% Text title : Shri Nrisimha Shatakam 06-07 % File name : nRRisiMhashatakam.itx % Category : vishhnu, shataka, dashAvatAra % Location : doc\_vishhnu % Proofread by : Saritha Sangameswaran % Description/comments : prakIrNastotrANi Stotrarnavah Ed. T.Chandrasekharan 1961 From stotrArNavaH 06-07 % Latest update : March 27, 2022 % Send corrections to : Sanskrit@cheerful.com % % This text is prepared by volunteers and is to be used for personal study % and research. The file is not to be copied or reposted for promotion of % any website or individuals or for commercial purpose without permission. % Please help to maintain respect for volunteer spirit. % \documentstyle[11pt,multicol,itrans]{article} #include=ijag.inc #endwordvowel=.h \portraitwide \parindent=100pt \let\usedvng=\Largedvng % for 1 column \pagenumbering{itrans} \def\engtitle#1{\hrule\medskip\centerline{\LARGE #1}} \def\itxtitle#1{\medskip\centerline{\LARGEdvng #1}\medskip\hrule} \def\endtitles{\medskip\obeyspaceslines} %% \begin{document} \engtitle{.. Shri Nrisimha Shatakam ..}## \itxtitle{.. shrInR^isiMhashatakam ..}##\endtitles ## chaNDabrahmANDabhANDabhramaNabharabR^ihaddhoShanirghAtadairghyai\- durdaityavyAghrashIghrapramathanakathanaM sarvadikShu prakurvan | kauTilyakrUradaMShTrotkaTachaTulanaTatprahvajihvAmaholkaH prahlAdAhlAdaheturdahatu mama mahadraMhasAMho nR^isiMhaH || 1|| naiShThuryaujasvichaNDatridashagirimahAdaNDasantADyamAna\- brahmANDAtodyabhANDoDDamararavasuhR^idbhAvasambhAvanIyaH | ruShTendradveShTamuShTidrughaNahatasabhAmaNDapastambhagarbhA\- dAvirbhUto vibhUtyai bhavatu naraharerAdighoSho visheShAt || 2|| devadveShTTpraveShTodbhaTamadaviTapibhraMshaghoShAbhighoro daityendrashrIprakoShThotkaTakaTakaghaTAkUjakUTAyamAnaH | nirghoSho durghaTaM drAgghaTayatu vikaTapretarADdvAHkavATo ddhATATTadhvAnakalpaH prakaTakaTakaTAkATavotpATavo.asau || 3|| aMhaHsa~NghAtaghAtaM ghaTayatu ninado raMhasA nArasiMhaH svargastrIvargara~NgasthalapadakalanAnandinAndIninAdaH | daityendrApatyatatyuttamamahimabharoddAmasaubhAgyabherI\- bhA~NkAro digdvidantashrutichalanakalAdhyAyasandhyAbdashabdaH || 4|| Urmi pre~NkholakhelAmukharajalanidhidhvAnagAnAtipInaH krodhakrUrasya shakradviShi harivapuShashchakrapANeH praghoShaH | kalyANaM lokapAlyA virachayatu haritku~njarashrotrapAlyA bAlyaprAbalyashAlyAshugavikR^itihR^iteH shlAghito dAnapAlyA || 5|| saMvartAmbhashumbhajjaladakulagalastambhigambhIratAbhR^i\- nmanthAdrikShubdhadugdhAbdhijaninadavidhAjagdhivaidagdhyadigdhaH | sambhUyojjR^imbhamANe sughaTadhanaghR^iNo dIrghanirghAtavarge shIghraM nirghoSha eSha sphuratu hR^idi bR^ihaddhargharAghora aishaH || 6|| mohaM sauvargavarge mahati bahalayana drA~NmahargehabhAjAM niShpItashrotagIto nu sanakajanakashrotrabAdhiryadhuryaH | dikkumbhistambhakArI pratininadasamuttAlapAtAlatAlu\- shchaNDo brahmANDabhedI bhavatu hariravaH shreyase bhUyase vaH || 7|| UrdhvaproddhR^itadhUmadhvaja R^ijujvAlamaNikyadaNDaM (vimalajvAlamaNikyadaNDaM) nIlapAlambalIlaprachalitarasanArAjivibhrAjibimbam | dIvyaddarvIkarorvIpativitataphaNAshreNinirmANamantaH nirmAyaM bhAvayAmaH prabhushirasi bR^ihattApamuktApahatyai || 8|| kShoNIbhR^itpakShapAtAdanunR^iharitanukShipyamANairvitAnaiH bANairvaimukhyalakShyaiH shvasitapavanataH kShuNNatatkaNThalakSham | udvarNairmaNDalAgrairapi charamachare khaNDanAyAriShaNDe lA~NgUlochchaNDadaNDaM dadhadavatu vipanmaNDalAtkuNDalIndraH || 