% Text title : ShivastotravalI by Utapaladeva % File name : shivastotrAvalIutapaladeva.itx % Category : shiva, kAshmIrashaivadarshanam % Location : doc\_shiva % Author : Utpaladeva % Transliterated by : Somadeva Vasudeva % Proofread by : Somadeva Vasudeva % Description-comments : 20 stotras for Shiva by Utpaladeva % Acknowledge-Permission: GRETIL, sanskritworld.in % Latest update : February 14, 2024 % Send corrections to : sanskrit at cheerful dot c om % % This text is prepared by volunteers and is to be used for personal study % and research. The file is not to be copied or reposted for promotion of % any website or individuals or for commercial purpose without permission. % Please help to maintain respect for volunteer spirit. % \documentstyle[11pt,multicol,itrans]{article} #include=ijag.inc #endwordvowel=.h \portraitwide \parindent=100pt \let\usedvng=\Largedvng % for 1 column \pagenumbering{itrans} \def\engtitle#1{\hrule\medskip\centerline{\LARGE #1}} \def\itxtitle#1{\medskip\centerline{\LARGEdvng #1}\medskip\hrule} \def\endtitles{\medskip\obeyspaceslines} %% \begin{document} \engtitle{.. Utpaladevavirachita Shivastotravali ..}## \itxtitle{.. utpaladevavirachitA shivastotrAvaliH ..}##\endtitles ## \section{anukramaNikA} 1\. bhaktivilAsAkhyaM prathamaM stotram | 2\. sarvAtmaparibhAvanAkhyaM dvitIyaM stotram | 3\. praNayaprasAdAkhyaM tR^itIyaM stotram | 4\. surasodbalAkhyaM chaturthaM stotram | 5\. svabalanideshanAkhyaM pa~nchamaM stotram | 6\. adhvavisphuraNAkhyaM ShaSThaM stotram | 7\. vidhuravijayanAmadheyaM saptamaM stotram | 8\. alaukikodbalanAkhyamaShTamaM stotram | 9\. svAtantryavijayAkhyaM navamaM stotram | 10\. avichChedabha~NgAkhyaM dashamaM stotram | 11\. autsukyavishvasitanAmaikAdashaM stotram | 12\. rahasyanirdeshanAma dvAdashaM stotram | 13\. sa~NgrahastotranAma trayodashaM stotram | 14\. jayastotranAma chaturdashaM stotram | 15\. bhaktistotranAma pa~nchadashaM stotram | 16\. pAshAnudbhedanAma ShoDashaM stotram | 17\. divyakrIDAbahumAnanAma saptadashaM stotram | 18\. AviShkAranAma aShTAdashaM stotram | 19\. udyotanAbhidhAnamekonaviMshaM stotram | 20\. charvaNAbhidhAnaM viMshaM stotram | atha shivastotrAvaliH || OM tatsat | shrI vighnahartre namaH | shrIgurave shivAya namaH | \section{bhaktivilAsAkhyaM prathamaM stotram |} na dhyAyato na japataH syAdyasyAvidhipUrvakam | evameva shivabhAsastaM numo bhaktishAlinam || 1\.1|| AtmA mama bhavadbhaktisudhApAnayuvApi san | lokayAtrArajorAgAtpalitairiva dhUsaraH || 1\.2|| labdhatatsampadAM bhaktimatAM tvatpuravAsinAm | sa~nchAro lokamArge.api syAttayaiva vijR^imbhayA || 1\.3|| sAkShAdbhavanmaye nAtha sarvasmin bhuvanAntare | kiM na bhaktimatAM kShetraM mantraH kvaiShAM na siddhyati || 1\.4|| jayanti bhaktipIyUSharasAsavavaronmadAH | advitIyA api sadA tvad.hvitIyA api prabho || 1\.5|| anantAnandasindhoste nAtha tattvaM vidanti te | tAdR^isha eva ye sAndrabhaktyAnandarasAplutAH || 1\.6|| tvamevAtmesha sarvasya sarvashchAtmani rAgavAn | iti svabhAvasiddhAMstvadbhaktiM jAna~njayejjanaH || 1\.7|| nAtha vedyakShaye kena na dR^ishyo.asyekakaH sthitaH | vedyavedakasa~NkShobhe.apyasi bhaktaiH sudarshanaH || 1\.8|| anantAnandasarasI devI priyatamA yathA | aviyuktAsti te tadvadekA tvadbhaktirastu me || 1\.9|| sarva eva bhavallAbhaheturbhaktimatAM vibho | saMvinmArgo.ayamAhlAdaduHkhamohaistridhA sthitaH || 1\.10|| bhavadbhaktyamR^itAsvAdAdbodhasya syAtparApi yA | dashA sA mAM prati svAminnAsavasyeva shuktatA || 1\.11|| bhavadbhaktimahAvidyA yeShAmabhyAsamAgatA | vidyAvidyobhayasyApi tA ete tattvavedinaH || 1\.12|| AmulAdvAglatA seyaM kramavisphArashAlinI | tvadbhaktisudhayA siktA tadrasADhyaphalAstu me || 1\.13|| shivo bhUtvA yajeteti bhakto bhUtveti kathyate | tvameva hi vapuH sAraM bhaktairadvayashodhitam || 1\.14|| bhaktAnAM bhavadadvaitasiddhyai kA nopapattayaH | tadasiddhyai nikR^iShTAnAM kAni nAvaraNAni vA || 1\.15|| kadAchitkvApi labhyo.asi yogenetIsha va~nchanA | anyathA sarvakakShyAsu bhAsi bhaktimatAM katham || 1\.16|| pratyAhArAdyasaMspR^iShTo visheSho.asti mahAnayam | yogibhyo bhaktibhAjAM yadvyutthAne.api samAhitAH || 1\.17|| na yogo na tapo nArchAkramaH ko.api pranIyate | amAye shivamArge.asmin bhaktirekA prashasyate || 1\.18|| sarvato vilasadbhaktitejodhvastAvR^itermama | pratyakShasarvabhAvasya chintAnAmapi nashyatu || 1\.19|| shiva ityekashabdasya jihvAgre tiShThataH sadA | samastaviShayAsvAdo bhakteShvevAsti ko.apyaho || 1\.20|| shAntakallolashItAchChasvAdubhaktisudhAmbudhau | alaukikarasAsvAde susthaiH ko.anAma gaNyate || 1\.21|| sAdR^ishaiH kiM na charvyeta bhavadbhaktimahauShadhiH | tAdR^ishI bhagavan yasyA mokShAkhyo.anantaro rasaH || 1\.22|| tA eva paramarthyante sampadaH sadbhirIsha yAH | tvadbhaktirasasambhogavisrambhaparipoShikAH || 1\.23|| bhavadbhaktisudhAsArastaiH kimapyupalakShitaH | ye na rAgAdi pa~Nke.asmiMLLi lipyante patitA api || 1\.24|| aNimAdiShu mokShAnteShva~NgeShveva phalAbhidhA | bhavadbhaktervipakvAyA latAyA iva keShu chit || 1\.25|| chitraM nisargato nAtha duHkhabIjamidaM manaH | tvadbhaktirasasaMsiktaM niHshreyasamahAphalam || 1\.26|| \section{sarvAtmaparibhAvanAkhyaM dvitIyaM stotram |} agnIShomaravibrahmaviShNusthAvaraja~Ngama | svarUpa bahurUpAya namaH saMvinmayAya te || 2\.1|| vishvendhanamahAkShArAnulepashuchivarchase | mahAnalAya bhavate vishvaikahaviShe namaH || 2\.2|| paramAmR^itasAndrAya shItalAya shivAgnaye | kasmai chidvishvasamploShaviShamAya namo.astu te || 2\.3|| mahAdevAya rudrAya sha~NkarAya shivAya te | maheshvarAyApi namaH kasmai chinmantramUrtaye || 2\.4|| namo nikR^ittaniHshoShatrailokyavigaladvasA- vasekaviShamAyApi ma~NgalAya shivAgnaye || 2\.5|| samastalakShanAyoga eva yasyopalakShaNam | tasmai namo.astu devAya kasmai chidapi shambhave || 2\.6|| vedAgamaviruddhAya vedAgamavidhAyine | vedAgamasatattvAya guhyAya svAmine namaH || 2\.7|| saMsAraikanimittAya saMsAraikavirodhine | namaH saMsArarUpAya niHsaMsArAya shambhave || 2\.8|| mUlAya madhyAyAgrAya mUlamadhyAgramUrtaye | kShInAgramadhyamUlAya namaH pUrNAya shambhave || 2\.9|| namaH sukR^itasambharavipAkaH sakR^idapyasau | yasya nAmagrahastasmai durlabhAya shivAya te || 2\.10|| namashcharAcharAkAraparetanichayaiH sadA | krIDate tubhyamekasmai chinmayAya kapAline || 2\.11|| mAyAvine vishuddhAya guhyAya prakaTAtmane | sUkShmAya vishvarUpAya namashchitrAya shambhave || 2\.12|| brahmendraviShNunirvyUDhajagatsaMhArakelaye | AshcharyakaraNIyAya namaste sarvashaktaye || 2\.13|| taTeShveva paribhrAntaiH labdhAstAstA vibhUtayaH | yasya tasmai namastubhyamagAdhaharasindhave || 2\.14|| mAyAmayajagatsAndrapa~NkamadhyAdhivAsine | alepAya namaH shambhushatapatrAya shobhine || 2\.15|| ma~NgalAya pavitrAya nidhaye bhUShaNAtmane | priyAya paramArthAya sarvotkR^iShTAya te namaH || 2\.16|| namaH satatabaddhAya nityanirmuktibhAgine | bandhamokShavihInAya kasmai chi dapi shambhave || 2\.17|| upahAsaikasAre.asminnetAvati jagattraye | tubhyamevAdvitIyAya namo nityasukhAsine || 2\.18|| dakShiNAchArasArAya vAmAchArAbhilAShiNe | sarvAchArAya sharvAya nirAchArAya te namaH || 2\.19|| yathA tathApi yaH pUjyo yatra tatrApi yo.architaH | yo.api vA