% Text title : Bhakti Shatakam % File name : bhaktishatakam.itx % Category : misc, buddha, shataka % Location : doc\_z\_misc\_general % Transliterated by : DSBC staff % Proofread by : Miroj Shakya % Acknowledge-Permission: Prof. Miroj Shakya, Text Nagarjuna Institute of Exact Methods, Digital Sanskrit Buddhist Canon Project, University of the West https://www.dsbcproject.org/ % Latest update : March 8, 2025 % Send corrections to : sanskrit at cheerful dot c om % % This text is prepared by volunteers and is to be used for personal study % and research. The file is not to be copied or reposted for promotion of % any website or individuals or for commercial purpose without permission. % Please help to maintain respect for volunteer spirit. % \documentstyle[11pt,multicol,itrans]{article} #include=ijag.inc #endwordvowel=.h \portraitwide \parindent=100pt \let\usedvng=\Largedvng % for 1 column \pagenumbering{itrans} \def\engtitle#1{\hrule\medskip\centerline{\LARGE #1}} \def\itxtitle#1{\medskip\centerline{\LARGEdvng #1}\medskip\hrule} \def\endtitles{\medskip\obeyspaceslines} %% \begin{document} \engtitle{.. Bhakti Shatakam ..}## \itxtitle{.. bhaktishatakam ..}##\endtitles ## namastasmai bhagavate.arhate samyaksambuddhAya | j~nAnaM yasya samastavastuviShayaM yasyAnavadyaM vacho yasmin rAgalavo.api naiva na punardveSho na mohastathA | yasyAheturanantasattvasukhadA.analpA kR^ipAmAdhurI | buddho vA girisho.athavA sa bhagavAn tasmai namaskurmahe || 1|| devaH shambhurna vairI harirapi na ripuH kevalI no sapatno nodAsInaH svayambhurna cha punarapare te pare vAsavAdyAH | shAstA buddho na bandhurjagati na janako naikagotraikajAtiH kintveShAM vItarAgo bhavati sakalavid yaH sudhIbhiH sa sevyaH || 2|| brahmA vidyAbhibhUto duradhigamamahAmAyayAli~Ngito.asau viShNU rAgAtirekAnnijavapuShi dhR^itA pArvatau sha~NkareNa | vItAvidyo vimAyo jagati sa bhagavAn vItarAgo munIndraH kaH sevyo buddhimadbhirvadata vadata me bhrAtarasteShu muktyai || 3|| brAhmaM vaiShNavamaishvara~ncha bahudhA labdhvA padaM hetutaiH (taH) saMsAre vata saMsaranti punarapyekAntaduHkhAspade | kintairdehabhR^itAmapAyabahalairAdyantavadbhiH padai\- stasmAnnityamanAdimadhyanidhanaM bauddhaM padaM prArthyatAm || 4|| chidAkAraM sUkShmaM vibhuvishadamAkArarahitaM nirIhaM nIrUpaM niravadhikR^ipAbIjamajaram | samastaj~naM sarvopadhirahitamaishyAdamR^itadaM jitAna~NgaiH sevyaM bhavatu mama tadvastu sharaNam || 5|| aNIyo.aNoH kleshApratihatamanantaM cha mahato mahIyo mAhAtmyapravijitajagadbhUrikaruNam | dvibAhuM nirbAhuM dvipadamapadaM satrivadAnaM dvinetraM nirnetraM saguNamaguNaM tattu sharaNam || 6|| sadAnandaM tathyaM sarasahR^idayaM sUktisadanaM satAM sevyaM samyaksamadhigatatattvaM samamanaH | svataH siddhaM sAdhyaM sakalaphaladaM saumyavadanaM sadIyaM sarvIyaM bhavatu mama tad vastu sharaNam || 7|| svayambhUtAbhij~naM bhavabhayaharaM bhItirahitaM sphuradbhAgyo bhogojjhitamahatavIryaM madanajit | chaturmArgaM shuddhaprakR^iti cha tathAkartR^ikamidaM mudaM lokotkR^iShTAmatanu