% Text title : Shri Bhaktisamvardhana Shatakam 06 37 % File name : bhaktisaMvardhanashatakam.itx % Category : misc, shataka, advice % Location : doc\_z\_misc\_general % Proofread by : Saritha Sangameswaran % Description/comments : From stotrArNavaH 06-37. pUrvabhAga and uttarabhAga 50 verses each % Latest update : January 6, 2021 % Send corrections to : Sanskrit@cheerful.com % % This text is prepared by volunteers and is to be used for personal study % and research. The file is not to be copied or reposted for promotion of % any website or individuals or for commercial purpose without permission. % Please help to maintain respect for volunteer spirit. % \documentstyle[11pt,multicol,itrans]{article} #include=ijag.inc #endwordvowel=.h \portraitwide \parindent=100pt \let\usedvng=\Largedvng % for 1 column \pagenumbering{itrans} \def\engtitle#1{\hrule\medskip\centerline{\LARGE #1}} \def\itxtitle#1{\medskip\centerline{\LARGEdvng #1}\medskip\hrule} \def\endtitles{\medskip\obeyspaceslines} %% \begin{document} \engtitle{.. Shri Bhaktisamvardhana Shatakam ..}## \itxtitle{.. shrIbhaktisaMvardhanashatakam ..}##\endtitles ## \section{pUrvabhAgaH} jAtaM jAtaM khalu jagadaho chitrametat samastaM kShINaM kShINaM muhurapi parAdR^ishyate yatprabhAvAt | (mR^ishyate) tasmai sAkShAt svarasaparamAnandavIchImayAya brahmAkhyAya tribhuvanapate deva tubhyaM namo.astu || 1|| (brahmaNyAya) jIvAtmA yadbhramati bahusho.apyatra saMsArachakre tattvanmAyAvilasitamataH prA~njaliH prArthaye.aham | mAmAnAhaM jagati bhagavan janma sampadyate chet (mAyAdyInaM jagati) karmAbhyarhaM bhavatu bhavanAdhIsha mAnuShyameva || 2|| chAturvarNyaprabhR^itivibhidAmudrite mAnuShaM chet | brahmaNyAya spR^ihayati jagannAtha nityaM jano.ayam | tatrAkurvannamR^itamashubhaM karma kurvannakAmaM bhakto bhUyAdbhavatu bhagavan mArgayan muktimArgam || 3|| bandhaH karmaNyatha bahuvidhe strIguhAyAM praviShTaH puMso retaHkaNashabalite shoNite vartamAnaH | viTpa~NkotthaiH kR^imibhirabhitaH tADitaH pIDitAtmA yAvat sIdAmyavashamaravindAkSha tAvat prasIda || 4|| kShArairuShNairapi cha kaTubhirmAturAhArajAtaiH udyadbAdho jaTharakuhare sa~Nkuchatsa~NkulA~NgaH | shvAsochChAseShvahamatitarAM kleshashAlI yadA syAM govinda tvaM prashamaya tadA bhaktibhAjo mamArtim || 5|| prAchInAnAmanushayavato janmanAM karmaNAM cha\- smAraM smAraM manasi sahasA labdhabodhodayasya | garbhAgAre rudhirakR^imiviNmUtrapUrNe sthitasya prAdurbhUyAnmadhuvimathana tvatsvarUpasmR^itirme || 6|| madhyegarbhAshayamata ito bhrAntimAn vartamAno mAsi prApte tadanu dashame pUryamANAkhilA~NgaH | vyAsedhena vyathitahR^idayo raktajambAlasikto vaikuNTha tvAM jananasamayaprAptakhedaH smarANi || 7|| bhUyo bhUyaH prasR^imarakaThorAmanasyArditAyA\- mAkrandrantyAM prasavasamaye srastagAtryAM jananyAm | yantrachChidrAt sapadi vivR^itAdduHkhataH sUtivAtai\- rnItiM jAtaM bhuvi