% Text title : shivagItimAlA % File name : shivagItimAlA.itx % Category : shiva, aShTaka, kRitI % Location : doc\_shiva % Author : Shri Chandrashekharendra Saraswati, 62nd Sankaracharya of Kanchi Kamakoti Peetham % Transliterated by : P.R. Kannan prkannanvashi at yahoo.com % Proofread by : P.R. Kannan prkannanvashi at yahoo.com % Description/comments : Praising the pleasurable moments of Lord Ekamreshwarar and Goddess Sri Kamakshi. Siva Gitimala Siva Ashtapadi % Latest update : January 19, 2019 % Send corrections to : sanskrit at cheerful dot c om % % This text is prepared by volunteers and is to be used for personal study % and research. The file is not to be copied or reposted for promotion of % any website or individuals or for commercial purpose without permission. % Please help to maintain respect for volunteer spirit. % \documentstyle[11pt,multicol,itrans]{article} #include=ijag.inc #endwordvowel=.h \portraitwide \parindent=100pt \let\usedvng=\Largedvng % for 1 column \pagenumbering{itrans} \def\engtitle#1{\hrule\medskip\centerline{\LARGE #1}} \def\itxtitle#1{\medskip\centerline{\LARGEdvng #1}\medskip\hrule} \def\endtitles{\medskip\obeyspaceslines} %% \begin{document} \engtitle{.. Sivagitimala or Sivashtapadi ..}## \itxtitle{.. shivagItimAlA athavA shivAShTapadI ..}##\endtitles ## shrIchandrashekharendrasarasvatIvirachitA ##Sivagitimala (Sivashtapadi) by Jagadguru Sri Chandrasekharendra Saraswati (62nd Sankaracharya of Kanchi Kamakoti Peetham) ## \section{|| prathamaH sargaH ||} dhyAnashlokAH \- sakalavighnanivartaka sha~Nkarapriyasuta praNatArtihara prabho || mama hR^idambujamadhyalasanmaNIrachitamaNDapavAsarato bhava || 1|| vidhivadanasarojAvAsamAdhvIkadhArA vividhanigamavR^indastUyamAnApadAnA | samasamayavirAjachchandrakoTiprakAshA mama vadanasaroje shAradA sannidhattAm || 2|| yadanubhavasudhormImAdhurIpAravashyaM vishadayati munInAtmanastANDavena | kanakasadasi ramye sAkShiNIvIkShyamANaH pradishatu sa sukhaM me somarekhAvataMsaH || 3|| sharvANi parvatakumAri sharaNyapAde nirvApayAsmadaghasantatimantarAyam | ichChAmi pa~Nguriva gA~NgajalAvagAha\- michChAmimAM kalayituM shivagItimAlAm || 4|| shivacharaNasarojadhyAnayogAmR^itAbdhau jalaviharaNavA~nChAsa~NgataM yasya chetaH | nikhiladuritamabha~NgavyApR^itaM vA manoj~naM parashivacharitAkhyaM gAnamAkarNanIyam || 5|| || prathamAShTapadI || mAlavIrAgeNa AditAlena gIyate (pralayapayodhijale itivat) kanakasabhAsadane vadane darahAsaM naTasi vidhAya sudhAkarabhAsaM sha~Nkara dhR^itatApasarUpa jaya bhavatApahara || 1|| jaladhimathanasamaye garalAnalashailaM vahasi galasthamuditvarakIlaM sha~Nkara dhR^itanIlagalAkhya jaya bhavatApahara || 2|| vidhuravirathacharaNe nivasannavanirathe puramiShuNA hR^itavAnitayodhe sha~Nkara vara vIramahesha jaya bhavatApahara || 3|| kusumasharAsakaraM purato vicharantaM girisha nihiMsitavAnachiraM taM sha~Nkara madanAripadAkhya jaya bhavatApahara || 4|| vaTatarutalamahite nivasanmaNipIThe dishasi parAtmakalAmatigADhe sha~Nkara dhR^itamauna gabhIra jaya bhavatApahara || 5|| jalanidhisetutaTe janapAvanayoge raghukulatilakayashaH pravibhAge sha~Nkara raghurAmamahesha jaya bhavatApahara || 6|| tanu bhR^idavanakR^ite varakAshInagare tArakamupadishasi sthalasAre sha~Nkara shiva vishvamahesha jaya bhavatApahara || 7|| nigamarasAlatale niravadhibodhaghana shrIkAmakShikuchakalashA~Nkana sha~Nkara sahakAramahesha jaya bhavatApahara || 8|| kachChapatanuhariNA nistulabhaktiyujA santatapUjitacharaNasaroja sha~Nkara shiva kachChapa li~Nga jaya bhavatApahara || 9|| sha~NkaravaraguruNA paripUjitapAda kA~nchipure vivR^itAkhilaveda sha~Nkara vidhumaulimahesha jaya bhavatApahara || 10|| shrIvidhumauliyateridamuditamudAraM shR^iNu karuNAbharaNAkhilasAraM sha~NkarAruNashailamahesha jaya bhavatApahara || 11|| shlokaH kanakasabhAnaTAya harinIlagaLAya nama\- stripuraharAya mAraripave munimohabhide | raghukR^itasetave vimalakAshijuShe bhavate nigamarasAla kUrmaharipUjita chandradhara || 6|| pApaM vArayate paraM ghaTayate kAlaM parAkurvate mohaM dUrayate madaM shamayate mattAsurAn hiMsate | mAraM mArayate mahAmunigaNAnAnandinaH kurvate pArvatyA