% Text title            : Shantivilasah by Neelakantha Dikshita
% File name             : shAntivilAsaH.itx
% Category              : shiva, nIlakaNThadIkShita
% Location              : doc\_shiva
% Author                : Nilakantha Dikshitar
% Latest update         : March 13, 2022
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. ShAntivilasah ..}##
\itxtitle{.. shAntivilAsaH ..}##\endtitles ##
|| shrIH ||
vaMshe kasminnajaniShi kayoH putnatAmagrahIShaM
      katyauShaM tadapi katidhA tachcha sadbhayaH katibhyaH |
kiM nAdrAkShaM vyasanamapi vA kiM sukhaM nAnvabhUvaM
      nopAraMsIttadapi hR^idayaM kIdR^isho me vipAkaH || 1||
pAdau me staH paramachaturau kIkaTAneva gantuM
      vAgapyAste nibhR^itamanR^itAnyeva vaktuM vachAMsi |
mImAMsante mama cha matayo doShadR^iShTau pareShAM
      pA~NgurmUkaH pashurapi bhavAmyAtmanIne tu kR^itye || 2||
yAmArAddhuM na gaNitamidaM jIvitaM vA dhanaM vA
      yasyAH prItirmanasi kalitA jyAyasI mokShato.api |
saivedAnIM vayasi chalite samprahINe cha vitte
      tUlAyApi tripurahara mAM manyate naiva bhAryA || 3||
kR^itvA pApAnyapi khalu mayA poShitAH shaishave ye
      nidrAhArAvapi vijahatA shikShitA ye kalAsu |
prAdurbhUtAH svayamiva hi te prAktanAdR^iShTalabdha\-
      praj~nonmeShA iva cha tanayA na smarantyAtmano.api || 4||
dArAH putrAH paramasuhR^ido bAndhavAH ki~NkarA vA
      svapnAvasthAsvapi cha virahaM ye mayA ne kShamante |
atyAsanne tapanatanayasyAj~nayA dUtavarge
      teShveko.api smarahara na me gantumanvasti jantuH || 5||
rAj~no bhR^ityA yadi parichitA deshikasyaiSha lAbho
      rAjadvAre yadi khalu gataM naimishe tatpraviShTam |
rAjA dR^iShTo.atha cha yadi paraM brahma sAkShAtkR^itaM ta\-
      tyakto deho yadi nR^ipakule mAdR^ishAM so.apavargaH || 6||
yattIrthAnAmaTanamatha yatpUjanaM devatAnA\-
      miShTApUrtavyasanamapi yadyachcha dAkShyaM kalAsu |
arthaprAptyaupayikamakhilaM jAyate mAdR^ishAM ta\-
      tte chApyarthA dharaNisharaNA bhUmibhR^itsAtkR^itA vA || 7||
A kaumArAdgurucharaNashushrUShayA brahmavidyA\-
      svAsthAyAsthAmahaha mahatImarjitaM kaushalaM yat |
nidrAhetonishi nishi kathAH shR^iNvatAM pArthivAnAM
      kAlakShepaupayikamidamapyAH kathaM paryaNaMsIt || 8||
ChAyA toyaM vasanamashanaM vAhanaM dIpikA vA
      ketuM yasminkila na sulabhaM ki~nchidapyeShu martyaiH |
tasmindUre pathi tanubhR^itAM sarvathaivAbhigamye
      prasthAnArhaM kamapi tu vidhiM ghasmarA na smarAmaH || 9||
AkarNyante tapanatanayagrAmasaMlApaghoShA
      mandaM mandaM hasati nihitaH kAlapAsho.api kaNThe |
ApR^ichChyante kR^itajigamiShAsambhramAH prANavAtA
      naivedAnImapi viShayavaimukhyamabhyeti chetaH || 10||
chakShuShyandhe chalati dashane shmashruNi shvetamAne
      sIdatya~Nge manasi kaluShe kampamAne karAgre |
dUtairetairdinakarabhuvaH shashvadudbodhyamAnA\-
      svAtuM dehaM tadapi bhiShajAmeva sAntvaM vadAmaH || 11||
shAnto vahnirjaTharapiThare saMsthitA kAmavArtA
      dhAvaM dhAvaM dishi dishi shanairindriyAshvA nipetuH |
evaM daivAduparamamagAdeSha me vairivarga\-
