% Text title            : Indradyumnakritam Karunyastavavarnanam
% File name             : indradyumnakRRitaMkAruNyastavavarNanam.itx
% Category              : vishhnu, vishnu, brahmapurANa
% Location              : doc\_vishhnu
% Proofread by          : PSA Easwaran
% Description/comments  : brahmapurANa | adhyAya 49/1-71||
% Latest update         : September 29, 2024
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Indradyumnakritam Karunyastavavarnanam ..}##
\itxtitle{.. indradyumnakR^itaM kAruNyastavavarNanam ..}##\endtitles ##
indradyumna uvAcha |
vAsudeva namaste.astu namaste mokShakAraNa |
trAhi mAM sarvalokesha janmasaMsArasAgarAt || 1||
nirmalAmbarasa~NkAsha namaste puruShottama |
sa~NkarShaNa namaste.astu trAhi mAM dharaNIdhara || 2||
namaste hemagarbhAbha namaste makaradhvaja |
ratikAnta namaste.astu trAhi mAM saMvarAntaka || 3||
namaste.a~njanasa~NkAsha namaste vibudhapriya |
nArAyaNa namaste.astu trAhi mAM varado bhava || 4||
namaste vibudhAvAsa namaste vibudhapriya |
nArAyaNa namaste.astu trAhi mAM sharaNAgatam || 5||
namaste balinAM shreShTha namaste lA~NgalAyudha |
chaturmukha jagaddhAma trAhi mAM prapitAmaha || 6||
namaste nIlameghAbha namaste tridashArjita |
trAhi viShNo jagannAtha magnaM mAM bhavasAgare || 7||
pralayAnalasa~NkAsha namaste ditijAntaka |
narasiMha mahAvIrya trAhi mAM dIptalochana || 8||
yathA rasAtalAdurvIM tvayA daMShTroddhR^itA purA |
tathA mahAvarAhastvaM trAhi mAM duHkhasAgarAt || 9||
tavaitA mUrtayaH kR^iShNa varadAH saMstutA mayA |
taveme baladevAdyAH pR^ithagrUpeNa saMsthitAH || 10||
a~NgAni tava devesha garutmAdyAstathA prabho |
dikpAlAH sAyudhAshchaiva keshavAdyAstathA.achyuta || 11||
ye chAnye tava devesha bhedAH proktA manIShibhiH |
te.api sarve jagannAtha prasannAyatalochana || 12||
mayA.architAH stutAH sarve tathA yUyaM namaskR^itAH |
prayachChata varaM mahyaM dharmakAmArthamokShadam || 13||
bhedAste kIrtitA ye tu hare sa~NkarShaNAdayaH |
tava pUrjArthasambhUtAstatastvayi samAshritAH || 14||
na bhedastava devesha vidyate paramArthataH |
vividhaM tava yadrUpamuktaM tadupachArataH || 15||
advaitaM tvAM kathaM dvaitaM vaktuM shaknoti mAnavaH |
ekastvaM hi hare vyApI chitsvabhAvo nira~njanaH || 16||
paramaM tava yadrupaM bhAvAbhAvavivarjitam |
nirlepaM nirguNaM shreShThaM kUTasthamachalaM dhruvam || 17||
sarvopAdhivinirmuktaM sattAmAtravyavasthitam |
taddevAshcha na jAnanti kathaM jAnAmyahaM prabho || 18||
aparaM tava yadrUpaM pItavastraM chaturbhujam |
sha~NkhachakragadApANimukuTA~NgadadhAriNam || 19||
shrIvatsoraskasaMyuktaM vanamAlAvibhUShitam |
tadarchayanti vibudhA ye chAnye tava saMshrayAH || 20||
devadeva surashreShTha bhaktAnAmabhayaprada |
trAhi mAM padmapatrAkSha magnaM viShayasAgare || 21||
nAnyaM pashyAmi lokesha yasyAhaM sharaNaM vraje |
tvAmR^ite kamalAkAnta prasIda madhusUdana || 22||
jarAvyAdhishatairyukto nAnAduHkhairnipIDitaH |
