% Text title            : Gita Gangeyam or Subrahmanya Ashtapadi
% File name             : gItagAngeyam.itx
% Category              : subrahmanya, aShTaka, gItam, kRitI
% Location              : doc\_subrahmanya
% Author                : Vishwanatha Sastry, (kAnADukAttAn) Kanaadukattan, Tamil Nadu
% Transliterated by     : Rajani Arjun Shankar rajani\_arjun at yahoo.com
% Proofread by          : Rajani Arjun Shankar rajani\_arjun at yahoo.com
% Description/comments  : See Notes for mUlam with additional details
% Acknowledge-Permission: Murugan Thiruvarul Sangam, Pranatharthihara Naamasankeerthana Mandali, P. Venkataraman, Bangalore
% Latest update         : June 22, 2023
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Shri Gita Gangeyam or Subrahmanya Ashtapadi ..}##
\itxtitle{.. shrIgItagA~NgeyaM athavA subrahmaNyAShTapadI ..}##\endtitles ##
\section{aShTapadI \- 1}
shlokAH \-

kastvaM brUhi dayasva me.atipalitaH kaste pitA kAmajit
samprApto.asi kuto.achalAt kimu phalaM mukhyaM priyAlokanam |
tanme.adyaihi sahAyatAM duhiturityuktvA pulinde gate
vallI\-ShaNmukhayorbhavantu bhavatAM bhadrapradAH kelayaH || shlo\. 1|| (shArdUla\-vikrIDitaM \- 19)

shrIman\-mayUra\-bhUdhara\-shikharAbharaNasya bhagavataH kR^ipayA !
shrI\-subrahmaNyasya prachodito.ayaM janaH prayatate.atra hi || shlo\. 2|| (AryA \- 12/18)

sauparvaNImiha giraM saphalAM vidhAtuM
vA~nChan vichitra\-sarasAM kavitAM cha labdhum |
shrI\-vishvanAtha\-kavirAtanute.adya hR^idyaM
shrImat\-kumAra\-charitAmR^ita\-varShi kAvyam || shlo\. 3|| (vasantatilaka \- 14)

jahatu kAla\-bhayaM rasikA janAH
dadhatu kAvyamidaM hR^idi vAchi cha |
dadatu shambhu\-sute nija\-chetasaH
charitumantara\-mAshrita\-vatsale || shlo\. 4|| (druta\-vilambita \- 12)

lakShmIM pakShmalayatyudAra\-lalitAM vyAkochayatyanvahaM
vAchaM mAkShika\-chAturI\-parajuShaM puShNAti puNyaM yashaH |
Adhatte bhajatA\-maroga\-tanutA\-manyAdR^ishaM vaibhavaM
datte dAruNa\-moha\-vAraNa\-chaNaM bodhaM nR^iNAM ShaNmukhaH || shlo\. 5|| (shArdUla\-vikrIDitaM \- 19)

aShTapadI \-1 (mAlava rAge, Adi tAle gIyate)

amara\-nadI\-salile, (prabho kumAra) ravi\-koTi\-samAnam |
panita\-mahAmuni\-kR^ita\-bahumAnam | ShaNmukha dhR^ita\-taijasa\-rUpa || 
jaya shikhishaila\-pate || 1||
hima\-giri\-taTa\-nikaTe, (prabho kumAra) shara\-kAnana\-niShThe |
tadanu virAjita\-jalaja\-variShThe | ShaNmukha shrita\-daivata\-jAla || 
jaya shikhishaila\-pate || 2||
vibudha\-jana\-samudaye, (prabho kumAra) parivAraka\-bhAvam |
gatavati yojita\-shAvaka\-bhAvam | ShaNmukha ruchi\-bhara ramaNIya || 
jaya shikhishaila\-pate || 3||
hari\-vachasopagate, (prabho kumAra) bahulA\-samudAye |
tvimamanujAgR^ihi hita\-snuta\-peye | ShaNmukha shishu\-ShaTkala\-dIpta ||  
jaya shikhishaila\-pate || 4||
vR^iShabha\-gate girishe, (prabho kumAra) sva\-vilokana\-kAme |
samupagate mudamApita\-some | ShaNmukha girijA\-kalitaikya || 
jaya shikhishaila\-pate || 5||
payasi vadana\-galite, (prabho kumAra) jananI\-suvitIrNe |
muni\-tanayAnvita\-sarasi supUrNe | ShaNmukha shrita\-shaila\-sutA~Nka || 
jaya shikhishaila\-pate || 6||
tvayi chalati sapitR^ike, (prabho kumAra) rajatAchala\-shR^i~Nge |
vividha\-vilAsa\-kratu\-vasita\-tu~Nge | ShaNmukha sura\-bhaya\-hara\-lIla || 
jaya shikhishaila\-pate || 7||
sasuhR^idakhila\-bhuvane, (prabho kumAra) kR^itavAnasi lIlAm |
itara\-sudurlabha\-vibhava\-vishAlAm | ShaNmukha bahu\-vikrama\-shIla || 
jaya shikhishaila\-pate || 8||
svIkuru lalita\-padaM, (prabho kumAra) stavamati\-rasa\-bharitam |
vishvanAtha\-kavinA kR^itametam | ShaNmukha nava\-vIra\-sameta || 
jaya shikhishaila\-pate || 9||

\section{aShTapadI \- 2}
shlokau \-

ga~NgAM tu~Ngayate, mudA sharavaNaM sharma\-pradaM tanvate
devAn modayate, payoda\-bahulA\-mAtR^IH nijAH kurvate |
shApAnmochayate parAshara\-sutA\-nAtanvate sammataM
pitrA, sarva\-jagattale kalayate lIlAM namaste vibho || shlo\. 6|| (shArdUla\-vikrIDitaM \- 19)

muktAnuddharate, shuchaM shamayate, saulabhya\-mAbibhrate
vidyAM vedayate guNAn ghaTayate shakti\-kShaye bibhrate |
pApaM lopayate, kaliM laghayate, nIrogatAM tanvate
vIrAn pAlayate, dayAM kalayate, vallIsha tubhyaM namaH || shlo\. 7|| (shArdUla\-vikrIDitaM \- 19)

aShTapadI \-2 (bhairavI rAge, tripuTa tAle gIyate)

rajata\-shilochchaya\-bhUShaNa | bhava\-bhIShaNa |
vidalita\-kanaka\-mahIdhra || jaya jaya deva guha || 1||
muni\-makha\-januraja\-shAsana | bhaya\-nAshana |
shrita\-sura\-bala\-pati\-bhAva || jaya jaya deva guha || 2||
nigaDita\-matta\-viri~nchana | budha\-ra~njana |
praNava\-padArtha purANa || jaya jaya deva guha || 3||
nija\-vapuShA pitR^i\-mohana | shikhi\-vAhana |
navamaNi\-maya\-gala\-hAra || jaya jaya deva guha || 4||
krau~ncha\-mahIdhara\-bhedana | shubha\-sAdhana |
vinihata\-tAraka\-daitya || jaya jaya deva guha || 5||
siMha\-mukhAsura\-khaNDana | kali\-daNDana |
raNa\-hata\-sura\-ripu\-shUra || jaya jaya deva guha || 6||
surapati\-tanujA\-vallabha | ripu\-durlabha |
kR^ita\-parashikhari\-vilAsa || jaya jaya deva guha || 7||
shubhamiha me pratipAdaya | sakR^ipodaya |
tava padakamala\-natAya || jaya jaya deva guha || 8||
vishvanAtha\-kavi\-bhAShitam | guNa\-bhUShitam |
shR^iNu vara\-ma~Ngala\-gItam || jaya jaya deva guha || 9||

shlokaH \-

mArutvatI\-madana\-mAdyadapA~Nga\-sa~NghaiH
kAtarya\-vismaya\-suhR^ittva\-mR^idu\-prasa~NgaiH |
indIvara\-sragabhi\-maNDitavad vibhAntI
shreyastanotu shara\-sambhava\-gaNDa\-pAlI || shlo\. 8|| (vasantatilaka \- 14)

\section{aShTapadI \- 3}
shlokau \-

vane vallIM bhillIM vikacha\-navamallI\-mR^idu\-tanuM
muhurnatvA smR^itvA guha\-guNa\-maruddhvA dhR^iti\-lavam |
smarAdhInAM dInAM jvara\-masahamAnAM virahajaM
sakhI vANI\-meNI\-shishu\-dR^isha\-mabhANIt sudhiShaNA || shlo\. 9|| (shikhariNI \- 17)

tava shrAntyAH shAntyai priyasakhi nishA\-jAgara\-pari\-
shramAt padmoshIrAdyupaharaNa\-jAtAdapi muhuH |
prabuddhA nidrAyAH svayamupanatAyA ahamaho
bruve svapnodantaM shruNu samavadhehi tyaja shucham || shlo\. 10|| (shikhariNI \- 17)

aShTapadI \-3 (vasantA rAge, Adi tAle gIyate)

skanda\-mahIbhR^iti rAjata\-bhUdhara\-shR^i~Nga\-gate bhR^isha\-tu~Nge |
navamaNi\-maNDala\-maNDita\-saudha\-talAntika\-kesara\-ra~Nge || 1||

pallavI
sakhi shR^iNu valaripu\-duhitR^i\-sadeshe |
hR^iShyati hara\-tanubhUH surabhAviha lasadupa\-kAnana\-deshe ||

madhura\-maranda\-madAkula\-ma~njula\-gIta\-milinda\-kadambe |
vikacha\-kusuma\-bhara\-nAmita\-bhAsura\-kesara\-taru\-nikurumbe || 2||
pathika\-mano\-bhR^isha\-kampana\-paNDita\-champaka\-sampadudAre |
sulalita\-vakula\-kulollAsana\-vati dhUli\-vidhUnita\-tIre || 3||
dinamaNi\-kara\-parirambha\-vikasvara\-sArasinI\-ramaNIye |
ruchira\-mR^iNAla\-latAsana\-suhita\-marAla\-ninada\-kamanIye || 4||
manasija\-narapati\-sahakR^iti\-paTutama\-puShpita\-mantra\-rasAle |
suma\-samaya\-shrI\-tilaka\-matipratha\-tilaka\-mahIruha\-jAle || 5||
puShpita\-mAdhavikA\-parirambhaNa\-vikasita\-chAru\-lava~Nge |
madana\-kR^ipANa\-bhramakara\-kiMshuka\-dhuta\-pathikAbja\-dR^iga~Nge || 6||
kupita\-vadhUjana\-mAna\-nivAraNa\-harShita\-yuvajana\-gamye |
saurabha\-pallava\-charvaNa\-puShyat\-kokila\-kUjana\-ramye || 7||
kurabaka\-reNu\-samAvR^ita\-dasha\-dishi vidalita\-nIla\-tamAle |
yuvajana\-ratija\-shramajala\-vAraka\-malayaja\-mAruta\-bAle || 8||
vishvanAtha\-kavinA rachitamidaM ShaNmukha\-bhakti\-nidAnam |
surabhi\-samaya\-vana\-varNana\-nirataM jayatu chiraM bhuvi gAnam || 9||

shlokau \-

madakala\-kalakaNThI\-kandharAnargalodyat\-
kalakala\-rava\-pUraiH poShayan pa~nchabANam |
ghaTa\-bhava\-giri\-jAto vAta\-poto.abhiyAta\-
stapati virahi\-cheto mAra\-senAdhi\-netA || shlo\. 11|| (mAlinI \- 15)

utphullan\-nava\-mallikA\-parimalodgAra\-priyambhAvuka\-
shrIkhaNDAchala\-vAta\-dhUta\-vikasachchAmpeya\-bhUmI\-ruhAH |
bhR^i~NgAli~Ngita\-bhR^i~Nga\-jha~NkR^iti\-mahA\-hu~NkAra\-santarjitaiH
nIyante kathamapyamI virahibhirvAsantikAH vAsarAH || shlo\. 12|| (shArdUla\-vikrIDitaM \- 19)

