% Text title            : yajnopavItasamIkShaNam
% File name             : yajnopavItasamIkShaNam.itx
% Category              : misc, sahitya, article, pradIptakumArananda
% Location              : doc\_z\_misc\_general
% Author                : (Copyright) Pradipta Kumar Nanda, Kendrapara, Orissa pknanda65 at gmail.com
% Transliterated by     : Pradipta Kumar Nanda
% Proofread by          : Pradipta Kumar Nanda
% Acknowledge-Permission: (Copyright) Pradipta Kumar Nanda
% Latest update         : June 20, 2021
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Yajnopavita Samikshanam ..}##
\itxtitle{.. yaj~nopavItasamIkShaNam ..}##\endtitles ##
lekhakaH \- nandapradIptakumAraH

ijyate havirdIyate.atra yaj+na~N=yaj~naH |  (yaj~na+upa+vIta) yaj~nopavItam phalitam | yaj~nArthaM sa.nskR^itaM  sUtravisheSham, yaj~nasUtram vA | upavItam (upa+vi+iN gatau+kta) upa samIpArthako.avyayapadam |  upanayanasa.nskAreNa pavitrIkR^itaM vItaM sva\-samIpAgataM brahmachArikR^ite navatantuparimitaM  vAmaskandhAt nAbhiparyantaM kaTiparyantaM vA lambAyamAnaM sUtravisheShaM yaj~nopavItamiti niruktiH | yadvA yaj~nena yaj~nasya yaj~nAya yaj~nAdvA AgataM yaj~nopavItam | yaj~nopavItashabdArtha uktaH smR^itisAre\- yaj~nAkhyaH paramAtmA ya uchyate chaiva hotR^ibhiH | upavItaM tato.asyedaM tasmAdyaj~nopavItakam ||
idaM yaj~nopavItamupanayanena sambhAvyate,arthAt upanayanasamaye yaj~nopavItagrahaNaM bhavati | brAhmaNasya kR^ite.asya yaj~nasUtrasya mahatI AvashyakatA asti | yaj~nopavItaM vinA viNmUtrotsargaM kartuM naiva shakyate,  bhojanasya kA kathA taM vinA jalapAnamapi na kartavyam | yatohi muktAvalyAm\-
     vinA yaj~nopavItena toyaM yaH pibate dvijaH |
     upavAsena chaikena pa~nchagavyena shuddhyati ||
     vinA yaj~nopavItena viNmUtrotsargakR^idyadi |
     upavAsadvayaM kR^itvA dAnairhomaistu shuddhyati ||
api cha gobhilena\-
     sadopavItinA bhAvyaM sadA baddhashikhena cha |
     vishikhyovyupavItashcha yatkaroti na tatkR^itam ||
iti | asya utpattistu brahmaNo jAtA | padmAsanastho brahmA padmanAlasUtreNAsya nirmANaM chakAra | yachchoktaM smR^itiprakAshe\-
yaj~nopavItaM paramaM pavitraM vibhUShaNaM brAhmaNalakShaNaM cha |
padmAsanasthena pitAmahena utpAditaM pa.nkajanAlasUtrAt ||
asya nirmANe tridevAnAM brahma\-viShNu\-maheshvarANAM mahatI anukampA vidyate | sAvitrIdevI asya jIvanyAsakartrI |  tathA cha \-
     brahmaNotpAditaM sUtraM viShNunA triguNIkR^itam |
     rudreNa datto granthirvai sAvitryA chAbhimantritam ||
sa.npratike kalau yaj~nasUtraM kArpAsayuktaM pratibhAti | tatpramANantu\-
      kR^ite padmamayaM sUtraM tretAyAM kanakodbhavam |
      dvApare rAjasaM proktaM kalau kArpAsasambhavam ||
      yaj~nopavItasyotpattiM jAnAti brAhmaNo na chet |
      sa vai vahati bhArAya pustakAni yathA vR^iShaH ||
nAbhiparyantaM lambAyamAnaM yaj~nopavItaM dhAryamiti vasiShThaH | kaTiparyantamiti kAtyAyanaH | tathA hi\-
      nAbherurddhvamanAyupyamadho nAbhestapaHkShayaH |
      tasmAnnAbhisamaM kuryAdupavItaM vichakShaNaH ||
api cha kAtyAyanaH\-
      pR^iShThadeshe cha nAbhyAM cha dhR^itaM yad vindate kaTim |
      taddhAryamupavItaM syAnnAtilambaM na chochChritam ||
iti | asya yaj~nasUtrasya sthalavisheShe trINi nAmAni prasiddhAni santi |  brahmasUtra\-nivIta\-prAchInAvItabhedAt | devakArye brahmasUtraM savye vAmaskandhe dhAraNam | mAlavatka.nThAvalambitaM nivItaM manuShyakArye tarpaNAdau prasiddham | apasavye dakShiNaskandhe niveshitaM prAchInAvItaM pitR^ikArye prashastam | yaduktaM hemAdrau bharadvAjaH\-
      dakShiNabAhumuddhR^itya vAmaskandhe niveshitam |
      yaj~nopavItamityuktaM devakAryeShu shasyate ||
      ka.nThAvalambitaM chaiva brahmasUtraM yadA bhavet |
      tannivItamiti khyAtaM shastaM karmaNi mAnuShe ||
      utkShipte vAmabAhau cha dakShiNaskandhamAshritam |
      prAchinAvItamityAhuH tatpitreShveva karmasu ||
manunApi\-
      uddhR^ite dakShiNe pANAvupavItyuchyate dvijaH |
      savye prAchInAvItI syAnnivItI ka.nThasajjanam ||

