% Text title : AnandamandAkinI % File name : AnandamandAkinI.itx % Category : shataka, major\_works, madhusUdanasarasvatI % Location : doc\_z\_misc\_major\_works % Author : Madhusudana Sarasvati % Transliterated by : Sunder Hattangadi % Proofread by : Sunder Hattangadi, PSA Easwaran % Description/comments : A unique devotional poem by an Advaita philosopher % Latest update : January 31, 2015 % Send corrections to : sanskrit at cheerful dot c om % % This text is prepared by volunteers and is to be used for personal study % and research. The file is not to be copied or reposted for promotion of % any website or individuals or for commercial purpose without permission. % Please help to maintain respect for volunteer spirit. % \documentstyle[11pt,multicol,itrans]{article} #include=ijag.inc #endwordvowel=.h \portraitwide \parindent=100pt \let\usedvng=\Largedvng % for 1 column \pagenumbering{itrans} \def\engtitle#1{\hrule\medskip\centerline{\LARGE #1}} \def\itxtitle#1{\medskip\centerline{\LARGEdvng #1}\medskip\hrule} \def\endtitles{\medskip\obeyspaceslines} %% \begin{document} \engtitle{.. Ananda Mandakini ..}## \itxtitle{.. AnandamandAkinI ..}##\endtitles ## shrImadhusUdanasarasvatIvirachitA AnandamandAkinI | vAgdevIchaturAsyapa~nchavadanA nityaM sahasrAnano\- .apyuchchairyatra jaDAtmatAmupagatAH ke.anye varAkAH surAH | martyAH svalpadhiyaH kathaM nu kushalAstatrApyahaM praj~nayA hInaH kiM karavANi tAM vrajakulottaMsa prashaMsAM tava || 1|| nityaM brahmasurendrasha~NkaramukhairdattopahArAya te visvAdAMstuShamishrataNDulakaNAnvipraH sudAmA dadau | tadvaddeva nirarthakaiH katipayai rUkShAkSharairnirmitAM vAgIshapramukhastutasya bhavataH kuryAM stutiM nistrapaH || 2|| shashvadbrahmashivendradevaguruvAgdevIphaNIndrAdibhiH stutyasyApi hare mamAstu rachitA vANI vinodAya te | chitrAla~NkR^itishAlibhiH sulalitairnityaM kavInAM stavaiH samrAjaH samupAsitasya shukagIrdhatte pramodaM yathA || 3|| chitrAkArakirITakoTivilasadratnaughakAntichChaTA\- sa~NghaTTena vichitramambaratalaM kurvatsthitaM mUrdhani | jIyAtkekishikhaNDamaNDanamidaM nIlAchalasthAyinI svarNAdreH shikhare purandaradhanurvyUhasya nindAvaham || 4|| yatpAdAntanakhAMshuchintanavashAdaj~nAnamandhaM tamo\- .apyantaM yAti mukunda tasya bhavato dhvAntAni kiM mUrdhani | j~nAtaM tvAM dayitaM sametyajaladA ye keshatAmAshritA\- ste baddhAshchapalAgaNaiH praNayajakrodhAtkirITachChalAt || 5|| tvachchakShuH savituH saroruharucheH sAkShAtkathaM gaNDayo\- rbhAle cha vrajanAtha nartanaparA dhvAntArbhakAH santatam | nirNItaM mukhanetrapa~NkajavanImAdhvIkapAnAnmuhu\- rmAdyanto madhupA bhramanti parito vaktrAlakavyAjataH || 6|| tvadbhAle nikaShopale vijayate kAshmIragorochanA\- sambhUtastilakaH parIkShaNavidhau kiM hemarekhodgamaH | chA~nchalyaM chapalA vihAya jaladaM kiM vA samAlambate kiM vA mArakatasthale samuditaH kandarpavR^ikShA~NkuraH || 7|| tvadbhUvallimiSheNa kArmukalatAmAkR^iShya puShpAshugaH kR^itvA champakakorakaM cha tilakavyAjena bANaM hare | lakShyaM kuntalanIlakaNThamatulashrIchandrakaM vidhyati prAyaH shatrusamAnanAmnyapijane krodho yadUrjasvinAm || 8|| niHsheShapramadAmanomanasijakrIDAmahAmandira\- vrIDAvajrakapATikAvighaTanaprauDhAkR^itiH