% Text title            : Panchadashi
% File name             : panchadashi.itx
% Category              : major\_works, vidyAraNya, vedanta, panchadashI
% Location              : doc\_z\_misc\_major\_works
% Author                : Swami Vidyaranya [circa 1350 A.D.]
% Transliterated by     : Sunder Hattangadi
% Proofread by          : Sunder Hattangadi, v.subrahmanian at gmail.com
% Description-comments  : A treatise on Advaita Vedanta of Shankara
% Latest update         : August 5, 2011, April 14, 2018
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Panchadashi ..}##
\itxtitle{.. pa~nchadashI ..}##\endtitles ##

pa~nchadashI      shloka sa~NkhyA   1570
1   tattvavivekaH . 65
2   bhUtavivekaH . 103
3   pa~nchakoShavivekaH . 43
4   dvaitavivekaH . 67
5   mahAvAkyavivekaH . 8
6   chitradIpaH . 290
7   tR^iptidIpaH . 297
8   kUTastha dIpaH . 76
9   dhyAnadIpaH . 158
10  nATaka dIpaH . 26
11  brahmAnande yogAnandaH . 134
12  brahmAnande AtmAnandaH . 90
13  brahmAnande advaitAnandaH . 105
14  brahmAnande vidyAnandaH . 65
15  brahmAnande viShayAnandaH . 35

\section{1\. tattvavivekonAma \- prathamaH parichChedaH .}
namaH shrIsha~NkarAnandagurupAdAmbujanmane .
savilAsamahAmohagrAhagrAsaikakarmaNe .. 1..
tatpAdAmburuhadvandvasevAnirmalachetasAm .
sukhabodhAya tattvasya viveko.aya.n vidhIyate .. 2..
shabdasparshAdayo vedyA vaichitryAjjAgare pR^ithak .
tatovibhaktA tatsa.nvidaikyarUpyAnna bhidyate .. 3..
tathA svapne.atra vedyantu na sthira.n jAgare sthiram .
tadbhedo.atastayoH sa.nvidekarUpA na bhidyate .. 4..
suptottthitasya sauShuptatamobodho bhavetsmR^itiH .
sA cAvabuddhaviShayAvabuddha.n tattadA tataH .. 5..
sabodhoviShayAdbhinno na bodhAtsvapnabodhavat .
eva.n sthAnatraye.apyekA sa.nvittadvaddinAntare .. 6..
mAsAbdAyugakalpeShu gatAgamyeShvanekadhA .
nodeti nAstametyekA sa.nvideShA svayaMprabhA .. 7..
iyamAtmA parAnandaH parapremAspada.n yataH .
mA na bhuva.n hi bhUyAsamiti premAtmanIkShyate .. 8..
tatpremAtmArthamanyatra naivamanyArthamAtmani .
atastatparamantena paramAnandatAtmanaH .. 9..
ittha.n sachchitparAnanda AtmA yuktyA tathAvidham .
paraM brahma tayoshchaikya.n shrutyanteShUpadishyate .. 10..
abhAne na paraM prema bhAne na viShayaspR^ihA .
atobhAne.apyabhAtA.asau paramAnandatAtmanaH .. 11..
adhyetR^ivargamadhyastha putrAdhyayana shabdavat .
bhAne.apyabhAnaM bhAnasya pratibandhena yujyate .. 12..
pratibandho.asti bhAtIti vyavahArArhavastuni .
ta.n nirasya viruddhasya tasyotpAdanamuchyate .. 13..
tasya hetuH samAnAbhihAraH putradhvanishrutau .
ihAnAdiravidyaiva vyAmohaikanibandhanam .. 14..
chidAnandamayabrahmapratibimbasamanvitA .
tamorajaHsattvaguNA prakR^itirdvividhA cha sA .. 15..
sattvashuddhAvishuddhibhyAM mAyA.avidye cha te mate .
mAyAbimbovashIkR^itya tA.n syAtsarvaj~na IshvaraH .. 16..
avidyAvashagastvanyastadvaichitryAdanekadhA .
sA kAraNasharIra.n syAtprAj~nastatrAbhimAnavAn .. 17..
tamaH pradhAnaprakR^itestadbhogAyeshvarAj~nayA .
viyatpavanatejo.ambu bhuvobhUtAni jaj~nire .. 18..
sattvA.nshaiH pa~nchabhisteShA.n kramAddhIndriyapa~nchakam .
shrotratvagakShirasanaghrANAkhyAmupajAyate .. 19..
tairantaHkaraNa.n sarvairvR^ittibhedena taddvidhA .
manovimarsharUpa.n syAdbuddhiH syAnnishchayAtmikA .. 20..
rajo.n.ashaiH pa~nchabhisteShA.n kramAtkarmendriyANi tu .
vAkpANipAdapAyUpasthAbhidhAnAni jaj~nire .. 21..
taiH sarvaiH sahitaiH prANovR^ittibhedAtsa pa~nchadhA .
prANo.apAnaH samAnashchodAnavyAnau cha te punaH .. 22..
buddhikarmendriyaprANapa~nchakairmanasA dhiyA .
sharIra.n saptadashabhiH sUkShma.n talli~Ngamuchyate .. 23..
prAj~nastatrAbhimAnena taijasatvaM prapadyate .
hiraNyagarbhatAmIshastayorvyaShTisamaShTitA .. 24..
samaShTirIshaH sarveShA.n svAtmatAdAtmyavedanAt .
tadabhAvAttato.anye tu kathyante vyaShTisa.nj~nayA .. 25..
tadbhogAya punarbhogyabhogAyatanajanmane .
pa~nchIkaroti bhagavAnpratyeka.n viyadAdikam .. 26..
dvidhA vidhAya chaikaika.n chaturdhA prathamaM punaH .
svasvetaradvitIyA.nshairyojanAtpa~ncha pa~ncha te .. 27..
tairaNDastatra bhuvanabhogyabhogAshrayodbhavaH .
hiraNyagarbhaH sthUle.asmindehe vaishvAnaro bhavet .
taijasA vishvatA.n yAtA deva tirya~NnarAdayaH .. 28..
te parAgdarshinaH pratyaktattvabodhavivarjitAH .. 29..
kurvate karma bhogAya karma kartu.n cha bhu~njate .
nadyA.n kITA ivAvartAdAvartAntaramAshu te .
vrajanto janmano janma labhante naiva nirvR^itim .. 30..
satkarmaparipAkAtte karuNAnidhinoddhR^itAH .
prApya tIrataruchChAyA.n vishrAmyanti yathAsukham .. 31..
upadeshamavApyaivamAchAryAttattvadarshinaH .
pa~nchakoShavivekena labhante nirvR^itiM parAm .. 32..
annaM prANo mano buddhirAnandashcheti pa~ncha te .
koShAstairAvR^itaH svAtmA vismR^ityA sa.nsR^iti.n vrajet .. 33..
syAtpa~nchIkR^itabhUtottho dehaH sthUlo.anna sa.nj~nakaH .
li~Nge tu rAjasaiH prANaiH prANaH karmendriyaiH saha .. 34..
sAttvikairdhIndriyaiH sAka.n vimarShAtmA manomayaH .
taireva sAka.n vij~nAnamayodhIrnishchayAtmikA .. 35..
kAraNe sattvamAnandamayomodAdivR^ittibhiH .
tattatkoShaistu tAdAtmyAdAtmA tattanmayo bhavet .. 36..
anvayavyatirekAbhyAM pa~nchakoSha vivekataH .
svAtmAna.n tata uddhR^itya paraM brahma prapadyate .. 37..
abhAne sthUladehasya svapne yadbhAnamAtmanaH .
so.anvayo vyatirekastadbhAne.anyAnavabhAsanam .. 38..
li~NgabhAne suShuptau syAdAtmano bhAnamanvayaH .
vyatirekastu tadbhAne li~NgasyAbhAnamuchyate .. 39..
tadvivekAdviviktAH syuH koShAH prANamanodhiyaH .
te hi tatra guNAvasthAbhedamAtrAtpR^ithakkR^itAH .. 40..
suShuptyabhAne bhAnantu samAdhAvAtmano.anvayaH .
vyatirekastvAtmabhAne suShuptyanavabhAsanam .. 41..
yathAmu~njAdiShIkaivamAtmA yuktyA samuddhR^itaH .
sharIratritayAddhIraiH paraM brahmaiva jAyate .. 42..
parAparAtmanoreva.n yuktyA sambhAvitaikatA .
tattvamasyAdivAkyaiH sA bhAgatyAgena lakShyate .. 43..
jagato yadupAdAnaM mAyAmAdAya tAmasIm .
nimitta.n shuddhasattvA.n tAmuchyate brahma tadgirA .. 44..
yadA malinasattvA.n tA.n kAmakarmAdidUShitam .
Adatte tatparaM brahma tvaM padena tadochyate .. 45..
tritayImapi tAM muktvA parasparavirodhinIm .
akhaNDa.n sachchidAnandaM mahAvAkyena lakShyate .. 46..
so.ayamityAdivAkyeShu virodhAttadidantvayoH .
tyAgena bhAgayoreka Ashrayo lakShyate yathA .. 47..
mAyAvidye vihAyaivamupAdhI parajIvayoH .
akhaNDa.n sachchidAnandaM paraM brahmaiva lakShyate .. 48..
savikalpasya lakShyatve lakShyasya syAdavastutA .
nirvikalpasya lakShyatva.n na dR^iShTa.n na cha sambhavi .. 49..
vikalpo nirvikalpasya savikalpasya vA bhavet .
Adye vyAhatiranyatrAnavasthAtmAshrayAdayaH .. 50..
ida.n guNakriyAjAtidravyasambandhavastuShu .
samantena svarUpasya sarvametaditIShyatAm .. 51..
vikalpatadabhAvAbhyAmasa.nspR^iShTAtmavastuni .
vikalpitatvalakShyatvasambandhAdyAstu kalpitAH .. 52..
ittha.n vAkyaistadarthAnusandhAna.n shravaNaM bhavet .
yuktyA sambhAvitatvAnusandhAnaM mananantu tat .. 53..
tAbhyA.n nirvichikitse.arthe chetasaHsthApitasya yat .
ekatAnatvametaddhi nididhyAsanamuchyate .. 54..
dhyAtR^idhyAne parityajya kramAddhyeyaikagocharam .
nirvAtadIpavachchitta.n samAdhirabhidhIyate .. 55..
vR^ittayastu tadAnImaj~nAtA apyAtmagocharAH .
smaraNAdanumIyante vyutthitasya samutthitAt .. 56..
vR^ittInAmanuvR^ittistu prayatnAtprathamAdapi .
adR^iShTAsakR^idabhyAsasa.nskAraH sachirAdbhavet .. 57..
yathA dIpo nivAtastha ityAdibhiranekadhA .
bhagavAnimamevArthamarjunAya nyarUpayat .. 58..
anAdAviha sa.nsAre sa~nchitAH karmakoTayaH .
anena vilaya.n yAnti shuddho dharmo vivardhate .. 59..
dharmameghamimaM prAhuH samAdhi.n yogavittamAH .
varShatyeSha yato dharmAmR^itadhArAH sahasrashaH .. 60..
amunA vAsanAjAle niHsheShaM pravilApite .
samUlonmUlite puNyapApAkhye karma sa~nchaye .. 61..
vAkyamapratibaddha.n satprAkparokShAvabhAsite .
karAmalakavadbodhamaparokShaM prasUyate .. 62..
parokShaM brahmavij~nAna.n shAbda.n deshikapUrvakam .
buddhipUrvakR^itaM pApa.n kR^itsna.n dahati vahnivat .. 63..
aparokShAtmavij~nAna.n shAbda.n deshikapUrvakam .
sa.nsArakAraNAj~nAnatamasashchaNDabhAskaraH .. 64..
ittha.n tattvaviveka.n vidhAya vidhivanmanaH samAdhAya .
vigalitasa.nsR^itibandhaH prApnoti pAraM pada.n naro na hirAt .. 65..

iti tattvavivekaH samAptaH .. 1..

\section{2\. bhUtavivekonAma\- dvitIyaH parichChedaH .}
sadadvaita.n shruta.n yattatpa~nchabhUtavivekataH .
boddhu.n shakya.n tato bhUtapa~nchakaM pravivichyate .. 1..
shabdasparshau rUparasau gandho bhUtaguNA ime .
ekadvitrichatuH pa~nchaguNA vyomAdiShu kramAt .. 2..
pratidhvanirviyachChabdo vAyau vIsIti shabdanam .
anuShNAshItasa.nsparsho vahno bhugubhugudhvaniH .
uShNaH sparshaH prabhA rUpa.n jale bulu bulu dhvaniH .
shItAsparshaH shuklarUpa.n raso mAdhuryamIritam .
bhUmau kaDakaDAshabdaH kAThinya.n sparsha iShyate .
nIlAdika.n chitrarUpaM madhurAmlAdiko rasaH .
surabhItaragandhau dvau guNAH samyagvivechitAH .. 3..
shrotra.n tvakchakShuShi jihvA ghrANa.n chendriyapa~nchakam .
karNAdigolakastha.n tachChabdAdigrAhaka.n kramAt .
saukShmyAtkAryAnumeya.n tatprAyo dhAvedbahirmukham .. 4..
kadAchitpihite karNe shrUyate shabda AntaraH .
prANavAyau jATharAgnau jalapAne.annabhakShaNe .
vyAjyAnte hyAntarAH sparshAmIlane chAntara.n tamaH .
udgAre rasagandhau cetyakShANAmAntaragrahaH .. 5..
pa~nchoktyAdAnagamanavisargAnandakAH kriyAH .
kR^iShivANijyasevAdyAH pa~nchasvantarbhavanti hi .. 6..
vAkpANipAdapAyUpasthairakShaistatkriyAjaniH .
mukhAdigolakeShvAste tatkarmendriyapa~nchakam .. 7..
mano dashendriyAdhyakSha.n hR^itpadmagolake sthitam .
tachchAntaHkaraNaM bAhyeShvasvAtantryAdvinendriyaiH .. 8..
akSheShvarthArpiteShvetadguNadoShavichArakam .
sattva.n rajastamashchAsya guNA vikriyate hi taiH .. 9..
vairAgya.n kShAntiraudAryamityAdyAH sattvasambhavAH .
kAmakrodhau lobhayatnAvityAdyA rajasotthitAH .
AlasyabhrAntitandrAdyA vikArAstamasotthitAH .. 10..
sAttvikaiH puNyaniShpattiH pApautpattishcha rAjasaiH .
tAmasairnobhaya.n kintu vR^ithAyuHkShapaNaM bhavet .
atrAhampratyayI kartetyeva.n lokavyavasthitiH .. 11..
spaShTashabdAdiyukteShu bhautikatvamatisphuTam .
akShAdAvapi tachChAstrayuktibhyAmavadhAryatAm .. 12..
ekAdashendriyairyuktyA shAstreNApyavagamyate .
yAvatki.nchidbhavedetadida.n shabdodita.n jagat .. 13..
ida.n sarvaM purA sR^iShTerekamevadvitIyakam .
sadevAsInnAmarUpe nAstAmityAruNervachaH .. 14..
vR^ikShasya svagato bhedaH patrapuShpaphalAdibhiH .
vR^ikShAntarAtsajAtIyo vijAtIyaH shilAditaH .. 15..
tathA sadvastuno bhedatrayaM prApta.n nivAryate .
aikyAvadhAraNadvaitapratiShedhaistribhiH kramAt .. 16..
sato nAvayavAH sha.nkyAstada.nshasyAnirUpaNAt .
nAmarUpe na tasya a.nshau tayoradyApyanudbhavAt .. 17..
nAmarUpodbhavasyaiva sR^iShTitvAtsR^iShTitaH purA .
na tayorudbhavastasmAtsannira.nsha.n yathA viyat .. 18..
sadantara.n sajAtIya.n na vailakShaNyavarjanAt .
nAmarUpopAdhibheda.n vinA naiva sato bhidA .. 19..
vijAtIyamasattattu na khalvastIti gamyate .
nAsyAtaH pratiyogitva.n vijAtIyAdbhidA kutaH .. 20..
ekamevAdvitIya.n satsiddhamatra tu kechana .
vihvalA asadevedaM purAsIdityavarNayan .. 21..
magnasyAbdhau yathA.akShANi vihvalAni tathA.asya dhIH .
akhaNDaikarasa.n shrutvA niHprachArA bibhetyataH .. 22..
gauDAchAryA nirvikalpe samAdhAvanyayoginAm .
sAkAradhyAnaniShThAnAmatyantaM bhayamUchire .. 23..
asparshayogo nAmaiSha durdarshaH sarvayogibhiH .
yogino bibhyati hyasmAdabhaye bhayadarshinaH .. 24..
bhagavatpUjyapAdAshcha shuShkatarkapaTUnamUn .
