% Text title            : Anamayastotra
% File name             : anAmayastotram.itx
% Category              : shiva
% Location              : doc\_shiva
% Author                : Dandin
% Transliterated by     : Sunder Hattangadi
% Proofread by          : Sunder Hattangadi
% Source                : Stutisanchaya
% Latest update         : August 22, 2015
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Anamaya Stotra ..}##
\itxtitle{.. anAmayastotram ..}##\endtitles ##
tR^iShNAtantre manasi tamasA durdine bandhuvartI
mAdR^igjantuH kathamadhikarotyaishvaraM jyotiragryam |
vAchaH sphItA bhagavati haressannikR^iShTAtmarUpA\-
sstutyAtmAnassvayamivamukhAdasya me niShpatanti || 1||
vedhA viShNurvaruNadhanadau vAsavo jIvitesha\-
shchandrAditye vasava iti yA devatA bhinnakakShyA |
manye tAsAmapi na bhajate bhAratI te svarUpaM
sthUle tvaMshe spR^ishati sadR^ishaM tatpunarmAdR^isho.api || 2||
tannasthANosstutiratibharA bhaktiruchchairmukhI ched
grAmyastotA bhavati puruShaH kashchidAraNyako vA |
no chedbhaktistvayi cha yadi vA brahmavidyAtvadhIte
nAnudhyeyastava pashurasAvAtmakarmAnabhij~naH || 3||
vishvaM prAdurbhavati labhate tvAmadhiShThAyakaM chet
nehotpattiryadi janayitA nAsti chaitanyayuktaH |
kShityAdInAM bhava nijakalAvattayA janmavattA
sidhyatyevaM sati bhagavatassarvalokAdhipatyam || 4||
bhogyAmAhuH prakR^itimR^iShayashchetanAshaktishUnyAM
bhoktA chainAM pariNamayituM buddhivartI samarthaH |
bhogopyasmin bhavati mithune puShkalastatra hetuH
nIlagrIva tvamasi bhuvanasthApanAsUtradhAraH || 5||
bhinnAvasthaM jagati bahunA deshakAlaprabhedAd
dvAbhyAM pApAnyabhigiri haran yonavadya kramAbhyAm |
prekShyArUDhassR^ijati niyamAdasya sarvaM hi yattat
sarvaj~natvaM tribhuvana sR^ijA yatra sUtraM na ki~nchit || 6||
chArUdreke rajasi jagatAM janmasatve prakR^iShTe
yAtrAM bhUyastamasi bahule bibhratassaMhR^itiM cha |
brahmAdyaitatprakR^itigahanaM stambhaparyantamAsIt
krIDAvastu trinayana manovR^ittimAtrAnugaM te || 7||
kR^ittishchitrA nivasanapade kalpitA pauNDarIko
vAsAgAraM pitR^ivanabhuvaM vAhanaM kashchidukShA |
evaM prAhuH pralaghuhR^idayA yadyapi svArthapoShaM
tvAM pratyekaM dhvanati bhagavannIsha ityeSha shabdaH || 8||
klR^iptAkalpaH kimayamashivairasthimukhyaiH padArthaiH
kassyAdasya stanakalashayorbhAranamrA bhavAnI |
bANau khaDgaH parashuridamapyakShasUtraM kimasyet
yA chakShANo hara kR^itaviyAmastu hAsyaikavedyaH || 9||
yatkApAlavratamapi mahad pR^iShTamekAntaghoraM
mukteradhvA sa punaramalaH pAvanaH kiM na jAtaH |
dAkShAyaNyAM priyatamatayA vartate yogamAyA
sA syAddhatte mithunacharitaM vR^iddhimUlaM prajAnAm || 10||
kashchinmartyaH kratukR^ishatanurnIlakaNTha tvayA ched
