% Text title : Gopala Shatakam % File name : gopAlashatakam.itx % Category : vishhnu, shataka, krishna % Location : doc\_vishhnu % Author : (ashoka) raghunAthAchArya % Proofread by : Rajesh Thyagarajan % Description/comments : From Stotrasamuchchaya 2, Edited by Pandit K. Parameshwara Aithal % Latest update : May 10, 2023 % Send corrections to : sanskrit at cheerful dot c om % % This text is prepared by volunteers and is to be used for personal study % and research. The file is not to be copied or reposted for promotion of % any website or individuals or for commercial purpose without permission. % Please help to maintain respect for volunteer spirit. % \documentstyle[11pt,multicol,itrans]{article} #include=ijag.inc #endwordvowel=.h \portraitwide \parindent=100pt \let\usedvng=\Largedvng % for 1 column \pagenumbering{itrans} \def\engtitle#1{\hrule\medskip\centerline{\LARGE #1}} \def\itxtitle#1{\medskip\centerline{\LARGEdvng #1}\medskip\hrule} \def\endtitles{\medskip\obeyspaceslines} %% \begin{document} \engtitle{.. Gopala Shatakam ..}## \itxtitle{.. gopAlashatakam ..}##\endtitles ## shrIshashrIpR^itanAdhipAnanukalaM seve shaThAriM bhaje nAthAbjAmbakarAmayAmunamahApUrNAnajasraM bhaje | samyag deshikapa~NktihArataralaM rAmAnujaM saMshraye yatkAruNyasukhAptasarvadhiShaNairAryairahaM vIkShitaH || 1|| khidyadgoveShabhUmivyasanaparihR^itiprAptalokeshashambhu\- svargasvAmyAdidevapraNatinutitatiprAptavAgvR^ittirIshaH | devaH kShIrAbdhishAyI jagadavanaparaH svIyama~nchena sAkaM devakyAH putratAM yaH samabhajadavanerbhArahAnyai bhaje tam || 2|| aShTamyAM kR^iShNapakShe nabhasi budhadine prodyamAne shashA~Nke prAjApatye shubharkShe vR^iShabhamupagate devakIjAtamIsham | kR^iShNaM vande svabhUShopalataraNihatadhvAntabhAsvadgR^ihAnta\- rdedIpyachCha~NkhachakrojjvalitashubhatanuM stUyamAnaM pitR^ibhyAm || 3|| mAyAmUrchChitakaMsabhR^ityanivahe tasmin nikete hariM nirmukte nigale piturvigalite sthUle kavATe vraje (kavATaM) | pitrA sheShaphaNAvR^itasvashirasA sannIyamAnaM bhaje meghe varShati jAnudaghnayamunApUrNapravAhe pathi || 4|| mUrchChAkrAntayashodayA vigalite.aj~nAte shishau svodarAd\- devakyAH kamanena chAtmajahariM nikShipya nIte shishum | kaMsenApi shilAtale suvanitArUpe hate svargate mene sApi yamAtmajaM chidachitorIshaM tamadyAshraye || 5|| jAto nandasya putraH sukamalanayanashchArunAsaH suvaktro devo.ayaM naiva martyo na hi bhavati tanustvIdR^ishI mAnuShANAm | saundaryaM saukumAryaM kimidamavayavAstvadbhutAH sarva eve\- tyevaM toSheNa sarvA vrajagatavanitA astuvan yaM tamIDe || 6|| snehAjyairnavanItapiNDasahitairdaghnA haridrodakai\- ste sarve samavAkiran brajajanAstoSheNa yajjanmani | devA apyatitoShamApurapatat svargAt sumAnAM tati\- rnedurdundubhayo jagarjurudadhervArINi taM dhImahi || 7|| j~nAtvA devajaniM surarShivachanAdekAntavAsaM hareH kaMsena prahite samastapR^ithukadhvaMsAya daityavraje | bAlaghnI vrajamAgatA viShamayaM dattvA stanaM pUtanA stanyasvIkaraNAt sahAsubhiragAd dyAM yena taM chintaye || 8|| gopyaH pashyata ko.ayamatra shakaTaH kShiptaH prabhano.apatat padbhyAmasya shishordhruvaM vinihataH padmopamAbhyAM bata | hantuM dAnava Agato girisamo yenAdya shete mR^itaH so.ayaM viShNuriti dhruvaM vrajajanA yaM menire taM bhaje || 9|| vAtyAveShadharo bhraman bahu tR^iNAnyAvartayan dAnavaH pAMsUdvarShavimUrchChitAn vrajajanAn kR^itvA gR^ihItvA cha yam | hantuM vyomni samutpatan nijagalAshliShTaM hariM shAbakaM bhArAd bhuvyapatad vyasustadurasi krIDArataM taM bhaje || 10|| kR^iShNAsyaM darshayAshu dhruvamaparimitA mR^ittikA bhakShitAdye\- tyuktvAsye yasya mAtA sakalajanapadadvIpasindhUn vrajaM cha | AtmAnaM saptalokAnamaranarapashusthAvarAdryAdiyuktAn dR^iShTvA matvA cha viShNuM nijatanayamaho yaM nanAmAshraye tam || 11|| AtmArAmo.api devaH shrutimakuTaramAsUrisevyo.api mAtu\- ryaH stanyAlAbharuShTo nikhiladaghipayobhANDabha~NgaM chakAra | muShNan haiya~NgavInaM pratigR^ihamakhilAn mohayan rUpacheShTA\- vAkyairmArjArakIshaiH samamacharadaho yastadIshaH shraye tam || 12|| AruhyolUkhalAgraM bahughaTanibiDaM