% Text title            : Shri Paramadhava Stuti 03 07
% File name             : paramAdhavastutiH.itx
% Category              : vishhnu, stuti
% Location              : doc\_vishhnu
% Proofread by          : Rajesh Thyagarajan
% Description/comments  : From stotrArNavaH 03-07
% Latest update         : August 14, 2021
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Shri Paramadhava Stuti ..}##
\itxtitle{.. shrIparamAdhavastutiH ..}##\endtitles ##
shrImAn ve~NkaTanAthAryaH kavitArkikakesarI |
vedAntAchAryavaryo me sannidhattAM sadA hR^idi || 1||
shrImatyAshritasantAnaH shrIshailAgre kR^itAlayaH |
karotu kamalAkAntaH kAmitaM naH phalaM mahat || 2||
ramAramaNa vA~nChitaM vitara dAsadAsAya me
     rasAramaNibhAlabhUtilakitAhishailAlaya |
kuchelamiva gopikAvashagajAnakInAtha bho
     vibhIShaNamivAva mAM vihitabhaktipUrtiM vibho || 3||
yadambukaNikAshritAH pratidashaM marutpotakA\-
     shchalanta iha cha~NkramAdyalasachetasaH prANinaH |
punanti puruShottamAmburuhiNI manohAriNI
     punarjanibhayaM tviyaM haratu me sakR^inmajjanAt || 4||
namajjanatamashChaTAkabalanaikabaddhAdaraM
     nabhomaNimivAparaM naksarojinIsevitam |
namAmyahamamuM muhurnabhasi rochamAnaM sadA
     nagendramuragAdhipAbhidhamudUDhanArAyaNam || 5||
prapattiphalakAraNaM praNamadArtividrAvaNaM
     phaNIndragiribhUShaNaM bhagavada~NghriyugmArpitam |
yadetadahamindirAkuchataTadvayIlA~nChanaM
     yadeva nikhilatrayIshikharalAlyamadyAshraye || 6||
viri~nchabhavadevarADihitanityapUjojjvalaM
     viyatsaridupAhR^itairvimalatoyapadmotpalaiH |
vidhUtashakaTAsuraM vihitagautamastrIsukhaM
     vibhoH padayugArpaNaM vijayate phaNIndrAchale || 7||
vidhUtavinatApadaM vibudhavR^indavandhaM sadA
     vinaumi vinatAsutaM vihagarAjamenaM vibhum |
ya etya yudhi rAvaNiprahitaghoranAgAstrato
     rarakSha sahavAnarairjhaTiti sAnujaM rAghavam || 8||
yathA haripadAvanIyugamavarNayattatvata\-
     strayIshikharadeshikaH kila sahasradhA yatpurA |
tathaiva bahudhA tanuM dadhadivAtra nAnAkR^ite
     rvibhAti jagadIshitushcharaNarakShaNaikAdaram || 2||
idaM sarasijA (layA) kamanapAdarakShAdvayI\-
     shataM haratu me tamashshatasahasrajanmArjitam |
yadAshrayatayA jagattritayavikramaikakShamaM
     babhUva paramAtmano.apyanupamasya pAdAmbujam || 10||
sphuratkanakabhittikAghaTitachitraratnaprabhA\-
     parItamidamindirAramaNamandiraM rAjate |
yadIyamiha darshanaM bhavati muktidaM dehinAM
     vinA jhaTiti satkriyAM jananachakramAseduShAm || 11||
namastasmai yasmin vasati paramAtmA sa bhagavAn
     ramAbhUnIlAbhiH saha vihR^itilolAbhiratulaH |
vimAnaM ratnADhyaM jagati yadahIndrakShitibhR^itaH
     shiroratnaM viShvak sphurati mahadAnandanilayam || 12||
idaM namo.asmadgurave cha tasmai
     bhUyastadAchAryaparamparAbhyaH |
trayyantagurvAdiyatIshvarashrI\-
     shaThArisenesharamAdhipebhyaH || 13||
vande mandAramAlAdharamiha mahasAM vR^indamindIvarAbhaM
     vandyaM vandArukANAmanavadhikadayAnandakandaM mukundam |
nAnA tvAmrAyavedyaM vilasati phaNirADbhUbhR^idagre ramAbhU\-
     nIlAlIlAnukUlaM vimalataramidaM vishvarakShAdhurINam || 14||
vA~nChAdhikaM praNamatAM phalamatra dAtuM
     vAtandhayAdrishikhare vasato murAreH |
pAdadvayaM parisarAnamato mameda\-