nipatitaM pAhi mAmArtabandho || 8|| adbhiH prakShAlitavapurapi svachChatAM nopagachChan\- mAtuH stanyaM galitamupajAtArtirAsvAdya sadyaH | asvAtantryAdadhikavimanAshcheShTiteShvapravINaH prApto mohaM muhurahamaho rakShaNIyo.asmi viShNo || 9|| shItoShNAbhyAM prabalamarutA kShuttR^iDArtiprasaktyA\- yUkAdaMshaprabhR^itibhirapi pratyahaM bAdhyamAnaH | AtmotsR^iShTairaviShahashakR^inmUtrapa~Nkaishcha liptaH sAkrando.ahaM tava muraripo bAlakaH pAlanIyaH || 10|| dantotpatteH prathamamamR^idu prAyamAhArajAtaM bhoktuM vAchChannanipuNatayA dUyamAno nikAmam | yAvat krandAmyahamatitarAM dInadInaH kShudhArtaH tAvaddeva prasaratu mayi kShipramekaH kaTAkShaH || 11|| uttiShThAsuH kathamapi samutthApito bAlavargaiH mandaM mandaM kimapi charaNanyAsamAkA~NkShamANaH | nAlambhUShNurjhaTiti patitaM niShThure bhUmipR^iShThe yAvanmuhyAmyajita bhavatA rakShaNIyo.asmi tAvat || 12|| krIDAlaulyAdgurubhirasakR^it preritaH krUravAgbhiH | vidyAbhyAse prachakitamanA hanta shochAmi yAvat | yAvaddUye dashanapatanaiH karNavedhena chAhaM tAvat pItAmbara tava kR^ipAloka evAvalambaH || 13|| sasnehAbhyAM paravashatayA puShyamANaH pitR^ibhyAM krIDAlaulyaprathitabahuchApalyamulla~Nghaya bAlyam | dvaitIyIkaM punaratha vayaH prApnuvan dR^iptachitto lakShmIjAne tava padayugaM vismaran mAsma bhUvam || 14|| dharmAchAraM dinamanuparityajya vidhvastalajjaH pApAnyApAdayitumuditauddhatyamudyogashAlI | arthApatyapriyasutakalatrAdisaktAshayo.ahaM garhAbhyartaH sadasi viduShAM mA bhaveyaM murAre || 15|| AshApAshairnigalitamahantAgrahagrAhakR^itta svasthAvasthAparichayamanuShThAnaniShThAvihInam | dR^iptaM chittaM mama kuru tamodhAma kAmabhitaptaM mA mA magnaM narakamathana strIviShAbdhau dayAbdhe || 16|| tyaktvA dhairyaM vyapagataparIpAkamuchchairvipAkaM muktvA hitvA sapadi cha kR^ipAM vAkpaTutvaM cha kR^itvA | krodhodvR^ittaM bhavati yadi me dhvastatattvaprabodhaM chittaM chakrAyudha tava padasthAsnu kartavyameva || 17|| dehe mAMsakShata jabharite rUpavattAbhimAnAt ka~nchit kAlaM vapuShi milito yauvanasyodayAchcha | aishvaryAdapyahaha sahasA nashvararAdvishvamUrte chittaM mattaM prachalati yadi tvAmR^ite kA gatirme || 18|| vidyAvattvaM draviNagurutA putramitrAdisaukhyaM kasyApi syAdyadi savayasaH prAyasho jAyamAnaH | antaH santApakR^idavirataM matsaro duHsahAtmA mA mA nAtha prasabhamabhavaM prashra yasyApanetA || 19|| yasmin kasminnapi laghutare kAryavastunyavasthAM kAlaM deshaM punaragaNayan dravyajAtaM tyajAmi | yasmAtkShobhAt samuchitamapAsyAmi dharmaM cha tasmAt cheto DambhAdviramatu mametyadya yAche hare tvAm || 20|| ka~nchid ddaShTvA sapadi vipade bhartsaye tatsamakShaM vegAddhAvAmi cha pathi jale niShpatAmyutpatAmi | ki~nchAhetormuhurapi hasAmyuchchakairyatprabhAvAt darpaH so.ayaM na bhavatu mama tvatprasAdAnmukunda || 21|| mAturvAkyaM piturapi nirAkR^itya nityaM gurUNA\- mAj~nAmulla~Nghaya cha