kadA navInaM yaj~nopavItaM dhAraNIyamiti viShaye shAstrAntare bahudhA uktam | tatra upAkarmArambhe (sa.nvatsarAdau vedapAThakarmaNi) dAnakarmaNi, jananAshauche, maraNAshauche, shrAddhe, chandrasUryagrahaNoparAnte, yaj~nAdau cha navInIkartavyam |   uktaM shrIrAmakalpadrume jyotiShArNave cha\-
      upAkarmaNi chotsarge sUtakadvitaye tathA |
      shrAddhakarmaNi yaj~nAdau shashisUryagrahe.api cha ||
navayaj~nopavItAni dhR^itvA jIrNAni cha tyajet ||
kadAchit aspR^ishya sparshena, abhakShabhakShaNena, sUtraChedanena cha navInaM dhAraNIyam |

etasya yaj~nasUtrasya paramAyurapi nirdiShTo.asti | dhAraNadinAt chaturmAsAnte avashyameva nUtanaM sUtraM dhAraNIyam | yachchoktaM gobhilaH\-
      dhAraNAtbrahmasUtrasya gate mAsachatuShTaye |
      tyaktvA tAnyapi jIrNAni navAnyanAni dhArayet ||
na dhArayati mUDhAtmA sarvakarmasu garhitaH ||
api chAhnikasUtrAvalyAm\-
      sUtake mR^itake chaiva gate mAsachatuShTaye |
      navayaj~nopavItAni dhR^itvA jIrNAni sa.ntyajet ||
atra manuH\-
      mantreNa dhAraNaM kAryaM mantreNa cha visarjanam |
      kartavyaM cha sadA sadbhirnAtra kAryA vichAraNA ||
pArijAte.api\-
      yaj~nopavItamantreNa dhArayed brahmasUtrakam |
      smR^ityuktena tu mantreNa niShkAshyaM brahmasUtrakam ||
dhAraNamantrastAvatkauShatakIshAkhAyA.n\- yaj~nopavItenopavyayAmi dIrghAyutvAya suprajAstvAya subIryAya sarveShAM vedAnAmAdhipatyAya yashase brahmavarchasAya | sarvatra\-
      yaj~nopavItaM paramaM pavitraM prajApateryatsahajaM purastAt |
      AyuShyamagryaM pratimu~ncha shubhraM yaj~nopavItaM balamastu tejaH ||
yadvA\- yaj~nopavItamasi yaj~nasya tvA yaj~nopavItenopanahyAmi | tyAgamantraH\-
      brahmAviShNumaheshAdyAstanUtAM devatAH smR^itAH |
      tyakShAmi puNyakAle.asmin bhavatAM tR^iptihetave ||
api cha \-
      etAvaddinaparyantaM brahmatvaM dhAritaM mayA |
      jIrNatvAtvatparityAgaH gachCha sUtraM yathAsukham ||
jIrNayaj~nopavItaM shiromArgeNa niHsArya jale nikShipet |

