% Text title            : Shri Nrisimhapuratirtha Mahima Varnanam
% File name             : nRRisiMhapuratIrthamahimAvarNanam.itx
% Category              : vishhnu, dashAvatAra, viShNu, padmapurANa, tIrthakShetra
% Location              : doc\_vishhnu
% Proofread by          : Manoj Kumar Barman
% Description/comments  : nRRisiMhakosha 3 upAsanA khaNDa uttarArdha. padmapurANe shrInRisiMhapuramAhAtmye shrIshivapArvatI saMvAde
% Latest update         : August 11, 2025
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Shri Nrisimhapuratirthamahimavarnanam ..}##
\itxtitle{.. shrInR^isiMhapuratIrthamahimAvarNanam ..}##\endtitles ##
dakShiNa prayAga mAhAtmya
\section{prathamo.adhyAyaH}
 || shrIgaNeshAya namaH | shrIlakShmInR^isiMhAya namaH ||
lakShmIshobhitavAmabhAgamamalaM siMhAsane sundaram |
savye chakradharaM cha nirbhayakaraM vAmena chApaM varam ||
sarpAdhIshakR^itAtapatramamalaM shrIvatsavakShaHsthalam |
vande devamunIndravanditapadaM lakShmInR^isiMhaM vibhum || 1||
shrutvA mAhAtmyamatulaM kShetrANAM sarahasyakam |
sarvArthaikapadaM guhyamapR^ichChan munayo.amalAH || 2||
ko devaH sarvadevAnAM kvAste kIdR^igavidhaH katham |
pUjyo mantro.asya kaH sUta sarvaM tachcha vadasva naH || 3||
sUta uvAcha |
munayaH sAdhupR^iShTo.ahaM lokAnAM hitamIpsubhiH |
vakShye guhyaM bhagavate natvA vyAsAya dhImate || 4||
ekadA rahasi sthANuM samAdhinirataM satI |
praNamyovAcha madhuraM jij~nAsurguhyamAtmani || 5||
devyuvAcha |
sarvaj~na prANanAthesha prasAdaM kuru sha~Nkara |
kiM dhyAyase chiraM chitte dhyeyaste kaH parAtmanaH || 6||
 itthaM chetkR^ipayA te.adya shroShyAmyArtArtinAshana |
tava prasAdAdahamapyantastaM chitaye vibhum || 7||
shrIshiva uvAcha |
shR^iNu devi paraM guhyamanAkhyeyamapi kvachit |
vakShye dhyeyaM sadA yattadanirdeshyaM manogirAm || 8||
yadekamajaraM shAntaM sachchidAnandarUpakam |
anAkhyaM narasiMheti prasiddhaM chintAyAmi tat || 9||
AtmA yaH sarvabhUtAnAmanAdinidhano.avyayaH |
svaprakAshaH surAdhIshairabhivandyapadAmbujaH || 10||
eShaH svalIlayA vishvaM sR^ijatyavati hantyajaH |
nAnAvatArairvishvAtmA krIDatyadbhutavikramaH || 11||
devAnAM guNali~NgAnAmeSha kAraNamakSharam |
kSharAkSharavibhedAbhyAmeSha sarvatra rAjate || 12||
ali~NgaH sarvali~NgAtmA prANali~Ngo maheshvari |
nR^isiMho.akhaNDamAtmasthaH svAtmanA chintyate vibhuH || 13||
devyuvAcha |
devesha jagadIshAna sarvaj~na karuNAkara |
j~nAta AtmA nR^isiMheti prasAdAttava sha~Nkara || 14||
kathaM j~neyo mahAmUDhairajitAtmabhirIshvaraH |
tanmAmAkhyAhi yatrAsau sukhenAvApyate.akhilaiH || 15||
shrIshiva uvAcha |
j~neyo bhaktyaiva nR^iharirlabdhavA satsamAgamAt |
viraktaH sarvabhogeShu sarvAtmA sarvatomukhaH || 16||
bAlA vA j~nAninaH saktA viraktA vA guNAtmakAH |
muchyeran saMsR^iterbhaktyA hareH satsa~NgalabdhayA || 17||
bhaktistadekaniShThA yA kAyavA~NmanasA sadA |
bahubhirbahudhA proktA sadyaH saMsR^itihAriNI || 18||
anantajanmasAhasraiH sa~nchitaiH puNyarAshibhiH ||
bhaktisyAnnR^iharau bhavyA sarvAtmanyakhilAshraye || 19||
nAnApAtakayukto.api mUDho.apyavijitendriyaH |
lIlayApnoti kaivalyaM nR^iharernAmakIrtanAt || 20||
durArAdhyo nR^ibhirmUDhairavipakvedriyairayam |
sukhenAvApyate yatra tadguhyaM bravImi te || 21||
purA tripuradAhena taptAsheShatanormama |
sudhAMshuga~NgAsa~Ngo.api na shAntyaiyadabhUchChive || 22||
tadA bhImatanoragre surAH sthAtumanIshvarAH |
gatvA brahmAdayo viShNuM sharaNyaM suvyajij~napan || 23||
devA UchuH |
jaya shAnta balAdhAra vishvarUpa parAtpara |
viShNo tripurasaMharturdAhaM shamaya mAdhava || 24||
eSha vIro mahAbhIma ugraH krodhAgnidIpanaH |
trinetro dAhasantapto grAsaM kartA ghanaH sphuTam || 25||
pAhi pAhi trilokesha hAlAhalagilAnanAt |
akANDe pralayo mA bhUdachyutAshritadehinAm || 26||
shrIshiva uvAcha |
 iti viklavitaM teShAM surANAM vIkShya mAdhavaH |
prahasya meghagambhIrAM babhAShe vAchamamR^itAm || 27||
shrIbhagavAnuvAcha |
abhayaM vo.amarA astu shivalIlAniveshataH |
etasmAnnahi sAdhUnAM bhItirvishvAtmarUpiNaH || 28||
bhImo.ayaM kila bhImAnAM mR^ityormutyu~njayo.asau |
kAlasyApi mahAkAlaH shivAnAM tu shivaM sa hi || 29||
ayaM me hR^idayaM shambhurasyAhaM hR^idayaM param |
 iti jAnAti tattvena yaH samuchyeta sa~NkaTAt || 30||
asti tatra sarit puNyA bhImA bhImA~NgasambhavA |
nIrAkAraM vapuH kR^itvA vidhAsye tatra sa~Ngamam || 31||
ato.ahaM dravarUpeNa svAM shaktiM prerayan surAH |
tamadyadravarUpeNa krIDantaM samupaimi bhoH || 32||
tatra yUyaM samAyAta sarve sarvArthasAdhakam |
draShTuM bhImAdravAyogaM lokAnnA hitamIpsavaH || 33||
shrIshiva uvAcha |
 ityAdishya surAn viShNustatraivAntaradhIyata |
devaH sadyodravAkAraM daddashurvismitAntarAH || 34||
tadaiva me hya~NgabhUtA nadI sarvAghahAriNI |
chachAra nIrayA bhImA pAvanI sarvadehinAm || 35||
devA ubhayataH kUle pashyanto hR^iShTamAnasAH |
yayuryatrobhayoH sa~NgaH pratyagAtmA hariH sthitaH || 36||
AlokyAtmaikasaukhyaM shrImandiraM sundarottamam |
praNamya stutibhiH stutvA divyapuShpairavAkiran || 37|
nadIsa~NgamasusnAtA hatapApatamobharAH |
nR^isiMhadarshanAnandanirbharAste.abhavansurAH || 38||
taddevi paramaM kShetraM siddhInAM paramAyanam |
Aste yatrAnishaM devo nR^isiMho bhaktavatsalaH || 39||
sudarshanamityabhihitaM kShetraM yad vedavidvaraiH |
tannAbhireSha bhUgarbhe kShetrarAjo virAjate || 40||
kalikalmaShabuddhInAM mahApApakR^itAmapi |
darshanAtpAparAshighno bhajanAd bhuktimuktidaH || 41||
atraiva mR^igyaH sarvAtmA nR^isiMho bhavabhIrubhiH |
dhyeyaH pUjyo namasyo.ayaM sarvArthaikAmaradrumaH || 42||

 @iti shrIpadmapurANe nR^isiMhapuramAhAtmye shivapArvatI saMvAde
kShetrotpattikathanaM nAma prathamo.adhyAyaH |
\section{dvitIyo.adhyAyaH}
devyuvAcha |
kAsau shaktidravIbhUtA viShNoste jIviteshvara |
kiM nAma kathamAkhyAbhUdyudayoriti shaMsa me || 1||
shrIshiva uvAcha |
yA shaktirvaiShNavI devi dravIbhUtAmalAshivA |
sA nIreti samAkhyAtA viShNutattvaikavAdibhiH || 2||
nayanI sarvabhAvAnnAM nIrA yA kathyate budhaiH |
sA nIrA prathitA loke viShNoH shaktiH pareshvarI || 3||
niHsheSharamaNA nIrA chidrasAnandavardhinI |
nIrAkArA haritanuH sevyA suramunIshvaraiH || 4||
nAnAsiddhipradA puNyA puNyavadabhiravApyate |||
tathA bhImeti vikhyAtA mamashaktiH shivAshive || 5||
nAshaM nayati pApAni lokAnAM yA svarUpataH |
bhImasya me dravatanurbhImA lokeShu paThyate || 6||
iyaM harati lokAnAM bhItiM hi bhavasindhutaH |
nIrAharirahaM bhImA dvayoryogaH sudurlabhaH || 7||
sa~Ngamo.ayaM bhuvi khyAtaH prayAga iti pAvanaH |
abhavadyajanaM yatra praharShamagaman surAH || 8||
prayAgamiti vikhyAtaM prayAgAtkoTipuNyadam |
maharShibhiH kathito yasya mahimA shR^iNu pArvati || 9||
nIrAbhImarathIyogaM ye shrR^iNvanti vidUrataH |
te pApapa~njaraM hitvA yAnti viShNoH paraM padam || 10||
kiM punaH shR^iddhayA nityaM ye sevante mahAdhiyaH |
nR^isiMhamUrti sanddaShTvA purIM prAptA mahodayAH || 11||
nIrA nIreti bhImeti sakR^innAma japanti ye |
teShAM nAmaiva gR^iNatAM yamadUtA na gocharAH || 12||
nIrAbhImAmbukalloladarshanoditachetasAm |
pitaro narakAdyAnti bahirvimalitAshayAH || 13||
ichChanti te sadAtyetadaho naH kuladIpakaH |
kashchidgatA naro yogaM nIrAbhImodbhavaM sudhIH || 14||
tarpayiShyati susnAtaH shrAddhaM bhaktyA kariShyati |
tena tR^iptA divaM gatvA vatsyAmaH shAshvatIH samAH || 15||
nIrA bhImarathIyogaM draShTustuShTAH pitAmahAH |
puShTiM dadAti dharmasya kaShTAn dUre dadhatyalam || 16||
nIrAbhImarathIyoge snAtasyA~NgeShu bindavaH |
tAvantyabadsahasrANi vasatiH smaryate divi || 17||
yamuddishyA~njaliM datte nIrAbhImAmbusa~Ngame |
sa vimAnamupAruhya tatkShaNAnmuchyate bhavAt || 18||
nIrA bhImarathIyoge shrAddhaM kR^itvA vichakShaNaH |
AkalpaM nayate tR^ipti pitR^inekottaraM shatam || 19||
ye nAnAyonigatAro ye nAnAnarakArditAH |
