% Text title            : yogavAsiShTha
% File name             : yogavAsiShTha18.itx
% Category              : yoga
% Location              : doc\_yoga
% Latest update         : May 25, 2017
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Yogavasishtha ..}##
\itxtitle{.. yogavAsiShThaH ..}##\endtitles ##
vairAgyaprakaraNaM prathamam |
prathamaH sargaH

. shrImahAgaNapaticharaNAravindAbhyAM namaH |
|| shrIH || 
yataH sarvANi bhUtAni pratibhAnti sthitAni cha |
yatraivopashamaM yAnti tasmai satyAtmane namaH || 1||
j~nAtA j~nAnaM tathA j~neyaM draShTA darshanadR^ishyabhUH |
kartA hetuH kriyA yasmAttasmai j~naptyAtmane namaH || 2||
sphuranti sIkarA yasmAdAnandasyAmbare.avanau |
sarveShAM jIvanaM tasmai brahmAnandAtmane namaH || 3||
sutIkShNo brAhmaNaH kashchitsa.nshayAkR^iShTamAnasaH |
agasterAshramaM gatvA muniM paprachCha sAdaram || 4||
sutIkShNa uvAcha |
bhagavandharmatattvaj~na sarvashAstravinishchita |
sa.nshayo.asti mahAnekastvametaM kR^ipayA vada || 5||
mokShasya kAraNaM karma j~nAnaM vA mokShasAdhanam |
ubhayaM vA vinishchitya ekaM kathaya kAraNam || 6||
agasti uvAcha |
ubhAbhyAmeva paxAbhyAM yathA khe paxiNAM gatiH |
tathaiva j~nAnakarmabhyAM jAyate paramaM padam || 7||
kevalAtkarmaNo j~nAnAnnahi moxo.abhijAyate |
kintUbhAbhyAM bhavenmoxaH sAdhanaM tUbhayaM viduH || 8||
asminnarthe purAvR^ittamitihAsaM vadAmi te |
kAruNyAkhyaH purA kashchidbrAhmaNo.adhItavedakaH || 9||
agniveshyasya putro.abhUdvedavedA~NgapAragaH |
guroradhItavidyaH sannAjagAma gR^ihaM prati || 10||
tasthAvakarmakR^ittUShNIM sa.nshayAno gR^ihe tadA |
agniveshyo vilokyAtha putraM karmavivarjitam || 11||
prAha etadvacho nindyaM guruH putraM hitAya cha |
agniveshya uvAcha |
kimetatputra kuruShe pAlanaM na svakarmaNaH || 12||
akarmanirataH siddhiM kathaM prApsyasi tadvada |
karmaNo.asmAnnivR^iteH kiM kAraNaM tannivedyatAm || 13||
kAruNya uvAcha |
yAvajjivamagnihotraM nityaM sandhyAmupAsayet |
pravR^ittirUpo dharmo.ayaM shrutyA smR^ityA cha choditaH || 14||
na dhanena bhavenmoxaH karmaNA prajayA na vA  |
tyAgamAtreNa kintvete yatayo.ashnanti chAmR^itam || 15||
iti shrutyArdvayormadhye kiM kartavyaM mayA guro |
iti sandhigdhatAM gatvA tUShNIM bhUto.asmi karmaNi || 16||
agasti uvAcha |
ityuktvA tAta vipro.asau kAruNyo maunamAgataH |
tathAvidhaM sutaM dR^iShTvA punaH prAha guruH sutam || 17||
agniveshya uvAcha |
shR^iNu putra kathAmekAM tadarthaM hR^idaye.akhilam |
matto.avadhArya putra tvaM yathechChasi tathA kuru || 18||
suruchirnAma kAchitstrI apsarogaNauttamA |
upaviShTA himavataH shikhare shikhisa.nvR^ite || 19||
ramante kAmasantaptAH kinnaryo yatra kinnaraiH |
svardhunyoghena sa.nsR^iShTe mahAghaughavinAshinA || 20||
dUtamindrasya gachChantamantarixe dadarsha sA |
tamuvAcha mahAbhAgA suruchishchApsarovarA || 21||
suruchiruvAcha |
devadUta mahAbhAga kuta Agamyate tvayA |
adhunA kutra gantAsi tatsarvaM kR^ipayA vada || 22||
devadUta uvAcha |
sAdhu pR^iShTaM tvayA subhru yathAvatkathayAmi te |
ariShTanemI rAjarShirdattvA rAjyaM sutAya vai || 23||
vItarAgaH sa dharmAtmA niryayau tapase vanam |
tapashcharatyasau rAjA parvate gandhamAdane || 24||
kAryaM kR^itvA mayA tatra tata Agamyate.adhunA |
gantAsmi pArshve shakrasya taM vR^ittAntaM niveditum || 25||
apsarA uvAcha |
vR^ittAntaH koa.abhavattatra kathayasva mama prabho |
praShTukAmA vinItAsmi nodvegaM kartumarhasi || 26||
devadUta uvAcha |
shR^iNu bhadre yathAvR^ittaM vistareNa vadAmi te |
tasminrAj~ni vane tatra tapashcharati dustaram || 27||
ityahaM devarAjena subhrurAj~nApitastadA |
dUta tvaM tatra gachChAshu gR^ihItvedaM vimAnakam || 28||
apsarogaNasa.nyuktaM nAnAvAditrashobhitam |
gandharvasiddhayaxaishcha kinnarAdyaishcha shobhitam || 29||
tAlaveNumR^ida~NgAdi parvate gandhamAdane |
nAnAvR^ixasamAkIrNe gatvA tasmingirau shubhe || 30||
ariShTanemiM rAjAnaM dUtAropya vimAnake |
Anaya svargabhogAya nagarImamarAvatIm || 31||
dUta uvAcha |
ityAj~nAM prApya shakrasya gR^ihitvA tadvimAnakam |
sarvopaskarasa.nyuktaM tasminnadrAvahaM yayau || 32||
Agatya parvate tasminrAj~no gatvA.a.ashramaM mayA |
niveditA mahendrasya sarvAj~nA.ariShTanemaye || 33||
iti madvachanaM shrutvA sa.nshayAno.avadachChubhe |
rAjovAcha |
praShTumichChAmi dUta tvAM tanme tvaM vaktumarhasi || 34||
guNA doShAshcha ke tatra svarge vada mamAgrataH |
j~nAtvA sthitiM tu tatratyAM kariShye.ahaM yathAruchi || 35||
dUta uvAcha |
svarge puNyasya sAmagryA bhujyate paramaM sukham |
uttamena tu puNyena prApnoti svargamuttamam || 36||
madhyamena tathA madhyaH svargo bhavati nAnyathA |
kaniShThena to puNyena svargo bhavati tAdR^ishaH || 37||
parotkarShAsahiShNutvaM spardhA chaiva samaishcha taiH |
kaniShTheShu cha santoSho yAvatpuNyaxayo bhavet || 38||
xINe puNye vishantyetaM martyalokaM cha mAnavAH |
ityAdiguNadoShAshcha svarge rAjannavasthitAH || 39||
iti shrutvA vacho bhadre sa rAjA pratyabhAShata |
rAjovAcha |
nechChAmi devadUtAhaM svargamIdR^igvidhaM phalam || 40||
ataH paraM mahograM cha tapaH kR^itvA kalevaram |
tyaxyAmyahamashuddhaM hi jIrNAM tvachamivoragaH || 41||
devadUta vimAnedaM gR^ihItvA tvaM yathAgataH |
tathA gachCha mahendrasya sannidhau tvaM namo.astu te || 42||
devdUta uvAcha |
ityukto.ahaM gato bhadre shakrasyAgre niveditum |
yathAvR^ittaM nivedyAtha mahadAshcharyatAM gataH || 43||
punaH prAha mahendro mAM shlaxNaM madhurayA girA |
indra uvAcha |
dUta gachCha punastatra taM rAjAnaM nayAshramam . . 44||
vAlmIkerj~nAtatattvasya svabhodhArthaM virAgiNam |
sandeshaM mama vAlmIkermaharShestvaM nivedaya || 45||
maharShe tvaM vinItAya rAj~ne.asmai vItarAgiNe |
nasvargamichChate tattvaM prabodhAya mahAmune || 46||
tena sa.nsAraduHkhArto moxameShyati cha kramAt |
ityuktvA devarAjena preShito.ahaM tadantike || 47||
mayAgatya punastatra rAjA valmIkajanmane |
niveditA mahendrasya rAj~nA moxyasya sAdhanam || 48||
tato valmIkajanmAsau rAjAnaM samapR^ichChata |
anAmayamatiprItyA kushalaprashnavArtayA || 49||
rAjovAcha |
bhagavandharmatattvaj~na j~nAtaj~neya vidA.nvara |
kR^itArtho.ahaM bhavadR^iShTyA tadeva kushalaM mama || 50||
bhagavanpraShTumichChAmi tadavighnena me vada |
sa.nsArabandhaduHkhArte kathaM mu~nchAmi tadvada || 51||
vAlmIkiruvAcha |
shR^iNu rAjanpravaxyAmi rAmAyaNamakhaNDitam |
shrutvAvadhArya yatnena jIvanmukto bhaviShyasi || 52||
vasiShTarAmasa.nvAdaM moxopAyakathAM shubhAm |
j~nAtasvabhAvo rAjendra vadAmi shrUyatAM budha || 53||
rAjovacha |
ko rAmaH kIdR^ishaH kasya baddho vA mukta eva vA |
etanme nishchitaM brUhi j~nAnaM tattvavidAM vara || 54||
vAlmIkiruvAcha |
shApavyAjavashAdeva rAjaveShadharo hariH |
AhR^itAj~nAnasampannaH ki~nchijj~no.asau bhavatprabhuH || 55||
rAjovacha |
chidAnandasvarUpe hi rAme chaitanyavigrahe |
shApasya kAraNaM brUhi kaH shaptA cheti me vada || 56||
vAlmIkiruvAcha |
sanatkumAro niShkAma avasadbrahmasadmani |
vaikuNThAdAgato viShNustrailokyAdhipatiH prabhuH || 57||
brahmaNA pUjitastra satyalokanivAsibhiH |
vinA kumAraM taM dR^iShTvA hyuvAcha prabhurIshvaraH || 58||
sanatkumAra stabdho.asi niShkAmo garvacheShTayA |
atastvaM bhava kAmArtaH sharajanmeti nAmataH || 59||
tenApi shApito viShNuH sarvaj~natvaM tavAsti yat |
ki~nchitkAlaM hi tattyaktvA tvamaj~nAnI bhaviShyasi || 60||
bhR^igurbhAryAM hatAM dR^iShTvA hyuvAcha krodhamUrchChitaH |
viShNo tavApi bhAryAyA viyogo hi bhaviShyati ||  61||
vR^indayA shApito viShNushChalanaM yattvayA kR^itam |
atastvaM strIviyogaM tu vachanAnmama yAsyasi || 62||
bhAryA hi devadattasya payoShNItIrasa.nsthitA |
nR^isi.nhaveShadhR^igviShNuM dR^iShTvA pa~nchatvamAgatA || 63||
tena shapto hi nR^iharirduHkhArtaH strIviyogataH |
tavapi bhAryayA sArdhaM viyogo hi bhaviShyati || 64||
bhR^iguNaivaM kumAreNa shApito devasharmaNA |
vR^indayA shApito viShNustena mAnuShyatAM gataH || 65||
etatte kathitaM sarvaM shApavyAjasya kAraNam |
idAnIM vachmi tatsarvaM sAvadhAnamatiH shR^iNu || 66||
ityArShe shrImadavAsiShThamahArAmAyaNe vAlmIkIye devadUtokte
moxopAye dvAtri.nshatsAhasryAM sa.nhitAyAM vairAgyaprakaraNe
sUtrapAtanako nAma prathamaH sargaH || 1||
\medskip\hrule\medskip
dvitIyaH sargaH

