-81||
% Latest update         : October 29, 2024
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Ishvaraproktam 2 Shivalinge Pushpapatrarpanopadesham ..}##
\itxtitle{.. IshvaraproktaM 2 shivali~Nge puShpapatrArpaNopadesham ..}##\endtitles ##
(shivarahasyAntargate mahAdevAkhye)

\- shivagaurIsaMvAde \-

Ishvara uvAcha |

bilvApAmArgajAjItulasishamibR^ihatkAnakaM bhR^i~NgadUrvA\-
mandAmbhojAhidarbhAmunitilakatagArabrahmakatvAramallI |
chApAshvArAtikumbhIdamanamaruvakAbilvatohAnishastA\-
triMshatryekAryarIshodadhinidhivasubhabhUyamAbhUyayeva || 57||
yattatparyuShitaM na chaiva kalitaM vR^intairvihInaM shive
durgandhAdyupahantR^iketakamahApadmAdi nArchyaM shive |
ChitvA naiva nipAtayetsumamupe sampUrNamevArchayet
sauvarNeShu cha ratnagarbhakali te no paryuShitatve vidhiH || 58||
svArAmodbhavameva puShpamagaje matpUjanArhaM bhavet
no vA shUdrakalabdhamAhatamadho yAtyeva tatpUjanAt |
bhUmau vA patitairapi spR^ishati chetsnAnAdihIno naraH
puShpeShvevamayaM vidhirbhavati me no bilvapatrottame || 59||
shukrAkhya patraM cha kapittha patraM
nirguNDikAvAraNabilvapatram |
pa~nachaiva bilvAni mameshi pUjane
prashastarUpaM priyameva bilvam || 60||
vasudhArAdhipa mitrapAdapUjyA
vasudhAdhR^igvarahArapAdasArAH |
sakR^idAragvadhapuShpato.archya li~Nge
sakalaprANivadhotthapApamuktAH || 61||
gaurIyallakali~NgapUjanaratomallIbhirevAMdayaM\-
mallIbhirniyamena mallayarato gallasya vAdyaM charan |
hallIlAsyalayAnugau mama kR^ipAvallI prarohaM gatA
tasminneva samullasatyanudinaM sallApatastasya hi || 62||
pAribhadrasumapUjayA shive\-
vIrabhadragaNapopamalIlaH |
bhadrameva labhate jitatandro
rudra eva sa bhavenna daridraH || 63||
shive marubakairbakairapi tathaiva sachchampakai\-
stathA kuravabakairdhavaiHkanakanAgapunnAgakaiH |
samarchya shivamaMhasA pravararAshipAra~Ngato
jano bhavati muktibhAgatulatu~Ngali~Nge mama || 64||
kadalIphalapuShpapUjayA
dalitAnyeva bhavanti pAtakAni |
dalitAnyatha tasya duHkhajAlA\-
nyamitAnyapyatha satyameva gauri || 65||
kushakAshasamarchako yadi syA\-
nmayi bhakto.ambarakeshali~Ngake me |
yamapAshakashAbhighAtaduHkhaM
na bhavejjAtu kadAchidasya gauri || 66||
bhUtAsvapAmArgadalaiH samarchya
li~NgaM mamA~NgaM vishate sa dhanyaH |
kaniShThajanmApi sa garbhaduHkhaM\-
naivApnuyAjjAtu sudarbhato.archya || 67||
jitaiNamadasaurabhairasamabilvapuShpairdalaiH
susaurabhasumaiH shive navavasantakAlotthitaiH |
jano jani vivarjitAM gatimupaiti bhAgyodayai\-
rnishAsu varaketakIkusumapUjakodhanyadhIH || 68||
yaH puNDarIkakusumairnavachandrakhaNDa\-
lIlAlakAvalitali~NgasupUjakashchet |
AkhaNDalAdimukhavanditapAdapITha\-
shchaNDAMshujAtavadanaM na sa jAtu pashyet || 69||
kamalairamalairmaheshali~NgaM
shatapatraiHshatapatramitranetram |