ku~nchikA | durmAnagrahilatrilokamahilAmAnachChidAkartarI shR^i~NgAradrumama~njarI sphurati kiM govinda te bhrUlatA || 9|| no kAryaM shrutivartmala~NghanamidaM nAlIkamugdhAkR^itiH paryantAkalanaM vidhAya sahajasvachChena bhAvyaM sadA | antaH kR^iShNamupAsya tadruchimatA sambhAvanA sarvataH kAryetyambujalochanAkShiyugalaM mAnaM dadhau te satAm || 10|| saundaryAmR^itadIrghhike tava dR^ishau pakShmAvalishchaitayoH kUle kAmakR^iShIvalena rachitA shR^i~NgArasasyonnatiH | dR^igbha~NgIrnigadanti yAstu vibudhA ratyambhasAM vIchaya\- stAH syurgopavadhUhR^idambujavanIdolAyitA yatnataH || 11|| dUre brahmashivendrapUrvadiviShadvR^inde namaskurvati vyAvalgadvrajabAlakaughalaguDatruTyatkirITe haThAt | sAvaj~nA madhumattasundaradR^ishAM shobhAdviShaH sAlasAH dR^ikpAtAstava nandavaMshatilaka svAnte sadA santu me || 12|| mukterapyatidurlabhA himagiriprasyandimandAkinI\- dhArAto.apyatishItalAtimasR^iNA chAndrAnmayUkhAdapi | vA~nChAto.apyativistR^itA viShayiNAM tvatpAdachintApara\- svAntAdapyatinirmalA mayi kR^ipAdR^iShTistavAstAM hare || 13|| kalpAntAgnishikhonnatirditisutavrAte prapanne jane pIyUShadravasindhuvR^iddhiramarastome vibhUtyAyatiH | sImA premabharasya gopanikare kandarpakANDAhati\- rbrahmANDodarasundarIhR^idi hare jIyAddR^ishoste dyutiH || 14|| nirbandhena yadIndranIlamahasA sampAditau darpaNau tAbhyAM kiM tulanA kapolatalayoH sambhAvyate vA na vA | evaM j~nAtumupAgate shrutipathaM netre trapAku~nchite sha~Nke dvaidhavatI tvadIyavadanaprAntashriyaM pashyataH || 15|| tvAM pAdA~Ngadaka~NkaNA~Ngadashirola~NkArahArAmbaraiH sampUjya pradadau sutAmatha maNiM ratnAkaraH kaustubham | Asye tasya sutaH sudhAMshurakhilAM kAntiM yadA dattavA\- nsvAkAraM vyataraMstadaiva makarAH kiM kuNDalAntastava || 16|| lAvaNyAmR^itavAhinI tava mukhasyeyaM manoj~nAkR^iti\- stasyAmadbhutabudbudaH samabhavattatrApi phenodgamaH | nAsAvaMshagataM tameva vishadaM muktAphalaM ye vidu\- ste mAnyA madhusUdana tvayi manovR^ittyaiva dhanyA yataH || 17|| netrAmbhojamukhendubhAlatilakairnityaM vivAdo yataH saundaryArthamiti pratItya vidhinA sItA kR^itA nAsikA | tUNI vA kusumAyudhasya nR^ipateryanmallikAkorakaH kANDastatra chakAsti mauktikaphalavyAjena nandAtmaja || 18|| yo.ahaM te padapa~NkajadyutilavaM prApyAbhavaM pallavaH kalpakShmAruhamastakAbharaNatAM yAtashcha rAdhApate | taM mAM nindati bimbavidrumalatAshrItaskaro.ayaMshrutA\- vevaM jalpitumAgate kisalaye sthAne.adharo rAgavAn || 19|| dR^igbha~NgIH sphuradindranIlanichayaH pakShmANi kastUrikA jihveyaM tava padmarAganikaraH shoNAdharo vidrumaH | dantAlI gajamauktikAni madhujinmandasmitaM chandanaM paNyasthAnamidaM manojavaNijo jAne tavAste mukham || 20|| yA raktA vadanendumaNDalagataM mAdhuryamuchchaistarA\- mAsvAdyeha sarasvatI sthitavatI satyaM rasaj~neva sA | yatsaptasvaramaNDalAni bahudhA tvatkaNThadeshAdbahiH prAdurbhUya mudaM shrutau sukR^itinAM yachChanti nandAtmaja || 21|| sAmyaM tvadvadanasya vA~nChati vidhurdoShAkaro yadyapi kShipto.apyambuni padmarAgashakalo dantachChadaM spardhate | dR^iShTvaivaM kushalaH kusheshayabhavaH kleshAdyashodAtmaja vyaktaM tvachchibukaM tathaiva vidadhe