% Text title            : yAjnIyamantropaniShad.h khaNDArtha
% File name             : Ishaa\_bhaashhya\_Raghavendra.itx
% Category              : upanishhat, svara
% Location              : doc\_upanishhat
% Author                : Sri Raghavendra Swami
% Transliterated by     : Shrisha Rao <shrao at dvaita.org>
% Proofread by          : Meera Tadipatri <mtadipatri at dvaita.net>
% Latest update         : April 26, 2001
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Ishopanishad with Shri Raghavendra Swami's commentary ..}##
\itxtitle{.. IshAvAsyopaniShadi shrIrAghavendrayativirachitaH khaNDArthaH ..}##\endtitles ##

%\centerline{\Largedvng shrIrAghavendrayativirachitaH} %\centerline{\LARGEdvng shrImadIshAvAsyopaniShatkhaNDArthaH}
   OM ||  shrIprANapatimAnamya pUrNabodhAdideshikAn  |
          IshAvAsyopaniShadaH kariShyAmyarthasa~Ngraham  ||
asyA upaniShadaH svAyambhuvo manu R^iShiH |  yaj~nanAmA harirdevatA |  anuShTubAdi
yathAyogyaM Chando j~neyam |  \ldq anejad.h\rdq ityAdinA tattvaM vivaxurupadiShTaM
tattvaM adhikAriNa eva hi hR^idyavatiShThate, nAnyasya, iti etadupaniShadadhikArasiddhyarthaM
vichChinnaviShayatR^iShNatvaM tAvadAdyena mantreNa sayuktikaM vidhatte \-
%\ldq IshA\rdq iti  ||

   {\Largedvng OM IshAvAsyamida{\m+} sarvaM yatki~ncha jagatyAM jagat  |}
   {\Largedvng tena tyaktena bhu~njIthA mA gR^idhaH kasyasviddhanam  || 1||}
\ldq yatki~ncha\rdq jagadidaM tatsarvaM pravR^ittyarthaM Atmani \ldq IshAvAsyam.h\rdq |
AvAsamarhati, iti AvAsyam |  Ishasya AvAsyaM \ldq IshAvAsyaM\rdq, \lsq IshAnupraviShTam.h\rsq
ityarthaH |  \ldq tadevAnuprAvishad.h\rdq ityAdeH |  \lsq ato.asvatantram.h\rsq iti bhAvaH |
ki~ncha \ldq jagatyAM\rdq prakR^itAvidaM sarvamAshritam |  sA cha IshAyattA.ato.api
asvatantram |  Isha eva svatantraH |  tena kAraNena \ldq tena\rdq IshvareNa \ldq tyaktena\rdq
dattena vittena |  \lsq yadR^ichChAlabdhena\rsq, iti yAvat |  \ldq bhu~njIthAH\rdq bhogaM kuryAH |
\ldq kasyasvit.h\rdq kasyApi rAjAdeH sakAshAt \ldq dhanaM\rdq \ldq mA gR^idha\rdq, nA.akA~NxethAH |
\lsq IshAdanyasyAsvAtantryeNa tasya dAne sAmarthyAbhAvAd.h, Ishadattenaiva varteta\rsq
\- iti bhAvaH  || 1||

\lsq tR^iShNAvichChedavat.h, svochitakarmAnuShThAnamapi j~nAnArthinAM Avashyakam.h\rsq,
ityAha \-

   {\Largedvng kurvanneveha karmANi jijIviShechChata{\m+} samAH  |}
   {\Largedvng evaM tvayi nAnyatheto.asti na karma lipyate nare  || 2||}
\ldq shataM samAH\rdq, shataM varShANi |  \ldq kAlAdhvanoratyantasaMyoge\rdq
(aShTA\. 2\.3\.5) iti dvitIyA |  iha mAnuShAdijanmani yAvaj \ldq jijIviShet.h\rdq
jIvitumichChet tAvat \ldq karmANi\rdq \ldq kurvanneva\rdq \- \lsq AmaraNaM bhagavatpUjAtmakAni
asa~NkalpitaphalAni svochitAni karmANi sarvathA kuryAd.h\rsq iti yAvat |

