% Text title : varadarAjastavaH 2 % File name : varadarAjastavaH2.itx % Category : vishhnu, appayya-dIkShita % Location : doc\_vishhnu % Author : Sri Appayya Dixitar % Proofread by : PSA Easwaran psawaswaran at gmail.com % Description/comments : Edited by S. V. Radhakrishna Shastriji % Acknowledge-Permission: Mahaperiaval Trust % Latest update : May 13, 2018 % Send corrections to : sanskrit at cheerful dot c om % % This text is prepared by volunteers and is to be used for personal study % and research. The file is not to be copied or reposted for promotion of % any website or individuals or for commercial purpose without permission. % Please help to maintain respect for volunteer spirit. % \documentstyle[11pt,multicol,itrans]{article} #include=ijag.inc #endwordvowel=.h \portraitwide \parindent=100pt \let\usedvng=\Largedvng % for 1 column \pagenumbering{itrans} \def\engtitle#1{\hrule\medskip\centerline{\LARGE #1}} \def\itxtitle#1{\medskip\centerline{\LARGEdvng #1}\medskip\hrule} \def\endtitles{\medskip\obeyspaceslines} %% \begin{document} \engtitle{.. Shri Varadarajastavah 2 ..}## \itxtitle{.. shrIvaradarAjastavaH 2 ..}##\endtitles ## appayyadIkShitendravirachitaH | (kA~nchyAM varadarAjakShetre) uddhATya yogakalayA hR^idayAbjakoshaM dhanyaishchirAdapi yathAruchi gR^ihyamANaH | yaH prasphuratyavirataM paripUrNarUpaH shreyaH sa me dishatu shAshvatikaM mukundaH || 1|| jAto na vetti bhagavanna janiShyamANaH pAraM paraM paramapUruSha te mahimnaH | tasya stutau tava tara~NgitasAhasikyaH kiM mAdR^isho budhajanasya bhavenna hAsyaH || 2|| manye nijaskhalanadoShamavarjanIya\- manyasya mUrdhni viniveshya bahirbubhUShuH | Avishya deva rasanAni mahAkavInAM devI girAmapi tava stavamAtanoti || 3|| netastathApi tava nirmamalokasevyAM mUrtiM madAvalamahIdhararatnabhUShAm | vaikuNTha varNayitumasmi dhR^itAbhilAShaH tvannAmarUpaguNachintanalAbhalobhAt || 4|| manye sR^ijantvabhinutiM kavipu~NgavAste tebhyo ramAramaNa mAdR^isha eva dhanyaH | tvadvarNane dhR^itarasaH kavitAtimAndyAt yastattada~NgachirachintanabhAgyameti || 5|| kA~nchI mahArghamaNikA~nchanadhAmachitrA vishvambharAM vibudhanAtha vibhUShayantI | bhAtA gajAdrishikhare tava bhaktachintA\- ratnena rAjatitarAM shubhavigraheNa || 6|| asyAM bhavantamabhitaH sthitadugdhasindhau madhye trayImaya mahAravimaNDalasya | pashyannadhaHkR^itachaturmukhaviShTapAyAM dhAmatraye.api kutukaM vijahAti vidvAn || 7|| asyAmameyaguNapuryaparAjitAyAM ashvatthavaryajuShi divyasaraHsamIpe | madhye hiraNmayagR^ihaM mahiShIyutaM tvAM dR^iShTvA jano na punareti bhavAntarArtim || 8|| samprApya dugdhataTinIvirajAM vishuddhAH santo bhavadbhajanadAM padamAgatAste | tvatpAdatoyatulasIkusumeShu lagnaM gandhaM rasaM cha