% Text title            : Varadarajastavah
% File name             : varadarAjastavaH.itx
% Category              : vishhnu
% Location              : doc\_vishhnu
% Proofread by          : Aruna Narayanan narayanan.aruna at gmail.com
% Description/comments  : Ramanuja Stotramala
% Latest update         : November 23, 2019
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Varadaraja Stavah ..}##
\itxtitle{.. varadarAjastavaH ..}##\endtitles ##
pa~nchastavyAM 4 varadarAjastavaH
shrIvatsachihnamishrebhyo nama uktimadhImahe |
yaduktayastrayIkaNThe yAnti ma~Ngala sUtratAm ||
svasti hastigirimastashekharassantanotu mayi santataM hariH |
nissamAbhyadhikamabhyadhatta yaM devamaupaniShadI sarasvatI || 1||
shrInidhiM nidhimapAramarthinAmarthitArthaparidAnadIkShitam |
sarvabhUtasuhR^idaM dayAnidhiM devarAjamadhirAjamAshraye || 2||
nityamindriyapathAtigaM maho yoginAmapi sudUragaM dhiyaH |
apyanushravashirassu durgrahaM prAdurasti karishailamastake || 3||
vallikA shrutimatamallikAmayI yena pallavitavishvashAkhayA |
svashriyA karigireranukriyAM vaShTi mR^iShTavaradaM tamAshraye || 4||
yaM parokShamupadeshatastrayI neti neti paraparyudAsataH |
vakti yastamaparokShamIkShayatyeSha taM karigiriM samAshraye || 5||
eSha Isha iti nirNayaM trayI bhAgadheyarahiteShu no dishet |
hastidhAmani na nirNayeta ko devarAjamayamIshvarastviti || 6||
hai! kudR^iShTyabhiniviShTachetasAM nirvisheShasavisheShatAshrayam |
saMshayaM karigirirnudatyasau tu~Ngama~NgalaguNAspade harau || 7||
nyAyatarkamunimukhyabhAShitaishshodhitaissaha katha~nchana trayI |
joShayeddharimanaMhaso janAn hastidhAma sakalaM janaM svayam || 8||
adbhutaM mahadasImabhUmakaM ki~nchidasti kila vastu nistulam |
ityaghoShi yadidaM tadagratastathyameva karidhAmni dR^ishyate || 9||
saMvadeta kila yatpramAntairastapramANamiti ye hi menire |
tanmate.api kila mAnatAM gatA hastinA.adya paravastuni trayI || 10||
guNAyattaM loke guNiShu hi mataM ma~NgalapadaM
     viparyastaM hastikShitidharapate ! tattvayi punaH |
guNAssatyaj~nAnaprabhR^itaya uta tvadgatatayA
     shubhIbhUyaM yAtA iti hi niraNaiShma shrutivashAt || 11||
nirAbAdhaM nityaM niravadhi niraMho nirupamaM
     sadA shAntaM shuddhaM pratibhaTamavadyasya satatam |
paraM brahmAmnAtaM shrutishirasi yat tadvarada ! te
     paraM rUpaM sAkShAttadidamapadaM vA~NmanasayoH || 12||
prashAntAnantAtmAnubhavajamahAnandamahima\-
     prasaktastaimityAnukR^itavitara~NgArNavadasham |
paraM yatte rUpaM svasadR^ishadaridraM varada ! tat
     trayI pisprakShantI paranirasane shrAmyati param || 13||
na vaktuM na shrotuM na manitumathopAsisiShituM
     na cha draShTuM spraShTuM tadanu na cha bhoktuM hi sUshakam |
paraM yadvastUktaM nanu varada ! sAkShAttadasi bhoH !
