% Text title            : Shri Vishnustavan by Markendeya in Narasimhapurana
% File name             : viShNustavanamArkaNDeyoktamNP.itx
% Category              : vishhnu, stotra
% Location              : doc\_vishhnu
% Proofread by          : Singanallur Ganesan singanallur at gmail.com
% Translated by         : https://archive.org/details/NarsimhaPuranGitapress
% Description-comments  : Narasimhapurana adhyAya 11
% Latest update         : June 6, 2013
% Send corrections to   : Sanskrit@cheerful.com
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Shri Vishnustavan by Markendeya in Narasimhapurana ..}##
\itxtitle{.. shrIviShNustavanaM mArkaNDeyaproktaM narasiMhapurANe ..}##\endtitles ##

vyAsa uvAcha \-\-
praNipatya jagannAthaM charAcharaguruM harim |
mArkaNDeyo.abhituShTAva bhogaparya~NkashAyinam || 1||
mArkaNDeya uvAcha \-\-
prasIda bhagavan viShNo prasIda puruShottama |
prasIda devadevesha prasIda garuDadhvaja || 2||
prasIda viShNo lakShmIsha prasIda dharaNIdhara |
prasIda lokanAthAdya prasIda parameshvara || 3||
prasIda sarvadevesha prasIda kamalekShaNa |
prasIda mandaradhara prasIda madhusUdana || 4||
prasIda subhagAkAnta prasIda bhuvanAdhipa |
prasIdAdya mahAdeva prasIda mama keshava || 5||
jaya kR^iShNa jayAchintya jaya viShNo jayAvyaya |
jaya vishva jayAvyakta jaya viShNo namo.astu te || 6||
jaya deva jayAjeya jaya satya jayAkShara |
jaya kAla jayeshAna jaya sarva namo.astu te || 7||
jaya yaj~napate nAtha jaya vishvapate vibho |
jaya bhUtapate nAtha jaya sarvapate vibho || 8||
jaya vishvapate nAtha jaya dakSha namo.astu te |
jaya pApaharAnanta jaya janmajarApaha || 9||
jaya bhadrAtibhadresha jaya bhadra namo.astu te |
jaya kAmada kAkutstha jaya mAnada mAdhava || 10||
jaya shaMkara devesha jaya shrIsha namo.astu te |
jaya ku~NkumaraktAbha jaya pa~Nkajalochana || 11||
jaya chandanaliptA~Nga jaya rAma namo.astu te |
jaya deva jagannAtha jaya devakinandana || 12||
jaya sarvaguro j~neya jaya shambho namo.astu te |
jaya sundara padmAbha jaya sundarivallabha |
jaya sundarasarvA~Nga jaya vandya namo.astu te || 13||
jaya sarvada sarvesha jaya sharmada shAshvata |
jaya kAmada bhaktAnAM prabhaviShNo namo.astu te || 14||
namaH kamalanAbhAya namaH kamalamAline |
lokanAtha namaste.astu vIrabhadra namo.astu te || 15||
namastrailokyanAthAya chaturmUrte jagatpate |
namo devAdhidevAya namo nArAyaNAya te || 16||
namaste vAsudevAya namaste pItavAsase |
namaste narasiMhAya namaste shAr~NgadhAriNe || 17||
namaH kR^iShNAya rAmAya namashchakrAyudhAya cha |
namaH shivAya devAya namaste bhuvaneshvara || 18||
namo vedAntavedyAya namo.anantAya viShNave |
namaste sakalAdhyakSha namaste shrIdharAchyuta || 19||
lokAdhyakSha jagatpUjya paramAtman namo.astu te |
