% Text title            : mahArthamanjarI
% File name             : mahArthamanjarI.itx
% Category              : yoga, major\_works
% Location              : doc\_yoga
% Author                : Maheshvarananda
% Transliterated by     : staff of Muktabodha under the supervision of Mark S. G. Dyczkowski
% Proofread by          : staff of Muktabodha, DPD
% Description-comments  : Publisher : Trivandrum Sanskrit Series.  With parimalavyAkhyA
% Acknowledge-Permission: Muktabodha Indological Research Institute http://muktalib5.org
% Latest update         : March 17, 2018
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. mahArthama~njarI composed by maheshvarAnanda ..}##
\itxtitle{.. maheshvarAnandapraNItA mahArthama~njarI ..}##\endtitles ##

namo nAlayate shuNDAM viShANena mR^iNAline |
pratyakkamalakandAya karNAbhyAM parNashAline || 1||

jayatyamUlamamlAnamauttaraM tattvamadvayam |
spandAspandaparispandamakarandamahotpalam || 2||

kAruNyAmR^itasindhoruditamivAvartamIkShaNApA~NgAt |
mauktikamayaM dadhAnA tATa~NkaM jayati gauravI mUrtiH || 3||

sphUrtaye vishvashilpasya shrIshivAnandamUrtaye |
nityonmeShanimeShAyai nistuShAyai namastviShe || 4||

yasmAdanuttaramahAhradamajjanaM me
saubhAgyashAmbhavasukhAnubhavashcha yasmAt |
tatsvAtmachitkramavimarshamayaM gurUNA\-
movalliyugmamuditoditavIryamIDe || 5||

namo nikhilamAlinyavilApanapaTIyase |
mahAprakAshapAdAbjaparAgaparamANave || 6||

gorakSho lokadhiyA deshikadR^iShTyA maheshvarAnandaH |
unmIlayAmi parimalamantargrAhya mahArthama~njaryAm || 7||

svakriyAyAM api vyAkhyAM svayameva prayu~njmahe |
uparyapyAtmasarambhasambhogAmreDanotsukAH || 8||

yadvA vineyajanachittachamatkriyArtha\-
matrodyamo.ayamudito.astu tadetadAstAm |
sa~NkShepavistaravibhAgaviviktashobhaH
puShpA~njalirbhavatu vA~Nmaya eSha shambhoH || 9||

avagatashivadR^iShTipratyabhij~nArthatattva\-
kramasaraNirahasyollAsasarvasvavedI |
gurucharaNasaparyAchAturIchidghano.ahaM
gahanamapi hR^idantarvyoma tadvyAkaromi || 10||

iha mahati rahasyonmIlane ma~NgalAya
prabhavati mama saMvidyoginInAM prasAdaH |
ati tu kulasaparyAbimbasabandhyavandhyAH
sakR^idapi matimanto nainamudghATayantu || 11||

svapnasamayopalabdhA sA sumukhI siddhayoginI devI |
gAthAbhiH saptatyA svApitabhAShAbhirastu samprItA || 12||

vardhatAM deshikaH shrImAn saMvinmArgashcha vardhatAm |
mAheshvarAshcha vardhantAM vardhatAM cha maheshvaraH || 13||

|| atha mahArthama~njarI ||

natvA nityashuddhau guroshcharaNau mahAprakAshasya |
grathnAti mahArthama~njarImimAM surabhiM maheshvarAnandaH || 1||

vardhatAM mahAprakAsho vimarshavichChuritanishChalodyotaH |
sa.nj~nAvisheShanirNayamAtrapravR^ittAni yatra shAstrANi || 2||

