% Text title : rangarAjastavam % File name : rangarAjastavam.itx % Category : vishhnu, shataka, parAsharabhaTTa, dvishatI % Location : doc\_vishhnu % Author : Parasharabhatta % Proofread by : Nat Natarajan nat.natarajan at gmail.com, PSA Easwaran % Description-comments : pUrva and uttara shatakas. Ramanuja Sampradaya. % Latest update : March 20, 2018 % Send corrections to : sanskrit at cheerful dot c om % % This text is prepared by volunteers and is to be used for personal study % and research. The file is not to be copied or reposted for promotion of % any website or individuals or for commercial purpose without permission. % Please help to maintain respect for volunteer spirit. % \documentstyle[11pt,multicol,itrans]{article} #include=ijag.inc #endwordvowel=.h \portraitwide \parindent=100pt \let\usedvng=\Largedvng % for 1 column \pagenumbering{itrans} \def\engtitle#1{\hrule\medskip\centerline{\LARGE #1}} \def\itxtitle#1{\medskip\centerline{\LARGEdvng #1}\medskip\hrule} \def\endtitles{\medskip\obeyspaceslines} %% \begin{document} \engtitle{.. Shri Rangaraja Stavam ..}## \itxtitle{.. shrIra~NgarAjastavam ..}##\endtitles ## shrImate rAmAnujAya namaH | shrIparAsharabhaTTAryaH shrIra~NgeshapurohitaH | shrIvatsA~NkasutaH shrImAnshreyase me.astu bhUyase | atha shrIra~NgarAjastave pUrvashatakam | shrIvatsachihnamishrebhyo nama uktimadhImahe | yaduktayastrayIkaNThe yAnti ma~NgalasUtratAm || 1|| rAmAnujapadachChAyA govindAhvA.anapAyinI | tadAyattasvarUpA sA jIyAnmadvishramasthalI || 2|| rAmAnujamunirjIyAdyo harerbhaktiyantrataH | kalikolAhalakrIDAmudhAgrahamapAharat || 3|| vidhAya vaidikammArgamakautaskutakaNTakam | netAraM bhagavadbhakteryAmunaM manavAmahai || 4|| naumi nAthamuniM nAma jImUtaM bhaktyavagrahe | vairAgyabhagavattattvaj~nAnabhaktyabhivarShukam || 5|| R^iShiM juShAmahe kR^iShNatR^iShNAtattvamivoditaM sahasrashAkhAM yo.adrAkShIddrAviDIM brahmasaMhitAm || 6|| namaH shrIra~NganAyakyai yadbhrUvibhramabhedataH | IsheshitavyavaiShamyanimnonnatamidaM jagat || 7|| shrIstanAbharaNaM tejaH shrIra~NgeshayamAshraye | chintAmaNimivodvAntamutsa~Nge.anantabhoginaH || 8|| asti vastvidamitthaM tvaprasa~NkhyAnaparA~Nmukham | shrImatyAyatane lakShmIpadalAkShaikalakShaNam || 9|| lakShmIkalpalatottu~Ngastanastabakacha~nchalaH | shrIra~NgarAjabhR^i~Ngo me ramatAM mAnasAmbuje || 10|| svasti shrIstanakastUrImakarImudritorasaH | shrIra~NgarAjAchCharadashshatamAshAsmahetamAm || 11|| pAtu praNatarakShAyAM vilambamasahanniva || sadA pa~nchAyudhIM bibhratsa naH shrIra~NganAyakaH || 12|| amataM mataM matamathAmataM stutaM parininditaM bhavati ninditaM stutam | iti ra~NgarAjamudajUghuShattrayI stumahe vayamkimiti tanna shaknumaH || 13|| yadi me sahasravadanAdivaibhavaM nijamarpayetsa kila ra~NgachandramAH | atha sheShavanmama cha tadvadeva vA stutishaktyabhAvavibhave.api bhAgitA || 14|| so a~Nga veda yadi vA na kileti vedaH sandegdhyanarghavidamAtmani ra~NganAtham | sthAne tadeSha khalu doShamalImasAbhiH madvAgbhiraishamatishAyanamAvR^iNoti || 15|| svaM saMskR^itadrAviDavedasUktaiH bhAntaM maduktairmalinIkaroti | shrIra~NgakamraH kalabhaM ka eva snAtvA.api dhUlIrasikaM niSheddhA || 16|| kintu prapattibalatAritaviShNumAya\- madvaMshyarAjakuladurlalitaM kilaivam | shrIra~NgarAjakamalApadalAlitatvaM yadvA.aparAdhyati mama stutisAhase.asmin || 17|| nAthasya cha svamahimArNavapAradR^ishva\- vij~nAnavAgvilasitaM sahate na vedaH | ApekShikaM yadi tadasti mamApi tena shrIra~NgiNaH stutividhAvahamadhyakArSham || 18|| anyatrAtadguNoktirbhagavati na tadutkarShachauryaiH pareShAM stutyatvAdyAvadarthA phaNitirapi tathA tasya nissImakatvAt | AmnAyAnAmasImnAmapi harivibhave varShabindorivA.abdhau saM bandhAtsvAtmalAbho na tu kabalanataH stoturevaM na kiM me || 19|| kAverImavagAhiShIya bhagavadbhogAntarAyI bhavat karmakleshaphalAshayaprashamanodvelAmalasrotasam | jantossamsarato.archirAdisaraNivyAsa~Ngabha~NgAya yA loke.asmiN virajeva vellitajalA shrIra~NgamAli~Ngati || 20|| dugdhAbdhirjanako jananyahamiyaM shrIreva putrI varaH shrIra~Ngeshvara etadarhamiha kiM kuryAmitIvAkulA | cha~nchachchAmarachandrachandanamahAmANikyamuktotkarAn kAverI laharIkarairvidadhatI paryeti sA sevyatAm || 21|| tIrthaM shundhati pAti nandanatarUn rathyA~NgaNAnyukShati snAnIyArhaNapAnavAri vahati snAtaH punIte janAn | shyAmaM vedaraho vyanakti puline phenairhasantIva tat ga~NgAM viShNupadItvamAtramukharAM hemApagA hantvagham || 22|| agaNitaguNAvadyaM sarvaM sthiratrasamaprati\- kriyamapi payaH pUrairApyAyayantyanujAgratI | pravahati jagaddhAtrI bhUtveva ra~NgapaterdayA shishiramadhurA.agAdhA sA naH punAtu marudvR^idhA || 23|| taraLatanutara~NgairmandamAndolyamAna\- svataTaviTapirAjIma~njarIsuptabhR^i~NgA | kShipatu kanakanAmnI nimnagA nArikela\- kramukajamakarandairmAMsalApA madaMhaH || 24|| kadalavakulajambUpUgamAkandakaNTha\- dvayasasarasanIrAmantarA sahyakanyAm | prabalajalapipAsAlambamAnAmbudaugha\- bhramakarataruvR^indaM vandyatAmantarIpam || 25|| yadviShNoH padamatamaH parorajo.agryaM muktAnAmanuvirajaM vidIpramAhuH | tatpuNyaM pulinamidantayA.adya madhye kAveri sphurati tadIkShiShIya nityam || 26|| trayyantaprahatimatIShu vaiShNavAnAM prApyAsu prachurabhavashramApahAsu | kAverIparicharitAsu pAvanIShu shrIra~NgopavanataTIShu vartiShIya || 