% Text title            : Satyanarayana Vrata Katha
% File name             : satyanArAyaNavratakathA.itx
% Category              : vishhnu, pUjA
% Location              : doc\_vishhnu
% Proofread by          : Preeti Bhandare
% Latest update         : November 26, 2023, kArtika pUrNimA as well as krittikA nakShatra, Deva-Diwali, tripurAri pUrNimA
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Shri Satyanarayana Vratakatha ..}##
\itxtitle{.. shrIsatyanArAyaNa vratakathA ..}##\endtitles ##
|| shrI gaNeshAya namaH ||
|| shrIparamAtmane namaH ||
atha kathA prArambhaH |
\section{atha prathamo.adhyAyaH |}
shrIvyAsa uvAcha |
ekadA naimiShAraNye R^iShayaH shaunakAdayaH |
paprachChurmunayaH sarve sUtaM paurANikaM khalu || 1||
R^iShaya UchuH |
vratena tapasA kiM vA prApyate vA~nChitaM phalam |
tatsarvaM shrotumichChAmaH kathayasva mahAmune || 2||
sUta uvAcha |
nAradenaiva sampR^iShTo bhagavAn kamalApatiH |
surarShaye yathaivAha tachChR^iNudhvaM samAhitAH || 3||
ekadA nArado yogI parAnugrahakA~NkShayA |
paryaTan vividhAn lokAn martyalokamupAgataH || 4||
tatodR^iShTvA janAnsarvAn nAnAkleshasamanvitAn |
nAnAyonisamutpannAn klishyamAnAn svakarmabhiH || 5||
kenopAyena chaiteShAM duHkhanAsho bhaved dhruvam |
iti sa~nchintya manasA viShNulokaM gatastadA || 6||
tatra nArAyaNaM devaM shuklavarNaM chaturbhujam |
sha~Nkha\-chakra\-gadA\-padma\-vanamAlA\-vibhUShitam || 7||
dR^iShTvA taM devadeveshaM stotuM samupachakrame |
nArada uvAcha |
namo vA~NgamanasAtItarUpAyAnantashaktaye |
AdimadhyAntahInAya nirguNAya guNAtmane || 8||
sarveShAmAdibhUtAya bhaktAnAmArtinAshine |
shrutvA stotraM tato viShNurnAradaM pratyabhAShata || 9||
shrIbhagavAnuvAcha |
kimarthamAgato.asi tvaM kiM te manasi vartate |
kathayasva mahAbhAga tatsarvaM kathAyAmi te || 10||
nArada uvAcha |
martyaloke janAH sarve nAnAkleshasamanvitAH |
nanAyonisamutpannAH pachyante pApakarmabhiH || 11||
tatkathaM shamayennAtha laghUpAyena tadvada |
shrotumichChAmi tatsarvaM kR^ipAsti yadi te mayi || 12||
shrIbhagavAnuvAcha |
sAdhu pR^iShTaM tvayA vatsa lokAnugrahakA~NkShayA |
yatkR^itvA muchyate mohat tachChR^iNuShva vadAmi te || 13||
vratamasti mahatpuNyaM svarge martye cha durlabham |
tava snehAnmayA vatsa prakAshaH kriyate.adhunA || 14||
satyanArAyaNasyaiva vrataM samyagvidhAnataH | (satyanArAyaNasyaivaM)
kR^itvA sadyaH sukhaM bhuktvA paratra mokShamApnuyAt |
tachChrutvA bhagavadvAkyaM nArado munirabravIt || 15||
nArada uvAcha |
kiM phalaM kiM vidhAnaM cha kR^itaM kenaiva tad vratam |
tatsarvaM vistarAd brUhi kadA kAryaM vrataM prabho || 16|| (kAryaMhitadvratam)

