% Text title            : Rudrarthavivaranam
% File name             : rudrArthavivaraNam.itx
% Category              : shiva, shivarahasya
% Location              : doc\_shiva
% Transliterated by     : Ruma Dewan
% Proofread by          : Ruma Dewan
% Description/comments  : shrIshivarahasyam | dvAdashAMshaH | adhyAyaH 26-33 rudrArthavivaraNam | vAvRittashlokAH ||
% Latest update         : December 28, 2024
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Rudrarthavivaranam ..}##
\itxtitle{.. rudrArthavivaraNam ..}##\endtitles ##
(shivarahasyAntargate IshAkhye)

(skandaproktam)

atha rudrArthavivaraNam |

pUrNAnandachidAtmako.apyapahataH svAvidyayA hR^idyayA
tallIlAdivilAsamohitamanA vismR^itya rUpaM nijam |
jIvatvaM samupetya nityamanayA vR^ityA tayA preritaH
yaH shashvannR^ivadashvavachcha gajavadgovachcha nAnAvidhAn || 1||
veShAnAkalayan vidhAya bahudhA karmANi tatsAdhanA\-
nyatyantonnatanIchamArgagamanashrAntaH pureShvAvasan |
kAminyA kamanIyayAtikamanaH svAvidyayA saMsaran
puNyApuNyavashAchchireNa paramAM vidyAM priyAmApya cha || 2||
shrIrudrAya namaH samastajagadutpattisthitidhvaMsita\-
krIDechChAsamupAttadivyavapuShe dhAturvidhAtre hareH |
rakShitre nitarAM harasya cha parAhantAkR^iteHsAkR^ite\-
bhartre bhaktajanasya va~nChitasamastAbhIShTadAtre sadA || 3||
ekaH sannapi kAryakAraNachidAkAraistribhiryo.aShTadhA
tredhAkevalamekadhA cha nikhilaM vishvaM charaM chAcharam |
svAtantryeNa bibharti tasya kurute janmAdi taM bhAsaya\-
nnantarvyApya bahishcha deva bhavate sAmbAya tubhyaM namaH || 4||
durvij~neyanarashchaturmukhamukhAnAmapyanekAkR^itiH
sarvesha svayamevamAdicharitairyaH sarvataH sarvadA |
sarvaM vishvamavan shivaH sphuTatapAH sarvAtmanA dR^ishyate
vyaktAvyaktatatarAya te bhava namastasmai cha vishvAtmane || 5||
ugra tvAM namasA prasAdya jagatAM te nigrahAnugraha\-
vyagrasyogratamAH tathA shivatamA ghorA aghorAtanUH |
devastaumi namaskaromyabhayamapyadyaiva yAche vibho
tvattaH kaH sharaNArthinAM sharaNadaH shrIrudra shambho vibho || 6||
vAgAdi svayameva bodhayati yaH sarvaM cha vAgrUpayA
prItyA sAdhujanaM cha vedayati yaH shrutyA cha dharmAdikam |
bhaktAnAM kila yoginAM nayati yo mantreNa tArAtmanA
yo.asau drAvayati svayaM dravati vA nAdAnta eva prabhuH || 7||
kalpAnte bhuvanAni rodayati yaH sarvArutaM yasya tAM
sarvAn drAvayati svayaM dravati cha rorUyamANo narAn |
shabdabrahmamayIM karoti cha rutiM yaH sarvavedAntikAM
dhAtre yashcha rutiM dadAti bhagavAn rudraprabho tasya te || 8||
manyuH kopa iti prapa~nchaharaNe shaktiH prasiddhAsti yA
tasyai veda namo.astu tAM prashamayan trAyasva naH sannatAn |
somaM shalyamanIkamagnirabhavadviShNuH svayaM tejanaM
parNAnyappatirAsa yasya nigamAH khyAtasya tasmai namaH || 9||
te devaiH sumaheShave.api cha phaNIndrajyaM sumervAtmakaM
yaddhanva praNavAtmakaM tripadayA sajyaM madaM yaddhanuH |
tasmai chAstu namastavApi cha dhanurbANodyatAstAM namo
bAhubhyAmathavA.akhilebhya utate bAhubhyAM ete namaH || 10||
bhaktAnAM sugamaM mahAghaharaNaM lokAdhipatyapradaM
rAj~nAM chAnamatAM prasAdasumukhaM shrIkAshyapArAdhitam |
yodhAkAramumAsahAyamachirAt AkarNakR^iShTe sharaM
chApe bhAsvati sandadhAnamanishaM rudraM yuvAnaM bhaje || 11||
bhaktAnAM sukhadAyinI bhavati yA khyAtA taveShustayA
yachchAtIva shiva~NkaraM tava dhanustenApi yAche sadA |
chakrAdyAyudhasaMhatistava sadA divyeShudhirvA tayA
chAsmAn deva dayAvashena sukhaya shrIrudra shambho prabho || 12||
AtreyarchitamannadaM praNamatAM durbhikShadoShApahaM
shambhuM syandanasaMsthamIshamumayA sArdhaM jvalantaM shriyA |
shUrAkAramatIva sasmitamukhaM saMstUyamAnaM suraiH
iShvAsena karaM prasannahR^idayaM bhakteShTadaM bhAvaye || 13||
yo.asau shaM tanute dayAmayatanuH prANibhya evaM girai
kailAse girishAtmanA jaladharaiH parjanyarUpeNa cha |
vaikharyAmayi vAchi vAchyavidhaye OMkAramayyAM gire(ri)
dhyeyatvena cha saMsthitaH svayamaho.akhaNDAmbudhArAnidhiH || 14||
tasyAM krUratayA samastajagatAM duHkhAtividhvaMsinI
yA te rudra shivAtanoriha tayA chAnandachidrUpayA |
smartR^INAmadhikaM sadA mukhatayA yuktastvamasmAn muhuH
pashyAnukShaNavIkShaNairabhimukhaM shrIrudrashambho prabho || 15||
evaM godhanavardhanaM praNamatAM shrIkAshyapArAdhitaM
shambhuM sameramukhAmbujaM triNayanaM bAlenduga~NgAdharam |
shrIshailendrasutAsahAyamamalaM bhasmoramAla~NkR^itaM
sarveShAmadhinAthamIshamanishaM dhyAyetpashUnAM patim || 16||
devAnAM sharaNArthinAM praNamatAM samprArthanAnantaraM
hantavyAstripurAsurA prati yudhi kShepyA gR^ihItvA iShum |
haste yAM girishanta samyagapi yA hartuM bibharShi svayaM
hastena tripurAkhyatUladahana krIDAM vidhAya kShaNAt || 17||
devatrAyaka nityamadhvaragirA abhrasya chaivaM gireH
kailAsasya cha nAthatAM kuru bhavadbhaktAn prati kShemadAm |
haste hyAbhimukhe cha ki~ncha kR^ipayA trAyasva pApaishcha mAM
mA hiMsIH puruShAgragaNyamanishaM tvatpAdasaMsevanAt || 18||
sarvaM gomahiShAshvadAsa kulamapyevaMvidhetyadarA\-
nnIrogaM nirupadravaM cha satataM shrIrudrasAmba prabho |
shrIkailAsanivAsa sarvanigamAdhIsha prabho sarvataH
sarvaM naH sutadArabAndhavajanakShetrAdikaM syAdyathA || 19||
nIrogaM sumanaskameva cha tathA tvAM sarvaduHkhApahaM
sarvaishvaryavivardhanaM praNamatAM sarvAdhikaM sarvadA |
sarvaishvaryaguNAkaraM shivakaraM kalyANalIlAmR^ita\-
stotrAkAratayA shivena cha sadA nityaM stumaH sannidhau || 20||
lokAnAmapamR^ityudoShaharaNaM devopaghAtApahaM
rudraM gautamanAyakena muninA gomAyunA chArchitam |
hAsakliShTa(dhvasta)puratrayaM giridhanuShpANiM rathAdhiShThitaM
sa~NgrAmochitadivyaveShamanishaM dhyAyetpurAriprabhum || 21||
kAryopAdhivashena sannapi nirAkAro.api jIvAtmako
yasyAMshaH svayamIdR^ishaM vapurabhedenAnugR^ihNAsi yat |
janmavyAdhijarAdiduHkhadamahAsaMsArakaShTajvara\-
pluShTAnAM vitarAshu durlabhamapi tvadbhaktimAtrauShadham || 22||
bhItAnAmabhayArthinAM abhayadeShvagresaro.ayaM bhiShak
sarveShAM bhiShajAM kileti nigamA yaM saMstuvantyAdarAt |
durj~neyo.api parAtparo.api jagatAM trANAya mohAya vA
deveShvekatamo.ahamasmi iti yaH prAdurbhavan krIDati || 23||
krIDAyAM sukharUpa eva vijigIShAyAM jayAtmA svayaM
bhaktyAtmA vyavahArake bhavati cha dyutyAtmako dyotate |
nityaM stotramayaH stutAvapi gatau gantavyarUpo.athavA
vAyvAtmA bahudhA vibhAti hi bahuShveteShu chaiko.api yaH || 24||
devAnAmapi yaH svayaM mukhamabhUt brahmAdikAnAM prabhuH
divyaj~nAnavatAM pradhAnapuruShaH sarvasya lokasya yaH |
sraShTAsan nikhilaM jagachcha sR^ijasi viShNurjagatpAlane
yaH sarvANi jaganti saMharati chApyaishvaryayogAnmuhuH || 25||
svAtantryAdhikavAgbhirevamamarAnAj~nApya chaivaM vidhAn
yaH svAbhAvikashaktimAnatitarAM arhaH samarthaH prabhuH |
asmaddhiMsanatatparAnarigaNAn jAtIstathA rakShasAM
sarvAnAshu vinAshayan mama puraH pratyakShamAvirbhavan || 26||
devaH so.ayamadhibravItu kR^ipayA mA bhaiShTa yuShmAnahaM
bhItibhyastvitipAlayAmyatha bhavAchchetyevamasmAn prabhuH |
shambhuM duHsahagarbharogaharaNaM rakShAkaraM sarvathA
rakShobhUtabhayApahaM praNamatAM dIrghAyurarthapradam || 27||
kaNvArAdhitamindumaulimanishaM vyAlolavItojjvalaM
prodyatpAvakavarchasaM triNayanaM kAlArimIshaM bhaje |
yaH pUrvAchalahemaratna shikharaprasthopalopatyakA\-
kAntivyAptivashAdrasAtalatamaH samparkato vAnvaham || 28||
udyan ku~Nkumapa~NkatAmra uditaH sindUrapUrAruNa\-
staptasvarNasukAntirUrdhvamadhasaMsarpan(?)kramAddR^ishyate |
kalyANaikanidhiH svayaM svayamasAvAdityarUpaH shivo
ye tulyAkR^itihetibhUtivibhavA rudreNa rudrAH pare || 28||
devasyAnucharAH samastajagatAM karmAnurUpaM phalaM
dAtuM dikShu sahasrashaH kShitimimAmadhyAsate chAbhitaH |
kR^ityasyA.akaraNAt(akR^ityakaraNAt) Alasya taH kAmataH
tasmAtpApamajasramArjitamabhUdasmAbhiraj~naistataH || 29||
teShAM tasya maheshvarasya vibhoryo.asmAnvihArAdaraH
krodhashchAsti tamIdR^ishastutinamaskArairapAkurmahe |
kShvelashyAmalakandharasphuradurujvAlAgnivarNaH shivaH
tejomaNDalamadhyavartivilasanmArtANDamadhyaM vasan || 30||
sAyaM ki~nchiduda~nchitA~NkuratamaHsAmarthyalInAM nishA\-
krAnte dhvAntamupAnayachcha paritaHpa~NkapradeshAntare |
bhUyiShThaM grasanakShaNaM ghR^iNigaNaH kAlAbhranIlAnilo ?
bibhrANo.astamayan vilohitanibhaHprAtastathaivodayan || 31||
yo.asautiryagadhashcha sarpati jagadyAtrAM sadA nirvahan
durj~neyo.api tapaH kriyAbhirakhilairvedaiHshrute medhayA |
yeneyaM bhagavantamastamachirAt yAntaM vanAntAdgavAM
grAmaprAptinimittamekamanasaH pashyanti gopA api || 32||
astaM yAsyati bhAnurandhatamasaM dR^iShTiM pidhAsyatyaho
svAmin chediha kutsayiShyati mR^igAnto bhartsayiShyatyapi |
ambhaH kumbhamidaM kadA nijagR^ihaM neShyAma ityAkulAH
svedAmbhaH kaNasiktaka~nchukasamAlakShyochchalachchUchukAH || 33||
bhrashyadbhUShaNajAlamAkulakachaM vyAlolahAraM tathA
dhAvantyaH parichArikAshcha vanitA a~NgairapA~NgairmuhuH |
sandhyAkhyoddharaNAgnihotrasamaye karmeka chittA dvijA\-
shchAvAsAbhimukhAni pakShipashukITAnyugrabhUtAnyapi || 34||
so.ayaM naH sukhayatvaharnishamupasthAnAni kAlArthibhiH
dR^iShTo.asmAbhirapi prabhuH prashamayannenaH kR^ipAmbhonidhiH |
yaM dhyAyanniha vedapAragakule jAtismaro jAyate
rudraM taM varadaM suvR^iShTiphaladaM shrIkashyaparAdhitam || 35||
bhAsvanmaNDalagaM hiraNmayatanuM chandraprabhAmaNDalaM
sAmbaM smeramukhAmbujaM munigaNairAsevyamAnaM bhaje |
nIlAtyujjvalakandharAya cha sahasrAkhyAtmane vR^iShTibhiH
parjanyAtmatayA bhuvaM cha paritaH sektre tathA yoniShu || 36||
garbhaNAM puruShAtmanAM cha vividhairbIjairvidhAtre namo
rudrAyAstu namaskaromyathabhaTA yechAsya tebhyo namaH |
santAnaikaphalArthinAM praNamatAM santAnarUpaM prabhuM
svAtmAnaM hR^idi bhAvayantamanishaM shambhuM kR^ipAmbhonidhim || 37||
kAntaM shAradachandrakAntisubhagaM shAntaM shivaM shItalaM
sAmbaM divyavapurdadhAnamamalaM sihmAsanasthaM bhaje |
saMrambhastripureShu duHsahataro yaH pUrvamAsIddhruvaM
syAdasyApi sa eva sevakajaneShvasmAsu dIneShvapi || 38||
vidyaishvaryayashaHshriyAM cha nilayasya j~nAnavairAgyayoH
dAkShiNyaikatanordayAmayatanoH pAlyeShvayukto hi saH |
tasmAjjyAmitarAM pramuchya dhanuShaH koTyordvayoryau.achiraM
vaddhAyAshchatave(?) ##. | . | .## vastiShThanti tAH prANinAm || 39||
saMhartrIrupasaMharannabhimukhIkurvanti nAsmAn yayA
tUNIreShu tirohitAn kuru tathA devesha tubhyaM namaH |
devAnekashateShudhirvraja sahasrAkShaH svamevaM dhanuH
kR^itvA vIkShyamidaM mukhAni nikhilAnAM chaivashIrNAni te || 40||
niHsheShaM nitarAM vidhAya kR^ipayA.asmAkaM prasAdArthinAM
sadyaH shAntamanAH shivo bhava sahasvAdyAparAdhAn bahUn |
suprItasya kapardino.astviha pinAkAkhyaM dhanuH sajyama\-
pyadyAsmatkushalAya vIjyamiShudhishchAyaM puroyatpurA || 40||
bANaiH pUrNataro.api vItavishikhobhUyAttadIyAshcha yAH |
devasyaiva vareShavo.apyapahatAstAH santu lInAH kramAt
tIkShNAro.api mahAsiradya bhajatAM bhakteShu mandAratAM
koshaHkhaDgasahAyavAnapi vinAbhUto.astu tenAdhunA || 42||
evaM shAntamanAH prashAntavividhAnekAyudhAH santataM
bhaktAn naH sharaNAgatAn karuNayA pAyAdapAyAchChivaH |
yuddhe vairibhayApahaM praNamatAM shrIrudramArAdhitaM
daivaM nAradanAmakena muninA nAnAyudhAla~NkR^itam || 43||
udyadbhAskarakoTidIdhititanurdIptottamA~Ngojjvala\-
tkAntiM bhIShaNa bhogibhUShaNamahaM dhyAyeta mIDhuShTamam |
rudro hetidharo.adhunA ##. | . | .## haste tavAste.adhunA || 44||
##words are missing in the source text##

