% Text title            : Kashikshetramahimakhyanam
% File name             : kAshIkShetramahimAkhyAnam.itx
% Category              : shiva, shivarahasya, tIrthakShetra
% Location              : doc\_shiva
% Transliterated by     : Ruma Dewan
% Proofread by          : Ruma Dewan
% Description/comments  : shrIshivarahasyam | ugrAkhyaH saptamAMshaH | adhyAyaH 2 | 6.2-104||
% Latest update         : March 8, 2024
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Kashikshetramahimakhyanam ..}##
\itxtitle{.. kAshIkShetramahimAkhyAnam ..}##\endtitles ##
\- shivagaurIsaMvAde \-
shrIshivaH \-
asti kShetravaraM devi sarvakShetrottamottamam || 6||
vedopagItamanishaM kAshIkShetramanAmayam |
kalpAnte sakalAn lokAn saMhR^itya nijamAyayA || 7||
kAshyAmeva tvayA sArdhaM saMvasAmi shubhAnane |
kAshI trishUlanilayA nirmalA layavarjitA || 8||
purAtanA na sA janyA pralaye.api na nashyati |
mamAparA tanuH kAshI matto bhinnA na sA parA || 9||
saivAhaM nAvayorbhedaH satyamevAvayoriva |
nAhaM vasAmi kailAse na cha mandaraparvate || 10||
nA vA himAchale bhadre kAshyAmeva vasAmyaham |
vasannapyatra kailAse vilAsArthaM kadAchana || 11||
vihAya kAshImanishaM nivasAmi manorame |
jyotiHpu~njamayI kAshI j~nAnarUpA manoramA || 12||
tayA tu sadR^ishI (shaM) vastu nAsti brahmANDagolake |
bhUgatApi na bhUH kAshI nimnasthApyakhilonnatA || 13||
vedavedyApi sA nUnaM vedavedyA na tattvataH |
matsvarUpA yataH kAshI tato.ahamiva tattvataH || 14||
vedAntairapi sA kAshI na j~nAtuM shakyate dhruvam |
yathA tvayi mama prItiH tathA kAshyAM shubhAnane || 15||
sarvathA prItirastyeva nAtrAprItiH kadAchana |
mahyaM tvamiva sA kAshI sarvadA sarvasaukhyadA || 16||
kAshI kAshIti satatamuchcharannivasAmyaham |
dharmaikarAshiH sA kAshI pAparAshivinAshinI || 17||
avinAshisudhArAshirAshAsyA vashibhiH sadA |
bahubhirjanmabhirnityaM yadi ghorataraM tapaH || 18||
taptaM tadA matprasAdAtkAshyAM vAso bhaviShyati |
kAshivAsaratA martyAH svargalokanivAsajam || 19||
sukhaM sarvaM tiraskR^itya nivasantyanishaM mudA |
nograistapobhirdAnaishcha dharmairadhyayanairapi || 20||
kAshIprAptirna lokAnAM matprasAdaM vinA shubhe |
kAshIprakAshakaM vastu loke naiva hi dR^ishyate || 21||
chandro vA bhAnuragnirvA tatprakAshakaro na hi |
yA na vedyA vedasa~Nghaistadanyairapi sAdhanaiH || 22||
avedyA sA kathaM vedyA kAshI loke shivAtmikA |
svargabhogamapi tyaktvA devendrAdyAmarAH sadA || 23||
kAshIvAsamapekShante muktyarthaM sarvasAdhanaiH |
sarvayaj~natapodAnaM dharmANAM phalamuttamam || 24||
kAshIvAsAtmakaM satyaM na tasmAdadhikaM phalam |
brahmahatyAdipApAni ghorANi vividhAnyapi || 25||
kAshIti smaraNAdeva kShaNAnnashyantyasaMshayam |
kAshInivAsaniratAnnarAnapyamarA mudA || 26||
namaskurvanti satataM pUjayanti stuvanti cha |
kAshIvAsasamutpannasukhena sadR^ishaM sukham || 27||
nAnubhUtaM mayA kvApi kvachidapyamalAnane |
manmano ramate kAshyAM yathA tadvadvarAnane || 28||
nAnyatra ramate chetaH tadvatsveva hi tAdR^isham |