AhurmAdhyamikAnbhrAntAnachintye.asminsadAtmani .. 25..
anAdR^itya shrutiM maurkhyAdime bauddhastapasvinaH .
Apedire nirAmatvamanumAnaikachakShushaH .. 26..
shUnyamAsIditi brUShe sadyoga.n vA sadAtmatAm .
shUnyasya na tu tadyuktamubhaya.n vyAha tattvataH .. 27..
na yuktastamasA sUryo nApi chAsau tamomayaH .
sacChUnyayorvirodhitvAchChUnyamAsItkatha.n vada .. 28..
viyadAdernAmarUpe mAyayA sati kalpite .
shUnyasya nAmarUpe cha tathA chejjIvyatA.n chiram .. 29..
sato.api nAmarUpe dve kalpite chettadA vada .
kutreti niradhiShThAno na bhramaH kvachidIkShyate .. 30..
sadAsIditi shabdArthabhede dvaiguNyamApatet .
abhede punaruktiH syAnmaiva.n loke tathekShaNAt .. 31..
kartavya.n kurute vAkyaM brUte dhAryasya dhAraNam .
ityAdivAsanAviShTaM pratyAsItsaditIraNam .. 32..
kAlAbhAve puretyuktiH kAlavAsanayAyutam .
shiShyaM pratyeva tenAtra dvitIya.n na hi sha.nkyate .. 33..
chodya.n vA parihAro vA kriyatA.n dvaitabhAShayA .
advaitabhAShayA chodya.n nAsti nApi taduttaram .. 34..
atastimitagambhIra.n na tejo na tamastatam .
anAkhyamanabhivyakta.n satki.nchidavashiShyate .. 35..
nanu bhUmyAdikaM mA bhUtparamANvanta nAshataH .
katha.n te viyato.asattvaM buddhimArohatIti chet .. 36..
atyanta.n nirjagadvyoma yathA te buddhimAshritam .
tathaiva sannirAkAsha.n kuto nAshrayate matim .. 37..
nirjagadvyoma dR^iShTa.n chetprakAshatamasI vinA .
kva dR^iShTa.n ki.ncha te pakShe na pratyakSha.n viyatkhalu .. 38..
sadvastu siddhantvasmAbhirnishchitairanubhUyate .
tUShNI.n sthitau na shUnyatva.n shUnyabuddhestu varjanAt .. 39..
sadbuddhirapi chennAsti mAstvasya svaprabhatvataH .
nirmanaskatvasAkShitvAtsanmAtra.n sugama.n nR^iNAm .. 40..
manojR^imbhanarAhitye yathA sAkShI nirAkulaH .
mAyAjR^imbhaNataH pUrva.n sattathaiva nirAkulam .. 41..
nistattvA kAryagamyAsya shaktirmAyAgnishaktivat .
na hi shakti kvachitkaishchidbuddhyate kArayataH purA .. 42..
na sadvastu sataH shaktirna hi vahneH svashaktitA .
sadvilakShaNatAyAntu shakteH ki.n tattvamuchyatAm .. 43..
shUnyatvamiti chechChUnyaM mAyAkAryamitIritam .
nashUnya.n nApi sadyAdR^iktAdR^iktattvamiheShyatAm .. 44..
nAsadAsInno sadAsIttadAnI.n kintvabhUttamaH .
sadyogAttamasaH sattva.n na svatastanniShedhanAt .. 45..
ataeva dvitIyatva.n shUnyavannahi gaNyate .
na loke chaitratachChaktyorjIvita.n gaNyate pR^ithak .. 46..
shaktyAdhikye jIvita.n chedvardhate tatra vR^iddhikR^it .
na shaktiH kintu tatkArya.n yuddhakR^iShyAdika.n tathA .
sarvathA shaktimAtrasya na pR^ithaggaNanA kvachit .
shaktikArya.n tu naivAsti dvitIya.n sha.nkyate katham .. 47..
na kR^itsnabrahmavR^ittiH sA shaktiH kintvekadeshabhAk .
ghaTashaktiryathA bhUmau snigdhamR^idyeva vartate .. 48..
pAdo.asya vishvA bhUtAni tripAdasti svayaM prabhaH .
ityekadeshavR^ittitvaM mAyAyA vadati shrutiH .. 49..
viShTabhyAhamida.n kR^itsnamekA.nshena sthito jagat .
iti kR^iShNorjunAyAha jagatastvekadeshatAm .. 50..
sabhUmi.n sarvato vR^itvA atyatiShThaddashA~Ngulam .
vikArAvarti chAtrAsti shrutisUtrakR^itorvachaH .. 51..
nira.nshe.apya.nshamAropya kR^itsne.n.ashe veti pR^ichChataH .
tadbhAShayottaraM brUte shrutiH shroturhitaiShiNI .. 52..
sattattvamAshritA shaktiH kalpayetsati vikriyAH .
varNAbhittigatAbhittau chitra.n nAnAvidha.n yathA .. 53..
Adyo vikAra AkAshaH so.avakAshasvabhAvAn .
AkAsho.astIti sattattvamAkAshe.apyanugachChati .. 54..
ekasvabhAva.n sattattvamAkAsho dvisvabhAvakaH .
nAvakAshaH sati vyomni sa chaiSho.api dvaya.n sthitam .. 55..
yadvA pratidhvanirvyomno guNo nAsau satIkShyate .
vyomni dvau saddhvanI tena sadeka.n dviguNa.n viyat .. 56..
yA shaktiH kalpayedvyoma sA sadvyomnorabhinnatAm .
ApAdya dharmadharmitva.n vyatyayenAvakalpayet .. 57..
sato vyomatvamApanna.n vyomnaH sattAntu laukikAH .
tArkikAshchAvagachChanti mAyAyA uchita.n hi tat .. 58..
yadyathA vartate tasya tathAtvaM bhAti mAnataH .
anyathAtvaM bhrameNeti nyAyo.aya.n sarvalaukikaH .. 59..
eva.n shrutivichArAtprAkyadyathA vastu bhAsate .
vichAreNa viparyeti tatastachchintyatA.n viyat .. 60..
bhinne viyatsatI shabdabhedAdbuddheshcha bhedataH .
vAyvAdiShvanuvR^itta.n sanna tu vyometi bhedadhIH .. 61..
sadvastvadhikavR^ittitvAddharmi vyomnastu dharmatA .
dhiyA sataH pR^ithakkAre brUhi vyoma kimAtmakam .. 62..
avakAshAtmaka.n tachchedasattaditi chintyatAm .
bhinna.n sato.asachcha neti vakShi chedvyAhatistava .. 63..
bhAtIti chedbhAtu nAma bhUShaNaM mAyikasya tat .
yadasadbhAsamAnantanmithyA svapnagajAdivat .. 64..
jAtivyakto dehidehau guNadravye yathA pR^ithak .
viyatsatostathaivAstu pArthakya.n ko.atra vismayaH .. 65..
buddho.api bhedo no chitte niruDhi.n yAti chettadA .
anaikAgryAtsa.nshayAdvA rUDhyabhAvo.asya te vada .. 66..
apramatto bhava dhyAnAdAdye.anyasminvivechanam .
kuru pramANayuktibhyA.n tato rUDhatamo bhavet .. 67..
dhyAnAnmAnAdyuktito.api rUDhe bheda viyatsatoH .
na kadAchidviyatsatya.n sadvastu Chidravanna cha .. 68..
j~nasya bhAti sadA vyoma nistattvollekhapUrvakam .
sadvastvapi vibhAtyasya nishChidratvapuraHsaram .. 69..
vAsanAyAM vivR^iddhAyA.n viyatsatyatvavAdinam .
sanmAtrAbodhayukta.n cha dR^iShTvA vismayate budhaH .. 70..
evamAkAshamithyAtve satsatyatve cha vAsite .
nyAyenAnena vAyvAdeH sadvastu pravivichyatAm .. 71..
sadvastunyekadeshasthA mAyA tatraikadeshagam .
viyattatrApyekadeshagato vAyu prakalpitaH .. 72..
shoShasparshau gatirvego vAyudharmA ime matAH .
trayaH svabhAvAH sanmAyAvyomnA.n ye te.api vAyugAH .. 73..
vAyurastIti sadbhAvaH sato vAyau pR^ithakkR^ite .
nistattvarUpatA mAyAsvabhAvo vyomago dhvaniH .. 74..
sato.anuvR^ittiH sarvatra vyomno neti puroditam .
vyomAnuvR^ittiradhunA katha.n navyAhata.n vachaH .. 75..
ChidrAnuvR^ittirnetIti pUrvoktiradhunA tviyam .
shabdAnuvR^ittirevoktA vachaso vyAhatiH kutaH .. 76..
nanu sadvastupArthakyAdasattva.n chettadA katham .
avyaktamAyAvaiShamyAdamAyAmayatApi no .. 77..
nistattvarUpataivAtra mAyAtvasya prayojikA .
sA shaktikAryayostulyA vyaktAvyaktatvabhedinoH .. 78..
sadasattvavivekasya prastutattvAtsachintyatAm .
asato.avAntaro bheda AstA.n tachchintayAtra kim .. 79..
sadvastubrahmashiShTo.n.ashovAyurmithyA yathA viyat .
vAsayitvA chira.n vAyormithyAtvaM maruta.n tyajet .. 80..
chintayedvahnimapyevaM maruto nyUnavartinam .
brahmANDAvaraNeShveShA.n nyUnAdhikavichAraNA .. 81..
vAyordashA.nshatonyUnovahnirvAyau prakalpitaH .
purANokta.n tAratamya.n dashA.nshairbhUtapa~nchake .. 82..
vahniruShNaprakAshAtmA pUrvAnugatiratra cha .
asti vahniH sanistattvaH shabdavAnsparshavAnapi .. 83..
sanmayAvyomavAyva.nshairyuktasyAgnernijo guNaH .
rUpa.n tatra sataH sarvamanyadbuddhyA vivichyatAm .. 84..
sato vivechite vahnau mithyAtve sati vAsite .
Apo dashA.nshato nyUnAH kalpitA iti chintayet .. 85..
santyApo.amUH shUnyatattvAH sashabadasparshasa.nyutAH .
rUpavatyo.anyadharmAnuvR^ityA svIyo raso guNaH .. 86..
sato vivechitAsvapsu tanmithyAtve cha vAsite .
bhUmirdashA.nshato nyUnA kalpitApsviti chintayet .. 87..
asti bhUstattvashUnyAsyAH shabdasparshau svarUpakau .
rasashcha parato naijo gandhaH sattA vivichyatAm .. 88..
pR^ithakkR^itAyA.n sattAyAM bhUmirmithyAvashiShyate .
bhUmerdashA.nshato nyUnaM brahmANDaM bhUmimadhyagam .. 89..
brahmANDamadhye tiShThanti bhuvanAni chaturdasha .
bhuvaneShu vasantyeShu prANidehA yathAyatham .. 90..
brahmANDalokadeheShu sadvastuni pR^ithakkR^ite .
asanto.aNDAdayo bhAntu tadbhAne.apIha kA kShatiH .. 91..
bhUtabhautikamAyAnAmasamatve.atyantavAsite .
sadvastvadvaitamityeShA dhIrviparyeti na kvachit .. 92..
sadadvaitAtpR^ithagbhUte dvaite bhUmyAdirUpiNi .
tattadarthakriyA loke yathA dR^iShTA tathaiva sA .. 93..
sA.nkhyakANAdabauddhAdyairjagadbhedo yathA yathA .
utprekShyate.anekayuktyA bhavatveSha tathA tathA .. 94..
avaj~nAta.n sadadvaita.n niHsha.nkairanyavAdibhiH .
eva.n kA kShatirrasmAka.n taddvaitamavajAnatAm .. 95..
dvaitAvaj~nA susthitA chedadvaitA dhIH sthirA bhavet .
sthairye tasyAH pumAneSha jIvanmukta itIryate .. 96..
eShA brAhmI sthitiH pArtha nainAM prApya vimuhyati .
sthitvAsyAmantakAle.api brahmanirvANamR^ichChati .. 97..
sadadvaite.anR^itadvaite yadanyo.anyaikyavIkShaNam .
tasyAntakAlastadbhedabuddhireva na chetaraH .. 98..
yadvAntakAlaH prANasya viyogostu prasiddhitaH .
tasminkAle.api na bhrAntergatAyAH punarAgamaH .. 99..
nIroga upaviShTo vA rugNo vA viluThanbhuvi .
mUrchChito vA tyajedeSha prANAnbhrAntirna sarvathA .. 100..
dine dine svapnasuptyoradhIte vismR^ite.apyayam .
paredyurnAnadhItaH syAttattvavidyA na nashyati .. 101..
pramANotpAditA vidyA pramANaM prabala.n vinA .
na nashyati na vedAntAtprabalaM mAnamIkShate .. 102..
tasmAdvedAntasa.nsiddha.n sadadvaita.n na bAdhyate .
antakAle.apyato bhUtavivekAnnirvR^itiH sthitA .. 103..

iti bhUtavivekanAma dvitIyaH parichChedaH .. 2..