AtmA khalu vishvamUlaM tatra pramANaM na ko.apyarthayate |
kasya vA bhavati pipAsA ga~NgAsrotasi nimagnasya || 3||

yaM jAnanti jaDA api jalahAryo.api yaM vijAnanti |
yasyaiva namaskAraH sa kasya sphuTo na bhavati kulanAthaH || 4||

avachChinnaM pratyakShamavachChinnaM tanmukhaM chAnumAnam |
AgamadIpAlokastasya prakAshayati kimapi mAhAtmyam || 5||

yeShAM nirupaNIyo vyatiriktaH ko.apyAtmano bhAvaH |
AtmavimukhAnAM teShAmadhikArivibhAgavibhramo bhavatu || 6||

yatra ruchistatra vidhiryatreyaM nAsti tatra cha niShedhaH |
ityasmAkaM viveko hR^idayaparispandamAtrashAstrANAm || 7||

paryAlochanavimukhe vastusvabhAvasyAtmano hR^idaye |
sha~NkAviShavegeneva saMsArabhayena muhyati lokaH || 8||

mANikyapraveka iva nicholito nijamayUkhalekhayA |
pratibhAti laukikAnAmatyantasphuTo.apyasphuTa AtmA || 9||

Urdhvo jvalati prakAsho lokAlokasya ma~NgalapradIpaH |
vimarshadashAmukhAnItadahyamAnamalAlitailavichChardaH || 10||
(vimarshadashAmukhena dahyate malAlitailaniShyandaH )

sannaiva hR^idayaprakAsho bhavanakriyAyA bhavati kartA |
saiva kriyAvimarshaH svasthA kShubhitA cha vishvavistAraH || 11||

pR^ithvIparamashivayoH pratyAhAre prakAshaparamArthe |
yo.anyonyavisheShaH sa eva hR^idayasya vimarshonmeShaH || 12||

tathA tathA dR^ishyamAnAnAM shaktisahasrANAmekasa~NghaTTaH |
nijahR^idayodyamarUpo bhavati shivo nAma paramasvachChandaH || 13||

sa eva vishvamIkShituM  sthAtuM kartuM chonmukho bhavan |
shaktisvabhAvaH kathito hR^idayatrikoNamadhumAsalollAsaH || 14||

j~nAnaM kriyeti dvayorapi prathamonmeShe sadAshivo devaH |
dvitIyAyA ullekhe dvitIyaH sa bhavatIshvaro nAma || 15||

j~nAtA sa AtmA j~neyasvabhAvashcha lokavyavahAraH |
(j~nAtR^itvadharmA AtmA )
ekarasAM saMsR^iShTi yatra gatau sA khalu nistuShA vidyA || 16||

ekarase svabhAve udbhAvayantI vikalpashilpAni |
mAyeti lokapateH paramasvatantrasya mohanI shaktiH || 17||

sarvakaraH sarvaj~naH pUrNo nityo.asa~Nkuchitashcha |
viparIta iva mahesho yAbhistA bhavanti pa~nchashaktayaH || 18||

ya eSha vishvanATakashailUShaH shuddhasaMvichChambhuH |
varNakaparigrahamayI tasya dashA kApi puruSho bhavati || 19||

j~nAnakriyAmAyAnAM guNAnAM sattvarajastamassvabhAvAnAm |
avibhAgAvasthAyAM tattvaM prakR^itiriti shAmbhavI shaktiH || 20||

kallolAyamAnAni sadA hR^idayAmbunidhau trINi karaNAni |
AkarShantIdantAM tatrAhantAM (tathA ahantAM) chAtrArpayanti || 21||

hR^idayasthitasya vibhorviShayAloko vishR^i~Nkhalo bhavati |
j~nAnendriyadIpeShu nijanijagolAgranityalagneShu || 22||

bhavanti karaNAni pa~ncha khalu karmapradhAnAni lokanAthasya |
spandate svaira yairjano jaDAdvilakShaNo bhavan || 23||

vishvodyAnavirUDhAni gandhapramukhAni sugandhIni puShpANi |
pa~nchApyAjighran krIDati trailokyadhUrto devaH || 24||

styAnasya kramavashAdikShurasasyeva shivaprakAshasya |
guDapiNDA iva pa~nchApi bhUtAni madhuratAM na mu~nchanti || 25||

sarvasya bhuvanavibhramayantrollAsasya tantuvallIva |
vimarshasaMrambhamayI ujjR^imbhate shambhormahAshaktiH || 26||

yadadhvanAM cha ShaTkaM tatra prakAshArthalakShaNamardham |
vimarshashabdasvabhAvamardhamiti shivasya yAmalollAsaH || 27||