sahitAya sarvanidhaye sharvAya tubhyaM namaH || 7|| || dvitIyAShTapadI || bhairavIrAgeNa tripuTatAlena gIyate (shritakamalAkucha itivat) kaliharacharitavibhUShaNa shrutibhAShaNa karatalavilasitashUla jaya bhavatApahara || 1|| dinamaNiniyutavibhAsura vijitAsura nalinanayanakR^itapUja jaya bhavatApahara || 2|| nirjitakusumasharAsana purashAsana niTilatilakashikhikIla jaya bhavatApahara || 3|| padayugavinatAkhaNDala phaNikuNDala tribhuvanapAvana pAda jaya bhavatApahara || 4|| andhakadAnavadAraNa bhavatAraNa smaratanubhasitavilepa jaya bhavatApahara || 5|| himakarashakalavataMsaka phaNihaMsaka gaganadhunIdhR^itashIla jaya bhavatApahara || 6|| paramatapodhanabhAvita surasevita nikhilabhuvanajanapAla jaya bhavatApahara || 7|| karimukhasharabhavanandana kR^itavandana shR^iNushashidharayatigItaM jaya bhavatApahara || 8|| shlokaH tuhinagirikumArI tu~NgavakShojakumbha\- sphuTadR^iDhaparirambhashliShTa divyA~NgarAgam | uditamadanakhedasvedamaMsAntaraM mAM avatu parashupANervyakta gADhAnurAgam || 8|| vAsantikAkusumakomaladarshanIyaiH a~Ngairana~NgavihitajvarapAravashyAt | kampAtaTopavanasImani vibhramantIM gaurimidaM sarasamAha sakhI rahasyam || 9|| || tR^itIyAShTapadI || vasantarAgeNa AditAlena gIyate (lalitalava~NgalatA itivat) vikasadamalakusumAnusamAgamashItalamR^idulasamIre atikulakalaravasambhR^itaghanamadaparabhR^itaghoShagabhIre vilasati suratarusadasi nishAnte varayuvatijanamohanatanuriha shubhadati vitatavasante vilasati || 1|| kusumasharAsanashabaraniShUditakupitavadhUdhR^itamAne dhanarasaku~Nkumapa~NkavilepanaviTajanakutukavidhAne vilasati || 2|| kusumitabAlarasAlamanoharakisalayamadanakR^ipANe madhukaramithunaparasparamadhurasapAnaniyogadhurINe vilasati || 3|| madanamahIpatishubhakaramantrajapAyitamadhukaraghoShe aviralakusumamarandakR^itAbhiniShechanatarumunipoShe vilasati || 4|| madananideshanivR^ittakalevaramardanamalayasamIre tuShitamadhuvratasa~nchaladatithisupUjanamadhurasapUre vilasati || 5|| suchirakR^itavratamaunavanapriyamunijanavAganukUle lalitalatAgR^ihavihR^itikR^itashramayuvatisukhAnilashIle vilasati || 6|| viShamasharAvanipAlarathAyitamR^idulasamIraNajAle virahijanAshayamohanabhasitaparAgavijR^imbhaNakAle vilasati || 7|| shrIshivapUjanayatamati chandrashikhAmaNiyativaragItaM shrIshivacharaNayugasmR^itisAdhakamudayatu vanyavasantaM vilasati || 8|| shlokaH vikachakamalakampAshaivalinyAstara~NgaiH aviralaparirambhaH sambhraman ma~njarINAm | parisararasarAgairvyAptagAtrAnulepo vicharati kitavo.ayaM mandamandaM samIraH || 9|| \section{|| dvitIyaH sargaH ||} shlokaH pragalbhatarabhAminI shivacharitra gAnAmR^ita\- prabhUtanavama~njarIsurabhigandhimandAnile | rasAlatarumUlagasphuritamAdhavI maNDape maheshamupadarshayantyasakR^idAha gaurImasau || || chaturthAShTapadI || rAmakriyArAgeNa AditAlena gIyate (chandanacharchita itivat) avirala ku~Nkumapa~NkakarambitamR^igamadachandravilepaM niTila visheShakabhAsuravahnivilochana kR^itapuratApaM shashimukhi shailavadhUtanaye vilokaya haramatha kelimaye shashimukhi || 1|| yuvatijanAshayamadanasharAyitashubhataranayana vilAsaM bhuvanavijR^imbhitaghanataratimiraniShUdananijatanu bhAsaM shashimukhi || 2|| pANi sarojamR^igIparisha~NkitabAlatR^iNAligalAbhaM yauvatahR^idayavidAraNapaTutaradarahasitAmitashobhaM shashimukhi || 3|| charaNasarojalasanmaNinUpuraghoShavivR^itapadajAtaM gaganadhunIsamatanuruchisaMhatikAritabhuvanavibhAtaM shashimukhi || 4|| nikhilavadhUjanahR^idayasamAhR^itipaTutaramohanarUpaM munivaranikaravimuktividhAyakabodhavibhAvanadIpaM shashimukhi || 5|| vikachasaroruhalochanasakR^idavalokanakR^itashubhajAtaM bhujagashiromaNishoNaruchA paribhItamR^igIsamupetaM shashimukhi || 6|| rajatamahIdharasadR^ishamahAvR^iShadR^iShTapurovanibhAgaM sanakasanandanamuniparishobhitadakShiNataditarabhAgaM shashimukhi || 7|| shrIshivaparicharaNavratachandrashikhAmaNi niyamadhanena shivacharitaM shubhagItamidaM kR^itamudayatu bodhaghanena shashimukhi || 8|| shlokaH madanakadanashAntyai phullamallI prasUnaiH virachitavarashayyAmApnuvannindumauliH | mR^idumalayasamIraM manyamAnaH sphuli~NgAn kalayati hR^idaye tvAmanvahaM shaila kanye || 12|| iti sahacharIvANImAkarNya