dR^iShTisnigdhassa punaramarastrIbhujagrAhyakaNThaH |
apyArUDhassuparivR^itaM sthAnamAkhaNDalIyaM
tvaM chetkruddhassa patati nirAlambano dhvAntajAle || 11||
shashvadbAlyaM sharavaNabhavaM ShaNmukhaM dvAdashAkShaM
tejo yatte kanakanalinIpadmapatrAvadAtam |
vismAryante surayuvatayastena sendrAvarodhA
daityendrANAmasurajayinAM bandhanAgAravAsam || 12||
vegAkR^iShTagraharavishashivyashnuvAnaM digantAt
nyakkurvANaM pralayapayasAmUrmibha~NgAvalepam |
muktAkAraM hara tava jaTAbaddhasaMsparshi sadyo
jaj~ne chUDA kusumasubhagaM vAri bhAgIrathIyam || 13||
kalmAShaste marakatashilAbha~NgakAntirna kaNThe
na vyAchaShTe bhuvanaviShayIM tvatprasAdapravR^ittim |
vArAM garbhasya hi viShamayo mandarakShobhajanmA
naivaM ruddho yadi na bhavati sthAvaraM ja~NgamaM vA || 14||
sandhAyAstraM dhanuShi niyamonmAyi sammohanAkhyaM
pArshve tiShThan girishasadR^ishe pa~nchabANo muhUrtam |
tasmAdUrdhvaM dahanaparidhau rAShadR^iShTiprasUte
raktAshokastavakita iva prAntadhUmadvirephaH || 15||
la~NkAnAthaM lavaNajaladhisthUlavelormidIrghaiH
kailAsaM te nilayanagarIM bAhubhiH kampayantam |
AkroshadbhirvamitarudhirairAnanairAplutAkShai\-
rApAtAlAnayadalasAbaddhama~NguShThakarma || 16||
aishvaryaM te.apyanR^iNatapatannekamUrdhAvasheShaH
pAdadvandvaM dashamukhashiraH puNDarIkopahAraH |
yenaivAsAvadhigataphalo rAkShasashrIvidheya\-
shchakre devAsurapariShado lokapAlaikashatruH || 17||
bhaktirbANAsuramapi bhayatpAdapadya spR^ishantaM
sthAnaM chandrAbharaNa gamayAmAsa lokasya mUrdhni |
nahyasyApi bhrukuTinayanAdagnidaMShTrAkarAlaM
draShTuM kashchidvadanamashakaddevadaityeshvareShu || 18||
pAdanyAsAnnamati vasudhA pannagaskandhalagnA
bAhukShepAd grahagaNayutaM ghUrNate meghavR^indam |
utsAdyante kShaNamiva disho hu~NkR^itenAtimAtraM
bhinnAvasthaM bhavati bhuvanaM tvayyupakrAntavR^itte || 19||
nordhvaM gamyaM sarasijabhuvo nApyadhashshAr~NgapANe\-
rAsIdanyastava hutavahastambhamUrtyA sthitasya |
bhUyastAbhyAmupari laghunA vismayena stuvadbhyAM
kaNThe kAlaM kapilanayanaM rUpamAvirbabhUva || 20||
shlAdhyAM dR^iShTiM duhitari girernyasya chApordhvakoTyAM
kR^itvA bAhuM tripuravijayAnantaraM te sthitasya |
mandArANAM madhurasurabhayo vR^iShTayaH peturArdrAH
svargodyAnabhramaravanitAdattadIrghAnuyAtAH || 21||
uddhR^ityaikaM nayanamaruNaM snigdhatArAparAgaM
pUrNedhAdyaH paramasulabhe duShkarANAM sahasre |
chakraM bheje dahanajaTilaM dakShiNaM tasya hastaM
bAlasyeva dyUtivalayitaM maNDalaM bhAskarasya || 22||
viShNushchakre karatalagate viShTapAnAM trayANAM
dattAshvAso danusutashirashChedadIkShAM babandha |
pratyAsannaM tadapi nayanaM puNDarIkAtukAri
shlAghyA bhaktistrinayana bhavatyarpitA kiM na sUte || 23||
