% Text title : aitareyopanishhat.h % File name : aitareya.itx % Category : upanishhat % Location : doc\_upanishhat % Author : Vedic Rishis % Transliterated by : Sunder Hattangadi % Proofread by : Sunder Hattangadi, John Manetta % Description-comments : 8/108; RigVeda, Mukhyopanishad % Latest update : July 20, 1999, January 17, 2023 % Send corrections to : sanskrit at cheerful dot c om % % This text is prepared by volunteers and is to be used for personal study % and research. The file is not to be copied or reposted for promotion of % any website or individuals or for commercial purpose without permission. % Please help to maintain respect for volunteer spirit. % \documentstyle[11pt,multicol,itrans]{article} #include=ijag.inc #endwordvowel=.h \portraitwide \parindent=100pt \let\usedvng=\Largedvng % for 1 column \pagenumbering{itrans} \def\engtitle#1{\hrule\medskip\centerline{\LARGE #1}} \def\itxtitle#1{\medskip\centerline{\LARGEdvng #1}\medskip\hrule} \def\endtitles{\medskip\obeyspaceslines} %% \begin{document} \engtitle{.. Aitareya Upanishad ..}## \itxtitle{.. aitareyopaniShat ..}##\endtitles ## vA~N me manasi pratiShThitA mano me vAchi pratiShThitamAvirAvIrma edhi || vedasya ma ANIsthaH shrutaM me mA prahAsIranenAdhItenAhorAtrAn sandadhAmyR^itaM vadiShyAmi satyaM vadiShyAmi || tanmAmavatu tadvaktAramavatvavatu mAmavatu vaktAramavatu vaktAram || || OM shAntiH shAntiH shAntiH|| || atha aitareyopaniShadi prathamAdhyAye prathamaH khaNDaH || OM AtmA vA idameka evAgra AsInnAnyatki~nchana miShat | sa IkShata lokAnnu sR^ijA iti || 1|| sa imA.N llokAnasR^ijata | ambho marIchIrmaramApo.ado.ambhaH pareNa divaM dyauH pratiShThA.antarikShaM marIchayaH | pR^ithivI maro yA adhastAtta ApaH || 2|| sa IkShateme nu lokA lokapAlAnnu sR^ijA iti || so.adbhya eva puruShaM samuddhR^ityAmUrChayat || 3|| tamabhyatapattasyAbhitaptasya mukhaM nirabhidyata yathA.aNDaM mukhAdvAgvAcho.agnirnAsike nirabhidyetaM nAsikAbhyAM prANaH | prANAdvAyurakShiNI nirabhidyetamakShIbhyAM chakShushchakShuSha AdityaH karNau nirabhidyetAM karNAbhyAM shrotraM shrotraddishastva~Nnirabhidyata tvacho lomAni lomabhya oShadhivanaspatayo hR^idayaM nirabhidyata hR^idayAnmano manasashchandramA nAbhirnirabhidyata nAbhyA apAno.apAnAnmR^ityuH shishnaM nirabhidyata shishnAdreto retasa ApaH || 4|| || ityaitareyopaniShadi prathamAdhyAye prathamaH khaNDaH || || atha aitareyopaniShadi prathamAdhyAye dvitIyaH khaNDaH || tA etA devatAH sR^iShTA asminmahatyarNave prApatan . tamashanApipAsAbhyAmanvavArjat | tA enamabruvannAyatanaM naH prajAnIhi yasminpratiShThitA annamadAmeti || 1|| tAbhyo gAmAnayattA abruvanna vai no.ayamalamiti | tAbhyo.ashvamAnayattA abruvanna vai no.ayamalamiti || 2|| tAbhyaH puruShamAnayattA abruvan