% Text title : vaikuNThastavaH % File name : vaikuNThastavaH.itx % Category : vishhnu % Location : doc\_vishhnu % Proofread by : PSA Easwaran psawaswaran at gmail.com % Description/comments : Edited by S. V. Radhakrishna Shastriji. Also from Vaishnava Stotramala % Acknowledge-Permission: Mahaperiaval Trust % Latest update : April 12, 2018 % Send corrections to : sanskrit at cheerful dot c om % % This text is prepared by volunteers and is to be used for personal study % and research. The file is not to be copied or reposted for promotion of % any website or individuals or for commercial purpose without permission. % Please help to maintain respect for volunteer spirit. % \documentstyle[11pt,multicol,itrans]{article} #include=ijag.inc #endwordvowel=.h \portraitwide \parindent=100pt \let\usedvng=\Largedvng % for 1 column \pagenumbering{itrans} \def\engtitle#1{\hrule\medskip\centerline{\LARGE #1}} \def\itxtitle#1{\medskip\centerline{\LARGEdvng #1}\medskip\hrule} \def\endtitles{\medskip\obeyspaceslines} %% \begin{document} \engtitle{.. shrIvaikuNThastavaH ..}## \itxtitle{.. shrIvaikuNThastavaH ..}##\endtitles ## pa~nchastavyAM 1 shrIvaikuNThastavaH (shrIvatsachihnamishrairanugR^ihItAyAM pa~nchastavyAm) shrIvatsachihnamishrebhyo nama uktimadhImahe | yaduktayastrayIkaNThe yAnti ma~NgalasUtratAm || yo nityamachyutapadAmbujayugmarukma\- vyAmohatastaditarANi tR^iNAya mene | asmadgurorbhagavato.asya dayaikasindhoH rAmAnujasya charaNau sharaNaM prapadye || 1|| traividyavR^iddhajanamUrdhavibhUShaNaM yat sampachcha sAttvikajanasya yadeva nityam | yadvA sharaNyamasharaNyajanasya puNyaM tatsaMshrayema vakuLAbharaNA~Nghriyugmam || 2|| bhaktiprabhAvabhavadadbhutabhAvabandha\- sandhukShitapraNayasArarasaughapUrNaH | vedArtharatnanidhirachyuta divyadhAmA jIyAtparA~NkushapayodhirasImabhUmA || 3|| yanma~NgalAya mahate jagatAmushanti traiviShTapAnyapi padAni yadAshrayANi | vandAmahe sarasijekShaNamaddhitIyaM vedAntavedyamanidamprathamaM mahastat || 4|| pItAmbaraM varadashItaladR^iShTipAta\- mAjAnulambibhujamAyatakarNapAsham | tanmeghamechakamudagravishAlavakSho lakShmIdharaM kimapi vastu mamAvirastu || 5|| yatttatvamakSharamadR^ishyamagotravarNaM agrAhyamavyayamanIdR^ishamadvitIyam | IshAnamasya jagato yadaNoraNIyaH tadvaiShNavaM padamudAttamudAharAmaH || 6|| AmnAyamUrdhani cha mUrdhani chordhvapuMsAM yaddhAma vaiShNavamabhIkShNataraM chakAsti | tanmAdR^ishAmapi cha gocharamiti vAcho manye tadIyamidamAshritavatsalatvam || 7|| jAnannapIha kila mAmanapatrapiShNuH viShNoH padapraNayinIM giramAdriye.aham | na shvAvalIDhamapi tIrthamatIrthamAhuH nodanyatApi cha shunA kila lajjitavyam || 8|| devasya daityamathanasya guNeShviyattA sa~NkhyA cha vA~NmanasagocharamatyabhUtAm | apyevamaNvapi cha