% Text title : shrIveMkaTeshastotram 3 % File name : veMkaTeshastotram.itx % Category : vishhnu, venkateshwara, stotra, vishnu % Location : doc\_vishhnu % Author : vIrarAghavAchArye % Transliterated by : Malleswara Rao Yellapragada malleswararaoy at yahoo.com % Proofread by : Malleswara Rao Yellapragada malleswararaoy at yahoo.com % Description-comments : with shrIpadmAvatIstotra % Source : Venkatesha Kavyakalapa % Latest update : May 28, 2021 % Send corrections to : sanskrit at cheerful dot c om % % This text is prepared by volunteers and is to be used for personal study % and research. The file is not to be copied or reposted for promotion of % any website or individuals or for commercial purpose without permission. % Please help to maintain respect for volunteer spirit. % \documentstyle[11pt,multicol,itrans]{article} #include=ijag.inc #endwordvowel=.h \portraitwide \parindent=100pt \let\usedvng=\Largedvng % for 1 column \pagenumbering{itrans} \def\engtitle#1{\hrule\medskip\centerline{\LARGE #1}} \def\itxtitle#1{\medskip\centerline{\LARGEdvng #1}\medskip\hrule} \def\endtitles{\medskip\obeyspaceslines} %% \begin{document} \engtitle{.. shrIvenkaTeshastotram ..}## \itxtitle{.. shrIve~NkaTeshastotram ..}##\endtitles ## shriyA pariShkR^itoraskaM dayAmaya shubhAkR^itim | shrIve~NkaTashikhAratnaM shrInivAsaM bhajAmahe || 1|| sate vaikuNThakhaNDe.asminnanantAshcharyavaibhave | sulabhAya namaH puMse durlabhAtmasamAya naH || 2|| a~njanAdrishirasyAttavya~njanAyA~njanachChide | a~njanAbhAya shuddhAya ra~njanAyAtmane namaH || 3|| avyaktAya susUkShmAya svayaMvyaktAya bhAsvate | vR^iShabhAdrivinodAya vishuddhajyotiShe namaH || 4|| tasmai parasmai kasmaichitpuMse saMsevitA~N.hghraye | surAsuranarairmuktairiva nityashriye namaH || 5|| adrIkR^itamahAtalpamavikalpadayAnidhim | AshritaprArthanAkalpamAkalpayatu me manaH || 6|| akharvapUrvadevAdigarvasarva~NkaShaujase | namaH shrIshAya sharvAdisuparvastutaparvaNe || 7|| uttu~NgAchalashR^i~Ngastho dayAra~NgairapA~NgitaiH | samAnapi samAnpashyan jantUn mantUnkShipetsa naH || 8|| AkR^iShya bhavino vyAjaiH AdhivyAdhyekabheShajam | anubhAvayate rUpaM nidhaye shrIshriyai namaH || 9|| nityashrIvAsanirduShTahR^idayAya dayAtmane | nikhilAnugrahaikArthavigrahAya namo.astu naH || 10|| architAya namo divyaissumanobhissugandhaye | vibudhAmR^itadAyAstu vR^iShabhAdrivishobhine || 11|| ghanapatralasimhAdrivanachChAyena varpbhaNA | ghanAghanasamAnena janatApachChide namaH || 12|| nAnAshAkhopapannAya suparNodbhAsitAtmane | nishsheShaphaladAyAstu namaH kalpadrumAya naH || 13|| yAmunAdhvagatodbodhasumanassaMstutAtmane | nityagopajaneShTAya govindAya namo.astu naH || 14|| bAlopachChandananyAyakR^itavishvahitaM param | avatIrNaM prabhuM tIrNakleshaM kAraNamAshraye || 15|| kapyAsaka~njanetrAya namaH kalmaShahAriNe | manaHpragraharUdvAkShavashIkAryAya viShNave || 16|| prashastanAgapR^iShTe.asminnAkapR^iShTha iva sthitam | nityasUryAshrayaM dhAma jagatsavitR^i tannumaH || 17|| apAravibhavAnekatIrthe divye vR^iShAchale | madhyalokamahAratne vasate viShNave namaH || 18|| AnandanilayakhyAtavimAnAntarvibhUShaNam | asheSheshvaramAnandamayaM brahma paraM stumaH || 19|| seve tau dampatI divyau yAvenAMsi bhavArditAn | harAvaH praNipAtyeti varAhakShetramAshritau || 20|| praNipAtyAnugR^ihyApi padmayA preShitAn janAn | prapAdya paramAnande majjayitre namo namaH || 21|| saptaparvatasopAnasamArohashramairbhavAn | aghAni phalayan shrIsha svAtmasAtkurute shritAn || 22|| Aruhya parvatAnuchchaiH adhaHsthAn vIkShya sAdhavaH | bhaktAbhaktAntaraM shrImannetAvaditi manvate || 23|| yaM tvAM muktAmayAkalpaM sadA muktAmayAH shritAH | muktA mayApi pApmAnaH yena shrInAtha te namaH || 24|| adR^iShTashrInivAsAnAmashritAhIndrabhUbhR^itAm | paro dUre.asti vaikuNThaH iti dhIrastyapavitramA || 25|| amR^itasyandibhirmuktairnityamuktaissabhaktikam | sumaissuvarNaistvaM nityamuktaishcha shrInidhe.archyase || 26|| chitrabhUramR^itaM tejaH prANaH khaM brahma mAdhava | mUlaM phalaM raso vai sa sukhaM tat sarvamapyasi || 27|| ghanAghanaprabhaM sheShadharAdharashiraHsthitam | ramAramaNamAhustvAM parAparavido gatim || 28|| vande vaikuNThashaileshaM vaikuNThaM kuNThitAMhasam | ekakaNThyaM pramANAnAM yatra\, yasyApi cha shriyA || 29|| nihatyAntastamo lokAnavate navatejase | sarvagandharasAya syAdvichitra shrIsha te namaH || 30|| astadoShaM samastADhyaM shastaM kastaM stavaisstuvan | pAraM drakShyatyato naiSha parIhAsAya me shramaH || 31|| \section{} shrIve~NkaTeshAya namaH | j~nAnashIlanidhiM naumi muniM shrIra~NgalakShaNam | guruM\, gurormukhAdyasya shrIvAso bharamagrahIt || 32|| prapadye pa~nchasaMskAraguruM travyantalakShmaNam | nityashrIvAsanidhyAnapUrNejyaM prAj~nayoginam || 33|| nAnAkR^itikR^itakShemaM nArAyaNagiristhitam | prapattidarshanaM vande deshikaM ve~NkaTeshvaram || 34|| shrutichakShurbaladyo.asau shrInidhiM devatottamam | sthApayAmAsa yogIndrashsheSha etaM shraye.anisham || 35|| baddhA~njalipuTo nityaM prapadye sapta parvatAn | shriyA viharate sArdhaM yeShu naH puruShottamaH || 36|| ahIndrashailavAstavyamadbhutaM dhAma tanmayi | apA~Ngari~NgaNaM ki~nchidAtanotvanukampayA || 37|| AnandAtma yadAshritya sukhamindhe jagattrayam | sheShashailashiroratnaM pratnaM taddayatAM mayi || 38|| mahimA.ananyasAmAnyo mAnyaM saulabhyamIshvare shrUyate.astIti yattasya deva eSha nidarshanam || 39|| kaTAkShAya namastasmai ve~NkaTabrahmaNo vibho | anukampAmupAshliShya jAgradyaH kurute jagat || 40|| niHshreyasasthalamivaiSha phaNindrashailo | nAtha tvayA bhavati ma~NgalavigraheNa tanmAdR^ishAnanugR^ihANa tathA yathA tvAm | ArAdhayeyurapi tAmanapekShya muktim || 41|| nUnaM vasannapi