% Text title            : Stutipaddhatih
% File name             : stutipaddhatiH.itx
% Category              : shiva, shrIdhara-venkaTesha, stuti
% Location              : doc\_shiva
% Author                : Sri Sridhara Venkatesa
% Proofread by          : Aruna Narayanan
% Description-comments  : shrIdharastutimaNimAlA dvitIyo bhAgaH stutimaNimAlA
% Latest update         : November 20, 2021
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Stutipaddhatih ..}##
\itxtitle{.. stutipaddhatiH ..}##\endtitles ##
shrIshivAbhyAM namaH |
namaste bhImAya shrutishikharasImAya cha namo
      namaste sharvAya kShapitayamagarvAya cha namaH |
namaste rudrAya sphuradavanamudrAya cha namo
      namaste sAmbAya trijagadavalambAya cha namaH || 1||
aLindasurapAdapaH shritavatAM dayAto.arjune
      puLindavapurAptavAnaghaharasvanAmAkSharaH |
miLindakachayaikayA miLitavAmabhAgaH sphura\-
      tkaLindatanayormi nirmalagaLo.ayamasmatprabhuH || 2||
naivAkAraM kamapi sahate tAttvikaM no guNaM vA
      pArthakyaM vA na tava kiyadapyantato.asmatpratIchaH |
AmnAyAnAM vitatiraparichChedamAvedayantI
      tvadrUpasyAnaghasukhachidekAyanasya smarAre || 3||
AtmAnaM nashshiva parachidAnandarUpaM bhavantaM
      mandAtmano vayamakushalAH paryupetuM tadAstAm |
uchchAnnIchAnapi hi gahanAduddharantIndugaurI
      gaurIjAnerjayati karuNA kApi te sA gatirnaH || 4||
brUmaH kiM vA purahara chidAnandarUpasvarUpaM
      sAmrAjyaM nastvamasi tadapabhraMshasa~NkleshitAH smaH |
tallAbhAya pratibhavati tattAvakaM divyarUpaM
      gauraM gaurIlasitamasitagrIvamardhenduchUDam || 5||
rUpaM me chidghanamanupamaM darshayantyAgamAntAH
      hanta shrAnto gahanakuhanaikAntadakShaistadakShaiH |
nApnomyetairupagata bhavatsannidhishchoparudhye
      nArhasyenaM punarasharaNaM nAtha sarvaj~na hAtum || 6||
mAndyaM kvaitat gahanakuhanaikAntikaH kvAkShavargoM
      nistIryaitat kusR^iti shivatallabhyate na pravaktum |
diShTyA tu tvAmadhigatavato hastalagnA jayashrIH
      dR^iShTebhAnau na khalu tamasAM prAgiva syAtprachAraH || 7||
rUpaM te chitsukhamapi shiva trivyavachChedashUnyaM
      tallIlaitad bhavati chidachidvastujAtaM tadAstAm |
nandAmi tvAmahamanubhavaMstattadutkarSharUpaM
      syAdutkarShaH kimu sukhachidunmeShataH kashchidanyaH || 8||
amUrtaM paraM vA.aparaM vA.athamUrtaM
      paraM vApi yatte vapuryachcha nAma |
dishaikatra tatrAnishaikAgratAM me
      tadabhyarthaye tvAM dayasvendumauLe || 9||
tvaddivyamUrtiparichintana dhArayA vA
      tvaddivyanAmaparikIrtanadhArayA vA |
kAlaM yathA shiva nayAmi tathA dayasva
      no chedanena mama kiM hatajIvanena || 10||
uchchanIchasadasatsukhaduHkhA\-
      dyuchchaladvividharUpadharaH kim |
va~nchayasyahaha pa~nchasharAre
      va~nchanAM tadiha mu~ncha namaste || 11||
tattadrUpaM vahasi viharannaikarUpaiH prakarShaiH
      tAMstAn gopAyasi tadupadhistvaM tadArAdhyamAnaH |
vishvatrANapraNaya shiva te vaibhavaM tadvarAko
      boddhuM neshe bhavasi sharaNaM tvaM mamedaM tu jAne || 12||
svakarapratipATitasvachApaH
      svadR^igambhojasamarchitasvakA~NghriH |
svapadAmbvavataMsitasvamUrdhA
      sharaNaM me.astu sa ko.api vishvahetuH || 13||
shrIpatyumApatipadAdyabhidheyamUrti\-
      rUpaM tathA hariharAdimanAmarUpam |
rUpaM tavesha sukhachidvapuSho dvirUpaM
      tvatprAptikalpalatikodayabIjabhUtam || 14||
jyotsnAgauraM yadachalasutAjAni saMviddhanaM yan\-
      meghashyAmaM girisha kamalAvallabhaM vApi rUpam |
taddhanyAnAM bhavabhayaharaM darshayantyAdyavAchaH
      tatrAdye me vahati kutukaM chittamuttaMsitendau || 15||
vAchyaM shivAviti padasya vayaM kathaM vA
      nirNetumIdR^ishatayA nipuNIbhavAmaH |
yasya svarUpamakutojanuShAmasheShAH
      sImA girAmapi sitAsitamAmananti || 16||
manmUrdhAnaM surabhayatu tatpArvatIhastalAlyaM
      tvaddivyashrIcharaNakamaladvandvamardhendumauLe |
vANIlakShmIsarabhasavashIkAradhuryAH shrutisrI\-
      sImantAla~NkR^itivirachanAtatparA yatparAgAH || 17||
kArtAntaki~NkaragaNAH kramatAtra kiM vA
      kiM vA kR^itAnta bhavato.api cha kR^ityamatra |
pAdAmbujaM bhagavato bhavadIyagarva\-
      sarvasvahAri satataM hR^idi nashchakAsti || 18||
chUDAjyotsnAlaharibhirapAkurvati dhvAntamantaH
      tApaM sadyashshamati vamati svairamAnandadhArAm |
sAmbe tasminmahasi rahasi shrIgirAM prAktanInAM
      AstAmastAparaviparivR^ittyantarAyo.antarAtmA || 19||
krINAtyantaHkaraNamamarodArakoTIrahIra\-
      smerajyotsnAsnapitacharaNashrIrumAla~NkR^itA~NkA |
sA vishvADhya~NkaraNakaruNAbindurinduprasannA
      netrodanyAM haratu hara te divyamUrtirmadIyAm || 20||
kiM pachAna iva kiM vividhAshA\-
      lampaTo.asmi shiva kintvidamIhe |
lumpatAdidamahampadavAchyaM
      tvaM parisphura sukhaM paramesha || 21||
maghavadAdinilimpaparamparA\-
      maNikirITamayUkhamayA~NghriNi |
makuTakandaLitenduni lIyatAM
      mahasi me hR^idayaM shitikandhare || 22||
saMvitsukhaparipAkaM sAmbaM kandarpasundaraM kamapi |
shashishakalaghaTitachUDaM shAntaM karavANyahaM dhiyashsharaNam || 23||
ardhendUttaMsitamagasutAvAmavAmA~NkasImaM
      kAruNyAbdhe shiva tava chidAnandarUpasvarUpam |
smeraM gauraM bhavajalanidheH pAramArAddhumichChan
      taddhIdhArollasitakusumairarchaye sArthayedam || 24||
udvelAnandadhuchidabhidhe kelisindhau kadA vA
      devyA dIvyannachalasutayA sArdhamardhendumauLe |
tadvIchInAM priyasahacharaistApamunmUlayan me
      vartethAstvaM nayanavalanairvatsalairakShisImni || 25||
krIDantaM khalvachalasutayA sve sukhAnandasindhau
      chUDAlaM tvAM shashikalikayA draShTumabhyAgato.asmi |
tatkallolairanavadhibhirAchChAditAsheShagAtro
      na tvAmIkShe na cha shashikalAM nAmbikAM vA purAre || 26||
pApaughaukasyahaha shiva me yadvarAkasya chitte
      tvatpAdAmbhoruhamamR^itaniShyandi yogIndragamyam |
dhatse tattvaM kimapi kR^ipayA.a.ali~NgitaH pAravashyaM
      nItasseyaM jayati bhagavan jIvikAmAdR^ishAnAm || 27||
kalyunmIlajjvalanavalayinyantara~Nge.arpitaM me
      gaurIsha tvachcharaNamaruNaM bhAti kAruNyamUrte |
soDhA glAnistvamasi nikhilaglAnihArI mamaivaM
      krItasso.ayaM tava kimaparaM tanmadIyAntarAtmA || 28||
kAra~NkAraM kamapi kamapi svairamAyasyatA.adaH
      khedachChedi smarahara mayA tvatpadaM khalvavApyam |
bhrAmambhrAmaM klamabharajuShA stanyamanvichChatA na\-
      nvabhyetavyaM bhavati shishunA mAturevopakaNTham || 29||
agre gaurI sakutukadishaddR^ikprabhAmechakAtmA
      shoNachChAyA.adharaparisare chandrachUDasmita shrIH |
jyotsnevAbhyullasati mukure gaNDabhAge tavAsyAM
      majjatvasminmatirinasutA shoNaga~NgAsamaShTau || 30||
shrImatpAdAmbujamamR^itaniShyandi te chandrachUDa!