tatra mamArtishAntyai kITasya tR^ipyata udanvati vipruSho.alam || 9|| premArdravihvalagiraH puruShAH purANAH svAM tuShTuvurmadhuripo madhurairvachobhiH | vAcho viDambitamidaM mama nIchavAchaH kShAntistu te saviShayA mama durvachobhiH || 10|| Aj~nA tavAtrabhavatI viditA trayI sA tAM hi pramANamabhijagmuratIndriye.arthe | AbhAsabhUyamabhiyAntyaparANi doShaiH eShA tu doSharahitA mahitA purANI || 11|| antarhito nidhirasi tvamasheShapuMsAM labhyo.asi puNyapuruShairitarairdurApaH | tatra trayIM sukR^itinaH kR^itino.adhijagmuH bAhyeShu bAhyacharitairitarairnipete || 12|| chitraM vidhervilasitaM tvidamAvirasti duShTAtmanAmayagaho kila durvipAkaH | yatkechidatrabhavatIM shrutimAshrayanto\- .apyarthe kudR^iShTiviniviShTadhiyo vinaShTAH || 13|| bAhyAH kudR^iShTaya iti dvitaye.apyapAraM ghoraM tamassamupayAnti na hIkShase tAn | jagdhasya kAnanamR^igairmR^igatR^iShNikepsoH kAsArasattvanihatasya cha ko visheShaH || 14|| nyAyasmR^iti prabhR^itibhirbhavatA nisR^iShTaiH vedopabR^iMhaNavidhAvuchitairupAyaiH | shrutyarthamarthamiva bhAnukarairvibhejuH tvadbhaktibhAvitavikalmaShashemuShIkAH || 15|| ye tu tvada~NghrisarasIruhabhaktihInAH teShAmamIbhirapi naiva yathArthabodhaH | pittaghnama~njanamanApnuShi jAtu netre naiva prabhAbhirapi sha~NkhasitatvabuddhiH || 16|| vedArthadhIstvayi tu bhaktita eva labhyA yAvAn hi yashcha bhagavannasi tattvatastvam | j~nAtu tathA bhuvanabhAvana vedavedyaM draShTuM praveShTumapi bhaktita eva shakyaH || 17|| tattvArthatatparaparashshatavedavAkyaiH sAmarthyataH smR^itibhirapyatha tAdR^ishIbhiH | tvAmeva tattvaparasAttvikasatpurANaiH devaj~nadhIbhirapi nishchinumaH paresham || 18|| anyatra tu kvachana kechidiheshashabdAt lokaprasiddhimupagamya tamIshamAhuH | taishcha prasiddhavibhavasya samUlatAyai grAhyA trayI tvayi tu sA.achyuta sambhukhInA || 19|| yaH khalvaNoraNutaro mahato mahIyAn AtmA janasya janako jagatashcha yo.abhUt | vedAtmakapraNavakAraNavarNavAchyaM taM tvAM vayantu parameshvaramAmanAmaH || 20|| Atmeshvaro.asi na paro.asti taveshvaro.anyo vishvasya chAsi patirasya parAyaNaM cha | nArAyaNAchyuta parastvamihaika eva brahmAdayo.api bhavadIkShaNalabdhasattAH || 21|| nitssamAbhyadhikavarjita UrjitashrIH nitye.akShare divi vasanpuruShaH purANaH | sattvapravartanakaro jagato.asya mUlaM nAnyastvadasti dharaNIdhara vedavedyaH || 22|| yaM bhUtabhavyabhavadIshamanIshamAhuH antassamudranilayaM yamanantarUpam | yasya trilokajananI mahiShI cha lakShmIH sAkShAtsa eva puruSho.asi sahasramUrdhA || 23|| sarvaM shrutiShvanugataM sthiramaprakampyaM nArAyaNAhvayadharaM tvamivAnavadyam | sUktaM tu pauruShamasheShajagatpavitraM tvAmuttamaM puruShamIshamudAjahAra || 24|| AnandamaishvaramavA~NmanasA.avagAhyaM AmnAsiShushshAtaguNottaritakrameNa | so.ayaM tavaiva