harShashokAnvito mUDhaH karmapAshaiH suyantritaH || 23||
patito.ahaM mahAraudre ghore saMsArasAgare |
viShamodakaduShpAre rAgadveShajhaShAkule || 24||
indriyAvartagambhIre tR^iShNAshokormisa~Nkule |
nirAshraye nirAlambe niHsAre.atyantacha~nchale || 25||
mAyayA mohitastatra bhramAmi suchiraM prabho |
nAnAjAtisahasreShu jAyamAnaH punaH punaH || 26||
mayA janmAnyanekAni sahasrANyayutAni cha |
vividhAnyanubhUtAni saMsAre.asmi~njanArdana || 27||
vedAH sA~NgA mayA.adhItAH shAsrANyayutAni cha |
vividhAnyanubhUtAni saMsAre.asmi~njanArdana || 28||
asantoShAshcha santoShAH sa~nchayApachayA vyayAH |
mayA prAptA jagannAtha kShayavR^id.hdhyakShayetarAH || 29||
bhAryArimitrabandhUnAM viyogAH sa~NgamAstatA |
pitaro vividhA dR^iShTA mAtarashcha tathA mayA || 30||
duHkhAni chAnubUtAni yAni saukhyAnyanekashaH |
prAptAshcha bAndhavAH putrA bhrAtaro j~natayastathA || 31||
mayoShitaM tathA strINAM koShThe viNmutrapichChale |
garbhavAse mahAduHkhamanubhUtaM tathA prabho || 32||
duHkhAni yAnyanekAni bAlyayauvanagochare |
vArdhake cha hR^iShIkesha tAni prAptAni vai mayA || 33||
maraNe yAni duHkhAni yamamArge yamAlaye |
mayA tAnyanubhUtAni narake yAtanAstathA || 34||
kR^imikITadrumANAM cha hastyashvamR^igapakShiNAm |
mahiShoShTragavAM chaiva tathA.anyeShAM vanaukasAm || 35||
dvijAtInAM cha sarveShAM shUdrANAM chaiva yoniShu |
dhaninAM kShatriyANAM cha daridrANAM tapasvinAm || 36||
nR^ipANAM nR^ipabhR^ityAnAM tathA.anyeShAM cha dehinAm |
gR^iheShu teShAmutpanno deva chAhaM punaH punaH || 37||
gato.asmi dAsatAM nAtha bhR^ityAnAM bahusho nR^iNAm |
daridratvaM cheshvaratvaM svAmitvaM cha tathA gataH || 38||
hato mayA hatAshchAnye ghAtito ghAtitAstathA |
dattaM mamAnyairanyebhyo mayA dattamanekashaH || 39||
pitR^imAtR^isuhR^idbhrAtR^ikalatrANAM kR^itena cha |
dhaninAM shrotriyANAM cha daridrANAM tapasvinAm || 40||
uktaM dainyaM cha vividhaM tyaktvA lajjAM janArdana |
devatir~NmanuShyeShu sthAvareShu chareShu cha || 41||
na vidyate tathA sthAnaM yatrAhaM na gataH prabho |
kadA me narake vAsaH kadA svarge jagatpate || 42||
kadA manuShyalokeShu kadA tiryaggateShu cha |
jalayantre yathA chakre ghaTI rajjunibandhanA || 43||
yAti chordhvamadhashchaiva kadA madhye cha tiShThati |
tathA chAhaM surashreShTha karmarajjusamAvR^itaH || 44||
adhashchordhvaM tathA madhye bhraman gachChAmi yogataH |
evaM saMsArachakre.asmin bhairave romaharShaNe || 45||
bhramAmi suchiraM kAlaM nAntaM pashyAmi karhichit |
na jAne kiM karomyadya hare vyAkulitendriyaH || 46||
shokatR^iShNAbhibhUto.ahaM kAndishIko vichetanaH |
idAnIM tvAmahaM deva vihvalaH sharaNaM gataH || 47||
trAhi mAM duHkhitaM kR^iShNa magnaM saMsArasAgare |
kR^ipAM kuru jagannAtha bhaktaM mAM yadi manyase || 48||
tvadR^ite nAsti me bandhuryo.asau chintAM kariShyati |
deva tvAM nAthamAsAdya na bhayaM me.asti kutrachit || 49||
jIvite maraNe chaiva yogakSheme.atha vA prabho |
