% Text title            : Prithivikritam 1 Vishnu Stotram
% File name             : pRRithivIkRRitaM1viShNustotram.itx
% Category              : vishhnu, vishnu, matsyapurANa, stotra
% Location              : doc\_vishhnu
% Proofread by          : PSA Easwaran
% Description/comments  : matsyapurANa | adhyAya 248/12-56||
% Latest update         : September 27, 2024
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Prithivikritam 1 Vishnu Stotram ..}##
\itxtitle{.. pR^ithivIkR^itaM 1 viShNustotram ..}##\endtitles ##
pR^ithivyuvAcha |
trivikramAyAmitavikramAya mahAvarAhAya surottamAya |
shrIshAr~NgachakrAsigadAdharAya namo.astu te devavara prasIda || 12||
tava dehAjjagajjAtaM puShkaradvIpamutthitam |
brahmANamihalokAnAM bhUtAnAM shAshvataM viduH || 13||
tava prasAdAddevo.ayaM divaM bhu~Nkte purandaraH |
tava krodhAddhi balavA~njanArdana jito baliH || 14||
dhAtA vidhAtA saMhartA tvayi sarvaM pratiShThitam |
manuH kR^itAnto.adhipatirjvalanaH pavano ghanaH || 15||
varNAshchA.a.ashramadharmAshcha sAgarAstaravo.achalAH |
nadyo dharmashcha kAmashcha yaj~nA yaj~nasya cha kriyAH || 16||
vidyA vedyaM cha sattvaM cha hrIH shrIH kIrtirdhR^itiH kShamA |
purANaM vedavedA~NgaM sA~Nkhyayogau bhavAbhavau || 17||
ja~NgamaM sthAvaraM chaiva bhaviShyaM cha bhavachcha yat |
sarvaM tachcha trilokeShu prabhAvopahitaM tava || 18||
tridashodAraphaladaH svargastrIchArupallavaH |
sarvalokamanaHkAntaH sarvasattvamanoharaH || 19||
vimAnAnekaviTapastoyadAmbumadhusravaH |
divyalokamahAskandhaH satyalokaprashAkhavAn || 20||
sAgarAkAraniryAso rasAtalajalAshrayaH |
nAgendrapAdapopeto jantupakShiniShevitaH || 21||
shIlAchArAryagandhastvaM sarvalokamayo drumaH |
dvAdashArkamayadvIpo rudraikAdashapattanaH || 22||
vasvaShTAchalasaMyuktastrailokyAmbhomahodadhiH |
siddhasAdhyormikalilaH suparNAnilasevitaH || 23||
daityalokamahAgrAho rakShoragajhaShAkulaH |
pitAmahamahAdhairyaH svargastrIratnabhUShitaH || 24||
dhIshrIhrIkAntibhirnityaM nadIbhirupashobhitaH |
kAlayogamahAparvaprayAgagativegavAn || 25||
tvaM svayogamahAvIryo nArAyaNa mahArNavaH |
kAlo bhUtvA prasannAbhiradbhirhlAdayase punaH || 26||
tvayA sR^iShTAstrayo lokAstvayaiva pratisaMhR^itAH |
vishanti yoginaH sarve tvAmeva pratiyojitAH || 27||
yuge yuge yugAntAgniH kAlamegho yuge yuge |
mama bhArAvatArAya deva tvaM hi yuge yuge || 28||
tvaM hi shuklaH kR^itayuge tretAyAM champakaprabhaH |
dvApare raktasa~NkAshaH kR^iShNaH kaliyuge bhavAn || 29||
vaivarNyamabhidhatse tvaM prApteShu yugasandhiShu |
vaivarNyaM sarvadharmANAmutpAdayasi vedavit || 30||
bhAsi vAsi pratapasi tvaM cha pAsi vicheShTase |
krudhyasi kShAntimAyAsi tvaM dIpayasi varShasi || 31||
tvaM hAsyasi na niryAsi nirvApayasi jAgrasi |
niHsheShayasi bhUtAni kAlo bhUtvA yugakShaye || 32||
sheShamAtmAnamAlokya visheShayasi tvaM punaH |