      shchetastvekaM na vashamayate kiM karomi kva yAmi || 12||
nAnopAyairdishi dishi dhanAnyarjayitvA vyayitvA
      samyaksampAditamidamaho sthaulyamekaM sharIre |
shrutvA shrutvA bahujanamukhAdAyuShaitAvatApi
      prAptaM darshAvadhitimiravadgADhamaj~nAnamekam || 13||
kekShante mAM kvachana shayitaM ki~NkarA daNDapANe\-
      rIkShantAM vA tadapi mayi kiM kuryuruddAmavR^itte |
kuryuH ki~nchitprasabhamapi vA ghAtayiShyAmi rAj~ne\-
      .atyantardhairyaM paramiha vahannantakaM na smarAmi || 14||
vedA vA syurvitathavachanA vismaredIshvaro vA
      dharmAdharmasthitivirachanAmantako vA mR^iShA syAt |
nityo vA syAmahamiti bahUnullikhantaH samAdhI\-
      nmedovR^iddhayA muditamanasaH sarvato nirvR^itAH smaH || 15||
yAme yAme galati vapuShaH sraMsate sandhibandhaH
      shvAse shvAse.api cha vichalati kShIyate dIrghamAyuH |
bhukte bhukte.api cha sukhalave lupyate puNyarAshiH
      kR^itye kR^itye niravadhi punarvardhate pAtakaM naH || 16||
gantavyo.adhvA sakaladuravasthAnasampAtabhUmi\-
      rgatvA dR^ishyastribhuvanajanAyuShkalAntaH kR^itAntaH |
dR^iShTvA labhyA nirayajanitA yAtanA naikabhedA
      vismR^ityedaM nikhilamapi tu vyarthamAyurnayAmaH || 17||
kAle kAle na kimupanataM bhu~njate bhojyajAtaM
      gR^ihNantyambho na kimatha na kiM saMvishanti kShapAsu |
puShNanti svAnna kimu pR^ithukAnstrIShu kiM no ramante
      kR^ityAkR^ityavyapagatadhiyAM kastirashchAM cha bhedaH || 18||
kR^ichChrAllabdhaM dhanamapi shatAMshAdhikaprAptilobhA\-
      tpatre ki~nchillikhitamupalabhyaiva sarvaM tyajAmaH |
shAstraiH siddhe bahushataguNAdhikyalAbhe paratra
      vyarthAsha~NkAkaluShamanaso notsR^ijAmo.arthalesham || 19||
jIrNe rugNe vikalakaraNe shatrubhirvA gR^ihIte
      svasminko.artho bhavati sukhadaH kashcha kAmaprasa~NgaH |
mA bhUdetatsakalamathavA svAyuShaH kiM pramANaM
      nishchityaivaM duritanichayashchIyate nirvisha~NkaiH || 20||
AyAntyagre nanu tanubhavA uttamarNA iveme
      shayyAlagnAH phaNabhR^ita ivAbhAnti dArA idAnIm |
kArAgehapratimamadhunA mandiraM dR^ishyate me
      tatra sthAtuM prasajati mano na kShaNaM na kShaNArdham || 31||
jAtaM jAtaM gatamapi gataM bAlyato laulyato vA
      netaHstheyaM kShaNamapi gR^ihe mu~nchataH ko muhUrtaH |
ityatyantavyavasitadhiyo niHsaranto.api gehA\-
      dAvartante jhaTiti rudatAM sAntvahetoH shishUnAm || 22||
naiva brUmo vayamatithayo.abhyAgatA bandhuvargA
      dInAnAthAH suhR^ida iti ye teShu kAryA dayeti |
yaM tvaM poShyaM manasi kuruShe nityamAtmAnamekaM
      janmanyasminniva bibhR^ihi taM sarvadetyullapAmaH || 23||
ko nu vyAsaH ka iva sa manuH ko nvasau yAj~navalkyo
      yairuddhuShTaM hitamasakR^idasmAsu pitreva putre |
pashyAmastAnnirupadhikR^ipAsAgarA.NllokabandhU\-
      npashyAmo.asmAnniravadhitamaHkShmAdharAnbrahmabandhUn || 24||
yattAmisra narakakuhare yadbahishchakravAlA\-
      dyatpAtAle yadapi dharaNau vArShikIShu kShapAsu |
rUDhaM gADhaM tama iti samastaM cha tachchintyamAnaM
      nAsmAkAntaHkaraNatamaso dAsabhAve.api yogyam || 25||