kati sa.nkhyakaM yaj~nasUtraM dhAraNIyamiti chechchaturthaparimitamuchyate, adhikAri\-pratinidhirUpeNa | tathA hi\-
      yaj~nopavIte dve dhArye shrote smArte cha karmaNi |
      tR^itIyamuttarIyArthaM vastrAbhAve chaturthakam ||
adhikArI bhedena chAtra devalaH\-
      upavItaM vaTorekaM dve tathetarayoH smR^ite |
      ekameva yatInAM syAditi shAstravinishchayaH ||
viNmUtrasamaye dakShiNakarNe sthApanIyam | anyathA ashuddhirjAyate sUtrasya | dakShiNakarNe sarveShAM devAnAM tIrthAnAM cha samAvesho.asti | yachchokta.n\-
      AdityA vasavo rudrA vAyuragnishcha dharmarAT |
      viprasya dakShiNe karNe nityaM tiShThanti devatAH ||
      agnirApashcha vedAshcha somaH sUryo.analastathA |
      sarve devAstu viprasya karNe tiShThanti dakShiNe ||
      prabhAsAdIni tIrthAni ga.ngAdyAH saritastathA |
      viprasya dakShiNe karNe vasanti munirabravIt ||
      ga.ngA cha dakShiNe shrotre nAsikAyAM hutAshanaH |
      ubhayoH sparshanenaiva tatkShaNAdeva shuddhyati ||
iti |

asya nirmANapraNAlIviShaye.api shAstraM na maunam | avitathaM tattvaM prakAshayati | granthAntareShu AhnikasUtrAvalyAdiShu\-
      shuchau deshe shuchiH sUtraM sa.nhatA.ngulimUlake |
      AveShTyaShaNNavatyAM cha triguNIkR^itya yatnataH ||
      a.ngulyagre tu viprANAM kShatriyo madhyaparvataH |
      a.ngulimUle tu vishAM kuryAtsUtrasya veShTanam ||
      ShoDashAshIti viprANAM dvAdashAtIti bhUbhujAm |
      chaturashIti vaishyAnAmashItiH shUdra uchyate ||
      ali.ngakaistribhiH samyak prakShAlyorddhvvR^itaM cha yat |
      apradakShiNamAvR^ittaH sAvitryA triguNIkR^itam ||
adhaH pradakShiNAvR^ittaM samaM syAnnavasUtrakam | trirAveShTya dR^iDhaM baddhvA haribrahmeshvarAnnaman | trivR^idUrdhvaM vR^itaM kAryaM tantutrayamadhovR^itam | trivR^itaM chopavItaM syAttasyeko granthiruchyate ||
vAmAvartaM triguNaM kR^itvA pradakShiNAvartaM navaguNaM vidhAya | tadevaM trisaraM kR^itvA granthimekaM vidadhyAt ||
      pR^iShThava.nshe cha nAbhyAM cha vR^itaM yadvindate kaTim |
      taddhAryamupavItaM syAnnAtilambaM no chochChitam ||
      vAmaskandhe kR^itaM nAbhihR^itpR^iShThava.nshayordhR^itam |
      kaTiparyantamApnoti tAvatparimANaM bhavet ||

navatantuparimite yaj~nasUtre nava tantudevatAH santi | te cha\-
      o.nkAraH prathame tantau dvitIyegnistathaiva cha |
      tR^itIye nAgadaivatyaM chaturthe somadevatA ||
      pa~nchame pitR^idaivatyaM ShaShThe chaiva prajApatiH |
      saptame mArutashchaiva aShTame sUrya eva cha ||
sarve devAstu navama ityetA tantudevatAH ||
iti  | uparyuktaM vidhividhAnAdikaM  samayasApekShaM sa.nprati asambhavaM manyate | yathAsAdhyaM yaj~nopavItaM nirmAya  ga.ngAjalena vidhautya ekasmin pAtre nidhAya abhimantrayet vaidikavidhinA | dhAraNAnte Achamanam | sUryArghyadAnam | ante aShTottarashatasa.nkhyako gAyatrImantro jApyaH |

                                       \-\-\- lekhakaH \- nandapradIptakumAraH
##
Written by Dr. Pradipta Kumar Nanda, Kendrapara, Orisa pknanda65 at gmail.com

\medskip\hrule\obeylines

Please send corrections to sanskrit at cheerful dot c om
Last updated \today
https://sanskritdocuments.org

\end{document}