tanutAM vastu jagatAm || 8|| kvachinnIlaM pItaM kvachidapi cha raktaM kvachidapi kvachichchandrachChAyaM kvachidapi cha mA~njiShTharuchiram | kvachit prAbhAsvaryyaM yadayati cha varNavyatikarA\- chChikhAShaTkaM taistairdadhadupari tadvastu sharaNam || 9|| parAbhedyaM jAmbUnadarUchiravarNaM trisharaNaM triyAnaM tripraj~naM tribhuvanasharaNyaM trivachanam | kR^ipApAtraM mandasmitamaruNasachchIvaradharaM kR^itadhyAnaM siddhAsanaghaTitapAd vastu sharaNam || 10|| prasannaM phullendIvaranayanayugmaM tripiTakaM muhurvyAkurvANaM suranaragaNebhyaH karuNayA | paraM shAntaM svarNopalarajataloShTreShu cha samaM dR^ishAM navyAtithyaM bhavatu mama tad vastu sharaNam || 11|| sharaNamiti sadagraM sAdhu gachChAmi buddhaM sharaNamiti virAgAgrIyamanvemi dharmam | sharaNamiti gaNAnAmagriyaM yAmi sa~NghaM sharaNamiti punastriM dvitrivAraM vrajAmi || 12|| punarapi sharaNaM vrajAmi buddhaM punarapi lokaguruM guruM karomi | punarapi kathayAmi naumi vande, tvayi mama gautama naiva tR^iptirAste || 13|| tribhuvanamasakR^innirUpya yuShmatpadasarasIruhareNumAshrito.aham | sharaNamayamaya~ncha daivatamme gatiraparA mama nAsti nAsti nAsti || 14|| anityamakhilaM duHkhamanAtmeti pravAdine | namo buddhAya dharmAya sa~NghAya cha namo namaH || 15|| bho vItarAga bhagavaMstava pAdameva vande munIndra muhurevamimaM pravande | bhUyaH punaH punarimaM parataH parastAt pArshvadvayorupari dikShu vidikShu vande || 16|| gatamiha bhavatA pathA cha yena sthitamapi yatra cha yatra vA niShaNNam | shayitamapi munIndra yatra yogAt tadapi shataM praNamAmi puNyatIrtham || 17|| samajani bhagavAn svayaM sma yasmin sakalamabodhi cha yatra dharmachakram | vishadataramadIpi yatra yasminnamR^itamapUri tadapyahaM namAmi || 18|| sarvaj~nachakrasarasIruharAjahaMsa kundendusundararuchiM suravR^indavandyam | saddharmachakrasahajaM janapArijAtaM shrIdantadhAtumamalaM praNamAmi bhaktyA || 19|| nAgAlayopari dharAlayachakravAlamUrdhni trikUTagatakA~nchanashailashR^i~Nge | bodhidrumUlanihitAkShayadhAtubimbaM vibhrannamAmi shirasA jinachaityamagram || 20|| haimAlavAlavalayAntaratnavedhI vajrAsanollasitamUlamagendrabodham | yaM prApya mAravijayAnupadaM prapede sarvaj~natAM sa bhagavAn tamahaM namAmi || 21|| mUrddhan buddhaM nama tvaM shravaNa shR^iNu sadA dharmamadvaidhavAdi proktaM sarvatra rUpaM nayana nirupamaM pashya jighrA~Naghripadmam | ghrANa tvaM chArkabandhoH stuhi sakhi rasane shrIghanaM pUjayethAH siddhaM pANe vrajA~Nghre jinasadanamadasmadguNaM chitta chintya || 22|| buddho dharmashcha sa~Nghastritayamiti mahAnargharatnaM mumukSho\- radyArabhyAhamasmai tribhavabhayabhide sandadAmyAtmabhAjam | eSho.ahaM tatparaH syAmparamayanamito nAsti me satyametat syAmasyAhantu shiShyastridashanutamidaM koTikR^itvo namAmi || 23|| nAhaM lAbhArchanArthI na cha bhayachakito nApi satkIrtikAmo na tvaM dharmAMshuvaMshaprabhava iti mune nApi vidyAshayA te | pAramparyAnnacha tvAM sharaNamupagataH kintu te sArvajanyaM samyagj~nAnaM samIkShya tvayi bhavajaladhiM santarItuM pravR^ittaH || 