\section{3\. pa~nchakoShavivekonAma \- tR^itIyaH parichChedaH .}
guhAhitaM brahma yattatpa~nchakoSha vivekataH .
boddhu.n shakya.n tataH koShapa~nchakaM pravivichyate .. 1..
dehAdabhyantaraH prANaH prANAdabhyantaraM manaH .
tataH kartA tato bhoktA guhA seyaM paramparA .. 2..
pitR^ibhuktAnnajAdvIryAjjAto.annenaiva vardhate .
dehaH so.annamayo nAtmA prAkchordhva.n tadabhAvataH .. 3..
pUrvajanmanyasattve tajjanma sampAdayetkatham .
bhAvijanmanyasatkarma na bhu~njIteha sa.nchitam .. 4..
pUrNo dehe bala.n yachChannakShANA.n yaH pravartakaH .
vAyuH prANamayo nAsAvAtmA chaitanyavarjanAt .. 5..
ahantAM mamatA.n dehe gR^ihAdau cha karoti yaH .
kAmAdyavasthayA bhrAnto nAsAvAtmA manomayaH .. 6..
lInA suptau vapurbodhe vyApnuyAdAnakhAgragA .
chichChAyopetadhIrnAtmA vij~nAnamayashabdabhAk .. 7..
kartR^itvakaraNatvAbhyA.n vikriyetAntarindriyam .
vij~nAnamanasI antarbahishchaite parasparam .. 8..
kAchidantarmukhA vR^ittirAnandapratibimbabhAk .
puNyabhoge bhogashAntau nidrArUpeNa lIyate .. 9..
kAdAchitkatvato nAtmA syAdAnandamayo.apyayam .
bimbabhUto ya Ananda AtmAsau sarvadA sthiteH .. 10..
nanu dehamupakramya nidrAnandAntavastuShu .
mAbhUdAtmatvamanyastu na kashchidanubhUyate .. 11..
bADha.n nidrAdayaH sarve.anubhUyante na chetaraH .
tathApyete.anubhUyante yena ta.n ko nivArayet .. 12..
svayamevAnubhUtitvAtvidyate nAnubhAvyatA .
j~nAtR^ij~nAnAntarAbhAvAdaj~neyo na tvasattayA .. 13..
mAdhuryAdisvabhAvAnAmanyatra svaguNArpiNAm .
svasmi.nstadarpaNApekShA no na chAstAnyadarpakam .. 14..
arpakAntarArAhityepyastyeShA.n tatsvabhAvatA .
mAbhUttathAnubhAvyatvaM bodhAtmA tu na hIyate .. 15..
svaya.njyotirbhavatyeSha puro.asmAtbhAsate.akhilAt .
tameva bhAntamanveti tadbhAsA bhAsate jagat .. 16..
yeneda.n jAnate sarva.n ta.n kenAnyena jAnatAm .
vij~nAtAra.n kena vidyAchChakta.n vedye tu sAdhanam .. 17..
sa vetti vedya.n tatsarva.n nAnyastasyAsti veditA .
viditAviditAbhyA.n tatpR^ithakbodhasvarUpakam .. 18..
bodhe.apyanubhavo yasya na katha.nchana jAyate .
ta.n kathaM bodhayechChAstra.n loShTa.n narasamAkR^itim .. 19..
jihvA me.asti na vetyuktirlajjAyai kevala.n yathA .
na budhyate mayA bodho boddhavya iti tAdR^iShI .. 20..
yasminyasminnasti loke bodhastattadupekShaNe .
yadbodhamAtra.n tadbrahmetyeva.n dhIrbrahmanishchayaH .. 21..
pa~nchakoShaparityAge sAkShibodhAvasheShataH .
svasvarUpa.n sa eva syAchChUnyatva.n tasya durghaTam .. 22..
asti tAvatsvaya.n nAma vivAdAviShayatvataH .
svasminnapi vivAdashchetprativAdyatra ko bhavet .. 23..
svAsattvantu na kasmaichidrochate vibhrama.n vinA .
ataeva shrutirbAdhaM brUte chAsattvavAdinaH .. 24..
asadbrahmeti chedveda svayameva bhavedasan .
ato.asya mAbhUdvedyatva.n svasattvantvabhyupeyatAm .. 25..
kIdR^iktarhIti chetpR^ichChedIdR^iktA nAsti tatra hi .
yadanIdR^igatAdR^ikcha tatsvarUpa.n vinishchinu .. 26..
akShANA.n viShayastvIdR^ikparokShastAdR^iguchyate .
viShayo nAkShaviShayaH svattvAnnAsyaparokShatA .. 27..
avedyo.apyaparokSho.ataH svaprakAsho bhavatyayam .
satya.n j~nAnamananta.n chetyastIha brahmalakShaNam .. 28..
satyatvaM bAdharAhitya.n jagadbAdhaikasAkShiNaH .
bAdhaH ki.nsAkShiko brUhi na tvasAkShika iShyate .. 29..
apanIteShu mUrteShu hyamUrta.n shiShyate viyat .
shakyeShu bAdhiteShvante shiShyate yattadeva tat .. 30..
sarvabAdhe na ki.nchichchedyanna ki.nchit tadeva tat .
bhAShA evAtra bhidyante nirbAdha.n tAvadasti hi .. 31..
ata eva shrutirbAdhyaM bAdhitvA sheShayatyadaH .
sa eSha neti netyAtmetyatadvyAvR^ittirUpataH .. 32..
ida.n rUpa.n tu yadyAva tattyaktu.n shakyate.akhilam .
ashakyo hyanida.n rUpaH sa AtmA bAdhavarjitaH .. 33..
siddhaM brahmaNi satyatva.n j~nAnatva.n tu puroditam .
svayamevAnubhUtitvAdityAdivachanaiH sphuTam .. 34..
na vyApitvAddeshato.anto nityatvAnnApi kAlataH .
na vastuto.api sarvAtmyAdAnantyaM brahmaNi tridhA .. 35..
deshakAlAnyavastUnA.n kalpitatvAchcha mAyayA .
na deShAdikR^ito.anto.asti brahmAnantya.n sphuTantataH .. 36..
satya.n j~nAnamananta.n yadbrahma tadvastu tasya tat .
Ishvaratvantu jIvatvamupAdhidvayakalpitam .. 37..
shaktirastyaishvarI kAchitsarvavastuniyAmikA .
AnandamayamArabhya gUDhA sarveShu vastuShu .. 38..
vastudharmA niyamyera.n shaktyA naiva yadA tadA .
anyonyadharmasA.nkaryAdviplaveta jagatkhalu .. 39..
chichChAyAveshataH shaktishchetaneva vibhAti sA .
tachChaktyupAdhisa.nyogAdbrahmaiveshvaratA.n vrajet .. 40..
koShopAdhivivakShAyA.n yAti brahmaiva jIvatAm .
pitA pitAmahashchaikaH putrapautrau yathA prati .. 41..
putrAderavivakShAyA.n na pitA na pitAmahaH .
tadvannesho nApi jIvaH shaktikoShAvivakShaNe .. 42..
ya evaM brahma vedaiSha brahmaiva bhavati svayam .
brahmaNo nAsti janmAtaH punareSha na jAyate .. 43..

iti pa~nchakoShovivekonAma tR^itIyaH parichChedaH .. 3..

\section{4\. dvaitaviveko nAma \- chaturthaH parichChedaH .}
IshvareNApi jIvena sR^iShTa.n dvaitaM prapa~nchyate .
viveke sati jIvena heyo bandhaH sphuTIbhavet .. 1..
mAyA.n tu prakR^iti.n vidyAnmAyina.n tu maheshvaram .
sa mAyI sR^ijatItyAhuH shvetAshvatara shAkhinaH .. 2..
AtmA vA idamagre.abhUtsa aikShata sR^ijA iti .
sa~NkalpenAsR^ijallokAnsa etAniti bahvR^ichAH .. 3..
khaMvAyvagnijalorvyoShadhyannadehAH kramAdamI .
sambhUtA brahmaNastasmAdetasmAdAtmano.akhilAH .. 4..
bahu syAmahamevAtaH prajAyeyeti kAmataH .
tapastaptvA.asR^ijatsarva.n jagadityAha taittiriH .. 5..
idamagre sadevAsIdbahutvAya tadaikShata .
tejo.avannANDajAdIni sasarjeti cha sAmagAH .. 6..
visphuli~NgA yathA vahnerjAyante.akSharatastathA .
vividhAshchijjaDA bhAvA ityAtharvaNikI shrutiH .. 7..
jagadavyAkR^itaM pUrvamAsIdvyAkriyate.adhunA .
dR^ishyAbhyA.n nAmarUpAbhyA.n virADAdiShu te sphuTAH .
virANAnurnaro gAvaH kharAshvAjAvayastathA .
pipIlikAvadhidvandvamiti vAjasaneyinaH .. 8..
kR^itvA rUpAntara.n jaiva.n dehe prAvishadIshvaraH .
iti tAH shrutayaH prAhu jIvatvaM prANadhAraNAt .. 9..
chaitanya.n yadadhiShThAna.n li~Ngadehashcha yaH punaH .
chichChAyA li~NgadehasthA tatsa.nghojIva uchyate .. 10..
mAheshvarI tu yA mAyA tasyA nirmANashaktivat .
vidyate mohashaktishcha ta.n jIvaM mohayatyasau .. 11..
mohAdanIshatAM prApya magno vapuShi shochati .
IshasR^iShTamida.n dvaita.n sarvamukta.n samAsataH .. 12..
saptAnnabrAhmaNe dvaita.n jIvasR^iShTaM prapa~nchitam .
annAni saptaj~nAnena karmaNAjanayatpitA .. 13..
martyAnAmeka.n devAnne dve pashvAnna.n chaturthakam .
annatritayamAtmArthamannAnA.n viniyojanam .. 14..
vrIhyAdika.n darshapUrNamAsau kShIra.n tathA manaH .
vAkprANashcheti saptatvamannAnAmavagamyatAm .. 15..
Ishena yadyapyetAni nirmitAni svarUpataH .
tathApi j~nAnakarmAbhyA.n jIvo kArShIttadannatAm .. 16..
IshakArya.n jIvabhogya.n jagaddvAbhyA.n samanvitam .
pitR^ijanyA bhartR^ibhogyA yathA yoShittatheShyatAm .. 17..
mAyAvR^ittyAtmako hIshasa.nkalpaH sAdhana.n janau .
mano vR^ittyAtmako jIvo sa.nkalpo bhogasAdhanam .. 18..
IshanirmitamaNyAdau vastunyekavidhe sthite .
bhoktR^idhIvR^ittinAnAtvAttadbhogo bahudheShyate .. 19..
hR^iShyatyeko maNi.n labdhvA kruddhyatyanyo hyalAbhataH .
pashyatyeva virakto.atra na hR^iShyati na kupyati .. 20..
priyo.apriya upekShyashchetyAkArA maNigAstrayaH .
sR^iShTA jIvairIshasR^iShTa.n rUpa.n sAdhAraNa.n triShu .. 21..
bhAryA snuShA nanAndA cha yAtA mAtetyanekadhA .
pratiyogidhiyA yoShidbhidyate na svarUpataH .. 22..
nanu j~nAnAni bhidyantAmAkArastu na bhidyate .
yoShidvapuShyatishayo na dR^iShTo jIvanirmitaH .. 23..
maivaM mA.nsamayI yoShitkAchidanyA manomayI .
mA.nsamayyA abhede.api bhidyate.atra manomayI .. 24..
bhrAntisvapnamanorAjyasmR^itiShvastu manomayam .
jAgranmAnena meyasya na manomayateti chet .. 25..
bAdhaM mAne tu meyena yogAtsyAdviShayAkR^itiH .
bhAShyavArtikakArAbhyAmayamartha udAhR^itaH .. 26..
mUShAsikta.n yathA tAmra.n tannibha.n jAyate tathA .
rUpAdIn vyApnuvachchitta.n tannibha.n dR^ishyate dhruvam .. 27..
vya~njako vA yathA loko vya~NgyasyAkAratAmiyAt .
sarvArthavya~njakatvAddhIrarthAkArA pradR^ishyate .. 28..
mAturmAnAbhiniShpattirniShpannaM meyameti tat .
meyAbhisa.ngata.n tachcha meyAbhatvaM prapadyate .. 29..
satyeva.n viShayau dvau sto ghaTau mR^iNmayadhImayau .
mR^iNmayo mAnameyaH syAtsAkShibhAShyastu dhImayaH .. 30..
anvayavyatirekAbhyA.n dhImayo jIvabandhakR^it .
satyasminsukhaduHkhe sta stasminnasati na dvayam .. 31..
asatyapi cha bAhyArthe svapnAdau badhyate naraH .
samAdhisuptimUrchChAsu satyapyasminna badhyate .. 32..
dUradesha.n gate putre jIvatyevAtra tatpitA .
vipralambhakavAkyena mR^itaM matvA praroditi .. 33..
mR^ite.api tasminvArtAyAmashrutAyA.n na roditi .
ataH sarvasya jIvasya bandhakR^inmAnasa.n jagat .. 34..
vij~nAnavAdo bAhyArthavaiyarthyAtsyAdiheti chet .
na hR^idyAkAramAdhAtuM bAhyasyApekShitattvataH .. 35..
vaiyArthyamastu vA bAhya.n na vArayitumIshmahe .
prayojanamapekShante na mAnAniti hi sthitiH .. 36..
bandhashchenmAnasa.n dvaita.n tannirodhena shAmyati .
abhyAsedyogamevAto brahmaj~nAnena ki.n vada .. 37..
tAtkAlika dvaitashAntAvapyAgAmIjanIkShayaH .
brahmaj~nAna.n vinA na syAditi vedAntaDiNDimaH .. 38..
anivR^itte.apIshasR^iShTe dvaite tasya mR^iShAtmatAm .
buddhvA brahmAdvayaM boddhu.n shakya.n vastvaikyavAdinA .. 39..
pralaye tannivR^ittau tu gurushAstrAdyabhAvataH .
virodhidvaitAbhAve.api na shakyaM boddhumadvayam .. 40..
abAdhaka.n sAdhaka.n cha dvaitamIshvaranirmitam .
apanetumashakya.n chetyAstA.n taddviShyate kutaH .. 41..
jIvadvaita.n tu shAstrIyamashAstrIyamiti dvidhA .
upAdadItA shAstrIyamAtattvasyAvabodhanAt .. 42..
AtmabrahmavichArAkhya.n shAstrIyaM mAnasa.n jagat .
buddhe tattve tachcha heyamiti shrutyanushAsanam .. 43..
shAstrANyadhItya medhAvI abhyasya cha punaH punaH .
paramaM brahma vij~nAya ulkAvattAnyathotsR^ijet .. 44..
granthamabhyasya medhAvI j~nAnavij~nAnatatparaH .
palAlamiva dhAnyArthI tyajedgranthamasheShataH .. 45..
tameva dhIro vij~nAya praj~nA.n kurvIta brAhmaNaH .
nAnudhyAyAdbahU~nChabdAnvAcho viglApana.n hi tat .. 46..
tamevaika.n vijAnIta hyanyA vAcho vimu~nchatha .
yachchedvA~NmanasI prAj~na ityAdyAH shrutayaH sphuTAH .. 47..
ashAstrIyamapi dvaita.n tIvraM mandamiti dvidhA .
kAmakrodhAdika.n tIvraM manorAjya.n tathetarat .. 48..
ubhaya.n tattvabodhAtprA~NnivAryaM bodhasiddhaye .
samaH samAhitatva.n cha sAdhaneShu shruta.n yataH .. 49..
bodhAdUrdhva.n cha taddheya.n jIvanmuktiprasiddhaye .
kAmAdikleshabandhena yuktasya na hi muktatA .. 50..
jIvanmuktiriyaM mA bhujjanmAbhAve tvaha.n kR^itI .
tarhi janmApi te.astyeva svargamAtrAtkR^itI bhavAn .. 51..
kShayAtishayadoSheNa svargo heyo yadA tadA .
svaya.n doShatamAtmAya.n kAmAdiH ki.n na hIyate .. 52..
tattvaM buddhvApi kAmAdInniHsheSha.n na jahAsi chet .
yatheShTAcharaNa.n te syAtkarmashAstrAtila~NghinaH .. 53..
buddhAdvaitasatattvasya yatheShTAcharaNa.n yadi .
shunA.n tattvadR^ishA.n chaiva kobhedo.ashuchibhakShaNe .. 54..
bodhAt purA manodoShamAtrAtkliShTo.asyathAdhunA .
asheShalokanindA chetyaho te bodhavaibhavam .. 55..
viD.hvarAhAditulyatvaM mA kA~NkShIstattvavid bhavAn .
sarvadhIdoShasa.ntyAgAllokaiH pUjyasva devavat .. 56..
kAmyAdidoShadR^iShTyAdyAH kAmAdityAgahetavaH .
prasiddhA mokShashAstreShu tAnanviShya sukhI bhava .. 57..
tyajyatAmeSha kAmAdirmanorAjye tu kA kShatiH .
asheShadoShabIjatvAt kShatirbhagavateritA .. 58..
dhyAyate viShayAnpu.nsaH sa~NgasteShUpajAyate .
sa~NgAtsa.njAyate kAmaH kAmAtkrodho.abhijAyate .
krodhAdbhavati sammohaH sammohAtsmR^itivibhramaH .
smR^itibhra.nshAdbuddhinAsho buddhinAshAtpraNashyati .. 59..
shakya.n jetuM manorAjya.n nirvikalpasamAdhitaH .
susampAdaH kramAtso.api savikalpasamAdhinA .. 60..
buddhatattvena dhIdoShashUnyenaikAntavAsinA .
dIrghaM praNavamuchchArya manorAjya.n vijIyate .. 61..
jite tasmin vR^ittishUnyaM manastiShThati mUkavat .
etatpada.n vashiShThena rAmAya bahudheritam .. 62..
dR^ishya.n nAstIti bodhena manaso dR^ishyamArjanam .
sampanna.n chettadotpannA parA nirvANanirvR^itiH .
vichAritamala.n shAstra.n chiramudgrAhitaM mithaH .
santyaktavAsanAnmaunAdR^ite nyastyuttamaM padam .. 63..
vikShipyate kadAchiddhIH karmaNA bhogadAyinA .
punaH samAhitA sA syAttadaivAbhyAsapATavAt .. 64..
vikShepo yasya nAstyasya brahmavittva.n na manyate .
brahmaivAyamiti prAhurmunayaH pAradarshinaH .. 65..
darshanAdarshane hitvA svaya.n kevalarUpataH .
yastiShThati sa tu brahmanbrahma na brahmavitsvayam .. 66..
jIvanmukteH parA kAShThA jIvadvaitavivarjanAt .
labhyate.asAvato.atredamIshadvaitAdvivechitam .. 67..