kutaH\?  evaM karmANi kurvati nare manuShyamAtre.api tvayi karma pApaM na lipyate |
svochitena asa~Nkalpitaphalena karmaNA bhagavatpUjAM kurvantaM alpAdhikAriNAmapi na
prAguttarANi pApAni bAdhante |  \lsq tatashcha j~nAnAdhikArI sa bhavati\rsq iti yAvat |
itaHkarmakaraNAt \lsq anyathA akaraNe karma pApaM na lipyata\rsq iti nAsti |
\lsq bhagavatpUjAmakurvantaM pApAni bAdhanta eva |  tatashchAsau j~nAne na adhikriyate |
atashcha karmANi kuryAd.h\rsq \- iti |

puruShArthanaye, \ldq niyamAchcha\rdq (bra\.sU\. 3\.4\.7) iti sUtrabhAShyAdau
\ldq nare j~nAninyapi tvayi karma na lipyata iti nAsti\rdq iti \lsq aparoxaj~nAnino.api
karmAkaraNe muktau AnandahrAsarUpa pApakarmalepo astyeva\rsq, iti j~nAniparatayA
mantro vyAkhyAtaH  || 2||

evaM prAptAdhikAraM prati paramAtmatattvabubhutsAjananAya viparItaj~nAnino nindAyAM
Aha \-

   {\Largedvng asuryA nAma te lokA andhena tamasA.a.avR^itAH  |}
   {\Largedvng tA{\m+}ste pretyAbhigachChanti ye ke chAtmahano janAH  || 3||}
suShThu ramaNaM sUryam |  supUrvasya ramatarD.hyapratyayaH tadviruddhaM
asuryaM mahAduHkham |  asuryameShu astItyasuryAH |  arsha Adyach pratyayAnto.ayam |
mahAduHkhavattvAd \ldq asuryAH\rdq |  asuraprApyatvAd vA \ldq asuryAH\rdq |

\ldq andhena tamasAH\rdq andhayatIti vyutpattyA, nibiDAndhakAreNa ityarthaH |
\lsq AvR^itAste prasiddhA yaH\rsq iti sheShaH |  lokAstAn \ldq pretya\rdq mR^itvA
\ldq abhigachChanti\rdq |

\lsq te ka\?\rsq ityata uktaM, \ldq ya\rdq iti |  \ldq AtmahanaH\rdq \- \lsq yathAvad.h
AtmAnamaj~nAtvA vaiparItyena jAnanto, ye kechana vartante te sarve.api
abhigachChanti\rsq, iti |  \ldq nAma\rdq \- \lsq nishchitametad.h\rsq, ityarthaH  || 3||

   {\Largedvng anejadekaM manaso javIyo nainaddevA ApnuvanpUrvamarShat  |}
   {\Largedvng taddhAvato.anyAnatyeti tiShThattasminnapo mAtarishvA dadhAti  || 4||}
idAnIM paramAtmatattvamupadishati, \ldq anejad.h\rdq ityAdimantradvayena |
tatparamAtmasvarUpaM anejat |  \ldq ejR^i kampane\rdq |  \lsq akampamAnaM nirbhayatvAd.h\rsq,
iti bhAvaH |  \ldq ekaM\rdq pradhAnam |  \ldq manaso\rdq{}.api \ldq javIyaH\rdq vegavattaram |
\ldq enat.h\rdq parabrahmasvarUpaM \ldq devAH\rdq na \ldq Apnuvat.h\rdq sAkalyena na vyajAnan |
\lsq brahma tu \ldq pUrvaM\rdq anAdikAlaM svabhAvataM\rsq, iti yAvat |  \ldq arShat.h\rdq,
\ldq R^iSha j~nAne\rdq sarvaM vyajAnat |  ADAgamAbhAvachChAndasaH (ADAgamAbhAvashChandasaH) |
\ldq tad.h\rdq brahma \ldq tiShThat.h\rdq vidyamAnameva (vidyamAneva) sad \ldq dhAvato\rdq,
vegena gachChato \ldq .anyAn.h\rdq janAn \ldq atyeti\rdq atikramya vartate |
\lsq achintyashaktitvAt.h, sarvagatatvAchcha\rsq, iti bhAvaH |  \ldq tasmin.h\rdq harau
\ldq mAtarishvA\rdq mukhyavAyuH AsamantAt pAlayantIti vyutpattyA apaH karmANi |
\lsq svapreraNayA prANibhiH kriyamANAni puNyakarmANi \ldq dadhAti\rdq samarpayati\rsq
\- iti  || 4||