so.api vA yo.asau devastasmai namo.astu te || 2\.20|| mumukShujanasevyAya sarvasantApahAriNe | namo vitatalAvaNyavarAya varadAya te || 2\.21|| sadA nirantarAnandarasanirbharitAkhila- trilokAya namastubhyaM svAmine nityaparvaNe || 2\.22|| sukhapradhAnasaMvedyasambhogairbhajate cha yat | tvAmeva tasmai ghorAya shaktivR^indAya te namaH || 2\.23|| munInAmapyavij~neyaM bhaktisambandhacheShTitAH | Ali~Ngantyapi yaM tasmai kasmai chidbhavate namaH || 2\.24|| paramAmR^itakoshAya paramAmR^itarAshaye | sarvapAramyapAramyaprApyAya bhavate namaH || 2\.25|| mahAmantramayaM naumi rUpaM te svachChashItalam | apUrvamodasubhagaM parAmR^itarasolvaNam || 2\.26|| svAtantryAmR^itapUrNatvadaikyakhyAtimahApaTe | chitraM nAstyeva yatresha tannaumi tava shAsanam || 2\.27|| sarvAsha~NkAsaniM sarvAlakShmIkAlAnalaM tathA | sarvAma~NgalyakalpAntaM mArgaM mAheshvaraM numaH || 2\.28|| jaya deva namo namo.astu te sakalaM vishvamidaM tavAshritam | jagatAM parameshvaro bhavAn paramekaH sharaNAgato.asmi te || 2\.29|| \section{praNayaprasAdAkhyaM tR^itIyaM stotram |} sadasattvena bhAvAnAM yuktA yA dvitayI gatiH | tAmulla~Nghya tR^itIyasmai namashchitrAya shambhave || 3\.1|| AsurarShijanAdasminnasvatantre jagattraye | svatantrAste svatantrasya ye tavaivAnujIvinaH || 3\.2|| asheShavishvakhachitabhavadvapuranusmR^itiH | yeShAM bhavarujAmekaM bheShajaM te sukhAsinaH || 3\.3|| sitAtapatraM yasyenduH svaprabhAparipUritaH | chAmaraM svardhunIsrotaH sa ekaH parameshvaraH || 3\.4|| prakAshAM shItalAmekAM shuddhAM shashikalAmiva | dR^ishaM vitara me nAtha kAmapyamR^itavAhinIm || 3\.5|| tvachchidAnandajaladheshchyutAH saMvittivipruShaH | imAH kathaM me bhagavannAmR^itAsvAdasundarAH || 3\.6|| tvayi rAgarase nAtha na magnaM hR^idayaM prabho | yeShAmahR^idayA eva te.avaj~naspadamIdR^ishAH || 3\.7|| prabhuNA bhavatA yasya jAtaM hR^idayamelanam | prAbhavINAM vibhUtInAM paramekaH sa bhAjanam || 3\.8|| harShANAmatha shokAnAM sarveShAM plAvakaH samam | bhavaddhyAnAmR^itApUro nimnANimnabhuvAmiva || 3\.9|| keva na syAddR^ishA teShAM sukhasambhAranirbharA | yeShAmAtmAdhikenesha na kvApi virahastvayA || 3\.10|| garjAmi bata nR^ityAmi pUrNA mama manorathAH | svAmI mamaiSha ghaTito yattvamatyantarochanaH || 3\.11|| nAnyadvedyaM kriyA yatra nAnyo yogo vidA cha yat | j~nAnaM syAtkiM tu vishvaikapUrNA chittvaM vijR^imbhate || 3\.12|| durjayAnAmanantAnAM duHkhAnAM sahasaiva te | hastAtpalAyitA yeShAM vAchi shashvachChivadhvaniH || 3\.13|| uttamaH puruSho.anyo.asti yuShmachCheShavisheShitaH | tvaM mahApuruShastveko niHsheShapuruShAshrayaH || 3\.14|| jayanti te jagadvandyA dAsAste jagatAM vibho | saMsArArNava evaiSha yeShAM krIDAmahAsaraH || 3\.15|| AsatAM tAvadanyAni dainyAnIha bhavajjuShAm | tvameva prakaTIbhUyA ityanenaiva lajjyate || 3\.16|| matparaM nAsti tatrApi jApako.asmi tadaikyataH | tattvena japa ityakShamAlayA dishasi kvachit || 3\.17|| sato.avashyaM paramasatsachcha tasmAtparaM prabho | tvaM chAsataH satashchAnyastenAsi sadasanmayaH || 3\.18|| sahasrasUryakiraNAdhikashuddhaprakAshavAn | api tvaM sarvabhuvanavyApako.api na dR^ishyase || 3\.19|| jaDe jagati chidrUpaH kila vedye.api vedakaH | vibhurmite cha yenAsi tena sarvottamo bhavAn || 3\.20|| alamAkranditairanyairiyadeva puraH prabhoH | tIvraM viraumi yannAtha muhyAmyevaM vidannapi || 3\.21|| \section{surasodbalAkhyaM chaturthaM stotram |} chapalamasi yadapi mAnasa tatrApi shlAghyase yato bhajase | sharaNAnAmapi sharaNaM tribhuvanagurumambikAkAntam || 4\.1|| ulla~Nghya vividhadaivatasopAnakramamupeya shivacharaNAn | AshrityApyadharatarAM bhUmiM nAdyApi chitramujjhAmi || 4\.2|| prakaTaya nijamadhvAnaM sthagayatarAmakhilalokacharitAni | yAvadbhavAmi bhagavaMstava sapadi sadodito dAsaH || 4\.3|| shiva shiva shambho sha~Nkara sharaNAgatavatsalAshu kuru karuNAm | tava charaNakamalayugalasmaraNaparasya hi sampado.adUre || 4\.4|| tAvakA~NghrikamalAsanalInA ye yathAruchi jagadrachayanti | te viri~nchimadhikAramalenAliptamasvavashamIsha hasanti || 4\.5|| tvatprakAshavapuSho na vibhinnaM kiM chana prabhavati pratibhAtum | tatsadaiva bhagavan parilabdho.asIshvara prakR^itito.api vidUraH || 4\.6|| pAdapa~NkajarasaM tava ke chidbhedaparyuShitavR^ittimupetAH | ke chanApi rasayanti tu sadhyo bhAtamakShatavapurdvayashUnyam || 4\.7|| nAtha vidyudiva bhAti vibhAte yA kadA chana mamAmR^itadigdhA | sA yadi sthirataraiva bhavettatpUjito.asi vidhivatkimutAnyat || 4\.8|| sarvamasyaparamasti na kiM chidvastvavastu yadi veti mahatyA | praj~nAya vyavasito.atra yathaiva tvaM tathaiva bhava suprakaTo me || 4\.9|| svechChayaiva bhagavannijamArge kAritaH padamahaM prabhunaiva | tatkathaM janavadeva charAmi tvatpadochitamavaimi na kiM chit || 4\.10|| ko.api deva hR^idi teShu tAvako jR^imbhate subhagabhAva uttamaH | tvatkathAmbudaninAdachAtakA yena te.api subhagIkR^itAshchiram || 4\.11|| tvajjuShAM tvayi kayApi lIlayA rAga eSha paripoShamAgataH | yadviyogabhuvi sa~NkathA tathA saMsmR^itiH phalati sa~Ngamotsavam || 4\.12|| yo vichitrarasasekavardhitaH sha~Nkareti shatasho.apyudIritaH | shabda Avishati tiryagAshayeShvapyayaM navanavaprayojanaH || 4\.13|| te jayanti mukhamaNDale bhramanasti yeShu niyataM shivadhvaniH | yaH shAshIva prasR^ito.amR^itAshayAtsvAdu saMsravati chAmR^itaM param || 4\.14|| parisamAptamivogramidaM jagadvigalito.aviralo manaso malaH | tadapi nAsti bhavatpurArgalakavATavighaTTanamaNva pi || 4\.15|| satataphullabhavanmukhapa~NkajodaravilokanalAlasachetasaH | kimapi tatkuru nAtha manAgiva sphurasi yena mamAbhimukhasthitiH || 4\.16|| tvadavibhedamateraparaM nu kiM sukhamihAsti vibhUtirathAparA | tadiha tAvakadAsajanasya kiM kupathameti manaH parihR^itya tAm || 4\.17|| kShaNamapIha na tAvakadAsatAM prati bhaveyamahaM kila bhAjanam | bhavadabhedarasAsavamAdarAdavirataM rasayeyamahaM na chet || 4\.18|| na kila pashyati satyamayaM janastava vapurdvayadR^iShTimalImasaH | tadapi sarvavidAshritavatsalaH kimidamAraTitaM na shR^iNoShi me || 4\.19|| smarasi nAtha kadAchidapIhitaM viShayasaukhyamathApi mayArthitam | satatameva bhavadvapurIkShaNAmR^itamabhIShTamalaM mama dehi tat || 4\.20|| kila yadaiva shivAdhvani tAvake kR^itapado.asmi mahesha tavechChayA | shubhashatAnyuditAni tadaiva me kimaparaM mR^igaye bhavataH prabho || 4\.21|| yatra so.astamayameti vivasvAMshchandramaH prabhR^itibhiH saha sarvaiH | kApi sA vijayate shivarAtriH svaprabhAprasarabhAsvararUpA || 4\.22|| apyupArjitamahaM triShu lokeShvadhipatyamamareshvara manye | nIrasaM tadakhilaM bhavada~NghrisparshanAmR^itarasena vihInam || 4\.23|| bata nAtha dR^iDho.ayamAtmabandho bhavadakhyAtimayastvayaiva kLLiptaH | yadayaM prathamAnameva me tvAmavadhIrya shlathate na leshato.api || 4\.24|| mahatAmamaresha pUjyamAno.apyanishaM tiShThasi pUjakaikarUpaH | bahirantarapIha dR^ishyamAnaH sphurasi draShTR^isharIra eva shashvat || 4\.25|| \section{svabalanideshanAkhyaM pa~nchamaM stotram |} tvatpAdapadmasamparkamAtrasambhogasa~Nginam | galepAdikayA nAtha mAM svaveshma praveshaya || 5\.1|| bhavatpAdAmbujarajorAjira~njitamUrdhajaH | apArarabhasArabdhanartanaH syAmahaM kadA || 5\.2|| tvadekanAtho bhagavanniyadevArthaye sadA | tvadantarvasatirmUko bhaveyaM