     kathaM vishvasmai tvaM karigiripurastiShThasa iha || 14||
prakR^iShTaM vij~nAnaM balamatulamaishvaryamakhilaM
     vimaryAdaM vIryaM varada ! paramA shaktirapi cha |
paraM tejashcheti pravaraguNaShaTkaM prathamajaM
     guNAnAM nissImnAM gaNanaviguNAnAM prasavabhUH || 15||
guNaiH ShaDbhistvetaiH prathamataramUrtistava babhau
     tatastisrasteShAM triyuga ! yugalairhi tribhirabhuH |
vyavasthA yA chaiShA nanu varada ! sA.a.aviShkR^itivashAt
     bhavAn sarvatraiva tvagaNitamahAma~NgalaguNaH || 16||
iyaM vaiyUhI vai sthitiratha kilechChAvihR^itaye
     vibhUtInAM madhye suranaratirashchAmavataran |
sajAtIyasteShAmiti tu vibhavAkhyAmapi bhajan
     karIsha ! tvaM pUrNo varaguNagaNaistAn sthagayasi || 17||
paro vA vyUho vA vibhava uta vA.archAvitaraNo
     bhavan vA.antaryAmI varavarada ! yo yo bhavasi vai |
sa sa tvaM sannaishAn varaguNagaNAn bibhradakhilAn
     bhajadbhyo bhAsyevaM satatamitarebhyastvitarathA || 18||
dayAkShAntyaudAryamradimasamatAsauhR^idadhR^iti
     prasAdapremAj~nAshritasulabhatAdyA varaguNAH |
tathA saundaryAdyAstava varadarAjottamaguNAH
     visImAno.asa~NkhyAH praNatajanabhogaM prasuvate || 19||
ananyAdhInatvaM tava kila jagurvaidikagiraH
     parAdhInaM tvAM tu praNataparatantraM manumahe |
upAlambho.ayaM bhoH ! shrayati bata sArvaj~nyamapi te
     yato doShaM bhakteShviha varada ! naivAkalayasi || 20||
pANipAdavadanekShaNashabdaiH
     ambujAnyapadishan varada ! tvam |
bAhubhistvativishAlatamAlAn
          A~njanaM karigirerasi shR^i~Ngam || 21||
tvAmudArabhujamunnasamAyatkarNapAshaparikarmasadaMsam |
AyatAkShamabhijAtakapolaM pAraNIyati varaprada ! dR^i~Nme || 22||
nIlameghanibhama~njanapu~njashyAmakuntalamanantashayaM tvAm |
abjapANipadamambujanetraM netrasAtkuru karIsha ! sadA me || 23||
tvakcha dR^ikcha nipipAsati jihvA
     vihvalA shravaNavatparavR^ittau |
nAsikA tvayi karIsha ! tatheti
     prApnuyAM kathamimAM svidavasthAm || 24||
AdhirAjyamadhikaM bhuvanAnAM
     Isha ! te pishunayan kila mauliH |
chUlikAmaNisahasramarIcheH
          hastibhUShaNa ! bhavatyudayAdriH || 25||
uddharatyupari bhaktajanAnityUrdhvatAshrayaNasUchitashaktim |
UrdhvapuNDratilakaM bahumAnAt kiM bibharShi varada ! svalalATe || 26||
karNikA tava karIsha ! kimeShA
     karNabhUShaNamutAMsavibhUShA |
aMsalambyalakabhUShaNamAho !
     mAnasasya mama vA parikarma || 27||
pArijAtaviTapAnabhito yA
     puShpasampadudiyAt karinAtha |
tAM viDambayati tAvakabAhuShu
     AtatA tu kaTakA~NgadalakShmIH || 28||
mathyamAnachalaphenilasindhu
     protthitikShaNadashAM gamitau te |
vakShasi sphuritamauktikahAre
     kaustubhashcha kamalA cha karIsha ! || 29||
a~njanakShitibhR^ito yadi nAma
     upatyakA varada ! hemamayI syAt |
tAdR^ishI tava vibhAti tu lakShmIH
     AmbarI bata viDambitavidyut || 30||
parabhAgamiyAdravestamisrA
     varadAdya tvayi tannishAmayAmaH |
gamitA tava vaktrachitrabhAnoH
     parabhAgaM nanu kauntalI tamisrA || 31||
ubhayorapi pakShayostithiryA
     viShamIbhAvanirAsadA.aShTamIti |
upamAnajasampade hi sendoH
     varadAbhUdbhavato lalATalakShmyA || 32||
alakAlichikIrShayA kilAttA
     suparIchikShiShayA lalATapaTTe |
sumaShI nikaShIkR^itA bhruvau te
     varada ! syAdakR^itatvatastu naivam || 33||
shravasashcha dR^ishashcha shabdarUpagrahaNe te na hi jIvavadvyavasthA |
ubhayorakhilekShaNakShamatvAdvaradAtaH ! shravaNAshraye dR^ishau te || 34||
karuNArasavAhivIkShaNormervarada ! premamayapravAhabhAjaH |