sarve dharmastulArUDhAH parasparajigIShayA || 29||
purA shrIshailashikhare shrIshaileshvarasannidhau |
kAshInivAsajAddharmAdanye dharmAstulAM gatAH || 30||
parasparaM jayaM prAptAH prathamaM te tataH param |
kAshInivAsasambhUtadharmashreShThajigIShayA || 31||
punaH sarve tulAM prAptumudyuktAH sambhramAnvitAH |
shrIshaileshastadA dharmAn saMvIkShya jayakA~NkShiNaH || 32||
uvAcha vachanaM prItyA sAmarUpaM jagatpriyam |
kAshIvAsajadharmeNa spardhA kAryA na sarvathA || 33||
sa sarvadharmachakresha iti vedairvinirmitaH |
tanme na rAjate spardhA sA hInena na rAjate || 34||
sarvonnatena tu spardhA svanAshAyopapadyate |
loke nItiviruddhAni karmANi viphalAni hi || 35||
na kurvantyeva nipuNA nItishAstravishAradAH |
svashaktiM parashaktiM cha vichArya samayAdikam || 36||
tataH spardhA prakurvANA nipuNAH santi sammatAH |
kva bhavanto.anUnavIryAH kva saH sarvonnataH param || 37||
kvAnantodyadbhAnutejAH kvAtyalpAgnyaNukaprabhA |
tatastena saha spardhA na kartavyA kadAchana || 38||
alpasya mahatA sArdhaM virodho nopajAyate |
iti shrIgirinAthasya shrutvA vachanamAdarAt || 39||
vishvasya tadvachaH samyak spardhA tyaktvA yayustataH |
tasmAchChrubhAnane devi kAshIvAsasamudbhavaH || 40||
dharmoM dharmavaro j~neyo dharmastAdR^i~Nna sarvathA |
yAvanti santi tIrthAni pAtAle pR^ithivItale || 41||
satyalokAdilokeShu tAvanti sukhade sadA |
kAshIM prayAnti shrIkAshImarchayanti stuvanti cha || 42||
kAshyAM viveshveShu(sha)tIrtheShu snAnaM kurvanti yatnataH |
puNyakShetrANi sarvANi dUradeshasthitAnyapi || 43||
gatvA kAshIM mudA samyak pUjayanti hi tAM sadA |
devAH svasvagaNaiHsAkaM vihAya svargajaM sukham || 44||
gachChantyatIva santuShTAH kAshIM prati sadAshive |
sarasvatyA saha sraShTA kAshIvAsarataH sadA || 45||
satyalokaM vihAyaiva kAshyAmAyAti hR^iShTadhIH |
viShNurapyanaghaM svIyaM sthAnaM tyaktvA sadA mudA || 46||
kAshyAM tiShThati mAmeva li~NgarUpiNamarchayan |
gandharvAH kinnarA yakShAH sarve svasvagaNAnvitAH || 47||
prayAnti satataM kAshI kAshIpUjanatatparAH |
pANDuparNAshino dhanyA munayo brahmavAdinaH || 48||
vAtAshanAshcha satataM santi kAshyAM munIshvarAH |
kShIrAbdhipramukhAH sarve samudrAH santataM mudA || 49||
kAshIpUjArthamAyAnti ratnairabhyarchayanti tAm |
kAmadogdhrI svayaM gatvA kShIreNaivAbhiShichya tAm || 50||
kAshyAM tiShThati santuShTA devalokaM vihAya sA |
puShpitAMH kalpavR^ikShAshcha gatvA kAshImaharnisham || 51||
puShpavR^iShTiM vitenuste kAshIpUjAparAyaNAH |
AdityA vasavaH sAdhyAH siddhAshcha svagaNAnvitAH || 52||
kAshyAM shuchiratA nityaM nivasantyAdareNa te |
kashyapo.atrirvasiShThAdyA R^iShayaH shaivapu~NgavAH || 53||
vishvedevAshcha satataM kAshyAM tiShThantyanAkulAH |
anye.api satyalokAdisatya(sarva) lokanivAsinaH || 54||
serve.api kAshyAmanishaM vasanti shivapUjakAH |
kAshIM te durlabhAM prApya nikShepamiva nirdhanaH || 55||
tyaktuM manaH kadAchidvA na kurvantyeva sarvathA |
kShudhitA iva mR^iShTAnnaM pipAsava ivodakam || 56||