mAnyathA budhaH || 5\.3|| aho sudhAnidhe svAminnaho mR^iShTa trilochana | aho svAdo virUpakShetyeva nR^ityeyamAraTan || 5\.4|| tvatpAdapadmasaMsparshaparimIlitalochanaH | vijR^imbheyabhavadbhaktimadirAmadaghUrNitaH || 5\.5|| chittabhUbhR^idbhuvi vibho vaseyaM kvApi yatra sA | nirantaratvatpralApamayI vR^ittirmahArasA || 5\.6|| yatra devIsametastvamAsaudhAdA cha gopurAt | bahurUpaH sthitastasmin vAstavyaH syAmahaM pure || 5\.7|| samullasantu bhagavan bhavadbhAnumarIchayaH | vikasatveSha yAvanme hR^itpadmaH pUjanAya te || 5\.8|| prasIda bhagavan yena tvatpade patitaM sadA | mano me tattadAsvAdya kShIvediva galediva || 5\.9|| praharShAdvAtha shokAdvA yadi ku~NyAddhaTAdapi | bAhyAdathAntarAdbhAvAtprakaTIbhava me prabho || 5\.10|| bahirapyantarapi tatsyandamAnaM sadAstu me | bhavatpAdAmbujasparshAmR^itamatyantashItalam || 5\.11|| tvatpAdasaMsparshasudhAsaraso.antarnimajjanam | ko.apyeSha sarvasambhogala~NghI bhogo.astu me sadA || 5\.12|| niveditamupAdatsva rAgAdi bhagavanmayA | AdAya chAmR^itIkR^itya bhu~NkShva bhaktajanaiH samam || 5\.13|| asheShabhuvanAhAranityatR^iptaH sukhAsanam | svAmin gR^ihANa dAseShu prasAdAlokanakShaNam || 5\.14|| antarbhaktichamatkAracharvaNAmIlitekShaNaH | namo mahyaM shivAyeti pUjayaM syAM tR^iNAnyapi || 5\.15|| api labdhabhavadbhAvaH svAtmollAsamayaM jagat | pashyan bhaktirasAbhogairbhaveyamaviyojitaH || 5\.16|| AkAmkShaNIyamaparaM yena nAtha na vidyate | tava tenAdvitIyasya yuktaM yatparipUrNatA || 5\.17|| hasyate nR^ityate yatra rAgadveShAdi bhujyate | pIyate bhaktipIyUSharasastatprApnuyAM padam || 5\.18|| tattadapUrvAmodatvachchintAkusumavAsanA dR^iDhatAm | etu mama manasi yAvannashyatu durvAsanAgandhaH || 5\.19|| kva nu rAgAdiShu rAgaH kva cha haracharaNAmbujeShu rAgitvam | itthaM virodharasikaM bodhaya hitamamara me hR^idayam || 5\.20|| vicharan yogadashAsvapi viShayavyAvR^ittivartamAno.api | tvachchintAmadirAmadataralIkR^itahR^idaya eva syAm || 5\.21|| vAchi manomatiShu tathA sharIracheShTAsu karaNarachitAsu | sarvatra sarvadA me puraHsaro bhavatu bhaktirasaH || 5\.22|| shivashivashiveti nAmani tava niravadhi nAtha japyamAne.asmin | AsvAdayan bhaveyaM kamapi mahArasamapunaruktam || 5\.23|| sphuradanantachidAtmakaviShTape parinipItasamastajaDAdhvani | agaNitAparachinmayagaNDike pravichareyamahaM bhavato.architA || 5\.24|| svavapuShi sphuTabhAsini shAshvate sthitikR^ite na kimapyupayujyate | iti matiH sudR^iDhA bhavatAtparaM mama bhavachcharaNAbjarajaH shucheH || 5\.25|| kimapi nAtha kadAchana chetasi sphurati tadbhavada~NghritalaspR^ishAm | galati yatra samastamidaM sudhAsarasi vishvamidaM disha me sadA || 5\.26|| \section{adhvavisphuraNAkhyaM ShaSThaM stotram |} kShaNamAtramapIshAna viyuktasya tvayA mama | nibiDaM tapyamAnasya sadA bhUyA dR^ishaH padam || 6\.1|| viyogasAre saMsAre priyeNa prabhuNA tvayA | aviyuktaH sadaiva syAM jagatApi viyojitaH || 6\.2|| kAyavA~Nmanasairyatra yAmi sarvaM tvameva tat | ityeSha paramArtho.api paripUrNo.astu me sadA || 6\.3|| nirvikalpo mahAnandapUrNo yadvadbhavAMstathA | bhavatstutikarI bhUyAdanurUpaiva vA~Nmama || 6\.4|| bhavadAveshataH pashyan bhAvaM bhAvaM bhavanmayam | vichareyaM nirAkA~NkShaH praharShaparipUritaH || 6\.5|| bhagavanbhavataH pUrNaM pashyeyamakhilaM jagat | tAvataivAsmi santuShTastato na parikhidyase || 6\.6|| vilIyamAnAstvayyeva vyomni meghalavA iva | bhAvA vibhAntu me shashvatkramanairmalyagAminaH || 6\.7|| svaprabhAprasaradhvastAparyantadhvAntasantatiH | santataM bhAtu me ko.api bhavamadhyAdbhavanmaNiH || 6\.8|| kAM bhUmikAM nAdhisheShe kiM tatsyAdyanna te vapuH | shrAntastenAprayAsena sarvatastvAmavApnuyAm || 6\.9|| bhavada~NgapariShva~NgasambhogaH svechChayaiva me | ghaTatAmiyati prApte kiM nAtha na jitaM mayA || 6\.10|| prakaTIbhava nAnyAbhiH prArthanAbhiH kadarthanAH | kurmaste nAtha tAmyantastvAmeva mR^igayAmahe || 6\.11|| \section{vidhuravijayanAmadheyaM saptamaM stotram |} tvayyAnandasarasvati samarasatAmetya nAtha mama chetaH | pariharatu sakR^idiyantaM bhedAdhInaM mahAnartham || 7\.1|| etanmama na tvidamiti rAgadveShAdinigaDadR^iDhamUle | nAtha bhavanmayataikyapratyayaparashuH patatvantaH || 7\.2|| galatu vikalpakala~NkAvalI samullasatu hR^idi nirargalatA | bhagavannAnandarasaplutAstu me chinmayI mUrtiH || 7\.3|| rAgAdimayabhavANDakaluThitaM tvadbhaktibhAvanAmbikA taistaiH | ApyAyayatu rasairmAM pravR^iddhapakSho yathA bhavAmi khagaH || 7\.4|| tvachcharaNabhAvanAmR^itarasasArAsvAdanaipuNaM labhatAm | chittamidaM niHsheShitaviShayaviShAsa~NgavAsanAvadhi me || 7\.5|| tvadbhaktitapanadIdhitisaMsparshavashAnmamaiSha dUrataram | chetomaNirvimU~nchaturAgAdikataptavahnikaNAn || 7\.6|| tasmin pade bhavantaM satatamupashlokayeyamatyuchchaiH | hariharyashvaviri~nchA api yatra bahiH pratIkShante || 7\.7|| bhaktimadajanitavibhramavashena pashyeyamavikalaM karaNaiH | shivamayamakhilaM lokaM kriyAshcha pUjAmayI sakalAH || 7\.8|| mAmakamanogR^ihItatvadbhaktikulA~NganANimAdisutAn | sUtvA subaddhamUlA mameti buddhiM dR^iDhIkurutAm || 7\.9|| \section{alaukikodbalanAkhyamaShTamaM stotram |} yaH prasAdalava Ishvarasthito yA cha bhaktiriva mAmupeyuShI | tau parasparasamanvitau kadA tAdR^ishe vapuShi rUDhimeShyataH || 8\.1|| tvatprabhutvaparicharvaNajanmA ko.apyudetu paritoSharaso.antaH | sarvakAlamiha me paramastu j~nAnayogamahimAdi vidUre || 8\.2|| lokavadbhavatu me viShayeShu sphIta eva bhagavanparitarShaH | kevalaM tava sharIratayaitAn+ lokayeyamahamastavikalpaH || 8\.3|| dehabhUmiShu tathA manasi tvaM prANavartmani cha bhedamupete | saMvidaH pathiShu teShu cha tena svAtmanA mama bhava sphuTarUpaH || 8\.4|| nijanijeShu padeShu patantvimAH karaNavR^ittaya ullasitA mama | kShaNamapIsha manAgapi maiva bhUttvadavibhedarasakShatisAhasam || 8\.5|| laghumasR^iNasitAchChashItalaM bhavadAveshavashena bhAvayan | vapurakhilapadArthapaddhatervyavahArAnativartayeya tAn || 8\.6|| vikasatu svavapurbhavadAtmakaM samupayAntu jaganti mamA~NgatAm | vrajatu sarvamidaM dvayavalgitaM smR^itipathopagame.apyanupAkhyatAm || 8\.7|| samudiyAdapi tAdR^ishatAvakAnana viloka parAmR^itasamplavaH | mama ghaTeta yathA bhavadadvayAprathanaghoradarIparipUraNam || 8\.8|| api kadAchana tAvakasa~NgamAmR^itakaNAchChuraNena tanIyasA | sakalalokasukheShu parA~Nmukho na bhavitAsmyubhayachyuta eva kim || 8\.9|| satatameva bhavachcharaNAmbujAkaracharasya hi haMsavarasya me | upari mUlatalAdapi chAntarAdupanamatvaja bhaktimR^iNAlikA || 8\.10|| upayAntu vibho samastavastUnyapi chintAviShayaM dR^ishaH padaM cha | mama darshanachintanaprakAshAmR^itasArANi paraM parisphurantu || 8\.11|| parameshvara teShu teShu kR^ichChreShvapi nAmopanamatsvahaM bhaveyam | na paraM gatabhIstvada~Ngasa~NgAdupajAtAdhikasammado.api yAvat || 8\.12|| bhavadAtmani vishvamumbhitaM yadbhavataivApi bahiH prakAshyate tat | iti yaddR^iDhanishchayopajuShTaM tadidAniM sphuTameva bhAsatAm || 8\.13|| \section{svAtantryavijayAkhyaM navamaM stotram |} kadA navarasArdrArdrasambhogAsvAdanotsukam | pravarteta vihAyAnyanmama tvatsparshane manaH || 9\.1|| tvadekaraktastvatpAdapUjAmAtramahAdhanaH | kadA sAkShAtkariShyAmi bhavantamayamutsukaH || 9\.2|| gADhAnurAgavashato