% Text title            : naaTyashaastra adhyaaya 13 karayuktidharmiivyanjaka
% File name             : natya13.itx
% Category              : nATyashAstra, major\_works, bharata
% Location              : doc\_z\_misc\_major\_works
% Author                : Sage Bharata
% Transliterated by     : Sowmya Krishnapur krsowmya at yahoo.com
% Proofread by          : Sowmya Krishnapur krsowmya at yahoo.com
% Latest update         : June 17, 2005
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Natya Shastra Chapter 13 ..}##
\itxtitle{.. nATyashAstram adhyAyaH 13 ..}##\endtitles ##

               .. shrIrastu ..
        bharatamunipraNItaM nATyashAstram.h
           atha trayodasho.adhyAyaH
ye tu pUrvaM mayA proktAstrayo vai nATyamaNDapAH |
teShAM vibhAgaM viGYAya tataH kakShyAM prayojayet || 1||
ye nepathyagR^ihadvAre mayA pUrvaM prakIrtite |
tayorbhANDasya vinyAso madhye kAryaH prayoktR^ibhiH || 2||
kakShyAvibhAgo nirdeshyo ra~NgapIThaparikramAt |
parikrameNa ra~Ngasya kakShyA hyanyA vidhIyate || 3||
kakShyAvibhAge GYeyAni gR^ihANi nagarANi cha |
udyAnArAmasaritastvAshramA aTavI tathA || 4||
pR^ithivI sAgarAshchaiva trailokyaM sacharAcharam |
varShANi saptadvIpAshcha parvatA vividhAstathA || 5||
alokashchaiva lokashcha rasAtalamathApi cha |
daityanAgAlayAshchaiva gR^ihANi bhavanAni cha || 6||
nagare vA vane vApi varShe vA parvate.api vA |
yatra vArtA pravarteta tatra kakShyAM pravartayet || 7||
bAhyaM vA madhyamaM vApi tathaivAbhyantaraM punaH |
dUraM vA sannikR^iShTaM vA deshaM tu parikalpayet || 8||
pUrvapraviShTA ye ra~NgaM GYeyAste.abhyantarA budhaiH |
pashchAtpraviShTA viGYeyAH kakShyAbhAge tu bAhyataH || 9||
teShAM tu darshanechChuryaH pravishedra~NgamaNDapam |
dakShiNAbhimukhaH so.atha kuryAdAtmanivedanam || 10||
yato mukhaM bhavedbhANDaM dvAraM nepathyakasya cha |
sA mantavyA tu dik pUrvA nATyayoge na nityashaH || 11||
niShkrAmedyashcha tasmAdvai sa tenaiva tathA vrajet |
yatastasya kR^itaM tena puruSheNa nivedanam || 12||
niShkrAnto.arthavashAchchApi pravishedyadi tadgR^iham |
yataH prAptaH sa puruShastena mArgeNa niShkramet || 13||
athavArthavashAchchApi tenaiva saha gachChati |
tathaiva pravishet gehamekAkI sahito.api vA || 14||
tayoshchApi pravishatoH kakShyAmanyAM vinirdishet |
parikrameNa ra~Ngasya tvanyA kakShyA vidhIyate || 15||
samaishcha sahito gachChennIchaishcha parivAhitaH |
atha prekShaNikAshchApi viGYeyA hyagrato gatau || 16||
saiva bhUmistu bahubhirvikR^iShTA syAtparikramaiH |
madhyA vA sannikR^iShTA vA teShAmevaM vikalpayet || 17||
nagare vA vane vApi sAgare parvate.api vA |
divyAnAM gamanaM kAryaM dvIpe varSheShu vA punaH || 18||
AkAshena vimAnena mAyayApyatha vA punaH |
vividhAbhiH kriyAbhirvA nAnArthAbhiH prayogataH || 19||
