% Text title : Upamanyuproktam Shiva Stotram % File name : upamanyuproktaMshivastotram.itx % Category : shiva, shivapurANa, stotra % Location : doc\_shiva % Proofread by : PSA Easwaran % Description/comments : shivapurANa | vAyavIyasaMhitA | uttarabhAga | adhyAya 31/1-188|| % Latest update : February 5, 2025 % Send corrections to : sanskrit at cheerful dot c om % % This text is prepared by volunteers and is to be used for personal study % and research. The file is not to be copied or reposted for promotion of % any website or individuals or for commercial purpose without permission. % Please help to maintain respect for volunteer spirit. % \documentstyle[11pt,multicol,itrans]{article} #include=ijag.inc #endwordvowel=.h \portraitwide \parindent=100pt \let\usedvng=\Largedvng % for 1 column \pagenumbering{itrans} \def\engtitle#1{\hrule\medskip\centerline{\LARGE #1}} \def\itxtitle#1{\medskip\centerline{\LARGEdvng #1}\medskip\hrule} \def\endtitles{\medskip\obeyspaceslines} %% \begin{document} \engtitle{.. Upamanyuproktam Shiva Stotram ..}## \itxtitle{.. upamanyuproktaM shivastotram ..}##\endtitles ## upamanyuruvAcha | stotraM vakShyAmi te kR^iShNa pa~nchAvaraNamArgataH | yogeshvaramidaM puNyaM karma yena samApyate || 1|| jaya jaya jagadekanAtha shambho prakR^itimanohara nityachitsvabhAva | atigatakaluShaprapa~nchavAchAmapi manasAM padavImatItatattvam || 2|| svabhAvanirmalAbhoga jaya sundaracheShTita | svAtmatulyamahAshakte jaya shuddhaguNArNava || 3|| anantakAntisampanna jayAsadR^ishavigraha | atarkyamahimAdhAra jayAnAkulama~Ngala || 4|| nira~njana nirAdhAra jaya niShkAraNodaya | nirantaraparAnanda jaya nirvR^itikAraNa || 5|| jayAtiparamaishvarya jayAtikaruNAspada | jaya svatantrasarvasva jayAsadR^ishavaibhava || 6|| jayAvR^itamahAvishva jayAnAvR^ita kenachit | jayottara samastasya jayAtyantaniruttara || 7|| jayAdbhuta jayAkShudra jayAkShata jayAvyaya | jayAmeya jayAmAya jayAbhAva jayAmala || 8|| mahAbhuja mahAsAra mahAguNa mahAkatha | mahAbala mahAmAya mahArasa mahAratha || 9|| namaH paramadevAya namaH paramahetave | namashshivAya shAntAya namashshivatarAya te || 10|| tvadadhInamidaM kR^itsnaM jagaddhi sasurAsuram | atastvadvihitAmAj~nAM kShamate ko.ativartitum || 12|| ayaM punarjano nityaM bhavadekasamAshrayaH | bhavAnato.anugR^ihyAsmai prArthitaM samprayachChatu || 13|| jayAmbike jaganmAtarjaya sarvajaganmayi | jayAnavadhikaishvarye jayAnupamavigrahe || 14|| jaya vA~NmanasAtIte jayAchiddhvAntabha~njike | jaya janmajarAhIne jaya kAlottarottare || 15|| jayAnekavidhAnasthe jaya vishveshvarapriye | jaya vishvasurArAdhye jaya vishvavijR^imbhiNi || 16|| jaya ma~NgaladivyA~Ngi jaya ma~NgaladIpike | jaya ma~NgalachAritre jaya