iti dvaitavivekanAma chaturthaH parichChedaH .. 4..

\section{5\. mahAvAkyavivekonAma \- pa~nchamaH  parichChedaH .}
yenekShate shR^iNotIda.n jighrati vyAkaroti cha .
svAdvasvAdU vijAnAti tatpraj~nAnamudIritam .. 1..
chaturmukhendradeveShu manuShyAshvashvagavAdiShu .
chaitanyamekaM brahmAtaH praj~nAnaM brahmamayyapi .. 2..
paripUrNaH parAtmAsmindehe vidyAdhikAriNi .
buddheH sAkShitayA sthitvA sphurannahamitIryate .. 3..
svataH pUrNaH parAtmAtra brahmashabdena varNitaH .
asmItyaikyaparAmarshastena brahma bhavAmyaham .. 4..
ekamevAdvitIya.n sannAmarUpavivarjitam .
sR^iShTeH purAdhunApyasya tAdR^iktva.n taditIryate .. 5..
shroturdehendriyAtIta.n vastvatra tvaM paderitam .
ekatA gR^ihyate.asIti tadaikyamanubhUyatAm .. 6..
svaprakAshAparokShatvamayamityuktito matam .
aha~NkArAdidehAntAtpratyagAtmeti gIyate .. 7..
dR^ishyamAnasya sarvasya jagatastattvamIryate .
brahmashabdena tadbrahma svaprakAshAtmarUpakam .. 8..

iti mahAvAkyavivekonAma pa~nchamaH parichChedaH .. 5..

\section{6\. chitradIponAma \- ShaShThaH parichChedaH .}
yathA chitrapaTe dR^iShTamavasthAnA.n chatuShTayam .
paramAtmani vij~neya.n tathAvasthAchatuShTayam .. 1..
yathA dhauto ghaTTitashcha lA~nChito ra~njitaH paTaH .
chidantaryAmi sUtrANi virAT chAtmA tatheryate .. 2..
svataH shubhro.atra dhautaH syAdghaTTito.annavilepanAt .
masyAkArairlA~nChitaH syAdra~njito varNapUraNAt .. 3..
svatashchidantaryAmI tu mAyAvI sUkShmasR^iShTitaH .
sUtrAtmA sthUlasR^iShTyaiSha virADityuchyate paraH .. 4..
brahmAdyAHstambaparyantAH prANino.atra jaDA api .
uttamAdhamabhAvena vartante paTachitravat .. 5..
chitrArpitamanuShyANA.n vastrAbhAsAH pR^ithakpR^ithak .
chitrAdhAreNa vastreNa sadR^ishA iva kalpitAH .. 6..
pR^ithakpR^ithakchidAbhAsAshchaitanyAdhyastadehinAm .
kalpAnte jIvanAmAno bahudhA sa.nsarantyamI .. 7..
vastrAbhAsasthitAnvarNAnyadvadAdhAravastragAn .
vadantyaj~nAstathA jIvasa.nsAra.n chidgata.n viduH .. 8..
chitrastha parvatAdInA.n vastrAbhAso na likhyate .
sR^iShTisthamR^ittikAdInA.n chidAbhAsAstathA na hi .. 9..
sa.nsAraH paramArtho.aya.n sa.nlagnaH svAtmavastuni .
iti bhrAntiravidyA syAdvidyayaiShA nivartate .. 10..
AtmAbhAsasya jIvasya sa.nsAro nAtmavastunaH .
iti bodho bhavedvidyA labhyate.asau vichAraNAt .. 11..
sadA vichArayettasmAjjagatjjIvaparAtmanaH .
jIvabhAvajagadbhAvabAdhe svAtmaiva shiShyate .. 12..
nApratItistayorbAdhaH kintu mithyAtvanishchayaH .
no chetsuShuptimUrchChAdau muchyetA yatnato janaH .. 13..
paramAtmAvasheSho.api tatsatyatvavinishchayaH .
na jagadvismR^itirno chejjIvanmuktirna sambhavet .. 14..
parokShA chAparokSheti vidyA dvedhA vichArajA .
tatrAparokSha vidyAptau vichAro.aya.n samApyate .. 15..
asti brahmeti chedveda parokShaj~nAnameva tat .
ahaM brahmeti chedveda sAkShAtkAraH sa uchyate .. 16..
tatsAkShAtkArasiddhyarthamAtmatattva.n vivichyate .
yenAya.n sarvasa.nsArAtsadya eva vimuchyate .. 17..
kUTastho brahmajIveshAvityeva.n chichchaturvidhA .
ghaTAkAshamahAkAshau jalAkAshAbhrakhe yathA .. 18..
ghaTAvachChinnakhe nIra.n yattatra pratibimbitaH .
sAbhranakShatra\-AkAsho jalAkAsha\-udIryate .. 19..
mahAkAshasya madhye yanmeghamaNDalamIkShyate .
pratibimbatayA tatra meghAkAsho jale sthitaH .. 20..
meghA.nsharUpamudaka.n tuShArAkArasa.nsthitam .
tatra khapratibimbo.aya.n nIratvAdanumIyate .. 21..
adhiShThAnatayA dehadvayAvachChinnachetanaH .
kUTavannirvikAreNa sthitaH kUTastha\-uchyate .. 22..
kUTasthe kalpitA buddhistatra chit pratibimbakaH .
prANAnA.n dhAraNAjjIvaH sa.nsAreNa sa yujyate .. 23..
jalavyomnA ghaTAkAshoyathA sarvastirohitaH .
tathA jIvena kUTasthaH so.anyo.anyAdhyAsa uchyate .. 24..
aya.n jIvo na kUTastha.n vivinakti kadAchana .
anAdiraviveko.ayaM mUlAvidyeti gamyatAm .. 25..
vikShepAvR^itirUpAbhyA.n dvidhAvidyA prakalpitA .
na bhAti nAsti kUTastha ityApAdanamAvR^itiH .. 26..
aj~nAnI viduShA pR^iShTaH kUTastha.n na prabudhyate .
na bhAti nAsti kUTastha iti buddhvA vadatyapi .. 27..
svaprakAshe kuto.avidyA tA.n vinA kathamAvR^itiH .
ityAditarkajAlAni svAnubhUtirgrasatyasau .. 28..
svAnubhUtAvavishvAse tarkasyApyanavasthite .
katha.n vA tArkikaMmanyastattvanishchayamApnuyAt .. 29..
buddhyArohAya tarkashchedapekSheta tathA sati .
svAnubhUtiyanusAreNa tarkyatAM mA kutarkyatAm .. 30..
svAnubhUtiravidyAyAmAvR^itau cha pradarshitA .
ataH kUTasthachaitanyamavirodhIti tarkyatAm .. 31..
tachchedvirodhi kenaeyamAvR^itirhyanubhUyatAm .
vivekastu virodhIsyAttattvaj~nAnini dR^ishyatAm .. 32..
avidyAvR^itakUTasthe dehadvayayutA chitiH .
shuktau rUpyavadadhyastA vikShepAdhyAsa eva hi .. 33..
idama.nshasya satyatva.n shuktiga.n rUpya IkShyate .
svayantva.n vastutA chaiva.n vikShepe vIkShyate.anyagam .. 34..
nIlapR^iShThatrikoNatva.n yathA shuktau tirohitam .
asa~NgAnandatAdyeva.n kUTasthe.api tirohitam .. 35..
Aropitasya dR^iShTAnte rUpya.n nAma yathA tathA .
kUTasthAdhyastavikShepanAmAhamiti nishchayaH .. 36..
idama.nsha.n svataH pashyan rUpyamityabhimanyate .
tathA sva.n cha svataH pashyannahamityabhimanyate .. 37..
ida.ntvarUpyate bhinne svatvAhante tathekShyatAm .
sAmAnya.n cha visheShashchetyubhayatrApi gamyate .. 38..
devadattaH svaya.n gachChettva.n vIkShasva svaya.n tathA .
aha.n svaya.n na shaknomItyeva.n lauke prayujyate .. 39..
ida.n rUpyamida.n vastramiti yadvadida.n tathA .
asau tvamahamityeShu svayamityabhimanyate .. 40..
ahantvAdbhidyatA.n svatva.n kUTasthe tena ki.n tava .
svaya.n shabdArtha evaiSha kUTastha iti me bhavet .. 41..
anyatvavAraka.n svatvamiti chedanyavAraNam .
kUTasthasyAtmatA.n vakturiShTameva hi tadbhavet .. 42..
svayamAtmeti paryAyastena loke tayoH saha .
prayogo nAstyataH svatvamAtmatva.n chAnyavArakam .. 43..
ghaTaH svaya.n na jAnAtItyeva.n svatva.n ghaTAdiShu .
achetaneShu dR^iShTa.n cheddR^ishyatAmAtmasattvataH .. 44..
chetanAchetanabhidA kUTasthAtmakR^itA na hi .
kintu buddhikR^itAbhAsakR^itaivetyavagamyatAm .. 45..
yathA chetana AbhAsaH kUTasthe bhrAntikalpitaH .
achetano ghaTAdishcha tathA tatraiva kalpitaH .. 46..
tattvedante.api svatvamiva tvamahamAdiShu .
sarvatrAnugate tena tayorapyAtmateti chet .. 47..
te Atmatve.apyanugate tattvedante tatastayoH .
Atmatva.n naiva sambhAvya.n samyaktvAderyathA tathA .. 48..
tattvedante svatAnyatve tvantAhante parasparam .
pratidvandvitayA loke prasiddhenAsti sa.nshayaH .. 49..
anyatAyAH pratidvandvI svaya.n kUTastha iShyatAm .
tva.ntAyAH pratiyogyeSho.ahamityAtmani kalpitaH .. 50..
aha.ntAsvatvayorbhede rUpyatedantayoriva .
spaShTe.api mohamApannA ekatvaM pratipedire .. 51..
tAdAtmyAdhyAsa evAtra pUrvoktAvidyayA kR^itaH .
avidyAyA.n nivR^ittAyA.n tatkArya.n vinivartate .. 52..
avidyAvR^ititAdAtmye vidyayaiva vinashyataH .
vikShepasya svarUpa.n tu prArabdhakShayamIkShyate .. 53..
upAdAne vinaShTe.api kShaNa.n kAryaM pratIkShyate .
ityAhustArkikAstadvadasmAka.n ki.n na sambhavet .. 54..
tantUnA.n dinasa.nkhyAnA.n taistAdR^ikkShaNa IritaH .
bhramasyAsa.nkhyakalpasya yogyaH kShaNa iheShyatAm .. 55..
vinA kShodakShamaM mAna.n tairvR^ithA parikalpyate .
shrutiyuktyanubhUtibhyo vadatA.n kinnu duHshakam .. 56..
AstA.n dustArkikaiH sAka.n vivAdaH prakR^itaM bruve .
svAhamoH siddhamekatva.n kUTasthapariNAminoH .. 57..
bhrAmyante paNDitaMmanyAH sarve laukikatArkikAH .
anAdR^itya shrutiM maurkhyAtkevalA.n yuktimAshritAH .. 58..
pUrvAparaparAmarshavikalAstatra kechana .
vAkyAbhAsAnsvasvapakShe yojayantyapyalajjayA .. 59..
kUTasthAdisharIrAntasa.nghAtasyAtmatA.n jaguH .
lokAyatAH pAmarAshcha pratyakShAbhAsamAshritAH .. 60..
shrautIkartu.n svapakShante koShamannamaya.n tathA .
virochanasya siddhAntaM pramANaM pratijaj~nire .. 61..
jIvAtmanirgame dehamaraNasyAtra darshanAt .
dehAtirikta evAtmetyAhurlokAyatAH pare .. 62..
pratyakShatvenAbhimatAha.n dhIrdehAtirekiNam .
gamayedindriyAtmAna.n vachmItyAdiprayogataH .. 63..
vAgAdinAmindriyANA.n kalahaH shrutiShu shrutaH .
tena chaitanyameteShAmAtmatva.n tata eva hi .. 64..
hairaNyagarbhAH prANAtmavAdinastvevamUchire .
chakShurAdyakShalope.api prANasattve tu jIvati .. 65..
prANo jAgarti supteShu prANashraiShThyAdika.n shrutam .
koShaH prANamayaH samyagvistareNa prapa~nchitaH .. 66..
mana AtmA iti manyanta upAsanaparA janAH .
prANasyAbhoktR^itA spaShTA bhoktR^itvaM manasastataH .. 67..
mana eva manuShyANA.n kAraNaM bandhamokShayoH .
shruto manomayaH koShastenAtmetIritaM manaH .. 68..
vij~nAnamAtmeti para AhuH kShaNikavAdinaH .
yatovij~nAnamUlatvaM manaso gamyate sphuTam .. 69..
aha.n vR^ittirida.n vR^ittirityantaHkaraNa.n dvidhA .
vij~nAna.n syAdaha.nvR^ittirida.nvR^ittirmano bhavet .. 70..
ahaMpratyayabIjatvamida.nvR^itteritisphuTam .
aviditvA svamAtmAnaM bAhya.n veda na tu kvachit .. 71..
kShaNe kShaNe janmanAshAvaha.nvR^ittirmitau yataH .
vij~nAna.n kShaNika.n tena svaprakAsha.n svato miteH .. 72..
vij~nAnamayakosho.aya.n jIva ityAgamA jaguH .
sarvasa.nsAra etasya janmanAshasukhAdikaH .. 73..
vij~nAna.n kShaNika.n nAtmA vidyudabhranimeShavat .
anyasyAnupalabdhatvAchChUnyaM mAdhyamikA jaguH .. 74..
asadevedamityAdAvidameva shruta.n tataH .
j~nAnaj~neyAtmaka.n sarva.n jagadbhrAntiprakalpitam .. 75..
niradhiShThAnavibhrAnterabhAvAdAtmano.astitA .
shUnyasyApi sasAkShitvAdanyathA noktirasya te .. 76..
anyo vij~nAnamayata Anandamaya AntaraH .
astItyevopalabdhavya iti vaidikadarshanam .. 77..
aNurmahAnmadhyamo vetyeva.n tatrApi vAdinaH .
bahudhA vivadante hi shrutiyuktisamAshrayAt .. 78..
aNu.n vadantyantarAlAH sUkShmanADIprachArataH .
romNaH sahasrabhAgena tulyAsu pracharatyayam .. 79..
aNoraNIyAneSho.aNuH sUkShmAtsUkShmatara.n tviti ..
aNutvamAhuH shrutayaH shatasho.atha sahasrashaH .. 80..
vAlAgrashatabhAgasya shatadhA kalpitasya cha .
bhAgo jIvaH sa vij~neya iti chAhaparA shrutiH .. 81..
digambarA madhyamatvamAhurApAdamastakam .
chaitanyavyAptisa.ndR^iShTerAnakhAgrashruterapi .. 82..
sUkShmanADI prachArastu sUkShmairavayavairbhavet .
sthUladehasya hastAbhyA.n ka~nchukapratimokavat .. 83..
nyUnAdhikasharIreShu pravesho.api gamAgamaiH .