kadAchidapi teM kAshIM na tyajanti dR^iDhavratAH |
chakorA iva pUrNenduM kAmukA iva kAminIm || 57||
na vihAsyanti te kAshImanyAshArahitAH sadA |
bhramarA iva puShpANi gAvo vatsatarANi cha (niva) || 58||
kAshIM prashaMsamAnAstAM na tyajanti dR^iDhavratAH |
pativrateva bhartAraM vidyeva vimalAshayama || 59||
kAshItyAgaM muktikAmo na karotyeva pAvanaH |
kaHkAshIM yatate tyaktvA mokShArthI vigataspR^ihaH || 60||
mUrkho.api grAsamamalaM na jahAti kShudhAturaH |
sihmAsanaM mahArAjo na jahAti balAnvitaH || 61||
na jahAti tathA kAshIM martyaH saMsAraduHkhitaH |
anantogratapodharmairlabdhvA kAshIM shive sthitAm || 62||
kaH sa~njahAti subhage saubhAgyanilayAM shubhAm |
anantajanmabhirghoraM tapaHkR^itvAtidurlabham || 63||
tenaiva tapasA kAshIM labdhvA kaH sa~njahAti tAm |
durlabhA sarvathA devi loke kAshyabhidhA sudhA || 64||
kaH sa~njahAti nipuNo vaktragAM sharkarAmiva |
atikleshAjitaM vittaM na mu~nchanti yathA narAH || 65||
tathA ghoratapolabdhAM kAshIM kastyaktumichChati |
sarvathA durlabhA kAshI durlabhA durlabhA dhruvam || 66||
durlabhA durlabhA satyaM durlabhA durlabhA shubhe |
mahAnidhiriyaM kAshI pApadAridryanAshinI || 67||
mokSharUpeShTaphaladA brahmAnandapravadhinI |
iyaM kAshI kAmadhenurmokSharUpeShTakAmadA || 68||
vinashyet kAmadA neyaM kAshI nityeShTakAmadA |
kAshI kAshIti satataM yaH kAshIsmaraNe rataH || 69||
sa sadyaH sarvapApebhyo muchyate devi sarvadA |
deshAntare.api yaHsthitvA kAshI kAshIti saMvadet || 70||
sa pApiShTho.api subhage pAtakebhyo vimuchyate |
vinAtyugreNa tapasA kAshIprAptiH shubhAnane || 71||
na bhavatyeva tatsatyaM satyaM satyaM na saMshayaH |
durlabhaM mAnuShaM janma samprApyApi naro yadi || 72||
kAshIM prAptuM na yatate sa eva puruShAdhamaH |
anyatra dussahaM martyastapaHkR^itvApi sarvadA || 73||
na pAralaukikaM saukhyaM prApnoti vimalAnane |
prajvalajjvalanaM tyaktvA bhasmanyAjyAdikaM haviH || 74||
hutamapyakhilaM vyarthaM tathAnyatra kR^itaM tapaH |
dhiktasya jIvanaM jantodhik dhik tasya punarbhavam || 75||
yena kAshI nAvaloki yena kAshI na pUjitA |
dhikkulaM tasya dhiksaukhyaM dhigdhIrdhidhik paraM yashaH || 76||
yena kAshI shivapurI nAnarchi sakalArthadA |
dhigaishvaryaM dhigaishvaryaM dhiktasya navayauvanam || 77||
yena kAshI puNyarAshirnAbhyarchi shubhasAdhanaiH |
dhigdhikvANI tasya jantoryena kAshI na vanditA || 78||
dhigdhikShubhA(bhaM) manastasya yena kAshI na chintitA |
dhigdhigdhikcha shirastasya yena kAshI na vanditA || 79||
dhigdhigdhi~Nnayane tasya yena kAshI na vIkShitA |
dhigdhigdhik shravaNaM tasya yena kAshI na cha shrutA || 80||
dhigdhigdhikcha hi tatpAdau kAshIprakramavarjitau |
dhikpANistasya vimalau yena kAshI na mArjitA || 81||
kITaH pata~Ngo maNDUko martyo vA shivasammataH |
kAshIM tyaktvA tanurbhUmau naivApnoti tanuM dhruvam || 82||
(kAshyAM tyaktvA tanuM bhUmau naivApnoti tanuM dhruvam) || 82||
yasya kasyApi vA jantormaraNe samupasthite |
kAshyAM shiva shivetyetannAmaivopadishAmyaham || 83||
