% Text title            : Ishvaraproktam Shivalingarchanavidhyupadesham 2
% File name             : IshvaraproktaMshivalingArchanavidhyupadesham2.itx
% Category              : shiva, pUjA, upadesha, advice, shivarahasya
% Location              : doc\_shiva
% Transliterated by     : Ruma Dewan
% Proofread by          : Ruma Dewan
% Description/comments  : shrIshivarahasyam | IshvarAkhyaH dashamAMshaH | adhyAyaH 46 | 1-65||
% Latest update         : September 8, 2024
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Ishvaraproktam Shivalingarchanavidhyupadesham 2 ..}##
\itxtitle{.. IshvaraproktaM shivali~NgArchanavidhyupadesham 2 ..}##\endtitles ##
(shivarahasyAntargate IshvarAkhye)

\- shivagaurIsaMvAde \-

IshvaraH (uvAcha)
ataH paraM pravakShyAmi nityanaimittike phalam |
kAlaM li~NgavisheShaM cha brahmakShatravishAM tathA || 1||
AshramANAM cha sarveShAM eSha li~NgArchane vidhiH |
nityali~NgArchana shastaM dhAtusphaTikasambhavam || 2||
bANali~NgaM mArakataM rasendrakakR^itaM shive |
pArthivaM kAmadaM j~neyaM sarvakarmasu shobhane || 3||
na yasya shivali~NgArchA gR^ihe bhavati sha~Nkari |
sa nityasUtakI j~neyo brAhmaNo vAntyajo.api vA || 4||
bANali~NgaM na yasyAsti gR^ihe bilvAdipUjitam |
tadgR^ihe jalamalpaM vA na peyaM sarvathA budhaiH || 5||
ekakAlaM dvikAlaM vA trikAlaM nityameva vA |
ye.archayantyeva niyataM mama li~NgaM maheshvari || 6||
te vai gaNendrA vij~neyA mama toShapradAH shive |
pradoSheShu visheSheNa yaH pUjayati sha~Nkaram || 7||
sa mahApAtakairmukto bhaviShyati na saMshayaH |
R^iNadAridryanAshAya pradoShe pUjayechChivam || 8||
ghR^itAbhiShekaM kurvIta kuryAtpaladashena(dashapalena) vai |
utpalairbilvapatraishcha pUjanIyo maheshvaraH || 9||
somavAre.archane shambhornaktamAyuShyavardhanam |
kShIreNa snApayeddevaM kapilAsambhavena vA || 10||
kamalairbilvapatraishcha pUjanIyo bhavo mune |
chaturdashyAM nishIyinyAmapAmArgaushcha bilvakaiH || 11||
pUjayelli~NgamekAgro dadhnA saMsnApayechChuchiH |
kAlAShTamyAM kAlakAlamarchayenniyatavrataH || 12||
madhunA snApya deveshaM bilvapatraiH prapUjayet |
bodhAyanoktavidhinA sarvanaktavrataM shive || 13||
tatrAvAhanapUjAM cha pravakShyAmi shive tava |
yathAbhiruchire(te) li~Nge dhAtuje sphATike.api vA || 14||
bANe(NaM) rasendrakalite(taM) tathA marakatodbhavam |
sthApya pIThe ra~NgavallImaNDite chopalepite || 15||
bhUmau naktavrato maunI snAtvA bhasmatripuNDradhR^ik |
rudrAkShamAlAbharaNo japetpa~nchAkSharaM manum || 16||
kare karatale chaiva hR^idaye cha nyasedbudhaH |
dhyAyettatra mahAdevaM pUjAdau japakarmaNi || 17||
mUle kalpadrumasya drutakanakanibhaM hemasihmAsanasthaM
vAmA~NkArUDhagaurInibiDakuchabharAbhogagADhopagUDham |
sarvAla~NkAradIptaM varaparashumR^igAbhItihastaM triNetraM
vande chandrArdhachUDaM guhagaNapashivAshliShTapArshvaM mahesham || 18\-19||