24|| tvadvairAgyasamastabhUtakaruNA praj~nAdinAnAguNa\- sphUrjjachchandanapa~Nkasindhupatito gantuM kShamo nAnyataH | bhUpA vA yadi daNDayanti vibudhA nindanti vA bAndhavA mu~nchanti kShaNamapyahaM jina pitarjIvAmi na tvAM vinA || 25|| svarge vA vasatirmamAstu niraye tiryakShu kiM vAsure pretAnAM nagare.athavA narapure kvApyanyataH karmaNA | bho sarvaj~na tatastatastava guNAn karNAmR^itasyandino niShpApAnavalambatAM mama mano nAnyA sukhaprArthanA || 26|| tavaivAhaM dAso guNapaNagR^ihIto.asmi bhavatA tavaivAhaM shiShyaH svavachanavinIto.asmi bhavatA | tavaivAhaM putraH smR^itikR^itasukhastadgatigato guro buddhasvAmin mama janaka mAM pAhi bhavataH || 27|| pitA mAtA bhrAtA tvamasi bhaginI tvaM cha vipadi sthiraM mitraM bandhuH prabhuramR^itadIkShAgurutamaH | tvamaishvaryyaM bhogo tvamasi dhanadhAnyaM cha mahimA yasho vidyA prANastvamasi mama sarvaj~na sakalam || 28|| vItarAja munIndra dayAmbudhe sugata bhagnabR^ihadbhavapa~njara | adhigatAmR^ita buddha mano.ambujaM mama tavAnagha gandhakuTIyatAm || 29|| anAtmanyanitye.ashubhe duHkhaduHkhe durante.atra saMsArachakre bhramantam | tvameko.asi mAM trAtumIsho dayAbdhe prabho.ataH prasIda prasIda prasIda || 30|| prasIdesha devesha lokesha jiShNo jagadvandya madvandya sadvandya buddha | aghore bhavAre smarAre tamore tavaivAsmi bhakto vapurvA~NmanobhiH || 31|| sa tava kulasutaH sa eva bhaktaH sa bhavati shAsanadhUrvahaH sa shiShyaH | sa cha sharaNagataH sa eva dAsaH kathamapi yo na vila~Nghayet tavAj~nAm || 32|| jagadupakR^itireva buddha! pUjA tadapakR^itistava lokanAtha! pIDA | jina jagadapakR^it kathaM na lajje gaditumahaM tava pAdapadmabhaktaH || 33|| dhanajanavibhavAsudeharAjyaM yadupakR^ite shatadhA tvayA pradattam | tamahitamapakartturasya lokaM kva mama kR^ipA muditA kva vA cha maitrI || 34|| upapatimasatIva chittavR^ittirvrajati bhavantamapAsya pa~nchakAmam | api cha viShayiNo na mokShasiddhiH kimu karavANi munIndra dehi dAsyam || 35|| priyatama puruShottamAgrabuddha shramahara siddha jagatprasiddhakIrte | bhava sharaNamanuttaraprasAdin pratipadamasmi tavaiva dAsadAsaH || 36|| dashabala kalikAladurbalo.ahaM chiraduritArNavatu~Ngabha~NgamagnaH | tava kathamanuyAmi dharmanAvaM jina mama dehi kR^ipAkarAvalambam || 37|| praNatiriyamanekashastavAhaM bahu bhavaduHkhamavekShya bhItibhItaH | dhara gurutaratR^iShNayA patantaM jina mama dehi kR^ipAkarAvalambam || 38|| jagati tava kR^ipA hi nirvisheShA prapavatayA jina mAM cha doShaduShTam | alamahamiaha no sukhI bhavendurna samakarashcharatIva sAdhvasAdhve(dhvoH) || 39|| upachitabahumohajAtamandhaM vigatadayaM vigatAtmabandhugandham | apagataguNavidyamudgatAghaM janamavivekamavAshu dInabandho || 40|| akaravamuruduShkR^itaM purA yad mama vapuShA manasA cha chetasA cha | anukalamakhilaM pralIyatAM tat tava charaNasmaraNena sarvavedin || 41|| sugata tava puraH puraH pR^ithivyAM madhuramate patito.asmi daNDanatyA | akushalamakhilaM tavAnubhAvAt prapatatu notpatatAt punaH sahaiva || 42|| tava charaNasarojameva vande tava padapa~Nkajameva