      premNA devyAstadavamR^ishatA pANipadmena sAkam |
Adhatsvaitanmama dR^ishi vibho tadvyapaitu jvaro.asyAH
      bhAvatkAsechanakavapuShA.a.apAdyatAM pAraNA cha || 31||
yatpAdAbjaM hR^idi vinihitaM mAmake tAvakInaM
      taddhanyo.ahaM tribhuvanaguro bhAgyamanyat kimAtaH |
AsIno vA kvachana vicharanvishvasanneva satyaM
      nAhaM jahyAmidamidamumAkAnta vA~nChAmi bhUyaH || 32||
tanudyotairudyaddinakaraparArdhya smayadhurA\-
      nirAsaM tanvadbhirvidadhadavibhinnaM tribhuvanam |
puro dhAvantIbhishshatadhR^itimukhAbhirdiviShadAM
      chamUbhistvaM sAmbaH purahara puro.asyAvirabhavaH || 33||
nigamalatAmakuTInAM bhAsAM
      aravindaripukalAmakuTInAm |
tArAjAlasitAnAM dAso.ahaM
      shirasi jahnujAlasitAnAm || 34||
yAvaddhAvayataH shravassukhadhurAluNTAkaghaNTAkaTu\-
      kkANairantakasairibhasya purataH pAto.asya me trasyataH |
tAvattAvakatu~Ngapu~NgavakhuradhvAnairnidhAnairmudAM
      devAvirbhaviShIShTa tUrNamidamAdhAsIShTa dhR^iShTaM manaH || 35||
mandasmitairmakuTakandaLitendurekhaiH
      gaurIsakhaiH sphaTikagauramanoharA~NgaiH |
tvadvigrahairavirataM paritaH sphuradbhiH
      cheto.astu me kavachitaM shiva te prasAdAt || 36||
sarvAtmakastvamasi sarvagayA.api mUrtyA
      tanme tanoShi tanaye.apyakhilA~ncha shikShAm |
Avedmi naiSha tadanugrahayALutAM te
      tachchAj~na eSha iti tasya dayAM prasUtAm || 37||
tamasashshamanaM tvadIyarUpaM
      sharadindudyuti shailajA sahAyam |
nayanAdhvani navyachandrachUDaM
      charame me samaye chakAstu shambho || 38||
parimaLabharAchAntAshAnte parisphuTamallikA\-
      vakuLasadane mandapraspandimArutasevite |
saha girijayA nandan kandarpasundaravigraho
      haratu nayanodanyAM dhanyAtmanAM purashAsanaH || 39||
kalAdharakalAdhare kalinirAsadattAdare
      nagendratanayAsakhe nayanitArkachandrAnale |
karAttahariNe sthitiM kalaya chitta kiM chintayA
      dayArasaghane dharAdharasharAsane tejasi || 40||
yasmai namaH shrutiriyaM natisheShitAM tva\-
      dbhAvagrahe vadati li~NgatayA purAre |
tvannAparaM spR^ishatu tannatisheShiteyaM
      li~NgaM bhavennakhalu sAdhyavadanyagAmi || 41||
namo.astu te sha~Nkara shashvadarthaye
      samarthayedaM karuNAnidhe vibho |
darasmitollAsimukho hR^idissphuran
      durasmitAM me kuru bhasmitAmimAm || 42||
karatalakalitakura~NgaM
      karuNArasapUrapUritApA~Ngam |
kalpitaratipatibha~NgaM
      ka~nchana kalayAmi kIrtibharatu~Ngam || 43||
kaThorakuchamaNDalAkalitapAdapa~NkeruhaH
      karAgradhR^itatatkaraM girisutAmuparyuddharan |
smitA~nchitamukhAmbujaH smitamukhaM pibannIkShaNaiH
      karotu jayama~NgaLaM kanakama~nchashAyI shivaH || 44||
nijasAyakitamukundaM
      nIhArAchalasutAkutukakandam |
ki~NkaradanimiShavR^indaM
      sha~NkaramupayAmi sachchidAnandam || 45||
bhavataM mayi vatsalAvubhA\-
      vavataM mAM vitarau shivau yuvAm |
niyataM bhavadekatAnatAM
      nayataM mAmidamastu vAM namaH || 46||
mamesha tanvantu mudaM dayAsudhAjharI\-
      chayAstAvakadR^i~NmarIchayaH |
sahAsate yairdarahAsachandrikAH
      namasyadachChedyatamasyadachChidaH || 47||
j~nAnAnandonnativihR^itayo mUrtayashsharva sarvAH
      tAM tAmArAdhayati bhagavan yo yathA tattathA tvam |
tAbhiH prodbhAsayati bhavatassannidhAnAt sudhIstAM
      ArAdhnomItyahamiti cha yastasya tAsAnna pAram || 48||
tvaM taskarANAM patirindumauLe
      na manmanastaskaratA kathaM te |
hantA namo hantra iti shrutestvaM
      kathaM na hantA madaghachChaTAnAm || 49||
mAlinyashAlinyapi mAnase me
      visha prabho tachcha vidhehi shuddham |
dIpo gR^ihe kiM timiroparuddhe
      nAyAti tat kinna pariShkaroti || 50||
prapanne sarvasvaprada iti vipannArtihara i\-
      tyaghaughachChinnAmetyakhilatanubhAjAM suhR^iditi |
yashashshAlI tvaM tvAmahamanapanodyArtirabhidhA\-
      vadaste prApto mAM shiva dhigayashaste vidadhatam || 51||
girijAstanabharaparimaLapishune
      shishunendunA.avataMsavati |
parimiLatu shrutikabarIparimaLa\-
      garimaNi manomadIyamidam || 52||
anIkShamANo mukhamanyadIyaM
      asaMsmaran jAtvapi chAnyadharmam |
antassmarannantakashAsana tvAM
      kadA tvadAkhyAM kathayan sukhI syAm || 53||
keyaM durnItireShA vada bhavati kadA vAsti kinnau vibhAgo
      daivAdaishvaryamAptaM niravadhi bhavatA kinna tadbhoktR^itA me |
tatkurvetanna kurvityapi vadasi samaM pashya mAmIsha no chet
      kUTasthe tvAM nivedya sthiramapi bhavadaishvaryamunmUlayAmi || 54||
vilasaddhanapuShpapuShpapuShpaM
      virahastrIjanamAramAramAram |
vinatAmararAjarAjarAjaM
      viShamAkShaM bhaja kAlakAlakAlam || 55||
indIvaralaLitaprabha\-
      mindusmayahAri vadanavAriruham |
nandayashodAnandathuka\-
      ndaLamApiba sukhena sakhi dR^iShTe || 56||
shive yasmin rajjAvahimiva vimohAdupanataM
      gR^iNantImaM vedA jagadudayamuddAmarachanam |
samuttu~NgastheyassukhasulabhatAyai sa bhagavAn
      prabodhAnandAtmA jayati shivanAmAtmakatayA || 57||
ayante vishrAntiM nigamanikarA yatra paramAM
      yadAnandodanvatpR^iShatalavatuShTA vidhimukhAH |
mahesho jihvAyAH kShaNamapi sa naivojjhitumalaM
      nanu tvAM rAmAkhye tava madhuratAM varNayatu kaH || 58||
shrImadgaurIramaNavapuShA shrIsharUpeNa chaikaH
      satyaj~nAnAmalasukhatanussa~nchakAstIshvaro yaH |
tasyai tasyAkhilajagadadhiShThAnabhUtasya nAmnA\-
      mAmnAyoktipravitatiriyaM vakti muktipradatvam || 59||
jij~nAsA hi bhavatpade bahujanuryaj~nAdisAdhyodayA
      kva j~nAnaM nanu durlabho.asi sulabho vij~nAyase chAnyataH |
kinnAmAtra nivedaye rasanayA tvannAma chet gR^ihyate