     muttaMsapallavaruchiM vidadhAtu maulau || 15||
upanataharachUDAchandralekhAbhimuktA\-
     mR^itasuruchirabindushreNikeveyamAshu |
vidalitanavamuktAjAlagaurA murAre\-
     shcharaNanakhararekhA shAshvanI naH punAtu || 16||
pAdAbhivandanakR^ite paramAtmano nu
     shrInAthapAdakaTakAkR^itimabhyupetya |
saMlakShyate kimayamadya sa chitrabhAnu\-
     rno chet kuto.asya vibhuviShNupadopasevA || 17||
ja~NghAdvayI jagadadhIshiturasya ramyA
     jetuH smarasya jayakAhalikAyugIva |
AbhAti chArumaNinUpurakAntichitrA
     yasyAM manAMsi yaminAM satataM ramante || 18||
vR^ittA vichitravasudhAramaNInijA~Nga\-
     lAvaNyadarshanalasanmaNidarpaNashrIH |
adyaiva me mahadaghaughatamisrameShA
     vishveshajAnuyugalI shithilIkarotu || 19||
saundaryasampadudayAkulapArijAtau
     saMvItapItavasanau sadR^ishAvimau tau |
nIlAramAvasumatIniyatopadhAne
     netuH shriyaH shrayatu me matirUrukANDau || 20||
AbaddhapItavasanA navaratnakA~nchI\-
     saMveShTitA kaTitaTI kamalAdhipasya |
paryantahATakamahIcha lasadvichitra\-
     ratnadyutiH sphurati seyamihA~njanAdreH || 21||
ramyA ramAramaNanAbhirasau gabhIrA
     rAjIvajanmajananI jagatAM vidhAtrI |
taddehakAntiyamunAsarito.adbhutashrI\-
     rAvartavibhramamito vidadhAti nUnam || 22||
vakShaHsthalIviharadambudhikanyakAyA
     hastochchalatkamalareNukarambitena |
liptaM vibhAti vapurasya suchandanena
     bAlAtapAruNamivAgratadaM mahAdreH || 23||
AnIlabhAsuravishAlabhujAntarAla\-
     vyomasphuratpR^ithulamauktikahAranadyAH |
hemAbjapa~Nktiriva kaustubhakAntirekhA
     shrIvatsadIdhitichalanmadhupAlirasya || 24||
sha~NkhaM shashA~NkadhavalA~Ngamasau dadhAno
     vAme sadA karatale varadAnahestaH |
saMlakShyate khalu lasannijakandharasya
     sAyaM parIkShitumivAsya cha kaNThadaghram || 25||
hastAmbujena vidhR^itaM vimalaM rathA~Nga\-
     mAlokyate jaladhijAdhipateramuShya |
yaddakShiNena navanIradanIlakAnte\-
     rarkasya maNDalamivodayashailamUrdhnA || 26||
kastUrikAkalitachArukala~NkabhAjo
     mandasmitadyutibharAkulachandrikasya |
chandrasya chAsyamukhachandramasaH kalAbhiH
     pUrNasya kaH satatamatra vadeta sAmyam || 27||
AlomanIlakuTilAlakajAlanUtna
     jImUtapa~NktipariveShTitamUlabhAgaH |
saMlakShyate muraripormaNimaulireSha
     bhAsvatkarAkramitamUrtirivAdrirAjaH || 28||
tattAdR^ikdhR^itashAr~NgachAparuchiro vakShaHsthalakShmItaTi\-
     tkAruNyAmR^itavR^iShTiradbhutadaradhvAnAtibhImAravaH |
muktAhArabalAkasantatiyuto mUrdhnya~njanakShmAbhR^itaH
     puNyashrIrvanamAlayA vijayate shroviShNukAlAmbudaH || 29||
hastoda~nchitasha~NkhachakraruchibhiH sarvAH samudbhAsayan
     AshAstAdR^iganarghyaratnaruchitairAkalpito bhUShaNaiH |
agre kA~nchanamaulikuNDalalasatkeyUrahArAdibhi\-
     rbhAti shrIgirinAyakaH saha mayA pUrNendubimbAnanaH || 30||
taM vande tapanIyachelamanaghaM tArAdhipArkekShaNaM
     tArAjAlavishudbhamauktikalasanmAlAbhirAmorasam |
shrutyantapratipAdyanaijacharitaH shrImAn dayAvAridhiH
     shrIshailAgraniketanaH shritaparitrAteti yo vishrutaH || 31||
shrImanmInasharIra mAmava mahAkUrmA~Nga kolAkR^ite |
     pAhi shrInarasiMha vAmanatano viShNo dayAvAridhe |
bhAsvadbhArgavarAma rAghava kR^ipAmUrte halin mAdhava
     shrIkR^iShNAkhilalokanAtha sahasA kalkin murAre vibho || 32||