divi bhUmau tathAkAshe bahirantashcha me vibhuH |
yo vibhAtyavabhAsAtmA tasmai sarvAtmane namaH || 1||
vAlmIkiruvAcha |
ahaM baddho vimuktaH syAmiti yasyAsti nishchayaH |
nAtyantamaj~no nota j~naH so.asmi~nChAstre.adhikAravAn || 2||
kathopAyAnvichAryAdau moxopAyAnimAnatha |
yo vichArayati praj~no na sa bhUyo.abhijAyate || 3||
asminrAmAyaNe rAmakathopAyAnmahAbalAn |
etA.nstu prathamaM kR^itvA purAhamarimardana || 4||
shiShyAsAsmi vinItAya bharadvAjAya dhImate |
ekAgro dattavA.nstasmai maNimabdhirivArthine || 5||
tata ete kathopAyA bharadvAjena dhImatA |
kasmi.nshchinmerugahane brahmaNo.agra udAhR^itAH || 6||
athAsya tuShTo bhagavAnbrahmA lokapitAmahaH |
varaM putra gR^ihANeti tamuvAcha mahAshayaH || 7||
bharadvAja uvAcha |
bhagavanbhUtabhavyesha varoayaM me/.adya rochate |
yeneyaM janatA duHkhAnmuchyate tadudAhara || 8||
shrIbrahmovAcha |
guruM vAlmIkimatrAshu prArthayasva prayatnataH |
tenedaM yatsamArabdhaM rAmAyaNamaninditam || 9||
tasmi~nChute naro mohAtsamagrAtsantariShyati |
setunevAmbudheH pAramapAraguNashAlinA || 10||
shrIvAlmIkiruvAcha |
ityuktvA sa bharadvAjaM parameShThI madAshramam |
abhyAsagachChatsamaM tena bharadvAjena bhUtakR^it || 11||
tUrNaM sampUjito devaH so.arghyapAdyAdinA mayA |
avochanmAM mahAsattvaH sarvabhUtahite rataH || 12||
rAmasvabhAvakathanAdasmAdvaramune tvayA |
nodvegAtsa parityAjya AsamApteraninditAt || 13||
granthenAnena loko.ayamasmAtsa.nsArasa~NkaTAt |
samuttariShyati xipraM potenevAshu sAgarAt || 14||
vaktuM tadevamevArthamahamAgatavAnayam |
kuru lokahitArthaM tvaM shAstramityuktavAnajaH || 15||
mama puNyAshramAttasmAtxaNAdantarddhimAgataH |
muhUrtAbhyutthitaH prochchaistara~Nga iva vAriNaH || 16||
tasminprayAte bhavatyahaM vismayamAgataH |
punastatra bharadvAja.napR^ichChaM svasthayA dhiyA || 17||
kimatedbrahmaNA proktaM bharadvAja vadAshu me |
ityuktena punaH proktaM bharadvAjena tena me || 18||
bharadvAja uvAcha |
etaduktaM bhagavatA yathA rAmAyaNaM kuru |
sarvalokahitArthAya sa.nsArArNavatArakam || 19||
mahyaM cha bhagavanbrUhi kathaM sa.nsArasa~NkaTe |
rAmo  vyavahR^ito hyasminbharatashcha mahAmanAH || 20||
shatrughno laxmaNashchApi sItA chApi yashasvinI |
rAmAnuyAyinaste vA mantriputrA mahAdhiyaH || 21||
nirduHkhitAM yathaite nu prAptAstadbrUhi me sphuTam |
tathaivAhaM bhaviShyAmi tato janatayA saha || 22||
bharadvAjena rAjendra vadetyukto.asmi sAdaram |
tadA kartuM vibhorAj~nAmahaM vaktuM pravR^ittavAn || 23||
shR^iNu vatsa bharadvAja yathApR^iShTaM vadAmi te |
shrutena yena sa.nmohamalaM dUre kariShyasi || 24||
tathA vyavahara prAj~na yathA vyavahR^itaH sukhI |
sarvAsa.nsaktayA buddhyA rAmo rAjIvalochanaH || 25||
laxmaNo bharatashchaiva shatrughnashcha mahAmanAH |
kausalyA cha sumitrA cha sItA dasharathastadhA || 26||
kR^itAstrashchA.avirodhashcha bodhapAramupAgatAH |
vasiShTho vAmadevashcha mantriNo.aShTau tathetare || 27||
dhR^iShTirjayanto bhAsashcha satyo vijaya eva hi |
vibhIShaNaH suSheNashcha hanumAnindrajittathA || 28||
ete.aShTau mantriNa proktAH samanIrAgachetasaH |
jIvanmuktA mahAtmAno yathAprAptAnuvartinaH || 29||
etairyathA hutaM dattaM gR^ihItamuShitaM smR^itam |
tathA chedvartase putra mukta evAsi sa~NkaTAt || 30||
apArasa.nsArasamudrapAtI
         labdhvA parAM yuktimudArasattvaH |
nashokamAyAti na dainyameti
         gatajvarastiShThati nityatR^iptaH || 31||

ityArShe shrImadavAsiShThamahArAmAyaNe vAlmIkIye
vairAgyaprakaraNe sUtrapAtanako nAma dvitIyaH sargaH || 2||
\medskip\hrule\medskip
tR^itIyaH sargaH

bharadvAja uvAcha |
jIvanmuktasthitiM brahmankR^itvA rAghavamAditaH |
kramAtkathaya me nityaM bhaviShyAmi sukhI yathA || 1||
shrIvAlmIkiruvAcha |
bhramasya jAgatasyAsya jAtasyAkAshavarNavat |
apunaHsmaraNaM manye sAdho vismaraNaM varam || 2||
dR^ishyAtyantAbhAvabodhaM vinA tannAnubhUyate |
kadAchitkenachinnAma svabodho.anviShyatAmataH || 3||
sa cheha sambhavatyeva tadarthamidamAtatam |
shAstramAkarNayasi chettattvamApsyasi nAnyathA || 4||
jagadbhramo.ayaM dR^ishyo.api nAstyevetyanubhUyate |
varNo vyomna ivAkhedAdvichAraNAmunA.anagha || 5||
dR^ishyaM nAstIti bodhena manaso dR^ishyamArjanam |
sampannaM dettadutpannA parA nirvANanirvR^itiH || 6||
anyathA shAstragarteShu luThatAM bhavatAmiha |
bhavatyakR^itrimAj~nAnAM kalpairapi na nirvR^itiH || 7||
asheSheNa parityAgo vAsanAnAM ya uttamaH |
moxa ityuchyate brahmansa eva vimalakramaH || 8||
xINAyAM vAsanAyAM tu cheto galati satvaram |
xINAyAM shItasantatyAM brahmanhimakaNo yathA || 9||
ayaM  vAsanayA deho dhriyate bhUtapa~njaraH |
tanunAntarniviShTena muktaughastantunA yathA || 10||
vAsanA dvividhA proktA shuddhA cha malinA tathA |
malinA janmano hetuH shuddhA janmavinAshinI || 11||
aj~nAnasughanAkArA ghanAha~NkArashAlinI |
punarjanmakarI proktA malinA vAsanA budhaiH || 12||
punarjanmA~NkuraM tyaktvAsthitA sambhR^iShTabIjavat |
dehArthaM dhriyate j~nAtaj~neyA shuddheti chochyate || 13||
apunarjanmakaraNI jIvanmukteShu dehiShu |
vAsanA vidyate shuddhA dehe chakra eva bhramaH || 14||
ye shuddhavAsanA bhUyo na janmAnarthabhAjanam |
j~nAtaj~neyAsta uchyante jIvanmuktA mahAdhiyaH || 15||
jIvanmuktipadaM prApto yathA rAmo mahAmatiH |
tatte.ahaM shR^iNu vaxyAmi jarAmaraNashAntaye || 16||
bharadvAja mahAbuddhe rAmakramamimaM shubham |
shR^iNu vaxyAmi tenaiva sarvaM j~nAsyasi sarvadA || 17||
vidyAgR^ihAdviniShkramya rAmo rAjIvalochanaH |
divasAnyanayadrehe lIlAbhirakutobhayaH || 18||
atha gachChati kAle tu pAlayatyavaniM nR^ipe |
prajAsu vItashokAsu sthitAsu vigatajvaram || 19||
tIrthapuNyAshramashreNIrdraShTumutkaNThitaM manaH |
rAmasyAbhUdbhR^ishaM tatra kadAchitguNashAlinaH || 20||
rAghavachintayitvaivamupetya charaNau pituH |
ha.nsaH padmAviva navau jagrAha nakhakesarau || 21||
shrIrAma uvAcha |
tIrthAni devasadmAni vanAnyAyatanAni cha |
draShTumutkaNThitaM tAta mamedaM nAtha mAnasam || 22||
  tadetAmarthitAM pUrvAM saphalAM kartumarhasi |
na so.asti bhuvane nAtha tvayA yo.arthI na mAnitaH || 23||
iti saM prArthito rAjA vasiShThena samaM tadA |
vichAryAmu~nchadevainaM rAmaM prathamamarthinam || 24||
shubhe naxatradivase bhrAtR^ibhyAM saha rAghavaH |
ma~NgalAla~NkR^itavapuH kR^itasvastyayano dvijaiH || 25||
vasiShThaprahitairvipraiH shAstraj~naishcha samanvitaH |
snigdhai katipayaireva rAjaputravaraiH saha || 26||
ambAbhirvihitAshIrbhirAli~NgyAli~Ngya bhUShitaH |
niragAtsvagR^ihAttasmAttIrthayAtrArthamudyataH || 27||
nirgataH svapurAtpaurestUryaghoSheNa vAditaH |
pIyamAnaH purastrINAM netrairbhR^i~Ngaughabha~NguraiH || 28||
grAmINalalanAlolahastapadmApanoditaiH |
lAjavarShairvikIrNAtmA himairiva himAchalaH || 29||
AvarjayanvipragaNAnparishR^iNvanprajAshiShaH |
AlokayandigantA.nshcha parichakrAma jA~NgalAn || 30||
athArabhya svakAttasmAtkramAtkoshalamaNDalAt |
snAnadAnatapodhyAnapUrvakaM sa dadarsha ha || 31||
nadItIrANi puNyAni vanAnyAyatanAni cha
ja~NgalAni janAnteShu taTAnyabdhimahIbhR^itAm || 32||
mandAkinImindunibhAM kAlindIM chotpalAmalAm |
sarasvatIM shatadrUM cha chandrAbhAgAmirAvatIm || 33||
veNIM cha kR^iShNaveNIM cha nirvindhyAM sarayUM tathA |
charmaNvatIM vitastAM cha vipAshAM bAhudAmapi || 34||
prayAgaM naimiShaM chaiva dharmAraNyaM gayAM tathA |
vArANasIM shrIgiriM cha kedAraM puShkaraM tathA || 35||
mAnasaM cha kramasarastathaivottaramAnasam |
vaDavAvadanaM chaiva tIrthavR^indaM sa sAdaram || 36||
agnitIrthaM mahAtIrthamindradyumnasarastathA |
sarA.nsi saritashchaiva tathA nadahradAvalIm || 37||
svAminaM kArtikeyaM cha shAlagrAmaM hariM tathA |
sthAnAni cha chatuHShaShTiM hareratha harasya cha || 38||
nAnAshcharyavichitrANi chaturabdhitaTAni cha |
vindhyamandaraku~njA.nshcha kulashailAsthalAni cha || 39||
rAjarShINAM cha mahatAM brahmarShINAM tathaiva cha |
devAnAM brAhmaNAnAM cha pAvanAnAshramA~nChubhAn || 40||
bhUyobhUyaH sa babhrAma bhrAtR^ibhyAM saha mAnadaH |
chaturShvapi diganteShu sarvAneva mahItaTAn || 41||
amarakinnaramAnavamAnitaH
         samavalokya mahImakhilAmimAm |
upayayau svagR^ihaM raghunandano
         vihR^itadik shivalokamiveshvaraH || 42||

ityArShe shrImadavAsiShThamahArAmAyaNe vAlmIkIye
vairAgyaprakaraNe tIrthayAtrAprakaraNaM nAma tR^itIyaH sargaH || 3||
\medskip\hrule\medskip
chaturthaH sargaH

shrIvAlmIkiruvAcha |
rAmaH puShpA~njalivrAtairvikIrNaH puravAsibhiH |
pravivesha gR^ihaM shrImA~njayanto viShTapaM yathA || 1||
praNanAmAtha pitaraM vasiShThaM bhrAtR^ibAndhavAn |
brAhmaNAnkulavR^iddhA.nshcha rAghavaH prathamAgataH || 2||
suhR^idbhirbhrAtR^ibhishchaiva pitrA dvijagaNena cha |
muhurAli~NgitAchAro rAghavo na mamau mudA || 3||
tasmingR^ihe dAsharatheH priyaprakathanairmithaH |
jughurNurmadhurairAshA mR^iduva.nshasvanairiva || 4||
babhUvAtha dinAnyaShTau rAmAgamana utsavaH |
sukhaM mattajanonmuktakalakolAhalAkulaH || 5||
uvAsa sa sukhaM gehe tataH prabhR^iti  rAghavaH |
varNayanvividhAkArAndeshAchArAnitastataH || 6||
prAtarutthAya rAmo.asau kR^itvA sandhyAM yathAvidhi |
sabhAsa.nsthaM dadarshendrasamaM svapitaraM tathA || 7||
kathAbhiH suvichitrAbhiH sa vasiShThAdibhiH saha |
sthitvA dinachaturbhAgaM j~nAnagarbhAbhirAdR^itaH || 8||
jagAma pitrAnuj~nAto mahatyA senayA vR^itaH |
varAhamahiShAkIrNaM vanamAkheTakechChayA || 9||
tata Agatya sadane kR^itvA snAnAdikaM kramam |
samitrabAndhavo bhuktvA ninAya sasuhR^innishAm || 10||
evamprAyadinAchAro bhrAtR^ibhyAM saha rAghava |
Agatya tIrthayAtrAyAH samuvAsa piturgR^ihe || 11||
nR^ipatisa.nvyavahAramanoj~nayA
sujanachetasi chandrikayAnayA |
parininAya dinAni sa cheShTayA
stutasudhArasapeshalayA.anagha || 12||

ityArShe shrImadavAsiShThamahArAmAyaNe vAlmIkIye
vairAgyaprakaraNe divasavyavahAranirUpaNaM nAma chaturthaH sargaH || 4||
\medskip\hrule\medskip
pan~nchama sargaH