      hA hanta bhramaNairalaM hara karagrAhaM tadA gR^ihyase || 60||
ye.ananyAssamupAsate.asmi duritAt gopteti chAhaM tava
      trAyasveti sakR^it prapatturakhilatrAsaM harANIti cha |
satyaM pratyashR^iNordadAsi tu bhavannAmAkSharagrAhiNe
      sarvasvaM shiva tAvataiva jayati tvAmandhayantI dayA || 61||
aprApyamIkShaNamapi shravaNaM yadIya\-
      manyaissurarShibhirapIndvavataMsa tasyAH |
muktishriyaH kabarikA.asya karAgralagnA
      mugdho.api yo rasanayA spR^ishati tvadAkhyAm || 62||
jAgratyumesha tava nAmni purassuradrau
      tyaktvaitadAptumanaso.anyata iShTasiddhIH |
kShiptvA.amR^itaM karagataM niyataM yatante
      bhUpAMsubhirgamayituM prashamaM pipAsAm || 63||
ekaikameva shubhamarpayituM kShamANi
      hetvantarANyapi cha yena vinA na tAni |
shreyo.akhilaM dishati yattvitarAnapekShaM
      tasmin satIsha tava nAmani kiM bhayaM me || 64||
Arto.asmItIraNamakaruNAropaNAya tvayi syAt
      dAso.asmIti hyanupadhiparitrAtR^itApahnavAya |
sAgasko.asmItyapi tava durArAdhatApAdakaM syAd
      Atastvat saMsmR^itiralamumAkAnta gopAyituM naH || 65||
maheshassarvaj~naH purahara mahAdeva iti cha
      tvadAkhyAnAmarthaM nipuNataramAsAM vimR^ishataH |
upAsyaH kasyAntaH sphurati na bhavAn deva bhuvane
      gR^ihItaM chennedaM hR^idayamadayaM nAstikatayA || 66||
doShagrahaH svaviShaye guNadhIH paratra
      chAnyatra cheshvaradR^ishiH(matiH) priyabhAShaNa~ncha |
tvadrAgitA vijanavR^ittiritIsha ShaDbhiH
      sevAkramaiH kalaya sAdhu bhavatparaM mAm || 67||
kailAsashikharidhAmnaH kalimalavidhvaMsahetunijanAmnaH |
phaNichAruhAradAmno bhaktA vayamadbhutasya sumahimnaH || 68||
kechit puShpaM daLamapi janAH kShiptavantaH prati tvAM
      sa~NkrIDante suratarubharAkrIDasImAsu dhanyAH |
kIrNaM nIraM kimapi shiva yaiste sudhAsindhukeLI\-
      svachChandA bhAntyapi tu na bhajAmyeSha jAlmo bhavantam || 69||
tvatsampUjAsvapi karayugaM pAdayugmaM tathA tvat\-
      prAdakShiNyakramaNavidhiShu tvatprashaMsAsu vAcham |
chetastvatsaMsmR^itiShu bhuvi ye kurvate sharva te.amI
      dhanyAH kurvantyapi nijadR^igadhvanyamanya~ncha dhanyam || 70||
chandrArdhashekhara bhavachcharaNAravinda\-
      sandarshanAdahamapAsta samasta khedaH |
AstAmidaM madavalokanabhAjanAnAM
      apyenasA paribhavo duravApa eva || 71||
yastvatpAdAmburuhakalanaspR^iShTajanmA sa me.astu
      trAtA dAtA gururapi sakhA vA nu bandhvantaraM vA |
shambho yastvayyahaha vimukho mA sa me tasya mA.ahaM
      mahyaM druhyannapi bhavati hi tvAM shrito vallabho me || 72||
preyAnekastvamasi paramAnandarUpaH smarAre
      preyAMsaste bhajanakR^itino dR^iShTamAtrAt punantaH |
tachcha preyastadupakaraNIbhAvamAlambate yat
      nAnyat preyastava hi karuNAbhAjanAnAM janAnAm || 73||
ruShTe hare.avati gururjagatItyanena
      nyAyena mAM bhagavatojjhitamIshvareNa |
ArtaM balAdavata bhAgavatA namo vaH
      kAruNyavAri nidhayo guravashcha yUyam || 74||
vadane shivadivyanAmadheyaM mahimAnaH punarAshaye tadIyAH |
vasatissaha tatparatvadhanyairativelaM kila bhAgyavaibhavaM naH || 75||
Ishena yaM prati sakR^innijanAmadheya\-
      sa~NkIrtanasya sakalAgha nivartakatvam |
sAkShAdabhaNyata jagadgurumAshraye taM
      govindasaMyamivaraM mama bhAgadheyam || 76||
AtmA shambho bhavasi khalu nassachchidAnandarUpaH
      tvayyetasmin kimiti na bhavejjAnatAM premabandhaH |
AtmatvenAbhimatamatadityapriyaM tatprasa~NgAt
      anyachchedaM padamanupadaM yat kilopaplutAnAm || 77||
mAtA tAtastvamasi bhavasi tvaM hi mitraM kaLatraM
      putrashchAnyastvamasi bata kA durmanIShA mamaiShA |
nissImArtipraNayi tadidaM kinna sarvAparokShaM
      tanme tvaM tvaM girisha bhagavan sachchidAnandamUrte || 78||
AtmAnaM khalvanidamudayAstvAM girassa~Ngirante
      santrAtAraM girisha jagatAmIshitAraM vadantyaH |
ArtishrAnteshsharaNavaraNasyAspadaM kaH kathaM ve\-
      tyantarglAnirmama punarasAvAshvasityantarAtmA || 79||
bhAvaM badhnantyakR^itakagirastvayyananyAshayinyo
      rAgonmAdAdapi munidhiyo dhAvanairApatanti |
rUpAyAsmai nirupamitaye sundarAyendurekhA\-
      chUDAlAya spR^ihayati vibho vR^ittirapyAntarI me || 80||
tvAdR^ishaM me kimapi dayitaM vastu naivAsti shambho
      mAdR^ikShAste shatamanupadaM tvarthino bAdhitAraH |
eko.apyasmin jagati kumudasyAsti chandrAyamANo
      naitAdR^ishyaH kati sumanasassanti chandrasya tasya || 81||
taddoShApakShatimupakR^itiM sa vyadhAdArtikR^idyaH
      kaH kopArhastadavamR^ishatAM tattu yat ki~nchidastu |
nyakkArastu smarahara bhavadbhaktibhAjA kR^ito yaH
      so.ayaM tvadbhaktyamR^itamadhurIbhAvito rochate me || 82||
mA me svapno.apyahaha sahate yastvadanyaM vadAnyaM
      kAmaM vA~nChatvitara itaropAsanAyAsadainyam |
tasyopAsyo vidhiharihareShvastu ko.apIsha so.api
      tvadbhrUvallIsphuraNasharaNaH spandane vindane.api || 83||
brahmapraShThA hara kimaparaM bhrUlatAki~NkarAste
      bhAvatkAj~nAM bhavati na vinA labhyasAmAnyalAbhaH |
aidamparyAditaraviShayAdanyathAgatyabhAvAt
      antaryAminnakhilabhajanashrAntiranveti tattvAm || 84||
prApyANAM tvaM mahadamahatAM prApako.anyastvashaktaH
      sarvaprepsustvamatisadR^ishastvAM tadevoparundhe |
tannAkShepyaM nirupamachidAnandasAmrAjyalakShmI\-
      kA~NkShI yastvAM shiva kalayate tattvadavyassa dhanyaH || 85||
etAdR^ikShormiLaviShayasaktyandhakArAntarALAt
      mukto bhaktaprakaradiviShatpAdapaM pAdapadmam |
kiM bhAvatkaM girisha paramAnandadhAnaM dadhAnaH
      takShatyAdhInna yadapi mano.anantarAnantarAtmA || 86||
kalyANI te girisha karuNAkalpavallImatallI
      gIrvANAgresarachitasamuddR^iShTipAtA~NkurashrIH |