yugAntAgnyavalIDheShu sarvabhUteShu ki~nchana || 33||
yAteShu sheSho bhavasi tasmAchCheSho.asi kIrtitaH |
chyavanotpattiyukteShu brahmendravaruNAdiShu || 34||
yasmAnna chyavase sthAnAttasmAtsa~NkIrtyase.achyutaH |
brahmANamindraM cha yamaM rudraM varuNameva cha || 35||
nigR^ihya harase yasmAttasmAddharirihochyase |
santAnayasi bhUtAni vapuShA yashasA shriyA || 36||
pareNa vapuShA deva tasmAchchAsi sanAtanaH |
yasmAdbrahmAdayo devA munayashchogratejasaH || 37||
na te.antaM tvadhigachChanti tenAnantastvamuchyase |
na kShIyase na kSharase kalpakoTishatairapi || 38||
tasmAttvamakSharatvAchcha akSharashcha prakIrtitaH |
viShTabdhaM yattvayA sarvaM jagatsthAvaraja~Ngamam || 39||
jagadviShTambhanAchchaiva viShNureveti kIrtyase |
viShTabhya tiShThase nityaM trailokyaM sachAracharam || 40||
yakShagandharvanagaraM sumahadbhUtapannagam |
vyAptaM tvayaiva vishatA trailokyaM sacharAcharam || 41||
tasmAdviShNuriti proktaH svayameva svayambhuvA |
nArA ityuchyate hyApo hyR^iShibhistattvadarshibhiH || 42||
ayanaM tasya tAH pUrvaM tena nArAyaNaH smR^itaH |
yuge yuge pranaShTAM gAM viShNo vindasi tattvataH || 43||
govindeti tato nAmnA prochyase R^iShibhistathA |
hR^iShIkANIndriyANyAhustattvaj~nAnavishAradAH || 44||
IshitA cha tvameteShAM hR^iShIkeshastathochyase |
vasanti tvayi bhUtAni brahmAdIni yugakShaye || 45||
tvaM vA vasasi bhUteShu vAsudevastathochyase |
sa~NkarShayasi bhUtAni kalpe kalpe punaH punaH || 46||
tataH sa~NkarShaNaH proktastattvaj~nAnavishAradaiH |
prativyUhena tiShThanti sadevAsurarAkShasAH || 47||
pravidyuH sarvadharmANAM pradyumnastena chochyase |
niroddhA vidyate yasmAnna te bhUteShu kashchana || 48||
aniruddhastataH proktaH pUrvameva maharShibhiH |
yattvayA dhAryate vishvaM tvayA saMhriyate jagat || 49||
tvaM dhArayasi bhUtAni bhuvanaM tvaM bibharShi cha |
yattvayA dhAryate ki~nchittejasA cha balena cha || 50||
mayA hi dhAryate pashchAnnAdhR^itaM dhAraye tvayA |
na hi tadvidyate bhUtaM tvayA yannAtra dhAryate || 51||
tvameva kuruShe deva nArAyaNa yuge yuge |
mahAbhArAvataraNaM jagato hitakAmyayA || 52||
tavaiva tejasA.a.akrAntAM rasAtalatalaM gatAm |
trAyasva mAM surashreShTha tvAmeva sharaNaM gatAm || 53||
dAnavaiH pIDyamAnA.ahaM rAkShasaishcha durAtmabhiH |
tvAmeva sharaNaM nityamupayAmi sanAtanam || 54||
tAvanme.asti bhayaM deva yAvanna tvAM kakudminam |
sharaNaM yAmi manasA shatasho.apyupalakShaye || 55||
upamAnaM na te shaktAH kartuM sendrA divaukasaH |
tattvaM tvameva tadvetsi niruttaramataH param || 56||

iti matsyapurANe aShTachatvAriMshadadhikadvishatatamAdhyAyAntargataM
         pR^ithivIkR^itaM viShNustotraM samAptam |

matsyapurANa | adhyAya 248/12\-56||
##
matsyapurANa . adhyAya 248/12-56..

Proofread by PSA Easwaran 

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}