tatatIravanAvalI bhruvau dR^ikchalasindhostava nAsikeva setuH || 35||
vibhavaM vivR^iNoti vistR^iNIte
     ruchamAviShkurute kR^ipAmapArAm |
abhivarShati harShamArdrabhAvaM
     tanute te varadaiSha dR^iShTipAtaH || 36||
aruNAdharapallave lasantI
     varadAsau dvijachandrachandrikA te |
adhividrumamastanistalAlI
     ruchamAviShkurute hi puShkarAkSha ! || 37||
smitanirjharikA viniShpatantI
     tava vakShaHsthalabhUtale vikIrNA |
varada ! prabibharti hAralakShmIM
          api muktAvalikA nadIva tajjA || 38||
parimaNDitarAsamaNDalAbhirvaradAghrAtaM abhIShTagopikAbhiH |
anuvartitadAtanapraharShAdiva phullaM hi kapolayoryugaM te || 39||
mukhamunnasamAyatAkShamudyatsmitadantaM ruchirAdharaM natabhru |
lasadaMsavilambikarNapAshaM mayi te nishchalamastu hastinAtha ! || 40||
padmAyAH praNayarasAtsamAsajantyAH
     svaM bAhuM subahumato bhujena tena |
kAM nAmAnvabhavadaho ! dashAM tadAtve
     kaNThaste karigirinAtha ! kambukAntaH || 41||
sAyAmA dhR^itapariNaddhayo.abdhayo vA
     tAdR^ishyaH sphuTamathavA dishashchatasraH |
chatvAro varada ! varapradAstvadIyAH
     bhAsante bhujaparighAstamAlanIlAH || 42||
AshleShe varada ! bhujAstavendirAyAH
     gopInAmabhimatarAsabandhane vA |
bandhe vA mudamadhikAM yashodayA.aho !
     sa.nprAptAstava navanItamoShadoShAt || 43||
sAlIyA iva viTapAssapallavAgrAH
     kallolA iva jaladhessavidrumAgrAH |
bhogIdrA iva cha phaNAmaNIddhavaktrAH
     bhAsante varada ! bhujAstavAruNAgrAH || 44||
ambhodhessvayamabhimanthanaM chakartha
     kShoNIdhraM punarabibhashcha saptarAtram |
saptAnAM vivalayasi sma kaNThamukShNAmamlAnA
     varada ! tathA.api pANayaste || 45||
ri~NkhAto vrajasadanA~NgaNeShu kiM te
     goyaShTigrahaNavashAnnu gopagoShThyAm |
AlambAddhayanayasUtratottrayorvA
     pANInAM varada ! tavAruNatvamAsIt || 46||
sarvaj~nAssamuchitashaktayassadaiva
     tvatsevAniyamajuShastvadekabhogAH |
hetInAmadhipatayassadA kimetAn
     shobhArthaM varada ! bibharShi harShato vA || 47||
kiM dhAturgaganavidhAnamAtR^ikA.abhUt
     vakShaste varada ! vareNya ! yatra nAma |
padmAyA mukhamatha kaustubhashcha jAtau
     chandrArkAvuDunikarAyate tu hAraH || 48||
aNDAnAM tvadudaramAmananti santaH
     sthAnaM tadvarada ! kathaM nu kArshyamasya |
mAhAtmyaM svasa iha yeShu nUnameShAM
     R^iddhissyAnmahimakarI na hItareShAm || 49||
saundaryAmR^itarasavAhavegajassyAt
     Avartastava kila padmanAbha ! nAbhiH |
tatpadmaM varada ! vibhAti kAntimayyAH
     lakShmyAste sakalavapurjuSho nu sadma || 50||
yA dAmodara iti nAmadA tavAsIt
     sA dAmA kila kiNakAriNI babhUva |
tannUnaM varada ! valitrayachChalena
     tvanmadhyaprathamavibhUShaNI babhUva || 51||
yAdR^igbIjAdhyuShitabhuvi yadvastu hastIsha ! jAtaM
     tattAdR^ikShaM phalati hi phalaM tvayyapIkShAmahe tat |
yasmAdaNDAdhyuShita udare tAvake jAyamAnaM
     padmaM padmAnana ! kila phalatyaNDaShaNDAnakhaNDAn || 52||
aj~ne yaj~neshvara ! kila jane kvApyadarshaM vimarshaM
     vishvAdhIshaH katama iti tannirNayaM varNayAmaH |
vyAvakroshI nR^iShu samuditA yAnupAshritya te.api
     brahmAdyAste varada ! janitAstundakandAravinde || 53||
muShNan kR^iShNaH priyanijajanairjayyahaiya~NgavInaM
     dAmnA bhUmnA varada ! hi yayA tvaM yashodAkarAbhyAm |
baddho bandhakShapaNakaraNIM tAM kilAdyApi mAtuH
     premNA gAtrAbharaNamudarAbandhanAkhyaM bibharShi || 54||
saundaryAkhyA saridurasi vistIrya madhyAvaruddhA
     sthAnAlpatvAdviShamagatijAvartagartAbhanAbhiH |
prApya prAptaprathima jaghanaM vistR^itA hastinAtha !