AlekhyavisheSha iva gajavR^iShabhayordvayaH pratibhAsaH |
ekasminnevArthe shivashaktivibhAgakalpanAM kurmaH || 28||

tilamAtre.api sharIre prekShadhvaM kITasyaitAvatI shaktiH |
sA svachChandashriyo vishvasharIrasya kiyatI bhavatu || 29||

vishvonmeShadashAyAM deshikanAthasya yAvAnprasaraH |
kalalAvasthayAM (sthito.api) vishvanimeShe.api tAvAnbhavati || 30||

tripuTImayaM khalu samastaM tatra cha j~neye j~nAtari cha samam |
dR^iDhagranthirj~nAnakalA kalayati trailokyamekakalam || 31||

kaH sadbhAvavisheShaH kusumAdbhavati gaganakusumasya |
yatsphuraNAnuprANo lokaH sphuraNaM cha sarvasAmAnyam || 32||

mANikyamaratakayoriva bhAvAbhAvayorbhedapratibhAsam |
ekaraso.anyonya dvayorapyunmArShTi (dvayoH pramArShTi) sphuraNasambhedaH || 33||

aNDamaye nijapiNDapIThe sphuranti karaNadevyaH |
prasphurati cha paramashivo j~nAnanidhishcha tAsAM madhye || 34||

sa tatrArchanIyo vimarshapuShpAdhivAsasurabhibhiH |
chittachaShakArpitairvedyasudhAvIrapAnavastubhiH || 35||

shrIpIThapa~nchavAho netratrayavR^indachakrANi smarata |
smarata cha gurUNAM pa~Nkti pa~ncha cha shaktIH sR^iShTipramukhAH || 36|| (41)

pIThe kalA nava pa~nchaiva pa~nchavAhapadavyAm |
saptadasha phA(bhA)lanetre dvAdasha ShoDasha chAnyanetrayoH || 37|| (42)

prakaTitapa~nchaskandhe chatuShShaShTirbhavanti vR^indachakre |
na khalu maNDale gurUNAM niyamo niyamAtila~NghinA (niyamAnalaM vinA) yuktaH || 38|| (43)

sR^iShTau dasha kalAH sthitau dvAvishatirbhavanti shaktayaH |
ekAdasha saMhAre trayodasha tAsturIyaparvaNi || 39|| (44)

bhAsAyAM na vikalpAH  sphurati sphuradekaniShkalashriyAm |
yadi pratibimbagatyA sphurati paraM ShoDashAdhikA devI || 40|| (45)

sR^iShTeH pa~nchamakalA bhAseti(pa~nchakalAbhAse) jano gaNayati vyavadhAnam |
(sR^iShTermUlakando bhAsA bhAsAyAH) sR^iShTermUlaskandhe bhAsAyAM  pallavaH sR^iShTiH || 41|| (46)

nijabalanibhAlanameva varivasyA sA cha durlabhA loke |
sulabhAni vishvapaterAsavatAmbUlagandhapuShpANi || 42|| (36)

vimraShTuM nijasattvaM vibhave kAryonmukhe stimite.api |
bAhyavR^ittAntAnAM bha~NgaH prANasya saMyamo j~neyaH || 43|| (37)

shoSho malasya nAsho dAha etasya vAsanochChedaH |
AplAvanaM tanUnAM j~nAnasudhAsekanirmitA shuddhiH || 44|| (38)

avikalpatayA vimarsho vikalpavargasyA~NgasannAhaH |
arghyaM vedyavilAsaH puShpANi svabhAvapoShakAH bhAvAH || 45|| (39)

pUrNAhantAyA mukhe vishvavikalpA~NkurANAM vikShepam |
mantrollekhavishuddhaM puNyaM kulabindutarpaNaM bhaNAmaH || 46|| (40)