AtmA.nshAnAM bhavettena madhyamatva.n sunishchitam .. 84..
sa.nshasya ghaTavannAsho bhavatyeva tathA sati .
kR^itanAshAkR^itAbhyAgamayoH ko vArako bhavet .. 85..
tasmAdAtmA mahAneva naivANurnApi madhyamaH .
AkAshavatsarvagato nira.nshaH shrutisaMmataH .. 86..
ityuktvA tadvisheShe.api bahudhA kalaha.n yayuH .
achidrUpo.atha chidrUpAshchidachidrUpa ityapi .. 87..
prAbhAkarAstArkikAshcha prAhurasyAchidAtmatAm .
AkAshavaddravyamAtmA shabdavattadguNashchitiH .. 88..
ichChAdveShaprayatnAshcha dharmAdharmau sukhAsukhe .
tat.hsa.nskArAshcha tasyaite guNAshchitivadIritAH .. 89..
Atmano manasA yoge svAdR^iShTavashato guNAH .
jAyante.atha pralIyante suShupte.adR^iShTasa.nkShayAt .. 90..
chitimattvAchchetano.ayamichChAdveShaprayatnavAn .
syAddharmAdharmayoH kartA bhoktA duHkhAdimattvataH .. 91..
yathAtra karmavashataH kAdAdika.n mukhAdikam .
tathA lokAntare dehe karmaNechChAdi janyate .. 92..
eva.n cha sarvagasyApi sambhavetA.n gamAgamau .
karmakANDaH samagro.atra pramANamiti te.avadan .. 93..
AnandamayakoSho yaH suShuptau parishiShyate .
aspaShTachitsa AtmaiShAM pUrvakosho.asya te guNAH .. 94..
gUDha.n chaitanyamutprekShya bodhAbodhasvarUpatAm .
Atmano bruvate bhATTAshchidutprekShyotthitasmR^iteH .. 95..
jaDo bhUtvA tadAsvApsamiti jADyasmR^itistadA .
vinA jADyAnubhUti.n na katha.nchidupapadyate .. 96..
draShTurdR^iShTeralopashcha shrutaH suptau tatastvayam .
aprakAshaprakAshAbhyAmAtmA khadyotavadyutaH .. 97..
nira.nshasyobhayAtmatva.n na katha.nchidghaTiShyate .
tena chidrUpa evAtmetyAhuH sA.nkhyA vivekinaH .. 98..
jADyA.nshaH prakR^iterUpa.n vikAri triguNa.n cha tat .
chito bhogApavargArthaM prakR^itiH sA pravartate .. 99..
asa~NgAyAshchiterbandhamokShau bhedAgrahAnmatau .
bandhamokShavyavasthArthaM pUrveShAmiva chidbhidA .. 100..
mahataH paramavyaktamiti prakR^itiruchyate .
shrutAksa~NgatA tadvadasa~Ngo hItyataH sphuTA .. 101..
chitsannidhau pravR^ittAyA prakR^iterhi niyAmakam .
IshvaraM bruvate yogAH sa jIvebhyaH paraH shrutaH .. 102..
pradhAnakShetraj~napatirguNesha iti hi shrutiH .
AraNyake saMbhrameNa hyantaryAmyupapAditaH .. 103..
atrApi kalahAyante vAdinaH svasvayuktibhiH .
vAkyAnyapi yathApraj~na.n dArDhyAyodAharanti hi .. 104..
kleshakarmavipAkaistadAshayairapyasa.nyutaH .
pu.nvisheSho bhavedIsho jIvavatso.apyasa~Ngachit .. 105..
tathApi pu.nvisheShatvAdghaTate.asya niyantR^itA .
avyavasthau bandhamokShAvApatetAmihAnyathA .. 106..
bhIShAsmAdityevamAdAvasa~Ngasya parAtmanaH .
shruta.n tadyuktamapyasya kleshakarmAdyasa~NgamAt .. 107..
jIvAnAmapyasa~NgatvAtkleshAdi na hyathApi cha .
vivekAgrahataH kleshakarmAdi prAgudIritam .. 108..
nityaj~nAnaprayatnechChAguNAnIshasya manvate .
asa~Ngasya niyantR^itvamayuktamiti tArkikAH .. 109..
pu.nvisheShatvamapyasya guNaireva na chAnyathA .
satyakAmaH satyasa.nkalpa ityAdishrutirjagau .. 110..
nityaj~nAnAdimattve.asya sR^iShTireva sadA bhavet .
hiraNyagarbha Isho.ato li~Ngadehena sa.nyutaH .. 111..
udgIthabrAhmaNe tasya mAhAtmyamativistR^itam .
li~Ngasattve.api jIvatva.n nAsya karmAdyabhAvataH .. 112..
sthUladeha.n vinA li~Ngadeho na kvApi dR^ishyate .
vairAjo deha Isho.ataH sarvato mastakAdimAn .. 113..
sahasrashIrShetyeva.n hi vishvatashchakShurityapi .
shrutamityAhuranisha.n vishvarUpasya chintakAH .. 114..
sarvataH pANipAdatve kR^imyAderapi cheshatA .
tatashchaturmukho deva evesho netaraH pumAn .. 115..
putrArtha.n tamupAsInA evamAhuH prajApatiH .
prajA asR^ijatetyAdishrutishchodAharantyamI .. 116..
viShNornAbheH samudbhUto vedhAH kamalajastataH .
viShNurevesha ityAhurloke bhAgavatA janAH .. 117..
shivasya pAdAvanveShTu.n shAr~NgyashaktastataH shivaH .
Isho na viShNurityAhuH shaivA AgamamAninaH .. 118..
puratraya.n sAdayitu.n vighnesha.n so.apyapUjayat .
vinAyakaM prAhurIsha.n gANapatyamate ratAH .. 119..
evamanye svasvapakShAbhimAnenAnyathAnyathA .
mantrArthavAdakalpAdInAshritya pratipedire .. 120..
antaryAmiNamArabhya sthAvarAnteshavAdinaH .
santyashvatthArkava.nshAdeH kuladaivatvadarshanAt .. 121..
tattvanishchayakAmena nyAyAgamavichAriNAm .
ekaiva pratipattiH syAtsApyatra sphuTamuchyate .. 122..
mAyA.n tu prakR^iti.n vidyAnmAyina.n tu maheshvaram .
asyAvayavabhUtaistu vyApta.n sarvamida.n jagat .. 123..
iti shrutyanusAreNa nyAyo nirNaya Ishvare .
tathA satyavirodhaH syAtsthAvarAnteshavAdinAm .. 124..
mAyA cheya.n tamorUpA tApanIye tadIraNAt .
anubhUti.n tatra mAnaM pratiyaj~ne shrutiH svayam .. 125..
jaDaM mohAtmaka.n tachchetyanubhAvayati shrutiH .
AbAlagopa.n spaShTatvAdAnantya.n tasya sAbravIt .. 126..
achidAtmaghaTAdinA.n yatsvarUpa.n jaDa.n hi tat .
yatra kuNThIbhavedbuddhiH sa moha iti laukikAH .. 127..
ittha.n laukikadR^iShTyaitatsarvairapyanubhUyate .
yuktidR^iShTyA tvanirvAchya.n nAsadAsIditishruteH .. 128..
nAsadAsIdvibhAtatvAnno sadAsIchcha bAdhanAt .
vidyAdR^iShTyA shruta.n tuchCha.n tasya nityanivR^ittitaH .. 129..
tuchChAnirvachanIyA cha vAstavI chetyasau tridhA .
j~neyA mAyA tribhirbodhaiH shrautayauktikalaukikaiH .. 130..
asya sattvamasattva.n cha jagato darshayatyasau .
prasAraNAchcha sa.nkochAdyathA chitrapaTastathA .. 131..
asvatantrA hi mAyA syAdapratItervinA chitim .
svatantrApi tathaiva syAdasa~NgasyAnyathAkR^iteH .. 132..
kUTasthAsa~NgamAtmAna.n jaDattvena karoti sA .
chidAbhAsasvarUpeNa jIveshAvapi nirmame .. 133..
kUTasthamanupAR^itya karoti jagadAdikam .
durghaTaikavidhAyinyAM mAyAyA.n kA chamatkR^itiH .. 134..
dravatvamudake vahnAvuShNya.n kAThinyamashmani .
mAyAyA durghaTatva.n cha svataH siddhyati nAnyathA .. 135..
na vetti mAyina.n loko yAvattAvachchamatkR^itim .
dhatte manasi pashchAttu mAyaiShetyupashAmyati .. 136..
prasaranti hi chodyAni jagadvastutvavAdiShu .
na chodanIyaM mAyAyA.n tasyAchchodyaikarUpataH .. 137..
chodye.api yadi chodya.n syAttachchodye chodyate mayA .
parihArya.n tatashchodya.n na punaH pratichodyatAm .. 138..
vismayaikasharIrAyA mAyAyAshchodyarUpataH .
anveShyaH parihAro.asyA buddhimadbhiH prayatnataH .. 139..
mAyAtvameva nishcheyamiti chettarhi nishchinu .
lokaprasiddhamAyAyA lakShaNa.n yattadIkShyatAm .. 140..
na nirUpayitu.n shakyA vispaShTaM bhAsate cha yA .
sA mAyetIndrajAlAdau lokAH sampratipedire .. 141..
spaShTaM bhAti jagachchedamashakya.n tannirUpaNam .
mAyAmaya.n jagattasmAdIkShasvApakShapAtataH .. 142..
nirUpayitumArabdhe nikhilairapi paNDitaiH .
aj~nAnaM puratasteShAM bhAti kakShAsu kAsuchit .. 143..
dehendriyAdayo bhAvA vIryeNotpAditAH katham .
katha.n vA tatra chaitanyamityukte te kimuttaram .. 144..
vIryasyaiSha svabhAvashchetkatha.n tadvidita.n tvayA .
anvayavyatirekau yau bhagnau tau vyarthavIryataH .. 145..
na jAnAmi kimapyetadityante sharaNa.n tava .
ata eva mahanto.asyAH pravadantIndrajAlatAm .. 146..
etasmAnkimivendrajAlamapara.n yadgarbhavAsasthitam.h
retashchetati hastamastakapadaM prodbhUtanAnA~Nkuram .
paryAyeNa shishutvayauvanajarArogairanekairvR^itam.h
pashyatyatti shR^iNoti jighrati tathA gachChatyathAgachChati .. 147..
dehavadvaTadhAnAdau suvichAryAvalokyatAm .
kva dhAnA kutra vA vR^ikShastasmAnmAyeti nishchinu .. 148..
niruktAvabhimAna.n ye dadhate tArkikAdayaH .
harShamishrAdibhiste tu khaNDanAdau sushikShitAH .. 149..
achintyAH khalu ye bhAvA na tA.nstarkeShu yojayet .
achintyarachanArUpaM manasApi jagatkhalu .. 150..
achintyarachanAshaktibIjaM mAyeti nishchinu .
mAyAbIja.n tadevaika.n suShuptAvanubhUyate .. 151..
jAgratsvapnajagattatra lInaM bIja iva drumaH .
tasmAdasheShajagato vAsanAstatra sa.nsthitAH .. 152..
yA buddhivAsanAstAsu chaitanyaM pratibimbati .
meghAkAshavadaspaShTashchidAbhAso.anumIyatAm .. 153..
sAbhAsameva tadbIja.n dhIrUpeNa prarohati .
ato buddhau chidAbhAso vispaShTaM pratibhAsate .. 154..
mAyAbhAsena jIveshau karotIti shrutau shrutam .
meghAkAshajalAkAshAviva tau suvyavasthitau .. 155..
meghavadvartate mAyA meghasthitatuShAravat .
dhIvAsanAshchidAbhAsastuShArasthakhavatsthitaH .. 156..
mAyAdhInashchidAbhAsaH shrutau mAyI maheshvaraH .
antaryAmI cha sarvaj~no jagadyoniH sa eva hi .. 157..
sauShuptamAnandamayaM prakramyaiva.n shrutirjagau .
eSha sarveshvara iti so.aya.n vedokta IshvaraH .. 158..
sarvaj~natvAdike tasya naiva vipratipadyatAm .
shrautArthasyAvitarkyatvAnmAyAyA.n sarvasambhavAt .. 159..
aya.n yatsR^ijate vishva.n tadanyathayituM pumAn .
na ko.api shaktastenAya.n sarveshvara iti IritaH .. 160..
asheShaprANibuddhInA.n vAsanAstatra sa.nsthitAH .
tAbhiH kroDIkR^ita.n sarva.n tena sarvaj~na IritaH .. 161..
vAsanAnAM parokShatvAtsarvaj~natva.n na hIkShyate .
sarvabuddhiShu taddR^iShTvA vAsanAsvanumIyatAm .. 162..
vij~nAnamayamukhyeShu koSheShvanyatra chaiva hi .
antastiShThanyamayati tenAntaryAmitA.n vrajet .. 163..
buddhau tiShThannAntaro.asyAdhiyAnIkShyashcha dhIvapuH .
dhiyamantaryamayatItyeva.n vedena ghoShitam .. 164..
tantuH paTe sthito yadvadupAdAnatayA tathA .
sarvopAdAnarUpatvAtsarvatrAyamavasthitaH .. 165..
paTAdapyAntarastantustantorapya.nshurAntaraH .
Antaratvasya vishrAntiryatrAsAvanumIyatAm .. 166..
dvitryAntaratvakakShANA.n darshane.apyayamAntaraH .
na vIkShyate tato yuktishrutibhyAmeva nirNayaH .. 167..
paTarUpeNa sa.nsthAnAtpaTastantorvapuryathA .
sarvarUpeNa sa.nsthAnAtsarvamasya vapustathA .. 168..
tantoH sa.nkochavistArachalanAdau paTastathA .
avashyameva bhavati na svAtantryaM paTe manAk .. 169..
tathAntaryAmyaya.n yatra yayA vAsanayA yathA .
vikrIyate tathAvashyaM bhavatyeva na sa.nshayaH .. 170..
IshvaraH sarvabhUtAnA.n hR^iddeshe.arjuna ##!## tiShThati .
bhrAmayansarvabhUtAni yantrArUDhAni mAyayA .. 171..
sarvabhUtAni vij~nAnamayAste hR^idaye sthitAH .
tadupAdAnabhUteshastatra vikriyate khalu .. 172..
dehAdipa~njara.n yantra.n tadAroho.abhimAnitA .
vihitapratisiddheShu pravR^ittirbhramaNaM bhavet .. 173..
vij~nAnamayarUpeNa tatpravR^ittisvarUpataH .
svashaktyesho vikriyate mAyayA bhrAmaNa.n hi tat .. 174..
antaryamayatItyuktyA yamevArthaH shrutau shrutaH .
pR^ithivyAdiShu sarvatra nyAyo.aya.n yojyatA.n dhiyA .. 175..
jAnAmi dharma.n na cha me pravR^itti\-
     rjAnAmyadharma.n na cha me nivR^ittiH .
kenApi devena hR^idi sthitena
     yathA niyukto.asmi tathA karomi .. 176..
nArthaH puruShakAreNetyeva.n mA sha.nkyatA.n yataH .
IshaH puruShakArasya rUpeNApi vivartate .. 177..
IdR^igbodheneshvarasya pravR^ittirmaiva vAryatAm .
tathApIshasya bodhena svAtmAsa~NgatvadhIjaniH .. 178..
tAvatA muktirityAhuH shrutayaH smR^itayastathA .
shrutismR^itI mamaivAj~ne ityapIshvarabhAShitam .. 179..
Aj~nAyA bhItihetutvaM bhIShAsmAditi hi shrutam .
sarveshvaratvametatsyAdantaryAmitvataH pR^ithak .. 180..
etasya vA akSharasya prashAsana iti shrutiH .
antaH praviShTaH shAstAya.n janAnAmiti cha shrutiH .. 181..
jagadyonirbhavedeSha prabhavApyayakR^idyataH .