9|| uddaNDairjvAlaShaNDairjvaladanaladR^isho.ajANDadaNDordhvakhaNDa\- sphoTo bhAvIti bhItyA prathitapR^ithuphaNashreNivistAritashrIH | urvIvAho vinekArbudakulakalanAmauliniShThapratiShThaH shIghraM no dIrghapR^iShThaprabhurabhayabhR^ito bhUShaNaM bhAvanIyaH || 10|| agraprodaprajAgranmaNigaNakiraNaistArakonmeShachoraM nIchairuchchairuda~nchadvitatapR^ithuphaNashreNishAkhAsahasram | lagnairagnisphuli~NgaiH sphuTaruchi niTilAkShNo.apyabhIkShNaM tathAdhaH kraShTA kaShTAni dR^iShTaM phaNipatimukuTaM kUTasiMhopariShTAt || 11|| somasparshAtprakarShaM pravahati dadhatI yakShiNIchitralakShmIM yatrAbhAte yadantarvilasati satataM guhyakeshaprasAraH | ga~NgAmbhashshubhramabhra~NkaShashivashikharabhrAjitaM rAjatAdreH devasyoparyahInorjitaphaNapaTalaM pATayet sa~NkaTaM naH || 12|| pAyAdAkAshakAshojjvalakusumasajyotirujjR^ibhitAgrA pratyagraprAgrathamuktAphalakhachitashikhasvarNasUchIsakhInA | kShudrachChidrAlimudrAvidhuparidhivalachchAlinIshAlinItiH lIlApArIndramUrteratiparueruSho bhAsurA kesarAlI || 13|| vaikuNThotkaNThitAnAmaNimaguNajuShAM prANinAM prItibhAjAM gAtrAdutkrAntamAtre sukhamayanilayaprApaNAyApayatnam | brahmANDasyordhvakhaNDe.arachiShata sR^itayo niHsR^itairyairvidArya\- chChauryaM haryakShamU rternidadhatu hR^idi te kesarA bhAsurA naH || 14|| hR^itkuNDAntaHprachaNDapratighahutavahashrIshiroromakUpa\- stUpadvArodyadaMshustabaka iti jane bibhrati bhrAntimuchchaiH | vidyujjvAlAvalIjapratibhayarasanAchChinnachA~nchalyasampa\- llumpet pratyUhamatyUrjitamiha nR^iharerbhAsurA kesarAliH || 15|| yairAsIdyaityahatyAhR^iShitahR^idamarashreNipUjAvitIrNa\- pronmIlanmallipuShpastabakitashikharasvarNadUrvAsavarNaiH | vidyullekhAsadR^ikShairnaraharashirasi sthUlanakShatralakShai \- rlakShmIrakShmIlabhAvaM vidadhatu vR^ijinojjAsane kesarAste || 16|| svIyashrIleshachaurIshchiramachiraruchaH svodarodAradaryAM paryAptIkR^itya goptuM nabhasi ghanaghaTAM koTikuntachChaTAbhiH | niryatkIlAlakulyaM kila paruSharuShA pATayantIva cheto daityoraHpATanATIkapaTaharisaTAdhATikATIkatAM naH || 17|| saptArchirmitrasUtratruTanasurasR^itisrastanakShatramAlA mallIjAlAbhisR^iShTidviguNitasumanassR^iShTisantAnavR^iShTiH | sandhyAsambadhdhashoNambudapaTalapaTIpATanakShepalakShmI\- rajyatkAShThAvadhUTIkapaTaharisaTAsphATikAdhUtiravyAt || 18|| stabdhAkalpAbdhyanalpochchaladurulaharIghoShakalpAdasIya\- dhvAnAdavyaktabhaktastutipadasadayagrAhikA sAgraheva | rItyA sAjAtyabhAjAmatiparuSharuShAmindriyANAM chaturNAM sa~NkochaM lajjayevorjitamatidadhatI pAtu karNadvayI naH || 19|| draShTaNAM dR^iShTisR^iShTeruparikR^itabhayAviShTatAvR^iShTiruShTe ndradveShTTkliShTajuShTasmaraNanijajanAniShTamuShTindhayaM tat | lIlAshailATamUrteratiparuSharuShoddhATayatpATalashrI\- ghATaM viShNorlalATasthalamativikaTaM pATayet sa~NkaTaM naH || 20|| nR^ityatkR^ilyAvalIva pralayasamudayatkAlarAtrIva khela\- chchAmuNDAmaNDalIvATTahasitavikaTottAlivetAlikeva | udri~NgadraudralakShmIriva kimuta bR^ihadbhairavodbhAsigarbhA | bhrashyatsvarbhAnuvargA dhruvamavatu vibhorbhIShaNA bhAlabhittiH || 21|| udyannirdhUmadhUmadhvajamayanayanA~NgAradhAnyAshritAsau tattirya~Nniryadarchirnichayaparichayeneva raktAvasiktA | sAchivyaktatrirekhIvalivilayavatI sUtakAlAgnirudre\- vedAnImeva devapravara tava hare pAtu bhAlasthalI naH || 22|| nR^ityantI kAlarAtrIkaratalavichalatsAchishUlAnukUlA mudrA vidrAviraudrAnbunidhinAdhivalallolakallolalIlAm | bibhratyetanmukhAntaHsamupagatamahAkopasopAnapAli\- rgopAyennastrirekhI