te muchyante kShaNAdeva nIrAbhImAmbutarpaNAt || 20||
ekaM sammbhojayanjIvaM nIrAbhImAmbusa~Ngame |
trailokyatR^ipti vidhivannayedAkalpikIM naraH || 21||
yatra shrImAn narahariH kaivalyAdyakhilArthadaH |
bhaktAnugrahavAnAste sarUpo.arUpavAnapi || 22||
aho kShetrasya mAhAtmyaM ko vijAnAti tattvataH |
sahasravadano.apyAho yatra mUka iva sthitaH || 23||
evaM narahareH sAkShAt sachchidAnandarUpiNaH |
sharIraM kShetrarUpeNa pratiShThAmAptamatra hi || 24||
vAlukAviShNurUpeNa taravo vibudhottamAH |
pakShiNo munayo yatra mAnavAshchidrasAtmakAH || 25||
sadA puNyatamaH kAlo deshaH puNyatamaH sadA |
sadA pAtraM pavitraM hi yatra devo nR^ikesarI || 26||
tattIrthaM tIrthataraNaM tatsAdhanamanuttamam |
sA siddhirmahatI devi yannR^isiMheti kIrtanam || 27||
yasya lIlAtanoH pUrvaM pashchAdvApArshva ityalam |
na shakyate.adhikaM kartuM paripUrNasya sarvataH || 28||
tathApi lIlayA tasya gatInAM niyamaH kR^itaH |
tenaiva pashyatAM devi brahmAdInAM puraH purA || 29||
devAgre muktiruddiShTAmR^itAnAM pR^iShThatodhanam |
vAme svargo.atha vij~nAnaM dakShiNe paramAtmanaH || 30||
labghA bharatavarShe.atra janmamAnuShamuttamam |
na gachChennR^ihareH sthAnaM sa shochyova~nchito bata || 31||
nR^ishabdo jIvavAchIha siMshabdo bandhavAchakaH |
nR^isiM hantA nR^isiMho.ayaM jIvabandhavinAshakaH || 32||
nR^isiMheNAbhito j~nAnaM bhaktivairAgyayogataH |
pUrNa puraM trilokasthairnR^isiMhapuramIryate || 33||
etadrahasyaM triShu viShTapeShu rahasyametat triShu vaidikeShu |
etadrahasyaM triguNeshvareShu sa~NgIyate vedashirobhirAryaiH || 34||
etattrayANAM lokAnAmupariShTAtpurAsthitam |
madanugrahato bhUmau khyAtimAgAdanuttamAm || 35|
brahmaNA tu purA proktaM rahasyaM me prasa~NgataH |
mayA proktaM nAradAya surebhyaH prAha yo mudA || 36||
tato lokeShu vikhyAtamabhUtpApaharaM param |
sadyaH siddhikaraM devi mahAmokShaikasAdhakam || 37||
vinA japaM vinA dhyAnaM vinAchendriyasaMyamam |
yathAtra bhuktirmuktishcha na tathAnyatra kutrachit || 38||
santi puryovanAnIha sarichChailasarAMsyaho |
na nR^isiMhasamo devo nIrAbhImAkR^itAlayaH || 39||
ekataH sarvatIrthAni nR^isiMhapuramekataH |
na bhavanti samAnyAyeM bhuktimuktimaharddhibhiH || 40||
kalikalmaShabuddhInAM purato mR^iNmayaM sphuTam |
bhaviShyati mahAkShetraM sarvatejomayaM tvidam || 41||
na karlina cha vA kAlo nAdhirnavyAdhirulbaNA |
yatra jAgarti chaNDogro mR^ityormR^ityurnR^ikesarI || 42||
tAvatpAtakamAta~NgA garjanti bhuvi nirbhayAH |
yAvad bhImAtaTollAsi siMhanAma na vAkpathe || 43||
prasa~NgAdupahAsAdvA sa~NketAdupakIrtitam |
nR^isiMheti sakR^innAma dahet pApaughapa~njaram || 44||
sa yatra lIlAmAsthAya ramate.anantashaktimAn |
tataH kiM paramma loke varNanIyaM phalArthibhiH || 45||
devi tatrAsthito janturlIlayApnoti yAM gatim |
sA yogairuta yAgAdyaiH prAptumanyatra durlabhA || 46||
alaM yogairalaM yAgailaM dInavratAdibhiH |
prAptiryadisyAnnahareH padasyAsyamahaujasaH || 47||
shrInR^isiMhakarAgreNa kalpAntanakharojjvalam |
trikoNamastrametaddhi rAjate paramarddhibhiH || 48||
tattIrthaM varamadyApi shrUyate puNyagauravAt |
yatra shrIsiMhavadanaH shravaNAdeva mokShadaH || 49||
nIrAmImAsamutpattimAhAtmyaM nR^ihareH puram |
shrR^iNuyAtkIrtayedbhaktyA yaH sa pApaiH pramuchyate || 50||

 @iti shrIpadmapurANe nR^isiMhapuramAhAtmye shrIshivapArvatIsaMvAde
nR^isiMhapurakShetramahimAvarNanaM nAma dvitIyo.adhyAyaH |
\section{tR^itIyo.adhyAyaH}
sUta uvAcha |
nR^isiMhapuramAhAtmyaM shrutvA devI mudAnvitA |
punaH paprachCha bhAvena praNamya girishaM satI || 1||
devyuvAcha |
sAdhu sAdhu mahApuNyaM rahasyaM kathitaM tvayA |
mAhAtmyaM puravaryasya mahApApaughanAshanam || 2||
kiyatpramANaM tatkShetraM kimArabhya bhuvaM gatam |
tIrthAnyatra kati svAmin sarvaM varNaya vistarAt || 3||
shrIshiva uvAcha |
shive sAdhu mahAkShetrametad buddheragocharam |
pramANaM yAvadAkAshaM yAvachchittasya vistaraH || 4||
etadgauNamapi prAyo mukhyaM kechid hi manvate |
anyAni kShetrajAtAni kShetraM prAhurvipashchitaH || 5||
lokAnAM mUDhadR^iShTInAM tattvaj~nAne kuchetasAm |
saMsArAbdhiplavo dR^iShTaH kShetrarAjo.ayamuttamaH || 6||
pa~nchakroshaM haripuraM nagaraM yojanatrayam |
devAlayaM yojanArthaM pramANamiti vishrutam || 7||
gaNarAjombikA durgA shAradA bahirAsthitAH |
kShetrasyAsya mahAvighnAn saMhartuM dikShu vai kramAt || 8||
tadantarAyudhAnyasya dakShiNottarayoH pR^ithak |
rakShanti sakalApadbhyo mahAkShetramidaM bhiye || 9||
devAlaye suragaNA munayaH siddhachAraNAH |
gandharvApsaraso nAgA yakSharakShAMsi kinnarAH || 10||
vasavo.aShTau tathA rudrA AdityAH samarudgaNAH |
ahaM brahmA vishvarUpo gaNeshaH sanakAdayaH || 11||
devA anye cha shatasho rakShati kShetramuttamam |
nidhiM yathA bhUtagaNA ugraveShAH samantataH || 12||
etatpurA mahAkalpe brahmaNombujashAyinaH |
anugrahAyAvirabhUd divyaM bhuvi mahAdbhutam || 13||
devyuvAcha |
bhagavannanugrahaH kR^ito brahmaNo hariNA katham |
kathaM bhuvi gataM tachcha sarvaM vistarato vada || 14||
shrIshiva uvAcha |
kalpAnte yogashayyAyA utthite kamalApatau |
sisR^ikShAsItpurA tatra padmanAbherudAyayau || 15||
tanmadhye rajasA yukto brahmAbhUd vishvasR^ikpatiH |
tasya svamUlapadmasya mUlekShAsIdaye sati || 16||
sa varShANAM shataM pashyan nAlarandhreNa tatpadam |
nAvindadatha sa~NkliShTo bhUtvA padmopari sthitaH || 17||
tatra shrInR^ihariH premNA vyomAtmA gUDhamAhatam |
tapastapeti taM matvAnugrahaM sa tatApa ha || 18||
sa varShashatamekAgrasamAdhau paritiShThataH |
tasyedaM darshayAmAsa rUpaM nArAyaNo hariH || 19||
sahasrashIrShAH puruShaH sahasrAkShaH sahasrapAt |
sahasrabAhurvishvAtmA lokAnvyApya vyavasthitaH || 20||
divyAbharaNashobhADhyo divyagandhAnulepanaH |
divyamAlyAmbaradharo divyAyudhavibhUShitaH || 21||
sarvalakShaNalakShaNyaH sarvasaubhAgyashevadhiH |
sarvamantramayodevaH prAhAlaM tapasA vidhe || 22||
 iti pIyUShamadhurAM nipIyAbjabhavogiram |
sa sa~njIva iva premNA praphullavadanAmbujaH || 23||
praNamya devadeveshaM praNatArtiharaM harim |
astauShIdekamanasA haridarshanalabdhadhIH || 24||
brahmovAcha |
namo.astu lIlAmayavigrahAya svarUpadR^iShTyAhatasadbhramAya |
namaH parAnandaparAlayAya svabhAvasampattimahodayAya || 25||
namo guNAnAM pataye mahimne vikAradhAmne.akhilakAraNAya |
namo jagadbhAsayate garimNe sate chidAtmAkR^itaye guNAya || 26||
tvamAdirasyAsi nidAnamadhyaM vishvAkR^itistvaM pralayo vibhustvam |
tvaM sarvayonistvamasarvayonistvaM sarvasho.asitvamasarvashashcha || 27||
namaH purastAdatha pArshvayoste pashchAnnamontarbahirIshvarAya |
pUrNAdvitIyAya namaH parAya aNIyase.anantachide parasmai || 28||
vaneH sphuli~NgA iva vArimbha~NgAH sindhorivaughA iva vAsanAnAm |
bhavanti tiShThanti viyanti yatra brahmANDasa~NghAstamajaM prapadye || 29||
yadIkShayA janirasyAprameyo vibhurnR^isiMho varado mamAstu |
yonAhamasmin vividhe.atrasa~Nge sampreritaH kAlavinaShTadR^iShTiH || 30||
yasyAdeshAt sargakarmapravR^itto bhUtvApyahaM kAlasammUDhachetAH |
sa puNyavAchA mama sR^iShTimetAmala~Nkarotu prabhaviShNurIshaH || 31||
ihaiva loko hyasamIkShya baddho mAyAguNaiH kAmayate nu kAmAn |
yachChannamuShmai ya ihAprameyo haratyananto nimiShaM prasIda || 32||
namo niyantre niyamAlayAya namo jaganmohatamoruNAya |
namo nR^isiMhAya vilAsadhAmne namaH shivAyAmitavikramAya || 33||
namo manodUracharAya vAchAM bAchAmanirdeshyapadAya bhUmne |
namaH svabhAsAkhilabhAsakAya pramANamAtre jagadIshvarAya || 34||
shrIshiva uvAcha |
 iti stutvA yathApraj~namajamAtmAnamIshvaram |
tUShNIM babhUva vishrAnta iva sve manasIshvaraH || 35||
tataH prasAdamadhurasmitapIyUShasanmukhaH |
prAha deveshvaro vAchA jIvayannigamAniva || 36||
shrIbhagavAnuvAcha |
abjayone prasanno.ahaM varaM varaya suvrata |
AdeshAnmama yatpUrvaM tapastaptaM tvayA khalu || 37||
sarvatra madbhAvanayA dUrayasva rajo mahat |