asmAn putrakalatraputrasahitAn sarvAn prasannAn sadA
sarvAsmAdduritAchcha rakSha bhagavan dInAn dayAmbhonidhe |
svAmin rudra namo.astu devadhanuShe chAnAtatajyAya te
udyuktAya sharAya chodyatagadAchakrAdisa~NghAya cha || 45||
duShTAn dharShayate dR^iDhAya vividhAyaivaMvighAyAyudha\-
stomAyAdya namo.astu te.adya bhagavan yAbhyAM ripUn vidhyasi |
bAhubhyAM bibhimo vayaM tava dhanurbANodyatAbhyAM tata
svasvanyeShu mahAbhujeShvapi muhustAbhyAmumAbhyAM namaH || 46||
yadvA dakShiNavAmabAhunivahAbhyAM te namaH kR^itsnashaH
tasmaichottamasAyakAya dhanuShe tasmai namaH kurmahe |
svAminnadya vayaM punaH punaridaM chAshAsyamAshAsmahe
yaH pArshve.asti taveShudhista iShavo yAstAshcha dUre punaH || 47||
vyUhairvairijanasya pAtaya tathA hiMsro.api dhanvana\-
statraivAstviha putrapautrasahitAn puShNAtu naH sarvataH |
tubhyaM deva sadA namo.astu bhagavan vishveshvarAyasphura\-
dvahnayarkendudR^ishe puratrayabhide kAlAgnirudrAya cha || 48||
kShvelashyAmalakandharAya mahatAM(te)devAya sarveshvarA\-
yeshAyAstu sadAshivAya mahate devAya shashvannamaH |
svAtmAnaM hR^idi bhAvayantamanishaM rudraM muhurdhyAyatAM
yuddhe sarvaripupraNAshanamaristhAnaikavidhvaMsinam || 49||
namrAsheShasurendramaulivilasatpAdAmbujaM kAraNaM
sarveShAM jagatAM pinAkinamahaM dhyAyAmi sAmbaM prabhum |
chandrottaMsamachintyamakSharamajaM saMsAraduHkhApahaM
madhyeshuddhasudhAbdhi chintitamaNidvIpe shayAnaM bhaje || 50||
chArusmeramukhaM sumauktikanibhaM madhye sudhAmaNDala\-
syAsInaM jagadekarakShaNaparaM dhyAyAmi sAmbaM sadA || 51||
svAmI tvaM svamidaM jagattadadhunA shakto.api sanmanyunA
saMhartuM kR^ipayA vibhUtivibhavairvyApyAsi shAntAtmanA |
kurvannigrahamapyanugrahamasheShaM sha~Nkara tvaM prabho
tasmai te.astu namo hiraNyapataye shambho hiraNyAtmane || 52||
a~NgaM yasya hiraNyabhUShaNagaNoddIptaM hiraNyaprabhaM
bAhU hR^idyatamau hi tau cha ramaNIyau bhaktibhAjAM satAm |
puNyApuNyavimishrakarmaphalabhoktR^INAM suraNAM nR^INAM
rakShoyakShapishAchakinnaraphaNIndrANAM pitR^INAmapi || 53||
sa~NghAtAn vividhAn vidhAya bahudhA senaHsvakIyAHsvayaM
svAmitvena cha saMsthito nayati tA bahvIrgatIryaH sadA |
yashchendrAdigirIshvarAtmakatayA sarvAM dishaM pAlayan
AdityAtmatayodayAstamatha sa~nchArairdishaH kalpayan || 54||
pratyakShaH sadupAsyamUrtiriha yattejonidhirdR^ishyate
tasmaite.astu namo namaH kShititale rudrAstadaMshAHpare |
ye vR^ikShAkR^itayo vasanti vividhA vR^ikSheShu vA saMsthitA
ye brahmAdipipIlikAntanikhilaprANyAtmakAshchetanAH || 55||
brahmANDAkhyamahAkShitAvatitarAM rUDhAshcha bhAlAkShiNA
bhogAnte nijakarmaNAM cha punarapyAvartamAnA muhuH |
ye rudrA haritAbhakeshanivahAstebhyo.api yo.asau patiH
brahmAdInapi pAti taishcha ramate teShAM pradhAnaH patiH || 56||
tasmai vishvabhuje namo nama idaM pratyakShamAvisphura
shreNIpi~njaramUrtaye.ativimalajyotirmayA~NgAya te |
chidrUpAya chidAtmanesvayamabhivyaktAya ye laukikA
mArgA ye.api cha vaidikA bahuvidhA dhUmArchirAdyA api || 57||
tAdR^i~NmArgavidashcha ye kratuShu ye tvAM draShTubhAvaMgatA
teShAM te pataye namonama idaM babhrutviShe sarvadA |
rakShitrevR^iShabhasya divyavR^iShabhArUDhAya pApAtmano
kShuttR^iShNa.apachayAmayaishchavividhairAvidhyase yAni cha || 58||
rakShAMsyadhvarabhakShakAni satataM teShAM cha hotre muhuH
somAyauShadhi sambhavairaviphalaiH sa~njIvayitre nR^iNAm |
annAnAM pataye namo nama idaM te nityayUne sadA
nIlAtyujjvalamUrdhajAya vilasadyaj~nopavItAya te || 59||
puShTAnAM cha satAM shamAdi suguNairnAthAya vAcho dhiyaH
kAyasyendriyasa~nchayasya cha gR^ihakShetrAdikAnAM tathA |
grAmANAM dhanadhAnyayorapi pashunyUhasya satsantate\-
dharmasyeti cha puShTayo dashavidhA yAHsyurdashAnAmapi || 60||
etAsAM pataye namo nama idaM saMsAravR^ikShachChide
hetyai saMsR^itijanyaduHsahamahAhiMsAsvarUpAya te |
lokAnAM pataye.ati duHsahamahAsaMsArakhinnAn janAn
kR^itvA tAnatha rakShate karuNayA shrIpa~nchavaktrAtmane || 61||
deveshAya namo namo bhagavate rudrAya sajyaM dhanuH
shashvaddhArayate samastamavate tenaiva vishvaM sadA |
hR^idyesho nivasannavanvapuridaM kShetraM svamAyAmayaM
mAyAyantrasamAsthitAniva sadA jIvAn muhurbhrAmayan || 62||
kShetraj~naH svayameva pashyati shrR^iNotyAsvAdayatyAspR^isha\-(?)
AnAdyaM sakalaM cha vetti sukhadaM yatsAdhanaM kevalam |
AvirbhUya bhuvi svayaMvasati yaH kShetreShu li~NgAtmanA
kShetrANi svayameva rakShati sadA yaH kShetrapAlAtmanA || 63||
kShetrANAM pataye mahesha avate tasmai namaste namaH
sUtAyAsya mahArathasya jagadAdhArasya sUtAtmanA |
kalpAdau cha mahAmunIn pratipuraNAnAM pravaktre.adhvare
somAyAbhiyutasya kevalamaha~NkAre nirUDhAya cha || 64||
bhUtaM bhAvi cha vartamAnamahamityAkArikAyAM parA\-
.ahantA tatra bhavAya kevalamahantavyAya satyAtmane |
sarveShAM vanadevatAtmakatayA goptre vanAnAM namaH
tubhyaM deva namo.astu lohitanibhAyAsheShavAgAtmanAm || 65||
shabdAnAM prathamapravartakatayA loke hitAyAbhitaH
sthitvA pAlayate niShAdapataye shaktre bR^ihadbAhave |
vR^ikShANAM pataye namo nama idaM mantrairupAsyAya te
.avedyAyopaniShadrahasyavachane lInAya chidrUpiNe || 66||
sAkShitvena cha karmaNApiparichChetre vaNivatR^iNAM
(sAkShitvena cha karmaNApi parichChetre.aparichChedyAya te)
vANyA vAchyatayA punaH punarabhivyaktAya cha svAmine |
kakShANAM girigulmagahvaranadIkuNDAtmakAnAM sadA
goptre teShu cha sarvato nivasatAM nAnAvidhaprANinAm || 67||
adhyakShAya vanasya dharmagahanatrAtre namaste namo
yasminvishvamidaM sthitaM bhavati chApyante tathA lIyate |
yaH shaktyA bhuvamAtanoti vijayI kartA dhanasyApi vA
pAtrAyArjayatAM dhanasya kR^itinAM dattvottamAnAM dhanam || 68||
yastrAtA varivaskR^itAM karuNayA yenaiva vishvAtmanA
vArIshAtmatayA cha vAriNi sadA vAsaH kR^ito yena cha |
bhUmAtmA svayamoShadhIH prajanayan grAmyAstathAraNyakAH
tAH somAtmatayA cha pAti satataM tasmai namaste namaH || 69||
uchchairghoShavate mahArNava mahAmeghAdirUpAya te
shambho pAhi shiveti bhaktanivahairuddhuShyamANAya cha |
yashchAkrandayate raNodyamasabhAkoNe bhaTAnAM muhuH
yaH shakto.api jaganti jetumakhilAnyekaH svayaM lIlayA || 70||
pattInAM cha patiH padAni shatakoTInAM cha netA svayaM
tasmai deva namo namo.astu bhavate kalpAntakAle jagat |