   {\Largedvng tadejati tannaijati taddUre tadvantike  |}
   {\Largedvng tadantarasya sarvasya tadu sarvasya bAhyataH  || 5||}
\ldq tad.h\rdq{}iti pa~nchamyarthe avyayam |  \lsq jagad.h\rsq iti sheShaH |
tattasmAt prakR^itAd hareH jagad \ldq ejati\rdq bibheti \- tat brahma \ldq naijati\rdq
na bibheti, svatantratvAd.h, iti bhAvaH |  tadu tadeva brahma dUre |  \lsq tadu tadevAntike
samIpe cha, sarvagatatvAd.h\rsq, iti bhAvaH |  tat brahma asya pramitasya sarvasyAntaH |
\lsq tadu tadeva sarvasya bAhyataH, bahirapi sarvavyApitvAd.h\rsq, iti bhAvaH  || 5||

   {\Largedvng yastu sarvANi bhUtAnyAtmanyevAnupashyati  |}
   {\Largedvng sarvabhUteShu chAtmAnaM tato na vijugupsate || 6||}
\ldq taddUra\rdq ityAdau hareH sarvabhUtAshrayatayA sarvabhUtagatatvamuktam |
tajj~nAnasya phalamAha \- \ldq yastu\rdq iti |  \ldq sarvANi bhUtAni\rdq chidachidAtmakaM
sarvaM jagat |  \ldq Atmanyeva\rdq paramAtmAshrayatvena eva astIti \ldq yastu\rdq \ldq anu\rdq
nissandehaM \ldq pashyati\rdq jAnAti |  yadvA AshritatvakramAnurodheneti \ldq anu\rdq{}shabdArthaH |
\ldq sarvabhUteShu cha AtmAnaM\rdq \- \lsq sarvabhUteShu niyantR^itayA sthitaM hariM yo
anupashyati\rsq, ityanvayaH |  tataH paramAtmasvarUpaj~nAnitvAt hetor \ldq na
vijugupsate\rdq |  \lsq svAtmAnaM goptuM nechChati, bhayAbhAvAd.h\rsq, iti bhAvaH  || 6||

etamevArthaM vivR^iNoti \-

   {\Largedvng yasminsarvANi bhUtAnyAtmaivAbhUdvijAnataH  |}
   {\Largedvng tatra ko mohaH kaH shoka ekatvamanupashyataH  || 7||}
\lsq yasminnAtmani sarvANi bhUtAni tiShThanti\rdq iti sheShaH |  sa
\ldq Atmaiva\rdq tatra sarvabhUteShu \ldq abhUt.h\rdq, \lsq anAdito vartata\rsq ityarthaH |
\lsq evam.h\rsq iti sheShaH |  evaM \ldq vijAnataH\rdq sarvAdhAratayA sarveShu
bhUteShu AtmAnaM visheSheNa jAnataH sarvatra sthitasya hareH \ldq ekatvaM\rdq
cha \ldq anupashyataH\rdq jAnataH, ko mohaH kaH shokaH\? \- na ko.api, ityarthaH  || 7||