sApi sudhAjharIM achaladuhitA netuH shrutvAbhirUpyaguNodayam | virahajanitAmArtiM dUrIchakAra hR^idi sthitAM dayitanihitapremA kAmaM jagAda mithaH sakhIm || 13|| || pa~nchamAShTapadI || toDirAgeNa chAputAlena gIyate (sa~ncharadadhara itivat) jalaruhashikharavirAjitahimakarasha~NkitakaranakharAbhaM ruchiraradanakiraNAmarasaridiva shoNanadAdhara shobhaM seve nigamarasAlanivAsaM \- yuvatimanoharavividhavilAsaM seve || 1|| shubhatanusaurabhalobhavibhUShaNakaitavamahita bhuja~NgaM mukuTavirAjitahimakarashakalavinirgaladamR^itasitA~NgaM seve || 2|| makuTaparibhramadamaradhunInakhavikShatasha~Nkita chandraM urasi vilepitamalayajapa~NkavimarditashubhatarachandraM seve || 3|| pannagakarNavibhUShaNamauligamaNiruchi shoNakapolaM agaNitasarasijasambhavamaulikapAlanivedita kAlaM seve || 4|| haridanupAlasureshapadonnatimupanamato vitarantaM anavadhimahimachirantanamunihR^idayeShu sadA viharantaM seve || 5|| nAradaparvatavaramunikinnarasannuta vaibhava jAtaM andhakasuraripugandhasindhura vibha~NgamR^igAdiparItaM seve || 6|| viShayaviratavimalAshayakoshamahAdhanacharaNasarojaM ghanataranijatanuma~njulatApari nirjitaniyuta manojaM seve || 7|| shrIshiva bhajana manorathachandrashikhAmaNiyativaragItaM shrotumuda~nchitakautukamaviratamamaravadhUpari gItaM seve || 8|| shlokaH sahachari mukhaM chetaH prAtaH praphullasaroruha\- pratimamanaghaM kAntaM kAntasya chandrashikhAmaNeH | smarati paritodR^iShTistuShTA tadAkR^itimAdhurI\- gativiShayiNI vANI tasya bravIti guNodayam || 14|| || ShaShTAShTapadI || kAmbhojirAgeNa tripuTatAlena gIyate (nibhR^itaniku~nja itivat) nikhilacharAcharanirmitikaushalabharitacharitra vilolaM lalitarasAlanibaddhalatAgR^ihaviharaNa kautuka shIlaM kalaye kAlamathanamadhIshaM ghaTaya mayA saha ghanatarakuchaparirambhaNa kelikR^itAshaM kalaye || 1|| kuvalayasaurabhavadanasamIraNavasitanikhiladigantaM charaNasarojavilokanato.akhilatAparujaM shamayantaM kalaye || 2|| paTutarachATuvachomR^itashishiranivAritamanasijatApaM taruNavanapriyabhAShaNayA saha sAdaravihitasulApaM kalaye || 3|| chalitadR^iga~nchalamasamasharAniva yuvatijane nidadhAnaM rahasi rasAlagR^ihaM gatayA saha sarasavihAravidhAnaM kalaye || 4|| darahasitadyutichandrikayA gatakheda vikArachakoraM lasadaruNAdharavadanavashIkR^itayuvatijanAshayachoraM kalaye || 5|| malayajapa~NkavilepanamurutarakuchayugamAkalayantaM kR^itakaruSho mama sutanulatAparirambhaNakeLimayantaM kalaye || 6|| suratarukusumasumAlikayA parimaNDitachikuranikAyaM alaghupulakakaTasImani mR^igamadapatravilekhavidheyaM kalaye || 7|| shrIshivasevanachandrashikhAmaNiyativaragItamudAraM sukhayatu shailajayA kathitaM shivacharitavisheShitasAraM kalaye || 8|| shlokaH lIlAprasUnasharapAshasR^iNiprakANDa\- puNDrekShubhAsikarapallavamambujAkSham | Alokya sasmitamukhendukamindumauliM utkaNThate hR^idayamIkShitumeva bhUyaH || 15|| \section{|| tR^itIyaH sargaH ||} shlokaH iti bahu kathayantImAlimAlokya bAlAM alaghuvirahadainyAmadrijAmIkShamANaH | sapadi madanakhinnaH somarekhAvataMsaH kimapi virahashAntyai chintayAmAsa dhIraH || 16|| || saptamAShTapadI || bhUpAlarAgeNa tripuTatAlena gIyate (mAmiyaM chalitA itivat) shlokaH lIlayA kalahe gatA kapaTakrudhA vaniteyaM mAninI madanena mAmapi santanoti vidheyam || shiva shiva kulAchalasutA || 1|| tApito madanajvareNa tanUnapAdadhikena yApayami kataM nu tadvirahaM kShaNaM kutukena shiva shiva || 2|| yatsamAgamasammadena sukhI chiraM viharAmi | yadviyogarujA na jAtu manohitaM vitanomi shiva shiva || 3|| lIlayA kupitA yadA mayi tAmathAnucharAmi | bhUyasA samayena tAmanunIya saMviharAmi shiva shiva || 4|| arpitaM shirasi krudhA mama hA yada~NghrisarojaM pANinA paripUjitaM bata jR^imbhamANamanojaM shiva shiva || 5|| dR^ishyase purato.api gauri na dR^ishyase chapaleva | nAparAdhakathA mayi praNataM janaM kR^ipayAva shiva shiva || 6|| nIlanIradaveNi kiM tava matkR^ite.anunayena | sannidhehi na gantumarhasi mAdR^ishe dayanena shiva shiva || 7|| varNitaM shivadAsachandrashikhAmaNishramaNena | vR^ittametadudetu santataM IshituH pravaNena shiva shiva || 8|| shlokaH bhuvanavijayI vikrAnteShu tvameva na chetaraH tava na kR^ipaNe yuktaM mAdR^igvidhe