\section{aShTapadI \- 4}
shlokaH \-

svasevanAyAta\-suparva\-yauvata\-
prasAdhanAbhyarhita\-rAmaNIyakam |
kumAra\-mArAma\-gataM smarantyasau
sakhI babhAShe punareva vallikAm || shlo\. 13|| (vaMsha\-sthavilaM \- 12)

aShTapadI \- 4 (rAmakriyA rAge, Adi tAle gIyate)

kuNDala\-maNDita\-gaNDa\-talA~nchita\-ShaNmukha\-pa~Nkaja\-shAlI |
sAndhya\-payoda\-taTid\-bhramadAyi\-kroDaka\-navamaNi\-mAlI || 1||

pallavI
guha iha khelati keli\-pare | vibudha\-vilAsa\-vadhU\-nikare ||

gAyati kAchana sundara\-vINA\-guNa\-raNanodyata\-hastA |
toyaja\-vadanA kokila\-kUjita\-hu~NkR^iti\-karaNe shastA || 2||
nR^ityati kAchana chalamaNi\-hAraM lalita\-vihAra\-mudAram |
nityamudaM paritoShayituM guha\-makR^itaka\-vANI\-sAram || 3||
kAchana parimala\-pUrita\-dasha\-disha\-mR^iga\-mada\-ma~Ngaja\-lolA |
sparsha\-sukhAnububhUShurakArShI\-dadhi\-niTilaM surabAlA || 4||
kAchana malayaja\-pa~Nka\-vilepana\-kaitavato guha\-gAtram |
hR^iShita\-tanUruha\-mAspR^ishati svaya\-ma~Ngaja\-pauruSha\-pAtram || 5||
bAhu\-yugena mR^ida~Nga\-varaM parirabhya mudA.a.ashayamekA |
vAdana\-nartita\-vAha\-mayUraM vya~njayati svamabhIkA || 6||
kechana yuvati\-janA vilasan\-maNi\-nUpura\-nAda\-makhedam |
vidadhati maNDala\-lAsya\-vilAsaM sa\-valaya\-karatala\-vAdam || 7||
kAchana hR^iShyati kAchana khidyati kAchana likhati pR^ithivyAm |
kAchana lajjita\-vadanA tiShThati hasati cha kAchidaTavyAm || 8||
vishvanAtha\-kavi\-bhAShita\-midamapi kalayatu kushalamasheSham |
kalita\-lalita\-purashAsana\-sUnoH svaira\-vilAsa\-visheSham || 9||

shlokAH \-

sarvAnandana indu\-sundara\-mukhaH kAntA\-mupAnta\-sthitAM
pashyan sasmita\-mapsaraH\-kulamapi svachChanda\-lIlAkulam |
AnandAmbudhi\-magna\-chetanamayaM kurvannapA~NgekShaNaiH
bhadraM kandalayatvamanda\-manishaM chandrArdha\-bhR^in\-nandanaH || shlo\. 14|| (shArdUla\-vikrIDitaM \- 19)

ka~NkelI\-prasavAbhi\-bhUShita\-vapuH ka~njekShaNAli~NgitaH
kaNThekAla\-sutaH kanat\-kurabakAmbhoja\-sragudbhAsitaH |
kAshmIra\-drava\-sikta\-chandana\-rasAlipto vidadhyAchChubhaM
kandarpAyuta\-koTi\-kAnti\-ranishaM shR^i~NgAra\-samrADasau || shlo\. 15|| (shArdUla\-vikrIDitaM \- 19)

kalyANAchala\-kArmukAchala\-shilA\-bAbhAsyamAnaH smarat\-
santApApaha\-chitra\-bandhana\-lasat\-skandAchalArAmakaH |
pAyA\-daskhalitAtmashakti\-ranishaM shaktiM karAbje vahan
snigdhAkhaNDala\-nandanA\-sahacharaH sAmoda\-somodayaH || shlo\. 16|| (shArdUla\-vikrIDitaM \- 19)

iti shrI\-vishvanAtha\-kR^itau gIta\-gA~Ngeya\-kAvye sAmoda\-somodayo nAma prathamaHsargaH |

\section{aShTapadI \- 5}
shlokaH \-

shrutvA svIya\-sakhI\-vacho vanacharI kR^ichChreNa shayyA\-talAt
utthAyAtanu\-tApa\-vepita\-tanuH nishvAsa\-paryAkulA |
vishvasyAtma\-sakhIM sagadgadamidaM bAShpAyamANA.abravIt
vishvAdhIsha\-gajAsya\-sodara\-mahA\-lAvaNya\-kR^iShTAntarA || shlo\. 17|| (shArdUla\-vikrIDitaM \- 19)

aShTapadI 5 (toDI rAge, Adi tAle gIyate)

ku~njara\-vadana\-sahodara\-mAshrita\-jana\-paripAlana\-dhIram |
madhupaiH sambhR^ita\-ma~nju\-madhUdbhava\-puShpa\-vichitrita\-hAram || 1||

pallavI
shaile guhamiha kalita\-vihAram | sakhi kalaye hR^idi girisha\-kumAram ||

mechaka\-rAjita\-mechaki\-tallaja\-vAhana\-mAtta\-sharAsam |
hasita\-pachelima\-bimba\-phalAdhara\-sa~NkramaNA~nchita\-hAsam || 2||
ki~NkiNi\-sa~Ngi\-shukodara\-sodara\-maNi\-ghaTitA~Ngika\-bhAjam |
kIra\-mukhAkR^iti\-nakha\-mukha\-shIlita\-valaripujodya\-durojam || 3||
adhara\-talAhita\-sumadhura\-vaiNava\-rAva\-vashIkR^ita\-lokam |
ketu\-samujjvala\-tama\-charaNAyudha\-bodhita\-vaibudha\-lokam || 4||
pa~nchasharAkR^iti\-va~nchana\-dIkShita\-vigraha\-kAnti\-manoj~nam |
vAraNa\-vadana\-surAri\-kalevara\-dAraNa\-labdha\-samaj~nam || 5||
kA~nchana\-tantu\-vinirmita\-chela\-vibhAsura\-naija\-valagnam |
parama\-dayAlutayA laghu\-tArita\-saMsR^iti\-sAgara\-magnam || 6||
shruti\-puTa\-mUla\-gatAti\-kR^ipA\-rasa\-sArdra\-vilochana\-ka~njam |
vaiNika\-munivara\-vINA\-varNita\-sa~Ngata\-shubhaguNa\-pu~njam || 7||
mukharita\-hATaka\-kalpita\-kA~nchI\-parihita\-kaTi\-gata\-chelam |
maNi\-makuTI\-parira~njita\-shIrShaM daivata\-sainika\-pAlam || 8||
vishvanAtha\-kavi\-bhaNitamidaM guha\-modakaraM suvikAsam |
bhajatu sadaiva kumAra\-guNAvali\-varNana\-tattva\-vilAsam || 9||

\section{aShTapadI \- 6}
shlokaH \-

pratapati sadA kAme kA me gatiH bhavitA.adhunA ?
dahati pavanashcheto neto.astyupAya udAsitum |
viharati nijArAmaM kAmaM gate.api shivAtmaje
sakhi mama mano mAnaM nUnaM jahAti karomi kiM ? || shlo\. 18|| (hariNI \- 18)

aShTapadI 6 (kAmbhojI rAge, tripuTa tAle gIyate)

virachita\-ka~Nku\-vanAvanayA kR^ita\-taruNa\-vanechara\-veSham |
drAvita\-shuka\-pika\-shArikayA dhR^ita\-paTu\-mR^igayA\-paritoSham || 1||

pallavI
sahasA sa~Ngamaya sakhi shUram |
nava\-nava\-kausumashara\-shara\-vedanayA.adya mayA sukumAram ||

sarabhasa\-vepita\-mAnasayA bahu\-sarasa\-kathA\-vishadeham |
shabara\-varAgati\-savyathayA shrita\-lalita\-tamAsana\-deham || 2||
janaka\-pratigati\-harShitayA paridhR^ita\-yuva\-tallaja\-rUpam |
tat\-punarAgamanAkulayA dhR^ita\-bhR^isha\-jaraTha\-dvija\-rUpam || 3||
kA~Nkava\-saktu\-madhu\-pradayA nija\-salila\-tR^iShaM kathayantam |
kumarI\-sarasIM sahagatayA smara\-vachana\-bharaM vikirantam || 4||
prayatana\-shatakenAvashayA paridarshita\-gaja\-herambam |
bhaya\-bhara\-kalitAli~NganayA dara\-hasitaM vihitAlambam || 5||
gatavati kariNi visAdhvasayA svaya\-mabhidarshita\-nija\-mUrtim |
marShaNa\-vachana\-parAyaNayA madhurasa\-bhAShaNa\-dalitArtim || 6||
vishadita\-manmatha\-vikriyayA raha Ashu nayantaM ku~njam |
lajjita\-mukulita\-lochanayA rada\-paTa\-juSha\-madhi\-suma\-ma~ncham || 7||
pulakita\-chumbita\-vigrahayA bahuvidha\-surata\-bhavAnandam |
pramada\-rasAmR^ita\-pUritayA sphuTa\-hita\-sarasa\-vacho\-vR^indam || 8||
vishvanAtha\-kavi\-gItamidaM sharavaNabhava\-guNa\-paripUrNam |
shithilita\-durita\-gaNaM satataM bhuvi jayatu sadA shubha\-varNam || 9||

shlokAH \-

svachChaM guchCha\-samunmiShat\-sumabharaM mAdhvI\-samAsvAdanA\-
shrAnta\-bhrAnta\-madhuvratA~nchita\-shikhaM krUraM pravIraH smaraH |
mallI\-valli\-juShaM viShA~Nkita\-sharachChAyaM hariNyAmiva
grAhaM grAhamaho mayi prakurute shArdUla\-vikrIDitam || shlo\. 19|| (shArdUla\-vikrIDitaM \- 19)

parIpAkodrekAt parimala\-bhR^itAnAM sumanasAM
parAgairmAlatyA viyadanavakAshaM virachayan |
udarkasthAgastyavrati\-shikhariNItAgaru\-khuraiH
samutpannaH svAntaM shvasana iha sImantayati me || shlo\. 20|| (shikhariNI \- 17)

svAhA\-vallabha\-bhAgya\-pAra\-mahimA nIhAra\-shailAtmajA\-
snehAlokita\-rAmaNIyaka\-vapuH bAhA\-gR^ihItendrabhUH |
mohAndhAsura\-mardanaika\-nirato vAhAyitAjAdhipo
mAhAdeva\-mano\-vinodana\-paTustvIhAM prabhuH pUrayet || shlo\. 21|| (shArdUla\-vikrIDitaM \- 19)

pAtu shaktyAyudho.aklesho lIlA\-lAlasa\-mAnasaH |
vallI\-manaH\-payojanma\-vikAsana\-divAkaraH || shlo\. 22|| (anuShTubh \- 8)

iti shrIvishvanAtha\-kavikR^itau gIta\-gA~Ngeya\-kAvye aklesha\-shaktyAyudho nAma dvitIyaH sargaH |