ahamevAkhilaM vastu sadasatparamavyayam || 38||
bhUtaM bhavyaM bhavachchAnyannamatto.asti charAcharam |
mayyeva mana Adhatsva rajoguNanivR^ittaye || 39||
yadAtmani na nirbhAtamAbhAti cha nirarthakam |
tattama bimbavanmAyAM jAnIhi hInadarshanam || 40||
madAtmA madvikArastvaM matkarmA madavasthitiH |
mayAtmanA sR^ijan sarvamapi no lipyase guNaiH || 41||
siddhaM sarveshvara tvattaH sarvaM me yadabhIpsitam |
kAmadrumamavApyAho kaH shocheta hi paNDitaH || 42||
tathApi yAche ha bhavataH shAsanena maheshvara |
sthAtavyaM bhuvi devesha rUpeNAnena sarvaga || 43||
ye mUDhA ye durAchArA ye cha kAmahatA narAH |
teShAM madAndhamanasAM prasAdaM kartumarhasi || 44||
shrIbhagavAnuvAcha |
vidhedyArabhya tiShThAmi bhuvi lokahita~NkaraH |
shravaNAddarshanAdhyAnAtkAyavA~NmanasAghahR^it || 45|
jambudvIpe bhArate.ahaM godAkR^iShNAntarAvanau |
tiShThAmi shambhunA sArdhamekarUpaH satAM gatiH || 46||
nR^isiMhanAmA jIvAnAM bandhahA varadeshvara |
sthAsyAmi dR^ishyAdR^ishyAtmA nAnAshaktibhirAdarAt || 47||
tavAnugrahakAmAya lokAnAM hitamIpsayA |
sthito.api pApairdurlabhyaH prAyasho.ahaM prajAdhipa || 48||
tathApi pUrvadattaM te vachanaM kartumichChayA |
nIrAbhImAmbukallole viharAmi sureshvara || 49||
tataH prahlAdanAmAgre daityaputro bhaviShyati |
sa nArada vachasA kariShyati tapo mahat || 50|
tattapastuShTa ArAdvi nIrAbhImAmbusa~NgamAt |
sthAsye pratya~Nmukho brahman dvibhujaH siddhibhUShaNaH || 51||
tato mAM bhuvi sallokA bhajiShyanti susiddhaye |
aShTAkSharamanuproktaM prajApanavarAbhayam || 52||
sarveShAmihabhUtAnAM bhajatAM mAmanAratam |
dadAmi vipulAn bhogAnante kaivalyamadbhutam || 53||
shrIshiva uvAcha |
 ityuktvA bhagavAn viShNuH praNato brahmaNArchitaH |
antardhAyAtmanorUpaM bhuvi prAdurbhavaM gataH || 54||
imaM prAdurbhavAdhyAyaM yaH shroShyati paThiShyati |
sarvAn kAmAnavApnoti prasAdAnnR^ihareharestu saH || 55||

 @iti shrIpadmapurANe nR^isiMhapuramAhAtmye shrIshivapArvatIsaMvAde
shrInR^isiMhaprAdurbhAvo nAma tR^itIyo.adhyAyaH |
\section{chaturtho.adhyAyaH}
shrIdevyuvAcha |
prahlAdo daityaputro yo bhaviShyati mahAtapAH |
tadAkhyAnaM kathaM deva devAvirbhAvakAraNam || 1||
daityA vai rAjasAH krUrAH stabdhAH paNDitamAninaH |
tadudbhaveShUpashamastApasAnAM sudurlabhaH || 2||
shrIshiva uvAcha |
purA vaikuNThanAthasya dUtau devavarchitau |
jayo.atha vijayo nAmnA prasiddhau dvArapAlakau || 3||
tayoH kadAchitkupitA brahmaNo mAnasAH sutAH |
shApaM dadurniShiddhA ye harisandarshanotsukAH || 4||
yAtaM yuvAM mahAghorAM chAsurIM yonimulbaNAm |
tribhirjanmabhirAyAtaM punaH padamanAmayam || 5|
janiM prApya ditisutau hiraNyakashipustathA |
hiraNyAkSha iti khyAtau bhavitArau sudurjayau || 6||
hiraNyakashipuH kartA rAjyaM trailokyavanditaH |
hartA kShoNIM hiraNyAkSho varAheNa hato raNe || 7||
hiraNyakashipuH svasya bhrAtuH pretasya duHkhataH |
taptA tapo bahusamA visR^ijya sakalAM shriyam || 8||
tAvadindro.amaraiH sArdhaM prabhajya tatpurIM khalu |
kayAdhuM tasya dayitAmapahartA purIM haTAt || 9||
prajAvatI nAradena dR^iShTA pathi shuchAturA |
nIyamAnA surendreNa muninA yAchitA bhavet || 10||
tasyai sagarbhamuddishya j~nAnaM guhyaM sadharmakam |
dadAti sAdarAtsUnorudayAya mahaujasAH || 11||
kAlaM neShyatyAshrame.asya kA~NkShantI ditijAgame |
bhajantI munishArdUlaM nAradaM pitR^ivatsatI || 12||
vidhervarAtsa kAlena AyAsyati purIM punaH |
prasoShyati kayAdhurvai tanujAMshchaturaH priye || 13||
prahlAdo bhagavaddAso.anugR^ihIto maharShiNA |
bhaviShyati sadAkAle kariShyati tapo mahat || 14||
nIrAbhImAmbusaMyoge stuvAno me puro.arbhakaH |
AyAsyati kR^ipAbhArAdupadiShTo maharShiNA || 15||
praNataM saguNaM bAlaM prahlAdaM sundarottamam |
anugrahIShyati guhyena mantreNa munisattamaH || 16||
kariShyati tadA bAlo nR^ihareH stavanamichChayA |
pratimAM saikatIM tasya dvibhujAM sundarAM priye || 17||
tuShTaH siMhAnano devaH pratimAyAM vishan hariH |
AvirbhaviShyati hi mA bhaiShIrbAleti saMvadan || 18||
sa IshAshvAsitaH premNA gadgadasvarasa~NkulaH |
ashrubhirmIlitAkSho.amuM sannasyati bhAvataH || 19||
utthApyAli~Ngya vishveshaH kR^ipAM tasminkariShyati |
sa svAmigAtrasparsheNa pUto j~nAnamavApsyati || 20||
pUjayitvA jagannAthaM nR^isiMhaM varadeshvaram |
stoShyati svasthabhAvena paramAnanda sundaram || 21||
prahlAda uvAcha |
jayadeva jagannAtha sarvajIvanashevadhe |
sudhAlokalavAmoda jIvitAkhilavR^ittida || 22||
jaya mAyAmahormINAmAkarAnandasAgara |
brahmANDabuddhadonnadvavilAsAkularodhasa || 23||
jayAnanta mahAbhAgya mokShalakShmIM mahIM kuru |
brahmabhAvaphalodyAnachidekAmarapAdapa || 24||
jaya kAmamahAvallIsa~NgharopitasatphalaiH |
vistR^itAvanisaurAjya sadekAnandagahvara || 25||
jaya jIvamahAmohabandhadhvaMsanapaNDita |
jaya deva vareshAna varadAdhIsha satpate || 26||
jaya mohAtimAyesha kAlakAla nR^isiMha bhoH |
jaya grastamahAmR^ityo prasIda karuNAnidhe || 27||
tvamekaH stutirIshAnaH stotA stutyastvamIshvaraH |
na jAne tvatparaM devaM bhUmau sadasadAtmakam || 28||
shrIbhagavAnuvAcha |
prahlAdArbhakavarashreShTha varado.ahaM varaM vR^iNu |
namAmAlokya bhUmAnaM ko.api shochitumarhati || 29|
prahlAda uvAcha |
ko varaste vareshAna darshanAdadhiko mataH |
yannAmashravaNAtpUtaH sadyaH syAd govadhAdapi || 30||
tathApi yAche sandiShTaH prabhuNA ki~NkarAnugaH |
svAminnanena rUpeNa vishAsyAM pratimAM bhuvi || 31||
ye bhajanti samarchanti mAnavAH praNamanti ye |
teShAmabhIShTakAmAnAM pUrako bhava sarvadA || 32||
eSha eva varo deva nAnyaM tvatto varaM vR^iNe |
manmanastvatpadadvandve nirdvandvaM sthiramastu bhoH || 33||
shrIshiva uvAcha |
evaM sandR^ishya bhagavAMstuShTo vakShyati bAlakam |
praphullavadanAmbhojasphuratsmitakalAdharam || 34||
shrIbhagavAnuvAcha |
tathAstu pratimAyAM te sthAsyAmyatra nirantaram |
pAlayiShyAmi sujandarshanAdeva svaraiH || 35||
ye mAM dvibhujamIshAnaM tvadarchAkR^itaviShTaram |
bhajanti bhaktyA parayA te vai yAnti parAM gatim || 36||
mAmuddishya sudUrastho dadAno dAnamarthinAm |
pUjAM dadhAti tasyAhaM kAmAn sampUraye.akhilAn || 37||
kiM punaH shR^iddhayA dhImAn mahAyAtrAM karoti yaH |
tasya puNyakR^itaH pAro nAsti puNyasya karhichit || 38||
nR^isiMhadarshanaM lapsye yasya buddhiriti sphuret |
sa sarvapApavinirmukto bhavedarkodaye tamaH || 39||
tataH prayAtasya gR^ihAtpUjayitveShTadevatAH |
devatAH samprasIdanti dadate vipulAnvarAn || 40||
tato.adhvani samAyAtaH stuvato nAmarabhirharim |
padepade.ashvamedhasya phalaM tasya vinishchitam || 41||
mahApuNyabharaiH prApya kShetraM madvallabhaM naraH |
mAnuShItanurUpo.api bhavenmadrUpasAmyabhAk || 42||
mAmAlokya sakR^inmartyo vaikuNThe labhate sthitim |
mAM bhajanmvapuShyante sAyujyaM labhate khalu || 43||
ye mAmanishamIshAnaM bhajate shR^iddhayAnvitAH |
te devA martyarUpeNa j~neyAH sarve chaturbhujAH || 44||
aj~no vA j~nAnavAnbAlo vR^iddhonIchothachottamaH |
nR^isiMha mAM bhajanmuktAH sadyo yAti gatiM satAm || 45||
sakR^itpradakShiNIkR^itya kR^itAsyAd bhUpradakShiNA |
sakR^innatvA daNDavanmAM bhavedvibudhasattanuH || 46||
darshanAtpuNyarUpo.asau pArameShThayaM padaM vrajet |
pUjanAnmamasArUpyaM bhajanAnmayi saMsthitim || 47||
tvamapyasurarAjena vatsa drohiShyase yadA |
Apvimuktaye bAla tadA matsmaraNaM kuru || 48||
yAtanAH prashamaM sarvA yAsyanti madanugrahAt |
pitApi mama saMsparshAtpUto yAsyati matpadam || 49||
yadAyadA dhyAyasi mAmadhIshaM chetaH samAdhAya mada~Nghripadme |
tadAtadA tatra hi tatra siddhastiShThAmi te.agre smR^itimAtratohi || 50||
etAvadabhayaM datvA chinmayo dR^ishyarUpadhR^ik |
vAlukApratimAyAM vai tiShThettatra nirantaram || 51||
prahlAdo.apitamIshAnaM triH parikramya sannataH |
pUrNArthaH puramAgatya bhaviShyati jaDA~Ngavat || 52||
taM virudhya pitA tasya kShayameShyati tatkShaNAt |
udIrNavakShaHsthalo bhUtvA nakharairnR^iharestadA || 53|