shikyamAkR^iShya tatsthe kumbhe hastaM svakIyaM bahuchalanayano yAvadantarniveshya | bhuktvA haiya~NgavInaM karayugalatataM tanmR^ijan svIyadehe baddho mAtrA guNairyaH svayamatikR^ipayolUkhale taM bhaje.aham || 13|| mAtrA yasmin nibaddhastadapi gurutaraM jAnuhastena gachCha\- nnAkarShan mattatotthAmaramunishapanodvegalabdhArjunatvau | bhR^ityau yakShAdhipasya svayamatighR^iNayA mochayan vR^ikShabhAvAd yastenolUkhalena shrutigaNavinutaM taM shraye bAlakR^iShNam || 14|| govatsAn vatsapAlAn vanabhuvi vidhinA va~nchitAn vIkShya devo vatsAn bAlAMshcha sR^iShTvA susadR^ishagamanAkAravarNasvarA~NgAn | saMyojya svasvamArgaM nishi nishi vipinAd vatsarAnte svashaktyA yaH sarvAn brahmarUpAn punarapi vidhaye.adarshayat taM bhaje.aham || 15|| kR^iShNaihi stanamadya bAla piba te tAtaH sumR^iShTodanaM bhoktuM tvAM prativIkShate dasha disho dAsyAmi tubhyaM phalam | janmarkShaM tava gAH pradehi subhagAH snAtaH shubhAla~NkR^ito bhu~NkShvetyeva yashodayA sutadhiyA yaH prArthitastaM bhaje || 16|| ugrAbhAShaNadR^iShTitarjanakashAghAtAdikR^ityAkShamA tattachcheShTitaduHkhitavrajavadhUdurvAkyasarvaMsahA krIDAtatparasAhasapriyasutavyApArasa~NkShobhitA | mAtA vyasmaradAtmakAryamakhilaM yachchintayA taM bhaje || 17|| gehAlepanamArjanAvahananasnAneShu godohana\- kShIrAdhishrayaNAdikarmasu sadA gopyo.api nityA iva | yasyAsechanakaM vapurbahuvidhA divyAshcha cheShTA giraH saMsmR^ityaiva jaguH kalaM paravashAstasmai namo brahmaNe || 18|| gopAlaiH sahito vihR^itya vipine sAyaM nivR^itto hari\- rmadhyemArgamaghAsuraM hyajagaraM vaktraM vivR^itya sthitam | shrutvA tasya mukhe nivishya sajano gobhirmukhe saMvR^ite svIyaM varShma vivardhayannajagaraM chichCheda yastaM bhaje || 19|| atyantAdbhutasundarojjvalashubhaM yadvarShma lakShmIpriyaM dhUlIdhUsaritena tena vapuShA nIlotpalashrImupA | yo.akrIDat svasamairanekapashupairgAya~nChataiH prANinAM tattajjAtyanurUpashabdarachanAH kurvan tamevAshraye || 20|| vatsAnAM charatAM tR^iNAni vipine madhye suvatsAkR^itiM prAptaM dAnavamIshvaro naravapurj~nAtvA svanAshotsukam | tenaiva svagR^ihIta pashchimapadotkShiptena naShTAmunA daityaM yo.apyahanat (?) kapitthavapuShaM tasmai namo.astvanvaham || 21|| j~nAtvA shrIdAmavAkyAt kharatanuditijArakShitaM tAlajAtaM gopAlaistatra gatvA bhujachalitatarUtpannashabdAgatena | rAmotkShiptena tenoddhR^itacharamapadA dhenukenAhatAnAM yastAlAnAM phalaiH svAn hatatadanubalo.amodayat so.avatAnnaH || 22|| devo mAyAmanuShyo vanabhuvi viharan gopachAlairbakena grasto.antardAhaduHkhAd girisamatanunA Chardito dAnavena | bhUyo grAsapravR^ittaM tamahanadatha(?) yastaM prapadye sharaNyaM taddhaMsAtyantatuShTAmarakR^itasumanovR^iShTivAdyAbhirAmam || 23|| kAlindItIrthapAnavyasupashumanujAn vIkShaNAjjIvayitvA nIpAt tasyAM nipatya prakupitabhujagenAvR^itaH kAliyena | utpAtAyAtamAtApitR^imukhamanujodvegashAntyai bhaje taM mUrdhno bha~njannahistrIstavanabhajanataH kAliyaM yo mumocha || 24|| nItvA kAliyamIshvaro ramaNakaM dvIpaM suhR^idvandhubhiH sauparNaM balibha~njanotthamadhikaM dveShaM nirasya svayam | (balibhakShaNottha) nadyA rodhasi yaH svapan vrajajanaiH sarvairnishIthe tataM dAvAgniM hyapibad rudatsvajanatAtoShAya taM chintaye || 25|| deve tiShThati muktide tvayi sadA bhaktapriye shrIsakhe nAnyaM chintayate manaH shR^iNu vacho yena vraje.atyAdarAt | (chintayame) sarvAbhIShTaphalapradena shishunA datte phale bhAjanAt kasyAshchit phalabhAjanaM suruchirai ratnairapUri svayam || 26|| kR^iShNo jetR^In vahadbhiH paribR^iDhabalasa~NghaTTigopAn svakIyaiH sAkaM shrIdAmavAhasvavahanachakitaM gopaveShaM pralambam | skandhe rAmaM vahantaM viyati nijavapurdarshayantaM subhImaM daityaM yo.anAshayat taM suramunivinutaM devamIDe.agrajena || 27|| mu~njAraNyaM praviShTe tR^iNacharaNadhiyA gosamUhe praNaShTe tattannAmapraghoShairgaganatalatatairAhvayan gAH samastAH | gopAnAmIlitAkShAn vanadahanatatAn vIkShya pItvA davAgniM bhANDIraM yo.anayad gA api sakalaphalaprApakaM saMshraye tam || 28|| yasmin gAyati veNunAtimadhuraM vR^indAvane yogino gogopyo vihagA mR^igAshcha shikhino nadyo.adrayo bhUruhAH | prAptA devagaNA amartyavanitA visrastamAlyambarA atrAmutra cha ye pare paravashAH sammUrchChitAstaM bhaje || 29|| kAlindImavagAhya gopavanitAH prAtardhanuShyanvahaM patnyo bhUma harervayaM bhagavato nandasnuShA ambike | kAtyAyanyayi devi no vratamidaM nirvartayetyambikA\- mAnarchuH sikatAmayIM sumaphalairyatkA~NkShayA taM bhaje || 30|| gopyaH krIDAparA yA udakamupagatA yAmunaM phullapadmaM tAsAmAdAya vAsAMsyatijavasahitaH kundamAruhya vR^ikSham | tAbhiH sa~NgUhya shIghraM kuchayugajaghanaM hastasaknAtikAmI vAso yo yAchyamAnaH karayugavinatiM yAchate taM bhaje.aham || 31|| kR^itvA godaNDayaShTiM jagadavanaparasvIyakakShe.aparasmin kakShe sandhAya veNuM shubhamR^idulatanau dohadAmApi baddhvA | bhartR^istyaktvAtibhaktyAgatamunivanitAdattamantho.a~njalau yo hyAtmArAmo.api bAlaiH samamacharadaho taM bhaje vAsudevam || 32|| yaj~nachChedaprakupyatsurapativachanAyAtasaMvartamegha\- vyAptiprAptogravAtAshanisahita shilAvarShabhItAsu gopu | yo.a~NgulyAbibhradadriM vrajamanujapashuprItaye saptarAtraM taM vande vAsudevaM vidhishivavinutaM devarAjArchitA~Nghrim || 33|| gopIrveNUtthagAnashruti vivashatanUrAgatAH prekShya tAbhiH krIDitvAntarhito yo virahagADhavashAt tAbhiranvIkShyamANaH | ekaikasyA araNye vahanaratisukhAdAnachihnena tattat\- pAdanyAsena dUnA asukhayadatha tA darshanAt taM bhaje.aham || 34|| kR^iShNo viShNurhi sAkShAnna yadi kathamasAvuddharet parvatendraM hyAsye syustasya lokAH kathamasuragaNAn nAshayedvA kathaM saH | evaM sa~nchintayadbhyo.akathayadatha pitA yaM smaran gargavAkyaM sAkShAnnArAyaNAMshaM jagadavanaparaM taM shraye.ahaM janebhyaH || 35|| govindetyuchcharan yaM sakalasuragaNaiH sAkamAgatya natvA sarvANDAnAmadhIshaM trijagadadhipatiM hyabhyaShi~nchat surendraH | nR^ityaddivyApsarobhiH surakR^itasumanovR^iShTigAnAnatIbhi\- rbhairINAM bhA~NkR^itairapyakhilamunikR^itaiH stotrajAlaiH shraye tam || 36|| AvishyAmbho nishIthe punarapi salilAnnotthitaH kena nandaH sa~nchintyaivaM prakhidyadvrajamanujamude pAshilokaM pravishya | samyak sampUjya dattaM pitaramakhiladR^ik pAshinA stotrapUrvaM hyAdAyAgatya tena svajanamudamadAd yastamIshaM prapadye || 37|| gopAnAM paramAdbhutojjvalamahAnandaikarUpaM padaM magnAnAM vitamaH paraM karuNayA brahmahrade tatra cha | tasyAmeva tanAvahIndrashayane svAtmAnamapyAsthitaM devIbhUShaNahetisUrisahitaM yo.adarshayat taM bhaje || 38|| gAyan vAchA pranR^ityaMshcharaNayugalatashchAlayan varShma dorbhyAM hastau gopyoH pragR^ihNan harimukhasumanovR^iShTivAdyAdiyuktaH | reme gopIM cha gopIM shubhamR^idulatanuryo.antarA gopikaivaM yaM yaM kR^iShNaM cha sarvA hariravatu sa mAM maNDale gopikAnAm || 39|| nandaM gopajanairanogiraDudyuktairanekarvanaM gatvA tatra maheshvaraM sagirijaM sampUjya rAtryAM sthitam | grastaM kuNDalinA hyamochayadaheH spR^iShTvA padAhiM muneH (daShTaM) shApAt prAptamaherahitvamapi yaH pAyAdapAyAt sa naH || 40|| kalhAraiH kumudaiH sitairjalaruhrairnIlotpalaiH pa~NkajaiH kirmIrAmupavishya sUryatanayAM krIDAparAbhiH svayam | yo.akrIDad ramaNIbhirambhasi jalotkShepochchalattatkucha\- sparshashleShavilokanApahasanashlAghAdibhistaM bhaje || 41|| goShThaM prApya vR^iShAsuro.atimahatA nAdena rundhan namaH puchChAdhUnanajAtavAyupatitairvR^ikShaiH kShitiM ChAdayan | kShmAbhR^idvibhramasa~NgatAmbudakakutsandarshanodvejitai\- rgopairnyastabhareNa yena hariNA sampiNDitastaM bhaje || 42|| daityA yena nipAtitA vrajabhuvi tvadbhagineyo hyasau (hi sau) yA pAShANatale tvayaiva nihatA sA nandagopAtmajA | vyatyAso vasudevakalpita iti shrutvA munernAradAd yaddhvaMsAya shashAsa keshiditijaM kaMsastamevAshraye || 43|| pAdAghAta vinirgatakShitirajomeghAyamAnAmbaraM heShAdhvAnavisAnj~nitavrajajanaM daityaM tura~NgAkR^itim | yaH svAnveShaNatatparaM girisamaM dR^iShTvA hariH keshinaM daShTastena muhustadIyavadanaM chichCheda taM chintaye || 44|| krIDadbhirmeShagopaiH katibhirapi parairmeShachoraiH sametaM tatpAlaishchoragopaM ditibhavamakhilAn meShagopAn krameNa | nItvA nikShipya daryAM mukhamapi dR^iShadAchChAdya tasyAH pragurvyA hatvA yaH sa~njihIrShuM nihatamukhashilo.amochayat