% Text title            : Sundarabahustavah
% File name             : sundarabAhustavaH.itx
% Category              : vishhnu
% Location              : doc\_vishhnu
% Proofread by          : Aruna Narayanan narayanan.aruna at gmail.com
% Description/comments  : Ramanuja Stotramala
% Latest update         : November 23, 2019, July 5, 2021
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Sundarabahustavah ..}##
\itxtitle{.. sundarabAhustavaH ..}##\endtitles ## 
pa~nchastavyAM 3 sundarabAhustavaH
shrIrastu |
shrImate hayagrIvAya namaH |
shrImate rAmAnujAya namaH ||
shrIvatsachihnamishrebhyo namauktimadhImahe |
yaduktayastrayIkaNThe yAnti ma~NgalasUtratAm ||
shrImantau haricharaNau samAshrito.ahaM shrIrAmAvarajamunIndralabdhabodhaH |
nirbhIkastata iha sundarorubAhuM stoShye tachcharaNavilokanAbhilAShI || 1||
sundarAyatabhujaM bhajAmahe vR^ikShaShaNDamayamadrimAsthitam |
yatra suprathitanUpurApagAtIrthamarthitaphalapradaM viduH || 2||
kvachittvaritagAminI kvachana mandamandalasA
     kvachitskhalitavihvalA kvachana phenilA sAravA |
patantyapi kila kvachidvrajati nUpurAhvA nadI
     susundarabhujAhvayaM madhu nipIya mattA yathA || 3||
udadhigamandarAdrimathimanthanalabdhapa\-
     yomadhurarasendirAhvasudhasundaradoHparigham |
asharaNamAdR^ishAtmasharaNaM sharaNArthijana\-
     pravaNadhiyaM bhajema taruShaNDamayAdripatim || 4||
shashadharari~NkhaNADhyashikhamuchChikharaprakaraM\-
      timiranibhaprabhUtataruShaNDamayaM bhramadam |
vanagirimAvasantamupayAmi hariM sharaNaM\-
      bhiduritasaptalokasuvishR^i~Nkhalasha~Nkharavam || 5||
yattu~NgashR^i~NgaviniSha~NgisurA~NganAnAM\-
      nyastordhvapuNDramukhamaNDanamaNDitAnAm |
darpaNyabhUddhR^itamapA~NkashashA~NkapR^iShThaM\-
      taddhAma sundarabhujasya mahAn vanAdriH || 6||
yadIyashikharAgatAM shashikalAM tu shAkhAmR^igA\-
      nirIkShya harashekharIbhavanamAmR^ishantastataH |
spR^ishanti na hi devatAntarasamAshriteti sphuTaM\-
      sa eSha sumahAtaruvrajagirirgR^ihaM shrIpateH || 7||
sundaradordivyAj~nAlambhanakAtaravashAnuyAyini kariNi |
praNayajakalahasamAdhiryatra vanAdrissa eSha sundaradoShNaH || 8||
sa eSha saundaryanidherdhR^itashriyo vanAchalo nAma sudhAma yatra hi |
bhuja~NgarAjasya kulasya gauravAnna khaNDitAH kuNDalinashshikhaNDibhiH || 9||
vR^iShagirirayamachyutasya yasmin svamatamala~NghayituM parasparebhyaH |
khagaticharaNau khagAshshapante bhujagapaterbhujagAshcha sarva eva || 10||
harikulamakhilaM hanUmada~NghriM svakulapajAmbavatastathaiva bhallAH |
nijakulapajaTAyuShashcha gR^idhrAH svakulapateshcha gajA gajendranAmnaH || 11||
vakuladharasarasvatIviShaktasvararasabhAvayutAsu kinnarIShu |
dravati dR^iShadapi prasaktagAnAsviha vanashailataTIShu sundarasya || 12||
bhR^i~NgI gAyati haMsatAlanibhR^itaM tatpuShNatI kokilA\-
     .apyudgAyatyatha vallitallajamukhAdAsraM madhu syandate |
niShpandastimitAH kura~NgatatayashshItaM shilAsaikataM
     sAyAhne kila yatra sundarabhujastasminvanakShmAdhare || 13||
pItAmbaraM varadashItaladR^iShTipAta\-
     mAjAnulambibhujamAyatakarNapAsham |
shrImanmahAvanagirIndranivAsadIkShaM
     lakShmIdharaM kimapi vastu mamAvirastu || 14||