ma~NgaladAyini || 17|| namaH paramakalyANaguNasa~nchayamUrtaye | tvattaH khalu samutpannaM jagattvayyeva lIyate || 18|| tvadvinAtaH phalaM dAtumIshvaro.api na shaknuyAt | janmaprabhR^iti deveshi jano.ayaM tvadupAshritaH || 19|| ato.asya tava bhaktasya nirvartaya manoratham | pa~nchavaktro dashabhujaH shuddhasphaTikasannibhaH || 20|| varNabrahmakalAdeho devassakalaniShkalaH | shivabhaktisamArUDhaH shAntyatItassadAshivaH || 21|| bhaktyA mayArchito mahyaM prArthitaM shaM prayachChatu || 21|| sadAshivA~NkamArUDhA shaktirichChA shivAhvayA | jananI sarvalokAnAM prayachChatu manoratham || 22|| shivayordayitA putrau devau herambaShaNmukhau | shivAnubhAvau sarvaj~nau shivaj~nAnAmR^itAshinau || 23|| tR^iptau parasparaM snigdhau shivAbhyAM nityasatkR^itau | satkR^itau cha sadA devau brahmAdyaistridashairapi || 24|| sarvalokaparitrANaM kartumabhyuditau sadA | svechChAvatAraM kurvantau svAMshabhedairanekashaH || 25|| tAvimau shivayoH pArshve nityamitthaM mayArchitau | tayorAj~nAM puraskR^itya prArthitaM me prayachChatAm || 26|| shuddhasphaTikasa~NkAshamIshAnAkhyaM sadAshivam | mUrdhAbhimAninI mUrtiH shivasya paramAtmanaH || 27|| shivArchanarataM shAntaM shAntyatItaM makhAsthitam | pa~nchAkSharAntimaM bIjaM kalAbhiH pa~nchabhiryutam || 28|| prathamAvaraNe pUrvaM shaktyA saha samarchitam | pavitraM paramaM brahma prArthitaM me prayachChatu || 29|| bAlasUryapratIkAshaM puruShAkhyaM purAtanam | pUrvavaktrAbhimAnaM cha shivasya parameShThinaH || 30|| shAntyAtmakaM marutsaMsthaM shambhoH pAdArchane ratam | prathamaM shivabIjeShu kalAsu cha chatuShkalam || 31|| pUrvabhAge mayA bhaktyA shaktyA saha samarchitam | pavitraM paramaM brahma prArthitaM me prayachChatu || 32|| a~njanAdipratIkAshamaghoraM ghoravigraham | devasya dakShiNaM vaktraM devadevapadArchakam || 33|| vidyApAdaM samArUDhaM vahnimaNDalamadhyagam | dvitIyaM shivabIjeShu kalAsvaShTakalAnvitam || 34|| shambhordakShiNadigbhAge shaktyA saha samarchitam | pavitraM madhyamaM brahma prArthitaM me prayachChatu || 35|| ku~NkumakShodasa~NkAshaM vAmAkhyaM varaveShadhR^ik | vaktramuttaramIshasya pratiShThAyAM pratiShThitam || 36|| vArimaNDalamadhyasthaM mahAdevArchane ratam | turIyaM shivabIjeShu trayodashakalAnvitam || 37|| devasyottaradigbhAge shaktyA saha samarchitam | pavitraM paramaM brahma prArthitaM me prayachChatu || 38|| sha~NkhakundendudhavalaM sandhyAkhyaM saumyalakShaNam | shivasya pashchimaM vaktraM shivapAdArchane ratam || 39|| nivR^ittipadaniShThaM cha pR^ithivyAM samavasthitam | tR^itIyaM shivabIjeShu kalAbhishchAShTabhiryutam || 40|| devasya pashchime bhAge shaktyA saha samarchitam | pavitraM paramaM brahma prArthitaM me prayachChatu || 41|| shivasya tu shivAyAshcha hR^inmUrtishivabhAvite | tayorAj~nAM puraskR^itya te me kAmaM prayachChatAm || 42|| shivasya cha shivAyAshcha shikhAmUrtishivAshrite | satkR^itya shivayorAj~nAM te me kAmaM prayachChatAm || 43|| shivasya cha shivAyAshcha varmaNA shivabhAvite | satkR^itya shivayorAj~nAM te me kAmaM prayachChatAm || 44|| shivasya cha shivAyAshcha netramUrtishivAshrite | satkR^itya shivayorAj~nAM te me kAmaM prayachChatAm || 45|| astramUrtI cha shivayornityamarchanatatpare | satkR^itya shivayorAj~nAM te me kAmaM prayachChatAm || 46|| vAmo jyeShThastathA rudraH kAlo vikaraNastathA | balo vikaraNashchaiva balapramathanaH paraH || 47|| sarvabhUtasya damanastAdR^ishAshchAShTashaktayaH | prArthitaM me prayachChantu shivayoreva shAsanAt || 48|| athAnantashcha sUkShmashcha shivashchApyekanetrakaH | eka rudrAkhyamUrtishcha shrIkaNThashcha shikhaNDakaH || 49|| tathAShTau shaktayasteShAM dvitIyAvaraNe.architAH | te me kAmaM prayachChantu shivayoreva shAsanAt || 50|| bhavAdyA mUrtayashchAShTau tAsAmapi cha shaktayaH | mahAdevAdayashchAnye tathaikAdashamUrtayaH || 51|| shaktibhissahitAssarve tR^itIyAvaraNe sthitAH | satkR^itya shivayorAj~nAM dishantu phalamIpsitam || 52|| vR^ikSharAjo mahAtejA mahAmeghasamasvanaH | merumandarakailAsahimAdrishikharopamaH || 53|| sitAbhrashikharAkAraH kakudA parishobhitaH | mahAbhogIndrakalpena vAlena cha virAjitaH || 54|| raktAsyashR^i~NgacharaNau raktaprAyavilochanaH | pIvaronnatasarvA~NgassuchArugamanojjvalaH || 55|| prashastalakShaNaH shrImAnprajvalanmaNibhUShaNaH | shivapriyaH shivAsaktaH shivayordhvajavAhanaH || 56|| tathA tachcharaNanyAsapAvitAparavigrahaH | gorAjapuruShaH shrImA~nChrImachChUlavarAyudhaH | tayorAj~nAM puraskR^itya sa me kAmaM prayachChatu || 57|| nandIshvaro mahAtejA nagendratanayAtmajaH | sanArAyaNakairdevairnityamabhyarchya vanditaH || 58|| sharvasyAntaHpuradvAri sArdhaM parijanaiH sthitaH | sarveshvarasamaprakhyassarvAsuravimardanaH || 59|| sarveShAM shivadharmANAmadhyakShatve.abhiShechitaH | shivapriyashshivAsaktashshrImachChUlavarAyudhaH || 60|| shivAshriteShu saMsaktastvanuraktashcha tairapi | satkR^itya shivayorAj~nAM sa me kAmaM prayachChatu || 61|| mahAkAlo mahAbAhurmahAdeva ivAparaH | mahAdevAshritAnAM tu nityamevAbhirakShatu || 62|| shivapriyaH shivAsaktashshivayorarchakassadA | satkR^itya shivayorAj~nAM sa me dishatu kA~NkShitam || 63|| sarvashAstrArthatattvaj~naH shAstA viShNoH parA tanuH | mahAmohAtmatanayo madhumAMsAsavapriyaH | tayorAj~nAM puraskR^itya sa me kAmaM prayachChatu || 64|| brahmANI chaiva mAheshI kaumArI vaiShNavI tathA | vArAhI chaiva mAhendrI chAmuNDA chaNDavikramA || 65|| etA vai mAtaraH sapta sarvalokasya mAtaraH | prArthitaM me prayachChantu parameshvarashAsanAt || 66|| mattamAta~Ngavadano