nR^iShu hi tvamihAntarAtmA tvaM puNDarIkanayanaH puruShashcha pauShNaH || 25|| yanmUlakAraNamabudhyata sR^iShTivAkyaiH brahmeti vA saditi vA.a.atmagirA.athavA tat | nArAyaNastviti mahopaniShadbravIti saubAlikIprabhR^itayo.apyanujaramurenAm || 26|| jyotiH paraM paramatattvamatho parAtmA brahmeti cha shrutiShu yatparavastvadhItam | nArAyaNastaditi tadvishinaShTi kAchi\- dviShNoH padaM paramamityaparA gR^iNAti || 27|| santIdR^ishAshshrutishirassu parassahasrA vAchastava prathayituM parameshitR^itvam | ki~ncheha na vyajagaNaHkR^imidhAtR^ibhedaM krAman jaganti nigiran punarudgiraMshcha || 28|| rUpashriyA paramayA parameNa dhAmnA chitraishcha kaishchiduchitaiH bhavatashcharitraiH | chihnairanihvavaparairaparaishcha kaishchit nishchinvate tvayi vipashchita IshitR^itvam || 29|| yasyAH kaTAkShaNamanukShaNamIshvarANAM aishvaryaheturiti sArvajanInasiddham | taM shrIriti tvadupasaMshrayaNAnnirAhu\- stvAM cha shriyashshriyamudAhurudAravAchaH || 30|| mAyA tvayA guNamayI kila yA nisR^iShTA sA te vibho kimiva narma na nirmimIte | kautaskutAH sthirakutarkavashena kechit satyAM shrutau cha badhirAstvayi tanmahimnA || 31|| yatsthAvarakrimipata~Ngamata~NgajAdi\- ShvanyeShu jantuShu sadaiva vijAyamAnaH | tvannityanirmalanira~njananirvikAra\- kalyANasadguNanidhe sa itIritastaiH || 32|| tvaddR^iShTijuShTamidamAvirabhUdasheShaM nochetkaTAkShayasi naiva bhavetpravR^ittiH | sthAtuM cha vA~nChati jagattava dR^iShTipAtaM tena shrutau jagadiShe hi jagattvameva || 33|| eva bhago iha bhavatparatantra eva shabdo.api rUpavadamuShya charAcharasya | aishvaryamIdR^ishamidaM shrutiShUditaM te pApIyasAmayamaho tvayi mohahetuH || 34|| ye tvatkaTAkShalavalakShyamiva kShaNaM tai\- raishvaryamIdR^ishamalabhyamalambhi pumbhiH | yatke.api sa~njagadire parameshitR^itvaM teShAmapi shrutiShu tanmahimaprasa~NgAt || 35|| nityeShu vastuShu bhavannirapekShameva tattasvarUpamiti kechidiha bhramantaH | aishvaryamatra tava sAvadhikaM girante brUte trayI tu nirupAdhikamIshanaM te || 36|| ichChAta eva tava vishvapadArthasattA nityaM priyAstava tu kechana te hi nityAH | nityaM tvadekaparatantra nijasvarUpA bhAvatkama~NgaLaguNA hi nidarshanaM na || 37|| vishvasya vishvavidhakAraNamachyutatvaM kAryaM tadetadakhilaM chidachitsvarUpam | tvaM nirvikAra iti vedashirassu ghoSho nissImameva tava darshayatIshitR^itvam || 38|| kiM sAdhanaH kva nivasan kimupAdadAnaH kasmai phalAya sR^ijatIsha idaM samastam | ityAdyaniShThitakutarkamatarkayantaH tvadvaibhavaM shrutivido vidurapratarkyam || 39|| yatsaMvR^itaM dashaguNottarasaptatattvai\- raNDaM chaturdasha jagadbhavadhAtR^idhAma | aNDAni tatsusadR^ishAni parashshatAni krIDAvidhestava parichChadatAmagachChan || 40|| ichChAvihAravidhaye vihitAnyamUni syAttadvibhUtilavaleshakalAyutAMshaH | yA vai na jAtu pariNAmapadAspadaM sA kAlAtmikA tava parA mahatI vibhUtiH || 41|| yadvaiShNavaM hi paramaM padamAmananti khaM vA yadeva paramaM tamasaH parastAt | tejomayaM paramasattvamayaM dhruvaM ya\- dAnandakandamatisundaramadbhutaM yat || 42|| yadbrahmarudrapuruhUtamuravairdurApaM nityaM nivR^ittinirataissanakAdibhirvA | sAyujyamujjvalamushanti yadA.a.aparokShyaM yasmAtparaM na padama~njitamasti kishchit || 43|| rUpeNa sadguNagaNaiH parayA samR^iddhyA bhAvairudAramadhurairapi vA mahimnA | tAdR^iktadIdR^igidamityupavarNayantyo vAcho yadIyavibhavasya tiraskriyAyai || 44|| yadvR^iddhyapakShayavinAshamukhairvikAraiH etairasaMstR^itamanastamitAstishabdam | yadgauravAt shrutiShu phalguphalaM kriyANA\- mAdiShTamanyadasukhottaramadhruvaM cha || 45|| niShkalmaShairnihatajanmajarAvikArai\- bhUyiShThabhaktivibhavairabhavairavApyam | anyairadhanyapuruShairmanasA.apyanApyaM vaikaNThanAma tava dhAma tadAmananti || 46|| nityA tavAnyanirapekShamahAmahimno \- .apyetAdR^ishI niravadhi niryatA vibhUtiH | j~nAnAdayo guNagaNAssamatItasImA lakShmIH priyA parijanAH patagendramukhyAH || 47|| ekasya yeShu hi guNasya lavAyutAMshaH syAtkasyachitsa khalu vA~NmanasAtigashrIH | te tAdR^isho.atyavadhayassamatItasa~NkhyAH tvatsadguNAstvamasi tannirapekShalakShmIH || 48|| sarvasya chaiva guNato hi vilakShaNatva\- maishvaryatashcha kila kashchiduda~nchitassyAt | tatpratyuta tvayi vibho vibhavo guNAshcha sambandhatastava bhajanti hi ma~Ngalatvam || 49|| dUre guNAstava tu sattvarajastamAMsi tena trayI prathayati tvayi nirguNatvam | nityaM hare nikhilasa~NguNasAgaraM hi tvAmAmananti paramIshvaramIshvarANAm || 50|| j~nAnAtmanastava tadeva guNaM gR^iNanti tejomayasya hi maNerguNa eva tejaH | tenaiva vishvamaparokShamudIkShase tvaM rakShA tvadIkShaNata eva yato.akhilasya || 51|| trayyudyatA tava yuvatvamukhairgaNaughai\- rAnandamedhitamiyAniti sanniyantum | te ye shatantviti paramparayA pravR^ittA naivaiSha vA~Nmanasagochara ityudAha || 52|| evaM tayA chaturayA tava yauvanAdyA\- ssarve guNAssaha samastavibhUtibhishcha | pravyAhR^itAH syuravadhInavadhIrayanto vAchAmagocharamahAmahimAna eva || 53|| savartavarti nikhilaM nirabhij~namaj~naM chitre cha karmaNi yathArhamaho niyachChan | sadyaH kR^imidruhiNabhedamabhedameta\- dAvishchakartha sakR^idIkShaNadIkShaNena || 54|| astaM yadudyadupachAyyapachAyi chaiva\- mIshaM daridramatha ja~Ngamamapyali~Ngam | vishvaM vichitramavilakShaNavIkShaNena vikShobhayasyanavadhirbata shaktiraishI || 55|| rUpaprakAra pariNAmakR^itavyavasthaM vishvaM viparyasitumanyadasachchakartum | kShAmyan svabhAvaniyamaM kimudIkShase tvaM svAtantryamaishvaramaparyanuyojyamAhuH || 56|| saMvartasambhR^itakarasya sahasrarashme\- rusraM tamisrayadajasravihArahAri | nityAnukUlamanukUlanR^iNAM