janijIvanApyayavimuktayo yato jagatAmiti shrutishirassu gIyate |
tadidaM samastaduritaikabheShajaM vanashailasambhavamahaM bhaje mahaH || 15||
sadbrahmAtmapadaistrayIshirasi yo nArAyaNoktyA tathA
     vyAkhyAto gatisAmyalabdhaviShayAnanyatvabodhojjvalaiH |
nistulyAdhikamadvitIyamamR^itaM taM puNDarIkekShaNaM
     prArUDhashriyamAshraye vanagireH ku~njoditaM sundaram || 16||
patiM vishvasyAtmeshvaramiti paraM brahma puruShaH
     paraM jyotistatvaM paramiti cha nArAyaNa iti |
shrutirbrahmeshAdIMstaduditavibhUtIMstu gR^iNatI
     yamAhArUDhashrIssa vanagiridhAmA vijayate || 17||
pR^ithivyAdyAtmAntaM niyamayati yastattvanikaraM
     tadantaryAmI tadvapuraviditastena bhagavAn |
sa eSha svaishvaryaM navijahadasheShaM vanagiriM
     samadhyAsIno no vishatu hR^idayaM sundarabhujaH || 18||
pratyagAtmani kadA.apyasambhavadbhUmabhUmimabhivakti yaM shratiH |
taM vanAdrinilayaM susundaraM sundarAyatabhujaM bhajAmahe || 19||
vandeya sundarabhujaM bhujagendrabhoga\-
     saktaM mahAvanagiripraNayapravINam |
yaM taM vidurdaharamaShTaguNopajuShTaM
     AkAshamaupaniShadIShu sarasvatIShu || 20||
yatsvAyattasvarUpasthitikR^itikanijechChAniyAmyasvasheShA\-
     nantAsheShaprapa~nchastata iha chidivAchidvapurvAchishabdaiH |
vishvaishshabdaiH pravAchyo hatavR^ijinatayA nityamevAnavadya\-
     staM vande sundarAhvaM vanagirinilayaM puNDarIkAyatAkSham || 21||
guNajaM guNino hi ma~NgalatvaM pramitaM pratyuta yatsvarUpametya |
tamanantasukhAvabodharUpaM vimalaM sundarabAhumAshrayAmaH || 22||
atipatitAvadhisvamahimAnubhavaprabhavatsukha\-
     kR^itanistara~NgajaladhIyitanityadasham |
pratibhaTameva heyanikarasya sadA.apratimaM
     harimiha sundarAhvamupayAmi vanAdritaTe || 23||
sadA ShADguNyAkhyaiH pR^ithulabalavij~nAnashakana\-
     prabhAvIryaishvaryairavadhividhurairedhitadasham |
drumastomakShmAbhR^itparisaramahodyAnamuditaM
     prapadye.adhyArUDhashriyamimamahaM sundarabhujam || 24||
saushIlyAshritavatsalatvamR^idutAsauhArdasAmyArjavaiH\-
     dhairyasthairyasuvIryashauryakR^ititAgAmbhIryachAturyakaiH |
saundaryAnvitasaukumAryasamatAlAvaNyamukhyairguNai\-
     rdevaH shrItaruShaNDashailanilayo nityaM sthitassundaraH || 25||
yeShvekasya guNasya vipruDapi vai lokottaraM svAshrayaM
     kuryAttAdR^ishavaibhavairagaNitairnissImabhUmAnvitaiH |
nityairdivyaguNaistato.adhikashubhatvaikAspadAtmAshrayai\-
     riddhaM sundarabAhumasmi sharaNaM yAto vanAdrIshvaram || 26||
sadA samastaM jagadIkShate hi yaH pratyakShadR^iShTyA yugapadbhuvA svataH |
sa IdR^ij~nAnanidhirnidhisturnAssahAdriku~njeShu chakAsti sundaraH || 27||
aishvaryatejobalavIryashaktayaH kIdR^igvidhAssundarabAhusaMshrayAH |
yo.asau jagajjanmalayasthitikriyAssa~Nkalpato.alpAdupakalpayatyajaH || 28||
yatkalpAyutabhogato.api kR^ishatAM yAyAnna tAvatphalaM
yeShvekasya tathAvidhaissatatajairaMhobhirutsImabhiH |
astAdAviha saMsR^itAvupachitaishChannaM susannaM janaM
sannatyA kShamate kShaNAdvanagiriprasthapriyassundaraH || 29||
yajjAtIyo yAdR^isho yatsvabhAvaH pAdachChAyAM saMshrito yo.api ko.api |
tajjAtIyastAdR^ishastatsvabhAvaH shliShyatyenaM sundaro vatsalatvAt || 30||