shrIbhagavAnuvAcha |
duHkhashokAdishamanaM dhanadhAnyapravardhanam || 17||
saubhAgyasantatikaraM sarvatra vijayapradam |
yasmin kasmin dine martyo bhaktishraddhAsamanvitaH || 18||
satyanArAyaNaM devaM yajechchaiva nishAmukhe |
brAhmaNairbAndhavaishchaiva sahito dharmatatparaH || 19||
naivedyaM bhaktito dadyAt sapAdaM bhakShyamuttamam |
rambhAphalaM ghR^itaM kShIraM godhUmasya cha chUrNakam || 20||
abhAve shAlichUrNaM vA sharkarA vA guDastathA |
sapAdaM sarvabhakShyANi chaikIkR^itya nivedayet || 21||
viprAya dakShiNAM dadyAt kathAM shrutvA janaiH saha |
tatashcha bandhubhiH sArdhaM viprAMshcha pratibhojayet || 22||
prasAdaM bhakShayed bhaktyA nR^ityagItAdikaM charet |
tatashcha svagR^ihaM gachChet satyanArAyaNaM smaran || 23||
evaM kR^ite manuShyANAM vA~nChAsiddhirbhaved dhruvam |
visheShataH kaliyuge laghUpAyo.asti bhUtale || 24|| (laghUpAyosti)

|| iti shrIskandapurANe revAkhaNDe shrIsatyanArAyaNa vratakathAyAM prathamo.adhyAyaH || 1||
\section{atha dvitIyo.adhyAyaH |}
sUta uvAcha |
athAnyat sampravakShyAmi kR^itaM yena purA dvijAH |
kashchit kAshIpure ramye hyAsIdvipro.atinirdhanaH || 1|| (hyAsIdviprotinirdhanaH)

kShuttR^iDbhyAM vyAkulobhUtvA nityaM babhrAma bhUtale |
duHkhitaM brAhmaNaM dR^iShTvA bhagavAn brAhmaNapriyaH || 2||
vR^iddhabrAhmaNa rUpastaM paprachCha dvijamAdarAt |
kimarthaM bhramase vipra mahIM nityaM suduHkhitaH |
tatsarvaM shrotumichChAmi kathyatAM dvija sattama || 3||
brAhmaNa uvAcha |
brAhmaNo.ati daridro.ahaM bhikShArthaM vai bhrame mahIm || 4|| (brAhmaNoti)

upAyaM yadi jAnAsi kR^ipayA kathaya prabho |
vR^iddhabrAhmaNa uvAcha |
satyanArAyaNo viShNurvA~nChitArthaphalapradaH || 5||
tasya tvaM pUjanaM vipra kuruShva vratamuttamama | (vratamuttamam)
yatkR^itvA sarvaduHkhebhyo mukto bhavati mAnavaH || 6||
vidhAnaM cha vratasyApi viprAyAbhAShya yatnataH |
satyanArAyaNo vR^iddhastatraivAntaradhIyata || 7||
tad vrataM sa~NkariShyAmi yaduktaM brAhmaNena vai |
iti sa~nchintya vipro.asau rAtrau nidrA na labdhavAn || 8|| (nidrAM)

tataH prAtaH samutthAya satyanArAyaNavratam |
kariShya iti sa~Nkalpya bhikShArthamagamadvijaH || 9|| (bhikShArthamagamaddvijaH)

tasminneva dine vipraH prachuraM dravyamAptavAn |
tenaiva bandhubhiH sArdhaM satyasyavratamAcharat || 10||
sarvaduHkhavinirmuktaH sarvasampatsamanvitaH |
babhUva sa dvijashreShTho vratasyAsya prabhAvataH || 11||
tataH prabhR^iti kAlaM cha mAsi mAsi vrataM kR^itam |
evaM nArAyaNasyedaM vrataM kR^itvA dvijottamaH || 12||
sarvapApavinirmukto durlabhaM mokShamAptavAn |
vratamasya yadA vipra pR^ithivyAM sa~NkariShyati || 13|| (viprAH)

