% Text title            : Moghadutam a humorous poetry ridiculing love
% File name             : moghadUtam.itx
% Category              : misc
% Location              : doc\_z\_misc\_general
% Author                : S. Jagannath
% Transliterated by     : samvadah@proton.me
% Proofread by          : samvadah@proton.me
% Acknowledge-Permission: Copyright S. Jagannatha
% Latest update         : August 8,, 2025
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Moghadutam ..}##
\itxtitle{.. moghadUtam ..}##\endtitles ##
##Moghaduta (not Meghaduta), a humorous poetry ridiculing love (written in mandakranta metre)
Moghadūta
Author: Jagannath

Description: Considered the best parody of Meghadūtam, where a politician uses a Gāndhī-ṭopi (political cap) as a futile messenger to convey a message.

Characteristics: Uses Kālidāsa’s words verbatim for ironic effect, with beautiful language, structure, and sharp parody. Example verse provided in the article highlights a politician’s failed attempt, mocked by barking dogs at the destination.

Theme: Political satire with a humorous take on ineffective communication.##
\section{pUrvamoghaH}
kashchinmArge kvachana taruNIM dR^iShTavAn kA~nchidAtta
premabhrAntiH paramakutukAt prAha tasyAH purastAt |
bAle preShThe tvamasi mama hR^itsanniviShTeti ruShTA
sAdAdasmai bata shiva shiva drAk kapole chapeTAm || 1||
sraShTuM premNi prabhavatu kathaM sA jaDA dArvyahAnim |
kiM jAnAti prakR^itikaThinaM premiNastAvataiva |
naiva dvaidhIbhavati hR^idayaM khaNDasho bhavyarUpaM
yasminnasti praNayakaNikAshreNiyug rAgarogaH || 2||
chUte phullatvakhilajanatAvismayaH kovidAraH
prAchIM tyaktvA dishamitaradikShvaryamA.a.apnotu janma |
pa~nchaprANAn praNayapiTake sthApayan AttanidraH
spapnAneSha tyajatu kimamUn prItikUTAdhirUDhAn || 3||
vetaNDAsyapraNayanarato vAnarasyeva kartA
shuNDAsthAnabhramabahulatAhetuto raktimANam |
klR^iptasvAntaH kila kalayituM kanyakAyAH kapole
labdhodyogo.asR^ijadahaha taM sve vidhirduShTavarmA || 4||
premisvAntaM hR^idayamadhurodgArabhAvAnabhij~nA
jAnAtveShA kathamatiruShA dUShitA bandhurA~NgI |
premajvAlAnalakaluShite kApathe pAtitA.asyAsh
chittAkArA dravatu hi shilA kAryayuktyA kayA vA || 5||
evaM chintAjaladhipatitaH svoddhR^itau baddhadIkShaM
ka~nchit kolaM bhR^ishamata ito.anviShya mithyAkhyara~Nge |
nityaM nR^ityaM kila vidadhatIM bAhyashubhrAM tathA.antar
gAlIhiMsAkusR^itimalinAM gAndhiTopIM dadarsha || 6||
TopIM dR^iShTvA hR^idayakamalabradhnakalpAmanalpAM
prItiM yAtaH sapadi yuvakabhrAntimArgasya pAnthaH |
TopyAloke bhavati sukhino.apyanyathAvR^itti cheto
martyaH kiM sa praNayajapakR^it kanyayA tADito yaH || 7||
hastadvandvaM svahR^idayasamairashmabhiH pUrayitvA
vyAdAyAsyaM sapadi kutukI svAgataM prAha Topyai |
astavyastaiH kathanamatha chArabdhavAnarthahInair
mUDhastutyaiH padasamudayairvakShyamANaprakAram || 8||
khAdIvastrairjananapadavIM prApitA kutra TopI
saMdeshAH kva praNayajaDadhIjantubhiH preShaNIyAH |
ityautsukyAdaparigaNayan tAM sa mUrkho yayAche
premonmattA mananamalinAshchetanAchetaneShu || 9||
nirmastiShkavrajashirasi sadratnabhUShAyamANe
Topi prApi prachurasukR^itairdarshanaM te madIyaiH |
kuDyaM kAShThAM badhirapuruShaM vIkShya yad bhAShaNAshma
prakShepeNa vyathayasi bhuvaM kaNThashoShaiH kR^itena || 10||
pAdairhIne nayanarahite shrotranAsAviyukte
Topi shrImAn sakalamahimA shvetimA kevalaste |
AkrAntuM yaM kusR^itiviShaye dhUrtatAyAM cha shaktaM
svapne.apyanyat kimapi sakale bhUtale vastu nekShe || 11||
pUrvaM padyAsadanagR^ihiNI yasya kasyApyashuddhe
pAdadvandve.anavadhi vihitAmarshanA tvaM tatashcha |
kasyApyAsye virachitaghR^itA sAMprataM yA.asi sA.asi
kleshe satyapyavarayatanaiH siddhirAsAdanIyA || 12||
svIyapraj~nAshrayaNajanitadhyeyamArgaprakAshAH
kechid dhanyA avihitaparaprArthanAH siddhasAdhyAH |
mandapraj~no.ahamiha bhavatIM prArthaye bhavyabuddhiM
hR^inmInaM te vachanabaDishairAkR^iShan mandamandam || 13||
eSha staumi sphuTamabhinayan nATakaM prItisaMj~naM
stutyA toShaM yadi bhajasi saMdarshitasvIyadantA |
nirvidyA apyurumadhigatAH shikShaNAmAtyabhAvaM
bhAvatkAbjadvayajayipadadvandvabhR^i~NgIbhavantaH || 14||
tvatpAdAbjabhramaritaparopAyaveNyAM shrutAyAM
sthAnaprAptau bhavati vishaye shIrShakITAyamAne |
bhaktasya syAt kimiha sharaNaM tvatkaTAkShAd R^ite.anyat
kAntishreNIjanitajanatAnetrasaubhAgyapAkAt || 15||
jAnAmi tvAM viphalakaraNe jalpane cha prasaktAM
kApeyAnAmanitarasamAM saMpadaM ki~ncha pUrNAm |
tenArthitvaM tvayi kutaruNItADitaH san gato.ahaM
yAch~nA moghA varamaguNiShu prAptakAmA na satsu || 16||
vakraiH kAryairavamatijuShAM Topi chUDA.asi tasmAt
saMdeshaM me hara vilapataH kruddhakanyA.a.ahatasya |
gantavyaM te gR^ihamatikaTusvAntavatyAH sadA.api
shvAnau dvAri shravaNaparuShaM bukkato yatra baddhau || 17||
shrutvA mArgaM tava kathayato me chala tvaM vishuddhaM
panthAste syAt yuvakakapibhirvAvadUkairupetaH |
prAyo yeShu prabhavati chalachchitragAnAM naTAnAM
bhUShAveShairamitamahimA navyarUpo vikAraH || 18||
sakhyuH kAryaM kalayitumitaShTopi yAntyAM bhavantyAM
ka~nchinmugdhaM ChalayitumiyaM gachChatIti svadR^iShTIH |
agre kR^itvA stimitanayanA unnatabhUvikArAH
prekShiShyante sapadi bhavatIM mAnuShA rAjakIyAH || 19||
tvAmIkShitvA sapadi muditA ghoShaNAkroshanAbhyAM
svIyonmAdaprakaTanaparA ujjhitasvasvakAryAH |