nihIno jAtyA vA bhR^ishamakR^ishalairvA svacharitaiH
     pumAnvai yaH kashchidbahutR^iNamapi syAdaguNataH |
bhajantaM taM pashyedbhujagapatinA tulyamapi yo
     vanAdriprasthasthassa mama sharaNaM sundarabhujaH || 31||
ekaikama~NlaguNAnubhavAbhinanda\-
     mIdR^iktviyAniti cha sundaradoShNi kR^iShNe |
te ye shataM tviti niyantumanAshshrutirhai
     naivaiSha vA~Nmanasagochara ityudAha || 32||
abjapAdamaravindalochanaM padmapANitalama~njanaprabham |
sundarorubhujamindirApatiM vandiShIya varadaM vanAdrigam || 33||
kanakamaratakA~njanadravANAM mathanasamutthitasAramelanottham |
jayati kimapi rUpamasya tejo vanagirinandanasundarorubAhoH || 34||
kinnu svayaM svAtmavibhUShaNaM bhavannasAvala~NkAra itIrito janaiH |
vardhiShNubAladrumaShaNDamaNDitaM vanAchalaM vA paritaH prasAdhayan || 35||
sukhasparshairnityaiH kusumasukumArA~NgasukhadaiH
     susaugandhyairdivyAbharaNagaNadivyAyudhagaNaiH |
ala~NkAryaissarvairnigaditamala~NgAra iti ya\-
     ssamAkhyAnaM dhatte sa vanagirinAtho.astu sharaNam ||
makuTamakuTamAlottaMsachUDAlalAma\-
     svalakatilakamAlAkuNDalaissordhvapuNDraiH |
maNivaravanamAlAhArakeyUrakaNThyai\-
     stulasikaTakakA~nchInUparAdyaishcha bhUShaiH || 37||
asijalajarathA~NgaishshAr~NgakaumodakIbhyA\-
     magaNitaguNajAlairAyudhairapyathAnyaiH |
satatavitatashobhaM padmanAbhaM vanAdre\-
     rupavanasukhalIlaM sundaraM vandiShIya || 38||
AjAnajasvagatabandhuragandhalubdha\-
     bhrAmyadvidagdhamadhupAlisadeshakesham |
vishvAdhirAjyaparibarhakirITarAjaM
     hai sundarasya bata ! sundaramuttamA~Ngam || 39||
andhaM tamastimiranirmitameva yatsyA\-
     ttatsArasAdhitasutanatvativR^ittavArtam |
Ishasya (kesarigire) keshavahareralakAlijAlaM
     tattulyakulyamadhupADhyamahAvanasya || 40||
juShTAShTamIkajvaladindusannibhaM dhR^itordhvapuNDraM vilasadvisheShakam |
bhUmnA lalATaM vimalaM virAjate vanAdrinAthasya samuchChritashriyaH || 41||
suchAruchApadvayavibhramaM bhrUvoyugaM sunetrAhvasahasrapatrayoH |
upAntagaM vA madhupAvalIyugaM virAjate sundarabAhusaMshrayam || 42||
adIrghamapremadughaM kShaNojjvalaM nachoramantaHkaraNasya pashyatAm |
anubjamabjaM nu kathaM nidarshanaM vanAdrinAthasya vishAlayordR^ishoH || 43||
prashchyotatpremasArAmR^itarasachulakaprakramaprakriyAbhyAM
     vikShiptAlokitormiprasaraNamuShitasvAntakAntAjanAbhyAm |
vishvotpattipravR^ittisthitilayakaraNaikAntashAntakriyAbhyAM
     devo.ala~NkAranAmA vanagirinilayo vIkShatAmIkShaNAbhyAm || 44||
premAmR^itaughaparivAhimahAkShisindhu\-
     madhye prabaddhasamuda~nchitasetukalpA |
R^ijvI susundarabhujasya vibhAti nAsA
     kalpadrumA~NkuranibhA vanashailabhartuH || 45||
vyAbhAShitAbhyadhikanandanabhandanarddhimandasmitAmR^itaparisravasaMstavADhyam |
AbhAti vidrumasamAdharamAsyamasya devasya sundarabhujasya vanAdribhartuH || 46||
yashodA~NgulyagronnamitachubukAghrANamuditau
     kapolAvadyApi hyanuparatataddharShagamakau |
virAjete vishvagvitatasahakArAsavarasa\-
     pramAdyadbhR^i~NgADhyadrumavanagiressundarahareH || 47||
vyAlambikuNDalamudagrasuvarNapuShpa\-
     niShpannakalpalatikAyamalAnukAram |
yatkarNapAshayugalaM nigalaM dhiyAM na\-