bhavAnamR^ite vibhUtau AtmaprabhAbhiratasIsumamechakAbhiH | vyApnoti ve~NkaTavibho bhuvanAnyathApi bhAgyAya nastava tu ma~Ngalavigraho.ayam || 42|| pitroranugrahapadaM na paraM suputrAH duShTAssutA api tadastu ramAnivAsa | bADhaM tu vishvasimi hAnapadaM na chAhaM kkevopayokShyata iyaM karuNA vinA mAm || 43|| yAche bhavantamiha kA~N.hkShitamarpayeti no chedvibho kka tava gachChatu sheSha eShaH | trAyasva vA vR^iShagirIsha dayAprabhAvAt Aho tyaja dhruvamidaM sharaNaM tvameva || 44|| dvidashashatarasaj~no nAyamIShTe.aparAdhAn mama gaNayitumeShA niShkR^itissA kka koNe | ativimaladhiyo yAM yAM munIndrAssmaranti tvayi shamayatu tattAn sA~njalirme praNAmaH || 45|| sakR^idapi yadi sheShashsheShashaileshvara tvAM namati nihitabuddhiH tatprabhR^ityeSha dhanyaH | mama tu kimiha kuryAM cha~nchalaM mAnasaM yat kShaNamapi na punastvadvyugratAmeti kR^ichChAt || 46|| tvayi vinihitabuddhirnAtha jAtveSha bhUyAt bhavatu mayi dayA te mA pratIkShasva ki~nchit | tR^iNamapi na chalettvAmantareNeti satye mama kathamiha yatnassidhyatu tvAM vinaiva || 47|| anudinamatibhAgyAdAshrayante bhavantaM ya iha vimalachittAH dviShTasaMsAraduHkhAH | na na bhavati tadA naH taissaha tvatstavechChA vR^iShagiribhuvi viShNo mAM yadi tvaM dayethAH || 48|| punantu pAdAmbujayugmareNavaH phaNIndrashaileshvara te pratikShaNam | smaran dhruvaM yAn samayeShu sAdaraM pragalbhate prArthitalambhane janaH || 49|| vR^iShAdrishR^i~Nge vibhavaM shriyaHpate vibhAvya te vismaratAt kathaM janaH | muhurmuhuryaH kramasho.anusaMhito vidhAsyati tvayyatulAM dR^iDhAM matim || 50|| shriyaHpate vaibhavameva te mahat yadAshritassapta girInaho janaH | akhinnapAdassukhameva la~Nghayan siseviShustvAmabhivandya modate || 51|| jaganniyantA na bhavedbhavedvA nAste yato jAtu na dR^ishyate.api yadyasti dR^ishyeta tadeti pakShaH tvayA vR^iShAdrIsha vilIyate sma || 52|| AmnAyabAhye jagati prabhUte na kashchana tvAM dhruvamabhyupaiShyat | nachedbhavAn sheShamahIdhrabhUmau adyotayiShyatsvamananyavedyaH || 53|| manye ya etAdR^ishamIshvaraM tvAM pravartate hanta jano niroddhum | kalessa ko.api prabhavaH pramUDhaH katha~ncha kenApi na shikShaNIyaH || 54|| bhoktavyaM kR^itamiti nishcitA matirme khedastu pratidinamapyasahya eShaH | yAche.ahaM vR^iShagirinAtha dInadInaH pApAni prashamaya me kaTAkShitaiste || 55|| dhanyAste phaNadharabhUdhare tu vR^ikShAH dhanyAste pratidivasaM tu ki~NkarAste | dhanyAste vimaladhiyaH stuvanti ye tvAM dhanyassyAmahamiha te kaTAkShitena || 56|| brahmAdyAH praNihitamAnasAssurAste santIti shritadaya mA bhavAnudAstAm | satyaM yattava na sudurlabhAH stavAste diShThyA tu kShaNamiha dattadR^iShTirasmi || 57|| iShTaM yadbhavati tadAptaye jagatyAM suspaShTaM vadati jano hyupAyabhedAn santvete\, yadi na bhavAn dayeta kiM syAt ttadyAche drutamiha me phalaM prayachCha || 58|| yasyAdareNa bhavato nanu ve~NkaTAkhyaH pApApanodanavidhau paTureSha shailaH yasyAnubhAvamanumAya maharShayaste vA~nChanti tatra tR^iNatAM tamahaM bhajAmi || 59|| shrIsha tvayA kimiti vA.a.adriyate vR^iShAdriH tasyAthavA phalamidaM tapasastu kasya | j~nAnena vA kimatha tasya vR^iShAdrinAtha chitte tu me vasa na ki~nchana kartumIshe || 60|| lajje na kartumiha ki~nchana yanniShiddham baddhA~njalestvayi natistu na buddhipUrvA | bhavyaM tathApi bhaviteti vR^iShAdrinAtha manye dayArdrabhavadIyakaTAkShalAbhAt || 61|| kadAchidAsAdya vR^iShAdrishR^i~NgaM vilokya te vaibhavamAshritastvAm | satyaM hare ve~NkaTashailanAtha vihAtumichChenna kadApi tu tvAm || 622|| ahamahamikayA siseviShUNAM yadi nichayaM prativAsaraM janAnAm | vR^iShagirishikhare vilokya R^idhno\- tyatha kimu te padasevinAM vichAraH || 63|| visR^itvaro yasya kaTAkSha eSha vinamramiShTairabhiShi~nchati drAk | bhaje tametaM vR^iShashailadevaM shriyaHpatiM shekharamAgamAnAm || 64|| niratyayaM khelatu bhAvanA me yathA cha te ma~Ngalavigrahe.asmin | tathA dayethAH vR^iShashailanAtha yathA cha nAnyatra gatirmamAstu || 65|| yasyAnubhAvaM svayamaikamatyAt uchchairvadanti shrutayo vibhinnAH | ahIndrashailasya shiromaNiM tam Ashritya nArAyaNamasmi tuShTaH || 66|| hR^idayeShu satAM vR^iShAdrishR^i~Nge nigamAnteShu cha nityamullasantam | kamapi shritavatsala~ncha lakShmI\- padalAkShA~NkitavakShasaM smarAmi || 67|| asmAkamArtishamanAya vR^iShAchale.asmin adhyakShitaH kalashavAridhikanyakeshaH | kAruNyasArakalitena kaTAkShitena shreyastanotu sharaNam jagatAM trayANAm || 68|| nirIkShamANaH kR^ipayA.arthinaM janaM parIkShamANashcha vR^iShAchalesha tam | yathA na khedo.asya bhavettathA bhavAn hitaM vitannannakhila~ncha rakShati || 69|| ramAmukhAmbujollAsavIkShaNasmerachakShuShaH prasIdantu kaTAkShAste vR^iShashaileshiturmayi || 70|| arthAdau prauDhimAbhAvepyaparityAjyatAM vidan shrInivAsastutiM vegAdvyatAnIdvIrarAghavaH || 71|| \section{} shrInivAsAya namaH samyag vibhAvya sakalaM punaraihikAdyaM mAyAvashena bhavatA kamalesha sR^iShTam | sarvAtmakaM sukhamaya~ncha bhavantamIhe dR^iShTvA guroshcha bhavati svayamaikatAnyam || 72|| atyantasundaramukhAmbujamandahAsAt netrotpalaprahitanistulavIkShitaishcha | kShemaM dadhatsakalalokanidAnameSha sheShAdrishekharamaNishsharaNaM mamAstu || 73|| kalashapayodhijAkamalasodaranetrayuga\- prahitakaTAkShavarShakR^itanIlimamUrtirasau | nigamashirobhirAkalitanaijaguNAMshakalaH kalayatu ma~NgalaM satatameSha vR^iShAdripatiH || 74|| padmayA.ala~NkR^itorassthalaM prArthaye pUruSha~nchottamaM sheShashaileshcharam | duHkhamAgantu me dUrataH prakShipat bhUrikalyANakR^idvIkShitaM preShyatAm || 75|| suramaulimakuTamaNDanamandArasra~N.hmarandameduritam | saMvAhitaM shriyA naH shriyaM samedhayatu shauripadapadmam || 76|| kalashAmburAshikanyAkaustubhavanamAlikAdikalitaM tat