shrIvAlmIkiruvAcha |
athonuShoDashe varShe vartamAne raghUdvahe |
rAmAnuyAyini tathA shatrughne laxmaNe.api cha || 1||
bharate sa.nsthite nityaM mAtAmahagR^ihe sukham |
pAlayatyavaniM rAj~ni yathAvadakhilAmimAm || 2||
janyatrArthaM cha putrANAM pratyahaM saha mantribhiH |
kR^itamantre mahAprAj~ne tajj~ne dasharathe nR^ipe || 3||
kR^itAyAM tIrthayAtrAyAM rAmo nijagR^ihe sthitam |
jagAmAnudinaM kArshyaM sharadIvAmalaM saraH || 4||
kumArasya vishAlAxaM pANDutAM mukhamAdade |
pAkaphulladalaM shuklaM sAlimAlamivAmbujam || 5||
kapolatalasa.nlInapANiH padmAsanasthitaH |
chintAparavashastUShNImavyApAro babhUva ha || 6||
kR^ishA~NgashchintayA yuktaH khedI paramadurmanAH |
novAcha kasyachitki~nchillipikarmArpitopamaH || 7||
khedAtparijanenAsau prArthyamAnaH punaH punaH |
chakArAhnikamAchAraM parimlAnamukhAmbujaH || 8||
ev~NguNavishiShTaM taM rAmaM guNagaNAkaram |
Alokya bhrAtarAvasya tAmevAyayaturdashAm || 9||
tathA teShu tanujeShukhedavatsu kR^isheShu cha |
sapatniko mahIpAlashchintAvivashatAM yayau || 10||
kA te putra ghanA chintetyevaM rAmaM punaH punaH |
apR^ichChatsnigdhayA vAchA naivAkathayadasya saH || 11||
na ki~nchittAta me duHkhamityuktvA pitura~NkagaH |
rAmo rAjIvapatrAxastUShNImeva sma tiShThati || 12||
tato dasharatho rAjA rAmaH kiM khedavAniti |
apR^ichChatsarvakAryaj~naM vasiShThaM vadatAM varam || 13||
ityuktashchintayitvA sa vasiShThamuninA nR^ipaH |
astyatra kAraNaM shrImanmA rAjanduHkhamastu te || 14||
kopaM viShAdakalanAM vitataM cha harSha.n
         nAlpena kAraNavashena vahanti santaH |
sargeNa sa.nhR^itijavena vinA jagatyA.n
         bhUtAni bhUpa na mahAnti vikAravanti || 15||

ityArShe shrImadavAsiShThamahArAmAyaNe vAlmIkIye
vairAgyaprakaraNe kArshyanivedanaM nAma pa~nchamaH sargaH || 5
\medskip\hrule\medskip
ShaShThaH  sargaH

shrIvAlmIkiruvAcha |
ityukte muninAthena sandehavati pArthive |
khedavatyAsthite maunaM ki~nchitkAlapratIxaNe || 1||
parikhinnAsu sarvAsu rAj~nIShu nR^ipasadmasu |
sthitAsu sAvadhAnAsu rAmacheShTAsu sarvataH || 2||
etasminneva kAle tu vishvAmitra iti shrutaH |
maharShirabhyagAddraShTuM tamayodhyAnarAdhipam || 3||
tasya yaj~no.atha raxobhistathA vilulupe kila |
mAyAvIryabalonmattairdharmakAryasya dhImataH || 4||
raxArthaM tasya yaj~nasya draShTumaichChatsa pArthivam |
nahi shaknotyavighnena samAptuM sa muniH kratum || 5||
tatasteShAM vinAshArthamudyatastapasAM nidhiH |
vishvAmitro mahAtejA ayodhyAmabhyagAtpurIm || 6||
sa rAj~no darshanAkA~NxI dvArAdhyaxAnuvAcha ha  |
shIghramAkhyAta mAM prAptaM kaushikaM gAdhinaH sutam || 7||
tasya tadvachanaM shrutvA dvAsthA rAjagR^ihaM yayuH |
sambhrAntamanasaH sarve tena vAkyena choditAH || 8||
te gatvA rAjasadanaM vishvAmitramR^iShiM tataH |
prAptamAvedayAmAsuH pratIhArAH patestadA || 9||
athAsthAnagataM bhUpaM rAjamaNDalamAlinam |
samupetya tvarAyukto yAShTIko.asau vyajij~napat || 10||
deva dvAri mahAtejA bAlabhAskarabhAsuraH |
jvAlAruNajaTAjUTaH pumA~nChrImAnavasthitaH || 11||
sabhAsurApatAkAntaM sAshvebhapuruShAyudham |
kR^itavA.nstaM pradeshaM yastejobhiH kIrNakA~nchanam || 12||
vIxyamANe tu yAShTike nivedayati rAjani |
vishvAmitro muniH prApta ityanuddhatayA girA || 13||
iti yAShTIkavachanamAkarNya nR^ipasattamaH |
sa samantrI sasAmantaH prottasthau hemaviShTarAt || 14||
padAtireva sahasA rAj~nAM vR^indena mAlitaH |
vasiShThavAmadevAbhyAM saha sAmantasa.nstutaH || 15||
jagAma tatra yatrAsau vishvAmitro mahAmuniH |
dadarsha munishArdUlaM dvArabhUmAvavasthitam || 16||
kenApi kAraNenorvItalamarkamupAgatam |
brAhmeNa tejasAkrAntaM xAtreNa cha mahaujasA || 17||
jarAjaraThayA nityaM tapaHprasararUxayA |
jaTAvalyA vR^itaskandhaM sasandhyAbhramivAchalam || 18||
upashAntaM cha kAntaM cha dIptamapratighAti cha |
nibhR^itaM chorjitAkAraM dadhAnaM bhAsvaraM vapuH || 19||
peshalenAtibhImena prasannenAkulena cha |
gambhIreNAtipurNena tejasA ra~njitaprabham || 20||
anantajIvitadashAsakhImekAmaninditAm |
dhArayantaM kare shlaxNAM kuNDImamlAnamAnasam || 21||
karuNAkrAntachetastvAtprasannairmadhurAxaraiH |
vIxaNairamR^iteneva sa.nsi~chantamimAH prajAH || 22||
yuktoyaj~nopavItA~NgaM dhavalapronnatabhruvam |
anantaM vismayaM chAntaH prayachChantamivexituH || 23||
munimAlokya bhUpAlo dUrAdevAnatAkR^itiH |
praNanAma galanmaulimaNimAnitabhUtalam || 24||
munirapyavanInAthaM bhAsvAniva shatakratum |
tatrAbhivAdayA~nchakre madhurodArayA girA || 25||
tato vasiShThapramukhAH sara eva dvijAtayaH |
svAgatAdikrameNainaM pUjayAmAsurAdR^itAH || 26||
dasharatha uvAcha |
asha~NkitopanItena bhAsvatA darshanena te |
sAdho svanugR^ihItAH smo raviNevAmbujAkarAH || 27||
yadanAdi yadaxuNNaM yadapAyavivarjitam |
tadAnandasukhaM prAptaM mayA tvaddarshamAnmune || 28||
adya vartAmahe nUnaM dhanyAnAM dhuri dharmataH |
bhavadAgamanasyeme yadvayaM laxyamAgatAH || 29||
evaM prakathayanto.atra rAjAno.atha maharShayaH |
AsaneShu sabhAsthAnamAsAdya samupAvishan || 30||
sa dR^iShTvA mAlitaM laxmyAbhItastamR^iShisattamam |
prahR^iShTavadano rAjA svayamarghyaM nyavedayat || 31||
sa rAj~naH pratigR^ihyArghyaM shAstradR^iShTena karmaNA |
pradaxiNaM prakurvantaM rAjAnaM paryapUjayat || 32||
sa rAjA pUjitastena prahR^iShTavadanastadA |
kushalaM chAvyayaM chaiva paryapR^ichChannarAdhipam || 33||
vasiShThena samAgamya prahasya munipu~NgavaH |
yathArhaM chArchayitvainaM paprachChAnAmayaM tataH || 34||
xaNaM yathArhamanyonyaM pUjayitvA sametya cha |
te sarve hR^iShTamanaso mahArAjaniveshane || 35||
yatochitAsanagatA mithaH sa.nvR^iddhatejasaH |
paraspareNa paprachChuH sarve.anAmayamAdarAt || 36||
upaviShTAya tasmai sa vishvAmitrAya dhImate |
pAdyamarghyaM cha gAM chaiva bhUyobhUyo nyavedayat || 37||
archayitvA tu vidhivadvishvAmitramabhAShata |
prA~njaliH prayato vAkyamidaM prItamAnA nR^ipaH || 38||
yathA.amR^itasya samprAptiryathA varShamavarShake |
yathAndhasyexaNaprAptirbhavadAgamanaM tathA || 39||
yatheShTadArasamparkAtputrajanmA.aprajAvataH |
svapnadR^iShTArthalAbhashcha bhavadAgamanaM tathA || 40||
yathepsitena sa.nyoga iShTasyAgamanaM yathA |
praNaShTasya yathA lAbho bhavadAgamanaM tathA || 41||
yathA harSho nabhogatyA mR^itasya punarAgamAt |
thathA tvadAgamAdbrahmansvAgataM te mahAmune || 42||
brahmalokanivAso hi kasya na prItimAvahet |
mune tavAgamastadvatsatyameva bravImi te || 43||
kashcha te paramaH kAmaH kiM cha te karavANyaham |
pAtrabhUto.asi me vipra prAptaH paramadhArmikaH || 44||
pUrvaM rAjarShishabdena tapasA dyotitaprabhaH |
brahmarShitvamanuprAptaH pUjo.asi bhagavanmayA || 45||
ga~NgAjalabhiShekeNa yathA prItirbhavenmama |
tathA tvaddarshanAtprItirantaH shItayatIva mAm || 46||
vigatechChAbhayakrodho vItarAgo nirAmayaH |
idamatyadbhutaM brahmanyadvAnmAmupAgataH . . 47||
shubhaxetragataM chAhamAtmAnamapakalmaSham |
chandramimba ivonmagnaM vedavedya vidA.nvara || 48||
sAxAdiva brahmaNo me tavAbhAgamanaM matam |
pUto.asmyanugR^ihItashcha tavAbhyAgamanAM mune || 49||
tvadAgamanapuNyena sAdho yadanura~njitam |
adya me saphalaM janma jIvitaM tatsujIvitam || 50||
tvAmihAbhyAgataM dR^iShTvA pratipUjya praNamya cha |
Atmanyeva namAmyantardR^iShTvenduM jaladhiryathA || 51||
yatkAryaM yena vArthena prApto.asi munipu~Ngava |
kR^itamityeva tadviddhi mAno.asIti sadA mama || 52||
svakArye na vimarshaM tvaM kartumarhasi kaushika |
bhagavannAstyadeyaM me tvayi yatpratipadyate || 53||
kAryasya na vichAraM tvaM kartumarhasi dharmataH |
kartA chAhamasheShaM te daivataM paramaM bhavAn || 54||
idamatimadhuraM nishamya vAkya.n
         shrutisukhamAtmavidA vinItamuktam |
prathitaguNayashA guNaiarvishiShTaM
         munivR^iShabhaH paramaM jagAma harSham || 55||

ityArShe shrImadavAsiShThamahArAmAyaNe vAlmIkIye
vairAgyaprakaraNe vishvAmitrAbhyAgamanaM nAma ShaShThaH sargaH ||  6
\medskip\hrule\medskip
sptamaH sargaH