 iti te kathitaM devi prahlAdAkhyAnamuttamam |
paThatAM shR^iNvatAM nR^iNAM pApaghnaM ma~NgalArthadam || 54||
ya etat paThati prAj~naH shR^iNotyavahito naraH |
sa prasAdaM hareryAti priyaH prahlAdavadbhavet || 55||
prahlAdena kR^itaM stotraM yaH paThetprAtaranvaham |
tasya mantrabhavA siddhirmAsenasyAtparArthadA || 56||
annaM yashaH sutAn kAmAn puNyamokShaM sanAtanam |
prabhAvAdasya stotrasya martyo vai prApnuyAt sadA || 57||
 iti te kathito devi kShetrAvirbhAvako bhuvi |
adhunA tIrthamAhAtmyaM shR^iNu siddhipradottamam || 58||

 @iti shrIpadmapurANe nR^isiMhapuramAhAtmye shrIshivapArvatIsaMvAde
kShetrAvirbhAvakonAma chaturtho.adhyAyaH |
\section{pa~nchamo.adhyAyaH}
shrIshiva uvAcha |
devasya vAmabhAge.asti lakShmItIrthamanuttamam |
tasya pramANaM vyAyAmaH shatachApamidaM viduH || 1||
purA lakShmyAtapastaptaM tatra divyaM samAshatam |
chA~nchalyadoShashAntyarthaM prasAdAnnR^ihareH prabhoH || 2||
tataH prasanno bhagavAMstasyai varamadAchChubham |
priye khinnAsi tapasA dushchareNApi yogibhiH || 3||
tavAbhIShTaM dadAmyAshu varaM varaya ma~Ngale |
chA~nchalyamayi te nAstu svasthA tiShThA vakShasi || 4||
bhArgave vAsare ye tvAmatrastoShyanti bhaktitaH |
devIsUktena vA mantraiH paurANairAgamodbhavaiH || 5||
teShAM harAmyahaM shashvadvipadaH sampado.arpaye |
mokShalakShmyA visheSheNa pAtraM te syurna saMshayaH || 6||
 ityuktvAli~Ngya kamalAM tUShNImAsIchChuchismitaH |
pratIkShamANaH padmAsya prIto.abhUdvachasA tadA || 7||
lakShmI uvAcha |
sarvaj~na karuNAmbhodhe nAtha siMhAnanAchyuta |
varadashreShTha yadi prIto dehi me yadabhIpsitam || 8||
asmiMstIrthe kR^itasnAnadAnatarpaNabhojanAH |
tava mantrajapAsaktAH sarve santu mahodayAH || 9||
nityaM tvada~NkaramaNIM ye smaranti mahAlasAm |
teShAmananyamanasAM muktiH karagatA bhavet || 10||
bhUyAdatra mahA.NllAbhaH sarvadA siddhisambhavaH |
yogamantratapodAnavratAnAM tvatprasAdataH || 11||
shrIbhagavAnuvAcha |
evamastu vishAlAkShi tIrthe.asminsarvadA priye |
sadA sthAsyAmi bhavatIma~NkekR^itvA varAnane || 12||
siddhayaH santu yogAdyA mokShasiddhirapi priye |
muktitIrthaM siddhitIrthaM lakShmItIrthaM manoharam || 13||
nR^isiMhatIrthamityAkhyA bhUyAdasya varAnane |
aShTapIThAni parito bhaviShyantyasya guptaye || 14||
pUrve kolhApuraM nAma kAmAkShaM nAma dakShiNe |
pashchime virajaM pIThaM kAmarUpaM tathottare || 15||
trikUTaM hi~NgulAsindhujAlandaramitisphuTam |
koNeShu tAni sthAsyanti nAnAsiddhipradAnyalam || 16||
kalau kaluShabuddhInAM nUnaM gUDhaM bhaviShyati |
lakShmItIrthasyamahimA na kenApi kShamo.avitum || 17||
atrAhaM tvaM sadA gUDhaM tiShThAmo yogasiddhaye |
lakShmInR^isiMhamanunA pUjitau saMstutau natau || 18||
shrIshiva uvAcha |
 ityuktvA saramo devastatraivAntaradhIyata |
tadArabhyAbhavattIrthaM sarveShAM sarvasiddhidam || 19||
kAlena nIrA saMyAtA tasyopari shuchismite |
tato nArAyaNaM nAma tIrthaM vidvadbhiruchyate || 20|
kadAchidatra saMyAto vaNikkashchiddhanI mahAn |
snAtvA vichArayAmAsa kuto me sampadIdR^ishI || 21||
na mayArAghitaH shambhurna tayA tarpitA dvijAH |
na mayA toShito viShNudInanAthA~NghapAlanAt || 22||
na tIrtheShu na pAtreShu na parvasu kadAchana |
kAkiNImAtramapyAho dattamanyasya kA kathA || 23||
 itthaM chintAturasyAsya purataH kashchidAgataH |
siddho.avadhUto digvAsA dIptanetro mahAprabhaH || 24||
taM praNamyAdareNAsau pR^iShTavAnyadvichintitam |
brUhi yogin kathaM sampajjAtA me dhanadopamA || 25||
prahasyAha mahAyogI kA te sampad vivarNaya |
sa provAcha mahAbhAga shrUyatAM yadi rochate || 26||
ete.aShTakoTayo.arthAnAM koTayo.ashvatarIgaNAH |
mahAmarakatA nIlA gAruDAstAdR^ishA mama || 27||
muktAphalAnAM navatIH koTInAM madgR^ihe tathA |
satyevaM maNayo.anantA vAsasAM parvatA ime || 28||
dhAtUnAM shikharANyAha dashalakShaM gR^ihe mama |
tAdR^ishAH koTiguNitAH sambhArAH santi he prabho || 29|||
dhAnyakShetragajAnIkasyandanAdibhirujjavalAH |
sarvadesheShvahaM mAnyo ghanADhyAnAM mahattamaH || 30||
kena puNyena sa~njAto na jAnAmyatrakAraNam |
sa provAcha mahAbhAga kathyatAM kR^ipayA hi tat || 31||
avadhUta uvAcha |
purA tvaM yAchako dIno vipro janmani saptame |
yAvajjanma parAnnena tuShTo lubdho.atishochyadhIH || 32||
sa kadAchichcharannurvIM nIrAtIramupAgataH |
ekAdashyAM phalAhAramapino labdhavAniha || 33||
kShughAturasya dInasya rAtrirannaikakA~NkShiNaH |
jAgareNa vyatItA sA bhramato devamandire || 34||
prasa~NgAddaivato rAtrau pUjAnarahareralam |
bhaktaiH kR^itAlokitA te nAmAni shR^iNvato hareH || 35||
prabhAte sa~Ngame snAtvA lakShmItIrthamupAgataH |
pallavasthAnyavAnprAdAH kasmaichid dvijali~Ngine |
tataH kAlavashaM yAtaH prApito yamasannidhau |
tAvadyamena prayatA gachCha gachCheti bhAShitaH || 37||
tadaiva dakShiNe deshe drAviDeShu nareshvaraH |
jAtastvaM sarvabhogADhyaH pa~nchavAraM sujanmasu || 38||
pa~nchapradakShiNA rAtrau bhramatA vihitAstvayA |
tena puNyena rAjendraH pa~nchajanmani bhogavAn || 39||
tena gantAsi vaikuNThaM yato nAvartanaM punaH |
adhunopoShaNaM yatte kR^itamekAdashIdine || 40||
pUjAdarshanapuNyena prAptavAnadya sanmatim |
yavadAnena sampattiM gato.asi vaNijAmpate || 41||
atrANvapi hi yat ki~nchitsukR^itaduShkR^itaM kR^itam |
na tasyAnto.asti kalpAnte yatrodAharaNaM bhavAn || 42||
shrIshiva uvAcha |
 ityuktvA sa tu yogIndro dattAtreyo mahAmuniH |
tatraivAntardadhe so.api vismayaM paramaM gataH || 43||
datvA sarvasvamAryabhyo yaj~nairiShTvA sudakShiNaiH |
tatraiva saMsthito ninye sheShamAyuraki~nchanaH || 44||
jitendriyo jitashvAso dhyAyannarahariM hR^idi |
dadarshAgre sthitaM divyaM vimAnaM taijasaM mahat || 45||
sadyashchaturbhujopeto divyAla~NkArabhUShaNaH |
divyaveSho vimAnaM tadAruroha mudAyutaH || 46||
sa vaikuNThe harerdAso viShNudAsa itIritaH |
adyApi rAjate shrImAn viShNuchinhairala~NkR^itaH || 47||
 iti sUtreNa mahimA lakShmItIrthasya varNitaH |
asya smaraNamAtreNa mahApApaiH pramuchyate || 48||

 @iti shrIpadmapurANe nR^isiMhapuramAhAtmye shrIshivapArvatIsaMvAde
shrIlakShmItIrthaprabhAvavarNanaM nAma pa~nchamo.adhyAyaH |
\section{ShaShTho.adhyAyaH}
devyuvAcha |
lakShmItIrthasya mahimA shruto deva mukhAttava |
anyeShAM tIrthavaryANAM mAhAtmyaM vaktumarhasi || 1||
shrIshiva uvAcha |
lakShmItIrthAt pR^iShThabhAge dhanuShAM pa~nchaviMshatiH |
padmatIrthaM mahApuNyaM sarveShAM siddhidAyakam || 2||
bhagavaddarshanAnandavikalAyAH karAgrataH |
padmAyA galitaM padmaM padmatIrthaM tato viduH || 3||
kubero yatra samprApto yataH padmanidhi purA |
adyApi padmatIrthasya sevakA na daridriNaH || 4||
vAme padmanidheH pUrve bhAge sha~NkhanidhiH sthitaH |
gadAtIrthaM pavitraM cha vidyate shR^iNu pArvati || 5|
chaturNAmihatIrthAnAM mahimA durlabhaH kalau |
smaraNAtsarvapApaghno darshanAnmuktido mataH || 6||
devasya vAme purato gadAtIrthamanuttamam |
gadAdharo yatra devo gayApuNyaM dadAtyasau || 7||
nIrAyAM lakShmItIrthAt dhanuShAM pa~nchaviMshatiH |
gadAtIrthaM gayAyAstu koTishrAddhaphalapradam || 8||
pitaraH sarvadechChanti gadAtIrthodakakriyAm |
shrAddhasyAkalpikI tR^iptirAkalpaM tIrthaM hi smR^itam || 9||
gadAtIrthe kR^itasnAnatarpaNashrAddhadAnataH |
manujo labhate siddhiM prasAdAnnR^ihareH priye || 10||
purA kashchid dvijashreShTho dAkShiNAtyaH shuchivrataH |
pitR^INAM niShkR^iti prepsurgachChastIrtha vratI gayAm || 11||
Agato nIrayA yatra gadAtIrtha susaMskR^itam |
kR^itavAn snAnadAnAdi shR^iddhAyuktaH pitR^ivrataH || 12||
tAvaddadarsha divyA~NgAn vimAnaishcharato divam |
svapitR^inparisantR^iptAn sAdhu sAdhviti vAdinaH || 13||
ta UchurbrAhmaNavaraM putra te tAritA vayam |
gadAtIrthaprabhAveNa gachChAmo harimandiram || 15||
gR^ihaM tvaM gachCha tIrthAni kR^itAni no viniShkR^itiH |
adhunA prayojanaM nAsti vatsa tIrthATanasya te || 15||