\section{aShTapadI \- 7}
shlokAH \-

sukumAraH kumAro.api mAnyAM vyAdhesha\-kanyakAm |
ananya\-mAnasAM smR^itvA kaitavAn\-niryayau gireH || shlo\. 23|| (anuShTubh \- 8)

vanecharAdhIsha\-sutAM smarArdito vane sanIDe lavalI\-mahIbhR^itaH |
gaveShayaMstA\-mavilokayan guho niShadya ku~nje nibhR^itaM vyachIcharat || shlo\. 24|| (vaMsha\-sthavilaM \- 12)

atraiva sA prANa\-samA samAgatA vilambanena prakaTAparAdhinam |
sakhI\-vR^itA kutra gatA vihAya mAM, vilokitA ched\-vidadhIya sAntvanAm || shlo\. 25|| ((upajAti \- 12)

aShTapadI \- 7 (bhUpAla rAge, chApu tAle gIyate)

nAyikA kva gatA pratIkShya chirAya mAM madanena |
bAdhitA kupiteva seti na nirNaye hR^idayena || 1||

shiva shiva vilochana\-pathe | tAM kathaM karavANi || shiva shiva ||

saMsmarAmi tadIyamAsya\-mala~NkR^itaM chikureNa |
sArasaM chalitAlinAmiva maNDitaM nikareNa || 2||
sA saheta rujaM kR^ishA kathamarpitAM viraheNa |
abjinIva madAkulasya mata~Ngajasya kareNa || 3||
chintayAmi tadoShTha\-madya mamArditaM radanena |
komalaM nava\-chUta\-patramiva kShataM vihagena || 4||
kiM bravIti kimIkShate bahulAshruman\-nayanena |
kiM dadhAti hR^idi priyA mama va~nchitA svajanena || 5||
sAparAdhamimaM janaM kimu vIkShya sA sadayena |
lokanena bhaved ruShA\-rahitA mamAnunayena || 6||
mAmudIkShya vadediyaM mama tApado.asi dhaveti
tAM samIkShya katheyameva taduttaraM savinIti || 7||
komalA~Ngi ruShaM vihAya puro mamAshu vibhAhi |
kAma\-tAnta\-midaM manaH kuru moda\-pUra\-vagAhi || 8||
vishvanAtha\-kaveridaM vacha AdadhAtu phalena |
shrIshivAtmaja\-toShadAyi shubhaM nR^iNAM paThanena || 9||

shlokau \-

tApaM mA kuru mAdhavAtmaja vR^ithA cheShTAM vimu~nchAdhunA
trailokyaika\-dhanurdhara tvadanujaivAste.antara~Nge mama |
dIne tadvirahAnalArta\-vapuShA sa~Ngena sha~NkAkule
kinnu syAt sahajA\-dhave prayatanaM yuShmAdR^ishAM sAmpratam || shlo\. 26|| (shArdUla\-vikrIDitaM \-19)

svairAdhIra\-viyoga\-sa~njvara\-vacho\-vyAhArakR^it kAnane
sa~NkalpAdhigata\-priyA\-tanu\-parIrambha\-prasajjatkaraH |
vallI\-lAlasa\-mAnasaH taduchitaM bhUShA\-visheShaM vahan
bhavyaM naH sukumAra eSha kurutA\-mAdyaH kumAraH sadA || shlo\. 27|| (shArdUla\-vikrIDitaM \-19)

iti shrIvishvanAtha\-kavikR^itau gIta\-gA~Ngeya\-kAvye sukumAra\-kumAro nAma tR^itIyaH sargaH |

\section{aShTapadI \- 8}
shlokaH \-

upAdri\-ku~nja\-nilayaM bahulAnanda\-vardhanam |
vallI\-vayasyA vAsantI vAchamUche sagadgadam || shlo\. 28|| (anuShTubh \- 8)

aShTapadI \- 8 (saurAShTra rAge, Adi tAle gIyate)

kokila\-kAkalikAmapi kalayati karNa\-puTe.ati\-kaThoram |
darpaka\-bhaTa\-kula\-vIra\-vachana\-tati\-miva vishadita\-mada\-sAram ||

pallavI
tApamitA tava jAyA shrIguha |
shabara\-nR^ipati tanayA smara\-vedanayA dayanIyA ||

svAnubhavena kalA\-bhR^ita\-matuhina\-kara\-maharIsha\-samAnaM
nishchinute kAraNa\-guNa\-sa~Nkrama\-naya\-mapi kurute mAnam || 2||
manasi karoti paTIra\-mahIdhra\-samIra\-kishora\-vihAram |
pitR^ipati\-haridadhi\-gamana\-vashAdiva duHsaha\-vaishasa\-ghoram || 3||
hR^idaya\-kuhara\-nilayasya sumAyudha\-bANa\-pathAdavanaM te |
sthagayati hR^idayaM kalayitu\-masakR^it kara\-yugataH sadanaM te || 4||
chitra\-paTe pravilikhya bhavantaM kA~NkShita\-vatyanunetum |
lekhana\-vastu paramapi sakampA nAshakadeva grahItum || 5||
dharati tanau smara\-gada\-yuji nIrasa\-kIrNa\-kusumashara\-jAlam |
mechaka\-dR^igiva viyogi\-mR^igAntaka\-madana\-vanechara\-jAlam || 6||
kalayati shaityopacharaNa\-mapi bahu\-parijana\-kalita\-mapArtham |
vedi\-gatAnala\- vihitamiva ghR^itaM tApa\-supoSha\-samartham || 7||
dhyAyati nandati pashyati mUrChati sIdati gAyati shete |
shvasiti svidyati jhaTiti dhaveti cha nigadati bAShpaM sUte || 8||
vishvanAtha\-kavi\-bhAShita\-midamapi guhapara\-tara\-kamanIyam |
guha\-virahArdita\-vanachara\-duhitR^i\-sakhI\-vacha AdaraNIyam || 9||

\section{aShTapadI \- 9}
shlokaH \-

prasUna\-shayanIya\-mapyatanu\-bANa\-talpAyate
paTIraja\-rajo.a~NgajAnala\-chalat\-sphuli~NgAyate |
yugAnta\-mihirAyate tanubhuvaH shashI ShaTpada\-
dhvanishcha kulishAyate vipinachAri\-pR^ithvIshituH || shlo\. 29|| (pR^ithvI \- 17)

aShTapadI \- 9 (bilahari athavA deshAkShi rAge, tripuTa tAle gIyate)

karatala\-gatamapi hallaka\-sUnam |
sA tanute kuvalayamiva dUnam || 1||

pallavI
vallikA tava virahe he guha |

upahR^ita\-bisa\-latikAmanu\-matyA |
viShadhara\-tanumiva pashyati bhItyA || 2||
kR^ita\-malayaja\-rasa\-lepana\-dAsyAm |
rachayati duHkha\-chayAM sva\-vayasyAm || 3||
kucha\-ghaTa\-taTa\-dhR^ita\-mauktika\-mAlAm |
kurute.asitamaNi\-yujamiva nIlAm || 4||
vyathayati parijana\-mupa\-tanu\-vAsam |
shvasita\-samIraNa\-janita\-nirAsam || 5||
kvachidabhi\-tiShThati malaya\-samIram |
virahi\-yugAnala\-marasA dhIram || 6||
ku~njaga\-ma~njula\-madhukara\-nAdam |
nirNayate guru\-mashani\-ninAdam || 7||
pratikala\-ma~njali\-kR^idadhi\-niTAlam |
vadati guheti sabAShpa\-kapolam || 8||
vishvanAtha\-kavi\-virachita\-gItam |
bhavatu sukhAya nR^iNA\-mavigItam || 9||

shlokAH \-

shete tiShThati yAti cha pralapati bhrAmyatyabhi\-dhyAyati
pronmIlatyabhidhAvati prajapati hyuttiShThati sraMsate |
dIrghaM niHshvasiti kShaNena hasati kR^ishyatyana~Nga\-jvare
tattAdR^ishyapi jIvati tvayi rasAt tAM pAhi deva drutam || shlo\. 30|| (shArdUla\-vikrIDitaM \- 19)

dUroda~nchita\-pa~nchashAkha\-makhabhuk\-sandoha\-samprArthanA\-
sAphalyAya shitAgra\-shakti\-dalita\-krau~nchAchalAdeH prabhoH |
saMsaktendra\-sutA\-payodhara\-taTI\-kAshmIrajA~Ngasya te
sAnandasya shubhAya santviha mahAsenasya dR^iShTya~nchalAH || shlo\. 31|| (shArdUla\-vikrIDitaM \- 19)

iti shrI\-vishvanAtha\-kR^itau gIta\-gA~Ngeya\-kAvye sAnanda\-mahAseno nAma chaturthaH sargaH |

\section{aShTapadI \- 10}
shlokaH \-

iha giri\-nikaTe karomi vAsaM, druta\-tara\-mAnayane yatasva tasyAH |
iti guha\-kathitaM nishamya vAkyaM, savinaya\-metya sakhI jagAda vallIm || shlo\. 32|| (puShpitAgrA 12/13)

aShTapadI \- 10 (AnandabhairavI rAge, Adi tAle gIyate)

kvaNati madhuranidhAne pika iha rujameti |
chalati virahi\-kadane maruti sa shucha\-mupayAti || 1||

pallavI
tava kamano virahI te | sakhi sIdati valli ||

hasati vakula\-kalApe dhR^itimati vijahAti |
raNati samada\-madhupe rajasi bhuja\-mupadadhAti || 2||
lasati kumuda\-sahAye sati vasati nilIya |
kanati kurabaka\-chaye viramati gira\-mabhidhAya || 3||
vasati gahana\-kuTIre parijana\-mapahAya |
shvasiti vimala\-mukure pratikR^iti\-malaghu vidhAya || 4||
vadati suvishvanAthe mR^iDa\-suta\-bhajanAya |
manasi kR^ita\-shubha\-kathe guha udayatu kushalAya || 5||