garuDadhvaja te labhante || 9|| sauvarNasAlavalayAn samanupravishya koshAniva tridashanAyaka ko.api dhanyaH | AnandavallyuditadivyaphalAnurUpaM rUpaM tvadIyamavalokayate.abhirUpam || 10|| mAta~NgashailamaNishR^i~NgamahAvimAna sopAnaparvachaturuttaraviMshatirvA | tAmeva tattvavitatiM puruSho vila~Nghya pashyanbhavantamupayAti bhavAbdhipAram || 11|| nApAri labdhumaravindabhuvA.api sAkShAd\- yaM pUrvamIshvara vinA hayamedhapuNyam | anyairanApya sa kathaM tava puNyakoTiM prApyastvadAkR^itivilokanajaH pramodaH || 12|| pratya~NmukhaM tava gajAchalarAjarUpaM pratya~NmukhAshchirataraM nayanairnipIya | asthAnamAptavachasAmavitarkaNIya\- mAshcharyametaditi nishchayamAvahante || 13|| yasmi~njahAtyatishayoktirala~NkR^ititvaM nyUnopamAtvamupamA samupaiti sarvA | sUkShmasvabhAvakalanApi cha na pratarkyA tadvarNayAmi bhavataH kathamAbhirUpyam || 14|| lakShmyAH priyo.asi ratikelikR^itaH pitAsi vishvaikamohanarasasya cha devatA.asi | AvAsabhUmirasi sarvaguNottamAnAM vaikuNTha varNayatu kastava rUparekhAm || 15|| sarvottaro.asi sakalatridashAshrayo.asi jyotishChaTAghaTitachakrapariShkR^ito.asi | shR^i~NgArashevadhirasi dvipashailamaule kalyANarUpa iti kastvayi chitravAdaH || 16|| a~NgAni te nikhilalokavilochanAnAM sambhAvanIyaguNasaMsaraNAni satyam | yeShvekamApya na purA.adhigataM smaranti vA~nChanti nAnyadapi labdhumado vihAya || 17|| ekatra manmathamajIjanadindarAyAM pUrvaM bhavAniti budhA kimapUrvamAhuH | adyApi taM na janayasyaravindanAbha kAsu prasannamadhurasmitakAminIShu || 18|| nikShipya hR^ittvayi punarlabhate na ko.api niryAta ityadhipa na tvayi chitrametat | hatvA haThAnmR^igadR^ishAM hR^idayAni yastva\- mevaM nilIya kila tiShThasi shailashR^i~Nge || 19|| mohaM jagattrayabhuvAmapanetumeta\- dAdAya rUpamakhileshvara dehabhAjAm | nissImakAntirasanIradhinA.amunaiva mohaM vivardhayasi mugdhavilochanAnAm || 20|| uchChedamekaviShayAtkathayanti bodhAn mohasya ye khalu kathaM na mR^iShAvadAste | lAvaNyamIsha tava yannayanairnipIya tatraiva mohamadhikaM dadhate taruNyaH || 21|| shubhrAMshuvaktra shubhagocharalAbhatoShAt samprasthito mR^igadR^ishAM nayanAmbujaughaH | tvadbhAsarityatha bibharti mohaM prAyaH phalanti viphalanti cha daivachintAH || 22|| yatprANasaMyamajuShAM yaminAM manAMsi mUrtiM vishanti tava mAdhava kumbhakena | pratya~NgamUrChadativelamahApravAha\- lAvaNyasindhutaraNAya tadityavaimi || 23|| lAvaNya sAgarabhuvi praNayaM visheShAd\- dugdhAmburAshiduhitustava tarkayAmi | yattAM bibharShi vapuShA nikhilena lakShmI\- manyAM tu kevalamadhokShaja vakShasaiva || 24|| sArasvataM vadanapadmabhuvaM pravAhaM traisrotasaM cha tava pAdabhuvaM nirIkShya | sarvapratIkanikarAtpravahantyajasra\- mIrShyAvatIsha yamunA kimu kAyakAntiH || 