% Text title            : ShoDashAyudhastotram
% File name             : ShoDashAyudhastotram.itx
% Category              : vishhnu, vedAnta-deshika, vishnu
% Location              : doc\_vishhnu
% Author                : vedAntadeshika
% Proofread by          : PSA Easwaran psawaswaran
% Description/comments  : Edited by S. V. Radhakrishna Shastriji
% Acknowledge-Permission: Mahaperiaval Trust
% Latest update         : May 13, 2018
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Shodashayudhastotram ..}##
\itxtitle{.. ShoDashAyudhastotram ..}##\endtitles ##

vedAntadeshikavirachitam |
(shrIsudarshanadevasya karasthAyudhastutiH)

svasa~NkalpakalAkalpairAyudhairAyudheshvaraH |
juShTaH ShoDashabhirdivyairjuShatAM vaH paraH pumAn || 1||
yadAyattaM jagachchakraM kAlachakraM cha shAshvatam |
pAtu vastvaparaM chakraM chakrarUpasya chakriNaH || 2||
yatprasUtishatairAsan drumAH parashulA~nChitAH |
sa divyo hetirAjasya parashuH paripAtu vaH || 3||
helayA hetirAjena yasmin daityAH samuddhR^ite |
shakuntA iva dhAvanti sa kuntaH pAlayeta vaH || 4||
daityadAnavamukhyAnAM daNDyAnAM yena daNDanam |
hetidaNDesha daNDo.asau bhavatAM daNDayed.hviShaH || 5||
ananyAnvayabhaktAnAM rundhannAshAmata~NgajAn |
ana~NkushavihAro vaH pAtu hetIshvarA~NkushaH || 6||
sambhUya shalabhAyante yatra pApAni dehinAm |
sa pAtu shatavaktrAgnihetirhetIshvarasya vaH || 7||
avidyAM svaprakAshena vidyArUpashChinatti yaH |
sa sudarshananistriMshaH sautu vastattvadarshanam || 8||
kriyAshaktiguNo viShNoryo bhavatyatishaktimAn |
akuNThashaktiH sA shaktirashaktiM vArayeta vaH || 9||
tAratvaM yasya saMsthAne shabde cha paridR^ishyate |
prabhoH praharaNendrasya pA~nchajanyaH sa pAtu vaH || 10||
yaM sAttvikamaha~NkAramAmanantyakShasAyakam |
avyAdvashchakrarUpasya taddhanuH shAr~NgidhanvanaH || 11||
AyudhendreNa yenaiva vishvasargo vivichyate |
sa vaH saudarshanaH kuryAtpAshaH pAshavimochanam || 12||
vihAro yena devasya vishvakShetrakR^iShIvalaH |
vyajyate tena sAreNa nAsIravijayo.astu vaH || 13||
AyudhAnAmahaM vajraM ityagIyata yaH sa vaH |
avyAddhetIsha vajro.asAvadadhIchyasthisambhavaH || 14||
vishvasaMhR^itishaktiryA vishrutA buddhirUpiNI |
sA vaH saudarshanI bhUyAdgadaprashaminI gadA || 15||
yAtyatikShodashAlitvaM musalo yena tena vaH |
hetIsha musalenAshu bhidyatAM mohamausalam || 16||
shUlidR^iShTamanorvAchyo yena shUlayati dviShaH |
bhavatAM tena bhavatAttrishUlena vishUlatA || 17||
astragrAmasya kR^itsnasya prasUtiM yaM prachakShate |
so.avyAtsudarshano vishvamAyudhaiH ShoDashAyudhaH || 18||
shrImadve~NkaTanAthena shreyase bhUyase satAm |
kR^iteyamAyudhendrasya ShoDashAyudhasaMstutiH || 19||

iti vedAntadeshikavirachitaM ShoDashAyudhastotraM sampUrNam |

##
Proofread by PSA Easwaran

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}