gurutarAnnAtibibhyanmahadbhayaH | abhyasyannapyavinayamaho straiNa eva pravR^itto nAma tvAmapyaparigaNayan mA dinAnyeSha naiSham || 22|| baddhotsAhaH pratimuhurasatkarmaNe dharmadArAn dUrAttyaktvA rahasi paradAraiH samaM rantukAmaH | nindyAkAro.apyatijaDamatiH sundarammanya eva svechChAkArI madanavivasho mA bhavaM devadeva || 23|| vAmAM vAmAM kuTilahR^idayAM kAmamAtmanyakAmA\- mAgR^ihNAnaH praNayachapalaH kAmataptAntarAtmA | tattAddagbhiH kapaTacharitairva~nchyamAnastayAhaM yoShitkrIDAkapiriti vibho mApahAsyeya sadbhiH || 24|| strIbhyo dattvA sakalamachirAt svApateyaM svakIyaM dAridraikaH svayamanudinaM jADyavAn pIDyamAnaH | anyAyena drutamatha paradravyamapyAjihIrShu\- rmaiva shrIvallabha duritamityArjitaM prAjyakIrte || 25|| mohenopaplutamatiratikramya tAruNyamudrAM pApaM kurvan viShamaviShayAkR^iShTachittaH pramattaH | AdhivyAdhiprabhR^itibhirapi pratyahaM bAdhyamAnaH karNAbhyArNAkalitavalitaH tvAM vibho bhAvayAni || 26|| kShutprakShINaM nijamavAdhIrbibhradekaH kusumbaM naiShNi~nchanyAttamanabhilaShan mitravargAdavindan | (naiShki~nchanyAt) karmAdhIne vapuShi jarasA jarjare lajjamAnaH satsaMrge bhavati bhagavan bhaktachitto bhavAni || 27|| asvAtantryAt paramanipuNaH kleshaleshAsahiShNuH putrairdAraiH satataruditaiH serShyamAbhAShyamANaH | shayyAparyAkulamadhishayArohamudvR^ittalakShmA yAvaddUye muramathana te nAma tAvat smarANi || 28|| kAsashvAsaprasaravidhure.ajIrNatApUrNagAtre netrashrotraprabhR^itikaraNagrAmashaktyA viyukte | aspaShTAbhirvadati vikR^itaM vAgbhirudbhUtapashchA\- ttApe jAte mayi sakaruNaM vIkShyatAM tArkShyaketo || 29|| anyenotthApitamakR^ipayA shAyitaM jIrNatalpe lalAjAlaM vadanakuharAdbhraShTadantAdvamantam | kaShTaM daShTaM vapuShi mashakairmatkuNairmakShikAbhi\- rmuhyantaM mAmajita kR^ipayA pAhi pAhIti pAhi || 30|| kShutkShAmatvAdbhR^ishataramaho durbalaiH putradAraiH kaShTAvasthAmahamupagato.anAsthayA rakShyamANaH | shUnyAgAre.apyapagatasuhR^idbhumimAveShTamAno duHkhAyiShye yadi bata jaranmAdhava tvaM prasIda || 31|| duShkarmANi prabalatamasA janmanopArjitAni smAraM smAraM nirayapatanaM shashvadutprekShamANaH | mR^ityorbibhyannapi jaraThatAM niHsaho martumichChuH tvannAmochchAraNamagaNayanneva mAnAthabhUvam || 32|| shayyAprAnte satatamavidanneva momUtryamANo muktvA bhuktvA bahumalamanirvR^ittashauchaH shayAnaH | shvAsAyAsavyasanaparipUrNArtirAsannamR^ityuH trAtavyo.ahaM tava vipavadasthAM gataH shAr~NghapANe || 33|| atyAsannA bahumR^itiramuShyeti shR^iNvan janAnAM vAchaM gho rairghurughururavaiH kliShTakaNThaH kaphena | kShubhyatprANaH shvasitarabhasoddhUtamarmAsthibandhaH so.ahaM viShNo jaya jaya mukundeti vANIM bravANi || 34|| ja~njhAvAte chalati timire vardhamAne kaThore meghe.apyuchchaiH stanati sahasA kAndishIke janaudhe | dyAvAbhUmyorvitatavapuShaH pretarAjasya dUtAn pashyantaM mAM paramakR^ipaNa rakSha pa~NkeruhAkSha || 35|| vR^ittAkAraprachalanayano