yattulyatA na kvachit || 22|| mAdhuryaM na lavaM madhUni dadhati drAkShA tu sAkShAdviShaM pIyUShAnyapi yAnti nimbasamatAM ke dugdhakhaNDAdayaH | prAleyAni na shItalAni sarasaM no kokilAkUjitaM godhugvaMshavataMsa jAtu jayati tvadvAgvilAsodaye || 23|| vedAshchandramasaM vadanti bhavataH svAntaM kathaM tadvR^ithA\- kurvantyatra vivAdamAtrakushalA govinda nandAdayaH | tasyaivAmR^itapa~NkilAstava mukhAdAvirbhavanto bahi\- rdhvAntaM yattirayanti hanta kiraNA mandasmitavyAjataH || 24|| yannAmasmaraNAdapi shravaNataH prakShINarAgAshayA yAnti tvatparamaM sadAshivapadaM yadyoginAM durlabham | tasyApyAnanapa~Nkaje tava jayatyuchchaistarAM rAgitA yenAbhIrakulapradIpa tadalaM tAmbUlamAstAM mude || 25|| pIyUShadravasArasAraghamadhudroNI tvadIyAdharA\- svAdAyArkasutAtaTe shritavatI sadvaMshajAtA tapaH | tatpuNyairmuralImiSheNa rasikA mAdhuryamuchchaistarA\- mAsyendoranubhUya gokulapate gItAmR^itaM mu~nchati || 26|| sAphalyaM shrutisampadAM trijagatAM prAleyadhArAprapA pIyUShadravamAdhurI paribhavakleshAmbudheH shoShaNam | brahmAnandatiraskR^itiH kulavadhUdhairyAdrivajrAhatiH kaMsadhvaMsana shaMsa kiM na bhavato vaMshIninAdodayaH || 27|| dhairyaM dhikkurute trapAM vichinute kaulaM yashaH pro~nChati pratyekaM guruvargaga~njanashataM vismArayatya~njasA | sAdhvInAma nirAkaroti bhavanaM bharturvidhatte viShaM kiM kiM no vidadhAti hanta sudR^ishAM vaMshIninAdastava || 28|| lAvaNyairakhilaistvadAsyamukuraM nirmAya ghAtA chirA\- nmuShTiM mArakataM vidhAya tadadhaH kaNThasthalavyAjataH | dhyAyaM dhyAyamasheShavastusuShamAdhArAya rekhAtrayaM brUte nAsti babhUva no na bhavitA saundaryametAdR^isham || 29|| AshAnAgakaraprasArimahasA niHsheShavAmabhruvA\- mAshAbhistridasheshanirbharashubhaiH kaMsAdinAshashriyA | premNA nandayashodayostanujuShAM niHsImabhAgyairdR^ishAM saubhAgyairvrajasubhruvAM vrajapate kiM te bhujau nirmitau || 30|| kaM yasmAdalamabhyudeti bhavataH sarvA~NgametAdR^ishaM sAmyaM vA bhajatAM kathaM jalaruhe sarvaj~namadhyasyatoH | mattarkaH punaratra gokulapate trailokyalakShmI yata\- stvatpANyoriti tau vadanti kamale sA yattadekAlayA || 31|| a~Ngulyastava hastayormurahara prAyo rasAlA~Nkura\- shreNI yatparito.a~NgulIyakamiShasnigdhAlavAlAvaliH kiM vA pa~nchasharaprachaNDatapasA pa~nchAshugAH pa~nchato\- ttIrNAH satphalinaH punarbhavaruchA puShNanti netrotsavAn || 32|| bhaktAnugrahakAtareNa bhavatA kR^itvA nR^isiMhAkR^itiM rAgAndhasya purA hiraNyakashiporvakShasthalI pATitA | tenAbhUttava pANipa~Nkajayuge rAgaH sa rAdhApate gopInAM kuchaku~NkumairdviguNito nAdyApi vishrAmyati || 33|| etau pa~nchashirastviShA dashadishaH sambhAvayantau bhR^ishaM daityaprANasamIrasaMhatiyamau shyAmau bhuja~Ngottamau | tanmaulidyutishAlinI punariyaM ratnAvalI jR^imbhate yAM prAhustava gokulesha nakharashreNIM karasthAM janAH || 34|| dordaNDadvayabandhanAni vidadhurnandopanandAdaya\- stadgranthitruTisha~NkayAtichakitA govardhanoddhAraNe | tAnyevApratimaprabhANi harito vidyotayantyadbhutaM vidvAMsastava ka~NkaNA~NgadatayA govinda yajjAnate || 35|| shR^i~NgAradrumasArakaNDanavashAttrailokyasImantinI\- krIDAmandiramaNDanAya vidhinA stambhau pralambau kR^itau | tanmadhye punarindranIlamaNibhiH