% Text title : shivAnanda laharI % File name : shivaananda.itx % Category : laharI, shiva, shankarAchArya % Location : doc\_shiva % Author : ShankarAchArya % Transliterated by : P. P. Narayanaswami swami at math.mun.ca % Proofread by : P. P. Narayanaswami, Rajesh Thyagarajan, Kavitha, Rajani Arjun Shankar % Latest update : June 16, 2023 % Send corrections to : sanskrit at cheerful dot c om % % This text is prepared by volunteers and is to be used for personal study % and research. The file is not to be copied or reposted for promotion of % any website or individuals or for commercial purpose without permission. % Please help to maintain respect for volunteer spirit. % \documentstyle[11pt,multicol,itrans]{article} #include=ijag.inc #endwordvowel=.h \portraitwide \parindent=100pt \let\usedvng=\Largedvng % for 1 column \pagenumbering{itrans} \def\engtitle#1{\hrule\medskip\centerline{\LARGE #1}} \def\itxtitle#1{\medskip\centerline{\LARGEdvng #1}\medskip\hrule} \def\endtitles{\medskip\obeyspaceslines} %% \begin{document} \engtitle{.. Shivananda LaharI ..}## \itxtitle{.. shrIshivAnandalaharI ..}##\endtitles ## kalAbhyAM chUDAla~NkR^itashashikalAbhyAM nijatapaH\- phalAbhyAM bhakteShu prakaTitaphalAbhyAM bhavatu me | shivAbhyAmastokatribhuvanashivAbhyAM hR^idi puna\- rbhavAbhyAmAnandasphuradanubhavAbhyAM natiriyam || 1|| galantI shambho tvachcharitasaritaH kilbiSharajo dalantI dhIkulyAsaraNiShu patantI vijayatAm | dishantI saMsArabhramaNaparitApopashamanaM vasantI machchetohradabhuvi shivAnandalaharI || 2|| trayIvedyaM hR^idyaM tripuraharamAdyaM trinayanaM jaTAbhArodAraM chaladuragahAraM mR^igadharam | mahAdevaM devaM mayi sadayabhAvaM pashupatiM chidAlambaM sAmbaM shivamativiDambaM hR^idi bhaje || 3|| sahasraM vartante jagati vibudhAH kShudraphaladA na manye svapne vA tadanusaraNaM tatkR^itaphalam | haribrahmAdInAmapi nikaTabhAjAmasulabhaM chiraM yAche shambho shiva tava padAmbhojabhajanam || 4|| smR^itau shAstre vaidye shakunakavitAgAnaphaNitau purANe mantre vA stutinaTanahAsyeShvachaturaH | kathaM rAj~nAM prItirbhavati mayi ko.ahaM pashupate pashuM mAM sarvaj~na prathitakR^ipayA pAlaya vibho || 5|| ghaTo vA mR^itpiNDo.apyaNurapi cha dhUmo.agnirachalaH paTo vA tanturvA pariharati kiM ghorashamanam | vR^ithA kaNThakShobhaM vahasi tarasA tarkavachasA padAmbhojaM shambhorbhaja paramasaukhyaM vraja sudhIH || 6|| manaste pAdAbje nivasatu vachaH stotraphaNitau karau chAbhyarchAyAM shrutirapi kathAkarNanavidhau | tava dhyAne buddhirnayanayugalaM mUrtivibhave paragranthAn kairvA paramashiva jAne paramataH || 7|| yathA buddhiH shuktau rajatamiti kAchAshmani maNi\- rjale paiShTe kShIraM bhavati mR^igatR^iShNAsu salilam | tathA devabhrAntyA bhajati bhavadanyaM jaDajano