sharavarShaNam | madana yadi te vairaM niryAtu bho niyataM purA vihitamahito nAhaM nityaM tavAsmi nideshagaH || 17|| madhukaramayajyAghoSheNa prakampayase manaH parabhR^itavadhUgAne karNajvaraM tanuShetarAm | kusumarajasAM vR^indairutmAdayasyachirAditaH smara vijayase vishvaM chitrIyate kR^itirIdR^ishI || 18|| chalitalalitApA~Nga shreNIprasAraNakaitavAt daravikasitasvachChachChAyAsitotpalavarShaNaiH | virahashikhinA dUnaM dInaM na mAmabhirakShituM yadi na manuShe jAnAsi tvaM madIyadashAM tataH || 19|| shubhadati vicharAvaH shubhrakampAtaTinyAstaTa bhuvi ramaNIyodyAnakeLiM bhajAvaH | pratimuhuriti chintAvihvalaH shailakanyAmabhi shubhataravAdaH pAtu chandrArdhamauleH || 20|| \section{|| chaturthaH sargaH ||} shlokaH kampAtIraprachuraruchirodyAnavidyotamAna\- shrImAkandadrumaparisara mAdhavIklR^iptashAlAm | adhyAsInaM rahasi virahashrAntamashrAntakeliM vAchaM gaurIpriyasahacharI prAha chandrAvataMsam || 21|| || aShTamAShTapadI || saurAShTrarAgeNa AditAlena gIyate (nindati chandanaM itivat) yA hi purA hara kutukavatI parihAsakathAsu virAgiNI asitakuTila chikurAvaLi maNDanashubhataradAma nirodhinI sha~Nkara sharaNamupaiti shivAmatihanti sa shambaravairI shiva virahakR^ishA tava gaurI || 1|| kusuma shayanamupagamya sapadi madanasharavisaraparidUnA malayajarajasi mahanalatatimiva kalayati matimatidInA shiva virahakR^ishA tava gaurI || 2|| urasiruchiramaNihAralatAgatabalabhidupalatatinIlA ma~njuvachanagR^ihapa~njarashukaparibhAShaNaparihR^italIlA shiva virahakR^ishA tava gaurI || 3|| bhR^ishakR^itabhavadanubhAvanayekShita bhavati vihitaparivAdA sapadi vihita virahAnugamanAdanusambhR^itahR^idaya viShAdA shiva virahakR^ishA tava gaurI || 4|| bAlahariNaparilIDhapadA tadanAdaravigata vinodA unmadaparabhR^itavirutAkarNanakarNashalyakR^itabAdhA shiva virahakR^ishA tava gaurI || 5|| kokamithunabahukeLivilokanajR^imbhitamadana vikArA sha~Nkarahimakarashekhara pAlaya mAmiti vadati na dhIrA shiva virahakR^ishA tava gaurI || 6|| dUShitamR^igamadaruchiravisheShaka niTilabhasikR^itarekhA atanutanujvarakAritayA parivarjitachandramayUkhA shiva virahakR^ishA tava gaurI || 7|| shrIshivacharaNaniShevaNachandrashikhAmaNiyativaragItaM shrIgirijAvirahakramavarNanamudayatu vinayasametaM shiva virahakR^ishA tava gaurI || 8|| shlokaH AvAsamandiramidaM manute mR^iDAnI ghorATavIsadR^ishamAptasakhIjanena | nA bhAShaNAni tanute nalinAyatAkShI deva tvayA virahitA hariNA~Nkamaule || || navamAShTapadI || bilaharirAgeNa tripuTatAlena gIyate (stanavinihata itivat) himakaramaNimayadAmanikAya kalayati vahnishikhAmurasIyaM shailajA shiva shailajA virahe tava sha~Nkara shailajA || 1|| vapuShi patitaghanahimakarapUraM santanute hR^idi divi duritAraM shailajA || 2|| urasi nihitamR^idu vitatamR^iNAlaM pashyati sapadi vilasadaLinIlaM shailajA || 3|| sahacharayuvatiShu nayanamanIlaM namitamukhI vitanoti vishAlaM shailajA || 4|| ruShyati khidyati muhuranidAnaM na prativakti sakhImapi dInaM shailajA || 5|| shiva iti shiva iti vadati sakAmaM pashyati pashuriva kimapi lalAmaM shailajA || 6|| surataruvividhaphalAmR^itasAraM pashyati viShamiva bhR^ishamatighoraM shailajA || 7|| yativarachandrashikhAmaNigItaM sukhayatu sAdhujanaM shubhagItaM shailajA || 8|| shlokaH tvadbhAvanaikarasikAM tvadadhInavR^ittiM tvannAmasaMsmaraNasaMyutachittavR^ittim | bAlAmimAM virahiNIM kR^ipaNaikabandho nopekShase yadi tadA tava sha~NkarAkhyA || 23|| vastUni nistulaguNAni nirAkR^itAni kastUrikAruchirachitrakapatrajAtam | IdR^igvidhaM virahiNI tanute mR^iDAnI tAmAdriyasva karuNAbharitairapA~NgaiH || 24|| \section{|| pa~nchamaH sargaH ||} shlokaH ekAmramUlavilasannavama~njarIka shrImAdhavIruchiraku~njagR^ihevasAmi | tAmAnayAnunaya madvachanena gaurImitthaM shivena punarAha sakhI niyuktA || || dashamAShTapadI || AnandabhairavIrAgeNa AditAlena gIyate (vahati malayasamIre itivat) jayati madananR^ipAle shive kupitapathika jAlaM bhramaramithuna jAle shive pibati madhu salIlaM viraharujA puravairI parikhidyati gaurI shivaviraharujA || 1|| malayamaruti valamAne shive viraha vighaTanAya sati cha madhupagAne shive sarasaviharaNAya shiva viraharujA || 2|| kusumabharitasAle shive vitatasumadhukAle