     srotobhedaM bhajati bhavataH pAdadeshApadeshAt || 55||
rambhAstambhAH karivarakarAH kArabhAssArabhAjo
     veShAshleShA api maratakastambhamukhyAstulAkhyAH |
sAmyaM samyagvarada ! na dadhussarvamurvostvadUrvoH
     na hyaishvaryaM dadhati na tathA yauvanArambhajR^imbhAH || 56||
yA te gAtre varada ! janitA kAntimayyApagA.abhUt
     tasyAssrotoyugalamiha yadyAti pAdapravAdam |
tajjAtordhvabhramiyugamivodbhAnunI jAnunI te
     syAdukShNorvA kakudayugalaM yauvanaishvaryanAmnoH || 57||
premNA.a.aghrAtuM karigirishiro.adhomukhIbhAvabhAjoH
     a~NghridvandvAhvayakamalayordaNDakANDAyamAne |
adrisparshodbhavasukhata utkaNTake romaharShAt
     draShTurdR^iShTirvarada ! kimalaM la~NghituM ja~Nghike te || 58||
bhaktAnAM yadvapuShi daharaM paNDitaM puNDarIkaM
     yachchAmlAnaM varada ! satatAdhyAsanAdAsanAbjam |
AmnAyAnAM yadapi cha shiro yashcha mUrdhA shaThAreH
     hastyadrervA kimatisukhadaM teShu pAdAbjayoste || 59||
padyAsvadyA~NguliShu varada ! prAntataH kAntisindhoH
     vIchIvIthIvibhavamubhayIShvambhaso lambhitAsu |
vindanninduH pratiphalanajAM sampadaM kiM padaM te
     ChAyAchChadmA nakhavitatitAM lambhitashshumbhitassan || 60||
shambhorambhoruhamukha ! sakhA san sahA~NkashshashA~NkaH
     kurvan sevAM varada ! vikalo vR^ittahInassuvakraH |
tvatpAdAbje priyamakha ! nakhachChadmanA.a.ashritya nityaM
     sadvR^itto.abhUtsa cha dashaguNaH puShkalo niShkala~NkaH || 61||
tvatpAdAbje prajAtA surasaridabhavatprAk chaturdhA tatastAsu
     ekAM dhatte dhruvassA tribhuvanamapunAttrInpatho bhAvayantI |
tatraikA khaM vrajantI shivayati tu shivaM sA punassaptadhA.abhUt
     tAsvekA gAM punAnA varada ! sagarajasvargasargaM chakAra || 62||
parijanaparibarhA bhUShaNAnyAyudhAni
     pravaraguNagaNAshcha j~nAnashaktyAdayaste |
paramapadamathANDAnyAtmadehastathA.a.atmA
     varada ! sakalametat saMshritArtha chakartha || 63||
anAptaM hyAptavyaM na tava kila ki~nchidvarada ! te
     jagajjanmasthemapralayavidhayo dhIvilasitam |
tathA.api kShodIyassuranarakuleShvAshritajanAn
     samAshleShTuM peShTuM tadasukhakR^itAM chAvatarasi || 64||
vivekadhiyamekato hyabhiniveshalesho haret
     mahattvabhiniveshanaM kimuta tanmahimnastava |
aho ! visadR^ishe jagatyavatatartha pArthAdikaM
     nijaM janamuda~nchayan varada ! taM samAshleShakaH || 65||
saMshleShe bhajatAM tvarAparavashaH kAlena saMshodhya tAn
     AnIya svapade svasa~NgamakR^itaM soDhuM vilambaM bata ! |
akShAmyan kShamiNAM varo varada ! sannatrAvatIrNo bhaveH
     kiM nAma tvamasaMshriteShu vitaran veShaM vR^iNIShe tu tAn || 66||
varada ! yadi na bhuvyavAtariShyaH
     shrutivihitAstvadupAsanArchanAdyAH |
karaNapathavidUrage sati tvayi
     aviShayatAnikR^itAH kilAbhaviShyan || 67||
yadaparAdhasahasramajasrajaM
     tvayi sharaNya ! hiraNya upAvahat |
varada !  tena chiraM tvamavikriyo
     vikR^itimarbhakanirbhajanAdagAH || 68||
tvAmAmananti kavayaH karuNAmR^itAbdhe !