27|| sphuritashapharadIryannAlikerIguluchCha\- prasR^imaramadhukulyAvardhitAnokahAni | ratimavirati ra~NgArAmaramyasthalAni kramukapadasamochAmechakAni kriyAsuH || 28|| adhiparamapadaM purImayodhyAM amR^itavR^itAmaparAjitAmushanti | pulinamupari ra~NgarAjadhAnI pishitadR^ishAmapi sA purashchakAsti || 29|| bhavapadamapi divyadhAma kartuM tadubhayatantritaharmyamAlikeva | bhavanamaNitalairvijR^imbhamANA jayatitarAmiha ra~NgarAjadhAnI || 30|| maNimakararuchIrvitatya pAshAn visR^imaraketukarairmR^igaM himAMshoH | shriya iva navakelaye jighR^ikShuH sukhayatu ra~NgapurI chakAsatI naH || 31|| janapadasaridantarIpapuShyat puraparipAlananityajAgarUkAn | praharaNaparivAravAhanADhyAn kumudamukhAN gaNanAyakAn namAmi || 32|| ahR^itasahajadAsyAH sUrayassrastabandhA vimalacharamadehA ityamI ra~NgadhAma | mahitamanujayatiryaksthAvaratvAH shrayante suniyatamiti ha sma prAhurebhyo namaH stAt || 33|| shrIra~Ngadivyabhavanambhuvi gopurANAM prAkAritena nikareNa gurutmateva | pArshvaprasAritapatattrapuTena bhaktyA nAnAtanUbhirUpagUDhamupaghnayAmaH || 34|| prAkAramadhyAjiramaNDapoktyA sadvIparatnAkararatnashailA | sarvaMsahA ra~NgavimAnasevAM prApteva tanmandiramAvirasti || 35|| jitabAhyajinAdimaNipratimA api vaidikayanniva ra~Ngapure | maNimaNDapavapagaNan vidadhe parakAlakaviH pranamemahi tAn || 36|| smerAnanAkShikamalairnamataH punAnAn daMShTrAgadAbhrukuTibhirdviShato dhunAnAn | chandraprachaNDamukhataH praNamAmi ra~Nga\- dvArAvalIShu chatasR^iShvadhikArabhAjaH || 37|| sarvAtmasAdhAraNanAthagoShThI\- pUre.api duShpUramahAvakAsham | AsthAnamAnandamayaM sahasra\- sthUNAdinA.a.amnAtamavApnavAni || 38|| viharati harau lakShmyA lIlAtapatrapariShkriyA\- vinimayavidhAsUnAsUnikriyAsaphalotpalAm | atha munimanaH padmeShvabjAsahAyavihAraja\- shramaharataTIM yAmastAmaindavImaravindinIm || 39|| tApatrayImaindavapuShkariNyAM nimajjya nirvApayitA.asmi yasyAH | abhyAsato.apAmaghamarShaNInAM chandraH sudhAdIdhititAmavApa || 40|| pUrveNa tAM tadvadudAranimna\- prasannashItAshayamagnanAthAH | parA~NkushAdyAH prathame pumAMso niShedivAMso dasha mAM dayeran || 41|| AdhArashaktimupari prakR^itiM pareNa tAM kUrmamatra phaNinaM pR^ithivIM phaNAsu | pR^ithvyAM payodhimadhi tannalinaM nidhAya shrIra~NgadhAma suniviShTamabhiShTavAni || 42|| pareNa nAkaM puri hemamayyAM yo brahmakosho.astyaparAjitAkhyaH | shrIra~NganAmnA tamapauruSheyaM vimAnarAjaM bhuvi bhAvayAni || 43|| anAdyAmnAtatvAtpuruSharachanAdoSharahitaM jane tAMstAn kAmAN vidadhadapi sAyujyahR^idayam | asandehAdhyAsaM bhagavadupalambhasthalamamI pratImaH shrIra~NgaM shrutishatasamAnarddhi sharaNam || 44|| api phaNipatibhAvAchChubhramantaH shayAloH marakatasukumAraiH ra~NgabharturmayUkhaiH | sakalajaladhipAnashyAmajImUtajaitraM pulakayati vimAnaM pAvanaM lochane naH || 45|| vyApi rUpamapi goShpadayitvA bhaktavatsalatayojjhitavelam | tad.hviShantapanR^ikesarirUpaM gopuropari vijR^imbhitamIDe || 46|| ahamalamavalambaH sIdatAmityajasraM nivasaduparibhAge gopuraM ra~NgadhAmnaH | kvachana nR^iparipATIvAsitaM kvApi simha\- kramasurabhitamekaM jyotiragre chakAsti || 47|| saMshodhya pAvanamanoharadR^iShTipAtaiH devAya mAmapi nivedayatAM gurUNAm | savyottare bhagavato.asya kaTAkShavIkShA\- pa~NktiM prapadya paritaH parito bhaveyam || 48|| shrIra~NgarAjakaranamritashAkhikAbhyo lakShmyA svahastakalitashravaNavataMsam | punnAgatallajamajasrasahasragIti\- sekotthadivyanijasaurabhamAmanAmaH || 49|| shrIra~NgachandramasamindirayA vihartuM vinyasya vishvachidachinnayanAdhikAram | yo nirvahatyanishama~Ngulimudrayaiva senAnyamanyavimukhAstamashishriyAma || 50|| sainyadhurINaprANasahAyAM sUtravatImAshishriyamambAm | shrIpadalAkShAlA~nChitasevAprotalasaddorvallivilAsAm || 51|| vidadhatu sukhaM viShvaksenasya te prathame bhaTAH karimukhajayatsenau kAlAhvasiMhamukhau cha naH | jagati bhajatAM tattatpratyUhatUladavAnalAH dishi dishi divArAtraM shrIra~NgapAlanakarmaThAH || 52|| shrutimayamatiharShaprashrayasmeravaktraM maNimukuramivAgre ma~NgalaM ra~NgadhAmnaH | sharaNamabhigatAH smo yatra rUpasvarUpa\- svaguNamahimadarshI modate ra~NgashAyI || 53|| tArkShyapakShativadasya vallabhAM rudrayA saha sukIrtimarchaye | harShabAShpamapi kIrtimarthinAM yanmukhena kamalA kaTAkShayet || 54|| svAstrarUpasphuranmauli mA shabda iti uddhunAnAM surAstarjanImudrayA | nAthanidrochitonnidratAmrekShaNAM sa~ncharantIM stumastAM cha pa~nchAyudhIm || 55|| astragrAmAgresaraM nAthavIkShA\- shIdhukShIbodvelanR^ittAbhirAmam | chakraM daityachChedakalmAShitA~NgaM bhrAmyajjvAlAmAlabhAri prapadye || 56|| hanubhUShavibhIShaNayoH syAM yatamAviha mokShamupekShya | raghunAyakaniShkrayabhUtaM bhuvi ra~NgadhanaM ramayete || 57|| ito bahiH pa~ncha parA~nchi khAni pratya~nchi tAni syurito.antarittham | aupAdhikebhyo nirupAdhibhogye pratyAharadvetradharaM namAmi || 58|| sheShashayalochanAmR^itanadIrayAkulitalolamAnAnAm | AlambamivAmodastambhadvayamantara~NgamabhiyAmaH || 59|| shrIra~NgAntarmandiraM dIprasheShaM shrIbhUmItadramyajAmAtR^igarbham | pashyema shrIdivyamANikyabhUShAma~njUShAyAstulyamunmIlitAyAH || 60|| lIlAlatAkR^ipANIbhR^i~NgArapatadgrahArpitakarAgrAH | protAvataMsitakuchAH padAbjasamvAhinIrvayaM stumahe || 61|| mukulitanalinAH sakaumudIkA iva sunishA vimalAdikA navApi | shirasi kR^itanamasyadekahastA itarakarochchalachAmarAH shrayeyam || 62|| utphullapa~NkajataTAkamivAbhiyAni