% Text title : Lokeshvara Shatakam % File name : lokeshvarashatakam.itx % Category : misc, buddha, shataka % Location : doc\_z\_misc\_general % Transliterated by : DSBC staff % Proofread by : Miroj Shakya % Acknowledge-Permission: Prof. Miroj Shakya, Text Nagarjuna Institute of Exact Methods, Digital Sanskrit Buddhist Canon Project, University of the West https://www.dsbcproject.org/ % Latest update : March 8, 2025 % Send corrections to : sanskrit at cheerful dot c om % % This text is prepared by volunteers and is to be used for personal study % and research. The file is not to be copied or reposted for promotion of % any website or individuals or for commercial purpose without permission. % Please help to maintain respect for volunteer spirit. % \documentstyle[11pt,multicol,itrans]{article} #include=ijag.inc #endwordvowel=.h \portraitwide \parindent=100pt \let\usedvng=\Largedvng % for 1 column \pagenumbering{itrans} \def\engtitle#1{\hrule\medskip\centerline{\LARGE #1}} \def\itxtitle#1{\medskip\centerline{\LARGEdvng #1}\medskip\hrule} \def\endtitles{\medskip\obeyspaceslines} %% \begin{document} \engtitle{.. Lokeshvara Shatakam ..}## \itxtitle{.. lokeshvarashatakam ..}##\endtitles ## OM namo lokanAthAya | bhAsvanmANikyabhAso mukuTabhR^iti namannAkanAthottamA~Nge bhaktiprahve sarojAsanashirasi hasanmAlatImAlikAbhaH | maulau mIlanmR^igA~NgAmakR^ishakapishatAM shAmbhave shAtayantyo loke lokeshapAdAmalanakhashashabhR^itkAntayaH santu shAntyai || 1|| nirdhUtA dhUrjaTIndorna khalu paTu jaTApi~NgamAsa~NgashAraiH sArairArAnmayUkhairna cha harimukuTAmandamANikyabhAbhiH | kAlimno nApi lInA vibudhagaNalalatkuntalAlInalInAl lokeshvaryo.anivAryAshcharaNanakharuchaH santu vo dhvAntashAntyai || 2|| paryAptodArakoShasphuTatarakamalAbhogasampattihetu\- rdUrIbhUtapriyANAmapahR^itaviShamAta~Nkasha~NkA janAnAm | na kShiptAla~NghanairapyupashamitatamodurgrahodbhUtabhIti\- rlokeshA~NghryorapUrvA nakhashishirarUchAM chandrikA vaH punAtu || 3|| niHsheShaM klesharAshIndhanadahanamahApAvakochchaiH shikhA vo lIlAlokAstrilokyAmapahR^itagahanAbaddhamohAndhakArAH | vahniskandheShvabandhyA narakabhuvi sudhAvArivistAradhArAH saMsArIM saMharantAM nakhanivaharuchaH padmabhR^itpAdajAtAH || 4|| svachChandachChedivA~nchChAvitaraNachaturAchintyachintAmaNInAM udgADhAta~Nkasha~NkodgamashamanamanohAriNI hArabhAsAm | spaShTAvirbhUtanAnAguNanivahadhR^itAdarshabimbachChavInAM ChAyA vaH pAtu lokeshvaracharaNabhuvAmunmayUukhA nakhAnAm || 5|| nAthasyoda~nchaduchchAmitaruchiruchibhI rochamAnoruchUDA\- rochiShNoruchchakAsachcharaNanakharuchAM sa~nchayo.asau chiraM vaH | atyuchchIyAt tadarchAchaturasurashirashchAruratnochchayochchai\- rnAnAnishchArirochishchayarachitashachIruchyachApopachAraH || 6|| shrImadbhogonnatInAmabhimataviShayaprAptidAnAdahInAM sevAbhAjAM samantAdavichalitaruchaH prItimutpAdayantaH | vaimalyAtulyabimbopahasitashashinaH shAtitadhvAntadoShA\- stoShaM mANikyadIpA iva dadatu nakhAH padmapANeH padorvaH || 7|| rAjadrAjIvapANernakhanivaharuchAM pAdapadmodbhavAnAM udbhedo bhedako.asau bhavatu bhavabhiyAM nirbharANAM bharaM vaH | jAtastaddehabhUmechaviratakaruNAvAridattopakAro yo.analpaH kalpavR^ikShA~Nkuranikara ivopAttavij~nAnabIjaH || 8|| lokeshasyA~Nghripadmaprabhavanakharucho dattamArArisenA\- santrAsAH