AkrAmeyurjhaTiti bhavatImAshu te bhugnabhAvAsh
choro dR^iShTvA na mudamayate pashyatohArakaM kim || 20||
svastItyuktvA tvamapi kakubhAM maNDalaM pUrayitvA
dantAn sarvAn mukhapiTakagAn tatpuro darshayitvA |
teShAM shIrShe galabilatataiH satyanItyAdishabdaiH
sarvaprANishravaNagaralaM bhAShaNaM varShayAshu || 21||
mastiShkAndhAn lasadabhinayAn nATake shokanAmni
prAjye rAShTre karaNaviratiprArthanAdhanyajIvAn |
vIkShasvAgre yamapuragate mAnuShe rAjakIye
yasmin kasmiMshchidapi sahasA sAMsadAMstyaktakAryAn || 22||
AsannirvAchanasamayagAShTopi kAshchit pratij~nAs
trAyasvAsmAn kila tadananuShThAnaruDUH prajAbhyaH |
evaM bhItyA vilapanaparAn rAjakIyAn prapannAn
dR^iShTvA dhairyaM janaya tava dhIH khalvasadrakShaNotkA || 23||
shvavrAtIyaM kalahamatha dhi~N mallajAtaM niyuddhaM
yuddhaM pUrvaM kurubhuvi kR^itaM hA mahAbhAratIyam |
paryAyeNApyanuvidadhatI sAMsadI kAryashailI
rItisphUrjatkavanakaraNe sphUrtidAtrI tava syAt || 24||
yadvA tadvA niyamarahitaM shAsanaM tvaM karoShi
kleshAnasmadvidhajanagatAn prachChakaH ko.api nAsti |
kroshannevaM vidadhati yadi tvayyanalpAshmavarShaM
lokaH shIghraM kakubhamaparAM prANanArthaM gR^ihANa || 25||
kashchijj~njAnan svamativibhavasyopayogaprakAraM
jAnannitthaM kavayati nuvan tanmudA.a.akarNaya tvam |
shvetA satyapyasasi bahudhA varNavaividhyapUrNA
garvAsUyAmilitakuhanAjAtanAnAvikArA || 26||
auchityaM naityayi kamalinIkalpanA kiM bhavatyAM
yasyA bhAnurbhavati vitaradrUpyakaH kShudrachetAH |
Ahosvit tvayyatha kumudinIdharmadarshI vipashchit
ko.api syAdyaH prakaTayati na dravyade kiM shashitvam || 27||
satyapyandhA tvamatha badhirA hanta chakShuShmatI tvaM
divyashrotrA.apyasi mama kR^ite Topi bhaktasya nantuH |
shrIvatsA~Nkorasi kR^itapade brahmapatnIshakAnte
matkAyAM te lasatu patito dakShiNAyAM kaTAkShaH || 28||
etAdR^igbhiH shrutiyugakalastotrapAThapravINair
gADhakShveDaiH svahR^idi vachanoddhR^itapIyUShasAraiH |
na plAvyestvaM vihitanatibhiShTopi labdhAvakAshair
karShiShyadbhistava padayugaM pAtayiShyadbhiragre || 29||
yadyAkShepAH shrutipathagatA mantriNAM kAryavaikharya
Asambaddhye smitavaramukhI yachCha mithyottarANi |
kruddhA satyapyananR^itavachojAgradudvegalokAd
AtmatrANapraNihitamatirvismR^itAnyAvanechChA || 30||
karNadvandve sakalamitarachChR^iNvatI tvaM purANaM
mA bhUrvighrapratihatamatirmatkriyAsatkriyAmAm |
kArye mukhye kutukaviraho gADhaniShThA cha gauNe
svakShemArthaM khalu sakhi khalai rAjakIyaiH kriyete || 31||
Ahosvit saMvidapi bhavatAdAvayoShTopi kAchit
kAryaM me tvaM janayasi shubhaM matpriyAgehagantrI |
kurve yatnaM tava jayakR^ite bhAvinirvAchane.ahaM
mitre lAbhaM paramiha mitho vA~nChataH kShudrabuddhI || 32||
mA bhaiShIryat prati jigamiShustvaM gR^ihaM tannikR^iShTAM
mA manyasva prachurabhayadAM saMsadaM mantripUrNAm |
yuddhe tvaM che~njayasi na sakhi brUhi nirvAchanAkhye
kasyAgre svaM viruchi vadanaM darshayiShyasyavij~ne || 33||
agre tyaktAdhyayanasuruchi svIkR^itAsabhyarIti
kShINaj~nAnArjanaphalagati chChAtravR^indaM yadi syAt |
tajjAnIthAH samuchitapathe yAntamAtmAnamevaM
sAdhurmArgo nR^ibhiranusR^itaH siddhisha~NkAM vidhatte || 34||
yachChetarhi shravaNayugalaM vishvavidyAlayIyaM
vR^ittaM j~nAtuM kutukalaharIpUritaM bhUri yatra |
gambhIratvaM jahati laghutAM lAnti vAkyAni yUnAM
prIte rItau kimapi samayAkurvatAM vyarthameva || 35||
draShTuM dhUrtAn gurutaragurUn vishvavidyAlayasthAn
tvatke netre prayatanavashATTopi dIrghAkriyetAm |
vaidheyAnAM kapaTakR^itinAM gAlidAne ratAnAM
yeShAM chittaM prasitamanishaM karmasu kShullakeShu || 36||
pashyantyAste kimidamiti bhIsaMhitasvAntavR^itter
jaijaikAro gamanamayituM yatnavA~nchChrayamANaH |
shbdo vidyAnilayachalitachChAtranirvAchanasyety
evaM bodhe dharatu paTutAM karNabAdhiryadhIraH || 37||
tvatsakhyArhAn bharatakulajAn vIkShya shiShyAn gurUMshcha
sphoTaM yAyAd hR^idayakamalaM prApya te bhUriharSham |
tasmAd rajjUn balavadurasi sthApayitvA badhAna
prAgevApaddharaNakaraNaM paddhatirdhInidhInAm || 38||
dR^iShTveShrShyAlvorapatitadhiyo drAg vivAhAkhyagarte
taddampatyoranitarasamaM mauDhyamudvIkShamANA |
ghorAkroshairbhaShakayugalaM smArayitroH shR^iNu tvaM
nityaM vAdAn kaThinavachanavrAtajAtAnanalpAn || 39||
dharmo.asmAkaM janayati mithaH premabhavyaM prapa~nchaM
divyo dharmaH pariNayakR^itorhanta yUnorvivAhaH |
evaMbhUtapravachanachaNaishChinnalA~Ngulapheru
snigdhasvAntaistvaritamatisaMdhIyase dhUrtavR^iddhaiH || 40||
adya shvo vA bhavati kanakasphUrjadudyogalAbhas
tasmAt putrA upayamayate tyaj~nagIHshraddhayA.aj~nAH |
hInodyogAH kR^itapariNayA arthaleshena hInA
nUtnAH patnyo.abhinavapatayashchAnukampyA bhR^ishaM te || 41||
tvatkAM kAntiM vikasitamukho melayan dantapa~Nktau
draShTavyo.agre nijavadanato dhUnayan vedamantrAn |
kAle yUnoH pariNayavidheshchittachAturyabhAsvat
paurohityadraviNavisaro dhanyajanmA purodhAH || 42||
tattat kreyaM dhanavadabhidhAstotrapAtratvasiddhyai
yadyad vastu sphurati bahudhA TIvivij~nApikAsu |
evaM lobhAtishayavilayIbhUtavittaiH pramattair
jAyeyAtAM hasitarudite drAgubhe mAnase te || 43||
hInaj~nAnAM pragatipadavIpAnthatAmAdadhAnAn
Asye kesheShvadharanakhayorhastayoH pAdayoshcha |
pashyannagre kimapi kimapi strIjanAn limpatastvaM
gachCheH shokaM dyutivirahitAnujjhitArogyabhAgyAn || 44||
agre pashyeH kavanakalayA jIvikA.avAptimichChor
lokaj~nAnAbhyasanavirahAta~Nkasha~NkAkulasya |