shrIra~NgarAjamiha dakShiNasavyasImnoH | lakShmIM vihArarasikAmiva rAjahamsIM ChAyAmivAbhyudayinImavanIM cha tasyAH || 63|| piba nayana puraste ra~NgadhuryAbhidhAnaM sthitamiva pariphullatpuNDarIkaM taTAkam | shriyamapi viharantIM rAjahamsImivAsmin pratiphalanamivAsyAH pashya vishvambharAM cha || 64|| saushIlyashItalamavelakR^ipAtara~Nga\- samplAvitAkhilamakR^itrimabhUma nimnam | lakShmyA cha vAsitamabhUma vigAhamAnAH shrIra~NgarAjamiShapadmasaraH prasannam || 65|| siMhAsane kamalayA kShamayA cha vishvaM ekAtapatrayitumasmadasUnniShaNNam | lakShmIsvayamvarasanAthitayauvanashrI\- saundarya sampadavaliptamivAlihIya || 66|| ApAdamUlamaNimaulisamullasantyA svAtantryasauhR^idatara~NgitayA.a~Ngabha~NgyA | sakhyaM samastajanachetasi sandadhAnaM shrIra~NgarAjamanimeShamanusriyAsma || 67|| kShitikamalanivAsAkalpavallIsalIlo\- lluThanadashadishodyadyauvanArambhajR^imbhaH | shramamapaharatAM me ra~NgadhAmeti tattad\- varamayaphalanamraH patralaH pArijAtaH || 68|| sambhAShamANamiva sarvavashaMvadena mandasmitena madhureNa cha vIkShaNena | divyAstrapuShpitachaturbhujamatyudAraM ra~NgAspadaM mama shubhAshrayamAshrayANi || 69|| ete sha~NkhagadAsudarshanabhR^itaH kShemA~NkarA bAhavaH pAdadvandvamidaM sharaNyamabhayaM bhadraM cha vo he janAH | ityUchiShyabhaya~Nkare karatale smereNa vaktreNa tad\- vyAkurvanniva nirvahenmama dhuraM shrIra~NgasarvaMsahaH || 70|| a~NgairahamprathamikAcharitAtmadAnaiH AmodamAnanavayauvanasAvalepaiH | hai pArijAtamiva nUtanatAyamAna\- shAkhAshataM hR^idi dadhImahi ra~Ngadhuryam || 71|| var. kathamadhImahi AlokA hR^idayAlavo rasavashAdIshAnamIShatsmitaM prachChAyAni vachAMsi padmanilayA chetaH sharavyaM vapuH | chakShuShmanti gatAgatAni ta ime shrIra~NgashR^i~NgAra te bhAvA yauvanagandhinaH kimaparaM si~nchanti chetAMsi naH || 72|| AyatkirITamalikollasadUrdhvapuNDraM AkarNalochanamana~NkushakarNapAsham | utphullavakShasamudAyudhabAhumarha\- nnIviM cha ra~NgapadamabjapadaM bhajAmaH || 73|| var. pati abjanyastapadAbjama~nchitakaTIsaMvAdikausheyakaM ki~nchittANDavagandhisaMhananakaM nirvyAjamandasmitam | chUDAchumbimukhAmbujaM nijabhujAvishrAntadivyAyudhaM shrIra~Nge sharadaH shataM tata itaH pashyema lakShmIsakham || 74|| agre tArkShyeNa pashchAdahipatishayanenAtmanA pArshvayoshcha shrIbhUmibhyAmatR^iptyA nayanachulakanaiH sevyamAnAmR^itaugham | vaktreNAviHsmitena sphuradabhayagadAsha~NkhachakrairbhujAgraiH vishvasmai tiShThamAnaM sharaNamasharaNA ra~NgarAjaM bhajAmaH || 75|| ArtApAshrayamArthikalpakamasahyAgaskarakShmAtalaM sadyaH samshritakAmadhenumabhiyatsarvasvamasmaddhanam | shrIra~NgeshvaramAshrayema kamalAchakShurmahIjIvitaM shrIra~Nge sa sukhAkarotu suchiraM dAsyaM cha dhattAM mayi || 76|| svaphaNavitAnadIpramaNimAlisudAmaruchi\- mradimasugandhibhogasukhashAyitara~Ngadhanam | madabharamantharochChvasitaniHshvasitottaralaM phaNipatiDolikAtalimamAshvasimaH praNatAH || 77|| vaTadaladevakIjaTharavedashiraH kamalA\- stanashaThakopavAgvapuShi ra~NgagR^ihe shayitam | varadamudAradIrghabhujalochanasaMhananaM puruShamupAsiShIya paramaM praNatArtiharam || 78|| udadhiparamavyomnorvismR^itya padmavanAlayA\- vinimayamayIM nidrAM shrIra~NganAmani dhAmani | phaNiparivR^iDhasphAraprashvAsaniHshvasitakrama\- skhalitanayanaM tanvanmanvIta naH paramaH pumAn || 79|| jaladhimiva nipItaM nIradenAdrimabdhau nihitamiva shayAnaM ku~njaraM vAdriku~nje | kamalapadakarAkShaM mechakaM dhAmni nIle phaNinamadhishayAnaM pUruShaM vandiShIya || 80|| shrIra~Ngeshaya iha sharma nirmimItAmAtAmrAdharapadapANividrumo naH | kAverIlaharikaropalAlyamAno gambhIrAdbhuta iva tarNako.arNavasya || 81|| si~nchedimaM cha janamindirayA taTitvAn bhUShAmaNidyutibhirindradhanurdadhAnaH | shrIra~NgadhAmani dayArasanirbharatvA\- dAdrau shayAluriva shItalakAlameghaH || 82|| AmauliratnamakarAtpunarA cha padbhyAM dhAmakramonnamadudAramanoharA~Ngam | shrIra~NgasheShashayanaM nayanaiH pibAmaH pashyanmanaHpravaNamoghamivAmR^itasya || 83|| aravinditama~NghripANipadmai\- rapi tApi~nChitama~nchitA~NgakAntyA | adhareNa sa bandhujIvitaM shrIH niyataM nandanayeta ra~Ngachandram || 84|| anyonyara~njakarucho.anupamAnashobhAH divyasragambarapariShkaraNA~NgarAgAH | saMsparshataH pulakitA iva chinmayatvAt ra~NgendukAntimadhikAmupabR^imhayanti || 85|| drutakanakajagiriparimiladudadhi\- prachalitalaharivadahamahamikayA | snapayati janamimamapaharati tamaH phaNishayamarakatamaNikiraNagaNaH || 86|| bhogIndraniHshvasita saurabhavardhitaM shrI nityAnuShaktaparameshvarabhAvagandhi | saurabhyamAplutadishAvadhi ra~NganetuH Anandasampadi nimajjayate manAMsi || 87|| ra~Ngabharturapi lochanacharchAM sAhasAvaliShu lekhayamAnam | puShpahAsa iti nAma duhAnaM saukumAryamativA~NmanasaM naH || 88|| ekaikasminparamavayave.anantasaundaryamagnaM sarvaM drakShye kathamiti mudhA mAmathA mandachakShuH | tvAM saubhrAtravyatikarakaraM ra~NgarAjA~NgakAnAM tallAvaNyaM pariNamayitA vishvapArINavR^itti || 89|| vapurmandArasya prathamakusumollAsasamayaH kShamAlakShmIbhR^i~NgIsakalakaraNonmAdanamadhu | vikAsaH saundaryasraji rasikatAshIdhuchulako yuvatvaM ra~NgendoH surabhayati nityaM subhagatAm || 90|| kirITachUDaratnarAjirAdhirAjyajalpikA | mukhendukAntirunmukhaM tara~Ngiteva ra~NgiNaH || 91|| shikhAratnoddIpraM dishi dishi cha mANikyamakarI\- lasachChR^i~NgaM ra~NgaprabhumaNikirITaM manumahe | samuttu~NgasphItaM chidachidadhirAjashriya iva priyAkrIDaM chUDAmaNimapi nitambaM tamabhitaH || 92|| viharatu mayi ra~NginashchUlikAbhramarakatilakordhvapuNDrojjvalam | mukhamamR^itataTAkachandrAmbujasmayaharashuchimugdhamandasmitam || 93|| mukhapuNDarIkamupari trikaNTakaM tilakAshcha kesarasamAH samauktikAH | iha ra~NgabharturabhiyanmadhuvrataprakarashriyaM bhramarakANi bibhrati || 94|| hR^idayaM prasAdayati ra~NgapatermadhurordhvapuNDratilakaM lalitam | alikArdhachandradalasaMvalitAmamR^itasrutiM yadabhisha~Nkayate || 95|| sarasIruhe samavanAmya madAdupari pranR^ityadalipa~Nktinibhe | sphurato bhruvAvupari lochanayoH savilAsalAsyagati ra~NgabhR^itaH || 96|| smarasharanalinabhramAnnetrayoH parisaranamadikShuchApachChavi | yugamudayati ra~NgabharturbhruvoH gurukulamiva shAr~NganR^ittashriyaH || 97|| kR^ipayA parayA kariShyamANe sakalA~NgaM kila sarvato.akShi netre | prathamaM shravasI samAstR^iNAte iti dairghyeNa vidanti ra~NganetuH || 98|| shravonAsArodhAttadavadhikaDolAyitagate vishAlasphItAyadruchirashishirAtAmradhavale | mitho baddhaspardhasphuritashapharadvandvalalite kriyAstAM shrIra~NgapraNayinayanAbje mayi dayAm || 99|| karuNAmR^itakUlamudvahaiSha praNamatsvAgatikI prasannashItA | mayi ra~NgadhanopakarNikA.akShNoH saritorvIkShaNavIchisantatiH stAt || 100|| vilasati nAsA kalpakavallI mugdheva ra~Nganilayasya | smitamapi tannavakusumaM chubukakapolaM cha pallavollasitam || 101|| nayanashapharividdhau karNapAshAvaruddhau ruSha iva luThato.archirma~njarIrudgirantau | parimiladalakAlIshaivalAmaMsavelAM anumaNimakaroddhau ra~NgadhuryAmR^itAbdheH || 102|| adharamadhurAmbhojaM tatkarNapAshamR^iNAlikA\- valayamabhi mAmAstAM ra~Ngenduvaktrasarashchiram | nayanashapharaM nAsAshaivAlavallari karNikA\- makaramalakashreNIparyantanIlavanAvali || 103|| ramayatu sa mAM kaNThaH shrIra~Nganeturuda~nchita\- kramukataruNagrIvAkambupralambamalimluchaH | praNayavilagallakShmIvishvambharAkarakandalI\- kanakavalayakrIDAsa~NkrAntarekha ivollasan || 104|| adhiShThAnastambhau bhuvanapR^ithuyantrasya kamalA\- kareNorAlAne arikarighaTonmAthamusalau | phaNIndrasphItasragvyatikaritasandigdhavibhavau bhujau me bhUyAstAmabhayamabhi ra~NgapraNayinaH || 105|| pratijaladhito velAshayyAM vibhIShaNakautukAt punariva puraskartuM shrIra~NgiNaH phaNipu~Ngave | samupadadhataH ka~nchitka~nchitprasArayato bhuja\- dvayamapi sadA dAnashraddhAlu dIrghamupAsmahe || 106|| kusumabharAlasau sphaTikavedishayau viTapA\- vamarataroH paraM parihasatpR^ithu ra~NgabhujaH | bahumaNimudrikAkanakaka~NkaNadorvalayaiH kisalayi dordvayaM phaNini nirbharasuptamimaH || 107|| madrakShAvratakautuke sukaTake vikrAntikarNejape shAr~NgajyAkiNakarkashimni sumanassra~Nmohane mArdave | dordvandvaM bahushaH pralobhya kamalAlIlopadhAnaM bhavat tachchitrAlakamudritaM vijayate shrIra~NgasaMsa~NginaH || 108|| bhavArtAnAM vaktrAmR^itasarasi mArgaM dishadiva svayaM vaktreNedaM varadamiti sandarshitamiva | karAmbhojaM pa~NkeruhavanaruShA pATalamiva shrayAmi shrIra~NgeshayiturupadhAnIkR^itamaham || 109|| kirITaM shrIra~NgeshayiturupadhAnIkR^itabhujaH vidhIshAdhIshatvAddhaTata iti saMspR^ishya vadati | nihInAnAM mukhyaM sharaNamiti bAhustaditaraH sphuTaM brUte pAdAmbujayugalamAjAnunihitaH || 110|| malayajashashiliptaM mAlatIdAmatalpaM sumaNisaravitAnaM kaustubhasvastidIpam | danujavR^iShaviShANollekhachitraM cha lakShmI\- lalitagR^ihamupAse ra~NgasarvaMsahoraH || 111|| hArasphAritaphenamaMshulaharImAlarddhi muktAphala\- shreNIshIkaradurdinaM tata ito vyAkIrNaratnotkaram | AviHkaustubhalakShmi ra~NgavasaternissImabhUmAdbhutaM vakSho mandaramathyamAnajaladhishlAghaM vilokemahi || 112|| vakShaHsthalyAM tulasikamalAkaustubhairvaijayantI sarveshatvaM kathayatitarAM ra~NgadhAmnastadAstAm | kUrmavyAghrInakhaparimilatpa~nchahetI yashodA\- naddhA maugdhyAbharaNamadhikaM naH samAdhiM dhinoti || 113|| kiyAnbharo mama jagadaNDamaNDalI\- tyatR^iptitaH kR^ishitamivodaraM vibhoH | rirakShiShochitajagatIparamparAM parAmiva prathayati nAbhipa~Nkajam || 114|| trividhachidachidvR^indaM tundAvalambivalitrayaM vigaNayadivaishvaryaM vyAkhyAti ra~NgamaheshituH | praNatavashatAM brUte dAmodaratvakaraH kiNaH tadubhayaguNAkR^iShTaM paTTaM kilodarabandhanam || 115|| trayo devAstulyAstritayamidamadvaitamadhikaM trikAdasmAttattvaM paramiti vitarkAn vighaTayan | vibhornAbhIpadmo vidhishivanidAnaM bhagavataH tadanyadbhrUbha~NgIparavaditi siddhAntayati naH || 116|| garbhe kR^itvA goptumanantaM jagadanta\- rmajjadbhramyA vA~nChati sAmyaM nanu nAbhiH | utkShipyaitatprekShitumudyadbhramibhUyaM nAbhIpadmo raMhati ra~NgAyatanAbdheH || 117|| madamiva madhukaiTabhasya rambhAkarabhakarIndrakarAbhirUpyadarpam | sphuTamiva paribhUya garvagurvoH kimupamimImahi ra~Ngaku~njarorvoH || 118|| kaTIkAntisaMvAdichAturyanIvIlasadratnakA~nchIkalApAnulepam | mahAbhraM lihanmerumANikyasAnUrivAbhAti pItAmbaraM ra~NgabandhoH || 119|| bharmasthalAMshupariveSha ivAmburAsheH sandhyAmbuvAhanikurumbamivAmbarasya | shampAkadambakamivAmbumucho manA naH pItAmbaraM pibati ra~Ngadhurandharasya || 120|| vaibhUShaNyAM kAntirA~NgI nimagnA viShvadrIchI kvApi sonmAdavR^ittiH | jAne jAnudvandvavArtAvivarto jAtaH shrImadra~Ngatu~NgAlayasya || 121|| shrIra~Ngeshayaja~Nghe shrIbhUmyAmarshaharShakaNTakite | tatkelinalinamAMsalanAladvayalalitamAcharataH || 