savye shUlaM trishikharamapare doShNi bhikShAkapAlaM
somo mugdhashshirasi bhujagaH kashchidaMshottarIyaH |
ko.ayaM veShastrinayana kuto dR^iShTa ityadrikanyA
prAyeNa tvAM hasati bhagavan premaniryantritAtmA || 24||
ArdraM nAgAjinamavayavagranthimadbibhradaMse
rUpaM prAvR^iDghanaruchimahAbhairavaM darshayitvA |
pashyan gaurIM bhayachalakarAlambitaskandhahastAM
manye prItyA dR^iDha iti bhavAn vajradehe.api jAtaH || 25||
vyAlAkalpA viShamanayanA vidrumAtAmrabhAso
jAyAmishrA jaTilashirashchandrarekhAvataMsAH |
nityAnandA niyatalalitAH snigdhakalmAShakaNThAH
devA rudrA dhR^itaparashavaste bhaviShyanti bhaktAH || 26||
mantrAbhyAso niyamavidhayastIrthayAtrAnurodho
grAme bhikShAcharaNamuTaje bIjavR^ittirvane vA
ityAyAse mahati ramatAmapragalbhaH phalArthe
smR^ityevAhaM tavacharaNayornirvR^itiM sAdhayAmi || 27||
AstAM tAvatsnapanamuparikShIradhArApravAhaiH
snehAbhya~Ngo bhavanakaraNaM gandhapuShpArpaNaM vA |
yaste kashchitkirati kusumAnyuddishan pAdapIThaM
bhUyo naiva bhramati jananIgarbhakArAgR^iheShu || 28||
shuktAkAraM munibhiranishaM chetasi dhyAyamAnaM
muktAgIraM shirasijaTile jAhnavImudvahantam |
nAnAkAraM navashashikalAshekharaM nAgahAraM
nArImishraM dhR^itanarashiromAlyamIshaM namAmi || 29||
tiryagyonau tridashanilaye mAnuShe rAkShase vA
yakShAvAse viShadharapure deva vidyAdhare vA |
yasmin kasminsukR^itanilaye janmani shreyaso vA
bhUyAdyuShmachcharaNakamaladhyAyinI chittavR^ittiH || 30||
vande rudraM varadamamalaM daNDinaM muNDadhAriM
divyaj~nAnaM tripuradahanaM sha~NkaraM shUlapANim |
tejorAshiM tribhuvanaguruM tIrthamauliM trinetraM
kailAsasthaM dhanapatisakhaM pArvatInAthamIsham || 31||
yogI bhogI viShabhugamR^itabhR^ik shastrapANistapasvI
shAntaH krUraH shamitaviShayaH shailakanyAsahAyaH |
bhikShAvR^ittistribhuvanapatiH shuddhimAnasthimAlI
shakyo j~nAtuM kathamiva shiva tvaM viruddhasvabhAvaH || 32||
upadishati yaduchchairjyotirAmnAyavidyAM
parama paramadUraM dUramAdyantashUnyAm |
tripurajayinI tasmin devadeve niviShTAM
bhagavati parivartonmAdinI bhaktirastu || 33||
iti virachitametachchAruchandrArdhamaule\-
rlalitapadamudAraM daNDinA paNDitena |
stavanamavanakAmenAtmano.anAmayAkhyaM
bhavati vigatarogI janturetajjapena || 34||
stotraM samyakparamaviduShA daNDinAM vAchyavR^ittAn
mandAkrAntAn tribhuvanaguroH pArvatIvallabhasya |
kR^itvA stotraM yadi subhagamApnoti nityaM hi puNyaM
tena vyAdhiM hara hara nR^iNAM stotrapAThena satyam || 35||

iti daNDivirachitamanAmayastotraM sampUrNam ||
##
Encoded and proofread by Sunder Hattangadi

\medskip\hrule\obeylines

Please send corrections to sanskrit at cheerful dot c om
Last updated \today
https://sanskritdocuments.org

\end{document}