dhyAtvaivaM mUlamantraM tu japedaShTottaraM shatam |
sodakaM kalashaM pUjya gandhapuShpAkShatairyutam || 20||
kalashasya mukhe viShNuH kaNThe rudraH samAshritaH |
mUle chAsya sthito brahmA madhye mAtR^igaNAH sthitAH || 21||
kukShau tu sAgarAH sarve  kalashasya(shAmbu) samAshritAH |
Ayantu shivapUjArthaM duritakShayakArakAH || 22||
evaM kalashamabhyarchya pashchAchCha~NkhaM samarchayet |
tvaM purA sAgarotpanno viShNunA vidhR^itaH kare || 23||
pUjitassarvadevaishcha pA~nchajanya namo.astute |
tataH sha~NkhasthatoyaM tu samantAt paritaH kShipet || 24||
ga~Nge cha yamune cheti kalashasya jalaM spR^ishet |
pIThapUjAM tataH kuryAdguruM gaNapatiM tathA || 25||
dakShavAme tathAdhArashaktiM cha prakR^itiM parAm |
anantaM pR^ithivIM chaiva kailAsaM ratnamaNTapam || 26||
kalpavR^ikShaM ratnavarasihmAsanamanuttamam |
shvetachChatraM chAmaraM cha prAgAdikramayogataH || 27||
dharmaj~nAnAdivairAgyaishvaryaM cha prAksamarchayet |
adharmaM cha tathA.aj~nAnamavairAgyamanaishvaram || 28||
dakShiNe pUjayedetAn satyaM chaiva rajastamaH |
mAyAM vidyAM cha vahni cha arkasaumau tathaiva cha || 29||
AtmAnaM cha j~nAnapadme prAgAdidalake yajet |
vAmAM jyeShThAM tathA raudrI kAlIM kalavikAriNIm || 30||
balAM balapramAthAM cha sarvabhUtadamanyakAm |
manonmanIM tathaivAntyAM pUjayetsAkShatAdibhiH || 31||
AvAhya kShaNike li~Nge pArthive dhAtuje.athavA |
vANavarjaM rasendre vA sphATike ratnajeShu vA || 32||
sAkShataM cha sapuShpaM tu gR^ihya svahR^idayAntare |
dhyAyedevaM virUpAkShaM nimIlyAkShINi sattama || 33||
vande maheshaM surasiddhasevitaM
suradrumaiH pUjita pAdapadmam |
vidyApradaM bhaktajanaishcha sevitaM
dhyAyetsadA sAmbashivaM prasannam || 34||
sarvAdhAre dhare devi pUjArthaM sha~Nkarasya hi |
sthAnaM dehi mahAdevi pUjitA bhava me sadA || 35||
ityakShatAbhiH sampUjya ghaNTAmAtADayettataH |
AgamArthaM tu devasya gamanArthaM tu rakShasAm || 36||
ghaNTAnAdaM karomyadya tena prIto bhavechChivaH |
li~NgaM pIThe cha saMsthApya devyA saha tato yajet || 37||
sapuShpaM sAkShataM gR^ihya prArthayeta maheshvaram |
ArAdhito manuShyaistvaM siddhairdevAsurAdibhiH || 38||
ArAdhayAmi shaktyA ttvaM gR^ihANa parameshvara |
AtvAvahaM tvanIshAnte sodakenAbhiShechayet || 39||
madhuparkaM tato dadyAt mUlenaiva tadA mune |
ApyAyasveti cha kShIraM dadhikrAvNeti vai dadhi || 40||
ghR^itaM mimikSheti ghR^itaM madhuvAtetivai madhu |
svAdaH pavasveti sitAM nArikelajalaM tathA || 41||
rambhApAnasa AmrAdijambIraikShurasairapi |
ShaDakShareNa saMsnApya gandharatnasumAmbubhiH || 42||
abhiShichya tato nyasya andhasaspatayetyapi |
kurvItAnnAbhiShekAntaM tannirvartya sushItalaiH || 43||
dhArApAtragatAmbhobhiravichChinnAmbudhArayA |
goshR^i~Ngairapi vA samyagrudrAvR^ittyA.abhiShechayet || 44||
ekavAraM trivAraM vA tathaikAdashinImapi |
saMsnApyAsAdya pIThe cha vAsashchaivopavItakam || 45||