\lsq bhagavajj~nAnamAtreNa kuto mohAdyabhAva\?\rsq ityata Aha \-

   {\Largedvng sa paryagAchChukramakAyamavraNamasnAvira{\m+} shuddhamapApaviddham |}
   {\Largedvng kavirmanIShI paribhUH svayambhUryAthAtathyato.arthAn vyadadhAchChAshvatIbhyaH }
   {\Largedvng samAbhyaH  || 8||}
\lsq sa j~nAnI paryagAt prApto.abhUt brahmA\rsq iti sheShaH |  \lsq tAvatA kathaM
shokAdyabhAva\?\rsq ityataH tadvishinaShTi, \ldq shukram.h\rdq ityAdinA |  \lsq shuchaM shokaM
rahati tyajati\rsq, iti shukraM shokarahitam |  \ldq akAyaM\rdq li~Ngadeharahitam |
\ldq avraNaM\rdq, \ldq vraNa sa~nchUrNana\rdq ityataH stoko vraNaH |  kAlena astokatvAdavraNaM
nityam |  guNairastokatvAd \ldq avraNam.h\rdq \- pUrNamityarthaH |  \ldq asnAviram.h\rdq
snAvopalaxitasaptadhAtumayasthUladeharahitam |  \ldq shuddhaM\rdq pAvitryahetuM, shuddhatvAdeva
\ldq apApaviddham.h\rdq |  tata eva hetoH pApamUlasthUlasUxmasharIrahInam |  tata eva
\lsq dehanimittashokAdishUnyam.h\rsq, iti \ldq shukram.h\rdq ityuchyate |  evambhUtaM hariM
\ldq paryagAd.h\rdq yato.ataH kAraNAchChokAdyabhAvaH |  \lsq evambhUtaharisArUpyalaxaNAM
tadgatiM gatasya shokAdyabhAvo yukta\rsq, iti bhAvaH |

\lsq nanu evamasharIrashchet.h, jagatsraShTA neti prAptam |  loke sadehasyaiva
sraShTR^itAdarshanAd.h\rsq ityAsha~NkAM nirAha \- \ldq kavir.h\rdq iti |  kaviH sarvaj~naH |
\ldq manIShI\rdq prakR^ityAdisarvamanasAM IshitR^itvAd manIShI |  etena
\lsq j~nAnAvinAbhUtadehavAn.h\rsq iti labhyate |  sa cha aprAkR^ita eva, iti prAguktaH |
tannimittashokAdyabhAvo yuktaH |  prAkR^itasyaiva taddhetutvAt |  \lsq paribhavati sarvaM
vashIkaroti\rsq iti \ldq paribhUH\rdq |  \lsq sarvato vara\rsq ityarthaH |  \lsq svayameva
paramanapexya bhavati\rsq iti \ldq svayambhUH\rdq |  sadA.ananyAshrayaH \ldq shAshvatIbhyaH samAbhya\rdq
iti pa~nchamI saptamyarthe |  anAdyanantasaMvatsareShu \ldq yAthAtathyato\rdq yAthArthyena
vartamAnAnarthAn \ldq vyadadhAn.h\rdq nirmime |  yAthAtathyata ityuktyA \lsq brahmavivartatvAdarthAnAM
na tatsR^iShTau dehAdyapexA\rsq iti chodyaM nirastam |  \ldq shAshvatIbhyaH samAbhya\rdq
ityuktyA \lsq sadA dehahInasyApi sR^iShTisamaye dehopAdAnenAstu sR^iShTiH\rsq iti chodyaM
nirastaM dhyeyam |  \lsq sR^iShT.hyAdipravAhasya anAdyanantakAlInatvAd.h\rsq iti  || 8||

   {\Largedvng andhaM tamaH pravishanti ye.avidyAmupAsate  |}
   {\Largedvng tato bhUya iva te tamo ya u vidyAyA{\m+} ratAH  || 9||}
\ldq vijAnato\rdq{}\ldq .anupashyata\rdq ityatra \lsq yathAvatparamAtmaj~nAnaM
muktihetuH\rsq ityuktam |  \lsq tajj~nAnaM mithyAj~nAnanindAsamuchchitameva
muktihetuH, na kevalam.h\rsq, ityAha \- \ldq andhaM tama\rdq ityAdimantratrayeNa |
tatra tAvadyathAvajj~nAnasyeva anyathAj~nAnanindanasya AvashyakatvopapAdanAya
anyathAj~nAnasya prAguktamasuryalokasAdhanatvamanUdya anyathAj~nAnAnindanasya
tato.adhikAnarthahetutvamAdyena mantreNochyate |  atra \ldq avidyA\rdq{}shabdena
vidyAvirodhimithyAj~nAnavAchinA tadviShayo anyathAprakAro grAhyaH |  tathA cha
avidyAM yathAvadAkArAdanyathAkAraM \ldq upAsate\rdq dhyAyanti ye, te \ldq andhaM tamaH
pravishanti\rdq \- ityuktAnuvAdaH |  \ldq ye\rdq \ldq vidyAyAM\rdq \ldq u\rdq tattvaj~nAna
eva \ldq ratAH\rdq mithyAj~nAnanindakA ityevakArArthaH |  te tato mithyAj~nAniprApya
tamaso \ldq bhUya\rdq adhikaM tamaH |  \ldq iva\rdq{}shabdasya \ldq vyaktam.h\rdq ityarthaH |
\lsq asaMshayam.h\rsq iti yAvat |  \ldq pravishanti\rdq ityanvayaH  || 9||