koshaiH prAchyairapi cha kavanairAdadAnasya shabdAn
saMyojyAho kimapi vayato duShkaveH sAhasAni || 45||
pakShiprekShAkutukahR^idayAH ke.api vidyAvariShThAH
pashyantastvAM nabhasi Dayate shobhanA shvetakAkI |
evaM brUyuH pramuditamanovR^ittayaH saMlapanto
dyotagrAhaidyutiyutakR^itIH ki~ncha gR^ihNIyurAshu || 46||
antaHshUnyAM bahiratitamAM shvetimAnaM dadhAnAM
ShaShThIchandrAkR^itisamatanuM tvAM vidhAyAmbakeShu |
nR^ityAnya~Ngairvidadhati samairejamAnA drutaM te
kShiptasvAntaprakaTanapaTubrahmasR^iShTipradhAnam || 47||
Amodaste.adhvani bahuvidho.anyAyataH pAnthamArgeSh
udyAneShvapyavidhi nagare nirmitairApaNairdrAk |
etadvIkShyApyajagaNasamaiH sajjanaiH kShobhahInaiH
kuryAM chintAM jahihi muditA va~nchanAbhiH sthirAyAm || 48||
padyena tvadviShayakanutishreNigaNyena puNyaM
vA~nChantyeke vidadhati cha dhIlaDDukaprAshanAshAm |
kaishchid dattvA kimapi kimapi prArthyase vItasha~NkaM
gUDhasvArthervihitavinayaiH kAmanAM vya~njayadbhiH || 49||
madhyepadyaM prakR^itigamanakleshakAraiH phalAdyaM
vikrINadbhiH pratanaphalake hastanunne sachakre |
tadrodhAya prayatanapare rakShiNi prAttala~nchaiH
snehaM gachChermatigatajayA bhAvinirvAchaneShu || 50||
sR^ityAH pAryau haritadalayugnetraramyadrumAlI
ChAyAshItau nishitaparashukrIDanArthA sthalIti |
bhAvaM bhUyo manasi dadhatIM pAlikAM nAgarImapy
agre pashya drumasamudayatrANane bhAShaNotkAm || 51||
vyAjAnveShI sunipuNamadan sarvakArIyavittaM
meyarnAmA bahulamayate yo vimAne videshAn |
UrdhvagrIvA nayanapadavIM taM prahR^iShTA naya tvaM
mR^itvA svargaM tava jigamiShA puNyasaMpattitashchet || 52||
andhAn eDAnapi rachayatAM vAhanairdhUmabhUmnA
paurAnuchchadhvanibhirabhito.analpasaMmarditAnAm |
bhItikShobhe sapadi sR^ijatAM kachcharairdUShitAnAM
modasva tvaM puri sakhi pathAM vIkShamANA vikArAn || 53||
rajyanmauDhye na kimati chalasyAdarAjjanmanA.andhA
kAyasthAnAM nayasi na halA yA.akShimArge kukR^ityam |
Topi svAsammatajanakR^itaM prArthanApatrarAshiM
kurvANAnAmadhikR^itanR^idR^ikpAtavinyAsadUram || 54||
Adhikyena sphuTati janatA bhUrisaMkhyAni yAnAny
adhvAnaH saMkuchitarachanAH sarvametad vilokya |
netradvandve sakhi dR^iDhataraM Topi vastraM badhAna
vya~NgAn pa~Ngunapi bata kuNIn draShTumichChA na chette || 55||
haMho labdhAkR^itiratitamAM va~nchanA~nshR^i~NkhaleyaM
mUrtIbhUtA kimuta kuhanA mastakaM shAkunaM vA |
evambhUtA sapadi vishayAH sa~njaniShyanta eva
tvadrShTR^iNAM manasi gahanA ye samAdhAnahInAH || 56||
etAvantaM samayamupalaprAyamArge charitvA
ghorakShveDAnilamayapuraprAntabhAge DayitvA |
shrAntaM te vishramaya karaNaM Topi shAkhoTakordhvaM
vR^ikShonmIladvishadakamalashrIbhramotpAdayitrI || 57||
AsmAkInA sitapaTasutA spandate jIvanADI
saMchintyaivaM vihitaviratau tvayyagAgre milatsu |
pIyUShArdrA tava sachivatAkA~NkiShu dhveDadhArA
mitrA dR^ik te patatu padavItyAgapatrechChukeShu || 58||
kAryAnena drutataragatirdarshanIyo.atha rAgI
saMpatpu~njaprachitavibhavo rAjakIye.api vij~naH |
saMnyAsI yadvasanavigalatkAntitaste.api ki~nchit
kAShAyatvaM bhavati vapuShi svAntavaichitryakAri || 59||
etAvatyA vachanabhavayA preraNAnAM saraNyA
dhAviShyantI jhaTiti kashayA shAlihotrIva viddhA |
utkarNA tvaM shR^iNu varagate Topi kautUhalADhyA
preyasyA me sadanamadhunA varNayantIrmamoktIH || 60||
\section{uttaramoghaH}
pashchAttApaM na vahati kR^ite.apyAgasi shrImadAd yA
yasyAH karNAdhvani mama girAmadhvanInatvamiShTam |
tasyA gehAnnayanapathagATTopi romA~nchitA syA
vyomavyApishvayugabhaShaNashrotrabha~NgAtighorAt || 1||
tUrNaM tvaM mA pravisha sadanaM harShato j~nAnahInA
pashyetAM chejjhaTiti bhaluhau tvadbhaviShyaM na vedmi |
prAgevaitad vishaditamato duShThu jAte tato.agre
kShepeShUNAM tava na bhavitA lakShyatA mayyamandam || 2||
shvAnau tau stAM taraNijapurIgR^ihyakau krUradaMShTrau
tvaM chApyedhi priyasakhi mahAva~nchanAmbhodhinakrA |
kampaM te hR^idyanuchitamahaM bhAvaye vastutastu
tvatpreShThau tau khalasujanayorbhedanirdhananena || 3||
vishvAsAya prabhavati mahAkUTakArye tadeva
prAyaH shvAgre nativirachanAsvAntalIlAvinode |
mithyAnItiM yadiha bhavatI nATakArthaM bibharti
pratyAdiShTAkhilavaraguNA gADhamAkrAntapIThA || 4||
setsyatkAryA vihitavinayA prArabhasva stutInAM
shreNIM yAvadbhaShaNaviratiM na shrayete kilAmU |
tvadbodhAya trichaturanutIH shrAvaye darshitAyAM
a~NgulyAM tvaM gilasi hi karaM lokasammohanItau || 5||
pUrvaM vANI tridashasamitau vallakImaspR^ishantI
hetuM pR^iShTA hR^idayavaramutkAriNi shvapralApe |
kasya shrotre sR^ijatu ninadaiH sharma vINetyavAdId
vande tAdR^i~NgahimanibiDadhvAnakR^iddhayAM yuvAbhyAm || 6||
baddhaspardhA mR^idutararave kokilo.ayaM yuvAbhyAM
hanta prAptuM jayamasaphalaH saMkuchan mAnasena |
jAtodvegaH kR^itabahuvidhahrIka utpannashokaH
shAkhApatrasthapuTitakhale klR^iptavAn svIyavAsam || 7||
rUkShaM dhvAnaM jaladhisaraNirvAM samAkarNya harShAch
ChiShyA bhUtvA sapadi saphalA yA yasho lAti gurvoH |
prApyedAnImatibhayabharasphUrjathutvaM hi saiva
shrutyoradhvanyaviralamalaM pUrayatyashmavarSham || 8||
shuNDAyA apyamarakariNaH puchChyorvAM varatve
suj~nAte satyapi jalapashuM vAhanIkR^itya ka~nchit |
prAyaH pashchAttapanajashuchA svargagehAdhipena
klinnAkSheNa kShititalapataddR^iShTimUrtyA.ashru sR^iShTam || 9||
satyabjahrIpaTuni yuvayorakShiNIDyau sphurantyAM
dantashreNyAmapi bahumiladdADimIbIjapa~Nkayau |