nirapekShIbhUtamAnaso.asmi kadA | paTapaTiti vighaTitAkhilamahArgalastvAmupaiShyAmi || 9\.3|| svasaMvitsArahR^idayAdhiShThAnAH sarvadevatAH | kadA nAtha vashIkuryAM bhavadbhaktiprabhAvataH || 9\.4|| kadA me syAdvibho bhUri bhaktyAnandarasotsavaH | yadAlokasukhAnandI pR^itha~NnAmApi lapsyate || 9\.5|| IshvaramabhayamudAraM pUrNamakAraNamapahnutAtmAnam | sahasAbhij~nAya kadA svAmijanaM lajjayiShyAmi || 9\.6|| kadA kAmapi tAM nAtha tava vallabhatAmiyAm | yayA mAM prati na kvApi yuktaM te syAtpalAyitum || 9\.7|| tattvato.asheShajantUnAM bhavatpUjAmayAtmanAm | dR^iShTyAnumoditarasAplAvitaH syAM kadA vibho || 9\.8|| j~nAnasya paramA bhUmiryogasya paramA dashA | tvadbhaktiryA vibho karhi pUrNa me syAttadarthitA || 9\.9|| sahasaivasAdya kadA gADhamavaShTabhya harShavivasho.aham | tvachcharaNavaranidhAnaM sarvasya prakaTayiShyAmi || 9\.10|| paritaH prasarachChuddhatvadAlokamayaH kadA | syAM yathesha na ki~nchinme mAyAchChAyAbilaM bhavet || 9\.11|| AtmasAtkR^itaniHsheShamaNDalo nirvyapekShakaH | kadA bhaveyaM bhagavaMstvadbhaktagaNanAyakaH || 9\.12|| nAtha lokAbhimAnAnAmapUrvaM tvaM nibandhanam | mahAbhimAnaH karhi syAM tvadbhaktirasapUritaH || 9\.13|| asheShaviShayAshUnyashrIsamAshleShasusthitaH | shayIyamiva shItA~Nghrikusheshayayuge kadA || 9\.14|| bhaktyAsavasamR^iddhAyAstvatpUjAbhogasampadaH | kadA pAraM gamiShyAmi bhaviShyAmi kadA kR^itI || 9\.15|| AnandabAShpapUraskhalitaparibhrAntagadgadAkrandaH | hAsollAsitavadanastvatsparsharasaM kadApsyAmi || 9\.16|| pashujanasamAnavR^ittAmavadhUya dashAmimAM kadA shambho | AsvAdayeya tAvakabhaktochitamAtmano rUpam || 9\.17|| labdhANimAdisiddhirvigalitasakalopatApasantrAsaH | tvadbhaktirasAyanapAnakriDhAniShTaH kadAsIya || 9\.18|| nAtha kadA sa tathAvidha Akrando me samuchcharedvAchi | yatsamanantarameva sphurati purastAvakI mUrtiH || 9\.19|| gADhagADhabhavada~NghrisarojAli~NganavyasanatatparachetAH | vastvavastvidamayatnata eva tvAM kadA samavalokayitAsmi || 9\.20|| \section{avichChedabha~NgAkhyaM dashamaM stotram |} na soDhavyamavashyaM te jagadekaprabhoridam | mAheshvarAshcha lokAnAmitareShAM samAshcha yat || 10\.1|| ye sadaivAnurAgeNa bhavatpAdAnugAminaH | yatra tatra gatA bhogAMste kAMshchidupabhu~njate || 10\.2|| bhartA kAlAntako yatra bhavAMstatra kuto rujaH | tatra chetarabhogAshA kA lakShmIryatra tAvakI || 10\.3|| kShanamAtrasukhenApi vibhuryenAsi labhyase | tadaiva sarvaH kAlo.asya tvadAnandena pUryate || 10\.4|| Anandarasabinduste chandramA galito bhuvi | sUryastathA te prasR^itaH saMhArI tejasaH kaNaH || 10\.5|| baliM yAmastR^itIyAya netrAyAsmai tava prabho | alaukikasya kasyApi mAhAtmyasyaikalakShmaNe || 10\.6|| tenaiva dR^iShTo.asi bhavaddarshanAdyo.atihR^iShyati | katha~nchidyasya vA harShaH ko.api tena tvamIkShitaH || 10\.7|| yeShAM prasanno.asi vibho yairlabdhaM hR^idayaM tava | AkR^iShya tvatpurAttaistu bAhyamAbhyantarIkR^itam || 10\.8|| tvadR^ite nikhilaM vishvaM samadR^igyAtamIkShyatAm | IshvaraH punaretasya tvameko viShamekShaNaH || 10\.9|| AstAM bhavatprabhAveNa vinA sattaiva nAsti yat | tvaddUShaNakathA yeShAM tvadR^ite nopapadyate || 10\.10|| bAhyAntarAntarAyAlIkevale chetasi sthitiH | tvayi chetsyAnmama vibho kimanyadupayujyate || 10\.11|| anye bhramanti bhagavannAtmanyevAtiduHsthitAH | anye bhramanti bhagavannAtmanyevAtisusthitAH || 10\.12|| apItvApi bhavadbhaktisudhAmanavalokya cha | tvAmIsha tvatsamAchAramAtrAtsiddhyanti jantavaH || 10\.13|| bhR^ityA vayaM tava vibho tena trijagatAM yathA | bibharShyAtmAnamevaM te bharttavyA vayamapyalam || 10\.14|| parAnandAmR^itamaye dR^iShTo.api jagadAtmani | tvayi sparsharase.atyantatarasutkaNThito(?).asmi te || 10\.15|| deva duHkhAnyasheShANi yAni saMsAriNAmapi | ghR^ityAkhyabhavadIyAtmayutAnyAyAnti sahyatAm || 10\.16|| sarvaj~ne sarvashaktau cha tvayyeva sati chinmaye | sarvathApyasato nAtha yuktAsya jagataH prathA || 10\.17|| tvatprANitAH sphurantIme guNA loShTopamA api | nR^ityanti pavanoddhUtAH kArpAsAH pichavo yathA || 10\.18|| yadi nAtha guNeShvAtmAbhimAno na bhavettataH | kena hIyeta jagatastvadekAtmatayA prathA || 10\.19|| vandyAste.api mahIyAMsaH pralayopagatA api | tvatkopapAvakasparshapUtA ye parameshvara || 10\.20|| mahAprakAshavapuShi vispaShTe bhavati sthite | sarvato.apIsha tatkasmAttamasi prasarAmyaham || 10\.21|| avibhAgo bhavAneva svarUpamamR^itaM mama | tathApi martyadharmANAmahamevaikamAspadam || 10\.22|| maheshvareti yasyAsti nAmakaM vAgvibhUShaNam | praNAmA~Nkashcha shirasi sa evaikaH prabhAvitaH || 10\.23|| sadasachcha bhavAneva yena tenAprayAsataH | svarasenaiva bhagavaMstathA siddhiH kathaM na me || 10\.24|| shivadAsaH shivaikAtmA kiM yannAsAdayetsukham | tarpyo.asmi devamukhyAnAmapi yenAmR^itAsavaiH || 10\.25|| hR^innAbhyorantarAlasthaH prANinAM pittavigrahaH | grasase tvaM mahAvahniH sarvaM sthAvaraja~Ngamam || 10\.26|| \section{autsukyavishvasitanAmaikAdashaM stotram |} jagadidamathavA suhR^ido bandhujano vA na bhavati mama kimapi | tvaM punaretatsarvaM yadA tadA ko.aparo me.astu || 11\.1|| svAminmaheshvarastvaM sAkShAtsarvaM jagattvameveti | vastveva siddhimetviti yAch~nA tatrApi yAch~naiva || 11\.2|| tribhuvanAdhipatitvamapIha yattR^iNamiva pratibhAti bhavajjuShaH | kimiva tasya phalaM shubhakarmaNo bhavati nAtha bhavatsmaraNAdR^ite || 11\.3|| yena naiva bhavato.asti vibhinnaM ki~nchanApi jagatAM prabhavashcha | tvadvijR^imbhitamato.adbhutakarmasvapyudeti na tava stutibandhaH || 11\.4|| tvanmayo.asmi bhavadarchananiShThaH sarvadAhamiti chApyavirAmam | bhAvayannapi vibho svarasena svapnago.api na tathA kimiva syAm || 11\.5|| ye manAgapi bhavachcharaNAbjodbhUtasaurabhalavena vimR^iShTaH | teShu visramiva bhavati samastaM bhogajAtamamarairapi mR^igyam || 11\.6|| hR^idi te na tu vidyate.anyadanyadvachane karmaNi chAnyadeva shambho | paramArthasato.apyanugraho vA yadi vA nigraha eka eva kAryaH || 11\.7|| mUDho.asmi duHkhakalito.asmi jarAdidoShabhIto.asmi shaktirahito.asmi tavAshrito.asmi shambho tathA kalaya shIghramupaimi yena | sarvottamAM dhuramapojjhitaduHkhamArgaH || 11\.8|| tvatkarNadeshama dhishayya mahArghabhAvamAkranditAni mama tuchChatarANi yAnti | vaMshAntarAlapatitAni jalaikadeshakhaNDAni mauktikamaNitvamivodvahanti || 11\.9|| kimiva cha labhyate bata na tairapi nAtha janaiH kShaNamapi kaitavAdapi cha ye tava nAmni ratAH shishiramayUkhashekhara tathA kuru yena mama | kShatamaraNo.aNimAdikamupaimi yathA vibhavam || 11\.10|| shambho sharva shasha~Nkashekhara shiva tryakShAkShamAlAdhara shrImannugrakapAlalA~nChana lasadbhImatrishUlAyudha kAruNyAmbunidhe trilokarachanAshIlograshaktyAtmaka shrIkaNThAshu | vinAshayAshubhabharAnAdhatsvasiddhiM parAm || 11\.11|| tatkiM nAtha bhavenna yatra bhagavAnnirmAtR^itAmashnute bhAvaH syAtkimu tasya chetanavato nAshAsti yaM sha~NkaraH itthaM te parameshvarAkShatamahAshakteH sadA saMshritaH | saMsAre.atra nirantarAdhividhuraH klishyAmyahaM kevalam || 11\.12|| yadyapyatra varapradoddhatatamAH pIDAjarAmR^ityava ete vA kShaNamAsatAM bahumataH shabdAdirevAsthiraH tatrApi spR^ihayAmi santatasukhAkA~NkShI chiraM sthAsnave | bhogAsvAdayutatvada~NghrikamaladhyAnAgrya jIvAtave || 11\.13|| he nAtha praNatArtinAshanapaTo shreyonidhe