% Text title            : Kumarasambhavam
% File name             : kumArasambhavam.itx
% Category              : major\_works, kAlidAsa
% Location              : doc\_z\_misc\_major\_works
% Transliterated by     : Vishvas Vasuki
% Proofread by          : Vishvas Vasuki
% Latest update         : November 26, 2024
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Kumarasambhavam ..}##
\itxtitle{.. kumArasambhavam ..}##\endtitles ##
\section{viShayAnukramaNikA}
prathamasarge (1\-60 shlokA~NkA)
girirAja himAlayasyaishvaryavarNanam | tasya menayA saha pANigrahaNam | mainAkajanmavarNanam | pitR^ikR^itaharAnAdarakaraNAt yogena sharIratyAgottara satIdevyA himAlayagR^ihe janmamavarNanam | tasyA nAmakaraNam | tasyA sharIrashobhAvarNanam | maharShernAradasya himavadgR^ihe samAgamanam | nAradakartR^ikashivapArvatIvivAhAbhidhAnam | patnIviyuktasya harasya girirAjashikharapradeshe tapashcharyAvarNanam | tasya pArvatIkartR^ika paricharaNam |

dvitIyasarge (1\-64)
tArakAsuravadhAya tatpIDitendrAdidevakartR^ikabrahmastuti | surakartR^ikastutiprasannIbhUtena brahmaNA kArtike tArakavinAshakatvAropaNam | haragauryo sayogAya kartavyanishchaya | mahAdevasya samAdhibha~NgAya surendrakartR^ikasmarasmaraNam | smarAgamana~ncha |

tR^itIyasarge (1\-76)
indrAdeshapAlanArtha smarasya pratij~nAkaraNam | vasantaratibhyA saha smarasya shivAshramapravesha | R^iturAjasamAgamanena shivAshramadashAvarNanam | shive smarakartR^ikakusumAyudhanikShepaH | shivalalATAkShisamudbhUtAgninA smaradAhashcha |

chaturthasarge (1\-46)
smaravinAshamIkShamANAyA ratervilApavarNanam | AkAshavANIdvArA ratisamAshvAsanam | smara hetUktiH | smarasya punara~NgaprAptinirNaya |

pa~nchamasarge (1\-66)
smaravinAshena haraprAptiviShayakAshAyA hatatvAt pArvatIviShAdavarNanam | tapashcharyAtyAgAya pArvatIM prati menakAkartR^ikopadeshaH | himavadantike sakhImukhena pArvatImanorathAbhidhAnam | tapastaptu sakhyA saha pArvatyAH gaurIshikharaprayANam | pArvatyAstAtkAlikasvarUpavarNanam | pArvatItapasA prasannIbhUtasya brahmachArIsvarUpasya shivasya tatrAgamanam | brahmachArIkartR^ikaharanindAto gauryAstapaso nivR^ityudyogaH | pArvatIkartR^ikashivaprashaMsAvarNanam | haraviShaye svAbhiprAyaprakAsha | pArvatyagre shivasya nijasvarUpadhAraNam |

ShaShThasarge (1\-65)
pArvatyA sahepsita vivAhAbhyarthanA sUchayituM himavadantike shivakartR^ikaM saptarShiprasthApanam | vivAhanirNayaH | dinanirNayakaraNam | shiva prati vivAhodantamabhidhAya saptarShINAmAtmaviShaya (desha)prasthAnam |

saptamasarge (1\-65)
shivapArvatyorvivAhakAlikanepathyAdividhAnam | girirAjagR^ihe varayAtrikAnA devatAdInAmupasthiti | vivAha | smarasya punarjIvanam | shivapArvatyoM kautukAgArapraveshashcha | vivAhottara gauryA smarAvasthAprApti | tayo sukhamayatvavarNanam |

aShTamasarge (1\-61)
shivamuktayauvanA gaurI vIkShya menAyA AnandaprApti vasthAprAptivarNanam | tatastasyA pragalbhAvasthAprApti | mugdhAvasthApannagauryA madhyamAsambhogavarNanam | gauryA saha harasya himavadgR^ihAt prasthAnavarNanam | kailAsAgamanam | jalakrIDAvarNanam |

navamasarge (1\-52)
indraprahitasya kapotasvarUpasyAgne shivasambhogAlayapravesha | kapotAvalokanena harasya krodhaprApti | kruddha hara prati surendrasandeshakathanam | agnikartR^ikanijAparAdhakShamApanam | kumArodbhavAya hareNa vahanau nijavIryasthApanam | shivavIryaprabhAveNa vahnervairUpyaprApti | vahanerindrAntike gamanam | hareNa pArvatIvinodanam | harakartR^ikapArvatInepathyarachanA | harAlaye teShA harakartR^ikaprasthApanam | harasya gauryA saha vihAra |

dashamasarge (1\-60)
indrAntikeM prApta virUpa vahina vilokya tasya kShobha | vahina prati vairUpyaprAptihetujij~nAsA vahinakartR^ikAtmarUpyaprAptihetukathanam | haratejodagdhAtmasharIratrANAya vahinakartR^ikaprArthanA | indrakartR^ikavahinasamAshvAsanam | ga~NgAyA harateja prakShepaNAyopadeshashcha | vahninA ga~NgAyA harateja prakShepaNam | haratejo.asahamAnAyA bhAgIrathyA baTkR^ittikAnA snAtumAgamanavarNanam | haratejasashcha tAsA sharIre samparka tena tAsA garbhadhAraNam | tadAdAya gR^iha gantu trapAvatIbhistAbhi sharavaNe garbhasrAva | tata kumArajanmavarNanam |

ekAdashasarge (1\-50)
indrAdiprArthanottara bhAgIrathyA kumArasya dugdhapAnAyA~NgIkAra | kadAchidAgachChatInA ShaTkR^ittikAnA kumArAvalokanena vivAda | vihArAya namasA gachChatorharagauryoratantrAgamanam | kumArAvalokanena tayoranupAta | pArvatyA kumArajanmaprashna shivenottarakathanam | kumAramAdAya shivapArvatyorgamanam | kumArajanmotsavArambha | tena samastajagatAmAnandaprApti | kumAralIlAkrIDAvarNanam |

dvAdashasarge (1\-60)
tArakapIDitasyendrasya harAlayAgamanam | indrasya kailAsAchalashobhA prekShaNam | tato mahendrasya haradarshanAdAnandaprApti | harAntike sthita dhR^itAyudha kumAraM vIkShyendrasya jayAshAbandhanam | indreNa tArakAsuropadravanivedanam | tadAkarNya hareNotsAhavarddhanam | indrakartR^ikatArakadushcheShTAkathanam | punastArakavadhAya kumAragamanaprArthanA kumAragamanAdeshaH | kumArakartR^ikapitrAj~nAsvIkAra parAkramiNo bAlasya vilokanena girijAyA harShaprAptiH varNanam |

trayodashasarge (1\-51)
kArtikeyayAchanArthamindrAdInA harasamIpagamanam | teShA hara prati kumAra yAchanAvarNanam | kumAraprasthAnAya haragauryorAdesha | indrAdInA kumArAnugamanam | teShA harasUnunA saha svargaprApti svargapraveshe bhItAn surAn prati kumArasyAbhayadavAkyam | gandharvAdikartR^ikakumAraprashaMsA | kumAra prati nAradAdInAM sAdhuvAdakathanam | ga~NgAbalokanam | nandanavanAvalokana~ncha | gatashobhasya tasyAvalokanena kumArasya krodhaprApti | amarAvatIprekShaNam | virUpAM tA nirIkShya kumArasya kAruNyaprApti tarayendreNa saha jayanta saudhagamanam | kashyapasya tatpalyAshcha kumArakartR^ikAbhivAdanam | ubhayakartR^ikAshIrvAdashasanam | kumArakartR^ikashachIpraNAma | tasyA AshIrvAdana kumArasamupAcharaNam |

chaturdashasarge (1\-51)
tArakavadhAyendrAdidvArA kumArasya sajjIbhavanam | yodadhu jigamiSho kumArasya vijitvaranAmarathArohaNam | indrAdInA kumArAnuprayANam | surasainyavarNana~ncha |

pa~nchadashasarge (1\-53)
kumAreNa sahendrAdInA yuddhAya tArakAsurAbhimukhamAgamanavarNanam | kumArAgamanamAkarNya suradviShA kShobhaprApti | charairindrAgamane nivedite tArakasya kAkUkti | tasya sainyasanahanArthamAdeshashcha | tArakasainyasannAhavarNanam | yodadhu gachChatastArakasyaikAdashItpAtaprAptivarNanam | sainyAnA tArakAnugamanam | gachChatA tArakasainyAnA vividhotpAtaprAptivarNanam | pa~nchamahotpAtavarNanam | utpAteShu satsvapyanivR^itta tAraka pratyAkAshavANI | AkAshavANImAkarNya divamuddishya tArakokti | kruddhasya khaDgapArNastasya shakrAntike rathopasthApanArthamAdeshashcha |

ShoDashasarge (1\-51)
surAsurasainyayorghorayuddhavarNanam |

saptadashasarge (1\-55)
tArakaprakShiptasharANAmindrasharaishChedanam | surabANAnA tArakabANaishChedana~ncha | tatastArakaprahitanAgapAshairbaddhAnAmindrAdInA kumArAntikAgamanam | kumAraprekShaNena devAnA nAgapAshAdvimukti | tArakAsurasya kumAra pratyuktiH | kumArasya tArakAsurasya pratikathanam | tatastArakAsurakumArayoH parasparaM bANaprahAra | tArakAsurakartR^ikamAyAyuddham | tato.anyo.anya vAyavyAdyastraprayoga | tatastArakavadha | devAnAmAnandaprApti | indrasya svargAdhipatyaprAptishcha |

\section{sargaH 1 \- umotpattiH}
astyuttarasyAM dishi devatAtmA himAlayo nAma nagAdhirAjaH |
purvAparau toyanidhI vagAhya sthitaH pR^ithivyA iva mAnadaNDaH || 1\.1||
yaM sarvashailAH parikalpya vatsaM merau sthite daugdhari dohadakShe |
bhAsvanti ratnAni mahaiShadhIshcha pR^ithUpadiShTAM duduhurdharitrIm || 1\.2||
anantaratnaprabhavasya yasya himaM na saubhAgyavilopi jAtam |
eko hi doSho guNasannipAte nimajjatIndoH kiraNeShvivA~NkaH || 1\.3||
yashchApsarovibhramamaNDanAnAM sampAdayitrIM shIkharaibibharti |
lAhakachChedavibhaktarAgAmakAlasandhyAmiva dhAtumattAm || 1\.4||
AmekhalaM sa~ncharatAM ghanAnAM ChAyAmadhaH sAnugatAM niShevya |
udvejitA vR^iShTibhirAshrayante shrR^i~NgANi yasyAtapavanti siddhAH || 1\.5||
padaM tuShArastrutidhaitaraktaM yasminnadR^iShTvApi hatadvipAnAm |
vidanti mArgaM nakharandhramuktairmuktAphalaiH kesariNAM kirAtAH || 1\.6||
nyastAkSharA dhAturasena yatra bhUrjatvachaH ku~njarabindushoNAH |
vrajanti vidyAdharasundarINAmUna~Ngalekhakriyayopayogam || 1\.7||
yaH pUrayankIchakarandhrabhAgAndarImukhotthena samIraNena |
udgAsyatAmichChati kinnarANAM tAnapradAyitvamivopagantum || 1\.8||
kapolakaNDUH karibhirvinetuM vighaTTitAnAM saraladrumANAm |
yatra snutakShIratayA prasUtaH sAnuni gandhaH surabhIkaroti || 1\.9||
vanecharANAM vanitAsakhAnAM darIgR^ihotsa~NganiShaktabhAsaH |
bhavanti yatrauShadhayo rajanyAmatailapUrAH suratapradIpAH || 1\.10||
udvejayatya~NgalipArShNibhAgAnmArge shilIbhUtahime.api yatra |
na durvahashroNipayodharArtA bhindanti mandAM gatimashvamukhyaH || 1\.11||
divAkarAdrakShati yo guhAsu lInaM divAbhItamivAndhakAram |
kShudre.api nUnaM sharaNaM prapanne mamatvamuchchaiHshirasAM satIva || 1\.12||
lA~NgUlavikShepavisarpishobhiritastatashchandra marIchigauraiH |
yasyArthayuktaM girirAjashabdaM kurvanti vAlavyajanaishchamaryaH || 1\.13||
yatrAMshukAkShepavilajjitAnAM yadR^ichChayA kimpuruShA~NganAnAm |
darIgR^ihadvAra vilambimbImbAstiraskariNyo jaladA bhavanti || 1\.14||
bhAgIrathInirjharasikarANAM voDhA muhamaH kampitadevadAruH |
yadvAyuranviShTamR^igaiH kirAtairAsevyate bhinnashishaNDibarhaH || 1\.15||
saptarShihastAvachitA vasheShANyadho vivasvAnparivartamAnaH |
padmAni yasyAgrasaroruhANi prabaudhayatyUrdhvamukhairmayUkhaiH || 1\.16||
yaj~nA~NgayonitvamavekShya yasya sAraM dharitrIdharaNakShamaM cha |
prajApatiH kalpitayaj~nabhAgaM shailAdhipatyaM svayamanvatiShThat || 1\.17||
sa mAnasIM meru\-sakhaH pitR^INAM kanyAM kulasya sthitaye sthitij~naH |
menAM munInAM api mAnanIyAM AtmAnurupAM vidhinopayeme || 1\.18||
sa mAnasiM merusakhaH pitR^INAM kanyAM kulasya sthitaye sthitij~naH |
menAM munInAmapi mAnanIyAmAtmAnurupAM vidhinopayeme || 1\.18||
kAlakrameNAtha tayoH pravR^itte svarupayogye surataprasa~Nge |
manoramaM yauvanamudvahantyA garbhe.avadbhUdhararAjapatnyAH || 1\.19||
asUta sA nAgavadhUpabhogyaM mainAkamambhonidhibaddhasakhyam |
kruddhe.api pakShachChidi vR^itrashatrAvavedanAj~naM kulishakShatAnAm || 1\.20||
athAvamAnena pituH prayuktA dakShasya kanyA bhavapUrvapatnI |
satI satI yogavisR^iShTadehA tAM janmane shailavadhUM prapede || 1\.21||
sA bhUdharANAmadhipena tasyAM samAdhimatyAmudapAdi bhavyA |
samyakprayogAdaparikShatAyAM nItAvivotsAhaguNena sampat || 1\.22||
prasannadikpAMsuviviktavAtaM sha~NkhasvanAnantarapuShpavR^iShTi |
sharIriNAM sthAvaraja~NgamAnAM sukhAya tajjanmadinaM babhuva || 1\.23||
tayA duhitrA sutarAM savitrI sphuratprabhAmaNDalayA chakAse |
vidUrabhUmirnavameghashabdA dudbhinnayA ratnashalAkayaiva || 1\.24||
dine dine sA parivardhamAnA labdhodayA chAndramasIva lekha |
pupoSha lAvaNyamayAnvisheShA~njayotsnAntarANIva kalAntarANi || 1\.25||
tAM pArvatItyAbhijanena nAmnA bandhupriyAM bandhajano jahAva |
umeti mAtrA tapaso niShiddhA pashchAdumAkhyAM sumukho jagAma || 1\.26||
mahIbhR^itaH putravato.api dR^iShTistasminnapatye na jagAma tR^iptim |
anantapuShpasya madhorhi chUte dvirephamAlA savisheShasa~NgA || 1\.27||
prabhAmahatyA shikhayeva dIpastrimArgayeva tridivasya mArgaH |
saMskAravatyeva girA manIShI tayA sa pUtashcha vibhUShitashcha || 1\.28||
mandAkinIsaikatavedikAbhiH sA kandukaiH kR^itrimaputrakaishcha |
reme muhirmadhyagatA sakhInAM krIDArasaM nirvishatIva bAlye || 1\.29||
tAM haMsamAlAH sharadIva ga~NgAM mahauShadhiM naktamivAtmabhAsaH |
sthiropadeshAmupadeshakAle prapedire prAktanajanmavidyAH || 1\.30||
asambhR^itaM maNDanama~NgayaShTeranAsavAkhyaM karaNaM madasya |
kAmasya puShpavyatiriktamastraM bAlyAtparaM sAtha vayaH prapede || 1\.31||
unmIlitaM tUlikayeva chitraM sUryAMshubhirbhinnamivAravindam |
babhUva tasyashchaturastrashobhi vapurvibhaktaM navayauvanena || 1\.32||
abhyunnatA~NguShThanakhaprabhAbhirnikShepaNAdrAgamivodgirantau |
AjahrR^itustachcharaNau pR^ithivyAM sthalAravindashriyamavyavasthAm || 1\.33||
sA rAjahaMsairiva sannatA~NgI gateShu lIlA~nchitavikrameShu |
vyanIyata pratyupadeshalubdhai rAditsubhirnUpurasi~njitAni || 1\.34||
vR^ittAnupUrve na cha chAtidIrdhe ja~Nghe shubhe sR^iShTavatastadIye |
sheShA~NganirmANavidhau vidhAturlAvaNya utpAdya ivAsa yatnaH || 1\.35||
nAgendrahastAstvachi karkashatvAdekAntashaityAtkadalIvisheShAH |
labdhvApi loke pariNAhi rUpaM jAtAstadUrverupamAnabAhyAH || 1\.36||
etAvatA nanvanumeyashobhi kA~nchIguNasthAnamaninditAyAH |
AropitaM yad girishena pashchAdananyanArIkamanIyama~Nkam || 1\.37||
tasyAH praviShTA natanAbhirandhraM rarAja tanvI navalomarAjiH |
nIvImatikramya sitetarasya tanmekhalAmadhyamaNerivArchiH || 1\.38||
madhyena sA vedivilagnamadhyA valitrayaM chAru babhAra bAlA |
ArohaNArthaM navayauvanena kAmasya sopAnamiva prayuktam || 1\.39||
anyonyamutpIDayadutpalAkShyAH stanadvayaM pANDu tathA pravR^iddham |
madhyaM yathA shyAmamukhasya tasya mR^iNAlasUtrAntaramapyalabhyam || 1\.40||
loke sukumAratvameva kusumAstrasya sAdhakatvamiti sthite satyAha \-
shirIShapuShpAdhikasaukumAryau bAhU tadIyAviti me vitarkaH |
parAjitenApi kR^itau harasya yau kaNThapAshau makaradhvajena || 1\.41||
kaNThasya tasyAH stanabandhurasya muktAkalApasya cha nistalasya |
anyonyashobhAjananAdvabhUva sAdhAraNo bhUShaNabhUShyabhAvaH || 1\.42||
chandraM gatA padmaguNAnna bhu~Nkte padmAshritA chAndramasImabhikhyAm |
umAmukhaM tu pratipadya lolA dvisaMshrayAM prItimavApa lakShmIH || 1\.43||
puShpaM pravAlopahitaM yadi syAnmuktAphalaM vA sphuTavidrumastham |
tato.anukuryAdvishadasya tasyA stAmrauShThaparyastaruchaH smitasya || 1\.44||
svareNa tasyAmamR^itasruteva prajalpitAyAmabhijAtavAchi |
apyanyapuShTA pratikUlashabdA shroturvitantrIriva tADyamAnA || 1\.45||
pravAtanIlotpalanirvisheShamadhIraviprekShitamAyatAkShyA |
tayA gR^ihitaM nu mR^igA~NganAbhyastato gR^ihItaM nu mR^igA~NganAbhiH ? || 1\.46||
tasyAH shalAkA~njananirmiteva kAntirbhruvorAyatalekhayoryA |
tAM vIkShya lilAchaturAmana~NgaH svachApasaundaryamadaM mumocha || 1\.47||
lajjA tirashchAM yadi chetasi syAdasaMshayaM parvatarAjaputryAH |
taM keshapAshaM prasamIkShya kuryurbAlapriyatvaM shithilaM chamaryaH || 1\.48||
sarvopamAdravyasamuchchayena yathApradeshaM viniveshitena |
sA nirmitA vishvasR^ijA prayatnAdekasthasaundaryadidR^ikShayeva || 1\.49||
tAM nAradaH kAmacharaH kadAchitkanyAM kila prekShya pituH samIpe |
samAdideshaikavadhUM bhavitrIM premNA sharIrArdhaharAM harasya || 1\.50||
guruH pragal\-bhe.api vayasyato.asyAstasthau nivR^ittAnyavarAbhilAShaH |
R^ite kR^ishAnorna hi mantrapUtamarhanti tejAMsyaparANi havyam || 1\.51||
ayAchitAraM na hi devadevamadriH sutAM grAhayituM shashAka |
abhyarthanAbha~Ngabhayena sAdhurmAdhyasthyamiShTe.apyavalambate.arthe || 1\.52||
yadaiva pUrve janane sharIraM sA dakSharoShAt sudatI sasarja |
tadAprabhR^ityeva vimuktasa~NgaH patiH pashUnAmaparigraho.abhUt || 1\.53||
sa kR^ittivAsAstapase yatAtmA ga~NgApravAhokShitadevadAru |
prasthaM himAdrermR^iganAbhigandhi ki~nchit kvaNatkinnaramadhyuvAsa || 1\.54||
gaNA nameruprasavAvataMsA bhUrjatvachaH sparshavatIrdadhAnAH |
manaHshilAvichChuritA niSheduH shaileyanaddheShu shilAtaleShu || 1\.55||
tuShArasa~NghAtashilAH khurAgraiH samullikhandarpakalaH kakudmAn |
dR^iShTaH katha~nchidgavayairvivignairasoDhasiMhadhvanirunnanAda || 1\.56||
tatrAgnimAdhAya samitsamiddhaM svameva mUrtyantaramaShTamUrtiH |
svayaM vidhAtA tapasaH phalAnAM kenApi kAmena tapashchachAra || 1\.57||
anarghyamarghyeNa tamadrinAthaH svargaukasAmarchitamarchayitvA |
ArAdhanAyasya sakhIsametAM samAdidesha prayatAM tanUjAm || 1\.58||
pratyarthi\-bhUtAM api tAM samAdheH
shushrUShamANAM girisho.anumene |
vikAra\-hetau sati vikriyante
yeShAM na chetAMsi ta eva dhIrAH || 1\.59||
avachitabalipuShpA vedisammArgadakShA
niyamavidhijalAnAM barhiShAM chopanetrI |
girishamupachachAra pratyahaM sA sukeshI
niyamitaparikhedA tachChirashchandrapAdaiH || 1\.60||

iti shrIkAlidAsakR^itau kumArasambhave mahAkAvye
umotpattirnAma prathamaH sargaH sampUrNaH || 1||
\section{sargaH 2 brahmasAkShAtkAraH}
tasminviprakR^itAH kAle tArakeNa divaukasaH |
turAsAhaM purodhAya dhAma svAyambhuvaM yayuH || 2\.1||
teShAmAvirabhUdbrahmA parimlAnamukhashriyAm |
sarasAM suptapadmAnAM prAtardIdhitimAniva || 2\.2||
atha sarvasya dhAtAraM te sarve sarvatomukham |
vAgIshaM vAgbhirarthyAbhiH praNipatyopatasthire || 2\.3||
namastrimUrtaye tubhyaM prAksR^iShTeH kevalAtmane |
guNatrayavibhAgAya pashchAdbhedamupeyuShe || 2\.4||
yadamoghamapAmantaruptaM bIjamaja tvayA |
atashcharAcharaM vishvaM prabhavastasya gIyase || 2\.5||
tisR^ibhistvamavasthAbhirmahimAnamudIrayan |
pralayasthitisargANAmekaH kAraNatAM gataH || 2\.6||
strIpuMsAvAtmabhAgau te bhinnamUrteH sisR^ikShayA |
prasUtibhAjaH sargasya tAveva pitarau smR^itau || 2\.7||
svakAlaparimANena vyastarAtrindivasya te |
yau tu svapnAvabodhau tau bhUtAnAM pralayodayau || 2\.8||
jagadyonirayonistvaM jagadanto nirantakaH |
jagadAdiranAdistvaM jagadIsho nirIshvaraH || 2\.9||
AtmAnamAtmanA vetsi sR^ijasyAtmAnamAtmanA |
AtmanA kR^itinA cha tvamAtmanyeva pralIyase || 2\.10||
dravaH sa~NghAtakaThinaH, sthUlaH sUkShmo laghurguruH |
vyakto vyaktetarashchAsi prAkAmyaM te vibhUtiShu || 2\.11||
udghAtaH praNavo yAsAM nyAyaistribhirudIraNam |
karma yaj~naH phalaM svargastAsAM tvaM prabhavo girAm || 2\.12||
tvAmAmananti prakR^itiM puruShArthapravartinIm |
taddarshinamudAsInaM tvAmeva puruShaM viduH || 2\.13||
tvaM pitR^INAmapi pitA, devAnAmapi devatA |
parato.api parashchAsi, vidhAtA vedhasAmapi || 2\.14||
tvameva havyaM hotA cha, bhojyaM bhoktA cha shAshvataH |
vedyaM cha veditA chAsi, dhyAtA dhyeyaM cha yatparam || 2\.15||
iti tebhyaH stutIH shrutvA yathArthA hR^idaya~NgamAH |
prasAdAbhimukho vedhAH pratyuvAcha divaukasaH || 2\.16||
purANasya kavestasya chaturmukhasamIritA |
pravR^ittirAsIchChabdAnAM charitArthA chatuShTayI || 2\.17||
svAgataM svAnadhIkArAnprabhAvairavalambya vaH |
yugapadyugabAhubhyaH prAptebhyaH prAjyavikramAH || 2\.18||
kimidaM dyutimAtmIyAM na bibhrati yathA purA |
himakliShTaprakAshAni jyotIMShIva mukhAni vaH || 2\.19||
prashamAdarchiShAmetadanudgIrNasurAyudham |
vR^itrasya hantuH kulishaM kuNThitAshrIva lakShyate || 2\.20||
kiM chAyamaridurvAraH pANau pAshaH prachetasaH |
mantreNa hatavIryasya phaNino dainyamAshritaH || 2\.21||
kuberasya manaHshalyaM shaMsatIva parAbhavam |
apaviddhagado bAhurbhagnashAkha iva drumaH || 2\.22||
yamo.api vilikhanbhUmiM daNDenAstamitatviShA |
kurute.asminnamoghe.api nirvANAlAtalAghavam || 2\.23||
amI cha kathamAdityAH pratApakShatishItalAH |
chitranyastA iva gatAH prakAmAlokanIyatAm || 2\.24||
paryAkulatvAnmarutAM vegabha~Ngo.anumIyate |
ambhasAmoghasaMrodhaH pratIpagamanAdiva || 2\.25||
AvarjitajaTAmaulivilambishashikoTayaH |
rudrANAmapi murdhAnaH kShatahu~NkArashaMsinaH || 2\.26||
labdhapratiShThAH prathamaM yUyaM kiM balavattaraiH |
apavAdairivotsargAH kR^itavyAvR^ittayaH paraiH || 2\.27||
tadbrUta vatsAH kimitaH prArthayadhve samAgatAH |
mayi sR^iShTirhi lokAnAM rakShA yuShmAsvavasthitA || 2\.28||
tato mandAniloddhUtakamalAkarashobhinA |
guruM netrasahasreNa nodayAmAsa vAsavaH || 2\.29||
sa dvinetro hareshchakShuH sahasranayanAdhikam |
vAchaspatiruvAchedaM prA~njalirjalajAsanam || 2\.30||
evaM yadAttha bhagavannAmR^iShTaM naH paraiH padam |
pratyekaM viniyuktAtmA kathaM na j~nAsyasi prabho || 2\.31||
bhavallabdhavarodIrNastArakAkhyo mahAsuraH |
upaplavAya lokAnAM dhUmaketurivotthitaH || 2\.32||
pure tAvantamevAsya tanoti ravirAtapam |
dIrghikAkamalonmeSho yAvanmAtreNa sAdhyate || 2\.33||
sarvAbhiH sarvadA chandrastaM kalAbhirniShevate |
nAdatte kevalAM lekhAM harachUDAmaNIkR^itAm || 2\.34||
vyAvR^ittagatirudyAne kusumasteyasAdhvasAt |
na vAti vAyustatpArshve tAlavR^intAnilAdhikam || 2\.35||
paryAyasevAmutsR^ijya puShpasambhAratatparAH |
udyAnapAlasAmAnyamR^itavastamupAsate || 2\.36||
tasyopAyanayogyAni ratnAni saritAM patiH |
kathamapyambhasAmantarA niShpatteH pratIkShate || 2\.37||
jvalanmaNishikhAshchainaM vAsukipramukhA nishi |
sthirapradIpatAmetya bhuja~NgAH paryupAsate || 2\.38||
tatkR^itAnugrahApekShI taM muhurdUtahAritaiH |
anukUlayatIndro.api kalpadrumavibhUShaNaiH || 2\.39||
itthamArAdhyamAno.api klishnAti bhuvanatrayam |
shAmyetpratyapakAreNa nopakAreNa durjanaH || 2\.40||
tenAmaravadhUhastaiH sadayAlUnapallavAH |
abhij~nAshChedapAtAnAM kriyante nandanadrumAH || 2\.41||
vIjyate sa hi saMsuptaH shvAsasAdhAraNAnilaiH |
chAmaraiH suravandInAM vAShpasIkaravarShibhiH || 2\.42||
utpATya merushrR^i~NgANi kShuNNAni haritAM khuraiH |
AkrIDaparvatAstena kalpitAH sveShu veshmasu || 2\.43||
mandAkinyAH payaHsheShaM digvAraNamadAvilam |
hemAmbhoruhasasyAnAM tadvApyo dhAM sAmpratam || 2\.44||
bhuvanAlokanaprItiH svargibhirnAnubhUyate |
khilIbhUte vimAnAnAM tadApAtabhayAtpathi || 2\.45||
yajvabhiH sambhR^itaM havyaM vitateShvadhvareShu saH |
jAtavedomukhAnmAyI miShatAmAchChinatti naH || 2\.46||
uchchairuchchaiHshravAstena hayaratnamahAri cha |
dehabaddhamivendrasya chirakAlArjitaM yashaH || 2\.47||
tasminnupAyAH sarve naH krUre pratihatakriyAH |
vIryavantyauShadhAnIva vikAre sAnnipAtike || 2\.48||
jayAshA yatra chAsmAkaM pratighAtotthitArchiShA |
harichakreNa tenAsya kaNThe niShkamivArpitam || 2\.49||
tadIyAstoyadeShvadya puShkarAvartakAdiShu |
abhyasyanti taTAghAtaM nirjitairAvatA gajAH || 2\.50||
tadichChAmo vibho ! sR^iShTaM senAnyaM tasya shAntaye |
karmabandhachChidaM dharmaM bhavasyeva mumukShavaH || 2\.51||
gotpAraM surasainyAnAM yaM puraskR^itya gotrabhit |
pratyAneShyati shatrubhyo vandImiva jayashriyam || 2\.52||
vachasyavasite tasminsasarja giramAtmabhUH |
garjitAnantarAM vR^iShTiM saubhAgyena jigAya sA || 2\.53||
sampatsyate vaH kAmo.ayaM kAlaH kashchitpratIkShyatAm |
na tvasya siddhau yAsyAmi sargavyApAramAtmanA || 2\.54||
itaH sa daityaH prAptashrIrneta evArhati kShayam |
viShavR^ikSho.api saMvardhya svayaM ChettumasAmpratam || 2\.55||
vR^itaM tenedameva prA~NmayA chAsmai pratishrutam |
vareNa shamitaM lokAnalaM dagdhuM hi tattapaH || 2\.56||
saMyuge sAMyugInaM tamudyataM prasaheta kaH |
aMshAdR^ite niShiktasya nIlalohitaretasaH || 2\.57||
sa hi devaH paraM jyotistamaHpAre vyavasthitam |
parichChinnaprabhAvarddhirna mayA na cha viShNunA || 2\.58||
umArUpeNa te yUyaM saMyamastimitaM manaH |
shambhoryatadhvamAkraShTumayaskAntena lohavat || 2\.59||
ubhe eva kShame voDhumubhayorbIjamAhitam |
sA vA shambhostadIyA vA mUrtirjalamayI mama || 2\.60||
tasyAtmA shitikaNThasya sainApatyamupetya vaH |
mokShyate suravandInAM veNIrvIryavibhUtibhiH || 2\.61||
iti vyAhR^itya vibudhAn vishvayonistirodadhe |
manasyAhita\-kartavyAste.api devA divaM yayuH || 2\.62||
tatra nishchitya kandarpamagamatpAkashAsanaH |
manasA kAryasaMsiddhau tvarAdviguNaraMhasA || 2\.63||
atha sa lalitayoShidbhrUlatAchArushrR^i~NgaM
rativalayapadA~Nke chApamAsajya kaNThe |
sahacharamadhuhastanyastachUtA~NkurAstraH
shatamakhamupatasthe prA~njaliH puShpadhanvA || 2\.64||