\section{aShTapadI \- 11}
shlokaH \-

pUrvaM yatra saha tvayA sumasharo devena siddhArthitaH
tatra tvachChayanAsane parimR^ishan sAshraM bahu vyAharan |
dhyAyaM dhyAyamapi tvadIya\-vadanaM nAmApi sa~NkIrtayan
stabdhastvad\-radanachChadAmR^ita\-rasAsvAdaM guho vA~nChati || shlo\. 33|| (shArdUla\-vikrIDitaM \- 19)

aShTapadI \- 11 (kedAra gaula rAge, Adi tAle gIyate)

malayaja\-vAte svayamupayAte sarabhasa\-ma~njali\-kArI |
pR^ichChati kushalaM tAvakamakhilaM sarvaga\-mamu\-mabhisArI || 1||

pallavI
shaila\-sanIDe kusumApIDe nivasati vIrudhagAre |
ardhendIvara\-bAndhava\-shekhara\-nandana ita sahakAre ||

gUhati karNaM prasR^ijati tUrNaM smara\-guNa\-shi~njita\-bhede |
patadapi parNaM shirasi na kIrNaM budhyati visarati khede || 2||
marudupanItaM champaka\-chUtaM vikacha\-sumaugha\-majasram |
matvA.a.ana~NgI\-mAnala\-bha~NgI\-mammaya\-masR^ija\-divAsram || 3||
chandana\-sAraM saghusR^iNa\-nIraM gopayituM sitimAnam |
abhidruta\-ma~Nge prasaradana~Nge dharati shramajala\-lInam || 4||
ninadati haMse kamala\-vataMse tvadabhigati\-dhiyA sha~Nke |
sajjati bhavatIM varatanu sudatIM dR^iDha\-mupagUhituma~Nke || 5||
pallava\-talpaM pAvaka\-kalpaM bhavati vibhoriti manye |
glapita\-sharIrAdatanu\-vikArAd\-vanachara\-nAyaka\-kanye || 6||
mA kuru shokaM tanu tamashokaM saphalayituM jhaSha\-ketum |
na kuru vilambaM mukha\-shashi\-bimbaM sahasita\-mehi vidhAtum || 7||
smara\-kR^ita\-tADe bahu\-vidha\-pIDe bhagavati he sakhi roSham |
na kalaya bhAmini vihara vilAsini shR^iNu vachanaM hataroSham || 8||
vishvanAtha\-kavi\-bhaNitamidaM bhuvi sukhayatu gAyaka\-jAtam |
jagadadhi\-pAlana\-kR^ita\-guha\-khelana\-varNana\-tatpara\-gItam || 9||

shlokAH \-

chakita\-hariNI\-dR^iShTe piShTe na yukta\-mudAsanaM
sarabhasa\-mupetyaitaM shItaM dR^iDhaM parirambhaNAt |
atanu\-vishikha\-jvAlA\-dolAyitaM kuru sAmprataM
hR^idaya\-dayita\-prema sthemAna\-metvavilambitam || shlo\. 34|| (hariNI \- 17)

ku~njAdyAti bahiH kShaNaM mR^igayati tvatpAda\-mudrAM vane
patre patriNi vA patatyapi chalatyAsha~Nkya te.abhyAgatim |
pratyAyAti nivishya ku~nja\-kuharaM shayyAM sa Alokate
tvayyAsakta\-manAH sakhIti lapati prANapriye svAgatam || shlo\. 35|| (shArdUla\-vikrIDitaM \- 19)

vallyA bhilla\-kulAdhinAyaka\-tapaH\-prAgbhAra\-sImA\-bhuvo
lIlollola\-tarAla\-kuntala\-bhara\-grAhe.ativAhe tanoH |
vIkShAyA\-mupagUhane tadadharAsvAde tayA bhAShaNe
sotkaNThaH shitikaNThajo vidadhatAM kShemAnnikAmaM sa me || shlo\. 36|| (shArdUla\-vikrIDitaM \- 19)

iti shrI\-vishvanAtha\-kR^itau gIta\-gA~Ngeya\-kAvye abhisArikA\-varNane sotkaNTha\-shitikaNThajo nAma pa~nchamaHsargaH |

\section{aShTapadI \- 12}
shlokaH \-

atha kucha\-jaghana\-mahimnA deha\-tanimnA sakhI sahAyA tAm |
skhalita\-padAM pathi vallIM niveshya mallI\-gR^ihe guhaM prAha || shlo\. 37|| (AryA \- 12\-18 )

aShTapadI \- 12 (sha~NkarAbharaNa rAge, chApu tAle gIyate)

ichChati tava parirambhaNa\-meShA |
viraha\-mahAgada\-kR^ita\-tanu\-shoShA || 1||

pallavI
lokapate sarva\-lokapate |
shrAmyati vallI ku~nja\-gR^ihe ||

japati satatamapi bhavadabhidhAnam |
vikirati nayanaja\-jalamatimAnam || 2||
manasija\-kalpita\-matrabhavantam |
pashyati sakala\-dishAsu vasantam || 3||
katha\-mabhisarati na tadanu vayasye |
sharavaNa\-bhava iti vadati rahasye || 4||
khaga\-gati\-sha~Nkita\-bhavadabhi\-gamanA |
parihita\-shithilita\-kR^isha\-kaTi\-vasanA || 5||
peshala\-kisalaya\-kR^ita\-kara\-valayA |
shvasiti bhavati virachita\-hR^idaya\-layA || 6||
bhavadabhisaraNAmita\-rasa\-lagnA |
padi padi nipatati valadavalagnA || 7||
muhyati karatala\-shayita\-kapolA |
snihyati hR^iShyati vanachara\-bAlA || 8||
vishvanAtha\-kavi\-gira\-manuvAram |
paThata namata shashi\-makuTa\-kumAram || 9||

shlokAH \-

alamadhika\-vilambenAbhisartuM yatethAH
saphalaya tava cheto\-vallabhAyA abhIShTam |
viraha\-vikala\-pAdA sA.abhisArepyashaktA
vasati virachayantI bAShpa\-sArdraM niku~njam || shlo\. 38|| (mAlinI \- 15)

AgachChen\-mama chittabandhurachirA\-dAnandayen\-nirbharaM
kR^itvA.a.ashleSha\-mathAdharaM nanu pibedromA~nchayed\-vigraham |
ityAkalpita\-kalpanA\-shata\-pathe niHsha~Nka\-gachChan\-matiM
tAM bAlAM paripAlayeH karuNayA dInAnukampin prabho || shlo\. 39|| (shArdUla\-vikrIDitaM \- 19)

IpsantI bhavadAgamaM mama sakhI sajjI\-karotya~njasA
shayyAM sUnamayIM vyapohati rajo vastrA~nchalena kShaNAt |
AkalpaM kurute navaM navamapItyuktiM nishamyAdarAt
dhanyo moda\-yuto.astu me sapadi subrahmaNya AnandadaH || shlo\. 40|| (shArdUla\-vikrIDitaM \- 19)

iti shrI\-vishvanAtha\-kR^itau gIta\-gA~Ngeya\-kAvye vAsaka\-sajjikA\-varNane dhanya\-subrahmaNyo nAma ShaShThaH sargaH |

\section{aShTapadI \- 13}
shlokau \-

chandrastamo.achChatanu\-rAshu karairnipItaM
kukShau kala~Nka\-kapaTena vahaMstadAnIm |
khedAnalaM virahiNAmapi mAra\-sAhyAt
saMvardhayan jaladhinA samamAvirAsIt || shlo\. 41|| (vasantatilakaM \-14)

udayati kuvalaya\-bandhau mAnasa\-bandhau cha nAgate vallI |
mu~nchantyavirata\-masraM vyalapadajasraM vimukta\-kaNThaM sA || shlo\. 42|| (AryA \- 12,18)

aShTapadI 13 (AhirI rAge, jhampa tAle gIyate)

jhaTiti guha Agamana\-shapatha\-shata\-bhAShaNam |
vitathayati viphalayati mAmaka\-vibhUShaNam || 1||

pallavI
kiM bruve viShama\-virahaM \-sahe kathamati\-vilobhitA ||

viShamaguNa\-viShamashara\-yodhapati\-kheTake |
bhavati shasha\-bhR^iti ka iha sharaNa\-mavasAdake || 2||
kulaja\-mR^igadR^i\-ganuchita\-mabhisaraNa\-mAshrayam |
anubhavati tadiha mama hR^ida\-tanu\-sharAmayam || 3||
lalita\-suma\-shayanamapi mama kara\-talAstR^itam |
virachayati manasija\-viShAda\-mati\-vistR^itam || 4||
rahasi mama ku~nja\-gR^iha\-vasati\-riha mAmikA |
priyatama\-parA~NmukhatayA dalita\-kautukA || 5||
Ayata\-ninAda\-kara\-koka\-yuvatI tviyam |
anunayati mAmiva sakhI sakaruNodayam || 6||
ahaha bahu sIdAmi kamalinIvAdhunA |
maditarotpalinIva tuShyati svAminA || 7||
adayamiha yadi sa iti bhajati rasa\-bha~njanam |
prathamamati tena kimu kalita\-manura~njanam || 8||
kavi\-vishvanAtha\-kaliteya\-mati\-komalA |
modayatu rasikamiha kR^itiramita\-ma~NgaLA || 9||

shlokaH \-

tat kiM svIya\-janAvR^itaH kimu sakhI nAvaikShata svAminaM
kiM pAdAmbuja\-sakta\-bhakta\-janatAbhIShTa\-pradAne rataH |
kiM vA bhAgyajuShA rahaH suvapuShA juShTo.anyayA yoShayA
mAmanviShya charatyayaM kimu vane ku~njaM sa yannAgataH || shlo\. 43|| (shArdUla\-vikrIDitam)