     sso.ayaM susundarabhujo vanashailabhUShA || 48||
sadaMsasaMsa~njitakuntalAntikAvatIrNakarNAbharaNADhyakandharaH |
subandhuraskandhanibandhano yuvA susundarassundaradorvijR^imbhate || 49||
vyUDhagUDhabhujajatrumullasatkambukandharadharaM dharAdharam |
vR^ikShaShaNDamayabhUbhR^itastaTe sundarAyatabhujaM bhajAmahe || 50||
mandarabhramaNavibhramodbhaTAssundarasya vilasanti bAhavaH |
indirAsamabhinandabhandanAshchandanAgaruvilepabhUShitAH || 51||
jyAkiNA~NkaparikarmadharmiNo bhAnti sundarabhujasya bAhavaH |
pArijAtaviTapAyitarddhayaH prArthitArthaparidAnadIkShitAH || 52||
sAgarAmbaratamAlakAnanashyAmalarddhaya udArapIvarAH |
sheShabhogaparibhogabhAginastannibhA vanagirIshiturbhujAH || 53||
ahamahamikAbhAjo govardhanoddhR^itinarmaNi
     pramathanavidhAvabdherlabdhaprabandhasamakriyAH |
abhimatabahUbhAvAH kAntAbhirambhaNasambhrame
     vanagiripaterbAhAshshumbhanti sundaradorhareH || 54||
shrImadvanAdripatipANitalAbjayugmamArUDhayorvimalasha~NkharathA~Ngayostu |
eko.abjamAshrita ivottamarAjahaMsaH padmapriyo.arka iva tatsamito dvitIyaH || 55||
lakShmyAH padaM kaustubhasaMskR^itaM cha shrIvatsabhUmirvimalaM vishAlam |
vibhAti vakSho vanamAlayA.a.aDhyaM vanAdrinAthasya susundarasya || 56||
saundaryAmR^itasArapUraparivAhAvartagartAyitaM
     yAtaH ki~ncha viri~nchasambhavanabhUmyambhojasambhUtibhUH |
nAbhishshumbhati kumbhikumbhanibhanirbhAtastanasvarvadhU\-
     sambhuktadrumaShaNDashailavasaterArUDhalakShmyA hareH ||
sundarasya kila sundarabAhoH shrImahAtaruvanAchalabhartuH |
hanta ! yatra nivasanti jaganti prApitakraMshima tattanu madhyam || 58||
piShTaduShTamadhukaiTabhakITau hastihastayugalAbhasuvR^ittau |
rAjataH kramakR^ishau cha sadUrU sundarasya vanabhUdharabhartuH || 59||
yauvanavR^iShakakudodbhedanibhaM nitarAM bhAti vibhorubhayaM jAnu shubhAkR^itikam |
sundarabhujanAmno mandaramathitAbdheshchandanavanavilasatkandaravR^iShabhapateH || 60||
adhomukhaM nyastapadAravindayoruda~nchitodAttasunAlasannibhe |
vila~Nghya ja~Nghe kva nu raMhato dR^ishau vanAdrinAthasya susundarasya me || 61||
susundarasyAsya padAravinde
     padAravindAdhikasaukumArye |
ato.anyathA te bibhR^iyAtkathaM nu
     tadAsanaM nAma sahasrapatram || 62||
saundaryamArdavasugandharasapravAhai\-
     rete hi sundarabhujasya padAravinde |
ambhojaDambhaparirambhaNamabhyajaiShTAM
     tadvai parAjitamime shirasA bibharti || 63||
ete te bata ! sundarAhvayajuShaH pAdAravinde shubha
     yannirNejasamutthitatripathagAsrotassu ki~nchitkila |
dhatte.asau shirasA dhruvastadaparaM sroto bhavAnIpati\-
     ryasyAsyAlakanandiketi nijagurnAmaivamanvarthakam || 64||
AmnAyakalpalatikotthasugandhipuShpaM yogIndrahArdasarasIruharAjahaMsam |
utpakvadharmasahakAraphalaprakANDaM vandeya sundarabhujasya padAravindam || 65||
susundarasyAsya tu vAmanAkR^iteH kramatrayaprArthini mAnase kila |
ime pade tAvadihAsahiShNunI vichakramAte trijagatpadadvaye || 66||
saundraryasArAmR^itasindhuvIchishreNIShu pAdA~NgulinAmikAsu |
nyakkR^itya chandrashriyamAtmakAntyA nakhAvalI shumbhati sundarasya || 67||
yo jAtakrashimA malI cha shirasA sambhAvitashshambhunA
     so.ayaM yachcharaNAshrayI shashadharo nUnaM nakhavyAjataH |