kR^itsnaM vItamabhUchcha yena haratA kalpAntarAtriryayA
yo.asau kevala eka eva hi shivaH kR^itsnAtmakaH shiShyate || 71||
bhaktaM shodhayati prasIdati punastasmai cha shIghraM sadA |
vatsaM gauriva chAnudhAvati paritrAtuM svabhaktaM janam |
netre brahmavidAmanekavidhisatvAnAM cha tasmai namaH || 72||
medhArAjyavashIkR^ipA varavadhU shatrukShayAdyaM phalaM
bhaktAnAM pradishantamIshamR^iShiNA maNDUkanAmnAchiram |
dhyAtaM rudramahaM bhaje suratarormUle niShaNNaM sadA
gauryA mauktikabhUShaNA~NgamamalaM bAlenduga~NgAdharam || 73||
hartuM bhartumakartumAshu cha jagatkartuM kR^itaM chAnyathA\-
kartuM durghaTameva sa~NghaTayituM shaktastvamekaHprabhuH |
tasmAtte satataM namo.astu vijayAshaktyAbhibhUta~njaga\-
tsarvaM svAtmani kurvate cha sahamAnAyAparAdhAn satAm || 74||
sAdhUn pAlayituM khalAMshcha nitarAmAvidhya tAn hantyalaM
yaH senA abhitaH parAnabhimukhAn tAsAM cha netre namaH |
deveshAya namo mahAvR^iShakakudbhAgAdhirUDhAya te
prodyatkhaDgamahAprahArakaTave chauryAya lIlAtmanAm || 75||
chorANAmapi bhaktavatsalatayA saMrakShakAyAthavA
teShAM shreShThatamAya sarvaharaNAdante namaste namaH |
udyatkhaDgavate janeShu nitarAM bhakteShu saktAya vA
tUNIrottamadhAriNe.apaharatAM sAkShAnmahAraNyake || 76||
vyAdhAnAM pataye namo nama idaM te va~nchanAM kurvate
yaH kurvannapi vipralambhamabhito vyAhanyate nAparaiH |
tasmai te paritaH sadA vicharate hartuM pareShAM dhanaM
nityaM kR^itrimasAdhuveShamayatAM nAnAvidhaChadmanAm || 77||
stAyUnAM pataye namo nama idaM sambhArashIlAya te
dADhyArthaM nitarAM vaneShu satataM trAtuM janAnAshritAn |
suvyaktaM paritaH sadaiva charite svAminnaraNye.anishaM
dasyUnAM vasatAM namo.astu pataye tebhyo.api nityaM namaH || 78||
ye rudrAH sadR^ishAstvayA dhR^itamahAvajrAdyanekAyudhAH
teShAM chAnucharA varAyudhadharAHstomAvitAro.athavA |
martyeShvapyatha hiMsakAshcha dhanadhAnyAdInyalaM muShNatAM
vyAdhInAM pataye namo.astu bhavate tebhyo.api nityaM namaH || 79||
utkoshAsidharebhya Ashu nagare naktaM charadbhyaH sadA
chauryAyai cha haranti ye nishi dhanaM hatvaiva teShAmapi
nAthAyAstu namo namo.adya tamahoShNIShAya tubhyaM namaH || 80||
vyAdhaiHsa~ncharate haranti pR^ithivIM ye vA prakR^intA balA\-
tkShudrAraNyagiripradeshapatayaH kShudrakriyashikShitA
hantAraH kulalu~nChakAshcha (?) patayasteShAM namaste namaH |
hastenaikatamena sampratidadhAnebhyo maheShuM dhanuH
sajyaM chAnyatamena vA pathi kareNAttaM mahadbhyo namaH || 81||
asyadbhyashcha namo.atha kurvatha ime yuddhAya sajjAnyalaM
sajje divyadhanuShyamoghasharasandhAnaM muhurvegataH |
kurvadbhishcha namo namaH sharavarAn sandhAya chApe samA\-
karShadbhyo visR^ijadbhya eva cha namo bhUyo namaH sAyakAn || 82||
jyAmuktAn paritaH parAn abhimukhAn samprApayadbhiH sharaiH
taiH shatrUn praharadbhireva paritaH shashvannamo vo namaH |
AsInebhya itastato bhuvi shayAnebhyo guhAbhyantare\-
.apyAyAsena cha vo namo nama idaM teShu svapadbhyaH sukham || 83||
jAgradbhyashcha namo namaH kvachidadhastiShThadbhya eva kvachit
dhAvadbhyashcha namo namashcha samupAviShTebhya eva kvachit |
svAmibhyaH sadasAM namo nama idaM chAshvebhya evApi vA
yeShAM shvastanavittamAtramapi vA naivasti tebhyo.api vA || 84||
ashvAdhyakShatayeva ujjvalamahAstrebhyo namaH shrImato
devasyAnucharAH kirAtavapuShaH shrIrudrasa~NghAH pare |
lIlAsambhR^itavigrahA bhagavataH tasyAMshabhUtAH sadA
ye chAnye paritashcharanti bahavastebhyo.api nityaM namaH || 85||
svAtmAnaM hR^idi bhAvayantamanishaM rudraM ripughnaM satAM
rAjAmAtyasamastarAShTra purahastyashvAdi rogApaham |
barhottaMsadharaM kirAtavapuShaM devaM yuvAnaM shvabhi\-
rbhUtaishchAvR^itamagrato munijanairdhyeyaM sadAbhyarchitam || 86||
yo.atrAnuvAkatrayametadadbhutaM
yo.arthaM tathA dhyAnamidaM sadA mudA |
sandhAya mantrAMshcha shivasya bhAvayet
parAM cha muktiM samavApya muktadhIH || 87||
sarvAbhyashcha namo.astu yA bhagavataH senAH samastAkhilA\-
nAvidhyanti jagaddhitAya vividhaM yAstADayantyuddhatAn |
yA utkR^iShTagaNaishcha pattinivahaiH pUrNAshcha yA hiMsinaH
vyApArAn parigUhayanti kushalapraj~nAvisheShAshcha ye || 88||
teShAM ye patayashcha ye tvaniyataM mR^ityuM muhuH saMshritA
nAnAjAtisamudbhavA bahuvidhakShudrakriyA jIvinAm |
ye bhUtAnatha yAnavantyapi cha ye ye bhUtarakShogaNA
rudrAH pAriShadAstathAdhipatayasteShAM cha ye ye pare || 89||
ye vA muNDitamastakAtivividhAkArAshcha ye svechChayA
sihmavyAghragajAshvasairibhavR^iShAdyAkArabhAjashcha ye
j~nAnAkAraguNaprabhAvavibhavairnityaM mahAntashcha ye
kShudraj~nAnaguNapradhAnavibhavA ye vA rathAdhiShThitAH || 90||
ye yodheShu(yuddheShu) rathAnviteShu charaNairdhAvanti shatrUn muhuH
ye chandrArkamahImukhAHsuragaNAH prAptA rathatvaM vibhoH |
ye rakShanti rathAn vahan svayamanAruhyaiva shaktyA svayA
ye rudrAH paritaH shivasya purataH senAtvamadhyAsate || 91||
etAsAmapi nAyakAH suravarAH ye sUtarUpAH surAH
ye gR^ihNanti ratheShu rashminivahAn sUtAj~nayA ki~NkarAH |
ye syurvardhanijAtijA api cha ye dakShA rathAnAM kR^itau
ye jAtAshcha kulAlajAtiShu tathA ye lohakArAshcha ye || 92||
nAnApakShisamUhabodhanavidhau dakShAshcha ye vai janAH
matsyAdipratidhAtakA api cha ye kurvanti tIkShNAniShUn |
ye vA dhanvakR^itashcha ye vanamR^igavyAdhAHsadA ye narAH
netArashcha shunAM cha vR^ittiniratA ye vA shunAmAkR^itim || 93||
bibhrANA atha ye shunAM cha patayaH shambhorathAMshAMshakAH
sarve martyajagadgatAH kumanujA vishveshvarAMshAshcha ye |
ye bhUmau divi sUryachandradharaNIbrahmAgniviShNvAdayo
ye rudrAshcha jaganti pAnti paritaH pUrNAH shivasyAMshataH || 94||
ye santi pramadA(thA)dirUpacharitAH sarvebhya evAdhunA
tebhyaH samprati pUruShaM stutinutiM kR^itvA namaskurmahe |
shambhuM duHsahaduShTakuShThavividhavyAdhijvarApasmaro\-
ddhartArantaMsmarahaM haraM puraharaM durvAsanAmnArchitam || 95||
bhasmoddhUlitavigrahaM triNayanaM bhAsvajjaTAmaNDalaM
svAsInaM vR^iShabhe gaNaiH parivR^itaM sAmbaM sadA bhAvaye || 96||
 \- \-
shrIrudraM yajuShAM cha madhyamamahAkANDe chaturthai sthitaM
saMsArAmaya bheShajaM prajapatAM vishveshabhaktipradam |
tasminnarthayuto vibhAsati hR^idA mantrAnuvAkAn mudA
chAturthaH sakalAtmanAM bhagavato vaktuM pravR^itto mune ||
 \- \-