shrutvA pitR^ivacho.abhIkShNaM vismito.abhUd dvijottamaH |
gadAtIrthe chiraM sthitvA dehAnte harimApa saH || 16||
(??)pashchimato dhanuShAmekaviMshatiH |
pishAchamochanaM nAma tIrthaM pAvanamasti hi || 17||
tatra ki~nchitpurAvR^ittaM devi te kathayAmyaham |
viShNusharmeti vipro.abhUdatharvaNa iti smR^itaH || 18||
smarannarahariM nityaM sadAchAro dayAnvitaH |
kadAchitkAshikAM draShTumIyuShAM sahachAriNAm || 19||
sa~NgAdgachChanpathi shrAnto vindhyAdreradhare sthitaH |
tAvadagre.abhavattasya dhUmarAshirmaholbaNaH || 20||
chakShuShA kevalaM vR^ikShAnuttu~NgAnapi yo dahan |
tanmadhye dadR^ishe tena vipreNa sahasA tadA || 21||
asthimAtraikasa~nchChanno dIrghagrIvA bhayAnakaH |
pi~Ngashmashru dhUmratvachaH prANinAM prANahArakaH || 22||
bahubhiH parinR^ityadbhiH parItaH pretavR^indakaiH |
bhIShayan pathikAn khAdan viprAgre.avasthitaH khalu || 23||
viShNusharmA nR^isiMheti jagadochchaiH sahAnugaiH |
sa tattIrthodakaM teShAmupari prAkShipattadA || 24||
tajjalasparshamAtreNa nR^isiMhanAmakIrtanAt |
sadyo divyatanurbhUtvA vimAnastho.abhavanmudA || 25||
preta uvAcha |
mochitA bhavatA vipra tIrthAmbusparshanAdvayam |
gachChAmo viShNubhavanaM prasAdAttava pAvanam || 26||
divyaM j~nAnaM mamotpannaM nR^isiMhAkhyAsmR^itervaram |
idAnIM pR^ichCha yadvA~nchChA sarvaM te kathayAmyaham || 27||
viShNusharmovAcha |
kastvaM pretavapuH pApAtkasmAjjAtamidaM prabho |
jalasya kasya saMsparshAd gato.asi harimandiram || 28||
preta uvAcha |
purAhaM rAjavaryasya bhojanAmno yashasvinaH |
purohito.abhavaM vipro vedavedA~NgapAragaH || 29||
ete sahAyyakA viprA mama shAstravishAradAH |
etairmayA parAbhUtA bahavaH paNDitottamAH || 30||
Chalena parihAreNa vR^ittyA te parihAritaH |
rAj~nA na pUjitAH kechinmayA tR^iNasamAH kR^itAH || 31||
dAnavratatapohomairarchayitvA dhanaM bahu |
adAntA ugrakarmANo brahmadveSheNa sarvadA || 32||
prAptA pApIyasIM yoniH paishAchIM smR^itinAshinIm |
bhavatA mochitA hyadya jalasparsheNa sanmate || 33||
viShNusharmovAcha |
kuto.asya mahimA sAdho jalasya pretamochane |
tvarNaya yadi kR^ipA mayi te syAdalaukikI || 34||
preta uvAcha |
sAdho ya eSha kalasho haste te vartate.adhunA |
pishAchamochanajalasyaitasminnArdratAbhavat || 35||
tatsa~NgAtpAvanaM vAri babhUva kalashesthitam |
yena pretatvamutsR^ijya prAptA divyAM gatiM dvija || 36||
gadAtIrthAgrato dIptaM vartate tIrthamuttamam |
pishAchamochanaM nAma yena sammochitA vayam || 37||
pishAchamochane snAtvA tarpayitvA pitR^In dvijAn |
uddharennarakAmbhogheH pitR^In pretAMshcha pUrvajAn || 38||
nityaM paricharedyastu tIrthaM paishAchamochanam |
tasyAj~nAnapishAchatvaM sadyo nashyati bandhakR^it || 39||
purAtra hariNA datto lokAnAM hitakAmyayA |
pishAchamochane muktiH varaH kAmaphalapradaH || 40||
asaMskR^itAH saMskR^itAstu saMskR^itA mokShabhAjanAH |
na tathAnyachChobhate tIrthaM yathedaM tIrthamuttamam || 41||
atrAhaM gururUpeNa sthitvA snAnArdravarShmaNAm |
chitte dishAmi tajj~nAnaM yena bandhAdvimuchyate || 42||
dUrasthenApi pApena stutiH paishAchamochinI |
shrAvyA shR^iddhAnvito bhUtvA matkR^itA mokShaprAptaye || 43||
 ityuktvA nR^iharistatra babhUvAntarhito dvija |
nIrA tasyoparigatA puNyA yA nR^iharestanuH || 44||
adhunA tvaraM tIrthaM tIrthAnAmuttamaM khalu |
vartante divyavapuSho yatra snAtvA dvijottama || 45||
shrIshiva uvAcha |
shrutvA pretasya vachanaM ddaShTavA gatimanuttamAm |
viShNusharmA vismito.agAtpunarnIrAtaTaM shuchiH || 46||
pishAchamochane sthitvA stutvA narahariM tadA |
mukto.abhavviShNusharmA bhavabandhAttadA priye || 47||
pishAchamochanAkhyAnaM ye shR^iNvanti narottamAH |
te.api muktA bhavodvandhAdyAnti viShNoH paraM padam || 48||

 @iti shrIpadmapurANe nR^isiMhapuramAhAtmye shrIshivapArvatIsaMvAde
pishAchamochanatIrthavarNanaM nAma ShaShTho.adhyAyaH |
\section{saptamo.adhyAyaH}
devyuvAcha |
pishAchamochanAkhyAnaM shrutaM paramamadbhutam |
idAnIM shrotumichChAmi stutiM paishAchamochinIm || 1||
hariH kasmAdimAM puNyAM kR^itavAn stutimuttamAm |
tvarNaya mahAdeva yayA bandhAd vimuchyate || 2||
shrIshiva uvAcha |
purA kalpAdisamaye viShNurnAbherabhUdajaH |
chaturyusahastrAnte tasya nidrAmupeyuShaH || 3||
viShNukarNamalodbhUtau sa~njAtau madhukaiTabhau |
tAbhyAmupAhR^itAH sarve vedA vishvasya sAdhanam || 4||
kAle sisR^ikShAttAvad vedA asmaraNaM gatAH |
tataH pishAchavajjaj~ne brahmA dAnavabhItitaH || 5||
tasya nArAyaNo.ananto didesha stotramuttamam |
brahmaNaH purato sthitvA mantrarAjAtmakaM shivam || 6||
tena prabuddho bhagavAn brahmA lokapitAmahaH |
asmaradvedamakhilaM j~nAnaM yatpaurvakAlikam || 7||
tadahaM te.abhighAsyAmi nArAyaNavarAdidam |
shrutaM brahmamukhAddevi sarvArthAnAM prasAdakam || 8||
vishuddhamajamAnandamekamAtramakhaNDitam |
sachchinmAtraM paraM shAntaM yattad brahma namAmyaham || 9||
yadbhAsA nikhilaM bhAti yasyanAnyatprakAshakam |
purANamavyayaM jyoti taddhi brahma namAmyaham || 10||
yadekaM sarvarUpeShu pratirUpatayA sthitam |
jyotiryathodapAtreShu taddhi brahma namAmyaham || 11||
yadantaH sarvabhUtAnAM yattadrUpamabAdhitam |
mevAbharaNAdInAM taddhi brahma namAmyaham || 12||
yadekaM sarvabhAvAnAM nirantaramadUShitam |
chinmAtraM niShphalaM pUrNaM taddhi brahma namAmyaham || 13||
yenArthAn bhajate janturandriyeShu manasyapi |
niraha~NkAramAnandaM taddhi brahma namAmyaham || 14||
yanmano manasAM prANaH prANAnAmidriyaM varam |
sarvAtmakamakhaNDaM sattaddhi brahma namAmyaham || 15||
yannAmaguNarUpAdyairvichitramapi sarvagam |
aj~neyaM pashubuddhInAM taddhi brahma namAmyaham || 16||
yasmAdudeti svishvaM yena jIvati vardhate |
yasminpralIyate sarvaM taddhi brahma namAmyaham || 17||
yato vAgAdayo bhAvA utthitAH svasvakarmasu |
pravartate sAkShirUpAttaddhi brahma namAmyaham || 18||
sakalaM niShkalaM vyoma mAyAtItaM nira~njanam |
asti nAsti dvayAtItaM taddhi brahma namAmyaham || 19||
yad grAsakaM grAsakANAM vIrANAM cha vivardhanam |
vyApakaM vyApakAnAM cha taddhi brahma namAmyaham || 20||
yajjvAlayati kAlAdyAMstamo yena prakAshate |
mahAjvAlAtamorUpaM taddhi brahma namAmyaham || 21||
yatsarvato vadanavatsarvataH karapAchChiraH |
sarvato nayanaM shrotraM taddhi brahma namAmyaham || 22||
yadvichAravatAM nR^iNAM bandho.anAditamobhavaH |
sadyo nashyati shArIrastaddhi brahma namAmyaham || 23||
yasyAj~nayAnilArkedurmR^ityuvanhigrahAdayaH |
sarve karmasu vartate taddhi brahma namAmyaham || 24||
yannAma ma~NgalatamaM ma~NgalAnAmanuttamam |
stutibhistUyate vedaistaddhi brahma namAmyaham || 25|
yasyAtmattAM vindAM mR^ityuranAdimriyatekShaNAt |
mR^ityumAraNamApUrNaM taddhi brahma namAmyaham || 26||
niShidhya sarva loke.asminyachCheShamupalabhyate |
sattAmAtramanirdeshyaM taddhi brahma namAmyaham || 27||
pUrNamantarbahiH pUrNaM yena pUrNena pUryate |
pUrNasya pUrNamAkAshaM taddhi brahma namAmyaham || 28||
etaddevi mahAstotraM mahApaishAchamochanam |
yatra kutra smaran janturbrahmasAyujyamashnute || 29||
kaivalyAdyakhilArthAnAmidamevehakAraNam |
nR^iharermantrarAjasya stotraM paishAchamochanam || 30||
etatpaThaNato yAti muktimAtyantikIM naraH |
kiM punaH sarvabhogAdyAMstuchChy dIneShusammatAn || 31||
etatprasa~NgataH proktaM stotraM te.abhIShTasiddhidam |
adhunA shR^iNu vakShyAbhi sheShatIrthAni sUtrataH || 32||
pishAchamochanAtpashchAttIrthaM gAruDasa.nj~nitam |
garuDena tapastaptvA yatra labdhaM mahadbalam || 33||
jitvAmareshvaraM sa~Nkhye sudhAM hR^itvA balAttataH |
vimuchya mAtaraM dAsyAd vinatAmajito.abhavat || 34||
toShayitvA raNe viShNuM tenAyaM yAchito mudA |
vAhanantva gato jagghvA pannagAnkoTisho.abhitaH || 35||
tattIrthe snAnadAnena sarvavedasamudbhavam |
puNyaM prApnoti kalyANi yatra kutra mR^ito.api saH || 36||
tatonR^isiMhatIrthaM ve kroshamAtraM varAnane |
hiraNyakashipuM hatvA yatra devo vyavasthitaH || 37||