tAn sa no.avyAt || 45|| kaMsena prahitaH shvaphalkatanayo gachChan rathena svayaM premArdrasvadR^ishA hariH kimadhunA mAmIkShayet saMspR^ishet | hastAbjena hareH kadA padayugaM pashyan vahan pUjayan stoShyAmIti vichintayan pathi hariM prApto.ayamavyAt sa naH || 46|| dogdhA dohanadAmasaMvR^itatanuH samyak prasanno hariH kaMsena prahitAya bhaktinidhaye.akrUrAya vR^indAvane | dattvAtithyamasheShayAdavakathAH shrutvA sarAmo rathaM yo.akrUreNa sahAdhiruhya mathurAM kShipraM yayau taM bhaje || 47|| kaMsapreShitagAndinIsutavachojAtaprayANonmukhaM shrutvA shaurimasheShagopavanitA nandAdibhiH sAgrajam | yatsaundaryamanoj~navAkpriyatamavyApAravIkShAsmita\- krIDAdaityavadhAdibhirhR^itahR^ido mohaM gatAstaM bhaje || 48|| akrUraH sabalaM mukundamanaghaH saMsthApya tasmin rathe madhyemArgamathAvaruhya sa rathAt snAtuM pravR^itto jale | dR^iShTA sheShagataM tameva salilAduttIrya dR^iShTvA rathe bhUyo.apyAshu jale nimajjya bhujage yaM dR^iShTavAMstaM bhaje || 49|| shrutvA chitraM charitraM suranarapashubhirmohitaishchintitaM ta\- chChaureH saulabhyapUrNaM vrajabhuvi paramaM bhAti yasmin paratvam | taM drakShyAmaH kadA naH prabhumiti mathurApattanasthAshcha sarve yatsevotkA ashR^iNvan sarathamupagataM sAgrajaM saMshraye tam || 50|| yaM prAptaM gopurasthA dadR^ishuratha pare harmyavAtAyanasthAH shrutvA kechit svagehAd bahujananibiDAM prApya rathyAmapashyan | sevAshAtundilA~NgA bahujanapihitaM draShTumanye na sheku\- styaktashrIpakShirAjaM vidhishivavinutaM saMshraye taM padAtim || 51|| lakShmIH padmasamudbhavA mR^idushayA yatpAdapuShpArchane\- .apyudvignA mR^idupAdapadmayugalaglAniprabhItyAbhavat | tAbhyAmasya gatiH kathaM kShititale padbhyAM bateti dhruvaM sAsrA yadgamanaM na shekuramarA draShTuM tamadyAshraye || 52|| tyAgArhaM na hi me paratvamiti tat prachChAdya pItAmbaraH saulabhyAd rajakaM kumartya iva yo vAso yayAche svayam | vedAntairadhunApyameyamahimAkupAravipruTkaNaH so.avyAnnaH svanikR^ittashIrSharajakashlAghyAmbarAla~NkR^itaH || 53|| shrIvaikuNThagato visR^ijya bhagavA~nChrIbhUminIlAdikAn madgehAntaramAgataH sabhujago martyAkR^itiH srakkR^ite | dhanyaH ko.asti madanya ehi bhagavan samyak kariShye.archanA\- mityuktvArchayadAshu mAlyakR^idapi premNA yamavyAt sa naH || 54|| kubjAmapyatidhoravaktravikR^itAmAtmArhagandhapradA\- mAkramya prapade padA chubukamapyutkR^iShya hastAgrataH | samyak shIghramR^ijUkR^itAM shubhatanuM svApekShiNIM yo.avadat pashchAt tvAM muditAM kariShya iti taM svAtmaikatR^iptaM shraye || 55|| nAnopAyanavITikAsumaphalaiH sampUjitaH sAgrajaH pR^ichChan paurajanAn dhanurvaragR^ihaM tatra pravishya svayam | bha~NktvA kaMsadhanustadIyashakalenAhatya tadrakShiNaH sAyaM yaH puTabhedanAt svashakaTaM prAyAt tamadyAshraye || 56|| jyotirdvitvasuvarNavR^ikShavishirashChAyAdisandarshanAt tailAbhya~NgavivastradakShiNagatistrasvapnAshcha kaMso bhayAt | mallAyodhanasambhramekShaNamiSheNArUDhama~ncho janai\- rma~nchasthaiH saha yaM nihantumakarod yatnaM shraye taM harim || 57|| ambaShTheritamArgarodhikariNA samyag gR^ihItashchyutaH tatpAdAntarago bahirgatatanuH puchChe gR^ihItvA dvipam | AkarShan bhramayan bhramannipatitaM chotkR^iShTataddantato hatvA sAgraja AgataH priyajanairyo nanditastaM shraye || 58|| kaMsapreShitakUTatoshalamukhairmayaiH sameto hariM (koshala) vakShojAnumukhe prahR^itya hariNA tatraiva tenAhataH | chANUraH praharan patan vinihato yenotpatan muShTinA rAmeNAtibalena muShTika iva prANAn jahau taM bhaje || 59|| malladhvaMsajighAMsitena hariNA vyAplutya ma~nche tataH kaMsaM bhUmitale nipAtya tarasA tasmin nipatya svayam | mUlaM daityataroH sa yena nihatastaM chintaye.aharnishaM hR^iShTairnandamukhaistu taM munigaNairbrahmAdibhiH pUjitam || 60|| kaMsadhvaMsena dattvA mudamaparimitAM vAsudevaH svapitro\- rbalyAnandApradAnAjjanitamaghamapi kShAmayitvA sarAmaH | rAjAnaM chograsenaM vihativirahitaM sthApayitvA prajAnAM svasminnIshatvachintAmanubhavajanitAM yo.aharat taM bhajAmi || 61|| nAnAdeshanivAsakarshitasuhR^itsvaj~nAtibandhupriyAn kaMsopadravaduHkhitAn puravare saMsthApya tuShTAn dhanaiH | nandaM gopajanaiH saha priyavachobhUShAmbarAdyAdR^itaM prasthApya vrajamagrajena saha yastuShTo.abhavat taM bhaje || 62|| samprApya dvijasaMskR^itiM shubhaguNAd gargAt sarAmo hari\- rvedAdhItikR^ite guruM shubhaguNaM vR^itvA cha sAnndIpanim | (sAndIpinim) labdhvA ShaShTikalA guroratha chaturmishrAshcha tAvaddinai\- rdAtuM tatsutamaichChadambudhimR^itaM yo dakShiNAM taM bhaje || 63|| pArAvAre nimagno hR^itagurutanayaM daityamantarvichinvan hatvAdR^iShTvA sutaM tattanugatamamalaM pA~nchajanyaM gR^ihItvA | yAtvA lokaM yamasya svayamatimahitastena sampUjya dattaM sa~NgR^ihyAdAt sutaM taM gurava urudayo yastamIshaM namAmi || 64|| yatsaMshleShasukhapradAH suruchirA rAtrIH smarantyo.anishaM yatpAdAmbujasa~NgigotarulatAdyAlokanAd duHkhitAH | yannetrAdyakhilAdbhutA~NgadhiShaNAvyatyastakAryA vraje yatsandeshaharaM vilokya sudR^ishastoShaM gatAstaM bhaje || 65|| nandAdIn kR^iShNachintAhR^itanikhilanijavyApR^itIn prApta duHkhAn nAnAvAkyairyadIyairguNacharitamukhaiH sAntvayan tyaktaduHkhAn | samyak kR^itvA cha nItvA vrajabhuvi sumukhaH pa~nchaShAMstatra mAsAn prApto yaM kR^iShNadAsaH kR^itaharivachano hyuddhavastaM prapadye || 66|| sampUjya svagR^ihAgataM harimaho kubjA yamardhyAsana\- sraktAmbUlamahArhachandanamukhairAshliShya shayyAgatam | reme yena sukhapravAhavivashA santyaktalakShmIdharA\- nIlAbhogachayena taM munigaNaiH sandR^ishyamAnaM bhaje || 67|| lIlAmartyatanurnivishya sadane.akrUrasya tena stuto madbhAgyAtishayAjjagajjanilayasthityAdilIlo hariH | prApto.atreti supUjitaH priyatamaM taM prAhiNod yo.a~njasA kaunteyAdivimarshanArthamadhunA gachCheti tasmai namaH || 68|| gatvA hastinapattanaM satanayAM kuntIM muhuH sAntvayan pR^ichChantIM bahushaH sahodaramukhAn bhrAtreyamukhyAn priyAn | putrANAmatiduHsahAn paribhavAnuktvA rudantIM muhu\- rnItvAnekadinAni yaM shubhaguNo.akrUro yayau so.avatAt || 69|| kaMsadhvaMsavirUpayoH svasutayorvAkyAchChvasan mAgadhaH saMrundhan madhurAmanIkanivahairnAnAvidhai rAjabhiH | vaikuNThAgatahetinA balayujA samyag gR^ihItvA mR^idhe (punaH) mukto yena yayau hR^itAkhilaghanaH saMlajjitastaM bhaje || 70|| yAtvA kR^iShNapurIM punarvinIhato bANaM gato mAgadho bANapreShitaku~njarAshvarathayuk senAgaNaiH saMvR^itaH | ruddhvA pUrvavadAshu yAdavapurIM yasmAd gR^ihItvA shikhAM rAmeNAshu jighAMsito hatabalo mukto yayau taM bhaje || 71|| gomantaM draShTukAmaH pathi munimamalaM jAmadagniM sarAmo dR^iShTvA pR^iShTvA cha hatvA giritaTanagare vAsudevaM sR^igAlam | AruhyAdriM cha dR^iShTvA phalasalilasumairvAsayogyaM nivR^ittaH prAptaM prAptaM jaghAnAkhilabalasahitaM mAgadhaM yaH sa no.avyAt || 72|| samprApte yavane surarShivachanAd roddhuM purIM yAdavIM haryairhemamayaiH suratnabhavanaiH svargAdhiko dvArakAm | tvaShTrA vajramahonivAritanishAbuddhiM kR^itAmambudhau dR^iShTvAvAsayadAtmayogavibhavAd yo yAdavAMstaM bhaje || 73|| tasyAM yatpratipattibhaktibhayato devAshcha sarve.avasan dikpAlA nidhayo vidhiH suratarU rudrAH sudharmAdayaH | sandR^iShTo yavanena nirjanapurAd bhUShAvR^ito nirgato hantuM yatnavatA palAyanaparo yo.anudrutastaM bhaje || 74|| rakShovidrutadevarakShaNabhavachChrAntiprashAntyai varaM labdhvA bodhakanAshamAtmanayanAt sa~njAtanidraM chirAt | aikShvAkaM muchukundametya bhagavAn daryAM cha tenAgataM pAdAghAtavibodhitena yavanaM yo.anAshayat taM bhaje || 75|| kastvaM kutra cha janma te vada mama premNeti pR^iShTo hasan bhUbhAroddharaNAya me yadukule trANAya sAdhorjaniH | tvaM mAM yAsyasi bhAvijanmani varo bhUtvA dvijaH samyagi\- tyevaM yo muchukundamAdipuruSho.avAdIt stutastaM bhaje || 76|| hR^itvA tasya dhanaM hate tu yavane gachChan purIM sAgraja\- statkAlAgatamAgadhena balinA yudhyan dravan nirjitaH | tenAnudruta Ashrito.adrishikharaM tasmiMshcha dagdhe tato bhUmiM prApya sushIghragaH samagamad yo dvArakAM taM bhaje || 77|| gatvA kanyakayA vidhiM varakR^ite shrutvA sugItiM tato\- .atItAn padmajavAkyato.atimahataH kAlAMshcha rAmaM varam | AnartAdhiparevatena tanayAM dattAM priyAM revatIM sIrAkR^iShTatanuM shubhAmudavahad yasyAgrajastaM bhaje || 78|| lakShmIshaM lokanAthaM