dhvAntaraudrAnalAni vyAdIrNAni bhrukuTivikaTAnyugradaMShTrodbhaTAni | dR^iShTvA dR^iShTvA yamabhaTamukhAnyAshu santrasyato me nAtha trAtA bhava mR^itidashAsa~NkaTe pa~NkajAkSha || 36|| chakrashvAsabhramitavapuShaM mUtramapyutsR^ijantaM netronmeShaM vidadhatamakANDe cha phenAyamAnam | AlokyAlokya cha yamabhaTAnantarA vepamAnaM prANApAyavyasanasamaye rakSha mAM chakrapANe || 37|| kShudre sadyastamakasahite brahmavR^ittAvasAne shvAsochChinne mahati cha chalatyUrdhvamUrdhAbhidhAne | dehAd dehi mama vighaTate yAvadAsAdya tAvat sAkShAdbhUyAstvamiti bhagavan prArthaye tIrthapAda || 38|| marmasthAnAM prakR^itikaThine loThatAmasthikUTe svasthAnebhyaH kR^itadR^iDhatarAghAtamudghATitAnAm | matprANAnAM vidadhati yadA yAtanAdehayogaM mR^ityordUtAH shiva shiva tadA pAhi mAM padmanAbha || 39|| hu~NkurvadbhiH shravaNaparuShaM mudgaraistADyamAnaH pAshaiH pashchAtkR^itabhujayugaM gADhamAbaddhagAtraH | tuShTaiH kR^iShTaH pitR^ipatibhaTaiH kaNTakainIryamAnaH trAtavyo.asmi prachurakaruNAvAsa te vAsudeva || 40|| ChAyAhIne viShamitapathe vItatoyaprasa~Nge santaptAbhirbhR^ishamata ito vAlukAbhishcha pUrNe | yAvannIye vigatakaruNaiH shrAddhadevasya dUtaiH tAvadbhaktAbhayada bhagavannuttamashloka pAhi || 41|| durmArgAyA marumayabhuvo yojanAnAM sahasraM vegAnnItaH praharaNavaraiH ki~Nkaraira~Nkushena | Aj~nAM shrotuM tadanu purato darshito daNDapANeH santrasto.ahaM manasi dayanIyo.asmi lakShmIpate te || 42|| AhUyAgre svayamatha yamo lekhakaM chitraguptaM pApAnyAkarNya cha mama tadA hanta tenoditAni | yAvatpApI chirataramayaM daNDyatAmityakANDe roShAdAj~nApayati cha jagannAtha rakShyo.asmi tAvat || 43|| tAmisrAkhye mahati narake raurave.apyandhakUpe pUyasrotasyasakR^idasipatrATavInAmadheye | lAlAbhakShye.apyatha bahuvidhe kaShTamanyatra yAvat pAtye tAvat paramapuruSha tvaM prasIda prasIda || 44|| iShTApUrtiprabhR^itisukR^itApAdanAt svargasaukhyaM ka~nchitkAlaM punaranubhaviShyAmi yadyapyudAram | na shraddheyaM na cha khalu tathApyetadasyAvasAne yajjanma syAt punariti vibho muktikAmoM bhavAni || 45|| gandharvA ye turagavadanA ye cha vidyAdharA ye\- siddhAH sAdhyA api bahuvidhA ye cha ye vA raNAshcha | (chAraNAshcha) ye ke.apyanye dishi dishi nabhovartmanA sa~ncharante teShAM sthAne na hi mama ratirnAtha nityetaratvAt || 46|| indro vahniH pitR^ipatiratho yAtudhAnaH pradhAna\- stoyAnAM cha prabhuratha marut kinnaresho maheshaH | ityaShTau ye divamadhivasantyekasho lokapAlA\- stebhyo me na spR^ihayati hR^iShIkesha mokShechChurAtmA || 47|| pUrNaiH puNyairatha cha duritairbhUribhiH saukhyaduHkhA\- nyekaikasmAdanubhavati yajjIvanAmAyamAtmA | tasmAdichChAmyupashamavidhAnena naiShkarmyasiddhiH yasmAt sidhyet paramamamR^itaM deva kaivalyanAtha || 48|| aShTA~Ngasya svayamiha samArabhya yogasya yogyA\- satyasyAtha prakaTitaphalAnyAshu karmANyamUni | (nyabhyasyAtha) mokShaprAptyai spR^ihayati