% Text title : Parameshvaradevasamagamavarnanam from Shrikanthacharita % File name : parameshvaradevasamAgamavarNanam.itx % Category : shiva % Location : doc\_shiva % Transliterated by : Ruma Dewan % Proofread by : Ruma Dewan % Description/comments : shrImaNkhakakavikRitaM shrIkaNThacharitam | saptadashaH sargaH || % Latest update : Ocober 7, 2023 % Send corrections to : sanskrit at cheerful dot c om % % This text is prepared by volunteers and is to be used for personal study % and research. The file is not to be copied or reposted for promotion of % any website or individuals or for commercial purpose without permission. % Please help to maintain respect for volunteer spirit. % \documentstyle[11pt,multicol,itrans]{article} #include=ijag.inc #endwordvowel=.h \portraitwide \parindent=100pt \let\usedvng=\Largedvng % for 1 column \pagenumbering{itrans} \def\engtitle#1{\hrule\medskip\centerline{\LARGE #1}} \def\itxtitle#1{\medskip\centerline{\LARGEdvng #1}\medskip\hrule} \def\endtitles{\medskip\obeyspaceslines} %% \begin{document} \engtitle{.. ParameshvaradevasamagamavarNanam from Shrikanthacharitam ..}## \itxtitle{.. shrIkaNThacharite parameshvaradevasamAgamavarNanam ..}##\endtitles ## galvarkakShititalabimbatArkabimbapratyuptapratinavaratnapAdapIThAm | chUDendupravisR^imarAchCharashmijAlairunanmIlasaddhavalavitAnapaunaruktyAm || 1|| AsthAnImacharamasAndhyakarmasiddheH sAsUyaM girisutayA vilokyamAnaH | devo.atha tripurapurandhrilokalIlAvAhlIkastavakamalimlucho vivesha || 2|| nairmalyapravishadahaskarAMshukANDairuchchaNDadviguNitahemavetradaNDAm | baMhiShThairapihitabandivR^indanAdAmudgarjanmukuTasarittara~NghoShaiH || 3|| bhrashyadbhirnamadamarendramaulIratnaurniryatnaprakaTitanUtanopakArAm | velladbhirguhashikhinaH shikhaNDakhaNdaDairArabdhapravitatatAlavR^intavR^ittAm || 4|| bibhrANo vapurahimAli luptatApaM pratyuptAmakhilagaNairdivAdisArAm | AshcharyaM charitamuda~nchayannapUrvAM sharvANIdayitatamaH sabhAmavApat || 5|| sasphArasphaTikavira~NkakuTTimAntaHsa~NkrAntAkhilatanubhirgaNAnAm | pAtAlasthaTaladhiruhya mUrdhni bhakterutsekAtsatatamivohyamAnapAdaH || 6|| netrAgnijvalanavirIyamAnachUDAkhaNDendusravadamR^itopajAtajIvAn | bhUyo.api pramupitasampado nR^imuNDankurvANaH shvasitaviSheNa ka~NkaNAheH || 7|| chinvAno dR^iDhataramahyupoDhabhAraM pAdAbjadvitayamivochchajUTabandham | grIvAyA valayamivAnvahaM dadhAno dordaNDaM shritaviShamAMsalasvarUpam || 8|| vyagrANAM chaTughaTanAsu vIkShamANo netrAntairvadanamamartyamAgadhAnAm | nAtho.atha pramathasabhAM prapadya tasthAvAsInaH shirasi vilAsaviShTarasya || 9|| mArArairmarakataviShTaraprabhANAmabhya~NgAdanusR^itanIlimodgamAni | sarvA~NgANyabhinavabhUtimUShaNAnyapyAseduH