kR^ipaNavirahijAle shive kitavahR^idanukUle shivaviraharujA || 3|| madanavijayanigamaM shive japati pikasamUhe chaturakitavasa~Nga (shive) kuTilaravadurUhe shivaviraharujA || 4|| kusumarajasi bharite shive kitavamR^iduLamarutA dishi cha vidishi vitate shive virahivapuShi charatA shivaviraharujA || 5|| vimalatuhinakiraNe shive vikirati karajAlaM vihR^itiviratiharaNe shive viyati dishi vishAlaM shivaviraharujA || 6|| mR^idulakusumashayane shive vapuShi virahadUne bhramati luThati dIne shive suhitasharaNahIne shivaviraharujA || 7|| jayati girishamatinA shive girishavirahakathanaM chandramakuTayatinA shive nikhilakaluShamathanaM shivaviraharujA || 8|| shlokaH yatratvAmanura~njayannatitarAmArabdhakAmAgamaM vyApArairachalAdhirAjatanaye kelIvisheShairyutaH | tatra tvAmanuchintayannatha bhavannAmaikatantraM japan bhUyastatparitambhasambhramasukhaM prANeshvaraH kA~NkShati || 26|| || ekAdashAShTapadI || kedAragauLarAgeNa AditAlena gIyate (ratisukhasAre gatamabhisAre itivat) himagiritanaye gurutaravinaye niyutamadanashubharUpaM niTilanayanamanura~njaya sati tava virahajanitaghanatApam | malayajapavane kampAnuvane vasati sudati puravairI yuvatihR^idayamadamardanakushalI sambhR^ita kelivihArI | malayajapavane || 1|| vada mR^idu dayite mama hR^idi niyate bahiriva charasi samIpaM vadati muhurmuhuriti hara mAmakadehamadanaghanatApam | malayajapavane || 2|| urughana sAraM himajala pUraM vapuShi patitamatighoraM sapadi na mR^iShyati shapati manobhavamatimR^idumalaya samIram | malayajapavane || 3|| vilikhati chitraM tava cha vichitraM pashyati sapadi samodaM vadati jhaTiti bahu mAmiti shambararipuratikalayati khedam | malayajapavane || 4|| arpayanIlaM mayi dhR^italIlaM nayanakusumamatilolaM virahataruNi virahAturamanubhaja mAmiha (ti) vilapati sA (so.a) lam | malayajapavane || 5|| lasadaparAdhaM manasijabAdhaM vimR^isha vinetumupAyaM gurutaratu~NgapayodharadurgamapAnaya haramanapAyam | malayajapavane || 6|| atidhR^itamAne parabhR^itagAne ki~nchiduda~nchaya gAnaM jahi jahi mAnamanUnaguNai ramayAshu virahachiradInam | malayajapavane || 7|| iti shivavirahaM ghanataramohaM bhaNati niyamijanadhIre chandrashikhAmaNinAmani kushalamupanaya gajavarachIre | malayajapavane || 8|| shlokaH vimala saliloda~nchatkampAsaroruhadhoraNI\- parimalarajaH pAlIsa~NkrAntamandasamIraNe | vitapati viyadga~NgAma~NgIchakAra shiraH sthitAM tava hi virahAkrAntaH kAntaH nato.api na veditaH || 27|| anubhavati mR^igAkShI tvadviyogakShaNAnAM lavamiva yugakalpaM svalpamAtmAparAdham | tvayi vihitamanalpaM manyamAnaH katha~nchit nayati samayamenaM devi tasminprasIda || 28|| iti sahacharIvANImeNA~NkamauLimanobhava\- vyathanakathanImenAmAkarNya karNasudhAjharIm | sapadi muditA vinyasyantI padAni shanaiH shanaiH jayati jagatAM mAtA netuH pravishya latAgR^iham || 29|| sA dakShadevanavihArajayAnuSha~NgalIlAhave bhavati shailajayA shivasya | chetaH prasAdamanayostarasA vidhAya devyA kR^itaM kathayati sma sakhI rahasyam || 30|| || dvAdashAShTapadI || sha~NkarAbharaNarAgeNa tripuTatAlena gIyate (pashyati dishi dishi itivat) kalayati kalayati manasi charantaM kuchakalashaspR^ishamayati bhavantam | pAhi vibho shiva pAhi vibho nivasati gaurI keLivane pAhi vibho || 1|| japati japati tava nAma sumantraM prati muhuruditasumAyudhatantraM pAhi || 2|| upachitakusumasudAmavahantI bhavadanuchintanamAkalayantI pAhi || 3|| malayajarajasi nirAkR^itarAgA vapuShi bhasita dhR^itisaMyatayogA pAhi || 4|| parihR^itaveNi jaTAkacha bhArA nijapatighaTakajanAshayadhArA pAhi || 5|| avidhR^itamaNimukuTAdilalAmA bisavalayAdividhAraNakAmA pAhi || 6|| muhuravalokita kisalayashayanA bahirupasa~Ngata sulalita nayanA pAhi || 7|| iti shiva bhajanaguNena vibhAntaM chandrashikhAmaNinA shubhagItam || pAhi || 8|| shlokaH sA vIkShate sahacharIM madanena lajjA\- bhAreNa nottaravacho vadati pragalbhA | vyAdhUnvati shvasitakoShNasamIraNena tu~NgastanottarapaTaM girijA viyuktA || 31|| \section{|| ShaShThaH sargaH ||} shlokaH atha virahiNImarmachChedAnusambhR^itapAtaka\- shrita iva nishAnAthaH sa~NkrAntanIlaguNAntaraH | kiraNanikaraira~nchatkampAsarittaTaramyabhU\- valayamabhito vyAptyA vibhrAjayanparijR^imbhate || 32|| vikirati nijakarajAlaM himakarabimbe.api nAgate kAnte | akR^itakamanIyarUpA svAtmagataM kimapi vadati girikanyA || 33|| || trayodashAShTapadI || AhirirAgeNa jhampatAlena gIyate (kathitasamaye.api itivat) suchiravirahApanaya sukR^itabhikAmitaM saphalayati kimiha vidhiruta na vibhavAmitaM kAminI kimiha kalaye sahacharIva~nchitAhaM kAminI || 1|| yadanubhajanena mama sukhamakhilamAyataM tamanukalaye kimiha nayanapathamAgataM kAminI || 2|| yena malayajareNunikaramidamIritaM na cha vahati kuchayugalamuru tadavadhIrituM kAminI || 3|| yachcharaNaparicharaNamakhilaphaladAyakaM na spR^ishati manasi mama hA tadupanAyakaM kAminI || 4|| nigamashirasi sphurati yatimanasi yatpadam | vitatasukhadaM tadapi hR^idi na me kimidaM kAminI || 5|| virahasamayeShu kila hR^idi yadanuchintanam | na sa bhajati nayanapathamakhilabhaya kR^intanaM kAminI || 6|| kuchayugalamabhimR^ishati sa yadi ratasUchitam | saphalamiha nikhilaguNasahitamapi jIvitaM kAminI || 7|| niyamadhanavidhumauLiphaNitamidama~nchitam | bahujaniShu kaluShabhayamapanayatu sa~nchitaM kAminI || 8|| shlokaH AjagmuShIM sahacharIM haramantareNa chintAvijR^imbhitaviShAdabhareNa dInA | Alokya lokajananI hR^idi sandihAnA kAntaM kayAbhiramitaM nijagAda vAkyam || 34|| || chaturdashAShTapadI || sAra~NgarAgeNa tripuTatAlena gIyate (smarasamarochita itivat) kusumasharAhavasamuchitarUpA priyaparirambhaNaparihR^itatApA kApi puraripuNA ramayati hR^idayamamitaguNA kApi || 1|| ghanatarakuchayugamR^igamadalepA dayitavihitaratinavyasulApA || kApi || 2|| ramaNarachitakaTapatravisheShA urasilulitamaNihAravibhUShA || kApi || 3|| dayitanipItasudhAdharasImA galitavasanakaTiparihR^itadAmA || kApi || 4|| adhigatamR^idutarakisalayashayanA daraparimIlitachAlitanayanA || kApi || 5|| vihitamadhuraratikUjitabhedA dR^iDhaparirambhaNahatameti bhedA || kApi || 6|| mahita mahorasi sarabhasapatitA lulitakusumakuTilAlakamuditA || kApi || 7|| chandrashikhAmaNiyativarabhaNitam | sukhayatu sAdhujanaM shivacharitam || kApi || 8|| \section{|| saptamaH sargaH ||} shlokaH chakorANAM prItiM kalayasi mayUkhairnijakalA\- pradAnairdevAnamapi dayitabhAjAM mR^igadR^ishAm | na kokAnAM rAkAhimakiraNa mAdR^igvirahiNI\- janAnAM yuktaM te kimidamasamaM hanta charitam || 35|| ga~NgAma~NganiSha~Ngipa~NkajarajogandhAvahAma~NganAM AshliShyannibhR^itaM nira~NkusharahaH keLIvisheShairalam | vibhrAntaH kimadabhrarAgabharitastasyAmuta syAdayaM kAnto.ashrAntamana~NganAgavihato nAbhyAshamabhyAgataH || 36|| santApayannakhilagAtramamitrabhAvAt sandR^ishyate jaDadhiyAmiha shItabhAnuH | doShAkaro vapuShi sa~NgatarAjayakShmA ghorAkR^itirhi shivadUti nishAcharANAm || 37|| || pa~nchadashAShTapadI || sAverirAgeNa AditAlena gIyate (samuditavadane itivat) virahitasharaNe ramaNIcharaNe vijitAruNapa~Nkaje aruNimaruchiraM kalayati suchiraM matimiva vapuShi nije ramate kampAmahitavane vijayI purArijane || ramate || 1|| alikulavalite parimaLalalite yuvatikuTilAlake kalayati kusumaM vilasitasuShumaM sumasharaparipAlake || ramate || 2|| kuchagiriyugale nijamatinigale mR^igamadarachanAkare maNisaranikaraM vilasitamukuraM ghaTayati sumanohare || ramate || 3|| vilasitaradane taruNIvadane kisalayaruchirAdhare rachayati patraM makaravichitraM smitaruchiparibhAsure || ramate || 4|| kaTitaTabhAge manasijayoge vigaLitakanakAmbare maNimayarashanaM ravirachivasanaM ghaTayati tuhinakare || ramate || 5|| adharasudhALiM ruchiraradAliM pibati sumukhasha~Nkare vidadhati madhuraM hasati cha vidhuraM ratinidhinihitAdare || ramate || 6|| mR^idulasamIre valati gabhIre vilasati tuhinakare uditamanojaM vikasadurojaM shivarativihitAdare || ramate || 7|| iti rasavachane shivanati rachane puraharabhajanAdare bahujanikaluShaM nirasatu paruShaM yativaravidhushekhare || ramate || 8|| shlokaH AyAtavAniha na khedaparAnuSha~Nga\- vA~nChAbhareNa vivashastaruNendumauliH | svachChndameva ramatAM tava ko.atra doShaH pashyAchireNa dayitaM madupAshrayastham || 38|| \section{|| aShTamaH sargaH ||} shlokaH matprANaneturasahAyarasAlamUla\- lIlAgR^ihasya mayi chedanurAgabandhaH | anyAkathAnubhavinaH praNayAnubandho dUti prasIdati mamaiSha mahAnubhAvaH || || ShoDashAShTapadI || punnAgavarAlI rAgeNa AditAlena gIyate (anilataralakuvalayanayanena itivat) aruNakamalashubhataracharaNena sapadi gatA na hi bhavataraNena | yA vihR^itA puravairiNA || 1|| smitaruchihimakarashubhavadanena nihitaguNA vilasitasadanena | yA vihR^itA puravairiNA || 2|| sarasavachanajitakusumarasena hR^idi vinihitaratikR^itarabhasena | yA vihR^itA puravairiNA || 3|| vihita vividhakusumasharavihR^ite nAnAgatarasA nayaguNa vihitena | yA vihR^itA puravairiNA || 4|| uditajalajaruchiragaLena sphuTitamanA na yuvatinigaLena | yA vihR^itA puravairiNA || 5|| kanakaruchirasujaTApaTalenAnuhatasukhAsatilakaniTilena | yA vihR^itA puravairiNA || 6|| nikhilayuvatimadanodayanena jvaritamAnA na virahadahanena | yA vihR^itA puravairiNA || 7|| tuhinakiraNadharayatirachanena sukhayatu mAM shivahitavachanena | yA vihR^itA puravairiNA || 8|| shlokaH ayi malayasamIra krUra bhAvoragANAM shvasitajanita kiM te mAdR^ishIhiMsanena | kShaNamiva sahakArAdIshagAtrAnuSha~Nga\- upahR^itaparimalAtmA sannidhehi prasannaH || 40|| \section{|| navamaH sargaH ||} shlokaH itthaM ruShA sahacharIM paruShaM vadantI shailAdhirAjatanujA tanujAtakArshyA | nItvA kathaM kathamapi kShaNadAM maheshaH mAgaH prashAnti vinataM kuTilaM babhAShe || 41|| || saptadashAShTapadI || ArabhIrAgeNa tripuTatAlena gIyate (rajanijanitaguru itivat) chaturayuvatisuratAdara jAgaritAruNamadhR^itavilAsaM niTilanayana nayanadvitayaM tava kathayati tadabhinivesham | pAhi tAmiha bhAlalochana yA tava dishati vihAraM garaLamilitadhavalAmR^itamiva haramAgamavachanamasAraM pAhi || gurutarakuchaparirambhaNasambhR^itaku~Nkumapa~NkilahAraM smarati vishAlamuro vishadaM tava ratirabhasAdanurAgaM pAhi || 2|| ratipatisamaravinirmita nishitanakhakShatachihnitarekhaM vapuridamaLikavilochana lasadiva ratibharakR^itajayarekhaM pAhi || 3|| radanavasanamaruNamidaM tava purahara bhajati virAgaM vigalitahimakarashakalamuda~nchitadarshitaratibharavegaM pAhi || 4|| yuvatipadasthitayAvakarasaparichintitaratikamanIyaM vilasati vapuridamalaghubahirgatamayati virAgamameyaM pAhi || 5|| yuvatikR^itavraNamadharagataM tava kalayati mama hR^idi roShaM priyavachanAvasare.api mayA saha sphuTayati tatparitoShaM pAhi || 6|| suratarusumadAmanikAyanibaddhajaTAvalivalayamudAraM kitavamanobhavasa~Ngarashithilitamanukathayati suvihAraM pAhi || 7|| iti himagirikuladIpikayA kR^itashivaparivadanavidhAnaM sukhayatu budhajanamIshaniShevaNayativaravidhushekharagAnaM pAhi || 8|| shlokaH IdR^igvidhAni subahUni tava priyAyAM gADhAnurAgakR^itasa~NgamalA~nChitAni | sAkShadavekShitavatImiha mAmupetya kiM bhAShase kitavashekhara chandramauLe || 42 \section{|| dashamaH sargaH ||} shlokaH tAmudyataprasavabANavikArakhinnAM sa~nchintyamAnashashimaulicharitralIlAm | bAlAM tuShAragirijAM ratikelibhinnAM ALiH priyAtha kalahAntaritAmuvAcha || 43|| || aShTAdashAShTapadI || yadukulakAmbhojirAgeNa AditAlena gIyate (harirabhisarati itivat) puraripurabhiratimati hR^idi tanute bhavadupagUhanamiha bahu manute | sha~Nkare he sha~Nkari mA bhaja mAnini parimAnamume sha~Nkare || 1|| mR^igamadarasamaya gurukuchayugale kalayati puraripuratha mati nigale || sha~Nkare || 2|| suchiravirahabhavamapahara kaluShaM bhavadadharAmR^itamupahara nimiSham || sha~Nkare || 3|| sarasa niTilakR^itachitrakaruchiraM tava vadanaM sa cha kalayati suchiram || sha~Nkare || 4|| vibhurayameShyati shubhataramanasA tadurasi kuchayugamupakuru sahasA || sha~Nkare || 5|| sakusumanikaramuda~nchaya chikuraM sudati vilokaya maNimaya mukuram || sha~Nkare || 6|| shR^iNu sakhi shubhadati mama hitavachanaM ghaTaya jaghanamapi vigalitarashanam || sha~Nkare || 7|| shrIvidhushekharayativaraphaNitaM sukhayatu sAdhujanaM shivacharitam || sha~Nkare || 8|| mahAdeve tasminpraNamati nijAgaH shamayituM tadIyaM mUrdhAnaM praharasi padAbhyAM girisute | sa eSha kruddhashchettuhinakiraNaM sthApayati chet mR^idUnya~NgAnya~NgAraka iva tanotyeSha pavanaH || 44|| \section{|| ekAdashaH sargaH ||} itthaM priyAM sahacharIM giramudgirantIM chintAbhareNa chiramIkShitumapyadhIrA | gaurI katha~nchidabhimAnavatI dadarsha kAntaM priyAnunayavAkya mudIrayantam || 45|| bAle kulAchalakumAri vimu~ncha