shoNatUNonmukhanihitaphalAmoghabANAMshushobhAH | shashvatsaMsAraghorAvaTapatitajanottAraNAsajjarajju\- prArohA rohayantAM duradhigamamahAsampaduchchaiH padaM vaH || 9|| bhAsvantaH kleshakarmashramavivashajagattApavichChedashUrAM dUrAddoShopalabdheH paTubudhaguravastArakA ye janasya | sAndrAnandaM dadAnAH sakalashashadharashrIbhR^ito niShkala~NkA\- ste vashchintAmachintyAH kamalakaranakhAH pAdajAtA jayantu || 10|| bhAsvatkhaNDendukhaNDairapachitirachanA kiM kR^itA shambhuneyaM nyastA ratnAvalI vA kimu niratishayotkaNThayA bodhilakShmyA | devairdivyAdbhutAnAmasamasumanasAM lambitA mAlikA nu prIyAtpa~NktirnakhAnAmiti janitamatirlokanAthA~NghrijA vaH || 11|| kvAyaM rAjIvajanmA namadamarashirastu~NgamANikyashayyA\- shashvatsuptA~NghrireNuH kva cha dharaNitalAlambamaulipraNAmaH | itthaM sa~njAtahAsA iva ruchinichayairdanturA ye durantA dhvAntachChedAya lokeshvaracharaNabhavAste nakhA vo bhavantu || 12|| shUrAstApApahAre shishiratarasudhAshIkarAsArakArAH prAkArAH krUradUraprasaradurusharAsAramArApakAre | saMsArAkArakArAgR^ihabR^ihadudarodAraduHkhaprakAraM ghoraM vaH saMharantAM charaNanakharuchaH shrIkarAH padmapANeH || 13|| bhAso lokeshapAdaprabhavanakhabhuvAM dUradurvAramAra\- vyAmuktavyApibANAvaraNajavanikAbhrAntimutpAdayantyaH | sa~NkleshAnIkanAshasphuTapishunamahAketusa~NghAtakalpA\- strailokyAshakyashaktitribhavajayabR^ihadvaijayantyo jayanti || 14|| samyaksambodhichetaH shashina iva samudbhAsibhAsAM samUho nirdagdhakleshabhUtiprachaya iva bR^ihanmuktimArgAnilAstaH | vinyastAdabhrashubhropalaphalaka iva krUramArairabhedyaH pAyAdutprekShito vo nakharuchinikaraH pAdajaH padmapANeH || 15|| vailakShyeNekShaNIyAH kShaNamasamatamaHkShepadakShAH kShapANAM nAthenAkShuNNapakShakShatinijavipadA niShkala~NkAkShayA ye | akShINArAtipakShakShapaNapaTujagadrakShaNAkShuNNadIkShA\- rakShA rakShantu lokeshvaracharaNanakhAste.akShaNakShepato vaH || 16|| satsampatsAdhanasya pravarakamalabhR^itpAdadurgAshrayasya trailokyashrIjigIShornakharuchinivahasyAtulo.abhyuchchayo vaH | mitreNAptodayena sphuTamanuvalatAlambhitAtyantavR^iddheH pAyAt sApAyasarvavyasanaripumahAyAnasaMsiddhihetuH || 17|| avrIDashchUDayA.asau vahati pashupatiH kAmamardhendubhUShAM shaureH shobhAbhilAShaH kathamapi kR^itinaH kaustubhenAstameti | dR^iShTe.asmin so.api mogho maghavamaNimahAmaulirityAptachittai\- ryatkAntyAchinti lokaishcharaNanakhagaNaH padmapANeH sa jIyAt || 18|| ArAduchchairuda~nchatkR^itavitatiradhastArako nArakANAm | udyannIhArarochiH shuchirarivadanashyAmatApAtahetuH | durvij~neyAnubhAvo nikhilajagadatispaShTadR^iShTiprakAshaH pAdAmbhojAvalambI nakhakiraNachayaH pAtu vo buddhamauleH || 19|| dR^iShTo hR^iShTAmareshArchanachaturavadhUmuktakarpUrapAMshu\- prodbhAso bhaktibhArapravaNaharajaTAbhUtivibhrAntabhUmiH | pUjAvikShiptalakShmIkarakamalagalatkesharAgrANureNu\- chChAyaH pAyAdapAyAnnakhakaravisaraH padmahastA~Nghrijo vaH || 20|| merau niShpItapItadyutiramarakarisphArasindUradhUlI\- shoNashrIshAntashUro haritaharihayAhInahArityahArI | mIlannIlAvabhAso nakharuchivisaraH padmabhR^itpAdapadmAd udyaddugdhAbdhivR^iddhitrasadamaravadhUvIkShito rakShatAd vaH || 21|| shobhA sambhAvyate.asmin himakaradhavalairnAmaraishchAmarairvA bhaktyArambheNa rambhe parikirasi mudhA kiM nu karpUradhUlIH | kiM