% Text title            : dehalIshastutiH
% File name             : dehalIshastutiH.itx
% Category              : vishhnu, vedAnta-deshika
% Location              : doc\_vishhnu
% Author                : vedAntadeshika
% Proofread by          : PSA Easwaran psawaswaran at gmail.com
% Description/comments  : Edited by S. V. Radhakrishna Shastriji
% Acknowledge-Permission: Mahaperiaval Trust
% Latest update         : May 13, 2018
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Dehalishastutih ..}##
\itxtitle{.. dehalIshastutiH ..}##\endtitles ##

vedAntadeshikakR^itA
(gopapure  \-  tirukkoyilUr \- paNNAtaTe)
vikramya yena vijitAni jaganti bhUmnA
vishvasya yaM paramakAraNamAmananti |
vishrANayan praNayinAM vividhAn pumarthAn
goptA sa me bhavatu gopapurAdhirAjaH || 1||
dehalyadhIshvara tavedR^ishamIshvaratvaM
tuShTUShatAM dishati gadgadikAnubandham |
vAchAlayasyatha cha mAM kvachana kShapAyAM
kShAntena dAnta kavimukhyavimardanena || 2||
tvachchakravaddrutamanehasi ghUrNamAne
nimnonnatakramanidarshitanemivR^ittAH |
ArAdhya gopanagare kR^ipayoditaM tvAM
svArAjyamagryamalabhanta surAsurendrAH || 3||
AkalpapuShpasubhagonnatabAhushAkhaH
pAde sadA paripachelimasatphalastvam |
paNNAtaTaspR^ishi mR^ikaNDutapovane.asmin
ChAyAnilInabhuvano.asi tamAlashAkhI || 4||
chakrasya daityadanujAdiShu vAmabhAvaM
sha~Nkhasya chAshritajaneShvapi dakShiNatvam |
vyaktaM pradarshayati gopapurAdhirAja
vyatyasya nUnamanayoH karasamprayogam || 5||
dIpena kenachidashItaruchA nishIthe
snehopapannaparishuddhaguNArpitena |
dahrAvakAshanibiDaM dadR^ishurbhavantaM
svAdhyAyayoganayanAH shuchayaH kavIndrAH || 6||
kAsArapUrvakavimukhyavimardajanmA
paNNAtaTekShusubhagasya raso bahuste |
tvatpAdapadmamadhuni tvadananyabhogye
nUnaM samAshrayati nUtanasharkarAtvam || 7||
vairochaneH sadasi vAmanabhUmikAvAn
vikrAntitANDavarasena vijR^imbhamANaH |
chakre bhavAn makarakuNDalakarNapAshaH
shyAmaikameghabharitAmiva saptalokIm || 8||
chitraM na tattriShu mitAni padeShu dhatte
vishvAnyamUni bhuvanAni visha~NkaTeShu |
bhaktaiH samaM kvachidasau bhavanaikadeshe
mAti sma mUrtiramitA tadihAdbhutaM naH || 9||
bhaktapriya tvayi tathA parivardhamAne
muktAvitAnavitatistava pUrvamAsIt |
hArAvaliH paramatho rashanAkalApaH
tArAgaNastadanu mauktikanUpurashrIH || 10||
bhikShochitaM prakaTayan prathamAshramaM tvaM
kR^iShNAjinaM yavanikAM kR^itavAn priyAyAH |
vyaktAkR^itestava samIkShya bhujAntare tAM
tvAmeva gopanagarIsha janA vidustvAm || 11||
satkurvatAM tava padaM chaturAnanatvaM
pAdodakaM cha shirasA vahatAM shivatvam |
ekatra vikramaNakarmaNi tad.hvayaM te
dehalyadhIsha yugapatprathitaM pR^ithivyAm || 12||
bhaktoparodhasaha pAdasarojataste
mandAkinI vigalitA makarandadhArA |