vakShassthalaM vidhattAM ve~NkaTanAthasya ma~NgalAni mama || 77|| divi tiShThati vR^ikSha iva stabdha iti tvAM dhare.atra tiShThantam | sakalaphalakalpavR^ikShaM puruShaM shrIman shrutisstauti || 78|| kalayAmi santatamimaM kamapi kR^ipAvArishevadhiM devam | vinatajanajAtarakShAdIkShaM shrIbhUmivallabhaM sharaNam || 79|| ve~NkaTabhUdharashikharadyoti paraM kimapi dhAma nirhetu | nikhilajagadekaheturnaisargikaguNagabhIramastu hR^idi || 80|| AshritarakShaNasUchakahastAmbujamudramakhiladevamimam | sheShamahIdharabhUShaNameSha janaH shrInidhiM namati || 81|| anidamprathamAni vachAMsyasheShato bodhayanti yaM devam | vinatAtanayamahIdharashikharapariShkAramAshraye shrIsham || 82|| sarvatra jagati tiShThan sarvasyApyashrayaH shriyaHkAntaH | nArAyaNashikharishiraHpariShkR^itishsharaNamastu devo naH || 83|| vidyududa~nchitadIptistaruNo dhArAdharo yathA devaH | a~njanagirimadhitiShThanna~njanamakhilaM vyapohatu shrIshaH || 84|| jagatassukhamedhayate medhAM bhakti~ncha sampadaM dadate | vR^iShaparvatashikharajuShe shrImaNDitavakShase namamsatatam || 85|| prahlAdamanvagR^ihNAtkR^ipAnidhiH shrInR^isiMhamUrtiryaH | siMhAchalashikharagato devaH shrIvallabhassa eSha gatiH || 86|| saptAchalAdhinAtho dvisaptalokAdhirAja eSha hariH | sa~NkhyAtItai rUpaissamullasan shrIpatiH paraM sharaNam || 87|| saptashailasvAmine namaH | || shrImate hayavadanaparabrahmaNe namaH || \section{|| varNamAlAstavaH ||} astu vastvidamanantabhUdhare nistuladyuti samastadaivatam | shastadaM shritavatAmurastalanyastamAnitaramaM paraM hR^idi || 88|| AdareNa vR^iShabhUdhareshiturmedureNa bhayadhairyanishchayaiH | pa~NkajAtasadR^ishe pade natiH pa~NkajAtashamanIyamastu naH || 89|| ijyayA.ahamahirAjabhUbhR^itaH prAjyayA paribR^iDhaM praharShayan | nityamasya padapadmachintayA kR^ityakR^idbhavitumasmi kAmanaH || 90|| IDituM shrutigaNaissadodyataiH vrIDitaM hi yamanantabhUmakam | tasya sheShagirishR^i~NgavAsinaH nyasya padyadhimudasmi me bharam || 91|| uchchanIchapadabhedachintanAM vyuchcharantyavikalaM vinA yataH | padmavAsarasikApaterdayAsadmano dR^isha imaM shraye.anisham || 92|| UrjitaM kimapi dhAma saMshraye varjitaM svayamasheShaheyataH | sheShashailashikharAgryabhUShaNaM sheShabhUtanikhilaM shriyaHpatim || 93|| R^iddhiratra cha paratra chArthyate siddhirAtmashubhakarmaNo yataH | vyaktimetya vR^iShaparvate sthitaM saktimeti tamavekShituM manaH || 94|| nR^InasAvanujighR^ikShurAdarAdenasA divamupaitumakShamAn | a~njanAchalashiraH shrito ramAra~njano ya imamAshrayemahi || 95|| klaptachetasamaduShTarakShaNe dR^iptaduShTadamane cha mAdhavam | aMhasAM nidhirayaM jano hariM raMhasA sharaNameti vishvasan || 96|| eti yo girimupaiti te padaM hetibhUShaNalasadvibhUtika | sa shrayatyabhimatAni satpadAnyashrameNa bhuvaneShvapi triShu || 97|| aindramukhyapadachintanaM vR^ithA chandrakoTijayino vR^iSheshvara | vyAkR^itAnavadhinAmarUpa te hyAkR^iteH padamidaM paraM padam || 98|| ojasaiSha vidadhadbhuvaM vashe bho janAH nasyati sheShabhUbhR^iti | vipratIpavidhibhiH kimasti vaH kShiprameSha sharaNaM chikIrShyatAm || 99|| audaraikaniratAn dhanArthinopyAdareNa harirepa muktidaH | pashyatIha vR^ipavallabho janAH nashyatha svayamupetya kiM parAn || 100|| ambujAkSha iha sheShabhUdhare kambuchakralasadaMsakuNDalaH | pratnanavyabahubhavyabhUShaNo ratnarAshiriva rAjati sthiraH || 101|| aH paro yadiha tatparaH sthitaH\, kaH parashshubhakarashshrayema tam | sheShavAsarasike.atra sheShitA sheShatApi yadasheShatassthirA || 102|| kamaladaLavimalashItaLakarNAntavishAlalochanodAram | kamapi kamalAsanAthaM kalaye vR^iShashailaviharaNaM kR^iShNam || 103|| kharashaThakaThorahR^idayasvabhAvabhediprabhAvabhUmAnam | kharakiraNakoTibhAsvaramakharakarAhlAdamachyutaM vande || 104|| gatimanyeShvAtmani vA phalArthinAmapyanarthinA~ncha param | sarvAntaraM sametaM samayA ramayA dayAnidhiM naumi || 105|| ghanasukR^itajanasamarchita ghanAghanaprArthyadivyabhavyAbha | aghanodana jIvaghanAt paraM shriyastvAM patiM samIkSheya || 106|| ~Nsa~NsinityavichAro dravyaguNaspandasatataghoShashcha | vyartho vR^iShashailapatessantashchintayata santataM rUpam || 107|| charaNaM vR^iShashailamaNestaraNaM jagatassamAshraye sharaNam | aruNAmbujadaLasundara karuNArasanirbharAyatAkSha tava || 108|| ChavibhissakalaM tejashChAdayate yassvayamprabhaH prabhavaH | tamahaM taruNapayodharavarNaM vR^iShashailaviharaNaM praNataH || 109|| jagadavana\-haraNa\-bhavanAdyAshcharyakrIDama~njanApIDam | ramayA sanAthamamalaM hR^idaye me prArthaye sthitaye || 110|| jhaTiti tyajati bhavantaM santatamabhyastalolupaM chittam | vR^iShashailashikharaviharaNa vivarItuM tvAM kadA nu te kAmaH || 111|| ~nAv ~nAviti kalahaparo bhakShe mArjAra iva jano yatra | parahAni\-svAtmasukhapravaNastasmAdramesha rakSha bhavAt || 112|| TIkAshshataM vidhattAM vyAchaShTAM shR^itiShu kAmamarthashatam | kiM tena yadi virajya na bhR^i~Nktena dhyAyatIha viShNo tvAm || 113|| Thakkiti yAvatprANAH na tanorniryAnti tAvadastveShaH | paripoShitabhaktiraso bhuvi bhavati dhyAnapUjanaishshrIsha || 114|| Dayata iti vihagamAtraM na katha~nchana te ratho yathA viShNo | ahamapi tathA na vidhiriva tathApi nAtha stutipriyekShasva || 115|| DhakkAdivAdanolbaNanATyarasena stavena bhavyena | anubhUya rAdhayati yaM shambhustaM siMhashailagaM staumi || 116|| Na iti hi varNo vArNAsiddherviShNoshcha varNane hetuH | nArAyaNasaMj~nAM tvayi niyamayati shrIvR^iShAdrIsha || 117|| taTidujjvalo ghano yo vanamAlAshobhano vR^iShAdhInaH tad.hdR^iShTau na bhaveyuH kekAH kathamatra pakShiNAM madhye || 118|| sthirakR^iShNa pakSharamyA haMsAH prAptA ahaM sa iti yAgam | svaparabhidaikaparA iha chitraM shuddhAshcharanti vR^iShe || 