nAsAyAM champakavilayanapremavatyAM cha satyAM
bardI kashchijjaDamatibhiranviShyate.anveShyashobhaiH || 10||
shailIM vAmAkramaNasamayabhrAjitAmekavAraM
vIkShyAtyantaM shishirabahule hInapAnIyaleshe |
aprApyAnne himanibiDatAjIvikAbhUrikaShTe
kailAse drAgabhajata hariH pArvatIvAhanatvam || 11||
meghAnAM khe jayati chalanaM yauvayo vikramo.ayaM
kAmAsUyAjanipaTutarA yauvayI rUpasaMpat |
hR^idye gAne pikajayavaraM yauvayaM bhukkaNaM cha
kShINA gIrme mitapadajuSho bhUtayorvarNane vAm || 12||
bandhU shvAnau pashusamajasadratnabhUtau nareDyau
sAShTA~NgeyaM praNatiradhunA namrabhAvA puro vAm |
pAdau mUrdhnA svakR^itisamaye gArdabhau matkarAbhyAM
namraM natyAM kimuta dhanikaprItikR^iddhayAM pashubhyAm || 13||
dhUrtasvAmI kR^ipaNagaNarAT ko.apyadattvA dhanaM me
svAnte nUnaM prahasati mayA kArayan dUtyakAryam |
tasmAd draShTuM laShati tanujAM svAmino yauvayasya
svAntaM me ki~nchidapi labhatAmitthamAshAM dadhAnam || 14||
dantairmA mA sapadi dashataM paNDitau mAMsalobhAd
vastrairjAtAM chaturahR^idayau yachChataM mArgamantaH |
shvetAM shobhAM dharatu sadanaM shvetayA shobhayA me
pIThArthitvaM bhavatu yuvayorbhAvinirvAchaneShu || 15||
evaMrUpaM naTanapaTutAM darshayitvA vashaM tAv
AnIyAshu prakaTaya nijAM buddhimattAmamoghAm |
nItiM ko.api shravasi na harishchandradattAM vidhatte
lokaH sarvo.apyabhinayavatAM muhyate pATavena || 16||
vAkyairetairuditahR^idayAmodabhUmnA sakhAyau
tvatkau padyAM jhaTiti jahitastvatkR^ite tau dayAlU |
sadmAntardrAk pravishasudR^iDhaM mAnuShIyaM na chittaM
svAntaM kAle kimu kaligate hanta kauleyakIyam || 17||
gehasyAntarlaghushashanibhe pAdavinyAsataH prAk
samyag gachCheH pathi vilasitairvR^ikShakaishcha kShupaishcha |
pratyagrANAM bharatajanR^iNAM dambhabhUmA sthito yair
asmaddeshaprathitalapitashreNyalabdhAbhidhAnaiH || 18||
agre bhavyaM nayanayugalIparvakR^id rAjasaudhaM
vIkShyAshcharyaM tava bhavatu mA shastavastuvrajADhyam |
udyoge.anunnatapadavatA tAdR^ishI siddhirAttA
gUDhaM j~nAtrI tvamiha na kimatyUrdhvadhI rAjakIye || 19||
yasyAH kasyA api kila purA dhik pishAchyAH purastAn
natyaivAdya prachuradhanakR^it pIThamArUDhavatyAH |
pratyUho.anyaH sthita iti na kiM dvArapAle.atha dR^iShTe
chintotthAsyatyurutarapathastatra kiM te na bhAti || 20||
Ahosvichchet tamabhilaShasi prItimantaM tvayi drAk
tasyoShNIShaM vada varataraM daivarAjyAt kirITAt |
nIrUpaM taM sakhi kathaya vA manmathaprANanAshaM
TopyetAdR^igviShayavisareShvasti te deshikAtvam || 21||
paryAptirna sphurati yadi te tasya chApyetayoktyA
mitra brAhmImabhinayajharIM tachChrutau pUrayaivam |
Arya tvadR^iShTyanupadamiyaM snehadhArA hR^idutthA
shuddhaM sAkShyaM prakaTayati nau pUrvajanmAnubandhe || 22||
pUrvasyAM dishyudayamayate dvAdashAtmAdhunA yad
varShatyabdo yadapi pR^ithivIM sasyavastrAM chikIrShan |
etallokapriyaghaTanayoH kAraNatvaM bhajante
saumya tvatkA hR^idayasubhagA vR^ittayo lokabhavyAH || 23||
kashchid buddhiprasarasahitammanyamAno vishuddhe
tvatke karmaNyamalacharite prekShatAM doShalesham |
etat kR^itvA prachuramatimAn kR^iShNarandhreShu dR^iShTiM
svIyAM badhvAtvatha sa dinakR^inmaNDalashrIsthiteShu || 24||
mA sUryaH svaM rajanijanitaM yAtvavIkShyatvamabhre
mApInduH svaM dinasamayajaM dR^ishyatA.abhAvametu |
dvAvapyetAvatha sadR^ishatAmArya yAtAM tvayA~Nga
shrAmyatyekaH svagR^ihamavituM bhUri naktandivaM yaH || 25||
aindraM vajraM patitamiha kiM svargato hetavo.amIH
shApAd bhraMshashchirasamayataH shakrasevotthajADyam |
bhUmyAloke paramakutukaM hetuShu triShvamIShu
prAgryaM kasyetyativishayayug vIkShya daNDaM janaste || 26||
rAShTrAdhyakShIbhavitumavituM bhArataM kShemahInaM
yogyatve satyapi bata bhavAn dvArapAlo yadasti |
tannaH spaShTIgamayati kalerduShTajuShTaM prabhAvaM
kAkashchUte raTatu virave kokile dInadIne || 27||
anyAyye.adhvanyanudinagatirbhAti siMhAsanasthaH
pAntho nyAyye pathi tu varadhIrdvArapAlatvameti |
etad dR^iShTvA mama hR^idi tathA jAyate tIvra UShmA
sarvo.ambhodhiH priyasakha yathA shuShyati kShmAtalIyaH || 28||
vidyAshUnyairbahukaluShite shikShaNakShetrapIThe
koShe deshadraviNanibiDe kenachid bhakShyamANe |
vidvanstvAdR^igvarajanakR^ite sthAnamekaM durApaM
mitra syAtkiM mayi tava hitaprApayitryAM bhavantyAm || 29||
putrIM draShTuM kathayati gR^ihasvAminaH ko.api vidyA
kShetre jAto ya upaminute kShetriyaM sasyameva |
tasmAddUrAt padavirahitAbhyAgatA.ahaM kadAchin
mUrkheNa j~no bhavati hatadhIrnAshayan svIyakAryam || 30||
sadmAntastvaM tvaraya vada mA tAM gatAM kvApi kAryAn
nedaM rAjavyavahR^itigR^ihe rAjakIyaM kukarma |
utkR^iShTe sA jayati na pade vetanasya grahItA
tvaM nApyantarna hi bhavati sA vaktumevaM niyuktaH || 31||
evaMrUpAM vachanalaharIM niHsR^itAM tvanmukhAbjAd
AkarShyAmbhonidhigatasudhAdhArayA baddhamaitrIm |
hR^iShTo gehaM vishati sa manAkspR^iShTavaidheyabhAvo
tAmAhvAtuM yuvatimadhunA prastutaM vastu yasyAH || 32||
shIghraM netradvayapathagatA kAchidAlokameShyaty
aj~navrAtaprathitakathanaprAptarUpA pishAchI |
kamprasyAsAvatha viTapino sthUlatAvAn prakANDaH
koTI ete jahihi sakhi tAM nishchinuhyUrvashIM me || 33||
Topi shvetA tvamiti bhuvane suprasiddhaiva vArtA
kAntistvatkA kimiti sahasA raktaraktA babhUva |
jAnIhyasyA adharayugalIliptalipsTikprabhAyAH
pAtAnnaShTastava suragajasmArako hanta varNaH || 34||
pUrvaM stotrairjagaditha shunIM sUkarIM vAnarIM vA