dhUrjaTe duHkhaikAyatanasya janmamaraNatrastasya me sAmpratam tachcheShTasva yathA manoj~naviShayAsvAdapradA uttamA | jIvanneva samashnuve.ahamachalAH siddhIstvadarchAparaH || 11\.14|| namo mohamahAdhvAntadhvaMsanAnanyakarmaNe | sarvaprakAshAtishayaprakAshAyendulakShmaNe || 11\.15|| \section{rahasyanirdeshanAma dvAdashaM stotram |} sahakAri na ki~nchidiShyate bhavato na pratibandhakaM dR^iShi | bhavataiva hi sarvamAplutaM kathamadyApi tathApi nekShase || 12\.1|| api bhAvagaNAdapIndriyaprachayAdapyavabodhamadhyataH | prabhavantamapi svataH sadA paripashyeyamapoDhavishvakam || 12\.2|| kathaM te jAyeran kathamapi cha te darshanapathaM vrajeyuH kenApi prakR^itimahatA~Nkena khachitaH tathotthAyotthAya sthalajalatR^iNAderakhilataH | padArthadyAnsR^iShTisravadamR^itapUrair(?) vikirasi || 12\.3|| sAkShatkR^ita bhavadrUpaprasR^itAmR^itatarpitAH | unmUlitatR^iSho mattA vicharanti yathAruchi || 12\.4|| na tadA na sadA na chaikadetyapi sA yatra na kAladhIrbhavet | tadidaM bhavadIyadarshanaM na cha nityaM na cha kathyate.anyathA || 12\.5|| tvadvilokanasamutkachetaso yogasiddhiriyatI sadAstu me | yadvisheyamabhisandhimAtratastvatsudhAsadanamarchanAya te || 12\.6|| nirvikalpabhavadIyadarshanapraptiphullamanasAM mahAtmanAm | ullasanti vimalAni helayA cheShTitAni cha vachAMsi cha sphuTam || 12\.7|| bhavanbhavadIyapAdayornivasannantara eva nirbhayaH | bhavabhUmiShu tAsu tAsvahaM prabhumarcheyamanargalakriyaH || 12\.8|| bhavada~Nghrisaroruhodare parilIno galitaparaiShaNaH | atimAtramadhUpayogataH paritR^ipto vichareyamichChayA || 12\.9|| yasya dambhAdiva bhavatpUjAsa~Nkalpa utthitaH | tasyApyavashyamuditaM sannidhAnaM tavochitam || 12\.10|| bhagavannitarAnapekShiNA nitarAmekarasena chetasA | sulabhaM sakalopashAyinaM prabhumAtR^ipti pibeyamasmi kim || 12\.11|| tvayA nirAkR^itaM sarvaM heyametattadeva tu | tvanmayaM samupAdeyamityayaM sArasa~NgrahaH || 12\.12|| bhavato.antarachAri bhAvajAtaM prabhuvanmukhyatayaiva pUjitaM tat | bhavato bahirapyabhAvamAtrA kathamIshAn bhavetsamarchyate vA || 12\.13|| niHshabdaM nirvikalpaM cha nirvyAkShepamathAnisham | kShobhe.apyadhyakShamI kSheyaM tryakSha tvAmeva sarvataH || 12\.14|| prakaTaya nijadhAma deva yasmiMstvamasi sadA parameshvarIsametaH | prabhucharaNarajaHsamAnakakShyAH kimavishvAsapadaM bhAnti bhR^ityAH || 12\.15|| darshanapathamupayAto.apyapasarasi kuto mamesha bhR^ityasya | kShaNamAtrakamiha na bhavasi kasya na jantordR^ishorviShayaH || 12\.16|| aikyasaMvidamR^itAchChadhArayA santataprasR^itayA kadA vibho | plAvanAtparamabhedamAnayaMstvAM nijaM cha vapurApnuyAM mudam || 12\.17|| ahamityamuto.avaruddhalokAdbhavadIyAtpratipattisArato me | aNumAtrakameva vishvaniShThaM ghaTatAM yena bhaveyamarchitA te || 12\.18|| aparimitarUpamahaM taM taM bhAvaM pratikShaNaM pashyan | tvAmeva vishvarUpaM nijanAthaM sAdhu pashyeyam || 12\.19|| bhavada~NgagataM tameva kasmAnna manaH paryaTatIShTamarthamartham | prakR^itikShatirasti no tathAsya mama chechChA paripUryate paraiva || 12\.20|| shatashaH kila te tavAnubhAvAdbhagavan ke.apyamunaiva chakShuShA ye | api hAlikacheShTayA charantaH paripashyanti bhavadvapuH sadAgre || 12\.21|| na sA matirudeti yA na bhavati tvadichChAmayI sadA shubhamathetaradbhagavataivamAcharyate ato.asmi bhavadAtmako bhuvi yathA | tathA sa~ncharan sthi to.anishamabAdhitatvadamala~NghripUjotsavaH || 12\.22|| bhavadIyagabhIrabhAShiteShu pratibhA samyagudetu me puro.ataH | tadanuShThitashaktirapyatastadbhavadarchAvyasanaM cha nirvirAmam || 12\.23|| vyavahArapade.api sarvadA pratibhAtvarthakalApa eSha mAm | bhavato.avayavo yathA na tu svata evAdaraNIyatAM gataH || 12\.24|| manasi svarasena yatra tatra pracharatyapyahamasya gochareShu | prasR^ito.apyavilola eva yuShmatparicharyAchaturaH sadA bhaveyam || 12\.25|| bhagavan bhavadichChayaiva dAsastava jAto.asmi parasya nAtra shaktiH | kathameSha tathApi vaktrabimbaM tava pashyAmi na jAtu chitrametat || 12\.26|| samutsukAstvAM prati ye bhavantaM pratyartharUpAdavalokayanti | teShAmaho kiM tadupasthitaM syAtkiM sAdhanaM vA phalitaM bhavettat || 12\.27|| bhAvA bhAvatayA santu bhavadbhAvena me bhava | tathA na ki~nchidapyastu na ki~nchidbhavato.anyathA || 12\.28|| yanna ki~nchidapi tanna ki~nchidapyastu ki~nchidapi ki~nchideva me | sarvathA bhavatu tAvatA bhavAn sarvato bhavati labdhapUjitaH || 12\.29|| \section{sa~NgrahastotranAma trayodashaM stotram |} sa~Ngrahena sukhaduHkhalakShaNaM mAM prati sthitamidaM shR^iNu prabho | saukhyameSha bhavatA samAgamaH svAminA viraha eva duHkhitA || 13\.1|| antarapyatitarAmaNIyasI yA tvadaprathanakAlikAsti me | tAmapIsha parimR^ijya sarvataH svaM svarUpamamalaM prakAshaya || 13\.2|| tAvake vapuShi vishvanirbhare chitsudhArasamaye niratyaye | tiShThataH satatamarchataH prabhuM jIvitaM mR^itamathAnyadastu me || 13\.3|| Ishvaro.ahamahameva rUpavAn paNDito.asmi subhago.asmi ko.aparaH | matsamo.asti jagatIti shobhate mAnitA tvadanurAgiNaH param || 13\.4|| devadeva bhavadadvayAmR^itAkhyAtisaMharaNalabdhajanmanA | tadyathAsthitapadArthasaMvidA mAM kuruShva charaNArchanochitam || 13\.5|| dhyAyate tadanu dR^ishyate tataH spR^ishyate cha parameshvaraH svayam | yatra pUjanamahotsavaH sa me sarvadAstu bhavato.anubhAvataH || 13\.6|| yadyathAsthitapadArthadarshanaM yuShmadarchanamahotsavashcha yaH | yugmametaditaretarAshrayaM bhaktishAliShu sadA vijR^imbhate || 13\.7|| tattadindriyamukhena santataM yuShmadarchanarasAyanAsavam | sarvabhAvachaShakeShu pUriteShvApibannapi bhaveyamunmadaH || 13\.8|| anyavedyamaNumAtramasti na svaprakAshamakhilaM vijR^imbhate | yatra nAtha bhavataH pure sthitaM tatra me kuru sadA tavArchituH || 13\.9|| dAsadhAmni viniyojito.apyahaM svechChayaiva parameshvara tvayA | darshanena na kimasmi pAtritaH pAdasaMvahanakarmaNApi vA || 13\.10|| shaktipAtasamaye vichAraNaM prAptamIsha na karoShi karhichit | adya mAM prati kimAgataM yataH svaprakAshanavidhau vilambase || 13\.11|| tatra tatra viShaye bahirvibhAtyantare cha parameshvarIyutam | tvAM jagattritayanirbharaM sadA lokayeya nijapANipUjitam || 13\.12|| svAmisaudhamabhisandhimAtrato nirvibandhamadhiruhya sarvadA | syAM prasAda paramAmR^itAsavApAnakeliparilabdhanirvR^itiH || 13\.13|| yatsamastasubhagArthavastuShu sparshamAtravidhinA chamatkR^itim | tAM samarpayati tena te vapuH pUjayantyachalabhaktishAlinaH || 13\.14|| sphArayasyakhilamAtmanA sphuran vishvamAmR^ishasi rUpamAmR^ishan | yatsvayaM nijarasena ghurNase tatsamullasati bhAvamaNDalam || 13\.15|| yo.avikalpamidamarthamaNDalaM pashyatIsha nikhilaM bhavadvapuH | svAtmapakShaparipUrite jagatyasya nityasukhinaH kuto bhayam || 13\.16|| kaNThakoNaviniviShTamIsha te kAlakUTamapi me mahAmR^itam | apyupAttamamR^itaM bhavadvapurbhedavR^itti yadi rochate na me || 13\.17|| tvatpralApamayaraktagItikAni tya yuktavadanopashobhitaH | syAmathApi bhavadarchanakriyApreyasIparigatAshayaH sadA || 13\.18|| IhitaM na bata pArameshvaraM shakyate gaNayituM tathA cha me | dattamapyamR^itanirbharaM vapuH svaM na pAtumanumanyate tathA || 13\.19|| tvAmagAdhamavikalpamadvayaM svaM svarUpamakhilArthaghasmaram | Avishannahamumesha sarvadA pUjayeyamabhisaMstuvIya cha || 