sahacharatAM galasthalasya || 10|| mithyaiva vyadhiShata tasya pAdapIThaM sotkaNThAH paricharituM puro bhujiShyAH | namrANAM chikurabharA hi nirjarANAM tatkR^ityagrahaNamanukrameNa chakruH || 11|| sAvegaM kathamapi tasya nopashalye ki~Nkaryo vidudhuvuragrachAmarANi | chUDenduglanakR^ito vishA~Nkya pAtraM lAlATajvalanamakANDatANDavasya || 12|| herambo nijapiturApya jUTakUdeNA~NkaM vinidadhadanyadantadhAmni | abhya~NgAdatha pR^ithutatkarachChaTAnAM truTyantaM prakR^itamapi vyadhatta dantam || 13|| prAvikShannatha shanakairakaitavena vya~njanto vinayAvinamratAM shirobhiH | sarve.api tridivasado nivedyayamAnAH sAvaj~naM kimapi shilAdanandanena || 14|| dUrAtte tadanu sudhAndhaso vivabruH saMhatya praNatimayugmalochanAya | tatpAdau virachayatAM hi maulibhUmau svAnmaulI~njagadapi pAdukIkaroti || 16|| chaNDAMshujvalanatuShAradhAmamayyo.apyavyAjaM puraripuNA vikIryamANAH | dR^iglekhA bata vapuSho.akhilAmarANAM santApaM jaDimaparigrahaM cha jahruH || 16|| auchityAnnijaninamAsanaM bhajantaste pR^iShTAH kushalamathendushekhareNa | ityUchurnamuchibhidAdayaH sudhAyAH sambandhAdiva madhurodgamairvachobhiH || 17|| vishveShAM puri puri yatsadaiva sheShe vidvadbhiH purUSha iti pratIyase tat | kiM dhAmatritayamayAnapAyadR^iShTestasmAtte jagati parokShamasti vastu || 18|| nanvevaM kimapi vinirmalaM prakR^ityA tvadrUpaM surasaridambuvatpunIte | srotobhistribhiratha kAraNAtmabhistadvishvAtmankR^itakamapi vyanakti bhedam || 19|| dhi~NmUDhA vitathamudAsanasvabhAvaM bhAShante puruSha tava trilokabhartuH | kartrI chetprakR^itiriyaM karotu ki~NchitkaivalyaM bhavadadhirohamantareNa || 20|| kiM mithyA hara mahadAdiShu prayu~Nkte loko.ayaM vikR^itimayeShu tattvashabdam | ekastvaM nirupadhirUpabhR^iddhi tathyaM tattattvaM puruSha bibharShi pa~nchaviMshaH || 21|| kiM kartuM tava purato.atha kiM nu vaktuM shakShyAmaH kShitidhararAjamUrdhashAyin | tvaM khaNDaM kvachidapi no padaM vyanakShi trailokyaM dhvanivapuShashcha te vivartaH || 22|| kutrApi pratihatimeti nAntArikShaM shabdastadguNapadavIM na chAtishete | tanmUrtistvamasi cha tadvibho jaganti vyApnoShItyamupapattisampradAyaH || 23|| no ki~nchidbahirUpapattimeti vastu j~nAnAttatprasarati kiM tu chitravR^itti | j~nAnAtmA prabhuriti vishvakartR^ibhAvo no bauddhairapi bhavato bata vyapAstaH || 24|| shUnyaM tairakathi na tuchChameva rUpaM mAdR^ikShAnadhigamanIyavR^itti kiM tu | tAdR^ikShaM tava cha vapustathA cha bauddhAstvAmeva kva na paramArthato gR^iNanti || 25|| bodhAtmanyanavadhitAM tvayIha jAnantyanyAni trinayana santu darshanAni | AtmA tvaM tava cha vapustrayo.apilokAstanmAnaM tvamiti cha nArhato.asti garhA || 26|| trailokyaM vibhajati yo vichitratantraM yasmAchcha