iti shrIkAlidAsakR^itau kumArasambhave mahAkAvye
brahmasAkShAtkAro nAma dvitIyaH sargaH sampUrNaH || 2||
\section{sargaH 3 \- madanadahanaH}
tasminmaghonastridashAnvihAya sahasramakShNAM yugapatpapAta |
prayojanA.apekShitayA prabhUNAM prAyashchalaM gauravamAshriteShu || 3\.1||
sa vAsavenAsanasannikR^iShTamito niShIdeti visR^iShTabhUmiH |
bhartuH prasAdaM pratinandya mUrdhnA vaktuM mithaH prAkramataivamenam || 3\.2||
Aj~nApaya j~nAtavisheSha ! puMsAM lokeShu yatte karaNIyamasti |
anugrahaM saMsmaraNapravR^ittamichChAmi saMvardhitamAj~nayA te || 3\.3||
kenAbhyasUyA padakA~NkShiNA te nitAntadIrghairjanitA tapobhiH |
yAvadbhavatyAhitasAyakasya matkArmukasyAsya nideshavartI || 3\.4||
asammataH kastava muktimArgaM punarbhavakleshabhayAtprapannaH |
baddhashchiraM tiShThatu sundarINAmArechitabhrUchaturaiH kaTAkShaiH || 3\.5||
adhyApitasyoshanasApi nItiM prayuktarAgapraNidhirdviShaste |
kasyArthadharmau vada pIDayAmi sindhostaTAvogha iva pravR^iddhaH || 3\.6||
kAmekapatnIvrataduHkhasholAM lolaM manashchArutayA praviShTAm |
nitambinImichChasi muktalajjAM kaNThe svaya~NgrAhaniShaktabAhum || 3\.7||
kayAsi kAmin suratAparAdhAtpAdAnataH kopanayAvadhUtaH |
yasyAH kariShyAmi dR^iDhAnutApaM pravAlashAyyAsharaNaM sharIram || 3\.8||
prasIda vishrAmyatu vIra ! vajraM sharairmadIyaiH katamaH surAriH |
bibhetu moghIkR^itabAhuvIryaH strIbhyo.api sopasphuritAdharAbhyaH || 3\.9||
tava prasAdAtkusumAyudho.api sahAyamekaM madhumeva labdhvA |
kuryAM harasyApi pinAkapANerdhairyachyutiM ke mama dhanvino.anye || 3\.10||
athorudeshAdavatArya pAda mAkrAntisambhAvitapAdapITham |
sa~NkalpitArthe vivR^itAtmashaktimAkhaNDalaH kAmamidaM babhAShe || 3\.11||
sarvaM sakhe ! tvayyupapannametadubhe mamAstre kulishaM bhavAMshcha |
vajraM tapovIryamahatsu kuNThaM tvaM sarvatogAmi cha sAghakaM cha || 3\.12||
avaimi te sAramataH khalu tvAM kArye guruNyAtmasamaM niyokShye |
vyAdishyate bhUdharatAmavekShya kR^iShNena dehodvahanAya sheShaH || 3\.13||
AshaMsatA bANagatiM vR^iShA~Nke kAryaM tvayA naH pratipannakalpam |
nibodha yaj~nAMshabhujAmidAnImuchchairdviShAmIpsitametadeva || 3\.14||
amI hi vIryaprabhavaM bhavasya jayAya senAnyamushanti devAH |
sa cha tvadekeShunipAtasAdhyo brahmA~NgabhUrbrahmaNi yojitAtmA || 3\.15||
tasmai himAdreH prayatAM tanUjAM yatAtmane rochayituM yatasva |
yoShitsu tadvIryaniShekabhUmiH saiva kShametyAtmabhuvopadiShTam || 3\.16||
gurorniyogAchcha nagendrakanyA sthANuM tapasyantamadhityakAyAm |
anvAsta ityapsarasAM mukhebhyaH shrutaM mayA matpraNidhiH sa vargaH || 3\.17||
tad gachCha sid.hdhyai kuru devakAryamartho.ayamarthAntarabhAvya eva |
apekShate pratyayamuttamaM tvAM bIjA~NkuraH prAgudayAdivAmbhaH || 3\.18||
tasminsurANAM vijayAbhyupAye tavaiva nAmAstragatiH kR^itI tvam |
apyaprasiddhaM yashase hi puMsAmananyasAdhAraNameva karma || 3\.19||
surAH samabhyarthayitAra ete, kAryaM trayANAmapi viShTapAnAm |
chApena te karma na chAtihiMsramaho batAsi spR^ihaNIyavIryaH || 3\.20||
madhushcha te manmatha !sAhacharyAdasAvanukto.api sahAya eva |
samIraNo nodayitA bhaveti vyAdishyate kena hutAshanasya || 3\.21||
tatheti sheShAmiva bharturAj~nAmAdAya mUrdhnA madanaH pratasthe |
airAvatAsphAlanakarkashena hastena pasparsha tada~NgamindraH || 3\.22||
sa mAdhavenAbhimatena sakhyA ratyA cha sAsha~NkamanuprayAtaH |
a~NgavyayaprArthitakAryasiddhiH sthANvAshramaM haimavataM jagAma || 3\.23||
tasminvane saMyaminAM munInAM tapaHsamAdheH pratikUlavartI |
sa~NkalpayonerabhimAnabhUtamAtmAnamAdhAya madhurjajR^imbhe || 3\.24||
kuberaguptAM dishamuShNarashmau gantuM pravR^itte samayaM vila~Nghya |
digdakShiNA gandhavahaM mukhena vyalIkaniHshvAsamivotsasarja || 3\.25||
asUta sadyaH kusumAnyashokaH skandhAtprabhR^ityeva sapallavAni |
pAdena nApaikShata sundarINAM samparkamAsi~njitanUpureNa || 3\.26||
sadyaH pravAlodgamachArupatre nIte samAptiM navachUtabANe |
niveshayAmAsa madhurdvirephAnnAmAkSharANIva manobhavasya || 3\.27||
varNaprakarShe sati karNikAraM dunoti nirgandhatayA sma chetaH |
prAyeNa sAmagryavidhau guNAnAM parA~NmukhI vishvasR^ijaH pravR^ittiH || 3\.28||
bAlenduvakrANyavikAsabhAvAdbabhuH palAshAnyatilohitAni |
sadyo vasantena samAgatAnAM nakhakShatAnIva vanasthalInAm || 3\.29||
lagnadvirephA~njanabhaktichitrammukhe madhushrIstilakaM prakAshya |
rAgeNa bAlAruNakomalena chUtapravAloShThamala~nchakAra || 3\.30||
mR^igAH priyAladrumama~njarINAM rajaHkaNairvighnitadR^iShTipAtAH |
madoddhatAH pratyanilaM vicherurvanasthalIrmarmarapatramokShAH || 3\.31||
chUtA~NkurAsvAdakaShAyakaNThaH puMskokilo yanmadhuraM chukUja |
manasvinImAnavighAtadakShaM tadeva jAtaM vachanaM smarasya || 3\.32||
himavyapAyAdvishadAdharANAmApANDurIbhUtamukhachChavInAm |
svedodgamaH kimpuruShA~NganAnAM chakre padaM patravisheShakeShu || 3\.33||
tapasvinaH sthANuvanaukasastAmAkAlikIM vIkShya madhupravR^ittim |
prayatnasaMstambhitavikriyANAM kathaM chidIshA manasAM babhUvuH || 3\.34||
taM deshamAropitapuShpachApe ratidvitIye madane prapanne |
kAShThAgatasneharasAnuviddhaM dvandvAni bhAvaM kriyayA vivavruH || 3\.35||
madhu dvirephaH kusumaikapAtre papau priyAM svAmanuvartamAnaH |
shR^i~NgeNa cha sparshanimIlitAkShIM mR^igImakaNDUyata kR^iShNasAraH || 3\.36||
dadau rasAtpa~NkajareNugandhi gajAya gaNDUShajalaM kareNuH |
ardhopabhuktena bisena jAyAM sambhAvayAmAsa rathA~NganAmA || 3\.37||
gItAntareShu shramavArileshaiH ki~nchitsamuchChvAsitapatralekham |
puShpAsavAghUrNitanetrashobhi priyAmukhaM kimpuruShashchuchumbe || 3\.38||
paryAptapuShpastabakastanAbhyaH sphuratpravAlauShThamanoharAbhyaH |
latAvadhUbhyastaravo.apyavApurvinamrashAkhAbhujabandhanAni || 3\.39||
shrutApsarogItirapi kShaNe.asminharaH prasa~NkhyAnaparo babhUva |
AtmeshvarANAM na hi jAtu vighnAH samAdhibhedaprabhavo bhavanti || 3\.40||
latAgR^ihadvAragato.atha nandI vAmaprakoShThArpitahemavetraH |
mukhArpitaikA~Ngulisa.nj~nayaiva mA chApalAyeti gaNAnvyanaiShIt || 3\.41||
niShkampavR^ikShaM nibhR^itadvirephaM mUkANDajaM shAntamR^igaprachAram |
tachChAsanAtkAnanameva sarvaM chitrArpitArambhamivAvatasthe || 3\.42||
dR^iShTiprapAtaM parihR^itya tasya kAmaH puraHshukramiva prayANe |
prAnteShu saMsaktanamerushAkhaM dhyAnAspadaM bhUtapatervivesha || 3\.43||
sa devadArudrumavedikAyAM shArdUlacharmavyavadhAnavatyAm |
AsInamAsannasharIrapAtastryambakaM saMyaminaM dadarsha || 3\.44||
parya~NkabandhasthirapUrvakAyamR^ijvAyataM sannamitobhayAMsam |
uttAnapANidvayasanniveshAtpraphullarAjIvamivA~Nkamadhye || 3\.45||
bhuja~NgamonnaddhajaTAkalApaM karNAvasaktadviguNAkShasUtram |
kaNThaprabhAsa~NgavisheShanIlAM kR^iShNatvachaM granthimatIM dadhAnam || 3\.46||
ki~nchitprakAshastimitogratArairbhrUvikriyAyAM virataprasa~NgaiH |
netrairavispanditapakShmamAlairlakShyIkR^itaghrANamadhomayUkhaiH || 3\.47||
avR^iShTisaMrambhamivAmbuvAhamapAmivAdhAramanuttara~Ngam |
antashcharANAM marutAM nirodhAnnivAtaniShkampamiva pradIpam || 3\.48||
kapAlanetrAntaralabdhamArgairjyotiHprarohairuditaiH shirastaH |
mR^iNAlasUtrAdhikasaukumAryAM bAlasya lakShmIM glapayantamindoH || 3\.49||
mano navadvAraniShiddhavR^itti hR^idi vyavasthApya samAdhivashyam |
yamakSharaM kShetravido vidustamAtmAnamAtmanyavalokayantam || 3\.50||
smarastathAbhUtamayugmanetraM pashyannadUrAnmanasApyadhR^iShyam |
nAlakShayatsAdhvasasannahastaH srastaM sharaM chApamapi svahastAt || 3\.51||
nirvANabhUyiShThamathAsya vIryaM sandhukShayantIva vapurguNena |
anuprayAtA vanadevatAbhyAmadR^ishyata sthAvararAjakanyA || 3\.52||
ashokanirbhartsitapadmarAgamAkR^iShTahemadyutikarNikAram |
muktAkalApIkR^itasinduvAraM vasantapuShpAbharaNaM vahantI || 3\.53||
AvarjitA kiM chidiva stanAbhyAM vAso vasAnA taruNArkarAgam |
paryAptapuShpastabakAvanamrA sa~nchAriNI pallavinI lateva || 3\.54||
srastAM nitambAdavalambamAnA punaH\-punaH kesaradAmakA~nchIm |
nyAsIkR^itAM sthAnavidA smareNa maurvIM dvitIyAmiva kArmukasya || 3\.55||
sugandhiniHshvAsavivR^iddhatR^iShNaM bimbAdharAsannacharaM dvirepham |
pratikShaNaM sambhramaloladR^iShTirlIlAravindena nivArayantI || 3\.56||
tAM vIkShya sarvAvayavAnavadyAM raterapi hrIpadamAdadhAnAm |
jitendriye shUlini puShpachApaH svakAryasiddhiM punarAshashaMse || 3\.57||
bhaviShyataH patyurumA cha shambhoH samAsasAda pratihArabhUmim |
yogAtsa chAntaH paramAtmasa.nj~naM dR^iShTvA paraM jyotirupArarAma || 3\.58||
tato bhuja~NgAdhipateH phaNAgrairadhaH kathaM chiddhR^itabhUmibhAgaH |
shanaiH kR^itaprANavimuktirIshaH parya~NkabandhaM nibiDaM bibheda || 3\.59||
tasmai shashaMsa praNipatya nandI shushrUShayA shailasutAmupetAm |
praveshayAmAsa cha bharturenAM bhrUkShepamAtrAnumatapraveshAm || 3\.60||
tasyAH sakhIbhyAM praNipAtapUrvaM svahastalUnaH shishirAtyayasya |
vyakIryata tryambakapAdamUle puShpochchayaH pallavabha~NgabhinnaH || 3\.61||
umApi nIlAlakamadhyashobhi visraMsayantI navakarNikAram |
chakAra karNachyutapallavena mUrdhnA praNAmaM vR^iShabhadhvajAya || 3\.62||
ananyabhAjaM patimApnuhIti sA tathyamevAbhihitA bhavena |
na hIshvaravyAhR^itayaH kadA chitpuShyanti loke viparItamartham || 3\.63||
kAmastu bANAvasaraM pratIkShya pata~NgavadvahnimukhaM vivikShuH |
umAsamakShaM harabaddhalakShyaH sharAsanajyAM muhurAmamarsha || 3\.64||
tapasvi\-shiva\-sevA
tapasvi\-shiva\-sevA
athopaninye girishAya gaurI tapasvine tAmraruchA kareNa |
vishoShitAM bhAnumato mayUkhairmandAkinIpuShkarabIjamAlAm || 3\.65||
pratigrahItuM praNayipriyatvAttrilochanastAmupachakrame cha |
sammohanaM nAma cha puShpadhanvA dhanuShyamoghaM samadhatta bANam || 3\.66||
harastu ki~nchitpariluptadhairyashchandrodayArambha ivAmburAshiH |
umAmukhe bimbaphalAdharoShThe vyApArayAmAsa vilochanAni || 3\.67||
vivR^iNvatI shailasutApi bhAvama~NgaiH sphuradbAlakadambakalpaiH |
sAchIkR^itA chArutareNa tasthau mukhena paryastavilochanena || 3\.68||
athendriyakShobhamayugmanetraH punarvashitvAdbalavannigR^ihya |
hetuM svachetovikR^iterdidR^ikShurdishAmupAnteShu sasarja dR^iShTim || 3\.69||
sa dakShiNApA~NganiviShTamuShTiM natAMsamAku~nchitasavyapAdam |
dadarsha chakrIkR^itachAruchApaM prahartumabhyudyatamAtmayonim || 3\.70||
tapaHparAmarshavivR^iddhamanyorbhrUbha~NgaduShprekShyamukhasya tasya |
sphurannudarchiH sahasA tR^itIyAdakShNaH kR^ishAnuH kila niShpapAta || 3\.71||
krodhaM prabho saMhara saMhareti yAvadgiraH khe marutAM charanti |
tAvatsa vahnirbhavanetrajanmA bhasmAvasheShaM madanaM chakAra || 3\.72||
tIvrAbhiSha~NgaprabhaveNa vR^ittimmohena saMstambhayatendriyANAm |
aj~nAtabhartR^ivyasanA muhUrtaM kR^itopakAreva ratirbabhUva || 3\.73||
tamAshu vighnaM tapasastapasvI vanaspatiM vajra ivAvabhajya |
strIsannikarShaM parihartumichChannantardadhe bhUtapatiH sabhUtaH || 3\.74||
shailAtmajApi pituruchChiraso.abhilAShaM vyarthaM samarthya lalitaM vapurAtmanashcha |
sakhyoH samakShamiti chAdhikajAtalajjA shUnyA jagAma bhavanAbhimukhI kathaM chit || 3\.75||
sapadi mukulitAkShIM rudrasaMrambhabhItyA duhitaramanukampyAmadrirAdAya dorbhyAm |
suragaja iva bibhratpadminIM dantalagnAM pratipathagatirAsIdvegadIrghIkR^itA~NgaH || 3\.76||

iti shrIkAlidAsakR^itau kumArasambhave mahAkAvye
madanadahano nAma tR^itIyaH sargaH sampUrNaH || 3||
\section{sargaH 4 \- rativilApaH}
atha mohaparAyaNA satI vivashA kAmavadhUrvibodhitA |
vidhinA pratipAdayiShyatA navavaidhavyamasahyavedanam || 4\.1||
avadhAnapare chakAra sA pralayAntonmiShite vilochane |
na viveda tayoratR^iptayoH priyamatyantaviluptadarshanam || 4\.2||
ayi jIvitanAtha jIvasItyabhidhAyotthitayA tayA puraH |
dadR^ishe puruShAkR^iti kShitau harakopAnalabhasma kevalam || 4\.3||
atha sA punareva vihvalA vasudhAli~NganadhUsarastanI |
vilalApa vikIrNamUrdhajA samaduHkhAmiva kurvatI sthalIm || 4\.4||
upamAnamabhUdvilAsinAM karaNaM yattava kAntimattayA |
tadidaM gatamIdR^ishIM dashAM na vidIrye kaThinAH khalu striyaH || 4\.5||
kva nu mAM tvadadhInajIvitAM vinikIrya kShaNabhinnasauhR^idaH |
nalinIM kShatasetubandhano jalasa~NghAta ivAsi vidrutaH || 4\.6||
kR^itavAnasi vipriyaM na me pratikUlaM na cha te mayA kR^itam |
kimakAraNameva darshanaM vilapantyai rataye na dIyate || 4\.7||
smarasi smara mekhalAguNairuta gotraskhaliteShu bandhanam |
chyutakesharadUShitekShaNAnyavataMsotpalatADanAni vA || 4\.8||
hR^idaye vasasIti matpriyaM yadavochastadavaimi kaitavam |
upachArapadaM na chedidaM tvamana~NgaH kathamakShatA ratiH || 4\.9||
paralokanavapravAsinaH pratipatsye padavImahaM tava |
vidhinA jana eSha va~nchitastvadadhInaM khalu dehinAM sukham || 4\.10||
rajanItimirAvaguNThite puramArge ghanashabdaviklavAH |
vasatiM priya kAminAM priyAstvadR^ite prApayituM ka IshvaraH || 4\.11||
nayanAnyaruNAni ghUrNayanvachanAni skhalayanpade\-pade |
asati tvayi vAruNImadaH pramadAnAmadhunA viDambanA || 4\.12||
avagamya kathIkR^itaM vapuH priyabandhostava niShphalodayaH |
bahule.api gate nishAkarastanutAM duHkhamana~Nga mokShyati || 4\.13||
haritAruNachArubandhanaH kalapuMskokilashabdasUchitaH |
vada samprati kasya bANatAM navachUtaprasavo gamiShyati || 4\.14||
alipa~NktiranekashastvayA guNakR^itye dhanuSho niyojitA |
virutaiH karuNasvanairiyaM gurushokAmanuroditIva mAm || 4\.15||
pratipadya manoharaM vapuH punarapyAdisha tAvadutthitaH |
ratidUtipadeShu kokilAM madhurAlApanisargapaNDitAm || 4\.16||
shirasA praNipatya yAchitAnyupagUDhAni savepathUni cha |
suratAni cha tAni te rahaH smara saMsmR^itya na shAntirasti me || 4\.17||
rachitaM ratipaNDita tvayA svayama~NgeShu mamedamArtavam |
dhriyate kusumaprasAdhanaM tava tachchAru vapurna dR^ishyate || 4\.18||
vibudhairasi yasya dAruNairasamApte parikarmaNi smR^itaH |
tamimaM kuru dakShiNetaraM charaNaM nirmitarAgamehi me || 4\.19||
ahametya pata~NgavartmanA punara~NkAshrayiNI bhavAmi te |
chaturaiH surakAminIjanaiH priya yAvanna vilobhyase divi || 4\.20||
madanena vinAkR^itA ratiH kShaNamAtraM kila jIviteti me |
vachanIyamidaM vyavasthitaM ramaNa tvAmanuyAmi yadyapi || 4\.21||
kriyatAM kathamantyamaNDanaM paralokAntaritasya te mayA |
samameva gato.asyatarkitAM gatima~Ngena cha jIvitena cha || 4\.22||
R^ijutAM nayataH smarAmi te sharamutsa~NganiShaNNadhanvanaH |
madhunA saha sasmitaM kathAM nayanopAntavilokitaM cha yat || 4\.23||
kva nu te hR^idaya~NgamaH sakhA kusumAyojitakArmuko madhuH |
na khalUgraruShA pinAkinA gamitaH so.api suhR^idgatAM gatim || 4\.24||
atha taiH paridevitAkSharairhR^idaye digdhasharairivArditaH |
ratimabhyupapattumAturAM madhurAtmAnamadarshayatpuraH || 4\.25||
tamavekShya ruroda sA bhR^ishaM stanasambAdhamuro jaghAna cha |
svajanasya hi duHkhamagrato vivR^itadvAramivopajAyate || 4\.26||
iti chainamuvAcha duHkhitA suhR^idaH pashya vasanta kiM sthitam |
yadidaM kaNashaH prakIryate pavanairbhasma kapotakarburam || 4\.27||
ayi samprati dehi darshanaM smara paryutsuka eSha mAdhavaH |
dayitAsvanavasthitaM nR^iNAM na khalu prema chalaM suhR^ijjane || 4\.28||
amunA nanu pArshvavartinA jagadAj~nAM sasurAsuraM tava |
bisatantuguNasya kAritaM dhanuShaH pelavapuShpapatriNaH || 4\.29||
gata eva na te nivartate sa sakhA dIpa ivAnilAhataH |
ahamasya dasheva pashya mAmaviShahyavyasanapradhUShitAm || 4\.30||
vidhinA kR^itamardhavaishasaM nanu mA~NkAmavadhe vimu~nchatA |
anaghApi hi saMshrayadrume gajabhagne patanAya vallarI || 4\.31||
tadidaM kriyatAmanantaraM bhavatA bandhujanaprayojanam |
vidhurAM jvalanAtisarjanAnnanu mAM prApaya patyurantikam || 4\.32||
shashinA saha yAti kaumudI saha meghena taDitpralIyate |
pramadAH pativartmagA iti pratipannaM hi vichetanairapi || 4\.33||
amunaiva kaShAyitastanI subhagena priyagAtrabhasmanA |
navapallavasaMstare yathA rachayiShyAmi tanuM vibhAvasau || 4\.34||
kusumAstaraNe sahAyatAM bahushaH saumya gatastvamAvayoH |
kuru samprati tAvadAshu me praNipAtA~njaliyAchitashchitAm || 4\.35||
tadanu jvalanaM madarpitaM tvarayerdakShiNavAtavIjanaiH |
viditaM khalu te yathA smaraH kShaNamapyutsahate na mAM vinA || 4\.36||
iti chApi vidhAya dIyatAM salilasyA~njalireka eva nau |
avibhajya paratra taM mayA sahitaH pAsyati te sa bAndhavaH || 4\.37||
paralokavidhau cha mAdhava smaramuddishya vilolapallavAH |
nivapeH sahakArama~njarIH priyachUtaprasavo hi te sakhA || 4\.38||
iti devavimuktaye sthitAM ratimAkAshabhavA sarasvatI |
shapharIM hradashoShaviklavAM prathamA vR^iShTirivAnvakampata || 4\.39||
kusumAyudhapatni durlabhastava bhartA na chirAdbhaviShyati |
shR^iNu yena sa karmaNA gataH shalabhatvaM haralochanArchiShi || 4\.40||
abhilAShamudIritendriyaH svasutAyAmakarotprajApatiH |
atha tena nigR^ihya vikriyAmabhishaptaH phalametadanvabhUt || 4\.41||
pariNeShyati pArvatIM yadA tapasA tatpravaNIkR^ito haraH |
upalabdhasukhastadA smaraM vapuShA svena niyojayiShyati || 4\.42||
iti chAha sa dharmayAchitaH smarashApAvadhidAM sarasvatIm |
ashaneramR^itasya chobhayorvashinashchAmbudharAshcha yonayaH || 4\.43||
tadidaM parirakSha shobhane bhavitavyapriyasa~NgamaM vapuH |
ravipItajalA tapAtyaye punaroghena hi yujyate nadI || 4\.44||
itthaM rateH kimapi bhUtamadR^ishyarUpaM mandIchakAra maraNavyavasAyabuddhim |
tatpratyayAchcha kusumAyudhabandhurenAmAshvAsayatsucharitArthapadairvachobhiH || 4\.45||
atha madanavadhUrupaplavAntaM vyasanakR^ishA paripAlayAM babhUva |
shashina iva divAtanasya lekhA kiraNaparikShayadhUsarA pradoSham || 4\.46||