tadaiva sarvaduHkhaM tu manujasya vinashyati | (cha manujasya)
evaM nArAyaNenoktaM nAradAya mahAtmane || 14||
mayA tatkathitaM viprAH kimanyat kathayAmi vaH |
R^iShaya UchuH |
tasmAd viprAchChrutaM kena pR^ithivyAM charitaM mune |
tatsarvaM shrotumichChAmaH shraddhA.asmAkaM prajAyate || 15|| (shraddhAsmAkaM)

sUta uvAcha |
shR^iNudhvaM munayaH sarve vrataM yena kR^itaM bhuvi |
ekadA sa dvijavaro yathAvibhava vistaraiH || 16||
bandhubhiH svajanaiH sArdhaM vrataM kartuM samudyataH |
etasminnantare kAle kAShThakretA samAgamat || 17||
bahiH kAShThaM cha saMsthApya viprasya gR^ihamAyayau |
tR^iShNAyA pIDitAtmA cha dR^iShTvA vipraM kR^itaM vratam || 18|| (kR^ita)

praNipatya dvijaM prAha kimidaM kriyate tvayA |
kR^ite kiM phalamApnoti vistarAd vada me prabho || 19|| (vistArAd)

vipra uvAcha |
satyanArAyaNesyedaM vrataM sarvepsitapradam |
tasya prasAdAnme sarvaM dhanadhAnyAdikaM mahat || 20||
tasmAdetad vrataM j~nAtvA kAShThakretA.atiharShitaH |
papau jalaM prasAdaM cha bhuktvA sa nagaraM yayau || 21||
satyanArAyaNaM devaM manasA ityachintayat |
kAShThaM vikrayato grAme prApyate chAdya yad dhanam || 22|| (prApyateme.adya)

tenaiva satyadevasya kariShye vratamuttamam |
iti sa~nchintya manasA kAShThaM dhR^itvA tu mastake || 23||
jagAma nagare ramye dhaninAM yatra saMsthitiH |
taddine kAShThamUlyaM cha dviguNaM prAptavAnasau || 24||
tataH prasannahR^idayaH supakvaM kadalI phalam |
sharkarAghR^itadugdhaM cha godhUmasya cha chUrNakam || 25||
kR^itvaikatra sapAdaM cha gR^ihItvA svagR^ihaM yayau |
tato bandhUn samAhUya chakAra vidhinA vratam || 26||
tad vratasya prabhAveNa dhanaputrAnvito.abhavat | (dhanaputrAnvitobhavat)
ihaloke sukhaM bhuktvA chAnte satyapuraM yayau || 27||

|| iti shrIskandapurANe revAkhaNDe shrIsatyanArAyaNa vratakathAyAM dvitIyo.adhyAyaH || 2||
\section{atha tR^itIyo.adhyAyaH |}
sUta uvAcha |
punaragre pravakShyAmi shR^iNudhvaM muni sattamAH |
purA cholkAmukho nAma nR^ipashchAsInmahAmatiH || 1||
jitendriyaH satyavAdI yayau devAlayaM prati |
dine dine dhanaM dattvA dvijAn santoShayat sudhIH || 2||
bhAryA tasya pramugdhA cha sarojavadanA satI |
bhadrashIlAnadI tIre satyasyavratamAcharat || 3||
etasminnantare tatra sAdhurekaH samAgataH |
vANijyArthaM bahudhanairanekaiH paripUritaH || 4||
nAvaM saMsthApya tattIre jagAma nR^ipatiM prati |
dR^iShTvA sa vratinaM bhUpaM prapachCha vinayAnvitaH || 5||
sAdhuruvAcha |
kimidaM kuruShe rAjan bhaktiyuktena chetasA |
prakAshaM kuru tatsarvaM shrotumichChAmi sAmpratam || 6||
rAjovAcha |
pUjanaM kriyate sAdho viShNoratulatejasaH |
vrataM cha svajanaiH sArdhaM putrAdyAvApti kAmyayA || 7||
bhUpasya vachanaM shrutvA sAdhuH provAcha sAdaram |
sarvaM kathaya me rAjan kariShye.ahaM tavoditam || 8||
mamApi santatirnAsti hyetasmAjjAyate dhruvam |
tato nivR^ittya vANijyAt sAnando gR^ihamAgataH || 9||
bhAryAyai kathitaM sarvaM vrataM santati dAyakam |
tadA vrataM kariShyAmi yadA me santatirbhavet || 10||
iti lIlAvatIM prAha patnIM sAdhuH sa sattamaH |
ekasmin divase tasya bhAryA lIlAvatI satI || 11|| (bhAryAM)