AvirbhAvatirobhAvAvutpattipralayau matau .. 182..
AvirbhAvayati svasminvilIna.n sakala.n jagat .
prANikarmavashAdeSha paTo yadvatprasAritaH .. 183..
punastirobhAvayati svAtmanyevAkhila.n jagat .
prANikarmakShayavashAtsa.nkochitapaTo yathA .. 184..
rAtrighasrau suptibodhAvunmIlananimIlane .
tUShNIMbhAvamanorAjye iva sR^iShTilayAvimau .. 185..
AvirbhAvatirobhAvashaktimattvena hetunA .
ArambhapariNAmAdichodyAnA.n nAtra sambhavaH .. 186..
achetanAnA.n hetuH syAjjADyA.nsheneshvarastathA .
chidAbhAsA.nshatastveSha jIvAnA.n kAraNaM bhavet .. 187..
tamaH pradhAnaH kShetrANA.n chitpradhAnAshchidAtmanAm .
paraH kAraNatAmeti bhAvanAj~nAnakarmabhiH .. 188..
iti vArtikakAreNa jaDachetanahetutA .
paramAtmana evoktA neshvarasyeti chechChhR^iNu .. 189..
anyonyAdhyAsamatrApi jIvakUTasthayoriva .
IshvarabrahmaNoH siddha.n kR^itvA brUte sureshvaraH .. 190..
satya.n j~nAnamananta.n yadbrahma tasmAtsamutthitAH .
kha.n vAyvagnijalorvyoShadhyannadehAH iti shrutiH .. 191..
ApAtadR^iShTitastatra brahmaNo bhAti hetutA .
hetoshcha satyatA tasmAdanyonyAdhyAsa iShyate .. 192..
anyonyAdhyAsarUpo.asAvannaliptaH paTo yathA .
ghaTTitenaikatAmeti tadvadbhrAntaikatA.ngataH .. 193..
meghAkAshamahAkAshau vivichyete na pAmaraiH .
tadvadbrahmaeshayoraikyaM pashyantyApAtadarshinaH .. 194..
upakramAdibhirli~NgaistAtparyasya vichAraNAt .
asa~NgaM brahma mAyAvI sR^ijatyeSha maheshvaraH .. 195..
satya.n j~nAnamananta.n chetyupakramyopasa.nhR^itaH .
yato vAcho nivartante ityasa~NgatvanirNayaH .. 196..
mAyI sR^ijati vishva.n sa.nniruddhastatra mAyayA .
anya ityaparA brUte shrutisteneshvaraH sR^ijet .. 197..
Anandamaya Isho.ayaM bahu syAmityavaikShata .
hiraNyagarbharUpo.abhUtsuptiH svapno yathA bhavet .. 198..
krameNa yugapadvaiShA sR^iShTirj~neyA yathAshruti .
dvividhashrutisadbhAvAddvividhasvapnadarshanAt .. 199..
sUtrAtmA sUkShmadehAkhyaH sarvajIvaghanAtmakaH .
sarvAhaMmAnadhAritvAtkriyAj~nAnAdishaktimAn .. 200..
pratyUShe vA pradoShe vA magno mande tamasyayam .
loko bhAti yathA tadvadaspaShTa.n jagadIkShyate .. 201..
sarvato lA~nChito masyA yathA syAdghaTTitaH paTaH .
sUkShmAkAraistatheshasya vapuH sarvatra lA~nChitam .. 202..
shasya.n vA shAkajAta.n vA sarvato.a~Nkurita.n yathA .
komala.n tadvadevaiSha pelavo jagada~NkuraH .. 203..
AtapAbhAtaloko vA paTo vA varNapUritaH .
shasya.n vA phalita.n yadavattathA spaShTavapurvirAT .. 204..
vishvarUpAdhyAya eSha uktaH sUkte.api pauruShe .
dhAtrAdistambaparyantAnetasyAvayavAn viduH .. 205..
IshasUtravirATvedhoviShNurudraendravahnayaH .
vighnabhairavamairAlamArikA yakSharAkShasAH .. 206..
viprakShatriyaviT.hshUdrA gavAshvamR^igapakShiNaH .
ashvatthavaTachUtAdyA yavavR^ihitR^iNAdayaH .. 207..
jalapAShANamR^itkAShThavAsyAkuddAlakAdayaH .
IshvarAH sarva evaite pUjitAH phaladAyinaH .. 208..
yathA yathopAsate taM phalamIyustathA tathA .
phalotkarShApakarShau tu pUjyapUjAnusArataH .. 209..
muktistu brahmatattvasya j~nAnAdeva na chAnyathA .
svaprabodha.n vinA naiva svasvapna.n hIyate yathA .. 210..
advitIyabrahmatattve svapno.ayamakhila.n jagat .
IshajIvAdrUpeNa chetanAchetanAtmakam .. 211..
Anandamayavij~nAnamayAvIshvarajIvakau .
mAyayA kalpitAvetau tAbhyA.n sarvaM prakalpitam .. 212..
IkShaNAdipraveshAntA sR^iShTirIshena kalpitA .
jAgradAdivimokShAntaH sa.nsAro jIvakalpitaH .. 213..
advitIyaM brahmatattvamasa~Nga.n tanna jAnate .
jIvaeshayormAyikayorvR^ithaiva kalaha.n yayuH .. 214..
j~nAtvA sadA tattvaniShThAnanumodAmahe vayam .
anushochAma evAnyAnna bhrAntairvivadAmahe .. 215..
tR^iNArchakAdiyogAntA IshvarabhrAntimAshritAH .
lokAyatAdisA.nkhyAntA jIvavibhrAntimAshritAH .. 216..
advitIyabrahmatattva.n na jAnanti yadA tadA .
bhrAntA evAkhilAsteShA.n kva muktiH kveha vA sukham .. 217..
uttamAdhamabhAvashchetteShA.n syAdastu tena kim .
svapnastharAjyabhikShAbhyA.n na buddhaH spR^ishyate khalu .. 218..
tasmAnmumukShibhirnaiva matirjIveshavAdayoH .
kAryA ki.ntu brahmatattva.n vichArya budhyatA.n cha tat .. 219..
pUrvapakShatayA tau chettattvanishchayahetutAm .
prApnuto.astu nimajjasya tayornaitAvatA vashaH .. 220..
asa~Ngachid.hvibhurjIvaH sA.nkhyoktastAdR^igIshvaraH .
yogoktastattvamorarthau shuddhau tAviti chechChR^iNu .. 221..
na tattvamorubhAvArthAvasmatsiddhAntatA.n gatau .
advaitabodhanAyaiva sA kakShA kAchidiShyate .. 222..
anAdimAyayA bhrAntA jIveshau suvilakShaNau .
manyante tadvyudAsAya kevala.n shodhana.n tayoH .. 223..
ata evAtra dR^iShTAnto yogyaH prAksamyagIritaH .
ghaTAkAshamahAkAshajalAkAshAbhrakhAtmakaH .. 224..
jalAbhropAdhyadhIne te jalAkAshAbhrakhe tayoH .
AdhArau tu ghaTAkAshamahAkAshau sunirmalau .. 225..
evamAnandavij~nAnamayau mAyAdhiyorvashau .
tadadhiShThAnakUTasthabrahmaNI tu sunirmale .. 226..
etat.hkakShopayogena sA.nkhyayogau matau yadi .
deho.annamayakakShatvAdAtmatvenAbhyupeyatAm .. 227..
Atmabhedo jagatsatyamIsho.anya iti chettrayam .
tyajyate taistadA sA.nkhyayogavedAntasaMmatiH .. 228..
jIvAsa~NgatvamAtreNa kR^itArtha iti chettadA .
srak.hchandanAdinityatvamAtreNApi kR^itArthatA .. 229..
yathA sragAdinityatva.n duHsampAdya.n tathAtmanaH .
asa~Ngatva.n na sambhAvya.n jIvatorjagadIshayoH .. 230..
avashyaM prakR^itiH sa~NgaM purevApAdayettathA .
niyachChatyetamIsho.api ko.asya mokShastathA sati .. 231..
avivekakR^itaH sa~Ngo niyamashcheti chettadA .
balAdApatito mAyAvAdaH sA.nkhyasya durmateH .. 232..
bandhamokShavyavasthArthamAtmanAnAtvamiShyatAm .
iti chenna yato mAyA vyavasthApayitu.n kShamA .. 233..
durghaTa.n ghaTayAmIti viruddha.n ki.n na pashyasi .
vAstavau bandhamokShau tu shrutirna sahatetarAm .. 234..
na nirodho na chotpattirna baddho na cha sAdhakaH .
na mumukShurna vai mukta ityeShA paramArthatA .. 235..
mAyAkhyAyA kAmadhenorvatsau jIveshvarAvubhau .
yathechChaM pibatA.n dvaita.n tattva.n tvadvaitameva hi .. 236..
kUTasthabrahmaNorbhedo nAmamAtrAdR^ite na hi .
ghaTAkAshamahAkAshau viyujyete na hi kvachit .. 237..
yadadvaita.n shruta.n sR^iShTeH prAktadevAdya chopari .
muktAvapi vR^ithA mAyA bhrAmayatyakhilAn janAn .. 238..
ye vadantItthamete.api bhrAmyante.avidyayAtra kim .
na yathA pUrvameteShAmatra bhrAnteradarshanAt .. 239..
aihikAmuShmikaH sarvaH sa.nsAro vAstavastataH .
na bhAti nAsti chAdvaitamityaj~nAnivinishchayaH .. 240..
j~nAnInA.n viparIto.asmAnnishchayaH samyagIkShyate .
svasvanishchayato baddho mukto.aha.n veti manyate .. 241..
nAdvaitamaparokSha.n chenna chidrUpeNa bhAsanAt .
asheSheNa na bhAta.n cheddvaita.n kiM bhAsate.akhilam .. 242..
di~NmAtreNa vibhAna.n tu dvayorapi sama.n khalu .
dvaitasiddhivadadvaitasiddhistvetAvatA na kim .. 243..
dvaitena hInamadvaita.n dvaitaj~nAne katha.n tvidam .
chidbhAna.n tvavirodhyasya dvaitasyAto.asame ubhe .. 244..
eva.n tarhi shR^iNu dvaitamasanmAyAmayatvataH .
tena vAstavamadvaitaM parisheShAdvibhAsate .. 245..
achintyarachanArUpaM mAyaiva sakala.n jagat .
iti nishchitya vastutvamadvaite parisheShyatAm .. 246..
punardvaitasya vastutvaM bhAti chettva.n tathA punaH .
parishIlaya ko vAtra prayAsastena te vada .. 247..
kiyanta.n kAlamiti chetkhedo.aya.n dvaita iShyatAm .
advaite tu na yukto.aya.n sarvAnArthanivAraNAt .. 248..
kShutpipAsAdayo dR^iShTA yathApUrvaM mayIti chet .
machChabdavAchye.aha~NkAre dR^ishyatA.n neti ko vadet .. 249..
chidrUpe.api prasajyeran tAdAtmyAdhyAsato yadi .
mAdhyAsa.n kuru kintu tva.n viveka.n kuru sarvadA .. 250..
jhaTityadhyAsa AyAti dR^iDhavAsanayeti chet .
Avartayetdviveka.n cha dR^iDha.n vAsayitu.n sadA .. 251..
viveke dvaitamithyAtva.n yuktyai veti na maNyatAm .
achintyarachanAtvasyAnubhUtirhi svasAkShikI .. 252..
chidapyachintyarachanA yadi tarhyastu no vayam .
chiti.n svachintyarachanAM brUmo nityatvakAraNAt .. 253..
prAgabhAvo nAnubhUtashchiternityA tatashchitiH .
dvaitasya prAgabhAvastu chaitanyenAnubhUyate .. 254..
prAgabhAvayuta.n dvaita.n rachyate hi ghaTAdivat .
tathApi rachanA chintyA mithyA tenendrajAlavat .. 255..
chitpratyakShA tato.anyasya mithyAtva.n chAnubhUyate .
nAdvaitamaparokSha.n chetyetanna vyAhata.n katham .. 256..
ittha.n j~nAtvApyasantuShTAH kechitkuta itIrya tAm .
chArvAkAdeH prabuddhasyApyAtmA dehaH kuto vada .. 257..
samyagvichAro nAstyasya dhIdoShAditi chettathA .
asantuShTAshcha shAstrArtha.n na tvIkShante visheShataH .. 258..
yadA sarve pramuchyante kAmA ye.asya hR^idi shritAH .
iti shrautaM phala.n dR^iShTa.n neti cheddR^iShTameva tat .. 259..
yadA sarve prabhidyante hR^idayagranthayastviti .
kAmA granthisvarUpeNa vyAkhyAtA vAkyasheShataH .. 260..
aha~NkArachidAtmAnaveekIkR^ityAvivekataH .
idaM me syAdidaM me syAditIchChAH kAmashabditAH .. 261..
apraveshya chidAtmAnaM pR^ithakpashyannaha~NkR^itim .
ichChastu koTivastUni na bAdho granthibhedataH .. 262..
granthibhede.api sambhAvyA ichChAH prArabdhadoShataH .
budhvApi pApabAhulyAdasantoSho yathA tava .. 263..
aha~NkAragatechChAdyairdehavyAdhidibhistathA .
vR^ikShAdijanmanAshairvA chidrUpAtmani kiM bhavet .. 264..
granthibhedAtpurApyevamiti chettanna vismara .
ayameva granthibhedastava tena kR^itI bhavAn .. 265..
naiva.n jAnanti mUDhAshchetso.aya.n granthirnachAparaH .
granthitadbhedamAtreNa vaiShamyaM mUDhabuddhayoH .. 266..
pravR^ittau vA nivR^ittau vA dehendriyamanodhiyAm .
na ki.nchidapi vaiShamyamastyaj~nAnivibuddhayoH .. 267..
vrAtyashrotriyayorvedapAThApAThakR^itAbhidA .
nAhArAdavasti bhedaH so.aya.n nyAyo.atra yojyatAm .. 268..
na dveShTi sampravR^ittAni na nivR^ittAni kA~NkShati .
udAsInavadAsIna iti granthibhidochyate .. 269..
audAsInya.n vidheya.n chedvachChashabda vyarthatA tadA .
na shaktA hyasya dehAdyA iti chedroga eva saH .. 270..
tattvabodha.n kShayavyAdhiM manyante ye mahAdhiyaH .
teShaM praj~nAtivishadA ki.n teShA.n duHshaka.n vada .. 271..
bharatAderapravR^ittiH purANokteti chettadA .
jakShatkrIDanrati.n vindannityashrauShIrna ki.n shrutim .. 272..
na hyAhArAdi santyajya bharatAdyAH sthitAH kvachit .
kAShThapAShANavatkintu sa~NgabhItA udAsate .. 273..
sa~NgI hi bAdhyate loke niHsa~NgaH sukhamashnute .
tena sa~NgaH parityAjyaH sarvadA sukhamichChatA .. 274..
aj~nAtvA shAstrahR^idayaM mUDho vaktyanyathAnyathA .
mUrkhANA.n nirNaya svAstAmasmatsiddhAnta uchyate .. 275..
vairAgyabodhoparamAH sahAyAste parasparam .
prAyeNa saha vartante viyujyante kvachitkvachit .. 276..
hetusvarUpakAryANi bhinnAnyeShAmasa.nkaraH .
yathAvadavagantavyaH shAstrArthapravivichyatA .. 277..
doShadR^iShTirjihAsA cha punarbhogeShvadInatA .
asAdhAraNahetvAdyA vairAgyasya trayo.apyamI .. 278..
shravaNAditraya.n tadvattattvamitthAvivechanam .
punargrantheranudayo bodhasyete trayo matAH .. 279..
yamAdirdhInirodhashcha vyavahArasya sa.nkShayaH .
syurhetvAdyA uparaterityasa.nkara IritaH .. 280..
tattvabodhaH pradhAna.n syAtsAkShAnmokSha pradatvataH .
bodhopakAriNAvetau vairAgyoparamAvubhau .. 281..
trayo.apyatyantapakvAshchenmahatastapasaH phalam .
duritena kvachitki.nchitkadAchitpratibadhyate .. 282..
vairAgyoparatI pUrNe bodhastu pratibadhyate .
yasya tasya na mokSho.asti puNyalokastapobalAt .. 283..
pUrNe bodhe tadanyau dvau pratibaddhau yadA tadA .
mokSho vinishchitaH kintu dR^iShTaduHkha.n na nashyati .. 284..
brahmalokatR^iNIkAro vairAgyasyAvadhirmataH .
dehAtmavatparAtmatvadArDhye bodhaH samApyate .. 285..
suptivadvismR^itiH sImA bhaveduparamasya hi .
dishAnayA vinishcheya.n tAratamyamavAntaram .. 286..