iti shrIkAlidAsakR^itau kumArasambhave mahAkAvye
rativilApo nAma chaturthaH sargaH sampUrNaH || 4||
\section{sargaH 5 \- tapaHphalodayaH}
tathA samakShaM dahatA manobhavaM pinAkinA bhagnamanorathA satI |
nininda rUpaM hR^idayena pArvatI priyeShu saubhAgyaphalA hi chArutA || 5\.1||
iyeSha sA kartumavandhyarUpatAM samAdhimAsthAya tapobhirAtmanaH |
avApyate vA kathamanyathA dvayaM tathAvidhaM prema patishcha tAdR^ishaH || 5\.2||
nishamya chainAM tapase kR^itodyamAM sutAM girIshapratisaktamAnasAm |
uvAcha menA parirabhya vakShasA nivArayantI mahato munivratAt || 5\.3||
manIShitAH santi gR^ihe.api devatAstapaH kva vatse kva cha tAvakaM vapuH |
padaM saheta bhramarasya pelavaM shirIshapuShpaM na punaH patatriNaH || 5\.4||
iti dhruvechChAmanushAsatI sutAM shashAka menA na niyantumudyamAt |
ka IpsitArthasthiranishchayaM manaH payashcha nimnAbhimukhaM pratIpayet || 5\.5||
kadA chidAsannasakhImukhena sA manorathaj~naM pitaraM manasvinI |
ayAchatAraNyanivAsamAtmanaH phalodayAntAya tapaHsamAdhaye || 5\.6||
athAnurUpAbhiniveshatoShiNA kR^itAbhyanuj~nA guruNA garIyasA |
prajAsu pashchAtprathitaM tadAkhyayA jagAma gaurI shikharaM shikhaNDimat || 5\.7||
vimuchya sA hAramahAryanishchayA vilolayaShTipraviluptachandanam |
babandha bAlAruNababhru valkalaM payodharotsedhavishIrNasaMhati || 5\.8||
yathA prasiddhairmadhuraM shiroruhairjaTAbhirapyevamabhUttadAnanam |
na shaTpadashreNibhireva pa~NkajaM sashaivalAsa~Ngamapi prakAshate || 5\.9||
pratikShaNaM sA kR^itaromavikriyAM vratAya mau~njIM triguNAM babhAra yAm |
akAri tatpUrvanibaddhayA tayA sarAgamasyA rasanAguNAspadam || 5\.10||
visR^iShTarAgAdadharAnnivartitaH stanA~NgarAgAruNitAchcha kandukAt |
kushA~NkurAdAnaparikShatA~NguliH kR^ito.akShasUtrapraNayI tayA karaH || 5\.11||
mahArhashayyAparivartanachyutaiH svakeshapuShpairapi yA sma dUyate |
asheta sA bAhulatopadhAyinI niSheduShI sthaNDila eva kevale || 5\.12||
punargrahItuM niyamasthayA tayA dvaye.api nikShepa ivArpitandvayam |
latAsu tanvIShu vilAsacheShTitaM viloladR^iShTaM hariNA~NganAsu cha || 5\.13||
atandritA sA svayameva vR^ikShakAnghaTastanaprasravaNairvyavardhayat |
guho.api yeShAM prathamAptajanmanAM na putravAtsalyamapAkariShyati || 5\.14||
araNyabIjA~njalidAnalAlitAstathA cha tasyAM hariNA vishashvasuH |
yathA tadIyairnayanaiH kutUhalAtpuraH sakhInAmamimIta lochane || 5\.15||
kR^itAbhishekAM hutajAtavedasaM tvaguttarAsa~NgavatImadhItinIm |
digdR^ikShavastAmR^iShayo.abhyupAgamanna dharmavR^iddheShu vayaH samIkShyate || 5\.16||
virodhisattvojjhitapUrvamatsaraM drumairabhIShTaprasavArchitAtithi |
navoTajAbhyantarasambhR^itAnalaM tapovanaM tachcha babhUva pAvanam || 5\.17||
yadA phalaM pUrvatapaHsamAdhinA na tAvatA labhyamamaMsta kA~NkShitam |
tadAnapekShya svasharIramArdavaM tapo mahatsA charituM prachakrame || 5\.18||
klamaM yayau kandukalIlayApi yA tayA munInAM charitaM vyagAhyata |
dhruvaM vapuH kA~nchanapadmanirmitaM mR^idu prakR^ityA cha sasArameva cha || 5\.19||
shuchau chaturNAM jvalatAM havirbhujAM shuchismitA madhyagatA sumadhyamA |
vijitya netrapratighAtinIM prabhAmananyadR^iShTiH savitAramaikShata || 5\.20||
tathAbhitaptaM saviturgabhastibhirmukhaM tadIyaM kamalashriyaM dadhau |
apA~NgayoH kevalamasya dIrghayoH shanaiH\-shanaiH shyAmikayA kR^itaM padam || 5\.21||
ayAchitopasthitamambu kevalaM rasAtmakasyoDupateshcha rashmayaH |
babhUva tasyAH kila pAraNAvidhirna vR^ikShavR^ittivyatiriktasAdhanaH || 5\.22||
nikAmataptA vividhena vahninA nabhashchareNendhanasambhR^itena cha |
tapAtyaye vAribhirukShitA navairbhuvA sahoShmANamamu~nchadUrdhvagam || 5\.23||
sthitAH kShaNaM pakShmasu tADitAdharAH payodharotsedhanipAtachUrNitAH |
valIShu tasyAH skhalitAH prapedire chireNa nAbhiM prathamodabindavaH || 5\.24||
shilAshayAM tAmaniketavAsinIM nirantarAsvantaravAtavR^iShTiShu |
vyalokayannunmiShitaistaDinmayairmahAtapaHsAkShya iva sthitAH kShapAH || 5\.25||
ninAya sAtyantahimotkirAnilAH sahasyarAtrIrudavAsatatparA |
parasparAkrandini chakravAkayoH puro viyukte mithune kR^ipAvatI || 5\.26||
mukhena sA padmasugandhinA nishi pravepamAnAdharapatrashobhinA |
tuShAravR^iShTikShatapadmasampadAM sarojasandhAnamivAkarodapAm || 5\.27||
svayaMvishIrNadrumaparNavR^ittitA parA hi kAShThA tapasastayA punaH |
tadapyapAkIrNamataH priyaMvadAM vadantyaparNeti cha tAM purAvidaH || 5\.28||
mR^iNAlikApelavamevamAdibhirvrataiH svama~NgaM glapayantyaharnisham |
tapaH sharIraiH kaThinairupArjitaM tapasvinAM dUramadhashchakAra sA || 5\.29||
athAjinAShADhadharaH pragalbhavAgjvalanniva brahmamayena tejasA |
vivesha kashchijjaTilastapovanaM sharIrabaddhaH prathamAshramo yathA || 5\.30||
tamAtitheyI bahumAnapUrvayA saparyayA pratyudiyAya pArvatI |
bhavanti sAmye.api niviShTachetasAM vapurvisheSheShvatigauravAH kriyAH || 5\.31||
vidhiprayuktAM parigR^ihya satkriyAM parishramaM nAma vinIya cha kShaNam |
umAM sa pashyannR^ijunaiva chakShuShA prachakrame vaktumanujjhitakramaH || 5\.32||
api kriyArthaM sulabhaM samitkushaM jalAnyapi snAnavidhikShamANi te |
api svashaktyA tapasi pravartase sharIramAdyaM khalu dharmasAdhanam || 5\.33||
api tvadAvarjitavArisambhR^itaM pravAlamAsAmanubandhi vIrudhAm |
chirojjhitAlaktakapATalena te tulAM yadArohati dantavAsasA || 5\.34||
api prasannaM hariNeShu te manaH karasthadarbhapraNayApahAriShu |
ya utpalAkShi prachalairvilochanaistavAkShisAdR^ishyamiva prayu~njate || 5\.35||
yaduchyate pArvati pApavR^ittaye na rUpamityavyabhichAri tadvachaH |
tathA hi te shIlamudAradarshane tapasvinAmapyupadeshatAM gatam || 5\.36||
vikIrNasaptarShibaliprahAsibhistathA na gA~NgaiH salilairdivashchyutaiH |
yathA tvadIyaishcharitairanAvilairmahIdharaH pAvita eSha sAnvayaH || 5\.37||
anena dharmaH savisheShamadya me trivargasAraH pratibhAti bhAvini |
tvayA manonirviShayArthakAmayA yadeka eva pratigR^ihya sevyate || 5\.38||
prayuktasatkAravisheShamAtmanA na mAM paraM sampratipattumarhasi |
yataH satAM sannatagAtri sa~NgataM manIShibhiH sAptapadInamuchyate || 5\.39||
ato.atra ki~nchidbhavatIM bahukShamAM dvijAtibhAvAdupapannachApalaH |
ayaM janaH praShTumanAstapodhane na chedrahasyaM prativaktumarhasi || 5\.40||
kule prasUtiH prathamasya vedhasastrilokasaundaryamivoditaM vapuH |
amR^igyamaishvaryasukhaM navaM vayastapaHphalaM syAtkimataH paraM vada || 5\.41||
bhavatyaniShTAdapi nAma duHsahAnmanasvinInAM pratipattirIdR^ishI |
vichAramArgaprahitena chetasA na dR^ishyate tachcha kR^ishodari tvayi || 5\.42||
alabhyashokAbhibhaveyamAkR^itirvimAnanA subhru kutaH piturgR^ihe |
parAbhimarsho na tavAsti kaH karaM prasArayetpannagaratnasUchaye || 5\.43||
kimityapAsyAbharaNAni yauvane dhR^itaM tvayA vArddhakashobhi valkalam |
vada pradoShe sphuTachandratArake vibhAvarI yadyaruNAya kalpate || 5\.44||
divaM yadi prArthayase vR^ithA shramaH pituH pradeshAstava devabhUmayaH |
athopayantAramalaM samAdhinA na ratnamanviShyati mR^igyate hi tat || 5\.45||
niveditaM nishvasitena soShmaNA manastu me saMshayameva gAhate |
na dR^ishyate prArthayitavya eva te bhaviShyati prArthitadurlabhaH katham || 5\.46||
aho sthiraH ko.api tavepsito yuvA chirAya karNotpalashUnyatAM gate |
upekShate yaH shlathalambinIrjaTAH kapoladeshe kalamAgrapi~NgalAH || 5\.47||
munivrataistvAmatimAtrakarshitAM divAkarApluShTavibhUShaNAspadAm |
shashA~NkalekhAmiva pashyato divA sachetasaH kasya mano na dUyate || 5\.48||
avaimi saubhAgyamadena va~nchitaM tava priyaM yashchaturAvalokinaH |
karoti lakShyaM chiramasya chakShuSho na vaktramAtmIyamarAlapakShmaNaH || 5\.49||
kiyachchiraM shrAmyasi gauri vidyate mamApi pUrvAshramasa~nchitaM tapaH |
tadardhabhAgena labhasva kA~NkShitaM varaM tamichChAmi cha sAdhu veditum || 5\.50||
iti pravishyAbhihitA dvijanmanA manogataM sA na shashAka shaMsitum |
atho vayasyAM paripArshvavartinIM vivartitAna~njananetramaikShata || 5\.51||
sakhI tadIyA tamuvAcha varNinaM nibodha sAdho tava chetkutUhalam |
yadarthamambhojamivoShNavAraNaM kR^itaM tapaHsAdhanametayA vapuH || 5\.52||
iyaM mahendraprabhR^itInadhishriyashchaturdigIshAnavamatya mAninI |
arUpahAryaM madanasya nigrahAtpinAkapANiM patimAptumichChati || 5\.53||
asahyahu~NkAranivartitaH purA purArimaprAptamukhaH shilImukhaH |
imAM hR^idi vyAyatapAtamakShaNodvishIrNamUrterapi puShpadhanvanaH || 5\.54||
tadAprabhR^ityunmadanA piturgR^ihe lalATikAchandanadhUsarAlakA |
na jAtu bAlA labhate sma nirvR^itiM tuShArasa~NghAtashilAtaleShvapi || 5\.55||
upAttavarNe charite pinAkinaH sabAShpakaNThaskhalitaiH padairiyam |
anekashaH kinnararAjakanyakA vanAntasa~NgItasakhIrarodayat || 5\.56||
tribhAgasheShAsu nishAsu cha kShaNamnimIlya netre sahasA vyabudhyata |
kva nIlakaNTha vrajasItyalakShyavAgasatyakaNThArpitabAhubandhanA || 5\.57||
yadA budhaiH sarvagatastvamuchyase na vetsi bhAvasthamimaM janaM katham |

iti svahastAllikhitashcha mugdhayA rahasyupAlabhyata chandrashekharaH || 5\.58||
yadA cha tasyAdhigame jagatpaterapashyadanyaM na vidhiM vichinvatI |
tadA sahAsmAbhiranuj~nayA guroriyaM prapannA tapase tapovanam || 5\.59||
drumeShu sakhyA kR^itajanmasu svayaM phalaM tapaHsAkShiShu dR^iShTameShvapi |
na cha prarohAbhimukho.api dR^ishyate manoratho.asyAH shashimaulisaMshrayaH || 5\.60||
na vedmi sa prArthitadurlabhaH kadA sakhIbhirasrottaramIkShitAmimAm |
tapaHkR^ishAmabhyupapatsyate sakhIM vR^iSheva sItAM tadavagrahakShatAm || 5\.61||
agUDhasadbhAvamitI~Ngitaj~nayA nivedito naiShThikasundarastayA |
ayIdamevaM parihAsa ityumAmapR^ichChadavya~njitaharShalakShaNaH || 5\.62||
athAgrahaste mukulIkR^itA~Ngulau samarpayantI sphaTikAkShamAlikAm |
kathaM chidadrestanayA mitAkSharaM chiravyavasthApitavAgabhAShata || 5\.63||
yathA shrutaM vedavidAM vara tvayA jano.ayamuchchaiHpadala~NghanotsukaH |
tapaH kiledaM tadavAptisAdhanaM manorathAnAmagatirna vidyate || 5\.64||
athAha varNI vidito maheshvarastadarthinI tvaM punareva vartase |
ama~NgalAbhyAsaratiM vichintya taM tavAnuvR^ittiM na cha kartumutsahe || 5\.65||
avastunirbandhapare kathaM nu te karo.ayamAmuktavivAhakautukaH |
kareNa shambhorvalayIkR^itAhinA sahiShyate tatprathamAvalambanam || 5\.66||
tvameva tAvatparichintaya svayaM kadA chidete yadi yogamarhataH |
vadhUdukUlaM kalahaMsalakShaNaM gajAjinaM shoNitabinduvarShi cha || 5\.67||
chatuShkapuShpaprakarAvikIrNayoH paro.api ko nAma tavAnumanyate |
alaktakA~NkAni padAni pAdayorvikIrNakeshAsu paretabhUmiShu || 5\.68||
ayuktarUpaM kimataH paraM vada trinetravakShaH sulabhaM tavApi yat |
stanadvaye.asminharichandanAspade padaM chitAbhasmarajaH kariShyati || 5\.69||
iyaM cha te.anyA purato viDambanA yadUDhayA vAraNarAjahAryayA |
vilokya vR^iddhokShamadhiShThitaM tvayA mahAjanaH smeramukho bhaviShyati || 5\.70||
dvayaM gataM samprati shochanIyatAM samAgamaprArthanayA kapAlinaH |
kalA cha sA kAntimatI kalAvatastvamasya lokasya cha netrakaumudI || 5\.71||
vapurvirUpAkShamalakShyajanmatA digambaratvena niveditaM vasu |
vareShu yadbAlamR^igAkShi mR^igyate tadasti kiM vyastamapi trilochane || 5\.72||
nivartayAsmAdasadIpsitAnmanaH kva tadvidhastvaM kva cha puNyalakShaNA |
apekShyate sAdhujanena vaidikI shmashAnashUlasya na yUpasatkriyA || 5\.73||
iti dvijAtau pratikUlavAdini pravepamAnAdharalakShyakopayA |
viku~nchitabhrUlatamAhite tayA vilochane tiryagupAntalohite || 5\.74||
uvAcha chainaM paramArthato haraM na vetsi nUnaM yata evamAttha mAm |
alokasAmAnyamachintyahetukaM dviShanti mandAshcharitaM mahAtmanAm || 5\.75||
vipatpratIkArapareNa ma~NgalaM niShevyate bhUtisamutsukena vA |
jagachCharaNyasya nirAshiShaH sataH kimebhirAshopahatAtmavR^ittibhiH || 5\.76||
aki~nchanaH sanprabhavaH sa sampadAM trilokanAthaH pitR^isadmagocharaH |
sa bhImarUpaH shiva ityudIryate na santi yAthArthyavidaH pinAkinaH || 5\.77||
vibhUShaNodbhAsi pinaddhabhogi vA gajAjinAlambi dukUladhAri vA |
kapAli vA syAdatha vendushekharaM na vishvamUrteravadhAryate vapuH || 5\.78||
tada~NgasaMsargamavApya kalpate dhruvaM chitAbhasmarajo vishuddhaye |
tathA hi nR^ityAbhinayakriyAchyutaM vilipyate maulibhirambaraukasAm || 5\.79||
asampadastasya vR^iSheNa gachChataH prabhinnadigvAraNavAhano vR^iShA |
karoti pAdAvupagamya maulinA vinidramandArarajoruNA~NgulI || 5\.80||
vivakShatA doShamapi chyutAtmanA tvayaikamIshaM prati sAdhu bhAShitam |
yamAmanantyAtmabhuvo.api kAraNaM kathaM sa lakShyaprabhavo bhaviShyati || 5\.81||
alaM vivAdena yathA shrutastvayA tathAvidhastAvadasheShamastu saH |
mamAtra bhAvaikarasaM manaH sthitaM na kAmavR^ittirvachanIyamIkShate || 5\.82||
nivAryatAmAli kimapyayaM baTuH punarvivakShuH sphuritottarAdharaH |
na kevalaM yo mahato.apabhAShate shR^iNoti tasmAdapi yaH sa pApabhAk || 5\.83||
ito gamishyAmyathaveti vAdinI chachAla bAlA stanabhinnavalkalA |
svarUpamAsthAya cha tAM kR^itasmitaH samAlalambe vR^iSharAjaketanaH || 5\.84||
taM vIkShya vepathumatI sarasA~NgayaShTirnikShepaNAya padamuddhR^itamudvahantI |
mArgAchalavyatikarAkuliteva sindhuH shailAdhirAjatanayA na yayau na tasthau || 5\.85||
adyaprabhR^ityavanatA~Ngi tavAsmi dAsaH krItastapobhiriti vAdini chandramaulau |
ahnAya sA niyamajaM klamamutsasarja kleshaH phalena hi punarnavatAM vidhatte || 5\.86||

iti shrIkAlidAsakR^itau kumArasambhave mahAkAvye
tapaHphalodayo nAma pa~nchamaH sargaH sampUrNaH || 5||
\section{sargaH 6 \- umApradAnaH}
atha vishvAtmane gaurI sandidesha mithaH sakhIm |
dAtA me bhUbhR^itAM nAthaH pramANIkriyatAmiti || 6\.1||
tayA vyAhR^itasandeshA sA babhau nibhR^itA priye |
chUtayaShTirivAbhyAShye madhau parabhR^itAmukhI || 6\.2||
sa tatheti pratij~nAya visR^ijya kathamapyumAm |
R^iShI~njyotirmayAnsapta sasmAra smarashAsanaH || 6\.3||
te prabhAmaNDalairvyoma dyotayantastapodhanAH |
sArundhatIkAH sapadi prAdurAsanpuraH prabhoH || 6\.4||
AplutAstIramandAra\- kusumotkiravIchiShu |
AkAshaga~NgAsrotassu di~NnAgamadagandhiShu || 6\.5||
muktAyaj~nopavItAni bibhrato haimavalkalAH |
ratnAkShasUtrAH pravrajyAM kalpavR^ikShA ivAshritAH || 6\.6||
adhaHpravarttitAshvena samAvarjitaketunA |
sahasrarashminA shashvatsapramANamudIkShitAH || 6\.7||
AsaktabAhulatayA sArdhamuddhR^itayA bhuvA |
mahAvarAhadaMShTrAyAM vishrAntAH pralayApadi || 6\.8||
sargasheShapraNayanAdvishvayoneranantaram |
purAtanAH purAvidbhirdhAtAra iti kIrtitAH || 6\.9||
prAktanAnAM vishuddhAnAM paripAkamupeyuShAm |
tapasAmupabhu~njAnAH phalAnyapi tapasvinaH || 6\.10||
teShAM madhyagatA sAdhvI patyuH pAdArpitekShaNA |
sAkShAdiva tapaHsiddhirbabhAse bahvarundhatI || 6\.11||
tAmagauravabhedena munIMshchApashyadIshvaraH |
strI pumAnityanAsthaiShA vR^ittaM hi mahitaM satAm || 6\.12||
taddarshanAdabhUchChambhorbhUyAndArArthamAdaraH |
kriyANAM khalu dharmyANAM saptatnyo mUlasAdhanam || 6\.13||
dharmeNApi padaM sharve kArite pArvatIM prati |
pUrvAparAdhabhItasya kAmasyochChvAsitaM manaH || 6\.14||
atha te munayaH sarve mAnayitvA jagadgurum |
idamUchuranUchAnAH prItikaNTakitatvachaH || 6\.15||
yadbrahma samyagAmnAtaM yadagnau vidhinA hutam |
yachcha taptaM tapastasya vipakvaM phalamadya naH || 6\.16||
yadadhyakSheNa jagatAM vayamAropitAstvayA |
manorathasyAviShayaM manoviShayamAtmanaH || 6\.17||
yasya chetasi vartethAH sa tAvatkR^itinAM varaH |
kiM punarbrahmayoneryastava chetasi vartate || 6\.18||
satyamarkAchcha somAchcha paramadhyAsmahe padam |
adya tUchchaistaraM tasmAtsmaraNAnugrahAttava || 6\.19||
tvatsambhAvitamAtmAnaM bahu manyAmahe vayam |
prAyaH pratyayamAdhatte svaguNeShUttamAdaraH || 6\.20||
yA naH prItirvirUpAkSha tvadanudhyAnasambhavA |
sA kimAvedyate tubhyamantarAtmAsi dehinAm || 6\.21||
sAkShAddR^iShTo.asi na punarvidmastvAM vayama~njasA |
prasIda kathayAtmAnaM na dhiyAM pathi vartase || 6\.22||
kiM yena sR^ijasi vyaktamuta yena bibharShi tat |
atha vishvasya saMhartA bhAgaH katama eSha te || 6\.23||
athavA sumahatyeShA prArthanA deva tiShThatu |
chintitopasthitAMstAvachChAdhi naH karavAma kim || 6\.24||
atha mauligatasyendorvishadairdashanAMshubhiH |
upachinvanprabhAM tanvIM pratyAha parameshvaraH || 6\.25||
viditaM vo yathA svArthA na me kAshchitpravR^ittayaH |
nanu mUrtibhiraShTAbhiritthambhUto.asmi sUchitaH || 6\.26||
so.ahaM tR^iShNAturairvR^iShTiM vidyutvAniva chAtakaiH |
ariviprakR^itairdevaiH prasUtiM prati yAchitaH || 6\.27||
ata AhartumichChAmi pArvatImAtmajanmane |
utpattaye havirbhokturyajamAna ivAraNim || 6\.28||
tAmasmadarthe yuShmAbhiryAchitavyo himAlayaH |
vikriyAyai na kalpante sambandhAH sadanuShThitAH || 6\.29||
unnatena sthitimatA dhuramudvahatA bhuvaH |
tena yojitasambandhaM vitta mAmapyava~nchitam || 6\.30||
evaM vAchyaH sa kanyArthamiti vo nopadishyate |
bhavatpraNItamAchAramAmananti hi sAdhavaH || 6\.31||
AryApyarundhatI tatra vyApAraM kartuM arhati |
prAyeNaivaMvidhe kArye purandhrINAM pragalbhatA || 6\.32||
tatprayAtauShadhiprasthaM siddhaye himavatpuram |
mahAkoshIprapAte.asminsa~NgamaH punareva naH || 6\.33||
tasminsaMyaminAmAdye jAte pariNayonmukhe |
jahuH parigrahavrIDAM prAjApatyAstapasvinaH || 6\.34||
tataH paramamityuktvA pratasthe munimaNDalam |
bhagavAnapi samprAptaH prathamoddiShTamAspadam || 6\.35||
te chAkAshamasishyAmamutpatya paramarShayaH |
AseduroShadhiprasthaM manasA samaraMhasaH || 6\.36||
alakAmativAhyeva vasatiM vasusampadAm |
svargAbhiShyandavamanaM kR^itvevopaniveshitam || 6\.37||
ga~NgAsrotaHparikShipta\- vaprAntarjvalitauShadhi |
bR^ihanmaNishilAsAlaM guptAvapi manoharam || 6\.38||
jitasiMhabhayA nAgA yatrAshvA bilayonayaH |
yakShAH kimpuruShAH paurA yoShito vanadevatAH || 6\.39||
shikharAsaktameghAnAM vyajante yatra veshmanAm |
anugarjitasandigdhAH karaNairmurajasvanAH || 6\.40||
yatra kalpadrumaireva vilolaviTapAMshukaiH |
gR^ihayantrapatAkAshrIrapaurAdaranirmitA || 6\.41||
yatra sphaTikaharmyeShu naktamApAnabhUmiShu |
jyotiShAM pratibimbAni prApnuvantyupahAratAm || 6\.42||
yatrauShadhiprakAshena naktaM darshitasa~ncharAH |
anabhij~nAstamisrANAM durdineShvabhisArikAH || 6\.43||
yauvanAntaM vayo yasminnAta~NkaH kusumAyudhaH |
ratikhedasamutpannA nidrA sa.nj~nAviparyayaH || 6\.44||
bhrUbhedibhiH sakampoShThairlalitA~NgulitarjanaiH |
yatra kopaiH kR^itAH strINAmAprasAdArthinaH priyAH || 6\.45||
santAnakataruchChAyA\- suptavidyAdharAdhvagam |
yasya chopavanaM bAhyaM sugandhirgandhamAdanaH || 6\.46||
atha te munayo divyAH prekShya haimavataM puram |
svargAbhisandhisukR^itaM va~nchanAmiva menire || 6\.47||
te sadmani girervegAdunmukhadvAHsthavIkShitAH |
avaterurjaTAbhArairlikhitAnalanishchalaiH || 6\.48||
gaganAdavatIrNA sA yathAvR^iddhapurassarA |
toyAntarbhAskarAlIva reje muniparamparA || 6\.49||
tAnarghyAnarghyamAdAya dUrAtpratyudyayau giriH |
namayansAragurubhiH pAdanyAsairvasundharAm || 6\.50||
dhAtutAmrAdharaH prAMshurdevadArubR^ihadbhujaH |
prakR^ityaiva shiloraskaH suvyakto himavAniti || 6\.51||
vidhiprayuktasatkAraiH svayaM mArgasya darshakaH |
sa tairAkramayAmAsa shuddhAntaM shuddhakarmabhiH || 6\.52||
tatra vetrAsanAsInAnkR^itAsanaparigrahaH |
ityuvAcheshvarAnvAchaM prA~njaliH pR^ithivIdharaH || 6\.53||
apameghodayaM varShamadR^iShTakusumaM phalam |
atarkitopapannaM vo darshanaM pratibhAti me || 6\.54||
mUDhaM buddhamivAtmAnaM haimIbhUtamivAyasam |
bhUmerdivamivArUDhaM manye bhavadanugrahAt || 6\.55||
adyaprabhR^iti bhUtAnAmadhigamyo.asmi shuddhaye |
yadadhyAsitamarhadbhistaddhi tIrthaM prachakShate || 6\.56||
avaimi pUtamAtmAnaM dvayenaiva dvijottamAH |
mUrdhni ga~NgAprapAtena dhautapAdAmbhasA cha vaH || 6\.57||
ja~NgamaM praiShyabhAve vaH sthAvaraM charaNA~Nkitam |
vibhaktAnugrahaM manye dvirUpamapi me vapuH || 6\.58||
bhavatsambhAvanotthAya paritoShAya mUrchChate |
api vyAptadigantAni nA~NgAni prabhavanti me || 6\.59||
na kevalaM darIsaMsthaM bhAsvatAM darshanena vaH |
antargatamapAstaM me rajaso.api paraM tamaH || 6\.60||
kartavyaM vo na pashyAmi syAchchetkiM nopapadyate |
sha~Nke matpAvanAyaiva prasthAnaM bhavatAmiha || 6\.61||
tathApi tAvatkasmiMshchidAj~nAM me dAtumarhatha |
viniyogaprasAdA hi ki~NkarAH prabhaviShNuShu || 6\.62||
ete vayamamI dArAH kanyeyaM kulajIvitam |
brUta yenAtra vaH kAryamanAsthA bAhyavastuShu || 6\.63||
ityUchivAMstamevArthaM darImukhavisarpiNA |
dviriva pratishabdena vyAjahAra himAlayaH || 6\.64||
athA~NgirasamagraNyamudAharaNavastuShu |
R^iShayashchodayAmAsuH pratyuvAcha sa bhUdharam || 6\.65||
upapannamidaM sarvamataH paramapi tvayi |
manasaH shikharANAM cha sadR^ishI te samunnatiH || 6\.66||
sthAne tvAM sthAvarAtmAnaM viShNumAhustathA hi te |
charAcharANAM bhUtAnAM kukShirAdhAratAM gataH || 6\.67||
gAmadhAsyatkathaM nAgo mR^iNAlamR^idubhiH phaNaiH |
A rasAtalamUlAttvamavAlambiShyathA na chet || 6\.68||
achChinnAmalasantAnAH samudrormyanivAritAH |
punanti lokAnpuNyatvAtkIrtayaH saritashcha te || 6\.69||
yathaiva shlAghyate ga~NgA pAdena parameShThinaH |
prabhaveNa dvitIyena tathaivochChirasA tvayA || 6\.70||
tiryagUrdhvamadhastAchcha vyApako mahimA hareH |
trivikramodyatasyAsItsa cha svAbhAvikastava || 6\.71||
yaj~nabhAgabhujAM madhye padamAtasthuShA tvayA |
uchchairhiraNmayaM shR^i~NgaM sumerorvitathIkR^itam || 6\.72||
kAThinyaM sthAvare kAye bhavatA sarvamarpitam |
idaM tu bhaktinamraM te satAmArAdhanaM vapuH || 6\.73||
tadAgamanakAryaM naH shR^iNu kAryaM tavaiva tat |
shreyasAmupadeshAttu vayamatrAMshabhAginaH || 6\.74||
aNimAdiguNopetamaspR^iShTapuruShAntaram |
shabdamIshvara ityuchchaiH sArdhachandraM bibharti yaH || 6\.75||
kalpitAnyonyasAmarthyaiH pR^ithivyAdibhirAtmani |
yenedaM dhriyate vishvaM dhuryairyAnamivAdhvani || 6\.76||
yogino yaM vichinvanti kShetrAbhyantaravartinam |
anAvR^ittibhayaM yasya padamAhurmanIShiNaH || 6\.77||
sa te duhitaraM sAkShAtsAkShI vishvasya karmaNaH |
vR^iNute varadaH shambhurasmatsa~NkrAmitaiH padaiH || 6\.78||
tamarthamiva bhAratyA sutayA yoktumarhasi |
ashochyA hi pituH kanyA sadbhartre pratipAditA || 6\.79||
yAvadetAni bhUtAni sthAvarANi charANi cha |
mAtaraM kalpayantyenAmIsho hi jagataH pitA || 6\.80||
praNamya shitikaNThAya vibudhAstadanantaram |
charaNau ra~njayantyasyAshchUDAmaNimarIchibhiH || 6\.81||
umA vadhUrbhavAndAtA yAchitAra ime vayam |
varaH shambhuralaM hyeSha tvatkulodbhUtaye vidhiH || 6\.82||
astotuH stUyamAnasya vandyasyAnanyavandinaH |
sutAsambandhavidhinA bhava vishvagurorguruH || 6\.83||
evaM vAdini devarShau pArshve pituradhomukhI |
lIlAkamalapatrANi gaNayAmAsa pArvatI || 6\.84||
shailaH sampUrNakAmo.api menAmukhamudaikShata |
prAyeNa gR^ihiNInetrAH kanyArthe hi kuTumbinaH || 6\.85||
mene menApi tatsarvaM patyuH kAryamabhIpsitam |
bhavantyavyabhichAriNyo bharturiShTe pativratAH || 6\.86||
idamatrottaraM nyAyyamiti bud.hdhyA vimR^ishya saH |
Adade vachasAmante ma~NgalAla~NkR^itAM sutAm || 6\.87||
ehi vishvAtmane vatse bhikShAsi parikalpitA |
arthino munayaH prAptaM gR^ihamedhiphalaM mayA || 6\.88||
etAvaduktvA tanayAmR^iShInAha mahIdharaH |
iyaM namati vaH sarvAMstrilochanavadhUriti || 6\.89||
IpsitArthakriyodAraM te.abhinandya girervachaH |
AshIrbhiredhayAmAsuH puraHpAkAbhirambikAm || 6\.90||
tAM praNAmAdarasrasta\- jAmbUnadavataMsakAm |
a~NkamAropayAmAsa lajjamAnAmarundhatI || 6\.91||
tanmAtaraM chAshrumukhIM duhitR^isnehaviklavAm |
varasyAnanyapUrvasya vishokAmakarodguNaiH || 6\.92||
vaivAhikIM tithiM pR^iShTAstatkShaNaM harabandhunA |
te tryahAdUrdhvamAkhyAya chelushchIraparigrahAH || 6\.93||
te himAlayamAmantrya punaH prekShya cha shUlinam |
siddhaM chAsmai nivedyArthaM tadvisR^iShTAH khamudyayuH || 6\.94||
pashupatirapi tAnyahAni kR^ichChrAdagamayadadrisutAsamAgamotkaH |
kamaparamavashaM na viprakuryurvibhumapi taM yadamI spR^ishanti bhAvAH || 6\.95||