niTilasahacharI chitrapArIndramUrteH || 23|| gA~NgeyAbhikhyayA yajjagati yaduditaM shAntanusphAramode pArthonAyodhanashrIrapi yadadhipaye chordhvatejaHprasiddhiH | yasyAste kR^iShNavartmAnusR^itiparamaho bhAlatArAtidAhi bhrUvallImadhyanetraM naraharivapuSho naumi bhIShmasvarUpam || 24|| rukShAbhikhayAM vivasvadrathacharaNarayakShuNNarUkShe.antarikShe sphAraM sphAraM sphuradbhirvidadhati bahalairutpatadbhiH sphuli~NgaiH | rUkShashreNIsadR^ikShe kShipati dishi dishi dhvAntajAle shikholkA\- mAlA lAlATanetre viharatu naharestatra chitre martinaH || 25|| hR^iShTAn vR^iShTaprasUnAnnabhasi diviShado nUtnaratnaprasUnaiH sphUrjatphullaraphuli~NgaiH suhR^idi himahimairjvAlahastairudastaiH | shIghraM pratyarghadirghIkaraNabahuguNe majjayallajjibdhau netraM sadvItihotraM dahatu narahare raMhasAMha stR^iNAni || 26|| vellajihvolbaNena prachalitabahalajvAlajihvAsahasraM sphArasphUrjatsphuli~NgasphuTamaNipaTalaM prAMshuratnAMshubhAsA | sArdhaM mordhvardhvAsindhusthalavasatijuShA bhogimUrdhAbhiShikte\- nAbaddhaspardhamaddhAvatu harinayanaM bhAlabhadrAsaneddham || 27|| loke vArapravR^ittiH samudayati yataH sannarAjIvachitte bibhrANashchakrabandhUkaraNakutukitAM yo nishAsheShabhAtaH | nityaM dhatte sadR^ikShodayamanuvinatAnandanollAsadhArI sashrIpArIndramUrterapaharatu tamo bhAlahagbAlaheliH || 28|| chUDApAtAlapAlolbaNamaNikiraNAkarShaNoda~nchitaita\- sphUrjatphU~NkArasa~NkochitavitatashikhApANirabhyAsabhAgbhyAm | sArdhaM dR^igbhyAM sakhIbhyAmiva kutukavashAdaMshupAMsuprapa~nchai\- ra~nchantvanyonyakhelAM jayati naraharerbhAladagbAlikeyam || 29|| khadyotadyotalesho dina iva na daraM dyotate vaidhuto.agniH\- yasyAgre nograbhAvAgrahamapi vahate sa grahagrAmaNIshcha | aurvo durvAradurvAsita iva vigaladgarvamambhodhigarbhe lIno yaddhetihIno viharatu nR^iharestatra netre matirnaH || 30|| yanmitro vItihotro.apyatishayadahanAdhyAyamadhyApitau tau\- shaktau samyaggrahItuM na kimapi nibiDottADitAvaMshuvetraH | eko raktAvasekAdaruNa iti gataH khyAtimanyo.api dhAmnA duHkhAdyevasya tejo guruniTilataTIlochanaM mohayennaH || 31|| lakShmIvakShojakumbhasthalakR^italalitAlIkabAhlIkalepaH prahvaprahlAdamaulAvatulavalayinI shoNashATI yadarchiH | rUkShendradveShTTsR^iShTerupari nipatitA pAvakAstrasya vR^iShTi\- rdyaShTirlAlATikI naH kapaTaharitanoH pATayet sa~NkaTaM sA || 32|| ma~njiShThAma~njuchelavyajanamiva valattantujAlaM samantAt AsyAntarlAsyavatyAH shramashamanakaraM roShalakShmIyuvatyAH | ghoNAdaNDopariShTAt prakaTitamaruNaM shliShTashoNAMshuveShTaM vR^ittaM hantA nu dantAvaladalanatanorakShi santApamantaH || 33|| udvellajjvAlavallIchChalamR^idulachalachChoNachelA~nchalashrI\- sphAraiH phullaiH sphuli~NgaiH khalu khachitashikhAmandamandAravR^indaiH | svadhyAtR^iNAM nR^iNAM sAbhayavarakaratA kIrtitA siMhamUrteH bandhukachChAyabandhuchChaviravatu vibhorbhairavI bhAladR^iShTiH || 34|| mAdyad durdAnavodyanmadadalanaphalaM bhaktabhUyovipatti\- pratyAdeshaM phalaM chAkalayitumasurashreShThaniShThA phalaM cha | kopashrIpATalAyAH kapaTanR^iharihR^idbhrAjabhAnodbhavAyAH pullatphullatrayIvollasatu madashubhasyApanetrI trinetrI || 35|| mAyAgandhaM nirundhan bhuvi padakamalAbhogasampAdahetuH saMvAdI tApadAne paramahimakareNAttakAruNyasampat | yatpAtaH shatrujAte suhR^idi cha sadR^isho divyapArIndramUrte\- rjaitrI sA nastrinetrI bhavabhayavibhavasyApanetrI bhavitrI || 36|| jvAlAvallI vishAlA sphurati