122|| vandAruvR^indArakamaulimAlAyu~njAnachetaH kamalAkarebhyaH | sa~NkrantarAgAviva pAdapadmau shrIra~Ngabharturmanavai navai cha || 123|| yadvR^indAvanapaNDitaM dadhiravairyattANDavaM shikShitaM yallakShmIkarasaukhyasAkShi jalajapraspardhamAnarddhi yat | yadbhakteShvajalasthalaj~namapi yaddUtyaprasa~NgotsukaM tadviShNoH paramaM padaM vahatu naH shrIra~NgiNo ma~Ngalam || 124|| shi~njAnashrutishi~njinImaNiravairvajrAravindadhvaja\- chChatrIkalpakasha~Nkhachakramukuraisstaistaishcha rekhAmayaiH | aishvaryeNa jayaM trivikramamukhaM ghuShyadbhirAmreDitaM shrIra~NgeshayapAdapa~NkajayugaM vandAmahe sundaram || 125|| punAni bhuvanAnyahaM bahumukhIti sarvA~NgulI jhalajjhalitajAhnavIlaharivR^indasandehadAH | divA nishi cha ra~NgiNashcharaNachArukalpadruma\- pravAlanavama~njarIH nakharuchIrvigAhemahi || 126|| shrIra~NgendoH padakisalaye nIlama~njIramaitryA vande vR^intapraNayimadhupavrAtarAjIvajaitre | nityAbhyarchAnatavidhimukhastomasaMshayyamAnaiH hemAmbhojairnibiDanikaTe rAmasItopanItaiH || 127|| iti shrIra~NgarAjastave pUrvashatakaM samAptam | atha shrIra~NgarAjastave uttarashatakam | shrIparAsharabhaTTAryaH shrIra~NgeshapurohitaH | shrIvatsA~NkasutaH shrImAn shreyase me.astu bhUyase || hartuM tamassadasatI cha vivektumIsho mAnaM pradIpamiva kAruNiko dadAti | tenAvalokya kR^itinaH paribhu~njate taM tatraiva ke.api chapalAshshalabhIbhavanti || 1|| yA vedabAhyAH smR^itayo.arhadAdervedeShu yAH kAshcha kudR^iShTayaH | ## var ## kudR^iShTayastAH? AgaskR^itAM ra~Nganidhe tvadadhvanyandha~NkaraNyaH smR^itavAn manustat || 2|| pratyakShapramathanapashyatoharatvA\- nnirdoShashrutivimateshcha bAhyavartma | dustarkaprabhavatayA cha vaktR^idoSha\- spR^iShTyA cha prajahati ra~Ngavinda vR^iddhAH || 3|| avayavitayeda~NkurvANairbahiShkaraNairvapu\- rniravayavako.aha~NkArArhaH pumAn karaNAtigaH | sphurati hi janAH pratyAsatterimau na vivi~nchate tadadhikurutAM shAstraM ra~Ngesha te paralokini || 4|| pratyakShA shrutirarthadhIshcha na tathA doShastadarthaH punardharmAdharmaparAvareshvaramukhaH pratyakShabAdhyo na cha | tachchArvAkamate.api ra~NgaramaNa pratyakShavat sA pramA yogonmIlitadhIstadarthamathavA pratyakShamIkSheta saH || 5|| na sadasadubhayaM vA nobhayasmAdbahirvA jagaditi na kilaikAM koTimATIkate tat | iti nirupadhi sarvaM sarvikAto niShedhan varada sugatapAshashchoralAvaM vilAvyaH || 6|| pratItishchediShTA na nikhilaniShedho yadi na ko niSheddhA.ato neShTo nirupadhiniShedhassadupadhau | niShedhe.anyatsidhyedvarada ghaTabha~Nge shakalavat pramAshUnye pakShe shrutirapi mate.asminvijayatAm || 7|| yogAchAro jagadapalapatyatra sautrAntikasta\- ddhIvaichitryAdanumitipadaM vakti vaibhAShikastu | pratyakShaM tatkShaNikayati te ra~NganAtha trayo.api j~nAnAtmatvakShaNabhidurate chakShate tAn kShipAmaH || 8|| jagadbha~NkuraM bha~NgurA buddhirAtmetyasadvettrabhAve tathA vedyavittyoH | kShaNadhvaMsatashcha smR^itipratyabhij~nAdaridraM jagatsyAdidaM ra~Ngachandra || 9|| ahamidamabhivedmItyAtmavittyorvibhede sphurati yadi tadaikyaM bAhyamapyekamastu | pramitirapi mR^iShA syAnmeyamithyAtvavAde yadi tadapi saheran dIrghamasmanmatAyuH || 10|| etadrAmAstraM dalayatu kalirbrahmamImAMsakAMshcha j~naptirbrahmaitajjvaladapi nijAvidyayA bambhramIti | tasya bhrAntiM tAM shlathayati jitAdvaitavidyastu jIvo yadyaddR^ishyaM tadvitathamiti ye j~nApayA~nchakruraj~nAH || 11|| a~NgIkR^itya tu saptabha~NgikusR^itiM syAdastinAstyAtmikAM vishvaM tvadvibhavaM jagajjinamate naikAntamAchakShate | bhinnAbhinnamidaM tathA jagaduShe vandhyA mamAmbetiva\- nnUtnabrahmavide rahaH paramidaM ra~Ngendra te chakShatAm || 12|| kaNacharacharaNAkShau bhikShamANau kutarkaiH shrutishirasi subhikShaM tvajjagatkAraNatvam | aNuShu vipariNAmya vyomapUrvaM cha kAryaM tava bhavadanapekShaM ra~NgabhartarbruvAte || 13|| vede kartrAdyabhAvAdbalavati hi nayaistvanmukhe nIyamAne tanmUlatvena mAnaM taditaradakhilaM jAyate ra~NgadhAman tasmAtsA~NkhyaM sayogaM sapashupatimataM kutrachitpa~ncharAtraM sarvatraiva pramANaM tadidamavagataM pa~nchamAdeva vedAt || 14|| sa~nchaShTe neshvaraM tvAM puruShapariShadi nyasya yadvA.a.anyaparyAt sA~Nkhyo yogI cha kAkvA pratiphalanamivaishvaryamUche kayAchit | bhikShau shaivassurAjambhavamabhimanute ra~NgarAjAtirAgAt tvAM tvAmevAbhyadhAstvaM nanu paravibhavavyUhanADhyambhaviShNum || 15|| iti mohanavartmanA/varShmaNA tvayA.api grathitaM bAhyamataM tR^iNAya manye | atha vaidikavarmavarmitAnAM manitAhe kudR^ishAM kimIsha vartma || 16|| saMskAraM pratisa~nchareShu nidadhatsargesu tatsmAritaM rUpaM nAma cha tattadarhanivahe vyAkR^itya ra~NgAspada | suptodbuddhaviri~nchapUrvajanatAmadhyApya tattaddhitaM shAsannasmR^itakartR^ikAn vahasi yadvedAH pramANaM tataH || 17|| shIkShAyAM varNashikShA padasamadhigamo vyAkriyAnirvachobhyAM ChandashChandashchitau syAdgamayati samayaM jyautiShaM ra~NganAtha | kalpe.anuShThAnamuktaM hyuchitagamitayornyAyamImAMsayossyAt arthavyaktiH purANasmR^itiShu tadanugAstvAM vichinvanti vedAH || 18|| Adau vedAH pramANaM smR^itirupakurute setihAsaiH purANaiH nyAyaissArdhaM tvadarchAvidhimupari parakShIyate pUrvabhAgaH | Urdhvo bhAgatsvadIhAguNavibhavaparij~nApanaistvatpadAptau vedyo vedaishcha sarvairahamiti bhagavan svena cha vyAchakartha || 19|| kriyA tachChaktirvA kimapi tadapUrvaM pitR^isura\- prasAdo vA kartuH phalada iti ra~Ngesha kudR^ishaH | tvadarcheShTApUrte phalamapi bhavatprItijamiti trayIvR^iddhAstattadvidhirapi bhavatpreraNamiti || 20|| Aj~nA te sanimittanityavidhayaH svargAdikAmyadvidhiH so.anuj~nA shaThachittashAstravashatopAyo.abhichArashrutiH | sarvIyasya samastashAsituraho shrIra~Ngasarvasva te rakShAkUtanivedinI shrutirasau tvannityashAstistataH || 21|| atrAste nidhiritivatpumarthabhUte siddhArthA api guNarUpavR^ittavAdAH | ra~Ngesha tvayi sakalAssamanvayante nopAsAphalavidhibhirvisheSha eShAm || 22|| deho dehini kAraNe vikR^itayo jAtirguNAH karma cha dravye niShThitarUpabuddhivachanAstAtsthyAt tathedaM jagat | vishvaM tvayyabhimanyase jagadiShe tenAdvitIyastataH mAyopAdhivikArasa~NkarakathA kA nAma ra~Ngeshvara || 23|| sthityutpattipravR^ittigrasananiyamanavyApanairAtmanaste sheSho.asheShaH prapa~ncho vapuriti bhavatastasya chAbhedavAdAH | sarvaM khalvaitadAtmyaM sakalamidamahaM tattvamasyevamAdyAH vyAkhyAtA ra~NgadhAmapravaNa vijayibhirvaidikaissArvabhaumaiH || 24|| sarAjakamarAjakaM punaranekarAjaM tathA yathAbhimatarAjakaM jagadidaM jajalpurjaDAH | jagAvavashachitratAtaratamatvatarkA~NgikA shrutishchidachitI tvayA varada nityarAjanvatI || 25|| brahmAdyAssR^ijyavarge bhrukuTibhaTatayodghATitA nAvatAra\- prastAve tena na tvaM na cha tava sadR^ishA vishvamekAtapatram | lakShmInetrA tvayeti shrutimunivachanaistvatparairarpayAmaH shrIra~NgAmbhodhichandrodaya jalamuchitaM vAdikautaskutebhyaH || 26|| doShopadhAvadhisamAtishayAnasa~NkhyA nirlepama~NgalaguNaughadughAShShaDetAH | j~nAnaishvarIshakanavIryabalArchiShastvAM ra~Ngesha bhAsa iva ratnamanarghayanti || 27|| yugapadanishamakShaiH svaiH svato vA.a.akShakArye niyamamaniyamaM vA prApya ra~NgAdhirAja | karatalavadasheShaM pashyasi svaprakAshaM tadavaraNamamoghaM j~nAnamAmnAsiShuste || 28|| nayanashravaNo dR^ishA shR^iNoShi atha te ra~Ngapate maheshituH | karaNairapi kAmakAriNaH ghaTate sarvapathInamIkShaNam || 29|| sArvaj~nyenAj~namUlaM jagadabhidadhato vAritAssAkShimAtrAt sA~NkhyoktAtkAraNaM tvAM parayati bhagavannaishvarI ra~NgashAyin apreryo.anyaiH svatantro.apratihati sadasatkarmachaitryA vichitraM yatrechChAleshatastvaM yugapadagaNayan vishvamAvishchakartha || 30|| kArye.anante svatanumukhatastvAmupAdAnamAhuH sA te shaktissukaramitarachcheti velAM vila~Nghya | ichChA yAvadviharati sadA ra~NgarAjAnapekShA saivaishAnAdatishayakari sorNanAbhau vibhAvyA || 31|| svamahimasthitirIsha bhR^ishakriyo.apyakalitashrama eva bibharShi yat | vapuriva svamasheShamidaM balaM tava parAshritakAraNavAraNam || 32|| mR^iganAbhigandha iva yatsakalArthAn nijasannidheravikR^ito vikR^iNoShi | priyara~Nga vIryamiti tattu vadante savikArakAraNamito vinivAryam || 33|| sahakAryapekShamapi hAtumiha tadanapekShakartR^itA | ra~Ngadhana jayati teja iti praNatArtijit pratibhaTAbhibhAvukam || 34|| martyautthAyaM viri~nchAvadhikamupari chotprekShya mImAMsamAnA ra~NgendrAnandavallI tava guNanivahaM yauvanAnandapUrvam | na svArthaM spraShTumIShTe skhalati pathi paraM mUkalAyaM nililye hantaivaM tvadguNAnAmavadhigaNanayoH kA kathA chittavAchoH || 35|| nyadhAyiShata ye guNA nidhinidhAyamAraNyakeShvamI mradimachAturIpraNatachApalakShAntayaH | dayAvijayasaundarIprabhR^itayo.api ratnaughavat jagadvyavahR^itikShamA varada ra~NgaratnApaNe || 36|| yamAshrityaivAtmambharaya iva te sadguNagaNAH prathante so.anantasvavashaghanashAntoditadashaH | tvameva tvAM vettha stimitavitara~NgaM varada bhoH svasaMvedyasvAtmadvayasabahulAnandabharitam || 37|| AghrAyeshvaragandhamIshasadR^ishaM manyAstavendrAdayo muhyanti tvamanAvilo niravadherbhUmnaH kaNehatya yat | chitrIyemahi nAtra ra~Ngarasika tvaM tvanmahimnaH paraH vaipulyAnmahitaH svabhAva iti vA kinnAma sAtmyaM na te || 38|| ShADguNyAdvAsudevaH para iti sa bhavAn muktabhogyo balADhyAt bodhAt sa~NkarShaNastvaM harati vitanuShe shAstramaishvaryavIryAt | pradyumnassargadharmau nayasi cha bhagava~nchChaktitejo.aniruddhaH bibhrANaH pAsi tattvaM gamayasi cha tathA vyUhya ra~NgAdhirAja || 39|| jAgratsvapnAtyalasaturIyaprAyadhyAtR^ikramavadupAsyaH | svAmiMstattatsahaparibarhaH chAturvyUhaM vahasi chaturdhA || 40|| achidavisheShitAn pralayasImani saMsarataH karaNakaLebarairghaTayituM dayamAnamanAH | varada nijechChayaiva paravAnakaroH prakR^itiM mahadabhimAnabhUtakaraNAvalikorakiNIm || 41|| nimnonnataM cha karuNaM cha jagadvichitraM karma vyapekShya srjatastava ra~NgasheShin | vaiShamyanirghR^iNatayorna khalu prasaktiH tadbrahmasUtrasachivAH shrutayo gR^iNanti || 42|| svAdhIne sahakArikAraNagaNe kartushsharIre.athavA bhoktuH svAnuvidhAparAdhavidhayoH rAj~no yathA shAsituH | dAturvA.arthijane kaTAkShANamiva shrIra~Ngasarvasva te sraShTussR^ijyadashAvyapekShaNamapi svAtantryamevAvahet || 43|| pralayasamayasuptaM svaM sharIraikadeshaM varada chidachidAkhyaM svechChayA vistR^iNAnaH | khachitamiva kalApaM chitramAtatya dhUnvan anushikhini shikhIva krIDasi shrIsamakSham || 44|| bhUyo bhUyastvayi hitapare.apyutpathAnAtmanIna\- srotomagnAnapi pathi nayaMstvaM durAshAvashena | rugNe toke sva iva janani tatkaShAyaM pibantI tattadvarNashramavidhivashaH klishyase ra~NgarAja || 45|| sArva tvatkaM sakalacharitaM ra~NgadhAman durAshA\- pAshebhyassyAnna yathi jagatAM jAtu mUrkhottarANAm | nistandrAlostava niyamato nartuli~NgapravAhA sargasthemaprabhR^itiShu sadAjAgarA jAghaTIti || 46|| suhR^idiva nigalAdyairunmadiShNuM