kAryasyArthe ratihR^idi mahAkShobhasaMpAdayitrIm |
tAdR^ishyAste na hi gurutaraM stotramasyA jaDAyA
mR^idbhakShitvaM kiyadiva shilAkaNTakAdyadmarasya || 35||
Adau hastAvabhinayayujA mudrayA darshayitvA
tvaddantashrIpatanajanitaM shvetimAnaM dadhAnaiH |
keshairvR^iddhAbhramapaTutarAM dAmbhikashreShThanAmaM
natvA kAryaM mama sakhi chirAd vA~nChitaM prArabhasva || 36||
Topi draShTuM bahubalayutAn prastare nAvanItyaM
chAmuNDImapyatishayatayA suprasannIvidhAtR^in |
varNAn samyag vada jaDamatishrotrakulyAmR^itotsAn
kAlevidyAnibiDahR^idayAmodajanmAnukUlAn || 37||
he svargokaHkusumaruchirodyAnakhelAnimagna
strIsaMghAtaprasR^imaramahAtIkShNamAtsaryabhUme |
saundaryAbhrasthitalasaddivyatAre manoj~ne
lAvaNyAbhonidhigatamaNishrIprashaste namaste || 38||
AyAtA tvAmasati cha vare pAdanetre chalantI
netradvandvapratihatasumadvandvashobhAM didR^ikShuH |
saundaryaM te guNasamudayaM pronnatAM ki~ncha vidyAM
samyak stotuM laShitamiha mAM prApayad dUradeshAt || 39||
prAtaHkAle vikasitavataH puNDarIkasya bandhuM
netradvandvaM taruNi vahasItyevamutstotukAmA |
joShaM tiShThAmyahaha kamalaj~nAnahInA yatastvaM
DerATyUlipprabhR^itisumanodarshanAd dhanyajanmA || 40||
hAsAt tvatkAd vadanarachitAjjalpakAle sakhIbhir
jR^imbhe svIye kR^itanarabhaye drAkShaNe cha svakIye |
lajjAluH satyanishamadhunA sUkarI garvahInA
ghorAraNyaddrumagaNaghanachChAyasaMchAratR^iptA || 41||
kArtaj~nyena praNamati mano nAbhijAtaM madIyaM
kAle vishvaprakaTanapare yaH kareNuM sasarja |
yena kleshaH kavisamudaye daivato naiva jAtas
tvatsAmyADhyaM kimapi kutukAt vastvavAptuM pravR^itte || 42||
nyUnIbhUtaM kathamidamaye bhasma matpretabhUmer
evaM chintAjvalanashikhayA dahyamAnAntarAtmA |
netrANi trINyapi pashupatiryasya bAle mukhe te
TAlkampauDar mukhagatamabhiprekShya chintAM jahAti || 43||
gandharvIyAM shravaNasukhadAM gAnapIyUShadhArAM
vANIyAmapyanitarasamAM vallakImaichChamachChAm |
svIyArAvaddrutatarajitadhvA~NksaMghe vare yat
tatrAgasvA~nChravaNavirahastvatkagItasya bAle || 44||
svIye shvaitye.apyatigamayituM kAntimugrAM tanoste
kR^iShNAyAM yo nishi gaganagaH shvetabhAnuH sa darshe |
vaiphalyena kShapitavibhavaH pUrNimAyAM punashcha
shvetIbhUto rachitavinayo vA~nChati tvatprasAdam || 45||
etAvantaM samayamitare kAvyakarmaNyabhij~nAs
tvatsaundaryaM na nijakavane lAnti yat tad vyanakti |
teShAmasmi~njagati jananaM puNyaleshena hInaM
dhanyaM janma sphurati kila me tvAmaho varNayantyAH || 46||
dvitrAn varNAn vilikhitumapi j~nAnahInA satI tvaM
klishnAsIti tvayi dR^iDhamadhikShepaNaM kurvate ye |
daurbhAgyAtte dadhati na matiM tvatkavIkShAlaharyAM
hastakShetraprachuradhanavArShaNe.abdopamAyAm || 47||
nairakSharyaM na bhavati padAnarhatAyA nidAnaM
rAShTre.asmAkaM tadadhikR^itikR^id yogyatAdhikyahetuH |
evaM satyAM vada tava kiyAn j~nAnagehapraveshash
choro nindyaH sati suvibhave pashyatomArake kim || 48||
yasyAdya tvaM janagaNapuraH kartukAmApamAnaM
khinnA haste sa na kupitavAn yogashAstrAdyadhItI |
duShTo bhAvo hR^idi sati na kiM janma dhatte kadAchit
sAdhau mArge rachitagatayaH pAdadoShAt skhalanti || 49||
yadyapyAgaH kvathayati manaste sadA hanta sAdhiM
taM jAnIhi sthirataramatiM kShAntibhavyaM tathApi |
tasmAt sa tvAmatikaruNayA tatprasAdArthanotkAM
tvAdR^iglokaprasadanapaTurmanmukhenedamAha || 50||
agnerdAho vapuShi janitaH shoNitasya pravAhaH
bhedo ghoraH shirasi laguDaistADanAdvA katha~nchit |
ko.apyeteShAM jayati na mahAchaNDike tADanaM te
brahmAstrAgre sphurati kimiShuprAsakuntAdi yuddhe || 51||
shashvad yogotkaTadR^iDhamanA dhyAnamagno.api bhakta
prItyA lokapraNatijatapobha~Ngama~NgIkaromi |
tasmAdadya tvayi virachito.anugraho.ayaM madIyaH
syurmatpAdadvayanakharucheH pANDarAH shIrShajAste || 52||
premavyaktyai mR^idulavachanaM shrIyate kaishchidaj~nair
anyairvAchA bahulakalaho vA~nChyate bhAvabandhe |
dhanyairghoraprakR^itibhirilAkampamutpAdayadbhiH
prItyunmAdakShubhitamatibhiH shrIyate bAhuyuddham || 53||
shvo vIkShya tvAM hR^idi mama kR^ipA jAyate prAyasho yat
kaShTaM te syAnmama padabisAlitvasaMprAptiyatne |
ashrAntAsmannayanayugalIdIptirekhAvapAta
spardhAlustrIsamudayakR^itAdabhrasaMdarbhabhUmnA || 54||
bhakte mA tvaM bibhihi kupitAt kShipyate shApabANo
devAchchet kiM karaNamuchitaM syAnmametyugrachintA |
asmatkIrtirnikhilabhuvanavyApikA nIchakR^itya
prItasvAnteShvabhayavaradA kiM na yAtA shrutiM te || 55||
he vandAro ramaNi yuvate la~nchadAnaiH parIkShA
sUttIrNatvaM tava na hi vayaM rakShiNo.agre bhaNAmaH |
prAtaH prApsyasyabhayavachanaM bADhamasmanmukhAbjAd
bhIro bAle karajasuShamAra~njitAsmatpadAbjA || 56||
anyat kanye shR^iNu tava piturvetane.alpe.apyakaShTaM
naikAn gehAn sa kila kurute rAjarAjAbhilaShyAn |
etanmarmAprakaTanavare prArthite pUrayiShye
ko vA devo varanari varaM suprasanno na dadyAt || 57||
prApte ramye vayasi katichichChaishavaM rochayante
lokaj~nAnAM suvachanamidaM chAritArthyaM dadhAti |
ArAd ratnaM svayamupanataM yattiraskR^itya chittaM
mauDhyopetaM nikhiladishamudghoShayasyAttabherI || 58||
prAyo.anyasmin nihitahR^idayA tvaM jane prItyanarhe
prAkpApIyaM phalamanubhavasyAdarArhaM tyajantI |
modaM yAtI sakR^imiNi jale pUtigandhinyashuddhe
pIyUShADhye sarasi bhavatAt sUkarI sAdarA kim || 59||
evaM prochya drutamapasara krodhanAyAH karasthAd
daNDAchChIrShaM yadi sakhi nijaM manyase rakShaNIyam |
AshIrme.ayaM shravaNasubhagaH shrUyatAM shAsakIyAn