pUjayAmi | tava padayugameva bhAvaye.ahaM tava padameva sadaiva daivataM me || 43|| kamapi na kathayAmi nArchayAmi kamapi na naumi na chintayAmi nehe | kamapi na sharaNaM vrajAmi hitvA tava charaNaM pitarasmi ki~Nkaraste || 44|| sadasi sadasi vAchi siddhaM pathi pathi sadmani sadmanIha buddham | bhuvi bhuvi mama vAri vAri chetaH kalayatu nityamimaM hi lokanAtham || 45|| aviratamavalokayAmi buddhaM gatarajasA manasApi chakShuSheva | svapimi nishi nidhAya yaddhR^idi tvAM na mama samaM virahastvayA ta eva || 46|| mama tadiha dinaM hi durdinaM syAd ashitaghanasthagitaM na durdinaM me | yadamR^itasamabuddharatnanAma smR^itirahitaM dinamasya mA tadastu || 47|| amR^itada ShaDabhij~na dharmarAja tribhuvanavandya munIndra gotameti | aharaharanukIrttyate nR^ibhiryairahamahitAnapi tAnnamAmi dhanyAn || 48|| dashabala jina siddha vajrabuddhe sugata tathAgata buddha shAkyasiMha | iti nigadati yaH kvachit kadAchit tamabhinamAmyapi dAsavaMshajAtam || 49|| madanajita parAjitebhya shAstarvibhava vinAyaka vishvavidvareNya | kavivara vadatAMvaresha shuddhodanasuta shAkyamune mune prasIda || 50|| amR^itamapi nipIya nirjarendra punarapi te.api shunIstanaM dhayanti | sakR^idapi tava vAksudhArasaj~no na vishati jAtu sa mAtureva garbham || 51|| ahamiha bhagavannalaM na soDhuM jananajarAmaraNA(ma)yAdibAdhAm | kuru mama karuNaM disho na jAne guru tadavekShya cha tiryagAdiduHkham || 52|| tadupari parichintya vR^iddhakAle karacharaNAdidR^igAdipAravashyam | agatikamativepate mano me jina kimahaM karavai prabho prasIda || 53|| shravaNapathagate.apyadR^iShTapUrve sukhakR^iti vastuni yattanomi tR^iShNAm | aviratamata eva shAntibIje tvayi valate ramate mamAtra chetaH || 54|| savipadi ramate na me mano.ataH suranarasharmaNi pUrvapUrvabhukte | anudinamanubhUya sharkarAyAmapi viratiM kurute hi dR^iShTadoShaH || 55|| karatalagatamapyamUlyachintAmaNimavadhIrayatI~Ngitena mUrkhaH | kathamahamapahAya buddharatnaM jagati dhanI guNavAMshcha paNDitashcha || 56|| sa bhavati matimAn sa nAkulInaH sa cha guNavAn sa cha kIrtimAn sa shUraH | sa jagati mahitaH sukhI sa eva tvayi jina yasya sunishchalAsti bhaktiH || 57|| api sakalamadhItamatra tena shrutamapi sarvamanuShThitaM cha tena | api jitamajitena tena vishvaM tvayi jina yasya sunishchalAsti bhaktiH || 58|| tyajati nijaparamparAdareNetarasamayasya jano na dR^iShTa dR^iShTim | asuharamapi gauraveNa mAturna khalu shishurviShamodakaM tu mu~nchet || 59|| kavivaramahamasmi paNDitaste jina na jahAmi kathannu kurgR^ihItam | nudati hi tamasantatiM pravR^ittAM mihiramarIchisahAyinI sudR^iShTiH || 60|| sugatapadaparA~Nmukhasya puMsaH kimu tapasA yashasA cha kiM kimanyaiH | sugatapadaparA~Nnukhasya puMsaH kimu tapasA yashasA cha kiM kimanyaiH || 61|| sugatapadi na bhaktirasti yeShAmajananireva mahItale.astu teShAm | kathitamiha kR^itAgasAM narANAM nirayagatirniyataM na chAnyato yat || 62|| viditasakalashAstramunnatAnAM kulabhavamuttamarUpayauvanAdyam | jina bhavadanupAsakaM nR^ipAsaM tyajatu mano mala nIchavattu jAtyA || 