\lsq na kevalaM vipaxe anarthaprAptereva samyagj~nAnAsamyagj~nAnanindanayoH
kAryatvaM, kintu moxaphalasyAMshataH ubhayasAdhyatvAdapi dvayoH kAryatvam.h\rsq,
ityAhuH \-

   {\Largedvng anyadevAhurvidyayA.anyadAhuravidyayA  |}
   {\Largedvng iti shushruma dhIrANAM ye nastadvichachaxire  || 10||}
\ldq vidyayA\rdq tattvaj~nAnena \ldq anyadeva\rdq moxaikadesharUpaM phalaM prApyamAhuH
vR^iddhAH |  \ldq avidyayA\rdq \- \lsq anyathAj~nAnanindayA cha\rsq, iti yAvat |
\ldq anyadeva\rdq moxaikadeshalaxaNaM phalaM prApyamAhuH vR^iddhAH |  \ldq iti\rdq
ityevaM vR^iddhavachanasammatiyuktaM vachanaM dhIrANAM dhImatAM (shrImatAM) sakAshAt.h
\ldq shushruma\rdq shrutavantaH sma |  \ldq ye\rdq \ldq dhIrA\rdq \ldq no\rdq{}.asmAkaM moxasAdhanaM
\ldq vichachaxire\rdq vyAchachaxire |  \lsq ato dvayamapi Avashyakam.h\rsq iti bhAvaH  || 10||

etanmantrArthameva vyaktamAha \-

   {\Largedvng vidyAM chAvidyAM cha yastadvedobhaya{\m+} saha  |}
   {\Largedvng avidyayA mR^ityuM tIrtvA vidyayA.amR^itamashnute  || 11||}
\ldq vidyAm.h\rdq viShNuyAthAtmyaj~nAnam |  \ldq avidyAm.h\rdq mithyAj~nAnanindanam |
\ldq cha\rdq{}shabdAvitaretarayoge |  \lsq saha ekapuruShArthahetutvena tadubhayaM
yo veda, sa\rsq iti sheShaH |  \ldq avidyayA\rdq anyathAj~nAnanindayA \ldq mR^ityuM\rdq
duHkhAj~nAnAdyaniShTaM \ldq tIrtvA\rdq, \ldq vidyayA\rdq viShNuyAthAtmyaj~nAnena
\ldq amR^itaM\rdq AnandAnubhavalaxaNaM moxaikadeshaM, \ldq ashnute\rdq prApnoti |
\lsq aniShTanivR^ittermithyAj~nAnanindanasAmarthyalabhyatvAt AnandAnubhavasya
cha tattvaj~nAnasAmarthyalabhyatvAt daladvayayuktamoxaprAptaye, dvayamapi Avashyakameva\rsq,
ityuktaM bhavati  || 11||

   {\Largedvng andhaM tamaH pravishanti ye.asambhUtimupAsate  |}
   {\Largedvng tato bhUya iva te tamo ya u sambhUtyA{\m+} ratAH  || 12||}
\lsq mithyAj~nAnamanarthahetuH tattvaj~nAnameva muktihetuH\rsq, iti prAguktasya
vivaraNaM \ldq andhaM tamaH\rdq ityuttaramantratrayeNa kriyate |  tatrAdyasya
ayamarthaH |  \ldq asambhUtiM\rdq jagatsR^iShTerakartAraM \lsq sR^iShTikartA na\rsq ityupAsate,
ityarthaH |  \ldq sambhUtyAm.h\rdq \- \ldq u\rdq{}shabda evArtho anenAnveti |  \ldq sambhUtyAm.h\rdq
\ldq u\rdq sR^iShTikartR^itva eva ratAH |  \lsq bhagavAn sR^iShTikartaiva, na saMhArakartA\rsq,
ityupAsata ityarthaH |  prAgvadeva avashiShTasyArtho dhyeyaH (j~neyaH)  || 12||