mA bhuShTopi kShaNamapi na te mastakAd viprayogaH || 60||

iti moghadUtaM sampUrNam |
\section{TippaNI}
pUrvamoghaH
1\. moghadUtaM mogho vyartho dUtaH AropitadUtatvarUpadharmaH padArthaShTopIrUpo yasmin kAvye tanmoghadUtam |
3\. chUte kovidArasya janma pashchimasyAM dishi sUryasyodayo vA saMbhavenna tu premAtirekavati yuvake premabha~Nga ityarthaH | aryamA sUryaH |
4\. vetaNDAsyaH gajAnano gaNeshaH |
6\. kolam uDupam | kolastu samudre plavate parantu naukeva samudre nAtyantamapekShyate tasya laghutvAt | gAlI nindA | kusR^itiH va~nchanA | bAhyashubhrAm bAhyabhAge shubhrAm |
7\. bradhnaH sUryaH |
8\. vyAdAya tiryagatyantaM vistR^itaM yathA syAttathodghATya |
10\. nirmastiShkA iti rAjakIyAnAM janAnAM saMj~nA | dhUrtatvAdidurguNayuktAnAmapi teShAM vidyAbuddhihInatvAnmastiShkashUnyatvamata eva saMgachChate |
12\. padyA mArga eva sadanaM tatra gR^ihiNI | bhikShukIti yAvat | vihitAmarshanA vihitasparshI | ayaM bhAvaH bhUtapUrvabhikShukI satyapi avaidhaiH karmabhiradhunA dhanikA saMjAtAsi | sati kleshe.avarairyatanaiH prayatnairanutkR^iShTaiH karmabhiH kathaMchidasmAkaM siddhiH sAdhanIyA |
13\. pUrvArdhasyAyaM bhAvaH prAj~nAH svakIyAM praj~nAmAshrayanti | ahaM tvAmAshrayAmi mandapraj~natvAnmama | baDishaiH matsyagrahaNArthaistadAkarShaNopayujyamAnairbhakShyavastuvisheShaiH |
14\. eSha staumi adhunA stotraM prArabha ityarthe prAchInaH prayogaH | ayamAgachChAmi ityAdivat | nirvidyAH vidyAshUnyAH | urum shreShTham | bhR^i~NgIbhavantaH shikShaNAmAtyabhAvam adhigatAH |
15\. bhavati vishaye sati saMshaye |
18\. yuvakakapibhiH yuvakAH kapaya iva taiH | vAvadUkaiH vAdashIlaiH |
20\. bhugnabhAvAH vakrabuddhayaH | bhugnaM vakram | pashyatohArakaH |
21\. kakubhAM dishAm |
22\. karaNaviratiH sharIravishrAntiH kAryakaraNAbhAvaH |
23\. ruDbhyaH roShAbhyaH ruTkrudhau striyAmityamaraH |
24\. shvavrAtIyam shunAM samUhasya sambandhi | anuvidadhatI anukurvatI |
25\. lokaH janatA | prANanArtham jIvanArtham |
26\. kashchit svArthI svabuddhyA kAryasAdhanopAyaM jAnan | nuvan stuvan | Nu stutau | asasi shobhase | asa shobhAyAm | shvetApi TopI vividhamAnasikavikArahetorvarNAnekatvaM bibhartIti bhAvaH |
27\. ayi Topi auchityaM na eti kim | tvaM kamalinyathavA kumudinI | tava kR^ite dhanadAtA sUryo.athavA chandraH |
28\. shrIvatsA~Nkasya viShNururasi saMpAditasthAne lakShmi brahmapatni sarasvati IshakAnte pArvati |
29\. kShveDo viSham | kalo madhuraH | padayugaM karShiShyadbhiH pAtayiShyadbhishcha |
30\. AsaMbaddhaye asaMbaddhatve |
31\. mukhyagauNayorgauNa kAryasaMpratyaya iti navIno rAjakIyo nyAyaH |
32\. saMvit paraspareNa vyAvahAriko.a~NgIkAraH | saMvidAgUH pratij~nAnamityamaraH | dve shuddhabuddhI mitre mithaH paraspareNa | arthAntaranyAsAla~NkAraH |
33\. nirvAchanAkhye yuddha ityanvayaH | viruchi kAntirahitam |
35\. etarhi adhunA |
36\. vaidheyAnAM mUrkhANAm | saMshodhanavidhau saMshodhanarUpe prauDhashikShaNakShetraprAdhyApakAnAM vAstavike kartavye | kevalaM pAThapravachanAdiShu saMlagnA vishvavidyAnilayeShu prAdhyAkatvapadavIM nArhanti |
37\. jaijai jaya jaya ityasya hindyAdiprAntabhAShAsvapabhraMshaH |
39\. vivAhAkhyagarte ye janA na patitAstAn dR^iShTvA asUyAyuktayordampatyoH | bhaShakayugalaM shunoryugalam |
40\. ChinnaM lA~NgulaM yasya sa pheruH shR^igAlaH | atrAryAH purAtanamudAharantImamitihAsam shR^igAlasya kasyachillA~NgulaM katha~nchichChinnamAsIt | sa chintitavAn mama lA~NgalAbhAvaM nimittIkR^itya sarvairitaraiH shR^igAlairahaM viDambye | tannivAraNAya kimapi kartavyam | sa itarAnuvAcha shR^igAlAn he shR^igAlAH lA~NgulaM shR^igAlAnAM bhArAyate | pashyata mAM yasya lA~NgUlabhAro nAsti tasmAdahaM shIghraM chalituM shaknomi | yUyamapi madvadyuShmadIyAni puchChAni kartayata | tato.anyaiH shR^igAlairbuddhileshamapi abibhrANaistada~NgIkR^itam | teShu svapuchChAni kartayitumudyateShu yuvA buddhimAn kashchichChR^igAlaH pR^iShTavAn yadi puchChAni na santi dehe.asmAkaM makShikAjAtAyAM kaNDDAM tA makShikA dhAvayituM ka ivAbhyupAyaH | tadvaddhartA vR^iddhAshChinnalA~NgUlena shR^igAlena sAdR^ishyaM vahamAnA vinaShTavivekAH santo yuvajanAn yuvakAn yuvatIshcha evaM durbodhayantiH vivekaH shirobhArAya | tadapavAraNena vivAhaM kurudhvaM shiraHshUlAdapi muktA bhavata | atisaMdhIyAse va~nchyase |
42\. purodhAH purohitaH | vivAhena lAbhaH kevalaM purohitasyeti vAstavikaM satyamatra sphoritam | satyoktiH kila dharmAya kalpate | etena saMdeshakartuH puNyalAbhaH sUchitaH |
43\. hasitarudite kartR^i | mAnase adhikaraNam |
44\. dyutivirahitAn kAntyA rahitAn |
46\. dyotagrAhaiH | dyutiyutakR^itIH |
47\. ambakeShu netreShu | samaiH sarvaiH | ejamAnAH kampamAnAH | te janAH | kShiptasya svAntasya prakaTane paTuryo brahmA tasya sR^iShTau pradhAnam | nR^ityasya visheShaNametat |
48\. akramikAnapi dR^iShTvApaNAn kShobhahInaiH | sajjanaMmanyamAnAnAm etAdR^ishAmeva jADyAd bhraShTA nirvAchaneShu jayashIlA bhavanti |
49\. dhIlaDDukaM manomodakam | tvayi kimapi dhanAdikaM dIyate | dhanAdikaM dattavadbhiH prArthyase cha tvaM vidhiviruddhAn varAn |
50\. madhyepadyaM padyAyAH mArgasya madhye | prakR^itigamanaklesham janatAyA gatAgatayoH kleshamutpAdayadbhiH | phalAdyaM phalAdikam | hastAbhyAM nunne prerite | nuda preraNe | prAttala~nchaiH pradattotkochaiH |