te puShpaiH prakIrNaiH shachishuchibhiriti svAminA svarbhuvAM vaH pUjAyAmabjapANernakharuchinivahaH pAdajo varNito.avyAt || 22|| kailAsodbhAsivindhye kavalitabalijitkAyakAlimni kAlI\- lIlAlAvaNyalepe vihataharitimashvetapUShAshvarashmau | lokeshA~NghrernakhAnAmurukaranikare kiM mayetIva shIrNaM shItAMshoH pAtu pUjAchaturasurajanAkIrNakuNDachChalAd vaH || 23|| pAdAH pAdodbhavAnAmativitatibhR^itAM buddhamaulernakhAnAM pAre saMsArayAdaHpatigamanamahAsetubandhAyamAnAH | udyaddurvAraduHkhAnalashamanamahApuNyasambhAravAri\- svachChandAchChachChaTAbhA jhaTiti vighaTanaM kurvatAM vo bhavasya || 24|| kAlIkAntendukAnteH paribhavavidhR^itirbhUrikailAsabhUbhR^id\- bhAsAM hAsAvagItirhatirapi himavadgauratAgauravasya | kShIrAkUpArapUraplutirapi kakubhAM nAkanAgIyadanta\- chChedachChAyAkShatirvo nakharuchivitatiH pAtu lokeshvarA~NghryoH || 25|| yatpUjApArijAte valitamalikulaM mIlati shrIsaroje sevAsaktaH svayambhUrmukulitanalinAd duHsthito yatra tasthau | yenAshyAmA dinashrIH shamitasuravadhUklAntidoShA nishA.abhUt pAdo.asau padmapANernakhavidhuvilasachchandrikaH pAtu yuShmAn || 26|| kAnto vibhrAntakAntAmarayuvatijanairarchito dR^iShTipAtaiH shubhraM vibhrANmR^iNAlInikaramiva nakhodyotanodbhUtashobhaH | kAmIvAnalpakAmaprasaraparavashAnekacharyApravR^ittaH pAdo vaH padmapANeravatu surapurIchandanAmandacharchaH || 27|| AnandAmandabhArollasadamarakaraiH pArijAte vikIrNe kAlIyaH kAlakUTotkaTapaTala iva prollasadbhR^i~NgasArthe | shreyo vaH shrIrvidhattAmalamamalanakhadyotadugdhAbdhimadhyAd udyantI padmapANeshcharaNasarasijasyAchyutaprItihetoH || 28|| vA~nChAvichChittikhedochChaladanalashikhAChedakachChochChryo vaH padmachChAyAnukArachChalitamadhukarAchChAdanAchChAditashrIH | svachChandAnachChamUrChachChuchinakhakiraNochChUnaguchChairatuchCho deyAt pAdo.abjakAntichChuritakararUcho.achChinnamichChAmakR^ichChrAt || 29|| udbhUtodbhAsichakradyutiramalanakhairadvitIyoditashrI\- rbibhrANo lakShaNAnAM gaNamatulaguNAgaNyapuNyopanItam | niHsheShadvIpadIpaprabhavadatimahadvaibhavo buddhamauleH pAyAt pAdo namasyadbhuvanapatishirashchakravartI chiraM vaH || 30|| kIrNairAkAshaga~NgAkanakakamalinIkuDmalaiH ko guNo.asmin kiM gItairgItameva sphuTasarasirUhabhrAntibhR^i~NgAvalIbhiH | shakyaM mANikyadAmnAmiha rUchiranakhe shobhituM netyavAdId yatpUjAyAM sureshaH sa jayati charaNo vArijavyagrapANeH || 31|| yo nAthasyaiva nAsIdapi khalu sugateH kAraNaM janmabhAjAM yasmin padmAbhilAShI na madhupanivahaH pakShapAtI jano.api | yenorvI nAtigurvI natimatiguruNA lambhitApi trilokI lokaM pAdaH sa pAyAt sugatashashadharadyotavidyotamauleH || 32|| yo.alInAM pAnadAnAdakR^ita dhR^itamudaM saMhatiM sevakAnAM yasminnAlaM vihInaM na khalu haritatAtyantashobhopadhAnam | deyAdvo laukanAthishchiramamarashiraHshAyireNUtkaro.asau shreyaH shrIvAsabhUmirnakhakiraNahasatkesharaH pAdapadmaH || 33|| dehadrohAvahogrAhitahativihito dehinAM hetirIhA\- siddherAhUtirAho hR^itiratimahato bR^iMhatAMhomahimnaH | kleshavyUhAhitehAhutivihitabR^ihaddrohiduHkhAgnidAha\- vyApohA vAhinI stAdvahuvihitahitA padmahastA~NaghribhAvaH || 34|| buddhAla~NkAramauleravikalakamalabhrAntibhR^idbhR^i~NgamAlA vAchAlA nirvichArA rachayatu charaNotsarpiNI sampadaM vaH | sattvatrANaikakAryA sthiratarasuchirAvasthitisthApanArthaM vinyastA shR^i~Nkhaleva