shrIvAlmIkiruvAcha |
tachChrutvA rAjasi.nhasya vAkyamadbhutavistaram |
hR^iShTamAno mahAtejA vishvAmitro.abhyabhAShata || 1||
sadR^ishaM rAjashArdUla tavaivaitanmahItale |
mahAva.nshaprasUtasya vasiShThavashavartinaH || 2||
yattu me hR^idgataM vAkyaM tasya kAryavinirNayam |
kuru tvaM rAjashArdUla dharmaM samanupAlaya || 3||
ahaM dharmaM samAtiShThe siddhyarthaM puruSharShabha |
tasya vighnakarA ghorA rAxasA mama sa.nsthitAH || 4||
yadA yadA tu yaj~nena yaje.ahaM vibudhavrajAn |
tadA tadA tu me yaj~naM vinighnanti nishAcharAH || 5||
bahusho vihite tasminmayA rAxasanAyakAH |
akiraste mahIM yAge mA.nsena rudhireNa cha || 6||
avadhUte tathAbhUte tasminyAgakadambake |
kR^itashramo nirutsAhastasmAddeshAdupAgataH || 7||
na cha me krodhamutsraShTuM buddhirbhavati pArthiva |
tathAbhUtaM hi tatkarma na shApastasya vidyate || 8||
IdR^ishI yaj~nadIxA sA mama tasminmahAkratau |
tvatprasAdAdavighnenaprApayeyaM mahAphalam || 9||
trAtumarhasi mAmArtaM  sharaNArthinamAgatam |
arthinAM yannirAshatvaM sattame.abhibhavo hi saH || 10||
tavAsti tanayaH shrImAndR^iptashArdUlavikramaH |
mahendrasadR^isho vIrye rAmo raxovidAraNaH || 11||
taM putraM rAjashArdUla rAmaM satyaparAkramam |
kAkapaxadharaM shUraM jyeShThaM me dAtumarhasi || 12||
shakto hyeSha mayA gupto divyena svena tajasA |
rAxasA ye.apakartArasteShAM mUrdhavinigrahe || 13||
shreyashchAsya kariShyAmi bahurUpamanantakam |
trayANAmapi lokAnAM yena pUjyo bhaviShyati || 14||
na cha te rAmamAsAdya sthAtuM shaktA nishAcharAH |
kruddhaM kesariNaM dR^iShTvA vanareNa ivaiNakAH || 15||
teShAM na chAnyaH kAkusthAdyoddhumutsahate pumAn |
R^ite kesariNaH kruddhAnmattAnAM kariNAmiva || 16||
vIryotsiktA hi te pApAH kAlakUTopamA raNe |
khardUShaNayorbhR^ityAH kR^itAntAH kupitA iva || 17||
rAmasya rAjashArdUla sahiShyante na sAyakAn |
anAratagatA dhArA jaladasyeva pA.nsavaH || 18||
na cha putrakR^itaM snehaM kartumarhasi pArthiva |
na tadasti jagatyasminyanna deyaM mahAtmanAm || 19||
hanta nUnaM vijAnAmi hatA.nstAnviddhi rAxasAn |
nahyasmadAdayaH prAj~nAH sandigdhe sampravR^ittayaH || 20||
ahaM vedmi mahAtmAnaM rAmaM rAjIvalochanam |
vasiShThashcha mahAtejA ye chAnye dIrghadarshinaH || 21||
yadi dharmo mahattvaM cha yashaste manasi sthitam |
tanmahyaM samabhipretamAtmajaM dAtumarhasi || 22||
dasharAtrashcha me yaj~no yasminrAmeNa rAxasAH |
hantavyA vighnakartAro mama yaj~nasya vairiNaH || 23||
atrApyanuj~nAM kAkutstha dadatAM tava mantriNaH |
vasiShThapramukhAH sarve tena rAmaM visarjaya || 24||
nAtyeti kAlaH kAlaj~na yathAyaM mama rAghava |
tathA kuruShva bhadraM te mA cha shoke manaH kR^ithAH || 25||
kAryamaNvapi kAle tu kR^itametyupakAratAm |
mahadapyupakAro.api riktatAmetyakAlataH || 26||
ityevamuktvA dharmAtmA dharmArthasahitaM vachaH |
virarAma mahAtejA vishvAmitro munishvaraH ||  27||
shrutvA vacho munivarasya mahAnubhAva-
         stUShNImatiShThadupapannapadaM sa vaktum |
no yuktiyuktakathanena vinaiti toSha.n
         dhImAnapUritamano.abhimatashcha lokaH || 28||

ityArShe shrImadvAsiShThamahArAmAyaNe vAlmIkIye
vairAgyaprakaraNe vishvAmitravAkyaM nAma saptamaH sargaH || 7
\medskip\hrule\medskip
aShTamaH sargaH

vAlmIkiruvAcha
tachChrutvA rAjashArdUlo vishvAmitrasya bhAShitam |
muhUrtamAsInnishcheShTaH sadenya chetamabravIt || 1||
UnaShoDashavarSho.ayaM rAmo rAjIvalochanaH |
na yuddhayogyatAmasya pashyAmi saha rAxasaiH || 2||
iyamaxauhiNI pUrNA yasyAH patirahaM prabho |
tayA parivR^ito yuddhaM dAsyAmi pishitAshinAm || 3||
ime hi shUrA vikrAntA bhR^ityA mantravishAradAH |
ahaM chaiShAM dhanuShpANirgoptA samaramUrdhani || 4||
ebhiH sahaiva vIrANAM mahendramahatAmapi |
dadAmi yuddhaM mattAnAM kariNAmiva kesarI || 5||
bAlo rAmastvanIkeShu na jAnAti balAbalam |
antaHpurAdR^ite dR^iShTA nAnenAnyA raNAvaniH || 6||
na shastraiH paramairyukto na cha yuddhavishAradaH |
navAstraiH shUtakoTinAM tajj~naH samarabhUmiShu || 7||
kevalaM puShpakhaNDeShu nagaropavaneShu cha |
udyAnavanaku~njeShu sadaiva parishIlanam || 8||
vivartumeSha jAnAti saha rAjakumArakaiH |
kIrNapuShpopahArAsu svakAsvajirabhUmiShu || 9||
adya tvatitarAM brahmanmama bhAgyaviparyayAt |
himeneva hi padmAbhaH sampanno hariNaH kR^ishaH || 10||
nAttumannAni shaknoti na vihartuM gR^ihAvanim |
antaHkhedaparItAtmA tUShNIM tiShThati kevalam || 11||
sadAraH sahabhR^ityo.ahaM tatkR^ite muninAyaka |
sharadIva payovAho nUnaM niHsAratAM gataH || 12||
IdR^isho.asau suto bAla AdhinA.atha vashIkR^itaH |
kathaM dadAmi taM tubhyaM yoddhuM saha nishAcharaiH || 13||
api bAlA~NganAsa~NgAdapi sAdho sudhArasAt |
rAjyAdapi sukhAyaiva putrasneho mahAmate || 14||
ye durantA mahArambhAstriShu lokeShu khedadAH |
putrasnehena santo.api kurvate tAnasa.nshayam || 15||
asavo.atha dhanaM dArAstyajyante mAnavaiH sukham |
na putro munishArdUla svabhAvo hyeSha jantuShu || 16||
rAxasAH krUrakarmANaH kUTayuddhavishAradAH |
rAmastAnyodhayatvitthaM yuktirevAtiduHsahA || 17||
viprayukto hi rAmeNa muhUrtamapi notsahe |
jIvituM jIvitAkA~NxI na rAmaM neturmarhasi || 18||
navavarShasahasrANi mama jAtasya kaushika |
duHkhenotpAditAstyete chatvAraH putrakA mayA || 19||
pradhAnabhUtasteShveva rAmaH kamalalochanaH |
taM vineha trayo.apyanye dhArayanti na jIvitam || 20||
sa eva rAmo bhavatA nIyate rAxasAnprati |
yadi tatputrahInaM tvaM mR^itamevAshu viddhi mAm || 21||
chaturNAmAtmajAnAM hi prItiratraiva me parA |
jyeShThaM dharmamayaM tasmAnna rAmaM netumarhasi || 22||
nishAcharabalaM hantuM mune yadi tavepsitam |
chatura~NgasamAyuktaM mayA saha balaM naya || 23||
ki.nvIryA rAxasAste tu kasya putrAH kathaM cha te |
kiyatpramANAH ke chaiva iti varNaya me sphuTam || 24||
kathaM tena prakartavyaM teShAM rAmeNa raxasAm |
mAmakairbAlakairbrahmanmayA vA kUTayodhinAm || 25||
sarvaM me sha.nsa bhagavanyathA teShAM mahAraNe |
sthAtavyaM duShTabhAgyAnAM vIryotsiktA hi rAxasAH || 26||
shrUyate hi mahAvIryo rAvaNo nAma rAxasaH |
sAxAdvaishravaNabhrAtA putro vishravaso muneH || 27||
sa chettava makhe vighnaM karoti kila durmatiH |
tatsa~NgrAme na shaktAH smo vayaM tasya durAtmanaH || 28||
kAle kAle pR^ithabrahmanbhUrivIryavibhUtayaH |
bhUteShvabhyudayaM yAnti pralIyate cha kAlataH || 29||
adyAsmi.nstu vayaM kAla  rAvaNAdiShu shatruShu |
na samarthAH puraH sthAtuM niyatereSha nishchayaH || 30||
tasmAtprasAdaM dharmaj~na kuru tvaM mama putrake |
mama chaivAlpabhAgyasya bhavAnhi paradaivatam || 31||
devadAnavagandharvA yaxAH patagapannagAH |
nashaktA rAvaNaM yoddhuM kiM punaH puruShA yudhi || 32||
mahAvIryavatAM vIryamAdatte yudhi rAxasaH |
tena sArdhaM na shaktAH sma sa.nyuge tasya bAlakaiH || 33||
ayamanyatamaH kAlaH pelavIkR^itasajjanaH |
rAghavo.api gato dainyaM yato vArdhakajarjaraH || 34||
athavA lavaNaM brahmanyaj~naghnaM taM madhoH sutam |
kathayatvasuraprakhyaM naiva moxyAmi putrakam || 35||
sundopasundayoshchaiva putrai vaivasvatopamau |
yaj~navighnakarau brUhi na te dAsyAmi putrakam || 36||
atha neShyasi chetbrahma.nstaddhato.asmyahameva te |
anyathA tu na pashyAmi shAshvataM jayamAtmanaH || 37||
ityuktvA mR^idu vachanaM raghUdvaho.asau
         kallole munimatasa.nshaye nimagnaH |
nAj~nAsItxaNamapi nishchayaM mahAtmA
         prodvIchAviva jaladhau sa muhyamAnaH || 38||

ityArShe shrImadvAsiShThamahArAmAyaNe vAlmIkIye
vairAgyaprakaraNe dasharathavAkyaM nAma aShTamaH sargaH || 8||
\medskip\hrule\medskip
navamaH sargaH

vAlmIkiruvAcha
tachChutvA vachanaM tasya snehaparyAkulexaNam |
samanyuH kaushiko vAkyaM pratyuvAcha mahIpatim || 1||
kariShyAmiti sa.nshrutya pratij~nAM hAtumarhasi |
sa bhavAnkesarI bhUtvA mR^igatAmiva vA~nChasi || 2||
rAghavANAmayukto.ayaM kulasyAsya viparyayaH |
na kadAchana jAyante shItA.nshoruShNarashmayaH || 3||
yadi tvaM na xamo rAjangamiShyAmi yathAgatam |
hInapratij~na kAkutstha sukhI bhava sabAndhavaH || 4||
vAlmIkiruvAcha
tasminkopaparIte.atha vishvAmitre mahAtmani |
chachAla vasudhA kR^itsnA surA.nshcha bhayamAvishat || 5||
krodhAbhibhUtaM vij~nAya jaganmitraM mahAmunim |
dhR^itimAnsuvrato dhImAnvasiShTho vAkyamabravIt || 6||
vasiShTha uvAcha |
ixkavAkUNAM kule jAtaH sAxAddharma ivAparaH |
bhavAndasharathaH shrImA.nstrailokyaguNabhUShitaH || 7||
dhR^itimAnsuvrato bhUtvA na dharmaM hAtumarhasi |
triShu lokeShu vikhyAto dharmeNa yashasA yutaH || 8||
svadharmaM  pratipadyasva na dharmaM hAtumarhasi |
munestribhuvaneshasya vachanaM kartumarhasi || 9||
kariShyAmIti sa.nshrutya tatte rAjannakurvataH |
iShTApUrtaM hareddharmaM tasmAdrAmaM visarjaya ||  10||
ixvAkuva.nshajAto.api svayaM dasharatho.api san |
na pAlayasi dedvAkyaM ko.aparaH pAlayiShyati || 11||
yuShmadAdipraNItena vyavahAreNa jantavaH |
maryAdAM na vimu~nchanti tAM na hAtuM tvamarhasi || 12||
guptaM puruShasi.nhena jvalanenAmR^itaM yathA |
kR^itAstramakR^itAstraM vA nainaM shaxyanti rAxasAH || 13||
eSha vigrahavAndharma eSha vIryavatAM varaH |
eSha buddhyA.adhiko loke tapasAM cha parAyaNam || 14||
eSho.astraM vividhaM vetti trailokye sacharAchare |
naitadanyaH pumAnvetti na cha vetsyati kashchana || 15||
na devA narShayaH kechinnAsurA na cha rAxasAH |
na nAgA yaxagandharvAH sametAH sadR^ishA muneH || 16||
astramasmai kR^ishAshvena paraiH paramadurjayam |
kaushikAya purA dattaM yadA rAjyaM samanvagAt || 17||
te hi putrAH kR^ishAshvasya prajApatisutopamAH |
enamanvacharanvIrA dIptimanto mahaujasaH || 18||
jayA cha suprabha chaiva dAxAyaNyau sumadhyame |
tathostu yAnyapatyAni shataM paramadurjayam || 19||
pa~nchAshataM sutA~njaj~ne jayA labdhavarA purA |
vadhArthaM surasainyAnAM te xamAH kAmachAriNaH || 20||
suprabhA janayAmAsa putrAnpa~nchAshataM parAn |
sa~NgharShAnnAma durdharvAndurAkArAnbalIyasaH || 21||
eva.nvIryo mahAtejA vishvAmitro jaganmuniH |
na rAmagamane buddhiM viklavAM kartumarhasi || 22||
asminmahAsattvatame munIndre
         sthite samIpe puruShasya sAdho |
prApte.api mR^ityAvamaratvameti
         mA dInatAM gachCha yathA vimUDhaH || 23||

ityArShe shrImadvAsiShThamahArAmAyaNe vAlmIkIye
vairAgyaprakaraNe vasiShThasamAshvAsanaM nAma navamaH sargaH || 9||
\medskip\hrule\medskip
dashamaH sargaH