sarvAnarthaprathamakaraNe sarvabhAvairjihAsye
      dehe moho yadi pariNataH poShaNIyo mayeti |
AstAmevaM vapuridamivAgAmi chAsmAkameve\-
      tyeShApyAstAM matiriti paraM dharmashAstreShu ghoShaH || 26||
kAmI kAmavraNaparigataH kAminIreva hitvA
      bhu~Nkte pashchAdapagatabhayaM kAminInAM sahasram |
ittha~NkAraM viShayasukhabhogaikatAnairnaraira\-
      pyasmindehe katipayadinAnyeSha bhogo vivarjyaH || 27||
nyAyyAdarthAdapi kimadhikaM labhyamunmArgavR^ittyA
      vaidhAdannAdapi kimadhikaM paryudasteShu bhojyam |
bhAryAbhogAdapi bhavati kaH paNyakAntAsu bhogaH
      prAyo neti shrutiviShayatA vishvamAdhuryahetuH || 28||
AstikyaM cheddhanamakhilamapyarthisAtkartumarhaM
      nAstikyaM chettadapi sutarAM bhogahetorapAsyam |
aspR^iShTvApi svayamatirahaH sthApyate yattadanta\-
      stasminhetuH ka iti nibhR^itaM tarkayAmo na vidmaH || 29||
shvAnaH puchChA~nchalakuTilatAM sUkarAH kukShipoShaM
kIshA dantaprakaTanavidhi gardabhA rUkShaghoSham ||
mA vakShaHshvayathumapi cha strIShu dR^iShTvA ramante
tatsaundaryaM kimiti phalitaM tattadaj~nAnato.anyat || 30||
rantuM prApto dashati dashanairAnanaM chetpriyAyA
      bhoktuM prAptaH kimiti na dashedagrahastaM pradAtuH |
itthaM vyakte hR^idayajanuShaH pAmaronmAdakatve
      hAtuM sadyaH prabhavati na ko.apyantato lajjituM vA || 31||
dArAH putrAH shayanamashanaM bhUShaNAchChAdane vA
      yachchedR^ikShaM pumabhilaShitaM teShu mAshabdikaH kaH |
kiM tveteShAM bhavati niyamaH sevane ko.api ko.api
      dveShastasminnapi yadi bhavettatra vaktA kR^itAntaH || 32||
vedAbhyAsavyasanarasikaiH sthIyate tAvatA kiM
      sUkShmA buddhiH shrutamiva vishatyashrutaM tAvatA kim |
jalpArambhe jayati niyataM vAdinastAvatA kiM
      nirvedArtaM na yadi hR^idayaM shAntimabhyeti puMsaH || 33||
yastvatyantavyavasitamatiH sa~njighR^ikSheta dharmaM
      khaTvA~NgAdArava na kimalaM tasya yAmArdhamAyuH |
duShpANDityAdapahR^itamatiryaH punaH saMshayAtmA
      kasmai tasya prabhavatu vR^ithA kAkavaddIrghamAyuH || 34||
arthA na syuryadi vijahimo dharmamarthaikasAdhyaM
      kAyakleshaiH katikatividhaH sAdhanIyo na dharmaH |
kAyaH shrAnto yadi bhavati kastAvatA dharmalopa\-
      shchittaM dattvA sakR^idapi shive chintitaM sAdhayAmaH || 35||
svenaivoktaM nigamavachasA bodhanIyAstu jIvA
      jIvairevetyapi cha munibhiH kAritaM dharmashAstram |
utpashyantu svayamiti bhavo dAruNashchAlyate.asA\-
      vadyApi smo yadi khalu jaDAH kiM vidhattAM shivo.api || 36||
yenAchAntAH salilanidhayo yena sR^iShTA pratidyauH
      shastrANyastrANyapi kabalitAnyekayA yasya yaShTyA |
kastAdR^ikShaH prabhavatu jano devabhUdevavarge
      kAlaH kITAniva kavalayAmAsa tAnapyayatnam || 37||
kAyasthairya karaNapaTutAM bandhusampattimarthaM
      chAturyaM vA kimiva hi balaM bibhrato nirbharAH smaH |
antyaH shvAsaH kimayamathavopAntya ityAmR^ishanto
      vismR^ityeshaM nimiShamapi kiM vartituM pArayAmaH || 38||
abhyasyAdau shrutimatha gR^ihaM prApya labdhvA mahArthA\-
      niShTvA yaj~nairjanitatanayaH pravrajedAyuSho.ante |
ityAchaShTe ya iha sa manuryAj~navalkyo.api vA me