iti shrIkAlidAsakR^itau kumArasambhave mahAkAvye
umApradAno nAma ShaShThaH sargaH sampUrNaH || 6||
\section{sargaH 7 \- umApariNayaH}
athauShadhInAmadhipasya vR^iddhau tithau cha jAmitraguNAnvitAyAm |
sametabandhurhimavAnsutAyA vivAhadIkShAvidhimanvatiShThat || 7\.1||
vaivAhikaiH kautukasaMvidhAnairgR^ihe gR^ihe vyagrapurandhrivargam |
AsItpuraM sAnumato.anurAgAdantaHpuraM chaikakulopameyam || 7\.2||
santAnakAkIrNamahApathaM tachchInAMshukaiH kalpitaketumAlam |
bhAsA jvalatkA~nchanatoraNAnAM sthAnAntarasvarga ivAbabhAse || 7\.3||
ekaiva satyAmapi putrapa~Nktau chirasya dR^iShTeva mR^itotthiteva |
AsannapANigrahaNeti pitrorumA visheShochChvasitaM babhUva || 7\.4||
a~NkAdyayAva~NkamudIritAshIH sA maNDanAnmaNDanamanvabhu~Nkta |
sambandhibhinno.api gireH kulasya snehastadekAyatanaM jagAma || 7\.5||
maitre muhUrte shashalA~nChanena yogaM gatAsUttaraphalgunIShu |
tasyAH sharIre pratikarma chakrurbandhustriyo yAH patiputravatyaH || 7\.6||
sA gaurasiddhArthaniveshavadbhirdUrvApravAlaiH pratibhinnarAgam |
nirnAbhikausheyamupAttabANamabhya~Nganepathyamala~nchakAra || 7\.7||
babhau cha samparkamupetya bAlA navena dIkShAvidhisAyakena |
kareNa bhAnorbahulAvasAne sandhukShyamANeva shashA~NkalekhA || 7\.8||
tAM lodhrakalkena hR^itA~NgatailAmAshyAnakAleyakR^itA~NgarAgAm |
vAso vasAnAmabhiShekayogyaM nAryashchatuShkAbhimukhaM vyanaiShuH || 7\.9||
vinyastavaidUryashilAtale.asminnaviddhamuktAphalabhaktichitre |
AvarjitAShTApadakumbhatoyAH satUryamenAM snapayAM babhUvuH || 7\.10||
sA ma~NgalasnAnavishuddhagAtrI gR^ihItapatyudgamanIyavastrA |
nirvR^ittaparjanyajalAbhiShekA praphullakAshA vasudheva reje || 7\.11||
tasmAtpradeshAchcha vitAnavantaM yuktaM maNistambhachatuShTayena |
pativratAbhiH parigR^ihya ninye kL^iptAsanaM kautukavedimadhyam || 7\.12||
tAM prA~NmukhIM tatra niveshya tanvIM kShaNaM vyalambanta puro niShaNNAH |
bhUtArthashobhAhriyamANanetrAH prasAdhane sannihite.api nAryaH || 7\.13||
dhUpoShmaNA tyAjitamArdrabhAvaM keshAntamantaHkusumaM tadIyam |
paryAkShipatkAchidudArabandhaM dUrvAvatA pANDumadhUkadAmnA || 7\.14||
vinyastashuklAguru chakrurasyA gorochanApatravibha~Ngama~Ngam |
sA chakravAkA~NkitasaikatAyAstrisrotasaH kAntimatItya tasthau || 7\.15||
lagnadvirephaM paribhUya padmaM sameghalekhaM shashinashcha bimbam |
tadAnanashrIralakaiH prasiddhaishchichCheda sAdR^ishyakathAprasa~Ngam || 7\.16||
karNArpito lodhrakaShAyarUkShe gorochanAkShepanitAntagaure |
tasyAH kapole parabhAgalAbhAdbabandha chakShUMShi yavaprarohaH || 7\.17||
rekhAbibhaktashcha vibhaktagAtryAH ki~nchinmadhUchChiShTavimR^iShTarAgaH |
kAmapyabhikhyAM sphuritairapuShyadAsannalAvaNyaphalo.adhraroShThaH || 7\.18||
patyuH shirashchandrakalAmanena spR^isheti sakhyA parihAsapUrvam |
sA ra~njayitvA charaNau kR^itAshIrmAlyena tAM nirvachanaM jaghAna || 7\.19||
tasyAH sujAtotpalapatrakAnte prasAdhikAbhirnayane nirIkShya |
na chakShuShoH kAntivisheShabud.hdhyA kAlA~njanaM ma~NgalamityupAttam || 7\.20||
sA sambhavadbhiH kusumairlateva jyotirbhirudyadbhiriva triyAmA |
saridviha~Ngairiva lIyamAnairAmuchyamAnAbharaNA chakAse || 7\.21||
AtmAnamAlokya cha shobhamAnamAdarshabimbe stimitAyatAkShI |
haropayAne tvaritA babhUva strINAM priyAlokaphalo hi veShaH || 7\.22||
athA~NgulibhyAM haritAlamArdraM mA~NgalyamAdAya manaHshilAM cha |
karNAvasaktAmaladantapatraM mAtA tadIyaM mukhamunnamayya || 7\.23||
umAstanodbhedamanupravR^iddho manoratho yaH prathamo babhUva |
tameva menA duhituH katha~nchidvivAhadIkShAtilakaM chakAra || 7\.24||
babandha chAsrAkuladR^iShTirasyAH sthAnAntare kalpitasannivesham |
dhAtrya~NgulIbhiH pratisAryamANamUrNamayaM kautukahastasUtram || 7\.25||
kShIrodaveleva saphenapu~njA paryAptachandreva sharattriyAmA |
navaM navakShaumanivAsinI sA bhUyo babhau darpaNamAdadhAnA || 7\.26||
tAmarchitAbhyaH kuladevatAbhyaH kulapratiShTHAM praNamayya mAtA |
akArayatkArayitavyadakShA krameNa pAdagrahaNaM satInAm || 7\.27||
akhaNDitaM prema labhasva patyurityuchyate tAbhirumA sma namrA |
tayA tu tasyArdhasharIrabhAjA pashchAtkR^itAH snigdhajanAshiSho.a pi || 7\.28||
ichChAvibhUtyoranurUpamadristasyAH kR^itI kR^ityamasheShayitvA |
sabhyaH sabhAyAM suhR^idAsthitAyAM tasthau vR^iShA~NkAgamanapratIkShaH || 7\.29||
tAvadvarasyApi kuberashaile tatpUrvapANigrahaNAnurUpam |
prasAdhanaM mAtR^ibhirAdR^itAbhirnyastaM purastAtpurashAsanasya || 7\.30||
tadgauravAnma~NgalamaNDanashrIH sA paspR^ishe kevalamIshvareNa |
sva eva veShaH pariNeturiShTaM bhAvAntaraM tasya vibhoH prapede || 7\.31||
babhUva bhasmaiva sitA~NgarAgaH kapAlamevAmalashekharashrIH |
upAntabhAgeShu cha rochanA~Nko gajAjinasyaiva dukUlabhAvaH || 7\.32||
sha~NkhAntaradyoti vilochanaM yadantarniviShTAmalapi~NgatAram |
sAnnidhyapakShe haritAlamayyAstadeva jAtaM tilakakriyAyAH || 7\.33||
yathApradeshaM bhujageshvarANAM karishyatAmAbharaNAntaratvam |
sharIramAtraM vikR^itiM prapede tathaiva tasthuH phaNaratnashobhAH || 7\.34||
divApi niShThyUtamarIchibhAsA bAlyAdanAviShkR^italA~nChanena |
chandreNa nityaM pratibhinnamauleshchUDAmaNeH kiM grahaNaM harasya || 7\.35||
ityadbhutaikaprabhavaH prabhAvAtprasiddhanepathyavidhervidhAtA |
AtmAnamAsannagaNopanIte khaDge niShaktapratimaM dadarsha || 7\.36||
sa gopatiM nandibhujAvalambI shArdUlacharmAntaritorupR^iShTham |
tadbhaktisa~NkShiptabR^ihatpramANamAruhya kailAsamiva pratasthe || 7\.37||
taM mAtaro devamanuvrajantyaH svavAhanakShobhachalAvataMsAH |
mukhaiH prabhAmaNDalareNugauraiH padmAkaraM chakrurivAntarIkSham || 7\.38||
tAsAM cha pashchAtkanakaprabhANAM kAlI kapAlAbharaNA chakAse |
balAkinI nIlapayodarAjI dUraM puraHkShiptashatahradeva || 7\.39||
tato gaNaiH shUlabhR^itaH purogairudIrito ma~NgalatUryaghoShaH |
vimAnashR^i~NgANyavagAhamAnaH shashaMsa sevAvasaraM surebhyaH || 7\.40||
upAdade tasya sahasrarashmistvaShTrA navaM nirmitamAtapatram |
sa taddukUlAdavidUramaulirbabhau patadga~Nga ivottamA~Nge || 7\.41||
mUrte cha ga~NgAyamune tadAnIM sachAmare devamaseviShAtAm |
samudragArUpaviparyaye.api sahaMsapAte iva lakShyamANe || 7\.42||
tamanvagachChatprathamo vidhAtA shrIvatsalakShmA puruShashcha sAkShAt |
jayeti vAchA mahimAnamasya saMvardhayantyA haviSheva vahnim || 7\.43||
ekaiva mUrtirbibhide tridhA sA sAmAnyameShAM prathamAvaratvam |
viShNorharastasya hariH kadAchidvedhAstayostAvapi dhAturAdyau || 7\.44||
taM lokapAlAH puruhUtamukhyAH shrIlakShaNotsargavinItaveShAH |
dR^iShTipradAne kR^itanandisa.nj~nAstaddarshitAH prA~njalayaH praNemuH || 7\.45||
kampena mUrdhnaH shatapatrayoniM vAchA hariM vR^itrahaNaM smitena |
AlokamAtreNa surAnasheShAnsambhAvayAmAsa yathApradhAnam || 7\.46||
tasmai jayAshIH sasR^ije purastAtsaptarShibhistAnsmitapUrvamAha |
vivAhayaj~ne vitate.atra yUyamadhvaryavaH pUrvavR^itA mayeti || 7\.47||
vishvAvasuprAgraharaiH pravINaiH sa~NgIyamAnatripurAvadAnaH |
adhvAnamadhvAntavikArala~NghyastatAra tArAdhipakhaNDadhArI || 7\.48||
khe khelagAmI tamuvAha vAhaH sashabdachAmIkaraki~NkiNIkaH |
taTAbhighAtAdiva lagnapa~Nke dhunvanmuhuH protaghane viShANe || 7\.49||
sa prApadaprAptaparAbhiyogaM nagendraguptaM nagaraM muhUrtAt |
puro vilagnairharadR^iShTipAtaiH suvarNasUtrairiva kR^iShyamANaH || 7\.50||
tasyopakaNThe ghananIlakaNTHaH kutUhalAdunmukhapauradR^iShTaH |
svabANachihnAdavatIrya mArgAdAsannabhUpR^iShThamiyAya devaH || 7\.51||
tamR^iddhimadbandhujanAdhirUDhairvR^indairgajAnAM girichakravartI |
pratyujjagAmAgamanapratItaH praphullavR^ikShaiH kaTakairiva svaiH || 7\.52||
vargAvubhau devamahIdharANAM dvAre purasyodghaTitApidhAne |
samIyaturdUravisarpighoShau bhinnaikasetU payasAmivaughau || 7\.53||
hrImAnabhUdbhUmidharo hareNa trailokyavandyena kR^itapraNAmaH |
pUrvaM mahimnA sa hi tasya dUramAvarjitaM nAtmashiro viveda || 7\.54||
sa prItiyogAdvikasanmukhashrIrjAmAturagresaratAmupetya |
prAveshayanmandiramR^iddhamenamAgulphakIrNApaNamArgapuShpam || 7\.55||
tasminmuhUrte purasundarINAmIshAnasandarshanalAlasAnAm |
prAsAdamAlAsu babhUvuritthaM tyaktAnyakAryANi vicheShTitAni || 7\.56||
AlokamArgaM sahasA vrajantyA kayAchidudveShTanavAntamAlyaH |
bandhuM na sambhAvita eva tAvatkareNa ruddho.api na keshapAshaH || 7\.57||
prasAdhikAlambitamagrapAdamAkShipya kAchiddravarAgameva |
utsR^iShTalIlAgatirAgavAkShAdalaktakA~NkAM padavIM tatAna || 7\.58||
vilochanaM dakShiNama~njanena sambhAvya tadva~nchitavAmanetrA |
tathaiva vAtAyanasannikarShaM yayau shalAkAmaparA vahantI || 7\.59||
jAlAntarapreShitadR^iShtiranyA prasthAnabhinnAM na babandha nIvIm |
nAbhipraviShTAbharaNaprabheNa hastena tasthAvavalambya vAsaH || 7\.60||
ardhAchitA satvaramutthitAyAH pade pade durnimite galantI |
kasyAshchidAsIdrashanA tadAnIma~NguShThamUlArpitasUtrasheShA || 7\.61||
tAsAM mukhairAsavagandhagarbhairvyAptAntarAH sAndrakutUhalAnAm |
vilolanetrabhramarairgavAkShAH sahasrapatrAbharaNA ivAsan || 7\.62||
tAvatpatAkAkulamindumauliruttoraNaM rAjapathaM prapede |
prAsAdashR^i~NgANi divApi kurva~njyotsnAbhiShekadviguNadyutIni || 7\.63||
tamekadR^ishyaM nayanaiH pibantyo nAryo na jagmurviShayAntarANi |
tathA hi sheShendriyavR^ittirAsAM sarvAtmanA chakShuriva praviShTA || 7\.64||
sthAne tapo dushcharametadarthamaparNayA pelavayApi taptam |
yA dAsyamapyasya labheta nArI sA syAtkR^itArthA kimutA~NkashayyAm || 7\.65||
paraspareNa spR^ihaNIyashobhaM na chedidaM dvandvamayojayiShyat |
asmindvaye rUpavidhAnayatnaH patyuH prajAnAM viphalo.abhavishyat || 7\.66||
na nUnamArUDharuShA sharIramanena dagdhaM kusumAyudhasya |
vrIDAdamuM devamudIkShya manye sannyastadehaH svayameva kAmaH || 7\.67||
anena sambandhamupetya diShTyA manorathaprArthitamIshvareNa |
mUrdhAnamAli kShitidhAraNochchamuchchaistarAM vakShyati shailarAjaH || 7\.68||
ityoShadhiprasthavilAsinInAM shR^iNvankathAH shrotrasukhAstrinetraH |
keyUrachUrNIkR^italAjamuShTiM himAlayasyAlayamAsasAda || 7\.69||
tatrAvatIryAchyutadattahastaH sharadghanAddIdhitimAnivokShNaH |
krAntAni pUrvaM kamalAsanena kakShyAntarANyadripatervivesha || 7\.70||
tamanvagindrapramukhAshcha devAH saptarShipUrvAH paramarShayashcha |
gaNAshcha giryAlayamabhyagachChanprashastamArambhamivottamArthAH || 7\.71||
tatreshvaro viShTarabhAgyathAvatsaratnamarghyaM madhumachcha gavyam |
nave dukUle cha nagopanItaM pratyagrahItsarvamamantravarjam || 7\.72||
dukUlavAsAH sa vadhUsamIpaM ninye vinItairavarodharakShaiH |
velAsamIpaM sphuTaphenarAjirnavairudanvAniva chandrapAdaiH || 7\.73||
tayA pravR^iddhAnanachandrakAntyA praphullachakShuHkumudaH kumAryA |
prasannachetaHsalilaH shivo.abhUtsaMsR^ijyamAnaH sharadeva lokaH || 7\.74||
tayoH samApattiShu kAtarANi ki~nchidvyavasthApitasaMhR^itAni |
hrIyantraNAM tatkShaNamanvabhUvannanyonyalolAni vilochanAni || 7\.75||
tasyAH karaM shailagurUpanItaM jagrAha tAmrA~NgulimaShTamUrttiH |
umAtanau gUDhatanoH smarasya tachCha~NkinaH pUrvamiva praroham || 7\.76||
romodgamaH prAdurabhUdumAyAH svinnA~NguliH pu~NgavaketurAsIt |
vR^ittistayoH pANisamAgamena samaM vibhakteva manobhavasya || 7\.77||
prayuktapANigrahaNaM yadanyadvadhUvaraM puShyati kAntimagryAm |
sAnnidhyayogAdanayostadAnIM kiM kathyate shrIrubhayasya tasya || 7\.78||
pradakShiNaprakramaNAtkR^ishAnorudarchiShastanmithunaM chakAse |
merorupAnteShviva vartamAnamanyonyasaMsaktamahastriyAmam || 7\.79||
tau dampatI triH pariNIya vahni~NkarAgrasaMsparshanimIlitAkShIm |
tAM kArayAmAsa vadhUM purodhAstasminsamiddhArchiShi lAjamokSham || 7\.80||
sA lAjadhUmA~njalimiShTagandhaM gurUpadeshAdvadanaM ninAya |
kapolasaMsarpishikhaH sa tasyA muhUrtakarNotpalatAM prapede || 7\.81||
tadIShadArdrAruNagaNDalekhamuchChvAsikAlA~njanarAgamakShNoH |
vadhUmukhaM klAntayavAvataMsamAchAradhUmagrahaNAdbabhUva || 7\.82||
vadhUM dvijaH prAha tavaiSha vatse vahnirvivAhaM prati pUrvasAkShI |
shivena bhartrA saha dharmacharyA kAryA tvayA muktavichArayeti || 7\.83||
AlochanAntaM shravaNe vitatya pItaM gurostadvachanaM bhavAnyA |
nidAghakAlolbaNatApayeva mAhendramambhaH prathamaM pR^ithivyA || 7\.84||
dhruveNa bhartrA dhruvadarshanAya prayujyamAnA priyadarshanena |
sA dR^iShTa ityAnanamunnamayya hrIsannakaNThI kathamapyuvAcha || 7\.85||
itthaM vidhij~nena purohitena prayuktapANigrahaNopachArau |
praNematustau pitarau prajAnAM padmAsanasthAya pitAmahAya || 7\.86||
vadhUrvidhAtrA pratinandyate sma kalyANi vIraprasavA bhaveti |
vAchaspatiH sannapi so.aShTamUrttavAshAsya chintAstimito babhUva || 7\.87||
kL^iptopachArAM chaturasravedIM tAvetya pashchATkanakAsanasthau |
jAyApatI laukikameShitavyamArdrAkShatAropaNamanvabhUtAm || 7\.88||
patrAntalagnairjalabindujAlairAkR^iShTamuktAphalajAlashobham |
tayoruparyAyatanAladaNDamAdhatta lakShmIH kamalAtapatram || 7\.89||
dvidhA prayuktena cha vA~Nmayena sarasvatI tanmithunaM nunAva |
saMskArapUtena varaM vareNyaM vadhUM sukhagrAhyanibandhanena || 7\.90||
tau sandhiShu vya~njitavR^ittibhedaM rasAntareShu pratibaddharAgam |
apashyatAmapsarasAM muhUrtaM prayogamAdyaM lalitA~NgahAram || 7\.91||
devAstadante haramUDhabhAryaM kirITabaddhA~njalayo nipatya |
shApAvasAne pratipannamUrtteryayAchire pa~nchasharasya sevAm || 7\.92||
tasyAnumene bhagavAnvimanyurvyApAramAtmanyapi sAyakAnAm |
kAle prayuktA khalu kAryavidbhirvijNApanA bhartR^iShu siddhimeti || 7\.93||
atha vibudhagaNAMstAnindumaulirvisR^ijya kShitidharapatikanyAmAdadAnaH kareNa |
kanakakalasharakShAbhaktishobhAsanAthaM kShitivirachitashayyaM kautukAgAramAgAt || 7\.94||
navapariNayalajjAbhUShaNAM tatra gaurIM vadanamapaharantIM tatkR^itotkShepamIshaH |
api shayanasakhIbhyo dattavAchaM katha~nchitpramathamukhavikArairhAsayAmAsa gUDham || 7\.95||