51\. sR^ityAH mArgasya | dalam parNam | sthalI sthalam | bhAvaM abhiprAyam | pAlikAM nAgarIM nagarapAlikAm | trANane rakShaNaviShaye | viShayasaptamI | bhAShaNotkAm bhAShaNotkaTAm |
52\. meyarpadavIdhAriNaH paunaHpunyena sarvakArIyaM dhanaM bhakShayanto vyAjavisheShAn nimittIkR^itya videshAn prayAntIti prasiddham |
53\. kIdR^ishAM pathAm | paureShu andhatvameDatvaM chotpAdayitR^INAM sammardayuktAnAm | bhItikShobhayuktAnAM kalmaShayuktAnAM cha | puri nagare | pathAM mArgANAM vikArAn vIkShamANA |
54\. halA sakhyAH saMbodhanamidam | haNDe ha~nje halAhvAne nIchAM cheTIM sakhIM prati ityamaraH |
57\. shAkhoTakaH bhUtAvAso vR^ikShaH |
58\. sitapaTasya shvetavastrasya sutA tannirmiteti yAvat | vihitaviratau kR^ittavishrAntau | tvayi agAgre | agAgre vR^ikShasyAgre | vihitaviratau tvayi satyAm | satsaptamI | kShveDaH viSham | tava mantritvakA~NkShiShu amR^itA syAtte dR^iShTiH | tava tyAgapatrapradAnAkA~N~NkShiShu cha viShamuk syAt |
59\. saMpatpu~njena dhanarAshinA prachito vR^iddhiM gato vibhavo yasya | tasya kAShAyatvakAraNAt tavApi kAShAyatvam | tadguNaH |
60\. utkarNA UrdhvakarNA satI | shAlihotrI ashvA |
uttaramoghaH
1\. Agasi aparAdhe | Ago.aparAdho mantushchetyamaraH | shrImadAt saMpattijAtAd garvAt |
2\. bhaluhau shvAnau | kShepeShUNAM nindArUpabANAnAm | mayi amandam drutam |
3\. stAm asterloTi prathamadvivachanam | taraNiH sUryastajjastatsuto yamaH | edhi asterloTi madhyamaikavachanam | gR^ihyakau gR^ihapAlitau | anurUpo yauShmAkINaH saMsargaH krauryava~nchanApUrNa iti bhAvaH | nirdhananam nAshaH | preShThau prItyAH pAtram |
4\. tadeva khalasujanayorbhedasya nAshanaM yadukte pUrvatane padye tadeva | shvaagre vinatiH | pratyAdiShTAH tiraskR^itAH akhilA varaguNA yayA | pIThamatra rAjakIyam |
6\. tridashAnAM devAnAM samitau sabhAyAm | varamut shreShThA prItiH | dhvAnaH shabdaH |
7\. sthapuTita nimnonnata | khale sthale |
8\. rUkShaM paruSham | komalatvadharmapratiyogi | lAti Adatte | lA A dAne | gurvoH AchAryayoryuvayoH shunoH | priyashiShyA lalite kalAvidhau ityAdiprayogadarshanena shiShyetyeva sAdhuH prayoga iti pratibhAti | asminnarthe ChAtrA iti prayogastu navInaH | ashmavarSha lakShaNayA karNabhedakaM dhvanim |
9\. amarakariNaH airAvatasya | shuNDAyA apekShayApi yuvayoreva puchChaM shreShTham | etat suvij~nAtam | tathApi jale jAtaM pashuvisheShameva vAhanatvena indro yatsvIkR^itavAn tadanu pashchAttApavatA tena rudatAshru vR^iShTyAkAreNa sR^iShTam |
10\. abjasya kamalasyApi hriyaH lajjAyA utpAdane paTuni akShiNi chakShuShi netre | jAtyekavachanam | kamalasya lajjAmutpAdayatsu satsu | bardI mayUraH | yadyapi pakShiNAM dantA na santyeva | parantu saundaryasUchakAni yAnyavayavAni prasiddhAni taiH samupetayoH satorapi yuvayoranyaH ko.api mayUrAkhyaH pakShivisheSho jaDairanviShyata iti bhAvaH |
11\. vAm yuvayoH | AkramaNa | hariH siMhaH |
12\. bhUtayoH jIvinoH | yuvayorbhAvaH yauvayam | tasya li~Ngatraye prayogo.atra |
13\. narANAm IDyau stutyau | namra yathA syAttathA | sAMpratikAnAM dhanikAnAM prItikAriNaH prAyaH shvAnaH | pashubhyAm atra chaturthI |
14\. dUtyaM dUtatvaM | dUtashabdAd dUtasya bhAgakarmaNI iti yatpratyayaH | dUtyAya daityAripateH pravR^itta naiShadhIyacharite ityAdayaH kaviprayogAH | dautyamityatra tu brAhmaNAderAkR^itigaNatvAd dUtasya brAhmaNAditvaM tataH guNavachanabrAhmaNAdibhyaH karmaNi cha iti Shya~niti rasAsvAdinyAkhyAyAM vedAntadeshikapraNItahaMsasandeshasya vyAkhyAyAM shrIkR^iShNabrahmatantrasvAmI | tasmAt kuntaleshvaradautyamiti sAdhu | kR^ite cha dUtyakArye mamApi ki~nchiddhanAdikaM labhyate |
15\. pIThArthitvam antaH praveShTuM mArga me yachChathashchedbhAvinirvAchaneShu yuvayoH pIThArthitvaM yathA bhavettathAhaM karomi |
17\. padyAM mArgam | jahitaH tyajataH | bhaviShyadvR^ittyA vartamAne prayoga odanaM pachatItivat | manuShyANAmeva chittaM na dR^iDhaM kimuta kalikAle kauleyakIyaM shunAM saMbandhi |
18\. laghushashanibhe iti TopIsaMbodhanam | shashAstu yadvA tadvA jhampAdi rachayeyuH udyAnasya nAshamapi kadAchit kuryuH | tanmA bhUditi | atra gUDhAkUtagarbhasya visheShaNasya sattvAt parikarAla~NkAraH | kShupaiH hrasvaiH vR^ikShakaiH | pratyAgrANAm AdhunikAnAM bhAratIyAnAM dambhabhUmA garvAdhikyam | asmadrAShTre prathitA yA bhAShAstAsAM shreNiShu alabdhanAmabhiH aprAptasaMj~nAkaiH |
19\. rAjakIye ati UrdhvadhIH satI tvaM gUDhamiha kiM na j~nAtrI j~nAtavatI | tAdR^ishI siddhiH rAjasaudhanirmANashaktirUpArhatA |
20\. pratyUhaH vighnaH | dvArapAle dR^iShTe vighno.anya upasthita iti chintA notthAsyati kim | tatra shreShTha upAyaH kiM na bhAti te |
21\. visareShu samUheShu |
23\. dvAdashAtmA sUryaH | abdaH meghaH |
24\. buddhiprasarasahitammanyamAnaH paNDitaMmanya iti yAvat | yadi tvayi doShalesho.asti sUrye.api kR^iShNarandhrANi santi | yathA sUrye kR^iShNarandhrANi na santi tathA tvayyapi doShalesho nAstIti bhAvaH | nidarshanAsakho mithyAdhyavasityala~NkAro.ayam | ayamala~NkAro na siddhyatIti yaduktaM paNDitarAjena rasaga~NgAdhare tannAtIva shraddheyam |
25\. avIkShyatvam adR^ishyatvaM mA yAtu | yAtAM loT pra dvi va | ekaH ekAkI | bhUri adhikam | sUryo naktamapi chandrashcha divApi gagane svakartavyaM bhUmiprakAshanarUpaM kurutAM tadanantarameva gR^iharakShaNarUpaM kartavyabhAraM naktamapi divApi nirvahatA tvayA sadR^ishau bhavatAm |
26\. prAgryaM prAshastyam | tava kare daNDaM vIkShya trayaH saMshayA utpadyante janAnAM manasi | ativishayayuk atyantaM saMshayAluH |
