% Text title            : nyAsatilakam
% File name             : nyAsatilakam.itx
% Category              : major\_works, vedAnta-deshika, vedanta
% Location              : doc\_z\_misc\_major\_works
% Author                : VedAnta Deshika
% Transliterated by     : Vikram Bhaskaran vikram85.iyer at gmail.com
% Proofread by          : Vikram Bhaskaran vikram85.iyer at gmail.com, NA
% Latest update         : May 17, 2018
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. nyAsatilakam ..}##
\itxtitle{.. nyAsatilakam ..}##\endtitles ##
shrImate nigamAntamahAdeshikAya namaH |
shrImAn ve~NkaTanAthAryaH kavitArkikakesarI |
vedAntAchAryavaryo me sannidhattAM sadA hR^idi ||

gurubhyastadgurubhyashcha namovAkamadhImahe |
vR^iNImahe cha tatrAdyau dampatI jagatAM patI || 1||

prAyaH prapadane puMsAM paunaHpunyaM nivArayan |
hastaH shrIra~NgabharturmAmavyAdabhaya mudritaH || 2||

anAderniHsImno duritajaladheryannirUpamaM
viduH prAyashchittaM yaduraghudhurINAshayavidaH |
tadArambhe tasyA giramavadadhAnena manasA
prapadye tAmekAM shriyamakhilanAthasya mahiShIm || 3||

mahendrAgnAviShNuprabhR^itiShu mahattvaprabhR^itivat
prapattavye tattve pariNamitavaishiShTyavibhavAm |
adhR^iShyatvaM dhUtvA kamiturabhigamyatvajananIM
shriyaM shItApA~NgAmahamasharaNo yAmi sharaNam || 4||

svataHsiddha shrImAnamitaguNabhUmA karuNayA
vidhAya brahmAdInvitarati nijAdeshamapi yaH |
prapattyA sAkShAdvA bhajana shirasA vA.api sulabhaM
mumukShurdeveshaM tamahamadhigachChAmi sharaNam || 5||

vR^indAni yaH svavashayanvrajasundarINAm
vR^indAvanAntarabhuvAM sulabho babhUva |
shrImAnasheShajanasa~NgrahaNAya shete
ra~Nge bhuja~Ngashayane sa mahAbhuja~NgaH || 6||

ra~NgAstIrNabhuja~Ngapu~NgavavapuHparya~NkavaryaM gatau
sargasthityavasAnakelirasikau tau dampatI naH patI |
nAbhIpa~NkajashAyinaH shrutisukhairanyonyabaddhasmitau
DimbhasyAmbujasambhavasya vachanairontatsadityAdibhiH || 7||

ghanakaruNArasaughabharitAM paritApaharAM
nayanamahashChaTAM mayi tara~Ngaya ra~Ngapate |
duritahutAshanasphuritadurdamaduHkha maShI\-
malinitavishvasaudhadurapahnavavarNasudhAm || 8||

durmochodbhaTakarmakoTinibiDo.apyAdeshavashyaH kR^itaH
bAhmairnaiva vimohito.asmi kuddashAM pakShairna vikShobhitaH |
yo mAhAnasiko mahAnyatipaternItashcha tatpautrajAn
AchAryAniti ra~Ngadhurya mayi te svalpAvashiShTo bharaH || 9||

ArteShvAshuphalA tadanyaviShaye.apyuchChinnadehAntarA
vahnyAderanapekShaNAttanubhR^itAM satyAdivadvyApinI |
shrIra~Ngeshvara yAvadAtmaniyatatvatpAratantrayochitA
tvayyeva tvadupAyadhIrapihitasvopAyabhAvA.astu me || 10||

tvayyAchAryaivinihitabharAstAvakA ra~NganAtha
tvatkai~NgaryapravaNamanasastvadguNAsvAdamattAH |
tvayyekasminnapi vijahato muktavatsAdhanatvaM
tvachCheShatvasvarasarasikAH sUrayo me svadantAm || 11||

kalpastome.apyapAstatvaditaragatayo.ashaktidhIbhaktIbhUmnA
ra~Ngesha prAtikUlyakSharaNapariNamannirvighAtAnukUlyAH |
trAtAraM tvAmabhedyAchCharaNavaraNato nAtha nirvighnayantaH
tvannikShiptAtmarakShAM prati rabhasajuShaH svapravR^ittiM tyajanti || 12||

tyaktopAyavyapAyAMstadubhayakaraNe satrapAnsAnutApAn
bhUyo.api tvatprapattyA prashamitakaluShAnhanta sarvaMsahastvam |
ra~Ngin nyAsAntara~NgAkhilajanahitatAgocharatvannidesha\-
prItiprAptasvavarNAshramashubhacharitAnpAsi dhanyAnananyAn || 13||

shokAspadAMshamathanaH shrayatAM bhavAbdhau
rAgAspadAMshasahajaM na ruNatsi duHkham |
no chedamI jagati ra~NgadhurINa bhUyaH
kShodiShThabhogarasikAstava na smareyuH || 14||

hetuvaidhe vimarshe bhajanavaditarat kiM tvanuShTAnakAle
vedyatvadrUpabhedo vividha iha sa tUpAyAnyanapekShA |
ra~NginprArabdhabha~NgAtphalamadhikamanAvR^ittirukteShTivansyAt
nAnA shabdAdibhedAtprapadanabhajane sUchite sUtrakAraiH || 15||