ArabdhakarmanAnAtvAdbuddhAnAmanyathAnyathA .
vartanantena shAstrArthe bhramitavya.n na paNDitaiH .. 287..
svasvakarmAnusAreNa vartatantA.n te yathA tathA .
avishiShTaH sarvabodhaH samA muktiriti sthitiH .. 288..
jagachchitra.n svachaitanye paTe chitramivArpitam .
mAyayA tadapekShaiva chaitanye parishiShyatAm .. 289..
chitradIpamima.n nitya.n ye.anusandadhate budhAH .
pashyanto.api jagachchitra.n te muhyanti na pUrvavat .. 290..

iti chitradIponAma ShaShThaH parichChedaH .. 6..

\section{7\. tR^iptidIponAma \- saptamaH parichChedaH .}
AtmAna.n chedvijAnIyAdayamasmIti pUruShaH .
kimichChankasya kAmAya sharIramanusa.njvaret .. 1..
asyAH shruterabhiprAyaH samyagatra vichAryate .
jIvanmuktasya yA tR^iptiH sA tena vishadAyate .. 2..
mAyAbhAsena jIveshau karotIti shrutatvataH .
kalpitAveva jIveshau tAbhyA.n sarvaM prakalpitam .. 3..
IkShaNAdipraveshAntA sR^iShTirIshena kalpitA .
jAgradAdivimokShAntaH sa.nsAro jIvakalpitaH .. 4..
bhramAdhiShThAnabhUtAtmA kUTasthAsa~NgachidvapuH .
anyonyAdhyAsato.asa~NgadhIsthajIvo.atra pUruShaH .. 5..
sAdhiShThAno vimokShAdau jIvo.adhikriyate na tu .
kevalo niradhiShThAnavibhrAnteH kvApyasiddhitaH .. 6..
adhiShThAnA.nshasa.nyuktaM bhramA.nshamavalambate .
yadA tadAha.n sa.nsArItyeva.n jIvo.atimanyate .. 7..
bhramA.nshasya tiraskArAdadhiShThAnapradhAnatA .
yadA tadA chidAtmAhamasa~Ngo.asmIti buddhyate .. 8..
nAsa~Nge.aha.nkR^itiryuktA kathamasmIti chechChR^iNu .
eko mukhyo dvAvamukhyAvityarthastrividho.ahamaH .. 9..
anyonyAdhyAsarUpeNa kUTasthAbhAsayorvapuH .
ekIbhUya bhavenmukhyastatra mUDhaiH prapUjyate .. 10..
pR^ithagAbhAsakUTasthAvamukhyau tatra tattvavit .
paryAyeNa prayu~Nkte.ahaMshabda.n loke cha vaidike .. 11..
laukikavyavahAre.aha.n gachChAmItyAdike budhaH .
vivichyaiva chidAbhAsa.n kUTasthAtta.n vivakShati .. 12..
asa~Ngo.ahaM chidAtmAhamiti shAstrIyadR^iShTitaH .
ahaMshabdaM prayu~Nkteya.n kUTasthe kevale budhaH .. 13..
j~nAnitAj~nAnite tvAtmAbhAsasyaiva na chAtmanaH .
tathA cha kathamAbhAsaH kUTastho.asmIti buddhyatAm .. 14..
nAya.n doShashchidAbhAsaH kUTasthaikasvabhAvavAn .
AbhAsatvasya mithyAtvAtkUTasthatvAvasheShaNAt .. 15..
kUTastho.asmIti bodho.api mithyA chenneti ko vadet .
na hi satyatayAbhIShTa.n rajjusarpavisarpaNam .. 16..
tAdR^ishenApi bodhena sa.nsAro vinivartate .
yakShAnurUpo hi balirityAhurlaukikA janAH .. 17..
tasmAdAbhAsapuruShaH sakUTastho vivichya tam .
kUTastho.asmIti vij~nAtumarhatItyabhyadhAt shrutiH .. 18..
asa.ndigdha aviparyasta bodho deha AtmanIkShyate .
tad.hvadatreti nirNetumayamityabhidhIyate .. 19..
dehAtmaj~nAnavajj~nAna.n dehAtmaj~nAnabAdhakam .
Atmanyeva bhavedyasya sa nechChannapi muchyate .. 20..
ayamityaparokShatvamuchyate chettaduchyatAm .
svayaMprakAshachaitanyamaparokSha.n sadA yataH .. 21..
parokShamaparokSha.n cha j~nAnamaj~nAnamityadaH .
nityAparokSharUpe.api dvaya.n syAddashame yathA .. 22..
navasa.nkhyAhR^itaj~nAno dashamo vibhramAttadA .
na vetti dashamo.asmIti vIkShyamANo.api tAnnava .. 23..
na bhAti nAsti dashama iti sva.n dahama.n tadA .
matvA vakti tadaj~nAnakR^itamAvaraNa.n viduH .. 24..
nadyAM mamAra dashama iti shochanpraroditi .
aj~nAnakR^itavikShepa.n rodanAdi.n vidurbudhaH .. 25..
na mR^ito dashamo.astIti shrutvAptavachana.n tadA .
parokShatvena dashama.n vetti svargAdilokavat .. 26..
tvameva dashamo.asIti gaNayitvA pradarshitaH .
aparokShatayA j~nAtvA hR^iShyatyeva na roditi .. 27..
aj~nAna avR^itivikShepa dvividhA j~nAna tR^iptayaH .
shokApagama ityete yojanIyAshchidAtmani .. 28..
sa.nsArAsaktachittaH sa.nshchidAbhAsaH kadAchana .
svayaMprakAshakUTastha.n svatattva.n naiva vettyayam .. 29..
na bhAti nAsti kUTastha iti vakti prasa~NgataH .
kartA bhoktAhamasmIti vikShepaM pratipadyate .. 30..
asti kUTastha ityAdau parokSha.n vetti vArttayA .
pashchAtkUTastha evAsmItyeva.n vetti vichArataH .. 31..
kartA bhoktetyevamAdishokajAtaM pramu~nchati .
kR^ita.n kR^ityaM prApaNIyaM prAptamityeva tuShyati .. 32..
aj~nAnamAvR^itistadvadvikShepashcha parokShadhIH .
aparokShamatiH shokamokShastR^iptirnira~NkushA .. 33..
saptAvasthA imAH santi chidAbhAsasya tAsvimau .
bandhamokShau sthitau tatra tisro bandhakR^itaH smR^itAH .. 34..
na jAnAmItyudAsInavyavahArasya kAraNam .
vichAraprAgabhAvena yuktamaj~nAnamIritam .. 35..
amArgeNa vichAryAtha nAsti no bhAti chetyasau .
viparItavyavahR^itirAvR^iteH kAryamiShyate .. 36..
dehadvayachidAbhAsarUpo vikShepa IritaH .
kartR^itvAdyakhilaH shokaH sa.nsArAkhyo.asya bandhakaH .. 37..
aj~nAnamAvR^itishchaite vikShepAtprAkprasiddhyataH .
yadyapyathApyavasthete vikShepasyaiva nAtmanaH .. 38..
vikShepotpattitaH pUrvamapi vikShepasa.nskR^itiH .
astyeva tadavasthAtvamaviruddha.n tatastayoH .. 39..
brahmaNyAropitatvena brahmAvasthe ime iti .
nasha~NkanIya.n sarvAsAM brahmaNyevAdhiropaNAt .. 40..
sa.nsAryaha.n vibuddho.aha.n niHshokastuShTa ityapi .
jIvagA uttarAvasthA bhAnti na brahmagA yadi .. 41..
tarhyaj~no.ahaM brahmasattvabhAne maddR^iShTito na hi .
iti pUrve avasthe cha bhAsete jIvage khalu .. 42..
aj~nAnasyAshrayo brahmetyadhiShThAnatayA jaguH .
jIvAvasthAtvamaj~nAnAbhimAnitvAdavAdiSham .. 43..
j~nAnadvayena naShTe.asminnaj~nAne tatkR^itAvR^itiH .
na bhAti nAsti chetyeShA dvividhApi vinashyati .. 44..
parokShaj~nAnato nashyedasattvAvR^ittihetutA .
aparokShaj~nAnanAshyA hyabhAnAvR^ittihetutA .. 45..
abhAnAvaraNe naShTe jIvatvAropasa.nkShayAt .
kartR^itvAdyakhilaH shokaH sa.nsArAkhyaH nivartate .. 46..
nivR^itte sarvasa.nsAre nityamuktatvabhAsanAt .
nira~NkushA bhavettR^iptiH punaH shokAsamudbhavAt .. 47..
aparokShaj~nAnashokanivR^ittAkhye ubhe ime .
avasthe jIvage brUte AtmAna.n chediti shrutiH .. 48..
ayamityaparokShatvamukta.n taddvividhaM bhavet .
viShayasvaprakAshatvAddhiyApyeva.n tadIkShaNAt .. 49..
parokShaj~nAnakAle.api viShayasvaprakAshatA .
samAbrahma svaprakAshamastItyeva.n vibodhanAt .. 50..
ahaM brahmetyanullikhya brahmAstItyevamullikht .
parokShaj~nAnameta.n na bhrAntaM bAdhAnirUpaNAt .. 51..
brahma nAstIti mAna.n chetsyAdbAdhyeta tadA dhruvam .
na chaivaM prabalaM manaM pashyAmo.ato na bAdhyate .. 52..
vyaktyanullekhamAtreNa bhramatve svargadhIrapi .
bhrAntiH syAdvyaktyanullekhAtsAmAnyollekhadarshanAt .. 53..
aparokShatva yogyasya na parokShamatirbhramaH .
parokShamityanullekhAdarthAtpArokShyasambhavAt .. 54..
a.nshAgR^ihItirbhrAntishched ghaTaj~nAM bhramo bhavet .
nira.nshasyApi sa.nshatva.n vyAvartyA.nshavibhedataH .. 55..
asatvA.nsho nivarteta parokShaj~nAnatastathA .
abhAnA.nshanivR^ittiH syAdaparokShadhiyA kR^itA .. 56..
dashamo.astItyavibhrAntaM parokShaj~nAnamIkShyate .
brahmAstItyapi tadvatsyAdaj~nAnAvaraNa.n samam .. 57..
AtmA brahmeti vAkyArthe niHsheSheNa vichArite .
vyaktirullikhyate yadvaddashamastvamasItyataH .. 58..
dashamaH ka iti prashne tvameveti nirAkR^ite .
gaNayitvA svena saha svameva dashama.n smaret .. 59..
dashamo.asmIti vAkyotthA na dhIrasya vihanyate .
AdimadhyAvasAneShu na navatvasya sa.nshayaH .. 60..
sadevetyAdivAkyena brahmasattvaM parokShataH .
gR^ihItvA tattvamasyAdivAkyAdvyakti.n samullikhet .. 61..
Adi madhyAvasAneShu svasya brahmatvadhIriyam .
naiva vyabhicharettasmAdAparokShaM pratiShThitam .. 62..
janmAdikAraNatvAkhyalakShaNena bhR^iguH purA .
parokSheNa gR^ihItvAtha vichArAt vyaktimaikShata .. 63..
yadyapi tvamasItyatra vAkya.n noche bhR^igoH pitA .
tathApyannaM prANamiti vichAryasthalamuktavAn .. 64..
annaprANAdi koSheShu suvichArya punaH punaH .
AnandavyaktimIkShitvA brahmalakShApyayUyujat .. 65..
satya.n j~nAnamananta.n chetyevaM brahmasvalakShaNam .
uktvA guhAhitatvena kosheShvetat pradarshitam .. 66..
pArokShyeNa vibudhyendro ya AtmeyAdilakShaNAt .
aparokShIkartumichCha.nshchaturvAra.n guru.n yayau .. 67..
AtmA vA iadamityAdau parokShaM brahmalakShitam .
adhyAropApavAdAbhyAM praj~nAnaM brahma darshitam .. 68..
avAntareNa vAkyena parokShabrahmadhIrbhavet .
sarvatraiva mahAvAkyavichArAttvaparokShadhIH .. 69..
brahmApArokShyasiddhyarthaM mahAvAkyamitIritam .
vAkyavR^ittAvato brahmAparokShye vimatirnahi .. 70..
AlambanatayA bhAti yo.asmat.hpratyayashabdayoH .
antaHkaraNasambhinnabodhaH sattvampadAbhidhaH .. 71..
mAyopAdhirjagadyoniH sarvaj~natvAdilakShaNaH .
pArokShyashabalaH satyAdyAtmakastat.hpadAbhidhaH .. 72..
pratyakparokShataikasya sadvitIyatvapUrNatA .
viruddhyete yatastasmAllakShaNA sampravartate .. 73..
tattvamasyAdivAkyeShu lakShaNA bhAgalakShaNA .
so.ayamityAdivAkyasthapadayoriva nAparA .. 74..
sa.nsargo vA vishiShTo vA vAkyArtho nAtra saMmataH .
akhaNDaikarasatvena vAkyArtho viduShAM mataH .. 75..
pratyagbodho ya AbhAti so.advayAnandalakShaNaH .
advayAnandarUpashcha pratyagbodhaikalakShaNaH .. 76..
itthamanyo.anyatAdAtmyapratipattiryadA bhavet .
abrahmatva.n tvamarthasya vyavartyeta tadaiva hi .
tadarthasya cha pArokShya.n yadyeva.n ki.n tataH shR^iNu .
pUrNAnandaikarUpeNa pratyag.hbodho.avashiShyate .. 77..
eva.n sati mahAvAkyAtparokShaj~nAnamIryate .
yaisteShA.n shAstrasiddhAntavij~nAna.n shobhatetarAm .. 78..
AstA.n shAstrasya siddhAnto yuktyA vAkyAtparokShadhIH .
svargAdivAkyavanneva.n dashame vyabhichArataH .. 79..
svato.aparokShajIvasya brahmatvamabhivA.nChataH .
nashyetsiddhaparokShatvamiti yuktirmahatyaho .. 80..
vR^iddhimiShTavato mUlamapi naShTamitIritam .
laukika.n vachana.n sArtha.n sampanna.n tvatprasAdataH .. 81..
antaHkaraNasaMbhinnabodho jIvo.aparokShatAm .
arhatyupAdhisadbhAvAnna tu brahmAnupAdhitaH .. 82..
naivaM brahmatvabodhasya sopAdhiviShayatvataH .
yAvadvidehakaivalyamupAdheranivAraNAt .. 83..
antaHkaraNasAhityarAhityAbhyA.n vishiShyate .
upAdhirjIvabhAvasya brahmatAyAshcha nAnyathA .. 84..
yathA vidhirupAdhiH syAtpratiShedhastathA na kim .
suvarNalauhabhedena shR^i~NkhalAtva.n na bhidyate .. 85..
atad.hvyAvR^ittirUpeNa sAkShAdvidhimukhena cha .
vedAntAnAM pravR^ittiH syAddvidhetyAchAryabhAShitam .. 86..
ahamarthaparityAgAdahaM brahmeti dhIH kutaH .
naivama.nshasya hi tyAgo bhAgalakShaNayoditaH .. 87..
antaHkaraNasantyAgAdavashiShTe chidAtmani .
ahaM brahmeti vAkyena brahmatva.n sAkShiNIkShyate .. 88..
svaprakAsho.api sAkShyeSha dhIvR^ittyA vyApyate.anyavat .
phalavyApyatvamevAsya shAstrakR^idbhirnivAritam .. 89..
buddhitat.hsthachidAbhAsau dvAvapi vyApnuto ghaTam .
tatrAj~nAna.n dhiyA nashyedAbhAsena ghaTaH sphuret .. 90..
brahmaNyaj~nAnanAshAya vR^ittivyAptirapekShitA .
svaya.n sphuraNarUpatvAnnAbhAsa upayujyate .. 91..
chakShurdIpAvapekShyete ghaTAderdarshane tathA .
na dIpadarshane kintu chakShurekamapekShyate .. 92..
sthito.apyasau chidAbhAso brahmaNyekIbhavetparam .
na tu brahmaNi atIshayaM phala.n kuryAdghaTa Adivat .. 93..
aprameyamanAdi.n chetyatra shrutyedamIritam .
manasaivedamAptavyamiti dhIvyApyatA shrutA .. 94..