dAruprAyaM parisaragataM tAvadAlambatAM mAM
      asyA hAnirna punariyatA dhanyatai tasya tu syAt || 87||
shrIkAntAdyA vibudhatilakAH shrImatImarthayante
      yAM te dR^iShTiM spR^ihayati janassaiSha tasyai kilAsyai |
avyAvR^ittA gatiriyamaye nAtha teShAmateShAM
      apyAtaste samuchitamumAkAnta mantuM na mantum || 88||
samvittattadviShayavishadIkAradhIrA girastvAM
      vyAkurvANA guNasamudayairlobhanIyAshcha tAstAH |
shlAghArthAnAM paramapi tathA bhUtaye vishvamUrte
      vya~njanti tvAM shiva punaramUstatra vandyo.api cha tvam || 89||
mayyatra doShakathanaM bahubhiH kimuktaiH
      siddhArthasAdhanamasatyavacho guNoktaiH |
asmin varAkatilake.apyahahAnukampA
      sambhAvyate shiva tavaiva dayAmburAsheH || 90||
ApyAyanAya cha nivartya nivartanAya
      tvayyAshrite shiva na tat kimapi pratImaH |
tvaM shiShyase punarakhaNDasukhAtmakastat
      kiM prAbhavaM kR^itadhiyo na jahatyapi tvAm || 91||
mahimnAmAmnAyaH stutiShu tava nAlaM pashupate
      tadasminnarthe.alaM tanitumadharaspandamapi kaH |
tadapyAshA me.antarvalati yadayuktAsphuTavacho\-
      nigumbho Dimbho.api pradishati mudaM chetasi pituH || 92||
gaurIvallabha durlabhassahi lavaH kAruNyasindhUnmiShat\-
      kallolaprasarairabhinnavapuSho mAmaspR^ishat tvaddR^ishaH |
no chet kvAyamahaM kva tAvadamR^itasyandI bhR^ishaM dInato\-
      chChedI phalgvitarat bhavAnmama paritrAtetyayaM pratyayaH || 93||
ardhonmIlannayanamasakR^innirgaladbAShpadhAraM
      prAdurbhUtAviraLapuLakaM paryudastApavargam |
vAmA~NkAla~NkaraNagirijAM divyamUrtiM tvadIyAM
      dhyAyandhyAyaM pramadajaladhau nAtha lInaH kadAsyAm || 94||
sAmba svAmin bhavadanuguNA tvatprasAdena labdhA
      tvatto.anyasminniha vinihitA chApalAt kevalAnnaH |
shobheteyaM na khalu bhaNitissaurabhAsphArabha~NgI\-
      krAntAshAntA kuNapa iva hAropitA puShpamAlA || 95||
tvAmAptAnAM bhavati bhagavannaShTadhA varShma bhinnaM
      grIvAM kShvelaH sthagayati shiraH ki~ncha sindhurnirundhe |
eShA tAvat bhavadupakR^itiprakriyA vishrutaiva
      prekShAvantastvayi tu balavat prema badhnanti chitram || 96||
yA jAtu sve pathi kathamapi prekShitaM no jahAti
      glAnIshchAsya kShapayati bhavadvallabhatva~ncha dhatte |
kalyANI sA jayati jananI tvatpadAmbhojabhaktiH
      chetashchaitad girisha tadavaShTambhadhR^iShTaM bhavetkim || 97||
jAtu bhrUlatikAnideshasaraNiM yAM te samulla~NghituM
      nAlaM padmabhavo na vA hariharau kutrendrachandrAdayaH |
seyaM bhUtirapi tvadIyaparamaishvaryAmbudheshshIkaraH
      saulabhyaM kiyadasya te shiva bhavasyAtmaiva tatpashyatAm || 98||
na hi patito jIveyaM janasa~NghA~NgAraghoravAhinyAm |
tvatpadakamalAmR^itarasasarasi vishan shiva kadA nu nirvR^iNuyAm || 99||
shiva shiva shiva sha~Nkareti tAraM vipinatale vijane sadaiva jalpan |
aviraLavigaLaddR^igamburudyat puLakabharo.astabharaH kadA sukhI syAm || 100||
dhatse dayAM mayi na chet kva nu tadyashaH syAt
      yatprAganekaparipAlana sambhavaM te |
shambho kulAlachiranirmita kumbhabha~Ngo
      daNDena kiM na bhavati kShaNamAtrabhAvI || 101||
Aste bhavAnasmyahamindumauLe
      dayA tavAste mama dainyamasti |
goptAsi gopyo.asmi kimanyadatra
      vij~nApanIyaM tava sAmbamUrte || 102||
dayopamanyau yA shambho yA mR^ikaNDusute cha te |
sAmbamUrte dayAmUrte mayyArte kuru tAM dayAm || 103||
dhruvamiva kamalAdhavo dayAlu\-
      shshishumupamanyumiva tvamindumauLe |
ava sakaruNamArtamarbhakaM mAM
      shiva na viLambitumarhasi prasIda || 104||
astaspR^iho.ahamabhijAtadayo.akhileShu
      pashyan bhavantamapi chaiShu namashcha kurvan |
UrjasvalAM tvayi vahan ratimujjhitopatApaH
      kadesha vicharANi tava prasAdAt || 105||
namo vAM rodasyau bhavatu bhavatIbhyashcha kakubho
      namo vAM chandrArkau bhavatu cha namo vishva bhavate |
ratirme yuShmAbhirbhagavati shive shailatanayA\-
      sahAye dAtavyA mayi rachayitavyA nanu dayA || 106||
dushcheShTitAghaparuShe.api sute.atibAle
      mAtA yathA bata tathA girisha tvadIyA |
dveShye jane.api vichakAsti hi sA.anukampA
      pAre girAM madhurimA bhavadIyatAyAH || 107||
mA tAvadantakaripo mayi te.anukampA
      syAchchedalaM tvayi sakR^inmama bhAvayogaH |
kInAshaki~NkaradurArabhaTIbharANAM
      kiM tAvatA na bhavitA sahasopamardaH || 108||
vehAya gaurIsha bhavatpadAmbujaM
      vihArayan durviShayeShvidaM manaH |
jighAMsuhaste svashiraH prayatnataH
      samarpayannasmyasamarthashekharaH || 109||
kiyat pArA~NmukhaM tvayi sukhachidAtmanyahaha me
      kiyatyanyatraiShA ratiragatiko.apIsha tadaham |
hatAtmA na grAhyastava tu karuNA.ananyasharaNaM
      na jahyAt kalyANI svayamavaguNApahnavaguNA || 110||
pApIyaso mama bhavedbhavadIyasevA
      nIchasya vipranikaTasthitivaddurApA |
kAlaM kiyantamiva hA mama durdasheyaM
      keyaM vibho vimukhatA mayi te prapanne || 111||
tvadbhaktisampadanurUpaguNairudAraiH
      dUrojjhito jagati nIcha iva dvijendraiH |
Ase kiyachchiramama~NgaLavR^ittimetAM
      AdhUnvatI shiva dayA mayi te kadA syAt || 112||
bhaktirhi tvaM sharaNamitarat tuchChamityarthatantrA\-
      buddhisseyaM pramitikaraNastomasaMrambhapAtram |
nainAmApnomyamatiriyatA nanvatR^ipto.asmi chopA\-
      lambhI shambho tava tu sakalaj~nasya bharturvinodaH || 113||
samrANniHsvAdapR^ithagapR^ithak sarvavidgADhamUDhAd
      yA no chedyA punaranucharat brahma shakrAdibhUtiH |
shambho tvaM me sharaNamiti sampratyayAnanyarUpAM
      tvadbhaktiM tAmahaha sulabhAM nAtha nApnomi dhi~NmAm || 114||
kR^itAntavidhvaMsa nR^ishaMsatAspadaM trivikramasvApasukhAspadA~Ngadam |