iti shrIkAlidAsakR^itau kumArasambhave mahAkAvye
umApariNayo nAma saptamaH sargaH sampUrNaH || 7||
\section{sargaH 8 \- umAsuratavarNanaM}
pANipIDanavidheranantaraM shailarAjaduhiturharaM prati |
bhAvasAdhvasaparigrahAdabhUtkAmadohadamanoharaM vapuH || 8\.1||
vyAhR^itA prativacho na sandadhe gantumaichChadavalambitAMshukA |
sevate sma shayanaM parA~NmukhI sA tathApi rataye pinAkinaH || 8\.2||
kaitavena shayite kutUhalAtpArvatI pratimukhaM nipAtitam |
chakShurunmiShati sasmitaM priye vidyudAhatamiva nyamIlayat || 8\.3||
nAbhideshanihitaH sakampayA sha~Nkarasya rurudhe tayA karaH |
taddukUlamatha chAbhavatsvayaM dUramuchChvasitanIvibandhanam || 8\.4||
evamAli nigR^ihItasAdhvasaM sha~Nkaro rahasi sevyatAmiti |
sA sakhIbhirupadiShTamAkulA nAsmaratpramukhavartini priye || 8\.5||
apyavastuni kathApravR^ittaye prashnatatparamana~NgashAsanam |
vIkShitena parigR^ihya pArvatI mUrdhakampamayamuttaraM dadau || 8\.6||
shUlinaH karataladvayena sA sannirudhya nayane hR^itAMshukA |
tasya pashyati lalATalochane moghayatnavidhurA rahasyabhUt || 8\.7||
chumbaneShvadharadAnavarjitaM sannahastamadayopagUhane |
kliShTamanmathamapi priyaM prabhordurlabhapratikR^itaM vadhUratam || 8\.8||
yanmukhagrahaNamakShatAdharaM dattamavraNapadaM nakhaM cha yat |
yadrataM cha sadayaM priyasya tatpArvatI viShahate sma netarat || 8\.9||
rAtrivR^ittamanuyoktumudyataM sA vibhAtasamaye sakhIjanam |
nAkarodapakutUhalaM hriyA shaMsituM cha hR^idayena tatvare || 8\.10||
darpaNe cha paribhogadarshinI pR^iShThataH praNayino niSheduShaH |
prekShya bimbamanu bimbamAtmanaH kAni kAni na chakAra lajjayA || 8\.11||
nIlakaNThaparibhuktayauvanAM tAM vilokya jananI samAshvasat |
bhartR^ivallabhatayA hi mAnasIM mAturasyati shuchaM vadhUjanaH || 8\.12||
vAsarANi katichitkatha~nchana sthANunA ratamakAri chAnayA |
j~nAtamanmatharasA shanaiH shanaiH sA mumocha ratiduHkhashIlatAm || 8\.13||
sasvaje priyamuronipIDitA prArthitaM mukhamanena nAharat |
mekhalApaNayalolatAM gataM hastamasya shithilaM rurodha sA || 8\.14||
bhAvasUchitamadR^iShTavipriyaM chATumatkShaNaviyogakAtaram |
kaishchideva divasaistadA tayoH prema rUDhamitaretarAshrayam || 8\.15||
taM yathAtmasadR^ishaM varaM vadhUranvarajyata varastathaiva tAm |
sAgarAdanapagA hi jAhnavI so.api tanmukharasaikanirvR^itiH || 8\.16||
shiShyatAM nidhuvanopadeshinaH sha~Nkarasya rahasi prapannayA |
shikShitaM yuvatinaipuNaM tayA yattadeva gurudakShiNIkR^itam || 8\.17||
daShTamuktamadharoShThamAmbikA vedanAvidhutahastapallavA |
shItalena niravApayatkShaNaM maulichandrashakalena shUlinaH || 8\.18||
chumbanAdalakachUrNadUShitaM sha~Nkaro.api nayanaM lalATajam |
uchChvasatkamalagandhaye dadau pArvatIvadanagandhavAhine || 8\.19||
evamindriyasukhasya vartmanaH sevanAdanugR^ihItamanmathaH |
shailarAjabhavane sahomayA mAsamAtramavasadvR^iShadhvajaH || 8\.20||
so.anumAnya himavantamAtmabhUrAtmajAvirahaduHkhakheditam |
tatra tatra vijahAra sampatannaprameyagatinA kakudmatA || 8\.21||
merumetya marudAshugokShakaH pArvatIstanapuraskR^itAnkR^itI |
hemapallavavibha~NgasaMstarAnanvabhUtsuratamardanakShamAn || 8\.22||
padmanAbhacharaNA~NkitAshmasu prAptavatsvamR^itavipruSho navAH |
mandarasya kaTakeShu chAvasaptArvatIvadanapadmaShaTpadaH || 8\.23||
vAraNadhvanitabhItayA tayA kaNThasaktaghanabAhubandhanaH |
ekapi~Ngalagirau jagadgururnirvivesha vishadAH shashiprabhAH || 8\.24||
tasya jAtu malayasthalIrate dhUtachandanalataH priyAklamam |
AchachAma salava~NgakesarashchATukAra iva dakShiNAnilaH || 8\.25||
hematAmarasatADitapriyA tatkarAmbuvinimIlitekShaNA |
khe vyagAhata tara~NgiNImumA mInapa~NktipunaruktamekhalA || 8\.26||
tAM pulomatanayAlakochitaiH pArijAtakusumaiH prasAdhayan |
nandane chiramayugmalochanaH saspR^ihaM suravadhUbhirIkShitaH || 8\.27||
ityabhaumamanubhUya sha~NkaraH pArthivaM cha dayitAsakhaH sukham |
lohitAyati kadAchidAtape gandhamAdanagiriM vyagAhata || 8\.28||
tatra kA~nchanashilAtalAshrayo netragamyamavalokya bhAskaram |
dakShiNetarabhujavyapAshrayAM vyAjahAra sahadharmachAriNIm || 8\.29||
padmakAntimaruNatribhAgayoH sa~Nkramayya tava netrayoriva |
sa~NkShaye jagadiva prajeshvaraH saMharatyaharasAvaharpatiH || 8\.30||
sIkaravyatikaraM marIchibhirdUrayatyavanate vivasvati |
indrachApapariveShashUnyatAM nirjharAstava piturvrajantyamI || 8\.31||
daShTatAmarasakesarasrajoH krandatorviparivR^ittakaNThayoH |
nighnayoH sarasi chakravAkayoralpamantaramanalpatAM gatam || 8\.32||
sthAnamAhnikamapAsya dantinaH sallakIviTapabha~NgavAsitam |
AvibhAtacharaNAya gR^ihNAte vAri vAriruhabaddhaShaTpadam || 8\.33||
pashya pashchimadigantalambinA nirmitaM mitakathe vivasvatA |
dIrghayA pratimayA saro.ambhasAM tApanIyamiva setubandhanam || 8\.34||
uttaranti vinikIrya palvalaM gADhapa~NktamativAhitAtapAH |
daMShTriNo vanavarAhayUthapA daShTabha~NgurabisA~NkurA iva || 8\.35||
eSha vR^ikShashikhare kR^itAspado jAtarUparasagauramaNDalaH |
hIyamAnamaharatyayAtapaM pIvaroru pibatIva barhiNaH || 8\.36||
pUrvabhAgatimirapravR^ittibhirvyaktapa~Nkamiva jAtamekataH |
khaM hR^itAtapajalaM vivasvatA bhAti ki~nchidiva sheShavatsaraH || 8\.37||
AvishadbhiruTajA~NgaNaM mR^igairmUlasekasarasaishcha vR^ikShakaiH |
AshramAH pravishadagnidhenavo bibhrati shriyamudIritAgnayaH || 8\.38||
baddhakoshamapi tiShThati kShaNaM sAvasheShavivaraM kusheshayam |
ShaTpadAya vasatiM grahIShyate prItipUrvamiva dAtumantaram || 8\.39||
dUramagraparimeyarashminA vAruNI digaruNena bhAnunA |
bhAti kesaravateva maNDitA bandhujIvatilakena kanyakA || 8\.40||
sAmabhiH sahacharAH sahasrashaH syandanAshvahR^idaya~NgamasvaraiH |
bhAnumagniparikIrNatejasaM saMstuvanti kiraNoShmapAyinaH || 8\.41||
so.ayamAnatashirodharairhayaiH karNachAmaravighaTTitekShaNaiH |
astameti yugabhugnakesaraiH sannidhAya divasaM mahodadhau || 8\.42||
khaM prasuptamiva saMsthite ravau tejaso mahata IdR^ishI gatiH |
tatprakAshayati yAvadudgataM mIlanAya khalu tAvatashchyutam || 8\.43||
sandhyayApyanugataM ravervapurvandyamastashikhare samarpitam |
yena pUrvamudaye puraskR^itA nAnuyAsyati kathaM tamApadi || 8\.44||
raktapItakapishAH payomuchAM koTayaH kuTilakeshi bhAntyamUH |
drakShyasi tvamiti sandhyayAnayA vartikAbhiriva sAdhumaNDitAH || 8\.45||
siMhakesarasaTAsu bhUbhR^itAM pallavaprasaviShu drumeShu cha |
pashya dhAtushikhareShu bhAnunA saMvibhaktamiva sAndhyamAtapam || 8\.46||
adrirAjatanaye tapasvinaH pAvanAmbuvihitA~njalikriyAH |
brahma gUDhamabhisandhyamAdR^itAH shuddhaye vidhivido gR^iNantyamI || 8\.47||
tanmuhUrttamanumantumarhasi prastutAya niyamAya mAmapi |
tvAM vinodanipuNaH sakhIjano valguvAdini vinodayiShyati || 8\.48||
nirvibhujya dashanachChadaM tato vAchi bharturavadhIraNAparA |
shailarAjatanayA samIpagAmAlalApa vijayAmahetukam || 8\.49||
Ishvaro.api divasAtyayochitaM mantrapUrvamanutasthivAnvidhim |
pArvatImavachanAmasUyayA pratyupetya punarAha sasmitam || 8\.50||
mu~ncha kopamanimittakopane sandhyayA praNamito.asmi nAnyayA |
kiM na vetsi sahadharmachAriNaM chakravAkasamavR^ittimAtmanaH || 8\.51||
nirmiteShu pitR^iShu svayambhuvA yA tanuH sutanu pUrvamujjhitA |
seyamastamudayaM cha sevate tena mAnini mamAtra gauravam || 8\.52||
tAmimAM timiravR^iddhipIDitAM shailarAjatanaye.adhunA sthitAm |
ekatastaTatamAlamAlinIM pashya dhAturasanimnagAmiva || 8\.53||
sAndhyamastamitasheShamAtapaM raktalekhamaparA bibharti dik |
sAmparAyavasudhA sashoNitaM maNDalAgramiva tiryagujjhitam || 8\.54||
yAminIdivasasandhisambhave tejasi vyavahite sumeruNA |
etadandhatamasaM nira~NkushaM dikShu dIrghanayane vijR^imbhate || 8\.55||
nordhvamIkShaNagatirna chApyadho nAbhito na purato na pR^iShThataH |
loka eSha timiraughaveShTito garbhavAsa iva vartate nishi || 8\.56||
shuddhamAvilamavasthitaM chalaM vakramArjavaguNAnvitaM cha yat |
sarvameva tamasA samIkR^itaM dhi~NmahattvamasatAM hR^itAntaram || 8\.57||
nUnamunnamati yajvanAM patiH shArvarasya tamaso niShiddhaye |
puNDarIkamukhi pUrvadi~NmukhaM kaitakairiva rajobhirAvR^itam || 8\.58||
mandarAntaritamUrtinA nishA lakShyate shashabhR^itA satArakA |
tvaM mayA priyasakhIsamAgatA shroShyateva vachanAni pR^iShThataH || 8\.59||
ruddhanirgamanamA dinakShayAtpUrvadR^iShTatanuchandrikAsmitam |
etadudgirati chandramaNDalaM digrahasyamiva rAtrichoditam || 8\.60||
pashya pakvaphalinIphalatviShA bimbalA~nChitaviyatsaro.ambhasA |
viprakR^iShTavivaraM himAMshunA chakravAkamithunaM viDambyate || 8\.61||
shakyamoShadhipaternavodayAH karNapUrarachanAkR^ite tava |
apragalbhayavasUchikomalAshChettumagranakhasampuTaiH karAH || 8\.62||
a~NgulIbhiriva keshasa~nchayaM sannigR^ihya timiraM marIchibhiH |
kuDmalIkR^itasarojalochanaM chumbatIva rajanImukhaM shashI || 8\.63||
pashya pArvati navendurashmibhiH sAmibhinnatimiraM nabhastalam |
lakShyate dviradabhogadUShitaM samprasIdadiva mAnasaM saraH || 8\.64||
raktabhAvamapahAya chandramA jAta eSha parishuddhamaNDalaH |
vikriyA na khalu kAladoShajA nirmalaprakR^itiShu sthirodayA || 8\.65||
unnateShu shashinaH prabhA sthitA nimnasaMshrayaparaM nishAtamaH |
nUnamAtmasadR^ishI prakalpitA vedhaseha guNadoShayorgatiH || 8\.66||
chandrapAdajanitapravR^ittibhishchandrakAntajalabindubhirgiriH |
mekhalAtaruShu nidritAnamUnbodhayatyasamaye shikhaNDinaH || 8\.67||
kalpavR^ikShashikhareShu samprati prasphuradbhiriva pashya sundari |
hArayaShTigaNanAmivAMshubhiH kartumAgatakutUhalaH shashI || 8\.68||
unnatAvanatabhAvavattayA chandrikA satimirA gireriyam |
bhaktibhirbahuvidhAbhirarpitA bhAti bhUtiriva mattadantinaH || 8\.69||
etaduchChvasitapItamaindavaM voDhumakShamamiva prabhArasam |
muktaShaTpadavirAvama~njasA bhidyate kumudamA nibandhanAt || 8\.70||
pashya kalpatarulambi shuddhayA jyotsnayA janitarUpasaMshayam |
mArute chalati chaNDi kevalaM vyajyate viparivR^ittamaMshukam || 8\.71||
shakyama~NgulibhiruddhR^itairadhaH shAkhinAM patitapuShpapeshalaiH |
patrajarjarashashiprabhAlavairebhirutkachayituM tavAlakAn || 8\.72||
eSha chArumukhi yogatArayA yujyate taralabimbayA shashI |
sAdhvasAdupagataprakampayA kanyayeva navadIkShayA varaH || 8\.73||
pAkabhinnasharakANDagaurayorullasaptratikR^itiprasannayoH |
rohatIva tava gaNDalekhayoshchandrabimbanihitAkShNi chandrikA || 8\.74||
lohitArkamaNibhAjanArpitaM kalpavR^ikShamadhu bibhratI svayam |
tvAmiyaM sthitimatImupasthitA gandhamAdanavanAdhidevatA || 8\.75||
Ardrakesarasugandhi te mukhaM mattaraktanayanaM svabhAvataH |
atra labdhavasatirguNAntaraM kiM vilAsini madaH kariShyati || 8\.76||
mAnyabhaktirathavA sakhIjanaH sevyatAmidamana~NgadIpanam |
ityudAramabhidhAya sha~NkarastAmapAyayata pAnamambikAm || 8\.77||
pArvatI tadupayogasambhavAM vikriyAmapi satAM manoharAm |
apratarkyavidhiyoganirmitAmAmrateva sahakAratAM yayau || 8\.78||
tatkShaNaM viparivartitahriyorneShyatoH shayanamiddharAgayoH |
sA babhUva vashavartinI dvayoH shUlinaH suvadanA madasya cha || 8\.79||
ghUrNamAnanayanaM skhalatkathaM svedibindumadakAraNasmitam |
Ananena na tu tAvadIshvarashchakShuShA chiramumAmukhaM papau || 8\.80||
tAM vilambitapanIyamekhalAmudvaha~njaghanabhAradurvahAm |
dhyAnasambhR^itavibhUtirIshvaraH prAvishanmaNishilAgR^ihaM rahaH || 8\.81||
tatra haMsadhavalottarachChadaM jAhnavIpulinachArudarshanam |
adhyasheta shayanaM priyAsakhaH shAradAbhramiva rohiNIpatiH || 8\.82||
kliShTakeshamavaluptachandanaM vyatyayArpitanakhaM samatsaram |
tasya tachChiduramekhalAguNaM pArvatIratamabhUnna tR^iptaye || 8\.83||
kevalaM priyatamAdayAlunA jyotiShAmavanatAsu pa~NktiShu |
tena tatparigR^ihItavakShasA netramIlanakutUhalaM kR^itam || 8\.84||
sa vyabudhyata budhastavochitaH shatakumbhakamalAkaraiH samam |
mUrchChanAparigR^ihItakaishikaiH kinnarairuShasi gItama~NgalaH || 8\.85||
tau kShaNaM shithilitopagUhanau dampatI chalitamAnasormayaH |
padmabhedapishunAH siShevire gandhamAdanavanAntamArutAH || 8\.86||
UrumUlanakhamArgarAjibhistatkShaNaM hR^itavilochano haraH |
vAsasaH prashithilasya saMyamaM kurvatIM priyatamAmavArayat || 8\.87||
sa prajAgarakaShAyalochanaM gADhadantapadatADitAdharam |
AkulAlakamaraMsta rAgavAnprekShya bhinnatilakaM priyAmukham || 8\.88||
tena bha~NgiviShamottarachChadaM madhyapiNDitavisUtramekhalam |
nirmale.api shayanaM nishAtyaye nojjhitaM charaNarAgalA~nChitam || 8\.89||
sa priyAmukharasaM divAnishaM harShavR^iddhijananaM siSheviShuH |
darshanapraNayinAmadR^ishyatAmAjagAma vijayAnivedanAt || 8\.90||
samadivasanishIthaM sa~Nginastatra shambhoH
shatamagamadR^itUnAM sAgramekA nisheva |
na tu suratasukheShu ChinnatR^iShNo babhUva
jvalana iva samudrAntargatastajjaleShu || 8\.91||
iti shrIkAlidAsakR^itau kumArasambhave mahAkAvye
umAsuratavarNanaM nAmAShTamaH sargaH sampUrNaH || 8||
\section{sargaH 9 \- kailAsagamanaM}
tathAvidhe.ana~Ngarasaprasa~Nge
mukhAravinde madhupaH priyAyAH |
sambhogaveshma pravishantamanta\-
rdadarsha pArAvatamekamIshaH || 9\.1||
sukAntakAntAmaNitAnukAraM
kUjantamAdhUrNitaraktanetram |
prasphAritonnamravinamrakaNThaM
muhurmuhurnya~nchitachArupuchCham || 9\.2||
vishR^i~NkhalaM pakShatiyugmamIShad\-
dadhAnamAnandagatiM madena |
shubhrAMshuvarNa jaTilAgrapAda\-
mitastato maNDalakaishcharantam || 9\.3||
ratidvitIyena manobhavena
hradayAtsudhAyA pravigAhyamAnAt |
taM vIkShya phenasya chayaM navottha\-
mivAbhyanandatkShaNamindumauliH || 9\.4||
tasyAkR^itiM kAmapi vIkShya
divyAmantarbhavashChadyaviha~Ngamagnim |
vichintayansaMvivide sa devo
bhrUbha~NgabhImashcha ruShA babhUva || 9\.5||
svarupamAsthAya tato hutAsha\-
strasanvalatkampa kR^itA~njaliH san |
pravepamAno nitarAM smarArimidaM
vacho vyaktamathAdhyuvAcha || 9\.6||
asi tvameko jagatAmadhIshaH
svargaukasAM tvaM vipado nihaMsi |
tataH surendrapramukhAH prabho tvA\-
mupAsate daityavarairvidhUtAH || 9\.7||
tvayA priyApremavashaMvadena
shataM vyatIye suratAdR^itUnAm |
rahaH sthitena tvadavIkShaNArto
dainyaM paraM prApa suraiH surendraH || 9\.8||
tvadIyasevAvasarapratIkShai\-
rabhyarthitaH shakramukhaiH suraistvAm |
upAgato.anveShTumahaM viha~Nga\-
rupeNa vidvansamayochitena || 9\.9||
iti prabho chetasi sampradhArya
tanno.aparAdhaM bhagavan kShamasva |
parAbhibhUtA vada kiM kShamante
kAlAtipAtaM sharaNArthino.amI || 9\.10||
prabho prasIdAshu sR^ijAtmaputraM
yaM prApya senAnyamasau surendraH |
svarlokalakShmIprabhutAmavApya
jagattrayaM pAti tava prasAdAt || 9\.11||
sa sha~NkarastAmiti jAtavedo
vij~nApanAmarthavatIM nishamya |
abhUtprasannaH paritoShayanti
gIrbhirgirishA ruchirAbhirIsham || 9\.12||
prasannachetA madanAntakAraH
sa tArakArerjayino bhavAya |
shakrasya senAdhipaterjayAya
vyachintayachchetasi bhAvi ki~nchit || 9\.13||
yugAntakAlAgnimivAviShahyaM
parichyutaM manmathara~Ngabha~NgAt |
ratAntaretaH sa hiraNyareta\-
syathordhvaretAstadamoghamAdhAt || 9\.14||
athoShNabAShpAniladUShitAntaM
vishuddhamAdarshamivAtmadeham |
babhAra bhUmnA sahasA purAri\-
retaH parikShepakuvarNamagniH || 9\.15||
tvaM sarvabhakSho bhava bhImakarmA
kuShThAbhibhUto.anala dhUmagarbhaH |
itthaM shashApAdrisutA hutAshaM
ruShTA ratAnandasukhasya bha~NgAt || 9\.16||
dakShasya shApena shashI kShayIva
pluShTo himeneva sarojakoshaH |
vahanvirupaM vapurugrareta\-
shchayena vahniH kila nirjagAma || 9\.17||
sa pAvakAlokaruShA vilakShAM
smaratrapAsmeravinamravaktrAm |
vinodayAmAsa girIndraputrIM
shrR^i~NgAragarbhairmadhurairvachobhiH || 9\.18||
haro vikIrNaM ghanagharmatoyai
rnetrA~njanA~NkaM hR^idayapriyAyAH |
dvitIyakaupInachalA~nchalenA
haranmukhendorakala~Nkino.asyAH || 9\.19||
mandena khinnA~NgulinA kareNa
kampreNa tasyA vadanAravindAt |
parAmR^ishangharmajalaM jahAra
haraH sahelaM vyajanAnilena || 9\.20||
ratishlathaM tatkabarIkalApa\-
maMsAvasaktaM vigalatprasUnam |
sa pArijAtodbhavapuShpamayyA
strajA babandhAmR^itamUrtimauliH || 9\.21||
kapolapAlyAM mR^iganAbhichitra
patrarAvalImindumukhaH sumukhyAH |
smarasya siddhasya jagadvimoha
mantrAkSharashreNimivollilekha || 9\.22||
rathasya karNAvabhi tanmukhasya
tATa~NkachakradvitayaM nyadhAtsaH |
jagajjigIShurviShameShureSha
dhruvaM yamArohati puShpachApaH || 9\.23||
tasyAH sa kaNThe pihitastanAgrAM
nyadhatta muktAphalahAravallIm |
yA prApa merudvitayasya mUrdhni
sthitasya gA~Ngaughayugasya lakShmIm || 9\.24||
nakhavraNashreNivare babandha
nitambabimbe rashanAkalApam |
chalasvachetomR^igabandhanAya
manobhuvaH pAshamiva smarAriH || 9\.25||
bhAlekShaNAgnau svayama~njanaM sa
bha~NktvA dR^ishoH sAdhu niveshya tasyAH |
navotpalAkShyAH pulakopagUDhe
kaNThe vinIle.a~NgulimujjagharSha || 9\.26||
alaktakaM pAdasaroruhAgre
saroruhAkShyAH kila sanniveshya |
svamauliga~NgAsalilena hastA
ruNatvamakShAlayadinduchUDaH || 9\.27||
bhasmAnulipte vapuShi svakIye
sahelamAdarshatalaM vimR^ijya |
nepathyalakShmyAH paribhAvanArtha
madarshayajjIvitavallabhAM saH || 9\.28||
priyeNa datte maNidarpaNe sA
sambhogachihnaM svavapurvibhAvya |
trapAvatI tatra ghanAnurAgaM
romA~nchadambhena bahirbabhAra || 9\.29||
nepathyalakShmIM dayitopaklR^iptAM
sasmeramAdarshatale vilokya |
amaMsta saubhAgyavatIShu dhurya
mAtmAnamuddhUtavilakShabhAvA || 9\.30||
antaH pravishyAvasare.atha tatra
snigdhe vayasye vijayA jayA cha |
susampadopAcharatAM kalAnA
ma~Nke sthitAM tAM shashikhaNDamauleH || 9\.31||
vyadhurbahirma~NgalagAnamuchchai
rvaitAlikAshchitracharitrachAru |
jagushcha gandharvagaNAH sasha~Nkha
svanaM pramodAya pinAkapANeH || 9\.32||
tataH svasevAvasare surANAM
gaNAMstadAlokanatatparANAm |
dvAri pravishya praNato.atha nandI
nivedayAmAsa kR^itA~njaliH san || 9\.33||
maheshvaro mAnasarAjahaMsIM
kare dadhAnastanayAM himAdreH |
sambhogalIlAlayataH sahelaM
haro bahistAnabhi nirjagAma || 9\.34||
kramAnmahendrapramukhAH praNemuH
shironibaddhA~njalayo mahesham |
prAleyashailAdhipatestanUjAM
devIM cha lokatrayamAtaraM te || 9\.35||
yathAgataM tAnvibudhAnvisR^ijya
prasAdya mAnakriyayA pratasthe |
sa nandinA dattabhujo.adhiruhya
vR^iShaM vR^iShA~NkaH saha shailaputryA || 9\.36||
manotivegena kakudmatA sa
pratiShThamAno gaganAdhvano.antaH |
vaimAnikaiH sA~njalibhirvavande
vihArahelAgatibhirgirIshaH || 9\.37||
svarvAhinIvArivihArachArI
ratAntanArIshramashAntikArI |
tau pArijAtaprasavaprasa~Ngo
marutsiSheve girIjAgirIshau || 9\.38||
pinAkinApi sphaTikAchalendraH
kailAsanAmA kalitAmbarAMshaH |
dhR^itArdhasomo.adbhutabhogibhogo
vibhUtidhArI sva iva prapede || 9\.39||
vilokya yatra sphaTikaraya bhittau
siddhA~NganAH svaM pratibimbamArAt |
bhrAntyA parasyA vimukhIbhavanti
priyeShu mAnagrahilA namatsu || 9\.40||
subimbitasya sphaTikAMshugupte
shchandrasya chihnaprakaraH karoti |
gauryArpitasyeva rasena yatra
kastUrikAyAH shakalasya lIlAm || 9\.41||
yadIyabhittau pratibimbitA~Nga
mAtmAnamAlokya ruShA karIndrAH |
mattAnyakumbhibhramato.atibhIma
dantAbhighAtavyasanaM vahanti || 9\.42||
nishAsu yatra pratibimbitAni
tArAkulAni sphaTikAlayeShu |
dR^iShTvA ratAntachyutatArahAra
yuktAbhramaM bibhrati siddhavadhvaH || 9\.43||
nabhashcharImaNDanardapaNashrIH
sudhAnidhirmUrdhani yasya tiShThan |
anardhyachUDAmaNitAmupaiti
shailAdhinAthasya shivAlayasya || 9\.44||
samIyivAMso rahasi smarArtA
riraMsavo yatra surAH priyAbhiH |
ekAkino.api pratibimbabhAjo
vibhAnti bhUyobhirivAnvitAH svaiH || 9\.45||
devo.api gauryA saha chandramauli
ryadR^ichChayA sphATikashailashrR^i~Nge |
shrR^i~NgAracheShTAbhiranAratAbhi
rmanoharAbhirvyaharachchirAya || 9\.46||
devasya tasya smarasUdanasya
hastaM samAli~Ngya suvibhramashrIH |
sA nandinA vetrabhR^itopadiShTa
mArgA purogeNa kalaM chachAla || 9\.47||
chalachChikhAgro vikaTA~Ngabha~NgaH
sudanturaH shuklasutIkShNatuNDaH |
bhruvopadiShTaH sa tu sha~NkareNa
tasyA vinodAya nanarta bhR^i~NgI || 9\.48||
kaNThasthalIlolakapAlamAlA
daMShTrAkarAlAnanamabhyanR^ityat |
prItena tena prabhuNA niyuktA
kAlI kalatrasya mude priyasya || 9\.49||
bhaya~Nkarau tau vikaTaM nadantau
vilokya bAlA bhayavihvalA~NgI |
sarAgamutsa~Ngamana~Ngashatro
rgADhaM prasahya svayamAlili~Nga || 9\.50||
uttu~NgapInastanapiNDapIDaM
sasambhramaM tatparirambhamIshaH |
prapadya sadya pulakopagUDhaH
smareNa ruDhapramado mamAda || 9\.51||
iti giritanujAvilAsalIlA
vividhavibha~NgibhireSha toShitaH san |
amR^itakarashiromaNirgirIndre
kR^itavasatirvashibhirgaNairnananda || 9\.52||

iti shrIkAlidAsakR^itau kumArasambhave mahAkAvye
kailAsagamanaM nAma navamaH sargaH sampUrNaH || 9||
\section{sargaH 10 \- kumArotpattiH}
AsasAda sunAsIraM sadasi tridashaiH saha |
eSha traiyambakaM tIvraM vahanvahnimaMhanmahaH || 10\.1||
sahasreNa dR^ishAmIsho kutsitA~NgaM cha sAdaram |
durdarshanaM dadarshAgniM dhUmradhUmitamaNDalam || 10\.2||
dR^iShTvA tathAvidhaM vahnimindraH kShubdhena chetasA |
vyachintayachchiraM ki~nchitkandarpadveShiroShajam || 10\.3||
sa vilakShyamukhairdevairvIkShyamANaH kShaNaM kShaNam |
upAvishatsurendreNAdiShTaM sAdaramAsanam || 10\.4||
havyavAha ! tvayAsAdi durdasheyaM dashA kutaH |