\lsq na kevalaM vipaxe anarthasattvAdeva sR^iShTisaMhArayoH kartR^itvaM harerj~neyaM,
kintu daladvayayuktamoxopayogitvAdapi\rsq, ityAha \-

   {\Largedvng anyadevAhuH sambhavAdanyadAhurasambhavAt  |}
   {\Largedvng iti shushruma dhIrANAM ye nastadvichachaxire  || 13||}
\ldq sambhavAt.h\rdq hareH sR^iShTikartR^itvaj~nAnAt.h, \ldq asambhavAt.h\rdq
saMhArakartR^itvaj~nAnat.h, ityarthaH |  shiShTaM prAgvat j~neyam  || 13||

etanmantrArthameva vyaktamAha \-

   {\Largedvng sambhUtiM cha vinAshaM cha yastadvedobhaya{\m+} saha  |}
   {\Largedvng vinAshena mR^ityuM tIrtvA sambhUtyA.amR^itamashnute  || 14|| 1||}
\ldq sambhUtim.h\rdq sR^iShTikartR^itvaM, \ldq vinAshaM\rdq jagatsaMhArakartR^itvaM,
shiShTaM prAgvat |  \lsq sR^iShTi upalaxitAnantaguNAtmakatvaj~nAnAdAnandAnubhavaH
vinAshakartR^itvaj~nAnAt akhilakleshanivR^ittiriti ubhayarUpamoxAya
ubhayaj~nAnamAvashyakam.h\rsq, iti bhAvaH  || 14|| 1||

   {\Largedvng hiraNmayena pAtreNa satyasyApihitaM mukham  |}
   {\Largedvng tat tvaM pUShannapAvR^iNu satyadharmAya dR^iShTaye || 15||}
evamAdyamantradvayenoktadishA prAptAdhikAraM shiShyaM prati \ldq anejadekam.h\rdq
ityAdinA bhagavatsvarUpaM nirUpya, \ldq yastu sarvANi\rdq ityAdisArdhamantradvayena
tatsAxAtkAro moxaheturityuktam |  \lsq sa cha sAxAtkAro na shravaNAdimAtreNa,
kintu IshvaraprasAdena bhavatItyato anuShThitashravaNAdikenApi tatsAxAtkArArthaM
bhagavatprArthanaM kAryam.h\rsq, iti bhAvena prArthanAprakAramAha \- \ldq hiraNmayena\rdq
ityAdinA \ldq smara\rdq ityantena granthena |

hiraNmayamiva \ldq hiraNmayam.h\rdq jyotirmayam |  \lsq pibati rasAn trAyate jagad.h\rsq
iti cha \ldq pAtram.h\rdq |  tena \ldq hiraNmayena pAtreNa\rdq sUryamaNDalena \ldq satyasya\rdq
sad.hguNapUrNasya sUryamaNDalasthasya tava \ldq mukham.h\rdq |  upalaxaNaM chaitat |  vapuH
sarvadA \ldq apihitaM\rdq asti |  he \ldq pUShan.h\rdq pUrNa, \ldq puSha puShTau\rdq iti dhAtoH |
tadvapuH \ldq tvaM\rdq \ldq satyadharmAya\rdq \lsq satyaM bhagavantaM hR^idaye dhArayati\rsq iti
vyutpattyA tvad.hdhyAnAdimate bhaktAya mahyaM \ldq dR^iShTaye\rdq mama tvaddarshanArthaM
\ldq apAvR^iNu\rdq, apagatAvaraNaM kuru  || 15||