pUrNatvaM vimalatvamujjvalatayA sArdhaM bahutvaM tathA
     yAtastaM taruShaNDashailanilayaM vandAmahe sundaram || 68||
yasyAH kaTAkShaNamanukShaNamIshvarANAmaishvaryaheturiti sarvajanInametat |
shrIsseti sundaraniShevaNato nirAhustvAM hi shriyashshriyamudAhurudAravAchaH || 69||
divyAchintyamahAdbhutottamaguNaistAruNyalAvaNyaka\-
     prAyairadbhutabhAvagarbhasatatApUrvapriyairvibhramaiH |
rUpAkAravibhUtibhishcha sadR^ishIM nityAnapetAM shriyaM
     nIlA bhUmimapIdR^ishIM ramayitA nityaM vanAdrIshvaraH ||
anyonyacheShTitanirIkShaNahArdabhAvapremAnubhAvamadhurapraNayaprabhAvaH |
AjasranavyataradivyarasAnubhUtistvAM preyasIM ramayitA vanashailanAthaH || 71||
sundarasya vanashailavAsino bhogameva nijabhogamAbhajan |
sheSha eSha iti sheShatAkR^iteH prItimAnahipatissvanAmani || 72||
vAhanAsanavitAnachAmarAdyAkR^itiH khagapatistrayImayaH |
nityadAsyaratireva yasya vai hyeSha sundarabhujo vanAdrigaH || 73||
vanAdrinAthasya susundarasya vai prabhuktashiShTAshyatha sainyasatpatiH |
samastalokaikadhurandharassadA kaTAkShavIkShyo.asya cha sarvakarmasu || 74||
ChatrachAmaramukhAH parichChadAssUrayaH parijanAshcha naityagAH |
sundarorubhujaminghate sadA j~nAnashaktimukhanityasadguNAH || 75||
dvAranAthagaNanAthatallajAH pAriShadyapadabhAginastathA |
mAmakAshcha guravaH purAtanAssundaraM vanamahIdhragaM shritAH || 76||
IdR^ishaiH parijanaiH parichChadairnityasiddhanijabhogabhUmigaH |
sundaro vanagirestaTIShu vai rajyate sakaladR^iShTigocharaH || 77||
akrIDabhUmiShu sugandhiShu pauShpikIShu
     vaikuNThadhAmani samR^iddhasuvApikAsu |
shrImallatAgR^ihavatIShu yathA tathaiva
     lakShmIdharassajati siMhagirestaTIShu || 78||
AnandamandiramahAmaNimaNDapAntarlakShmyA
     bhuvA.apyahipatau saha nIlayA cha |
nissa~Nkhyanityanijadivyajanaikasevyo
     nityaM vasan sajati sundaradorvanAdrau || 79||
pratyarthini triguNakaprakR^iterasImni
     vaikuNThadhAmani parAmbaranAmni nitye |
nityaM vasanparamasatvamaye.apyatIta\-
     yogIndravA~Nmanasa eSha harirvanAdrau || 80||
lokAMshchaturdasha dadhat kila sundarasya
     pa~NaktIguNottaritasaptavR^itIdamaNDam |
anyAni chAsya susandR^ishi parashshatAni
     krIDAvidheriha parichChadatAmagachChan || 81||
suranaratiryagAdibahubhedakabhinnamidaM
     jagadatha chANDamaNDavaraNAni cha sapta tathA |
guNapuruShau cha muktapuruShAshcha vanAdripate\-
     rupakaraNAni narmavidhaye.api bhavanti vibhoH || 82||
j~nAninassatatayoginastu ye sundarA~NghriparabhaktibhAginaH |
muktimApya paramAM pare pade nityaki~NkarapadaM bhajanti te || 83||
devasya sundarabhujasya vanAdribhartu\-
     rhai shIlavattvamathavA.a.ashritavatsalatvam |
aishasvabhAvamajahadbhirihAvatArai\-
     ryo.ala~nchakAra jagadAshritatulyadharmA || 84||
siMhAdrinAtha! tava vA~NmanasAtivR^ittaM
     rUpaM tvatIndriyamudAha rahasyavANI |
evaM cha na tvamiha chetsamavAtariShya\-
     stvajj~nAnabhaktividhayo.adya mudhA.abhaviShyan || 85||
ye bhaktA bhavadekabhogamanaso.ananyAtmasa~njIvanA
     tatsaMshloShaNatadvirodhinidhanAdyarthaM vanAdrIshvara! |
madhye.aNDaM yadavAtarassuranarAdyAkAradivyAkR^iti\-
     stenaiva tridashairnaraishcha sukaraM svaprArthitaprArthanam ||