25|| ApUritatribhuvanodaramaMshujAlaM manye mahendramaNivR^indamanoharaM te | tvadrAgadIpitahR^idAM tvaritaM vadhUnAM prApte saritsahacharaM pralaye.abhivR^iddham || 26|| yuktyA.a.agamena cha bhavAn shashivarNa eva niShkR^iShTasattvaguNamAtravivartabhUmiH | dhatte kR^ipAmbubharatastviShamaindranIlIM shubhro.api sAmburasitaH khalu dR^ishyate.abdaH || 27|| sarvAtishAyisahajadyutibhUShitasya vishvaikanAyaka vibhUShaNadhAraNaM te | AbaddhasauhR^idamapArasukhAmburAsheH vIkShe tavaiva viShayAdikutUhalena || 28|| madhye sphuranmakaratoraNamaNDalasya chAmIkarAbharaNabhUShitasarvagAtraH | AdityabimbagatamAprapadAtsuvarNaM bhAsA bhavAnanukaroti bhavantameva || 29|| sevArasAgatasurAdyanubimbadR^ishyaM bhUShAmaNiprakaradarshitasarvavarNam | tvAM vishvarUpavapuSheva janaM samastaM pashyAmi nAgagirinAtha kR^itArthayantam || 30|| shR^i~NgIsuvarNaruchipi~njaritaikabhAgA\- nya~NgeShu deva tava bhUShaNamauktikAni | pratyakShayanti bhavataH pratiromakUpa\- vishrAntisAndrajagadaNDasahasrashobham || 31|| Abaddhapa~NktimahitAni tava tridhAman vIdhrANi hIrashakalAni vibhUShaNeShu | sammohanAni sarasIruhalochanAnAM mantrAkSharANi kalaye makaradhvajasya || 32|| ApAdamaulividhR^iteShu vibhAnti deva sthUlendranIlamaNayo maNibhUShaNeShu | rAgAdupetya tava sundara tattada~Nga\- lagnAni lokasudR^ishAmiva lochanAni || 33|| tvAM vIkShya muktida janAstaraNiM sakhAyaM bhindyuH kileti tava bhUShaNapadmarAgAH | sha~Nke chiraM janadR^ishaH svakaraiH kShipanti tanmAtrato.api tava muktidatAmabuddhvA || 34|| pAdAvupendra sukumAratamAvimau te bhUShAbharAdaruNimAnamivodvamantau | itthaM kimasti sukumAramitIva boddhuM lokatraye.api cha karaiH spR^ishataH padArthAn || 35|| mUrtiM prasAdhayati te charaNAMshupu~njaH tAM jaiminiH kathamadhIsha nirAkarotu | sarvatra yogamupapAdayatA.aruNimnaH tenAruNAdhikaraNe hi muniH sa bhagnaH || 36|| antastamAMsi yaminAmapasArayantI hR^itpa~NkajAnyapi cha nAtha vikAsayantI | bhaktapravekabhavavArinidhestaraNyoH tvatpAdayorjayati kA.api mayUkhamAlA || 37|| muShNanprabhAtasamayeShu murAntakArin a~Nghridvayashriyamahaskarataskaraste | yatprApyate na karabha~NgamamuShya bAla\- mitratvameva miShati dhruvamatra hetuH || 38|| a~Nghridvayasya tava santatamantara~Nga\- mambhojavargamiha yojayati shriyA yat | utkochadAnamidamuShNakarasya bAlyAt tatkAntiratnachayachoraNatatparasya || 39|| bhAnurnishAsu bhavada~NghrimayUkhashobhA lobhAtpratApya kiraNotkaramAprabhAtam | tatroddhR^ite hutavahAtkShaNaluptarAge tApaM bhajatyanudinaM sa hi mandatAtaH || 40|| taulyaM vadantu kavayastarupallavAnAM mugdhAstvadIyacharaNena mukunda kiM taiH | tAnyeva tattadadharoShThamiShAttadAnIM kampaM bhajanti kathayanti kilAtmanaichyam || 41|| padmopamAtpadayugAttava