mahAdeveshaM tvAM manasi cha na matvA pashupate || 8|| gabhIre kAsAre vishati vijane ghoravipine vishAle shaile cha bhramati kusumArthaM jaDamatiH | samarpyaikaM chetaH sarasijamumAnAtha bhavate sukhenAvasthAtuM jana iha na jAnAti kimaho || 9|| naratvaM devatvaM nagavanamR^igatvaM mashakatA pashutvaM kITatvaM bhavatu vihagatvAdi jananam | sadA tvatpAdAbjasmaraNaparamAnandalaharI\- vihArAsaktaM cheddhR^idayamiha kiM tena vapuShA || 10|| vaTurvA gehI vA yatirapi jaTI vA taditaro naro vA yaH kashchidbhavatu bhava kiM tena bhavati | yadIyaM hR^itpadmaM yadi bhavadadhInaM pashupate tadIyastvaM shambho bhavasi bhavabhAraM cha vahasi || 11|| guhAyAM gehe vA bahirapi vane vA.adrishikhare jale vA vahnau vA vasatu vasateH kiM vada phalam | sadA yasyaivAntaHkaraNamapi shambho tava pade sthitaM chedyogo.asau sa cha paramayogI sa cha sukhI || 12|| asAre saMsAre nijabhajanadUre jaDadhiyA bhramantaM mAmandhaM paramakR^ipayA pAtumuchitam | madanyaH ko dInastava kR^ipaNarakShAtinipuNa\- stvadanyaH ko vA me trijagati sharaNyaH pashupate || 13|| prabhustvaM dInAnAM khalu paramabandhuH pashupate pramukhyo.ahaM teShAmapi kimuta bandhutvamanayoH | tvayaiva kShantavyAH shiva madaparAdhAshcha sakalAH prayatnAtkartavyaM madavanamiyaM bandhusaraNiH || 14|| upekShA no chet kiM na harasi bhavad.hdhyAnavimukhAM durAshAbhUyiShThAM vidhilipimashakto yadi bhavAn | shirastadvaidhAtraM na na khalu suvR^ittaM pashupate kathaM vA niryatnaM karanakhamukhenaiva lulitam || 15|| viri~nchirdIrghAyurbhavatu bhavatA tatparashira\- shchatuShkaM saMrakShyaM sa khalu bhuvi dainyaM likhitavAn | vichAraH ko vA mAM vishada kR^ipayA pAti shiva te kaTAkShavyApAraH svayamapi cha dInAvanaparaH || 16|| phalAdvA puNyAnAM mayi karuNayA vA tvayi vibho prasanne.api svAmin bhavadamalapAdAbjayugalam | kathaM pashyeyaM mAM sthagayati namassambhramajuShAM nilimpAnAM shreNirnijakanakamANikyamakuTaiH || 17|| tvameko lokAnAM paramaphalado divyapadavIM vahantastvanmUlAM punarapi bhajante harimukhAH | kiyadvA dAkShiNyaM tava shiva madAshA cha kiyatI kadA vA madrakShAM vahasi karuNApUritadR^ishA || 18|| durAshAbhUyiShThe duradhipagR^ihadvAraghaTake durante saMsAre duritanilaye duHkhajanake | madAyAsaM kiM na vyapanayasi kasyopakR^itaye vadeyaM prItishchettava shiva kR^itArthAH khalu vayam || 19|| sadA mohATavyAM charati yuvatInAM kuchagirau naTatyAshAshAkhAsvaTati jhaTiti svairamabhitaH | kapAlin bhikSho me hR^idayakapimatyantachapalaM dR^iDhaM bhaktyA baddhvA shiva bhavadadhInaM kuru vibho || 20|| dhR^itistambhAdhArAM dR^iDhaguNanibaddhAM sagamanAM vichitrAM padmADhyAM pratidivasasanmArgaghaTitAm | smarAre machchetaHsphuTapaTakuTIM prApya vishadAM jaya svAmin shaktyA saha shiva gaNaiH sevita vibho || 