\section{aShTapadI \- 14}
shlokaH \-

gatAM guhAbhyarNa\-mupAgatAM tAM sakhI\-matha prANa\-dhavAdR^ite sA |
dR^iShTvA viShaNNAM parisha~Nkya devaM saktaM kayAchid\-virahiNyathA.a.aha || shlo\. 44|| (upajAti \- 11)

aShTapadI 14 (sAra~Nga rAge, chApu tAle gIyate)

mR^iga\-mada\-bindu\-pariShkR^ita\-phAlA |
kacha\-dhR^ita\-vikasita\-vichakila\-mAlA || 1||

pallavI
kA.api girisha\-bhuvA | viharati nalina\-dR^igabhinavA ||

pati\-vilikhita\-makarika\-kucha\-kalashA |
chapala\-kalevara\-chala\-vasana\-dashA || 2||
shramajala\-lesha\-karambita\-vadanA |
dhava\-mR^idu\-pANija\-shithilita\-rashanA || 3||
satrapa\-mukulita\-nayana\-kuvalayA |
sarabhasa\-cha~nchala\-karamaNi\-valayA || 4||
guha\-parirambha\-sapulaka\-sharIrA |
kusuma\-sharAsana\-vigraha\-dhIrA || 5||
vigalita\-kuntala\-sumabhR^ita\-ma~nchA |
saphalita\-sR^iShTi\-vidhAyi\-viri~nchA || 6||
shItkR^iti\-kara\-radanapaTa\-yuga\-dharA |
darahasa\-sUchita\-nija\-sukha\-visarA || 7||
maNita\-raNita\-paripoShita\-mArA |
kalakala\-rava\-rashana\-jaghana\-bhArA || 8||
vishvanAtha\-kavi\-bhaNita\-maviratam |
guha\-rasikaM kalayatu sukha\-bharitam || 9||

shlokaH \-

kumuda\-bandhura\-bandhuraho mama sva\-mahasA maha\-sAdhana\-paNDitaH |
kusuma\-mArgaNa\-mArgaNavat karAnalaghayan laghayan mana edhate || shlo\. 45|| (druta\-vilambitaM \- 12)

\section{aShTapadI \- 15}
shlokau \-

atrAntare daivata\-rAja\-putrIM shyAmAmudUDhAM shashi\-mauli\-sUnuH |
vallI\-mabhANIt pratipAlayantIM smR^itvA jagAmeti sakhI sashokam || shlo\. 46|| (upajAti \- 11)

nishamya vachanaM vallI vayasyA\-vadana\-chyutam |
sabAShpaM vilalApochchaiH dR^iShTvaiva guha\-cheShTitam || shlo\. 47|| (anuShTubh \- 8)

aShTapadI \- 15 (sAverI rAge, chApu tAle gIyate)

upamita\-mudire taruNI\-chikure karShaNa\-shithilI\-kR^ite |
rachayati masR^iNaM surabhi saghusR^iNaM taTidupamita\-mAyate || 1||

pallavI
kurute vihR^itiM nijabhavane | sharajo vihAra\-vipine ||

sa dashana\-vasane bahurasa\-sadane sughaTita\-madanAhave |
sphuTa\-suma\-mR^idulaM rada\-pada\-paTalaM vikirati madhurAsrave || 2||
lulita\-kachabhare sumashara\-mukure sulalita\-mati komale |
vitarati tilakaM sahasita\-madhikaM pulakita\-gaNDasthale || 3||
ghana\-jaghana\-taTe galita\-chala\-paTe kalakala\-rava\-mekhale |
ghaTayati vasanaM suruchira\-rachanaM lalita\-pulina\-ma~njule || 4||
kucha\-kalasha\-yuge girivara\-subhage jharamiva madanAvahe |
vimala\-maNisaraM sarabhasa\-madhuraM kalayati kamalA\-gR^ihe || 5||
jita\-bisa\-kusume hima\-kiraNa\-same saguNamiva mukhe nate |
shramajala\-nichayaM svanayana\-viShayaM pravidadhadatimodate || 6||
kamala\-vadaruNe lalanA\-charaNe gati\-kR^ita\-varaTA\-jaye |
sthirayati vitulaM nUpura\-yugalaM vidalita\-madanAmaye || 7||
sakhi mama vijane sthitamiha gahane mada\-gajamukha\-sodare |
surapati\-kanyAM ramayati dhanyAM viphalamida\-manAdare || 8||
sharabhava\-sharaNe kathita\-guNagaNe shrIkavi\-vishvanAthe |
kathayati saralaM sahR^idaya\-hR^idayaM saratu surabala\-nAthe || 9||

\section{aShTapadI \- 16}
shlokaH \-

mA tApaM bhaja he sakhi ! priyatamo nAyAta ityAshaye
so.ayaM nandatu mAM pratArya mahilA\-manyAM gR^ihItvA shaThaH |
vAto vAtu daro virAjatu madhushrIH kokilaH kUjatu
pradyumno mudametu gachChatu mama svAntaM mukhenduM prabhoH || shlo\. 48|| (shArdUla\-vikrIDitaM \- 19)

aShTapadI \- 16 (punnAgavarAlI rAge, Adi tAle gIyate)

manasija\-madahara\-ruchi\-bharitena |
shrayati na sA shucha\-mali\-virutena || 1||

pallavI
yA sahitA shiva\-sUnunA sakhi |

shrutipatha\-parisara\-sara\-nayanena |
bhajati na sA rujamuDu\-kamanena || 2||
Chavidhuta\-himakara\-mukha\-kamalena |
shvasiti na sA kuravaka\-mukulena || 3||
dhR^ita\-bahuvidha\-maNi\-mukuTa\-vareNa |
luThati na sA pika\-raNita\-bhareNa || 4||
aruNa\-kiraNa\-nibha\-mR^idu\-vasanena |
jvalati na sA viharaNa\-vipinena || 5||
kisalaya\-sahachara\-kara\-yugalena |
vahati na sA shramabhara\-manilena || 6||
bhramarita\-sura\-kacha\-pada\-jalajena |
dravati na sA kaThina\-hR^idayajena || 7||
rasa\-jita\-sudha\-mR^idu\-tama\-vachanena |
dalati na sA suma\-tati\-shayanena || 8||
vishvanAtha\-kavi\-kR^ita\-rachanena |
guha iha vishatu sahR^idaya\-manena || 9||

shlokau \-

mandAnila tvaM madanAntakAtmaja\-
chChAtrAdri\-jAto.asi na sAmprataM tava |
mitratva\-mAshritya manobhuvo mayi
klesha\-pradAnaM guha\-gAmi\-chetasi || shlo\. 49|| (indravaMshaM \- 12)

vallI shochyatamAM gatAdya vipine.avasthA\-matanvAtapAt
pramlAna\-prasavA.anavApya luThati sthANva~NgajAshleShaNam |
pAtvAkarNya surarShi\-bhAShitamidaM paurandarIM va~nchayan
bAlAM nAgariko bruvan vanalatAM rakSheti senApatiH || shlo\. 50|| (shArdUla\-vikrIDitaM \- 19)

iti shrIvishvanAthakavi\-kR^itau shrIgItagA~Ngeya\-kAvye vipralabdhA\-varNane nAgarika\-senApatirnAma saptamaH sargaH |

\section{aShTapadI \- 17}
shlokaH \-

kathamapi rajanImatha vyatItya smara\-dalitA.api purogataM nishAnte |
guha\-manunaya\-kAriNaM nirIkShya praNaya\-ruShA sphuradoShTha\-mAha vallI || shlo\. 51|| (puShpitAgrA \- 12,13)

aShTapadI \- 17 (Arabhi rAge Adi tAle gIyate)

rajani\-kalita\-satatAsama\-shara\-raNa\-jAgarato.aruNimAnam |
vahati tavekShaNa\-yugamaruNAmbuja\-miva vikasita\-matimAnam || 1||

pallavI
chArunAyaka chArusAdhaka yAhi vidhehi na vAdam |
prINaya tAM giri\-rAja\-sutA~Ngaja yA tava janayati modam ||

prathayati tava kR^ita\-chitraka\-kucha\-yuga\-lA~nChana\-murasi vishAle |
kuvalaya\-nayanA\-dR^iDha\-parirambhaNa\-sambhrama\-rasa\-manukUle || 2||
mukhamapi tAvaka\-manusarati priya\-janaka\-saku~Nkuma\-shoNam |
sAndhya\-payodhara\-ra~njita\-manishita\-kara\-mavikala\-parimANam || 3||
rada\-pada\-bhUShita\-bhavadadharo.ayaM phalitamiva lasati bimbam |
keli\-shukI\-mukha\-sarabhasa\-virachita\-nibiDita\-chihna\-kadambam || 4||
uDupati\-gaNamiva karaja\-padAvali\-ma~nchati tAvakama~Ngam |
haridupala\-sarachChavi\-haritAbhaM sArava\-mamita\-tara~Ngam || 5||
sutanu\-dR^iga~njana\-ra~njita\-sammada\-jala\-lavakaM tava chelam |
jayapaTa\-manuharati makara\-ketoH maShi\-likhitAkShara\-jAlam || 6||
sphuTayati tava pada\-kamala\-yugaM gamanAlasa\-metadapAram |
samuchita\-bandhana\-shata\-lasitAdbhuta\-surata\-mahotsava\-sAram || 7||
tAmupayAhi chirAyasa iha yadi, yA bhavadabhimata\-yoShA |
roSha\-yutApi bhavedanupadamapi bhavadanunaya\-kR^ita\-toShA || 8||
vishvanAtha\-kavi\-bhAShita\-midamiha vibudhajanA anuvAram |
khaNDita\-rati\-taruNI\-kR^ita\-vachanaM kuruta giri saparivAram || 9||

shlokau \-

mukhaM te pashyantyAH sarada\-pada\-dantachChadamapi
prarUDhorojA~NkaM kitava bhujayorantaramapi |
mamAbhU\-dAmodaH kShaNa\-virahitAM tAmanunayeH
namaste.astu svAminnala\-mahR^idayaiH chATu\-nichayaiH || shlo\. 52|| (shikhariNI \- 17)

vallI\-ShaDvadanau vilokya hasati prAtaH sakhInAM gaNe
mudrAvarNa\-suvarNa\-ka~NkaNa\-gaNAgAdhA~Nka\-kaNTha\-sthalau |
vallIM namramukhIM vishAkha urasA dhR^itvA vilakSho.antaraM
nItvA svonnamitaitadAsya\-kamalAmodotsukaH pAtu naH || shlo\. 53|| (shArdUla vikrIDitaM \- 19)

iti shrIvishvanAtha\-kavi\-kR^itau shrIgIta\-gA~Ngeya\-kAvye khaNDitA\-varNane vilakSha\-vishAkho nAma aShTamassargaH |