sutanumatanubhiH koTisa~NkhyairatulyaM bhartAraM tvAM bhajeyaM na yadi mama tanutyAga eva tvayAham | hartavyA sampramathyAkhilanR^ipatigaNAnambikArthaM vrajantI\- tyevaM rukmiNyudantaM rahasi sulikhitaM yo.ashR^iNot taM prapadye || 79|| rukmiprItikR^ite vidarbhanR^ipatau chaidyAya dAtuM shubhAM kanyAmichChati satkR^ite nR^ipagaNe chaidye vare.ala~NkR^ite | nAnAma~NgalavAdyapUrNanagare gehe tathAla~NkR^ite yaM prAptaM hyavagamya modamagamad bhaiShmI dvijAt taM bhaje || 80|| samprApto bahusenayA saha harI rAmAdibhiH kuNDinaM bhIShmeNApi susatkR^ito nR^ipatinodyAne vasan sAnugaH | bhaiShmIM pUjitapArvatIndramahiShIM yAntIM gR^ihaM rakShitA\- matyugrairapahR^itya yo.anayadarI~njitvA purIM so.avatAt || 81|| bhUpAn kR^iShNahR^itAM vilokya kupitAn bhaiShmIM nirudhyAhatAn kR^iShNAchChinnapadorubAhushiraso j~nAtvApi rukmI vrajan | yudhyan yena hatAshvasArathidhanurbaddho rathe shAr~NgiNA mukto muNDitamastakaH pratiyayau bhaiShmIyutaM taM bhaje || 82|| nAnAratnamahashChaTAhR^itanishAchihnAM purIM dvArakAM rambhApUgasutoraNadhvajavatIM ramyAM praviShTo hariH | rukmiNyA sahito mumoda sukR^itodvAhotsavo mandire nAnopAyanapANibhUpatigaNairyaH pUjitastaM bhaje || 83|| sUryaprAptashamantakAkhyasumaNeH satrAjito bhrAtaraM kaNThodbhAsimaNiM nihatya vipine.agR^ihNAnmaNiM kesarI | hatvA jAmbavatA tamAttamaNinA yenAshritA svA guhA taM nirjitya mR^idhe maNiM cha tanayAM tasyApa yastaM bhaje || 84|| Aropya bhrAtR^ihatyAM maNiharaNakR^ite vAsudeve.atha tasmA\- chChrutvA tatpUrvavR^ittaM tamapi maNivaraM lajjitaH sampragR^ihya | dattAM satrAjitA yaH svakaluShahataye satyabhAmAM shubhA~NgIM ramyAM prItyopayeme.amaragaNavinutaM taM shraye vAsudevam || 85|| nidrAluM shvashuraM ruShA shatadhanurhatvA maNiM yo.aharat taM hatvA shatayojanAshvagamapi hyanviShya ratnaM hariH | akrUrasthamaNiM prakAshya jagataH svasyApakIrtiM tataH satyArAmashuchaM krudhaM cha mahatIM yo.avArayat taM bhaje || 86|| kaunteyAn prApya nItvA kR^itasakalakatho vR^iShTimAsAn kadAchid gatvA pArthena sAkaM vanamatha yamunAM kanyakAM tatra dR^iShTvA | viShNornAnyasya bhAryAhamiti ravisutAM saMvadantIM rathe yaH kAlindIM sthApya nItvA svapuramudavahat taM bhaje vAsudevam || 87|| kanyAM rAjAdhidevyAH svasurapi cha pituH kR^iShNakAmAM niShiddhAM bhrAtR^ibhyAM mitravindAM shrutasakalakathaH prApya vindAnuvindau | Avantyau tau pramathyAnayadakhilatanurdvArakAM senayA yaH kR^iShNaH kAle shubhe tAmudavahadapi taM vAsudevaM prapadye || 88|| baddhvA sapta vR^iShAn hatAkhilanR^ipAn yaH saptavarShmA hariH satyAM kosalabhUbhR^itA bahudharnairdaintyashvamukhyaiH samam | dattAM nagnajitA nayan nijapurIM nIlAM svasainyairvR^itaH prApte puNyadine priyAmudavahat taM chintaye shrIsakham || 89|| bhadrAM yaH shrutakIrtijAmudavahat paitR^iShvaseyIM tata\- shchApAropaNashaktileshavidhurairbhUpairanekaiH stutaH shIghrAropitachApatADitajhaSho vIryArjitAM lakShmaNAM yo madrAdhipajAM priyAmudavahannItvA puMrIM taM bhaje || 90|| kR^iShNaH patnyA sameto.amarapativachanAd vainateyAdhirUDho gatvA prAjyotiShAkhyaM nagaramatha muraM sAnugaM tatra hatvA | yudhyantaM yuddhashauNDaM kR^itabahunidhano bhaumamapyAshu hatvA bhUmeH pautrAya yo.adAdabhayamatimudA bhUstutastaM prapadye || 91|| ratnAdriM prAhiNod yo.amaragaNapataye vAsavaM vAruNaM cha chChatraM rAj~ne jalAnAmatha narakahR^itaM ShoDashastrIsahasram | svApekShaM divyaratnai rathaturagadhanaiH ku~njarAdyaiH sametaM shvetairdivyairgajendrairanayadakhiladR^ik svAM purIM taM namAmi || 92|| gatvA tArkShyAdhirUDho.amarapatibhavanaM satyayA bhaumagehAd vittai ratnairmaghonAmarapuramahito mAtaraM tatra natvA | mAtre dityai svapatnyA kShititanayahR^itaM kuNDalaM dApayitvA patnIprItyai viveshAmarapatidayitaM nandanaM yo bhaje tam || 93|| hartavyaH pArijAtaH surapatimahiShIgarvahetuH suramyo devyaivaM prerito yo.amarapatidayitaM pArijAtaM cha hR^itvA | tatkopAyAtarudrAntakamukhavibudhAn devarAjaM cha jivA satyAhUtena tena stutanijamahimA svAM purIM prApa so.avyAt || 94|| yatputraH shUlidatto hyagatadashadinaH shambareNa pragR^ihya kShipto.ambhodhau nigIrNo