sukR^itaM bateti puruSho vAva sukR^itam | tA abravIdyathAyatanaM pravishateti || 3|| agnirvAgbhUtvA mukhaM prAvishadvAyuH prANo bhUtvA nAsike prAvishadAdityashchakShurbhUtvA.akShiNI prAvishAddishaH shrotraM bhUtvA karNau prAvishannoShadhivanaspatayo lomAni bhUtvA tvachaMprAvisha.nshchandramA mano bhUtvA hR^idayaM prAvishanmR^ityurapAno bhUtvA nAbhiM prAvishadApo reto bhUtvA shishnaM prAvishan || 4|| tamashanAyApipAse abrUtAmAvAbhyAmabhiprajAnIhIti te abravIdetAsveva vAM devatAsvAbhajAmyetAsu bhAginnyau karomIti | tasmAdyasyai kasyai cha devatAyai havirgR^ihyate bhAginyAvevAsyAmashanAyApipAse bhavataH || 5|| || ityaitareyopaniShadi prathamAdhyAye dvitIyaH khaNDaH || || atha aitareyopaniShadi prathamAdhyAye tR^itIyaH khaNDaH || sa IkShateme nu lokAshcha lokapAlAshchAnnamebhyaH sR^ijA iti || 1|| so.apo.abhyatapattAbhyo.abhitaptAbhyo mUrtirajAyata | yA vai sA mUrtirajAyatAnnaM vai tat || 2|| tadenatsR^iShTaM parA~NtyajighA.nsattadvAchA.ajighR^ikShat tannAshaknodvAchA grahItum | sa yaddhainadvAchA.agrahaiShyadabhivyAhR^itya haivAnnamatrapsyat || 3|| tatprANenAjighR^ikShat tannAshaknotprANena grahItuM sa yaddhainatprANenAgrahaiShyadabhiprANya haivAnnamatrapsyat || 4|| tachchakShuShA.ajighR^ikShat tannAshaknochchakShuShA grahItu/n sa yaddhainachchakShuShA.agrahaiShyaddR^iShTvA haivAnamatrapsyat || 5|| tachChrotreNAjighR^ikShat tannAshaknochChrotreNa grahItuM sa yaddhainachChroteNAgrahaiShyachChrutvA haivAnnamatrapsyat || 6|| tattvachA.ajighR^ikShat tannAshaknottvachA grahItuM sa yaddhainattvachA.agrahaiShyat spR^iShTvA haivAnnamatrapsyat || 7|| tanmanasA.ajighR^ikShat tannAshaknonmanasA grahItuM sa yaddhainanmanasA.agrahaiShyaddhyAtvA haivAnnamatrapsyat || 8|| tachChishnenAjighR^ikShat tannAshaknochChishnena grahItuM sa yaddhainachChishnenAgrahaiShyadvitsR^ijya haivAnamatrapsyat || 9|| tadapAnenAjighR^ikShat tadAvayat saiSho.annasya graho yadvAyuranAyurvA eSha yadvAyuH || 10|| sa IkShata kathaM nvidaM madR^ite syAditi sa IkShata katareNa prapadyA iti | sa IkShata yadi vAchA.abhivyAhR^itaM yadi prANenAbhiprANitaM yadi chakShuShA dR^iShTaM yadi shrotreNa shrutaM yadi tvachA spR^iShTaM yadi manasA dhyAtaM yadyapAnenAbhyapAnitaM yadi shishnena visR^iShTamatha ko.ahamiti || 11|| sa etameva sImAnaM vidaryaitayA dvArA prApadyata | saiShA vidR^itirnAma dvAstadetannA.andanam | tasya traya AvasathAstrayaH svapnA ayamAvasatho.ayamAvasatho.ayamAvasatha iti || 12|| sa jAto bhUtAnyabhivyaikhyat kimihAnyaM vAvadiShaditi |sa etameva puruShaM brahma tatamamapashyat | idamadarshanamitI 3 || 13|| tasmAdidandro nAmedandro ha vai nAma | tamidandraM santamindra ityAchakShate parokSheNa | parokShapriyA iva hi devAH parokShapriyA iva hi devAH || 14|| || ityaitareyopaniShadi prathamAdhyAye