mano vismR^itAsheShasa~Nga\- stvatpAdabjasmR^itimanubhavAmyeva lakShmInivAsa || 49|| tvatkaM dhyAyan manasi sakalaM niShkalaM cha svarUpaM sarvAtmatvaM tvayi cha kalayan pUrNabhaktiprapa~nchaH | nAmAnyuchchArya cha bahuvidhAnyasya chintAvihInaH\- kaivalyArthI tava paramahaM deva dAso bhavAmi || 50|| || iti bhaktisaMvardhanashatake pUrvabhAgaH sampUrNaH || \section{uttarabhAgaH} jAtaH satyavratanunR^ipatera~njalau vardhamAnaH (narapate) kalpAmbhodhau vitatasalile klR^iptakelIprachAraH | tasmai rAj~ne hitamupadishan vedamapyAdadAno mAyAmatsyastvamiha manasi smaryase vishvanAtha || 51|| pIyUShArthaM diviShadasurairanbudhau madhyamAne manthAdrau cha kShubhitasalilaM yAti pAtAlamUlam | AdAyainaM vipulimabhR^itA karpareNoddharantaM chittena tvAmajitakuhanAkachChapaM chintayAmi || 52|| pArAvAre pralayavitate cha~nchadUrmiprapa~nche magnAM pR^ithvImanibhR^itabhR^itauddhatyamuddhartukAmaH | ma~NkShurmagnaH kuTilashikhayA daMShTrayA tAM dadhAnaH krIDAkroDaH kamalanayana tvaM mayA chintyase.antaH || 53|| prahlAdasya svapadayugalIdattachittasya hatyai sannaddhasya tribhuvanaripordaityabharturnihantA | ghorAkAraH prakharanakharo bhIShaNabhrUkuTIka\- strailokyAdhIshvara manasi me vartase tvaM nR^isiMha || 54|| vishvAdhIshe prabhavati balau mANavIbhUya bhUyaH pR^ithvImagnIndhanavidhikR^itaye yAchamAno jighR^ikShuH | Ashu krAman bhuvanamakhilaM dhAtR^inirNiktapAdaH tvaM devendrAvaraja manasA vAmano bhAvito.asi || 55|| jAto madhyedharaNi jamadagneH suto reNukAyA\- mantevAsI tripuramathituH kArtavIryasya jetA | pANau bibhratparashumadhisa~NgrAmamAsannaviMshAn vArAn kSheptA duravanibhujo deva rAma smR^ito.asi || 56|| jAto vaMshe saviturR^iShiNA sa~Ngato jAnakIshaH svairaM gachChan vanamatha viyuktapriyo dhvastavAlI | uttIrNAbdhiH kapikulabalo rAvaNasyApi hantA sItAyuktaH puramadhivasan deva rAma smR^ito.asi || 57|| shvetAkAro halamusalavAn nIlavastrandadhAnaH karShan mattastapanatanayAmAttapItA~NgarAgaH | nAnAdaityapramathanapaTurnAgarAjAvatAro bhUmerbhAraM gurumapaharan deva rAma smR^ito.asi || 58|| jAto vaMshe tuhinamahaso gokule klR^iptavAsaH kaMsadhvaMsI pariNayamatha strIgaNAnAM vitanvan | chaidyArAtiH samarasamaye sArathiH pANDusUnoH dhAtrIbhArakShapaNanipuNo deva kR^iNNa smR^ito.asi || 59|| antaM sa~NgachChati kaliyuge varNasa~NkIrNabhAve\- bhAvinyatyutkaTataramadharme cha vartiShyamANe | ashvArUDhaH karatalachalanmaNDalAgnaH khalaughAn bhartsyan kalkitribhuvanapate ghorarUpaH smR^ito.asi || 60|| shaile kUTatrayavati payaHsindhunA veShTayamAne puShpodyAnodarakamalinIM gAhamAne gajendre | grAhagraste stuvati tadanugrAhakastvaM dayAlu\- stAkShyArruDhaH kamalanayana smaryase chakradhArI || 61|| devairdaityairapi vimathitAdutthitaH kShIrasindhoH shvetoShNIShI valabhidupalashyAmalaH kShemakAraH | bibhrachchakraM daramatha sudhApUrNakumbhaM jalUkAM dorbhirdhanvantaririha