naraharerbhAlanetrAlavAle tAmevochchaiH sphuli~NgasphuTakusumaghaTAM koTi deshe dadhAnA | addhA yaddhetukochchAvachaphalapaTalaprAyatAmAyatAlaM saMvartodvR^ittavAhnidyumaNigaNabR^ihadbhAnudambholivargaH || 37|| sArdhaM yoddhuM samR^iddhairnabhasi bhapatinA durjayairdhvAntayodhaiH dhR^iShNishreNIbhaTAnAmahamahamikayA satvaroditvarANAm | vAhAsa~NghaTTapiShTA~NgadamaNipaTalIprAMshupiShTAtavR^iShTAH kaShTAnAM santu naShTayai naraharivapuSho phAladR^iShTeH sphuli~NgAH || 38|| bhaktaprANiprahANiprachaladasilatApANidurdaityahatyA\- tikrUrakrodhayodhaprachalanakhachitashmashrulekhAsakhI naH | raudrashrIkAdraveyIdrutalalanavalajjihvikA projjihAnA\- sA nAgadveShimUrterviharatu hR^idaye vellitA chillivallI || 39|| lAsyenollAsyamAnA niravadhivigaladyodhagodhipratolI\- yAvatkrodhAvakIrNA~nchalachapalachalachchAmaroDDAmarashrIH | ghoNAdaNDAgrajAgrajjayaparichayakR^idvaijayantI jayantI raudrasya drAgabhadraM vighaTayabhu haThAdbhrUdvayI nR^idvipAreH || 40|| durdAntadhvAntabhekapratibhayasarayashvAsaphUtkAra ghorA pre~NkholashmashrulekhAchChalachalarasanAdvandvavibhrAjamAnA | veShTuM vA lambamAnAnanabilanilayaM bhAlabhitteradhastAt | syAddhoNAdIrghapR^iShThI madaghavighaTinIkUTashailATamUrteH || 41|| sUryAdijyotirurjasvalakarapaTalImoTanAlampaTo.asau\- daityendroddAmadhAmadyumaNighR^iNighaTAla~NghanenAbhighAtI | lokAlokAdrirItyutpratigha iva taduttu~NgashR^i~Ngatvabha~Nge ja~NghAlo ja~NghanItuchChalahariparuShashvAsavAto.aghasa~NghAn || 42|| krUrakrodhAgnikIlakkathita iva pR^ithushvAsabhUmA nR^isiMha\- syogrANAmagragANAmanutanughaTitaraphAravisphoTakoTiH | vArdhinAmaikyamR^iddhaM ghaTayitumiva ja~NghAlaja~NghAlatAbhrU (ja~NghAlajhamjhAsamIro) drAgaMhaHsa~NghanItirmataM sakalashubholla~NghanI ja~NghanItu || 43|| (nItirmama, shubholla~Nghane) dvIpAntardyotamAnakShitidharanikarakShudratAmudritaujA lokAlokAdrimUrdhA~nchalachalanadhanashlAghanIyApadAnaH | drAgmittyAghAtajAtapratighuritarayabhrAntagA~NgeyareNu\- bhrAjadbrahmANDabhANDaH sphuratu hR^idi hareH shvAsarUpI nabhasvAn || 44|| ghoNAshvabhrorugarbhAdatiparuShakharashvAsadhArAnirastA\- kAlavyAladvayIvodyataphaNayugalIshrotragarbhapradeshe netrAyurvAyuyAyinyasurapariShadaH sthUlatAlAlitAntA (netrAyurvAyupAyinya) smerA shmashrudvayI no dvipadalanatanostu~NgabhAsa~NgatAvyAt || 45|| kauTilyenaiva lkhalvAcharitaparichitA vakratAshubhratAbhyAM nyasyantI kShIrakaNThadvijanapatighaTAkaNThapIThe prakoShTham | tAbhyAM tigmatvayugbhyAM nagaravaravadhUnetrakoNAntamaitrI daMShTradhATI sphuTA naH kapaTaharitanoH pATayet pApakUTam || 46|| AvirbhUyAsyagarbhAdravamasuravadhUgarbhavibhraMshabhImaM jihvAM chAlokya daityakShatajarasajharIgrAsalolAmivogrAm | kUrAsthigranthikoTIvighaTanakaTutoddhATinIvAtighorA pAyAchChailATacheShTAnukR^itikR^itibhR^ito dantadhATI prabhornaH || 47|| prahlAdodriktanidrapramadakumudinIjAgarArAgarAjo ruShTendradveShTTdyShTisphuTapuTakaghaTAdarshitAkShudranidrAH | vidhvastAtiprashastAmaranivahamahAsAdhvasadhvAntadhArAH lIlAshailATamUrterdashanashashikalAshreNayaH prINayantu || 48|| daityoraHpIThapATaprakaTavikaTaruTkakkhaToghR^iShTadaMShTrA sa~NghaTTaspaShTadR^iShTajvalanakaNagaNashreNayo.aniShTanaShTau | jAyantAM jAgarUkA vidalitadanujavyUhavAhorjitejaH pUgaprodgIrNachUrNaprachayasamarucho raMhasA siMhamUrteH || 49|| niryallAlATadR^iShTijvalanaghR^iNighaTApluShTaduShTaughavaMsha\- sthUlAsthigranthikUTasphuTanachaTachaTATTAravasphArasha~NkAm | kurvan