bhartR^iyuktAnandachittA.abhavad dharmaparAyaNA |
rgabhiNI sA.abhavat tasya bhAryA satyaprasAdataH || 12|| (sAbhavat)

dashame mAsi vai tasyAH kanyAratnamajAyata |
dine dine sA vavR^idhe shuklapakShe yathA shashI || 13||
nAmnA kalAvatI cheti tannAmakaraNaM kR^itam |
tato lIlAvatI prAha svAminaM madhuraM vachaH || 14||
na karoShi kimarthaM vai purA sa~NkalpitaM vratam |
sAdhuruvAcha |
vivAha samaye tvasyAH kariShyAmi vrataM priye || 15||
iti bhAryAM samAshvAsya jagAma nagaraM prati |
tataH kalAvatI kanyA vavR^idhe pitR^iveshmani || 16||
dR^iShTvA kanyAM tataH sAdhurnagare sakhibhiH saha |
mantrayitvA drutaM dUtaM preShayAmAsa dharmavit || 17||
vivAhArthaM cha kanyAyA varaM shreShThaM vichAraya |
tenAj~naptashcha dUto.asau kA~nchanaM nagaraM yayau || 18||
tasmAdekaM vaNikputraM samAdAyAgato hi saH |
dR^iShTvA tu sundaraM bAlaM vaNikputraM guNAnvitam || 19||
j~nAtibhirbandhubhiH sArdhaM parituShTena chetasA |
dattAvAn sAdhuputrAya kanyAM vidhividhAnataH || 20|| (sAdhuHputrAya)

tato.abhAgyavashAt tena vismR^itaM vratamuttamam | (tatobhAgyavashAt)
vivAhasamaye tasyAstena ruShTo bhavat prabhuH || 21|| (ruShTo.abhavat)

tataH kAlena niyato nijakarma vishAradaH |
vANijyArthaM tataH shIghraM jAmAtR^i sahito vaNik || 22||
ratnasArapure ramye gatvA sindhu samIpataH |
vANijyamakarot sAdhurjAmAtrA shrImatA saha || 23||
tau gatau nagare ramye chandraketornR^ipasya cha | (nagaretasya)
etasminneva kAle tu satyanArAyaNaH prabhuH || 24||
bhraShTapratij~namAlokya shApaM tasmai pradattavAn |
dAruNaM kaThinaM chAsya mahad duHkhaM bhaviShyati || 25||
ekasmindivase rAj~no dhanamAdAya taskaraH |
tatraiva chAgata shchauro vaNijau yatra saMsthitau || 26||
tatpashchAd dhAvakAn dUtAn dR^iShTavA bhItena chetasA |
dhanaM saMsthApya tatraiva sa tu shIghramalakShitaH || 27||
tato dUtAHsamAyAtA yatrAste sajjano vaNik |
dR^iShTvA nR^ipadhanaM tatra baddhvA.a.anItau vaNiksutau || 28|| (baddhvAnItau)