tR^itIyaH khaNDaH || || atha aitaropaniShadi dvitIyodhyAyaH || OM puruShe ha vA ayamAdito garbho bhavati yadetadretaH .tadetatsarvebhyo.a~NgebhyastejaH saMbhUtamAtmanyeva.a.atmAnaM bibharti tadyadA striyAM si~nchatyathainajjanayati tadasya prathamaM janma || 1|| tatstriyA AtmabhUyaM gachChati yathA svama~NgaM tathA | tasmAdenAM na hinasti | sA.asyaitamAtmAnamatra gataM bhAvayati || 2|| sA bhAvayitrI bhAvayitavyA bhavati | taM strI garbha bibharti | so.agra eva kumAraM janmano.agre.adhibhAvayati | sa yatkumAraM janmano.agre.adhibhAvayatyAtmAnameva tadbhAvayatyeShaM lokAnAM santatyA | evaM santatA hIme lokAstadasya dvitIyaM janma || 3|| so.asyAyamAtmA puNyebhyaH karmabhyaH pratidhIyate | athAsyAyAmitara AtmA kR^itakR^ityo vayogataH praiti | sa itaH prayanneva punarjAyate tadasya tR^itIyaM janma || 4|| taduktamR^iShiNA garbhe nu sannanveShAmavedamahaM devAnAM janimAni vishvA shataM mA pura AyasIrarakShannadhaH shyeno javasA niradIyamiti | garbha evaitachChayAno vAmadeva evamuvAcha || 5|| sa evaM vidvAnasmAchCharIrabhedAdUrdhva utkramyAmuShmin svarge loke sarvAn kAmAnAptvA.amR^itaH samabhavat samabhavat || 6|| || ityaitaropaniShadi dvitIyodhyAyaH || || atha aitaropaniShadi tR^itIyodhyAyaH || OM ko.ayamAtmeti vayamupAsmahe kataraH sa AtmA | yena vA pashyati yena vA shR^iNoti yena vA gandhAnAjighrati yena vA vAchaM vyAkaroti yena vA svAdu chAsvAdu cha vijAnAti || 1|| yadetaddhR^idayaM manashchaitat | sa~nj~nAnamAj~nAnaM vij~nAnaM praj~nAnaM medhA dR^iShTirdhR^itimatirmanIShA jUtiH smR^itiH sa~NkalpaH kraturasuH kAmo vasha iti | sarvANyevaitAni praj~nAnasya nAmadheyAni bhavanti || 2|| eSha brahmaiSha indra eSha prajApatirete sarve devA imAni cha pa~nchamahAbhUtAni pR^ithivI vAyurAkAsha Apo jyotI.nShItyetAnImAni cha kShudramishrANIva | bIjAnItarANi chetarANi chANDajAni cha jArujAni cha svedajAni chodbhijjAni chAshvA gAvaH puruShA hastino yatki~nchedaM prANi ja~NgamaM cha patatri cha yachcha sthAvaraM sarvaM tatpraj~nAnetraM praj~nAne pratiShThitaM praj~nAnetro lokaH praj~nA pratiShThA praj~nAnaM brahma || 3|| sa etena prAj~nenA.a.atmanA.asmAllokAdutkramyAmuShminsvarge loke sarvAn kAmAnAptvA.amR^itaH samabhavat samabhavat || 4|| || ityaitaropaniShadi tR^itIyodhyAyaH || OM vA~N me manasi pratiShThitA mano me vAchi pratiShThitamAvirAvIrma edhi vedasya ma ANIsthaH shrutaM me mA prahAsIranenAdhItenAhorAtrAn sandadhAmyR^itaM vadiShyAmi satyaM vadiShyAmi tanmAmavatu tadvaktAramavatvavatu mAmavatu vaktAramavatu vaktAram || || OM shAntiH shAntiH shAntiH|| ## Encoded by Sunder Hattangadi Proofread by Sunder Hattangadi, John Manetta \medskip\hrule\obeylines Please send corrections to sanskrit at cheerful dot c om Last updated \today https://sanskritdocuments.org \end{document}