yo yasya bhAvayogastasya khalu sa eva devatA bhavati |
tadbhAvabhAvitA abhilaShita tathA phalanti pratimAH || 47||

chitraM na likhati chitraM chitrakaraH pashyata likhati tachchitram |
tad bhaNata kutra yogyA kartuM dvayorapi (riti) devatAbuddhiH || 48|| (47)

mananamayI nijavibhave nijasa~Nkochabhaye trANamayI |
kavalitavishvavikalpA anubhUtiH kApi mantrashabdArthaH || 49|| (48)

vaikhari(kA) nAma kriyA j~nAnamayI bhavati madhyamA vAk |
ichChA punaH pashyantI sUkShmA sarvAsA samarasA vR^ittiH || 50|| (49)

AnandollAsashrIH kShullakitAShTamahAsiddhisaubhAgyA |
dR^ishyate yatra dashAyAM saiva devasya sarva(mahA)mudrAH || 51|| (50)

hR^idayasthAnaprarUDho vimarshakalpadrumo mahAshAkhaH |
puShpyati bhogashriyA phalati cha niShkalasukhotsavAlokam || 52|| (51)

kramiko bhavati na devastasya kathaM kAlakalmaShasparshaH |
nityanirAvaraNasyApi (ko jIvato mokShapratyUhaH) ko.api jIvanmuktipratyUhaH || 53|| (52)

yat kimapi yena kenApi rUpeNa yatra kutrApi kiM nAsti |
tasmAdAtmA nityasthiraH kShaNabha~Nga evAsthiro bhavati || 54|| (53)

nanvAtmanaH priyArthaM sarvasya priyatvaM bhaNati shrutiH |
tasmAdAnandasvabhAva AtmA mukto.amukto vA || 55|| (54)

yadi nijahR^idayollAsaM nirNetuM nityaniShkalamichChA |
madhyatuTistruTitavyA asta~NgatayoH somasUryayosttarhi || 56|| (55)
(madhyatuTistruTitavyA.astra yatoH somasUryayoH ||)

sthUlatareShvapi prekShadhvaM bhUteShu khasya niShkalAvasthAm |
ShaTtriMshikAtila~NghI kIdR^isho bhavatu somanAthaH || 57|| (56)

ye kulakumbhasudhAsavapAnamahAmakhotsave(mahotsavasukhe) pravartante |
te khalu vikalpA~NkurasikA (vikalpA~NkurAn rasikA) upadaShTuM pragalbhante || 58|| (57)

hanta mukhaM pratibimbatu pratibimbayatu tathA tadapi darpaNaH |
darpaNaH punaryasmin pratibimbati so.api j~nAtavyaH || 59|| (58)

avikArobhayapArshve chAShapi~njasadR^ikShe.arthe |
antarmukho yogI bahirmukha iti kalpanA kutaH || 60|| (59)

yogI jAgarasvapnasuShuptyavasthAtrayasya(sauShuptaturIyaparva)paripATim |
chitrAmiva maNimAlAM vimarshasUtraikagumphitAmudvahati || 61|| (60)

ullokAnandasudhAshIdhurasodvejitena hR^idayena |
abhilaShati lokayAtrAM tintiNicharvaNarasAntaraM yogI || 62|| (61)

yAbhirgR^ihNAti yogI karaNapraNAlIbhirviShayasaukhyAni |
nijahR^idayodvamanashIlAbhiH sphuraNamaya tAbhiH karoti trailokyam || 63|| (62)

yathA tava sthitistathAssva nishchinta iti ((khalu) pratiShThito.arthaH |
tatrApyasti viveka evamupadishati ta(ka)sya ko.anyaH || 64|| (63)

aho saMsArasukhakelI (saMsArasukhAtishayaH) aho sulabhaM mokShamArge saubhAgyam  (mokShamArgasaubhAgyam) |
truTitAta~Nkakala~NkA aho shivayoginAM yAmalI siddhiH || 65|| (64)

kShaNamAtraspR^iShTenApyamR^itasvabhAvena j~nAnabhAvena |
sarvottirNaH sarvaH sarvachiraM labhate sarvasaubhAgyam || 66|| (66)

gUDhAdguDhataro  yo bhavati sphuTAdapi sphuTatara eShaH |
daishikakaTAkShapAte pakShaH prathamo na bhavati dhanyAnAm || 67|| (66)

