% Text title : varadarAjapanchAshat % File name : varadarAjapanchAshat.itx % Category : vishhnu, panchAshata, vedAnta-deshika, vishnu % Location : doc\_vishhnu % Author : vedAntadeshika % Proofread by : PSA Easwaran psawaswaran % Description/comments : Edited by S. V. Radhakrishna Shastriji % Acknowledge-Permission: Mahaperiaval Trust % Latest update : May 13, 2018 % Send corrections to : sanskrit at cheerful dot c om % % This text is prepared by volunteers and is to be used for personal study % and research. The file is not to be copied or reposted for promotion of % any website or individuals or for commercial purpose without permission. % Please help to maintain respect for volunteer spirit. % \documentstyle[11pt,multicol,itrans]{article} #include=ijag.inc #endwordvowel=.h \portraitwide \parindent=100pt \let\usedvng=\Largedvng % for 1 column \pagenumbering{itrans} \def\engtitle#1{\hrule\medskip\centerline{\LARGE #1}} \def\itxtitle#1{\medskip\centerline{\LARGEdvng #1}\medskip\hrule} \def\endtitles{\medskip\obeyspaceslines} %% \begin{document} \engtitle{.. Varadarajapanchashat ..}## \itxtitle{.. varadarAjapa~nchAshat ..}##\endtitles ## vedAntadeshikakR^ita (kA~nchyAm) dviradashikharisImnA sadmavAn padmayoneH turagasavanavedyAM shyAmalo havyavAhaH | kalashajaladhikanyA vallarI kalpashAkhI kalayatu kushalaM naH ko.api kAruNyarAshiH || 1|| yasyAnubhAvamadhigantumashaknuvanto muhyantyabha~Nguradhiyo munisArvabhaumAH | tasyaiva te stutiShu sAhasamashnuvAnaH kShantavya eSha bhavatA karishailanAtha || 2|| jAnannanAdivihitAnaparAdhavargAn svAmin bhayAtkimapi vaktumahaM na shaktaH | avyAjavatsala tathApi nira~NkushaM mAM vAtsalyameva bhavato mukharIkaroti || 3|| kiM vyAharAmi varada stutaye kathaM vA khadyotavatpralaghu sa~NkuchitaprakAshaH | tanme samarpaya matiM cha sarasvatIM cha tvAma~njasA stutipadairyadahaM dhinomi || 4|| machChaktimAtragaNane kimihAsti shakyaM shakyena vA tava karIsha kimasti sAdhyam | yadyasti sAdhaya mayA tadapi tvayA vA kiM vA bhavedbhavati ki~nchidanIhamAne || 5|| stotraM mayA virachitaM tvadadhInavAchA tvatprItaye varada yattadidaM na chitram | Avarjayanti hR^idayaM khalu shikShakANAM ma~njUni pa~njarashakuntavijalpatAni || 6|| yaM chakShuShAmaviShayaM hayamedhayajvA drAghIyasA sucharitena dadarsha vedhAH | taM tvAM karIsha karuNApariNAmataste bhUtAni hanta nikhilAni nishAmayanti || 7|| tattatpadairupahite.api tura~Ngamedhe shakrAdayo varada pUrvamalabdhabhAgAH | adhyakShite makhapatau tvayi chakShuShaiva hairaNyagarbha haviShAM rasamanvabhUvan || 8|| sargasthitipralayavibhramanATikAyAM shailUShavadvividhaveShaparigrahaM tvAm | sambhAvayanti hR^idayena karIsha dhanyAH saMsAravArinidhisantaraNaikapotam || 9|| prAptodayeShu varada tvadanupraveshAt padmAsanAdiShu shivAdiShu ka~nchukeShu | tanmAtradarshanavilobhitashemuShIkAH tAdAtmyamUDhamatayo nipatantyadhIrAH || 10|| madhye viri~nchishivayorvihitAvatAraH khyAto.api tatsamatayA tadidaM na chitram | mAyAvashena makarAdi sharIriNaM tvAM tAneva pashyati karIsha yadeSha lokaH || 11|| brahmeti sha~Nkara itIndra iti svarADi\- tyAtmeti sarvamiti sarvacharAcharAtman | hastIsha sarvavachasAmavasAnasImAM tvAM sarvakAraNamushantyanapAya vAchaH || 12|| AshAdhipeShu girisheShu chaturmukheShva\- pyavyAhatA vidhi niShedhamayI tavAj~nA | hastIsha nityamanupAlanala~NghanAbhyAM puMsAM