63|| parihR^itamadamAnamatsarAdiH sakaruNashIlasamAdhimAn vivekI | tava padadR^iDhabhaktirantyajo.api pratibhavamastu narottamaH sakhA me || 64|| vihitajinapadArchanasya bhakturdashadivasAnapi jIvitaM prashastam | na tu niyutasahasrakalpakoTIrakR^itamunIndrapadAbjapUjanasya || 65|| sa bhavati surasundarIsakho.anyaiH kR^itamabhinandati vArchanaM cha bhaktyA | tridashanaraguro tvadIyapUjAmagatitayA yadi kartumakShamaH syAt || 66|| suruchiramatichitrachitrarUpaM nayanapathaM nayatIha yastavArchAm | rahayati puruShaM tamapyudAraM chiratarasa~nchitaduShkR^itaM kavIndra || 67|| maNikanakashilAdinirmitAM yaH praNamati te pratimAM tayoshcha tulyam | phalamiha manasashcha sa.nprasAdAdanuparataM jina yo.agrato namet tvAm || 68|| sakR^idapi tava pAdapadmapUjA vanakusumairapi yaH karoti dhImAn | avanatasurasa~NghamaulimAlojjvalamamalaM shrayate tamAdhipatyam || 69|| yadi bhavati sarUpamekachittakShaNasharaNodbhavapuNyavR^indamuchchaiH | gaNasharaNa samantabhadrasAdho.akhilanabhaso.apyatirichyate tadA tat || 70|| tava guNakathane tu yaH prasannastamanuvishanti mune guNAstvadIyAH | udayati shashini prasannamindUpalamiva tatkiraNAvalItuShAraH || 71|| sakR^idapi samadAyi deva ki~nchid bhavaratimutsR^ijatA janena tubhyam | sugata tadakhilAn lunAti dhArA vadasiriva drumamAshravAdidoShAn || 72|| kR^itamiha sukR^itaM mR^iShAdR^ishA yajjanayati tat kila tasya durvipAkam | kShitisalilarasaM svatiktabhAvaM nayati yathA pichumardabIjamuptam || 73|| tava padanaline nipatya bhUyo nipatati naiva chaturShvapAyakeShu | nahi kushalakaro naraH kadApi kvachidapi durgatimeti nAtha kashchit || 74|| iti bhavadupadeshato viditvA tava padapa~NkajapUjane rato.asmi | dR^iDhayatu bhagavAn yuge yuge me kumatimudasya bhave bhave.aryabhaktim || 75|| sthiramapi bhagavan kShaNaM tavoktau karacharaNAni dR^igAdi vairivargaH | vyathayati hR^idayaM balAdvichAlya tvamidamanAthamanIsha pAhi pAhi || 76|| yadi nayanamayaM vashe vidhAtuM yatati tadA dravati shravo yadA tat | tadanu rasana\-nAsikAsharIrANyahaha parasparadurgrahANi chaivam || 77|| gatiratichapalasya chetasaH syAdiha nabhasIva nabhasvato.asurodhA | kabhamapi bhajate krameNa dhairyaM chiaramidamabhyasanena saMviraktyA || 78|| vishadamapi manaH svabhAvato me chirakR^itakilviShakAlimAhR^itaM syAt | kushalajalalavaiH kathannu dhautaM bhavati mayedR^ishachetasArjitaistaiH || 79|| shuchitaravachanAmR^itapravAhaiH raghamalinIkR^itachittasantatiM mAm | anadhivara nitAntamAdhitaptaM sapadi vishodhaya daNDavannamAmi || 80|| sati sakalaguro mune prasanne kimiha durApamamutra kiM durApam | yadamalamanasastvadIyadAsAH surapatitAM manasApi nAdriyante || 81|| vidadhati bhayamindriyANi bhUmnA viShayaviShagrahaNeShu doShadR^iShTyA | nahi suviditabhAvidAhadoShaH shishurapi dIpashikhAgrasa~NgR^ihI syAt || 82|| na bhavati jina yAvadeSha jIrNo viShayapishAchaniShevaNena tAvat | jhaTiti sukR^itakarmaNi prayojya svava sharaNAgatavatsalAgataM mAm || 83|| iadamapi yadi vedmi putradArasvatanugR^ihAdi marIchikAmbutulyam | sthagayati