harSheNa dhAvamAnAshcha prochurnR^ipasamIpataH |
taskarau dvau samAnItau vilokyAj~nApaya prabho || 29||
rAj~nA.a.aj~naptAstataH shIghraM dR^iDhaM baddhvA tu tA vubhau |
sthApitau dvau mahAdurge kArAgAre.avichArataH || 30||
mAyayA satyadevasya na shrutaM kaistayorvachaH |
atastayordhanaM rAj~nA gR^ihItaM chandraketunA || 31||
tachChApAchcha tayorgehe bhAryA chaivAti duHkhitA |
chaureNApahR^itaM sarvaM gR^ihe yachcha sthitaM dhanam || 32||
AdhivyAdhisamAyuktA kShutpipAshAti duHkhitA | (kShutpipAsAti)
annachintAparA bhUtvA babhrAma cha gR^ihe gR^ihe |
kalAvatI tu kanyApi babhrAma prativAsaram || 33||
ekasmin divase yAtA kShudhArtA dvijamandiram | (divase jAtA)
gatvA.apashyad vrataM tatra satyanArAyaNasya cha || 34|| (gatvApashyad)

upavishya kathAM shrutvA varaM rprAthitavatyapi |
prasAda bhakShaNaM kR^itvA yayau rAtrau gR^ihaM prati || 35||
mAtA kalAvatIM kanyAM kathayAmAsa premataH |
putri rAtrau sthitA kutra kiM te manasi vartate || 36||
kanyA kalAvatI prAha mAtaraM prati satvaram |
dvijAlaye vrataM mAtardR^iShTaM vA~nChitasiddhidam || 37||
tachChrutvA kanyakA vAkyaM vrataM kartuM samudyatA |
sA mudA tu vaNigbhAryA satyanArAyaNasya cha || 38||
vrataM chakre saiva sAdhvI bandhubhiH svajanaiH saha |
bhartR^ijAmAtarau kShipramAgachChetAM svamAshramam || 39||
aparAdhaM cha me bharturjAmAtuH kShantumarhasi |
vratenAnena tuShTo.asau satyanArAyaNaH punaH || 40|| (tuShTosau)

darshayAmAsa svapnaM hI chandraketuM nR^ipottamam |
bandinau mochaya prAtarvaNijau nR^ipasattama || 41||
deyaM dhanaM cha tatsarvaM gR^ihItaM yat tvayA.adhunA | (tvayAdhunA)
no chet tvAM nAshayiShyAmi sarAjyadhanaputrakam || 42||
evamAbhAShya rAjAnaM dhyAnagamyo.abhavat prabhuH | (dhyAnagamyobhavat)
tataH prabhAtasamaye rAjA cha svajanaiH saha || 43||
upavishya sabhAmadhye prAha svapnaM janaM prati |
baddhau mahAjanau shIghraM mochaya dvau vaNiksutau || 44||
iti rAj~no vachaH shrutvA mochayitvA mahAjanau |
samAnIya nR^ipasyAgre prAhuste vinayAnvitAH || 45||
AnItau dvau vaNikputrau muktau nigaDabandhanAt |
tato mahAjanau natvA chandraketuM nR^ipottamam || 46||
smarantau pUrva vR^ittAntaM nochaturbhayavihvalau |
rAjA vaNiksutau vIkShya vachaH provAcha sAdaram || 47||
devAt prAptaM mahadduHkhamidAnIM nAsti vai bhayam |
tadA nigaDasantyAgaM kShaurakarmAdyakArayat || 48||
vastrAla~NkArakaM dattvA paritoShya nR^ipashcha tau |
puraskR^itya vaNikputrau vachasA.atoShayad bhR^isham || 49|| (vachasAtoShayadbhR^isham)

purAnItaM tu yad dravyaM dviguNIkR^itya dattavAn |
provAcha cha tato rAjA gachCha sAdho nijAshramam || 50|| (provAchatau)

rAjAnaM praNipatyAha gantavyaM tvatprasAdataH |
ityuktvA tau mahAvaishyau jagmatuH svagR^ihaM prati || 51|| (mahAvaishyo)