shubhAshubhamayAni phalAni sUte || 13|| trAtApadi sthitipadaM bharaNaM prarohaH ChAyA karIsha sarasAni phalAni cha tvam | shAkhAgatatridashavR^indashakuntakAnAM kiM nAma nAsi mahatAM nigamadrumANAm || 14|| sAmAnyabuddhijanakAshcha sadAdishabdAH tattvAntarabhramakR^itashcha shivAdi vAchaH | nArAyaNe tvayi karIsha vahantyananyam anvarthavR^ittiparikalpitamaikakaNThyam || 15|| sa~nchintayantyakhilaheyavipakShabhUtaM shAntoditaM shamavatA hR^idayena dhanyAH | nityaM paraM varada sarvagataM susUkShmaM niShpandanandathumayaM bhavataH svarUpam || 16|| vishvAtishAyi sukharUpa yadAtmakastvaM vyaktiM karIsha kathayanti tadAtmakAM te | yenAdhirohati matistvadupAsakAnAM sA kiM tvameva tava veti vitarkaDolAm || 17|| mohAndhakAravinivartanajAgarUke doShA divApi niravagrahamedhamAne | tvattejasi dviradashailapate vimR^iShTe shlAghyeta santamasaparvasahasrabhAnoH || 18|| rUDhasya chinmayatayA hR^idaye karIsha stambAnukAri pariNAmavisheShabhAjaH | sthAneShu jAgrati chaturShvapi sattvavantaH shAkhAvibhAgachature tava chAturAtmye || 19|| nAgAchalesha nikhilopaniShanmanIShA ma~njUShikAmarakataM parichinvatAM tvAm | tanvI hR^idi sphurati kApi shikhA munInAM saudAminIva nibhR^itA nava meghagarbhA || 20|| audanvate mahati sadmani bhAsamAne shlAghye cha divyasadane tamasaH parastAt | antaHkalevaramidaM suShiraM susUkShmaM jAtaM karIsha kathamAdaraNAspadaM te || 21|| bAlAkR^itervaTapalAshamitasya yasya brahmANDamaNDalamabhUdudaraikadeshe | tasyaiva tadvarada hanta kathaM prabhUtaM vArAhamAsthitavato vapuradbhutaM te || 22|| bhaktasya dAnavashishoH paripAlanAya bhadrAM nR^isiMha kuhanAmadhijagmuShaste | stambhaikavarjamadhunApi karIsha nUnaM trailokyametadakhilaM narasiMhagarbham || 23|| krAman jagatkapaTavAmanatAmupetaH tredhA karIsha sa bhavAn nidadhe padAni | adyApi jantava ime vimalena yasya pAdodakena vidhR^itena shivA bhavanti || 24|| yenAchalaprakR^itinA ripusa~NkShayArthI vArAM nidhiM varada pUrvamala~Nghayastvam | taM vIkShya setumadhunApi sharIravantaH sarve ShaDUrmibahulaM jaladhiM taranti || 25|| itthaM karIsha durapahnavadivyabhavya\- rUpAnvitasya vibudhAdi vibhUtisAmyAt | kechidvichitracharitAn bhavato.avatArAn satyAn dayAparavashasya vadanti santaH || 26|| saushIlyabhAvitadhiyA bhavatA katha~nchit sa~nChAditAnapi guNAn varada tvadIyAn | pratyakShayantyavikalaM tava sannikR^iShTAH patyustviShAmiva payodavR^itAn mayUkhAn || 27|| nityaM karIsha timirAviladR^iShTayo.api siddhA~njanena bhavataiva vibhUShitAkShAH | pashyantyuparyupari sa~ncharatAmadR^ishyaM mAyAnigUDhamanapAya mahAnidhiM tvAm || 28|| sadyastyajanti varada tvayi baddhabhAvAH paitAmahAdiShu padeShvapi bhAvabandham | kasmai svadeta sukhasa~ncharaNotsukAya kArAgR^ihe kanakashR^i~NkhalayA.api bandhaH || 29|| hastIsha duHkhaviShadigdhaphalAnubandhi\- nyAbrahmakITamaparAhatasamprayoge | duShkarmasa~nchayavashAdduratikrame naH pratyastrama~njalirasau tava nigrahAstre || 30|| tvadbhaktipotamavalambitumakShamANAM pAraM paraM varada gantumanIshvarANAm | svairaM lila~NghayiShatAM bhavavArirAshiM tvAmeva gantumasi seturabha~Ngurastvam || 31|| ashrAntasaMsaraNadharmanipIDitasya bhrAntasya me varada bhogamarIchikAsu | jIvAturastu niravagrahamedhamAno deva tvadIyakaruNAmR^itadR^iShTipAtaH || 32|| antaHpravishya bhagavannakhilasya jantoH AseduShastava karIsha bhR^ishaM davIyAn | satyaM bhaveyamadhunApi