vAlmIkiruvAcha
tathA vasiShThe bruvati rAjA dasharathaH sutam |
samprahR^iShTamanA rAmamAjuhAva salaxmaNam || 1||
dasharatha uvAcha |
pratihAra mahAbAhuM rAmaM satyaparAkramam |
salaxmaNamavighnena puNyArthaM shIghramAnaya || 2||
iti rAj~nA visR^iShTo.asau gatvAntaHpuramandiram |
muhUrtamAtreNAgatya samuvAcha mahIpatim || 3||
deva dordalitAsheSharipo rAmaH svamandire |
vimanAH sa.nsthito rAtrau ShaTpadaH kamale yathA || 4||
AgachChAmi xaNeneti vakti dhyAyati chaikataH |
na kasyachichcha nikaTe sthAtumichChati khinnadhIH || 5||
ityuktastena bhUpAlastaM rAmAnucharaM janam |
sarvamAshvAsayAmAsa paprachCha cha yathAkramam || 6||
kathaM kIdR^igvidho rAma iti pR^iShTo mahIbhR^itA |
rAmabhR^ityajanaH khinno vAkyamAha pahIpatim || 7||
dehayaShTimimAM deva dhArayanta ime vayam |
khinnAH khede parimlAnatanau rAme sute tava || 8||
rAmo rAjIvapatrAxo yataHprabhR^iti chAgataH |
saviprastIrthayAtrAyAstataHprabhR^iti durmanAH || 9||
yatnaprArthanayAmAskaM nijavyApAramAhnikam |
so.ayamAmlAnavadanaH karoti na karoti vA || 10||
snAnadevArchanAdAnabhojanAdiShu durmanAH |
prArthito.api hi nAtR^ipterashrAtyashanamIshvaraH || 11||
lolAntaHpuranArIbhiH kR^itadolAbhira~NgaNe |
nacha krIDati lIlAbhirdhArAbhiriva chAtakaH || 12||
mANikyamukulaprotA keyUrakaTakAvaliH |
nAnandayatiu taM rAjandyauH pAtaviShayaM yathA || 13||
krIDadvadhUvilokeShu vahatkusumavAyuShu |
latAvalayageheShu bhavatyati viShAdavAn || 14||
yaddravyamuchitaM svAdu peshalaM chittahAri cha |
bAShpapUrNexaNa eva tenaiva parikhidyate || 15||
kimimA duHkhadAyinyaM prasphurantIH purA~NganAH |
iti nR^ittavilAseShu kAminIH parinindati . 16||
bhojanaM shayanaM yAnaM vilAsaM snAnamAsanam |
unmAttacheShTita iva nAbhinandatyaninditam || 17||
kiM sampadA kiM vipadA kiM gehena kimi~NgitaiH |
sarvamevAsadityuktvA tUShNImeko.avatiShThate || 18||
nodeti parihAseShu na bhogeShu nimajjati |
na cha tiShThati kAryeShu maunamevAvalambate || 19||
vilolAlakavallaryo helAvalitalochanAH |
nAnandayanti taM nAryo mR^igyo vanataruM yathA || 20||
ekAnteShu diganteShu tIreShu vipineShu cha |
ratimAyAtyaraNyeShu vikrIta iva jantuShu || 21||
vastrapAnAshanAdAnaparA~NmukhatayA tayA |
parivrADdharmiNaM bhUpa so.anuyAti tapasvinam || 22||
eka eva vasandeshe janashUnye janeshvara |
na hasatyekayA buddhyA na gAyati na roditi || 23||
baddhapadmAsanaH shUnyamanA vAmakarasthale |
kapolatalamAdhAya kevalaM paritiShThati || 24||
nAbhimAnamupAdatte nacha vA~nChati rAjatAm |
nodeti nAstamAyAti sukhaduHkhAnuvR^ittiShu || 25||
na vidmaH kimasau yAti kiM karoti kimIhate |
kiM dhyAyati kimAyAti kathaM kimanudhAvati || 26||
pratyahaM kR^ishatAmeti pratyahaM yAti pANDutAm |
virAgaM pratyahaM yAti sharadanta eva drumaH || 27||
anuyAtau tathaivaitau rAjachChatrughnalaxmaNau |
tAdR^ishAveva tasyaiva pratibimbAviva sthitau || 28||
bhR^ityai rAjabhirambAbhiH sampR^iShTo.api punaH punaH |
uktvA na ki~nchideveti tUShNImAste nirIhitaH || 29||
ApAtamAtrahR^idyeShu mA bhogeShu manaH kR^ithAH |
iti pArshvagataM bhavyAmanushAsti suhR^ijjanam || 30||
nAnAvibhavaramyAsu strIShu goShThIgatAsu cha |
purasthitamivAsneho nAshamevAnupashyati || 31||
nItamAyuranAyAsapadaprAptivivarjitaiH |
cheShTitairiti kAkalyA bhUyobhUyaH pragAyati || 32||
samrADbhaveti pArshvasthaM vadantamanujIvinam |
pralapantamivonmattaM hasatyanyamanA muniH || 33||
na proktamAkarNayati Ixate na purogatam |
karotyavaj~nAM sarvatra susametyApi vastuni || 34||
apyAkAshasarojinyA apyAkAshamahAvane |
itthametanmana iti vismayo.asya na jAyate || 35||
kAntAmadhyagatasyApi mano.asya madaneShavaH |
na bhedayanti durbhedyaM dhArA iva mahopalam || 36||
ApadAmekamAvAsamabhivA~nChasi kiM dhanam |
anushiShyeti sarvasvamarthine samprayachChati || 37||
iyAmApadiyaM sampadityevaM kalpanAmayaH |
manaso.abhudito moha iti shlokAnpragAyati || 38||
hA hato.ahamanAtho.ahamityAkrandaparo.api san |
n jano yAti vairAgyaM chitramityeva vaktyasau || 39||
raghukAnanashAlena rAmeNa ripughAtinA |
bhR^ishamitthaM sthitenaiva vayaM khedamupAgatAH || 40||
na vidmaH kiM mahAbAho tasya tAdR^ishachetasaH |
kurmaH kamalapatrAxa gatiratra hi no bhavAn || 41||
rAjAnamathavA vipramupadeShTAramagrataH |
hasatyaj~namivAvyagraH so.avadhIrayati prabho || 42||
yadevedamidaM sphAraM jagannAma yadutthitam |
naitadvastu nachaivAhamiti nirNIya sa.nsthitaH || 43||
nArau nAtmani no mitre na rAjye na cha mAtari |
na sampadA na vipadA tasyAsthA na vibho bahiH || 44||
nirastAstho nirAsho.asau nirIho.asau nirAspadaH |
na mUDho na cha mukto.asau tena tapyAmahe bhR^isham || 45||
kiM dhanena kimambAbhiH kiM rAjyena kimIhayA |
iti nishchayavAnantaH prANatyAgaparaH sthitaH . || 46||
bhoge.apyAyuShi rAjyeShu mitre pitari mAtari |
paramudvegamAyAtashchAtako.avagrahe yathA || 47||
iti toke samAyAtAM shAkhAprasarashAlinIm |
ApattAmalamuddhartuM samudetu dayAparaH || 48||
tasya tAdR^iksvabhAvasya samagravibhavAnvitam |
sa.nsArajAlamAbhogi prabho prativiShAyate || 49||
IdR^ishaH syAnmahAsattvaH ka ivasminmahItale |
prakR^ite vyavahAre taM yo niveshayituM xamaH || 50||
manasi mohamapAsya mahAmanAH
         sakalamArtitamaH kila sAdhutAm |
saphalatAM nayatIha tamo haran
         dinakaro bhuvi bhAskaratAmiva || 51||

ityArShe shrImadvAsiShThamahArAmAyaNe vAlmIkIye
vairAgyaprakaraNe rAghavaviShAdo nAma dashamaH sargaH || 10||
\medskip\hrule\medskip
ekAdashaH sargaH

vishvAmitra uvAcha |

evaM chettanmahAprAj~nA bhavanto raghunandanam |
ihAnayantu tvaritA hariNaM hariNA iva || 1||
eSha moho raghupaternApadbhyo na cha rAgataH |
vivekavairAgyavato bodha eva mahodayaH || 2||
ihayAtu xaNAdrAma iha chaiva vayaM xaNAt |
mohaM tasyApaneShyAmo mAruto.adrerghanaM yathA || 3||
etasminmArjite yuktyA mohe sa raghunandanaH |
vishrAntimeShyati pade tasminvayamivottame || 4||
satyatAM muditAM praj~nAM vishrAntimapatApatAm |
pInatAM varavarNatva pItAmR^ita ivaiShyati || 5||
nijAM cha prakR^itAmeva vyavahAraparamparAm |
paripUrNamanA mAnya AchariShyatyakhaNDitam || 6||
bhaviShyati mahAsattvo j~nAtalokaparAvaraH |
sukhaduHkhadashAhInaH samaloShTAshmakA~nchanaH || 7||
ityukte muninAthena rAjA sampUrNamAnasaH |
prAhiNodrAmamAnetuM bhUyo dUtaparamparAm || 8||
etAvatAtha kAlena rAmo nijagR^ihAsanAt |
pituH sakAshamAgantumutthito.arka ivAchalAt || 9||
vR^itaH katipayairbhR^ityairbhrAtR^ibhyAM cha jagAma ha |
tatpuNyaM svapituH sthAnaM svargaM surapateriva || 10||
dUrAdeva dadarshAsau rAmo dasharathaM tadA |
vR^itaM rAjasamUhena devaugheneva vAsavam || 11||
vasiShThavishvamitrAbhyAM sevitaM pArshvayordvayoH |
savashAstrArthatajj~nena mantrivR^indena mAlitam || 12||
chAruchAmarahastAbhiH kAntAbhiH samupAsitam |
kakubbhiriva mUrtAbhiH sa.nsthitAbhiryathochitam || 13||
vasiShThavishvAmitrAdyAstathA dasharathAdayaH |
dadR^ishU rAghavaM durAdupAyAntaM guhopamam || 14||
sattvAvaShTabdhagarbheNa shaityeneva himAchalam |
shritaM sakalasevyena gambhIreNa sphuTena cha . || 15||
saumyaM samaM shubhAkAraM vinayodAramAnasam |
kAntopashAntavapuShaM parasyArthasya bhAjanam || 16||
samudyadyauvanArambhaM vR^iddhopashamashobhanam |
anudvignamanAnandaM pUrNaprAyamanoratham || 17||
vichAritajagadyAtraM pavitraguNagocharam |
mahAsattvaikalobhena guNairiva samAshritam || 18||
udAramAryamApUrNamantaH karaNakoTaram |
avixubhitayA vR^ittyA darshayantamanuttamam || 19||
eva~NguNagaNAkIrNo dUrAdeva raghUdvahaH |
parimeyasmitAchChAchChasvahArAmbarapallavaH || 20||
praNanAma chalachchAruchUDAmaNimarIchinA |
shirasA vasudhAkampaloladevAchalashriyA || 21||
evaM munIndre bruvati pituH pAdAbhivandanam |
kartumabhuAjagAmAtha rAmaH kamalalochanaH || 22||
prathamaM pitaraM pashchAnmunI mAnyaikamAnitau |
tato viprA.nstato bandhu.nstato gurugaNAnsuhR^it || 23||
jagrAha cha tato dR^iShTyA manA~NmUrdhnA tathA girA |
rAjalokena vihitAM tAM praNAmaparamparAm || 24||
vihitAshIrmunibhyAM tu rAmaH susamamAnasaH |
AsasAda pituH puNyaM samIpaM surasundaraH || 25||
pAdAbhivandanaparaM tamathAsau mahIpatiH |
shirasyabhyAlili~NgAshu chuchumba cha punaH punaH || 26||
shatrughnaM laxmaNaM chaiva tathaiva paravIrahA |
Alili~Nga ghanasneho rAjaha.nso.ambuje yathA || 27||
utsa~Nge putra tiShTheti vadatyatha mahIpatau |
bhUmau parijanAstIrNe so.n.ashuke.atha nyavixata || 28||
rAjovAcha |
putra prAptavivekastvaM kalyANAnAM cha bhAjanam |
jaDavajjirNayA buddhyA khedAyAtmA na dIyatAm || 29||
vR^iddhavipraguruproktaM tvAdR^ishenAnutiShThatA |
padamAsAdyate puNyaM na mohamanudhAvatA || 30||
tAvadevA.a.apado dUre tiShThanti paripelavAH |
yAvadeva na mohasya prasaraH putra dIyate || 31||
shrIvasiShTha uvAcha |
rAjaputra mahAbAho shUrastvaM vijitAstvayA |
duruchChedA durArambhA apyamI viShayArayaH || 32||
kimatajj~na ivAj~nAnAM yogye vyAmohasAgare |
vinimajjasi kallolabahule jADyashAlini || 33||
vishvAmitra uvAcha |
chalannIlotpalaavyUhasamalochanalolatAm |
brUhi chetaHkR^itAM tyakvA hetunA kena muhyasi || 34||
ki.nniShThAH ke cha te kena kiyantaH kAraNena te |
AdhayaH pravilumpanti mano gehamivAkhavaH || 35||
manye nAnuchitAnAM tvamAdhInAM padamuttamam |
Apatsu chA.aprayojyaM te nihInA api chAdhayaH || 36||
yathAbhimatamAshu tvaM brUhi prApsyasi chAnagha |
sarvameva punaryena bhetsyante tvAM tu nAdhayaH || 37||
ityuktamasya sumate raghuva.nshaketu-
rAkaNyaM vAkyamuchitArthavilAsagarbham |
tatyAja khedamabhigarjati vArivAhe
barhI yathA tvanumitAbhimatArthasiddhiH || 38||