   {\Largedvng pUShannekarShe yama sUrya prAjApatya vyUha rashmIn  |}
   {\Largedvng samUha tejaH yat te rUpaM kalyANatamaM tat te pashyAmi  || 16||}
he \ldq pUShan.h\rdq, pUrNa, \ldq ekarShe\rdq sarvaviShayakatvAdinA pradhAnaj~nAnavattvahetunA
\ldq ekarShi\rdq{}shabdavAchyaH san ekarShyAkhyamunistha |  \ldq yama\rdq sarvaniyAmakatayA
\ldq yama\rdq{}shabdavAchyaH san yamAntargata |  sUribhiH prApyatvahetunA, \ldq sUrya\rdq{}shabdavAchyaH
san sUryAntargata |  \ldq prAjApatya\rdq prajApateH hiraNyagarbhasya visheSheNa prApyatayA
\ldq prAjApatya\rdq{}shabdavAchya |  \ldq rashmIn.h\rdq madIyaM svarUpaj~nAnaM \ldq vyUha\rdq vistAraya |
\ldq tejo\rdq bAhyaj~nAnaM cha \ldq samUha\rdq vistAraya \- ityarthaH | \ldq teja\rdq iti
svarUpaj~nAnam |  \ldq rashmIn.h\rdq iti bAhyaj~nAnaM vA |

tathA cha \ldq yatte rUpaM kalyANatamaM\rdq tadrUpaM te prasAdAdahaM \ldq pashyAmi\rdq, iti
AdityarashmyAdInAM apagamanAdinA tadantargatapratItyasambhavAt AdityarashmyAdiviShayaM
vyAkhyAnamayuktam  || 16||

\lsq sarvajIvottamamukhyavAyurUpapratIkasthityAdij~nAnaM Avashyakam.h\rsq, iti
bhAvena tat sthityAdikamAha \-

   {\Largedvng yo.asAvasau puruShaH so.ahamasmi  || 17||}
\ldq yo.asau\rdq \- \lsq prasiddho.asau mukhyaprANe sthita\rsq iti sheShaH |
\lsq so.aheyatvAt \ldq aham.h\rdq{}ityuktaH sadA.astitvena meyatvahetunA
\ldq asmi\rdq{}iti ti~N.hpratirUpakAvyayapadavAchyaH taM pashyAmi\rsq \- ityarthaH |

yadvA \ldq asAvasau\rdq iti dvayamapi prathamAntameva |  vIpsAyAM dviruktiH |  pUrvaM
pUShAdishabdairupalaxaNatayA prANAdyanekapratIkasthatvaM viShNoruktam |  tatra
bhedasha~NkAyAM \ldq yo.asau\rdq iti vAkyamuchyate |  \ldq yo.asAvasau puruShaH\rdq
prANAdyaneka(pUShAdyaneka)pratIkeShu sthitaH \ldq so.ahamasmi\rdq \- madantaryAmitayA
asti, ityarthaH |  \lsq sarvapratIkeShu mayi cha sthita eka eva\rsq, iti phalito.arthaH  |

\ldq ahaM\rdq{}padasya pratyagAtmaM jIvAntaryAmiNi mukhyatayA tatsamabhivyAhArAd.h
\ldq asmi\rdq iti uttamapuruShaprayogo.api sAdhureva, iti j~neyam  || 17||

\lsq nanu parameshvarasya yatkalyANarUpatvamuktaM yachcha \ldq so.ahamasmi\rdq iti
jIvAntargatasya nityAstitvamuktaM, tanna yuktam |  dehanAshasya pratyaxAdisiddhatayA,
tadantargatasya jIvasyeva maraNAdyavashyambhAvAd.h\rsq, ityAsha~NkAM kaimutyena nirAha \-

   {\Largedvng vAyuranilamamR^itamathedaM bhasmA.nta{\m+} sharIram  || 18|| }
yadyapi \ldq idaM\rdq \ldq sharIraM\rdq \ldq bhasmAntaM\rdq, tathApi tadantargatasya hareH na
maraNAdidoShaprasaktiH |  kutaH\?  \ldq anilam.h\rdq \- \lsq aH brahmaiva nilaM
nilayanaM Ashrayo yasya so.anilaH\rsq |  \lsq parameshvarAshrito vAyurapi
yadA.amR^itaH nityaH, atha tadA parameshvaro.amR^ita iti kimu vaktavyam.h\?\rsq
\- ityarthaH |  \ldq anila\rdq{}\ldq amR^ita\rdq{}padayoH li~Ngavyatyayo j~neyaH |
vAyoramR^itatvaM nityaj~nAnatvena j~neyam.h, \ldq atirohitavij~nAnAd vAyurapi
amR^itaH smR^itaH\rdq ityukteH |  \ldq etena mAtarishvA vyAkhyAtaH\rdq
(bra\.sU\. 2\.3\.8) ityatra bhAShyAdau tathA nirNayAchcha \- iti  || 18||