\section{aShTapadI \- 18}
shlokaH \-

kusuma\-sharAsana\-dUnAM rati\-sukha\-hInAM navAgasA dInAm |
dhR^ita\-mada\-kalahAdhInA\-majahan\-maunAM sakhI jagAdainAm || shlo\. 54|| (AryA 12\-18)

aShTapadI \- 18 (yadukula\-kAmbhoji rAge, Adi tAle gIyate)

guha\-mupanata\-miha chira\-mabhilaShitam |
kalaya nayana\-viShayaM dhuri vinatam || 1||

pallavI
ShaNmukhe mA bhava bhAmini roSha\-yutA ||

sakhi tava sumadhura\-madhurasa\-sadanam |
kathamiva vitathayasi radana\-vasanam || 2||
taruNima\-valgita\-murasija\-yugalam |
saphalaya sa~Ngata\-pati\-kara\-kamalam || 3||
tava madhu\-pavana\-chalA tanu\-retam |
shliShyatu jagadavalambana\-bhUtam || 4||
kiM kuruShe sarale sati mAnam |
maunamapi dharasi katha\-manidAnam || 5||
visR^ija ruShaM sR^ija harShaja\-vAShpam |
sukhaya sharaja\-mapi shakalita\-bAShpam || 6||
pavana\-chapala\-sarasIruha\-nayane |
dhavamupasara mR^idu\-kisalaya\-shayane || 7||
anunaya\-vachana\-vidhAyina\-menam |
jIvaya virachaya moda\-nidhAnam || 8||
vishvanAtha\-kavi\-bhAShita\-gItam |
muditamidaM rachayatu budha\-jAtam || 9||

shlokau \-

AyAsI\-dAyatAkShi prasava\-shara\-samo vIpsayA prepsito yaH
pashyAvashyAya\-shubhrAM tanumapi virahAdasya rasyA tvameva |
shrutvA yuktaM maduktaM vachana\-mati\-hitaM prINayeH prANanAthaM
bhogyaM bhAgyaM vihAtuM sakhi samupanataM sAmprataM sAmprataM kim || shlo\. 55|| (sragdharA \- 21)

sevA\-sakta\-purandarAdi\-diviShat\-sImantinI\-kandharA\-
nR^ityan\-ma~NgaLa\-sUtra\-dArDhy\-karaNAsakti\-prashastodyamAm |
AptyAnIta\-vinIta\-vIra\-nikara\-prakrAnta\-sambhAvanAM
shaktiM pANi\-tale dharan vanacharI\-mugdho vidadhyAchChubham || shlo\. 56|| (shArdUla\-vikrIDitaM \-19)

iti shrIvishvanAtha\-kavi\-kR^itau shrI\-gItagA~Ngeya\-kAvye kalahAntaritA\-varNane mugdha\-shaktidharo nAma navamassargaH |

\section{aShTapadI \- 19}
shlokaH \-

tAM sundarIM tadanu lakShaNa\-sUchitAgAH
utkampita\-stana\-mudashru cha dUyamAnAm |
nishvAsa\-vAta\-chapalI\-kR^ita\-kAnanAntAM
svAmI sagadgadamidaM vachanaM babhAShe || shlo\. 57|| (vasantatilaka\-14)

aShTapadI \- 19 (mukhAri rAge, jhampa tAle gIyate)

taruNi mayi dAruNa\-mahetuka\-ruShAruNaM, nahi vikira tava nayana\-koNam |
ayamiha samIhate shrita\-karuNa\-mIkShaNaM, tAvaka\-jano madana\-shoNam || 1||

pallavI
hite sAdhurIte | valli mayi mA.abhinaya kopam ||
vahati madhu\-mArute mama manasi jAyate | kA.api gatirupashamaya tApam ||

kimiti chalitAdharaM lulita\-kabarI\-bharaM, parigalita\-bAShpa\-rasa\-dhAram |
tiShThasi samAkulA kimuchita\-midaM bruve, tyaja shoka\-mima\-mati\-gabhIram || 2||
madhura\-vachanena sudhayA sama\-tureNa tava jIvaya sumeShu\-kR^isha\-rUpam |
vahasi karuNAvati na ki~nchidapi nAyake mayi tapati sAttva\-manutApam || 3||
mantu\-mabhisha~Nkase yadi ramaNi mAmakaM, tathyamevAkalaya daNDam |
bhuja\-yugala\-pariNahana\-mAchara kalevare, shikhari\-rada\-lekha\-madhituNDam || 4||
kuru lalita\-rashanayA maNi\-ghaTitayA sahe, prahati\-mayi dhIra\-madhideham |
bhaya\-pishAchaka\-palAyana\-kR^ite mantriNo, vetra\-latikA\-hati\-mivAham || 5||
madana\-vishikhAhati\-vraNa\-nikara\-nibiDitaM, kroDatala\-mAshrita\-nidAgham |
sukhaya kalayantyachira\-kR^ita\-kucha\-niveshanaM, gADha\-parirambhaNa\-mamogham || 6||
ghaTaya maNi\-kuNDale shravaNa\-yugale sumukhi, nUpuramapi praNaya pAdam |
mukharaya cha mekhalAM sarabhasa\-samAgame, modaya nivAraya viShAdam || 7||
kara\-sarasijena te parimalaya vapuridaM malayaja\-rasena kR^ita\-sekam |
mama mukhaM vITikA\-ghumaghumita\-mAkalaya, shItalaya mAnasa\-mashokam || 8||
shrIvishvanAtha\-kavi\-bhaNita\-magajA\-bhuvo, vallikAM prati vachana\-vR^indam |
guha\-bhajana\-para\-rasika\-janamano\-modakaM, jayatu bhuvi peshala\-mamandam || 9||

shlokAH \-
sutanu visR^ijA.a.asha~NakAM kiM kAtarAsi mayi sthite
satatamapi me vallI bhillIti bhAnti giro mukhe |
hR^idaya\-sadane tvanyA kanyA na vAsa\-mupeyuShI
tadalamiyatA vAmaM kAmaM pramodaya mAmapi || shlo\. 58|| (hariNI \- 17)

kuvalaya\-nayane tavAnatA bhrUH
sumashara\-kArmuka\-daNDa eva tasmAt |
abhihatamuditaiH kaTAkSha\-bANaiH
adhara\-sudhAsvarasena jIvayermAm || shlo\. 59|| (puShpitAgrA 12,13)

prANAdhIshvari vIkShase tva\-madharA.a.alokAbhilAShA\-dhare
vishvAsAnuvidhAyake mayi paraM shvAsAn sR^ijasyAyatAn |
prAptA yat paruShatvamapyaparuShe.ana~Nga\-prasa~Ngodyate
yuktaM tvA\-manusR^itya vachmi tanuyA a~NgAnuSha~Ngodyamam || shlo\. 60|| (shArdUla\-vikrIDitaM \-19)

keyaM nAtha mahendraje shabarajA kiM nAma vallI priye
kiM kAryaM tava sevanaM kimu phalaM sApatnya\-mityUhyate |
tatkiM te.abhimataM kathaM bhavadabhiprAyo nirasyo haThAt
evaM prashna\-saduttareShu chaturaH ShANmAturaH pAtu naH || shlo\. 61|| (shArdUla\-vikrIDitaM \-19)

iti shrIvishvanAtha\-kavi\-kR^itau shrIgIta\-gA~Ngeya\-kAvye mAninI\-varNane chatura\-ShANmAturo nAma dashamassargaH |

\section{aShTapadI \- 20}
shlokaH \-

atha sharavaNa\-jAte sAntvayitvA.a.atmabandhuM
gatavati rati\-sajje ramya\-ku~njaM rahasyam |
rachita\-vividha\-bhUShAM vallikAM kAchidAlI
sati rajani\-mukhe tAM sAdaraM prAha vANIm || shlo\. 62|| (mAlinI \- 15)

aShTapadI \- 20 (kalyANI rAge, chApu tAle gIyate)

atimR^idu\-pallava\-shayana\-yutaM shrita\-va~njula\-mUla\-vibhAgam |
komala\-ku~njagR^ihaM bhavatIM pratipAlya gata\-matula\-rAgam || 1||

pallavI
ramye shivatanujaM valli | upagata\-mupachara valli ||

chalita\-dalai\-rapyabhisR^iti\-ku~nja upAhvayatIva sarAgam |
ali\-ninadai\-rabhisara gurujaghane mAmavalambya savegam || 2||
bhavadabhisaraNa\-vibodhikayA sakhi pika\-gaNa\-nAda\-vidIrNam |
haMsaka\-kalakala\-rava\-sudhayA paripUraya nAyaka\-karNam || 3||
sharavaNa\-januShe sakhi vinivedaya malaya\-samIra\-kishoram |
bhavati nikaTake sukhayati mAmiti sAnubhavaM sukha\-pUram || 4||
tava galanAda\-sahodara\-kalagala\-madhura\-ninAda udAre
janayatu modamupAgata\-manmatha\-kAhala\-ravava\-dadUre || 5||
rati\-kalahe jaya pati\-maparAdhina\-madhika\-sukhena bhujAbhyAm |
bandhana\-malaghu vidhAya nipIDya cha kalpa\-latA\-sadR^ishAbhyAm || 6||
kucha\-kumbha\-yugaM raya\-gati\-vighna\-mihAcharati prasabhaM te |
tadanubhavatu dR^iDha\-nishita\-nakhA~Nkusha\-mukha\-dalanaM tava kAnte || 7||
adhara\-rasaM paripAyaya nAthaM tiraya sudhA\-rasa\-chintAm |
anunaya\-chATu\-shatena vayasye visR^ija sudUra\-mahantAm || 8||
vishvanAtha\-kavi\-bhaNitamidaM shivabhava\-pada\-bhakti\-nidAnam |
vilasatu vibudha\-mukhAmburuhe chira\-mati\-madhura\-rasa\-nidhAnam || 9||

shlokAH \-

AgachChet priyanAyikA.adya kushalaM pR^ichChet prayachChechcha sA
gADhAli~Ngana\-ma~NgamutpulakatAM gachChedidaM mAmakam |
itthaM dhyAyati pashyati pralapati bhrAmyatyasau gAyati
pratyeti priyametya ma~njula\-vachaH\-pu~njaiH sukhaM prApayeH || shlo\. 63|| (shArdUla\-vikrIDitaM \-19)

kastUrI\-tilakAyate.adhiniTilaM karNe.asitAbjAyate
netrAmbhoja\-yuge.a~njanAyata iyaM gADhA tamaHsantatiH |
kaNThe nIla\-sarAyate kaTi\-taTe shyAmAya\-chelAyate
sAhAyyAt smara\-shAsitA.ambuja\-dR^ishA\-mAnanda\-kandAyate || shlo\. 64|| (shArdUla\-vikrIDitaM \-19)

gADhAndhakAramapi chetana\-jAla\-dR^iShTeH
sa~nchAra\-lopa\-karaNe dR^iDha\-baddha\-kachCham |
siddhA~njanaM vitanute hyabhisArikANAM
AshcharyameSha madanAbhidha\-vaidyarAjaH || shlo\. 65|| (vasantatilakaM \- 14)