nATake chChannaveShANAM divyAnAM bhUmisa~ncharaH |
mAnuShe kAraNAdeShAM yathA bhavati darshanam || 20||
bhArate tvatha haime vA harivarSha ilAvR^ite |
ramye kiMpuruShe vApi kuruShUttarakeShu vA || 21||
divyAnAM ChandagamanaM sarvavarSheShu kIrtitam |
bhArate mAnuShANA~ncha gamanaM saMvidhIyate || 22||
gachChedyadi vikR^iShTastu deshakAlavashAnnaraH |
a~NkachChede tamanyasmin nirdisheddhi praveshake || 23||
ahnaH pramANaM gatvA tu kAryalAbhaM vinirdished |
tathAlAbhe tu kAryasya a~NkachChedo vidhIyate || 24||
kShaNo muhUrto yAno vA divaso vApi nATake |
ekA~Nke sa vidhAtavyo bIjasyArthavashAnugaH || 25||
a~NkachChede tu nirvR^ittaM mAsaM vA varShameva vA |
nordhvaM varShAtprakartavyaM kAryama~NkasamAshrayam || 26||
evaM tu bhArate varShe kakShyA kAryA prayogataH |
mAnuShANAM gatiryA tu divyAnAntu nibodhata || 27||
himavatpR^iShThasaMsthe tu kailAse parvatottame |
yakShAshcha guhyakAshchaiva dhanadAnucharAshcha ye || 28||
rakShaHpishAchabhUtAshcha sarve haimavatAH smR^itAH |
hemakUTe cha gandharvA viGYeyAH sApsarogaNAH || 29||
sarve nAgAshcha niShadhe sheShavAsukitakShakAH |
mahAmerau trayastriMshad GYeyA devagaNA budhaiH || 30||
nIle tu vaiDUryamaye siddhA brahmarShayastathA |
daityAnAM dAnavAnA~ncha shvetaparvata iShyate || 31||
pitarashchApi viGYeyA shR^i~NgavantaM samAshritAH |
ityete parvatAH shreShThA divyAvAsAH prakIrtitAH || 32||
teShAM kakShyAvibhAgashcha jambUdvIpe bhavedayam |
teShAM na cheShTitaM kAryaM svaiH svaiH karmaparAkramaiH || 33||
parichCha\(chChe\)davisheShastu teShAM mAnuShalokavat |
sarve bhAvAshcha divyAnAM kAryA mAnuShasaMshrayAH || 34||
teShAntvanimiShatvaM yattanna kAryaM prayoktR^ibhiH |
iha bhAvA rasAshchaiva dR^iShTAveva pratiShThitAH || 35||
dR^iShTyA hi sUchito bhAvaH punara~NgairvibhAvyate |
evaM kakShyAvibhAgastu mayA prokto dvijottamAH || 36||
punashchaiva pravakShyAmi pravR^ittInAntu lakShaNam |
chaturvidhA pravR^ittishcha proktA nATyaprayogataH |
AvantI dAkShiNAtyA cha pA~nchAlI choDhramAgadhI || 37||
atrAha pravR^ittiriti kasmAt \?\  uchyate pR^ithivyAM
nAnAdeshaveShabhAShAchAravArtAH prakhyApayatIti vR^ittiH |
pravR^ittishcha nivedane | atrAha - yathA pR^ithivyAM bahavo
deshAH santi , kathamAsAM chaturvidhatvam upapannaM,
samAnalakShaNashchAsAM prayoga uchyate \,\ satyametat |
samAnalakShaNa AsAM prayogaH | kintu
nAnAdeshaveShabhAShAchAro loka iti kR^itvA lokAnumatena
vR^ittisaMshritasya nATyasya vR^ittInAM mayA
chaturvidhatvamabhihitaM bhAratI sAttvatI kaishikyArabhaTI
cheti | vR^ittisaMshritaishcha prayogairabhihitA deshAH | yataH
pravR^ittichatuShTayamabhinirvR^ittaM prayogashchotpAditaH | tatra
dAkShiNAtyAstAvat bahunR^ittagItavAdyA kaishikIprAyAH
chaturamadhuralalitA~NgAbhinayAshcha | tadyathA -
mahendro malayaH sahyo mekalaH pAlama~njaraH |