ityArShe shrImadvAsiShThamahArAmAyaNe vAlmIkIye
vairAgyaprakaraNe rAghavasamAshvAsanaM nAmaikAdashaH sargaH||
11||
\medskip\hrule\medskip
dvAdashaH sargaH

vAlmIkiruvAcha |

iti pR^iShTo munIndreNa samAshvasya cha rAghavaH |
uvAcha vachanaM chAru paripUrNArthamantharam || 1||
shrIrAma uvAcha |
bhagavanbhavatA pR^iShTo yathAvadadhunA.akhilam |
kathayAmyahamaj~no.api ko la~Nghayati sadvachaH || 2||
ahaM tAvadayaM jAto nije.asminpitR^isadmani |
krameNa vR^iddhiM samprAptaH prAptavidyashcha sa.nsthitaH || 3||
tataH sadAchAraparo bhUtvAhaM muninAyaka |
vihR^itastIrthayAtrArthamurvImambudhimekhalAm || 4||
etAvatAtha kAlena sa.nsArAsthAmimAM haran |
samudbhUto manasi me vichAraH so.ayamIdR^ishaH || 5||
vivekena parItAtmA tenAhaM tadanu svayam |
bhoganIrasayA buddhyA pravichAritavAdinam || 6||
ki.nnAmedaM bata sukhaM yeyaM sa.nsArasantatiH |
jAyate mR^itaye loko mriyate jananAya cha . || 7||
asthirAH sarva eveme sacharAcharacheShTitAH |
ApadAM patayaH pApA bhAvA vibhavabhUmayaH || 8||
ayaHshalAkAsadR^ishAH parasparamasa~NginaH |
shliShyante kevalaM bhAvA manaHkalpanayA svayA || 9||
manaHsamAyattamidaM jagadAbhogi dR^ishyate |
manashchAsadivAbhAti kena sma parimohitAH || 10||
asataiva vayaM kaShTaM vikR^iShTA mUDhabuddhayaH |
mR^igatR^iShNAmbhasA dUre vane mugdhamR^igA iva || 11||
na kenachichcha vikrItA vikrItA eva sa.nsthitAH |
bata mUDhA vayaM sarve jAnAnA api shAmbaram || 12||
kimeteShu prapa~ncheShu bhogA nAma sudurbhagAH |
mudhaiva hi vayaM mohAtsa.nsthitA baddhabhAvanAH || 13||
A j~nAtaM bahukAlena vyarthameva vayaM vane |
mohe nipatitA mugdhAH shvabhre mugdhA mR^igA iva || 14||
kiM me rAjyena kiM bhogaiH ko.ahaM kimidamAgatam |
yanmithyaivAstu tanmithyA kasya nAma kimAgatam || 15||
evaM vimR^ishato brahmansarveShveva tato mama |
bhAveShvaratirAyAtA pathikasya maruShviva || 16||
tadetadbhagavanbrUhi kimidaM pariNashyati |
kimidaM jAyate bhUyaH kimidaM parivardhate || 17||
jarAmaraNamApachcha jananaM sampadastathA |
AvirbhAvatirobhAvairvivardhante punaH punaH || 18||
bhogaistaireva taireva tuchChAirvayamamI kila |
pashya jarjaratAM nItA vAtairiva giridrumAH || 19||
achetanA iva janAH pavanaiH prANanAmabhiH |
dhvanantaH sa.nsthitA vyarthaM yathA kIchakaveNavaH || 20||
shAmyatIdaM kathaM duHkhamiti tapto.asmi chintayA |
jaraddruma ivogreNa koTarasthena vahninA || 21||
sa.nsAraduHkhapAShANanIrandhrahR^idayo.apyaham |
nijalokabhayAdeva galadbAShpaM na rodimi || 22||
shUnyA manmukhavR^ittIstAM shuShkarodananIrasAH |
viveka eva hR^itsa.nstho mamaikAnteShu pashyati || 23||
bhR^ishaM muhyAmi sa.nsmR^itya bhAvAbhAvamayIM sthitim |
dAridryeNeva subhago dUre sa.nsAracheShTayA || 24||
mohayanti manovR^ittiM khaNDayanti guNAvalim |
duHkhajAla prayachChanti vipralambhaparAH shriyaH || 25||
chintAnichayachakrANi nAnandAya dhanAni me |
samprasUtakalatrANi gR^ihANyugrApadAmiva || 26||
vividhadoShadashAparichintanai-
rvitatabha~NgurakAraNakalpitaiH |
mama na nirvR^itimeti mano mune
nigaDitasya yathA vanadantinaH || 27||
khalAH kAlekAle nishi nishitamohaikamihikA  -
gatAloke loke viShayashatachaurAH suchaturAH |
pravR^itAH prodyuktA dishidishi vivekaikaharaNe
raNe shaktAsteShAM ka iva viduShaH projjhyasubhaTAH || 28||

ityArShe shrImadvAsiShThamahArAmAyaNe vAlmIkIye
vairAgyaprakaraNe prathamaparitApo nAma dvAdashaH sargaH || 12||
\medskip\hrule\medskip
trayodashaH sargaH

shrIrAma uvAcha |
iyamasminsthitodArA sa.nsAre parikalpitA |
shrIrmune parimohAya sApi nUnaM kadarthadA || 1||
ullAsabahulAnantakallolAnalamAkulAn |
jaDAnpravahati sphArAnprAvR^iShIva tara~NgiNI || 2||
chintAduhitaro bahvyo bhUridurlalitaidhitAH |
cha~nchalAH prabhavantyasyAstara~NgAH sarito yathA || 3||
eShA hi padamekatra na nibadhnAti durbhagA |
dagdhevAniyatAchAramitashchetashcha dhAvati || 4||
janayantI paraM dAhaM parAmR^iShTA~NgikA satI |
vinAshameva dhatte.antardIpalekheva kajjalam || 5||
guNAguNavichAreNa vinaiva kila pArshvagam |
rAjaprakR^itivanmUDhA durArUDhA.avalambate || 6||
karmaNA tenatenaiShA vistAramanugachChati |
doShAshIviShavegasya yatxIraM vistarAyate || 7||
tAvachChItamR^idusparshAH pare sve cha jane janAH |
vAtyayeva himaM yAvachChriyA na paruShIkR^itAH || 8||
prAj~nAH shUrAH kR^itaj~nAshcha peshalA mR^idavashcha ye |
pA.nsumuShTyeva maNayaH shriyA te malinIkR^itAH || 9||
na shrIH sukhAya bhagavanduHkhAyaiva hi vardhate |
guptA vim=nAshanaM dhatte mR^itiM viShalatA yathA || 10||
shrImAnajananindyashcha shUrashchApyavikatthanaH |
samadR^iShTiH prabhushchaiva durlabhAH puruShAstrayaH || 11||
eShA hi viShamA duHkhabhoginAM gahanA guhA |
ghanamohagajendrANAM vindhyashailamahAtaTI || 12||
satkAryapadmarajanI duHkhakairavachandrikA |
sudR^iShTidIpikAvAtyA kallolaughatara~NgiNI || 13||
sambhramAbhrAdipadavI viShAdaviShavardhinI |
kedArikA vikalpAnAM khedAyabhayabhoginI || 14||
himaM vairAgyavallInAM vikArolUkayAminI |
rAhuda.nShTrA vivekendoH saujanyAmbhojachandrikA || 15||
indrAyudhavadAlolanAnArAgamanoharA |
lolA taDidivotpannadhva.nsinI cha jaDAshrayA || 16||
chApalAvajitAraNyanakulI nakulInajA |
vipralambhanatAtparyajitogramR^igatR^iShNikA || 17||
laharIvaikarUpeNa padaM xaNamakurvatI |
chalA dIpashikhevAtidurj~neyagatigocharA || 18||
si.nhIva vigrahavyagrakarIndrakulapothinI |
khaDgadhAreva shishirA tIxNatIxNAshayAshrayA || 19||
nAnayApahR^itArthinyA durAdhiparilInayA |
pashyAmyabhavyayA laxmyA ki~nchidduHkhAdR^ite sukham || 20||
dUreNotsAritA.alaxmyA punareva tamAdarAt |
aho batAshliShyatIva nirlajja durjanA sadA || 21||
manoramA karShati chittavR^itti.n
kadarthasAdhyA xaNabha~NgurA cha |
vyAlAvalIgAtravivR^ittadehA
shvabhrotthitA puShpalateva laxmIH || 22||

ityArShe shrImadvAsiShThamahArAmAyaNe vAlmIkIye
vairAgyaprakaraNe laxmInirAkaraNaM nAma trayodashaH sargaH || 13||
\medskip\hrule\medskip
chaturdashaH sargaH

shrIrAma uvAcha |

AyuH pallavakoNAgralambAmbukaNabha~Nguram |
unmattamiva santyajya yAtyakANDe sharIrakam || 1||
viShayAshIviShAsa~NgaparijarjarachetasAm |
aprauDhAtmavivekAnAmAyurAyAsakAraNam || 2||
ye tu vij~nAtavij~neyA vishrAntA vitate pade |
bhAvAbhAvasamAshvAsamAyusteShAM sukhAyate || 3||
vayaM parimitAkArapariniShThitanishchayAH |
sa.nsArabhrataDitpu~nje mune nAyuShi nirvR^itAH || 4||
yujyate veShTanaM vAyorAkAshasya cha khaNDanam |
grathanaM cha tara~NgANAmAsthA nAyuShi yujyate || 5||
pelavaM sharadIvAbhramasneha iva dIpakaH |
tara~Ngaka ivAlolaM gatamevopalaxyate || 6||
tara~NgaM pratibimbenduM taDitpu~njaM nabhombujam |
grahItumAsthAM badhnAmi na tvAyuShi hatasthitau || 7||
avishrAntamanAH shUnyamAyurAtatamIhate |
duHkhAyaiva vimUDhA.antargarbhamashvatarI yathA || 8||
sa.nsArasa.nsR^itAvasyAM pheno.asminsargasAgare |
kAyavallyAmbhaso brahma~njIvitaM me na rochate || 9||
prApyaM samprApyate yena bhUyo yena na shochyate |
parAyA nirvR^iteH sthAnaM yattajjIvitamuchyate || 10||
taravo.api hi jIvanti jIvanti mR^igapaxiNaH |
sa jIvati mano yasya mananena na jIvati || 11||
jAtAsta eva jagati jantavaH sAdhujIvitAH |
ye punarneha jAyante sheShA jaraThagardabhAH || 12||
bhAro.avivekinaH shAstraM bhAro j~nAnaM cha rAgiNaH |
ashAntasya mano bhAro bhAro.anAtmavido vapuH || 13||
rUpamAyurmano buddhiraha~NkArastathehitam |
bhAro bhAradharasyeva sarvaM duHkhAya durdhiyaH || 14||
avishrAntamanApurNamApadAM paramAspadam |
nIDaM rogaviha~NgAnAmAyurAyAsanaM dR^iDham || 15||
pratyahaM khedamutsR^ijya shanairalamanAratam |
Akhruneva jarachChvabhraM kAlena vinihanyate || 16||
sharIrabilavishrAntairviShadAhapradAyibhiH |
rogairApIyate raudrairvyAlairiva vanAnilaH || 17||
prasnuvAnairavichChedaM tuchChairantaravAshibhiH |
duHkhairAvR^ishchyate krUrairghuNairiva jaraddrumaH || 18||
nUnaM nigaraNAyAshu ghanagardhamanAratam |
AkhrurmArjArakeNeva maraNenAvalokyate || 19||
gandhAdiguNagarbhiNyA shUnyayA.ashaktiveshyayA |
annaM mahAshaneneva jarayA parijIryate || 20||
dinaiH katipayaireva parij~nAya gatAdaram |
durjanaH sujaneneva yauvanenAvamuchyate || 21||
vinAshasuhR^idA nityaM jarAmaraNabandhunA |
rUpaM khi~NgavareNeva kR^itAntenAbhilaShyate || 22||
sthiratayA sukhabhAsitayA tayA
satatamujjhitamuttamaphalgu cha |
jagati nAsti tathA guNavarjita.n
maraNabhAjanamAyuridaM yathA || 23||

ityArShe shrImadvAsiShThamahArAmAyaNe vAlmIkIye
vairAgyaprakaraNe jIvitagarhA  nAma chaturdashaH sargaH || 14||
\medskip\hrule\medskip
pa~nchadashaH sargaH