     j~nAnakriyAbhajanalabhyamalabhyamanyaiH |
eteShu kena varadottarakosalasthAH
     pUrvaM sadUrvamabhajanta hi jantavastvAm || 69||
bhajatsu vAtsalyavashAt samutsukaH
     prakAmamatrAvatarervaraprada ! |
bhaveshcha teShAM sulabho.atha kinnvidaM
          yada~Nga dAmnA niyataH purA.arudaH || 70||
narasiMhatanuragauNI samasamayasamudbhavashcha bhaktagiraH |
stamme cha sambhavaste pishunayati pareshatAM varada ! || 71||
tApatrayImayadavAnaladahyamAnaM
     muhyantamantamavayantamananta ! naiva |
sthAtuM prayAtumupayAtumanIshamIsha !
     hastIsha ! dR^iShTyamR^itavR^iShTibhirAbhajethAH || 72||
nAnAviruddhavidishAsu dishAsu chAho
     vandhyairmanorathashatairyugapadvikR^iShTaH |
tvatpAdayoranuditaspR^iha eSha so.ahaM
     na svasti hastigirinAtha ! nishAmayAmi || 73||
hai ! nirbhayo.asmyavinayo.asmi yatastvada~Nghrau
     lipsAmalabdhavati chetasi durvinIte |
duShkarmavarmaparikarmita eSha so.ahaM
     agre varaprada ! tava pralapAmi ki~nchit || 74||
savyAdhirAdhiravituShTiraniShTayogaH
     svAbhIShTabha~njanamamarShakaro nikarShaH |
kR^intanti santatamimAni mano madIyaM
     hastIsha ! na tvadabhilAShanidhiprahANiH || 75||
vidveShamAnamadarAgavilobhamohAdi
     AjAnabhUmirahamatra bhave nimajjan |
nirdvandva ! nityaniravadyamahAguNaM tvAM
     hastIsha ! kashshrayitumIkShitumIpsituM vA || 76||
putrAdayaH kathamamI mayi saMsthite syuH
     ityapratikriyanirarthakachintanena |
dUye na tu svayamahaM bhavitA.asmi kIdR^ik
     ityasti hastigirinAtha ! vimarshaleshaH || 77||
shampAchalaM bahuladuHkhamanarthahetuH
     alpIya ityapi vimR^iShTiShu dR^iShTadoSham |
durvAsanAdraDhimatassukhamindriyotthaM
     hAtuM na me matiralaM varadAdhirAja ! || 78||
bud.hdhvA cha no cha vihitAkaraNairniShiddha\-
     saMsevanaistvadapachArashatairasahyaiH |
bhaktAgasAmapi shatairbhavatA.apyagaNyaiH
     hastIsha ! vAktanumanojanitairhato.asmi || 79||
tvaddAsyamasya hi mama svarasaprasaktaM
     tachchorayannayamahaM kila chaskhala prAk |
tvaM mAmakIna iti mAmabhimanyase sma
     hastIsha ! saMshayatha nastamimaM vivAdam || 80||
bhogA ime vidhishivAdipadaM cha ki~ncha
     svAtmAnubhUtiriti yA kila muktiruktA |
sarvaM tadUShajalajoShamahaM juSheya
     hastyadrinAtha !  tava dAsyamahArasaj~naH || 81||
viShayaviShadharavrajavyAkule
     jananamaraNanakrachakrAspade |
agatirasharaNo bhavAbdhau luThan
     varada ! sharaNamityahaM tvAM vR^iNe || 82||
akR^itasukR^itakassuduShkR^ittaraH
     shubhaguNalavaleshadeshAtigaH |
ashubhaguNaparassahasrAvR^ito
     varadamurudayaM gatiM tvAM vR^iNe || 83||
sharaNavaraNavAgiyaM yoditA
     na bhavati bata ! sA.api dhIpUrvikA |
iti yadi dayanIyatA mayyaho !
     varada ! tava bhavettataH prANimi || 84||
niravadhiShu kR^iteShu chAgassvaho !