gIrvANavarge.adbhutakalananabhobhAji nishsheShayenno doShAn roShaprapoSho miShaharivapuSho dantasa~NghaTTaghoShaH || 50|| mandArodArasindUrakashishubisinIbandhubandhUkasandhyA\- niryanniryAsakAryAkR^itiriva kalitAruNyatAruNyasampat | saptArchistaptakhaDgapratinidhiradhikollAsilaulyolbaNashrI\- rAstAM nastApabhAjAM naraharirasanAvAsanAshAsanAya || 51|| saukShamyeNAgnernidAne vadana iha sataH krodhadodhUyamAna\- prANadrAghiShThabhastrAjavanapavanato dIptishIleva kIlA | krodhAndhAnAM nakhAnAmasuravarahR^ido darshanAyeva samyak\- prahvA jihvA madaMhaH pradahatu mahimonnAhabhR^innArasiMhI || 52|| niShkrAntevAnayantAdgalaravavalataH sAdhvasadhvastadhairyAt (niShkrAntevAnayanAdgalaravavalataH) pronmIlatkampasampadbhayamayacharitodbhAvanaprekShayeva | daMShTrAbhiH spaShTarochiHpaTalakaraghaTAghaTTanIbhiH pradyaShTA\- shvAseva svAntadeshe naraharirasanA vAsanAshAsanI syAt || 53|| daiteyoddAmadhAmadrumadahanadhR^itATopanopAgnikIlA prahlAdodriktabhaktichChalanilayachalachChoNaketuchChIvarnaH | syAjjihvA nArasiMhI vibudhapatishubhA dR^iShTavAsantavArtA\- shliShTashrIvallihR^iShTaprathamakisalayashrIraniShTapraNaShTayai || 54|| cha~nchatpa~nchaprakAre mukha iha bhavituM sAmprataM pa~ncha jihvAH vyaktaikAgre mahogrA punarapi bhavitArashchatasro.adhipArshvam | ityAlochyeva sImAjivaTaviShutayA karNajAhAM jihAne smartavye siMhamUrterbhushamapasharaNaiH sR^ikkaNI chakrapANeH || 55|| pre~NkhanniHshvAsalekhaM prakaTakaTakaTasphoTavispaShTadaMShTraM shmashrusmeratvabhIShmaM kuTilamavikaTabhrUkuTIbhrAjamAnam | krodhakrUkShichakraM sarabhasarasanAbhImataM shrImata~Nga\- (sarabhasarasanAbhIShaNaM) dveShTurdrAgdveShTu vaktraM mama viShamadashAsraShTuriShTaM gariShTham || 56|| daMShTrAsa~NghaTTaghorajvaladanalakaNashreNikarNaprasUne prodyannirghoShavAdye prachalitabahalajvAlajihvAmaholke | raudrashrIlAsyara~Nge prakaTavikaTaruTsUtradhAraprachAre sadyo vidyotamAnadvipadalanatanorAnane no ratiH syAt || 57|| vahniprAchIradIpraprasrumaraparitaHkesare spaShTadaMShTrA kuDyAsaMshliShTayaShTiprachayaparichite bhrUlatAtoraNADhye | jAgratpragrIvamitrapratibhayanayane prahvAjihvAlatodya\- tsopAne raudralakShmIgR^iha iva nR^iharerAnane mAnanAstAm || 58|| nistriMshasraMsanaM prAksR^ijati karatalAjjihvayA nArasiMhe daMShTrAbhiH kR^ittashastrIpaTalavighaTane bhrUlatAvibhrameNa | kodaNDabhraMshachaNDe shitavishikhahare shrIkaTAkShachChaTAbhiH dR^iShTAnAM dR^iShTimAtrAt pratikR^itikR^itini prItirAstAM mukhe naH || 59|| udyajjihvAmaholke mukharimakharanirghoShanirghAtaghore bhrUvallIshmashrulekhAvilasitavilasaddhUmaketuprakAshe | sakrodhA kShudrachakShustrikavikasanasandarshitArkatrayIke tasyAsye syAnnamasyAsurakuladalanA darshitA janyasainye || 60|| daMShTrAdhATIkaThorakrakachaparichayenApyakhaNDasvarUpA saM~NkochaM kaNThaghoSheNa cha na cha dadhatI bhIShaNenolbaNena | loke jihvApuTe.apyasvalitapadavatI bhAratI yatra vAsaM mA sandhatte.apramatte hR^idi bhavatu harerdrAgupAsyaM tadAsyam || 61|| saptArchiHkhaNDaShaNDastabakitakuharA chullikevollasantI dIrNA dIrghAdarIvoddhurarudhirasuhR^iddhArAdhurINA | pAtAladvArivodyatphaNiphaNamaNirukkandakIvR^indalIDhA\- lIlAharyakShamUrteH kShapayatu vipulA vaktrakukShirmadaMhaH || 62|| garjashrInirjitAmbhodharapaTalahaThAkR^iShTavidyutkalApa prAyAM prAptAM samudrAdapi paribhAvano vaidrumI vallarIM vA | raudrashrIvIravaryAvaravaraNavidhAdantabandhUkamAlAM bibhradyaityAntramAlAmatiparuSharuShaH pAtu