21|| pralobhAdyairarthAharaNaparatantro dhanigR^ihe praveshodyuktaH san bhramati bahudhA taskarapate | imaM chetashchoraM kathamiha sahe sha~Nkara vibho tavAdhInaM kR^itvA mayi niraparAdhe kuru kR^ipAm || 22|| karomi tvatpUjAM sapadi sukhado me bhava vibho vidhitvaM viShNutvaM dishasi khalu tasyAH phalamiti | punashcha tvAM draShTuM divi bhuvi vahan pakShimR^igatA\- madR^iShTvA tatkhedaM kathamiha sahe sha~Nkara vibho || 23|| kadA vA kailAse kanakamaNisaudhe saha gaNai\- rvasan shambhoragre sphuTaghaTitamUrdhA~njalipuTaH | vibho sAmba svAmin paramashiva pAhIti nigadan vidhAtR^INAM kalpAn kShaNamiva vineShyAmi sukhataH || 24|| stavairbrahmAdInAM jayajayavachobhirniyaminAM gaNAnAM kelIbhirmadakalamahokShasya kakudi | sthitaM nIlagrIvaM trinayanamumAshliShTavapuShaM kadA tvAM pashyeyaM karadhR^itamR^igaM khaNDaparashum || 25|| kadA vA tvAM dR^iShTvA girisha tava bhavyA~NghriyugalaM gR^ihItvA hastAbhyAM shirasi nayane vakShasi vahan | samAshliShyAghrAya sphuTajalajagandhAn parimalA\- nalabhyAM brahmAdyairmudamanubhaviShyAmi hR^idaye || 26|| karasthe hemAdrau girisha nikaTasthe dhanapatau gR^ihasthe svarbhUjA.amarasurabhichintAmaNigaNe | shirassthe shItAMshau charaNayugalasthe.akhilashubhe kamarthaM dAsye.ahaM bhavatu bhavadarthaM mama manaH || 27|| sArUpyaM tava pUjane shiva mahAdeveti sa~NkIrtane sAmIpyaM shivabhaktidhuryajanatAsA~NgatyasambhAShaNe | sAlokyaM cha charAcharAtmakatanudhyAne bhavAnIpate sAyujyaM mama siddhamatra bhavati svAmin kR^itArtho.asmyaham || 28|| tvatpAdAmbujamarchayAmi paramaM tvAM chintayAmyanvahaM tvAmIshaM sharaNaM vrajAmi vachasA tvAmeva yAche vibho | vIkShAM me disha chAkShuShIM sakaruNAM divyaishchiraM prArthitAM shambho lokaguro madIyamanasaH saukhyopadeshaM kuru || 29|| vastroddhUtavidhau sahasrakaratA puShpArchane viShNutA gandhe gandhavahAtmatA.annapachane barhirmukhAdhyakShatA | pAtre kA~nchanagarbhatAsti mayi ched bAlenduchUDAmaNe shushrUShAM karavANi te pashupate svAmin trilokIguro || 30|| nAlaM vA paramopakArakamidaM tvekaM pashUnAM pate pashyan kukShigatAn charAcharagaNAn bAhyasthitAn rakShitum | sarvAmartyapalAyanauShadhamatijvAlAkaraM bhIkaraM nikShiptaM garalaM gale na gilitaM nodgIrNameva tvayA || 31|| jvAlograH sakalAmarAtibhayadaH kShvelaH kathaM vA tvayA dR^iShTaH kiM cha kare dhR^itaH karatale kiM pakvajambUphalam | jihvAyAM nihitashcha siddhaghuTikA vA kaNThadeshe bhR^itaH kiM te nIlamaNirvibhUShaNamayaM shambho mahAtman vada || 32|| nAlaM vA sakR^ideva deva bhavataH sevA natirvA nutiH pUjA vA smaraNaM kathAshravaNamapyAlokanaM mAdR^ishAm | svAminnasthiradevatAnusaraNAyAsena kiM labhyate kA vA muktiritaH kuto bhavati chet kiM prArthanIyaM tadA || 33|| kiM brUmastava sAhasaM pashupate kasyAsti shambho bhava\- ddhairyaM