eteShu ye shritA deshAH sa GYeyo dakShiNApathaH || 38||
kosalAggstoshalAshchaiva kali~NgA yavanA khasAH |
draviDAndhramahArAShTrA vaiShNA vai vAnavAsajAH || 39||
dakShiNasya samudrasya tathA vindhyasya chAntare |
ye deshAsteShu yu~njIta dAkShiNAtyAM tu nityashaH || 40||
AvantikA vaidishikAH saurAShTrA mAlavAstathA |
saindhavAstvatha sauvIrA AvartAH sArbudeyakAH || 41||
dAshArNAstraipurAshchaiva tathA vai mArtikAvatAH |
kurvantyAvantikImete pravR^ittiM nityameva tu || 42||
sAttvatIM kaishikIM chaiva vR^ittimeShAM samAshritA |
bhavet pryogo nATye.atra sa tu kAryaH prayoktR^ibhiH || 43||
a~NgA va~NgAH kali~NgAshcha vatsAshchaivoDhramAgadhAH |
pauNDrA nepAlakAshchaiva antargiribahirgirAH || 44||
tathA plava~NgamA GYeyA maladA mallavartakAH |
brahmottaraprabhR^itayo bhArgavA mArgavAstathA || 45||
prAjyotiShAH pulindAshcha vaidehAstAmraliptakAH |
prA~NgAH prAvR^itayashchaiva yu~njantIhoDhramAgadhIm || 46||
anye.api deshAH prAchyAM ye purANe samprakIrtitAH |
teShu prayujyate hyeShA pravR^ittishchoDhramAgadhI || 47||
pA~nchAlA saurasenAshcha kAshmIrA hastinApurAH |
bAhlIkA shalyakAshchaiva madrakaushInarAstathA || 48||
himavatsaMshritA ye tu ga~NgAyAshchottarAM disham |
ye shritA vai janapadAsteShu pA~nchAlamadhyamAH || 49||
pA~nchAlamadhyamAyAM tu sAttvatyArabhaTI smR^itA |
prayogastvalpagItArtha AviddhagativikramaH || 50||
dvidhA kriyA bhavatyAsAM ra~NgapIThaparikrame |
pradakShiNapradeshA cha tathA chApyapradakShiNA || 51||
AvantI dAkShiNAtyA cha pradakShiNaparikrame |
apasavyapradeshAstu pA~nchAlI choDhramAgadhI || 52||
AvantyAM dAkShiNAtyAyAM pArshvadvAramathottaram |
pA~nchAlyAmoDhramAgadhyAM yojyaM dvAraM tu dakShiNam || 53||
ekIbhUtAH punashchaitAH prayoktavyAH prayoktR^ibhiH |
pArShadaM deshakAlau vApyarthayuktimavekShya cha || 54||
yeShu desheShu yA kAryA pravR^ittiH parikIrtitA |
tadvR^ittikAni rUpANi teShu tajGYaH prayojayet || 55||
ekIbhUtAH punastvetA nATakAdau bhavanti hi |
avekShya vR^ittibAhulyaM tattatkarma samAcharet || 56||
sArthe bAhulyamekasya sheShANAmatha buddhimAn |
yeShAmanyasya bAhulyaM pravR^ittiM pUrayettadA || 57||
prayogo dvividhashchaiva viGYeyo nATakAshrayaH |
sukumArastathAviddho nATyayuktisamAshrayaH || 58||
yattvAviddhA~NgahArantu chChedyabhedyAhavAtmakam |
mAyendrajAlabahulaM pustanepathyasaMyutam || 59||
puruShairbahubhiryuktamalpastrIkaM tathaiva cha |
sAttvatyArabhaTIyuktaM nATyamAviddhasaMGYitam || 60||
DimaH samavakArashcha vyAyogehAmR^igau tathA |
etAnyAviddhasaMGYAni viGYeyAni prayoktR^ibhiH || 61||
eShAM prayogaH kartavyo daityadAnavarAkShasaiH |
uddhatA ye cha puruShAH shauryavIryabalAnvitAH || 62||
nATakaM saprakaraNaM bhANo vIthya~NkanATike |
sukumAraprayogANi mAnuSheShvAshritAstu ye || 63||
atha bAhyaprayogeShu prekShAgR^ihavivarjite |