\section{aShTapadI \- 21}
shlokaH \-

vaktrendu\-mandasmita\-chandrikAbhiH
dhvastAndhakAre sthitamatra ku~nje |
dvAri sthitA vIkShya guhaM salajjAM
vallIM sakhI prAha saharShamevam || shlo\. 66|| (upajAti \- 11)

aShTapadI 21 (ghaNTA rAge, jhampa tAle gIyate)

keli\-kalanochita\-niku~nja bhavane |
iha vihara dara\-hasita\-vashita\-kamane || 1||

pallavI
sukhaya bAle somadhara\-sUnum |

madhukara\-nikara\-rachita\-madhura\-gAne |
iha vihara gati\-vijita\-haMsa\-yAne || 2||
sarasa\-mR^idu\-kusuma\-chaya\-ruchira\-shayane |
iha vihara rasa\-sadana\-surabhi\-vadane || 3||
sundara\-maranda\-rasa\-lahari\-shIte |
iha vihara vipinachara\-nR^ipati\-jAte || 4||
madhu\-pavana\-ghaTita\-suma\-surabhi\-pUre |
iha vihara madhu\-vijayi\-vachana\-sAre || 5||
taruNa\-shuka\-pika\-nikara\-kalita\-rAve |
iha vihara kapaTa\-guNa\-rahita\-bhAve || 6||
sarala\-kisalaya\-nichita\-dR^iDha\-vitAne |
iha vihara mukha\-milita\-madhurapAne || 7||
madana\-shara\-janita\-dara\-dalana\-dhIre |
iha vihara jalada\-nibha\-chikura\-bhAre || 8||
shrIvishvanAtha\-kavi\-kathita\-gAnam |
kuruta vadanAmbuje kushala\-dAnam |
bhajata rasikAH satatamIshamenam | 9||

shlokaH \-

bAle tvatpratipAlake dR^iDha\-parIrambhotsuke ShaNmukhe
krUraiH kausuma\-kArmukaiH shara\-gaNaiH santApita\-svAntare |
prema\-dyotaka\-mandahAsa\-laharI bhUyAt tavAhlAdinI
keyaM bhItiriha tvadeka\-sharaNe nishsha~Nka\-ma~NkaM bhaja || shlo\. 67|| (shArdUla\-vikrIDitaM \- 19)

\section{aShTapadI \- 22}
shlokaH \-

tataH sasAdhvasaM vallI saharShaM cha latA\-gR^iham |
prAvishat ShaNmukhAsthAnaM raNan\-madhura\-nUpuram || shlo\. 68|| (anuShTubh \- 8 )

aShTapadI 22 (madhyamAvatI rAge, Adi tAle gIyate)

vallI\-vadana\-vilokana\-vikasita\-sarasa\-vilochana\-bhAjam |
hradamiva himakara\-darshana\-phulla\-samadhu\-rasa\-nIla\-sarojam || 1||

pallavI
girijA\-tanujaM samudita\-madana\-vikAsam |
AsasAda sama\-hArda\-masau guru\-muda\-madhi\-ku~nja\-nivAsam ||

vidruma\-sampuTa\-vinihita\-mauktika\-maNi\-nikaramiva dadhAnam |
dara\-hasita\-sphuritAdhara\-lasitaM radagaNa\-madhika\-vibhAnam || 2||
shikhara\-virAjita\-jalada\-pariShkR^ita\-kanaka\-dharAdhara\-shobham |
masR^iNa\-shiroruha\-bhAra\-vibhAsura\-shirasamimaM mihirAbham || 3||
marakata\- tilaka\-dyuti\-valita\-bhrU\-maNDita\-ma~njula\-phAlam |
navajala\-bharita\-taTAka\-miva krama\-taTa\-sa~Ngata\-shuka\-bAlam || 4||
hIra\-maNI\-maya\-kuNDala\-kAntyanu\-ra~njita\-ma~nju\-kapolam |
kokanadopari\-sa~Ngata\-dhavalachChada\-kamalAkara\-lIlam || 5||
tarala\-tarala\-bahu\-vimala\-maNi\-nichaya\-kalita\-manohara\-hAram |
anukR^ita\-vAta\-chalad\-bahu\-budbuda\-shoNa\-nadAmbu\-vihAram || 6||
bibhrata\-madhikaTi kAnaka\-tantu\-vinirmita\-chitrita\-chelam |
sandhyA\-kAla\-payoda\-miva sphuradindra\-dhanU\-ruchi\-jAlam || 7||
a~Ngada\-ka~NkaNa\-bhUShita\-bhujayuga\-madbhuta\-gAtra\-nivesham |
samadana\-chala\-kara\-sUchita\-dayitA\-kucha\-vahanAbhinivesham || 8||
valyAlokaja\-nijamudamapi tad\-vachana\-samaya\-madhidhAtum |
shruti\-nikaTa\-gatAM dR^isha\-mabhidadhataM ruchi\-jita\-suma\-shara\-ketum || 9||
vishvanAtha\-kavi\-virachita\-midamapi gIta\-masheSha\-budhAnAm |
bhavatu mudAvaha\-manavarataM priya\-shivasuta\-charita\-sudhAnAm || 10||

shlokAH \-

salIlaM gachChantyAH chakita\-chakitaM bhartR^i\-savidhaM
mukhenduM pashyantyA amita\-mudito bAShpa\-visaraH |
smara\-mlAnaM nAthaM snapayitu\-miva prApta\-samayaM
ravi\-glAnaM chandropala\-jalabharo.adrestaTamiva || shlo\. 69|| (shikhariNI \- 17)

prachaNDAmartyAri\-pramathana\-samuchchaNDa\-vibhavaH
sasauhArdaM putryA tridasha\-nR^ipateshchumbita iha |
yadIyo dordaNDo jaya\-kamalayA.amaNDyata sadA
sa me subrahmaNyaH kalayatu kalA\-kaushalamayam || shlo\. 70|| (shikhariNI \- 17)

kutra tvaM valli yAtA sahachari kumarI\-tIrthametat kimarthaM
snAtuM pAtuM cha yuktaM katha\-maya\-madharaH sakShataH matsya \-daMshAt |
mAyI yAtaH sahAyaH kva tava sajaraThaH kutra vetyUrNuvANAM
sAnandaH skandadevo vitaratu kushalaM vIkShya sAkUta\-metAm || shlo\. 71|| (sragdharA \- 21)

iti shrIvishvanAtha\-kavi\-kR^itau shrIgItagA~Ngeya\-kAvye vallikA\-milane sAnanda\-skandadevo nAma ekAdashaH sargaH |

\section{aShTapadI \- 23}
shlokaH \-

tadanu sahasA yAte kAryachChalena sakhIjane
sadara\-madhara\-snigdha\-sphIta\-smitArdra\-natAnanAm |
kusuma\-shayane nyastApA~NgA\-mana~Nga\-vashaMvadAM
sharavaNabhavo vAchaM prAha priyAM sakutUhalam || shlo\. 72|| (hariNI \- 17)

aShTapadI \- 23 (nAdanAmakriyA rAge, Adi tAle gIyate)

vikasita\-suma\-shayane mama sundari kalaya tava mR^idula\-pAdau |
idamapi mArdava\-guNamadhilabhatAM sparshana\-maNyavibhedau || 1||

pallavI
kuru sahasA gaurI\-sutam | ati\-sukhayujamayi mAM vallike ||

tyaja nahi kashchidihAsti suhAsini nayana\-nimIlanamevam |
pashya vilajjamupAgata\-madhika\-priya\-matishayita\-vibhAvam || 2||
vadana\-saroruha\-tallaja\-nirgala\-damR^ita\-rasena nitAntam |
madhukara\-miva padmini mAM prINaya manasija\-shara\-hati\-tAntam || 3||
apahara ka~nchuka\-mardha\-vipATita\-murasija\-gUhaka\-menam |
vighaTaya tApa\-muroja\-yugaM hR^idi mama viniveshya supInam || 4||
shlathayitu\-maMshuka\-michChati dayite viraha\-gada\-miva jano.ayam |
urarIkuru mAmaka\-nAthana\-miha jIvaya mA\-masahAyam || 5||
madanaja\-kampana\-chala\-ghana\-jaghanaka\-chala\-rashanA kala\-rAvam |
ghaTayitu\-mabhilaShitaM mama tanute sAntvanamiva bhaja bhAvam || 6||
atidUrA.a.agati\-khedayutaM tava charaNayuga\-mativaheyam |
gala\-dara\-niHsR^ita\-maNi\-mathita\-shrama\-kaNa\-nikara\-mapanayeyam || 7||
manasija\-jaya\-dundubhi\-ninadAyita\-maNita\-ravaiH kR^ita\-modam |
hasita\-sudhArasa\-vachana\-kadambai\-rapanaya mAnasa\-khedam || 8||
vishvanAtha\-kavi\-nigaditamidamiha vishadita\-ShaNmukha\-toSham |
viharatu kaNThatale.akhila\-viduShAM virachita\-bahu\-paritoSham || 9||

shlokAH \-

sA dhUnoti karau saka~NkaNa\-jhaNatkAraM jighR^ikShau priye
vegAdAsya\-sudhAM karotyapi tirashchInaM pipAsau mukham |
mA mA meti cha bhAShate haTha\-samAshleShaM chikIrShau giraM
puShNAtyasya tathA.api sammadamidaM kAmasya lIlAyitam || shlo\. 73|| (shArdUla\-vikrIDitaM \- 19)

udyuktA dayitaM vijetu\-madhunA saumeShave sa~Ngare
dorvallI\-dR^iDha\-bandhanAnyati\-dR^iDhoroja\-dvayAsphAlanam |
tIkShNAgrai\-rdashanai\-rnakhaishcha dalanaM chakre tathApya~njasA
shrAntaiShA hyabalAtva\-mutpala\-dR^ishAM yuktaM kuto.astvanyathA || shlo\. 74|| (shArdUla\-vikrIDitaM \- 19)

keshA AkulitAssrajo vigalitAH svidyan\-mukhAmbhoruhaM
shvetA dantapaTI shlathA bhujalatA nishcheShTitau cha stanau |
shoNA netrayugI nakha\-kShata\-parikliShTaM cha valyA vapuH
tAmAdAya tathA.api mohanakarIM dorbhyAM nananda prabhuH || shlo\. 75|| (shArdUla\-vikrIDitaM \- 19)