nR^ishaMsaM tvamapi nirayapUrvairdaNDayan ra~NganetaH | taditaramapi bAdhAttrAyase bhogamokSha\- pradirapi tava daNDApUpikAtassuhR^ittvam || 47|| dhR^itiniyamanarakShAvIkShaNaishshAstradAna\- pramR^itibhirachikitsyAn prANinaH prekShya bhUyaH | suramanujatirashchAM sarvathA tulyadharmA tvamavatarasi devo.ajo.api sannavyayAtmA || 48|| anujanuranurUparUpacheShTA na yadi samAgamamindirA.akariShyat | asarasamathavA.apriyambhaviShNu dhruvamakariShyata ra~NgarAjanarma || 49|| garIyastvaM parijAnanti dhIrAH paraM bhAvaM manujatvAdibhUShNum | ajAnantastvavajAnanti mUDhAH janighnaM te bhagava~njanma karma || 50|| madhyeviri~nchagirishaM prathamAvatAraH tatsAmyataH sthagayituM tava chetsvarUpam | kiM te paratvapishunairiha ra~NgadhAman sattvapravartanakR^ipAparipAlanAdyaiH || 51|| madhuH kaiTabhashcheti rodhaM vidhUya trayIdivyachakShurvidhAturvidhAya | smarasya~Nga ra~Ngistura~NgAvatAraH samastaM jagajjIvayiShyasyakasmAt || 52|| ra~Ngadhe timiraghasmarashItasvachChahaMsatanurindurivodyan | vedabhAbhiranujagrahithA.a.artAn j~nAnayaj~nasudhayaiva samR^iddhyan || 53|| vaTadalamadhishayya ra~NgadhAman shayita ivArNavatarNakaH padAbjam | adhimukhamudare jaganti mAtuM nidadhitha vaiShNavabhogyalipsayA vA || 54|| unmUlyAhara mandarAdrimahinA taM sambadhAnAmunA dorbhishcha~nchalamAlikaishcha dadhinirmAthaM mathAnAmbudhim | shrIra~Ngeshvara chandrakaustubhasudhApUrvaM gR^ihANeti te kurvANasya phalegrahirhi kamalAlAbhena sarvaH shramaH || 55|| devIhastAmbujebhyashcharaNakisalaye saMvahadbhyo.apahR^itya pratyasyAnantabhogaM jhatiti chalapuTe chakShuShi vistR^iNAnaH | AkShipyorashcha lakShmyAH stanakalashakanatku~Nkumastomapa~NkA\- ddevaH shrIra~NgadhAmA gajapatighuShite vyAkulaH stAt puro naH || 56|| atantritachamUpatiprahitahastamasvIkR^ita praNItamaNipAdukaM kimiti chAkulAntaH puram | avAhanapariShkriyaM patagarAjamArohataH karipravarabR^imhite bhagavatastvarAyai namaH || 57|| yaM pashyanvishvadhuryAM dhiyamasakR^idatho mantharAM manyamAnaH hu~NkArAsbhAlanA~Nghriprahatibhirapi taM tArkShyamadhyakShipastvam | ki~nchoda~nchannudasthAstamatha gajapaterbR^imhite jR^imbhamANe deva shrIra~Ngabandho praNamati hi jane kAndishIkI dashA te || 58|| shrIra~Ngeshaya sharaNaM mamAsi vAtyAvyAlolatkamalataTAkatANDavena | sragbhUShAmbaramayathAyathaM dadhAnaH dhi~NmAmityanugajagarjamAjagantha || 59|| mInatanustvaM nAvi nidhAya sthiracharaparikaramanumanu bhagavan vedasanAbhisvoktivinaudairakalitalayabhayalavamamumavahaH || 60|| shrInayanAbhodbhAsuradIrghapravipulasuruchirashuchishishiravapuH | pakShanigIrNodgIrNamahAbdhisthalajalaviharaNaratagatiracharaH || 61|| chakartha shrIra~NginnikhilajagadAdhArakamaTho bhavan dharmAn kUrmaH punaramR^itamanthAchaladharaH | jagantha shreyastvaM marakatashilApIThalalitaM jalAdudyallakShmIpadakisalayanyAsasulabham || 62|| hR^idi suraripordaMShTrotkhAte kShipan pralayArNavaM kShitikuchataTImarchan daityAsraku~NkumacharchayA | sphuTadhutasaTAbhrAmyadbrahmastavonmukhabR^imhitaH sharaNamasi me ra~NgistvaM mUlakolatanurbhavan || 63|| nR^iharidashayoH pashyannautpattikaM ghaTanAdbhutaM naramuta hariM dR^iShTvaikaikaM samudvijate janaH | iti kila sitAkShIranyAyena sa~NgamitA~NgakaM sphuTasaTamahAdamShTraM ra~NgendrasimhamupAsmahe || 64|| dviShANadveShodyannayanavanavahniprashamana bhramallakShmIvaktraprahitamadhugaNDUShasuShamaiH nakhakShuNNArAtikShatajapaTalairAplutasaTA\- chChaTAskandho rundhe duritamiha puMspa~nchavadanaH || 65|| nakhAgragraste.api dviShati nijabhaktadruhi rUShaH prakarShAdviShNutvadviguNapariNAhotkaTatanuH | viruddhe vaiyagrIsughaTitasamAnAdhikaraNe nR^isiMhatve bibhradvarada bibharAmAsitha jagat || 66|| daityaudAryendrayAch~nAvihatimapanayan vAmano.arthI tvamAsIH vikrAnte pAdapadme trijagadaNusamaM pAMsulIkR^itya lilye | nAbhIpadmashcha mAnakShamamiva bhuvanagrAmamanyaM sisR^ikShuH tasthau ra~Ngendra vR^itte tava jayamukharo diNDimastatra vedaH || 67|| bhavAn rAmo bhUtvA parashuparikarmA bhR^igukulA\- dalAvIdbhUpAlAn pitR^igaNamatArpsIttadasR^ijA | bhuvo bhArAkrAntaM laghu talamupAchIklR^ipaditi dviShAmugrampashyo.apyanagha mama mA jIgaNadagham || 68|| manujasamayaM kR^itvA nAthAvateritha padmayA kvachana vipine sA chedantardhinarma vinirmame | kimatha jaladhiM badhvA rakSho vidhIshavaroddhataM balimukhakulochChiShTaM kurvan ripuM nirapatrayaH || 69|| .....trapaH? yad.hyUte vijayApadAnagaNanA kAli~NgadantA~NkuraiH yadvishleShalavo.api kAliyabhuve kolAhalAyAbhavat | dUtyenApi cha yasya gopavanitAH kR^iShNAgasAM vyasmaran taM tvAM kShemakR^iShIbalaM haladharaM ra~Ngesha bhaktAsmahe || 70|| AkaNThavAribharamantharameghadeshyaM pItAmbaraM kamalalochanapa~nchaheti | brahma stanandhayamayAchata devakI tvAM shrIra~NgakAnta sutakAmyati kA.aparaivam || 71|| shailo.agnishcha jalAmbabhUva munayo mUDhAmbabhUvurjaDAH prAj~nAmAsuragAssagopamamR^itAmAsurmahAshIviShAH | govyAghrAssahajAmbabhUvurapare tvanyAmbabhUvuH prabho tvaM teShvanyatamAmbabhUvitha bhavadveNukvaNonmAthane || 72|| kalkitanurdharaNIM laghayiShyan kalikaluShAn vilunAsi purA tvam | ra~Nganiketa lunIhi lunIhItyakhilamaruntudamadya lunIhi || 73|| AstAM te guNarAshivadguNaparIvAhAtmanAM janmanAM sa~NkhyA bhaumaniketaneShvapi kuTIku~njeshU ra~Ngeshvara | archyassarvasahiShNurarchakaparAdhInAkhilAtmasthitiH prINIShe hR^idayAlubhistava