prachurakaruNayA sthUlakAlAyasasya || 35|| rAjIvAntaHpalAshAvaliruchiramR^idurvajrasAro visAro krudhyadvairipramuktapraharaNanivahasyodbhavadbha~NgabhUmiH | rakto rAgopashAnteratishayabalavatkAraNaM tAraNAyAM saMsArAmbhonidhervaH sugatashashibhR^ito.apAstakhedo.astu pAdaH || 36|| jambhArerjR^imbhitAmbhoruharuchirachaye chApalenApyalInA nAlaM lolApi lolA harakaravihitAnandakundotkare.api | bhrAjiShNau viShNukIrNe parimalini puraH pArijAte.apyajAta\- prItiryatrAlimAlA ramati jinabhR^itaH so.a~Naghripadmo.avatAd vaH || 37|| bhUyAdudbhUtabhUridyutinivahalasatkesharodbhAsuro vo raktachChAyAnuviddhonmukhanakhadashanodbhAsikAntyA karAlaH | trasyaddurvR^ittavairidvipataralachalallochanAlokanIyo lokeshasyA~NaghrisiMhaH kamalabhavajaTAraNyashAyI shivAya || 38|| achChIyAnapyanachCho laghurapi na laghurla~Nghane di~NmukhAnAM trailokyAnandano.api prabalaparapuravyApisantApahetuH | lAvaNyAlepalipto.apyatishayamadhuro vaidhurAdherniroddhA pAdoddyotaH kriyAd vo jinarUchivikasanmAlikAshekharasya || 39|| rAjIvai rAjarAjo harirapi haritairhAribhiH pArijAtaiH kundaiH sAnandamindurbahuvasuvisarairvAsavo bhAsamAnaiH | prItaH pAshI palAshairiti vibudhajanaH prAjyapUjAvisheShaM yatrAnuprAsakAvyAyitamatata sa vaH pAtu pAdo.abjapANeH || 40|| bhAnurbhAsAM vikAshe nutimakR^ita nakheShUnmukho nAkanAthaH sharvaH shAkhAgraparvaNyavichalanayano.apyantakaH prAntakAntau | yasyAsAmAnyashobhAviShayamatishayaM draShTumAsIdanIsho niHsheShaM divyalokaH sa jayati charaNo buddhabimbA~NkamauleH || 41|| samyaksambuddhabhAnusphuTavikaTajaTApu~njaku~njorumUrteH saMsArAmbhodhimajjadgurutarajanatAmedinIstambhanasya | bhUyAd bhadrAya pAdaH kamaladharagireH sevitaH siddhasArthaiH paryantodvAntakAntisravadaruNamahAdhAtumannirjharo vaH || 42|| saMsArAdhvaprabandhashramasakalajagatklAntisaMshAntihetu\- chChAyasyechChAphalasya sphuTanakhakusumodbhAsishAkhAbhR^ito vaH | lokeshA~Naghridrumasya praNatasurajanairmaulimAlAlavAle mUle sampAdito.avyAnmaNikalashabhR^itaH svachChadhAmAmbusekaH || 43|| sammUlakleshajAlaprabalaripubalonmUlanasthUlalAbhA\- llabdhollAso vilAsI balavijayilasanmaulilIlAlayo vaH | pAda pAyAdatulyAmalakamalabhR^ito.alIkaphullAbjalobha\- vyAlolAnalpalApollasadalipaTalAlluptasa~NgItilolaH || 44|| trailokyaishvaryalakShmIchapalakarivadhUsaMyamAlAnadaNDaH kaShTakleshAhidaShTaskhaladakhilajagatpAlane dakShatarkShaH | durvArAntaHpraveshAkR^ishanarakapure dvAragADhArgalo vo bhUtyai lokeshapAdo bhavajaladhisamulla~Nghanaikaplavo.astu || 45|| iti pAdukAdeshanA vR^itto nR^ittaprakAraH sapadi vighaTitA vAdyavidyAnavadyA no gItaM nAvagItaM kR^itarasarachanairnaiva bhAvairabhAvi | ityantaH smerashAkre sadasi na shakitA yatra pUjApsarobhiH kartuM bhAvAturAbhiH sa jayati janitAtR^iptirUpaH sarojI || 46|| uddAmasthAmavAmakramaviShamamilanmAramAnapramAthI madhyAdunmAthimohodgamamamitamahomaulirAyAmabhImam | shrImanniHsImabhUmAsamamahimamahAkAmadhAmAtibhUmau sattvapremaprakAmaprathitamR^idumanA nirvirAmAshrayo vaH || 47|| sAraprAkAraghorAvaraNanivaraNo bandhanakrUradUra\- sphArAvArAtiraudre narakanagarikAkAradhAriNyarINAm | kArAgArodare yaH smaraNasharaNatAM kAraNAkAtarANAM yAtaH satkArakArI gurutarakaruNaH pAtu lokeshvaro vaH || 48|| kalpAntollAsihelAchaladanilachalollolakallolamAlA\- vAchAle nakrajAlAkulakalilajale