devasya kaNThaH || 63|| mAdhuryodrekadhuryaM nijasahajapariShkAravaryaM visR^ijya\- krauryashrIvAryamANAvasaramaparasandaityapAlAntranAlam | ghorAkArAM ghR^iNAyAH padamapi dadhatI dhAryamANAM haThena grIvA shrIrvAraNAreH sharaNamiha paraM pIvarI vAmanI vaH ? || 64|| mAyAharyakShamUrteH kShayasamayapayovAhasAhasragarja\- sphUrjannirghoShasambhAvitavidalanadiksandhisandhukShaNAya | unmIlatkAntitantUtkaTakarajaghaTAsUchisAchivyabhAjo viShvadrIcho.anuvishvopakR^itikR^itibhR^ito bhAvaye bAhudaNDAn || 65|| namrA daiteyasamrAdpratibhayapR^itanAghAtagurvIM kilorvIM dIvyadyarvIkarorvIpatiphaNapariShatkharvatAM parvatAntAm | uddhartaM proddhurA nu pratidishavalitAH sarvato.akharvamUrteH sAhasrA bAhavaste mama hR^idi mahimonnAhavAhaH sphurantu || 66|| dIpraM yadviprachittaprabhavamR^igadR^ishAM kShipramodadadhAnaM nipraghnadvipravaryapratibhayarayabhR^itkaiTabhATopalopam | chakraM haryakShamUrteH sharaNamahamahorAtramArto bhR^ishArte remi drAkkAlanemikShatajarasalannemi kasmAdvibhemi || 67|| vahnijvAlAbhajihvAvagalanavikalatvAmbunA sannavaktraM (vikalasvAmbunA) nirghoShaiH kaNThakamboshchakitamiva mahAmaunamudrAM dadhAnam | ghoNAghrANaprahINaM jalajamiva sitaM pANibhUShAyamANaM shatrubhyastrANahetoH sharaNaya nR^iharerambujAkShasya kambum || 68|| R^ikchakreNeva chakraM prathanamadhimadhugrAsikogrAkR^itIti krauryeNa krau~nchabhede paTuriti vikaTAM shrImahAsenashaktim | dambholiM jambhashatrorahihananamahAsAhasIsraddhasanto daityorastroTayantastR^iNamiva nR^ihareH pANijAH prINayantu || 69|| daityendradhvAnasandhyAdhvanimukulitadikpAlamAlAsukhardhi\- svAdhyAyArambhapUrvoditasatanudasho~NkArikAkAribhAjaH | nAgAnAmindriyANAM dashasR^iNisadR^ishAH prANinAM prItibhAjAM prAyaH pArIndramUrtermama dasha nakharAste kharAH syuH sukhAya || 70|| sAkShAdAlakShyamANaM yudhi daladagadAghAtashothaprathimnA di~NnAgAnAM viShANorumusalashakalaiH pANDunirbhagnamagnaiH | daiteyavyAghravakShaHprabalamadagadaM shIghramullAghayanto bhUshalyoddhArakalyAbhavabhayabhiShajaH pANijAH pAntu yuShmAn || 71|| unmIlatkAlakhaNDotpalamamalinaka~NkAlakhaNTaiH kumudva\- ttadvadye vyaktamulkAmukulitakamalaM srAgasR^ikkAbhipUrNam | haMsApatyAtiraktaM suraripuvarahR^illakShyaharyakShamUrteH krauryakrIDAtaTAgaM kShaNamadhividadhuste nakhAH syuH sukhAya || 72|| udri~NgadraktalekhAruNavasanalatAkarShamuchchaistrilokI lakShmIdaityendravakShaHsthalapR^ithulashilAstheyasImirShyeyeva | AkarShanto dvirUDhAM vibudhaparivR^itenaiva bADhaM vidhAtuM nirbhIti prINayantu ChalaharivapuShaH pANijAH prANijAtam || 73|| vakShaHsImantayanto nabhidurabhidurorachChadaChedadakShA yatki~nchidvighnanighnA iva ghanamaghavadvajraghAtotthashothaiH | sthUlAsthigranthikUTe nibiDakaDakaDoDDAmarAmreDitena krIDantashshakrashatrornaraharinakharAste kharAH syuH sukhAya || 74|| chApalyenApatantImiva shirasi rasaj~nAM prataptAsilekhA\- bhImAmAlokya sImAntaragatakamalAkaustubhashrIva bhItyA | tArAdArAMshudhArApratimaghanatamollAsavallomavallI\- lInashrIvatsalakShma kShapayatu duritaM lakShaharyakShavakShaH || 75|| avyAdAkAshakAshastabakapariNataH kUrmalomnAM vivarto dR^iShTAntashyAmashR^i~Ngasya cha haridudayachchitralekhaikamitram | mithyadvairathyasajjadvipadalanatanordehapUrvApararddhi\- sthityarthApattisAdhyaM bhavabhayavikaTAnma~NkShu no madhyamavyAt || 76|| daityendro dIrghanidrAmadhita shitashikhaistannakhaiH khaNDitoraH kaNDUtiryatra hastaskhaladasiphalakasphArapAdaprasAraH | cha~nchajjAnUpadhAnA tanuruhanivahaprachChadanADhyA ma~nchetaH sthairyapaTvAkramatu kapaTaharyakShadakShorukhaTvA || 77|| nyaste roSheNa sAchiprasR^imaraparito dIdhitau yatra rakte madhye namratvakamraM kuvalayamabhitaH sa~Ngatottu~NgatAkam | uttAnasvarNadaNDAyutakanakashalAkA[lilAlityashAli chChatrAbhAmApa tApAnapanudatu harervAmaja~NghAprakANDaH || 78|| stambhodbhUtasya bhUmerUpari lipadasR^ikchandanaM syandamAnA\- dho.anUnAruNyalakShyAditi sutapR^itanApAdaghAtArtibhAjaH | phAle shrIkhaNDapuNDraM likhadiva nakharajyotsnayA vatsalatvAt prahlAdasya praNAmapravaNitashirasaH pAtu pAdadvayI naH || 79|| rundhantIvAribandhUnadhirudhiradhunIbandhubandhUkamUrte\- rAkR^iShyAshAnuvishvAH svayamapi yugapadyojayantIva bhAnti | dvaitaM dyAvApR^ithivyordalayitumudayanmAMsalAnIchavIchiH vishvadrIchI marIchItatiraruNasamIchInarochirvichintyA || 80|| asthAnadvAri tiShThan asuravarahR^ido dAruNAyaikaniShTa\- krodhaH shrIpR^iShThaniShThapratataphaNabR^ihaddIrghapR^iShThasthaviShThaH | prahlAdAptapratiShThaH prabaladanujanuHsainyavinyastaniShThaH pAyAddevo vasiShThaprabhavabhavanuto devagoShThIgariShThaH || 81|| dantebhyaH pANijebhyastuhinagubhaginIstomalekhAsuhR^idbhayo no bibhyatyabdhishabdashravaNaparavashAghoragambhIraghoShAt | aurvajvAlAlatAyAH kaNakusumahR^idapyugrajihvAlatAyA\- yasyA~Nke nirvisha~NkaM jayati jalAdhijA saiSha devo.avatAdvaH || 82|| eSha brahmANDabhANDAmitavitatavapuH sajjanasvAntadeshe svachChandAmandalIlo viShayasamudayAku~nchitattvA~nchite.api | kAShThAkaivalyalakShmyA jagati katipayaiH kalmibhiH kAryadR^iShTayA devaH shrImAn nR^isiMho.avatu paramamahAnapyaNorapyaNIyAn || 83|| uchchairghuShTaprahR^iShTatridashagaNaghanashlAghanAghUrNanodya\- nmUrdhAdhodhvastapuShpastabakavikasitaistArakAchakravAlaiH | dR^iShToraH pATaruShTisphuTavikaTasaTAkampasampattichakra\- chChinnairAchChAditA~NgachChalanR^iharitanuryachChatAdvA~nChitaM naH || 84|| AbhAtItendudhAmAsadaridarakaraH sarvamAnavyamAbhR^i\- tkAyodArassadArochitadashanakharaH ko.api tattvAdhikArI | AbhAtItendudhAmA sadari karaH sarvadA navyamAbhR^i\- (sadara) tkAyodAraH sadArochitadashanakharaH ko.api tattvAdhikArI || 85|| tiShThannambhojapR^iShThe jalanidhijanuSho rochiShA rAjamAno vidyujjvAlAkalApojjvalavipulasaTAkIrNavistIrNavaktraH | jAnvorvinyastahastaH kaTitaTavivaladyogapaTTasphuTashrI\- bhAjoH sha~NkhAridhArI jayati naravapushchitrapArondravaktraH || 86|| pAtUraHpIThapaTTAshritajaladhijaniryogapaTTAbhirAmo daityoraHpATakaTTArakakharanakharo bhrAjadaTTATTaghoShaH | saMsArakleshahaTTApaharaNamahimA yo hR^idaTTAdhivAsI bhaktAnAM devabhaTTArakakalitanutiH pItapaTTAMshukaH saH || 87|| satrAsatrANartrI ripusutavipadaH sAdhu nAnA dhunAnA\- mArAmArAjivakShA nakhavidalitaduShTAsurA bhAsurAbhA | sAmAsAmAdigItA nijapadakamalAlambatArAvatArA bhImAbhImArthadakShA tanuravatu sudhA bhAnumAlAnumAlA || 88|| prAptA mudrAvile shena paramamahatA yena yaH santaraNyA kArAM pR^ithvIM dadhAno varabhujagavaratrAsarakShAM vibhAti | gA~NgashrIshobhamAnAM svatanumavatu naH shaM khalUchchairmahimnA pArAvAraprabhAvaH sa nR^ihariraparA yasya mainIha mUrtiH || 89|| jyAyasyAbhAsamAnA bhavati na tanuruTChAlinI yArirAjI\- shyAmA kShIrodanIrochChvasanakushalinI yA kR^itodvR^ittapAtA | hanyAnmUrtirhareH sA duritamatibalA kAchChapI nAma mAtrA\- tikrAntA dIrghapR^iShThaM paramapi dadhatI mAndarashrInidhAnam || 90|| deho yasyAmbuvAhopalasitaruchibhR^idyaH sarasvatyupAsyaH