tattIrthasya prabhAvo hi mayA vaktuM na shakyate |
sarvArthadaM mokShabIjaM tIrthaM tatparamaM priye || 38||
shrImannR^isiMhaH sampUjyo bhaktavighnaughanAshanaH |
nAnopahAraiH kShetrasya mahAbhItyupashAntaye || 39||
etAni tIrthamukhyAni vAme devasya chAgrataH |
ekaikasmin vasantIha koTishastIrtharAshayaH || 40||
indratIrthaM tataHpuNyamanvitaM koTitIrthakaiH |
harirnAyAsato yatra rarakShedraM hi pAtakAt || 41||
shvetatIrthaM cha tasyAgre haMsatIrthaM vadantyadaH |
haMsAvatAro bhagavAn yatra j~nAnamadIdishat || 42||
tasyaiva paritaH santi tIrthAni sanakAdibhiH |
kR^itAni yogibhiH puNyAnyayutAni chaturdasha || 43||
marIchiratriH pulaho vasiShThaH kratura~NgirAH |
pulastyo devalaH somo dakSho gIShpatiratrijaH || 44||
varuNo dhanado vAyuryamo.agnirniR^itirvasuH |
svanAmnA tIrthamukhyAni kR^itvA siddhiM parAM gatAH || 45||
sarvatIrthaM tataH puNyaM tIrthairyatra tapaH kR^itam |
nR^iharerarchanAtprAptaM pApaghnaM puNyadaM balam || 46||
tArAtIrthaM mahApuNyaM yatratArA tapaHsthitA |
raghuvIraprasAdena gatA j~nAnamakhaNDitam || 47||
durvAsatIrthamatulaM kapilasyacha yoginaH |
yatraikAkSharajApyena gatAvAtyantikIM gatim || 48||
etAnyantarato nIrAbhImayoH kShetramadhyataH |
tIrthAnyanyAni cha kalau pravakShyantyanyanAmabhiH || 49||
bhImAmadhye cha tIrthAnyadhunA te bravImyaham |
eShAM nAmAni saMsmR^itya mahApApaiH pramuchyate || 50||

 @iti shrIpadmapurANe shrInR^isiMhapuramAhAtmye shrIshivapArvatI
saMvAde tIrthamahimAvarNanaM nAma saptamo.adhyAyaH |
\section{aShTamo.adhyAyaH}
shrIshiva uvAcha |
durgAtIrthaM mahApuNyaM sarvadurgopashAntikR^it |
yatra snAnakR^itAM nR^iNAM durgatirnAshatAM gatA || 1||
kAlarUpaM tataH pUrve mahAkAlasya sannidhau |
ujjayinyAH shataguNaM phalaM yachChati majjataH || 2||
bhImAnR^isiMhapurato mahAnAdeshvaro.architaH |
kShetrAntarAtkoTiguNaM phalaM yachChati nishchitam || 3||
durgayA vimale tIrthe devo.ayaM vimaleshvaraH |
vArANashyA api mahatphalaM yachChati pUjitaH || 4||
kurukShetrAttIrthavarAt sthANuryata shilAmayaH |
dAnAdyaiH pUjito bhaktyA phalaM yachChatyasaMshayam || 5||
tatraiva pa~nchahastena koTitIrthaM mahAphalam |
tatra snAtvA samabhyarchya gokarNAtkoTipuNyabhAk || 6||
bahUnyanyAni kShetrANi vidyante cha maheshvari |
vidikShu dikShu paritaH kramAdeva nibodha me || 7||
tejastIrthe mahAtejAH sha~NkukarNo virAjate |
sarvatIrthe kR^ittivAsA ekAmbarasahAyavAn || 8||
kAlA~njane nIlakaNTha UrdhvaretAstridaNDake |
ChAgalaNDe kapardIshaH shobhate shR^iNu pArvati || 9||
ga~NgAyAM cha jayanto vai puruke chAdisaMhataH |
gokarNasyAbhitaH saumye saMsthitaH kukkuTaH priye || 10||
tato bhImAjale ramye brahmAvarte.atha devarAT |
tato.agnitIrthe someshaH prabhAsena sahasthitaH || 11||
tato gayAyAM phalgustho dharmeshaH paramo mahAn |
vAmeshvarAjjaTAdevo harishchandrAddharIshvaraH || 12||
vR^iShadhvajAd vR^iSheshashcha bhavo vai vAtsanApathAt |
bhadrakarNAchChivaH sAkShAddharmali~NgAddhareshvaraH || 13||
nepAlAtpashupo devo dArukShetrAttu daNDadhR^ik |
ugraH kanakalAdudrAlayAdrudraH samAgataH || 14||
kedArAd garbhaIshAnaH sahastrAkShaH suvarNataH |
sarvamedhyAchcha sarveshaH shrIshelAt tripurAntakaH || 15||
jAleshvarAt trishUlI cha kAshmIrAdvijayeshvaraH |
AmlAtakAchcha sUkShmeshashchaNDesho marujA~NgalAt || 16|
rudrakoTAnmahAyogI shUlaTa~NkaH prayAgataH |
mahAvrato mahendrAchcha marukoTAnmahotkaTaH || 17||
ayogIshaH puShkarAchcha karavIrAtkapAlabhR^it |
mAheshvar dIptinAtho bhUteshAd bhasmagAtravAn || 18||
ga~NgAsAgarato devo.amaresho.api samAgataH |
vindhyAd dharaNivArAhaH kailAsAd gaNanAyakaH || 19||
hemUkUTAd virUpAkShaH pAtAlAd hATakeshvaraH |
kirAteshaH kirAtAravyAjjalali~NgAjjaleshvaraH || 20||
analesho vADavAsyAdo~NkAro.amarakaNTakAt |
devakAyAdumAnAtho virajaskAd virochanaH || 21||
la~NkAyA marukeshAno ga~NgAdvArAd himeshvaraH |
nakuleshAtsvayambhUrvai lakulIkAtparohataH || 22||
saptagodAvarItIrthAd bhImeo bhImavikramaH |
karNikArAd guNAdhyakSho trAgatAddhi gadAdharaH || 23||
bhUrbhuvaH svaH patirdevo gandhamAdanataH priye |
kAshyA vishveshvaro deva umAnAthaH samAgataH || 24||
samAgatAni tIrthAni devataiH saha satpuram |
draShTuM nR^isiMharUpaM vai sarvArthaikAmaradrumam || 25||
bhImAyAM pa~nchahastAnAmantareNa sthitAnyalam |
aikaikasya mahattvaM hi mayA vyAkhyAtumakShamam || 26||
anantasiddhimApannA eteShu snAnadAnataH |
muktAH kati na jAne.ahaM trilokesho.api vai priye || 27||
atrApyAkhyA puNyatamA gIyante nAradAdibhiH |
rahasyaM bhImarathyAshcha sarveShAM sarvakAmadam || 28||
ekadA munayaH sarve tIrthayAtrAM chikIrShavaH |
vR^indasho dharaNIM cherubrahmiShThAH sarvadarshinaH || 29||
vishvomitro vAmadevo bharadvAja R^ibhuH kratuH |
agastyaH kaNva utta~Nko devalo bhArgavo.asitaH || 30||
vyAsAdyAH sa~NghashaH shiShyaishcharitvAbhuvatrayam |
shrAntA aprAptasantoShA babhUvuste tadA priye || 31||
mArge tIrthakathAM svairaM kurvanto guNabuddhayaH |
mitho vichArayAmAsuH kiM shreShThaM tIrthamuttamam || 32||
kaH kAshIM kashchanAvantI ke.api tIrthAnyanekashaH |
vivadantaH prashaMsato naivApuHsthairyamAtmanaH || 33||
teShu j~nAnavatAM rAjA vasiShTho maunamAsthitaH |
vij~nApito munivarairmune kasmAnna bhAShase || 34||
sa provAcha vivAde vo nAstyeko.api niyAmakaH |
vinaikaM nAradamR^iShiM mahAbhAgavatottamam || 35||
te tadvAkyaM prashaMsantaH prochuHkvAsau sa nAradaH |
va~nchayitvAkhilAn gUDhaH kiM tIrthamanusevate || 36||
evaM hi vichAraparA manoyogAddhiyoginaH |
vichinvAnA brahmaputraM bhImAtIre sthitaM yayuH || 37||
vIrAsanAsthaM vimalAmbara sR^ijaM virAgamAnandabhareNa pIvaram |
bhrUmadhyadR^iShTiM paramaM samAdhinA vilokayantaM narasiMhamAtmani || 38||
vIkShya bhAvena devarShi brahmarShipravarA natAH |
AsthitA parito yatra bhImA dakShiNavAhinI || 39||
prochuH prA~njalayaH shrAntA vayaM deva munIshvara |
alabdhAnyatra vishrAntiM prAptAste.atikamAdarAt || 40||
mUDhAnAM kleshakhinnAnAmasmAkaM tIrthavedane |
saMshayaM vachasApohya sukhakartumihArhasi || 41||
nArada uvAcha |
aho brahmarShayaH puNyA hitvA mAnaM dhiyaM parAm |
shrotuM vA~nChA yadyasti vakShye vo.asaMshayaM vachaH || 42||
puroktaM brahmaNA pitrA putrebhyo naH paraM vachaH |
yatra viShNushivau yuktau nAnArUpau jagatpatI || 43||
tatra kShetrANi tIrthAni devA muktiH kriyA phalam |
tadahaM manasA dhyAtvA sarvatIrthaikasa~Ngraham || 44||
brahmaNo vachanAdatra vasAmi sukhamAdarAt |
atra tIrthAni sarvANi kShetrANi cha maharShayaH || 45||
vasatiM karoti puNyeyaM bhImA dakShiNavAhinI |
atra bhuktishcha muktishcha puruShArtho.atrapuShkalaH || 46||
iyaM bhImA mahAdevo nIrA sAkShAdramApatiH |
ubhayoH sa~Ngamo yatra tatraivAtyantikI gatiH || 47||
etadrahasyaM paramaM nidhAnamiva pIThake |
guptaM bhUgolake dhAtrA sarveShAM mokShasAdhanam || 48||
shrIshiva uvAcha |
shrutvedaM nAradoktaM vai divyaj~nAnA maharShayaH |
j~nAtvA rahasyaM kShetre.asminnAsthitA vishramaM padam || 49||
tataH prabhR^iti babhUvuste nirbharAnandamoditAH |
shrInR^isiMhasthitijuShaH kShetrasyAsya prabhAvataH || 50||
yAte kiyati kAle tairhatasarvendriyakriyaiH |
samAdhinirataiH sarvairdadR^ishe vai mahAdbhutam || 51||
sarvatIrthAni mUrtAni kShetrANi cha mahAtyaMho |
pUjayanti sma nR^ihariM nIrAbhImAmbusa~Ngame || 52||
haripUjAbharAlokAtpuNyaughamupalabhya vai |
vicheruH sveShu sthAneShu nIDeShu pakShiNo yathA || 53||
sAyaM prAtashcha madhyAhnenR^ihareH pUjanodaye |
sarvatIrthAni kShetrANi draShTuM yAnti dinedine || 54||
 ityAlokyAdbhutaM sarve vismitA nR^ihareH padam |
prashaMsanto vicheruste svasvamAlayamAdarAt || 55||

 @itishrIpadmapurANe shrInR^isiMhapuramAhAtmye shrIshivapArvatIsaMvAde
bhImAmadyatIrthavarNanaM nAma aShTamo.adhyAyaH |
\section{navamo.adhyAyaH}
gotIrthaM prathitaM loke shR^iNu tvaM mR^igalochane |
yadAkhyAnaM pitR^igaNairmudA saMstUyate sadA || 1||