jhaShajaTharagato dhIvaraiH sa~NgR^ihItAt | mInAt tasmAddhatA~NgAdavanimadhigataH shambarasyaiva gehe hR^itvA taM shambarAriM nijapuramagamad bhAryayA taM prapadye || 95|| hatvA kR^itrimasha~NkhachakragaruDaM pauNDraM hariH svAgrajaM tatsAhAyyakaraM cha kAshyadhipatiM mAtAmahaM saMyuge | kR^ityAM tatsutakalpitAM nijapurIdAhAya chakreNa yo vidrAvyAshchadahat tayA tamapi tadvArANasIM taM bhaje || 96|| kR^iShNaH prAptashamantapa~nchakamahAkShetro grahe bhAsvato nAnAdeshasamAgatAkhilanR^ipaiH sampUjitaH sAnugaH | pArthairnandamukhaiH sabandhuvanitA bhR^ityaistathA yogibhiH pitrA kShetrakR^ite makhe sumahito yo.agAt purI so.avatAt || 97|| paT putrAH kaMsabhagNAH kila mama bhagavaMstAn prayachCheti mAtuH shrutvA vAkyaM sarAmo balisadanagatastena sampUjya dattAn | UrNAjjAtAnmarIcheH prahasanakupitAd devalAd dAnavAMstAn hairaNyAna devakIjAnanayadatha hatAn mAtaraM yaH sa no.avyAt || 98|| pArAvArapraviShTAn nR^ipagaNachakitAMstyaktarAjAsanAn na\- styaktvA bhUpeShu yogyaM kamapi bhaja nR^ipaM yaH svachetaH praviShTaH | ityuktA bhIShmaputrI rahasi bhagavatA premakopAnabhij~nA svatyAgAtyantabhItA punarapi bahusho lAlitA yena so.avyAt || 99|| bhaiShmI jAmbavatI priyA bhagavataH satyAya kAlindyato mitrA nagnajitaH sutA cha subhagA bhadrA tathA lakShmaNA | ekaikA samajIjanad dasha sutAn yasmAt tathA ShoDasha\- strIsAhasrabhavaiH sutaiH subahubhiH pUrNA nahI taM bhaje || 100|| pradyumnenoddhR^itAyAH svaduhituruditAyAniruddhAya pautrIM dattvA tasmin vivAhe priyabalasahitaH samyagakShairvidItryan | jetAraM taM jito.asItyapanayavachanAt tena rukmI hato.abhUd yasya syAlo.agrajena shritanijanagaraH sAnugaH so.avatAnnaH || 101|| sauvarNAyutaShaTsahasravanitAgeheShu ratnollasa\- nnAnAsaudhavirAjiteShu kalaye shauriM lasantaM pR^ithak | dhyAnastotrajapArchanapraNamanasvAdhyAyahomArhaNa\- krIDAnR^ittasuddR^igvihAralalitAlApA~NgacheShTAdibhiH || 102|| shrutvA mAgadhamandire nR^ipagaNairuddhairhariH preShitA\- ddhatvA mAgadhamIshvarAdya kR^ipayA trAhIti nastadvachaH | AhUto.atha yiyakShuNA suramunervAkyAt pR^ithAsUnunA shakraprasthamagAt sarAmadayitAsenastamevAshraye || 103|| gatvA brAhmaNabhImaphalgunayujA janyaM mayA brahmaNA bhikShAM yAchita etya mAgadhanR^ipo yudhyan raNe ghAtitaH | bhImenaiva vipATito mR^itimagAt kAShThA jitA bhrAtR^ibhiH pArthAtaH kuru rAjasUyamiti yo.avAdIt tamavyAt sa naH || 104|| aNDAnAmadhipe vashe mayi sadA kaunteya ke te.avashA\- stasmAt sAdhaya rAjasUyamiti yadvAkyAt sa dharmAtmajaH | nAnAdeshasamAgatairnR^ipagaNaiH sAkaM munIndraiH surai\- rbrahmAdyairakarot priyaM kratuvaraM kR^iShNAya tasmai namaH || 105|| sutye.ahanyudite sadasyanupame prApte.agryapUjAvidhI kasya syAdakhileshvaraM harimR^ite pUjeti dharmAtmajaH | yatpAdAvavanijya tena payasA samprokShya mUrdhno.akhilA\- nAtmAnaM cha parAn hatAkhilamalAn mene sa no.avyAddhariH || 106|| gopastyaktanR^ipAsano.ambudhigato durvR^itta karmA kathaM pUjyaH syAnmahato vihAya sadasi j~nAtreti chaidyo vadan | chakrachChinnashirAH kShitau vinipatan dehodgatajvAlayA sarveShAM mipatAM yamApa vigate shApe tamevAshraye || 107|| rAjAnaM dharmaputraM muninR^ipatigaNaiH stUyamAnaM sabhAyAM draShTuM gachCha~njale.api sthalamiti nipatan dR^iShTa uchchairhasadbhiH | sadyo gachChan nivR^ittaH svapuramapi javAd dhArtarAShTro.atikopAd yenaivopekShito.abhUdavanibharabhR^itA so.avatAd vAsudevaH || 108|| sAlvaH kR^iShNahatAgrajo nijatapastuShTAchChivAt kAmagAM labdhvA saubhapurIM tayA saha gato bha~NktvA purIM dvArakAm | pradyumnapramukhairjito bahudinaM yudhyan gataH shauriNA yenAnudruta Agatena nihataH sAkaM purA taM shraye || 109|| kR^iShNaH prAptaH sudharmAM bahunR^ipatigaNaiH sevito brAhmaNoktyA pA~nchAlIgAtravastrApaharaNamuditAd dhArtarAShTrAdaraNyam | prAptaM sabhrAtR^ibhAryaM jitahR^itasakalaM pArthamakShairviditvA yo gatvAshvAsya tenoditasakalakatho.agAt purIM svAM shraye tam || 110|| dattvA brAhmaNadattagAmapi punargobhirnR^igo brahmaNe svAmibhyAM kalahAt sametya gadito dattApahartetyatha | taddoShAt kR^ikalAsatAmupagataH shvabhre chiraM saMvasan sparshAd yasya nR^ipo