roShaM doShaM cha mayyadhigataM hR^idaye na kuryAH | shakShyAmi naiva bhavituM bhavatIM vinAhaM vakShyAmi kiM tava puraH priyamanyadasmAt || 46|| || ekonaviMshAShTapadI || mukhAri rAgeNa jhampatAlena gIyate (vadasi yadi ki~nchidapi itivat) bhajasi yadi mayi roShamaruNavAriruhAkShi kimiha mama sharaNamabhijAtaM sharaNamupayAyatavati kaluShaparibhAvanaM na varamiti sati sujanagItaM shive shailakanye pa~nchasharatapanamiha jAtaM harakamalashItalaM sarasanayanA~nchalaM mayi kalaya ratiShu kamanIyaM shive shailakanye || 1|| spR^ishasi yadi vapuraruNakamalasamapANinA na spR^ishasi tapanamanivAraM darahasitachandrakaranikaramanuSha~njayasi yadi mama cha hR^idayamatidhIraM shive shailakanye || 2|| kusumadAmachayena mama jaTAvalijUTanichayamayi sudati savilAsaM sapadi kalayAmi valayAkR^itisarojavanasurasaritamupahasitabhAsam shive shailakanye || 3|| amalamaNihAranikareNa paribhUShayasi pR^ithula kuchayugala matibhAram | tuhinagarishikharAnugaLitasuranimnagA sugaLasamabhAvasugabhIram shive shailakanye || 4|| vikasadasitAmburuhavimalanayanA\- ~nchalairupacharasi virahaparidUnam | saphalamiha jIvitaM mama sudati kopane visR^ija mayi saphalamatimAnam shive shailakanye || 5|| bhavadadhara madhu vitara viShamasharavikR^iti\- haramayi vitara ratiniyatabhAnaM sphuyamadaparAdhashatamagaNanIyamiha vimR^isha bhavadanusR^itividhAnaM shive shailakanye || 6|| kupitahR^idayAsi mayi kalaya bhujabandhane kuru nishitaradanaparipAtaM uchitamidamakhilaM tu nAyike sudati mama shikShaNaM svakuchagiripAtaM shive shailakanye || 7|| iti vividhavachanamapi chaturapuravairiNA himashikharijanuShamabhirAmaM shivabhajananiyatamatiyatichandramaulinA phaNitamapi jayatu bhuvi kAmaM shive shailakanye || 8|| shlokaH suchira virahAkrAntaM vibhrAntachittamitastataH smaraparavashaM dInaM nopekShase yadi mAM priye | ahamiha chiraM jIvanbhAvatkasevanamAdriye yadapakaraNaM sarvaM kShantavyamadrikumArike || 47|| \section{|| dvAdashaH sargaH ||} shlokaH iti virahitAmenAM chetaH prasAdavatIM shivAM anunayagirAM gumphaiH sambhAvayannijapANinA | jhaTiti ghaTayanmandasmerastadIyakarAmbujaM himakarakalAmauliH sa.nprApa kelilatAgR^iham || 48|| sa.nprApya keLIgR^ihamindumauliH indIvarAkShImanuvIkShamANaH | jahau rahaH kelikutUhalena viyogajArtiM punarAbabhAShe || 49|| || viMshAShTapadI || ghaNTArAgeNa jhampatAlena gIyate (ma~njutaraku~njatala itivat) pR^ithulataralalitakuchayugalamayi te mR^igamadarasena kalayAmi dayite | ramaya bAle bhavadanugamenam || ramaya bAle || 1|| vidhushakalaruchiramidamalikamayi te shubhatilakamabhilasatu keliniyate || ramaya bAle || 2|| iha vihara taruNi nava kusumashayane bhavadadharamadhu vitara makaranayane || ramaya bAle || 3|| ayi suchiraviraharujamapahara shive sarasamabhilapa ramaNi parabhR^itarave || ramaya bAle || 4|| kalaya malayajapa~Nkamurasi mama te kaThinakuchayugamatanu ghaTaya lalite || ramaya bAle || 5|| idamamaratarukusumanikaramayi te ghanachikuramupacharatu sapadi vanite || ramaya bAle || 6|| darahasitavidhukaramuda~nchaya mano\- bhavatapanamapanudatu vilasitaghane || ramaya bAle || 7|| shivacharaNaparicharaNayatavichAre phaNati himakaramauLiniyamidhIre || ramaya bAle || 8|| shlokaH IdR^igvidhaishchaTulachATuvachovilAsaiH gADhopagUhanamukhAmbujachumbhanAdyaiH | AhlAdayan girisutAmadhikA~nchi nityaM ekAmramUlavasatirjayati prasannaH || 50|| vidyAvinItajayadevakaverudAra\- gItiprabandhasaraNipraNidhAnamAtrAt | eShA mayA virachitA shivagItimAlA modaM karotu shivayoH padayojanIyA || 51|| avyaktavarNamuditena yathArbhakasya vAkyena modabharitaM hR^idayaM hi pitroH | ekAmranAtha bhavada~NghrisamarpiteyaM modaM karotu bhavataH shivagItimAlA || 52|| guNAnusyUtirahitA doShagranthividUShitA | tathApi shivagItirno mAlikA chitramIdR^ishI || 53|| OM namaH shivAyai cha namaH shivAya iti shrIchandrashekharendrasarasvatIvirachitA shivagItimAlA athavA shivAShTapadI samAptA | || shubhamastu || ## Siva Gitimala Siva Ashtapadi Encoded and proofread by P.R. Kannan prkannanvashi at yahoo.com \medskip\hrule\obeylines Please send corrections to sanskrit at cheerful dot c om Last updated \today https://sanskritdocuments.org \end{document}