vishvaM yaH satataM bibharti samadhiShThAyaiva mUrtyaShTakaM
yastAbhistanubhiH shivAbhiranugR^ihNAtIha tasmai namaH |
yaH sarvatra supUrNa eva bhavati svasmin vilInaM jagat
bhUyo bhavati sthitaM bhavati tadyasmiMshcha yo bhAvyate || 97||
yogIndrairbhagavAn apAM svayamadhiShThAtA cha yo.asau rujAM
nityaM drAvayatAM satAM svayamadhiShThAtA cha sUryasya yaH |
tasmai nityamidaM namo.astu yugapatkalpAntakAle jagat
sR^iShTvaivAshu vihiMsate hi yamadhiShThAtA tathAgnerapi || 98||
Aj~nAdaNDadharaprahArita mahAmAyorupAshaH pashUn
brahmAdInavatIha bhUtanivahAdhiShThAnarUpashcha yaH |
tasmai sarvasurAdhikAya jagatAmIshAya tubhyaM namo
nIlagrIvakalevarAya shitikaNThAyAstu tubhyaM namaH || 99||
yogIshAya kapardine.akhilamahAyAgeShu dIkShAbhR^ite
tubhyaM vyuptashiroruhAya yajamAnAkArabhAje namaH |
deveshAya sahasralochanabhR^ite shakrAtmane te shatA\-
nyatyantottamadhanvabANavividhAnekAyudhAnAM yudhi || 100||
bibhrANAya namo girIshvarakR^itAvAsAya digvAsase
rashmivrAtavR^itArkamaNDalasamAviShTAya sUryAtmane |
sarvaprANihR^idambujeShu vasate tubhyaM namo retasaH
sektre divyahiraNmayasya cha harergarbhe vidhAtre vidheH || 101||
shUrAyAttamaheShave nama idaM svalpapramANAya cha
svechChAsa~NkuchitA~NgakAya cha namastasmai bR^ihadrUpiNe |
j~nAnAkAravayastapobhirabhivR^iddhAyastu tasmai namo
vR^iddhAyAdhikadIrghakAlavayasAM stotraiH pravR^iddhAya cha || 102||
samyagvardhayate svabhaktanivahAn devAya tasmai namaH
vishvAgryAya tathA pradhAnapuruShAyedaM namo.astvAshave |
shIghrAnekagatiprabhedakushalAyedaM namaH shambhave
svAvirbhAvavate cha tAsu vividhAkArapravAhAsu cha || 103||
nityaM sannihitAya te nama idaM sthAne mahormiShvapAM
niShkampA vigatasvanAH punarapAM vIchisvanAshchApi yA |
ApastAsu cha sarvadA nivasate tasmai namaH srotasAM
madhye sannihitAya ki~ncha vasate dvIpeShu puNyeShu cha || 104||
tubhyaM deva namaH pitAmahaharIndrebhyaH prashastAya cha
jyeShThAyAtimanoj~nanityataruNAkArAya nityaM namaH |
vishvasmAdapi pUrvameva vasate sthAtre cha tasmAtparaM
janmAntAdivivarjitAya cha namo madhye prasiddhAya cha || 105||
lIlArthe shavadhAriNe nama idaM tubhyaM jaghanyAya cha
sthityantAdimatAmasheShajagatAM mUlAya tubhyaM namaH |
gAndharve nagare tathaiva nagareShvanneShu sarveShu cha
sthAtre.adhIshatayA pratIpasaraNe dakShAya tubhyaM namaH || 106||
prANiprANasamUhasaMyamanamapyante svayaM kurvate
nityaM saMvasate yamasya cha pure kAlAntakAdyAtmanA |
vishvakShemavidhAyine nama idaM saurAtmanA chorvarAH
svAvirbhAvasamastasasyanivahasyAvardhayitre sadA || 107||
dhAnyAdyAtmatayA khaleShu vasate tubhyaM namaH sarvadA
loke vAchyatayA sthitAya satataM devaiH saha krIDate |
kalpAnte.apyavinAshine shrutishirovedyAya tubhyaM namaH
svAraNyAya cha rakShakAya cha namaH shushrUShamANAya cha || 108||
varNadhvanyubhayAtmanA shrutipurANAdau prasiddhAya cha
pratyuptapratishabdarUpiNa idaM tubhyaM namaH shIghragAm |
senAM pAlayate.ati shIghragarathAyedaM namaste namaH
shUrashreShThatamAya duShTanivahAn sambhindate te namaH || 109||
varNashreShThabhR^ite vishiShTa vilasaddehAya tubhyaM namaH
divyopAyanabhasmabhAjana shirastrANAdikaM bibhrate |
Agulphasthalalambika~nchukabhR^ite nityaM namo.astushruti\-
khyAtAya shrutivishrutAyudhabhR^ite vikhyAtasenAya cha || 110||
shambhuM shatrubhayApahaM jayamahAsAmrajyasatputradaM
gorIpANisaroruhArpitamahAhemAdribANAsanam |
bANAla~NkR^itapANimeNaviladbAlenduga~NgAdharaM
shAntaM sundararUpiNaM vR^iShavarArUDhaM bhaje sarvadA || 111||
 \- \-
rudrArthavishrutapadArthasubodhasAra\-
vAkyArthavaibhavamidaM prakaTAnuvAdam |
pa~nchAsyashrAntashrutivishruti pa~nchavAka\-
vaidAnuvAkamidameva mahArthasAram ||
 \- \-