tvaM mAtA sarvalokAnAM tvameva jagataH pitA || 20||
tvamArtAnAM suhR^inmitraM priyastvaM prapitAmahaH |
tvaM gurustvaM gatiH sAkShI tvaM patistvaM parAyaNaH || 21||
tvaM dhruvastvaM vaShaTkartA tvaM havistvaM hutAshanaH |
tvaM shivastvaM vasurdhAtA tvaM brahmA tvaM sureshvaraH || 22||
tvaM yamastvaM ravirvAyustvaM jalaM tvaM dhaneshvaraH |
tvaM manustvamahorAtraM tvaM nishA tvaM nishAkaraH |
tvaM dhR^itistvaM shriyaH kAntistvaM kShamA tvaM dharAdharaH || 23||
tvaM kartA jagatAmIshastvaM hantA madhusUdana |
tvameva goptA sarvasya jagatastvaM charAchara || 24||
karaNaM kAraNaM kartA tvameva parameshvaraH |
sha~NkhachakragadApANe bho samuddhara mAdhava || 25||
priya padmapalAshAkSha sheShaparya~NkashAyinam |
tvAmeva bhaktyA satataM namAmi puruShottamam || 26||
shrIvatsA~NkaM jagadbIjaM shyAmalaM kamalekShaNam |
namAmi te vapurdeva kalikalmaShanAshanam || 27||
lakShmIdharamudArA~NgaM divyamAlAvibhUShitam |
chArUpR^iShThaM mahAbAhuM chArubhUShaNabhUShitam || 28||
padmanAbhaM vishAlAkShaM padmapatranibhekShaNam |
dIrghatu~NgamahAghrANaM nIlajImUtasaMnibham || 29||
dIrghabAhuM suguptA~NgaM ratnahArojjvalorasam |
subhrUlalATamukuTaM snigdhadantaM sulochanam || 30||
chArubAhuM sutAmroShThaM ratnojjvalitakuNDalam |
vR^ittakaNThaM supInAMsaM sarasaM shrIdharaM harim || 31||
sukumAramajaM nityaM nIlaku~nchitamUrdhajam |
unnatAMsaM mahoraskaM karNAntAyatalochanam || 32||
hemAravindavadanamindirAyanamIshvaram |
sarvalokavidhAtAraM sarvapApaharaM harim || 33||
sarvalakShaNasampannaM sarvasattvamanoramam |
viShNumachyutamIshAnamanantaM puruShottamam || 34||
nato.asmi manasA nityaM nArAyaNamanAmayam |
varadaM kAmadaM kAntamanantaM sUnR^itaM shivam || 35||
namAmi shirasA viShNo sadA tvAM bhaktavatsala |
asminnekArNave ghore vAyuskampitacha~nchale || 36||
anantabhogashayane sahasraphaNashobhite |
vichitrashayane ramye sevite mandavAyunA || 37||
bhujapa~njarasaMsaktakamalAlayasevitam |
iha tvAM manasA sarvamidAnIM dR^iShTavAnaham || 38||
idAnIM tu suduHkhArtho mAyayA tava mohitaH |
ekodake nirAlambe naShTasthAvaraja~Ngame || 39||
shUnye tamasi duShpAre duHkhapa~Nke nirAmaye |
shItAtapajarArogashokatR^iShNAdibhiH sadA || 40||
pIDito.asmi bhR^ishaM tAta suchiraM kAlamachyuta |
shokamohagrahagrasto vicharan bhavasAgare || 41||
ihAdya vidhinA prAptastava pAdAbjasaMnidhau |
ekArNave mahAghore dustare duHkhapIDitaH || 42||
chirabhramaparishrAntastvAmadya sharaNaM gataH |
prasIda sumahAmAya viShNo rAjIvalochana || 43||
vishvayone vishAlAkSha vishvAtman vishvasambhava |
ananyasharaNaM prAptamato.atra kulanandana || 44||
trAhi mAM kR^ipayA kR^iShNa sharaNAgatamAturam |
namaste puNDarIkAkSha purANapuruShottama || 45||
a~njanAbha hR^iShIkesha mAyAmaya namo.astu te |