bhavan yamanagho natvA gatastaM bhaje || 111|| nandAdIn prApya mAsaistribhiramitaguNAM varNayan kR^iShNacharyAM kurvan santyaktaduHkhAn vrajabhuvi viharan vAruNIpAnamattaH | krIDArthaM gopikAbhiH saha ravitanayAM rAma AhUya kopA\- daprAptAmAchakarShAgraja uruhalato yasya taM saMshraye.aham || 112|| sAmbo yasya sutaH suyodhanasutAmAhR^itya yudhyan nR^ipai ruddho hastinapattane hata iti shrutvAtha yasyAgrajaH | yAtvA kauravapUjitaH punaradhikShipto halAt tatpuraM jAhnavyAM vinipAtayan svasutayuk tairAhatastaM bhaje || 113|| gopIbhirviharan vibhAvasubhavAkachChe manoj~nAnile ChAyAyAM phalapuShpapUrNasutaro rAmo vraje vR^ikShagam | bhrUkShepairgudadarshanena cha shilAkShepAdibhirhu~NkR^itai\- ryudhyantaM dvividaM kShaNena hatavAn yasyAgrajastaM bhaje || 114|| dAridryAtyantakhidyadvitaparamahilAduHkhavAkyapraNunnaM prAptaM premNA kuchelaM bahumaNikhachite svAsane samprapUjya | tatkanthAveShTitaM yaH pR^ithukamatimudA muShTimeyaM prajagdhaM tadgehaM vittamuktAmaNinidhimakarot taM bhaje vAsudevam || 115|| gatvA maithilapattanaM bahujanaiH sArdhaM munIndrairharI rUpAbhyAM shrutadevaveshma bahulAshvasyApi veshmaikadA | anyonyAviditaH pravishya kR^ipayA tAbhyAM stutaH pUjito bhaktau tAvanugR^ihya yaH puramagAt svIyAM tameva shraye || 116|| yasya svAtmashayaM kShipAmi shirasi syAt tatkShaNAd bhasmasAd dehi tvaM varamIshvareti vadate dattvA varaM sha~NkaraH | tatsiddhipramitiprasAritakaraM spraShTuM shiraH svaM vR^ikaM dR^iShTvA pravyathinaH palAyanaparo yenAvitastaM bhaje || 117|| satre brahmasuto bhR^igurmunigaNaiH pAramyanirdhAraNe (dharmasuto) sandiShTo vidhimetya taM prakupitaM j~nAtvAstavAchCha~Nkaram | prAptastena jighAMsitaH pratighayAnAshleShaNAnmAdhavaM vaikuNThe praharan padAtimahito yenAvitastaM bhaje || 118|| bhUbhR^itpApahatAtmajAgrajashishuprANAvanaikavratI kR^itvA bANagR^ihaM shishorasumavan naShTe shishau phalgunaH | gatvA devagR^ihAMstadIyatanayAlabdhyAgniveshodyamI vaikuNThasthitatatsutAn pradadatA yenAvitastaM bhaje || 119|| santIrNAj~nAtavAsAn harirakhilanuto gograhaprAptayuddhAn prAptA~nshrutvAtha gatvA kR^itabahuvachano hastinaM prApya dUtaH | bhuktvA bhaktyAnnamiShTaM viduragR^ihagato vIkShya yo dhArtarAShTrAn teShAM svadrohachintAmaharadatha nijAd vaishvarUpyAd bhaje tam || 120|| bhUtvA phalgunasArathI rathagataH senAdvayAntargato bandhusnehanivR^ittayuddhavijayaprotsAhanavyAjataH | dehAtmasvagatiM vimuktipadavIM sA~NgAM svabhaktiM tato .ashaktAnAmapi muktidaM svacharaNaM yo.agAyadavyAt sa naH || 121|| dattvA divyadR^ishaM hariH karuNayA yo vishvarUpaM maha\- nnAnAmastakanetrabAhucharaNaM bIbhatsave.adarshayat | koTyarkojjvalama~Ngasa~Ngatajagad brahmAdibhiH sannutaM nAnAdaMShTramukhAdyamAnajanatAbhImaM sa devo.avatAt || 122|| shAntaM shAntanavaM hariM navadinaiH kR^itvA shikhaNDAtmako dhR^iShTadyumnatanurmR^idhe vinihataM droNaM dinaiH pa~nchabhiH | karNaM chArjunato hataM tridivasaiH shalyaM cha dharmAtmajAt sAyaM bhImahataM suyodhanamagAd yastoShamavyAt sa naH || 123|| shaptaH strIveShasAmbodaragatamusalAkAralohaprachUrNa\- protpannairerakAgraiH kubharanijakulaM nAshayitvA mitho yaH | rAmAsyodvAntasheShaM jalapativinutaM tatpraviShTaM prapashya\- nnindreNa prArthito.abhUnnijapadagataye taM prapadye murArim || 124|| prApte hetigaNe vimuktipadavIM bhittvA ravermaNDalaM (mukhe) puryA majjanamambudhau svagamanaM svAnAM parij~nApya yaH | lubdhotsR^iShTasharAhatA~NghrikamalaH svaH prApayan taM kShaNAt prAyAd dhAma nijaM hR^itAvanibharaM nArAyaNaM taM bhaje || 125|| shrIvAsudevacharitAni malApahAni puNyAni muktiphaladAnyatimAnuShANi | yo vetti chintayati vakti shR^iNoti nityaM prApnoti muktimachirAt sa mukundadR^iShTaH || 126|| iti shrI (ashoka) raghunAthAchAryeNa virachitaM gopAlashatakaM sampUrNam | hariH OM | shrInivAsarAmAnuja mahAde shikAya namaH | shrImadvedAntarAmAnujamahAdeshikAya namaH | stotrasamuchchayaH 2 (55) ## Proofread by Rajesh Thyagarajan \medskip\hrule\obeylines Please send corrections to sanskrit at cheerful dot c om Last updated \today https://sanskritdocuments.org \end{document}