chedR^ishamAtmanaH sthitiriyaM chAnyaiH kathaM labhyate | bhrashyaddevagaNaM trasanmunigaNaM nashyatprapa~nchaM layaM pashyannirbhaya eka eva viharatyAnandasAndro bhavAn || 34|| yogakShemadhurandharasya sakalashreyaHpradodyogino dR^iShTAdR^iShTamatopadeshakR^itino bAhyAntaravyApinaH | sarvaj~nasya dayAkarasya bhavataH kiM veditavyaM mayA shambho tvaM paramAntara~Nga iti me chitte smarAmyanvaham || 35|| bhakto bhaktiguNAvR^ite mudamR^itApUrNe prasanne manaH\- kumbhe sAmba tavA~NghripallavayugaM saMsthApya saMvitphalam | sattvaM mantramudIrayannijasharIrAgArashuddhiM vahan puNyAhaM prakaTIkaromi ruchiraM kalyANamApAdayan || 36|| AmnAyAmbudhimAdareNa sumanassa~NghAH samudyanmano\- manthAnaM dR^iDhabhaktirajjusahitaM kR^itvA mathitvA tataH | somaM kalpataruM suparvasurabhiM chintAmaNiM dhImatAM nityAnandasudhAM nirantararamAsaubhAgyamAtanvate || 37|| prAkpuNyAchalamArgadarshitasudhAmUrtiH prasannaH shivaH somaH sadguNasevito mR^igadharaH pUrNastamomochakaH | chetaH puShkaralakShito bhavati chedAnandapAthonidhiH prAgalbhyena vijR^imbhate sumanasAM vR^ittistadA jAyate || 38|| dharmo me chatura~NghrikaH sucharitaH pApaM vinAshaM gataM kAmakrodhamadAdayo vigalitAH kAlAH sukhAviShkR^itAH | j~nAnAnandamahauShadhiH suphalitA kaivalyanAthe sadA mAnye mAnasapuNDarIkanagare rAjAvataMse sthite || 39|| dhIyantreNa vachoghaTena kavitAkulyopakulyAkramai\- rAnItaishcha sadAshivasya charitAmbhorAshidivyAmR^itaiH | hR^itkedArayutAshcha bhaktikalamAH sAphalyamAtanvate durbhikShAnmama sevakasya bhagavan vishvesha bhItiH kutaH || 40|| pApotpAtavimochanAya ruchiraishvaryAya mR^ityu~njaya stotradhyAnanatipradakShiNasaparyAlokanAkarNane | jihvAchittashiro~NghrihastanayanashrotrairahaM prArthito mAmAj~nApaya tannirUpaya muhurmAmeva mA me.avachaH || 41|| gAmbhIryaM parikhApadaM ghanadhR^itiH prAkAra udyadguNa\- stomashchAptabalaM ghanendriyachayo dvArANi dehe sthitaH | vidyAvastusamR^iddhirityakhilasAmagrIsamete sadA durgAtipriyadeva mAmakamanodurge nivAsaM kuru || 42|| mA gachCha tvamitastato girisha bho mayyeva vAsaM kuru svAminnAdikirAta mAmakamanaHkAntArasImAntare | vartante bahusho mR^igA madajuSho mAtsaryamohAdaya\- stAn hatvA mR^igayAvinodaruchitAlAbhaM cha samprApsyasi || 43|| karalagnamR^igaH karIndrabha~Ngo ghanashArdUlavikhaNDano.astajantuH | girisho vishadAkR^itishcha chetaH\- kuhare pa~nchamukhosti me kuto bhIH || 44|| ChandaHshAkhishikhAnvitairdvijavaraiH saMsevite shAshvate saukhyApAdini khedabhedini sudhAsAraiH phalairdIpite | chetaHpakShishikhAmaNe tyaja vR^ithAsa~nchAramanyairalaM nityaM sha~NkarapAdapadmayugalInIDe vihAraM kuru || 45|| AkIrNe nakharAjikAntivibhavairudyatsudhAvaibhavai\- rAdhautepi cha padmarAgalalite haMsavrajairAshrite | nityaM bhaktivadhUgaNaishcha