sampAditA vedikA tau bAhU madhujidvadanti bhavato vakShaHsthalIM tAmapi || 36|| yadraktaH kamalAkaraM karatalenAlambate bhAskara\- stvachchakShurmukhapANipAdakamale jAtastataH shoNimA | tanmitraM punarAkalayya sa dhR^itaH kaNThe tvayA kaustubha\- vyAjeneti mukunda mAdR^ishi jane tarkaH samujjR^imbhate || 37|| AlokyAkhilavedashAstrajaladhestattvaM yadekAntataH kR^itvA sa~NkalitaM svakIyanilaye kShIrAbdhimadhye dhR^itam | sarvArthapratibhAsakaM vrajakulAla~NkAra tatkaustubha\- vyAjAdvismR^itisha~Nkayeva bhavatA kaNThe kR^itaM sAmpratam || 38|| yAtvA viShNupadaM samAshritavatI nakShatramAlA sphura\- ddIptiryogyamidaM kathaM muraripo naktandinaM dyotate | AM j~nAtaM dayitaM tavAnanavidhuM yAntImimAM yAminI romashreNimiShAttato dhR^itavatI j~nAtvA saptnImiyam || 39|| yaH pAshena yashodayA niyamito yenAparAdhaM vinA tasminnasti valistridhA mayi puraH so.ayaM balidhvaMsinaH | evaM chintanatatparaH kR^ishatarastvanmadhyadesho bhR^ishaM yAshodeya sa shokamudgirati te romAvalivyAjataH || 40|| sR^iShTyAdau prakR^itirguNatrayamayI yA svIkR^itA.a.asIttvayA seyaM sattvamayI sukhAya jagatAM hArAkR^itiste bhuvi | gu~njAdAmamiShAnmukunda dadhatI rAgAdrajovigrahaM nAbhIsImni tamomayI punariyaM romAvalI rAjate || 41|| saundaryAmR^itavAridhau smaramahAyAdaHsamArambhataH sambhUtA bhramirambhasAM sulalitA jAtAstato vIchayaH | tAM jAne sphuradindranIlaghaTitashrIsampuTArdhadyutiM tvannAbhImapi tAM valitrayamiti shyAmAbhirAmAkR^ite || 42|| nIlAmbhoruhavallirullasati te nAbhIsarasyAM dhruvaM yachChrIvatsamiShAdbibharti kusumaM nAlaM cha romAvalI | yaM vA vakShasi kaustubhaM budhajanA jAnanti nandAtmaja prAyaH so.apyanurAga eva bhavitA trailokyavAmabhruvAm || 43|| nIrUpo.api ghanadyutirmunimanomAtraikapAtrIkR^ito\- .apyAbhIrIgaNasa~NgataH sukhaghano.apyAnandito bandhavaiH | j~nAnAtmApyatimugdhatAmupagato vAmabhruvAM vibhramai\- ritthaM te trivalImiShAnmurahara trayyasti chitrArpitA || 44|| devyaH pallavasampadA vidadhate saubhAgyalakShmIM shrutau svachChandaM sumanaHphalAni vibudhA vindanti te sevayA | vedenApi nigadyate murahara tvaM bhaktakalpadrumaH prAyaH kalpalatA tataH shritavatI tvAM vaijayantIChalAt || 45|| vishvAnandakadambasampadamatisnigdhaM tamAladyutiM dR^iShTvA nirbharavibhramaM ghana iti tvAM sa~NgatA vidyutaH | tvadrUpAmR^itasindhusa~NgamavashAtprApyAmbaraprachyavaM chA~nchalyAtkimu nandanandana bhavatpItAmbaratvaM dadhuH || 46|| kA~nchI te dhR^itayogasampadabhito jAtA vishAlAkR^iti\- ryAvantI madhurA dhvaniM vidadhatI pashchAdayodhyAbhavat | mAyAdvAravatI shivAdhivasatiH sA kAshikA dR^ishyate tachchitraM na vadAmi mAdhava yatastvAM sA sadA saMshritA || 47|| jAnImaH sahajAM tvada~NgamilitAmAlokya padmAlayAM tatsa~Ngasthitibha~NgakAtaratamau kalpadrumairAvatau | AdyaH pallavasampadaM karapade bimbAdhare chAparaH shuNDAdaNDaguNaM tavoruyugale yenAdadhe mAdhava || 48|| rambhAstambhayugaM na tadyadupari sthUlaM tathorudvayaM tUNIrau makaradhvajasya sumanomodena vidmo vayam | hA kaShTaM madhukaiTabhau sphuTamadau kiM kaiTabhAre haThA\- nniShpiShTau shatakoTikoTikaThinau tasminsthale komale || 49|| stambhadvaitamidaM payonidhisutAgehasya