padAravindaM tadudAramIsha te kadA nu pashyAmi mudA.anayA dR^ishA || 115||
lIlopAttA shiva tava tanuryA sharachchandragaurI
      gaurIma~NkAbharaNitavatI chitsukhaikasvabhAvA |
chandrottaMsA vidhihariharairbhaktinamrairupAsyA
      tasyAmasyAmacharamatanoshchittavR^ittiH kutaH syAt || 116||
so.ahaM dehendriyamukhamahAduHkhasindhau nimajjA\-
      myastasvAtmA hara kimaparaM tattvato na tvadanyaH |
bhu~NkShe tu tvaM sukhachidanaghaprAjyasAmrAjyalakShmIM
      dUrIkuryAH kiyadiva chiraM mAmaye tvAmaye.aham || 117||
tavaishvaryaM shambho niravadhi kR^ipAmapyanupadhiM
      mamApIdaM dainyaM sharaNalavashUnyaM nanu vidan |
prapadye yanna tvAmahaha tadidaM me vimR^ishato
      na jAne ko heturdaLati shatadhA yanna hR^idayam || 118||
tvadbhaktyalAbhadavapAvakadahyamAna\-
      stAmArtimapyayi na vedmi tamo.abhibhUtaH |
tajjAnataH sphuTamumesha tava hyupekShA
      nAtha tvadekagatike mayi nAnurUpA || 119||
shambho bhavadbhuvanama~NgaLadivyarUpe
      shAntaM mano yadi niShIdati nirvR^itissA |
tAM rundhatIha sakale kila duHkharUpe
      tAM yanti hanta sukhaduHkhavibhAgamohAt || 120||
yatte rUpaM trinayanamumAkAntamardhenduchUDaM
      tanme hAtuM kShaNamapi na sammanyate nAtha chittam |
tatpratyUhA viShayaviShamagrAvapAtArtidhArAH
      bAdhante mAM tava tu karuNA syAt kadA vA na jAne || 121||
AropitA.api mama dhrIrbhavada~NghrimasmAt
      Aplutya divyamaNipIThataTAchChunIva |
tuchCheShviyaM patati doShamimaM dhiyo.asyAH
      bha~Nktvesha yachCha sudR^iDhAM bhavada~Nghri niShThAm || 122||
duShkUpagaH shvahatako.atidurAsado.api
      kinnu prasahya dayayoddhiyate na kaishchit |
evaM hi mUrkhatama eSha shiva prasahya
      pAlyastavAsmi bhagavan paramAnukampyaH || 123||
drAkShAvanI nanu kharairiva me.avasAdaM
      akShALireti viShayairiyamakShanetaH |
asyAshshiva~NkaramamuM tvayi bhaktiyogaM
      Akalpayorjitamaye girisha prasIda || 124||
kAlaM kiyantamahaha tvadayogakhedo
      nAlaM kimIsha vada so.ayamidaM chiraM me |
tvatpAdapa~Nkaruha ki~NkaravR^ittimekAM
      utpAdayAshu mama sa~NkShapayArtimetAm || 125||
tuchChaH kilAyamiti cheddayase na me tvaM
      tuchCho janastava na cheddayayA gR^ihItaH |
na tvaddayA yadi vinA tvayi bhaktiyogaM
      so.ayaM ghaTeta kathamIsha dayAM vinA te || 126||
bandhukShayAdivipadi sthitavAnatajj~no
      bAlo yathA shiva tathaiva hasan hasadbhiH |
tvadbhaktyalAbhaparamApadi hAsmyakhinnaH
      tvaM tadvidanmama na kiM dayase dayAbdhe || 127||
asUyerShyAlobhasmaradurabhimAnasmayatamaH
      pramAdakrodhAdirmadavaguNavargo niravadhiH |
kadA.asmAduttIrNaH kathaya nirayAdantakaripo
      pateyaM deva tvatpadakamalayorArtiharayoH || 128||
asyantamAtmahitamantikamAshrayantaM
      bAlaM prasUH kimu na pAlayatIshvaraivam |
jAtuprapattikalanAjjanitAnubandhaM
      hAtuM na mUrkhamapi mAM dayayA.arhasi tvam || 129||
chintayanmama durAtmatAM yadi
      tvaM tanoShi na dayAM mayi shrite |
antakAntaka gatirvinA tvayA
      nAntakAntika gatAntarasya me || 130||
shaTho lubdhaH kruddhashchalamatirasUyaikavasatiH
      jaDo mUrkhaH stabdhaH kumatiratisandhAnarasikaH |
aghAnAmAdhAraH punarahamathApi smararipo
      dayALo deva tvachcharaNasharaNo.ananyasharaNaH || 131||
sadrUpaM na sphurati na hi te sharva kurve kimeShA
      nAntashshAntiM tirayati duradhyAsaparyAkulA dhIH |
doShastomonmiShitavapuShA prItimatpratyayena
      grastA.a.ashaiva kShapayati parisphUrtirasphUrti khedam || 132||
shaknoShyArtiM kShaNamapi na nassoDhumIdR^ik dayA kva
      kvainashchakrakramaviramasApekShatA rakShituM te |
Isha kShAmya tvamakhilavidasyekamatyuchyate.adaH
      siShNAsuH kiM prahasanapadaM normimAlinyanUrmau || 133||
ante hite.api vidite tadanutsuko.ayaM
      rugNo yathA tvayi tathA.avadhR^ite sharaNye |
hA kena vAsmi kR^ita evamanutsuko.ahaM
      hAryA tvayaiva kR^ipayesha mameyamArtiH || 134||
tvadbhaktyAkhyaM padamanupamottu~NgamaspR^iShTabha~NgaM
      velolla~NghipratanasukR^itashreNi nishreNigamyam |
AroDhuM drAgahamanipuNastvatkR^ipApA~Ngabha~NgI\-
      dAmnA tAvad girisha bhavataivAyamAropaNIyaH || 135||
unmAdayanti muditAni yadindriyANi
      khinnAni chedvipadudanvati majjayanti |
 ityevamAkulita Ishvara nAtmanIne
      dakSho.asmyananyasharaNashsharaNaM gatastvAm || 136||
tvatpAdapadmavimukhasya durAtmano me
      dAho.anyadurviShayasaktidavAnalena |
arhassa eSha hara kintu dayAmbudhe mad\-
      daurAtmyahAnyakaraNaM tava nAnurUpam || 137||
      ajighratArthAntaramAshayena shrIshambhuchintAmR^itashItalena |
syAM kiM sukhI tiShThatu tadbruve kiM
      manoratho.apyeSha sudurlabho me || 138||
tvadbhaktyalAbhavipadArti nidahyamAnaH
      so.ahaM tadArtimanalena vidahyamAnaH |
vR^ikShastadArtimiva nAlamupaitumetat
      maddausthyamIsha tava kinna dayAM prasUte || 139||
sabhAhR^idyA vidyA nirupahatayo bhUtitatayo
      guNodArA dArA iti ha viShayeShvapyabhiratiH |
ayaM tAvaddhAvatyamR^itarasaniShyandini vibho
      na yAvadbhAvatke hara charaNapadme parichayaH || 140||
hitArthI nanvasyAdishasi sukhasindhau tvayi ratiM
      vipattyudgAribhyo viShayavisarebhyashcha viratim |
dayAM te sopAdhiM niyatamiyatA.ahaM nigamayA\-
      myaho mUrkhaH pAlyashshiva tava kR^ipALorupanataH || 141||
AtmAnaM tvAM niravadhisukhAmbhonidhiM paryudasyan
      nAtrApyeteShvativisadR^isheShvapyadashshIkarANUn |
shambho majjannayamanalamunmastamAto.apahAsyaH
      krIDApAtraM miLita iti kiM noddharasya~njasA mAm || 142||
jagadIsha mamAgasAM gaNaiH karuNAbdhe kimiti prakampase |