prasarati sarvajIvalokaH | chArvAkAstamiha vadanti yatsvabhAvaM tarbha~NgyA tvamasi shivorarIkR^itastaiH || 27|| yaM mAyA kvachidanirud.hdhyamAnarUpA na spraShTuM prabhavati neti neti santaH | yasmiMshcha vyavahR^itimAcharanti taM tvAM tAtparyadupaniShado vibho gR^iNanti || 28|| ekastvaM trinayana dR^ishyase.adhikartuM j~nAtuM cha trimuvanamIshvaraH prakAshaH | tAdAtmyaM vivR^itavatI vimarshashaktirdvaidhe.api prathayati te na bhedadoSham || 29|| ichChadbhiH shashimukuTa kriyaikarUpaM vaivashyApraNayavidhAyinaM viyogam | nirvyUDhashrutikavikR^itya vishvakartA tvaM ha hartAbhyupagata eva vedavidbhiH || 30|| yachChAyAShTaShadabhiShekato.api sarve tAtparyAdavasitajADyatAM bhajante | tasyAtmaMstava jaDatAmudIrayantaH kANAdA bata na katha~nchana trapante || 31|| kvAvatsyatkathamajaniShyata prakAshaM prANiShyatkathamathavaiSha jIvalokaH | A sargAdakhilajagadgariShTha no chetkAruNyAtprabhurabhaviShyadaShTamUrtiH || 32|| vaktre.abhUttava murajitpratigrahItA tvaM grIvAM sarasijajanmano vyalAvIH | itthaM te himakarashekhara prasAdaH kopo vA kvachidajaniShTa no mahatsu || 33|| ityAdistutimukhareShu nirjareShu pratyagraprasR^itakR^ipArasAtatirekaH | tAnitthaM kathayitumindukhaNDanachUDaH prArebhe rabhasavashaMvadairvachobhiH || 34|| prAptAnAM mama savidhaM vidhUtadhairyA charyAsau vipulamuplavaM vyanakti | vishliShyannijamahasAM mukhAni yadvaH prAtastyaM rajanipatiM viDambayanti || 35|| vishvApadgadabhiShajo.api kiM bhavanto vaiklavyavyasanavisaMsthulAnanAH stha | pratyarthipradhanarasA vila~Nghya dainyaM tejo vastulayati vADavaM hi dhAma || 36|| dhyAnena stimitatamatvamabjayonerAsIdyatpraNihitadIkShamIkShaNeShu | chintAyAH parichayane tadeva sadyaH sAdhikyakramamapi nAdhikaM dhinoti || 37|| sAvegaM yudhi valatAM dviShAM shirobhiryasyAgre samajani mR^ityubhANDabha~NgiH | tachchakraM krashimavashaMvadAgrimArchiHsa~nchAraM kimiti muradviSho.adhishete || 38|| yatra shrIranishavinidradR^iksahasre vishramya sarati na pa~NkajAkarasya | so.akANDe kimiti biDaujaso.asya dehaH sandehaM muhuriva kasya na vyanakti || 39|| chitrodyatkrashimaviroShavavadbhira~NgairvaiklavyaM vivR^itavatAM samIraNAnAm | kiM tveShAM punarapi jAyate mahadbhirniHshvAsairanalasamAMsalatvayogaH || 40|| pANDimnA parichitamujjhitapratApaprAvAraM kimiti tathA vapuH kharAMshoH | shubhrAMshubhramaghaTanAdvinA triyAmAmAta~NkaM sR^ijati yathA rathA~NganAmnAm || 41|| niHsheShatribhuvanaghasmarashritatvAttadvahneH sahajamapahnutaM kva tejaH | yuShmAkaM sapadi vilokyate.asya hA dhik shokoShNashvasitatara~NgamAtrasheShaH || 42|| krAntAbhiH pratidivasAstashailasIdachchaNDAMshudyutibhiriveshvaraH pratIchyAH | yastejo durabhibhavaM babhAra sadyaH svAM shakti