mandAkinI\- syandAmandamaranditA~Nghrikamaladvandvasya nAlAyugam | tvajja~NghAyugalaM vimuktikalashInirmANadaNDadvayaM sampattidvipasa~NghayantraNavidhAvAlAnayugmaM bhaje || 50|| vidvAn so.api kathaM kaThorakamaThIpR^iShThena tulyaM vada- nnIdR^ikpAdayugaM kathaM nu kamalAvakShojashaile dadhat | dhi~NmandAM vasudhAmidaM madhuripo gochAraNe sa~ncharat\- pAShANA~NkurakaNTakAdiShu haThAddR^iShTvA vidIrNA na yat || 51|| yadratnaughamarIchayo.api samatAvyAvartanaM vishvataH kR^itvA digvalayaM bhramanti mahitA nAdairmadhusyandibhiH | yachcha brahmashivendravanditapadadvandvopari dyotate tatkR^iShNasya padA~NgadadvayamataH kiM varNyatAM mAdR^ishaiH || 52|| shete yatkamalAlayA tava padAmbhojadvaye saMgatA dhAtA tatra tanUpadhAnyugalaM gulphachChalAnnirmame | kiM vA manmathakAruNA virachite tasyA mude kanduke sA yatkrIDati pANipa~Nkajatale kR^itvA sakhIbhiH saha || 53|| yA raktA dashalokapAlamukuTaprAntatviShaH santataM kalpakShmAruhapuShpasambhR^itaruchastvatpAdamUle babhuH | tA dIvyannakharA~nchitA~NgulitayA jAnanti satyaM janAH svasminneva sadAdhareNa dadhate lekhA yadUrdhvashriyam || 54|| pIyuShadyutibimbamambaratale vidyotamAnaM puraH prekShyotphulladR^ishA tvayA muhuridaM dehIti yadbhAShitam | tanmanye tava pa~NkajekShaNa mahachchitraM yashodArthanaM yattvatpAdasarojayornakhamaNivyAjena shItAMshavaH || 55|| satyaM yadvibudhA vadanti padayordvandvaM tavAmbhoruhe godhUlichChalataH sthitAni parito haMsAlichetAMsyalam | pItvaitanmakarandabindumasakR^idvR^indAvanIbhUpate ma~njIradvayama~njushi~njitamiShAda~nchanti yatpa~nchamam || 56|| AkR^ipyAkhilavastutaH prathamato rAgaM munIndraistataH kR^itvA mAnasapa~Nkaje tava padadvandvaM sa tasmindhR^itaiH | yenAsminnaravindalochana punastatkesarANAM dyuti\- stomenApi sama~nchitaH samudayatyuchchaistarAM shoNimA || 57|| haMsAstvAmupanIya mAnasasarojanmapradeshe.anishaM krIDantaH kamalAlayena bhavatA sArdhaM pramodaM dadhuH | sa tvaM lochanalohitAdharapadadyotaH shrito haMsatAM ## var ## lohitalochanA tatsamparkavashAditi vrajakulAla~NkAra sha~NkAmahe || 58|| kShudrAtmA nitarAM kimunnatataraH kAThinyavAnnirbhayaM kiM yA kevalakomalaH shrayati chetki~nchinmadIyaM padam | dhanyaH so.ayamitIva lokamakhilaM sambodhayanmAdhava tvaM dhatse padayoryavaM dhvajavaraM dambholimambhoruham || 59|| tvAM nityaM samupAsya dAsyavidhayA sthAsyAma ityAshayA brahmendrAdyamaraistvadIyapadayoH svIyA dhR^itAH sampadaH | tAsAma~NkushanIrajAshanilasachChatradhvajAdyAkR^itiM bibhrANA vijayashriyaM trijagatAM vandyAravindAlayA || 60|| tvatpAdAmbujasa~NgamAttrijagatAM vandyAravindAlayA sthAne sthAnaguNAdbhavanti hi janAH prAyaH padaM sampadAm | kiM tvekaM shatapatralochana mahachchitraM yadasmAdadhaH pAtA puNyatamA vimuktinagarIniHshreNikA svardhunI || 61|| yatpAdAmbu vidhAya mUrdhani chitAvAsaH shivatvaM haThA\- tprApto bhakShitakAlakUTanikaro mR^ityujayatvaM yayau | digvAsA nR^ikapAlamAtravibhavashchAvindadIshAnatAM sa tvaM nandasi yasya mandiragato nandAya tasmai namaH || 62|| dhUlIdhUsaritaM mukhaM tava sharatpUrNendunindAvahaM vyAlolAlakakuNDaladyuti chalannetrashriyA prollasat | yAlokyArdravilochanA smitamukhI prasyandamAnastanI pANibhyAmavalambya chumbitavatI