vAridhAvullalantaH | Alambe yasya nIlotpalavimalamahAkuTTimAlInalIlAM AlIyante ladhIyaH sa jagati kamalI pAlanAyAla mastu || 49|| dhUmaughobandhabandhIkR^itavidhuravidhubradhnanirbandhadhAmA nIrodhodbhedabAdhAbudhavibudhavadhUdhIratoddhAradhuryaH | yannAmAdhItidhArAdharavidhR^itikR^itAmeti dhUmadhvajo.api pradhvaMsaM sAdhu dheyAnniravadhi sa vidhiM buddhadhAro dhR^itervaH || 50|| krodhAdutkShiptakAlAyudhakaranikaraH krUrasUtkArakArI dAnaklidyatkapolAkulamadhupakulAkANDakAlorukAyaH | krAnto yannAmakaShTA~NkushahatikR^ipaNaH kAtareNa karIndro lokeshaH sa prakAmopakaraNakaruNaH kAmakR^ityaM kriyAd vaH || 51|| sUtkArishvAsapoShAkR^ishaviShavamathuploShiroShAshrayAshA daMshAshAdarshitAsyA bhR^ishatatashiraso nAshane dandashUkAH | yannAmAshIviSheshadviShi vishati viShAM dhIShu nashyantyanIshA lokeshaH so.astu vishvashrayadativiShamaklesharAsheH shamAya || 52|| gandhodgArorugarvagrahaNagajagaNagrAsagItogravegaH sAvegodagragAmI galagahanaguhAgADhagambhIragarjaH | yogairyugyopayogAnagami mR^igapatiryadgaNodgItiyogAd duryogaM vaH sa yogI sthagayatu sugatAsa~Ngitu~NgottamA~NgaH || 53|| bhUyo.apAyAnumeyaH kShatadayahR^idayo bhIvidhAyI vihAya stheyAn shailopameyaH shrayadaligavayachChAyakAyo nikAyaH | sadyogopAyamAyAmaya iva vilayaM yAtavAn yAtavIryo yatpAdadhyAyineyaH sa sugatanilayo jAyatAM vo jayAya || 54|| santrAsAvAsabhUmiM kalivisarasaradyAdasaM bhAsvarAsi\- prAsaprollAsibha~NgaM prasR^itasitalasatketusatphenahAsyAm | yatsevAsAdhunAvA dviShadasamasamitsArasenAsravantIM sotsAhAH sa~ncharante sukhamasukhamasau saMhriyAd vaH sarojI || 55|| bhUbhR^itsambhArabhedaprabhukaravibhavo bhUribhUbhogabhImaM bibhrANashchitrabhAnuM bhavadatibharabhIsambhramodbhrAntibhUtaH | dambholirbhItibhAjAmabhavadabhipatannAshunAbhAvabhUmi\- rbhakteryasya prabhAvAt sa bhavatu bhavabhidvo bhR^itAmbhojashobhI || 56|| AbAdhAdhUtadhairyashchyutividhisavidho durvidhakrodhavedho bAdhAduHsAdharodhoddhurabahuvividhavyAdhisambAdhadehaH | yasya dhyAnAvadhAnAdadhikadhR^itisudhAdhAnasandhAritAsu\- rdhImAnnAdhervidheyo dhiyamavatu sa vo bodhaye buddhamUrdhA || 57|| ArAdAhUtiyAtR^ikShitipatiratulArAtishAtipratApa\- prodgItirdaNDanItiprathitapitR^ipatikhyAtijiddaNDanItiH | yatpAdAdhItishakteH kupitamatiratiprItimAyAti bhUte\- rvyAghAtodbhUtiheturjinavR^iShavasatiH saMhriyAd vaH sa bhItim || 58|| brahmA jihmAyito.abhUdagururapi guruH khaNDitAkhaNDalokti\- rviShNustUShNImadhR^iShTo vachanavirachane vItagarvo.api sharvaH | tuShTAstuShTUShavo.api sphuTamiti vibudhA no budhA yadguNoktau sa shrImAnabjapANirjayati jinamanogocharAntarguNaughaH || 59|| dhAtrA chitraM charitraM suraripuripuNA satrinetreNa netre gotrAmitreNa gotraM gatirapi guruNA rAtripeNApi gAtram | maitraM mitreNa putrIyitasakalajagatprema putreNa chAtre\- ryatredaM stotrapAtraM stutamavatu sa vo.amAtrasatto.abjapANiH || 60|| yasmin brahmA bahutvaM bahubahumatavAnAnanAnAM nijAnAM skando.apyAnandagarbhaM nutiShu natikR^itau nAganAtho.api mUrdhnaH | shakraH shlAghyAmanaiShInnayanadashashatAM yaM vilokya trilokI\- lokesho nirvirAmAnatinayanaratistotrapAtraM sa pAyAt || 61|| khedI khe dIptarashmiH kila viphalamasAvadhvanInodhvanIno lokAlokArthamAste nanu kamalabhR^ito dIptatApaH pratApaH | dhIrairdhIrairakAri stutiriti vihitollAsabhAsAM sabhAsAM