rahasi svechChAvihAraM kuru sthitvA mAnasarAjahaMsa girijAnAthA~NghrisaudhAntare || 46|| shambhudhyAnavasantasa~Ngini hR^idArAme.aghajIrNachChadAH srastA bhaktilatAchChaTA vilasitAH puNyapravAlashritAH | dIpyante guNakorakA japavachaHpuShpANi sadvAsanA j~nAnAnandasudhAmarandalaharI saMvitphalAbhyunnatiH || 47|| nityAnandarasAlayaM suramunisvAntAmbujAtAshrayaM svachChaM saddvijasevitaM kaluShahR^itsadvAsanAviShkR^itam | shambhudhyAnasarovaraM vraja mano haMsAvataMsa sthiraM kiM kShudrAshrayapalvalabhramaNasa~njAtashramaM prApsyasi || 48|| AnandAmR^itapUritA harapadAmbhojAlavAlodyatA sthairyopaghnamupetya bhaktilatikA shAkhopashAkhAnvitA | uchchairmAnasakAyamAnapaTalImAkramya niShkalmaShA nityAbhIShTaphalapradA bhavatu me satkarmasaMvardhitA || 49|| sandhyArambhavijR^imbhitaM shrutishiraHsthAnAntarAdhiShThitaM sapremabhramarAbhirAmamasakR^it sadvAsanAshobhitam | bhogIndrAbharaNaM samastasumanaHpUjyaM guNAviShkR^itaM seve shrIgirimallikArjunamahAli~NgaM shivAli~Ngitam || 50|| bhR^i~NgIchChAnaTanotkaTaH karimadagrAhI sphuranmAdhavA\- hlAdo nAdayuto mahAsitavapuH pa~ncheShuNA chAdR^itaH | satpakShaH sumanovaneShu sa punaH sAkShAnmadIye mano\- rAjIve bhramarAdhipo viharatAM shrIshailavAsI vibhuH || 51|| kAruNyAmR^itavarShiNaM ghanavipad\-grIShmachChidAkarmaThaM vidyAsasyaphalodayAya sumanaHsaMsevyamichChAkR^itim | nR^ityadbhaktamayUramadrinilayaM cha~nchajjaTAmaNDalaM shambho vA~nChati nIlakandhara sadA tvAM me manashchAtakaH || 52|| AkAshena shikhI samastaphaNinAM netrA kalApI natA\- .anugrAhipraNavopadeshaninadaiH kekIti yo gIyate | shyAmAM shailasamudbhavAM ghanaruchiM dR^iShTvA naTantaM mudA vedAntopavane vihArarasikaM taM nIlakaNThaM bhaje || 53|| sandhyA gharmadinAtyayo harikarAghAtaprabhUtAnaka\- dhvAno vAridagarjitaM diviShadAM dR^iShTichChaTA cha~nchalA | bhaktAnAM paritoShabAShpavitatirvR^iShTirmayUrI shivA yasminnujjvalatANDavaM vijayate taM nIlakaNThaM bhaje || 54|| AdyAyAmitatejase shrutipadairvedyAya sAdhyAya te vidyAnandamayAtmane trijagataH saMrakShaNodyogine | dhyeyAyAkhilayogibhiH suragaNairgeyAya mAyAvine samyaktANDavasambhramAya jaTine seyaM natiH shambhave || 55|| nityAya triguNAtmane purajite kAtyAyanIshreyase satyAyAdikuTumbine munimanaH pratyakShachinmUrtaye | mAyAsR^iShTajagattrayAya sakalAmnAyAntasa~nchAriNe sAyantANDavasambhramAya jaTine seyaM natiH shambhave || 56|| nityaM svodarapUraNAya sakalAnuddishya vittAshayA (svodarapoShaNAya) vyarthaM paryaTanaM karomi bhavataH sevAM na jAne vibho | majjanmAntarapuNyapAkabalatastvaM sharva sarvAntara\- stiShThasyeva hi tena vA pashupate te rakShaNIyo.asmyaham || 57|| eko vArijabAndhavaH kShitinabhovyAptaM tamomaNDalaM bhittvA lochanagocharo.api bhavati tvaM koTisUryaprabhaH | vedyaH kinna