dR^ishi vidhR^itAmbhasi vyanakti || 43|| anyeShAM savanalihAmapi prayAtaH sa prAchyaH kva nu nijatejaso.atirekaH | nIrandhrapravisR^imarAnanAnilaughaiH kiM lIDhaH kathamapi dIpavachChamena || 44|| IdR^igbhiH smaramakaraikamAntrikasya vyAhArairapahR^itakalpachittapIDAH | nirvedAdabhimukhalochanaM katha~nchitprotkShipya kShaNamavatasthire mukhAni || 45|| devo.atha shrutikavitA payodanAdapratyarthisvanarachanA~nchitairvachobhiH | haMsAnAM rathapathavartinAM muhUrtaM tanvAno bhayamiti sAdara jagAda || 46|| santApaM kimapi vivR^iNvate na kepAM ye pAdA iva diviShanmanojvarasya | santyatra trinayana duHsahaprameyA daiteyAstribhuvanashatravastrayaste || 47|| prAgudyadyamAniyamAdimAMsalAbhishcheShTAbhistridivamunInvila~NghayantaH | saMhatya sthirataranishchayena te mAmArAddhuM niravadhi tepire tapAMsi || 48|| trailokyaM tapasi visha~Nkameva teShAM kalpAntajvalananayena bAdhamAne | nirvyAjakramamatha darshanaM purastAttebhyo.ahaM vyataramanuttarAtanurodhaH || 49|| santapte vapuShi tapobhareNa kurvannirvANaM vahanapattripattravAtaiH | sAvegaM paTu ghaTitA~njalInpurastAttAnAviShkR^itanijamUrtirityavocham || 50|| santuShTaM nishitatapovisheShamayyA vAsyA vaH sakalamapIha gAtratantram | yuShmabhyaM varamahamIpsitaM pradAsye bho vatsA khalu virachayya tadvratAni || 51|| IdR^ikShapratatatapaHpaNamayuktyA yaM prAptuM vivR^itadurodarakriyAH stha | arthaM taM kathayata tatra kApi mA bhUdAsha~NkA ditikulamaulimaNDanA vaH || 52|| ityasmadgiramadhiropya karNavIthIM nedIyaH pramadarasokShitekShaNAste | mAmevaM vinayamapAkSharAntara~NgapronmIlatpadamagadanvinamrakaNTham || 53|| anyaiH kiM varada varAntarairavAptairaprAptairatha cha na ko.api yairvisheShaH | tvadvaktraprasR^itavachomR^itaughalAbhAdasmAkaM bhavatu vibho jhagityamR^ityuH || 54|| naivedaM vitaritumIshvaro.asti kashchinnishchitya drutamitaraM varaM vR^iNIdhvam | ityasmadvachanamathochchulumpya te.atra shrotrAbhyAM punaridamAdarAdavochan || 59|| nevaM chetpratishR^iNute bhavAnakasmAdasmabhyaM dR^iDhatapasApi niHsahebhyaH | tahyerko yudhi ripuNA sharo.arpyamANaH sarveShAM bhavatu sadaiva mR^ityave naH || 56|| mattastaM varamiti dIptamAptavantaste yuktyA matimativartituM yamasya | trIMllokAnatha cha pR^ithakpR^itha~NniroddhuM sannaddhA vyadhiShata nUtnayatnasiddhim || 57|| tattvamAntaramavetya tataH suvarNadurvarNaloghaTanAvikaTaiH prakAraiH | tebhyaH pR^ithaktriShu jagatsu purIranalpashilpAvikalpasamayaH sa mayashchakAra || 58|| arUNamaNigarIyogo puraprojjihAna\- dyutinivahanavInoTTa~NkitAgneyavapram | puravaramatha haimaM daityanArIkaTAkShaiH kuvalayitagavAkShaM tArakAkSho.adhyarukShat || 59|| dhavalabhavanayogAdAptaparyAptasAmya\- shriNi nabhasi hasantyAmullasadbhimayUkhaiH | puri parikaramAdhAdrAjatollAsabandhau svaka iva kamalAkShaH prakramo vikramasya || 60|| bharatruTyatkShoNItalavisR^itapAtAlatimira\- sthirAsa~Ngeneva sphuradasitaniHsheShavapuSham | nR^iNAM ke kAlAyasamayamayAtnAjjanapadaM tato vidyunmAlItyasisaliladhArAbhirasichat || 61|| te prApya tripuraprathAmatha pR^ithaglokAnrujantaH sthitA divyAnyabdashatAyutAnyupanamadvishvApamR^ityushriyaH | yannAmnApyAdhirohatA shrutipadaM gIrvANavAmabhruvAM gAhante tanavo.ativelapavanodvellallatAsauhR^idam || 62|| tApaM ruchikShatimatho vividhAshcha pIDA vishvasya dhAtava ivotkupitAsrayaste | Atanvate sapadi duHsahasannipAte tasminbhiShaktu yAde bharga bhavatprasAdaH || 63|| yAH krIDadvibudhAvarodhanapariShkArArkakAntAnala\- jvAlAtApalavAvalehamapi no madhyedinaM sehire | tAH santAnakavIrudho vidhunitAstatsainikaiH sAmprataM dAvAgniryadi nAma rakShati tato nIchAvamAnajvarAt || 64|| pAshairbaddhashirodharAH phaNimayairutkhAtanAkidruma\- skandhAChAnataleShu dAnasalilAvagrAhiNo digdvipAH | nItAstairajireShu yAmagajatAM sraste.api vishvambharA\- bhAre vrIDanipIDanena dadhate dUrAvanamra shiraH || 65|| kiM vAnyatte tathAdya trinayana vinayAtikramAkrAntavishvA niHshvAsaughena dIrghIkR^itachamaramaruDDambarAH svarvadhUbhiH | sarvaM nirvIramurvItalamatha nilayaM nAkinAM manyamAnAH kartAro nUnamasmatparikaramachirAnnAmamAtrAvasheSham || 66|| itthaM prastAvanAyai vivR^itavati vachaH padmabhUsUtradhAre tUrNaM vaktraprasAdaprasrajavanikAmagrato.apAsya dUram | krodhAkhyaH parShadAnAM vidadhadadhimanora~NgapIThapraveshaM shailUSho dR^iShTahastAdyasamavikR^itibhiH sa~Ngama~NgIchakAra || 67|| || iti shrIma~Nkhakasya kR^itau shrIkaNThacharite mahAkAvye parameshvaradevasamAgamavarNanam || || shrIma~NkhakakavivirachitaM shrIkaNThacharitam | saptadashaH sargaH || ## .. shrImankhakakavivirachitaM shrIkaNThacharitam . saptadashaH sargaH .. Notes: Śrīkaṇṭhacaritam ##shrIkaNThacharitam ## is a Saṃskṛta Mahākāvya ##saMskRRita mahAkAvya ## composed by Mahākavi Maṅkhaka ##mahAkavi ma~Nkhaka ## - a 12th century poet from Kashmir. The 25 sections of the Mahākāvya ##mahAkAvya ## describe the incidence of Tripuradāha ##tripuradAha ## and the annihilation of Tripurāsura ##tripurAsura ## by Śrīkaṇṭha ##shrIkaNTha ## (Śiva ##shiva##). Sarga 17 ##sarga 17 ## describes the meeting of the deva-s ##devAH ## with Śrīkaṇṭha ##shrIkaNTha ## (Śiva ##shiva##) at Kailāsa ##kailAsa##, wherebey they eulogise and apprise Him about the menace created by Tripurāsura ##tripurAsura##. Encoded and proofread by Ruma Dewan \medskip\hrule\obeylines Please send corrections to sanskrit@cheerful.com Last updated \today https://sanskritdocuments.org \end{document}