madbhaktAnvimalAn dR^iShTvA maraNAsannajIvanAn |
mamaivA~Nke sanniveshya shivetyupadishAmyaham || 84||
shivanAmAnusandhAnAt purA pUtatanurnaraH |
punarmannAma tatkAshyAmante prApnoti mAnavaH || 85||
shiveti nAmadAvAgniH pApatUlAdinAshakaH |
tasmAchChiva shivetyeva nAma japyaM sadA janaiH || 86||
sadAshiva shivetyeva mannAmochchAraNe paraiH |
kAshyAmante shivetyetannAma samprApyate dhruvam || 87||
tataH shiva shivetyetannAma muktipradAyakam |
tanmayApyupadiShTaM chetkAshyAM kiM punarambike || 88||
kAshyanyapuNyakShetreShu madbhaktaH svavapuryadi |
tyajatyante sa bhUyo.api madbhakto bhuvi jAyate || 89||
tataH kAshImavApyAtha madbhakto matprasAdataH |
ante shivashivetyetanmantraM prApnoti muktaye || 90||
svargabhogakare puNye naShTe devAH punarnarAH |
bhavanti te.api madbhaktAH kAshyAM tiShThantyaharnisham || 91||
tataH kAshyAmantakAle mamaivAnugrahe sati |
sadAshiva shivetyetannAma samprApnuvanti te || 92||
kAshyAM muktatanurmartyo na punasstanyabhAk shubhe |
kintu madrUpatAM yAti madbhakto matparAyaNaH || 93||
yathA bhUyo na yAtyeva prajjvaladvahnigaM haviH |
tathA tyaktvA tanuH kAshyAM shaivairnaivApyate punaH || 94||
kAshI shaivasharIrANi gR^ihItvA yAchitApi sA |
na dadAti havIMShIva pAvakaH punarujjvalaH || 95||
anyatra muktikAmaistu na sthAtavyaM kadAchana |
tyaktvA kAshIM shubhAM satyamuddhR^itya bhujamuchyate || 96||
madbhakta evAdhikArI mokShe (loke) kAshyeva muktidA |
mannAmasmR^itireva syAnmokShasAdhanamuttamam || 97||
shive shivashivetyetannAmasmaraNameva hi |
kAraNaM mokSharUpasya phalasyeti matirmama || 98||
matprasAdena samprApya kAshIM muktipradAyinIm |
madbhakto matparo nityaM ko vA mu~nchati cha~nchuraH || 99||
puNyapuShpasamAkrAntaM mokSharUpaphalAvR^itam |
kaH kAshIM samupAshritya punaranyatra gachChati || 100||
yAM na bhAsayituM dakShA bhAnuchandrAnalAH shubhe |
tAmiShTaphaladAM kAshI kastyaktuM tanute matim || 101||
amarairapyalabhyAM tAmanAyAsena muktidAma |
kaHsa~njahAti vimalaH kAshImIshAnanAyikAm || 102||
kShudhitaH karagaM grAsaM yathA naiva vimu~nchati |
tathA na mu~nchati prAj~naH kAshIM muktipradAyinIma || 103||
malli~NgArchatatatparA hR^idi sadA mAmeva kAshyAM mudA
dhyAyanto mama nAma sha~Nkara mahAdevAkhilesha prabho |
gaurInAtha shiveshvareti vimalaM bhaktyA japantaH paraM
satyaM satyamapAstabhogaviShayAH shaivAgragaNyAH shive || 104||

|| iti shivarahasyAntargate shivagaurIsaMvAde kAshIkShetramahimAkhyAnaM sampUrNam ||

\- || shrIshivarahasyam | ugrAkhyaH saptamAMshaH | adhyAyaH 2 | 6\.2\-104||
##
- .. shrIshivarahasyam . ugrAkhyaH saptamAMshaH . adhyAyaH 2 . 6.2-104..

Notes:
Śiva ##shiva## describes to Devī ##devI## the splendor and layout of Kaśī ##kAshI##.
Kaśī ##kAshI## harbors several ŚivaTīrthaKṣetra ##shivatIrthakShetra## that are outlined in ŚivaRahasyam saptāṃśaḥ ##shivarahasyaM saptAMshaH##.##
##
Proofread by Ruma Dewan 

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}