mamatA cha mAmahantA tadapi hi mohavijR^imbhitaM garIyaH || 84|| ajani cha nijakAraNena sarvaM nirasati jIryati nashyati svahetoH | ahamapi hi tathaiva dhAtupu~njaH kathamahamasya kathaM mune mamedam || 85|| Atmabuddhiriha yasya jAyate sA cha tasya janayedaha~NkR^itim | sA tanoti sutarAM bhavaspR^ihAM saiva mohajananI muhurmuhuH || 86|| tena karma kurute shubhAshubhaM taddhi duHkhajanakaM bhavatraye | duHkhamUlamata eva sAtmadhIH tAM lunIhi jina me vacho.asinA || 87|| atha sakalavidaM dayAsamudraM tribhuvanakAraNakAraNaM kulInam | nikhilagatamanantamastishAntiM munijanamAnasahaMsamIshamIDe || 88|| snAne karmaNi bhojane vitaraNe ghrANe tathAkarNane dhyAnasparshanadarshanAdiShu tathA sambhAShaNAdAvapi | prAtaH sAyamatho divA cha nishi cha tvatpAdapadme vibho chittaM me ramatAM munIndra satataM yUnAM yuvatyAmiva || 89|| matsvAmin madabhIShTakalpaviTapin maddevate madguro manmAtarmadupAsya matpriyasakhe matsadgate matpitaH | madvidye madasheShaduHkhashamakR^id madbhAvane mannidhe manmukte madudArabhAgya madaso madbuddha mAM pAlaya || 90|| brahmA jihmAnano.abhUd gururagururaharNAyako.anAyako.asau viShNustR^iShNAM prapede kavirakavirabhUdIshvaro.anIshvaro.api | sheShaH sheShAnubhAvastava sugata nutau khaNDitAkhaNDaloktiH ko.ahaM mUDho varAkastridashanarapate kIrttane te guNAnAm || 91|| dashadvayadhikaviMshatisphuradashItyanuvya~njanaiH mahApuruShalakShaNaM vapuShi yasya dedIpyate | kalAmapi na ShoDashIM bhajati tasya puNyAtmanash chaturmukhamukho gaNo diviShadAM nR^iNAM kA kathA || 92|| mahendranavachApavat kanakaparvate sarvataH sadA tava manoharaM sphurati suprabhAmaNDalam | dR^isho bhavati gocharaM tadiha yasya tasya tvarAn tamastatimanuttamAM harati dUramantarbahiH || 93|| rUpaM lochanalobhanaM shravaNayorAnandasandohadA vANI vishvavimohakR^it tava kR^ipAvesho.atishAntastava | pANDityaM prathitaM jagatsu bhagavan sarvaj~nanAmnaiva te sAmrAjyasya cha yauvane nirasanaM vairAgyasImA sphuTam || 94|| shauryaM tvadviShameShu darpadalanAda~NgIkR^itaM daivataiH yadvANaiH sa surAsuraH pravijito loko.ayamoshatkaram | vIryaM te prakaTIchakAra nitarAM nirvANasAkShAtkR^itiH kiM brUmo balavaibhavaM bhagavatastatte jagaddurvaham || 95|| yatra chChAgatura~NgamAraNavidhirvede.api taM nindasi premNA prANabhR^itAmataH sakaruNastvatto mahAnnAparaH | evaM te guNasampado na viShayA buddherasUyAtmanAM te mUDhAH pralapanti hanta sugato madvedanindItyayam || 96|| nirmajjatsurasundarIkuchachalannirmandamandAkinI\- pheNakShIrasamudrakairavasakhI satkIrtilakShmIstava | yannAli~Ngati mandabhAgyamadhunA bhUyAnna tenApi me sa~NgaH sa~NgagadAdivaidya bhagavanneShApi me prArthanA || 97|| ye tvAM gachChanti buddhaM sharaNamiti na te durgatiM yAnti santas tyaktvA kAyAnmanuShyAnniratishayasukhAn te labhante.atha divyAn | duHsvapno durnimittaM durahidurahitA durgrahA duShTasattvA duHkhaM durvyAdhayo.api kvachidiha kushalAn nopasarpanti chaivam || 98|| ChatraM brahmA vyadhAtte maNimayamamalaM chAmaraM chakrapANi\- stotAro gadyapadyairharaguruphaNinaH