iti pR^iShTaH surendreNa sa niHshvasya vacho.avadat || 10\.5||
anatikramaNIyAtte shAsanAtsuranAyaka |
pArAvata vapuH prApya vepamAno.atisAdhvasAt || 10\.6||
abhigauri ratAsaktaM jagAmAhaM maheshvaram |
kAlasyeva smarArAteH svaM rupamahamAsadam || 10\.7||
dR^iShTvA Chadmaviha~NgaM mAM suj~no vij~nAya jambhabhit |
jvaladbhAlAnale hotuM kopano mAmamanyata || 10\.8||
vachobhirmadhuraiH sArthairvanamreNa mayA stutaH |
prItimAnabhavaddevaH stotraM kasya na tuShTaye || 10\.9||
sharaNyaH sakalatrAtA mAmatrAyata sha~NkaraH |
krodhAgnerjvalato grAsAtrtrAsato durnivArataH || 10\.10||
parihR^itya parIrambharabhasaM duhiturgireH |
kAmakelirasotsekAd vrIDayA virarAma saH || 10\.11||
ra~Ngabha~NgachyutaM retastadAmoghaM sudurvaham |
trijagaddAhakaM sadyo madvigrahamadhi nyadhAt || 10\.12||
durviShahyeNa tenAhaM tejasA dahanAtmanA |
nirdagdhamAtmano dehaM durvahaM voDhumakShamaH || 10\.13||
raudreNa dahyamAnasya mahasAtimahIyasA |
mama prANaparitrANapraguNo bhava vAsava ! || 10\.14||
iti shrutvA vacho bahneH paritApopashAntaye |
hetuM vichintayAmAsa manasA vibudheshvaraH || 10\.15||
tejodagdhAni gAtrANi pANinAsya parAmR^ishan |
ki~nchitkR^ipITayoniM taM divaspatirabhAShata || 10\.16||
prItaH svAhAsvadhAhantakAraiH prINayase svayam |
devAnpitR^InmanuShyAMstvamekasteShAM mukhaM yataH || 10\.17||
tvayi juhvati hotAro havIMShi dhvastakalmaShAH |
bhu~njanti svargamekastvaM svargaprAptau hi kAraNam || 10\.18||
havIMShi mantrapUtAni hutAsha ! tvayi juhvataH |
tapasvinastapaHsiddhiM yAnti, tvaM tapasAM prabhuH || 10\.19||
nidhatse hutamarkAya, sa parjanyo.abhivarShati |
tato.annAni, prajAstebhyastenAsi jagataH pitA || 10\.20||
antashcharo.asi bhUtAnAM, tAni tvatto bhavanti cha |
tato jIvitabhUtastvaM jagataH prANado.asi cha || 10\.21||
jagataH sakalasyAsya tvameko.asyupakArakR^it |
kAryopapAdane tatra tvatto.anyaH kaH pragalbhate ? || 10\.22||
amIShAM surasa~NghAnAM tvameko.arthasamarthane |
vipattirapi saMshlAghyopakAravratino.anala || 10\.23||
devI bhAgIrathI pUrva bhaktyAsmAbhiH pratoShitA |
nimajjatastavodIrNaM tApaM nirvApayiShyati || 10\.24||
ga~NgAM tadgachCha mA kArShI vilambaM havyavAhana |
kAryeShvavashyakAryeShu siddhaye kShiprakAritA || 10\.25||
shambhorambhomayI mUrtiH saiva devI surApagA |
tvattaH smaradviSho bIjaM durdharaM dhArayiShyati || 10\.26||
ityudIrya sunAsIro virarAma, sa chAnalaH |
tadvisR^iShTastamApR^ichChya pratasthe svardhunImabhi || 10\.27||
hiraNyaretasA tena devI svargatara~NgiNI |
tIrNAdhvanA prapede sA niHsheShakleshanAshinI || 10\.28||
svargArohaNaniHshreNirmokShamArgAdhidevatA |
udAraduritodgArahAriNI durgatAriNI || 10\.29||
maheshvarajaTAjUTavAsinI, pApanAshinI |
sarAgAnvayanirvANakAriNI, dharmadhAriNI || 10\.30||
viShNupAdodakodbhUtA, brahmalokAdupAgatA |
tribhiH strotobhirashrAntaM punAnA bhuvanatrayam || 10\.31||
jAtavedasamAyAntamUrmihastaiH samutthitaiH |
AjuhAvArthasid.hdhyai taM suprasAdadhareva sA || 10\.32||
sammiladbhirmarAlaiH sA kalaM kUjadbhirunmadaiH |
dade shreyAMsi duHkhAni nihanmIti tamabhyadhAt || 10\.33||
kallolairudgatairarvAchInaM taTamabhidrutaiH |
prIteva tamabhIyAya svardhunI jAtavedasam || 10\.34||
athAbhyupetastApArto nimamajjAnalaH kila |
vipadA paribhUtAH kiM vyavasyanti vilambitum || 10\.35||
ga~NgAvAriNi kalyANakAriNi shramahAriNi |
sa magno nirvR^itiM prApa puNyabhAriNi tAriNi || 10\.36||
tatra mAheshvaraM dhAma sa~nchakrAma havirbhujaH |
ga~NgAyAmuttara~NgAyAmantastApavipaddhR^iti || 10\.37||
kR^ishAnuretaso retasyAdR^ite saritA tayA |
nishchakrAma tataH saukhyaM havyavAho vahanbahu || 10\.38||
sudhAsArairivAmbhobhirabhiShikto hutAshanaH |
yathAgataM jagAmAtha parAM nirvR^itimAdadhat || 10\.39||
sA sudurviShahaM ga~NgA dhAma kAmajito mahat |
AdadhAnA parItApamavApa vyomavAhinI || 10\.40||
bahirArtA yugAntAgnestaptAnIva shikhAshataiH |
hitvoShNAni jalAnyasyA nirjagmurjalajantavaH || 10\.41||
tejasA tena raudreNa taptAni salilAnyapi |
samuda~nchanti chaNDAni durdharANi babhAra sA || 10\.42||
jagachchakShuShi chaNDAMshau ki~nchidabhyudayonmukhe |
jagmuH ShaT kR^ittikA mAghe mAsi snAtuM surApagAm || 10\.43||
shubhrairabhra~NkaShairUrmishataiH svarganivAsinAm |
kathayantImivAlokAvagAhA chamanAdikam || 10\.44||
susnAtAnAM munIndrANAM balikarmochitairalam |
bahiH puShpotkaraiH kIrNatIrAM dUrvAkShatAnvitaiH || 10\.45||
brahmadhyAnaparairyogaparairbrahmAsanasthitaiH |
yoganidrAgatairyogapaTTabandhairupAshritAm || 10\.46||
pAdA~NguShThAgrabhUmisthaiH sUryasambaddhadR^iShTibhiH |
brahmarShibhiH paraM brahma gR^iNadbhirupasevitAm || 10\.47||
atha divyAM nadIM devImabhyanandanvilokya tAH |
kaM nAbhinandayatyeShA dR^iShTA pIyUShavAhinI || 10\.48||
chandrachUDAmaNirdevo yAmudvahati mUrdhani |
yasyA vilokanaM puNyaM shraddadhUstA mudA hR^idi || 10\.49||
divyAM viShNupadIM devIM nirvANapadadeshinIm |
nirdhUtakalmaShAM mUrdhnA suprahvAstA vavandire || 10\.50||
saubhAgyaiH khalu suprApAM mokShapratibhuvaM satIm |
bhaktyAtra tuShTuvustAM tAH shraddadhAnA divodhunIm || 10\.51||
muktistrIsa~NgadUtyaj~naistatra tA vimalairjalaiH |
prakShAlitamalAH sasnuH susnAtAstapasAnvitAH || 10\.52||
snAtvA tatra sulabhyAyAM bhAgyaiH paripachelimaiH |
charitArthaM svamAtmAnaM bahu tA menire mudA || 10\.53||
kR^ishAnuretaso retastAsAmabhikalevaram |
amoghaM sa~nchachArAtha sadyo ga~NgAvagAhanAt || 10\.54||
raudraM sudurdharaM dhAma dadhAnA dahanAtmakam |
paritApamavApustA magnA iva viShAmbudhau || 10\.55||
akShamA durvahaM voDhumambuno bahirAturAH |
agniM jvalantamantastA dadhAnA iva niryayuH || 10\.56||
amoghaM shAmbhavaM bIjaM sadyo nadyojjhitaM mahat |
tAsAmabhyudaraM dIptaM sthitaM garbhatvamAgamat || 10\.57||
suj~nA vij~nAya tA garbhabhUtaM tadvoDhumakShamAH |
viShAdamadadhuH sadyo gADhaM bhartR^ibhiyA hriyA || 10\.58||
tataH sharavaNe sArdhaM bhayena vrIDayA cha tAH |
tadgarbhajAtamutsR^ijya svAn gR^ihAnabhiniryayuH || 10\.59||
tAbhistatrAmR^itakarakalAkomalaM bhAsamAnaM
tadvikShiptaM kShaNamabhinabhogarbhamabhyujjihAnaiH |
svaistejobhirdinapatishataspardhamAnairamAnai
rvaktraiH Sha~NbhiH smaraharaguruspardhayevAjanIva || 10\.60||

iti shrIkAlidAsakR^itau kumArasambhave mahAkAvye
kumArotpattirnAma dashamaH sargaH sampUrNaH || 10||
\section{sargaH 11 \- kumArasya bAlakrIDA}
abhyarthyamAnA vibudhaiH samagraiH prahvaiH surendrapramukhairupetya |
taM pAyayAmAsa sudhAtipUrNaM surApagA svaM stanamAshu mUrtA || 11\.1||
piban sa tasyAH stanayoH sudhaughaM kShaNaM kShaNaM sAdhu samedhamAnaH |
prApAkR^itiM kAmapi ShaDbhiretya niShevyamANaH khalu kR^ittikAbhiH || 11\.2||
bhAgIrathIpAvakakR^ittikAnAmAnandabAShpAkulalochanAnAm |
taM nandanaM divyamupAttumAsItparasparaM prauDhataro vivAdaH || 11\.3||
atrAntare parvatarAjaputryA samaM shivaH svairavihArahetoH |
nabho vimAnena vigAhamAno manotivegena jagAma tatra || 11\.4||
nisargavAtsalyavashAdvivR^iddhachetaHpramodau galadashrunetrau |
apashyatAM taM girijAgirIshau ShaDAnanaM ShaDdinajAtamAtram || 11\.5||
athAha devI shashikhaNDamauliM ko.ayaM shishurdivyavapuH purastAt |
kasyAthavA dhanyatamasya puMso mAtAsya kA bhAgyavatIShu dhuryA || 11\.6||
svargApagAsAvanalo.ayametAH ShaT kR^ittikAH kiM kalahAyamAnAH |
putro mamAyaM na tavAyamitthaM mithyeti vailakShyamudAharanti || 11\.7||
eteShu kasyedamapatyamIshAkhilatrilokItilakAyamAnam |
anyasya kasyApyatha devadaityagandharvasiddhoragarAkShaseShu || 11\.8||
shrutveti vAkyaM hR^idayapriyAyAH kautUhalinyA vimalasmitashrIH |
sAndrapramododayasaikhyahetubhUtaM vacho.avochata chandrachUDaH || 11\.9||
jagattrayInandana eSha vIraH pravIramAtustava nandano.asti |
kalyANi ! kalyANakaraH surANAM tvatto.aparasyAH kathameSha sargaH || 11\.10||
devi tvamevAsya nidAnamAsse sarge jaganma~NgalagAnahetoH |
satyaM tvameveti vichArayasva ratnAkare yujyata eva ratnam || 11\.11||
ataH shrR^iNuShvAvahitena vR^ittaM bIjaM yadagnau nihitaM mayA tat |
sa~NkrAntamanta stridashApagAyAM tato.avagAhe sati kR^ittikAsu || 11\.12||
garbhatvamAptaM tadamoghametattAbhiH sharastambamadhi nyadhAyi |
babhUva tatrAyamabhUtapUrvo mahotsavo.asheShacharAcharasya || 11\.13||
asheShavishvapriyadarshanena dhuryA tvametena suputriNInAm |
alaM vilambyAchalarAjaputri ! svaputramutsa~Ngatale nidhehi || 11\.14||
atheti vAdinyamR^itAMshumaulau shailendraputrI rabhasena sadyaH |
sAndrapramodena supInagAtrI dhAtrI samastasya charAcharasya || 11\.15||
kirITabaddhA~njalibhirnabhaHsthairnamaskR^itA satvaranAkilokaiH |
vimAnato.avAtaradAtmajaM taM grahItumutkaNThitamAnasAbhUt || 11\.16||
svargApagApAvakakR^ittikAdIn kR^itA~njalInAnamato.api bhUyaH |
hitvotsukA taM sutamAsasAda putrotsave mAdyati kA na harShAt || 11\.17||
pramodabAShpAkulalochanA sA na taM dadarsha kShaNamagrato.api |
parispR^ishantI karaku~Nmalena sukhAntaraM prApa kimapyapUrvam || 11\.18||
suvismayAnandavikasvarAyAH shishurgaladbAShpatara~NgitAyAH |
vivR^iddhavAtsalyarasottarAyA devyA dR^ishorgocharatAM jagAma || 11\.19||
tamIkShamANA kShaNamIkShaNAnAM sahasramAptuM vinimeShamaichChat |
sA nandanAlokanama~NgaleShu kShaNaM kShaNaM tR^ipyati kasya chetaH ? || 11\.20||
vinamradevAsurapR^iShThagAbhyAmAdAya taM pANisaroruhAbhyAm |
navodayaM pArvaNachandrachAruM gaurI svamutsa~NgatalaM ninAya || 11\.21||
svama~NkamAropya sudhAnidhAnamivAtmano nandanaminduvaktrA |
tamekameShAM jagadekavIraM babhUva pUjyA dhuri putriNInAm || 11\.22||
nisargavAtsalyarasaughasiktA sAndrapramodAmR^itapUrapUrNA |
tamekaputraM jagadekamAtAbhyutsa~NginaM prastraviNI babhUva || 11\.23||
asheShalokatrayamAturasyAH ShANmAturaH stanyasudhAmadhAsIt |
surasravantyAH kila kR^ittikAbhirmuhurmuhuH saspR^ihamIkShyamANaH || 11\.24||
sukhAshrupUrNena mR^igA~NkamauleH kalatramekena mukhAmbujena |
tasyaikanAlo dgatapa~nchapadmalakShmIM kramAtShaDvadanIM chuchumba || 11\.25||
haimI phalaM hemagirerlateva vikasvaraM nAkanadIva padmam |
pUrveva di~NnUtanamindumAbhAttaM pArvatI nandanamAdadhAnA || 11\.26||
prItAtmanA sA prayatena dattahastAvalambA shashishekhareNa |
kumAramutsa~Ngatale daghAnA vimAnamabhraMlihamAruroha || 11\.27||
maheshvaro.api pramadapraruDharomodgamo bhUdharanandanAyAH |
a~NkAdupAdatta tada~NkataH sA tasyAstu so.apyAtmajavatsalatvAt || 11\.28||
dadhAnayA netrasudhaikasatraM putraM pavitraM sutayA tayAdreH |
saMshliShyamANaH shashikhaNDadhArI vimAnavegena gR^ihAjjagAma || 11\.29||
adhiShThitaH sphATikashailashrR^i~Nge tu~Nge nijaM dhAma nikAmaramyam |
mahotsavAya pramathapramukhyAn pR^ithUngaNA~nshambhurathAdidesha || 11\.30||
pR^ithupramodaH praguNo gaNAnAM gaNaH samagro vR^iShavAhanasya |
girIndraputryAstanayasya janmanyathotsavaM saMvavR^ite vidhAtum || 11\.31||
sphuranmarIchichChuritAmbarANi santAnashAkhiprasavA~nchitAni |
uchchikShipuH kA~nchanatoraNAni gaNA varANi sphaTikAlayeShu || 11\.32||
dikShu prasarpastadadhIshvarANAmathAmarANAmiva madhyaloke |
mahotsavaM shaMsitumAhato.anyairdadhvAna dhIraH paTahaH paTIyAn || 11\.33||
mahotsave tatra samAgatAnAM gandharvavidyAdharasundarINAm |
sambhAvitAnAM girirAjaputryA gR^ihe.abhavanma~NgalagItakAni || 11\.34||
suma~NgalopAyana pAtrahastAstaM mAtaro mAtR^ivadabhyupetAH |
vidhAya dUrvAkShatakAni mUrdhni ninyuH svama~NkaM girijAtanUjam || 11\.35||
dhvanatsu tUryeShu sumandrama~NkyAli~NgyordhvakeShvapsaraso rasena |
susandhibandhaM nanR^ituH suvR^ittagItAnugaM bhAvarasAnuviddham || 11\.36||
vAtA vavuH saukhyakarAH prasedurAshA vidhUmo hutabhuga didIpe |
jalAnyabhUvanvimalAni tatrotsave.antarikShe prasasAda sadyaH || 11\.37||
gambhIrasha~NkhadhvanimishramuchchairgR^ihodbhavA dundubhayaH praNeduH |
divaukasAM vyomni vimAnasa~NghA vimuchya puShpaprachayAnprasasruH || 11\.38||
itthaM maheshAdrisutAsutasya janmotsave sammadayA~nchakAra |
charAcharaM vishvamasheShametatparaM chakampe kila tArakashrIH || 11\.39||
tataH kumAraH samudAM nidAnaiH sa bAlalIlAcharitairvichitraiH |
girIshagauryohR^idayaM jahAra mude na hR^idyA kimu bAlakeli || 11\.40||
maheshvaraH shailasutA cha harShAtsatarShamekena mukhena gADham |
ajAtadantAni mukhAni sUnormanoharANi kramatashchuchumba || 11\.41||
kvachitskhaladbhiH kvachidaskhaladbhiH kvachitprakampaiH kvachidaprakampaiH |
bAlaH sa lIlAchalanaprayogaistayomudaM vardhayati sma pitroH || 11\.42||
ahetuhAsachChuritAnanendurgR^ihA~NgaNakrIDanadhUlidhUmraH |
muhurvadankichidalakShitArthaM mudaM tayora~NkagatastatAna || 11\.43||
gR^ihNanviShANe haravAhanasya spR^ishannumA kesariNaM salIlam |
sa bhR^i~NgiNaH sUkShmataraM shikhagraM karShanbabhUva pramadAya pitroH || 11\.44||
eko nava dvau dashA pa~ncha saptetyajIgaNannAtmamukhaM prasArya |
maheshakaNThoragadantapa~NktiM tada~NkagaH shaishavamaugdhyamaishiH || 11\.45||
kapardikaNThAntakapAladAmno.a~NguliM praveshyAnanakoTareShu |
dantAnupAttuM rabhasI babhUva muktAphalabhrAntikaraH kumAraH || 11\.46||
shambhoH shiro.antaHsaritastara~NgAnvigAhya gADhaM shishirAnnasena |
sa jAtajADyaM nijapANipadmamatApayadbhAlavilochanAgnau || 11\.47||
ki~nchitkalaM bha~Ngurakandharasya namajjaTAjUTadharasya shambhoH |
pralambamAnaM kila kautukena chiraM chuchumbe mukuTendukhaNDam || 11\.48||
itthaM shishoH shaishavakelivR^ittairmanobhirAmairgirijAgirIshau |
manovinodaikarasaprasaktau divAnishaM nAvidatAM kadAchit || 11\.49||
iti bahuvidhaM bAlakrIDAvichitravicheShTitaM
lalitalalitaMsAndrAnandaM manoharamAcharan |
alabhata parAM buddhiM ShaShThe dine navayauvanaM
sa kila sakalaM shAstraM shastraM viveda vibhuryayA || 11\.50||

iti shrIkAlidAsakR^itau kumArasambhave mahAkAvye
kumArasya bAlakrIDA nAma ekAdashaH sargaH sampUrNaH || 11||
\section{sargaH 12 \- kumArasainApatyavarNanaM}
atha prapede tridashairasheShaiH krUrAsuropaplavaduHkhitAtmA |
pulomaputrIdayito.andhakAriM pattrIva tR^iShNAturitaH payodam || 12\.1||
dR^iptArisantrAsakhilIkR^itAtsa katha~nchidambhodavihAramArgAt |
avAtatArAbhigiriM girIshagaurIpadanyAsavishuddhamindraH || 12\.2||
sa~NkrandanaH syandanato.avatIrya meghAtmano mAtalidattahastaH |
pinAkino.athAlayamuchchachAla shuchaupipAsAkulito yathAmbhaH || 12\.3||
itastato.atha pratibimbabhAjaM vilokamAnaH sphaTikAdribhUmau |
AtmAnamapyekamanekadhA sa vrajanvibhorAspadamAsasAda || 12\.4||
vichitracha~nchanmaNibha~Ngisa~NgaM sauvarNadaNDaM dadhatAtichaNDam |
sa nandinAdhiShThitamadhyatiShThatsaudhA~NgaNadvAramana~NgashatroH || 12\.5||
tataH sa kakShAhitahemadaNDo nandI surendraM pratipadya sadyaH |
pratoShayAmAsa sugauraveNa gatvA shashaMsa svayamIshvarasya || 12\.6||
bhrUsa.nj~nayAnena kR^itAbhyanuj~naH sureshvaraM taM jagadIshvareNa |
praveshayAmAsa suraiH purogaH samaM sa nandI sadanaM sadasya || 12\.7||
sa chaNDibhR^i~NgipramukhairgariShThairgaNairanekairvividhasvarupaiH |
adhiShThitaM saMsadi ratnamayyAM sahasranetraH shivamAluloke || 12\.8||
kapardamudbaddhamahInamUrdharatnAMshubhirbhAsuramullasadbhiH |
dadhAnamuchchaistaramiddhadhAtoH sumerushrR^i~Ngasya samatvamAptam || 12\.9||
bibhrANamuttu~Ngatara~NgamAlAM ga~NgAM jaTAjUTataTaM bhajantIm |
gaurIM tadutsa~NgajuShaM hasantImiva svaphenaiH sharadabhrashubhraiH || 12\.10||
ga~NgAtara~NgapratibimbitaiH svairbahUbhavantaM shirasA sudhAMshum |
chalanmarIchiprachayaistuShAragaurairhimadyotitamudvahantam || 12\.11||
bhAlasthale lochanamedhamAnadhAmAdharIbhUtaravIndunetram |
yugAntakAlochitahavyavAhaM mInadhvajaploShaNamAdadhAnam || 12\.12||
mahArharatnA~nchitayo rudAraM sphuratprabhAmaNDalayoH samantAt |
karNasthitAbhyAM shashibhAskarAbhyAmupAsitaM kuNDalayoshChalena || 12\.13||
svabaddhayA kaNThikayeva nIlamANikyamayyA kutukena gauryAH |
nIlasya kaNThasya parisphurantyA kAntyA mahatyA suvirAjamAnam || 12\.14||
kAlArditAnAM tridashAsurANAM chitArajobhiH paripANDura~Ngam |
mahanmahebhAjinamudgatAbhraprAleyashailashriyamudvahantam || 12\.15||
pANisthitabrahmakapAlapAtraM vaikuNThabhAjApi niShedhyamANAm |
narAsthikhaNDAbharaNaM raNAntamUlaM trishUlaM kalayantamuchchaiH || 12\.16||
purAtanIM brahmakapAlamAlAM kaNThe vahantaM punarAshvasantIm |
udgItavedAM mukuTenduvarShatsudhA bharaughAplavalabdhasa.nj~nAm || 12\.17||
salIlama~NkasthitayA girIndraputryA navAShTApadavallibhAsA |
virAjamAnaM sharadabhrakhaNDaM parisphurantyAchirarochiSheva || 12\.18||
dR^iptA.andhakaprANaharaM pinAkaM mahAsurastrIvidhavatvahetum |
kareNa gR^ihNAntamagR^ihyamanyaiH purAsmaraploShaNakelikAram || 12\.19||
bhadrAsanaM kA~nchanapAdapIThaM mahArhamANikyavibha~Ngichitram |
adhiShThitaM chandramarIchigaurairudvIjyamAnaM chamarairgaNAbhyAm || 12\.20||
shastrAstravidyAbhyasanaikasakte savismayairetya gaNaiH sudR^iShTe |
nIrAjyamAne sphaTikAchalena sAnandanirdiShTadR^ishaM kumAre || 12\.21||
tathAvidhaM shailasutAdhinAthaM pulomaputrIdayito nirIkShya |
AsItkShaNaM kShobhaparo nu kasya mano na hi kShubhyati dhAmadhAmni || 12\.22||
vikarasvarAbhbhojavanashriyA taM dR^ishaM sahasreNa nirIkShamANaH |
romAlibhiH svargapatirbabhAse puShpotkarAkIrNa ivAmrashAkhI || 12\.23||
dR^iShTvA sahasreNa dR^ishAM maheshamabhUtkR^itArtho.atitarAM mahendraH |
sarvA~NgajAtaM tadatho virupamiva priyAkopakaraM viveda || 12\.24||
tataH kumAraM kanakAdrisAraM purandaraH prekShya dhR^itAstrashastram |
maheshvaropAntikavartamAnaM shatrorjayAshAM manasA babandha || 12\.25||
shrInIlakaNTha dyupatiH puro.asti tvayi praNAmAvasaraM pratIchChan |
sahasranetre.atra bhava trinetra dR^iShTyA prasAda praguNo mahesha || 12\.26||
iti prabaddhA~njaliretya nandI nidhAya kakShAmabhiH hema netram |
prasAdapAtraM purato bhaviShNuratha smarArAtimuvAcha vAcham || 12\.27||
purA surendraM surasa~NghasevyaM trilokasevyastripurAsurAriH |
prItyA sudhAsAranidhAriNeva tato.anujagrAha vilokanena || 12\.28||
kirITakoTichyutapArijAta puShpotkareNAnamitena mUrdhnA |
svargaikavandyo jagadekavandyaM taM devadevaM praNanAma devaH || 12\.29||
anekalokaikanamaskriyArhaM maheshvaraM taM tridasheshvaraH sa |
bhaktyA namaskR^itya kR^itArthatAyAH pAtraM pavitraM paramaM babhUva || 12\.30||
subhaktibhAjAmadhi pAdapIThaM prAntakShitiM namrataraiH shirobhiH |
tataH praNemuH purato gaNAnAM gaNAH surANAM kramataH purArim || 12\.31||
gaNopanIte prabhuNopadiShTaH shubhAsane hemamaye purastAt |
prApopavishya pramudaM surendraH prabhuprasAdo hi mude na kasya || 12\.32||
krameNa chAnye.api vilokanena sambhAvitAH sasmitamIshvareNa |
upAvishaMstoShavisheShamAptA dR^iggochare tasya surAH samagrAH || 12\.33||
athAha devo balavairimukhyAn gIrvANavargAnkaruNArdrachetAH |
kR^itA~njalIkAnsurAbhisUtAndhvastashriyaH shrAntamukhAnavekShya || 12\.34||
aho batAnantaparAkramANAM divaukaso vIravarAyudhAnAm |
himodabinduglapitasya kiM yaH padmasya dainyaM dadhate mukhAni || 12\.35||
svargaukasaH svargaparichyutAH kiM svapuNyarAshau sumahattame.api |
chihnaM chiroDhaM na tu yUyamete nijAdhipatyasya parityajadhvam || 12\.36||
divaukaso devagR^ihaM vihAya manuShyasAdhAraNatAmavAptAH |
yUyaM kutaH kAraNatashcharadhvaM mahItale mAnabhR^ito mahAntaH || 12\.37||
ananyasAdhAraNasiddhamuchchaistaddaivataM dhAma nikAmaramyam |
kasmAda kasmAnniragAdbhavadbhyashchirArjitaM puNyamivA pachArAt || 12\.38||
divaukaso vo hR^idayasya kasmAttayAvidhaM dhairyamahAryamAryAH |
agAdagAdhasya jalAshayasya grIShmAtitApAdivashAdivAmbhaH || 12\.39||
surAH surAdhIshapuraHsarANAM samIyuShAM vaH samamAturANAm |
tadbrUta lokatrayajitvarAtkiM mahAsurAttArakato viruddham || 12\.40||
parAbhavaM tasya mahAsurasya niSheddhumeko.ahamalambhaviShNuH |
dAvAnalaploShavipattimanyo mahAmbudAtkiM harate vanAnAm || 12\.41||
itIrite manmathamardanena surAH surendrapramukhA mukheShu |
sAndrapramodAshrutara~NgiteShu dadhuH shriyaM satvaramAshvasantaH || 12\.42||
tato girIshasya girAM virAme jagAda labdhe.avasare surendraH |
bhavanti vAcho.avasare prayuktA dhruvaM phalAviShTamahodayAya || 12\.43||
j~nAnapradIpena tamopahenAvinashvareNAskhalitaprabheNa |
bhUtaM bhavadbhAvi cha yachcha ki~nchitsarvaj~na sarvaM tava gocharaM tat || 12\.44||
durvAradorudyamaduHsahena yattArakeNAmaraghasmareNa |
tadIshatAmAptavatA nirastA vayaM divo.amI vada kiM na vetsi || 12\.45||
vidheramoghaM sa varaprasAdamAsAdya sadyastrijagajjigIShuH |
surAnasheShAnahakapramukhyAndordaNDachaNDo manute tR^iNAya || 12\.46||
stutyA purAsmAbhirupAsitena pitAmaheneti nirupitaM naH |
senApatiH saMyati daityametaM puraH smarArAtisuto nihanti || 12\.47||
aho tato.anantaramadyayAva tsuduHsahAM tasya parAbhavArtim |
viShehire hanta hR^idantashalyamAj~nAniveshaM tridivaukasau.amI || 12\.48||
nidAghadhAmaklamaviklavAnAM navInamambhodamivauShadhInAm |
sunandanaM nandanamAtmano naH senAnyametaM svayamAdisha tvam || 12\.49||
trailokyalakShmIhR^idayaikashalyaM samUlamutkhAya mahAsuraM tam |
asmAkameShAM purato bhavansa duHkhApahAraM yudhi yo vidhatte || 12\.50||
mahAhave nAtha tavAsya sUnoH shastraiH shitaiH kR^ittashirodharANAm |
mahAsurANAM ramaNIvilopairdisho dashaitA mukharIbhavantu || 12\.51||
mahAraNakShoNipashUpahArIkR^ite.asure tatra tavAtmajena |
bandisthitAnAM sudR^ishAM karotu veNipramokShaM suraloka eShaH || 12\.52||
itthaM surendre vadati smarAriH surAridushcheShTitajAtaroShaH |
kR^itAnukampastridasheShu teShu bhUyo.api bhUtAdhipatirbabhAShe || 12\.53||
aho aho devagaNAH surendramukhyAH shR^iNudhvaM vachanaM mamaite |
vicheShTate sha~Nkara eSha devaH kAryAya sajjo bhavatAM sutAdyaiH || 12\.54||
purA mayAkAri girIndraputryAH pratigraho.ayaM niyatAtmanApi |
tatraiSha hetuH khalu tadbhavena vIreNa yadvadhyata eSha shatruH || 12\.55||
atropapannaM tadamI niyujya kumAramenaM pR^itanApatitve |
nighnantu shatruM suralokameSha bhunaktu bhUyo.api suraiH sahendraH || 12\.56||
ityudIrya bhagavAMstamAtmajaM ghorasa~Ngaramahotsavotsukam |
nandanaM hi jahi devavidviShaM saMyatIti nijagAda sha~NkaraH || 12\.57||
shAsanaM pashupateH sa kumAra svIchakAra shirasAvanatena |
sarvathaiva pitR^ibhaktiratAnAmeSha eva paramaH khalu dharmaH || 12\.58||
asurayuddhavidhau vibudheshvare pashupatau vadatIti tavAtmajam |
girIjayA mumude sutavikrame sati na nandati kA khalu vIrasUH || 12\.59||
suraparivR^iDhaH prauDhaM vIraM kumAramumApate\-
rbalavadamarArAtistrINAM dR^iga~njanabha~njanam |
jagadabhayadaM sadyaH prApya pramodaparo.abhavad\-
dhruvamabhimate pUrNe ko vA mudA na hi mAdyati || 12\.60||