trAhi trAhi dayAnidhe jhaTiti mAM dAridryanakrAnanA\-
     dantastIvraR^iNAkhyadantanikarairApIDitA~NgaM sadA |
padmAkAmuka pAdayonipatitaM padmAkSha te tvaM javA\-
     nno chet kA gatiratra me trijagatAM madhye tvadanyA vibho || 33||
nakragrastapadaH sa nAtha karigaDAkrushya mUleti na
     trAtaH kiM bhavatA trilokapatinA tUrNaM samAgachChatA |
hA kR^iShNetyavamAnitAmapi parairane kurUNAM muhuH
     kroshantIM sahasA rarakSha bhuvi kaH kR^iShNAM tvadanyastu tAm || 34||
khyAtiH khalviha paryapAlaya iti hi tvaM rAmamUrtiH purA
     shrIman vAlinirastamAtmasachivairanyaM vanAntaM gatam |
dInaM dInasharaNya sAdhu sahasA sugrIvamAshvAsya taM
     rAjyasthaM kalayannihatya tadariM chAtmArthasiddhichChalAt || 35||
evamprAyA mahAtmanniravadhikadayAsindhunA bandhunA na
     trAtA bhItA jagatyAM kati kati vividhopadravAddehabhAjaH |
lokasyAsya tvayA shrIramaNa tadahamapyeka evAdya teShAM
     kShipraM saMrakSha pApAdanitarasharaNaM mAmimaM tvatkaTAkShaiH || 36||
vismR^ityAsmatkR^itAni pratijananamasatkR^ityajAlAnyameyA\-
     nyadya tvandInabandho sakR^idapi rachitAmAnatiM vA stutiM vA |
vyAjIkR^itya prasanno yadi mayi kR^ipayA vartase tattava syA\-
     dyuktaM khalvanyathA chedanavadhikadayApAravashyasya naiva || 37||
sadyaH prasIda jagadIsha yathA bhaveyaM
     dAridryaduHkhaR^iNasa~NkaTato vimuktaH |
shrImannatha praNatarakShaka mAM prapannaM
     saMyojayasva samaye bhavada~Nghri (kA)bhyAm || 38||
ramAkAnta svAntaM raghuvara nitAntaM madavashAt
     paribhrAntaM pAponmukhamanishamunmattacharitam |
nigR^ihyetat kShipraM niravadhidayAbdhe mama bhava\-
     tpadAmbhojadvandve kalaya chiralIlAparavasham || 39||
svadhAmno vaikuNThAdapi varamidaM pannagagireH
     shirastu~NgaM shrImanniti yadavatIrNo.asi ramayA |
suyuktaM tattasmAdapi gatavato dhanvinagAraM
     hare ko vA lAbhastava kathaya godAlayamidam || 40||
tataH shrIvaikuNThAdapi subhagamityetadadhunA
     mR^iShA sheShakShoNIdharashikharamabhyetya vasasi |
yadetat kintu shrIramaNa karuNAsAra bhagavan
     mudA godApANigrahaNakaraNAyaiva niyatam || 41||
vande tamindirAkAntaM mandetarakR^ipArasam |
indIvaradalashyAmamindubimbasadR^i~Nmukham || 42||
vedaM cha shAstramanavadyamadhIsha lakShmyAH
     satyaM kuruShva bhava satyavacho.agraNIstvam |
dattvA kShaNena madabhIpsitamadya sheSha\-
     kShoNIbhR^idIsha vinataM kuru mAM kR^itArtham || 43||
grAmArAmakShitidhanapashuvrAtabhUShAsubhR^itya\-
     sthAnIyAdyauriha bahuvidhaiH sAdhanaishchAnapekSham |
bhUyo nityaM jayati mahadArAdhanaM yasya sheSha\-
     kShoNIbhartuH shirasi vasataH shrIdharaM taM prapadye || 44||
tasmAdadyaiva lakShmIparibR^iDha sahasA duHsahAM durdashAM me
     ChittvaimA ve~NkaTakShmAdharanilaya hare pUrvapApopalabdhAm |
dattvA madvA~nChitArtha sakalamapi balAdaihikAmuShmikAkhyaM
     bhaktiM pAdAbjayoste bhavaduritagatidhvaMsinIM rakSha mAM tvam || 45||
 iti tAtayAryakavinA vinirmitA
     mitabuddhinApi kR^ipayA muradviShaH |
paThatAmabhIShTaphaladA satAmiyaM
     mudamAtanotu paramAdhavastutiH || 46||

iti shrIparamAdhavastutiH sampUrNA |
##
Proofread by Rajesh Thyagarajan 

\medskip\hrule\obeylines

Please send corrections to sanskrit at cheerful dot c om
Last updated \today
https://sanskritdocuments.org

\end{document}