prahlAdAya prasannAya prasannaM jagatAM patim |
yayurdraShTuM sureshAnaM munIndrAdyA varUthashaH || 2||
AkIrNavalayaiH puShyaiH stutvA stotrairanekashaH |
mahAbhiShekasambhAraM chakruste paramAdarAt || 3||
pa~nchAmR^itAni saritAM pIThaM puNyatamairjalaiH |
oShadhIrdharaNIdevI pIThaM sheSho.apyupAnayat || 4||
tadA kAmaduho gAvo babhUvurvai sahastrashaH |
nArasiMhaM samAlokya prastutastanamandharAH || 5||
Agatya chintAmaNinA kR^itaM nIrAjanaM priye |
vAme sthitena bhaktyA taM vavarShuH pAyasIM sR^itim || 6||
payasA snApayitveshaM gAvo dakShiNataH sthitAH |
mArgayantyo nR^ihareH prasAdaM vimalAshayAH || 7||
tAM samAlokya saMsiddhiM chetaso bhaktibhAvitam |
uvAchedaM prasannAtmA nR^iharirbhaktavatsalaH || 8||
shrIbhagavAnuvAcha |
varo vaH shrUyatAM gAvo bhaktyA tuShTasya me paraH |
bhavatIbhiH payodhArA muktA yA mama mUrdhani || 9|
dhArAtIrthaM tadevedaM gotIrthamiti vishrutam |
bhaviShyati mahApuNyaM pitR^INAM toShakAraNam || 10||
kurukShetre prayAge cha gayAyAmanyadhAmasu |
yA tR^iptiHshatavarShaiHsyAchChrAddhe sA labhyate sakR^it || 11||
gotIrthe snAnadAnAdi kurvatAM vasatiH priye |
kalpAnte matprasAdena bhaveddhi sannidhau mama || 12||
dakShe kAmaduho vAme chintAmaNigaNeshvaraH |
pR^iShThe kalpadrumo.ashvatthaH priyaM me trayamuttamam || 13||
parvaparvasu goyAtrA chaturthyAM gaNapUjanam |
mandavAre.ashvatthasevA niyatA saphalArthinAm || 14||
aho tIrthAni sarito devarShimanujAdayaH |
gotIrthe snAtatR^iptyarthaM pitR^INAM kAmasiddhaye || 15||
shrIshiva uvAcha |
AdeshamimamAkarNya sarve gopayasAM hR^ide |
chakraHsnAnAni dAnAni pitR^iNAM tR^iptihetave || 16||
tadA prajAnAM pitarastatkShaNAddivyavarchasaH |
mUrtastuShTAHpuShTadehAstuShTuvurnR^iharimmudA || 17||
yo lIlayAtmanijagadvitanotyanantaH puShNAti nirmalasudhAnayanena nityam |
sadyaHsvarUpamahasAbhivR^iNoti sarvaM tasyAdya tR^iptikaraNe katamaH prayAsaH || 18||
sarveShu dehiShu samaM sadanantamAdyaM pUrNe shivaM sadasataH paramekasaMstham |
yastvadvitIyamudayAstamayAdihInaM shashvatprashAntamabhayaM tamajaM purANam || 19||
yasyekShayaivaparijIvati jIvasa~Ngho nashyatyasau.anIkShita eva tena |
jAnannapi prabhuvaraM na bhajatyasau tvAM hA hA hataH kathamaho tamasA vimUDhaH || 20||
tvaM vishvamUrtimataH pitAmaho naH pUjyaH svadhAbhiranaghaH paripUrNakAmaH |
AtmAtmanA ramayase.asya vibhUtibhAjastatte guro vilasanaM suhitAya puMsAm || 21||
adya prabho bhavadanugrahato.atitR^iptAH sarve vayaM pitR^igaNA na tathAnyatIrthe |
jAnImahe karuNayA yadIkShase tvaM tatpUrNatAM nayasi nUnamamoghashakte || 22||
tvannAmamantramahimArthaparAH prashAntAH svAtmAvabodhabharapUrNamanovilAsaH |
kurvanti dR^iShTisudhayAnyajanAnvimuktAn tvaM tR^iptimunnayasi naH kimaho.atrachitram || 23||
adyaprabhR^ityavanatAkhilakAmandatat tvatsannidhau sthitAmihAstu sutR^iptaye naH |
yatrAbhimajjanasudAnasutarpaNAdyaistR^iptirbhapitR^iShu kalpashatAyutairvai || 24||
yaj~nAya sarvamataye.akhiladevamantraviprAgnisaMsthitahaviH phalashuddhidhAmne |
yogAvabodhavapuShe guNakAmasImne sarvAtmanAkhiladR^ishe bR^ihate namaste || 25||
shrIbhagavAnuvAcha |
astuvaH pitR^i tR^iptyarthametadgotIrthamuttamam |
etatsaMsevanAnR^iNAM na kAmAnAmAtigrahaH || 26||
yadahaM payasAM pUraiH plAvito.atra hi mUrdhani |
sevanAttasya tIrthasya dAriharaM nopajAyate || 27||
iyaM bhUH kAmadhugdevI kalpavR^ikShA mahIruhAH |
chintAmaNigaNAH sarve dR^iShado matparigrahAt || 28||
evaM mahAbhiSheke.asminnabhiShikto.asmadAdibhiH |
nIrAjito devatAbhiH saMstuto munisattamaiH || 29||
prArthito.atha prasannAtmA praNatAnandavAridhiH |
deveshaH sthIyantA prItyA sarveShAM hitasiddhaye || 30||
tathetitAnanushrutya lakShmImAli~Ngya lIlayA |
sarvarUpo.anantashaktistatrAdR^ishyo.abhavatkShaNAt || 31||
 itastataH pragR^iNatAM sarveShAM naH kR^ipAnidhiH |
nabhorUpo.avadaddevo munayo.ahaM vasAmi vai || 32||
idameva mahadrUpaM vyoma me sarvakAraNam |
japatAM dhyAyatAM nR^iNAM kaivalyAdyakhilArthadamaM || 33||
mantrarAjena nAmnA mAM ye.atra nityaM stuvantyaho |
teShAM na chittato dUre bhavAmi vkApi sarvagaH || 34||
ahamadR^ishyarUpeNa sthitaH sarvAntarAtmani |
pUjito bhAvitaH premNA dadAmyAtmAnamapyajaH || 35||
yathA yA sa~NkatI mUrtiH pralhAdArbhapratiShThitA |
tathA dadAmi satkAmAnkaivalyamati vA~nChitam || 36||
bhavantaH shaktibhiH svAbhiratra tiShThantu sarvadA |
rakShaNAyAsya paritaH kShetrarAjasya sattamAH || 37||
 ittyuktavantaM munivarAH praNamya vyomarUpiNam |
shaktIH svAH svAH pratiShThApya gatAH svaM svaM padaM mudA || 38||
 iti te.abhihito devi gotIrthaprabhavo mudA |
sa~NkShepAd vistaraM vaktuM na kShamo.ahaM kuto.apare || 39||
gotIrthaprabhavaM tvetaM ye paThanti dvajottamAH |
nayantyAkalpikIM tR^ipti pitR^in mama svaraiH || 40||

 @iti shrIpadmapurANe nR^isiMhapuramAhAtmye shrIshivapArvatIsaMvAde
gotIrthaprabhavo nAma navamo.adhyAyaH |
\section{dashamo.adhyAyaH}
shrIshiva uvAcha |
gotIrthAtpUrvatodevi bhAnutIrthamanuttamam |
tapastaptvA raviryatra prAptavAn j~nAnamuttamam || 1|||
tattIrthamajjanakR^itAM ravau sUryagrahakrame |
grahAH prashamamAyAnti na vishatyaj~nAnajantamaH || 2||
sUrya AtmAsya jagataH priye sthitvA mahAprabhaH |
AtmAvabodhasampanno nityaM yatra prakAshate || 3||
sarvakAmikametaddhi tIrthaM sarvavarapradam |
bhavavyAdhiharaM nR^iNAM sevanAtsnAnatarpaNAt || 4||
tasyAgre chakratIrthahi prahlAdasyAvanAya yat |
hariNA preShitaM chakraM yatroditamanuttamam || 5||
chakratIrthaikabhaktAnAM na bhayaM kAlachakrajam |
saMsArachakravyAvR^ittirnacha kalpeta pArvati || 6||
chakrAvatAro nR^ihariH sadA rakShati vai jagat |
bhajatAM kAmado.atyarthaM yathA kalpadrumo nR^iNAm || 7||
nandakAkhyaM cha tIrthaM vai sarvAnandamanuttamam |
tadagre pAshatIrthaM vai bhavapAshanikR^intanam || 8||
tadagre lA~NgalaM tIrthaM kaSharNaM kAmasampadA |
tadagre mausalaM nAma duHkhaparvatamardanam || 9||
etAni bhImamagnAni tIrthAni paramANi vai |
pratyekaM dhanuShAM pa~nchaviMshatyA gaNitaM priye || 10||
anyAni bahushastIrthAnyAdR^itAni sureshvaraiH |
purANeShu prapaThyante sarveShu prANavallabhe || 11||
sarveyaM tIrtharUpAbhUH sarvadevamayohariH |
sarvAgamarasA bhImA nIrA sarvaphalaudhinI || 12||
snAtavyaM sa~Ngame nityaM tarpaNIyA dvijeshvarAH |
pUjanIya narahariH prAptavyaM paramaM padam || 13||
atra tIrthAni sarvANi mantrA Nyatra pratiShThitAH |
devatA nR^ihariryatra kimanyadavashiShyate || 14||
snAnaM dAnaM tarpaNaM cha pumAnyatra karoti yaH |
sarvatIrthodbhavaM puNyaM prApnuyAt sa pade pade || 15||

 @iti shrIpadmapurANe nR^isiMhapuramAhAtmye shrIshivapArvatIsaMvAde
bhImAmagmatIrthavarNanaM nAma dashamo.adhyAyaH |
\section{ekAdasho.adhyAyaH}
devyuvAcha |
vichitramidamAkhyAnaM tIrthAnAM bhagavanmukhAt |
shrutaM pApaharaM puNyaM sarveShAM mokShasiddhidam || 1||
idAnIM kathaya svAminyAtrAnirNayamuttamam |
yaM vij~nAya naro yAti kShetraM puNyaphalaM varam || 2||
shrIshiva uvAcha |
yAtrAM sAMvatsarIM devi mAsAM nityAM tathA shR^iNu |
nR^ihareH prIyate yA hi kR^itAH pUrvamaharShibhiH || 3||
jayantyAM mAdhave shukle bhUte pAte cha svAtibhe |
yAtrA sAMvatsarI kAryA vArShikI siddhimichChatA || 4||
tasyAM snAnajapadhyAnapUjAhavanatarpaNaiH |
koTiyAgaphalaM sphItaM bhuktvA yAnti hareH padam || 5||
rAmasya kR^iShNasya jayantyAM vA sarvAsu shivarAtriShu |
yAtrA kAryA jayantIvattatropoShaNatatparaiH || 6||
yadA daityo hataH sAyaM hariNA siMharUpiNA |
tasmin kAle.anishaM devo dR^iShTo hanti januHshatam || 7||
parvaparvasu gotIrthe snAnaM pUjAhareH parA |
sa~NkrAtigrahaNarkeShu bhAnutIrthe tathaiva cha || 8||
somashravaNayoge tu prahlAdasya hariH svayam |
darshayAmAsa surUpaM tatra yAtrAhi mAsikI || 9||
sAyaM prAtarmadhyAhne vai yAtrA dainandinI matA |
sarvakalyANajananI sarvAghaughavinAshinI || 10||