pareShA\- mudvejanaM cha tava teja udAharanti || 57|| naiva hyavApyamanavAptamihAsti yasya sattA.api tasya tava vIkShaNataH prajAnAm | sampattu kiM punarito na vadAnyamanyaM manye tvameva khalu mandiramindirAyAH || 58|| pApai ranAdibhavasambhavavAsanotthai\- rduHkheShu yaH khalu mima~NkShati hanta jantuH | taM kevalaM nu kR^ipayaiva samuddhariShyan tadduShkR^itasya nanu niShkR^itimAttha shAstraiH || 59|| shAstrairanAdinidhanaiH smR^itibhistvadIya\- divyAvatAracharitaishshubhayA cha dR^iShTyA | niHshreyasaM yadupakalpayasi prajAnAM sA tvatkR^ipAjaladhitallajavalgitashrIH || 60|| hai hanta jantuShu nirantarasantatAtmA pApmA hi nAma vada ko.ayamachintyashaktiH | yastvatkR^ipAjaladhimapyativelaravela\- mulla~NghayatyakR^itabhAsurabhAgadheyAn || 61|| yadbrahmakalpaniyatAnubhave.apyanAshyaM tatkilbiShaM sR^ijati janturiha kShaNArdhe | evaM sadA sakalajanmasu sAparAdhaM kShAmyasyaho tadabhisandhivirAmamAtrAt || 62|| kShAntistaveyamiyatI mahatI kathannu muhyedaho tvayi kR^itA~njalipa~njareShu | itthaM svato nikhilajantuShu nirvisheShaM vAtsalyamutsakajaneShu kathaM guNaste || 63|| vishvaM dhiyaiva virachayya nichAyya bhUya\- ssa~njahruShassati samAshritavatsalatve | AjagmuShastava gajottamabR^iMhitena pAdaM parAmamR^ishuSho.api cha kA manIShA || 64|| yaH kashchideva yadi ki~nchana hanta jantu\- rbhavyo bhajeta bhagavantamananyachetAH | taM so.ayamIdR^isha iyAniti vApyajAnan hai vainateya sa mamApyurarIkaroShi || 65|| tvatsAmyameva bhajatAmabhivA~nChasi tvaM tvatsAtkR^itairvibhavarUpaguNaistvadIyaiH | muktiM tato.api paramaM tava sAmyamAhu\- stvaddAsyameva viduShAM paramaM mataM tat || 66|| tadvai tathA.astu katamo.ayamaho svabhAvo yAvAnyathAvidhaguNo bhajate bhavantam | tAvAMstathAvidhaguNastadadhInavR^ittiH saMshliShyase tvamiha tena samAnadharmA || 67|| shrIvaikuNThanAthamabhiShTauti \-\- nIlA~njanAdrinibhamunnasamAyatAkSha\- mAjAnujaitrabhujamAyatakarNapAsham | shrIvatsalakShaNamudAragabhIranAbhiM pashyema deva sharadashshatamIdR^ishaM tvAm || 68|| ambhoruhAkShamaravindanibhA~Nghriyugma\- mAtAmratAmarasaramyakarAgrakAntim | bhR^i~NgAlakaM bhramaravibhramakAyakAntiM pItAmbaraM vapuradastu vayaM stuvAma || 69|| bhrUvibhrameNa mR^idushItavilokitena mandasmitena madhurAkSharayA cha vAchA | premaprakarShapishunena vikAsinA cha sambhAvayiShyasi kadA mukhapa~Nkajena || 70|| vajrA~Nkushadhvajasaroruhasha~Nkhachakra\- matsyIsudhAkalashakalpakakalpitA~Nkam | tvatpAdapadmayugaLaM vigaLatprabhAbhi\- rbhUyo.abhiShekShyati kadA nu shiro madIyam || 71|| traivikrama kramakR^itAkramaNatrilokaM uttaMsamuttamamanuttamabhaktibhAjAm | nityaM dhanaM mama kadA hi maduttamA~Nga\- ma~NgIkariShyati chiraM tava pAdapadmam || 72|| unnidrapatrashatapatrasagotramanta\- rlekhArabindamabhinandanamindriyANAm | manmUrdhni hanta karapallavatallajaM te kurvankadA kR^itamanorathayiShyase mAm || 73|| A~NgI nisarganiyatA tvayi hanta kAnti\- rnityaM tavAlamiyameva tathA.api chAnyA | vaibhUShaNI bhavatiM kAntiralantarAM sA hai puShkalaiva nikhilA.api bhavaddhibhUtiH || 74|| shrIvatsakaustubhakirITalalATikAbhiH kehyahArakarakottamakarNikAbhiH | uddAmadAmamaNinUpura nIvibandhai\- rbhAntaM bhavantamanimeShamudIkShiShIya || 75|| aindIvarI kvachidapi kvachidAravindI chandrAtapI kvachana cha kvachanAtha haimI | kAntistavoDhaparabhAgaparasparashrIH pAryeta pAraNayituM kimu chakShuShorme || 76|| tvAM sevitaM jalajachakragadAsishAr~Ngai\- stArkShyeNa sainyapatinA.anucharaistathA.anyaiH | devyA shriyA saha vasantamanantabhoge bhu~njIya sA~njalirasa~NkuchitAkShipakShmA || 77|| kai~Nkaryanityaniratairbhavadekabhogai\- rnItyairanukShaNanavInarasArdrabhAvaiH | nityAbhivA~nChitaparasparanIchabhAvai\- rmaddaivataiH parijanastava sa~NgamIya || 78|| yatki~nchidujjalamidaM yadupAkhyayA.a.ahuH saundaryamR^iddhiriti yanmahimAMshaleshaiH | nAmnaiva yAM shriyamushanti yadIyadhAma tvAmAmananti yatamAyatamAnasiddhiH || 79|| yA cha tvayApyudadhimanthanayatnalabhyA yAntarhiteti jagadunmathanodyato.abhUH | yA cha pratikShaNamapUrvarasAnubandhai\- rbhavairbhavantamabhinandayate sadaiva || 80|| rUpashriyA guNagaNairvibhavena dhAmnA bhAvairudAramadhuraishchaturaishcharitraiH | nityaM tavaiva sadR^ishIM shriyamIshvarIM tvAM tvAM chA~nchitaH parichareyamudIrNabhAvaH || 81|| yA bibhratI sthiracharAtmakameva vishvaM vishvambharA paramayA kShamayA kShamA cha | tAM mAtaraM cha pitaraM cha bhavantamasya vyu~nChantu rAtraya imA varivasyato me || 82|| bhAvairudAramadhurairvividhairvilAsaiH bhrUvibhramasmitakaTAkShanirIkShaNaishcha | yA tvanmayI tvamapi yanmaya eva sA mAM nIlA nitAntamurarIkurutAmudArA || 83|| bhAvairanukShaNamapUrvarasAnuviddhai\- ratyadbhutairabhinavairabhinandya devIH | bhR^ityAn yathochitaparichChadino yathArhaM sambhAvayantamabhito bhagavan bhaveyam || 84|| hA hanta hanta hatako.asmi khalo.asmi dhi~NmAM muhyannaho ahamidaM kimuvAcha vAchA | tvAma~Nga ma~NgaLaguNAspadamastaheya mA smartumeva kathamarhati mAdR^igaMhaH || 85|| aMhaH prasahya vinigR^ihya vishodhya buddhiM vyApU(dhU)ya vishvamashivaM januShA.anubaddham | AdAya sadguNagaNAnapi nAhamarha\- stvatpAdayoryadahamatra chiraM nimagnaH || 86|| jAne.athavA kimahama~Nga yadeva sa~NgA\- da~NgIkaroShi na hi ma~NgalamanyadasmAt | tena tvamena murarIkuruShe janaM che\- nnaivAmuto bhavati yuktataro hi kashchit || 87|| yannAbhavAma bhavadIyakaTAkShalakShaM saMsAragartaparivartamato.agamAma | AgAMsi ye khalu sahasramajasrameva janmasvatanmahi kathaM ta ime.anukampyAH || 88|| satkarma naiva kila ki~nchana sa~nchinomi