devIshAya namo.astu dundubhimahAnidhvAnarUpAya cha
prauDhAtyunnatavaibhavAya vasate devaishcha sArdhaM sadA |
bherIvAdanadaNDarUpiNa idaM tubhyaM namaH sarvadA
duShTAn dharShayate vimarshakushalAyAsheShavidyAsu cha || 112||
nityaM bhaktajane prakR^iShTakaruNAshIlAya tasmai namo
dautyaM karma cha kurvate sumanasAM prANAya vahnyAtmane |
bhaktebhyaH kR^ipayA prakR^iShTadhanadAyedaM namo bibhrate
khaDgaM cheShudhimuttamaM nama idaM tIkShNeShuhastAya cha || 113||
tIkShNAnekasharAyudhAya cha namaH saumyAya cha svochitA\-
moghAnekamahAyudhAya shubhasatkodaNDahastAya cha |
tubhyaM deva namo.astvanekavividhakShudrArthasa~nchAriNe
prakhyAtAya charAyachAcharamahAli~NgeShu pUjyAya cha || 114||
nirmagnAmbhasi bhUtale sadudake desheShu chAkardame
vikhyateShu sarassu vishrutanadI shreShThAsu nAde.api cha |
devAdyarthaniveshiteShu nivahakUpeShu garteShu cha
sadvarShAmbhasi chApi meghanivahe vidyutsutaptAmbhasi || 115||
dIptAbhre sphuradAtapeShu cha mahAvAte chariShyanmahA\-
bhUtavrAtayugAntaduHsahashilAvarShograsaMvartake |
grIShme vAtasamutthapAMsunivahe vAtyAsu vA.anyatra vA
yA sattAsti tadAtmanA jagadidaM vyApya sthitAyAnisham || 116||
yaH sarvANi sadaiva pAti parito vastUni vAstoShpati\-
stasmai chAstu namo.astu sarvabhuvanavyAptAya sarvAtmane |
rudraM bhImakanAmakena muninA shrIhemakoshena cha
dhyAtaM vashyasurUpavaTisutasatsampattimedhAyuShAm || 117||
vidyA.a.arogyasudhenupaTTasumahAsAmrAjyamokShashriyAm |
dAtAraM dvipacharmalambitajaTAsarpAdichihnaM bhaje || 118||
 \- \-
rudrArthasArapadamantrapadArthasAra\-
puNyAnuvAkavishadaHkhalu ShaShThasaptaH |
vishvAdhikapraNatibodhakasarvabhAva\-
yukto hi bhaktavaramuktikashaktidAyI ||
 \- \-