ruShamudvahate padAhatairgururutsa~Ngacharasya kiM shishoH || 143||
na kuto dayate vibho bhavAnaparAdhAnanuchintayan mama |
praharannapi kinna phalguno bhavatA.arakShi dayApayonidhe || 144||
aparAdhiShu naiva me samaH kShamayA goptR^iShu naiva te samaH |
tadupaiShi kimityudAsikAM anukampAM kuru sha~Nkara prabho || 145||
sadasachcha janassamaM tanotyanushiShTo bhavatA.antarAtmanA |
aparAdhakathA kathaM nu tanmayi kAruNyanidhe maheshituH || 146||
bhagavan viraLA guNA nR^iNAM aparAdhAstu shataM pade pade |
yadi pAlanakIrtikAmanA bhavatastadbhavatUttaro.adharaH || 147||
sakalaj~na vibho vipaddrutaM kimu goptA yadi ki~NkaraM na mAm |
na hi duShpathagAminaM pashuM pashunAthaH pratiyannupekShate || 148||
parAvaj~nAniShThA paruShavachanAnAM prasavabhUH
      svadoShANAM goptA svarasagatirenassvahamidam |
karALaM hi dhvAntaM kathamiva tarANIshvara kadA
      charANi svairaM tvachcharaNanakhachandra pramuditaH || 149||
aparAdhidhurorjitaM bhava\-
      tyapi tanvannaparAdhamanvaham |
karuNAkara sha~Nkara tvayA
      paripAlyo.ayamato.anubandhataH || 150||
tvachchintanAdiShu tadutthasukhe cha nAhaM
      yogyo.asmi tattadanuchintanajAntarAyAH |
hA krandane.api kati me mayi te.anurUpA
      nAtha tvadekagatike kimivAtyupekShA || 151||
api manuShyajanuShyajanIha chet
      mama na sha~Nkaraki~NkaratAsukham |
ahaha kaM prati kiM pratipAdaye
      mama hi pa~Nkamasha~Nkamana~Nkusham || 152||
priyamapriyamapriyaM priyaM vidadhatyA bhavadIya mAyayA |
paramArthagatirdavIyasI kriyate nAtha kR^ipA kadA.astu te || 153||
shambho padAbjakaTakaM tava yo.adhishete
      devasya tasya charaNAmbu dayAmbudhe tvam |
mauLI vahan prathayasi shritavatsalatvaM
      taM tvAmasAvahamaho na bhajAmi dhi~NmAm || 154||
tvatpAdapadmarasikeShvahamapyumesha
      kashchid bhaveyamiti me.anuchitApi kA~NkShA |
aindre pade shuna iveyamaho bhR^ishaM mAM
      antastudatyajahatI shiva kiM karomi || 155||
gAstrAtavAn sakhitayA.a.adR^itavAn kapIMstvaM
      bhUShAtmanA.ahichayamAptatayA pishAchAn |
gR^ihNAsyamIShu yadi mAmapi ka~nchidIsha
      kA hAnirasya bhavataH kR^ipayA tu bhAvyam || 156||
bhavatpadAmbuje bhaktiM bhavarogavinAshinIm |
dehi me pAhi mAM shambho devadeva dayAnidhe || 157||
avivekanidhirnirAshrayo na ruShAM te.asmi padaM dayasva me |
kathaya druhiNAstrabhAjanaM bhuvane kiM kalavi~NkapotakaH || 158||
ati saMhata eSha dasyubhissuchirAdantaravasthitaiH prabho |
kimivAkaravaM na vedmi tanmayi mantuM na hi mantumarhasi || 159||
viShayAbhiniveshadurviShaglapitaM dussahamoharUShitam |
shiva mA sma bhavAnudAsta mAM paripuShNAtu dayAsudhArasaiH || 160||
udyatkR^itAntasavidhe.asmi pade pade.ahaM
      vadhyo vadhasthalamiva pratinIyamAnaH |
tvAmantakAntakamasau na bhajAmi dhi~NmAM
      asmIsha te kimaparaM prasabhAnukampyaH || 161||
rundhanti mAmiha ShaDambudhayaH smarAdyAH
      pAraM paraM tvamadhigatya vibhAsi chaiShAm |
sAmba prabho bhavadapA~Ngalavaplave sa\-
      tyetAMstarANi viharANi cha sannidhau te || 162||
dehAtmatAkhyanarake sthitametaduttha\-
      shreyastadanyasamavAptyapanodaniShTham |
dAvAnalasthamadasIyasugandhidhUmA\-
      dhUmAntarAptivigamAbhirataM pratImaH || 163||
ahante hantAhaM tava kitavavR^ittyA viShabharaM
      kirantyA dUnassyAM kiyadiva chiraM vItasharaNaH |
prasIdAtaH shAtakratavamapi vA vaidhasamapi
      tvayA.asmAkaM mA bhUtpadamapi bhavatyai nama idam || 164||
tR^iNagaNitAkhilajagatAmapi karakalitatrayIrahasyAnAm |
shlAghAvAravadhUTIghaTadAsatvaM tu durnirasam || 165||
saMvilleshadraviNakaNikAsannikarShaprasUtaiH
      darpaiH krAntA vidhiharimukhodAsikAdeshikairye |
tvayyapyeShAM shiva na gaNanA kA kathA.anyeShu teShAM
      dussAdhyo hi tvamasi sharaNaM mAdR^ishAnAM kR^ishAnAm || 166||
kva vA shamasudhormiLAH kva paramArthadhInishchalAH
      kadA nanu bhajema tAniti paribhramAmo vayam |
nimittalava nispR^ihAnavadhikopadhUpAyitAn
      upAsitumapAsituM bata vR^ithA vayo neshmahe || 167||
AropayadbhiraparaM mahimAnamanyaiH
      AkR^iShTadhIrananusandadhadAtmanaichyam |
naShTo.asmi duShTaduraha~NkriyayA hatastvAM
      naivAsmaraM shiva kathaM mayi te dayA syAt || 168||
vedyaM na ki~nchidapi vedmyakhilaj~natA.abhi\-
      mAnastu me.anavadhirIsha na chAtmanInam |
kurve kimapyatha mahAn kR^itakR^ityatAbhi\-
      mAnaH kathaM nu mayi mUrkhatame dayethAH || 169||
paramadhane puramathane karamathane ye smR^ite.anyagAminyA |
kAmanayA kAM anayA nAma nayApetayA shriyaM yAyAm || 170||
prapannaM nAgoptuM prabhavasi mahesho.asi jagatAM
      shiva tvaM sarvaj~no na hi tava guNAn veditumalam |
prapattishcha trAtA tvamiti dhiShaNA tvAM hi karuNA
      niyachChatyevaM tanmama taraNatarkopakaraNam || 171||
sAmrAjyaM vA karakalitamastvastu vA.aki~nchanatvaM
      sArvashyaM vA bhavatu bhavatUnmastakaM vApi mauDhyam |
etat tvIhe kuru shiva kR^ipAmetu mA cha prahAsIt
      ekaH kShema~NkarakulagururmAM bhavadbhaktiyogaH || 172||
yattvA hitvA sphurati yadapi tvAM vinA.ahaM samastaM
      pratyetuM tadgirisha na mayA pAryate nAparairvA |
sa~NgoptA me sakalavidhayA jAgarUkassamantAd
      evaM tAvadbhavasi bhagavan tadbhayasyodbhavaH kaH || 173||
yadAtmanInaM tadavetya vA~nChituM
      na hi kShamo.asmIha tadapyavA~nChitum |
vimUDhametAdR^ishaminduchUDa mAM
      yadIshiShe goptumaye tadIshiShe || 174||
sadvA.asadvApyakR^itamakR^itaM yatkR^itaM tatkR^itaM tat
      khedaM modaM na punarupayAtyantarAtmA sa eShaH |
j~nAtaM tattvaM shiva tava kR^ipA vigrahAddeshikendrAt
      prArabdhaM tatkShapayitumasAvasti kAlapratIkShA || 175||