ye tu tvAM vidhivaddeva nArchayanti narAdhamAH || 50||
sugatistu kathaM teShAM bhavetsaMsArabandhanAt |
kiM teShAM kulashIlena vidyayA jIvitena cha || 51||
yeShAM na jAyate bhaktirjagaddhAtari keshave |
prakR^itiM tvAsurIM prApya ye tvAM nindanti mohitAH || 52||
patanti narake ghore jAyamAnAH punaH punaH |
na teShAM niShkR^ikistasmAdvidyate narakArNavAt || 53||
ye dUShayanti durvR^ittAstvAM deva purUShAdhamAH |
yatra yatra bhavejjanma mama kramanibandhanAt || 54||
tatra tatra hare bhaktistvayi chAstu dR^iDhA sadA |
ArAdhya tvAM surA daityA narAshchAnye.api saMyatAH || 55||
avApuH paramAM siddhiM kastvAM deva na pUjayet |
na shaknuvanti brahmAdyAH stetuM tvAM tridashA hare || 56||
kathaM mAnuShabud.hdhyA.ahaM staumi tvAM prakR^iteH param |
tathA chAj~nAnabhAvena saMstuto.asi mayA prabho || 57||
tatkShamasvAparAdhaM me yadi te.asti dayA mayi |
kR^ipAparAdhe.api hare kShamAM kurvanti sAdhavaH || 58||
tasmAtprasIda devesha bhaktasnehaM samAshritaH |
stuto.asi yanmayA deva bhaktibhAvena chetasA |
sA~NgaM bhavatu tatasarvaM vAsudeva namo.astu te || 59||
(phalashrutiH)
brahmovAcha |
itthaM stutastadA tena prasanno garuDadhvajaH |
dadau tasmai munishreShThAH sakalaM manasepsitam || 60||
yaH sampUjya jagannAthaM pratyahaM stauti mAnavaH |
stotreNAnena matimAnsa mokShaM labhate dhruvam || 61||
trisandhyaM yo japedvidvAnidaM stotravaraM shuchiH |
dharmaM chArthaM cha kAmaM cha mokShaM cha labhate naraH || 62||
yaH paThechChR^iNuyAdvA.api shrAvayedvA samAhitaH |
sa lokaM shAshvataM viShNoryAti nirdhUtakalmaShaH || 63||
dhanyaM pApaharaM chedaM bhuktimuktipradaM shivam |
guhyaM sudurlabhaM puNyaM na deyaM yasya kasyachit || 64||
na nAstikAya mUrkhAya na kR^itadhnAya mAnine |
na duShTamataye dadyAnnAbhaktAya kadAchana || 65||
dAtavyaM bhaktiyuktAya guNashIlAnvitAya cha |
viShNubhaktAya shAntAya shraddhAnuShThAnashAline || 66||
idaM samastAghavinAshahetuH kAruNyasa.nj~naM sukhamokShadaM cha |
asheShavA~nChAphaladaM variShThaM stotraM mayoktaM puruShottamasya || 67||
ye taM susUkShmaM vimalA murAriM dhyAyanti nityaM puraShaM purANam |
te muktibhAjaH pravishanti viShNuM mantrairyathA.a.ajyaM hutamadhvarAgnau || 68||
ekaH sa devo bhavaduHkhahantA paraH pareShAM na tato.asti chAnyat |
dra(sra)ShTA sa pAtA sa tu nAshakartA viShNuH samastAkhilasArabhUtaH || 69||
kiM vidyayA kiM svaguNaishcha teShAM yaj~naishcha dAnaishcha tapobhirugraiH |
yeShAM na bhaktirbhavatIha kR^iShNe jagadgurau mokShasukhaprade cha || 70||
loke sa dhanyaH sa shuchiH sa vidvAn makhaistapobhiH sa guNairvariShThaH |
j~nAtA sa dAtA sa tu satyavaktA yasyAsti bhaktiH puruShottamAkhye || 71||

iti brahmapurANe ekonapa~nchAshattamA.adhyAyAntargataM
       indaradyumnakR^itaM kAruNyastavavarNanaM samAptam |

brahmapurANa | adhyAya 49/1\-71||
##
brahmapurANa . adhyAya 49/1-71..

Proofread by PSA Easwaran 

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}