sadyastrivargamapavargamapi kSharantI
puNyA babhUva purashAsana maulimAlA || 13||
vikrAntaketupaTikA padavAhinI te
nya~nchantyupaiti natajIvitashiMshumAram |
auttAnapAdimamR^itAMshumashItabhAnuM
hemAchalaM pashupatiM himavantamurvIm || 14||
vedhaH kamaNDalujalairvihitArchanaM te
pAdAmbujaM pratidinaM pratipadyamAnA |
stotrapriya tripathagA.a.adisaridvarANAM
paNNA babhUva bhuvane bahumAnapAtram || 15||
svachChandavikramasamunnamitAdamuShmAt
srotastrayaM yadabhavattava pAdapadmAt |
vetAlabhUtasarasAmapadishya vAchaM
prAyeNa tatprasavabhUmimavApa bhUyaH || 16||
krIDApareNa bhavatA vihitoparodhAn
ArAdhakAnanuparodhamuda~nchayiShyan |
tAmreNa pAdanakhareNa tadA.aNDamadhye
ghaNTApathaM kamapi nUnamavartayastvam || 17||
kAmAvile.api karuNArNavabindurekaH
kShiptaH svakeli tarasA tava dehalIsha |
tatsantaterubhayathA vitatiM bhajantyAH
saMsAradAvadahanaM shamayatyasheSham || 18||
nIDodarAnnipatitasya shukArbhakasya
trANena nAtha viharanniva sArvabhaumaH |
AdAya gopanagarAdhipate svayaM mAM
krIDA dayA vyatikareNa kR^itArthaya tvam || 19||
lIlAshakuntamiva mAM svapadopalabdhyai
svairaM kShipan duritapa~njarato guNastham |
tattAdR^ishaM kamapi gopapurIvihArin
santoShamullalaya sAgarasambhavAyAH || 20||
vAtUlakalpavR^ijinaprabhavairmadIyAM
vaiyAkulIM viShayasindhutara~Ngabha~NgaiH |
dAsopamardasaha durnirasAM tvadanyaiH
anvIkShya gADhamanukampitumarhasi tvam || 21||
enasvinImiti sadA mayi jAyamAnAM
dehalyadhIsha dR^iShado.api vilApayantIm |
nAthe samagrashakane tvayi jAgarUke
kiM te saheta karuNA karuNAmavasthAm || 22||
AtmonnatiM paranikarShamapIha vA~nChan
nimne.api mohajaladhau nipatAmi bhUyaH |
tanmAmuda~nchaya tavonnatapAdanighnaM
dehalyadhIsha guNitena dayAguNena || 23||
akShINakalmaSharaso.api tavAnR^ishaMsyAt
lakShmIsamakShamapi vij~napayAmyabhItaH |
bhaktopamardarasika svayamalpabuddheH
yanmanyase mama hitaM tadupAdadIthAH || 24||
manye dayArdra hR^idayena mahAdhanaM me
dattaM tvayedamanapAyamaki~nchanatvam |
yena stanandhayamiva svahitAnabhij~naM
nyAsIkaroShi nijapAdasaroruhe mAm || 25||
durvAratIvraduritaprativAvadUkaiH
audAryavadbhiranaghasmitadarshanIyaiH |
dehalyadhIshvara dayAbharitairapA~NgaiH
vAchaM vinApi vadasIva mayi prasAdam || 26||
ayamanavamasUktairAdibhaktairyathAvat
vishaditanijatattvo vishvamavyAdabhavyAt |
rathacharaNanirUDhavya~njanAnAM janAnAM
duritamathanalIlAdohalI dehalIshaH || 27||
iyamavitathavarNA varNanIyasvabhAvAt
viditanigamasImnA ve~NkaTeshena gItA |
bhavamarubhuvi tR^iShNAlobhaparyAkulAnAM
dishatu phalamabhIShTaM dehalIshastutirnaH || 28||

iti vedAntadeshikakR^itA dehalIshastutiH samAptA |

##
Proofread by PSA Easwaran

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}