shrImanmahAvanagirIshavidhIshayoste
     madhye tu viShNuriti yaH prathamAvatAraH |
tenaiva chettava mahimni janAH kilAndhA\-
     stvanmatsyabhAvamavagamya kathaM bhaveyuH || 87||
he deva! sundarabhuja! tvamihANDamadhye
     saulabhyato visadR^ishaM charitaM mahimnaH |
a~NgIkaroShi yadi tatra surairamIbhi\-
     ssAmyAnnikarShaparipAlanameva sAdhu || 88||
ihAvatIrNasya vanAdrinAtha! te nigUhataH svaM mahimAnamaishvaram |
umApateH kiM vijayaH priya~NkaraH priya~NkarA vendrajidastrabandhanA || 89||
puchChotpuchChanamUrchChanoddhatidhutavyAvartitAvartavat\-
     saMvartArNavanIrapUraviluThatpAThInadivyAkR^iteH |
siMhAdrIsha na vaibhavaM tava kathaM svAlakShyamAlakShyate
     padmAkShasya jughukShato.api vibhavaM lakShmI\-dharAdhokShaja! || 90||
sAchalAvaTataTAkadIrghikAjAhnavIjalavivardhitaH kShaye |
shR^i~Ngasa~NgamitanaurmanorabhUragrato.aNDajavapurhi sundara! || 91||
pralayajanIrapUraparipUritasvanilayAvasannavadanabhramada\-
     sharaNyabhUtasharaNArthinAkisharaNaM bhavan svakR^ipayA |
chaladudadhIritAmbukaluShIkriyADhyagamanasvapR^iShThavidhR^itA\-
     chalakula eSha mInatanuratra sundarabhujo vanAdrinilayaH || 92||
svapR^iShThe praShThAdribhramaNakaraNaiH ki~ncha phaNinaH
     vikR^iShTivyAkR^iShTivyatividhutadugdhAbdhichalitaiH |
avispando nandan vikasadaravindekShaNaruchiH
     purA.abhUssiMhAdreH priyatama ! hare ! kachChavapuH || 93||
jagatpralInaM punaruddidhIrShatassiMhakShitikShinnilayastha ! sundara ! |
purA varAhasya taveyamurvarA daMShTrAhvayendoH kila lakShya lakShitA || 94||
na vAyuH paspande yayaturathavA.astaM shashiravI
     disho.anashyan vishvA.apyachaladachalA sAchalakulA |
nabhashcha prashchyoti kvathitamapi pAtho naraharau
     tvayi stambhe shumbhadvapuShi sati he sundarabhuja ! ||
arAlaM pAtAlaM tridashanilayaH prApitalayo
     dharitrI nirdhUtA yayurapi dishaH kAmapi disham |
ajR^imbhiShTAmbhodhirghumughumiti ghUrNan suraripoH
     vibhindAne vakShastvayi naraharau sundarabhuja ! ||
nakhakrakachakaprathikrathitadaityavakShaHsthalI\-
     samuttharudhirachChaTAchChuritabimbitaM svaM vapuH |
vilokya ruShitaH punaH pratimR^igendrasha~NkAva\-
     shAdya eSha narakesarI sa iha dR^ishyate sundaraH || 97||
kShitiriyaM janisaMhR^itipAlanaiH nigiraNodgiraNoddharaNairapi |
vanagirIsha ! tavaiva satI kathaM varada ! vAmana ! bhikShaNamarhati || 98||
bhArgavaH kila bhavan bhavAnpurA kundasundaravanAchaleshvara ! |
arjunasya baladarpitasya tu chChetsyati smarati bAhukAnanam || 99||
Aj~nA tavAtrabhavatI viditA trayI sA
     dharmaM taduktamakhilena vanAdrinAtha! |
anyUnamAcharitumAstikashikShaNArtha\-
     matrAvatIrya kila sundara ! rAghavo.abhUH || 100||
vanagiripatirIshiteti devaiH tripuraharatripuraghnachApabha~NgAt |
vyagaNi parashurAmadarshitasya svakadhanuShaH parimarshadarshanA~ncha || 101||
anavAptamatra kila lipsyate janairna cha labdhametadiha bhoktumiShyate |
anavAptamatra kila nAsti rAma ! tajjagatI tvayA tR^iNamavaikShi sundara! || 102||
shikhariShu vipineShvapyApagAsvachChatoyA\-
     svanubhavasi rasaj~no daNDakAraNyavAsAn |
tadiha tadanubhUtau sAbhilASho.adya rAma !