yasyAryasyAstu tasmAjjagati kR^itaripukShiprasAdaH prasAdaH || 62|| nyastA yasminnamasye natirapi nitarAmunnatiH puNyadhAmnAM niHsAmAnyaikamAnye.apachitirUpachitirbhUyasI bhaktibhAjAm | dhyAnasthAnasya yasya smR^itirapi sahasA vismR^itirbhUtabhIteH so.anantAchintyaloke vihitahitapatho lokanAtho.avatAdvaH || 63|| dambho dambholiraindraH kvachidakR^ita surArAtishAto.atishAto hArI hArIraNAsau balavati viphalAbhIShu rAjIShu rAjI | chakre chakreNa nArthaM haririti janatA nUnamAheti heti\- vyAsavyAsaktimuktAn jayati ripujanollAsarojI sarojI || 64|| lokAtotaM dadhAnaH sukhamapi jagatAM tIvraduHkhena duHkhI nityaM nityAnurakto.apyasharaNakR^ipaNaprANabhR^idyogayuktaH | trailokyasyaikanAtho.apyasamaruchijanArAdhanAbandhuro yaH so.avyAt sambuddhamaulirvihitavisadR^ishAchintyacharyashchiraM vaH || 65|| nirvichChedatrilokInihitanirupamasnehayogAnuyogAn nirvANo na prakampyo balavadalaghubhistIrthikonmattavAtaiH | jIyAllokeshadIpaH sa bhuvanabhavanodbhUtamohAndhakAra\- dhvaMso.avidhvaMsadhAmA parahitakaraNodyogasaMvR^ittavarttiH || 66|| kvAsau sarvatra maitrI kva viShamabahalakleshavidveShidAhaH kva prauDhA muktishaktiH kva cha dR^iDhakaruNApAshaniShpandabandhaH | kvopekShApakShapAtaH kvaparahitakR^itivyagratA tadvichitraM chitraM rAjIvapANeshcharitamatijagajjAyatAM jyotijidvaH || 67|| sarvAgraH sarvarUpaprathanapR^ithunayaH sarvadA sarvanAthaH sarveShAM sarvathA yo vinayavidhimahAsarvagurvarthasid.hdhyai | sarvaiH sAtotagarvairgurumahimaguNaiH kharvayan sarvagarvAn sarvaH sarvaprado vaH saphalayatu rUchIH sarvavinmaulirurvIH || 68|| IshaH svAmI prajAnAM patiramaragururlokapAlo mahendro bhAsvAn dattAridaNDaH parajayabalijid vittado jaitrapAshaH | ityantarhAsagarbhaM bhaNati parijane.anvarthanAmnAM nijAnAM pAtre yatrAnulajjairnatamamaragaNairabjapANiH sa jIyAt || 69|| varyAryANAM vareNyo varaparavidhurotsAraNA saMvaro vo durvAraiH sAramArairamitakaradharo durdharo vairivIraiH | vIro vIrArivArI prachurataravarodArasambhAravAri\- sphArAsArorudhArAvisaravitaraNAdhIradhArAdharaH syAt || 70|| nityodyukte.atishakte prabhavati nalinodbhAsi haste samasto nAthI saMsArayAdaHpatipathapathako loka ityAkalayya | yasmin vinyasya bhAraM laghuralaghukR^ipo vishvadIpaM prapede buddho.avandhyapratij~nAkR^itadhR^itividhR^itirnirvR^itiM so.avatAdvaH || 71|| uchchairUDho garIyAn sugata iva jagatkAryasambhArabhAro nyastA haste prashastA nija iva kamalAla~NkR^itirbhaktibhAjAm | nirvANaM nArakAgnernichaya iva chiraM prApitaH sattvasArthaH tIvrakleshaprabandho jana iva shamito yena pAyAt sa yuShmAn || 72|| yo nAnAnantarUpaprakaTanapaTimakhyAtamAyo.apyamAyaH saMshAntAsheShabhIrapyatikaruNatayA kAtarAchArakArI | vItakrodho.api duShTAshayadamanabudhakrodhanityAnubandhaH sambuddhodbhAsimauliH sa jayati mahatAM chintanIyo.apyachintyaH || 73|| dhatte naivottamA~NgaM paramapitu vapuryo.amitAbhAbhirAmaM sannAlaM nAravindaM gurubhayavidhurA vairisenApi yasya | yenAbaddhA jaTA no jagadahitahativyApR^itenApi kakShA dakSho.asau rakShatAdvaH kupitayamamukhAlokanAllokanAthaH || 74|| sheShAsha~NkI chakampe bhavasalilanidhiH kleshasArthaiH pralInaM vishrAntaM bodhisattvairmunirapi shushubhe shlAghyanirvANalIlaH | yasminnAbaddhakakShe prasarati parito.asheShasattvArthakArya\- vyAyAme sa prakAmaM shamayatu sugatAvAsamaulirmalaM