ga~NgomAsha~NkarAtmajaH | AkAshadeho digbAhussomasUryAgnilochanaH || 67|| airAvatAdibhirdivyairdiggajairnityamarchitaH | shivaj~nAnamadodbhinnastridashAnAmavighnakR^it || 68|| vighnakR^ichchAsurAdInAM vighneshaH shivabhAvitaH | satkR^itya shivayorAj~nAM sa me dishatu kA~NkShitam || 69|| ShaNmukhashshivasambhUtaH shaktivajradharaH prabhuH | agneshcha tanayo devo hyaparNAtanayaH punaH || 70|| ga~NgAyAshcha gaNAmbAyAH kR^ittikAnAM tathaiva cha | vishAkhena cha shAkhena naigameyena chAvR^itaH || 71|| indrajichchandrasenAnIstArakAsurajittathA | shailAnAM merumukhyAnAM vedhakashcha svatejasA || 72|| taptachAmIkaraprakhyaH shatapatradalekShaNaH | kumArassukumArANAM rUpodAharaNaM mahat || 73|| shivapriyaH shivAsaktaH shivapAdArchakassadA | satkR^itya shivayorAj~nAM sa me dishatu kA~NkShitam || 74|| jyeShThA variShThA varadA shivayoryajaneratA | tayorAj~nAM puraskR^itya sA me dishatu kA~NkShitam || 75|| trailokyavanditA sAkShAdulkAkArA gaNAmbikA | jagatsR^iShTivivR^id.hdhyarthaM brahmaNA.abhyarthitA shivAt || 76|| shivAyAH pravibhaktAyA bhruvorantaranissR^itAH | dakShAyaNI satI menA tathA haimavatI hyumA || 77|| kaushikyAshchaiva jananI bhadrakAlyAstathaiva cha | aparNAyAshcha jananI pATalAyAstathaiva cha || 78|| shivArchanaratA nityaM rudrANI rudravallabhA | satkR^itya shivayorAj~nAM sA me dishatu kA~NkShitam || 79|| chaNDaH sarvagaNeshAnaH shambhorvadanasambhavaH | satkR^itya shivayorAj~nAM sa me dishatu kA~NkShitam || 80|| pi~Ngalo gaNapaH shrImA~nChivAsaktaH shivapriyaH | Aj~nayA shivayoreva sa me kAmaM prayachChatu || 81|| bhR^i~NgIsho nAma gaNapaH shivarAdhanatatparaH | prayachChatu sa me kAmaM patyurAj~nApuraHsaram || 82|| vIrabhadro mahAtejA himakundendusannibhaH | bhadrakAlIpriyo nityaM mAtR^INAM chAbhirakShitA || 83|| yaj~nasya cha shirohartA dakShasya cha durAtmanaH | upendrendrayamAdInAM devAnAma~NgarakShakaH || 84|| shivasyAnucharaH shrImA~nChivashAsanapAlakaH | shivayoH shAsanAdeva sa me dishatu kA~NkShitam || 85|| sarasvatI maheshasya vAksarojasamudbhavA | shivayoH pUjane saktA sA me dishatu kA~NkShitam || 86|| viShNorvakShaHsthitA lakShmIH shivayoH pUjane ratA | shivayoH shAsanAdeva sA me dishatu kA~NkShitam || 87|| mahAmoTI mahAdevyAH pAdapUjAparAyaNA | tasyA eva niyogena sA me dishatu kA~NkShitam || 88|| kaushikI siMhamArUDhA pArvatyAH paramA sutA | viShNornidrAmahAmAyA mahAmahiShamardinI || 89|| nishumbhashumbhasaMhatrI madhumAMsAsavapriyA | satkR^itya shAsanaM mAtussA me dishatu kA~NkShitam || 90|| rudrA rudrasamaprakhyAH pramathAH prathitaujasaH | bhUtAkhyAshcha mahAvIryA mahAdevasamaprabhAH || 91|| nityamuktA nirupamA nirdvandvA nirupaplavAH | sashaktayassAnucharAssarvalokanamaskR^itAH || 92|| sarveShAmeva