lokAnugrahakAmyayA.akhilasatAM dhyeyashcha yaH sarvadA
dhatte yaH shivashambhusha~NkaramukhAnekAbhidhAnAni cha |
tasmai deva namo.astu yaH karuNayA prAdurbhavannagrato
bhaktAn pAti sahomayA pratidinaM devAn pitR^In mAnavAn || 119||
anyAnapyamR^itena tarpayati yaH somAtmanA sha~NkaraH
sarvAnabhyudayena tarpayati yaH somAdiyAgAtmanA |
pashchAddrAvayati svayaM praNamatAM nityaM rujaM prANinAM
tasmai deva namo.astu nityamudayatkAshmIratAmrAya cha || 120||
sindUrAruNamUrtaye tadanu te sUryAtmanedaM jagat
(sindUrAruNamUrtaye dinakarAkArAya sarvaMjagat)
dyutyA dyotayate cha shaM gamayate prApayya bhaktaM janam |
sarvANyAlayate pashUn vidhimukhAn chorAritApAtyaya\-
vyAdhibhyaH kR^ipayA.avate nama idaM te duShpradharShAya cha || 121||
duHkhAdyairyajamAnamUrtaya idaM yebhyaH samastaM jagat
janmavyAdhijarAvipattimaraNAdibhyo bibhetIdR^ishA |
yasmAdbibhyati te.api te bhagavate tasmai viyanmUrtaye
tubhyaM deva namo yadA khalajanAH sAdhUn jighAMsanti ye || 122||
AvirbhUya yadagrataH prathamatasteShAM nihantre cha ye
dUre tvAmapahAya sarvajagadArAdhyaM kumArge sthitAH |
teShAmeva durAtmanAM chiratare kAle nihantre namo
hantre hanti balena yena mahatA hantavyamAshu kShaNAt || 123||
tadrUpAya pashUn kR^itAviva mahAsaMhArakAle balAt\-
yAtyantAtishayena hantyapi haribrahmendramukhyAdarAt |
AtAryasya charAcharasya jagatastasmai namo.astu prabho
rudrAH pAnti jaganti ye cha parito vR^ikShAdi rUpAH pare || 124||
ye rudrAharitAbhakeshanivahAstebhyo.api nityaM namaH
saMsArArNavamAshu tArayati yastArAtmakaH sarvathA |
brahma brahmavidAM chirAdupadishaMstasmai namaste.astu yad\-
duHkhApAyamayaM sukhaM yadi tadAbhAgyaM paratreha cha || 125||
sAkShitvena tayoH shamityapi mayashchetIha vikhyAtayoH
druShTuM nityasukhAtmane nama idaM shrIsha~NkarAkhyAya cha |
sarvasmai jagate karoti kR^ipayA yaH shaMmayashchAnishaM
tasme te.astu namaHshivAya cha guNAtItAya shuddhAya cha || 126||
ichChAshaktyaviyuktachidghanasharIrAyAvyayAyAtmane
pUrNAnandatarAya pUrNasukhadAyAjasrapUrNAya cha |
lokAnAmaviparyayeNa kurute.atyantaM shivaM yaH sadA
tasmai chAstu namaH prayAgabadarIkedArakAshyAdiShu || 127||
tIrthyo yo hi marudvR^idhAdisaritAM kUlaM cha godAvarI\-
kR^iShNA sindhusarasvatImukhasaritpAraM tadarvAktaTam |
nityaM sannihitAya teShu jagatAM trANAya tubhyaM namaH
prApyaivottamayonijanmaguNamutkarShakramAtprANinAm || 128||
magnAnAM bhavasAgare karuNayA chonmajjayitre bhavA\-
dUrdhvaM choddharate namaH kramavashAtpAraM bhavAmbhonidheH |
prAptAnkarmavashena jantunivahAnAvartamAnAnpunaH
kartuM prerayate dhiyastadanu tAnmadhye bhavAbdheshchiram || 129||
sarvAnbhrAmayate namo.astu bhavate puNyeShu darbhAdiShu
kShudraprANikuleShu bAlatR^iNavat svalpaprAmANeShu cha |
phenyaH phenavadalpakAlamathavA yAvatsu jantuShvapi
evaM tatsikatAsu tadvadadhikaM kShudreShu nIreShvapi || 130||
nAnApuNyanadIpravAhanivahe tattulyabhUtiShvapi
shreShThaprANiShu cheriNeShu cha tathA nityakriyAmAniShu |
prakhyAte pathi cha prakR^iShTatarasanmArgAnuvartiShvapi
kShudrAnekashilAtikarkashatare deshe kushIle jane || 131||
vastavye vijane janeShvati(pi) tathA yogyeShu chaiteShu yaH
sarveShvevamanugrahAya jagatAM Aste vibhuH sarvataH |
tasmai te.astu namaH kapardina idaM satkuNDalAyAnishaM
bhaktAnAM purataH sthitAya cha namo goShThe gR^ihAbhyAntare || 132||
talpe.analpatare tavAtivividhaprAsAdamadhye tathA
kATe parvatagahvare hradavare nIhAravAriShvapi |
satpAMsau viShame rajasyapi tathA shuShke.api chArdre.api cha
deshe luptatR^iNAdike cha paritaH pUrNe tR^iNAdyaiH sthale || 133||
urvyAmadhyabilAkR^itipratikR^itau parNeShu parNavraje\-
shUreShvasti shivo.ayamevamabhitaH sachchitsukhAMshaiH svayam |
bhUtaM bhAvi cha vartamAnamanu sa~NgR^ihNAti budhyA satAM
bhaktyA bhAvayatAM sa eva sulabhastasmai namaH kurmahe || 134||
prArabdhAkhilakarmabandhavinivR^ittyarthaM cha pApAtmanAM
AdhivyAdhijarAritaskaramahAsarpAdinakrAdibhiH |
kShiNvadbhyo vividhaM namastanubhR^itAM karmAnurUpaM phalaM
dAtuM duShkR^itinastvime sukR^itinashcheme kiletyanvaham || 135||
lokAnugrahakAmyayApi cha vichinvaddbhyo namo vo namo
maryAdA cha sunishchitA cha niyamenAyuH kShayaH prANinAm |
hantR^ibhyashcha namaH katha~nchidapi sarpeyuH kvachitprANinaH
prAyeNeti hi shAsituM tanubhR^itaH sarvAn samastAn sadA || 136||
nIrandhraM suvijR^imbhitaM jagadidaM vyApya sthitebhyo namaH |
shrIrudrAnucharAshcha guptamapare ye santi tebhyo namaH || 137||
vyaktAvyaktatayA charAcharAmayaM vishvaM sadAntarbahi\-
rvyAptA vishvabhavAbhavasthitikR^ito vishvAtmakA vishvapAH |
vishvasmAdadhikAshcha vishvapatayastannigrahAnugraha\-
vyagrAtyugrasushAntavigrahakR^ito rudrAstvadaMshAshcha ye || 138||
tadrUpeNa vayaM natistutishataistvAM prINayanto.adhunA
suprItaM varadaM kR^ipAlumabhayaM samprArthayAmaH shivam |
bibhrANaH kavachaM vibhAti bhagavAn yaH pApinAM durgateH
pratyedaM khalu duHkhaduHsahamahAsaMsAradAridryayoH || 139||
yo.asau prApayitA samastabhuvanaM dhvaMsAtmikAyA gateH
shashvattArayitA cha yo.akhilajagannAtho.annado.api svayam |
vishvasyaikagatiH sa eva nikhilAlakShyasvarUpaH sadai\-
vAste tasya daridravajjagadidaM yannAmarUpAtmakam || 140||
sarvasthUlasharIrameva yadidaM yasya svahR^idyeshato
yaH sambhUya cha nIlalohita iti khyAtaH shiraHpa~nchamam |
udvartasya vibhorvidhAturagajAviShNoshcha vAmaMvapu\-
ryo datvA savilAsalohita tanurnirdoSharUpashcha yaH || 141||
kaNThe nIlamatIvalohitanibhaM chAnyatragAtraM shivaM
dhatte yaH satataM dayAmayatano satvaM prasanno.adhunA |
etAnputrakalatramitraparivArAdInimAn gomahi\-
ShyAdIMshchApi pashanahan praNamatAM bhItAn krudhA mA kR^ithAH || 142||
duHkhAdyaishcha kadApi mA gamaya tAnArtiM prasAdAttava
svAmin ki~nchidapi jvarAdikamimAn mA bAdhatAM kvApi cha |
pradhyAtaM pulahena rudramanishaM bhUtAbhichArAdika\-
drohAriShTabhayApahaM dhanamahAsidhyAdikaM dhyAyatAm || 143||
AgulphaM sitaka~nchukaM DamarukodyuktollasatkuNDalaM
dhyAyettundilaputrapuMsatilakaM sannUpuraM bhairavam |
tu~Ngottu~Ngatura~NgasaMvR^itamahAmAta~Ngamadhyasphura\-
ddhAvatprauDharathAyutAvR^italasajjAmbUnadasyandanam || 144||
adhyAsto bhavatIha yaH kShitirathe mANikyasihmAsanaM
brahmA jAtu nijAshritAnapi janAntsampUjayan mAnavaH |
indrabrahmapadaM cha samyamaphalaM sAkShAchcha mokShashriyAM
sAlokyAdichaturvidhaM cha bhajatAM tadbhogyasAmyaM phalam || 145||
yA te tatpuruShasya rudra shivadApUrvA tanuryoginAM
sarvaM yachChati yA cha dakShiNatanuH saMsArarugbheShajI |
prakShINAkhilakarmabhinna hR^idayagranthipraNaShTAkhilA\-
j~nAnaM ChinnasamastasaMshayamapAstadvaitamastArikam || 146||
j~nAnaM pratyagabhinna chinmayaparabrahmaikalakShyaM paraM
sarvAn bodhayataH sadA munijanAn chinmudrayA bhadrayA |
rudrasyAdiguroH satAM shivamayI yA syAttanUrUrdhvagA
tasya j~nAnaghanAtmikA tava guNAtItA shivAkhyA.amalA || 147||
nityA.a.atyantikabandhamuktiphaladA cheshAnamUrteH sadA
tAbhiste tisR^ibhistanUbhirabhitastvaM sajjanaikArthinA |
yAvanmAnuShabhogalAbhajanitAnandena dIrghAyuShaM
tvAmArAdhayituM shivaM sukhaya naH shambho dayAmbhonidhe || 148||
j~nAnaishvaryayashodayAdi suguNaiH sarvairanantairbalaiH
saMvR^iddhaH kR^ipayA sakR^itpraNamatAmapyekabhaktyA satAm |
yaH saMvardhayitA ya eva nikhila brahmANDavidhvaMsanA\-
.a.avirbhAvodvahanaikadhR^iShNu paramaM dhatte phalaM kevalam || 149||
yo.asau divyakapardabhR^idyamabhitaste vIrabhadrAdayo
dhIrAshchAdhivasanti yasya mahatA vIryeNa dhIroddhatAH |
kShIyante nikhilAH khalA bhagavate rudrAya tatte priyAM
nityaM tAM bibhR^imo vayaM mitimayIM yA mAnasArchAmayI || 150||
svargotkR^iShTaphalArthibhirmunijanaiH sarveshvaraH sarvathA
dhyAtavyaH shiva eva ki~ncha bahudhA yaShTavya evAnisham |
stotavyaH parikIrtanIya iti cha chAvichChedanIyA matiH
tAM labdhvA shivameva sarvamitaratsantyajya sarvAtmanA || 151||
dhyAyantaH satataM bhajAma ihanaH shrIsha~Nkarasya prabhoH
tasyaitatkR^ipayA yathA svaparivArANAM cha ki~nchAdhunA |
grAme.asminnivasatyasheShamapi yadyatprANijAtaM cha ta\-
tpuShTaM tuShTamanAturaM cha sukhitaM bhUyAttathopAsmahe || 152||
svAmin rudra namaskriyAbhiranishaM stotrairhavirbhiHkShaya\-
dvAri tvAM vayamAdarAtparicharemAsmAsu kurvan kR^ipAm |
dArApatyadhanAdibhistu sukhitAnasmAnkuruShvApi cha
brahmAnandamayaM cha yattadapi naH shreyaH kR^ipAmbhonidhe || 153||
yadvA prArthanayA prayachCha bhagavan tvayyeva bhaktiM sthirAM
vA~nChAtItaphalapradA bhavatunaH sarvAtmanA sAtvikI |
saMsArajvara duHsahArti haraNa svAmiMstavAnugrahaH
pUrNo naH kimasAdhyamasti bhajatAM tasmAtvamasmatpitA || 154||
saShTR^itvena niyojitaH sa bhagavAn lokeshvaraH svasya ya\-
tprAptAnAgataduHsahArtishamanaM vA~nChan tadAj~nAkramam |
nAtikrAmati tachcha durlabha mapi prApsyAmahe tattathA || 155||
devaM godhanavarddhanaM praNamatAM hastyashvarakShAkaraM
mANDavyena maharShiNArchitamumAkAntaM prasannAnanam |
chandrodbhAsitashekharaM munijanaiH saMstUyamAnaM prabhuM