|| iti shrIskanda purANe revAkhaNDe shrIsatyanArAyaNa vratakathAyAM tR^itIyo.adhyAyaH || 3||
\section{atha chaturtho.adhyAyaH |}
sUta uvAcha |
yAtrAM tu kR^itavAn sAdhurma~NgalAyanapUrvikAm |
brAhmaNebhyo dhanaM dattvA tadA tu nagaraM yayau || 1||
kiyad dUre gate sAdho satyanArAyaNaH prabhuH |
jij~nAsAM kR^itavAn sAdhau kimasti tava nausthitam || 2||
tato mahAjanau mattau helayA cha prahasya vai | (matau)
kathaM pR^ichChasi bho daNDin mudrAM netuM kimichChasi || 3||
latApatrAdikaM chaiva vartate taraNau mama |
niShThuraM cha vachaH shrutvA satyaM bhavatu te vachaH || 4||
evamuktvA gataH shIghraM daNDI tasya samIpataH |
kiyad dUre tato gatvA sthitaH sindhu samIpataH || 5||
gate daNDini sAdhushcha kR^itanityakriyastadA |
utthitAM taraNIM dR^iShTvA vismayaM paramaM yayau || 6||
dR^iShTvA latAdikaM chaiva mUrchChito nyapatad bhuvi |
labdhasa.nj~no vaNikputrastatashchintAnvito.abhavat || 7|| (vaNikputrastatashchintAnvitobhavat)

tadA tu duhituH kAnto vachanaM chedamabravIt |
kimarthaM kriyate shokaH shApo dattashcha daNDinA || 8||
shakyate tena sarvaM hi kartuM chAtra na saMshayaH | (shakyatene na)
atastachCharaNaM yAmo vA~nChatArtho bhaviShyati || 9|| (vA~nChitArtho)

jAmAturvachanaM shrutvA tatsakAshaM gatastadA |
dR^iShTvA cha daNDinaM bhaktyA natvA provAcha sAdaram || 10||
kShamasva chAparAdhaM me yaduktaM tava sannidhau |
evaM punaH punarnatvA mahAshokAkulo.abhavat || 11|| (mahAshokAkulobhavat)

provAcha vachanaM daNDI vilapantaM vilokya cha |
mA rodIH shR^iNumadvAkyaM mama pUjAbahirmukhaH || 12||
mamAj~nayA cha durbuddhe labdhaM duHkhaM muhurmuhuH |
tachChrutvA bhagavadvAkyaM stutiM kartuM samudyataH || 13||
sAdhuruvAcha |
tvanmAyAmohitAH sarve brahmAdyAstridivaukasaH |
na jAnanti guNAn rUpaM tavAshcharyamidaM prabho || 14||
mUDho.ahaM tvAM kathaM jAne mohitastavamAyayA | (mUDhohaM)
prasIda pUjayiShyAmi yathAvibhavavistaraiH || 15||
purA vittaM cha tat sarvaM trAhi mAM sharaNAgatam |
shrutvA bhaktiyutaM vAkyaM parituShTo janArdanaH || 16||
varaM cha vA~nChitaM dattvA tatraivAntardadhe hariH |
tato nAvaM samArUhya dR^iShTvA vittaprapUritAm || 17||
kR^ipayA satyadevasya saphalaM vA~nChitaM mama |
ityuktvA svajanaiH sArdhaM pUjAM kR^itvA yathAvidhi || 18||
harSheNa chAbhavat pUrNaHsatyadevaprasAdataH |
nAvaM saMyojya yatnena svadeshagamanaM kR^itam || 19||
sAdhurjAmAtaraM prAha pashya ratnapurIM mama |
dUtaM cha preShayAmAsa nijavittasya rakShakam || 20||
tato.asau nagaraM gatvA sAdhubhAryAM vilokya cha | (dUtosau)
provAcha vA~nChitaM vAkyaM natvA baddhA~njalistadA || 21||
nikaTe nagarasyaiva jAmAtrA sahito vaNik |
Agato bandhuvargaishcha vittaishcha bahubhiryutaH || 22||
shrutvA dUtamukhAdvAkyaM mahAharShavatI satI |
satyapUjAM tataH kR^itvA provAcha tanujAM prati || 23||
vrajAmi shIghramAgachCha sAdhusandarshanAya cha |
iti mAtR^ivachaH shrutvA vrataM kR^itvA samApya cha || 24||
prasAdaM cha parityajya gatA sA.api patiM prati | (sApi)
tena ruShTAH satyadevo bhartAraM taraNiM tathA || 25|| (ruShTaH, taraNIM)