     matiranushayinI yadi syAttataH |
varada ! hi dayase na saMshemahe
     niranushayadhiyo hatA hai ! vayam || 85||
sharaNavaraNavAgiyaM yA.adya me
     varada ! tadadhikaM na ki~nchinmama |
sulabhamabhimatArthadaM sAdhanaM
     tadayamavasaro dayAyAstava || 86||
viShayaviShayayiNI spR^ihA bhUyasI
     tava tu charaNayorna sA.alpApi me |
varada ! nanu bharastavaiva tvayaM
     yaduta tava padaspR^ihAjanma me || 87||
iyamiha matirasmadujjIvanI
     varada ! tava khalu prasAdAdR^ite |
sharaNamiti vacho.api me nodiyAt
     tvamasi mayi tataH prasAdonmukhaH || 88||
varada ! yadiha vastu vA~nChAmyahaM
     tava charaNalabhAvirodhastataH |	
yadi na bhavati tashcha dehi prabho !
     jhaTiti vitara pAdamevAnyathA || 89||
tadapi kimapi hanta ! durvAsanA\-
     shatavivashatayA yadabhyarthaye |
tadatuladaya ! sArva ! sarvaprada !
     pravitara varada ! kShamAmbhonidhe || 90||
priyamitaradathApi vA yadyathA
     vitarasi varada ! prabho ! tvaM hi me |
tadanubhavanameva yuktaM tu me
     tvayi nihitabharo.asmi so.ahaM yataH || 91||
yathA.asi yAvAnasi yo.asi yadguNaH
     karIsha ! yAdR^igvibhavo yadi~NgitaH |
tathAvidhaM tvA.ahamabhaktadurgrahaM
     prapattivAchaiva nirIkShituM vR^iNe || 92||
aye ! dayAlo ! varada ! kShamAnidhe !
     visheShato vishvajanIna ! vishvada ! |
hitaj~na ! sarvaj~na ! samagrashaktika !
     prasahya mAM prApaya dAsyameva te || 93||
svakairguNaiH svaishcharitaiH svavedanAt
     bhajanti ye tvAM tvayi bhaktito.athavA |
karIsha ! teShAmapi tAvakI dayA
     tathAtvakR^itsaiva tu me balaM matam || 94||
yadi tvabhakto.apyaguNo.api niShkriyo
     nirudyamo niShkR^itaduShkR^ito na cha |
labheya pAdau varada ! sphuTAstataH
     kShamAdayAdyAstava ma~NgalA guNAH || 95||
vilokanairvibhramaNairapi bhruvoH
     smitAmR^itairi~Ngitama~Ngalairapi |
prachoditaste varada ! prahR^iShTadhIH
     kadA vidhAsye varivasyanaM tava || 96||
vivishya vishvendriyatarShakarShaNIH
     manassthale nityanikhAtanishchalAH |
sudhAsakhIrhastipate ! sushItalAH
      giraH shravasyAshshR^iNuyAma tAvakIH || 97||
asheShadeshAkhilakAlayoginIShu
     ahaM tvavasthAsvakhilAsvananyadhIH |
asheShadAsyaikaratistadAcharan
     karIsha ! varteya sadA tvadantike || 98||
imaM janaM hanta ! kadA.abhiShekShyati
     tvadakShinadyorvarada ! shramApahA |
akR^itrimapremarasapravAhajA
     visR^itvarI vIkShaNavIchisantatiH || 99||
sadAtanatve.api tadAtanatvat
     navIbhavatpremarasapravAhayA |
niShevitaM tvAM satatotkayA shriyA
     karIsha ! pashyema parashshataM samAH || 100||
samAhitaissAdhu sanandanAbhiH
     sudurlabhaM bhaktajanairadurlabham |
achintyamatyadbhutamapratarkaNaM
     varaprada tvatpadamApnuyAM katham ? || 101||
rAmAnujA~NghrisharaNo.asmi kulapradIpaH
     tvAsItsa yAmunamunessa cha nAthavaMshyaH |
vaMshyaH parA~Nkushamunessa cha so.api devyAH
     dAsastaveti varadAsmi tavekShaNIyaH ||

|| iti pa~nchastavyAM chaturtho varadarAjastavaH samAptaH ||

##
Proofread by Aruna Narayanan narayanan.aruna at gmail.com

\medskip\hrule\obeylines

Please send corrections to sanskrit at cheerful dot c om
Last updated \today
https://sanskritdocuments.org

\end{document}