119|| dakShAssanti girIshAstadaiva te sarvama~NgalAkArAH | sadgaNapatayassuguhAshsheShagirIshAna bhaktaughAH || 120|| dhAvanti cha dhoranti cha dhayanti cha tvAM stavaishcha dhinvanti | labdha~ncha dhArayanti shrIshetthaM pa~nchadhA bhaktAH || 121|| nAgendranagavaraM yo na gato nagato narasya nAsya bhidA | phaladaM nagasya janma syAdasya tu niShphalaM janma || 122|| pANipayojagataste sha~Nkho haMsassudarshanashliShTaH | shrIman padapadmagatairhaMsairdR^iShTo.atha mAnase lasati || 123|| phalamidameveti satAM phaladaM tvarayeti saMsR^itiM vahatAm | yatra parA pratipattiH tat tvadrUpaM vR^iShAdrIsha || 124|| beraiH pa~nchabhiretaissavyUhaH para iva tvamullasasi | vR^ikSha ivaikasstabdho divi tiShThn sheShashailashikhare tvam || 125|| bhavatu bhagavanmukunda shrIvallabha ve~NkaTAdrishR^i~NgamaNe | kuladaiva kalpavR^ikShantyevaM tvayi me vacho.ajasram || 126|| madanakadanairdhaMnAyAvetAlyA pAralaukikairdharmaiH | bhR^ishamatra karshitAnAM parAyaNaM tvaM rasAyanaM bhagavan || 127|| yasyAH kaNAssaranto bhAgyavashAtsaMhatAssukhAya bhuvaH | vilasanti tatratatra shrIman vAtsalyadIrghikA sA tvam || 128|| ramayitumeva ramAM tvaM bhUmimavindaH prajAshcha pAsIti | gamayati ghoSho nAmnoH kathAM ramAramaNa govinda || 129|| lakShmIM shukapuri tapasA prApya shrIshailashR^i~NgashR^i~NgAraH | tapaso vidUrabhavinastapasvino vIkShase dayayA || 130|| vandArunandathuvahaM vR^indAvanachAri vArijA.a.atAmram | shubhasheShabhogavAsaM shrIvAsa tvatpadaM vibhAtu hR^idi || 131|| shakto divi sthitastvaM sarvatra tathApi sheShamAyAtaH | asamarthabaddhabhaktavrAtasamAshleShavirahasantaptaH || 132|| ShaDguNamannaM divyaM triguNaratAn sAdaraM samAsvAdya | akleshato viraktiM vardhayase vR^iShagirIsha tvam || 133|| sadyaH phalaM prayachChati kalpatarau satpashailashikharasthe | anukalpabhUtamalpadamanyaddainyena kiM sevyam || 134|| hayavadanAdyavatArairAbrahmamanuShyamAndhyahartAram | vedagirishikharashekharamimaM numo bhaktidhIvR^idvyai || 135|| || iti varNamAlAstavaH || \section{} kuNDalirAjagiristhaH khaNDitasakalAntarAya eSha hariH | kalyANaM kalayatu naH kalashAkUpArakanyakAnilayaH || 136|| vR^iShagirishikharavihArI vR^iShamukhavibudhAbhivandyapadapadmaH | vR^iShamasmAsu vidhattAM vIkShAvalitairvishiShTakAruNyaiH || 137|| puShNAsi bhogamakhilaM klishnAti na ki~nchidAshrita iha tvAm | tamimaM mukunda vande devaM tvAM vR^iShagirIshAnam || 138|| a~njanAchalavibhUShaNaM bhaje ka~njalochanamasheShadaivatam | AdareNa nigamAntadeshiko yo babhUva jagaduddidhIrShayA || 139|| shrInidhAnamanapAyi vatsalaM tannidhAnamadhisheShabhUdharam | sAvadhAnamanubhoktumAdarAtsaMvidhAnaparamastu me manaH || 140|| Ashraye shritajanAvane sthitaM dhAma divyamanaghaM dayAnidhim | ve~NkaTAchalavihAri vAridashyAmasundaramaghApanuttaye || 141|| kAmaye kamalakomalaM tava kShAntisAgara padaM parAyaNam | kAma eSha mama kApathe bata prasthitiM na punaretu ki~nchana || 142|| khedavarShakarakAbhirAhate modaheturiha no manAgapi | kApathe punaridaM pravartate kaShTamIshvara mano ruNatsi no || 143|| iShTametaditi ve~NkaTeshvara svalpamapyamala naiva chintaye | pAratantryaparikarmitasya me tanna yujyata iti sthitaH punaH || 144|| a~njanesha bhuvi ra~njayanshritAn bha~njanaM na kuruShe mamainasaH | ka~njalochana kR^ipAnidhe kathaM kalmaShakShapaNanAmakIrtana || 145|| pApamachyuta kR^itaM punaHpunardhIharaM khalu mayA.anubhUyate | puNyamasti yadi me yadR^ichChayA padmavAsarasikesha pAhi mAm || 146|| duShkR^itasya karaNe dR^iDhaM manaH dUyate punaratho manAgiva | pratyahaM yadidamIdR^ishaM hare kIdR^ishI gatiraho bhaviShyati || 147|| nAsti me gatirananyavatsala shrInidhe sakalalokarakShaka | dehi divyajaladopamadyute tApashAntimabhaya~Nkaro bhava || 148|| yAvadachyuta pavitramAnasaprAj~nasAdarasubhAShitAspadam | jIvitaM sakalalokamAnitaM tAvadastu na tu chet mR^itiM kuru || 149|| deshikairanaghadivyamAnasairAdR^ite pathi bhavanmanohare | shrInivAsa kR^ipayA manAggataM pArshvagartapatanAchcha pAhi mAm || 150|| ambujAsanamukhaissuraisstutaM tumburuprabhR^itigItamapyaham | shambarArivivashochyutaM shraye tvaM balena tava rakSha mAdhava || 151|| kAmaleshahatachetano na yo mAnanIyavibhavassa saMsR^itau | sarvasheShishubhadivyadampatiprItimAtramapi kinna kAmyate || 152|| sarvakAmaparipUrNasevayA ghorakAmavashatA vinashyati | adbhutaM tamimama~nchanAchaladyotamAshraya manaH parAM gatim || 153|| indriyANi na vashe manAgapi shrInivAsa tamasA vR^itto.asmyaham | jAtu hanta bhavatA bhavatpriyaishchekShitaM sapadi mAmupekShase || 154|| rakSha samprati ramAnivAsa mAM rAgasambhR^itaparAgapAMsulam | kAlamegha karuNArasaishshubhaishshodhayan vihitashuddhajIvanaH || 155|| vedaparvatashirassthitaM padaM veda yattava ramAnidhe janaH | vedanAbhiranupaplutassukhaM veda so.atra cha paratra chAkhilam || 156|| itthamAshritajanAvanapriyaM devadevamanaghaM dayAnidhim | shrInivAsamiha vIrarAghavo duShkR^itodyamahatIpsayA.a.ashritaH || 157|| upaniShadbhirudIritamAdarAdudayatAmupabR^iMhaNavarNitam | suramaharShimukhastutamadbhutaM manasi siMhamahIdharaNaM mahaH || 158|| kimiha naH kathayA bhavitAnyayA tvanayakalpitayA kathayAnayA | avahitaM bhava ve~NkaTabhUdhare tava hitaM nihitaM mahitaM manaH || 159|| praNatalokaparAyaNamAnasaM praNamata praNayena parAyaNam | nikhilavedagaveShitamadbhutaM vR^iShamahIdharadIptamidaM mahaH || 160|| nikhilatApanibarhaNachu~nchunA niyamitasvakayugmavibhUtinA | shritaramaH karuNAsahachAriNA dishati vIkShitakena sa nassukham || 161|| sakalahaMsasamAshrayaNIyatAM sakalahaMsamidaM maNinUpuraiH | sapadi naH pratipAdayatIva te kamalakAnti padaM kamalApate || 162|| hitakR^ite kR^ipayeha mahItale mahitama~njanashailamadhishritam | anaghamadbhutama~NgalavigrahaM kamapi yAmi gatiM kamalAnidhim || 163|| AshcharyabhUtanirapAyadayAmayIbhi\- rArdrIkR^itAkhilavR^iShAdyachalasthalAbhiH | baddhAdarA.a.ahitanimajjanapAvanIbhi\- rdhArAbhirADhyamavanIdharamAshrito.asmi || 164|| abhito vishobhigirikUTashekhara\- drumashR^i~Ngatu~NgatarashAkhikojjvalaiH | adhinIrajAtalalitairanokahai\- rhR^idi pApanAshashubhatIrthamastu naH || 165|| itastato bhinnanijaprasArayA prabhUtapApakShayavAridhArayA | adabhravegotthakaNA.a.ahitAbhrayA manashsharIra~ncha mamAstu shodhitam || 166|| AkAshagaM gAmapi sampraviShTaM AkAshaga~NgAsalilaM mahAntaH | shreya pradaM saMviniyojayanto bhajanti lakShmIsha bhavatpriyatvam || 167|| sahasrasUryojjvaladivyatejasa\- ssarojavAsAsahadharmachAriNaH | sukhaissushItairharitaiH prabhAbharaiH vanaM mude tada ghanapatrachitritam || 168|| vane nivAso.apyavanena jIvitA janeShvasaktirjanatApahAritA | ghane sthitistvayyaghanAshashIlatA tvadadrilIneShu hare janeritAH || 169|| hare girerasya hi sarvatomukha\- pradAnashuddhAntarabhAvashobhitAH | nivAsino.ante svayamAttagauravA bhavanti mAnyA mudirA bhavatpade || 170|| na shradhA na matiH na shaktiratha me kiM syAdadR^iShTaM shubham dhUrtAnAM mama chAsti kA khalu bhidA veShaH prajAmohanaH | he sheShAchalashekhareshvara ramAnAtha prabho shAshvata j~nAnAnandavibhUtinAyaka naya tvaM mAM svayaM satpatham || 171|| antarme na hi mAtrayApi bhavati prema shriyaH preyasi svAminyadbhutanissamAdhikaguNagrAme shubhAlambane | kAmo.athApi bhavadvilokanavidhau kAmaikavashyasya me bAShpasvedasagadgadasvaramukhaprAptyai kathaM yujyate || 172|| bhaktAH kechana pAvitannijagatastvayyev pAtivratIM bibhrANAstava pAdapadmanataye shailaM samAyAnti ye | tAdR^ikShAH mayi nityaduShTahR^idaye nAtha prabho nIrada\- shyAma shrIdhara vIkShaNaM sakaruNaM yAche kShipantu svayam || 173|| kAmArtanna kathaM mano mama hare yannAma nArImayIM hA kaShTaM pratimAmapIkShaNapadaM prAptAM jahAtyeva na | kalyANe kamanIya ujjvalatame kAlAmbudashyAmaLe kA~NkShAkarupatarau vR^iShAchalamaNau kuryAtkadaitAM ratim || 174|| bhAgyaM bhUri vR^iShAchalesha kalaye strIjanmahetuM yataH | tAruNyojjvala toyavAhasubhage tvayyastu lInaM manaH | etatsAmpratamambujekShaNa yathA gopyo.api kR^iShNe tvayi premodgArakaShAyikomalahR^ido naivaM munIndrA yataH || 175|| AchAryairupadiShTamasti sudR^iDhaM sa~nchintita~ncha svayaM nAto bAhyakudR^iShTimohanavashaM manye mano yAsyati | evantvepi yada~njanAdrishikharapradyota lakShmInidhe tvadrUpAnubhavasthamasti na manaH pApiShThametattataH || 176|| AgatyAntaravekShaNAya bhavatashchittaM na yattaM bata prasthAne kR^ipayA bahishcha manute prAnte samAyAtviti | IdR^iktandri mahAghametadanaghaM tvA~nchet didR^ikSheta jA\- tvetadve~NkaTashailanAtha bhagavan pratyUhitaM mA kuru || 177|| tvAmeSha praNato.asmi te parijanAn ye.anye tvadIyAshcha tAn mA me jAtu manaH krudhA kaluShitaM bhUyAdvR^iShAdrIshvara | sahyaM sarvamaho vichintya bahunA yajjanmanA svArjitam krodhaH kintu mahAgase punaratashshAnto.asmi vIkShasva mAm || 178|| budhdhA yAni kR^itAni samprati kathaM pApAni tAni prabho na smaryanta ihA~njaneshvara mano dhUrtaM madIyaM dhruvam | sthAtavyantu yathA tathA na bhavituM yatno bhavantaM puna\- smAkShepaM smarayAmi sarvasamatAM lakShmyA saha tvaM hasa || 179|| dUre.apohaya duShkR^itAni kR^ipayA puNyAni chetsanti me tAni shrIsha balAtsamUhaya mayi prema svaya poShaya | he gopIjanabAndhava praNipatAmyanyA gatirnAsti me tat tvaM tattvamanuttamaM tava padadvandvaM sukhaM darshaya || 180|| bhrAjatpItasuvarNachitravasanaM kA~nchIkR^itAla~NkriyaM sAlagrAmasuvarNaratnakusumaprakhyAtamAlyA~nchitam | kAntaM te ghanasArapuNDralalitasmerAravindollasa\- dvaktraM divyakirITama~njanapate rUpaM svayaM darshaya || 181|| \section{viraktagR^ihasthaprArthanA} shrImAneSha vR^iShAchalendrashikharaprAntapradIpAyita\- svairavyaktasamastama~NgalanidhishrImUrtirAdhitsatAm | padmApAdapayojayugmavigalallAkShApadeshojjvala\- nmandasyandimarandameduramahorasko viraktiM mama || 182|| kR^ityAkR^ityavivekadurvidhamahAnarthopanaddhonmada\- prAj~naMmanyakaratyajaddaradR^iDhapronmAthi manmAnasam | tanme samprati taM prati praNatayassantu priyo yashshriyaH premArdraM praNidhApayenmana idaM kAma~ncha niryApayet || 183|| shR^i~Nge sheShabhu~Ngapu~Ngavagirestu~Nge paraM ma~NgalaM shR^i~NgAraM tamana~Ngabha~Ngavidhaye so.ahaM sharaNyaM gataH | yo lakShmImukhapadmalambhitamahAmodAnaghApA~Ngita\- shreNIbhR^i~NgaparamparAsvarasamasvA~NghrishritasvAgataH || 184|| yatkhalvAshramamadvitIyamanaghaM tat sadvitIyaM shriyaH preyaH prAptamidaM dvitIyamiha me dharmaH paraM vardhatAm | mA bhUda~njanashailashekhara hare tvatpAdapa~Nkeruha\- prAptasyAsya kadApi kAmakadanasvalpaprasa~Ngo.api me || 185|| ijyaupAsanavaishvadevavidhinA pUrvaM para~nchAshramaM pratyapyannasamarpaNena suhitAM vR^ittiM sukhaM prepsataH | shrImanna~njanashailashR^i~NgavilasatsantAna sa~Nkalpaya svenaiva svakaki~NkaratvavibhavasthairyaM sayUthasya me || 186|| tvAmevAnubhavannirantaramahaM tvatpAdadAsyapriyaH tvatprItyai niyataM vidhAya vidhivatsarvaM gR^ihasthochitam | kAmoddAmakadarthanAni kamalAkAnta prabhAveNa te dUrIkR^itya kR^itArthayeyamanishaM dInaM madIya~ncha mAm || 187|| yastu prAthamikAshramassa bhagavan kShipraM vyatIyAya me vAnaprastha itIdamadya jagati prAptaM bhR^ishAdarshanam | saMnyAsastu gR^ihasthadharmavahanavyAkShiptanaijasthitiH tadgArhasthyamidaM vidhatsva niyataM dharmyaM priyaM te mama || 188|| itthaM ve~NkaTashailashekharapadAmbhojadvayaikapriyaH kandarpodbhaTadarpadhUnanakR^ite devaM tameva shrayan | dharmye vartmani vIrarAghavakavirvA~nChan shubhaM vartanaM tattaH prArthitavAnathAsya