      tAvatkAlaM pratibhavati chedAyuShastatpramANam || 39||
annaM dhAnyaM vasu vasumatItyuttareNottareNa
      vyAkR^iShyante paramakR^ipaNAH pAmarA yadvadittham |
bhUmiH khaM dyaurdruhiNagR^ihamityuttareNottareNa
      vyAmuhyante vimalamatayo.apyasthireNaiva dhAmnA || 40||
prAyashchittaM sakR^idupanate vA pramAdAtkR^ite vA
      bhUyo bhUyo.apyavahitataraiH sAdhite kaH samAdhiH |
kAruNyAbdhiryadi puraharaH satsu kAmaM dayeta
      bhraShTe mAdR^ishyapi sa dayate chetkShato dharmasetuH || 41||
sAdhyA shambhoH kathamapi dayetyapyasAdhyopadeshaH
      kopaM tasya prathamamapanudyaiva sAdhyaH prasAdaH |
kopo varNAshramaniyamitAchAranirla~NghanotthaH
      shAntiM neyaH sa kathamadhunApyavyavasthApravR^ittaiH || 42||
iShTApUrtairnigamapaThanaiH kR^ichChUchAndrAyaNAdyaiH
      svAminnanyairapi tava manaH kAmamAvarjayema |
madhye madhye yadi na nipatetkarmaNA choditAnAM
      j~nAnaM shraddhetyubhayamapi no jAtivairyargaleva || 43||
nirmaryAdaH paramachapalo niHsamAj~nAnarAshi\-
      rmAdR^ikSho.anyaH ka iti bhuvane mArgaNIyaM tvayaiva |
IdR^ikShe.api kvachidiha dayeyeti kautUhalaM che\-
      tsvAminvishveshvara tava bhavaM nistareyaM tadAham || 44||
pashchAttaptAH kathamapi vidheH ki~NkarIbhUya kurmaH
      sevAM shambhoriti cha niyamaM vApi sa~NkalpayAmaH |
AyuH kiM me kimiva karaNaM dustare sa~NkaTe.asmi\-
      nsvAmingaurIramaNa sharaNaM nastvameva tvameva || 45||
samya~NyuktAstribhirapi malaishchidvikAsaikarUpA\-
      stvannidhyAnapravaNamanasaH sUrayastvatpure ye |
teShAM sandarshayitumaparij~nAtapUrvaM kadAchi\-
      jjantuM mugdhaM shiva nayasi kiM vishvapAraM puraM mAm || 46||
diShTyA labdhaM dvijavarakule janma tatrApi diShTyA
      dharmAdharmasthitiravagataiva prasAdAdgurUNAm |
janmanyasminnapi yadi na me sambhavedAstikatvaM
      nistAraH kiM nirayabhavanAtsarvamokShe.api labhyaH || 47||
bhavye dehe paTuShu karaNeShvAlaye shrIsamR^iddhe
      kaumArAnte vayasi kathamapyapravR^itte cha duHkhe |
pratyakpuShpIprasavavidhayA yasya puMso nisargA\-
      tpratyagvaktraM bhavati hR^idayaM kastato.apyasti dhanyaH || 48||
nAhaM yAche padamuDupaternAdhikAraM maghono
      nApi brAhmIM bhuvanagurutAM kA kathAnyaprapa~nche |
anyasyAnyaH shriyamabhilaShannastu kastasya loko
      mahyaM shambho disha masR^iNitaM mAmakAnandameva || 49||
A garbhAdA kulaparivR^iDhAdA chaturvaktrato.api
      tvatpAdAbjaprapadanaparAnvetsi nashchandramaule |
mAyAyAshcha prapadanapareShvapravR^ittiM tvamAttha
      svAminnevaM sati yaduchitaM tatra devaH pramANam || 50||
daNDaM dhatte sakalajagatAM dakShiNo yaH kR^itAnto
      nAmApyasya pratibhayatanornopagR^ihNImahIti |
prAptAH smamtaM nigamavachasAmuttaro yaH kR^itAnto
      yadvA tadvA bhavatu na punastasya pashyema vaktram || 51||

iti shrInIlakaNThadIkShitavirachitaM shAntivilAsaH sampUrNaH ||

##
Proofread by Rajesh Thyagarajan

\medskip\hrule\obeylines

Please send corrections to sanskrit at cheerful dot c om
Last updated \today
https://sanskritdocuments.org

\end{document}