jayantyaH shivarAtrIshcha tathA haridinAni vai |
sadopoShyANi sudhiyA janmasAphalyamichChatA || 11||
etAsu sarva pApAni tiShThatyannAshrayeNa vai |
tasmAtsarvAtmanA dhImAnetAsUpavaset sadA || 12||
navamI chaitrashuklasya shrAvaNasyAsitAShTamI |
shravaNadvAdashI bhAdre rAdhe shuklachaturdashI || 13||
anurAdhottarApuShyarohiNIshravaNairyutA |
ekAdashI dvAdashI vA maghAyuktA chaturdashI || 14||
etAsu puruSho dhImAn nAshnIyAt kimapi priye |
annamashn pramAdena yAti ghorAMstu nArakAn || 15||
pUjAhomastutigataM jAgaro brAhmaNArchanam |
upavAsaH pAraNAnte vidhiH sAdhAraNo.ahi || 16||
nityaM pUjAM hareH pashyaMstIrthANAM phalamApnuyAt |
prApnuyA vai yaj~naphalaM pashyannIrAjanaM hareH || 17||
naivedyasamaye devaM yaH pashyati vimUDhadhIH |
sarvAparAdhamalino daNDyo.asau yamaki~NkaraiH || 18||
naivedyAnte tu nR^ihariM suprasannaM vilokayan |
tIrthakoTiphalaM labdhvA dhanyajanmA bhavennaraH || 19||
aparAdhakR^itAM puMsAM tIrthe vAso na shakyate |
tIrthe pApakR^itAM yasmAtsukhaM nAsti yugeShvapi || 20||
parApavAdaniratA hiMsrA ye duShpratigrahAH |
durAchArA narAsteShAM tIrthe vAso na chottamaH || 21||
tIrthe praveshamApannAH sarve niShpApapa~njarAH |
tIrthe vAsakR^itA martyA apyamartyA matAH shive || 22||
tIrthe pApakR^itAM ghorAM viShvaksenasya yAtanAH |
pashyatAM tu nR^ihariM bhaktyA yamadUtA na gocharAH || 23||
nR^isiMhanAmavidhvastapApaka~nchukanirmalAH |
prayAnti nR^iharerlokaM yoginAmapi durlabham || 24||

 @iti shrIpadmapurANe nR^isiMhapuramAhAtmye shrIshivapArvatIsaMvAde
yAtrAnirNayavarNanaM nAma ekAdasho.adhyAyaH |
\section{dvAdasho.adhyAyaH}
devyuvAcha |
shruto.ayaM nirNayo deva yAtrAyAH paramotsavaH |
ma~NgalAnAM naro yasmin prApyate lIlayA padam || 1||
idAnIM shrotumichChAmi hareH pUjAvidhiM param |
yenAsau pUjitastuShTo dadAtyAtmAnamIshvaraH || 2||
shrIshiva uvAcha |
deviM pUjAvidherasyAnantasyAnto na vidyate |
sarvArthaikabhujasyAsya sarvepratyayasAkShiNaH || 3||
tathApi hitakAmAyAstava premNA nR^iNAM priye |
vadAmi sUtrato devi pUjAkramamanuttamam || 4||
trividho yoga Ishasya vaidiko mishratAntrikau |
adhikAravibhedena kathito hariNA mama || 5||
vedaprayogato vedyastAntrikastantrashAsanAt |
ubhayAnuShThito mishra iti jAnIhi tattvataH || 6||
eteShvekena nR^ihariM mantrarAjairyajannaraH |
prApnoti nikhilAM siddhimabhIShTAmAtmadeshvarAt || 7||
pratimAyAM jale vAyau vanhauM hR^idi tathA priye |
AkAshe svAtmani premNA yajentR^ihariM pumAn || 8||
svAtmanyAtmatayAtmAnamAkAshe viyadAtmanA |
tattattoSheNa lokeShu sarvAntaryAminiShThayA || 9||
hR^idibhAvArpaNairagnau haviShA cheShTayAnile |
jale jalopachAreNa pUjayennR^ihariM mudA || 10||
pratimA saikatI lepyA lekhyA dArvI shilAmayI |
maNirUpA dhAtumayI pArthivetIyamaShTadhA || 11||
etAsvAvAhanodvAsA uktau pUjAvidhiM shR^iNu |
lekhyAlepyApArthivAsu sasnAnaM mArjanaM priye || 12||
na gandhalepo lekhyAyAmanyaH sAdhAraNo vidhiH |
eSha ja~NgamarUpAsu kathitastattvato vidhiH || 13||
sthAvarAsu na chArchAsu visargAvAhana priye |
pUrvameva pratiShThA hi jAtA devasya pArvati || 14||
charAsvapi cha shailAsu shAlagrAmAdiShu sphuTam |
harermama gaNeshasya tava sAdhyAstathaiva bhoH || 15||
atraiva bhaktarAjena sthAvarAmUrtisthApanam |
kR^itaM pUjAvidhAnena tanme nigadataH shR^iNu || 16||
prAtaH shauchaM vidhAyAdau dantAnAshodhya mantravAn |
snAyAnmR^idAdibhiH sarvairmatrairvAruNavaiShNavaiH || 17||
vAsasI paridhAyAtha kR^itasandhyAdi skriyaH |
samukhaH svastha AsIta pUjAbhAraiH susambhR^itaiH || 18||
priye kR^itvA nyAsavidhiM prANAnAyamya vAgyataH |
shodhayed vAyutejobhyAM piNDaM pIyUShajIvanam || 19||
hR^itpadmakarNikAmadhyaM hR^idayAkAshabandhuram |
nAdAnte bhAvayedIshaM jyotirUpamakhaNDitam || 20||
tena saMyuktahR^idayo nirmalo gaganopamaH |
sarvadevAdhirUpAM tAM mUrti dhyAyed vishuddhadhIH || 21||
sUkShmAtsUkShmataraM devaM bhAvayan paramAtmanam |
shanairagrasthitAM mUrticharyayed vidhipUrvakam || 22||
mUlena mantrarAjena vyUhe ShoDashashaktibhiH |
yuktaM yajennR^ihariM pIThArchanavidhAnataH || 23||
mahAchakrakrameNAsya kuryAdAvaraNAni vai |
brahmAviShNushivAdInAM mantrarAjAtmakAni cha || 24||
pratyekAvaraNe shrIshaM yogapIThasthitaM harim |
pUjayetpara yA bhaktyA mokShasAdhanalipsayA || 25||
pAdyArthyAchamanasnAnavastrasUtravibhUShaNaiH |
gandhamAlyAdibhirdhUpairnaivedyaiH ShaDrasaiH saha || 26||
phalatAmbUlabhogAdyairgItaiH stotraiH suma~NgalaiH |
tauryatrikaiH purANAkhyAj~nAnAdeshairanekashaH || 27|
ChatrachAmarakairyAnairvyajanairdarpaNAdibhiH |
nAnopahArabalibhiH sAmanIrAjanAdibhiH || 28||
anyairmahopachAraishcha nAnAvibhavavistaraiH |
pradakShiNAbhirnatibhishchArthayitvA kShamAM gurum || 29||
puShpA~njali samayate sheShaM devAj~nayA mudA |
dvijAtibhyo vibhajyAtha gR^ihaNIyAnmokShasiddhaye || 30||
devAnagni viprAMshcha pUjayedyaH samAhitam |
sarvAnkAmAnavApnoti kaivalyamapi vai pumAn || 31||
devAgre puShpavATI yo kurute bhaktito naraH |
yAvatpuShpadalAgrANi tAvatkalpaM sa nAkabhAk || 32||
devapUjAsu nirvAhavR^ittiM yaH kalpayet sudhIH |
dine dine.ashvamedhasya phalaM tasya na saMshayaH || 33||
jIrNoddhAreNa sarveShTaM prApya bhogAn pratiShThayA |
archayApnoti vaikuNTha trayeNApnoti sadgatim || 34||
yastu vai dvijavaryANAM vR^ittiM nAshayate kudhIH |
yAvallomAni dehe.asya tAvatkalpaM sa nArake || 35||
 iti te sarvamAkhyAtaM guhyaM yanmokShasAdhanam |
nR^ihareH puramAhAtmyaM kimanyachChrotumichChasi || 36||
devyuvAcha |
svAminmahottamaM kShetraM nR^ihareH padabhUShitam |
etanmAhAtmyamAkarNya dhIrmeM puShTiM parAM gatA || 37||
atra stheyaM bhagavatA mayAsaha hitechChayA |
janAnAM puNyakAmAnAM mArgaM darshayatA guro || 38||
shrIshiva uvAcha |
shive jAnIhi nR^iharau trayo devA vayaM sadA |
nivasAmo janAnAM hi hitArthAya na saMshayaH || 39||
atra mAM vA vidhiM viShNuM bhedadR^iShTyAbhimanvate |
teShAM kalpashatenApi na siddhiH pAramArthikI || 40||
dehAkAro bhavedbrahmA nAmamAtro hariH svayam |
pUjAbhimAnI rudro hi trayamAtmaiva kevalam || 41||
etanmataM me jAnanti sanakAdyA maharShayaH |
marIchyAdyAshcha manavo lokapAlAH khageshvaraH || 42||
gandharvApsaraso nAgAH pralhAdAdyAstathAsurAH |
kiM devAH kinnarA yakShA rakShaH kiM puruShAdayaH || 43||
sarve svalAbhasantuShTA ante yAsyanti sadgatim |
muktA vai bahavaH siddhA etenaiva matena me || 44||
ya etadavajAnanti mUDhA dehAtmamAninaH |
na bhavenmuktatA teShAM triShu kAleShvapi priye || 45||
athApi rUpavAnagre devasya pArshvayoH |
tvayA tiShThAmi madhye cha sarveShAM sukhahetave || 46||
etatpuNyatamAkhyAnaM prayataH shruNuyAtpaThet |
sarvAn bhogavarAn bhuktvA prAnte nR^iharimApnuyAt || 47||
sarvavedeShu yatpuNyaM sarvatIrtheShu yatphalam |
sarvapUjAsu yatproktaM prApnuyAdasya kIrtanAt || 48||
sUta uvAcha |
evamuktvA shivo gaurIM premNAli~Ngya mudAyutAm |
udare nR^iharermUrteH pravivesha dayodadheH || 49||
evaM bhoH kathitaM guhyamitihAsena sattamAH |
nR^iNAM niHshreyasArthAya sarvakAmaughasiddhaye || 50||
etatpuNyatamAkhyAnaM vyAsena parikIrtitam |
j~nAnavairAgyayuktAya putrAya shukAya vai || 51||
shruNuyAt kIrtayed yo vA nR^isiMhapuravarNanam |
dayArNavasya nR^ihareH sAyujyapadamarhati || 52||
vyAsa uvAcha |
 iti sUtAtsamAkarNya mAhAtmyaM purasambhavam |
prashaMsanto mudAyuktAstaM praNamya yayurgR^ihAn || 53||
nR^isiMhapuramAhAtmyaM shR^iNoti paThatIha yaH |
kiM tasyAnyena puNyena mukto.asau bhavabandhanAt || 54||
kimatra bahunoktena vartamAno.api sarvadA |
na lipanti duHkhaleshena sa naro nAtra saMshaya || 55||

 iti shrIpadmapurANe shrInR^isiMhapuramAhAtmye shrIshivapArvatI
saMvAde haripUjAvidhirnAma dvAdasho.adhyAyaH |
OM tatsat |

iti shrInR^isiMhapuratIrthamahimAvarNanaM sampUrNam |
##
Proofread by Manoj Kumar Barman 

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}