dadyAt triyambakenaiva bhUtiM gandhAkShatAMstathA |
uttAnairuttarAgraishcha bilvaiH sa~NkShAlitairyajet || 46||
mAlAbhiH kusumaishchaiva shatAShTottaranAmabhiH |
bhavAyeti tathaivAShTau nidhanetyAdibhistathA || 47||
dhUpaM dIpaM cha naivedyaM tAmbUlaM cha visheShataH |
devIpArshve yajechChambhoH vAme dakShe.athavA mune || 48||
devImantreNAbhiShichya gandhadhUpAdivAsasA |
pUjayelli~NgapArshve tu skandaM cha gaNapaM tathA || 49||
nIrAjayettato li~Nge devIM skandavinAyakau |
kAMsyavAditraninadairghoShayechChivamandiram || 50||
pradakShiNAtrayaM kR^itvA namaskArAdipa~nchakam |
ShaDakShareNa mantreNa kurvIta munisattama || 51||
ChatraM cha chAmare divye vyajanAdarshakaM tataH |
nR^ittaM gItaM tathA vAdyaM pradadyAnmUlamantrataH || 52||
stotrametat paThedvidvAn vedatrayagataM dvija |
namo nAthAtmane tubhyaM namo bindukalAtmane || 53||
ali~Ngali~NgarUpAya rUpAtItAya te namaH |
tvaM mAtA sarvalokAnAM tvameva jagatAM pitA || 54||
tvaM bhrAtA tvaM suhanmitraM tvameva prapitAmahaH |
namaH sadyAya devAya namastatpuruShAya cha || 55||
aghorAya namaste.astu vAmadevAya te namaH |
IshAnAya namaste.astu devadevAya te namaH || 56||
sharvAya kShitirUpAya shuddhamAtrAya te namaH |
namaH pashUnAM pataye pAvakAyAmitaujase || 57||
bhImAya vAksvarUpAya shabdarUpAya te namaH |
mahAdevAya somAya amR^itAya namo namaH || 58||
ugrAya yajamAnAya namo.astvAkAshamUrtaye |
tvadaShTamUrtibhirvyAptaM jagatsarvaM charAcharam || 59||
mayA j~nAnataH shambho yatkR^itaM pUjanaM tava |
tatkShamasva mahAdeva sharaNAgatavatsala || 60||
iti stutvA japenmantraM ShaDakSharamatandritaH |
nyAsaM di~NmochanaM kR^itvA sha~NkhatoyaM bhrameta cha || 61||
tenaiva prokShayeddehaM nirmAlyAmbu pibet tridhA |
eka kAlaM dvikAlaM vA trikAlaM vA yathA balam || 62||
aShTamyAM somavAreShu pradoShe doShavarjite |
chaturdashyAM tathA naktaM nityanaimittike.api cha || 63||
grahaNe viShuve chaiva pUjeyaM kathitA tava |
nAsti shambhoH pUjanena sadR^ishaM karma pAvanam || 64||
pUjayA bhogamokShau cha sidhyataH kiM bahUktitaH |
uttu~NgamAta~Ngatura~Ngapa~NktiH
syAttu~Ngali~NgArchakagehaniShThA |
dhanaM cha dhAnyaM varavastraratna\-
bhogAMshcha labdhveha vimuktimante || 65||

|| iti shivarahasyAntargate IshvaraproktaM shivali~NgArchanavidhyupadeshaM 2 sampUrNam ||

\- || shrIshivarahasyam | IshvarAkhyaH dashamAMshaH | adhyAyaH 46 | 1\-65||
##
- .. shrIshivarahasyam . IshvarAkhyaH dashamAMshaH . adhyAyaH 46 . 1-65..

Notes:
Śiva ##shiva## describes the procedures of worshipping Him through Śivaliṅga ##shivali~Nga## made of various materials, using various Dravya ##dravya##; especially during Pradoṣa ##pradoSha##, Somavāra ##somavAra##, Night of Caturdashī ##chaturdashI##, KālāAṣṭami ##kAlAShTamI##, Grahaṇa ##grahaNa##, Viṣuva ##viShuva## etc.

Proofread by Ruma Dewan 

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}