vaH || 75|| iti bhagavadvarNanA | pratyUhavyUhabAdhAvighaTanaviShame mAnasasyApyabhUmau karmaNyekAntasharmachChidi jagadahitochChittaye padmapANiH | nighnaH krIto.atha bhIto balavadiva yayA nirvikAro niyuktaH sA nAthasyAtigurvI prabhuravatu kR^ipA niShkR^ipAdantakAdvaH || 76|| bhUmirnaivAbhibhUtermR^idutaramapi yallokadhAtUnanantAn atyantAvIryavIryaM yugapadapi bhR^ishaM bhAsayaMstrAsashAntyai | khadyotodyotaleshAnukR^itivilisitAsheShatejasviteja\- stejo lokeshvaraM vo haratu hR^idi bhavadbhUrimohAndhakAram || 77|| niHsheShAkAshadhAturjana iva janitApUritAshaH samantAt prArabdhaH sarvabhAsAmiva niratishayApAyarAshervilopaH | sArdhaM sAndrAndhakAraiH shamamagami mahAnR^iddhimAnmAnimAro yenodbhAsaH sa bhUyAt sarasirUhabhR^ito bhUtaye jAyatAM vaH || 78|| Isho.anyadyotanAsho balabhiditarabhAduHshamadhvAntarAsheH sattvadrohAshayAnAmanupamatapano yo.achyutashchitrabhAnuH | nAnAnantAchalAdivyavahitaviShayodbhAsane shaktidhArI lokeshodbhAsa ekopyamaragaNanibho bhIbhide vaH sa bhUyAt || 79|| sampannAsheShasattvaprachurajalacharechChAsukhaM yatra dUraM durla~Nghaye yAntyadhastAd giraya iva janAnarthadustIrthyasArthAH | durvAro.asau samantAt pR^ithubhavabhuvanAbhAvasaMrambhajR^imbhI bhIdAvAgniprashAntyai karakamalavibhAmbhonidhirjR^imbhatAdvaH || 80|| nirvANo nArakAgniH kimiti yadi vineyeShu dharmAmR^itaugho\- rAshirbaddho jaTAnAM yadi gatirahitaH kiM samaho ripUNAm | mardhAgAre garIyAn yadi vasati jino bandhurA kiM trilokI nAthasyetthaM vichitrA vyavahR^itirahitaM hantu vo lokabandhoH || 81|| mUrchChatyekApi sattvAshayavashavihitAkArabhedAbhirAmA durbhedAbhUtakalpA chaladachalamahArambhadambholikoTiH | laukeshI sanmanIShAkumudashashiruchistIrthikAnarthakoTi\- dhvAntAntardhAnabhAnurbhavatu bhavabhide deshanA shAsanI vaH || 82|| durvAdonmAdanAdiprachuramadakaNAdAkShapAdAdivAdi\- prodyannAnAvivAdAspadamadasadasAM sApavAdo vivAdaH | utsAdaH sapramAdonmadajanavipadAM kovidAnAM prasAdo bhAvAnutpAdavAdo jayati jinavapuH pAdasampAdamauleH || 83|| trastavyastArishastraM trayi jagati chakAsti stuto yadgabhasti\- stomo vistIrNatoyaM marunilayasadAM vistaradhvastatApaH sa stAdastAhitAstro balivalikulishaH padmahastasya hasto \- .anApAstyaiH vaM samastatribhuvanavikasatsAdhvasApAstishastaH || 84|| saMvartodvR^ittavAtavyatikaraviShayottu~NgashailadrumAlI\- nirmUlonmUlanAya prabhurarikariNAM shAtitAnalpadarpaH | bhadro lokeshvarasya praNayimadhukarAkarShadAnaughavarShI hastastamberamo vo bhavaripunagarIbha~njanAyAlamastu || 85|| satkoShaM sannidhAnaM ghanaruchijinatAvA~nChitAchChedasiddhau yadyAtaM shAtakoTimanukR^itimahitatrAsisatpatrakoTi | samyaksambodhilakShmIkR^itavasatiguNashlAghayaivAvimuktaM muktestatkAraNaM vaH karakamalamalaM lokanAthasya bhUyAt || 86|| shashvadvardhiShNutR^iShNAvikalagaladarIvihvalapretarAshe\- rAhlAdotpAdi satyaM kamalamadhivasadbodhilakShmIkamabjam | satpadmaM bhUtivA~nchChAvinihitamanasAM sAdhusevApadaM yat tallokeshasya yuShmAn paTuruchipaTalIrAjirAjIvamavyAt || 87|| nAnAduHkhapratAnAM tanukiraNaghanottApanakleshabhAnu\- mlAnaM dInAnanaM yajjanamanujanayatyAtapatropamAnam | glAniM mA gAdahInaM tadakhilabhuvanAnyUnabhAnUdvitAnaM lInaM lokeshapANau nalinamamalinaM mlAnimeno nayedvaH || 88|| sthAmnaH sthAnaM mahimno mahadudayapadaM dhAmadhAmnAM