ratnagarbhA\- jjAteti padmasadR^ishAkR^itimAhurenAm | kAryaM hi kAraNaguNAnativarti loke prAyaH pata~NgapativAha vilokayAmaH || 42|| kalyANashAlikamalAkaralAlanIya\- mAsevakashrutimanoharanAdi haMsam | AmodameduramarunnamitAlikAntaM sha~Nke taveshvara padaM shatapatrameva || 43|| sparshaM yayoH samadhigamya jhaTityahalyA devI cha bhUrabhavadujjhitasarvapa~NkA | tAbhyAM ghaTeta samatA bhavataH padAbhyAM Ajanmapa~NkavasateH kathamambujasya || 44|| mAta~NgashailamaNishekhara te padAbhyAM mohena sAmyamanuchintya kR^itAparAdham | sha~Nke sarojamanayorubhayorupetya rekhAchChalena satataM vidadhAti sevAm || 45|| lekhAdhinAthavanapallavadhairyachore rekhAmayaM padatale kamalaM yadetat | tatraiva vishramajuSho.achyutarAgalakShmyAH krIDAnishAntakamalaM taditi pratImaH || 46|| yasyAH svamUrtyanuguNAkR^itishaktiyuktaH pAdAmbujadvayamiShAtkamaThAdhirAjaH | mUle vasatyuchitameva nigadyate sA mUrtirmahApuruSha te.akhilalokarUpA || 47|| kiM dvAdashAtmani ravau bhagavandhR^iterShyaH chandrastato.apyadhikatAmadhigantumeva | ete taveha dasha bhAnti padA~NgulIShu svAtmAna ityajani chittadR^igarNavebhyaH || 48|| bhAsA padaM tava ramAdhipa bhUShayanti saMsevakAMshcha vibudhAn paritoShayanti | nAtha kShipanti cha tamAMsi nakhendavaste saMshoShayantyapi tu bhaktabhavAmmburAshim || 49|| ga~NgAchChalena tava niHsR^itamUrdhvagANDa\- sa~NghaTTanAtpadanakhAgramayUkhalesham | Alokya nUnamamarAH patitaM payodhA\- vAmathya taM jagR^ihurIsha tadindurUpam || 50|| pAdAnamatsurashiromaNipadmarAgAn sadyaH sphuratsahajarukprakarAnkarAgraiH | muktAmayAnvidadhatAM prakaTaM murAre jaivAtR^ikatvamuchitaM nanu te nakhAnAm || 51|| yatte padAmburuhamamburuhAsaneDyaM dhanyAH prapadya sakR^idIsha bhavanti muktAH | nityaM tadeva bhajatAmatimuktalakShmI\- yuktaiva divyamaNinUpuramauktikAnAm || 52|| nAtha tvada~NghrinakhadhAvanatoyalagnAH tatkAntaleshakaNikAjaladhiM praviShTAH | tA eva tasya mathanena ghanIbhavantyo nUnaM samudranavanItapadaM prapannAH || 53|| savyApasavyasharamokShakR^itIkShudhanvA ja~Nghe tava svasharadhI iti sandihAnaH | Alokate.a~NghrikaTakodgatarukChalena nyasyAbhito nijasharAnanurUpabhAvam || 54|| jAnudvayaM tava jagattrayanAtha manye mArasya kelimaNidarpaNatAmupetam | Alokayan yadavadAtamanoj~navR^ittaM rUpaM nijaM kalayate viparItameShaH || 55|| UroH kimanyadayatAmupamAnabhAvaM vAmasya dakShiNamamuShya cha taM vihAya | rambhAdayaH sadR^isha ityuchitaM kimetad\- yasyorvashI subhaga sA.api vibhUtileshaH || 56|| nAtha tvayA parihitaM varavarNinInAM rAgasya yadvasanamAspadatAM bibharti | saundaryasAranilayena kaTItaTena tasyaiva kinnu mahimA parishIlanasya || 57|| samprApya sArasanamadhyatalodayAdriM madhyAmbaraM masR^iNayannaruNairmayUkhaiH | saMvIkShyate