AstAmanyA vidyAshchatuHsrotasAmapi sAgarANAmiva |
enamevAmR^itamayaM mathnAti manthAnabhairavo devaH || 68|| (67)

hanta rahasyaM bhaNAmo muDhA  mA bhramata garbhagoleShu |
atyAsanna hR^idaya paryAlochayata tasyodyogam || 69||

enameva mahArthaM yuddhArambhe pANDuputrasya |
ShoDashasahasrashaktirdeva upadishati sma mAdhavaH (iti shivam) || 70|| (69)

itthaM prAkR^itasUtrasaptatisamullAsaikasandhAyinIM
jAgrattatkShaNanirvisheShasvapnAvatIrNAM pratij~nottarAm |
lokolla~NghanayogyasiddhipadavIprasthAnabaddhodyamAM
kanthAshUlakapAlamAtravibhavAM vande tAM yoginIm || 71|| (70)

iti gurumukhAmnAyanyAyAnmahAkramama~njarI\-
parimalamimaM shiShyapremNA babandha maheshvaraH |
kanakasadaso madhye nR^ityanniva prabhuradbhutaM
yadiha sulabhaH sAkShAtkartuM vimarshamayaH shivaH ||

gAthAnAmanubhAShaNaM tadanu tachChAyA tato vyAkR^iti\-
rgranthArthagrathanakriyAsu gahano hR^idyashcha kashchit kramaH |
saMvAdoktisahasrasa~NkalanayA tattvArthacharchotsavaH
saubhAgyashcha vimarshasampada iti prasthAnamadhyakShyatAm ||

cholAste satatotsavA janapadAH shlAghyo guNairmAdhavo
retodhAH sphaTikAvadAtahR^idayo nAthaH prakasho mahAn |
srotaH svachChamanuttaraM pariNataM pANDityamAsthAdhikA
vashyA vAgiti hanta tantrakR^idasau sarvottaro vartate ||

yo me vAmachamatkriyodyamamayaH stabdho.api sannashnute
vishvaM vyApnuvatashchidadvayamahashchandrodayAd vikriyAm |
tasyAhlAdamahArNavasya na kathaM vardheta kUla~NkaSho
vAgvikShobhavijR^imbhayA bahumukhaM kallolahallohalaH ||

kAveryA iva mAdhuryaM kahlArasyeva saurabham |
naTeshasyeva tannR^ittamasya granthasya gauravam ||

vishvotpattivipattibhUH sa bhagavAnatra pravaktA shiva\-
stasyAhaM pratishabdaparvataguhA yanme na garvagrahaH |
taddoSho.astu guNo.api vA na khalu tat svAyattamitthaM sthite
mAtsaryaM mahatAmudetu yadi vA vAtsalyamujjR^imbhatAm ||

adhivAsayatu sadA mukhamanyakathAlepalabdhadaurgandhyam |
karpUrashakala iva me shiva shiva iti shItalaH shabdaH ||

|| iti shrIgorakShAparaparyAyamaheshvarAnandavirachitA
                   mahArthama~njarI samAptA ||

kAlachakraghaTIyantrakalpanAmUlashilpine |
namH svachChandachinmAtraparibarhAya shambhave ||
pAdukodayamahArthama~njarIkomalAstavaparAstutikramaiH |
sphArayan bhuvi mahArthasaMvidaM deshiko vijayate maheshvaraH ||
jayatyamUlamamlAmamautaraM tattvamadvayam
spandAspandaparispandamakaradamahotpalam ||

|| shubhamastu  ||

##
From Muktabodha Indology Research Institute Library muktalib5.org
Reproofread by DPD. parimalavyAkhyA is added.


\medskip\hrule\obeylines

Please send corrections to sanskrit at cheerful dot c om
Last updated \today
https://sanskritdocuments.org

\end{document}