% Text title            : Ishvaraproktam Shivaratripujavratakathanam
% File name             : IshvaraproktaMshivarAtripUjAvratakathanam.itx
% Category              : shiva, shivarahasya, pUjA
% Location              : doc\_shiva
% Transliterated by     : Ruma Dewan
% Proofread by          : Ruma Dewan
% Description/comments  : shrIshivarahasyam | mahAdevAkhyaH ekAdashamAMshaH | adhyAyaH 32 shivarAtripUjAvratakathanam | 24.2-80||
% Latest update         : October 29, 2024
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Ishvaraproktam Shivaratripujavratakathanam ..}##
\itxtitle{.. IshvaraproktaM shivarAtripUjAvratakathanam ..}##\endtitles ##
(shivarahasyAntargate mahAdevAkhye)

\- shivapArvatIsaMvAde \-

devyuvAcha |

shivarAtryAM mahAdeva kathamarchanti sAdhakAH || 24||
ko vidhistasya niyamastatsarvaM vada me vibho |

maheshvara uvAcha |

kathayAmi vidhiM te.adya shivarAtrisamarchane || 25||
shR^iNvaparNo na prakAshyaM rahasyaM paramaM mama |
sthAvare vA chare vApi mR^idbANasphaTike.api vA || 26||
dhAtuje vA yathA joShaM pUjAM yAmachatuShTaye |
sampAdya pUjAsAmagrI shivakShetre gR^ihe.api vA || 27||
prAtaH kR^ityaM cha nirvartya duShTAlApavivarjitaH |
snAtvA nadyAM taDAge vA dhautavastradharaH shuchiH || 28||
sitabhasmatripuNDrA~Nko rudrAkShAdhAraNAnvitaH |
gAM gomayenopalipya ra~NgavalyAdimaNDitAm || 29||
vitAnamaNTapairyuktAM vedikAstaraNAvR^itAm |
kalpayetpIThamutkR^iShTaM samAsInaH kushAsane || 30||
pa~nchAmR^itaM phalarasaM pa~nchagavyaM sumAnyapi |
bilvapadmArkakalhAranavanIlotpalAni cha || 31||
damanoshIrakAdIni sampAdyAmbu cha chandanam |
dhUpadIpau phalAnIshe vAgyato havireva cha || 32||
tAmbUlaM cha suvAsAMsi sampAdya niyamAnvitaH |
Achamya prANAnAyamya japetpa~nchAkSharaM shive || 33||
sA~NganyAsaM sahasraM me yAme yAme.atha pUjakaH |
dhyAyeddevaM virUpAkShaM shivarAtryAM shivArchakaH || 34||
\- \- (shivadhyAnam) \- \-

devaM nityaM maheshaM rajatagirivasaM chAruchandrAvataMsaM
ratnA.a.akalpojjavalA~NgaM parashumR^igavarAbhItihastAntara~Ngam |
padmAsInaM sahAmbaM vR^itagaNapagaNairvyAghrakR^ittiM vasAnaM
vishvAdyaM vishvavandyaM nikhilabhayaharaM sarvapApApahAram || 35||
\- \-