dhyAyedrudramabhIShTadaM praNamatAM sihmAsanAdhiShThitam || 156||
svAmin rudramadIya vaMshamakhilaM vR^iddhaM yuvAnaM shishuM
garbhasthaM pitaraM svamAtaramihAsmAkaM ruShA mA vadhIH |
mA hiMsIshcha priyA tanUrbahuvidhA vyAdhyAdi vAtAtapaiH
shastrAstrAgni mahAhi vR^ishchikavR^ika vyAghrograsihmAdibhiH || 157||
sarvAbhIShTaphalapradaM praNamatAM devaM dayAshevadhiM
deveshaM hR^idi devarAtamuninA dhyAtaM gaNeshAvR^itam |
taM nandIshvaravanditaM suvimalaM bAlenduchUDAmaNiM
bAlAditya samAnakAntimanishaM shrIrudramekaM bhaje || 158||
svAmin rudra vapAhavishchapuroDAshAjyayAgairmuhuH
prItiM te namasA cha samprati vayaM sampAdayanto.adhikAm |
deva tvAM karuNAnidhiM paricharemAsmAsu kurvan kR^ipAM
bhaktAnAmaparAdhinAmapi cha maH putreShu pautreShu cha || 159||
go.ajAshvAdiShu chAsmadAdiShu ruShA hiMsAM vibho mA kR^ithAH
ki~nchAsmatkulavardhanAnniharaNe dAne cha dharme dhane |
bAlAMstanyaparAMstathaurasagaNAn mA no vadhIH kiM tu tAn
vardhiShNUn chirajIvinashcha kuru tAnnaH prArthaneyaM vibho || 160||
svAtmAnaM hR^idi bhAvayantamanishaM rudraM chirAyurmahA\-
mArgakShemasutuShTi putra kanaka shrIkanyakAdipradam |
tvAmekAdashadhA vibhaktavapuShaM tejonidhiM shUlinaM
chandrAla~NkR^itamaulimindudhavalaM shAntAkR^itiM bhAvaye || 167||
AshrAntAn puruShAMshcha gAshcha nitarAM tvAM nighnataH sarvadA
prItirhiMsanagocharAya ##. | . | .## darUpaM cha dUre.astutat |
vishvatrANaparAyaNasya jagatAM mAsmAsu bhUtasya yA
chaNDIshAdyavane.asti sAstu mayi sA prItiH sadAsmAsviha || 168||
bhaktAnAM shivadaM sadAshiva shivaM rUpaM cha yattachChivA\-
yAsmAkaM purataH parisphuratu te ki~nchAdhunAsmAn vibho |
bhR^ityAn rakSha sapakShapAtamadhikaM dAkShiNyapUrNaM vachaH
kShemaM yogamahaM vahAmi bhavatAmityAdarAdbrUhi naH || 169||
shrIrudrArthaka sharma yachCha bhagavan AmuShmikaM chaihikam |
kastAdR^iksukhavardhanaH praNamatAM devastvadanyaH prabho || 170||
AyuH shrIsukhavardhanaM munivareNArAdhitaM chAtriNA
devottaMsahiraNyasannibhalasanmUrtiM prasannAnanam |
bibhrANaM jvalanaM jvalantamamalaM kurvANamagre svayaM
devyAstANDavamAdarAtsuragaNairAsevyamAnaM bhaje || 171||
mArtANDasya cha maNDale tribhuvanavyAptaprabhAmaNDale
nityaM vyomni paretabhUmiShu cha yaH prAdurbhavaMstiShThati |
yaH sarvashrutiShu shruteShu nikhilashrutyantasAreShu chA\-
tyantaM vishrutadivyakIrtiguNachAritrAyuto yaH sadA || 172||
sihmavyAghramukhAtighoramR^igavadbhImAkR^itirdurhR^idAM
yo vadhyAnakhilAnajasramupasaMhartuM khalAnudyataH |
yashchAnyAnabhibhUtashaktirasakR^ichchogrAkR^itiM mR^ityuva\-
dbibhraddhanti khalAMshcha yastamanishaM devaM maheshaM stuhi || 173||
ityAtmAnamahaM pramAdavimukhaM tvAM prerayAmi svayaM
bhaktyA staumi cha bhaktabhItiharaNaM he rudra tuShTo bhava |
stotavyo.api sureshvarairhariviri~nchAdyaiH prapannaHkilA\-
.a.apanno.ayaM jana ityananyasharaNaM mAmapyatIvAlpakam || 174||
stotAraM sukhaya prasAdasumukhaH ki~nchAstiki~nchitparaM
bhUtapretapishAcharAkShasamukhA ghorA bhavatsainikAH |
mAsmAMshchaiva adhikShipantu satataM rakShantu naH sarvadA
sarvasmAdduritAdbhayAchcha bhagavan nityaM prasAdAttava || 175||
durj~neyA vidhayo vibhinnamatibhirnItA abhinnArthatAM
ChannaChannavibhinna vismR^itamahAshAkhAsahasrAyutAH |
vedAstadvihitAstathAbahuvidhAste dravyakAlakriyA\-
mantrAH svalpataraM cha jIvanamatIvAlpA cha shaktirmatiH || 176||
durvij~neyataraM suduShkaramataH karmAkhilaM tadbhavet
bhaktyA naH saphalaM bhavediti yathApraj~naM yathAsambhavam |
yaj~nAtmA.akhilayaj~nabhuk tvamiti cha tvAM deva yakShyAmahe
yaj~naireva vapAhavishcharupuroDAshAjyavanto vayam || 177||
DambhAha~NkR^itidarpapUrNahR^idayA devAnyajante parAn
eteShAmadhamichChatastava muhurdAtuM pradIptAkR^ite |
ugrA nigraharUpiNI sthiratarA yA durmatirmAkR^ithA\-
stAmasmAsu kadApyato mR^iti(mati)riyaM hetishcha rudrasya te || 178||
bhaktAn dUrata eva deva paritaH sA varjayatvadya naH
sarvAn ki~ncha vimuchya chApamadhunA AbaddhamasmatkR^ite |
sR^iShTvA vishvamidaM maheshvara tadevAnupravishya prajA\-
shchAvichChinnatayA samastajagataH sraShTuM striyAM yoniShu || 179||
vIryaM si~nchasi yatprajApatirato mIDhvA pitA tvaM hitaH
tvaM putrAniha pautrakAMshcha surasashrIrudrashambho prabho |
vaMshoddhArakashaktibhaktisuguNashrIkIrtimatputradaM
dhyAyaMstaM bhagavantamantaranishaM svAtmAnameva svayam || 180||
nAnAprasphuradAyudhaM natamahApApaughaduHkhApahaM
deveshaM gajacharmasaMvR^itatanuM shrIkR^ittivAsaM bhaje |
nAtho yaH prakR^iteH parashcha puruShaH sarvAntarAtmA japA\-
lauhityaM sphaTikAdikeShviva hi yaH puMbhAvasambhAvitaH || 181||
puMbhAvaH puruSheShu bhAti jagati svAMshapradhAneShu yaH
strIShveva prakR^itipradhAnatanuShu svaM vIryamAsi~nchati |
yo.atyantaM shivadaH samastajagatAM sa tvaM prasAdArthinAM
asmAkaM cha shivo bhavAdya sumanA hAnirna tattAvatA || 182||
dhanyAH syAma vayaM cha kiM cha parame vR^ikShe kvachiddUrato
nikShapyAyudhajAlametadakhilaM pApAtmanAM bhIShaNam |
saumyaM bAhuvibhUShaNaM karatale bibhratpinAkaM dhanuH
shAntaM kAntamupetya tArakavapuH kR^ittiM vasAnaH shubhAm || 183||
vaiyAghraM vanamadhyataH karuNayAbhyAgachCha pAhi svakAn
rakShannaH puratashcharAcharahitaM shrIrudra shambho prabho |
arthaprANa vipatti saMshayabhayakleshAri chora vyathA\-
bhItighnaM hR^idi bhAvayantamanishaM shambhuM svarUpaM svayam || 184||
agryaM yAntamatIva sundaratanuM sanma~NgalaikAlayaM
sAnandaM cha pinAkinaM vanacharAkAraM yuvAnaM bhaje |
lauhityena vivarjitaM girijayA yasyA~NgamardhaM sadA
yaM vedAntagiro vadanti satatAsa~NgohyayaM pUruShaH || 185||
kAluShyeNa vivarjitaH shiva iti khyAtashcha yaH pUjitaH
sadbhiH sadvividhAmayArtibhayahR^itsaMsAraghorApadAm |
yastvaM khaNDayitAsi kANDanivahAn chaNDAn prakIryAbhitaH
daNDyAn daNDayasi svayaM cha harasi svairbhIShaNairAyudhaiH || 186||
j~nAnaishvaryayashaH suvIryakaruNAvairAgyabhAgyAmita\-
shrIbhiH pUrNataro.asti yo hi bhagavAnasmai namaste.adhunA |
yAste santu sahasramAshugatayastA hetayo yAyinaH
shAstuM ki~nchidadhikShipantvaghavatAM madye madanyaM tathA || 187||
bhaktA eva vayaM bhavAma bhavataH sarvAtmanA sAgarAH
tvaddhyAnaikaparAyaNAH sumanaso nityaM samAshAsmahe |
tiryagjantu mahAjalUkajanatApakShyAdi siddhipradaM
devaM sarvajayapradaM cha bhajatAM shambhuM pulastyArchitam || 188||
saskandaM jagadambayAyutatanuM devAdirudraiH stutaM
sAmbaM klR^iptavivAhama~NgalavidhiM smerAnanaM bhAvaye |
pratyekaM cha sahasradhA bahusahasrANAM sahasrANi yaH
santyatyuttamahetayastava shivAsa~NkhyeyabAhuShviha || 189||
tatsa~NkShepaNatatsamudbhavamahAhiMsAvidhAnAdike\-
ShvIshAno bhagavan vibhAsi yadi tachchitraM kimatra prabho |
puNyApuNyakR^itAM parasparamapi saMj~nAnalakShyaM kShaNAt
lakShIkR^itya tu puNyapApavashatastannigrahAnugrahe || 190||
hartuM bhartumasheShalokamapi yastvaM bhAvikImIshatAM
dhatse.ataH karuNAvashAchCharaNagAMstrAtuM sadA.asmAn prati |
hetInAM tu mukhAni chAnabhimukhAnyasmAkamasmaddviShAM
nityaM chAbhimukhAni deva kuru naH saukhyapradAni prabho || 191||
devopadravarAjapIDanamahAkAntArachoravyathA\-
bhItighnaM hR^idi nAradena muninA dhyAtaM satAM sarvadA |
rudraM sarvamanoj~nabhUShaNadharaM sarvAyudhAla~NkR^itaM
sarvAghaughaharaM cha sarvajagatAmIshaM maheshaM bhaje || 192||
kalpAdau vidhinA.arthitena kR^ipayA rudreNa ye nirmitA\-
stuttulyAkR^itayastadAyudhadharAstatulyabhUShAstathA |
lokAnugrahanigrahaikanipuNAH karmAnurUpaM phalaM
yachChanto nivasanti ye cha paritaH sUryAnilAgnyaMshajAH || 193||
vishvedevagaNAH prasiddhasuguNAstejomarutpArthivA\-
shchArA ye cha maheshvarasya bahudhA nityaM vibhaktAkR^iteH |
bhaktAnugrahatatparasya bahavaH sAnugrahAnigrahA
ye bhaktAH shivabhAvanAmadhigatA rudrAH surUpA hi te || 194||
vaiyAghrAjinabhogibhUShaNabhR^ito bAlenduga~NgAjaTA\-
chUDAla~NkR^itamastakAstriNayanAH sAmbAH sa nandIshvarAH |
ye devAnucharAshcha devasadR^isho devA gaNAdhIshvarAH
sarve.amI bhajatAM shivAtmakatayA saMsArarugdrAvakAH || 195||
pratyekaM tu sahasrasho bahusahasrANAM sahasrANi ye
rudrAshchAdhivasantyadhIshvara tathA bhUmyantarikShe divi |
ye sarvatrabhavA bhavena sadR^ishA asminmahatyarNave
vR^iShTirnaH paripUrNameghanivahaiH pUrNe.antarikShe.api cha || 196||
ye hAlAhalanIlakaNTha vapuShaH sharvAH kShamAyAmadhaH
pAtAle pracharanti ye.api cha divi rudrAH sadopAshritAH |
tAnevaM stubhiH sadaiva natibhishchArAdhayanto vayaM
teShAmadya sahasrayojanamite dUre sthitAnAmapi || 197||
arvAktatparataH purashcha paritaH sajjAni dhanvAnyalaM
vijyAnyAtanumaH sukhAya satataM kShemAya yogAya cha |
rAj~nAM shatruvinAshanaM praNamatAM ghorAbhichArakriyA\-
sambhUtAdhanivAraNaM cha muninA durvAsasArAdhitam || 198||
bibhrANaM trishikhaM pradIptavapuShaM rudraM jvalanmUrdhajaM
bhogIndrAbharaNaM bhaje bhayaharaM daMShTrAkarAlAnanam || 199||
 \- \-
ayamanuvAkachatuShTayasya rudra\-
priyAyogasya upAsanAvisheShaH |
athavA chAShTatanostathAShTahR^iShTo
navamo.ayaM dashamaH shatAnvitAnAm ||
 \- \-