     shrayasi vanagirIndraM sundarIbhUya bhUyaH || 103||
upavanataruShaNDairmaNDite gaNDashaila\-
      praNayibhavadudantodgAyigandharvasiddhe |
vanagiritaTabhUmiprastare sundara ! tvaM
      bhajasi nu mR^igayAnAnudravashrAntishAntim || 104||
kUle.abdheH kila dakShiNasya nivasandUrottarAmbhodhigAn
      daityAnekapatatriNA.achChina itIyaM kiM vadantI shrutA |
tatraiveshvaramambhasAM vyajayathAstasmAdvanAdrIshvara !
      shrIman ! sundara ! setubandhanamukhAH krIDAstavADambaram || 105||
raghukulatilaka ! tvaM jAtuchidyAtudhAna\-
      chChalamR^igamR^igayAyAM sa.nprasaktaH purA.abhUH |
tadupajanitakhedachChedanAyAdya gAyan\-
      madhukarataruShaNDaM rajyase kiM vanAdrim || 106||
he sundaraikatarajanmani kR^iShNabhAve
      dve mAtarau cha pitarau cha kule api dve |
ekakShaNAdanugR^ihItavataH phalaM te
      nIlA kulena sadR^ishI kila rukmiNI cha || 107||
tvaM hi sundara ! yadA stanandhayaH pUtanAstanamadhAstadA nu kim |
jIrNameva jaThare payoviShaM durjaraM vada tadAtmanA saha || 108||
AshriteShu sulabho bhavan bhavAn martyatAM yadi jagAma sundara! |
astu nAma tadulUkhale kiyaddAmabaddha iti kiM tadA.arudaH || 109||
sundarorubhuja ! nandanandanastvaM bhavan bhramaravibhramAlakaH |
mandireShu navanItatallajaM vallavIdhiyamuta vyachUchuraH || 110||
kAliyasya phaNatAM shirastu me satkadambashikharatvameva vA |
vaShTi juShTavanashaila ! sundara ! tvatpadAbjayugamarpitaM yayoH || 111||
gUhitasvamahimA.api sundara ! tvaM vraje kimiti shakramAkramIH |
saptarAtramadadhAshcha kiM giriM pR^ichChatashcha suhR^idaH kimakrudhaH || 112||
he nandanandana ! susundara ! sundarAhva
     vR^indAvane viharatastava vallavIbhiH |
veNudhvanishravaNatastarubhistadA va
     sagrAvabhirjatuvilAyamaho ! vililye || 113||
gAya~NgAyaM vanagiripate ! tvaM hi vR^indAvanAnta\-
     rgopIsa~Nghairviharasi yadA sundara ! vyUDhabAho ! |
rAsArambhotsavabahuvidhapremasImantinInA
     chetashchetastava cha tu tadA kAM dashAmanvabhUtAm ||
i~NgitaM nimiShitaM cha tAvakaM ramyamadbhutamatipriya~Nkaram |
tena kaMsamukhakITashAsanaM sundarAlpakamapi prashasyate || 115||
vArANasIdahanapauNDrakabhaumabha~Nga\-
     kalpadrumAharaNasha~NkarajR^imbhaNAdyAH |
anyAshcha bhAratabalakrathanAdayaste
     krIDAssusundarabhuja ! shravaNAmR^itAni || 116||
tvaM hi sundara ! vanAdrinAtha ! he ve~NkaTAhvayanagendramUrdhani |
devasevitapadAmbujadvayaH saMshritebhya iha tiShThase sadA || 117||
hastishailanilayo bhavan bhavAn sAmprataM varadarAjasAhvayaH |
iShTamarthamanukampayA dadadvishvameva dayate hi sundara ! || 118||
madhyekShIrapayodhi sheShashayane sheShe sadA sundara !