shrIrAma uvAcha |

mudhaivAbhyutthito mohAnmudhaiva parivardhate |
mithyAmayena bhIto.asmi duraha~NkArashatruNA || 1||
aha~NkAravashAdeva doShakoshakadarthatAm |
dadAti dInadInAnAM sa.nsAro vividhAkR^itiH || 2||
aha~NkAravashAdApadaha~NkArAddurAdhayaH |
aha~NkAravashAdIhA tvaha~NkAro mamAmayaH || 3||
tamaha~NkAramAshritya paramaM chiravairiNam |
na bhuje na pibAmyambhaH kimu bhogAnbhuje mune || 4||
sa.nsArarajanI dIrghA mAyA manasi mohinI |
tato.aha~NkAradoSheNa kirAteneva vAgurA || 5||
yAni duHkhAni dIrghANi viShamANi mahAnti cha |
aha~NkArAtprasUtAni tAnyagAtkhadirA iva || 6||
shamendusai.nhikeyAsyaM guNapadmahimAshanim |
sAmyameghasharatkAlamaha~NkAraM tyajAmyaham || 7||
nAhaM rAmo na me vA~nChA bhAveShu na cha me manaH |
shAnta AsitumichChAmi svAtmanIva jino yathA || 8||
aha~NkAravashAdyadyanmayA bhuktaM hutaM kR^itam |
sarvaM tattadavastveva vastvaha~NkArariktatA || 9||
ahamityasti dedbrahmannahamApadi duHkhitaH |
nAsti detsukhitastasmAdanaha~NkAritA varam || 10||
aha~NkAraparityajya mune shAntamanastayA |
avatiShThe gatodvego bhogaugho bha~NgurAspadaH || 11||
brahmanyAvadaha~NkAravAridaH parijR^imbhate |
tAvadvikAsamAyAti tR^iShNAkuTajama~njarI || 12||
aha~NkAraghane shAnte tR^iShNA navataDillatA |
shAntadIpashikhAvR^ittyA kvApi yAtyatisatvaram || 13||
aha~NkAramahAvindhye manomattamahAgajaH |
visphUrjati ghanAsphoTaiH stanitairiva vAridaH || 14||
iha dehamahAraNye ghanAha~NkArakesarI |
yo.ayamullasati sphArastenedaM jagadAtatam || 15||
tR^iShNAtantulavaprotA bahujanmaparamparA |
aha~NkArograkhi~Ngena kaNThe muktAvalI kR^itA || 16||
putramitrakalatrAditantramantravivarjitam |
prasAritamaneneha mune.aha~NkAravairiNA || 17||
pramArjite.ahamityasminpade svayamapi drutam |
pramArjitA bhavantyete sarva eva durAdhayaH || 18||
ahamityambude shAnte shanaishcha shamashAtinI |
manogaganasa.nmohamihikA kvApi gachChati || 19||
niraha~NkAravR^itterme maurkhyAchChokena sIdataH |
yatki~nchiduchitaM brahma.nstadAkhyAtumihArhasi || 20||
sarvApadAM nilayamadhruvamantarastha-
munmuktamuttamaguNena na sa.nshrayAmi |
yatnAda~NkR^itipadaM parito.atiduHkha.n
sheSheNa mAM samanushAdhi mahAnubhAva || 21||

ityArShe shrImadvAsiShThamahArAmAyaNe vAlmIkIye
vairAgyaprakaraNe aha~NkArajugupsA nAma pa~nchadashaH sargaH || 15||
\medskip\hrule\medskip
ShoDashaH sargaH

shrIrAma uvAcha |

doShairjarjaratAM yAti satkAryAdAryasevanAt |
vAtAntaHpichChalavavachchetashchalati cha~nchalam || 1||
itashchetashcha suvyagraM vyarthamevAbhidhAvati
dUrAddUrataraM dInaM grAme kauleyako yathA || 2||
na prApnoti kvachitki~nchitapraptairapi mahAdhanaiH |
nAntaH sampUrNatAmeti karaNDaka ivAmbubhiH || 3||
nityameva mune shUnyaM kadAshAvAgurAvR^itam |
na mano nirvR^itiM yAti mR^igo yUthAdiva chyutaH || 4||
tara~NgataralAM vR^ittiM dadhadAlUnashIrNatAm |
parityajya xaNAmapi hR^idaye yAti na sthitim || 5||
mano shchananavixubdhaM disho dasha vidhAvati |
mandarAhananoddhUtaM xIrArNavapayo yathA || 6||
kallolakalitAvartaM mAyAmakaramAlitam |
na niroddhuM samartho.asmi manomayamahArNavam || 7||
bhogadUrvA~NkurAkA~NxI shvabhrapAtamachintayan |
manohariNako brahmandUraM viparidhAvati || 8||
na kadAchana me chetaH svAmAlUnavishirNatAm |
tyajatyAkulayA vR^ittyA cha~nchalatvamivArNavaH || 9||
chetashcha~nchalayA vR^ittyA chintAnichayacha~nchuram |
dhR^itiM badhnAti naikatra pa~njare kesarI yathA || 10||
mano moharathArUDhaM sharIrAtsamatAsukham |
haratyapahatodvegaM ha.nsaH xIramivAmbhasaH || 11||
analpakalpanAtalpe vilInAshchittavR^ittayaH |
munIndra na prabudhyante tena tapye.ahamAkulaH || 12||
kroDIkR^itadR^iDhagranthitR^iShNAsUtre sthitAtmanA |
vihago jAlakeneva brahmanbaddho.asmi chetasA || 13||
santatAmarShadhUmena chintAjvAlAkulena cha |
vahnineva tR^iNaM shuShkaM mune dagdho.asmi chetasA || 14||
krUreNa jaDatAM yAtastR^iShNAbhAryAnugAminA |
shavaM kauleyakeneva brahmanbhukto.asmi chetasA || 15||
tara~NgataralAsphAlavR^ittinA jaDarUpiNA |
taTavR^ixa ivaughena brahmannIto.asmi chetasA || 16||
avAntaranipAtAya shUnye vA bhramaNAya cha |
tR^iNaM daNDanileneva dUre nIto.asmi chetasA || 17||
sa.nsArajaladherasmAnnityamuttaraNonmukhaH |
setuneva payaHpUro rodhito.asmi kuchetasA || 18||
pAtAlAdgachChatAM pR^ithvIM pR^ithvyAH pAtAlagAminA |
kUpakAShThaM kudAmneva veShTito.asmi kuchetasA || 9||
mithyaiva sphArarUpeNa vichArAdvisharAruNA |
bAlo vetAlakeneva gR^ihIto.asmi kuchetasA || 20||
vahneruShNataraH shailAdapi kaShTatarakramaH |
vajrAdapi dR^iDho brahmandurnigrahamanograhaH || 21||
chetaH patati kAryeShu vihagaH svAmiSheShviva |
xaNena viratiM yAti bAlaH krIDanakAdiva || 22||
jaDaprakR^itirAlolo vitatAvartavR^ittimAn |
mano.abdhirahitavyAlo dUraM nayati tAta mAm || 23||
apyabdhipAnAnmahataH sumerUnmUlanAdapi |
api vahnyashanAtsAdho viShamashchchittanigrahaH || 24||
chittaM mAraNamarthAnAM tasminsati jagattrayam |
tasminxINe jaganxINaM tachchikitsyaM prayatnataH || 25||
chitAdimAni sukhaduHkhashatAni nUna-
mabhyAgatAnyagavarAdiva kAnanAni |
tasminvivekavashastanutAM prayAte
manye mune nipuNameva galanti tAni || 26||
sakalaguNajayAshA yatra baddhA mahadbhi-
stamarimiha vijetuM chittamabhyutthito.aham |
vigataratitayAntarnAbhinandAmi laxmI.n
jaDamalinavilAsAM meghalekhAmivenduH || 27||

ityArShe shrImadvAsiShThamahArAmAyaNe vAlmIkIye
vairAgyaprakaraNe vairAgyachittadaurAtmyaM nAma ShoDashaH sargaH || 16||
\medskip\hrule\medskip
saptadashaH sargaH

shrIrAma uvAcha |

hArdAndhakArasharvaryA tR^iShNayeha durantyayA |
sphuranti chetanAkAshe doShakaushikapa~NktayaH || 1||
antardAhapradAyinyA samUDharasamArdavaH |
pa~Nka AdityadIptyeva shoShaM nIto.asmi chintayA || 2||
mama chittamahAraNye vyAmohatimirAkule |
shUnye tANDavinI jAtA bhR^ishamAshApishAchikA || 3||
vachorachitanIhArA ka~nchanopavanojjvalA |
nUnaM vikAsamAyAti chintAkaNakama~njarI || 4||
alamantarbhramAyaiva tR^iShNAtaralitAshayA |
AyAtA viShamollAsamUrmirambunidhAviva || 5||
uddAmakallolaravA dehArdrau vahatIha me |
tara~NgataralAkArA taratR^iShNAtara~NgiNI || 6||
vegaM sa.nroddhumudito vAtyayeva jarattR^iNam |
nItaH kaluShayA kvApi tR^iShNayA chittachAtakaH || 7||
yAM yAmahamatIvAsthAM sa.nshrayAmi guNashriyAm |
tAM tAM kR^intati me tR^iShNA tantrImiva kumUShikA || 8||
payasIva jaratparNaM vAyAviva jarattR^iNa.n.
nabhasIva sharanmeghashchintAchakre bhramAmyaham || 9||
gantumAspadamAtmIyamasamarthadhiyo vayam |
chintAjAle vimuhyAmo jAle shakunayo yathA || 10||
tR^iShNAbhidhAnayA tAta dagdho.asmi jvAlayA tathA |
yathA dAhopashamanamAsha~Nke nAmR^itairapi || 11||
dUraM dUramito gatvA sametya cha punaH punaH |
bhramatyAshu diganteShu tR^iShNonmatta tura~NgamI || 12||
jaDasa.nsargiNI tR^iShNA kR^itordhvAdhogamAgamA |
xubdhA granthimatI nityamAraghaTTAgrarajjuvat || 13||
antargrathitayA dehe sarvadushChedayA.anayA |
rajjvevAshu balIvardastR^iShNayA vAhyate janaH || 14||
putramitrakalatrAditR^iShNayA nityakR^iShTayA |
khageShviva kirAtyedaM jAlaM lokeShu rachyate || 15||
bhIShayatyapi dhIraM mAmandhayatyapi sexaNam |
khedayatyapi sAnandaM tR^iShNA kR^iShNeva sharvarI || 16||
kuTilA komalasparshA viShavaiShamyasha.nsinI |
dashatyapi manAkspR^iShTA tR^iShNA kR^iShNeva bhoginI || 17||
bhindatI hR^idayaM pu.nsAM mAyAmayavidhAyinI |
daurbhAgyadAyinI dInA tR^iShNA kR^iShNeva rAxasI || 18||
tandrItantrIgaNaiH koshaM dadhAnA pariveShTitam |
nAnande rAjate brahma.nstR^iShNA jarjaravallakI || 19||
nityamevAtimalinA kaTukonmAdadAyinI |
dIrghatantrI ghanasnehA tR^iShNAgahvaravallarI || 20||
anAnandakarI shUnyA niShphalA vyarthamunnatA |
ama~NgalakarI krUrA tR^iShNA xINeva ma~njarI || 21||
anAvarjitachittApi sarvamevAnudhAvati |
na chApnoti phalaM ki~nchittR^iShNA jIrNeva kAminI || 22||
sa.nsAravR^inde mahati nAnArasasamAkule |
bhuvanAbhogara~NgeShu tR^iShNA jaraThanartakI || 23||
jarAkusumitArUDhA pAtotpAtaphalAvaliH |
sa.nsAraja~Ngale dIrghe tR^iShNA viShalatA tatA || 24||
yanna shaknoti tatrApi dhatte tANDavitAM gatim |
nR^ityatyAnandarahitaM tR^iShNA jIrNeva nartakI || 25||
bhR^ishaM sphurati nIhAre shAmyatyAloka Agate |
durla~NghyeShu padaM dhatte chintA chapalabarhiNI || 26||
jaDakallolabahulA chiraM shUnyAntarAntarA |
xaNamullAsamAyAti tR^iShNA prAvR^iTtara~NgiNI || 27||
naShTamutsR^ijya tiShThantaM tR^iShNA vR^ixamivAparam |
puruShAtpuruShaM yAti tR^iShNA loleva paxiNI || 28||
padaM karotyala~Nghye.api tR^iptApi phalamIhate |
chiraM tiShThati naikatra tR^iShNA chapalamarkaTI||
idaM kR^itvedamAyAti sarvamevAsama~njasam |
anArataM cha yatate tR^iShNA cheShTeva chaivikI || 30||
xaNamAyAti pAtAlaM xaNaM yAti nabhasthalam |
xaNaM bhramati dikku~nje tR^iShNA hR^itpadmaShaTpadI || 31||
sarvasa.nsAradoShANAM tR^iShNaikA dIrghaduHkhadA |
antaHpurasthamapi yA yojayatyatisa~NkaTe || 32||
prayachChati paraM jADyaM paramAlokarodhinI |
mohanIhAragahanA tR^iShNA jaladamAlikA || 33||
sarveShAM jantujAtAnAM sa.nsAravyavahAriNAm |
pariprotamanomAlA tR^iShNA bandhanarajjuvat || 34||
vichitravarNA viguNA dIrghA malinasa.ansthitiH |
shUnyA shUnyapadA tR^iShNA shakrakArmukadharmiNI || 35||
ashanirguNasasyAnAM phalitA sharadApadAm |
himaM sa.nvitsarojAnAM tamasAM dIrghayAminI || 36||
sa.nsAranATakanaTI kAryAlayaviha~NgamI |
mAnasAraNyahariNI smarasa~NgItavallakI || 37||
vyavahArAbdhilaharI mohamAta~NgashR^i~NkhalA |
sarganyagrodhasulabhA duHkhakairavachandrikA || 38||
jarAmaraNaduHkhAnAmekA ratnasamudrikA |
AdhivyAdhivilAsAnAM nityaM mattA vilAsinI || 39||
xaNamAlokavimalA sAndhakAralavA xaNam |
vyomavIthyupamA tR^iShNA nIhAragahanA xaNam || 40||
gachChatyupashamaM tR^iShNA kAyavyAyAmashAntaye |
tamI ghanatamaHkR^iShNA yathA raxonivR^ittaye || 41||
tAvanmuhyatyayaM mUko loko vilulitAshayaH |
yAvadevAnusandhatte tR^iShNA  viShaviShUchikA || 42||
loko.ayamakhilaM duHkhaM chintayojjhitayojjhati |
tR^iShNAviShUchikAmantrachintAtyAgo hi kathyate || 43||
tR^iNapAShANakAShThAdisarvamAmiShasha~NkayA |
AdadAnA sphuratyante tR^iShNA matsyI hrade yathA || 44||
rogArtira~NganAtR^iShNA gambhIramapi mAnavam |
uttAnatAM nayantyAshu sUryA.nshava ivAmbujam || 45||
antaHshUnyA granthimatyo dIrghasvA~NkurakaNTakAH |
muktAmaNipriyA nityaM tR^iShNA veNulatA iva || 46||
aho bata mahachchitraM tR^iShNAmapi mahAdhiyaH |
dushChedAmapi kR^intanti vivekenAmalAsinA || 47||
nAsidhArA na vajrArchirna taptAyaHkaNArchiShaH |
tathA tIxNA yathA brahma.nstR^iShNeyaM hR^idi sa.nsthitA || 48||
ujjvalA.asitatIxNAgrA snehadIrghadashA parA |
prakAshA dAhaduHsparshA tR^iShNA dIpashikhA iva || 49||
api merusamaM prAj~namapi shUramapi sthiram |
tR^iNIkaroti tR^iShnaikA nimeSheNa narottamam || 50||
sa.nstIrNagahanA bhImA ghanajAlarajomayI |
sAndhakArogranIhArA tR^iShNA vindhyamahAtaTI || 51||
ekaika sarvabhuvanAntaralabdhalaxyA
durlaxyatAmupagataiva vapuHsthitaiva |
tR^iShNA sthitA jagati cha~nchalavIchimale
xIrodakAmbutarale madhureva shaktiH || 52||