shA~Nkhiko.abhUnmahendraH | anye dIpodakumbhadhvajakusumalasatpANayo bhaktinamrAs tasthurvyAkhyAya dharmaM bhuvamavaruhataH svargataste munIndra || 99|| mAtevAsIt parastrI bhavati paradhane na spR^ihA yasya puMso mithyAvAdI na yaH syAnna pibati madirAM prANino yo na hanyAt | maryAdAbha~NgabhIruH sakaruNahR^idayastyaktasarvAbhimAno dharmAtmA te sa eva prabhavati bhagavan pAdapUjAM vidhAtum || 100|| sarvaprANAtipAtAt paradhanaharaNAt sa~NgamAda~NganAyA mithyAvAdAchcha madyAdbhavati jagati yo.akAlabhutkternivR^ittaH | sa~NgItasraksugandhAbharaNavilasitAduchchashayyAsanAd apyAsIddhImAn sa eva tridashanaraguro tvatsuto nAtra sha~NkA || 101|| shrotApattyAdimArgAH sadavayavayutA ghnanti rAgAdidoShAn doShAste ChinnamUlA hatabhavagatayastatphalairyAnti shAntim | mArgANAM kleshahAniH sadamR^itamajaraM kAraNaM syAnnavAnAM dharmANAM hetureShAM tava jina vachanaM tasya hetustvameva || 102|| viMshatsatkAyadR^iShTikShitidharamamalaj~nAnavajreNa bhittvA rAgadveShAdipApAntaduditamakhilaM karma chonmUlayantaH | chatvAro labdhamArgAstadanuguNaphalAste.api chatvAra evaM tvatashchAShTAryasa~NghaH pR^ithagiti na punashchintayAmo munIndra || 103|| api gagaNamanantaM sarvasattvo.apyanantaH sakalamidamanantaM chakravAlaM vishAlam | vadasi jina viditvAnantayA j~nAnagatyA tava cha guNamanantaM vedasI buddha chaivam || 104|| bhagavati bhavatIti dhvaMsakAriNyamoghe bhavatu bhavatu bhaktirjanmajanmAntare.api | bhavatu bhavatu dharmaH sarvathA me.anushAstA bhavatu bhavatu sa~Ngho.anuttarA puNyabhUmiH || 105|| tribhuvanamahanIyaM tvAmabhiShTutya buddhaM vishadataramadabhraM puNyamatrArjitaM yat | jagati sakalasattvAstena sambuddhabodhiM vidhutavividhapApA bhAvanAbhirvrajantu || 106|| bhAsvadbhAnukulAmbujanmamihire rAjAdhirAjeshvare shrIla~NkAdhipatau parAkramabhuje nItyA mahIM shAsati | sadgauDaH kavibhAratikShitisuraH shrIrAmachandraH sudhIH shrItR^iNAmakarot sa bhaktishatakaM dharmArthamokShapradam || 107|| iti shrIshAkyamunerbhagavataH sarvaj~nasya paramopAsakena gauDadeshIya\- shrIbauddhAgamachakravarttinA bhUsureNAchAryeNa mahApaNDitena virachitaM bhaktishatakaM sampUrNam | ## Alternative verses ## nR^ipaH parAkrAntibhujo mahIbhujo shiromaNiH paNDitamaNDalIsakhaH | sa rAmachandraM kavibhAratidvijaM chakAra bauddhAgamachakravartinam || 1|| buddho me jayatAM jinaH sa bhagavAn taddeshanA nirmalA stheyAt sattvahitAya bhAtu bhaNitA sa~NghastadAdhArakaH | la~NkeshapramukhAshchiaraM vasumatIM rakShantu nityaM nR^ipA varShantu stanayitnavashcha samaye maitrIM labhantAM prajAH || 2|| tIrthagrAmapateryatestripiTakAchAryasya bhUpAnvayA\- chAryashreShThamunIshvarasya sugiraH shrIrAhulasvAminaH | shiShyo yo.avarajaH suma~NgalamunirdhImAn svayA bhAShayA kAruNyena munIndrabhaktishatakavyAkhyAnamAkhyAtavAn || 3|| namo buddhAya gurave namo dharmAya shAsine | namaH sa~NghAya mahate tribhyo.api satataM namaH || 4|| siddhiH || ## \medskip\hrule\obeylines Please send corrections to sanskrit@cheerful.com Last updated \today https://sanskritdocuments.org \end{document}