     tvaM tadvaibhavamAtmano bhuvi bhavadbhakteShu vAtsalyataH |
vishrANyAkhilanetrapAtramiha san sahyodbhavAyAstaTe
     shrIra~Nge nijadhAmni sheShashayane sheShe vanAdrIshvara! || 119 |
kalkIbhaviShyan kalikalkadUShitAn\-
     duShTAnasheShAn bhagavan ! haniShyasi |
sa eSha tasyAvasarassusundara !
     prashAdhi lakShmIsha ! samakShameva naH || 120||
IdR^ishAstvadavatArasattamAssarva eva bhavadAshritAn janAn |
trAtumeva na kadAchidanyathA tena sundara ! bhavantamAshraye || 121||
tvAmAmananti kavayaH karuNAmR^itAbdhi
     tvAmeva saMshritajanighnamupaghnameShAm |
yeShAM vrajanniha hi lochanagocharatvaM
     hai sundarAhva ! parichaskariShe vanAdrim || 122||
ashakyaM no ki~nchittava na cha na jAnAsi nikhilaM
     dayAluH kShantA chAsyahamapi na chAgAMsi taritum |
kShamo.atastvachCheSho hyagatiriti cha kShudra iti cha
     kShamasvaitAvanno.abalamiha hare ! sundarabhuja ! || 123||
la~NkAyuddhahatAn harIn dvijasutaM shambUkadoShAnmR^itaM
     sAndIpanyabhijaM mR^itaM dvijasutAn bAlAMshcha vaikuNThagAn |
garbhaM chArjunisambhavaM vyudadharassvainaiva rUpeNa yaH
svAbhIShTaM mama madguroshcha dadase no kiM vanAdrIshvara! || 124||
AyodhyakAn sapashukITatR^iNAMshcha jantUn
      ki~NkarmaNo nu bata ! kIdR^ishavedanADhyAn |
sAyujyalabhyavibhavAnnijanityalokAn
      sAntAnikAnagamayo vanashailanAtha! || 125||
haritavAraNabhR^ityasamAhvayaM karigirau varadastvamapUrvikAm |
dR^ishamalambhaya eva hi sundara ! sphuTamadAshcha varAn shatamIdR^ishAn || 126||
iha cha deva ! dadAsi varAn parAn varada ! sundara ! sundaradordhara ! |
vanagirerabhitastaTamAvasannakhilalochanagocharavaibhavaH || 127||
idamime shR^iNumo malayadhvajaM nR^ipamiha svayameva hi sundara ||
charaNasAtkR^itavAniti tadvayaM vanagirIshvara ! jAtamanorathAH || 128||
vij~nApanAM vanagirIshvara! satyarUpAma~NgIkuruShva karuNArNava ! mAmakInAm |
shrIra~NgadhAmani yathApuramekato.ahaM rAmAnujAryavashagaH parivartiShIya || 129||
ki~ncheda~ncha viri~nchabhAvana ! vanAdrIsha ! prabho ! sundara !
     pratyAkhyAnaparA~Nmukho varadatAM pashyannavashyaM shR^iNu |
shrIra~NgashriyamanvahaM praguNayaMstvadbhaktabhogyAM kuru
     pratyakShaM sunirastameva vidadha\- tpratyarthinAM prArthanam || 130||
kAruNyAmR^itavAridhe ! vR^iShapate ! he satyasa~Nkalpana !
     shrIman ! sundara ! yogyatAvirahitA\- nutsArya sadvatsala ! |
kShAmyan sAdhujanaiH kR^itAMstu nikhilAnevApachArAn kShaNAt
     tadbhogyAmanishaM kuruShva bhagavan ! shrIra~NgadhAmashriyam || 131||
idaM bhUyobhUyaH punarapi cha bhUyaH punarapi
     sphuTaM vij~nIpsAmItyagatirabudho.ananyasharaNaH |
kR^itAgA duShTAtmA kaluShamatirasmItyanavadheH
     dayAyAmte pAtraM vanagiripate ! sundarabhuja ! || 132||

iti pa~nchastavyAM tR^itIyaH sundarabAhustavaH sammAptaH |

##
Proofread by Aruna Narayanan narayanan.aruna at gmail.com 

\medskip\hrule\obeylines

Please send corrections to sanskrit at cheerful dot c om
Last updated \today
https://sanskritdocuments.org

\end{document}