bhavasyaho ghanataraM kIdR^igbhavenmattama\- statsarvaM vyapanIya me pashupate sAkShAt prasanno bhava || 58|| haMsaH padmavanaM samichChati yathA nIlAmbudaM chAtakaH kokaH kokanadapriyaM pratidinaM chandraM chakorastathA | cheto vA~nChati mAmakaM pashupate chinmArgamR^igyaM vibho gaurInAtha bhavatpadAbjayugalaM kaivalyasaukhyapradam || 59|| rodhastoyahR^itaH shrameNa pathikashChAyAM tarorvR^iShTito bhItaH svasthagR^ihaM gR^ihasthamatithirdInaH prabhuM dhArmikam | dIpaM santamasAkulashcha shikhinaM shItAvR^itastvaM tathA chetaH sarvabhayApahaM vraja sukhaM shambhoH padAmbhoruham || 60|| a~NkolaM nijabIjasantatirayaskAntopalaM sUchikA sAdhvI naijavibhuM latA kShitiruhaM sindhuH saridvallabham | prApnotIha yathA tathA pashupateH pAdAravindadvayaM chetovR^ittirupetya tiShThati sadA sA bhaktirityuchyate || 61|| AnandAshrubhirAtanoti pulakaM nairmalyatashChAdanaM vAchAsha~Nkhamukhe sthitaishcha jaTharApUrtiM charitrAmR^itaiH | rudrAkShairbhasitena deva vapuSho rakShAM bhavadbhAvanA\- parya~Nke viniveshya bhaktijananI bhaktArbhakaM rakShati || 62|| mArgAvartitapAdukA pashupatera~Ngasya kUrchAyate gaNDUShAmbuniShechanaM puraripordivyAbhiShekAyate | ki~nchidbhakShitamAMsasheShakabalaM navyopahArAyate bhaktiH kiM na karotyaho vanacharo bhaktAvataMsAyate || 63|| vakShastADanamantakasya kaThinApasmArasammardanaM bhUbhR^itparyaTanaM namatsurashiraHkoTIrasa~NgharShaNam | karmedaM mR^idulasya tAvakapadadvandvasya kiM vochitaM machchetomaNipAdukAviharaNaM shambho sadA~NgIkuru || 64|| vakShastADanasha~NkayA vichalito vaivasvato nirjarAH koTIrojjvalaratnadIpakalikAnIrAjanaM kurvate | dR^iShTvA muktivadhUstanoti nibhR^itAshleShaM bhavAnIpate yachchetastava pAdapadmabhajanaM tasyeha kiM durlabham || 65|| krIDArthaM sR^ijasi prapa~nchamakhilaM krIDAmR^igAste janA yatkarmAcharitaM mayA cha bhavataH prItyai bhavatyeva tat | shambho svasya kutUhalasya karaNaM machcheShTitaM nishchitaM tasmAnmAmakarakShaNaM pashupate kartavyameva tvayA || 66|| bahuvidhaparitoShabAShpapUra\- sphuTapulakA~NkitachArubhogabhUmim | chirapadaphalakA~NkShisevyamAnAM paramasadAshivabhAvanAM prapadye || 67|| amitamudamR^itaM muhurduhantIM vimalabhavatpadagoShThamAvasantIm | sadaya pashupate supuNyapAkAM mama paripAlaya bhaktidhenumekAm || 68|| jaDatA pashutA kala~NkitA kuTilacharatvaM cha nAsti mayi deva | asti yadi rAjamaule bhavadAbharaNasya nAsmi kiM pAtram || 69|| arahasi rahasi svatantrabud.hdhyA varivasituM sulabhaH prasannamUrtiH | agaNitaphaladAyakaH prabhurme jagadadhiko hR^idi rAjashekharo.asti || 70|| ArUDhabhaktiguNaku~nchitabhAvachApa\- yuktaiH shivasmaraNabANagaNairamoghaiH | nirjitya kilbiSharipUn vijayI sudhIndraH sAnandamAvahati susthirarAjalakShmIm || 71|| dhyAnA~njanena samavekShya