dhyAtvA vA dya mahAli~Nge sa puShpA~njalimIshvari |
pAdyArghyAchamanAdIni dadyAtpa~nchAkShareNa hi || 36||
pa~nchAmR^itaiH pa~nchagavyaiH shive phalarasairapi |
gandhapuShpakushAmbUni dadyAdrudreNa bhAmini || 37||
ghR^itadIpAvaliM dadyAt dhUpaM guggulusaMyutam |
kuryAddhArAbhiShekaM me rudraikAdashasa~NkhyayA || 38||
tauryatrikaistadA devi shivarAtryAM shive mudA |
sa kUrchaistarpayedante bhavAyetyaShTanAmAbhiH || 39||
ki~nchiddatvA.atha naivedyaM parimR^ijyAtha vAsasA |
pIThe saMsthApya deveshaM gandhapuShpAkShatairyajet || 40||
bhasmanA bilvakusumairmallikAbhirmaheshvari |
bhUShaNairbhUShayedIshaM padmakalhArachampakaiH || 41||
mandAraiH ketakaishchaiva(?) tathA damanakAdibhiH |
shatAShTanAmabhirvApi nAmasAhasrato.api vA || 42||
mUrtayo.aShTau shivasyaitAH pUrvadikkramayogataH |
pUjayetskandanandIshau gaNachaNDeshvarAdikAn || 43||
umAM cha bhavapArshve cha pUjayedupachArakaiH |
\- \- (aShTamUrti shivastutiH) \- \-
sharvAya kShitirUpAya bhavAya jalamUrtaye || 44||
rudrAya tejorUpAya ugrAya pavanAtmane |
bhImAyAkAsharUpAya yAjyAya pashupAya cha || 45||
mahAdevAya somAya yaShTre sUryAtmane namaH |
\- \-
iti sampUjya deveshamaShTamUrtiM pinAkinam || 46||
gaNeshaM bhairavaM durgAM skandanandIshvarAvubhau |
chaNDeshaM cha gaNeshaM cha tattanmantrairyajechChive || 47||
mUlamantreNa tAM shaktiM gandhapuShpAkShatAdibhiH |
dhUpaM dIpaM tato dadyAnnaivedyaM bhakShyabhojyakam || 48||
tAmbUlaM phalajAlaM cha pAnIyaM mukhavAsakam |
nIrAjanaM tato dadyAchChatasAhasravartikam || 49||
chAmaraM darpaNaM ChatraM vitAnaM dhvajameva cha |
vyajanaM bhAjanaM devi dadyAdvittamava~nchayan || 50||
nametpradakShiNAM stotraM R^iksAmAtharvayAjuShaiH |
kuryAnnR^ittaM gItavAdyaM vINAveNumR^ida~NgakAn || 51||
nivedayitvA devAya stotrametatpaThennaraH || 52||
\- \- (shivastutiH) \- \-

vishvAdhika tridashanAyaka devadeva
vandAruvanditapadAbja mahesha sharva |
pAhyambayA shashikalAmalachArumaule
mAmAshu lokaya bhavAmbudhivIchilagnam || 53||
vishvesha vishvajanakAvyaya somadhAman
bhUmAva sharva mahimAgama vAmadeva |
kAmA~NganAshana garAshana kAlakAla
mAM pAhi saMsR^itijagadgatamAshu deva || 54||
kandarpadarpahara sarpavishobhitA~Nga
gartAsanastha gajacharmaparItadeha |
kartA tvameva jagatAM paramesha hartA
pAtA tvamIsha paripAhi bhavAbdhimagnam || 55||
he vishvanAtha gaNanAtha sumanmathAre
mannAtha nAshitamahAghachayenduchUDa |
pAhIsha mAmakadhiyA bhavapAshalagnaM
magnaM mahAbhava samudrasupa~NkilaM mAm || 56||
tryakShAkShayyaphalapradAya vibho dakShAdidIkShApaha
ukShordhvA~NgagatAmitAbhayahara vIkShaikadagdhAsura |
kakShAdisthita pakShapAtasadR^ishA saMvIkSha mAmIshvara
pakShIndrapriyavAhapUjitapada pratyakShamuktiprada || 57||
\- \-

itthaM yAmachaturShvevaM saMstuvIta maheshvaram |
pratyekamarghyaM dadyAdvai sapuShpAmbuvimishritam || 58||
\- \- (kShamAprArthanA) \- \-

namaH shivAya shAntAya sarvapApaharAya cha |
shivarAtrau mayA dattamarghyaM prItikR^idastu te || 59||
mayA kR^itAnyanekAni pAtakAni cha sha~Nkara |
gR^ihANArghyamumAkAnta shivarAtrau prasIda me || 60||
duHkhadAridryabhAraishcha dagdhau.ahaM pArvatIpate |
mamArghyadAnAtsuprItaH sukhinaM kuru sha~Nkara || 61||
mayA kR^itAnyaghaughAni hara sha~Nkara shaM kuru |
shivarAtrau dadAmyarghyaM shivarAtrau prasIda me || 62||
pratipraharamevaM syAdarghyaM datvA vichakShaNaH |
daNDavatpraNato bhUtvA tato devaM kShamApayet || 63||
a~NgahInaM kriyAhInaM vidhihInaM maheshvara |
pUjito.asi mayA deva tatkShamasva ghR^iNAnidhe || 64||
yachchApyupahataiH puShpairashastairbhAvadUShitaiH |
keshakITApaviddhaishcha pUjito.asi mayA prabho || 65||
anyatrAsaktachittena kriyahInatayA vibho |
nidrAtandrAhR^itA~Ngena kShutkShAmaphalabhakShaNaiH || 66||
tAmasena cha bhAvena hInamantrAkShareNa cha |
pUjito.asi mayA deva tatsarvaM kShamyatAM mama || 67||
vrataM sampUrNatAM yAtu phalaM chAkShayyamastu me |