saMhR^itya cha dhanaiH sArdhaM jale tasyAvamajjayat |
tataH kalAvatI kanyA na vilokya nijaM patim || 26||
shokena mahatA tatra rudantI chApatad bhuvi | (rudatI)
dR^iShTvA tathAvidhAM nAvaM kanyAM cha bahuduHkhitAm || 27||
bhItena manasA sAdhuH kimAshcharyamidaM bhavet |
chintyamAnAshcha te sarve babhUvustarivAhakAH || 28||
tato lIlAvatI kanyAM dR^iShTvA sA vihvalA.abhavat |
vilalApAtiduHkhena bhartAraM chedamabravIta || 29||
idAnIM naukayA sArdhaM kathaM so.abhUdalakShitaH |
na jAne kasya devasya helayA chaiva sA hR^itA || 30||
satyadevasya mAhAtmyaM j~nAtuM vA kena shakyate |
ityuktvA vilalApaiva tatashcha svajanaiH saha || 31||
tato lIlAvatI kanyAM krauDe kR^itvA ruroda ha |
tataHkalAvatI kanyA naShTe svAmini duHkhitA || 32||
gR^ihItvA pAduke tasyAnugatuM cha manodadhe | (pAdukAM)
kanyAyAshcharitaM dR^iShTvA sabhAryaH sajjano vaNik || 33||
atishokena santaptashchintayAmAsa dharmavit |
hR^itaM vA satyadevena bhrAnto.ahaM satyamAyayA || 34||
satyapUjAM kariShyAmi yathAvibhavavistaraiH |
iti sarvAn samAhUya kathayitvA manoratham || 35||
natvA cha daNDavad bhUmau satyadevaM punaH punaH |
tatastuShTaH satyadevo dInAnAM paripAlakaH || 36||
jagAda vachanaM chainaM kR^ipayA bhaktavatsalaH |
tyaktvA prasAdaM te kanyA patiM draShTuM samAgatA || 37||
ato.adR^iShTo.abhavattasyAH kanyakAyAH patirdhruvam |
gR^ihaM gatvA prasAdaM cha bhuktvA sA.a.ayAti chetpunaH || 38|| (sAyAti)

labdhabhartrI sutA sAdho bhaviShyati na saMshayaH |
kanyakA tAdR^ishaM vAkyaM shrutvA gaganamaNDalAt || 39||
kShipraM tadA gR^ihaM gatvA prasAdaM cha bubhoja sA |
pashchAt sA punarAgatya dadarsha svajanaM patim || 40|| (sApashchAtpunarAgatya, sajanaM)

tataH kalAvatI kanyA jagAda pitaraM prati |
idAnIM cha gR^ihaM yAhi vilambaM kuruShe katham || 41||
tachChrutvA kanyakAvAkyaM santuShTo.abhUdvaNiksutaH |
pUjanaM satyadevasya kR^itvA vidhividhAnataH || 42||
dhanairbandhugaNaiH sArdhaM jagAma nijamandiram |
paurNamAsyAM cha sa~NkrAntau kR^itavAn satyasya pUjanam || 43|| (satyapUjanam)