nidhiM niravadhiM dhutavyavadhi chandrachUDAbhidhaM
      sukhaM na khalu manyase.alasatayA.atra hA hanyase |
avastuni sukhAnukAriNi vipadgaNodgAriNi
      pradhAvasi vR^ithA.avasIdasi kimarthamitthaM manaH || 176||
anyasya dR^iShTisaraNAvapatan svadoSha\-
      chintAbhrashAntaduraha~NkR^itichaNDatApaH |
tasmin bhavadguNavitatyamR^itAmburAshau
      majjan kadA madanasUdana nirvR^itaH syAm || 177||
duHkhAni me khalu dishan duritapravR^itti\-
      bha~NgAya darshayasi bharga dayAmbudhe tvam |
putre piteva shubhabuddhikR^ite prahartA
      tannaiSha vedmi kumatistadaye dayethAH || 178||
tuShyantu ke.api mayi doShamudAharantaH
      santaM vidanti yadi chet sa hitopadeshaH |
chedanyathA punarayaM bhramajaH pralApaH
      kautUhalAya ghaTate kimitIha kopaH || 179||
sarvaM bhavAn girisha tatsakalasya chAsya
      kAryA.amunA.apachitireSha karomi naitAm |
hA tatra tatra kalaye.avamati~ncha dhi~NmAM
      dauHsthyaM tvidaM mama kadesha dhunan dayethAH || 180||
saMrakShati tvayi samastamidaM prapa~nchaM
      tadbhAramAtmani tamovivasho.adhiropya |
sambambhramIti tanubhR^it sakalaM tadetat
      pashyan hasanviharasi pramathaprabho tvam || 181||
kAtaryaM samudeti ki~nchidapi na bhrAtaryamAt kinnu te
      chetassAdhu vichintaya smarabhidA trAtaH prapanno naraH |
etAvanti janUMShi hanta viShayaireva pravidhvaMsitA\-
      nyekaM janma shivArpaNaM yadi karoShyatena kA te hatiH || 182||
janashchidAnandasamastavigrahaM jahat bhavantaM prabhavantamIsha yaH |
      durIshamanviShyati tuShyati svayaM paraM dhanAyaiShyati mugdhadhIrjanaH |
shiva eva samAyAti shiva~NkarakR^ipA~NkuraH |
      tatraika vipratAbuddhiH kathaM sa~njAyate tava || 184||
aindrabrahmAdimapadalasadbudbudAtyadbhutAnAM
      vidhyaNDAkrAntyanupamayashaH phenaShaNDoddhatAnAm |
bhAvatkAnAM girisha karuNAsrotasAM kiM navInaM
      mAdR^i~NnIchapravaNasaraNiShvAnurUpyaM nirUpyam || 185||
svachChandaM suradhenavo.a~NkaNataTIma~nchantu mu~nchantu vA\-
      rhaimaM vA.ambumucho ramA cha vahatu bhUvashyatAM dR^ishyatAm |
kandarpAyutasundarasya bhavatashshambho mukhAmbhoruhA\-
      lokenaiva bhavan bhavenmama na tairAmodabhUmodayaH || 186||
nirdhUya duHkhanivahaM nikhilaM purAre
      saMsevinAM vitarati tvayi modalakShmIm |
annaM disheti vasanaM vitareti bhogAn
      dehIti mandamatayo vayamIrayAmaH || 187||
svAmin padaM shivapadaM tvakutobhayaM tu
      tvayyAtmakR^it praNamanAdapi sAmbamUrte |
hAsAspadaM bhavati kutsitalipsureShaH
      kaupInakAma iva kalpataruM prapannaH || 188||
suta iti sudatIti dravyamityeShu magno\-
      .asukhadamidamasheShaM saukhyadaM vetti martyaH |
malakaluShajalAntarmajjanonmajjanAdyaiH
      kiTiriva manute svaM kevalAnandarUpam || 189||
sevante kimiti prabhUnanupadaM hA dR^ipyataH kupyatastu
      etAvatyupasarpaNe cha jaTharApUryAptidhUryApiNaH |
smarturjAgrati chandrachUDa bhavati svAtmAnamevaM dada\-
      tyaishvaryeNa kR^itAspadaM jagadala~NkarmINadR^ikkoTinA || 190||
vaivasvatAnanagatasya tathAvidhena
      kiM me pareNa kimu vAsya mayA satIttham |
asmyanyabhAga haha dausthyamidaM vidhUnvan
      tanvanratiM tvayi mamesha kadA dayethAH || 191||
 itthaM mameyamaratirbhavatItaratra
      chetthaM ratirbata kiTeriva kutsite.arthe |
dhi~NmAM paraM tvadhamavR^ittirupAshritasya
      tvAM me yadItthamayashaskaramIsha tatte || 192||
vadhUputrakAdIn prati prastuto.ayaM
      balIvardabhAvaH kadA me.apayAtu |
bhavatpAdapadmAmR^itAsvAdadhanyA
      dashA sA bhavitrI kadA sAmbamUrte || 193||
kiyadiva duravApya prAntavakrAn kadAchit
      nanu dhanikavarAkAn nityamArAdhayAmaH |
sakR^idavanatavashyaM sAmbamUrtiM kadA vA
      sakalajagadadhIshaM tvAmupAsImahIme || 194||
uttara~NgitavR^ithAkutUhalo yattara~NgachapaleShvamIShvaham |
shvakramantamimamuddhareH kadA vakramantakaripo dayAnidhe || 195||
shrIman vR^ishchika sandasha dvirasana tvaM chumba shArdUla na\-
      nvAsanno.anugR^ihANa R^ikShavaradorullAsamullAsaya |
tAMstAnitthamanargaLAdarabhareNAbhyarthitairyadbhavet
      klAntiryadbhavatA jitA bata sakhe tadbhu~NkShva divyaM sukham || 196||
vibho.amuShminnasya svajananivahasya praNayitA
      svaghAtAyonmIlatyadhigR^ihakiTi svAmina iva |
svaghAtodarkaM tat kumatiravidannatra mudame\-
      tyasau hitvA vigaLatu kadA me vipadiyam || 197||
prathamasujanAya tubhyaM mahyamapi prathamadurjanAya namaH |
sarvaM hataH kR^itau yau sakR^idupakArApakArAbhyAm || 198||
dhIritaraM bhUritaraM dUritaramyaguNametya kiM labhatAm |
khedaharaM veda haraM chedaharantassaharShachandramasam || 199||
mR^idvIkA rasitA sitA samashitA sphItaM nipItaM payaH
      svaryAtena sudhA.apyadhAyi bahudhA rambhA.adharaH khaNDitaH |
satyaM brUhi madIya jIva bhavatA bhUyo bhave bhrAmyatA
      rAmetyakSharayoraye madhurimodgAraH kva vA.a.asvAditaH || 200||
AbibhratyA taruNataruNIshrImadastenama~NgaM
      devyA smerAnanakamalayA.ala~NkR^itotsa~NgasImam |
chUDA.a.apIDasphuritashashabhR^itkandaLaM mandalakShya\-
      shrImaddantA~NkuradarahasaM tanmahaH stAtpurastAt || 201||
paridhAvata bho yamasya dUtAH
      nikaTe dhUrjaTirAgatassa eShaH |
parito dhavaLaM nipashyataita\-
      nmakuTIchandrakalAmayUkhapu~njaiH || 203||
vilagnaM koTIre kimapi kusumaM te vijayate
      nilimpakShuddainyaprashamanayasho vaibhavapadam |
tulAkoTIkoTiH sphurati dhR^itavishvambharatayA
      vibho vishvatrANaM na khalu tava saMrambhaviShayaH || 203||
namatsuraparamparAmaNikirITakoTisphuran\-
      maNIkiraNadhoraNImahita pAdapa~Nkeruham |