tamaHpradeshaM bhittvA mahAbalibhirIshvaranAmamantraiH | divyAshritaM bhujagabhUShaNamudvahanti ye pAdapadmamiha te shiva te kR^itArthAH || 72|| bhUdAratAmudavahadyadapekShayA shrI\- bhUdAra eva kimataH sumate labhasva | kedAramAkalitamuktimahauShadhInAM pAdAravindabhajanaM parameshvarasya || 73|| AshApAshakleshadurvAsanAdi\- bhedodyuktairdivyagandhairamandaiH | AshAshATIkasya pAdAravindaM chetaHpeTIM vAsitAM me tanotu || 74|| kalyANinaM sarasachitragatiM savegaM sarve~Ngitaj~namanaghaM dhruvalakShaNADhyam | chetastura~Ngamadhiruhya chara smarAre netaH samastajagatAM vR^iShabhAdhirUDha || 75|| bhaktirmaheshapadapuShkaramAvasantI kAdambinIva kurute paritoShavarSham | sampUrito bhavati yasya manasttaTAka\- stajjanmasasyamakhilaM saphalaM cha nA.anyat || 76|| buddhiH sthirA bhavitumIshvarapAdapadma\- saktA vadhUrvirahiNIva sadA smarantI | sadbhAvanAsmaraNadarshanakIrtanAdi sammohiteva shivamantrajapena vinte || 77|| sadupachAravidhiShvanubodhitAM savinayAM suhR^idaM samupAshritAm | mama samuddhara buddhimimAM prabho varaguNena navoDhavadhUmiva || 78|| nityaM yogimanaH sarojadalasa~nchArakShamastvatkramaH shambho tena kathaM kaThorayamarADvakShaHkavATakShatiH | atyantaM mR^idulaM tvada~NghriyugalaM hA me manashchintaya\- tyetallochanagocharaM kuru vibho hastena saMvAhaye || 79|| eShyatyeSha janiM mano.asya kaThinaM tasminnaTAnIti ma\- drakShAyai girisImni komalapadanyAsaH purAbhyAsitaH | no cheddivyagR^ihAntareShu sumanastalpeShu vedyAdiShu prAyaH satsu shilAtaleShu naTanaM shambho kimarthaM tava || 80|| ka~nchitkAlamumAmahesha bhavataH pAdAravindArchanaiH ka~nchid.hdhyAnasamAdhibhishcha natibhiH ka~nchitkathAkarNanaiH | ka~nchit ka~nchidavekShaNaishcha nutibhiH ka~nchiddashAmIdR^ishIM yaH prApnoti mudA tvadarpitamanA jIvan sa muktaH khalu || 81|| bANatvaM vR^iShabhatvamardhavapuShA bhAryAtvamAryApate ghoNitvaM sakhitA mR^ida~NgavahatA chetyAdi rUpaM dadhau | tvatpAde nayanArpaNaM cha kR^itavAn tvaddehabhAgo hariH pUjyAtpUjyataraH sa eva hi na chet ko vA tadanyo.adhikaH || 82|| jananamR^itiyutAnAM sevayA devatAnAM na bhavati sukhaleshaH saMshayo nAsti tatra | ajanimamR^itarUpaM sAmbamIshaM bhajante ya iha paramasaukhyaM te hi dhanyA labhante || 83|| shiva tava paricharyAsannidhAnAya gauryA bhava mama guNadhuryAM buddhikanyAM pradAsye | sakalabhuvanabandho sachchidAnandasindho sadaya hR^idayagehe sarvadA saMvasa tvam || 84|| jaladhimathanadakSho naiva pAtAlabhedI na cha vanamR^igayAyAM naiva lubdhaH pravINaH | ashanakusumabhUShAvastramukhyAM saparyAM kathaya kathamahaM te kalpayAnIndumaule || 85|| pUjAdravyasamR^iddhayo virachitAH pUjAM kathaM kurmahe pakShitvaM na cha vA kiTitvamapi na prAptaM mayA durlabham | jAne mastakama~NghripallavamumAjAne na te.ahaM vibho