lokAnAM sR^iShTisaMharaNakShamAH | parasparAnuraktAshcha parasparamanuvratAH || 93|| parasparamatisnigdhAH parasparanamaskR^itAH | shivapriyatamA nityaM shivalakShaNalakShitAH || 94|| saumyAdhArAstathA mishrAshchAntarAladvayAtmikAH | virUpAshcha surUpAshcha nAnArUpadharAstathA || 95|| satkR^itya shivayorAj~nAM te me kAmaM dishantu vai | devyA priyasakhIvargo devIlakShaNalakShitaH || 96|| sahito rudrakanyAbhiH shaktibhishchApyanekashaH | tR^itIyAvaraNe shambhorbhaktyA nityaM samarchitaH || 97|| satkR^itya shivayorAj~nAM sa me dishatu ma~Ngalam | divAkaro maheshasya mUrtirdIptisumaNDalaH || 98|| nirguNo guNasa~NkIrNastathaiva guNakevalaH | avikArAtmakashchAdya ekassAmAnyavikriyaH || 99|| asAdhAraNakarmA cha sR^iShTisthitilayakramAt | evaM tridhA chaturdhA cha vibhaktAH pa~nchadhA punaH || 100|| chaturthAvaraNe shambhoH pUjitashchAnugaiH saha | shivapriyaH shivAsaktaH shivapAdArchane rataH || 101|| satkR^itya shivayorAj~nAM sa me dishatu ma~Ngalam | divAkaraShaDa~NgAni dIptAdyAshchAShTashaktayaH || 102|| Adityo bhAskaro bhAnU ravishchetyanupUrvashaH | arko brahmA tathA rudro viShNushchAdityamUrtayaH || 103|| vistarAsutarAbodhinyApyAyinyaparAH punaH | uShA prabhA tathA praj~nA sandhyA chetyapi shaktayaH || 104|| somAdiketuparyantA grahAshcha shivabhAvitAH | shivayorAj~nayA nunnA ma~NgalaM pradishantu me || 105|| athavA dvAdashAdityAstathA dvAdasha shaktayaH | R^iShayo devagandharvAH pannagApsarasAM gaNAH || 106|| grAmaNyashcha tathA yakShA rAkShasAshchAsurAstathA | saptasaptagaNAshchaite saptachChandomayA hayAH || 107|| vAlakhilyAdayashchaiva sarve shivapadArchakAH | satkR^itya shivayorAj~nAM ma~NgalaM pradishantu me || 108|| brahmAtha devadevasya mUrtirbhUmaNDalAdhipaH | chatuHShaShTiguNaishvaryo buddhitattve pratiShThitaH || 109|| nirguNo guNasaM~NkIrNastathaiva guNakevalaH | avikArAtmako devastatassAdhAraNaH puraH || 110|| asAdhAraNakarmA cha sR^iShTisthitilayakramAt | bhuvaM tridhA chaturdhA cha vibhaktaH pa~nchadhA punaH || 111|| chaturthAvaraNe shambho pUjitashcha sahAnugaiH | shivapriyaH shivAsaktashshivapAdArchane rataH || 112|| satkR^itya shivayorAj~nAM sa me dishatu ma~Ngalam | hiraNyagarbho lokesho virATkAlashcha pUruShaH || 113|| sanatkumAraH sanakaH sanandashcha sanAtanaH | prajAnAM patayashchaiva dakShAdyA brahmasUnavaH || 114|| ekAdasha sapatnIkA dharmassa~Nkalpa eva cha | shivArchanaratAshchaite shivabhaktiparAyaNAH || 115|| shivAj~nAvashagAssarve dishantu mama ma~Ngalam | chatvArashcha tathA vedAssetihAsapurANakAH || 116|| dharmashAstrANi vidyAbhirvaidikIbhissamanvitAH | parasparaviruddhArthAH shivaprakR^itipAdakAH || 117|| satkR^itya shivayorAj~nAM ma~NgalaM pradishantu me | atha rudro mahAdevaH