mAmuddhara mahAbAho magne saMsArasAgare || 46||
gahvare dustare duHkhakliShTe kleshamahAgrahaiH |
anAthaM kR^ipaNaM dInaM patitaM bhavasAgare |
mAM samuddhara govinda varadesha namo.astu te || 47||
namastrailokyanAthAya haraye bhUdharAya cha |
devadeva namaste.astu shrIvallabha namo.astu te || 48||
kR^iShNa kR^iShNa kR^ipAlustvamagatInAM gatirbhavAn |
saMsArArNavamagnAnAM prasIda madhusUdana || 49||
tvAmekamAdyaM puruShaM purANaM jagatpatiM kAraNamachyutaM prabhum |
janArdanaM janmajarArtinAshanaM sureshvaraM sundaramindirApatim || 50||
bR^ihadbhujaM shyAmalakomalaM shubhaM varAnanaM vArijapatranetram |
taraMgabha~NgAyatakuntalaM hariM sukAntamIshaM praNato.asmi shAshvatam || 51||
sA jihvA yA hariM stauti tachchittaM yattvadarpitam |
tAveva kevalau shlAghyau yau tvatpUjAkarau karau || 52||
janmAntarasahasreShu yanmayA pAtakaM kR^itam |
tanme hara tvaM govinda vAsudeveti kIrtanAt || 53||
vyAsa uvAcha \-\-
iti stutastato viShNurmArkaNDeyena dhImatA |
saMtuShTaH prAha vishvAtmA taM muniM garuDadhvajaH || 54||
shrIbhagavAnuvAcha \-\-
prIto.asmi tapasA vipra stutyA cha bhR^igunandana |
varaM vR^iNIShva bhadraM te prArthitaM dadmi te varam || 55||
mArkaNDeya uvAcha \-\-
tvatpAdapadme devesha bhaktiM me dehi sarvadA |
yadi tuShTo mamAdya tvamanyadekaM vR^iNomyaham || 56||
stotreNAnena devesha yastvAM stoShyati nityashaH |
svalokavasatiM tasya dehi deva jagatpate || 57||
dIrghAyuShTvaM tu yaddattaM tvayA me tapyataH purA |
tatsarvaM saphalaM jAtamidAnIM tava darshanAt || 58||
vastumichChAmi devesha tava pAdAbjamarchayan |
atraiva bhagavan nityaM janmamR^ityuvivarjitaH || 59||
shrIbhagavAnuvAcha \-\-
mayyastu te bhR^igushreShTha bhaktiravyabhichAriNI |
bhaktyA muktirbhavatyeva tava kAlena sattama || 60||
yastvidaM paThate stotraM sAyaM prAtastaveritam |
mayi bhaktiM dR^iDhAM kR^itvA mama loke sa modate || 61||
yatra yatra bhR^igushreShTha sthitastvaM mAM smariShyasi |
tatra tatra sameShyAmi dAnto bhaktavasho.asmi bhoH || 62||
vyAsa uvAcha \-\-
ityuktvA taM munishreShThaM mArkaNDeyaM sa mAdhavaH |
virarAma sa sarvatra pashyan viShNuM yatastataH || 63||
iti te kathitaM vipra charitaM tasya dhImataH |
mArkaNDeyasya cha munestenaivoktaM purA mama || 64||
ye viShNubhaktyA charitaM purANaM bhR^igostu pautrasya paThanti nityam |
te muktapApA narasiMhaloke vasanti bhaktairabhipUjyamAnAH || 65||
iti shrInarasiMhapurANe mArkaNDeyacharitaM nAma ekAdasho.adhyAyaH || 11||

##
Narasimhapurana adhyAya 11
https://archive.org/details/NarsimhaPuranGitapress

Proofread by Singanallur Ganesan singanallur at gmail.com

\medskip\hrule\obeylines

Please send corrections to sanskrit at cheerful dot c om
Last updated \today
https://sanskritdocuments.org

\end{document}