sukR^itibhirmaNireSha pUShA saMsArarAtryuparatiM gatavadbhireva || 58|| nAbherabhUttava chaturbhuja nAntarikShaM yannAbhireva yadunetariyaM tato.abhUt | nAbhyA iti shrutiviparyayage vibhaktI tAM jaimineranusasAra pashoshcha sUtram || 59|| AropamadhyavasitiM cha vinA tavAsyAM nAbhau saraHpadamupaiti kathaM nu vR^ittim | sAkShAdiyaM sarasijasya samudrashAyin utpattibhUriti hi nAyaka nAyamUhaH || 60|| kalpAntareShu vitatiM kamalAsanAnAM bhUyo.api kartumiva bhUri rajo dadhAnam | nAbhihrade samuditaM nalinaM tavaita\- dbhUyAtsadaiva mama bhUtikaraM murAre || 61|| ullAsayatyudarabandhanibaddhadivya\- shoNAshmarashmikalikAvalirachyutaiShA | AgAmyanekashatakalpavidhAtR^igarbha\- nAbhyudgatAmburuhakuTmalapa~NktishobhAm || 62|| UrdhvaM viri~nchibhavanAttava nAbhipadmA\- dromAvalIpadajuShastamasaH parastAt | muktaughamaNDitamuraHsthalamunmayUkhaM pashyAmi deva paramaM padameva sAkShAt || 63|| sAlairudaMshuchayaratnalalantikADhyaiH sphItollasatkusumayA vanamAlayA cha | vibhrAjate vipulamenadurastvadIya\- mantaHpuraM jaladhirAjakumArikAyAH || 64|| prAlambikAmupagatAstava padmarAgAH pratyagragharmakaramaNDalanirvisheShAH | parya~Nkake varada vakShasi bhAnti lakShmyAH krIDopabarhatilakA iva pArshvabhAjaH || 65|| astu trayImayatanustava lambanAlI\- ratnaistiraskriyata eva tathA.api bhAnuH | soDhaH satAM bata nishAntamupAgatAnAM evaM tiraskR^idIshvara kaH samarthaH || 66|| naShTe.api bhasmani vane girishena dagdhaM strINAM hR^idIsha madanaM pratibodhayantaH | bhasmochchaye kR^itakachapratibodhanaM taM shukraM jayantu na kathaM tava hAratArAH || 67|| utprekShayatyadhibhujAntaramullasantI pArshvadvaye paramapUruSha hAramAlA | tatratyakAntisaritastaralaiH praNunnAM UrmyutkarairubhayataH sitaphenapa~Nktim || 68|| tvAM sarvabhUtamayamAshritasarvavarNaM yadvaijayantyupagatAchyuta sarvagandham | tenaiva kiM tribhuvanaikamahAvadAnya\- sArUpyamAvahati te sakalAbhinandyam || 69|| tArAbhirAmapariNAhalasatsitAbhraM tApi~nChamechakamuraH sharadantarikSham | prApyaiva deva tava kaustubhapUrNachandraH pUrNAM bibharti puruShottama kAntirekhAm || 70|| nAbhI sarojakiraNairmaNirAjabhAbhiH AtmaprabhAbhirapi saMvalitaM vibhAti | shrIvatsavigrahajuShaH prakR^itestvadIyaM vakShaH parItamiva sattvarajastamobhiH || 71|| vakShaHsthalaM varada nandanamAshritaste yeShAM vibhAti harichandana eva madhye | ete chaturbhuja bhujAstava tasya shAkhAH sha~Nke karAbjadalakomalitAgrabhAgAH || 72|| jAtyaiva yadvarada pallavarAga eSha yallAlyate cha bhavatA kaTake niveshya | manye maNistadupagamya madAndhabhAvaM sAkShAdayaM savitureva karotyavaj~nAm || 73|| aindropalaprabhamadho bhujadaNDanAlaM ekatra chakramaparatra cha sha~NkhahaMsam | dR^iShTvA kathaM na kalayemahi kAntisindhoH