tAM nandajAyAM bhaje || 63|| pItvA stanyaviShaM sahAsupavanaiH sampAtite pUtanA\- dehe vai bhavatA janArdana tR^iNAvarte cha nIte kShayam | rAhUnmuktasudhAmayUkhasuShamA yAdR^ikchakorAlibhi\- ryAbhistvadvadanadyutishchulukitA tA gopakanyAH stumaH || 64|| yadbandhasya vidhitsayApi vivashaH kInAshapAshairdR^iDhaM baddhaH sAnugaputrabAndhavajano duryodhano.antaM gataH | taM tvAM yena nibadhya nandadayitA vR^indArakairvanditA jAtA.a.anandamayI mukunda mahate bhAvAya tasmai namaH || 65|| nirbhinne yamalArjune.atichakitAstUrNaM gR^ihAnnirgatAH pItvA dR^ikchaShakaistvadakShatatanUrUpAmR^itaM nirvR^itAH | tvAmAdAya vidhAya netrasalilaiH siktaM tvarAmAshritA ye vR^indAvanamAgatAH kR^itadhiyastAngopavR^iddhAnstumaH || 66|| kR^itvA kAliyadandashUkadamanaM tvayyAsthite tANDavaM tasyottabdhasamastamastakamaNistome samuttasthuShi | yenAlambhi vibhAtabhAskarasuraprAgbhArashobhAsphura\- dratnAmbhojayugadyutiH pratipadaM tatte.a~NghriyugmaM bhaje || 67|| utphullaiH paripIya karNapuTakairvaMshIninAdAmR^itaM tachcha ghrANamudasya dattakavalaM prodbhinnaromA~Nkuram | niHspandairnayanairamandamadhuraiH shyAmaM mahastAvakaM yenodvIkShitamambujekShaNa bhaje tadgokadambaM tava || 68|| jammAreH sphuradAyudhasya bhavatA dambhAdrividrAvaNaM kR^itvA vAmabhujena saptadivasAnyo.asau dhR^itaH parvataH | so.astu snigdhatamAlasAraghaTitastambhaikasambhAvita\- prAsAdadyutinindakaH pratipadaM bhavyAya govardhanaH || 69|| tvadbAhUddhR^itaparvatArpitadR^ishaH prekShya priyAyAH skhala\- dvAsaHpInapayodharakShitidharau doHstambhakampe tava | shaile cha~nchalatAM gate vrajapate trAsAkule gokule nande mandamukhadyutau jayati te mandAkShamandekShaNam || 70|| paugaNDaM madakhaNDanaM balabhidaH kiM te hare stUyate kaumAraM charitaM yato vijayate vyAmohanaM brahmaNaH | kiM stavyaM tava yauvanaM tripurajidyadbANayuddhe jitaH sammohaM gamitAstvayA yadabalA bhAve.api netrashriyA || 71|| pIte dAvahutAshane nijajanatrANaikahetostvayA niHspandaM pashupaughapakShipashubhiH pepIyamAne tvayi | premArdrANyatinirmalAni diviShachchittAni satyaM muhu\- stvadgAtre nu vitIryamANakusumavyAjena bhAnti prabho || 72|| ka~NkellistabakaM muhuH kamalinIkAntaM pratIchIgataM paryAlochya vilokya dhUmapaTalaM godhUlibuddhyAkulAH | uchchaiH kokilakUjitaM cha muralInAdaM viditvA gR^ihA\- ttvAM yA vIkShitumAgatAH pathi gavAM gopA~NganAstAH stumaH || 73|| sAyAhne samuda~nchati shrutipathaM vaMshIninAde haThA\- nnepathyasya samApanena shapathairAlIjanaiH prArthite | pANibhyAmavalambya nIvirashanA nirgamya tUrNaM bahi\- rdR^igbhyAM te mukhasaurabhaM chulukitaM yAbhirbhaje tA janIH || 74|| yatrAghAsurakeshidhenukabakAriShTapralambAdayaH krodhAgnau bhavatA hutA ditisutAH santarpitA devatAH | yasmiMste padapa~NkajadvayarajaH padmodbhavaprArthitaM bhejurgomR^igapakShibhUruhalatA vR^indAvanaM tadbhaje || 75|| devendrasya parAbhavaM kimaparaM vyAmohanaM brahmaNaH sampashyannapi vaibhavaM vrajakulottaMsa prachetAstava | nandaM yatpitaraM jahAra bhavataH sthAne jalAtmanyadaH sthAne tAdR^ishi te babhUva na manAkkrodhasya lesho.api tat || 76|| ma~njIradvayaka~NkaNAvalilasatkA~nchIghaTAshi~njite vINAveNumR^ida~NgajharjharakarottAle