bhiShagbhAvyase tvaM murAre || 62|| shrIkaNThAya prakaTitatarautkaNThyamAkrIDamadhye prakrIDantI dhutatanulatAsauShThavAtiShThamAnA | sabhrUbha~NgasmitasahacharApA~NgalIlabhirAmA daityAre tvaM kapaTataruNI bhAvyase divyabeShA || 63|| naiShkarmyAviShkaraNanipuNaH kardamApatyabhUtaH svachChandAtmA kapilaruchibhiH shobhamAno jaTAbhiH | tattvaj~nAnaM paramupadishan devahUtyai svamAtre govinda tvaM manasi kapilo vAsudevaH smR^ito.asi || 64|| duShTAdvenAnmunijanamahAshApataH prAptanAshAt jAtashchApATanividalitakShmAdharAyAM dharAyAm | merau dogdharyamitadhanadhAnyAdi vistArayantaM dhyAyAmi tvAM pR^ithumatipR^ithuprAbhavaM vishvanAtha || 65|| bharge bhaktatritayamapathe vartamAnaM purANAM vAchoyuktyA pariNatamahad dveShamApAdAyantam | dharmasthityai prathitacharitaM buddhasa.nj~naM munIndraM mAyAdevIsutamayi hare mAyinanaM bhAvaye tvAm || 66|| dAkShAyaNyAM prathitayashasau dharmadevasya putrau sa~njAtau dvau mahitanaranArAyaNAkhyaM dadhAnau | prAleyAdrestaTabhuvi badaryAshrame saMvasantau rakShAhetuM jagati bhagavan bhAvayAmi tvadaMsham || 67|| saundaryashrIlalitavapuShaM klR^iptasa.nnyAsAveShaM divyaM digvAsasamata itaH strIsahAyaM charantam | adhyAtmaj~nairmunibhirabhitaH stUyamAnaM munIndraM dattAtreyaM manasi bhagavan bhAvayAmi tvadaMsham || 68|| revAsrotoviharaNaparaM prasphuraddoHsahasraM dhAtrIrakShAparamaparimeyAtmavIryAnubhAvam | dattAtreyAdupagatavaraM kArtavIryArjunaM tvAM kIrtistomAjjanitabhuvanaM bhAvaye shrInivAsam || 69|| pArAsharyA pariNatatanurbIjashaktyA shrutInAM vyAsaM kurvan bahuvidhapurANetihAsapraNetA | vedAntArthaprakAshastutimupanayan pUrNashiShyaprashiShyaH kR^iShNadvaipAyanamunivaraH smaryase tvaM mukunda (?) || 70|| velAghAtaprachalitamahAvIchijAlaprasarpa\-| tphenAvartaM dhavalasalilodbhrAntayAdaHkadambam | nAnAratnadyutitaralitAgAdhagarbhapradeshaM dugdhAmbhodhiM manasi bhagavan bhAvaye tvannivAsam || 71|| puShyatkalpadrumasuralatAjR^imbhitAmodabhAraM nAnApakShipravaralalitAbandhanAdaprapa~ncham | bhR^i~NgashreNIravamukharitaM mandavAtAbhirAmaM shvetadvIpaM tava padamimaM deva sambhAvayAmi || 72|| udyAnodyatkusumanikaraM gopurAbaddhasAlaM rathyAshR^i~NgATakavilasitaM ketanodyatpatAkam | prAsAdAgrasphuritavalabhIbhAgamutta~NgasaudhaM vAsasthAnaM manasi kalaye padmanAbha tvadIyam || 73|| AshApAlAn sahitadayitAn sapriyAn devayonIn devabrahmakShitipatimunIn bhaktibhArairvinamrAn | tvatpAdAbjapraNamanaparAn bhaktibhArAvanamrAn paryantasthAn paramapuruSha tvanmayAnbhAvayAmi || 74|| tattvaj~nAnapravaNahR^idayAn bhUyasho.abhyastayogAn jyotirjAlaprasarataralAnnityakaumArayuktAn | brahmANDAntabhramaNanipuNAnujjvalattvatpadAbja\- prAptAn padmAramaNa sanakAdyAn munIn bhAvayAmi || 75|| bhUShAveShAdyadhikasubhagAn doshchatuShkAbhirAmAn meghashyAmAn kapishavasanAn phAlabaddhArdhapuNDrAn | dIrghApA~NgAn prahasitamukhAn bhaktalokaikabandho nAtha