sa eva bhUyaH svAbhAvikI tava dayA yadi nAntarAyaH || 33|| aj~nAtanirgamamanAgamavedinaM mAM andhaM na ki~nchidavalambanamashnuvAnam | etAvatIM gamayituH padavIM dayAloH sheShAdhvalesha nayane ka ivAtibhAraH || 34|| bhUyo.api hanta vasatiryadi me bhavitrI yAmyAsu durviShahavR^ittiShu yAtanAsu | samyagbhaviShyati tataH sharaNAgatAnAM saMrakShiteti birudaM varada tvadIyam || 35|| paryAkulaM mahati duHkhapayonidhau mAM pashyan karIsha yadi joShamavasthitastvam | sphArekShaNe.api miShati tvayi nirnimeShaM pAre kariShyati dayA tava durnivArA || 36|| kiM vA karIsha kR^ipaNe mayi rakShaNIye dharmAdi bAhyasahakArigaveShaNena | nanvasti vishvaparipAlanajAgarUkaH sa~Nkalpa eva bhavato nipuNaH sahAyaH || 37|| niryantraNaM pariNamanti na yAvadete nIrandhraduShkR^itabhavA duritaprarohAH | tAvanna chettvamupagachChasi shAr~NgadhanvA shakyaM tvayApi na hi vArayituM karIsha || 38|| yAvanna pashyati nikAmamamarShaNo mAM bhrUbha~NgabhIShaNakarAlamukhaH kR^itAntaH | tAvatpatantu mayi te bhagavan dayAloH unnidrapadmakalikA madhurAH kaTAkShAH || 39|| sa tvaM sa eva rabhaso bhavadaupavAhyaH chakraM tadeva shitadhAramahaM cha pAlyaH | sAdhAraNe tvayi karIsha samastajantoH mAta~NgamAnuShabhidA na visheShahetuH || 40|| nirvApayiShyati kadA karishailadhAman durvArakarmaparipAkamahAdavAgnim | prAchInaduHkhamapi me sukhayanniva tvat pAdAravindaparichArarasapravAhaH || 41|| muktaH svayaM sukR^itaduShkR^itashR^i~NkhalAbhyAM archirmukhairadhikR^itairativAhitAdhvA | svachChandaki~NkaratayA bhavataH karIsha svAbhAvikaM pratilabheya mahAdhikAram || 42|| tvaM chetprasIdasi tavAsmi samIpatashchet tvayyastabhaktiranaghA karishailanAtha | saMsR^ijyate yadi cha dAsajanastvadIyaH saMsAra eSha bhagavannapavarga eva || 43|| AhUyamAnamanapAyavibhUtikAmaiH AlokaluptajagadAndhyamanusmareyam | AlohitAMshukamanAkulahetijAlaM hairaNyagarbhahayamedhahavirbhujaM tvAm || 44|| bhUyo bhUyaH pulakanichitaira~NgakairedhamAnAH sthUlasthUlAn nayanamukulairbibhrato bAShpabindUn | dhanyAH kechidvarada bhavataH saMsadaM bhUShayantaH svAntairantarvinayanibhR^itaiH svAdayante padaM te || 45|| varada tava vilokayanti dhanyAH marakatabhUdhara mAtR^ikAyamANam | vyapagataparikarmavAravANaM mR^igamadapa~NkavisheShanIlama~Ngam || 46|| anibhR^itaparirambhairAhitAmindirAyAH kanakavalayamudrAM kaNThadeshe dadhAnaH | phaNipatishayanIyAdutthitastvaM prabhAte varada satatamantarmAnasaM sannidheyAH || 47|| turagavihagarAjasyandanAndolikAdi\- ShvadhikamadhikamanyAmAtmashobhAM dadhAnam | anavadhikavibhUtiM hastashaileshvaraM tvAM anudinamanimeShairlochanairnirvisheyam || 48|| nirantaraM nirvishatastvadIyamaspR^iShTachintApadamAbhirUpyam | satyaM shape vAraNashailanAtha vaikuNThavAse.api na me.abhilAShaH || 49|| vyAtanvAnA taruNatulasIdAmabhiH svAmabhikhyAM mAta~NgAdrau marakataruchiM puShNatI mAnase naH | bhogaishvaryapriyasahacharaiH kApi lakShmIkaTAkShaiH bhUyaH shyAmA bhuvanajananI devatA sannidhattAm || 50|| iti vihitamudAraM ve~NkaTeshena bhaktyA shrutisubhagamidaM yaH stotrama~NgIkaroti | karishikhari viTa~NkasthAyinaH kalpavR^ikShAt bhavati phalamasheShaM tasya hastApacheyam || 51|| iti vedAntadeshikakR^ita varadarAjapa~nchAshat samAptA | ## Proofread by PSA Easwaran \medskip\hrule\obeylines Please send corrections to sanskrit@cheerful.com Last updated \today https://sanskritdocuments.org \end{document}