bhaktau ra~Ngapate yathA khalu pashuchChAgAdivatvedana\-
dhyAnopAsanadarshanAdivachasAmichChantyabhinnArthatAm |
vyaktyaikyAchCharaNAgatiprapadanatyAgAtmanikShepaNa\-
nyAsAdyeShu tathaiva tantranipuNaiH paryAyatA smaryate || 16||

vishvAsAyAsabhUmnornyasanabhajanayorgaurave ko visheShaH
tatsadbhAve.api dharmAntara iva ghaTate kartR^ibhedAdvikalpaH |
tadbhedo ra~NgashAyinnanitaragatitAdyutthashokAtirekAt
sadvidyAdau vikalpastvabhimatibhidayA tena tatraikarAshyam || 17||

dhrR^ivamadhikR^itibhedAdkarmavatra~NgashAyin
phalati phalamanekaM tvatpade bhaktirekA |
sharaNavaraNavANI sarvahetustathA.asau
kR^ipaNabhajananiShThA buddhidaurbalyakAShThA || 18||

kartavyaM sakR^ideva hanta kaluShaM sarvaM tato nashyati
brahmeshAdisudurlabhaM padamapi prApyaM mayA drAgiti |
vishvAsapratibandhichintanamidaM paryasyati nyasyatAM
ra~NgAdhIsha ramApatitvasubhagaM nArAyaNatvaM tava || 19||

dhIkarmabhaktirahitasya kadA.apyashaktyA
ra~Ngesha bhAvakaluShapraNatidvayokteH |
manye balaM prabaladuShkR^itashAlino me
tvanmUladeshikakaTAkShanipAtamAdyam || 20||

andho.anandhagrahaNavashago yAti ra~Ngesha yadvat
pa~NgurnaukAkuharanihito nIyate nAvikena |
bhu~Nkte bhogAnaviditanR^ipaH sevakasyArbhakAdiH
tvatsamprAptau prabhavati tathA deshiko me dayALuH || 21||

uktyA dhana~njayavibhIShaNalakShyayA te
pratyAyya lakShmaNamunerbhavatA vitIrNam |
shrutvA varaM tadanubandhamadAvalipte
nityaM prasIda bhagavanmayi ra~NganAtha || 22||


sakR^idapi vinatAnAM sarvade sarvadehini
upaniShadabhidheye bhAgadheye vidheye |
viramati na kadAchinmohato hA hato.ahaM
viShamaviShayachintAmedurA me durAshA || 23||

yAvajjIvaM jagati niyataM dehayAtrA bhavitrI
tyaktAH sarve trichaturadinaglAnabhogA nabhogAH |
datte ra~NgI nijamapi padaM deshikAdeshakA~NkShI
kiM te chinte paramabhimataM khidyase yat punastvm || 24||

api muhuraparAdhairaprakampyAnukampe
vahati mahati yoga kShema vR^indaM mukunde |
madakaluShamanIShAvajralepAvalepAn
aNuguNayitumIhe na prabhUnaprabhUtAn || 25||

mAtarbhArati mu~ncha mAnuShachaTUnhe deha labdhairalaM
lubdhadvAradurAsikAparibhavaistoShaM juShethA manaH |
vAchaH sImani ra~NgadhAmani mahAnandonnamadbhUmani
svAminyAtmani ve~NgaTeshvarakaveH svenArpito.ayaM bharaH || 26||

dAsyaM lAsyavatA.anumatya manasA ra~Ngeshvara tvatpade
nityaM ki~NkaravANyahaM na tu punaH kuryAM kadaryAshrayAm |
mIlachchakShuShi vellitabhruNi muhurdattAvamAnAkShare
bhIme kasyachidADhyakasya vadane bhikShAvilakShAM ddasham || 27||

tvayyekA~nchaliki~Nkare tanubhR^itAM nirvyAjasarvaMsahe
kalyANAtmani ra~NganAtha kamalAkAnte mukunde sthite |
svAminpAhi dayasva deva kushalinjIva prabho bhAvayeti
AlApAnavalepiShu pralapituM jihreti jihvA mama || 28||

tvayi sati ra~Ngadhurya sharaNAgatakAmadudhe
nirupadhikapravAhakaruNApariNAhavati |
parimitadeshakAlaphaladAnphaladAkR^itikAn
kathamadhikurmahe vidhishivapramukhAnamukhAn || 29||

omityabhyupagamya ra~NganR^ipate.ananyochitAM sheShatAM
svAtantryAdimayImapohya mahatImAdyAmavidyAsthitim |
nityAsa~NkhyavisImabhUtiguNayoryAyAmanAyAsataH
sevAsampadamindiresha yuvayoraikAntikAtyantikIm || 30||

AchAryAdra~Ngadhurya dvayasamadhigame labdhasattaM tadAtve
vishliShTAshliShTapUrvottaraduritabharaM yApitArabdhadeham |
nItaM tvatkaistvayA vA niravadhikadayodbhUtabodhAdirUpaM
tvadbhogaikasvabhogaM dayitamanucharaM tvatkR^ite mAM kuruShva || 31||

vidhAnAM ra~NgeshAdadhigatavato ve~NgaTakaveH
sphuradvarNaM vaktre parikalayatAM nyAsatilakam |
ihAmutrApyeSha praNatajanachintAmaNigiriH
svaparya~Nke sevAM dishati phaNiparya~NkarasikaH || 32||

iti vedAntadeshikavirachitaM nyAsatilakaM sampUrNam |

##
Encoded and proofread by Vikram Bhaskaran vikram85.iyer at gmail.com, NA

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}