\section{aShTapadI \- 24}
shlokaH \-

atha vallI rati\-rabhasa\-shrAntA saprema\-vachana\-mida\-mUche |
sAnandaM shivasUnuM mandaM mandaM maranda\-rasa\-ruchiram || shlo\. 76|| (AryA 12\-18)

aShTapadI \- 24 (ma~Ngalakaushika rAge, eka tAle gIyate)

priya shivasambhava ! lambaya mR^igamada\-chitraka\-matrapa\-meva me
vadana\-tale vimale madhukara\-miva puShkara\-puShpa\-manorame || 1||

pallavI
shivanandane shubha\-mAnasA khelati | kathayAmAsa sA ||

adharamimaM mama nirmita\-yAvaka\-lepaja\-rUpa\-vibhAsuram |
kalaya nirantara\-dantapadaM tava sarabhasa\-meva sahAdaram || 2||
ghana\-nibha\-chikura\-kulaM mama maNDaya keli\-kalA\-marudAkulam |
bahuvidha\-kusumita\-suma\-tati\-kR^ita\-chapalAyita\-mAlikayA.atulam || 3||
pratanu sumukha\-savisheSha\-visheShaka\-mati\-nibiDorasija\-dvaye |
hima\-ghanasAra\-paTIra\-rasena mata~Ngaja\-kumbha\-taTAdvaye || 4||
adhikaTi yojaya me jayashakti\-dhara svaya\-mutsvana\-mekhalAm |
harita\-paTopari tR^iNa\-tati\-gata\-harigopa\-guNAvali\-ma~njulAm || 5||
AkalayA~njana\-ra~njanamAshrita\-ka~njana\-bha~njana\-naipuNe |
pramada\-nirargala\-nirgaladashru\-nisarga\-visarga\-yujIkShaNe || 6||
ka~NkaNa\-ma~Ngada\-sa~Ngata\-miha kuru mama chatureNa kareNa te |
bAhau guchCha\-lasachChavi\-rajya\-dashoka\-bhR^ishopama Ayate || 7||
shravasi cha kuNDala\-maNDala\-maNDana\-murasi vilAsaya mAlikAm |
rati\-viShamaM cha samaM sakalaM kuru mama paripAlaya nAyikAm || 8||
vishvanAtha\-kavi\-virachita\-muchitaM priyashiva\-sambhava\-sa~Nkathe |
lasatu rasajuShAM chetasi viduShAM pUrNa\-purANa\-manorathe || 9||

shlokAH \-

atha sa karuNA\-sindhuH bandhuH pulinda\-tanU\-bhuvo
vyarachaya\-dayaM dakSho vakShoruhe makarIkriyAm |
hR^idi parikarodAraM hAraM raNan\-maNi\-nUpuraM
ruchira\-vasanaM netre shrotre.a~njanaM maNi\-kuNDalam || shlo\. 77|| (hariNI \-17)

udyan\-mAnmatha\-janya\-janya\-chalana\-sthAnA vibhUShAH punaH
sauhArdena samaM vanechara\-bhuvi svAmI pratiShThApayan |
prAptaitatpriya\-bAndhavAnumatirapyenA\-mudUhyAnayA
prApya skandagiriM sutAM surapatestanvan dadAtu shriyam || shlo\. 78|| (shArdUla\-vikrIDitaM \- 19)

madhuramiti marandaM phANitaM chekShusAraM
madhu\-rasamapi dugdhaM manyatA\-manya eva |
guha\-bhajana\-parANAM sAra\-sa~NgrAhakANAM
ati\-madhuramidaM syAd\-gIta\-gA~Ngeyameva || shlo\. 79|| (mAlinI \- 15)

sakAruNyaH pAyAt smara\-vijayi\-lAvaNya\-jaladhiH
taruNyAshliShTA~NgaH sura\-pariShadagraNyabhinataH |
sharaNyo lokAnAM tridasha\-muni\-paNyAmita\-guNaH
sa mAM subrahmaNyaH shikhi\-giri\-vareNyAgra\-sadanaH || shlo\. 80|| (shikhariNI \- 17)

vallI\-sasmita\-kAma\-manthara\-chalApA~Nga\-prabhAmaNDalI\-
vyAkochArjuna\-mechakotpala\-sara\-bhrAjachChirodhiH sadA |
suprItassuma\-shekharasya tanujo.asmAkaM sva\-bhakteShTa\-kR^it
subrahmaNya udAra\-ma~Ngala\-nidhiH sampAdayen\-ma~Ngalam || shlo\. 81|| (shArdUla\-vikrIDitaM \- 19)

ramyaM shrIvishvanAthaH kaviravadadidaM gItagA~Ngeya\-kAvyaM
shrImat\-kAnADu\-kAttAn puravarasadanaH shAbdikaH skanda\-bhaktaH |
gR^ihNantaH skanda\-bhaktAH mudamapi paramAM te.api vindantu gAnAt
puShTiM dArDhyaM cha bhaktiM shriyamati\-bahulAM santataM prApnuvantu || shlo\. 82|| (sragdharA \- 21)

iti shrIvishvanAtha\-kavi\-kR^itau shrI\-gItagA~Ngeya\-kAvye
svAdhIna\-bhartR^ikA\-varNane suprIta\-subrahmaNyo nAma dvAdashassargaH |

iti shrInavasAla\-rAjadhAnI\-virAjamAna\-shrIgokarNa\-kShetravara\-
sannihita\-shvetanadItIra\-bAbhAsyamAna\- shrIshivapura\-agrahArAbhijanasya,
kAnADu\-kAttAn\-nagarI\-nivAsinaH, shrIrAmasubrahmaNya\-sudhIndrasUnoH,
shrIbAlAmbikA\-garbhashukti\-shauktikeyasya, shAbdikasya,
shrImad\-rAmAyANAdi\-tatva\-vivechakasya,
shrIvishvanAthakaveH kR^itiShu, shrI gItagA~Ngeya\-kAvyaM sampUrNam ||

##

Notes :
1. In every Ashtapadi, the Pallavi is sung after every stanza, as a refrain.
2. Hyphens are added just to make the text easier to read
     - between the words that make up the Samasas or compound words
     - between words that are combined due to Sandhis.
     If the latter word in the Sandhi starts with a vowel, the
     letter after the hyphen would be the last consonant of
     the first word. Eg. ##bhajatA\-maroga## should be read
     as ##bhajatAmaroga##
3. The mUlam with additional notes for greater understanding
     is given in a separate file.

\chapter{Kaanaadukaathaan Sri Vishvanatha Kavi}
Kaanaadukaathaan Sri Vishvanatha Kavi, the author of Gita Gangeyam : A short life-sketch 

Amongst the many books inspired by Gita Govindam of Jayadeva, some of the well-known ones are Rama Ashtapadi, and Shivageetimaalaa. These celebrate Rama and Sita, and Shiva and Parvati as the hero and heroine of their work, respectively. One of the recent additions to such works, is the Gita Gangeyam, which has been written in the first half of the 20th Century, CE.

The author of this work is Sri Vishvanatha Kavi, who resided in Kaanaadukaathaan and in  Kundrakudi, in Tamil Nadu, India. He was born circa 1890 CE, and lived till around the age of sixty. His parents were Sri Ramasubramanya Sarma and Balambal, and they were residents of the Shivapuram Agraharam, in Srigokarnam. Srigokarnam (Tirugokarnam in Tamil) is  an important temple in Pudukottai, and Goddess Parvati, known there as Brhadamba, is the tutelary deity of the Tondamaan kings who ruled from Pudukkottai in the past few centuries. The Kavi’s family worshipped Lord Subrahmanya in Vaideeswaran Koil, and later in Kumaramalai (a small hill shrine near Pudukkottai) as their family deity. Later when he started residing in places around Kundrakudi, the family embraced Lord Subrahmanya of Kundrakudi as their chosen deity. In fact, he has composed Gita Gangeyam in praise of Lord Subrahmanya of Kundrakudi, which is also known as Mayuragiri. He has used synonyms for the place, such as Shikhi-shaila, Mayura-bhudhara etc. in the work.

Sri Vishvanatha Kavi completed his studies in the Vedas and became a Ghanapaathi. He was an Adhyaapaka (instructor) of the Vedas in the Vedapathashala in a village called Uyyakkondaan Siruvayal (now known as O. Siruvayal). He was also well-versed in the Valmiki Ramayana and used to conduct discourses on the Ramayana. In the Tamil month of Aippasi (Ashvayuji), he also held readings of the Tulaa Puraanam, which extols the greatness of River Kaaveri. Apart from these, he was also a Shaabdika (grammarian), who could perform Ashtaavadhaanam in Vyaakarana (i.e. he could pay attention to and respond to eight different kinds of queries simultaneously posed to him regarding grammar). He was also devoted to his spiritual routine and would not eat until he completed his Shiva Panchaayatana Puja everyday. He had great devotion towards Mahasvami of Kanchi, as well as towards Kutraalam Mouna Svami, whose Math he would occasionally visit and spend a month or so in.

Family members of Sri Vishvanatha Kavi recall that when they later went to have Darshan, Kanchi Mahasvami told them about him, and enquired if they had learnt anything from him. It is also said that the Mahasvami directed some people with doubts in some texts to Sri Vishvanatha Kavi for clarifications.

About fifty years ago, the family (then living in Thirumeyyam) had a visitor from the French Institute of Puducherry, who wanted to collect the works of Kavi. When they searched the ancestral house in Kundrakudi, the room was seen to be invaded by termites. The few available manuscripts were taken by the visitor to the French Institute. Those works were in the Grantha script, it is said. As of now, the only work available to us is the Gita Gangeyam.

Sri Vishvanatha Kavi was married to Smt. Meenakshi. Having no children, the couple adopted his brother’s son Sri Ramanathan. Sri Ramanathan completed his Vedic studies upto Ghana, and also mastered South Indian Classical music, having taken lessons from Sri Kottaiyur Ramachandra Bhaagavatar. Sri Ramanathan’s younger son Sri Meenakshisundaram is a musician and music teacher, and his son, Sri Kundrakudi M. Balamuralikrishna is a well-known vocalist today. 

The immensely famous violinist of yesteryears, Kunnakkudi R. Vaidyanathan, also belongs to this family. His father Sri Ramaswamy was another younger brother of Sri Vishvanatha Kavi.

Sri Vishvanatha Kavi spent his later years with his son’s family in Keezha-Poongudi. Till the end he continued his teaching and discourses. He was unwell only for a week before he passed away.

The Gita Gangeyam is a short Kavya, a great work filled with charming verses, that describes the sports of Lord Subrahmanya (Gangeya) and His younger consort Sri Valli. Although modelled after Gita Govindam, it has a rare beauty of its own. It has 24 Ashtapadis ( songs with 8 stanzas) in differing rhythms and has some Shlokas before and after each Ashtapadi. These Shlokas are set in a variety of Chandas (metres) and have amazing descriptions of Nature, the heroic deeds of Subrahmanya and various nuances of the emotions of love. Many are simply sublime prayers to Him.

The book was published in 1982 by Murugan Tiruvarut Sangam of Chennai, under the guidance of musician and scholar Sri TS Vasudevan. It was made part of the Guha Bhajana Sampradaaya and published in the book of Hari-hara-guha Bhajana Sampradaaya published by Sri AK Gopalan Bhagavatar.  Later it was also published by Pranatartihara Bhajana Mandali of  Bengaluru and then by Dr P Siva of Hyderabad. Reconciling these four sources, this book has now been uploaded online in www.sanskritdocuments.org, under the Stotras of Subrahmanya. We hope many will read and appreciate this beautiful Kavya and musicians will add songs from it in their repertoire. 

Note : Some of the lesser known words have been spelt here with double a’s to aid their correct pronunciation.


Enocoded, edited, and proofread by
      Rajani Arjun Shankar rajani_arjun at yahoo.com

\medskip\hrule\obeylines

Please send corrections to sanskrit at cheerful dot c om
Last updated \today
https://sanskritdocuments.org

\end{document}