utphullapadmayugamUrdhvakaradvayaM te || 74|| chandrArkachArutarasha~NkharathA~NgashobhA sambhAvyarAtridivasAtmakapArshvayugmam | nakShatradR^ishyanavamauktikahArirUpaM manye mahApuruSharUpadharaM bhavantam || 75|| saMvartajR^imbhitavikartanadurnirIkShaM pashyAmi dakShiNakare tava chakrarAjam | daityaughasindhupatimanthamahAchalasya bAhoH pratApaghanamiddhamivodgataM te || 76|| AbhAti deva vidhR^itastava savyapANau antarbahishcha shuchirachyuta pA~nchajanyaH | antevasanniva galasya gurorgabhIra dhyAnakriyopaniShadadhyayanArthameShaH || 77|| kaumodakI sphurati te karapallavAgre vairi~nchavAkyavikR^iteva sarasvatI sA | trisrotasastava padAbjabhuvo visheShaM AkA~NkShya pANikamalAttava nissarantI || 78|| haste virAjati tavAbhayamudrite.asmin avyAjakomalaruchiprakarAbhirAme | vajrormikAMshunikaraH kamalAdhirAjya paTTAbhiShekasalilaugha ivAvadAtaH || 79|| nAmaiva te varada vA~nChitadAtR^ibhAvaM vyAkhyAnato na vahase varadAnamudrAm | na hyAgamoditarasaH shrutisiddhamarthaM li~Ngena bodhyamurarIkurute vipashchit || 80|| AbhAti mauktikaguNagrathitairanalpaiH nIlotpalairvalayitastava nAtha kaNThaH | saMvartameghavasatiM dhvananaistadantaiH nishchitya tannikaTagairiva meghaDimbhaiH || 81|| yadbrahmaNashcha janibhUH priyamindarAyAH saspardhamoShadhipatau cha sakarNikaM cha | etairguNairguNanidhe katamastvadIyaM vaktraM manoj~namavagachChatu nAravindam || 82|| vaktreNa te yadabhibhUtamabhUtsarojaM tannAbhibhUtamiti shabdamavAchyanUnam | shabdachChalAdapaninIShu janApavAdaM nAbherabhUttava ramAdhipa vishrutAyaH || 83|| unmIlayankumudamujjvalayan girIshaM unmUlayanviShamavAhabhavAbhitApam | uddIpayanvaravadhUjanatAnurAgaM ud.hyotate varada te vadanAmR^itAMshuH || 84|| pakShadvayakrashimapoShavibhAvyamAna\- chAndrAyaNavrataniShevaNa eSha nityam | kurvanpradakShiNamupendra surAlayaM te lipsurmukhAbjaruchimeva tapasyatInduH || 85|| nAtha tvadIyamakala~NkamimaM mukhenduM ApIya tR^ipyati sadA vasudhA yataste | tenaiva kiM navasudhArasagocharo.abhUt induH kala~NkamalinIkR^itamadhyabhAgaH || 86|| Ashritya nUnamamR^itadyutayaH padaM te dehakShaye vidhR^itadivyapadAbhimukhyAH | lAvaNyapuNyanichayaM suhR^idi tvadAsye vinyasya yAnti mihiraM pratimAsabhinnAH || 87|| tvadvaktrasAmyamayamambujakoshamudrA\- bha~NgAttatatsuShamamitrakaropaklR^iptyA | labdhvA.api parvaNi vidhuH kramahIyamAnaH shaMsatyanItyupachitAM shriyamAshunAshAm || 88|| dR^igbhyAM mukunda mR^igalochanakomalAbhyAM jAtAdhikadyuti vilokya tavAnanAbjam | manye svamaNDalamito.apyadhikaM vidhitsuH tasminbibharti mR^igameva jaDaH sitAMshuH || 89|| mAlinyamabjashashinormadhuliTkala~Nkau dhatto mukhe tu tava dR^iktilakAtmanA.a.abhAm | doShAvataH kvachana melanato guNatvaM vakturyathesha vachasi bhramavipralambhau || 90|| AmodakAntabhR^idaharnishamekarUpaM AsevitaM dvijagaNairdiviShadgaNaishcha | a~NkAdhirUDhasahajashri mukhaM tvadIyaM sha~NkAmahe varada saMhatamabjayugmam || 91|| bimbastavAyamadharaH pratibimbanena yuktaM sadA yuvatimAnasadarpaNeShu | bimbAdharaH kavibhirIshvara varNyase tvaM etAvataiva na tu tuchChaphalopamAnAt || 92|| vidyAmayeShu tava niHshvasiteShvapUrvaM vidyAvisheShamiva shikShitumantarAtman | vANyAH sadA tava mukhAmburuhe vasantyAH kAyaprabheva lasati smitachandrikA te || 93|| tApatrayauShadhavarasya tava smitasya niHshvAsamandamarutA nibusIkR^itasya | ete kaDa~NgarachayA iva viprakIrNA jaivAtR^ikasya kiraNA jagati bhramanti || 94|| siddhauShadhaM jayati te.adhararatnapAtre tApatrayI jhaTiti mu~nchati yena siktam | manye tuShArakiraNaM guNaleshayogA\- dasyaiva vArijavilochana kalkapu~njam || 95|| AtanvatAmavayaveShu gatAgatAni yuktAtmanAM varada yauvatachakShuShAM cha | vishrAntibhUrvidhukaraprakarAvadAtA mandasmitachChaviriyaM tava mAM punAtu || 96|| niHshvAsamandamalayAnilakandalena nirhAriNA bahutareNa cha saurabheNa | nAsApuTau nalinalochana te manoj~nau manye sadaiva madhumAdhavayornivAsau || 97|| sa~nchArashAli tava niHshvasite samasta\- vedetihAsavapuShi dvipashailanAtha | nAbhIsaroruhanavAruNamaNDale cha manye madhuvratakulaM madhuvidyayoktam || 98|| dehAdvadanti jananaM munayastilAnAM devendravandyacharaNAmbuja tAvakInAt | nArAyaNaitaduchitaM prakaTIkaroti nAsAbhidhAnamiha divyatilaprasUnam || 99|| netre tava kva bhagavan kva cha puNDarIkaM brUte tayostadupamAnamathApi vedaH | sarvAtmanastava samAdhikavastvalAbhA\- dAkAshavatsa khalu sarvagatatvamAha || 100|| sAmyabhramAdavinayena samunnatasya savyaM tavAkShi harati shriyamambujasya | tasyApi tAM samadhikAM tanute yadanyad\- dAkShiNyameva danujAhita tatra mUlam || 101|| padmAnurAgajuShi lohitashuklakR^iShNAM AseduShi prakR^itimAdR^itamInarUpe | shrutyantabhAsini madAvalashailanAtha tvallochane tvayi cha bhAti na me visheShaH || 102|| muktaH prajApatirayaM mama darshanAdi\- tyanyaM vidhAtumanasastava bhAlajAtA | gharmAmbubindutatireva kirITamUla\- pratyuptamauktikatatichChalato vibhAti || 103|| rAjantyanarghamaNisa~Nghamaye kirITe rAjIvalochana na nIlamaNipravekAH | AghrAya gandhamanilastava kuntalAnAM antaH praveShTumanasaH parito nilInAH || 104|| ApAdamAchikurabhAramasheShabha~NgaM AnandavR^indalasitaM sudR^ishAmasImam | antarmama sphuratu santatamantarAtman ambhojalochana tava shritahastashailam || 105|| iti appayyadIkShitendravirachitaH shrIvaradarAjastavaH sampUrNaH | ## Proofread by PSA Easwaran \medskip\hrule\obeylines Please send corrections to sanskrit at cheerful dot c om Last updated \today https://sanskritdocuments.org \end{document}