vidyApyavadyarahitA cha tu vidyate me | ki~ncha tvada~nchitapadAmbujabhaktihInaH pAtraM bhavAmi bhagavan bhavato dayAyAH || 89|| kiM bhUyasA pralapitena yadeva ki~nchi\- tpApAhvamalpamuru vA tadasheShameShaH | jAnanna vA shatasahasraparArdhakR^itvo yo.akArShamenamagatiM bhagavan kShamasva || 90|| deva tvadIyacharaNapraNayapravINa rAmAnujArya viShayIkR^itamapyaho mAm | bhUyaH pradharShayati vaiShayiko vimoho matkarmaNaH kataradatra samAnasAram || 91|| garbheShu nirbharanipIDanakhinnadehaH kShodIyaso.atimahato.apyakhilasya jantoH | janmAntarANyanuvichintya parassahasrA\- NyatrAhamapratividhirnihatashcharAmi || 92|| bhUyashcha janmasamayeShu sudurvachAni duHkhAni duHkhamatirichya kimapyajAnan | mUDho.anubhUya punareva tu bAlabhAvaM duHkhottaraM nijacharitramamutra seve || 93|| bhUyAMsi bhUya upayanvividhAni duHkhA\- nyanyachcha duHkhamanubhUya sukhabhrameNa | duHkhAnubandhamapi duHkhavimishramalpaM kShudraM jugupsitasukhaM sukhamityupAse || 94|| loladbhirindriyahayairapatheShu nIto dupprApadurbhagamanorathamathyamAnaH | vidyAdhanAbhijanajanmamadena kAma\- krodhAdibhishcha hatadhIrna shamaM prayAmi || 95|| labhyeShu durlabhatareShvapi vA~nChiteShu jAte sahasraguNataH pratilambhane.api | vighnairhate.apyapi cha teShusamUlaghAtaM vardhiShNureva na tu shAmyati hanta tR^iShNA || 96|| tvatkIrtanastutinamaskR^itibedaneShu shraddhA na bhaktirapi shaktiratho na chechChA | naivAnutApamatireShvakR^iteShu kinnu bhUyAnaho parikaraH pratikUlapakShe || 97|| etena vai suviditaM bata mAmakIna\- daurAtmyamapratividheyamapAramIsha | sammUrchChato.apyapadamasmi yatastvadIya nissImabhUma karuNAmR^itavIchivAyoH || 98|| aishvaryavIryakaruNAgarimakShamAdyAH svAminnakAraNasuhR^ittvamatho visheShAt | sarve guNAssaviShayAstava mAmapAra\- ghorAghapUrNamagatiM nihataM sametya || 99|| tvatpAdasaMshrayaNahetuShu sAdhikArA\- nudyu~njatashcharitakR^itsnavidhIMshcha tAMstAn | tvaM rakShasIti mahimA tava nAlameShA mAM chedanIdR^ishamananyagatiM na rakShe || 100|| yA karmaNAmadhikR^itirya ihodyamaste eShvapyanuShTitirasheShamidaM hi puMsAm | tvAmantareNa na katha~nchana shakyamAptuM evaM tu teShu mayi chAsti na te visheShaH || 101|| nirbandha eSha yadi te yadasheShavaidha saMsevino varada rakShasi netarAMstvam | tarhi tvameva mayi shaktyadhikAravA~nChAH pratyUhashAntimitarachcha vidhehi vishvam || 102|| vyaktIkurvannigamashirasAmarthamantarnigUDhaM shrIvaikuNThastutimakR^ita yashshreyase sajjanAnAm | kUrAdhIshaM gurutaradayA dugdhasindhuM tamIDe shrIvatsA~NgaM shrutimataguruchChAtrashIlaikadhAma || 103|| iti vaikuNThastavaH sampUrNaH | ## Proofread by PSA Easwaran \medskip\hrule\obeylines Please send corrections to sanskrit at cheerful dot c om Last updated \today https://sanskritdocuments.org \end{document}