na j~nAtaM hi pitAmahena hariNA tattvena tadrUpiNA || 86|| ashanaM garalaM phaNI kalApo vasanaM charma cha vAhanaM mahokShaH | mama dAsyasi kiM kimasti shambho tava pAdAmbujabhaktimeva dehi || 87|| yadA kR^itAmbhonidhisetubandhanaH karasthalAdhaHkR^itaparvatAdhipaH | bhavAni te la~NghitapadmasambhavaH tadA shivArchAstavabhAvanakShamaH || 88|| natibhirnutibhistvamIsha pUjA\- vidhibhirdhyAnasamAdhibhirna tuShTaH | dhanuShA musalena chAshmabhirvA vada te prItikaraM tathA karomi || 89|| vachasA charitaM vadAmi shambho\- rahamudyogavidhAsu te.aprasaktaH | manasAkR^itimIshvarasya seve shirasA chaiva sadAshivaM namAmi || 90|| AdyA.avidyA hR^idgatA nirgatAsI\- dvidyA hR^idyA hR^idgatA tvatprasAdAt | seve nityaM shrIkaraM tvatpadAbjaM bhAve mukterbhAjanaM rAjamaule || 91|| dUrIkR^itAni duritAni durakSharANi daurbhAgyaduHkhaduraha~NkR^itidurvachAMsi | sAraM tvadIyacharitaM nitarAM pibantaM gaurIsha mAmiha samuddhara satkaTAkShaiH || 92|| somakalAdharamaulau komalaghanakandhare mahAmahasi | svAmini girijAnAthe mAmakahR^idayaM nirantaraM ramatAm || 93|| sA rasanA te nayane tAveva karau sa eva kR^itakR^ityaH | yA ye yau yo bhargaM vadatIkShete sadArchataH smarati || 94|| atimR^idulau mama charaNA\- vatikaThinaM te mano bhavAnIsha | iti vichikitsAM santyaja shiva kathamAsIdgirau tathA veshaH (veshmaH) || 95|| dhairyA~Nkushena nibhR^itaM rabhasAdAkR^iShya bhaktishR^i~NkhalayA | purahara charaNAlAne hR^idayamadebhaM badhAna chidyantraiH || 96|| pracharatyabhitaH pragalbhavR^ittyA madavAneSha manaHkarI garIyAn | parigR^ihya nayena bhaktirajjvA parama sthANupadaM dR^iDhaM nayAmum || 97|| sarvAla~NkArayuktAM saralapadayutAM sAdhuvR^ittAM suvarNAM sadbhiH saMstUyamAnAM sarasaguNayutAM lakShitAM lakShaNADhyAm | udyadbhUShAvisheShAmupagatavinayAM dyotamAnArtharekhAM kalyANIM deva gaurIpriya mama kavitAkanyakAM tvaM gR^ihANa || 98|| idaM te yuktaM vA paramashiva kAruNyajaladhe gatau tiryagrUpaM tava padashirodarshanadhiyA | haribrahmANau tau divi bhuvi charantau shramayutau kathaM shambho svAmin kathaya mama vedyo.asi purataH || 99|| stotreNAlamahaM pravachmi na mR^iShA devA viri~nchAdayaH stutyAnAM gaNanAprasa~Ngasamaye tvAmagragaNyaM viduH | mAhAtmyAgravichAraNaprakaraNe dhAnAtuShastomava\- ddhUtAstvAM viduruttamottamaphalaM shambho bhavatsevakAH || 100|| || iti shrImachCha~NkarAchAryavirachita shivAnandalaharI samAptA || || iti shrImachCha~NkarAchAryavirachita shivAnandalaharI samAptA || ## Encoded by P. P. Narayanaswami at swami at math.mun.ca Proofread by P. P. Narayanaswami, Rajesh Thyagarajan, Kavitha, Rajani Arjun Shankar \medskip\hrule\obeylines Please send corrections to sanskrit at cheerful dot c om Last updated \today https://sanskritdocuments.org \end{document}