ihaloke sukhaM bhuktvA chAnte satyapuraM yayau || 44||

|| iti shrIskanda purANe revAkhaNDe shrIsatyanArAyaNa vratakathAyAM chaturtho.adhyAyaH || 4||
\section{atha pa~nchamo.adhyAyaH |}
sUta uvAcha |
athAnyachcha pravakShyAmi shruNudhvaM munisattamAH |
AsIt tu~Ngadhvajo rAjA prajApAlanatatparaH || 1||
prasAdaM satyadevasya tyaktvA duHkhamavApa saH |
ekadA sa vanaM gatvA hatvA bahuvidhAn pashUn || 2||
Agatya vaTamUlaM cha dR^iShTvA satyasya pUjanam | (chApashyat)
gopAH kurvanti santuShTA bhaktiyuktAH sa bAndhavAH || 3||
rAjA dR^iShTvA tu darpeNa na gato na nanAma saH |
tato gopagaNAH sarve prasAdaM nR^ipasannidhau || 4||
saMsthApya punarAgatya bhuktatvA sarve yathepsitam |
tataH prasAdaM santyajya rAjA duHkhamavApa saH || 5||
tasya putrashataM naShTaM dhanadhAnyAdikaM cha yat |
satyadevena tatsarvaM nAshitaM mama nishchitam || 6||
atastatraiva gachChAmi yatra devasya pUjanam |
manasA tu vinishchitya yayau gopAlasannidhau || 7||
tato.asau satyadevasya pUjAM gopagaNaiHsaha |
bhaktishraddhAnvito bhUtvA chakAra vidhinA nR^ipaH || 8||
satyadevaprasAdena dhanaputrAnvito.abhavat |
ihaloke sukhaM bhuktatvA chAnte satyapuraM yayau || 9||
ya idaM kurute satyavrataM paramadurlabham |
shR^iNoti cha kathAM puNyAM bhaktiyuktaH phalapradAm || 10||
dhanadhAnyAdikaM tasya bhavet satyaprasAdataH |
daridro labhate vittaM baddho muchyeta bandhanAt || 11||
bhIto bhayAt pramuchyeta satyameva na saMshayaH |
IpsitaM cha phalaM bhuktvA chAnte satyapuraMvrajet || 12||
iti vaH kathitaM viprAH satyanArAyaNavratam |
yat kR^itvA sarvaduHkhebhyo mukto bhavati mAnavaH || 13||
visheShataH kaliyuge satyapUjA phalapradA |
kechit kAlaM vadiShyanti satyamIshaM tameva cha || 14||
satyanArAyaNaM kechit satyadevaM tathApare |
nAnArUpadharo bhUtvA sarveShAmIpsitapradam || 15|| (sarveShAmIpsitapradaH)

bhaviShyati kalau satyavratarUpI sanAtanaH |
shrIviShNunA dhR^itaM rUpaM sarveShAmIpsitapradam || 16||
ya idaM paThate nityaM shR^iNoti munisattamAH |
tasya nashyanti pApAni satyadevaprasAdataH || 17||
vrataM yaistu kR^itaM pUrvaM satyanArAyaNasya cha |
teShAM tvaparajanmAni kathayAmi munIshvarAH || 18||
shatAnandomahAprAj~naHsudAmAbrAhmaNo hyabhUt |
tasmi~njanmani shrIkR^iShNaM dhyAtvA mokShamavApa ha || 19||
kAShThabhAravaho bhillo guharAjo babhUva ha |
tasmi~njanmani shrIrAmaM sevya mokShaM jagAma vai || 20||
ulkAmukho mahArAjo nR^ipo dasharatho.abhavat |
shrIra~NganAthaM sampUjya shrIvaikuNThaM tadAgamat || 21|| (shrIrAmachandrasamprApya)

rdhAmikaH satyasandhashcha sAdhurmoradhvajo.abhavat | (sAdhurmoradhvajobhavat)
dehArdhaM krakachaishChittvA datvA mokShamavApa ha || 22||
tu~Ngadhvajo mahArAjaH svAyambhuvo.abhavat kila | (svAyambhUrabhavat)
sarvAn bhAgavatAn kR^itvA shrIvaikuNThaM tadA.agamat || 23|| (kR^ittvA, tadAgamat)

bhUtvA gopAshcha te sarve vrajamaNDalavAsinaH |
nihatya rAkShasAn sarvAn golokaM tu tadA yayuH || 24||

|| iti shrIskandapurANe revAkhaNDe shrIsatyanArAyaNa vratakathAyAM pa~nchamo.adhyAyaH || 5||

##
Proofread by Preeti Bhandare

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}