tvatpArShadavR^iShavarAnnandamukhyAn smarAmi || 76|| bhaktiprahvaM mukulitadR^ishaM prA~njaliM prAntasaMsthaM nAmAnyuchchaiHsvaramukharitAbhyAshamuchchArayantam | AhlAdArdai manasi vikasattvatsvarUpaprakAshaM prahlAdAkhyaM nalinanayana tvatpriyaM chintayAmi || 77|| sa~NgAyantau gamakagatimanmUrChanAgrAmabhinna\- shrutyArUDhasvarapariNamadrAgahR^idyaM vipa~nchayA | nAnAvandipravarasahitau gAyakau tAvakInau sAkShAdIkShe manasi bhagavannAradaM tumburuM cha || 78|| ki~nchidvisraMsitakachabharAH pUrNasarvA~Ngabha~NgI\- rnepathyashrImadhurimajuSho ma~njushi~njAnabhUShAH | pArshve sthitvA lalitalalinta chAmaraM chArayantIH pashyAmyantaditisutaripo chAmaragrAhiNIste || 79|| abhyAshasthaM bhujagapaTalIbhUShitoddIptagAtraM pakShakShepakShubhitabhuvanaM chaNDatuNDaprakANDam | Api~NgAkShaM kanakakapishajyotiShaM vAhanaM te tArkShyaM vIkShe manasi karabaddhA~njaliM ka~njanAbha || 80|| shUtkurvantaM phaNadashashatIvisphuradratnajAlaM daMShTrAkoTidvitayavilasachchaNDatuNDAntarAlam | shvetAkAraM taralapavanAhArato vardhamAnaM parya~NkasthaM manasi kamalAkAnta pashyAmyanantam || 81|| jyotirjAlajvalitavapuShaH prA~njalIn prAjyavidyAn uchchairabhyuchcharitajayashabdasvanAdhmApitAshAn | mUrtAn daityapramathanaparAnAyudhaughAn prabhAte chittAbhogaH prakaTayati me sha~NkhachakrapradhAnAn || 82|| pItashyAmaprabhatanulate raktapItA~NgarAga\- kShaumAbhoge makuTakaTakAdyujjvalan bhUshitADhye | saundaryodyattaruNimadilAsA~nchite pArshvasaMsthe sa~NgachChete hR^idi mama hare tvatpriye shrIdharaNyau || 83|| ratnabhrAjatkanakamakuTaM ku~nchitAnIlakeshaM vellatsAndrAlakamalikasambhAsamAnordhvapuNDram | bhrUvikShepA~nchitamabhinavAmbhojapatrAyatAkShaM sAkShAdIkShe manasi madhuvidhvaMsana tvatsvarUpam || 84|| karNAbhyudyanmakaravilasatkuNDalaM tu~NganAsaM dantajyotsnAmadhuramadharajyotiShA shobhamAnam | gaNDAbhogoDDamarasuShamaM kaustubhollAsikaNThaM sAkShAdIkShe manasi madhuvidhvaMsana tvatsvarUpam || 85|| hArAbhyantassphuritatulasIdAmavanyasragADhyaM shrIvatsA~NkaprathinaghusR^iNAmodivakShovibhAgam | dIptasvarNA~NgadavalayakeyUravaddoshchatuShkaM sAkShAdIkShe manasi madhuvidhvaMsana tvatsvarUpam || 86|| udyadromAvalivaliyutaM prasphuraddundabandhaM lokeshADhyAsitavikachapadmollasannAbhirandhrama | kA~nchIdAmA~nchitakaTitaTaM pItakausheyavastraM sAkShAdIkShe manasi madhuvidhvaMsana tvatsvarUpam || 8|| ApInorudvitayamatulAkArajAnupradeshaM bhrAjajja~NghAyugalasuShamAbhogamAgUDhagulpham | kUrmAkAraprapadamadhikAtAmrapAdAravindaM sAkShAdIkShe manasi madhuvidhvaMsana tvatvarUpam || 88|| kAlAmbhodAjjananavakalAyaprasUnAbhirAmaM shyAmajyotiShpaTalapariveShA~nchitaM chAruveShama | sarvA~NgINaprakaTanaphalAvanyapUrNaprakAshaM (phalAvandhya) sAkShAdIkShe manasi madhuvidhvaMsana tvatsvarUpam || 89|| udyanmandasmitamadhurimodbhAsivaktrAravindaM kAruNyAmbhaHprasaralaharIpUrNanetrAravindam | yogIndrAntaHkaraNamadhuliTsevyapAdAravindaM