pAtAlakShmAkharAMshupratimanakhagaNo yo hiraNyAkShajetA | yo nandollAsakAnto vilasati bahulomAvalI yasya dhAmni shreyo dadyAt sa devo nijajanamahase labdhabhUdArabhAvaH || 91|| udyatprahlAdasampannakharakararuchiH sarvadA rAjadanta\- shrIdhArI yoridhA rAstrantharavivaraNo yo.anurajyadrasaj~naH (?) | (yoridA) chillIlAsyAdhikArI vikasitatanuruTkesarI ko.api loke kalyANaM sa svatulyaH praNayatu parito.ala~NkriyAbhAsamAnaH || 92|| lokaprahlAdasadbhAdrapadajanamatiprollasadyevakAryA\- yAsArAmbhodadhAnadhvanivibhavavatI chumbitArkAkShamAlA | kaupInaprItadhAtrIvalaniyamalayAlokaharShaprakAshA shuklAkShI sphoTabhImA haritanuravatAdvAmanI chAdhikA sA || 93|| prasvApadvardhanIyA shashidaraparashubhrAjitA dAnavAryA pArIcharyAditakShmopakR^itigurumahAdevashAstrAdhikArA | bhArgavyAbhAsamAnA hR^idi mama bahushokArtivIryAvirAstAM mUrti devasya kApi pratidinamavitAmnAyashailImukhashrIH || 94|| yo gAdheyAgninetrI gataduritashatAnandasUryA cha tArA\- bharturlakShmIM dadhArAhriyata kila yayApyuchchakairAvaNashrIH | yA vaidehyAptabhItikShayakaramahimA sAdhu sA rAghavIti\- khyAtA mUrtirharerno vasatu hR^idi parAbhUtamAyAkura~NgA || 95|| yo.abhUt santApasaktA lavanakharaghaTAhArihasto yadIyA\- sachchakre sUtamR^ityu~NkaraNakushalatA sUryajAkarShashIlaH | yashchetohArihAlAhalabhR^iti bahalaprItiruttAlaketuH preyo vR^indAvanaH kauravagururabhitaH shrIharI rakShatAM naH || 96|| pratyakShAdipramANonabhimataparalokapraharSho nayaj~ne prahlAde chAntaniShThe ghR^iNayati ghR^iNimAlyachChavidyotito yaH | sarveShAM mUlahetuH kila yadabhimato bhAvahAvaprasiddhaH saMsArAduddharenmAM kapaTaharitanuH shuddhabuddhasvarUpaH || 97|| sArdhaM duShTaiH pravR^iddhaiH kaliyugamalahR^itsindhujArohashAlI yo.abhUdyevAdhirAjapraNayavashatayA labdhajanmAnukAraH | saMsAre satyadharmA charaNaparavasho yaH kR^ipANAM samudraH devo.abhUdrogahantA bhavatu naraharirbhAsvadantaH prakAshaH || 98|| daityAnAM kAladaNDaH sphuratu hR^idi hareshchaNDalA~NgUladaNDaH shakrashrIlAsyadaNDaH svajanaghanakR^ipAketanollAsadaNDaH | ApadgoShaNDadaNDaH surapurataruNItrAsabhANDaughadaNDaH svarlokachChatradaNDastripuranijajanurghoShaNAtodyadaNDaH || 99|| svarge saMsargavatyA dititanujabhujA vIryalakShmIyuvatyAH prodastaM kinnu dastA kalitakachakulaM kShmAtale pAtanAya | krodhashrIbAhudaNDaM valayitasitaru~NmaNDalaM tatprachaNDaM cheto brahmANDaketoH smaraharivapuSho vAlahastaprakANDaM (?) || 100|| UShmAkUShmANDaShaNDo dayatu hR^idi na te yAtu no yAtuno bhIH pretAH ke tAvadaShTau tyajata mayi mahAbhairavA vairavArtAm | ruShTatvetena duShTagrahagaNagaNanAkAlaka~NkAlasampa\- tsampannA te madAsyaM madAyitumudabhUnmApayannArasiMhaM (?) || 101|| kShipaM sarpApasarpa vraja vanagajate vidrava ChidradeshA\- dadrernirgachCha tuchChadraviNa na hi madAdachChabhalla prayachCha | mA siMha trAsa raMhaH sharabha sarabhasaM yAhi shArdUla dUrA\- dAhvA jihvA~nchalaM nashvapalayati yatashchitrapa~nchAsyamUrteH (?) || 102|| kashchit kautsavavaMshakairavavanIprAkAsharAkApatiH kR^itvA martyahareramartyakalitAM shlokaiH shatairmauktikaiH | mAlAM dUShaNadUraNAya guNavadvij~nAnashANArchitAM (dUShaNadAraNAya) satkaNThArpaNato jagAma paramAnandaM sa ga~NgAdharaH || 103|| iti shrInR^isiMhashatakaM sampUrNam | ## Proofread by Saritha Sangameswaran \medskip\hrule\obeylines Please send corrections to sanskrit at cheerful dot c om Last updated \today https://sanskritdocuments.org \end{document}