shambhormUrtirgarIyasI || 118|| vAhneyamaNDalAdhIshaH pauruShaishvaryavAnprabhuH | shivAbhimAnasampanno nirguNastriguNAtmakaH || 119|| kevalaM sAttvikashchApi rAjasashchaiva tAmasaH | avikArarataH pUrvaM tatastu samavikriyaH || 120|| asAdhAraNakarmA cha sR^iShTyAdikaraNAtpR^ithak | brahmaNo.api shirashChettA janakastasya tatsutaH || 121|| janakastanayashchApi viShNorapi niyAmakaH | bodhakashcha tayornityamanugrahakaraH prabhuH || 122|| aNDasyAntarbahirvartI rudro lokadvayAdhipaH | shivapriyaH shivAsaktaH shivapAdArchane rataH || 123|| shivasyAj~nAM puraskR^itya sa me dishatu ma~Ngalam | tasya brahma ShaDa~NgAni vidyeshAntaM tathAShTakam || 124|| chatvAro mUrtibhedAshcha shivapUrvAH shivArchakAH | shivo bhavo harashchaiva mR^iDashchaiva tathAparaH | shivasyAj~nAM puraskR^itya ma~NgalaM pradishantu me || 125|| atha viShNurmaheshasya shivasyaiva parA tanuH | vAritattvAdhipaH sAkShAdavyaktapadasaMsthitaH || 126|| nirguNassattvabahulastathaiva guNakevalaH | avikArAbhimAnI cha trisAdhAraNavikriyaH || 127|| asAdhAraNakarmA cha sR^iShTyAdikaraNAtpR^ithak | dakShiNA~NgabhavenApi spardhamAnaH svayambhuvA || 128|| Adyena brahmaNA sAkShAtsR^iShTaH sraShTA cha tasya tu | aNDasyAntarbahirvartI viShNurlokadvayAdhipaH || 129|| asurAntakarashchakrI shakrasyApi tathAnujaH | prAdurbhUtashcha dashadhA bhR^igushApachChalAdiha || 130|| bhUbhAranigrahArthAya svechChayAvAtaratkShitau | aprameyabalo mAyI mAyayA mohaya~njagat || 131|| mUrtiM kR^itvA mahAviShNuM sadAviShNumathApi vA | vaiShNavaiH pUjito nityaM mUrtitrayamayAsane || 132|| shivapriyaH shivAsaktaH shivapAdArchane rataH | shivasyAj~nAM puraskR^itya sa me dishatu ma~Ngalam || 133|| vAsudevo.aniruddhashcha pradyumnashcha tataH paraH | sa~NkarShaNassamAkhyAtAshchatasro mUrtayo hareH || 134|| matsyaH kUrmo varAhashcha nArasiMho.atha vAmanaH | rAmatrayaM tathA kR^iShNo viShNusturagavaktrakaH || 135|| chakraM nArAyaNasyAstraM pA~nchajanyaM cha shAr~Ngakam | satkR^itya shivayorAj~nAM ma~NgalaM pradishantu me || 136|| prabhA sarasvatI gaurI lakShmIshcha shivabhAvitA | shivayoH shAsanAdetA ma~NgalaM pradishantu me || 137|| indro.agnishcha yamashchaiva nirR^itirvaruNastathA | vAyuH somaH kuberashcha tatheshAnastrishUladhR^ik || 138|| sarve shivArchanaratAH shivasadbhAvabhAvitAH | satkR^itya shivayorAj~nAM ma~NgalaM pradishantu me || 139|| trishUlamatha vajraM cha tathA parashusAyakau | khaDgapAshA~NkushAshchaiva pinAkashchAyudhottamaH || 140|| divyAyudhAni devasya devyAshchaitAni nityashaH | satkR^itya shivayorAj~nAM rakShAM kurvantu me sadA || 141|| vR^iSharUpadharo devaH saurabheyo mahAbalaH | vaDavAkhyAnalaspardhAM pa~nchagomAtR^ibhirvR^itaH || 142|| vAhanatvamanuprAptastapasA parameshayoH | tayorAj~nAM puraskR^itya sa me kAmaM prayachChatu || 143|| nandA sunandA surabhiH sushIlA sumanA tathA | pa~nchagomAtarastvetAshshivaloke vyavasthitAH || 144|| shivabhaktiparA nityaM shivArchanaparAyaNAH | shivayoH shAsanAdeva dishantu mama vA~nChitam || 145|| kShetrapAlo mahAtejA nIlajImUtasannibhaH | daMShTrAkarAlavadanaH sphuradraktAdharojjvalaH || 146|| raktordhvamUrdhajaH shrImAnbhrukuTIkuTilekShaNaH | raktavR^ittatrinayanaH shashipannagabhUShaNaH || 147|| nagnastrishUlapAshAsikapAlodyatapANikaH | bhairavo bhairavaiH siddhairyoginIbhishcha saMvR^itaH || 148|| kShetre kShetre samAsInaH sthito yo rakShakassatAm | shivapraNAmaparamaH shivasadbhAvabhAvitaH || 149|| shivAshritAnvisheSheNa rakShanputrAnivaurasAn | satkR^itya shivayorAj~nAM sa me dishatu ma~Ngalam || 150|| tAlaja~NghAdayastasya prathamAvaraNe.architAH | satkR^itya shivayorAj~nAM chatvAraH samavantu mAm || 151|| bhairavAdyAshcha ye chAnye samantAttasya veShTitAH | te.api mAmanugR^ihNantu shivashAsanagauravAt || 152|| nAradAdyAshcha munayo divyA devaishcha pUjitAH | sAdhyA nAgAshcha ye devA janalokanivAsinaH || 153|| vinivR^ittAdhikArAshcha maharlokanivAsinaH | saptarShayastathAnye vai vaimAnikaguNaissaha || 154|| sarve shivArchanaratAH shivAj~nAvashavartinaH | shivayorAj~nayA mahyaM dishantu mama kA~NkShitam || 155|| gandharvAdyAH pishAchAntAshchatasro devayonayaH | siddhA vidyAdharAdyAshcha ye.api chAnye nabhashcharAH || 156|| asurA rAkShasAshchaiva pAtAlatalavAsinaH | anantAdyAshcha nAgendrA vainateyAdayo dvijAH || 157|| kUShmANDAH pretavetAlA grahA bhUtagaNAH pare | DAkinyashchApi yoginyaH shAkinyashchApi tAdR^ishAH || 158|| kShetrArAmagR^ihAdIni tIrthAnyAyatanAni cha | dvIpAH samudrA nadyashcha nadAshchAnye sarAMsi cha || 159|| girayashcha sumervAdyAH kAnanAni samantataH | pashavaH pakShiNo vR^ikShAH kR^imikITAdayo mR^igAH || 160|| bhuvanAnyapi sarvANi bhuvanAnAmadhIshvarAH | aNDAnyAvaraNaissArdhaM mAsAshcha dasha diggajAH || 161|| varNAH padAni mantrAshcha tattvAnyapi sahAdhipaiH | brahmANDadhArakA rudrA rudrAshchAnye sashaktikAH || 162|| yachcha ki~nchijjagatyasmindR^iShTaM chAnumitaM shrutam | sarve kAmaM prayachChantu shivayoreva shAsanAt || 163|| atha vidyA parA shaivI pashupAshavimochinI | pa~nchArthasa.nj~nitA divyA pashuvidyAbahiShkR^itA || 164|| shAstraM cha shivadharmAkhyaM dharmAkhyaM cha taduttaram | shaivAkhyaM shivadharmAkhyaM purANaM shrutisammitam || 165|| shaivAgamAshcha ye chAnye kAmikAdyAshchaturvidhAH | shivAbhyAmavisheSheNa satkR^ityeha samarchitAH || 166|| tAbhyAmeva samAj~nAtA mamAbhipretasiddhaye | karmedamanumanyantAM saphalaM sAdhvanuShThitam || 167|| shvetAdyA nakulIshAntAH sashiShyAshchApi deshikAH | tatsantatIyA guravo visheShAdguravo