iti shrIkAlidAsakR^itau kumArasambhave mahAkAvye
kumArasainApatyavarNanaM nAma dvAdashaH sargaH sampUrNaH || 12||
\section{sargaH 13 \- kumArasainApatyAbhiShekaH}
prasthAnakAlochitachAruveShaH sa svargivargairanugamyamAnaH |
tataH kumAraH shirasA natena trailokyabhartuH praNanAma pAdau || 13\.1||
jahIndrashatruM samare.amareshapadaM sthiratvaM naya vIra vatsa |
ityAshiShA taM praNamantamIsho mUrdhanyupAghrAya mudAbhyanandat || 13\.2||
prahvIbhavannamratareNa mUrdhnA namashchakArA~NghriyugaM svamAtuH |
tasyAH pramodAshrupayaH pravR^iShTistasyAbhavadvIravarAbhiShekaH || 13\.3||
tama~NkamAropya sutA himAdrerAshliShya gADhaM sutavatsalA sA |
shirasyupAghrAya jagAda shatruM jitvA kR^itArthIkuru vIrasUM mAm || 13\.4||
uddAma daityeshavipattihetuH shraddhAluchetAH samarotsavasya |
ApR^ichChya bhaktyA girijAgirIshau tataH pratasthe.abhidivaM kumAraH || 13\.5||
devaM maheshaM girIjAM cha devIM tataH praNamya tridivaukaso.api |
pradakShiNIkR^itya cha nAkanAthapUrvAH samastAstamathAnujagmuH || 13\.6||
atha vrajadbhistridashai rasheShaiH sphuratprabhA bhAsuramaNDalaistaiH |
nabho babhAse parito vikIrNaM divApi nakShatragaNairivograiH || 13\.7||
rarAja teShAM vrajatAM surANAM madhye kumAro.adhikakAntikAntaH |
nakShatratArAgrahamaNDalAnAmiva triyAmAramaNo nabhonte || 13\.8||
girIshagaurItanayena sArdhaM pulomaputrIdayitAdayaste |
uttIrya nakShatrapathaM muhUrtAtprapedire loka mathAtmanInam || 13\.9||
te svargalokaM chirakAladR^iShTaM mahAsuratrAsavashaMvadatvAt |
sadyaH praveShTuM na viShehire taM kShaNaM vyalambanta surAH samagrAH || 13\.10||
puro bhava tvaM, na puro bhavAmi, nAhaM purogo.asmi, puraH sarastvam |
itthaM surAstatkShaNameva bhItAH svargaM praveShTuM kalahaM vitenuH || 13\.11||
surAlayAlokanakautukena mudA shuchismeravilochanAste |
dadhuH kumArasya mukhAravinde dR^iShTiM dviShatsAdhvasa kAtarAntAm || 13\.12||
sahelahAsachChuritAnanendustataH kumAraH purato bhaviShNuH |
sa tArakApAtamapekShamANo raNapravIro hi surAnavochat || 13\.13||
bhItyAlamadya tridivaukaso.amI svargaM bhavantaH pravishantu sadyaH |
atraiva me dR^ikpathametu shatrurmahAsuro vaH khalu dR^iShTapUrvaH || 13\.14||
svarlokalakShmIkachakarShaNAya dormaNDalaM valgati yasya chaNDam |
ihaiva tachChoNitapAnakelimahnAya kurvantu sharA mamaite || 13\.15||
shaktirmamAsAvahataprachArA prabhAvasArA sumahaHprasArA |
svarlokalakShmyA vipadAvahAreH shiro harantI dishantAnmudaM vaH || 13\.16||
ityandhakArAtisutasya daityavadhAya yuddhotsukamAnasasya |
sarvaM shuchismeramukhAravindaM gIrvANavR^indaM vachasA nananda || 13\.17||
sAndrapramodAtpulakopagUDhaH sarvA~NgasamphullasahastranetraH |
tasyottarIyeNa nijAmbareNa niru~nChanachAru chakAra shakraH || 13\.18||
ghanapramodAshrutara~NgitAkShairmukhaishchaturbhiH prachuraprasAdaiH |
atho achumbadvidhirAdivR^iddhaH ShaDAnanaM ShaTsu shiraHsu chitram || 13\.19||
taM sAdhu sAdhvityabhitaH prashasya mudA kumAraM tripurAsurAreH |
AnandayanvIra ! jayeti vAchA gandharvavidyAdharasiddhasa~NghAH || 13\.20||
divyarShayaH shatruvijeShyamANaM tamabhyanandankila nAradAdyAH |
niru~nChanaM chakrurathottarIyaishchAmIkarIyairnijavalkalaishcha || 13\.21||
tataH surAH shaktidharasya tasyAvaShTambhataH sAdhvasamutsR^ijantaH |
utsehire svargamanantashakte rgantuM vanaM yUthapaterivebhAH || 13\.22||
athAbhipR^iShThaM girijAsutasya purandarArAtivadhaM chikIrShoH |
surA nirIyustripuraM didhakShoriva smarAreH pramathaH samantAt || 13\.23||
surA~NganAnAM jalakelibhAjAM prakShAlitaiH santatama~NgarAgaiH |
prapedire pi~njaravAripUrAM svargaukasaH svargadhunIM purastAt || 13\.24||
digdantinAM vArivihArabhAjAM karAhatairbhImataraistara~NgaiH |
AplAvayantIM muhurAlabAlashreNiM tarUNAM nijatIrajAnAm || 13\.25||
lIlArasAbhiH surakanyakAbhi rhiraNmayIbhiH sikatAbhiruchchaiH |
mANikyagarbhAbhirupAhitAbhiH prakIrNatIrAM varavedikAbhiH || 13\.26||
saurabhyalubdhabhramaropagItairhiraNyahaMsAvalikelilolaiH |
chAmIkarIyaiH kamalairvinidraishchyutaiH parAgaiH paripi~NgatoyAm || 13\.27||
kutUhalAtpraShTumupAgatAbhi stIrasthitAbhiH surasundarIbhiH |
abhyUrmirAjipratibimbitAbhirmudaM dishantIM vrajatAM janAnAm || 13\.28||
nananda sadyashchirakAladR^iShTAM vilokya shakraH suradIrghikAM tAm |
adarshayatsAdaramadriputrImaheshaputrAya tataH purogaH || 13\.29||
sa kArttikeyaH purataH parItaH surai samastaiH suranimnagAM tAm |
apUrvadR^iShTAmavalokamAnaH savismayaH smeravilochano.abhUt || 13\.30||
upetya tAM tatra kirITakoTinyastA~njalirbhaktiparaH kumAraH |
gIrvANavR^indaiH praNutAM praNutya namreNa mUrdhnA mudito vavande || 13\.31||
praNartitasmerasarojarAjiH puraH parIrambhamilanmahormiH |
kapolapAlishramavArihArI bheje guhaM taM saritaH samIraH || 13\.32||
tato vrajannandananAmadheyaM lIlAvanaM jambhajitaH purastAt |
vibhinnabhagnoddhR^itashAlasa~NghaM prekShA~nchakAra smarashatrusUnuH || 13\.33||
suradviShopaplutamevametadvanaM balasya dviShato gatashri |
itthaM vichintyAruNalochano.abhUd bhrubha~NgaduShprekShyamukhaH sa kopAt || 13\.34||
nirlUnalIlopavanAmapashyadduHsa~ncharIbhUtavimAnamArgAm |
vidhvastasaudhaprachayAM kumAro vishvaikasArAmamarAvatIM saH || 13\.35||
gatashriyaM vairivarAbhibhUtAM dashAM sudInAmabhito dadhAnAm |
nArImavIrAmiva tAmavekShya sa vADhamantaH karuNAparo.abhUt || 13\.36||
dushcheShTite devaripau saroShastasyAviShaNNaH samarAya chotkaH |
tathAvidhAM tAM sa vivesha pashyansuraiH surAdhIshvararAjadhAnIm || 13\.37||
daiteyadantyAvalidantaghAtaiH kShuNNAntarAH sphATikaharmyapa~NktIH |
mahAhinirmokapinaddhajAlAH sa vIkShya tasyAM viShasAda sadyaH || 13\.38||
utkIrNachAmIkarapa~NkajAnAM digdantidAnadravadUShitAnAm |
hiraNyahaMsavrajavarjitAnAM vidIrNavaiDhUryamahAshilAnAm || 13\.39||
AvirbhavadvAlatR^iNA~nchitAnAM tadIyalIlAgR^ihadIrghikANAm |
sa durdashAM vIkShya virodhijAtAM viShAdavailakShyabharaM babhAra || 13\.40||
taddantidantakShatahemabhitti sutantujAlAkularatnajAlAm |
ninye surendreNa purogatena sa vaijayantAbhidhamAtmasaudham || 13\.41||
nirdiShTavartmA bivudheshvareNa suraiH samagrairanugamyamAnaH |
sa prAvishattaM vividhAshmarashmichChinnena sopAnapathena saudham || 13\.42||
nisargakalpadrumatoraNaM taM sa pArijAtaprasavasragADhyam |
divyaiH kR^itasvastyayanaM munIndrairantaHpraviShTapramadaM prapede || 13\.43||
pAdau maharSheH kila kashyapasya kulAdivR^iddhasya surAsurANAm |
pradakShiNIkR^itya kR^itA~njaliH sanSha~NbhiH shirobhiH sa natairvavande || 13\.44||
sa devamAturjagadekavandyau pAdau tathaiva praNanAma kAmam |
muneH kalatrasya cha tasya bhaktyA prahvIbhava~nshailasutAtanUjaH || 13\.45||
sa kashyapaH sA jananI surANAM tamedhayAmAsaturAshiShA dvau |
tayA yayA naikajagajjigIShuM jetA mR^idhe tArakamugravIryam || 13\.46||
svadarshanArthaM samupeyuShINAM sudevatAnAmaditishritAnAm |
pAdau vavande patidevatAstamAshIrvachobhiH punarabhyanandan || 13\.47||
pulomaputrIM vibudhAdhibhartustataH shachIM nAma kalatrameShaH |
namashchakAra smarashatrusUnustamAshiShA sA samupAcharachcha || 13\.48||
athAditIndrapramadAH sametAstA mAtaraH sapta ghanapramodAH |
upetya bhaktyA namate maheshaputrAya tasmai dadurAshiShaH prAk || 13\.49||
sametya sarve.api mudaM dadhAnA mahendramukhyAstridivaukaso.atha |
AnandakallolitamAnasaM taM samabhyaShi~nchanpR^itanAdhipatye || 13\.50||
sakalavibudhalokaH srastaniHsheShashokaH
kR^itaripuvijayAshaH prAptayuddhAvakAshaH |
ajani harasutenAnantavIryeNa tenA\-
khilavibudhachamUnAM prApya lakShmImanUnAm || 13\.51||

iti shrIkAlidAsakR^itau kumArasambhave mahAkAvye
kumArasainApatyAbhiSheko nAma trayodashaH sargaH sampUrNaH || 13||
\section{sargaH 14 \- devasenAprayANaM}
raNotsukenAndhakashatrusUnunA samaM prayuktaistridashairjigIShuNA |
mahAsuraM tArakasa.nj~nakaM dviShaM prasahya hantuM samanahyata drutam || 14\.1||
sa durnivAraM manaso.ativeginaM jayashriyaH sannayanaM suduHsaham |
vijitvaraM nAma tadA mahArathaM dhanurdharaH shaktidharo.adhyarohayat || 14\.2||
surAlayashrIvipadAM nivAraNaM surArisampatparitApakAraNam |
kenApi dadhre.asya virodhidAraNaM suchAru chAmIkaragharmavAraNam || 14\.3||
sharachcharachchandramarIchipANDuraiH saMvIjyamAno varachAruchAmaraiH |
puraHsaraiH kinnarasiddhachAraNai raNechChurastUyata vAgbhirulbaNaiH || 14\.4||
prayANakAlochitachAruveShabhR^idvajraM vahanparvatapakShadAraNam |
airAvataM sphATikashailasodaraM tato.adhiruhya dyupatistamanvagAt || 14\.5||
tamanvagachChad girishrR^i~NgasodaraM madoddhataM meShamadhiShThitaH shikhI |
virodhividveSharuShAdhikaM jvalanmaho mahIyastaramAyudhaM dadhat || 14\.6||
athendranIlAchalachaNDavigrahaM viShANavidhvastamahApayodharam |
adhiShThitaH kAsaramuddharaM mudA vairasvato daNDadharastamanvagAt || 14\.7||
madoddhataM pretamathAdhiruDhavAMstamandhakadveShitanUjamanvagAt |
mahAsuradveShavisheShabhIShaNaH suroShaNashchaNDaraNAya nairR^itaH || 14\.8||
navodyadambhodharaghoradarshane yuddhAya ruDho makare mahattare |
durvArapAsho varuNo raNolbaNastamanviyAya tripurAntakAtmajam || 14\.9||
digambarAdhikramaNolbaNaM kShaNAnmR^igaM mahIyAMsamaruddhavikramam |
adhiShThitaH sa~NgarakelilAlaso marunmaheshAtmajamanvagAd drutam || 14\.10||
virodhinAM shoNitapAraNaiShiNIM gadAmanUnAM naravAhano vahan |
mahAhavAmbhodhi vigAhanoddhataM yiyAsu manvAgamadIshanandanam || 14\.11||
mahAhinirbaddhajaTAkalApino jvalattrishUlaprabalAyudhA yudhe |
rudrAstuShArAdrisakhaM mahAvR^iShaM tato.adhiruDhAstamayuH iunAkinaH || 14\.12||
anye.api sannahya madAraNotsavashraddhAlavaH svargigaNAstamanvayuH |
svavAhanAni prabalAnyadhiShThitAH pramodavismeramukhAmbujashriyaH || 14\.13||
uddaNDahemadhvajadaNDasa~NkulAshcha~nchadvichitrAtapavAraNojjvalAH |
chaladdhanasyandanaghoShabhIShaNAH karIndraghaNTAravachaNDachItkR^itAH || 14\.14||
sphuradvichitrAyudhakAntimaNDalairuddyotitAshAvalayAmbarAntarAH |
divaukasAM so.anuvahanmahAchamUH pinAkapANestanayastato yayau || 14\.15||
kolAhalenochchalatAM divaukasAM mahAchamUnAM gurubhirdhvajavrajaiH |
ghanairniruchChvAsamabhUdanantaraM di~NmaNDalaM vyomatalaM mahItalam || 14\.16||
surArilakShmIparikampahetavo dikchakravAlapratinAdamedurAH |
nabhontakukShimbharayo ghanAH svanA nihanyamAnaiH paTahairvitenire || 14\.17||
pramathyamAnAmbudhigarjatarjanaiH surArinArIgaNagarbhapAtanaiH |
nabhashchamUdhUlikulairivAkulaM rarAsa gADhaM paTahapratisvanaiH || 14\.18||
kShuNNaM rathairvAjibhirAhataM khuraiH karIndrakarNaiH paritaH prasAritam |
dhUtaM dhvajaiH kA~nchanashailajaM rajo vAtairhataM vyAma samAruhatkramAt || 14\.19||
khAtaM khurai rathyatura~Ngapu~Ngavai rupatyakAhATakamedinIrajaH |
gataM digantAnmukharaiH samIraNaiH suvibhramaM bhUri babhAra bhUyasA || 14\.20||
adhastathordhvaM purato.atha pR^iShThato.abhito.api chAmIkarareNuruchchakaiH |
chamUShu sarpanmarudAhato.aharannavInasUryasya cha kAntivaibhavam || 14\.21||
baloddhR^itaM kA~nchanabhUmijaM rajo babhau diganteShu nabhaHsthale sthitam |
akAlasandhyAghanarAgapi~NgalaM ghanaM ghanAnAmiva vR^indamudyatam || 14\.22||
hemAvanIShu pratibimbamAtmano muhurvilokyAbhimukhaM mahAgajAH |
rasAtalottIrNagajabhramAtkrudhA dantaprakANDaprahR^itAni tenire || 14\.23||
sujAtasindUraparAgapi~njaraiH kalaM chaladbhiH surasainyasindhuraiH |
shuddhAsu chAmIkarashailabhUmiShu nAdR^ishyata svaM pratibimbamagrataH || 14\.24||
iti krameNAmararAjavAhinI mahAhavAmbhodhivilAsalAlasA |
avAtaratkA~nchanashailato drutaM kolAhalAkrAntavidhUtakandarA || 14\.25||
mahAchamUsyandanachaNDachItkR^itairvilolaghaNTebhapateshcha bR^iMhitaiH |
surendrashailendramahAguhAshayAH siMhA mahatsvapnasukhaM na tatyajuH || 14\.26||
gambhIrabherIdhvanitairbhaya~NkarairmahAguhAntapratinAdameduraiH |
mahArathAnAM guruneminisvanairanAkulaistairmR^igarAjatAjani || 14\.27||
samutthitena tridivaukasAM mahAchamUraveNAdritaTAntadAriNA |
prapedire kesariNo.adhikaM madaM svavIryalakShmImR^igarAjatAvashAt || 14\.28||
bhiyA surAnIkavimardajanmanA vidudruvurdUrataraM drutaM mR^igAH |
guhAgR^ihAntAdbahiretya helayA tasthurvisha~NkaM nitarAM mR^igAdhipAH || 14\.29||
vilokitAH kautukinA.amarAvatIjanena juShTapramadena dUrataH |
surAchalaprAntabhuvaH prapedire suvistR^itAyAH prasaraM susainikAH || 14\.30||
pItAsitAraktasitaiH surAchala prAntasthitairdhAturajobhirambaram |
ayatnagandharvapurodayabhramaM babhAra bhUmnotpatitairitastataH || 14\.31||
mahAsvanaH sainyavimardasambhavaH karNAntakUla~NkaShatAmupeyivAn |
payonidheH kShubdhatarasya vardhano babhUva bhUmnA bhuvanodarambhariH || 14\.32||
mahAgajAnAM gurubR^iMhitaistataiH suheShitairghorataraishcha vAjinAm |
ghanai rathAnAM guruchaNDachItkR^itaistirohito.abhUtpaTahasya niHsvanaH || 14\.33||
mahAsurANAmavarodhayoShitAM kachAkShipakShmastanamaNDaleShu cha |
dhvajeShu nAgeShu ratheShu vAjiShu kShaNena tasthau surasainyajaM rajaH || 14\.34||
ghanairvilokya sthagitArkamaNDalaishchamUrajobhirnichitaM nabhaHsthalam |
ayAyi haMsairabhi mAnasaM ghanabhrameNa sAnandamanarti kekibhiH || 14\.35||
sAndraiH surAnIkarajobhirambare navAmbudAnIkanibhairabhishritai |
chakAshire svarNamayA mahAdhvajAH parisphurantastaDitAM gaNA iva || 14\.36||
vilokya dhUlIpaTalairbhR^ishaM bhR^itaM dyAvApR^ithivyoralamantaraM mahat |
kimUrdhvato.adhaH kimadhasta Urdhvato rajo.abhyupaitIti janairatarkyata || 14\.37||
nordhvaM na chAdho na puro na pR^iShThato na pArshvato.abhUtkhalu chakShuShorgatiH |
sUchyagrabhedyaiH pR^itanArajashchayairAchChAditA prANigaNasya sarvataH || 14\.38||
digantadantyAvalidAnahAribhirvimAnarandhrapratinAdameduraiH |
anekavAdyadhvanitairanAratairjagarja gADhaM gurubhirnabhastalam || 14\.39||
bhuvaM vigAhya prayayau mahAchamUH kvachinna mAntI mahatIM divaM khalu |
susa~NkulAyAmapi tatra nirbharAtkiM kAndishIkatvamavApa nAkulA || 14\.40||
uddAmadAnadvipavR^indabR^iMhitairnitAntamuttu~Ngatura~NgaheShitaiH |
chaladghanasyandananeminiHsvanairabhUnniruchChvAsamivAkulaM jagat || 14\.41||
mahAgajAnAM gurubhistu garjitairvilolaghaNTAraNitai raNolvaNaiH |
vIrapraNAdaiH pramadapramedurairvAchAlatAmAdadhiretarAM dishaH || 14\.42||
dantIndradAnadravavArivIchibhiH sadyo.api nadyo bahudhA pupUrire |
dhArA rajobhisturagaiH kShatairbhR^itA yAH pa~NkatAmetya rathaiH sthalIkR^itAH || 14\.43||
nimnAH pradeshAH sthalatAmupAgamannimnatvamuchchairapi sarvatashcha te |
tura~NgamANAM vrajatAM khuraiH kShatA rathairgajendraiH paritaH samIkR^itAH || 14\.44||
nabhodigantapratighoShabhIShaNairmahAmahIbhR^ittaTadAraNolvaNaiH |
payodhinirdhUnanakelibhirjagad babhUva bherIdhvanitaiH samAkulam || 14\.45||
itastato vAtavidhUta cha~nchalairnorandhritAshAgamanairdhvajAMshukaiH |
lakShaiH kvaNatkA~nchanaki~NkiNIkulairamajji dhUlIjaladhau nabhogate || 14\.46||
ghaNTAravai raudratarairnirantaraM visR^itvarairgarjaravaiH subhairavaiH |
mattadvipAnAM prathayAmbabhUvire na vAhinInAM paTahasya niHsvanAH || 14\.47||
karAlavAchAlamukhAshchamUsvanairdhvastAmbarA vIkShya disho rajasvalAH |
tirobabhUve gahanairdineshvaro rajondhakAraiH paritaH kuto.apyasau || 14\.48||
AkrAntapUrvA rabhasena sainikairdiga~NganA vyoma rajobhidUShitA |
bherIravANAM pratishabditairghanairjagarja gADhaM ghanamatsarAdiva || 14\.49||
gurusamIrasamIritabhUdharA iva gajA gaganaM vijagAhire |
gurutarA iva vAridharA rathA bhuvamitIha vivarta ivAbhavat || 14\.50||
balavadasuralokAnalpakalpAntakAle
niravadhaya ivAmbhorAshayo ghoraghoShAH |
gurutaraparimajjadbhUbhR^ito devasenA
vavR^idhurapi supUrNA vyomabhUmyantarAle || 14\.51||

iti shrIkAlidAsakR^itau kumArasambhave mahAkAvye
devasenAprayANaM nAma chaturdashaH sargaH sampUrNaH || 14||
\section{sargaH 15 \- surAsurasainyasa~NgrAmaH}
senApatiM nandanamandhakadviSho yudhe puraskR^itya balasya shAtravaH |
sainyairupaitIti suradviShAM puro.abhUtkiMvadantI hR^idayaprakampinI || 15\.1||
chamUprabhuM manmathamardanAtmajaM vijitvarIbhirvijayashriyAshritam |
shrutvA surANAM pR^itanAbhirAgataM chitte chiraM chukShubhire mahAsurAH || 15\.2||
sametya daityAdhipateH pure sthitAH kirITabaddhA~njalayaH praNamya te |
nyavedayanmanmathashatrusUnunA yuyutsunA jambhajitaM sahAgatam || 15\.3||
dAsIkR^itAsheShajagattrayaM na mAM jigAya yuddhe katishaH shachIpatiH |
girIshaputrasya balena sAmprataM dhruvaM vijeteti sa kAkuto.ahasat || 15\.4||
tataH krudhA visphuritAdharAdharaH sa tArako darpitadorbaloddhatAn |
yudhe trilokIjayakelilAlasaH senApatIn sannahanArthamAdishat || 15\.5||
mahAchamUnAmadhipAH samantataH sannahya sadyaH sutarAmudAyudhAH |
tasthurvinamrakShitipAlasa~Nkule tada~NganadvAravaraprakoShThake || 15\.6||
sa dvArapAlena puraH pradarshitAnkR^itAnatInbAhuvarAnadhiShThitAn |
mahAhavAmbhodhividhUnanoddhatAndadarsha rAjA pR^itanAdhipAnbahUn || 15\.7||
balI balArAtibalAtishAtanaM digdantinAdadravanAshanasvanam |
mahIdharAmbhodhinavAritakramaM yayau rathaM ghoramathAdhiruhya saH || 15\.8||
yugakShayakShubdhapayodhiniHsvanAshchalatpatAkAkulavAritAtapAH |
dharArajograstadigantabhAskarAH patiM prayAntaM pR^itanAstamanvayuH || 15\.9||
chamUrajaH prApa digantadantinAM mahAsurasyAbhisuraM prasarpiNaH |
dantaprakANDeShu siteShu shubhratAM kumbheShu dAnAmbughaneShu pa~NkatAm || 15\.10||
mahIbhR^itAM kandaradAraNolbaNaistadvAhinInAM paTahasvanairghanaiH |
udvelitAshchukShubhire mahArNavA nabhaHstravantI sahasA.abhyavardhata || 15\.11||
surArinAthasya mahAchamUsvanairvigAhyamAnA tumulaiH surApagA |
abhyuchChritairUrmishataishcha vArijairakShAlayannAkaniketanAvalIm || 15\.12||
atha prayANAbhimukhasya nAkinAM dviShaH purastAdashubhopadeshinI |
agAdhaduHkhAmbudhimadhyamajjanaM babhUva chotpAtaparamparA tava || 15\.13||
AgAmidaityAshanakelikA~NkShiNI kupakShiNAM ghoratarA paramparA |
dadhau padaM vyomni surArivAhinIruparyuparyetyanivAritAtapA || 15\.14||
muhurvibhagnAtapavAraNadhvajashchaladdharAdhUlikulAkulekShaNaH |
dhUtAshvamAta~NgamahArathAkarAnavekShaNo.abhUtprasabhaM prabha~njanaH || 15\.15||
sadyo vibhinnA~njanapu~njatejaso mukhairviShAgniM vikiranta uchchakaiH |
puraH patho.atItya mahAbhuja~NgamA bhaya~NkarAkArabhR^ito bhR^ishaM yayuH || 15\.16||
milanmahAbhImabhuja~NgabhUShaNaM prabhurdinAnAM pariveShamAdadhau |
mahAsurasya dviShato.atimatsarAdi vAntamAsUchayituM bhaya~NkaraH || 15\.17||
tviShAmadhIshasya puro.adhimaNDalaM shivAH sametAH paruShaM vavAshire |
surArirAjasya raNAntashoNitaM prasahya pAtuM drutamutsukA iva || 15\.18||
divApi tArAstaralAstarasvinIH parApatantIH parito.atha vAhinIH |
vilokya loko manasA vyachinntayatprANavyayAntaM vyasanaM suradviShaH || 15\.19||
jvaladbhiruchchairabhitaH prabhAbharairudbhAsitAsheShadigantarAmbaram |
raveNa raudreNa hR^idantadAraNaM papAta vajraM nabhaso nirambudAt || 15\.20||
jvaladbhira~NgArachayairnabhastalaM vavarSha gADhaM saha shoNitAsthibhiH |
dhUmaM jvalantyo vyasR^ijanmukhai rajo dadhurdisho rAsabhakaNThadhUsaram || 15\.21||
nirghAtaghoSho girishrR^i~NgashAtano ghano.ambarAshAkuharodarambhariH |
babhUva bhUmnA shrutibhittibhedanaH prakopikAlArjitagarjitarjanaH || 15\.22||
skhalanmahebhaM prapatattura~NgamaM parasparAshliShTajanaM samantataH |
prakShubhyadambhodhivibhinnabhUdharAd balaM dviSho.abhUdavani prakampAt || 15\.23||
UrdhvIkR^itAsyA ravidattadR^iShTayaH sametya sarve suravidviShaH puraH |
shvAnaH svareNa shravaNAntashAtinA mitho rudantaH karuNena niryayuH || 15\.24||
apIti pashyanpariNAmadAruNAM mahattamAM gADhamariShTasantatim |
durdaivadaShTo na khalu nyavartata krudhA prayANavyavasAyato suraH || 15\.25||
ariShTamAsha~Nkya vipAkadAruNaM nivAryamANo.api budhairmahAsuraH |
puraH pratasthe mahatAM vR^ithA bhavedasadgrahAndhasya hitopadeshanam || 15\.26||
kShitau nirastaM pratikUlavAyunA tadIyachAmIkaragharmavAraNam |
rarAja mR^ityoriva pAraNAvidhau prakalpitaM hATakabhAjanaM mahat || 15\.27||
vijAnatA bhAvi shiro nikR^intanaM praj~nena shokAdiva tasya maulinA |
muhurgaladbhistaralairalantarAmarodi muktAphalavAShpabindubhiH || 15\.28||
nivAryamANairabhito.anuyAyibhirgrahItukAmairiva taM muhurmuhuH |
apAti gR^idhrairabhimaulimAkulairbhaviShyadetanmaraNopadeshibhiH || 15\.29||
sadyo nikR^ittA~njanasodaradyutiM phaNAmaNiprajvaladaMshumaNDalam |
niryadviSholkAnalagarbhaphUtkR^itaM dhvaje janastasya mahAhimaikShata || 15\.30||
rathAshvakeshAvalikarNachAmaraM dadAha bANAsanabANabANadhIn |
akANDatashchaNDataro hutAshanastasyAtanusyandanadhuryagocharaH || 15\.31||
ityAdyariShTairashubhopadeshibhirvihanyamAno.apyasuraH punaH punaH |
yadA madAndho na gatAtnyavartatAmbarAttadAbhUnmarutAM sarasvatI || 15\.32||
madAndha mA gA bhujadaNDachaNDimAvalepato manmathahantR^isUnunA |
suraiH sanAthena purandarAdibhiH samaM samantAtsamaraM vijitvaraiH || 15\.33||
guho.asuraiH ShaDdinajAtamAtrako nidAghadhAmeva nishAtamobharaiH |
viShahyate nAbhimukho hi sa~Ngare kutastvayA tasya samaM virodhitA || 15\.34||
abhraMlihaiH shrR^i~NgashataiH samantato dikchakravAlaiH sthagitasya bhUbhR^itaH |
krau~nchasya randhraM vishikhena nirmame yenAhavastasya saha tvayA kutaH || 15\.35||
labdhvA dhanurvedamana~NgavidviShastriHsaptakR^itvaH samare mahIbhujAm |
kR^itvAbhiShekaM rudhirAmbubhirghanaiH svakrodhavahniM shamayAmbabhUva yaH || 15\.36||
na jAmadagnyaH kShayakAlarAtrikR^itsa kShatriyANAM samarAya valgati |
yena trilokIsubhaTena tena kuto.avakAshaH saha vigrahagrahe || 15\.37||
tyajAshu garvaM madamUDha mA sma gAH smarArisUnorvarashaktigocharam |
tameva nUnaM sharaNaM vrajAdhunA jagatsuvIraM sa chirAya jIva tat || 15\.38||
shrutveti vAchaM viyato garIyasIM krodhAdaha~NkAraparo mahAsuraH |
prakampitAsheShajagattrayo.api sannakampatochchairdivamabhyadhAchcha saH || 15\.39||
kiM brUtha re vyomacharA mahAsurAH smarArisUnupratipakShavartinaH |
madIyabANavraNavedanA hi sA.adhunA kathaM vismR^itigocharIkR^itA || 15\.40||
kaTusvaraiH prAlapathAmbarasthitAH shishorbalAtShaDdinajAtakasya kim |
shvAnaH pramattA iva kArtike nishi svairaM vanAnte mR^igadhUrtakA iva || 15\.41||
sa~Ngena vo garbhatapasvinaH shishurvarAka eSho.antamavApsyati dhruvam |
ataskarastaskarasa~Ngato yathA tadvo nihanmi prathamaM tato.apya mum || 15\.42||
itIrayatyugrataraM mahAsure mahAkR^ipANaM kalayatyalaM krudhA |
parasparotpIDitajAnavo bhayAnnabhashcharA dUrataraM vidudruvuH || 15\.43||
tato.avalepAdvikaTaM vihasya sa vyavatta koshAdasimuttamaM bahiH |
rathaM drutaM prApaya vAsavAntikaM nanvityavochannijasArathiM rathI || 15\.44||
manotivegena rathena sArathipraNoditena prachalanmahAsuraH |
tataH prapede surasainyasAgaraM bhaya~NkarAkAramapAramagrataH || 15\.45||
puraH surANAM putanAM prathIyasIM vilokya vIraH pulakaM pramodajam |
babhAra bhUmnAtha sa bAhudaNDayoH prachaNDayoH sa~NgarakelikautukI || 15\.46||
tato mahendrasya charAshchamUcharA raNAntalIlArabhasena bhUyasA |
puraH prachelurmanaso.ativegino yuyutsubhiH kiM samare vilambyate || 15\.47||
puraHsthitaM devariposhchamUcharA baladviShaH sainyasamudramabhyayuH |
bhujaM samutkShipya parebhya Atmano.abhidhAnamuchchairabhito nyavedayan || 15\.48||
purogataM daityachamUmahArNavaM dR^iShTvA paraM chukShubhire mahAsurAH |
purArisUnornayanaikakoNake mamurbhaTAstasya raNe.avahelayA || 15\.49||
dviShadvalatrAsavi bhIShitAshchamUrdivaukasAmandhakashatrunandanaH |
apashyaduddishya mahAraNotsavaM prasAdapIyUShadhareNa chakShuShA || 15\.50||
utsAhitAH shaktidharasya darshanAnmR^idhe mahendrapramukhA makhAshanAH |
ahaM mR^idhe jetumarInarIramanna kasya vIryAya varasya sa~NgatiH || 15\.51||
parasparaM vajradharasya sainikA dviSho.api yoddhuM svakaroddhR^itAyudhAH |
vaitAlikashrAvitatAravikramAbhidhAnamIyurvijayaiShiNo raNe || 15\.52||
sa~NgrAmaM pralayAya sannipatato velAmatikrAmato
vR^indArAsurasainyasAgarayugasyAsheShadigvyApinaH |
kAlAtithyabhujo babhUva bahalaH kolAhalaH kroShaNaH
shailottAlataTIvighaTTanapaTurbrahmANDakukShimbhariH || 15\.53||