13\.20|| \section{jayastotranAma chaturdashaM stotram |} jayalakShmInidhAnasya nijasya svAminaH puraH | jayodghoShaNapIyUSharasamAsvAdaye kShaNam || 14\.1|| jayaikarudraikashiva mahAdeva maheshvara | pArvatIpraNayi~nsharva sarvagIrvANapUrvaja || 14\.2|| jaya trailokyanAthaikalA~nChanAlikalochana | jaya pItartalokArtikAlakUTA~Nkakandhara || 14\.3|| jaya mUrtatrishaktyAtmishatashUlollasatkara | jayechChAmAtrasiddArthapUjArhacharaNAmbuja || 14\.4|| jaya shobhashatasyandilokottaravapurdhara | jayaikajaTikAkShINaga~NgAkR^ityAttabhasmaka || 14\.5|| jaya kShIrodaparyastajyotsnAchChAyAnulepana | jayeshvarA~Ngasa~NgottharatnakAntAhimaNDana || 14\.6|| jayAkShayaikashItAMshukalAsadR^ishasaMshraya | jaya ga~NgAsadArbdhavishvaishvaryAbhiShechana || 14\.7|| jayAdharA~NgasaMsparshapAvanIkR^itagokula | jaya bhaktimadAbaddhagoShThIniyatasannidhe || 14\.8|| jaya svechChAtapodeshavipralambhitabAlisha | jaya gaurIpariShva~NgayogyasaubhAgyabhAjana || 14\.9|| jaya bhaktirasArdrArdrabhAvopAyanalampaTa | jaya bhaktimadoddAmabhaktavA~NnR^ittatoShita || 14\.10|| jaya brahmAdideveshaprabhAvaprabhavavyaya | jayalokeshvarashreNishirovidhR^itashAsana || 14\.11|| jayasarvajagannyastasvamudrAvyaktavaibhava | jayAtmadAnaparyantavishveshvaramaheshvara || 14\.12|| jaya trailokyasargechChAvasarAsad.hvitIyaka | jayaishvaryabharodvAhadevImAtrasahAyaka || 14\.13|| jayAkramasamAkrAntasamastabhuvanatraya | jayAvigItamAbAlagIyamAneshvaradhvane || 14\.14|| jayAnukampAdiguNAnapekShasahajonnate | jaya bhIShmamahAmR^ityughaTanApUrvabhairava || 14\.15|| jaya vishvakShayochchaNDakriyAniShparipanthika | jaya shreyaHshataguNAnuganAmAnukIrtana || 14\.16|| jaya helAvitIrnaitadamR^itAkarasAgara | jaya vishvakShayakShepikShaNakopAshushukShaNe || 14\.17|| jaya mohAndhakArAndhajIvalokaikadIpaka | jaya prasuptajagatIjAgarUkAdhipUruSha || 14\.18|| jaya dehAdriku~njAntarnikUja~njIvajIvaka | jaya sanmAnasavyomavilAsivarasArasa || 14\.19|| jaya jAmbUnadodagradhAtUdbhavagirIshvara | jaya pApiShu nindolkApAtanotpAtachandramaH || 14\.20|| jaya kaShTatapaHkliShTamunidevadurAsada | jaya sarvadashArUDhabhaktimallokalokita || 14\.21|| jaya svasampatprasarapatrIkR^itanijAshrita | jaya prapannajanatAlAlanaikaprayojana || 14\.22|| jaya sargasthitidhvaMsakAraNaikAvadAnaka | jaya bhaktimadAlolalIlotpalamagotsava || 14\.23|| jaya jayabhAjana jaya jitajanmajarAmaraNa jaya jagajjyeShTha jaya jaya jaya jaya jaya jaya jaya jaya jaya | jaya jaya jaya jaya tryakSha || 14\.24|| \section{bhaktistotranAma pa~nchadashaM stotram |} trimalakShAlino granthAH santi tatpAragAstathA | yoginaH paNDitAH svasthAstvadbhaktA eva tattvataH || 15\.1|| mAyIyakAlaniyatirAgAdyAhAratarpitAH | charanti sukhino nAtha bhaktimanto jagattaTe || 15\.2|| rudanto vA hasanto vA tvAmuchchaiH pralapantyamI | bhaktAH stutipadochchAropachArAH pR^ithageva te || 15\.3|| na virakto na chApIsho mokShAkA~NkShI tvadarchakaH | bhaveyamapi tUdriktabhaktyAsavarasonmadaH || 15\.4|| bAhyaM hR^idaya evAntarabhihR^ityaiva yo.archati | tvAmIsha bhaktipIyUSharasapUrairnamAmi tam || 15\.5|| dharmAdharmAtmanorantaH kriyayorj~nAnayostathA | sukhaduHkhAtmanorbhaktAH kimapyAsvAdayantyaho || 15\.6|| charAcharapitaH svAminapyandhA api kuShThinaH | shobhante paramuddAmabhavadbhaktivibhUShaNAH || 15\.7|| shilo~nChapichChakashipuvichChAyA~NgA api prabho | bhavadbhaktimahoShmaNo rAjarAjamapIshate || 15\.8|| sudhArdrAyAM bhavadbhaktau luThatApyArurukShuNA | chetasaiva vibho.archanti kechittvAmabhitaH sthitAH || 15\.9|| rakShaNIyaM vardhanIyaM bahumAnyamidaM prabho | saMsAradurgatiharaM bhavadbhaktimahAdhanam || 15\.10|| nAtha te bhaktajanatA yadyapi tvayi rAgiNI | tathApIrShyAM vihAyAsyAstuShTAstu svAminI sadA || 15\.11|| bhavadbhAvaH puro bhAvI prApte tvadbhaktisambhave | labdhe dugdhamahAkumbhe hatA dadhani gR^idhnutA || 15\.12|| kimiyaM na siddhiratulA kiM vA mukhyaM na saukhyamAsravati | bhaktirupachIyamAnA yeyaM shambhoH sadAtanI bhavati || 15\.13|| manasi maline madIyemagnA tvadbhaktimaNilatA kaShTam | na nijAnapi tanute tAnapauruSheyAn svasampadullAsAn || 15\.14|| bhaktirbhagavati bhavati trilokanAthe nanUttamA siddhiH | kiM tvaNimAdikavirahAtsaiva na pUrNeti chintA me || 15\.15|| bAhyato.antarapi chotkaTonmiShattryambakastavakasaurabhAH shubhAH | vAsayantyapi viruddhavAsanAn yogino nikaTavAsino.akhilAn || 15\.16|| jyotirasti kathayApi na kiM chidvishvamapyatisuShuptamasheSham | yatra nAtha shivarAtripade.asminnityamarchayati bhaktajanastvAm || 15\.17|| sattvaM satyaguNe shive bhagavati sphArIbhavatvarchane chUDAyAM vilasantu sha~NkarapadaprodyadrajaHsa~NchayAH rAgAdismR^itivAsanAmapi samuchChettuM tamo jR^imbhatAm | shambho me bhavatAttvadAtmavilaye traiguNyavargo.athavA || 15\.18|| saMsArAdhvA sudUraH kharataravividhavyAdhidagdhA~NgayaShTiH bhogA naivopabhuktA yadapi sukhamabhUjjAtu nanno chirAya itthaM vyartho.asmi jAtaH shashidharacharaNAkrAntikAntottamA~Nga\- stvadbhaktashcheti tanme kuru sapadi mahAsampado dIrghadIrghAH || 15\.19|| \section{pAshAnudbhedanAma ShoDashaM stotram |} na ki~nchideva lokAnAM bhavadAvaraNaM prati varyatkiM chideva bhUtAnAMeM chitNaresvaraparIksA | na ki~nchideva bhaktAnAM bhavadAvaraNaM prati || 16\.1|| apyupAyakramaprApyaH sa~Nkulo.api visheShaNaiH | bhaktibhAjAM bhavAnAtmA sakR^ichChuddho.avabhAsate || 16\.2|| jayanto.api hasantyete jitA api hasanti cha | bhavadbhaktisudhApAnamattAH ke.apyeva ye prabho || 16\.3|| shuShkakaM maiva siddheya maiva muchyeya vApi tu | svAdiShThaparakAShTAptatvadbhaktirasanirbharaH || 16\.4|| yathaivaj~nAtapUrvo.ayaM bhavadbhaktiraso mama | ghaTitastadvadIshAna sa eva paripuShyatu || 16\.5|| satyena bhagavannAnyaH prArthanAprasaro.asti me | kevalaM sa tathA ko.api bhaktyAvesho.astu me sadA || 16\.6|| bhaktikShIvo.api kupyeyaM bhavAyAnushayIya cha | tathA haseyamudyAM cha raTeyaM cha shivetyalam || 16\.7|| viShamastho.api svastho.api rudannapi hasannapi | gambhIro.api vichitto.api bhaveyaM bhaktitaH prabho || 16\.8|| bhaktAnAM nAsti saMvedyaM tvadantaryadi vA bahiH | chiddharmA yatra na bhavAnnirvikalpaH sthitaH svayam || 16\.9|| bhaktA nindAnukare.api tavAmR^itakaNairiva | hR^iShyantyevAntarAviddhAstIkShNaromA~nchasUchibhiH || 16\.10|| duHkhApi vedanA bhaktimatAM bhogAya kalpate | yeShAM sudhArdrA sarvaiva saMvittvachchandrikAmayI || 16\.11|| yatra tatroparuddhAnAM bhaktAnAM bahirantare | nirvyAjaM tvadvapuHsparsharasAsvAdasukhaM samam || 16\.12|| tavesha bhakterarchAyAM dainyAMshaM dvayasaMshrayam | vilupyAsvAdayantyeke vapurachChaM sudhAmayam || 16\.13|| bhrAntAstIrthadR^isho bhinnA bhrAntereva hi bhinnatA | niShpratidvandvi vastvekaM bhaktAnAM tvaM tu rAjase || 16\.14|| mAnAvamAnarAgAdiniShpAkavimalaM manaH | yasyAsau bhaktimAMllokatulyashIlaH kathaM bhavet || 16\.15|| rAgadveShandhakAro.api yeShAM bhaktitviShA jitaH | teShAM mahIyasAmagre katame j~nAnashAlinaH || 16\.16|| yasya bhaktisudhAsnAnapAnAdividhisAdhanam | tasya prArabdhamadhyAntadashAsUchchaiH sukhAsikA || 16\.17|| kIrtyashchintApadaM mR^igyaH pUjyo yena tvameva tat | bhavadbhaktimatAM shlAghyA lokayAtrA bhavanmayI || 16\.18|| muktisaMj~nA vipakvAyA bhaktereva tvayi prabho | tasyAmAdyadashArUDhA