ityArShe shrImadvAsiShThamahArAmAyaNe vAlmIkIye
vairAgyaprakaraNe tR^iShNAbha~Ngo nAma saptadashaH sargaH || 17||
\medskip\hrule\medskip
aShTAdashaH sargaH

shrIrAma uvAcha |

ArdrAntratantrIgahano vikArI paripAtavAn |
dehaH sphurati sa.nsAre so.api duHkhAya kevalam || 1||
aj~no.api tajj~nasadR^isho valitAtmachamatkR^itiH |
yuktyA bhavyo.apyabhavyo.api na jaDo nApi chetanaH || 2||
jaDAjaDadR^ishormadhye dolAyitadurAshayaH |
avivekI vimUDhAtmA mohameva prayachChati || 3||
stokenAnandamAyAti stokenAyAti kheditAm |
nAsti dehasamaH shochyo nIcho guNabahiShkR^itaH || 4||
AgamApAyinA nityaM dantakesarashAlinA |
vikAsasmitapuShpeNa pratixaNamala~NkR^itaH || 5||
bhujashAkho ghanaskandho dvijastambhashubhasthitiH |
lochanAlibilAkrAntaH shiraHpIThabR^ihatphalaH || 6||
shravadantarasagrasto hastapAdasupallavaH |
gulmavAnkAryasa~NghAto viha~NgamakR^itAspadaH || 7||
sachChAyo dehavR^ixo.ayaM jIvapAnthagaNAspadaH |
kasyAtmIyaH kasya para AsthAnAsthe kilAtra ke || 8||
tAta santaraNArthena gR^ihItAyAM punaH punaH |
nAvi dehalatAyAM cha kasya syAdAtmabhAvanA || 9||
dehanAmni vane shUnye bahugartasamAkule |
tanUruhAsa~Nkhyatarau vishvAsaM ko.adhigachChati || 10||
mA.nsasnAyvasthivalite sharIrapaTahe.adR^iDhe |
mArjAravadahaM tAta tiShThAmyatra gatadhvanau || 11||
sa.nsArAraNyasa.nrUDho vilasachchittamarkaTaH |
chintAma~njaritAkAro dIrghaduHkhaghuNaxataH || 12||
tR^iShNAbhuja~NgamIgehaM kopakAkakR^itAlayaH |
smitapuNyodgamaH shrImA~nChubhAshubhamahAphalaH || 13||
suskandhaughalatAjAlo hastastabakasundaraH |
pavanaspanditAsheShasvA~NgAvayavapallavaH || 14||
sarvendriyakhagadhAraH sujAnustambha unnataH |
sarasachChAyayA yuktaH kAmapAnthaniShevitaH || 15||
mUrdhasa~njanitA.a.adIrghashiroruhatR^iNAvaliH |
aha~NkAragR^idhrakR^itakulAyaH suShirodaraH || 16||
vichChinnavAsanAjAlamUlatvAddurlavAkR^itiH |
vyAyAmavirasaH kAyaplaxo.ayaM na sukhAya me || 17||
kalevaramaha~NkAragR^ihasthasya mahAgR^iham |
luThatvabhyetu vA sthairyaM kimanena mune mama || 18||
pa~NktibaddhendriyapashuM valattR^iShNAgR^ihA~Nganam |
rAgara~njitasarvA~NgaM neShThaM dehagR^ihaM mama || 19||
pR^iShThAsthikAShThasa~NghaTTaparisa~NkaTakoTaram |
AntrarajjubhirAbaddhaM neShThaM dehagR^ihaM mama || 20||
prasR^itasnAyutantrIkaM raktAmbukR^itakardamam |
jarAma~NkoladhavalaM neShThaM dehagR^ihaM mama || 21||
chittabhR^ityakR^itAnantacheShTAvaShTabdhasa.nsthiti |
mithAmohamahAsthUNaM neShThaM dehagR^ihaM mama || 22||
duHkhArbhakakR^itAkrandaM sukhashayyAmanoramam |
durIhAdagdhadAsIkaM neShThaM dehagR^ihaM mama || 23||
malADhyaviShayavyUhabhANDopaskarasa~NkaTam |
aj~nAnaxAravalitaM neShThaM dehagR^ihaM mama || 24||
gulphagugguluvishrAntajAnUrdhvastambhamastakam |
dIrghadordArusudR^iDhaM neShThaM dehagR^ihaM mama || 25||
prakaTAxagavAxAntaH krIDatpraj~nAgR^ihA~Nganam |
chintAduhitR^ikaM brahmanneShTaM dehagR^ihaM mama || 26||
mUrdhajAchChAdanachChannakarNashrIchandrashAlikam |
AdIrghA~NgulinirvyUhaM neShThaM dehagR^ihaM mama || 27||
sarvA~NgakuDyasa~NghAtaghanaromayavA~Nkuram |
sa.nshUnyapeTavivaraM neShThaM dehagR^ihaM mama || 28||
nakhorNanAbhinilayaM saramAraNitAntaram |
bhA~NkArakAripavanaM neShThaM dehagR^ihaM mama || 29||
praveshanirgamavyagravAtavegamanAratam |
vitatAxagavAxaM tanneShThaM dehagR^ihaM mama || 30||
jihvAmarkaTikAkrAntavadanadvArabhIShaNam |
dR^iShTadantAsthishakalaM neShThaM dehagR^ihaM mama || 31||
tvaksudhAlepamasR^iNaM yantrasa~nchAracha~nchalam |
manaH sadAravunotkhAtaM neShThaM dehagR^ihaM mama || 32||
smitadIpaprabhodbhAsi xaNamAnandasundaram |
xaNaM vyAptaM tamaHpUrairneShThaM dehagR^ihaM mama || 33||
samastarogAyatanaM valIpalitapattanam |
sarvAdhisAragahanaM neShThaM dehagR^ihaM mama || 34||
axarxaxobhaviShamA shUnyA niHsArakoTarA |
tamogahanadikku~njA neShTA dehATavI mama || 35||
dehAlayaM dhArayituM na shaknomi munIshvaraH |
pa~NkamagnaM samuddhartuM gajamalpabalo yathA || 36||
kiM shriyA kiM cha rAjyena kiM kAyena kimIhitaiH |
dinaiH kapitayaireva kAlaH sarva nikR^intati || 37||
raktamA.nsamayasyAsya sabAhyAbhyantaraM mune |
nAshaikadharmiNo brUhi kaiva kAyasya ramyatA || 38||
maraNAvasare kAyA jIvaM nAnusaranti ye |
teShu tAta kR^itaghneShu kaivAsthA vada dhImatAm || 39||
mattebhakarNAgrachalaH kAyo lambAmbubha~NguraH |
na santyajati mAM yAvattAvadenaM tyajAmyaham || 40||
pavanaspandataralaM pelavaH kAyapallavaH |
jarjarastanuvR^ittashcha neShTo me kaTunIrasaH || 41||
bhuktvA pItvA chiraM kAlaM bAlapallavapelavAm |
tanutAmetya yatnena vinAshamanudhAvati || 42||
tAnyeva sukhaduHkhAni bhAvAbhAvamayAnyasau |
bhUyo.apyanubhavankAyaH prAkR^ito hi na lajjate || 43||
suchiraM prabhutAM kR^itvA sa.nsevya vibhavashriyam |
nochChrAyameti na sthairyaM kAyaH kimiti pAlyate || 44||
jarAkAle jarAmeti mR^ityukAle tathA mR^itim |
sama evAvisheShaj~naH kAyo bhogidaridrayoH || 45||
sa.nsArambhodhijaThare tR^iShNAkuharakAntare |
suptastiShThati mukteho mUko.ayaM kAyakachChapaH || 46||
dahanaikArthayogyAni kAyakAShThAni bhUrishaH |
sa.nsArAbdhAvihohyante ka~nchitteShu naraM viduH || 47||
dIrghadaurAtmyavalayA nipAtaphalapAtayA |
na dehalatayA kAryaM ki~nchidasti vivekinaH || 48||
majjankardamakosheShu jhaTityeva jarAM gataH |
na j~nAyateyAtyachirAtkaH kathaM dehadarduraH || 49||
niHsArasakalArambhAH kAyAshchapalavAyavaH |
rajomArgeNa gachChanto dR^ishyante neha kenachit || 50||
vAyordIpasya manaso gachChato j~nAyate gatiH |
AgachChatashcha bhagava~nCharIrasya kadAchana || 51||
baddhAsthA ye sharIreShu baddhAsthA ye jagatsthitau |
tAnmohamadironmattAndhigdhigastu punaH punaH || 52||
nAhaM dehasya no deho mama nAyamahaM tathA |
iti vishrAntachittA ye te mune puruShottamAH || 53||
mAnAvamAnabahulA bahulAbhamanoramAH |
sharIramAtrabaddhAsthaM gnanti doShadR^isho naram || 54||
sharIrashvabhrashAyinyA pishAchyA pashalA~NgayA |
aha~NkArachamatkR^ityA Chalena ChalitA vayam || 55||
praj~nA varAkI sarvaiva kAyabaddhAsthayAnayA |
mithyAdyAnakurAxasyA ChalitA kaShTamekikA || 56||
na ki~nchidapi dR^ishye.asminsatyaM tena hatAtmanA |
chitraM dagdhasharIreNa janatA vipralabhyate || 57||
dinaiH katipayaireva nirjharAmbukaNo yathA |
patatyayamayatnena jaraThaH kAyapallavaH || 58||
kAyo.ayamachirApAyo budbudo.ambunidhAviva |
vyarthaM kAryaparAvarte parisphurati niShphalaH || 59||
mithAj~nAnavikAre.asminsvapnasambhramapattane |
kAye sphuTatarApAye xaNamAsthA na me dvija || 60||
taDitShu sharadabhreShu gandharvanagareShu cha
sthairyaM yena vinirNItaM sa vishvasitu vigrahe || 61||
satatabha~NgurakAryaparamparA
vijayijAtajayaM haThavR^ittiShu |
prabaladoShamidaM tu kalevaram
tR^iNamivAhamapohya sukhaM sthitaH || 62||

ityArShe shrImadvAsiShThamahArAmAyaNe vAlmIkIye
vairAgyaprakaraNe kAyajugupsA nAmAShTAdashaH sargaH || 18||
##

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}