jagajjananarakShaNakShapaNadakShashikShAkramaM
      viShAdaharamAshraye viShahareshvaraM sha~Nkaram || 204||
prasUnagR^ihashobhitaM prasavachApakoTiprabhaM
      manoharahirAmaNIgaNavibhUShaNAla~NkR^itam |
sugandhichikurAvR^itaM sukR^itilokanetrAmR^itaM
      vilochanasukhaM pibAvihati mAtR^ibhUteshvaram || 205||
antaka durahante te mAbhUdantashchakAsti purahantA |
chintaya manasi patantaM dakShamakhAnte cha te piturdantam || 206||
tvatpAdAbje tanubhR^iti tadAlambite vA manovAk\-
      kAyopAyassajatu girijAkAnta hetoH kuto.api |
tatsaubhAgyaM nanu pariNataM nAtha teShAM natirnaH
      tApAnetAn daLayitumalaM dhAtumabhyunnatiM vA || 207||
antaryAmin shiva tava chidAnandasAmrAjyabhartuH
      yaddhAmAntaHkaraNamuchitodbodhavaidhuryadhuryaH |
varte tuchChairahaha viShayaiH kIrNayan durNayaM taM
      vAtsalyAnmA gaNaya tadasambhUtaye shAdhi chAgre || 208||
kopaste.ayaM khala iti mayi syAdyadi syAnniroddhA
      ko vA kiM vA.ananuguNamidaM tvaM pitA.ahaM suto.asmi |
anyat kiM mAmakaluShamanenAbhyupaituM tvamarha\-
      syAtmAnaM tvatpadakamalayorarpayAmIndumauLe || 209||
sthAne dhanyAH katichidiha yatpreraNA vAraNA vA
      shrautIH smArtIrapi punaranulla~NghayantastvadAj~nAH |
AshAsAnAshshiva bhavadanugrAhyatAmAsate.asyAM
      asyAshA me paramanupadhitvatkR^ipaikAvalambA || 210||
mandAtmAsau mananajaraThastAvakAj~nAH shrutismR^i\-
      tyAdeshAkhyA bata paribhavatyeva sarvastathApi |
spando.api tvanniyamanavinAbhAvyabhAvI yadeShA
      bhAvatkAj~nAnusR^itiriyatA me dayALo dayethAH || 211||
sakR^idapi shiva pAhItyetadAkarNya dUrAt
      sarabhasamupayAntyostvatkR^ipAvIkShayoH kim |
madavanavidhikeLyAM mAtR^ibhUteshvarAsIt
      ahamahamikayA.a.ajistena manye viLambam || 212||
hA hanta tAta shiva kA tava mayyupekShA
      kaShTAM dashAM upagate.api makhAntakAre |
ChetturvidhAtR^ishirasaH kimu tallipInAM
      unmArjanAdupahatiH kimu duShkarA te || 213||
tArAnAyakashekharAya jagadAdhArAya dhArAdhara\-
      chChAyAdhArakakandharAya girijAsa~NgaikashR^i~NgAriNe |
nadyA shekhariNe dR^ishA tilakine nArAyaNenAstriNe
      nAgaiH ka~NkaNine nagena gR^ihiNe nAthAya seyaM natiH || 214||
ArtaH kvAnavalambanaH kva vipado.amuShyApaneShye kade\-
      tyashrAntotkalikArtamindukalikAchUDAla vishvaprabhum |
ApaM tvAM duravApamityahamato hR^iShTo.atha dR^iShTo.asi chet
      aspR^ishyo vipadAmaho shiva bhavasyAtmaiva yatpashyatAm || 215||
styAyattR^iShNA viShayavisaraddussahoShmaNyadabhre
      mohashvabhre viShayadR^iShadAM pAtanairebhirevam |
rUkShairakShairahamiha na hA pArayAmyasyamAnaH
      svAminmAmuddhara hara kR^ipApA~NgahastArpaNena || 216||
kAmaM kAmaprabhR^itaya ime nissapatnAssapatnAH
      mAmasyanti svaparikarapAramparI samparItAH |
kiM sAndrApadbhR^ishakabaLite ki~Nkare sha~NkaredaM
      rUkShopekShAvratamiha tavAdyApi nodyApanIyam || 217||
yatsaMsargAchchitamapi sukhaM vya~njatI chittavR^ittiH
      vya~NgaM svAntaM shiva vidadhatI sachchidAnandamUrte |
tubhyaM druhyatyahaha kalayA chainayA taiH khalaira\-
      pyarthaissa~NgAdahamiha mahAmantukArI tavAsmi || 218||
anyaddainyaM kathaya kimito yatsamIhAsahasrA\-
      jasrAkR^iShTaM hR^idayamitarAstvApado nopadeshyAH |
saMsR^ityUrmiShvalamalamamIShvAbhirAghUrNanAbhiH
      vishrAntiM me vitara girisha shrAmyatastvaM dayethAH || 219||
tvanmUrtyAlokanasukhabhare majjayannetrayugmaM
      nidhyAnAdhvanyapi vivashayan svAntamatyantashAntam |
tvatpUjAyAM vapurapi kuru tvatkathAyA~ncha vAchaM
      tvachchintAyAM hR^idayamahaha svairachArI hato.aham || 220||
gAtrotkampaH karaNapaTalIviprakAro.antarAtma\-
      sthemadhvaMso.asharaNasharaNatvAnusandhAnajanmA |
nAbhivya~njantyahaha kimamI nAtha me durdashAM tat
      mA bhaiShIrityabhayavachasA mAmumeshAdriyethAH || 221||
kAmaM gaLagrAhiNi shatruvarge
      kA ma~NgaLaprArthanayA nayAptiH |
majjanmanaH shambhupade.arthavatvaM
      majjan manassAdhaya hR^iShya cha tvam || 222||
viShva~NmUrchChadviShayagaraLApannamujjIvaya tvad\-
      divyApA~NgavyatikarasudhAdhArayA mAM purAre |
asmin doShagrahaNamuchitaM hA kimasyAM dashAyAM
      tattvaM kiM tvAM tudati na kR^ipaitAdR^ishAmIkShamANam || 223||
tvaM koTIre saha samadadhAH kiM kirAtasya shambho
      gaNDUShaM na tridashasaritopAnaha~nchendunA vA |
bhaktyA krIto bhavasi bhagavan sA cha bhAvaprabhedaH
      tasyAmasyAM mama vimukhataitAvatI hanta dhi~NmAm || 224||
brUte janmani yashshivetyapi sakR^innAma pramAdena vA
      madbhaktairuditaM shR^iNoti yadi vA rudrAkShabhasmA~NkitaiH |
tasyAtyutkaTamR^ityumantasamaye hanmIti kAruNyataH
      ki~nchit ku~nchitakomalaikacharaNaM chitte shivaM kurmahe || 225||
saMsArAkhyavishAlanATakagR^ihe sarvANi rUpANyaho
      dhR^itvA.adhomukhayonikAyavanikAM nirhR^itya nirgatya cha |
sarvaj~nasya dayAparasya tava devAgre chiraM nR^ityataH
      shrAntasyApi mamAlamityuchitavAgevAstu vishrANanam || 226||
medhe tavAsti yadi manmathashAsanAkhye
      gAdhetarAmR^itasarasvati khelanechChA |
bAdheta ko nu bhavatIM rasanAmapAsta\-
      bAdhe tara~Ngaya sukhaM girishAbhidhAne || 227||
prasavashararipo tvatpAdapadmAnusandhA\-
      tR^iNitavalabhidambhojodbhavAdishriyAM naH |
svajanakabhR^itaye na tvayyapIhArthimudrA\-
      vihR^itiralamudetuM kA kathAnyatra tasyAH || 228||

iti shrIshrIdharave~NkaTashArya virachitA stutipaddhatiH samAptA |

##
Proofread by Aruna Narayanan

\medskip\hrule\obeylines

Please send corrections to sanskrit at cheerful dot c om
Last updated \today
https://sanskritdocuments.org

\end{document}