tatashshIlAjjaDIbhUyate || 74|| shrImadvyoma nasIma vA~Nmanasayossarve.avatArAH kvachit kAle vishvajanInametaditidhIH shrIra~NgadhAmanyatha | ArtasvAgatikaiH kR^ipAkaluShitairAlokitairArdrayan vishvatrANavimarshanaskhalitayA nidrAsi jAgaryayA || 75|| sargAbhyAsavishAlayA nijadhiyA jAnannananteshayaM bhAratyA sahadharmachAraratayA svAdhInasa~NkIrtanaH | kalpAneva bahUn kamaNDalugaladga~NgApluto.apUjaya\- dbrahmA tvAM mukhalochanA~njalipuTaiH padmairivA.avarjitaiH || 76|| manukulamahIpAlavyAnamramauliparamparA\- maNimakarikArochirnIrAjitA~NghrisaroruhaH | svayamatha vibho svena shrIra~NgadhAmani maithilI\- ramaNavapuShA svArhANyArAdhanAnyasi lambhitaH || 77|| manvanvavAye druhiNe cha dhanye vibhIShaNenaiva puraskR^itena | guNairdaridrANamimaM janaM tvaM madhyesarinnAtha sukhAkaroShi || 78|| tejaH paraM tatsaviturvareNyaM dhAmnA pareNApraNakhAtsuvarNAm | tvAM puNDarIkekShaNamAmananti shrIra~NganAthaM tamupAsiShIya || 79|| AtmA.asya gantuH paritasthuShashcha mitrasya chakShurvaruNasya chAgneH | lakShmyA sahautpattikagADhabandhaM pashyema ra~Nge sharadashshataM tvAm || 80|| yasyAsmi patyurna tamantaremi shrIra~Ngatu~NgAyatane shayAnam | svabhAvadAsyena cha yo.ahamasmi sa san yaje j~nAnamayairmakhaistam || 81|| AyuH prajAnAmamR^itaM surANAM ra~NgeshvaraM tvAM sharaNaM prapadye | mAM brahmaNe.asmai mahase tadarthaM pratya~nchamenaM yunajai parasmai || 82|| ArtiM titIrShuratha ra~Ngapate dhanAyan AtmambharirvividiShurnijadAsyakAmyan | j~nAnItyamUn samamathAssamamatyudArAn gItAsu deva bhavadAshrayaNopakArAn || 83|| nityaM kAmyaM paramapi katichittvayyadhyAtmasvamatibhiramamAH | nyasyAsa~NgA vidadhati vihitaM shrIra~Ngendo vidadhati na cha te || 84|| pratya~nchaM svaM pa~nchaviMshaM parAchassa~nchakShANAstattvarAshervivichya | yu~njAnAshchartambharAyAM svabuddhau svaM vA tvAM vA ra~NganAthA.apnuvanti || 85|| atha mR^iditakaShAyAH kechidAjAnadAsya\- tvaritashithilachittAH kIrtichintAnamasyAH | vidadhati nanu pAraM bhaktinighnA labhante tvayi kila tatame tvaM teShu ra~Ngendra kiM tat || 86|| upAdatte sattAsthitiniyamanAdyaishchidachitau svamuddishya shrImAniti vadati vAgaupaniShadI | upAyopeyatve tadiha tava tattvaM na tu guNA\- vatastvAM shrIra~Ngeshaya sharaNamavyAjamabhajam || 87|| paTunaikavarATikeva klR^iptA sthalayoH kAkaNikAsuvarNakoTyoH | bhavamokShaNayostvayaiva jantuH kriyate ra~Nganidhe tvameva pAhi || 88|| j~nAnakriyAbhajanasampadaki~nchano.aha\- michChAdhikArashakanAnushayAnabhij~naH | ra~Ngesha pUrNavR^inashsharaNaM bhaveti maukhyAdbravImi manasA viShayAkulena || 89|| tvayi sati purusAharthe matpare chAhamAtma\- kShayakarakuhanArthA~nChraddadhadra~Ngachandra | janamakhilamahamyurva~nchayAmi tvadAtma\- pratimabhavadananyaj~nAnivaddeshikassan || 90|| atikrAmannAj~nAM tava vidhiniShedheShu bhavate.api abhidruhyanvAgdhIkR^itibhirapi bhaktAya satatam | ajAnan jAnan vA bhavadasahanIyAgasi rata\- ssahiShNutvAdra~NgapravaNa tava mAbhUvamabharaH || 91|| prakupitabhujagaphaNAnAmiva viShayANamahaM ChAyAm | sati tava bhujasuraviTapiprachChAye ra~NgajIvita bhajAmi || 92|| tvatsarvashakteradhikA.asmadAdeH kITasya shaktirbata ra~Ngabandho | yattvatkR^ipAmapyatikoshakAranyAyAdasau nashyati jIvanAsham || 93|| shrIra~Ngesha tvadguNAnAmivAsmaddoShANAM kaH pAradR^ishvA yato.aham | oghe moghodanyavattvadguNAnAM tR^iShNApUraM varShatAM nAsmi pAtram || 94|| tvaM chenmanuShyAdiShu jAyamAnastatkarmapAkaM kR^ipayopabhu~NkShe | shrIra~NgashAyin kushaletarAbhyAM bhUyo.abhibhUyemahi kasya hetoH || 95|| kShamA sAparadhe.anutApinyupeyA kathaM sAparAdhe.api dR^ipte mayi syAt | tathApyatra ra~NgAdhinAthAnutApavyapAyaM kShametAtivelA kShamA te || 96|| balibhuji shishupAle tAdR^igAgaskare vA gunalavasahavAsAttvatkShamA sa~NkuchantI | mayi guNaparamANUdantachintAnabhij~ne viharatu varadAsau sarvadA sArvabhaumI || 97|| dayA paravyasanaharA bhavavyathA sukhAyate mama tadahaM dayAtigaH | tathA.apyasau sukhayati duHkhamityataH dayasva mAM guNamaya ra~Ngamandira || 98|| garbhajanmajarAmR^itikleshakarmaShaDUrmigaH | shveva devavaShaTkR^itaM tvAM shriyo.arhamakAmaye || 99|| anukR^itya pUrvapumsaH ra~Nganidhe vinayaDambhato.amuShmAt | shuna iva mama varamR^iddheH upabhogastvadvitIrNAyAH || 100|| sakR^itprapannAya tavAhamasmItyAyAchate chAbhayadIkShamANam | tvAmapyapAsyAhamahambhavAmi ra~Ngesha visrambhavivekarekAt || 101|| tava bharo.ahamakAriShi dhArmikaishsharaNamityapi vAchamudairiram | iti sasAkShikayannidamadya mAM kuru bharaM tava ra~Ngadhurandhara || 102|| dayA.anyeShAM duHkhAprasahanamananyo.asi sakalaiH dayAlustvaM nAtaH praNamadaparAdhAnaviduShaH | kShamA te ra~Ngendo bhavati na tarAM nAtha na tamAM tavaudAryaM yasmAttava vibhavamarthisvamamathAH || 103|| guNatu~NgatayA tava ra~Ngapate bhR^ishanimnamimaM janamunnamaya | yadapekShyamapekShiturasya hi tatparipUraNamIshiturIshvaratA || 104|| tvaM mInapAnIyanayena karmadhIbhaktivairAgyajuSho vibharShi | ra~Ngesha mAM pAsi mitampachaM yatpAnIyashAlaM marubhUShu tatsyAt || 105|| iti shrI ra~NgarAjastave uttarashatakaM samAptam | iti shrIparAsharabhaTTavirachitaM shrIra~NgarAjastavaM sampUrNam | ## Proofread by Nat Natarajan nat.natarajan at gmail.com, PSA Easwaran \medskip\hrule\obeylines Please send corrections to sanskrit at cheerful dot c om Last updated \today https://sanskritdocuments.org \end{document}