27\. duShTaiH juShTaM sevitam | anAryajuShTamityAdi bhagavadgItAvAkyaM smaryatAm | virave ravarahite maunavatIti yAvat |
28\. siMhAsanamatra lakShaNayAdhikAraH | anyAyye mArge gantA unnatAdhikArI bhavati nyAyye tu mArge gantA dvArapAlakaH |
29\. yena kenApi kimapi kimapi bhAgyaM saMpAdyate | evaM sati kiM tava kR^ite.adhikArasthAnaM prApayituM na shakyate tvaddhitakAriNyA mayA |
30\. kShetriyachyarakShetre chikitsya iti shAstram | asatyapi poShaNe kShetre samutpadyamAnaM sasyAhArasya svayaM bhakShaNena vrIhyAdivardhane kleshapradaM sasyaM yattadeva kShetriyaMsasyamiti sarvagandhAsaMpAdako di DA vIrabhadramishra Aha sma | idaM shastaM pratibhAti |
31\. utkR^iShTe pade adhikR^ite pITha iti yAvat | jayati virAjate | kAryAn kAryAt | anunAsikasandhiH | chaturthe kAraNa idaM vaktavyam sadApi kAryAlaye nAsti mukhyo.adhikArI iti AgantUn janAn vaktumeva kechid dvArapAlAH vetanaM gR^ihNantIti prasiddham |
32\. ambhonidhau lavaNimA vartate na punaH sudheti smaryatAmatra |
33\. aj~nAnAmeva vrAteShu samUheShu prAptarUpA na vastusatI | kamprasya kampanashIlasya | ja~Ngamasyeti yAvat | asau | viTapino vR^ikShasya prakANDaH mUlAchChAkhAparyanto bhAgaH | koTI vikalpadvayam | koTI ete prakR^itibhAvaH |
34\. lipsTik |
35\. tAdR^ishyAH itthaMbhUtalakShaNAyAH | admarasya atibhakShaNashIlasya |
36\. vR^iddheti dR^iShTR^iNAM bhramajanane paTutarAM natvetyanvayaH | dAmbhikAnAM shreShTho yathA namati tathA upamAne karmaNi cha iti Namul |
37\. prastare lakShaNayA kaThine hR^idaye | nAvanItyaM navanItatvam | lakShaNayA mR^idutvam | baliShThAn vashayituM mR^idulA varNA uchchAryante | tathA kAlejvidyArthinImimAM prasAdayituM mR^idu yathA syAttathA saMbhAShasvetyarthaH |
38\. svargokaso ye devAsteShAM kusumasundarodyAne khelantInAM strINAM vR^inde.asUyAM janayitri |
40\. joShaM spandanaM yathA na syAttathA | videshAdAgatAnAM DerATyUlipprabhR^itInAM sumanasAM kusumAnAM darshanena dhanyajanmA |
42\. nAbhijAtaM brahmANam | vishvaprakaTanapare vishvaj~nAnasya sarvatra prasaraNapare kAle sR^iShTisamaya iti yAvat | kareNum gajastriyam |
43\. TAlkampauDar |
44\. he bAle iti chaturthapAde saMbuddhiH | vANIyAm vANIsaMbaddhAm | vallakIm lakShaNayA vallakIsamudbhavaM nAdam | dhvA~NkShaH kAkaH | AgasvAn aparAdhI | shravaNavirahaH shravaNAbhAvaH | yadi tava nirjitakAkaravaM gAnamashroShyaM nAhaM gandarvagAnavallakInAdau apaikShiShye | vallakInAdashravaNechChAyAM hetustava ravashravaNAbhAvaH |
45\. shvetabhAnuH chandraH | darshe amAvasyAyAm | yadyapi amAvasyAyAM kR^iShNAM tvatkAntimatikramituM chandraH prayatnaM karoti parantu viphalaH san punaH pUrNimAyAM shveta eva bhavati |
46\. etAvatkAlaparyantamanyaiH kavibhistvassaundaryasya kavitAdirachanAsvavarNitatve hetumAha etAvantamityAdinA | na lAnti na svIkurvanti | lA AdAne |
47\. tvayi tava viShaye | viShayasaptamI | adhikShepaNaM nindAm | nirakSharakukShistvam | hasta eva kShetraM tatra prachurasya dhanarUpasya vAraH vArshabdasya ShaShThyekavachane padarUpam vAriNaH varShaNe abdopamAyAM meghopamAyAm | tava kaTAkShe nipatite tvaM yathechCham utkochaM dAtuM samarthAsItyajAnAnAste tvaM nirakSharakukShiriti nindAM kurvanti | utkochaM prApya te nindAmetAM tyajantu tvAM vidyAvatIM sarvatra ghoShayantvityAkUtam |
48\. nidAnaM kAraNam | j~nAnagehe vidyAlaye | pashyatomArake vishvavidyAnilayeShu yaH shaikShikaH starabha~NgastaM virudhya buddhijIvinaH bhAgyavashAdadyatve patrikAsu bhAShaNAdiShu cha krodhaM pradarshayanti | parantu krodhasya prakAshanaM nAlam | anarhANAM vishvavidyAnilayeShu praveshAvakAsha eva niShedhya iti mamAbhiprAyaH |
49\. sati vare | vare.api hR^idi kadAchid duShTabhAvajananarUpo doSho bhavati | kadAchiditi madhyamaNinyAyena vAkyadvaye.apyanveti | mArge shuddhe.api uchchAvachatvahIne skhalanahetuH pAdadoShaH |
50\. AgaH aparAdhaH | Ago.aparAdho mantushchetyamaraH | kShAntyA kShamAguNena bhavyAm | prasAdArthanotkAm prasannatAviShayikAyAM prArthanAyAm utkaTamatiM tvAm | prasadane prasAde paTuH san |
51\. agneH agni~Nas | agnerdAho vA rudhirapravAho vA shirastADanaM vA yAM vedanAM janayanti sA tava tADanajAtAyA vedanAyA agre kShullakAH aparigaNanIyAH | prAsakuntau AyudhavisheShau |
52\. tvayi mahyaM praNamantyAM mama nakhakAntikAraNAt tava kR^iShNAH keshAH shvetA bhavantu | pANDarAH shvetAH | rucheH ruchi~Nas | shIrShajAH keshAH | tadguNAnuprANitA paryAyoktiH |
53\. premNo.abhivyaktyai trayaH santyupAyAH mR^iduvachanaM paruShavachanaM bAhuyuddhaM cheti | tatra bAhuyuddhaM prashastatamam ekAntena phaladAtR^itvAt | shastA prashastA prakR^itiH | ilA bhUmiH |
54\. padameva bisam kamalaM tatrAlitvaM bhramaratvam | adabhram bahulam |
55\. vR^ittiH manovR^ittiH |
56\. vandAro vandanashIle shvaH kariShyamANavandane iti yAvat | bhayade bhayaM kurvANe idaM cha rakShigehe ityasya visheShamam | rakShiNo.agre | karajAH nakhAH | paryAyoktya~NkAraH |
57\. rAjarAjaH kuberaH | marmaNo rahasyasya aprakaTanarUpe vare | varanari vare nari nR^i~Ni manuShye | li~Ngamatantram | varaM kAmanAm |
58\. ArAt samIpe | ArAhUrasamIpayorityamaraH |
59\. sakR^imiNi kR^imisahite | nAntaH kR^iminshabdaH |
60\. krodhanAyAH atikrodhashIlAyAH | shAsakIyAn shAsakIyAt |
##

Encoded and proofread by samvadah@proton.me

Copyright S. Jagannatha

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}