muktakalpA vayaM tataH || 16\.19|| duHkhAgamo.api bhUyAnme tvadbhaktibharitAtmanaH | tvatparAchI vibho mA bhUdapi saukhyaparamparA || 16\.20|| tvaM bhaktyA prIyase bhaktiH prIte tvayi cha nAtha yat | tadanyonyAshrayaM yuktaM yathA vettha tvameva tat || 16\.21|| sAkAro vA nirAkaro vAntarvA bahireva vA | bhaktimattAtmanAM nAtha sarvathAsi sudhAmayaH || 16\.22|| asminneva jagatyantarbhavadbhaktimataH prati | harShaprakAshanaphalamanyadeva jagatsthitam || 16\.23|| guhye bhaktiH pare bhaktirbhaktirvishvamaheshvare | tvayi shambhau shive deva bhaktirnAma kimapyaho || 16\.24|| bhaktirbhaktiH pare bhaktirbhaktirnAma samutkaTA | tAraM viraumi yattIvrA bhaktirme.astu paraM tvayi || 16\.25|| yato.asmi sarvashobhAnAM prasavAvanirIsha tat | tvayi lagnamanarghaM syAdratnaM vA yadi vA tR^iNam || 16\.26|| AvedakAdA cha vedyAdyeShAM saMvedanAdhvani | bhavatA na viyogo.asti te jayanti bhavajjuShaH || 16\.27|| saMsArasadaso bAhye kaishchittvaM parirabhyase | svAmin paraistu tatraiva tAmyadbhistyaktayantraNaiH || 16\.28|| pAnAshanaprasAdhanasambhuktasamastavishvayA shivayA | pralayotsavasarabhasayA dR^iDhamupagUDhaM shivaM vande || 16\.29|| parameshvaratA jayatyapUrvA tava vishvesha yadIshitavyashUnyA | aparApi tathaiva te yayedaM jagadAbhAti yathA tathA na bhAti || 16\.30|| \section{divyakrIDAbahumAnanAma saptadashaM stotram |} aho ko.api jayatyeSha svAduH pUjAmahotsavaH | yato.amR^itarasAsvAdamashrUNyapi dadatyalam || 17\.1|| vyApArAH siddhidAH sarve ye tvatpUjApuraHsarAH | bhaktAnAM tvanmayAH sarve svayaM siddhaya eva te || 17\.2|| sarvadA sarvabhAveShu yugapatsarvarUpiNam | tvAmarchayantyavishrantaM ye mamaite.adhidevatAH || 17\.3|| dhyAnAyasatiraskArasiddhastvatsparshanotsavaH | pUjAvidhiriti khyAto bhaktAnAM sa sadAstu me || 17\.4|| bhaktAnAM samatAsAraviShuvatsamayaH sadA | tvadbhAvarasapIyUSharasennaiShAM sadArchanam || 17\.5|| yasyAnArambhaparyantau na cha kAlakramaH prabho | pUjAtmAsau kriyA tasyAH kartArastvajjuShaH param || 17\.6|| brahmAdInAmapIshAste te cha saubhAgyabhAginaH | yeShAM svapne.api mohe.api sthitastvatpUjanotsavaH || 17\.7|| japatAM juhvatAM snAtAM dhyAyatAM na cha kevalam | bhaktAnAM bhavadabhyarchAmaho yAvadyadA tadA || 17\.8|| bhavatpUjAsudhAsvAdasambhogasukhinaH sadA | indrAdInAmatha brahmamukhyAnAmasti kaH samaH || 17\.9|| jagatkShobhaikajanake bhavatpUjAmahotsave | yatprApyaM prApyate ki~nchidbhaktA eva vidanti tat || 17\.10|| tvaddhAmni chinmaye sthitvA ShaTtriMshattattvakarmabhiH | kAyavAkchittacheShTAdyairarchaye tvAM sadA vibho || 17\.11|| bhavatpUjAmayAsa~Ngasambhogasukhino mama | prayAtu kAlaH sakalo.apyananto.apIyadarthaye || 17\.12|| bhavatpUjAmR^itarasAbhogalampaTata vibho | vivardhatAmanudinaM sadA cha phalatAM mama || 17\.13|| jagadvilayasa~njAtasudhaikarasanirbhare | tvadabdhau tvAM mahAtmAnamarchannAsIya sarvadA || 17\.14|| asheShavAsanAgranthivichChedasaralaM sadA | mano nivedyate bhaktaiH svAdu pUjAvidhau tava || 17\.15|| adhiShThAyaiva viShayAnimAH karaNavR^ittayaH | bhaktAnAM preShayanti svatpUjArthamamR^itAsavam || 17\.16|| bhaktAnAM bhaktisaMvegamahoShmavivashAtmanAm | ko.anyo nirvANahetuH syAttvatpUjAmR^itamajjanAt || 17\.17|| satataM tvatpadAbhyarchAsudhApAnamahotsavaH | tvatprasAdaikasamprAptiheturme nAtha kalpatAm || 17\.18|| anubhUyAsamIshAna pratikarma kShaNAtkShaNam | bhavatpUjAmR^itApAnamadAsvAdamahAmudam || 17\.19|| dR^iShTartha eva bhaktAnAM bhavatpUjAmahodyamaH | tadaiva yadasambhAvyaM sukhamAsvAdayanti te || 17\.20|| yAvanna labdhastvatpUjAsudhAsvAdamahotsavaH | tAvannAsvAdito manye lavo.api sukhasampadaH || 17\.21|| bhaktAnAM viShayanveShAbhAsAyAsAdvinaiva sA | ayatnasiddhaM tvaddhAmasthitiH pUjAsu jAyate || 17\.22|| na prApyamasti bhaktanAM nApyeShAmasti durlabham | kevalaM vicharantyete bhavatpUjAmadonmadAH || 17\.23|| aho bhaktibharodArachetasAM varada tvayi | slAghyaH pUjAvidhiH ko.api yo na yAch~nAkala~NkitaH || 17\.24|| kA na shobhA na ko hlAdaH kA samR^iddhirna vAparA | ko vA na mokShaH ko.apyeSha mahAdevo yadarchyate || 17\.25|| antarullasadachChAchChabhaktipIyUShapoShitam | bhavatpUjopayogAya sharIramidamastu me || 17\.26|| tvatpAdapUjAsambhogaparatantraH sadA vibho | bhUyAsaM jagatAmIsha ekaH svachChandacheShTitaH || 17\.27|| tvaddhyAnadarshanasparshatR^iShi keShAmapi prabho | jAyate shItalasvAdu bhavatpUjAmahAsaraH || 17\.28|| yathA tvameva jagataH pUjAsambhogabhAjanam | tathesha bhaktimAneva pUjAsambhogabhAjanam || 17\.29|| ko.apyasau jayati svAmin bhavatpUjAmahotsavaH | ShaTtriMshato.api tattvAnAM kShobho yatrollasatyalam || 17\.30|| namastebhyo vibho yeShAM bhaktipIyUShavAriNA | pUjyAnyeva bhavanti tvatpUjopakaraNAnyapi || 17\.31|| pUjArambhe vibho dhyAtvA mantrAdheyAM tvadAtmatAm | svAtmanyeva pare bhaktA mAnti harSheNa na kvachit || 17\.32|| rAjyalAbhAdivotphullaiH kaishchitpUjAmahotsave | sudhAsavena sakalA jagatI saMvibhajyate || 17\.33|| pUjAmR^itApAnamayo yeShAM bhogaH pratikShaNam | kiM devA uta muktAste kiM vA ke.apyeva te janAH || 17\.34|| pUjopakaraNIbhUtavishvaveshena gauravam | aho kimapi bhaktAnAM kimapyeva cha lAghavam || 17\.35|| pUjAmayAkShavikShepakShobhAdevAmR^itodgamaH | bhaktAnAM kShIrajaladhikShobhAdiva divaukasAm || 17\.36|| pUjAM ke chana manyante dhenuM kAmadughAmiva | sudhAdhArAdhikarasAM dhayantyantarmukhAH pare || 17\.37|| bhaktAnAmakShavikShepo.apyeSha saMsArasammataH | upanIya kimapyantaH puShNAtyarchAmahotsavam || 17\.38|| bhaktikShobhavashAdIsha svAtmabhUte.archanaM tvayi | chitraM dainyAya no yAvaddInatAyAH paraM phalam || 17\.39|| upachArapadaM pUjA keShAM chittvatpadAptaye | bhaktAnAM bhavadaikAtmyanirvR^ittiprasarastu saH || 17\.40|| apyasambaddharUpArchAbhaktyunmAdanirargalaiH | vitanyamAnA labhate pratiShThAM tvayi kAmapi || 17\.41|| svAdubhaktirasAsvAdastabdhIbhUtamanashchyutAm | shambho tvameva lalitaH pUjAnAM kila bhAjanam || 17\.42|| paripUrNAni shuddhAni bhaktimanti sthirANi cha | bhavatpUjAvidhau nAtha sAdhanAni bhavantu me || 17\.43|| asheShapUjAsatkoshe tvatpUjAkarmaNi prabho | aho karaNavR^indasya kApi lakShmIrvijR^imbhate || 17\.44|| eShA peshalimA nAtha tavaiva kila dR^ishyate | vishveshvaro.api bhR^ityairyadarchyase yashcha labhyase || 17\.45|| sadAmurttAdamUrttAdvA bhAvAdyadvApyabhAvataH | uttheyAnme prashastasya bhavatpUjAmahotsavaH || 17\.46|| kAmakrodhAbhimAnaistvAmupaharIkR^itaiH sadA | ye.archayanti namastebhyasteShAM tuShTo.asmi tattvataH || 17\.47|| jayatyeSha bhavadbhaktibhAjAM pUjAvidhiH paraH | yastR^iNaiH kriyamAno.api ratnairevopakalpate || 17\.48|| \section{AviShkAranAma aShTAdashaM stotram |} jagato.antarato bhavantamAptvA punaretadbhavato.antarAllabhante | jagadIsha tavaiva bhaktibhAjo na hi teShAmiha dUrato.asti ki~nchit || 18\.1|| kvachideva bhavAn kvachidbhavAnI sakalArthakramagarbhiNI pradhAnA | paramArthapade tu naiva devyA bhavato nApi jatattrayasya bhedaH || 18\.2|| no jAnate subhagamapyavalepavanto lokAH prayatnasubhagA nikhila hi bhAvAH | chetaH punaryadidamudyatamapyavaiti naivAtmarUpamiha hA tadaho hato.asmi || 18\.3|| bhavanmayasvAtmanivAsalabdhasampadbharAbhyarchitayuShmada~NghriH | na bhojanAchChAdanamapyajasramapekShate yastamahaM nato.asmi || 18\.4|| sadA bhavaddehanivAsasvastho.apyantaH paraM dahyata eSha lokaH | tavechChayA tatkuru me yathAtra tvadarchanAnandamayo bhaveyam || 18\.5|| svarasoditayuShmada~NghripadmadvayapUjAmR^itapAnasaktachittaH | sakArthachayeShvahaM bhaveyaM sukhasaMsparshanamAtralokayAtraH || 18\.6|| sakalavyavahAragochare sphuTamantaH spurati tvayi prabho | upayAntyapayAnti chAnishaM mama vastUni vibhAntu sarvadA || 18\.7|| satatameva tavaiva pure.athavApyarahito vichareyamahaM tvayA | kShaNalavo.apyatha mA sma bhavetsa me na vijaye nanu yatra bhavanmayaH || 18\.8|| bhavada~NgaparisravatsushItAmR^itapUrairbharite samantato.api | bhavadarchanasampadeha bhaktAstava saMsArasaro.antare charanti || 18\.9|| mahAmantrataruchChAyAshItale tvanmahAvane | nijAtmani sadA nAtha vaseyaM tava pUjakaH || 18\.10|| prativastu samastajIvataH pratibhAsi pratibhAmayo yathA | mama nAtha tathA puraH prathAM vraja netratrayashUlashobhitaH || 18\.11|| abhimAnacharUpahArato mamatAbhaktibhareNa kalpitAt | paritoShagataH kadA bhavAnmama sarvatra bhaveddR^ishaH padam || 18\.12|| nivasanparamAmR^itAbdhimadhye bhavadarchAvidhimAtramagnachittaH | sakalaM janavR^ittamAchareyaM rasayan sarvata eva ki~nchanApi || 18\.13|| bhavadIyamihAstu vastu tattvaM vivarItuM ka ivAtra pAtramarthe | idameva hi nAmarUpacheShTAdyasamaM te harate haro.asi yasmAt || 18\.14|| shAntaye na sukhalipsutA manAgbhaktisambhR^itamadeShu taiH prabhoH | mokShamArgaNaphalApi nArthanA smaryate hR^idayahAriNaH puraH || 18\.15|| jAgaretaradashAthavA parA yApi kAchana manAgavasthiteH | bhaktibhAjanajanasya sAkhilA tvatsanAthamanaso mahotsavaH || 18\.16|| Amano.akShavalayasya vR^ittayaH sarvataH shithilavR^ittayo.api tAH | tvAmavApya dR^iDhadIrghasaMvido nAtha bhaktidhanasoShmaNAM katham || 18\.17|| na cha vibhinnamasR^ijyata ki~nchidastyatha sukhetaradatra na nirmitam | atha cha duHkhi cha bhedi cha sarvathApyasamavismayadhAma namo.astu te || 18\.18|| kharaniShedhakhadAmR^itapUraNochChalitadhautavikalpamalasya me | dalitadurjayasaMshayavairiNastvadavalokanamastu nirantaram || 18\.19|| sphuTamavisha mAmathAvisheyaM satataM nAtha bhavantamasmi yasmAt | rabhasena vapustavaiva sAkShAtparamAsattigataH samarchayeyam || 18\.20|| tvayi na stutishaktirasti kasyApyathavAstyeva yato.atisundaro.asi | satataM punararthitaM mamaitadyadavishrAnti vilokayeyamIsham || 18\.21|| \section{udyotanAbhidhAnamekonaviMshaM stotram |} prArthanAbhUmikAtItavichitraphaladAyakaH | jayatyapUrvavR^ittAntaH shivaH satkalpapAdapaH || 19\.1|| sarvavastuni cha yaikanidhAnAtsvAtmanastvadakhilaM kila labhyam | asya me punarasau nijA AtmA na tvameva ghaTase paramAstAm || 19\.2|| j~nAnakarmamayachidvapurAtmA sarvathaiSha parameshvara eva | syAdvapustu nikhileShu padArtheShveShu nAma na bhavetkimutAnyat || 19\.3|| viShamArtimuShAnena phalena tvaddR^igAtmanA | abhilIya pathA nAtha mamAstu tvanmayI gatiH || 19\.4|| bhavadamalacharaNachintAratnalatAla~NkR^itA kadA siddhiH | siddhajanamAnasAnAM vismayajananI ghaTeta mama bhavataH || 19\.5|| karhi nAtha vimalaM mukhabimbaM tAvakaM samavalokayitAsmi | yatsravatyamR^itapUramapUrvaM yo nimajjayati vishvamasheSham || 19\.6|| dhyAtamAtramuditaM tava rUpaM karhi nAtha paramAmR^itapUraiH | pUrayettvadavibhedavimokShAkhyAtidUravivarANi sadA me || 19\.7|| tvadIyAnuttararasAsa~NgasantyaktachApalam | nAdyApi me mano nAtha karhi syAdastu shIghrataH || 19\.8|| mA shuShkakaTukAnyeva paraM sarvANi sarvadA | tavopahR^itya labdhAni dvandvAnyapyApatantu me || 19\.9|| nAtha sAmmukhyamAyAntu vishuddhAstava rashmayaH | yAvatkAyamanastApatamobhiH parilupyatAm || 19\.10|| deva prasIda yAvanme tvanmArgaparipanthikAH | paramArthamuSho vashyA bhUyAsurguNataskarAH || 19\.11|| tvadbhaktisudhAsArairmAnasamApUryatAM mamAshu vibho | yAvadimA uhyantAM niHsheShAsAravAsanAH plutvA || 19\.12|| mokShadashAyAM bhaktistvayi kuta iva martyadharmiNo.api na sA | rAjati tato.anurUpAmAropaya siddhibhUmikAmaja mAm || 19\.13|| siddhilavalAbhalubdhaM mAmavalepena mA vibho saMsthAH | kShAmastvadbhaktimukhe prollasadaNimAdipakShato mokShaH || 19\.14|| dAsasya me prasIdatu bhagavAnetAvadeva nanu yAche | dAtA tribhuvananAtho yasya na tanmAdR^ishAM dR^isho viShayaH || 19\.15|| tvadvapuHsmR^itisudhArasapUrNe mAnase tava padAmbujayugmam | mAmake vikasadastu sadaiva prasravanmadhu kimapyatilokam || 19\.16|| asti me prabhurasau janako.atha tryambako.atha jananI cha bhavAnI | na dvitIya iha ko.api mamAstItyeva nirvR^itatamo vichareyam || 19\.17|| \section{charvaNAbhidhAnaM viMshaM stotram |} nathaM tribhuvananAthaM bhUtisitaM trinayanaM trishUladharam | upavItIkR^itabhoginamindukalAshekharaM vande || 20\.1|| naumi nijatanuvinismaradaMshukapariveShadhavalaparidhAnam | vilasatkapAlamAlAkalpitanR^ittotsavAkalpam || 20\.2|| vande tAn daivataM yeShAM harashcheShTA harochitAH | haraikapravaNAH prANAH sadA saubhAgyasadmanAm || 20\.3|| krIDitaM tava maheshvaratAyAH pR^iShThato.anyadidameva yathaitat | iShTamAtraghaTiteShvavadAneShvAtmanA paramupAyamupaimi || 20\.4|| tvaddhAmni vishvavandye.asminniyati krIDane sati | tava nAtha kiyAn bhUyAnnAnandarasasambhavaH || 20\.5|| kathaM sa subhago mA bhUdyo gauryA vallabho haraH | haro.api mA bhUdatha kiM gauryAH paramavallabhaH || 20\.6|| dhyAnAmR^itamayaM yasya svAtmamUlamanashvaram | saMvillatAstathArUpAstasya kasyApi sattaroH || 20\.7|| bhaktikaNDUsamullAsAvasare parameshvara | mahAnikaShapAShANasthUNA pUjaiva jAyate || 20\.8|| sadA srShTivinodAya sadA sthitisukhAsine | sadA tribhuvanAhAratR^iptAya svAmine namaH || 20\.9|| na kvApi gatvA hitvApi na ki~nchididameva ye | bhavyaM tvaddhAma pashyanti bhavyAstebhyo namo namaH || 20\.10|| bhaktilakShmIsamR^iddhAnAM kimanyadupayAchitam | etayA vA daridraNAM kimanyadupayAchitam || 20\.11|| duHkhAnyapi sukhAyante viShamapyamR^itAyate | mokShAyate cha saMsAro yatra mArgaH sa sha~NkaraH || 20\.12|| mUle madhye.avasAne cha nAsti duHkhaM bhavajjuShAm | tathApi vayamIshAna sIdAmaH kathamuchyatAm || 20\.13|| j~nAnayogAdinAnyeShAmapyapekShitumarhati | prakAshaH svairiNAmiva bhavAn bhaktimatAM prabho || 20\.14|| bhaktAnAM nArtayo nApyastyAdhyAnaM svAtmanastava | tathApyasti shivetyetatkimapyeShAM bahirmukhe || 20\.15|| sarvAbhAsAvabhAso yo vimarshavalito.akhilam | ahametaditi staumi tAM kriyAshaktimIsha te || 20\.16|| vartante jantavo.asheShA api brahmendraviShNavaH | grasamAnAstato vande deva vishvaM bhavanmayam || 20\.17|| sato vinAshasambandhAnmatparaM nikhilaM mR^iShA | evamevodyate nAtha tvayA saMhAralIlayA || 20\.18|| dhyAtamAtmupatiShThata eva tvadvapurvarada bhaktidhanAnAm | apyachintyamakhilAdbhutachintAkartR^itAM prati cha te vijayante || 20\.19|| tAvakabhaktirasAsavasekAdiva sukhitamarmamaNDalasphuritaiH | nR^ityati vIrajano nishi vetAlakulaiH kR^itotsAhaH || 20\.20|| ArabdhA bhavadabhinutiramunA yenA~Ngakena mama shambho | tenAparyantamimaM kAlaM dR^iDhamakhilameva bhaviShIShTa || 20\.21|| iti utpaladevavirachitA shivastotrAvaliH sampUrNA | ## Encoded and proofread by Somadeva Vasudeva \medskip\hrule\obeylines Please send corrections to sanskrit@cheerful.com Last updated \today https://sanskritdocuments.org \end{document}