dishashchumbati | kAmaM pUrNakalAnidhau vilasati bhrashyatpaTe svarvadhU\- vR^inde varShati daivate sumanaso rAsastavAstAM mude || 77|| nR^ityadbhrUnayanotpalasmitamukhasvidyatkapolasthalaM lIlAcha~nchalakuNDalaM bhujalatAndolakvaNatka~NkaNam | truTyatka~nchukabandhamunnatakuchaM tiryaktrikaM praskhala\- nnIvi vya~njitashi~njitaM jayati te rAsaH priyAbhiH saha || 78|| Aku~nchadvadanaM kvachidvilasitAmbhojAsyashomaM kvachi\- nmandasyandivilochalaM kvachidalaM dR^ikchApalaM kutrachit | kvApyuddAmamadAndhasindhuragataM kutrApi vidullatA\- chA~nchalyaM smaravardhanaM vijayate lAsyaM priyANAM tava || 79|| adhyAsyorutalaM vapuH pulakitaM svidyatkapolasthalIM dorvallImapi tAvakAMsamilitAM kampAkulAM bibhrati | prodyatpUrNakalAnidhAvaruchire smere muhuHsItkR^ite rAdhA dhanyatamA dadhAra vadane tAmbUlakalkaM tava || 80|| yasyAM tu~Ngatara~Ngasa~NgamavashAdbhItA bhuja~NgabhramA\- dAli~Ngati varA~NganAstava jalakrIDAjusho.a~NgaM haThAt | sA nityaM dalitendranIlanikarashrItaskarA bhAskara\- syApatyaM taTinI shivaM dishatu me gopAlabhUpAlaja || 81|| utphullAmbujamAkalayya dayitAsmerAnanaM vibhrama\- dbhR^i~NgashreNimana~Ngabha~NguradR^ishastasyAH kaTAkShachChaTAm | shaivAlaM parigR^ihya kuntaladhiyA drAkchumbanAyodyata\- stvaM yasyAM hasitaH priyAbhirabhitastAM bhAnukanyAM bhaje || 82|| puShpaM tvayyavachinvati priyatamAvR^indena sArdhaM mudA vR^indAraNyamahIruhasya nikare kampAkule nirbharam | tasminvarShati kautukena kusumAnyuchchaiH punardaivata\- stome.api vrajabhUpate vijayate taistaishchitaM te vapuH || 83|| kAntAkoTikalAkulasya bhavataH santoShya rAse smara\- kShINAM vIkShya nishAM nishAkarakarastome paraM mu~nchati | sAta~NkaM samupAgatasya sadanAdyAntaM shayAne jane kIrasyApi girA jayanti paritaH paryAkulA dR^iShTayaH || 84|| udyanneva bhavAniva vrajabhuvAM sarvApadAM saMhati\- dhvAntastomamanuttamaM tamanayatkAntaH sarojanmanAm | sollAsAni saroruhANi nayanAnIva tvadAlokane lokAnAM kila nandavaMshatilaka svApasya nAyaM kShaNaH || 85|| mitreNeha tamasvinIM vinihatAM nAtha tvayA pUtanAM vyAdhUtAmiva kairaveShvapi bhavadvidveShivaktradyutim | AshAM pashya purandarasya dayitAM raktAmbarAla~NkR^itAM sindUrAnvitakumbhamambaramaNerbimbaM vahantIM puraH || 86|| gItaj~nAH kavayo naTA bahukalAshikShAsu dakShAH pare viprendrAH kushapANayo.api bhavanadvAreShu santyutsukAH | talpaM mu~ncha dadasva lochanaphalaM tvaM dehabhAjAmiti prAtarvandigiro jayanti bhavataH sambodhane nityashaH || 87|| ##(##visheShakam##)## bhAnormaNDalamAvirasti purato nAdyApi nidrAhatiH kiM te tAta balAnujeti jananIvAgvIchimAchAmataH | ardhonmIlitapATalAkShiyugalaM paryastanIlAlakaM jR^imbhArambhavisheShashobhi vadanAmbhojaM bhajAmastava || 88|| mu~nchantaM shayanaM bhavantamabhitaH sa~NgamyagopA~NganA\- stailAbhya~njanama~njanAdi dadhatIH saMvIkShya devyashchiram | ujjhantyaH sumano.ambarANi sumanobhAvA varaM sa~NgatAH prAyo gopavadhUtvalabdhimanasaivAkAshasAmyaM dadhuH || 89|| ## var ## bhUyo prAtarbhojanamArachayya vipinaM prasthAtukAme tvayi prAyo gopavadhUlatAsu militaH kandarpadAvAnalaH | yadgodhUlimiShAdudeti parito dhUmAlirabhraMlihA tAsAmashrurasAH sravanti cha muhurdandahyamAne.antare || 90|| pa~nchAsye chaturAnane dashashatInetrAdipUrve gavA\- madhvanyadhvani lokapAlanivahe bhUmIluThanmUrdhani | tadvyAghrAjinabhUShaNAdibhiralaM traste samaste pashau gopAH kopavashAdgR^ihItalaguDA hIhIravAH syurmude || 91|| tigmAMshau tapati kvachijjalamuchAM stome jalaM mu~nchati premArdraH pratanoti yaH svavapuShA chitrAtapatraM tava | so.ayaM bhAskarakoTibhAsvaramahaHsambhArapATachcharaH pArIndro.asuradantinAM dishatu meM bhavyaM bhuja~NgAntakaH || 92|| madhyAhne yamunAtaTe viTapinAM mUle vayasyaiH samaM dadhyannAnyupabhujya rajyati punastatkrIDane cha tvayi | devendrastripurAntakaH kamalabhUranye cha nAkAlayAH kAkAkArajuSho muhuH kavalayantyuchChiShTamiShTaM tava || 93|| nidrANe tvayi shItale tarutale talpai dalaiH kalpite saMvIkShyAmbujapatramandamarutA saMvAhite pAdayoH | rudrabrahmamahendratarjanavidhau gopArbhakANAM kara\- vyAdhUtAni jayanti bha~NguradR^ishAM kAntishcha shoNAyitA || 94|| sphUrjantastapasA pulastyapulahAgastyAH sadurvAsasaH santyuchchairyashasaH pare.api sa paraM dhanyo munirnAradaH | yasya tvadguNagAnamagnamanaso vyApAdite keshini prAleyAdriviniHsR^itAmaradhunIdhArAyate.asrAvaliH || 95|| lakShmANi dhvajavajrapa~NkajayavachChatrordhvalekhAyutA\- nyAlakShmyAmburuhAkSha te charaNayoH kShoNItale.ahnAya yaH | dhyAyattyutpulakatyuda~nchati luThatyAkrandati prIyate ko.anyo dhanyatamastatastribhuvane syAdgAndinInandanAt || 96|| dhanyaM tasya janustathaiva pitarau dhanyaM tadIyaM kulaM dhanyA tena vasundharA kimadhikaM tenaiva dhanyaM jagat | yaH kaMsaikanideshavartyapi bhavatpAdAmbujAlokanA\- dakrUro.ashruniruddhakaNThakuharaH premAbdhimagno.ajani || 97|| paryAvR^ittya pashUnasheShasakhibhiH sAkaM tvayA svIkR^ite gopIlochanapa~NkajAlinichite sAyaM gavAmadhvani | jIyAsurdayitAnaneShu nitarAM sAkUtanR^ityAkulAH kAlindIsadR^ishAH smitena surasAstvachchakShuShoH kAntayaH || 98|| yo vAcho manaso.api naiva viShayastvaM tvAM vidhAyAtmajaM yAbhya~NgasnapanAshanaprabhR^itibhiH saMlAlayatyanvaham | no dAnena na chejyayA na tapasA no sA~NkhyayogAdibhi\- ryallabhyaM tadavApa gopadayitA sA.a.astAM yashodA mude || 99|| pUrNe dAnapatermanorathashataiH sArdhaM pralambAriNA talpe ninditadugdhasindhusuShamAsAre tvayA svIkR^ite | sandaShToShThamudashru marditakaraM tachcheShTitaM shR^iNvataH kaMsadhvaMsamabhIpsato jayati te bhrAtA samaM mantraNA || 100|| yA saMvyApya suvarNabhUdharapadaM jAtA girIshArchitA svachChA haMsakavipriyA kamalamudgAmbhIryamabhya~nchati | yeyaM kR^iShNapadAbjabhaktivasudhApAtAlamAlambitA sA tApaM mama sarvataH prashamayatvAnandamandAkinI || 101|| ye pANDityakavitvasUnudharaNIdharmArthakAmANimA\- dIshitvendrapadAptimokShamathavA vA~nChanti bhaktiM harau | sambhUtAM madhusUdanaprapadataH santo bhajantvAdarA\- tte saMsAradavAgnitApashamanImAnandamandAkinIm || 102|| iti shrImannandanandanapadadvandvasamuda~nchannakhachandrachandrikAchaya\- dattachittachakorashrImadhusUdanasarasvatIvirachitAnandamandAkinI sampUrNA || ## Encoded and proofread by Sunder Hattangadi Proofread by PSA Easwaran \medskip\hrule\obeylines Please send corrections to sanskrit@cheerful.com Last updated \today https://sanskritdocuments.org \end{document}