prathimna\- strAsAvAso ripUNAM durabhibhavabhavAdbhIbhidodbhUtibhUmiH | kAntaM shobhAnishAntaM vasatiratijagadvIryavistArirAshe\- rlokeshasyAstu bAhurbahujagadahitochChedanAchaNDadaNDaH || 89|| yallAvaNyAmR^itaughaM kSharadapi janitAta~NkamevAhitAnAM tR^iptiM naiva prayachChatyatha punaratanuprINanaM lochanAnAm | shobhAgAraM vishobhIkR^itasakalajagadbhUShaNaM bhUShaNAnAM tadbhuyAdekachIraM sukhamasukhanude bhAsvadambhojino vaH || 90|| mlAnaM rUpAbhimAnairjagati saphalatAM lochanaiH puNyabhAjAM yAtaM ghAtaM tu tR^iShNAtatitaralatarairyatra lAvaNyasindhau | manye.asa~NkhyaiH shashA~NkaprabhR^itibhiratulaM kAntimadbhiH kR^itaM syAd ekaM yadyAsyamasyApyatijayi jayatAM tanmukhaM padmapANeH || 91|| yasmin vidveShabhAjAmaviratavilasatkAntitoyaughameghaiH saMvR^ittaM dAhadAyi sphuTataramasakR^iddurdinaM dehinAM tu | dhautA dhvastAnubandhA bahulamalamaShIpa~NkalepaprabandhAH tadbuddhAgAramUrddhAmukhamatisukhadaM stAdvichitrakriyaM vam || 92|| iShTAbjAkliShTapANeH sphuTavikaTakuTIkuTTimAntopaviShTa\- spaShTashliShTAmitAbhadyutipaTupaTalApATalAbhApaTimnaH | shobhAviShTairadR^iShToparighanaghaTanasyotkaTATopabandhaH kUTasyAvyAjjaTAnAM kaTurakaTasuhR^itsa~NkaTAtka~NkaTo vaH || 93|| atyantAhlAdahetoraviratavistR^itasyAmitAbhaprabhAmbhaH sambhArasyaiva sekAn niratishayamR^ijAsundaro labdhavR^iddhiH | uddAmAmodidivyAdbhutakusumachayairarchitashchintitArtha\- prApteH sampattaye stAnnalinadharajaTAkalpavallIchayo vaH || 94|| yAsAM baddho vimuktiM gamayati niyatAmujjhitAnyAdhivAso niHsAmAnyAM vibhUShAM janayati vapuShA yAsu nAtho.amitAbhaH | sarvAmodachChido yA nirupamavahalAmodaliptAkhilAshA laukeshyo.avashyalabhyAM mR^itimativikaTAstA jaTA vo harantu || 95|| sa~NghAto no jaTAnAmakhilajanamanobandhane pAsharAshi\- rlAvaNyaM nApi duHkhAnalavikalajagajjIvanIyo.amR^itaughaH | nAmbhojaM duShTadamyAntakaturagakashAkleshadoShAtimoShaH pratyAshA poShasiddhiM dishatu jinashashishleShikeshaH shriyo vaH || 96|| uddAmApi~NgatejaHprasaravirachitAsheShadigdAhamoha\- trastAtrANAtrilokIkavalanarabhasollAsikAlAgnikalpam | daShTauShThaM duShTadR^iShTijvalitamanuhayagrIvamAbaddhalakShmyA jAtA lokeshvarI vaH kShaNamatulakR^ipAkAtarA dR^iShTiravyAt || 97|| lopaM lokaH prayAti sphuTamakhilamahAbhUbhR^itAmadya tUrNaM chUrNIbhAvo dharANAmapi jalanidhayaH shoShamAyAntyanantAH | itthaM yasyAntakopabhrukuTibharabhavadbha~NgabhImAllalATA\- nniryAntIM vIkShya devImatulabhujabalaistrastamabjI sa jIyAt || 98|| stutyaiH stutyA gurUNAmapi jagati gururvanditA vandanIyai\- rmUrtevAnalpakalpArjitasakalajagattrANanirvyAjashaktiH | lokasyArtichChidA yaiH svayamatulakR^ipaivAbjino nirgatA stAt tArA saMsArakArodaraguruvilasatkAraNAhAriNI vaH || 99|| gIrvANagrAmagIto gurugaNanaguNo gIShpateragragAbhi\- rgrAhyonudgADhavargasphuTagatigahano haMsagAmyugragAbhiH | gambhIrodgAriNIbhirnigaditagarimAgeyapUgAlpabhAgaH samyaggamyaH samagro.avatu sugatagirAmabjino vo guNaughaH || 100|| kavirapi janmani janmani bhaktashcharaNe.avalokiteshvarasya | prakR^itisharaNagottaradhIH parahitagurukAryakAryaH syAm || 101|| iti mahAkShapaTalikashrIvajradattakavivirachitaM shrIlokeshvarashatakaM sampUrNam || ## \medskip\hrule\obeylines Please send corrections to sanskrit@cheerful.com Last updated \today https://sanskritdocuments.org \end{document}