ye vR^ikSheShviha kAlakarmavashatashchAvR^ishchyamAneShvimAM
kShmAmAvR^itya charAcharAtmaratayA tiShThanti jAveShu ye |
antavyAptajaganti ye.akhilajagatpIDAkarANAM sadA (? )
hantAro.asitakandharA bahuvidhA ye nityaniShkalmaShAH || 200||
bhUtAnAM pR^ithivIjalAgnimarudAkAshAtmanAM ye dhiyA
sthitvA teShu jaganti pAnti paritastatkAryabhUtaiH phalaiH |
nAnAbhUtagaNAdhipAshcha vividhA jvAlAjvalanmUrtayaH
ye vA vItashikhA vichitravishikhA ye vA kapardojjvalAH || 201||
ye.anneShu chaturvidheShu cha tadA ye ye purAnnAdanA
vyApArArhavichitrarUpachaShakA mArgAdike saMsthitAH |
pApiShThAn phalatolanena vividhaM pApAnurUpaM janAn
nyUnAdhikyavichitradhAtugatibhirvidhyanti cha vyAdhibhiH || 202||
teShAmadya sahasrayojanamite dUre sthitAnAM vayaM
vijyAnyAtanumo dhanUMShi satataM kShemAya yogAya cha |
rAj~nAM shatrunR^ipAdimAraNamahAsiddhipradaM tAdR^ishAM
bhaktAnAmakhilAghasa~NghaharaNaM shrIdevalArAdhitam || 203||
rudraM bhIShaNabhogibhUShaNadharaM daMShTrAkarAlAnanaM
bibhrANaM trishikhaM pradIptavapuShaM dhyAyejjvalanmUrdhajam |
ye.amI laukikavaidikAdividhayA nAnAvidhAnAM pathAM
sarveShAmapi rakShakA bahuvidhAH karmAnurUpeNa ye || 204||
ye dharmaM cha tatho.atha deva pathibhishchordhvaM cha tiryaggati\-
shchAdhastAchcha nayanti ye sukR^itinAM bhaktyA paraM dhyAyatAm |
kartR^itvAdimatiprasaktavividhavyApArashUrasthira\-
dhyAnApAstasamastakalmaShamanaH sAkShAtkR^itabrahmaNAm || 205||
IshanyastasamastadurbharamahAsaMsArabhArAtmanAM
annaM dAtumaraM tvanaM karuNayA haste dadhAnAH sadA |
ye yudhvA yuvabhiH khalairatibalaiH sampIDyamAnAn sadA
saMrakShanti haranti karmavashatashchAyuH pareShAmapi || 206||
ye tIrthAni charanti tIrthaphaladAstIrthadviShaHsantataM
hantuM bANakR^ipANakArmukasR^ikAvanto niSha~NgodyatAH |
teShAmadya sahasrayojanamite dUre sthitAnAM vayaM
vijyAnyAtanumo dhanUMShi satataM kShemAya yogAya cha || 207||
vidvadvallabhasarvashaktavarasatputrapradaM dhyAyatAM
saumukhyena samastatIrthaphaladaM shrIdevalArAdhitam |
rudraM bhIShaNabhogibhUShaNadharaM daMShTrAkarAlA naM
bibhrANaM trishikhaM pradIptavapuShaM dhyAyejjvalanmUrdhajam || 208||
etAvadbhirihoditairdashamahAmantraiH prakAshIkR^itA\-
shchaitAvadbhiriyattayA.aparimitA bhUmyantarikShe sthitAH |
ye trailokyamatItya sarvabhuvanavyAptAshcha sarvAtmakAH
bhUyAMsashcha vasanti ye dashadisho rudrAH samAkramya cha || 209||
teShAmeva sahasrayojanamite dUre sthitAnAM vayaM
vijyAnyAtanumo dhanUMShi satataM kShemAya yogAya cha |
vidyAputrapurA~NganAptisumahAmAta~Ngatu~NgAshvadaM
divyasyandanadivyasasyasumahIbhogAdihemArthadam || 210||
rudraM bhasmavibhUShaNaM phaNigaNAbhUShaM jvalatkandharaM
chandrodbhAsishikhaM pradIptavapuShaM dhyAyet trishUlIkaram |
shrIrudrebhya idaM namaH prathamato vA chaiva vAgbhUtaye
karmaNyapyatha ye vasanti cha pR^ithak bhUmyantarikShAdvayuH || 211||
datvAnnaM bahubhakShaNAdiShu ratAstvAM kAryashauryAdibhiH
pApiShThA gaThabandhanAdijanitakleshAkulAn kurvatAm |
alpAlpairadhikAdhikairmuhurakAlotthairmarudvarShaNaiH
yeShAM pIDayatAM jagatyadhikR^itAM annaM cha vAsastathA || 212||
varShantyeShu samUhavattriNayamapyetajjagajjIvanaM
hiMsAsAdhanamAsa duShkR^itakR^itAM kShemAya nityaM samAm |
tebhyo naH purato vayaM tviha dasha prAchIHpratIchIrdisho\-
rdhvArogyAya shivAya kAyikanamaskArAtmikAH sarvataH || 213||
kR^itvA chintitasiddhaye.atha manasA tebhyo namaskurmahe
he rudrAH sukhayantu naH praNamataste.amI bhajanto vayam |
niShpApAH stutipUrNakAnatishatairyuShmatkR^ipAbhAjanAH
tasmAdasmadariM tu pApapuruShaM hetuM sa yatnAchchirAt || 214||
yaM dviShmaH paripIDayannanudinaM dAridryarogAdibhiH
yo.asmAn dveShTi tameva dantanivahaiH kAlAtmanAvA dadhA\-
myetAMstAn sukhitAn sadA kuru janAnpUrNAnsadA rakSha naH || 215||
kAlaj~nAnadamannadaM praNamatAM jAtismaratvapradaM
sarvAbhIShTadamAtmanAtmani nijAtmAnaM bhajantaM sadA |
rudraM devamanantarudrasahitaM vishveshvaraM vishvata\-
shchakShuH shrotrakarA~NghrimUrjitamahAkAlatmakaM chintaye || 216||

|| iti shrIshivarahasyAntargate skandaproktaM rudrArthavivaraNaM sampUrNam ||

\- || shrIshivarahasyam | dvAdashAMshaH | adhyAyaH 26\-33 rudrArthavivaraNam | vAvR^ittashlokAH ||
##
- .. shrIshivarahasyam . dvAdashAMshaH . adhyAyaH 26-33 rudrArthavivaraNam . vAvRRittashlokAH ..

Notes:

Skanda ##skanda## delivers an exposition on Rudrārthaḥ ##rudrArthaH## - that is meant to capture the deeper meanings of the respective Anuvāka-s ##anuvAkAH## of ŚrīRudram ##shrIrudram## of the Yajurvedaḥ ##yajurvedaH##.

Most of the Śloka-s are composed in ŚardūlavikrīditaCandaḥ ##shArdUlavikrIDitaChandaH##

Selected Śloka-s from the Chapters 26-33 are collated on this page and renumbered for seamless reading.##

##
Proofread by Ruma Dewan 

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}