mama || 168|| shaivA mAheshvarAshchaiva j~nAnakarmaparAyaNAH | karmedamanumanyantAM saphalaM sAdhvanuShThitam || 169|| laukikA brAhmaNAssarve kShatriyAshcha vishaH kramAt | vedavedA~Ngatattvaj~nAH sarvashAstravishAradAH || 170|| sA~NkhyA vaisheShikAshchaiva yaugA naiyAyikA narAH | saurA brahmAstathA raudrA vaiShNavAshchApare narAH || 171|| shiShTAH sarve vishiShTAshcha shivashAsanayantritAH | karmedamanumanyantAM mamAbhipretasAdhakam || 172|| shaivAH siddhAntamArgasthAH shaivAH pAshupatAstathA | shaivA mahAvratadharAH shaivAH kApAlikAH pare || 173|| shivAj~nApAlakAH pUjyA mamApi shivashAsanAt | sarve mamAnugR^ihNantu shaMsantu saphalakriyAm || 174|| dakShiNaj~nAnaniShThAshcha dakShiNottaramArgagAH | avirodhena vartantAM mantrashreyo.arthino mama || 175|| nAstikAshcha shaThAshchaiva kR^itaghnAshchaiva tAmasAH | pAShaNDAshchAtipApAshcha vartantAM dUrato mama || 176|| bahubhiH kiM stutairatra ye.api ke.apichidAstikAH | sarve mAmanugR^ihNantu santaH shaMsantu ma~Ngalam || 177|| namashshivAya sAmbAya sasutAyAdihetave | pa~nchAvaraNarUpeNa prapa~nchenAvR^itAya te || 178|| ityuktvA daNDavadbhUmau praNipatya shivaM shivAm | japetpa~nchAkSharIM vidyAmaShTottarashatAvarAm || 179|| tathaiva shaktividyAM cha japitvA tatsamarpaNam | kR^itvA taM kShamayitveshaM pUjAsheShaM samApayet || 180|| etatpuNyatamaM stotraM shivayorhR^idaya~Ngamam | sarvAbhIShTapradaM sAkShAdbhuktimuktyaikasAdhanam || 181|| ya idaM kIrtayennityaM shR^iNuyAdvA samAhitaH | sa vidhUyAshu pApAni shivasAyujyamApnuyAt || 182|| goghnashchaiva kR^itaghnashcha vIrahA bhrUNahApi vA | sharaNAgataghAtI cha mitravishrambhaghAtakaH || 183|| duShTapApasamAchAro mAtR^ihA pitR^ihApi vA | stavenAnena japtena tattatpApAtpramuchyate || 184|| duHsvapnAdimahAnarthasUchakeShu bhayeShu cha | yadi sa~NkIrtayedetanna tato nArthabhAgbhavet || 185|| AyurArogyamaishvaryaM yachchAnyadapi vA~nChitam | stotrasyAsya jape tiShThaMstatsarvaM labhate naraH || 186|| asampUjya shivastotraM japAtphalamudAhR^itam | sampUjya cha jape tasya phalaM vaktuM na shakyate || 187|| AstAmiyaM phalAvAptirasminsa~NkIrtite sati | sArdhamambikayA devaH shrutyaivaM divi tiShThati || 188|| tasmAnnabhasi sampUjya devadevaM sahomayA | kR^itA~njalipuTastiShThaMstotrametadudIrayet || 189|| iti shrIshivamahApurANe saptamyAM vAyavIyasaMhitAyAM uttarakhaNDe ekatriMshAdhyAyAntargataM upamanyukR^itaM shivastotraM samAptam | shivapurANa | vAyavIyasaMhitA | uttarabhAga 2 | adhyAya 31/1\-188|| ## shivapurANa . vAyavIyasaMhitA . uttarabhAga 2 . adhyAya 31/1-188.. Proofread by PSA Easwaran \medskip\hrule\obeylines Please send corrections to sanskrit@cheerful.com Last updated \today https://sanskritdocuments.org \end{document}