atha praNavapratIkaM prArthayate \-

   {\Largedvng OM krato smara kR^ita{\m+} smara  |}
   {\Largedvng OM krato smara kR^ita{\m+} smara || 19||}
otatvAdiguNayuktatayA \ldq OM\rdq{}ityuchyamAna \ldq krato\rdq j~nAnarUpahare |
\lsq mAm.h\rsq iti sheShaH |  \ldq smara\rdq anugR^ihANa |  \ldq kR^itaM\rdq madIyaM
dhyAnAdikaM karma \ldq smara\rdq |  \lsq dhyAnAdinA mayA kR^itena mayi anugrahonmukho
bhava\rsq, ityarthaH |  nityaj~naptisvarUpasya saMskArajanyasmaraNAyogAt |  abhyAsaH
tAtparyArthaH  || 19||

\lsq kR^itashravaNAdinA puruSheNa sAxAtkArArthaM hareH prArthanaM kAryam.h\rsq,
ityataH tatprakAraM \ldq hiraNmayena\rdq ityAdinoktvA adhunA \lsq prAptasAxAttkAreNApi
puMsA moxArthaM bhagavadupAsanaM kAryam.h\rsq iti bhAvena agnipratIkastha
bhagavatprArthanAprakAramAha \-

   {\Largedvng agne naya supathA rAye asmAn vishvAni deva vayunAni vidvAn  |}
   {\Largedvng yuyodhyasmajjuhurANameno bhUyiShThAM te namauktiM vidhema  || 20|| 2||}
\lsq a~NgaM dehaM guNabhUtaM jagadvA nayati prerayati\rsq iti vyutpattyA
\ldq agni\rdq{}padamukhyArthaH san agnau vidyamAnahare |  \ldq asmAn.h\rdq
\ldq supathA\rdq punarAvR^ittihInArchirAdimArgeNa \ldq rAye\rdq moxAkhyavittAya \ldq naya\rdq |

kutaH\?  \lsq he deva asmadanuShThitAni vishvAni sampUrNAni moxAya paryAptAni\rsq iti yAvat |
\ldq vayunAni\rdq j~nAnAni bhavAn \ldq vidvAn.h\rdq veda |  \lsq prArabdhakarmayuktasya kathaM moxa\?\rsq,
ityata uktaM, \ldq yuyodhi\rdq iti |  \ldq asmAn.h\rdq ityatrApi anuShajyate | \ldq asmAn.h\rdq
\ldq juhurANaM\rdq alpAn kurvatsaMsAre parivartayaditi yAvat |  \lsq enaH pApaM
aniShTaM karma\rsq iti yAvat |  \ldq asmat.h\rdq asmattaH \ldq yuyodhi\rdq viyojaya |
\ldq yuyu viyoge\rdq iti dhAtorlugvikaraNam |  vayaM tu \ldq te\rdq tubhyaM \ldq bhUyiShThAM\rdq
bhaktij~nAnopetAM \ldq nama uktiM\rdq nama ityuktiM \ldq vidhema\rdq kurmaH | \lsq na tu tat.h
pratikartuM shaknuma\rsq \- iti  || 20|| 2||

   samastaguNapUrNAya doShadUrAya viShNave  |
   namaH shrIprANanAthAya bhaktAbhIShTapradAyine  ||
   IShAvAsyopaniShado bhAShyAdyuktArthasa~NgrahaH  |
   rAghavendreNa yatinA kR^ito.ayaM shiShyayA~nchayA  ||
\centerline{iti shrIrAghavendrayativirachitaH shrImadIshAvAsyopaniShatkhaNDArthaH samAptaH}
\centerline{.. bhAratIramaNamukhyaprANAntargata shrIkR^iShNArpaNamastu..}
## \smallskip\hrule\smallskip
Encoded by Shrisha Rao (shrao at dvaita.org).  See details on http://www.dvaita.net
Proofread by Meera Tadipatri (mtadipatri at dvaita.net)

\medskip\hrule\obeylines

Please send corrections to sanskrit at cheerful dot c om
Last updated \today
https://sanskritdocuments.org

\end{document}