iti shrIkAlidAsakR^itau kumArasambhave mahAkAvye
surAsurasainyasa~NgrAmo nAma pa~nchadashaH sargaH sampUrNaH || 15||
\section{sargaH 16 \- surAsurasa~NgrAmavarNanaM}
athAnyonyaM vimuktAstrashastrajAlairbhaya~NkaraiH |
yuddhamAsItsunAsIrasurAribalayormahat || 16\.1||
pattiH pattimabhIyAya raNAya rathinaM rathI |
tura~NgasthaM turaDgastho dantisthaM dantini sthitaH || 16\.2||
yuddhAya dhAvatAM dhIraM vIrANAmitaretaram |
vaitAlikAH kulAdhIshA nAmAnyalamudAharan || 16\.3||
paThatAM vandivR^indAnAM pravIrA vikramAvalIm |
kShaNaM vilambya chittAni daduryuddhotsukAH puraH || 16\.4||
sa~NgrAmAnandavardhiShNau vigrahe pulakA~nchite |
AsItkavachavichChedo vIrANAM milatAM mithaH || 16\.5||
nirdayaM khaDgabhinnebhyaH kavachebhyaH samutthitaiH |
AsandhyomadishastUlaiH palitairiva pANDurAH || 16\.6||
khaDgA rudhirasaMliptAshchaNDAMshukarabhAsurAH |
itastato.api vIrANAM vidyutAM vaibhavaM dadhuH || 16\.7||
visR^ijanto mukhairjvAlA bhImA iva bhuja~NgamAH |
visR^iShTAH subhaTai ruShTairvyoma vyAnashire sharAH || 16\.8||
bADhaM vapUMShi nirbhidya dhanvinAM nighnatAM mithaH |
ashoNitamukhA bhUmiM prAvishandUramAshugAH || 16\.9||
nirbhidya dantinaH pUrvaM pAtayAmAsurAshugAH |
petuH pravarayodhAnAM prItAnAmAhavotsave || 16\.10||
jvaladagnimukhairvANairnIrandhrairitaretaram |
uchchairvaimAnikA vyomni kIrNe dUramapAsaran || 16\.11||
vibhinnaM dhanvinAM bANairvyathArtamiva vihvalam |
rarAsa virasaM vyoma shyenapratiravachChalAt || 16\.12||
chApairAkarNamAkR^iShTairvimuktA dUramAshugAH |
adhAbanrudhirAsvAdalubdhA iva raNaiShiNAm || 16\.13||
gR^ihItAH pANibhirvIrairvikoshAH kha~NgarAjayaH |
kAntijAlachChalAdAjau vyahasansammadAdiva || 16\.14||
khaDgAH shoNitasandigdhA nR^ityanto vIrapANiShu |
rajoghane raNe.anante vidyutAM vaibhavaM dadhuH || 16\.15||
kuntAshchakAshire chaNDamullasanto raNArthinAm |
jihvAbhogA yamasyeva lelihAnA raNA~NgaNe || 16\.16||
prajvalatkAntichakrANi chakrANi varachakriNAm |
chaNDAMshumaNDalashrINi raNavyomani babhramuH || 16\.17||
kechiddhIraiH praNAdaishcha vIrANAmabhyupeyuShAm |
nipetuH kShobhato vAhAdapare mumuhurmadAt || 16\.18||
kashchidabhyAgate vIre jighAMsau mudamAdadhau |
parAvR^itya gate kShubdhe viShasAdAhavapriyaH || 16\.19||
bahubhiH saha yuddhvA vA paribhramya raNolbaNAH |
uddishya tAnupeyuH ke.api ye pUrvavR^itA raNe || 16\.20||
abhito.abhyAgatAnyoddhuM vIrAnraNamadoddhatAn |
pratyanandanbhujAdaNDaromodgamabhR^ito bhaTAH || 16\.21||
shastrabhinnebhakumbhebhyo mauktikAni chyutAnyadhaH |
adhyAhavakShetramuptakIrtibIjA~Nkurashriyam || 16\.22||
vIrANAM viShamairghoShUrvidrutA vAraNA raNe |
shAsyamAnA api trAsAdbhejurdhUtA~NkushA dishaH || 16\.23||
raNe vANagaNairbhinnA bhramanto bhinnayodhinaH |
nimamajjurmiladraktanimnagAsu mahAgajAH || 16\.24||
apAre.asR^iksaritpUre ratheShUchchaistareShvapi |
rathino.abhiripuM kruddhA hu~NkR^itairvyasR^ija~nsharAn || 16\.25||
khaDganirlUnamUrdhAno vyApatanto.api vAjinaH |
prathamaM pAtayAmAsurasinA dAritAnarIn || 16\.26||
vIrANAM shastrabhinnAni shirAMsi nipatantyapi |
adhAvandantadaShToShThabhImAnyabhiripuM krudhA || 16\.27||
shirAMsi varayodhAnAmardhachandrahR^itAnyalam |
AdadhAnA bhR^ishaM pAdaiH shyenA vyAnashire nabhaH || 16\.28||
krodhAdabhyApataddantidantAruDhAH padAtayaH |
ashvArohA gajArohaprANAnprAsairapAharan || 16\.29||
shastrachChinnagajArohA vibhramanta itastataH |
yugAntavAtachalitAH shailA iva gajA babhuH || 16\.30||
militeShu mitho yoddhuM dantiShu prasabhaM bhaTAH |
agR^ihNanyud.hdhyamAnAshcha shastraiH prANAnparasparam || 16\.31||
ruShA mitho miladdantidantasa~NgharShajo.analaH |
yodhA~nshastrahR^itaprANAnadahatsahasAribhiH || 16\.32||
AkShiptA api dantIndrAH kopanaiH pattayaH param |
tadasUnaharankhaDgaghAtaiH svasya puraH prabhoH || 16\.33||
utkShipya karibhirdUrAnmuktAnAM yodhinAM divi |
prApi jIvAtmabhirdivyA gatirvA vigrahairmahI || 16\.34||
khaDgairdhavaladhArAlairnihatya kariNAM karAn |
tairbhuvApi samaM viddhAnsantoShaM na bhaTA yayuH || 16\.35||
AkShipyAbhidivaM nItAH pattayaH karibhiH karaH |
divyA~NganAbhirAdAtuM raktAbhirdrutamIShire || 16\.36||
dhanvinasturagAruDhA gajArohA~nsharaiH kShatAn |
pratyaichChanmUrchChitAnbhUyo yoddhumAshvasatashchiram || 16\.37||
kruddhasya dantinaH pattirjighR^ikShorasinA karam |
nirbhidya dantamusalAvAruroha jighR^ikShayA || 16\.38||
khaDgena mUlato hatvA dantino radanadvayam |
prAtipakShye praviShTo.api padAtirniragAddrutam || 16\.39||
kareNa kariNA vIraH sugR^ihIto.api kopinA |
asinAsU~njahArAshu tasyaiva svayamakShataH || 16\.40||
tura~NgI turagAruDhaM prAsenAhatya vakShasi |
patatastasya nAj~nAsItprasaghAtaM svake hR^idi || 16\.41||
dviShA prAsahR^itaprANo vAjipR^iShThadR^iDhAsanaH |
hastoddhR^itamahAprAso bhuvi jIvannivAbhramat || 16\.42||
tura~NgasAdinaM shastrahR^itaprANaM mataM bhuvi |
abaddho.api mahAvAjI na sAshrunayano.atyajat || 16\.43||
bhallena shitadhAreNa bhinno.api ripuNAshvagaH |
nAmUrchChatkopato hantumiyeSha prapatannapi || 16\.44||
mithaH prAsAhatau vAjichyutau bhUmigatau ruShA |
shastryA yuyudhatuH kauchitkoshAkeshi bhujAbhuji || 16\.45||
rathino rathibhirbANairhR^itaprANA dR^iDhAsanAH |
kShatakArmukasandhAnAH saprANA iva menire || 16\.46||
na rathI rathinaM bhUyaH prAharachChastramUrchChitam |
pratyAshvasantamanvichChannAtiShThadyudhi lobhataH || 16\.47||
anyonyaM rathinau kauchidgataprANau divaM gatau |
ekAmapsarasaM prApya yuyudhAte varAyudhau || 16\.48||
mitho.ardhachandranirlUnamUrdhAnau rathinau ruchA |
khecharau bhuvi nR^ityantau svakabandhAvapashyatAm || 16\.49||
raNA~NgaNe shoNitapa~NkapichChile kathaM kathaM chinnanR^iturdhR^itAyudhAH |
nadatsu turyeShu paretayoShitAM gaNeShu gAyatsu kabandharAjayaH || 16\.50||
iti suraripurvR^itte yuddhe surAsurasainyayo
rudhirasaritAM majjaddantivrajeShu taTeShvalam |
aruNanayanaH krodhAdbhImabhramadbhR^ikuTImukhaH
sapadi kakubhAmIshAnabhyAgamatsayuyutsayA || 16\.51||

iti shrIkAlidAsakR^itau kumArasambhave mahAkAvye
surAsurasa~NgrAmavarNanaM nAma ShoDaShaH sargaH sampUrNaH || 16||
\section{sargaH 17 \- tArakAsuravadhaH}
dR^iShTvAbhyupetamatha daityapatiM purastA\-
tsa~NgrAmakelikutukena ghanapramodam |
yoddhuM madena mimiluH kakubhAmadhIshA
bANAndhakAritadigambaragarbhametya || 17\.1||
devadviShAM parivR^iDho vikaTaM vihasya
bANAvalIbhiramarAnvikaTAnvavarSha |
shailAniva pravaravAridharalo gariShThA\-
nadbhiH parAbhiratha gADhamanAratAbhiH || 17\.2||
jambhadviShatprabhR^itidikpatichApamuktA
bANAH shitAH danujanAyakabANasa~NghAn |
ahnAya tArkShyanivahA iva nAgapUgA\-
nsadyo vichichChiduralaM kaNasho raNAnte || 17\.3||
tAnprajvalatphalamukhairviShamaiH surAri\-
nAmA~NkitaiH pihitadiggaganAntarAlaiH |
AchChAditastR^iNachayAniva havyavAha\-
shchichCheda so.api surasainyasharA~nsharaughaiH || 17\.4||
daityeshvaro jvalitaroShavisheShabhImaH
sadyo mumocha yudhi yAnvishikhAnsahelaH |
te prApurudbhaTabhuja~NgamabhImabhAvaM
gADhaM babandhurapi tAMstridashendramukhyAn || 17\.5||
te nAgapAshavishikhairasureNa baddhAH
shvAsAnilAkulamukhA vimukhA raNasya |
di~NnAyakA balaripupramukhAH smarAri\-
sUnoH samIpamagamanvipadantahetoH || 17\.6||
dR^iShTiprapAtavashato.api purArisUno\-
ste nAgapAshaghanabandhavipattiduHkhAt |
indrAdayo mumuchire svayamasya devAH
sevAM vyadhurnikaTametya mahAjigIShoH || 17\.7||
uddIptakopadahano.atha surendrashatru\-
rahnAya sArathimavochata chaNDabAhuH |
baddhA mayA surapatipramukhAH prasahya
bAlasya dhUrjaTisutasya nirIkShaNena || 17\.8||
muktA babhUvuradhunA tadimAnvihAya
kartAsmyamuM samarabhUmipashUpahAram |
tatsyandanaM sapadi vAhaya shambhusUnuM
draShTAsmi darpitabhujAbalamAhavAya || 17\.9||
tatsyandanaH sapadi sArathisampraNunnaH
prakShubdhavAridharadhIragabhIraghoShaH |
chaNDashchachAla dalitAkhilashatrusainya\-
mAMsAsthishoNitavipa~NkaviluptachakraH || 17\.10||
dR^iShTvA rathaM pralayavAtachaladgirIndra\-
kalpaM daladvalavirAvavisheSharaudram |
abhyAgataM suraripoH surarAjasainyaM
kShobhaM jagAma paramaM bhayavepamAnam || 17\.11||
prakShubhyamANamavalokya digIshasainyaM
shambhoH sutaM kalahakelikutUhalotkam |
uddAmadoHkalitakArmukadaNDachaNDaH
provAcha vAchamupagamya sa kArttikeyam || 17\.12||
re shambhutApasashisho ! bata mu~ncha mu~ncha
dordarpamatra virama tridivendrakAryAt |
shastraiH kimatra bhavato.anuchitairatIva
bAlatvakomalabhujAtulabhArabhUtaiH || 17\.13||
evaM tvameva tanayo.asi girIshagauryoH
kiM yAsi kAlaviShayaM viShamaiH sharairme |
sa~NgrAmato.apasara jIva piturjananyA
stUrNaM pravishya varama~NkatalaM vidhehi || 17\.14||
samyaksvayaM kila vimR^ishya girIshaputra
jambhadviSho.asya jahihi pratipakShamAshu |
eSha svayaM payasi majjati durvigAhye
pAShANanauriva nima~njayate purA tvAm || 17\.15||
itthaM nishamya vachanaM yudhi tArakashcha
kamprAdharo vikachakokanadAruNAkShaH |
kShobhAttrilochanasuto dhanurIkShamANaH
provAcha vAchamuchitAM parimR^ishcha shaktim || 17\.16||
daityAdhirAja bhavatA yadavAdi garvA\-
ttatsarvamapyuchitameva tavaiva kiM tu |
draShTAsmi te pravarabAhubalaM variShThaM
shastraM gR^ihANa kuru kArmukamAtatajyam || 17\.17||
ityuktavantamavadattripurAriputraM
daityaH krudhauShThamadharaM kila nirvibhidya |
yuddhArthamudbhaTabhujAbaladarpito.asi
bANAnsahasva mama sAditashatrupR^iShThAn || 17\.18||
duShprekShaNIyamaribhirdhanurAtatajyaM
sadyo vidhAya viShamAnvishikhAnnyadhatta |
sa krodhabhImabhujagendranibhaM svachApaM
chaNDaM prapa~nchayati jaitrasharaiH kumAre || 17\.19||
karNAntametya ditijena vikR^iShyamANaM
kodaNDametadabhita suShuve sharaughAn |
vyomA~NgaNe lipikarAnki raNaprarohaiH
sAndrairasheShakakubhAM palitaM kariShNUn || 17\.20||
bANaiH surAridhanuShaH prasR^itairanantai\-
rnirghoShabhIShitabhaTo lasadaMshujAlaiH |
andhIkR^itAkhilasureshvarasainya Isha\-
sUnuH kuto.api viShayaM na jagAma dR^iShTeH || 17\.21||
devena manmatharipostanayena gADha\-
mAkarNakR^iShTamabhito dhanurAtatajyam |
bANAnasUta nishitAnyudhi yAnsujaitrAM\-
staiH sAyakA bibhidire sahasA surAreH || 17\.22||
reje surArisharadurdinake niraste
sadyastarAM nikhilakhecharakhedahetau |
devaH prabhAprabhuriva smarashatrusUnuH
pradyotanaH sughanadurdharadhAmadhAmA || 17\.23||
tatrAtha du sahataraM samare tarasvI
dhAmAdhikaM dadhati dhIrataraM kumAre |
mAyAmayaM samaramAshu mahAsurendro
mAyAprachArachaturo rachayA~nchakAra || 17\.24||
ahnAya kopakaluSho vikaTaM vihasya
vyarthAM samarthya varashastrayudhaM kumAre |
jiShNurjagadvijayadurlalitaH sahelaM
vAyavyamastramasuro dhanuShi nyadhatta || 17\.25||
sandhAnamAtramapi yasya yugAntakAla\-
bhUtabhramaM puruShabhIShaNadhoraghoShaH |
uddhUtadhUlipaTalaiH pihitAmbarAshaH
prachChannachaNDakiraNo vyasaratsamIraH || 17\.26||
kundojjavalAni sakalAtapavAraNAni
dhUtAni tena marutA surasainikAnAm |
uDDIyamAnakalahaMsakulopamAni
meghAbhadhUlimaline nabhasi prasastruH || 17\.27||
vidhvasya tena surasainyamahApatAkA
nItA nabhasthalamalaM navamallikAbhAH |
svargApagAjalamahaughasahastralIlAM
vyAtenire divi sitAmbarakaitavena || 17\.28||
dhUtAni tena surasainyamahAgajAnAM
sadyaHshatAni vidhurANi dalatkuthAni |
petuH kShitau kupitavAsavavajralUna\-
pakShasya bhUdharakulasya tulAM vahanti || 17\.29||
tAstAH khareNa marutA ratharAjayo.api
dodhUyamAnanipatiShNutura~NgamAshcha |
vistrastasArathikulapravarAH samantAd
vyAvR^itya peturavanau suravAhinInAm || 17\.30||
hitvAyudhAni surasainyatura~NgavAhA
vAtena tena vidhurAH surasainyamadhye |
shastrAbhighAtamanavApya nipetururvyAM
svIyeShu vAhanavareShu patatsu satsu || 17\.31||
tenAhatAstridashasainyapadAtayo.api
srastAyudhAH suvidhurAH paruShaM rasantaH |
vAtsAvivartadalavadbhramametya dUraM
niShpeturambaratalAdvasudhAtale.asmin || 17\.32||
itthaM vilokya surasainyamatho asheShaM
daityeshvareNa vidhurIkR^itamastrayogAt |
svarlokanAthakamalAkushalaikahetu\-
rdivyaM prabhAvamatanodatanuH sa devaH || 17\.33||
tenojjhitaM sakalameva surendrasainyaM
svAsthyaM prapadya punareva yudhi pravR^ittam |
dR^iShTvAsR^ijaddahanadaivatamastramiddha\-
muddIptakopadahanaH sahasA surAriH || 17\.34||
varShAtikAlajaladadyutayo nabho.ante
gADhAndhakAritadisho ghanadhUmasa~NghAH |
sadyaH prasasrurasitotpaladAmabhAso
dR^iggocharatvamakhilaM na hi sannayantaH || 17\.35||
dikchakravAlagilanairmalinaistamobhi\-
rliptaM nabhaHsthalamalaM ghanavR^indasAndraiH |
dhUmairvilokya muditAH khalu rAjahaMsA
gantuM saraH sapadi mAnasamIShuruchchaiH || 17\.36||
jajvAla vahniratulaH surasainikeShu
kalpAntakAladahanapratimaH samantAt |
AshAmukhAni vimalAnyakhilAni kIlA\-
jAlairalaM kapilayansakalaM nabho.api || 17\.37||
ujjAgarasya dahanasya nirargalasya
jvAlAvalIbhiratulAbhiranAratAbhiH |
kIrNaM payodanivahairiva dhUmasa~Nghai\-
rvyomAbhyalakShyata kulaistaDitAmivochchaiH || 17\.38||
gADhAdbhayAdviyati vidrutakhechareNa
dIptena tena dahanena suduHsahena |
dandahyamAnamakhilaM surarAjasainya\-
matyAkulaM shivasutasya samIpamApa || 17\.39||
ityagninA ghanatareNa tato.abhibhUtaM
taddevasainyamakhilaM vikalaM vilokya |
sasmeravaktrakamalo.andhakashatrusUnu\-
rbANAsanena samadhatta sa vAruNAstram || 17\.40||
ghorAndhakAranikarapratimo yugAnta\-
kAlAnalaprabaladhUmanibho nabhonte |
garjAravairvighaTayannavanIdharANAM
shrR^i~NgANi meghanivaho ghanamujjagAma || 17\.41||
vidyullatA viyati vAridavR^indamadhye
gambhIrabhIShaNaravaiH kapishIkR^itAshA |
ghorA yugAntachalitasya bhaya~NkarA.atha
kAlasya lolarasaneva chamachchakAra || 17\.42||
kAdambinI viruruche viShakaNThikAbhi\-
ruttAlakAlarajanIjaladAvalIbhiH |
vyomnyuchchakairachirarukparidIpitAshA.a\-
dR^iShTichChadA viShamaghoShavibhIShaNA cha || 17\.43||
vyomnastalaM pidadhatAM kakubhAM mukhAni
garjAravairavirataistudatAM manAMsi |
ambhobhR^itAmatitarAmanaNIyasIbhi\-
rdhArAvalIbhirabhito vavR^iShe samUhaiH || 17\.44||
ghorAndhakArapaTalaiH pihitAmbarANAM
gambhIragarjanaravairvyathitAsurANAm |
vR^iShTyA.anayA jalamuchAM varuNAstrajAnAM
vishvodarambharirapi prashashAma vahniH || 17\.45||
daityo.api roShakaluSho nishitaiH kShuraprai\-
rAkarNakR^iShTadhanurutpatitaiH sa bhImaiH |
tadbhItividrutasamastasurendrasainyaM
gADhaM jaghAna makaradhvajashatrusUnum || 17\.46||
devo.api daityavishikhaprakaraM sachApaM
bANaishchakarta kaNasho raNakelikArI |
yogIva yogavidhishuShkamanA yamAdyaiH
sAMsArikaM viShayasa~NghamamoghavIryam || 17\.47||
bhrUbhahgabhIShaNamukho.asurachakravartI
sandIptakopadahano.atha rathaM vihAya |
krIDatkarAlakaravAlakaro.asurendra\-
staM pratyadhAvadabhitastripurAri sUnum || 17\.48||
abhyApatantamasurAdhipamIshaputro
durvArabAhuvibhavaM surasainikaistam |
dR^iShTvA yugAntadahanapratimAM mumocha
shaktiM pramodavikasadvadanAravindaH || 17\.49||
uddyotitAmbaradigantaramaMshujAlaiH
shaktiH papAta hR^idi tasya mahAsurasya |
harShAshrubhiH saha samastadigIshvarANAM
shokoShNabAShpasalilaiH saha dAnavAnAm || 17\.50||
shaktyA hR^itAsumasureshvaramApatantaM
kalpAntavAtahatabhinnamivAdrishrR^i~Ngam |
dR^iShTvA praruDhapulakA~nchitachArudehA
devAH pramodamagamaMstridashendramukhyAH || 17\.51||
yatrApatatsa danujAdhipatiH parAsuH
saMvartakAlanipatachChikharIndratulyaH |
tatrAdadhAtphaNipatirdharaNIM phaNAbhi\-
stadbhUribhAravidhurAbhiradho vrajantIm || 17\.52||
svargApagAsalilasIkariNI samantAt
saurabhyalubdhamadhupAvalisevyamAnA |
kalpadrumaprasavavR^iShTirabhUnnabhastaH
shambhoH sutasya shirasi tridashArishatroH || 17\.53||
pulakabharavibhinnavArabANA
bhujavibhavaM bahu tArakasya shatroH |
sakalasuragaNA mahendramukhyAH
pramadamukhachChavisampado.abhyanandan || 17\.54||
iti viShamasharAreH sUnunA jiShNunAjau
tribhuvanavarashalye proddhR^ite dAnavendre |
balaripuratha nAkasyAdhipatyaM prapadya
vyajayata surachUDAratnaghR^iShTAgrapAdaH || 17\.55||

iti shrIkAlidAsakR^itau kumArasambhave mahAkAvye
tArakAsuravadho nAma saptadashaH sargaH sampUrNaH || 17||

kumArasambhavaH
##

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}