paThitApyastvetadIkShApadam || 189|| \section{adhamarNaprArthanA} shrIkAnta shritasarvalokasharaNa shreyonidhe shAshvata svAdhInAkhila shAnta vatsala shubhapraj~nAnashaktyujjvala | devAdhIsha vR^iShAchaleshvara dR^iDhaM tvatpAdapadmapriyaH tvadbhR^ityastava ki~Nkaro.asmi kimiti prApto.asmi kaShTAM dashAm || 190|| vedo mAnamasheShatassa bhagavAMstvaM daivataM keshavaH mAnyAH vyAsaparAsharAdimunayo niShkampanirdhArakAH | satyevaM vR^iShashailashekhara kathaM tvatpAdapadmadvayIm AshrityApi jano.ayamitthamadhunA kaShTasya kAShTAM gataH || 191|| uddishyA~NghrimudAra te yadi bhavedeko.abhinIto.a~njaliH kenApyachyuta kR^itsnamasya vR^ijinaM muShNAsi puShNAsi sham | tattAdR^ikprathapadmavAsarasikAla~NkAravakShassthala prAj~nairitthamudIrito.asi tadidaM kAle tvayA smaryatAm || 192|| kAlo.ayaM kaliratra kalpitamabhUjjanma tvayedaM tu naH tasmAdasmadihAsti karma natarAM bhUyaH pratIkShyaM tvayA | kAmaM mokShapathassa mAstu sakalaM tvanyattadekodbhavaM tatkiM nAmani ve~NkaTesha phaNito.apyevaM na santuShyasi || 193|| nAhaM saMsR^itisAgarAntaramahAvartabhramaM prArthaye no vA tvAmapahAya dabhrachidanusvAdakShaNaM kAmaye | no vA samprati ra~NgalakShmaNamuninyastAtmarakShAbharaH tvattastvatpadapadmasevanamahAnanda~ncha yAche svayam || 194|| shrImanna~njanashailashekhara hare svAminnidaM shiShyate yatte pAdapayojasevanamihA.a.adehAvasAnepsitam | tattubhyaM mayakA madIyakayujA nirvartaya tvaM svayaM dUrIkR^itya bhayaM dayAjalanidhe doShaikarAshermama || 195|| utpAdya svayamuttame khalu kule vidyAsu yuktAsvapi vyatpAdyAdbhutadeshikA~NghrikamalAtsampAdya yatsAmpratam | vAtsalyena vR^iShAchalesha nayato vartma svayaM sAdhu mAm ante hanta kathaM nu ghoravR^ijinAraNye visarge matiH || 196|| sthAtuM yuktamasaMshayaM samadhiyA mAnAvamAnadvaye naivAthApi nideshala~NghanakR^itaM sahyaM satAM garhaNam | Aj~nApAlanatatparasya yadi me kAmo na sa~Nkalpyate padmAkAnta suputrahAnivihitashshoko bhavantaM dahet || 197|| hA hA hanta mukunda hAsyati kadA chintAjvaro mAnasaM sarvopyeSha vR^ithaiva yAti samayo dAsye.api tiShThAsataH | AkarShanti yathAyathaM na cha parIhAre manAk prAbhavaM nAtha tvAM sharaNaM gatasya R^iNitA shrIkAnta naivochitA || 198|| adya shvastadanantare divasa ityevaM mR^iShAbhAShitaiH arthApekShiNamuttamarNanivahaM nityaM hare va~nchayan | sarvaM nArakama~njanAdrishikharAla~NkAra chetprApnuyAM tvatkIrtirmama dAsyavR^ittirapi hA nUnaM layaM yAsyataH || 199|| shrImannIdR^ishasAdhuvartmanayanaprAptaM yashaste sthiraM kartuM ki~ncha mamApi janma saphalIkartuM vyavasyanniha | dAse deva dayAtara~NgitashubhApA~NgAlpavikShepataH kShipraM sarvamR^iNaM vidhUya mama dehyatyantadAsyaM tvayi || 200|| itthaM ve~NkaTashailashR^i~NganilayaM sarvArthavishrANanaM shrImantaM harichandanaM kuladhanaM devaM paraM saMshrayan | premodgArakaShAyitena manasA kai~NkaryavighnakShayaM kA~NkShannastuta vIrarAghavakaviH kShemAya devo.astu saH || 201|| \section{pANimudrAstavaH} pArthaM purA praNayataH purato niShAdya padyaM yaduttamarahasyamasAvagAsIH | saMsevya ve~NkaTapate.atra tadarthadarshi haste~NgitaM tava kimapyabhidhitsurasmi || 202|| vAchAmagocharamananta padAbjayoste vedeShu vaibhavamashaktatameShu vaktrum | kA nAma mAdR^ishamahAjaDaduShTavAchAm kArye vR^iShAchalapate.atra kathA pravR^ittau || 203|| AshAvashena bahudhA virachayya karmA\- pyAshAdhipA makaleShu mata~NgajeShu | nyastAsanA iha patanti janAH phalaM tat nityaM labhadhvamiti vakShi kareNa kiM tvam || 204|| divyassamastyakR^itakastamasaH parastA\- danyassa kashciditi kinnu mudhA.abhimatyA | bhaktaiH prapattR^ibhirapi tvapunargatIdaM prApyaM param padamiti praNayin bravIShi || 205|| kShetraM mahiShThamidamAdivarAhadeva kAruNyakandalakaTAkShavinaShTakaShTam | datte trivargamapavargamapIha tasmAt | vastavyamityupadishasyuchitaM ramesha || 206|| Aruhya sapta tava sevanakA~NkShayA.adrIn AgachChataH karuNayA kamalesha pashyan | atraiva tiShThata madadbhutadivyarUpa\- dR^iShTipranaShTaduritA iti kiM bravIShi || 207|| kAkAsureNa kR^itaghoravicheShTitena kAle jagatrayaparibhramaNaM vidhAya | yasminpade nipatitaM shAraNArthinA prAk etattadAshrayata shrIghramiti bravIShi || 208|| santi pralobhanaparAH phalamalpameva dakShAH pradAtumadharottaramAshu devAH | sarvatra tatra bhavinAM na sukhAvakAshaH tanme padaM sharaNamAshrayateti vakShi || 209|| ye nAma kechana bhavAdR^ishavA~nChitArtha\- dohaprabhAvabharitAH prathitAstrilokyAm | tepyetada~NghrisarasIruhapUjanena prAptAH prabhutvamiti kinnu hari bravIShi || 209|| kAmaM bhavedvividhanashvarapUruShArtha\- lipsAkulaM paravashaM lalitaM mano vaH | tattAdR^ishaM sakalamapyadhikaM labhedhva\- metatpadAmbujamupAya iti bravIShi || 210|| arthyaM phalaM sakalamapyachireNa dAtum archAmimAmupagato.asmi dayaikarUpAm | kartavyamapyatilaghu praNipAtarUpa\- metatpadAbja iti deva hitaM bravIShi || 211|| vyAjena kenachidasheShamapIshvara tva\- mAnAdhya lokamanukampikaTAkShitassan | anyadvimu~nchat phalaM sakalaM phalaM vaH pAdAbjameva mama nityamiti bravIShi || 212|| devI dayeva dayitA hR^idayaM shritA sA nityAshcha kechana shubhAyudhabhUShaNAdyaiH | rUpairyathochitamavAptamada~NgabhAgAH tadvaH kR^ite padamidantviti vakShi sad.hbhyaH || 213|| mA nAma bhUdbhayamupAshrayatAM manAga\- pyahnAya te svayamidaM mama pAdapadmam | yeM vo bhayAnakamatAH mama hetibhItAH prApsyanti jIvitumiti prathayasyananta || 214|| kAmaikabhogavivashAMstridashAnupetya teShAM pashUbhavitumichChatha hanta kasmAt | tasmAdvaraM vividhasachcharaNArhabhUmA\- vatraiva vastumiti bodhayasi prabho tvam || 215|| ArAdhaneShu vividheShvadhivedamukte\- pvetatpadAbjayajanaM paramasti santaH | ArAdhanaM paratarantvidamAshritAnA\- mityAdareNa