vidikShvapi bhavedra~NgaH kadAchid bharturAGYayA || 64||
pR^iShTha kutapaM nATye yuktA yato mukhaM bharatAH |
sA pUrvA mantavyA prayogakAle tu nATyaGYaiH || 65||
dvArANi ShaT chaiva bhavanti chAsya
ra~Ngasya digbhAgavinishchitAni |
nATyaprayogeNa khalu praveshe
prAchyAM pratIchyAM cha dishi praveshaH || 66||
vidhAnamutkramya yathA cha ra~Nge
vinA pramANAdvidishaH prayoge |
dvArantu yasmAtsamR^ida~NgabhANDaM
prAchIM dishaM tAM manasA.adhyavasyet || 67||
vayo.anurUpaH prathamantu vesho vesho.anurUpashcha gatiprachAraH |
gatiprachArAnugatashcha pAThyaM
pAThyAnurUpAbhinayashca kAryaH || 68||
dharmI yA dvividhA proktA mayA pUrvaM dvijottamAH |
laukikI nATyadharmI cha tayorvakShyAmi lakShaNam || 69||
svabhAvabhAvopagataM shuddhaM tvavikR^itaM tathA |
lokavArtAkriyopetama~NgalIlAvivarjitam || 70||
svabhAvAbhinayopetaM nAnAstrIpuruShAshrayam |
yadIdR^ishaM bhavennATyaM lokadharmI tu sA smR^itA || 71||
ativAkyakriyopetamatisattvAtibhAvakam |
lIlA~NgahArAbhinayaM nATyalakShaNalakShitam || 72||
svarAla~NkArasaMyuktamasvasthapuruShAshrayam |
yadIdR^ishaM bhavennATyaM nATyadharmI tu sA smR^itA || 73||
lokaprasiddhaM dravyantu yadA nATye prayujyate |
mUrtimat sAbhilASha~ncha nATyadharmI tu sA smR^itA || 74||
Asannoktantu yadvAkyaM na shR^iNvanti parasparam |
anuktaM shrUyate vAkyaM nATyadharmI tu sA smR^itA || 75||
shailayAnavimAnAni charmavarmAyudhadhvajAH |
mUrtimantaH prayujyante nATyadharmI tu sA smR^itA || 76||
ya ekAM bhUmikAM kR^itvA kurvItaikAntare.aparAm |
kaushalyAdekakatvAdvA nATyadharmI tu sA smR^itA || 77||
yA gamyA pramadA bhUtvA gamyA bhUmiShu yujyate |
gamyA bhUmiShvagamyA cha nATyadharmI tu sA smR^itA || 78||
lalitaira~NgavinyAsaistathotkShiptapadakramaiH |
nR^ityate gamyate yachcha nATyadharmI tu sA smR^itA || 79||
yo.ayaM svabhAvo lokasya sukhaduHkhakriyAtmakaH |
so.a~NgAbhinayasaMyukto nATyadharmI tu sA smR^itA || 80||
yashchetihAsavedArtho brahmaNA samudAhR^itaH |
divyamAnuSharatyarthaM nATyadharmI tu sA smR^itA || 81||
yashcha kakShyAvibhAgo.ayaM nAnAvidhisamAshritaH |
ra~NgapIThagataH prokto nATyadharmI tu sA bhavet || 82||
nATyadharmIpravR^ittaM hi sadA nATyaM prayojayet |
na hya~NgAbhinayAtki~nchidR^ite rAga pravartate || 83||
sarvasya sahajo bhAvaH sarvo hyabhinayo.arthataH |
a~NgAla~NkAracheShTAbhirnATyadharmI prakIrtitA || 84||
evaM kakShyAvibhAgastu dharmI yuktaya eva cha |
viGYeyA nATyatattvaGYaiH prayoktavyAshcha tattvataH || 85||
ukto mayehAbhinayo yathAvat shAkhAkR^ito yashcha kR^ito.a~NgahAraiH |
punashcha vAkyAbhinayaM yathAvadvakShye svaravya~njanavarNayuktam || 86||
iti bharatIye nATyashAstre karayuktidharmIvya~njako nAma
trayodasho.adhyAyaH |
##
Encoded by Sowmya Krishnapur krsowmya@yahoo at com

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}