paripUjya labhetkalatraputraM
makhasatrAdadhikAM tu puNyavR^iddhim || 70||
bimbAbhadADimakadambakadambapuShpai\-
rambApateH priyatamottamachAruli~Ngam |
vR^indAravR^indavaranAyakamaulivandyo
bandhAdvimuktimupayAti na pApagandham || 71||
atasItulasIbhirIshali~NgaM
kumudairapyamadairmudA bhavAni |
sakR^idIshvara pUjya vanya puShpaiH
yadi sAmAnya naro bhavetsa dhanyaH || 72||
arkadvayaM cha karavIramunIndrapuShpai\-
dhAtrI pavitrasumairvarajAtikAbhiH |
droNaishcha nandikusumairasamaiH kadambaiH
shevantikAtrayamume paripUjya dhanyaH || 73||
jAtena kiM tena hi pArijAta\-
pUjArataM yasya na mAnasaM syAt |
mando.api mandAra sumaM samarpya
vAchaspatiM dhikkurute sabhAsu || 74||
shamIkusumapUjayA sumasharArili~Nge shive
sharAririvanIrago.apyuragavairivegAtigaH |
bhavesuchirasambhR^itairaghasahasrakairAvR^ito\-
.apyanAratamanusmaret shamanajAtabhItyujjhitaH || 75||
sauvarNavarNasamadivyasukarNikAraiH
sampUjya li~Ngamagaje sakalo.api varNaH |
parvaNyapi prathitadopahara pradoShe\-
.aparNApateH priyataro gaNapaH sa tUrNam || 76||
sitAsitasupATalIpaTalapuShpasampUjayA
sa pATayati pAtakadrumasahasrameva drutam |
sa sa~NkaTakulaM sadA na hi kadApi pashyennaraH
sakaNTakapathaM shide yamabhaTorudaNDAhataH || 77||
IShachChirIShakusumairmamali~Ngamaulau
(IshA)eSho.anuraktahR^idayaHsuvisheShayechchet |
hitvAghasa~Nghamagaje gaNapu~Ngavendro
bhadrANi so.adya(devi) labhate sa surendravandyaH || 78||
utphullahallakusumairmR^igabAlapANi\-
li~NgArchanena kalayenna sa jAtu kAlam |
ra~Nko.apyasau bhavati sarvadharAdhinAtha\-
vandyA~NghriyugmanakhachandraruchirbhavAni || 79||
mandArAmbujamallikAvirachitAM mAlAM cha nIlotpalaiH
yuktAM yaH pradadAti sha~NkaramahAli~Nge sahasraiH kR^itAm |
tasyArdhArdhasusa~NkhyayA suvihitA syAtprItaye muktida (syAdbhuktimuktipradA)
muktApuShpasamarchanAdapi sadA samprItaye me (matprItaye sA) parA || 80||
puShpAdhyAyamidaM sadaiva hR^idaye dhAryaM hi varyaiH sadA
kAryaM syAnmama pUjanaM suvihitaM vIryonnataiH shailaje |
garvaM chApyapahR^itya dhairyaparamairhastArchitaiH pAvanai\-
rarchyo.ahaM bhuvi sAdaraM sumagaNairhIno bhavetpAtakaiH || 81||

|| iti shivarahasyAntargate IshvaraproktaM shivali~Nge puShpapatrArpaNopadeshaM 2 sampUrNam ||

\- || shrIshivarahasyam | mahAdevAkhyaH ekAdashamAMshaH | adhyAyaH 9 puShpAdhyAyaH | 57\.81||
##
- .. shrIshivarahasyam . mahAdevAkhyaH ekAdashamAMshaH . adhyAyaH 9 puShpAdhyAyaH . 57.81..

Notes:

Śiva ##shiva## delivers Upadeśa ##upadesha## to Devī ##devI## about the various flowers i.e. Puśpa ##puShpa## and Leaves i.e. Patra ##patra## etc. to be used for offering to Śivaliṅga ##shivali~Nga##.##

##
Proofread by Ruma Dewan

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}