vR^iShashailamaNe bravIShi || 216|| eShA vibhUtiriyatIdamuparyasau me nityA tripAditi kareNa pareNa choktvA | bambhramyamANamiha bhavyajaganmaya tvaM lokaM ninIShuravalokayase padaM te || 217|| atyuchChitaH parita eSha dharAdharendraH pAdena pashyata mayaivamadhaHkR^ito.atra | itthaM mavadvR^ijinarAshimadho vidadhyA\- mAtaH padaM praNamateti vadasyananta || 218|| gR^ihNanti ye.atra kusumAni kR^iteShu sAkShA\- dabhyarchaneShu charaNairamarAH mahAntaH | kShiptAni tetviha vahanti shirobhiretA\- nyarchyaM padaM tadidamityadhideva vakShi || 219|| traivikramashcharaNa eSha jagadvyadhAtprAk vajrAtapatramukhachihnavishiShTashobham | ekAtapatravahavajradharAdibhAva\- lipsA yadi praNamateti vadasyananta || 220|| sthAnAtsudUramavatIrNavatastataste ja~NghAntapAdayugalashramayApanAya | bhaktAnniyojayasi yasya tavAdbhutasya prekShAlavaprashamitashrama eSha lokaH || 221|| bhaktavrajaM vR^iShagirIndra vimohanaM tvAM strIbhAvatastvanububhUShumanugrahItum | prA~N.hmaithilIpariNayAtkR^itagautamastrI\- rUpaM dR^iShadyamala lambhayase.a~NghireNum || 222|| sA pAdukApi padapa~NkajadhAranAtprAk sAketarAjapadamuttamamadhyatiShThat | tasmAdidaM shirasi dhArayatAM karasthaH kShemassayoga iti vakShi vR^iShAchalendra || 223|| maddivyashAkhacharaNaikaparAyaNatvA chChAkheti vIkShya charaNetyapi cha prasidhdim | vedassa mAM girivapurvahatIha bhaktye\- tyevaM suparNagirishR^i~NgamaNe bravIShi || 224|| satyAdilokanilayAMstava sevanArthe vaikuNThalokagamanodyaminassurAnttvam | atrAgato.asmi vR^iShashaila iti bravANo vitrAsitAsura samAhvayasIti manye || 225|| j~nAnAtmake cha bhuvane jaladheshcha madhye mAnyeShu te nigamarAjashirassu nityam | tulyam shriyaHkamana nissvaparArthabuddhi\- ShvapyAvibhAtamupadarshayaseM.aghripadmam || 226|| saMsAravAridhirayaM bhavatAmagAdho ja~NghAmitaM jalamivAsti sukhena landhyaH | matpAdapadmayugalapraNipAtamAtrA\- dityAdareNa vadasIva vR^iShAdrinAtha || 227|| evaMvidhAni vividhAni vibodhayaMstvaM vishvaM janaM nijapadAmbujasevanena | dhanyaM tanoShi dayayA vR^iShashailashR^i~Nge nityaM sthito.atra nirapAyaramAnivAsa || 228|| iti pANimudrAstavaH \section{} nAtha shriyo naLinasundaramAshrayaMste pAdaM pavitramapanItasamastakhedaH | sArvaj~nyaramyasakalAdbhutasheShavR^itti\- dhanyo bubhUShati dayAmbunidhe mamA.a.atmA || 229|| nAthassa eSha narakachChidapArashakti\- rnAkasya pR^iShTha iva naH prakaTe prakR^iShTe | nArAyaNAchala iha svayamAvarAtmA bhUmA ramAsahacharaH svaguNaissamindhe || 230|| eSha shriyA saha harishshubhadivyamUrti\- shshreyo janasya sakalasya vidhitsurasmin | sheShAchale jayati ve~NkaTanAthanAmA kiM bho janAstaditaratra bhajadhvamenam || 231|| ye nAma kechana ramesha samesha karma\- vaichitryataH kalitabAhyakudR^iShTipakShAH | tepi tvadIyamanaghaM vibhavaM samIkShya vashyA bhavanti tava kassadR^ishastato.astu || 232|| tvAmadvitIyamakhilAshshrutayo gR^iNanti shrIman sadaiva ramayApi cha sadvitIyam | tvadbhUmadarshanasukhAmbunidhau nimagnAH naivAnyadambujavilochana lokayanti || 233|| hA hA kimetadadharottaramadya loka\- ssa~ncheShTamAna iti sAttvikasa~NghavAdaH | sarvaj~na bhAvi parishIlayataH kalau te sAdhutvabudhdiriha cheta na ramesha bhIrme || 234|| shaktistavAstyanavadhirhi yathA tathaiva shrIkAnta santyanavadhIni mamapyadhAni | sarvAdhikasya tava sAmyamidaM na yuktaM tattvaM vichintya dayayochitamatra kuryAH || 235|| Ama~njunR^ipuramahAmakuTaM bhavantam AsthApareNa manasA cha dR^ishA vilokya | AnandasAgaranimajjanabhAgyadhanyAH mAnyAH shriyaH kamana santu mayi prasannAH || 236|| sA sarvalokajananI sakalArtihantrI sAmAdibhistvayi dayAmabhivardhayantI tvayyekatAmupagatA lasatIha yaiShA tva~ncha shriyo nilaya nashsharaNaM bhavetam || 237|| sarvAntarAtmabhavanaM sakaleShu tulyAM vR^ittiM sadaiva ramayApi cha sAhitIM te | nArAyaNAchalanivAsaratAbhiyuktAH samyabhvibhAvya samameva bhavantamAhuH || 238|| taddhAma divyamanaghaM tapasApyagamyaM sa~NkalpitaM hi bhavatA na mamAtra khedaH | yat tvAM tathaiva ramayAdya vR^iShadrishR^i~Nge pashyAmi sAdaramasheShasamanvito.aham || 239|| AsetubandhahimashailamanantabhedAH lokA bhavantamanapAyadayAnidhAnam | AnamravA~nChitavidhAnaparAvatAra\- mArAdhayanti ramayA sahitaM svashakyA || 240|| ambhojanetramapahAya ramAsahAyaM kaM bho janAH bhajatha hanta vR^ithA vimugdhAH | sarveShTadassakaladevapatissa eSha sheShAchale viharatIha hi vo hitAya || 241|| vishvasya yAchatu phalaM tadiheti budhyA vishvasya vishvamihalokaphalaM duhAnaH | tvallabdhabhUtividhishambhumukhAnyadeva\- sevAratiM shamayasIva vR^iShAdrivAsin || 242|| vaikuNThato vR^iShagiriM svayamachyuta tvAm AnIya te.a~NghriyugamAshrayituM janaugham | yA prerayatyadha itopyavatIrya tasyAH prItyai shriyo mayi nidhehi dayArdradR^iShTim || 243|| divye plave vividhavaidyutadIparatna\- bhavye bhavantamiha samprati puShkariNyAm | shrIshailanAtha sahitaM ramayA cha bhUmyA dAsassamIkShya cha vinasya cha dhanya eShaH || 244|| susnigdhavR^ittaruchirasphaTikAvadAta\- sthUNopashobhini vichitravimAnamAnye | vibhrAjamAnashubhavaidyutadIpa~N.hktau svajyotiShA plava ihA.adripate vibhAsi || 245|| shrIman vR^iShAchalavarA~nchalavallabha tvA\- mAshritya santatabhavatpadapadmasaktaH | pApAdapAyanichayAnnirayAchcha samya\- gAtmAnamAtmajanamapyavituM prayAche || 246|| sarvaj~na te na viditaM kimidaM mano ge sarveShu shakta na kutasstavane niyojye | muktAdineva kimito.asti mayA phalaM te bad.hdho yadasmi bhagavan sa parassamAdhiH || 247|| AshAvashAdvR^iShagirIsha tathAnurUpyAt aj~nAtashaktirahamIDitumadhyavasyan | anyatra kAlamakhilaM sarasaM kShipan yat tvAM prasmarAmi tadidaM bhagavan kShamasva || 248|| gItopadeshanirataH pavanAtmajAta\- ketoH pR^ithAtanubhuvo raNadeshamadhye | vyAkhyA~Nkashobhikarapadmadalassa nUnaM govindarAja iha ve~NkaTavallabha tvam || 249|| tvayyeva me matiriyaM niyatA vibhAtu tvatpAdapa~Nkajadhanena cha dhanyatA syAt | tvatsundarA~NgaparichintanalabdhabhUmA tvatki~NkaraH kamalalochana vartiShIya || 250|| shrIve~NkaTAdrisadR^ishaM na hi ki~nchidasti shrIve~NkaTeshasadR^isho na cha jAtu kashchit | tatpAdapa~NkajaparAgapavitritena dehena tatparisare sukR^itI bhavAni || 251|| vajrAyudhAdivibudhavrajavandyamAnaM vajraikabhUShaNavibhUShitamujjvalam tvAm | vajrAtkaThorataramapyatimUrkhachitta\- mAshu dravaM rachayituM prabhumAshrito.asmi || 252|| kiM nAma chintayasi dAsajane na jAne dehAntakAlaparamAvadhi kAryamatra | shAstrashrameNa vikalaH kuta eva bhaktaH pratyakShitaM svaparambhAvi kutastarAM syAt || 253|| AloDitAni nikhilAnyapi yaistu shAstrA\- NyAchAryatallajamukhairavadhAritaM tvAm | nArAyaNa shritavR^iShAchalatu~NgashR^i~NgaM nAthaM namAmi nalinAkShamudAramADhyam || 254|| pAdAravindayugale balavanmano me nikShiptamachyuta nirastasamastadoShe | tatraiva ma~njulamanoharadivyaruk.hma\- ma~njIrashobhini madhusvadanaM vidhatte || 255|| nAtha shriyo nayanayoryugalaM madIyaM nishsheShama~NgalanidhiM nidhimAshritAnAm | ApAdachUDamanubhUya bhavantameti sAhasranetramukhasevita naiva tR^iptim || 256|| raukmeNa bhavyamahasA makuTena mAnyaM chakreNa te kamalalochana kambunA cha | nityaM shriyA vihitashobhabhujAntarAlaM rUpaM prabho vR^iShagirIsha vibhAtu chitte || 257|| sA me samastajagatIbhamAgyabhUmA kAmAtishAyikamanIyaguNAbhirAmA | shyAmA ramAramaNa divyasuvarNadAmA kShemAya mUrtiriyamastu vR^iShAdridhAmA || 258|| siMhAchaleshvara disho vidishashcha deva\- siMhaM samAshrayitumetya janA bhavantam | siMhAdbhayAdiva bhR^igairvR^ijinairvimuktAH siMhAsaneShu mahiteShu sukhaM jayanti || 259|| nAgA hi ratnashiraso.arthaparAyaNAste nAgeshaparvatanivAsa tathA.avanisthAH | dharme ratA divibhavA api kAyamagnAH traivargiketaradimAM gamaya trilokIm || 260|| madhye.avaneriha tathA payasAM nidhAne vyomanyapetatamasi sphuTarashmibimbe | nityaM vibhAntamanaghaM marutAmadhIshaM tvAM sarvabhUtanilayaM kalaye.a~njanesha || 261|| ve~NkaTamahIdhravarashekharamiha tvAM yAchati yadeSha idamasti na na yuktam | dIna iha nirgatiralabdhaphala eSha tvaM tu vibhuradbhutamahAguNanidhishcha || 262|| ve~NkaTAdhIsha te vaibhavaM kiMvidhaM kena vA shakyate j~nAtumatyadbhutam | kShemabhAjaM janaM mAM bhavAn bhUyasA vIkShitena svayaM deva nityaM kuru || 263|| dayAsindhuH shrImAn dalitanikhilArAtiradhikaM shriyaM naH puShNan yashsharaNamasi kR^itsnasya jagataH | prabhutvaM saulabhyaM paramapuruShatvaM tava hare kadA vA ko vA syAdgaditumiha shaktaH kiyadapi || 264|| asAmAnyaM mAnyaM hyativachanasaulabhyamadhuraM prabhutvaM shlAghante paramapuruSha brahmaniratAH | alIkastotrANAmaviShayamanantAdbhutaguNaM tadekasthAnaM tvAM vR^iShagiripate yAmi sharaNam || 265|| asmAdR^ishAmayamanArataduShkR^itAnAm avyAjavatsalatayA shamitA~njanassan | sheShAchalesha bhagavan bhavasindhupotaH pAre paratra tanuShe paramaM cha sAmyam || 266|| prapadye.ahaM sadyaH padayugamavidyaikanilayo niShadyA doShANAM niravadhiguNagrAmamanagham | mR^igendrakShoNibhR^inmahitashikharodyAnavihR^iti\- priyashrIvaivashyakShataduritadR^iShTestava hare || 267|| sUrIndrA api nAthayAmunamunishrIpUrNarAmAnuja\- shrutyantAryamukhAstathA mama gurustrayyantarAmAnujaH | shiShyastasya cha ra~NgalakShmaNamuniryaM shrInidhiM saMshritAH so.ayaM sarvagurustuto.astu niyataM shreyaHprado naH prabhuH || 267|| yadAyattaM vishvaM yadupari na ki~nchit yata idaM nilInaM yatredaM yadidamiti chAmnAyaviditam | bhaje tannirdoShaM niravadhikanissa~NkhyavibhavaM prabuddhairArAdhyaM prapadanavashaM shrIshriyamiha || 268|| mano me mA ki~nchanmadhumathana mR^idgAtu madano mR^iDe vA.anyasmin vA mama bhavatu mA rakShakamatiH | asheSheshe sheShAchalanilayini shrIparibR^iDhe mukunde bhAvo me bhavatu munilokaikasugamaH || 269|| mahatyAnande.asminmahitaguNasindhau sphurati taM vihAyAyaM lokaH kimiti viShaye hanta sajati | kShudhashchodanyAyAH prashamanamimaM dhyAyata janAH sharIre jIrNe.asminnahi bhavati tAto na jananI || 270|| tvayi sati khagarAjakShmAdharAdhIsha lakShmI\- parIbR^iDha sakalannaH kShemamAtanvati drAk | kimiti kalayatIdaM mAnasaM tvadvibhinnaM bhavasi cha paramastvaM prApakassan phala~ncha || 271|| niyantrA vyAptaM yannikhilamapi lokeShu bhavatA tadeSha svAchChandyaM vijahadiha jIvo niyatadhIH | upekShyaitadbAhyaM nipuNamatha sarvAntaramimaM bhavantaM bhu~njIta shritarama durAshAvirahitaH || 272|| tattadvarNAshramasamuchitaM karma yassAtvikassan yAvajjIvaM tvayi bhagavati shrIsha bhakto vidadhyAt | arvAchInairna khalu sa pumAn lipyate labdhasheSha\- prakhyakShoNIdharashikharasaMvAsa kAruNyataste || 273|| pAdAmbhojayuge praNamya nihitaM ja~NghAgataM mAnasaM jAnudvandvamupeyivat parigatashreShThoru labdhvA kaTim | vakShaH shrImaNishobhi saMshritamatho lolaM bhujeShu kramA\- dvaktrAbjaM samavApya kR^itsnamachirAdAlambate shrIpate || 274|| itthaM nistulatIrthasaptashikhariprakhyAtashR^i~NgATavI\- ku~njaikAntaramAvihAraparamAnandaM paraM pUruSham | shrIvatsAnvayavIrarAghavakaviH kAleShu yairbhaktimAn astauShIdiha tAni sa~NkalitavAnpadyAni so.ayaM svayam || 275|| iti tarkArNavena paNDitaratnena shiromaNinA uttamUrti vIrarAghavAchAryeNa virachitaM shrIpadmAvatIstotrasahitaM shrIve~NkaTeshastotraM sampUrNam || || shubhamastu || ## From a telugu book veNkaTeshakAvyakalApa Encoded and proofread by Malleswara Rao Yellapragada malleswararaoy at yahoo.com \medskip\hrule\obeylines Please send corrections to sanskrit at cheerful dot c om Last updated \today https://sanskritdocuments.org \end{document}