\- \-

evaM stutvA namaskR^itya pUjAsthAnaM visarjayet || 68||
naivedyAdi cha tatsarvaM bhasmA~NgAya nivedayet |
paredyuH kR^itakarmAtha sampUjya shivamavyayam || 69||
brAhmaNAn bhojayechChaktyA gandhapuShpAkShatArpaNaiH |
evamaishaM vrataM kuryAt naityakaM prativarShakam || 70||
mAghakR^iShNachaturdashyAM sarvakAmaphalapradam |
chaturviMshadvAdashAbde kuryAdudyApanaM budhaH || 71||
Ajanma yastathA kuryAtso.akShayyAM labhate gatim |
mAghakR^iShNa chaturdashyAM pUjya li~NgaM pinAkinaH || 72||
chaturdashI darshayuktA aShTamI navamIyutA |
pAraNaM tatra kartavyaM raudrarkShe vA punarvasau || 73||
kalashA dasha vAShTau vA sodakAnabhipUrya cha |
gandhapuShpAkShataphalaiH R^itvijo.aShTau nimantrayet || 74||
AcharyaM varayedekaM brAhmaNaM vedapAragam |
gaNeshaM skandanandIshaM kAlI bhadrAM sarasvatIm || 75||
vR^iShabhaM tvAmumAdevIM kalasheShvabhito yajet |
mR^ityu~njayena mantreNa vahnau hutvA shatAShTakam || 76||
charuNA sadhR^iteneshi brAhmaNAn bhojayechChive |
yathAshaktyA dhenuvastraM hiraNyaM vratadakShiNAm || 77||
AchAryAya cha R^itvigbhyo dadyAdudyApanaM smR^itam |
etadvai sa~NgraheNaiva kuryAdudyApanaM shive || 78||
shivarAtrivratasyAsya sarvakAmaprapUraNam || 79||
Ishvara uvAcha |

bhUtAyAmasite cha naktamagaje mAghyAM mamarkShe naraH
pApaughAnna bibheti sha~NkarapadadhyAnAnuraktaH sadA |
muktaH saMsR^itighorapAshata imAM gAM sarvadAnAdhikAM
datvA yatphalamApnuyAt sunishitaM tatprApya mAmeti cha || 80||

|| iti shivarahasyAntargate IshvaraproktaM shivarAtripUjAvratakathanaM sampUrNam ||

\- || shrIshivarahasyam | mahAdevAkhyaH ekAdashamAMshaH | adhyAyaH 32 shivarAtripUjAvratakathanam | 24\.2\-80||
##
- .. shrIshivarahasyam . mahAdevAkhyaH ekAdashamAMshaH . adhyAyaH 32 shivarAtripUjAvratakathanam . 24.2-80..

Notes:

Śiva ##shiva## delivers Upadeśa ##upadesha## to Pārvatī ##pArvatI## about observing Śivarātri Vrata ##shivarAtri vrata## during Māgha Kṛṣṇa Caturdaśī ##mAgha kR^iShNa chaturdashI## and worshiping ŚivaParivāra ##shivaparivAra##.

He also advises ŚivaDhyānam ##shivadhyAnam##, ŚivaStutiḥ ##shivastutiH##, Aṣṭamūrti ŚivaStutiḥ ##aShTamUrti shivastutiH## and KṣamāPrārthanā ##kShamAprArthanA## for the Śivarātri Pūjā ##shivarAtri pUjA##.##

##
Proofread by Ruma Dewan

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}