sAkShAdIkShe manasi madhuvidhvaMsana tvatsvarUpam || 90|| pAtAlA~NghniM dharaNivalayaM shroNibhAgaM vihAya madhyoddeshaM surapuramukhaM brahmalokottamA~Ngam | bhAsvachchandrekShaNamanilanishvAsamambhodhivIryaM dhyAyAmyantastribhuvanapate pUruShaM tvAM virAjam || 91|| bhUtAtmAnaM bhuvanavitataM bhUtisarvasvabhA~nja bhuktermukterapi cha viShayaM bhUrikAruNyapUrNam | bhUtagrAmaprabhavavibhavaM bhUrbhuvaHsvarnidhAnam | bhUyo bhUyo manasi bhagavan bhAvayeyaM bhavantam || 92|| mAyAtItaM mananaviShayaM maunabhAjAM munInAM kAlAtmAnaM kalimalamuShaM kAraNaM kAraNAnAm | durvij~neyaM nigamavachasA mukhyAvAkyArthasAraM tejorUpaM tribhuvanapate chetasA tvAM smarAmi || 93|| AtmArAmaM vipulamamalaM vAkprapa~nchAtivR^ittaM dvandvAtItairviShayavimukhairyogibhishchintyamAnam | AvirbhUtasvarasaparamAnandaniShyandasAndraM vishvotpattisthitilayakaraM tvAM murAre smarAmi || 94|| muktisthAnaM munijanamanomandiraM mUrtihInaM nAnAkAraM nirupamamasa~NkhyAtavIryAnubhAvam | nirvyApAraM vividhavibhavaM nirmalaM nirvikalpaM vishvAkAraM paramapuruSha tvAmahaM bhAvayAmi || 95|| sthUlaM sUkShmaM gurulaghusamuttu~NgamuchchairgabhIraM dIpraM shAntaM taralamachalavyaktamavyaktarUpam | sarvAdhyakShaM sakalakaruNAgocharaM lUtamAyaM mAyAhInaM manasi kalaye deva rUpaM tvadIyam || 96|| sattAmAtraM vikR^itirahitaM vyAptamAdyantashUnyaM saMvidrUpaM guNagaNanikAvikramAhlAdapUrNam | shuddhaM buddhaM vighaTitatamobandhamAtmaprakAshaM pratyagbhUtaM tava muraripo rUpamantaHssmarAmi || 97|| sarvasmAdapyupari vilasatsarvabhUtAtmabhUtaM sarvAkAraprakaTanaparaM sarvatejonidhAnam | sarvApAyakShapaNanipuNaM sarvalokapradhAnaM tvadrapaM me lasatu hR^idayAmbhoruhe devadeva || 98|| nirvANAkhyaM nikhilajagatAmAshrayaM durvibhAvyaM bhavyaM divyaM bhavajalanidheH pAramuchchairayantam | sachchitsaukhyAtmakamupaniShanmukhyavAkyaprapa~ncha\- vyAkhyAyogyaM paramapuruSha tvatsvarUpaM smarAmi || 99|| satyaM j~nAnaM muhurapi mahAyogibhishchintyamAnaM pUrNAnandAmR^italaharikAjAlamAnyaM turIyam | o~NkArArthaM paramamamR^itaM tvanniShedhAvasheShaM brahmAdvaitaM paramapuruSha svAtmabodhaM smarAmi || 100|| stotraM viShNoriti mR^idupadaiH suprabandhaiH shatena shlokairebhirvirachitamidaM bhaktisaMvardhanAkhyam | bhaktyA yuktaH paThati khalu yaH prAtarutthAya nityaM prANApAye vrajati hi harerdhAma nirvANanAma || 101|| idaM stotraM paThennityaM yo naraH prAtarutthitaH | bhaktisaMvardhanaM nAma sa yAti paramaM padam || 102|| bhaktisaMvardhanaM nAma shlokAnAM shatakaM mayA | brahmadattAbhidhAnena stotraM viShNorvinirmitam || 103|| || iti shrIbhaktisaMvardhanashatake uttarabhAgaH sampUrNaH || iti bhaktisaMvardhanashatakaM sampUrNam | ## Proofread by Saritha Sangameswaran \medskip\hrule\obeylines Please send corrections to sanskrit at cheerful dot c om Last updated \today https://sanskritdocuments.org \end{document}