AtmAna.n chedvijAnIyAdayamasmIti vAkyataH .
brahmAtmavyaktimullikhya yo bodhaH so.abhidhIyate .. 95..
astu bodho.aparokSho.atra mahAvAkyAt tathApyasau .
na dR^iDhaH shravaNAdInAmAchAryaiH punarIraNAt .. 96..
ahaM brahmeti vAkyArthabodho yAvaddR^iDhIbhavet .
shamAdisahitastAvadabhyasechChravaNAdikam .. 97..
bAdha.n santi hyadArDhyasya hetavaH shrutyanekatA .
asambhAvyatvamarthasya viparIta cha bhAvanA .. 98..
shAkhAbhedAtkAmabhedAchChruta.n karmANyathAnyathA .
evamatrApi mAsha~NkItyataH shravaNamAcharet .. 99..
vedAntAnAmasheShANAmAdimadhyAvasAnataH .
brahmAtmanyeva tAtparyamitidhIH shravaNaM bhavet .. 100..
samanvayAdhyAya etatsUkta.n dhIsvAsthyakAribhiH .
tarkaiH sambhAvanArthasya dvitIyAdhyAyaH IritA .. 101..
bahujanmadR^iDhAbhyAsAddehAdiShvAtmadhIH kShaNAt .
punaH punarudetyeva.n jagatsatyatvadhIrapi .. 102..
viparItA bhAvaneyamaikAgryAtsA nivartate .
tattvopadeshAt prAgeva bhavatyetadupAsanAt .. 103..
upAstayo.ata evatra brahmashAstre.api chintitAH .
prAganabhyAsinaH pashchAdbrahmAbhyAsena tadbhavet .. 104..
tachchintana.n tatkathanamanyonya.n tat.hprabodhanam .
etadekaparatva.n cha brahmAbhyAsa.n vidurbudhAH .. 105..
tameva dhIro vij~nAya praj~nA.n kurvIta brAhmaNaH .
nAnudhyAyAdbahu~nChabdAnvAcho viglApana.n hi tat .. 106..
ananyAshchintayanto mA.n ye janAH paryupAsate .
teShA.n nityAbhiyuktAnA.n yogakShema.n vahAmyaham .. 107..
iti shrutismR^itI nityamAtmanyekAgratA.n dhiyaH .
vidhatto viparItAyA bhAvanAyAH kShayAya hi .. 108..
yad yathA vartate tasya tattva.n hitvAnyathAtvadhIH .
viparIta bhAvanA syAtpitrAdAvaridhIryathA .. 109..
AtmA dehAdibhinno.ayaM mithyA cheda.n jagat tayoH .
dehAdyAtmatvasatyatvadhIrviparyayabhAvanA .. 110..
tattvabhAvanayA nashyetsAto dehAtiriktatAm .
Atmano bhAvayettadvanmithyAtva.n jagato.anisham .. 111..
kiM mantrajapavanmUrtidhyAnavachchAtmabhedadhIH .
jaganmithyAtvadhIshchAtra vyAvartyA syAdutAnyathA .. 112..
anyatheti vijAnIhi dR^iShTArthatvena bhuktivat .
bubhukShurjapavadbhu~Nkte na kashchinniyataH kvachit .. 113..
ashnAti vA na vAshnAti bhu~Nkte vA svechChayAnyathA .
yena kena prakAreNa kShudhAmapaninIshati .. 114..
niyamena japa.n kuryAdakR^itau pratyavAyataH .
anyathAkaraNe.anarthaH svaravarNaviparyayAt .. 115..
kShudheva dR^iShTabAdhAkR^idviparItA cha bhAvanA .
jeyA kenApyupAyena nAstyatrAnuShThiteH kramaH .. 116..
upAyaH pUrvamevoktastachchintAkathanAdikaH .
etadekaparatve.api nirbandho dhyAnavanna hi .. 117..
mUrtipratyayasAntatyamanyAnantarita.n dhiyaH .
dhyAna.n tatrAtinirbandho manasashcha~nchalAtmanaH .. 118..
cha~nchala.n hi manaH kR^iShNa pramAthi balavaddR^iDham .
tasyAha.n nigrahaM manye vAyoriva suduShkaram .. 119..
apyabdhipAnAnmahataH sumerUnmUlanAdapi .
api vahnyashanAt sAdho viShamshchittanigrahaH .. 120..
kathanAdau na nirbandhaH shR^i~NkhalAbaddhadehavat .
kintvanantetihAsAdyairvinodo nATyavaddhiyaH .. 121..
chidevAtmA jaganmithyetyatra paryavasAnataH .
nididhyAsanavikShepo netihAsAdibhirbhavet .. 122..
kR^iShivANijyasevAdau kAvyatarkAdikeShu cha .
vikShipyate pravR^ittA dhIstaistattvasmR^ityasambhavAt .. 123..
anusandadhataivAtra bhojanAdau pravartitum .
shakyate.atyantavikShepAbhAvAdAshu punaH smR^iteH .. 124..
tattvavismR^itimAtrAnnAnarthaH kintu viparyayAt .
viparyetu.n na kAlo.asti jhaTiti smarataH kvachit .. 125..
tattva smR^iteravasaro nAstyanyAbhyAsashAlinaH .
pratyutAbhyAsaghatitvAdbalAttattvamapekShyate .. 126..
tamevaika.n vijAnIta hyanyA vAcho vimu~nchatha .
iti shruta.n tathAnyatra vAcho viglApanantviti .. 127..
AhArAdi tyajannaiva jIvechChAstrAntara.n tyajan .
ki.n na jIvasi yenaiva.n karoShyatra durAgraham .. 128..
janakAdeH katha.n rAjyamiti cheddR^iDhabodhataH .
tathA tavApi chettarkaM paTha yadvA kR^iShi.n kuru .. 129..
mithyAtvavAsanAdArDhye prArabdhakShayakA~NkShayA .
aklishyantaH pravartante svasvakarmAnusArataH .. 130..
atiprasa~Ngo mA shakyaH svakarmavashavartinAm .
astu vA kaH atra shakyeta karma vArayitu.n vada .. 131..
j~nAnino.aj~nAninshchAtra same.apyArabdhakarmaNi .
na kleSho j~nAnino dhairyAnmUDhaH klishyatyadhairyataH .. 132..
mArge gantrordvayoH shrAntau samAyAmapyadUratAm .
jAnandhairyAddruta.n gachChedanyastiShThati dInadhIH .. 133..
sAkShAt.hkR^itAtmadhIH samyagaviparyayabAdhitaH .
kimichChankasya kAmAya sharIramanusa.njvaret .. 134..
jaganmithyAtvadhIbhAvAdAkShiptau kAmyakAmukau .
tayorabhAve santApaH shAmyenniHsnehadIpavat .. 135..
gandharvapattane ki.nchinnendrajAlikanirmitam .
jAnan kAmayate kintu jihAsati hasannidam .. 136..
ApAtaramaNIyeShu bhogeShveva.n vichAravAn .
nAnurajjati kintvetAn doShadR^iShTyA jihAsati .. 137..
arthAnAmarjane kleshastathaiva parirakShaNe .
nAshe duHkha.n vyaye duHkha.n dhigarthAnkleshakAriNaH .. 138..
mA.nsapA~nchAtikAyAstu yantralole.a~Ngapa~njare .
snAyvasthigranthishAlinyAH striyAH kimiva shobhanam .. 139..
evamAdiShu shAstreShu doShAH samyakprapa~nchitAH .
vimR^ishannanishantAni katha.n duHkheShu majjati .. 140..
kShudhayA pIDyamAno.api na viSha.n hyattumichChati .
miShTAnnadhvastatR^iDjAnannAmUDhastajjighatsati .. 141..
prArabdhakarmaprAbalyAdbhogeShvichChA bhavedyadi .
klishyaneva tadApyeSha bhu~Nkte viShTigR^ihItavat .. 142..
bhu~njAnAstAnapi budhAH shraddhAvantaH kuTumbinaH .
nAdyApi karma nashChinnamiti klishyanti santatam .. 143..
nAya.n klesho.atra sa.nsAratApaH kintu viraktatA .
bhrAntij~nAnanidAno hi tApaH sA.nsArikaH smR^itaH .. 144..
vivekena pariklishyannalpabhogena tR^ipyati .
anyathAnantabhoge.api naiva tR^ipyati karhichit .. 145..
na jAtu kAmaH kAmAnAmupabhogena shAmyati .
haviShA kR^iShNavartmeva bhUya eva abhivardhate .. 146..
parij~nAyopabhukto hi bhogo bhavati tuShTaye .
vij~nAya sevitashchaurI maitrImeti na chauratAm .. 147..
manaso nigR^ihItasya lIlAbhogo.alpako.api yaH .
tamevAlabdhavistAra.n kliShTatvAdbahu manyate .. 148..
baddhamukto mahIpAlo grAmamAtreNa tuShyati .
parairna baddho nAkrAnto na rAShTraM bahu manyate .. 149..
viveke jAgrati sati doShadarshanalakShaNe .
kathamArabdhakarmApi bhogechChA.n janayiShyati .. 150..
naiSha doSho yato.anekavidhaM prArabdhamIkShyate .
ichChAnichChA parechChA cha prArabdha.n trividha.n smR^itam .. 151..
apathyasevinshchaurA rAjadAraratA api .
jAnanta eva svAnarthamichChantyArabdhakarmataH .. 152..
na chAtraitadvArayitumIshvareNApi shakyate .
yata Ishvara evAha gItAyAmarjunaM prati .. 153..
sadR^isha.n cheShTate svasyAH prakR^iterj~nAnavAnapi .
prakR^iti.n yAnti bhUtAni nigrahaH ki.n kariShyati .. 154..
avashyaM bhAvibhAvAnAM pratIkAro bhavedyadi .
tadA duHkhairna lipyeran nalarAmayudhiShThirAH .. 155..
na cheshvaratvamIshasya hIyate tAvatA yataH .
avashyaM bhAvitApyeShaIshvareNa eva nirmitA .. 156..
prashnottarAbhyAmevaitadgamyate.arjunakR^iShNayoH .
anichChApUrvaka.n chAsti prArabdhamiti tachChR^iNu .. 157..
atha kena prayukto.ayaM pApa.n charati pUruShaH .
anichChannapi vArShNeya balAdiva niyojitaH .. 158..
kAma eSha krodha eSha rajoguNasamudbhavaH .
mahAshano mahApApmA viddhyenamiha vairiNam .. 159..
svabhAvajena kaunteya nibaddhaH svena karmaNA .
kartu.n nechChasi yanmohAtkariShyasyavasho.api tat .. 160..
nAnichChanto na chechChantaH paradAkShiNyasa.nyutAH .
sukhaduHkhe bhajantyetatparechChA pUrvakarma hi .. 161..
katha.n tarhi kimichChannityevamichChA niShidhyate .
nechChAniShedhaH kintvichChAbAdho bharjitabIjavat .. 162..
bharjitAni tu bIjAni santyakAryakarANi cha .
vidvadichChA yatheShTavyA sattvabodhAnna kAryakR^it .. 163..
dagdhabIjamarohe.api bhakShaNAyopayujyate .
vidvadichChApyalpabhoga.n kuryAnna vyasanaM bahu .. 164..
bhogena charitArthatvAtprArabdha.n karma hIyate .
bhoktavyasatyatAbhrAntyAvyasana.n tatra jAyate .. 165..
mA vinashyatvayaM bhogo vardhatAmuttarottaram .
mA vighnAH pratibadhnantu dhanyo.asmyasmAditi bhramaH .. 166..
yadabhAvi na tadbhAvi bhAvi chenna tadanyathA .
iti chintAviShagno.ayaM bodho bhramanivartakaH .. 167..
same.api bhoge vyasanaM bhrAnto gachChenna buddhimAn .
ashakyArthasya sa~NkalpAdbhrAntasya vyasanaM bahu .. 168..
mAyAmayatvaM bhogyasya buddhvAsthAmupasa.nharan .
bhu~njAno.api na sa~Nkalpa.n kurute vyasana.n kutaH .. 169..
svapnendrajAlasadR^ishamachintyarachanAtmakam .
dR^iShTanaShTa.n jagatpashyankatha.n tatrAnurajjati .. 170..
svasvapnamAparokSheNa dR^iShTvA pashyansvajAgaram .
chintayedapramattaH sannubhAvanudinaM muhuH .. 171..
chira.n tayoH sarvasAmyamanusandhAya jAgare .
satyatvabuddhi.n sa.ntyajya nAnurajjati pUrvavat .. 172..
indrajAlamida.n dvaitamachintyarachanAtvataH .
ityavismarato hAniH kA vA prArabdhabhogataH .. 173..
nirbandhastattvavidyAyA indrajAlatvasa.nsmR^itau .
prArabdhasyAgraho bhoge jIvasya sukhaduHkhayoH .. 174..
vidyArabdhe viruddhyete na bhinnaviShayatvataH .
jAnadbhirapyaindrajAlo vinodo dR^ishyate khalu .. 175..
jagatsatyatvamApAdya prArabdhaM bhojayedyadi .
tadA virodhi vidyAyA bhogamAtrAnna satyatA .. 176..
annyUno jAyate bhogaH kalpitaiH svapnavastubhiH .
jAgrat.hvastubhirapyevamasatyairbhoga iShyatAm .. 177..
yadi vidyApahnuvita jagatprArabdha ghAtinI .
tadA syAnna tu mAyAtvabodhena tadapahnavaH .. 178..
anapahnutya lokAstadindrajAlamida.n tviti .
jAnantyevAnapahnutya bhogaM mAyAtvadhIstathA .. 179..
yatra tvasya jagat svAtmA pashyetkastatra kena kim .
ki.n jighretki.n vadedveti shrutau tu bahu ghoShitam .. 180..
tena dvaitamapahnutya vidyodeti na chAnyathA .
tathA cha viduSho bhogaH katha.n syAditi chet shR^iNu .. 181..
suShuptiviShayA muktiviShayA vA shrutistviti .
ukta.n svApyayasampatyoriti sUtre hyatisphuTam .. 182..
anyayA yAj~navalkyAderAchAryatva.n na sambhavet .
dvaitadR^iShTAvavidvattA dvaitAdR^iShTau na vAgvadet .. 183..
nirvikalpasamAdhau tu dvaitAdarshanahetutaH .
saivAparokShavidyeti chetsuShuptistathA na kim .. 184..
Atmatattva.n na jAnAti suptau yadi tadA tvayA .
AtmadhIreva vidyeti vAchya.n na dvaitavismR^itiH .. 185..
ubhayaM milita.n vidyA yadi tarhi ghaTAdayaH .
ardhavidyAbhAjinaH syuH sakaladvaitavismR^iteH .. 186..
mashakadhvanimukhyAnA.n vikShepANA.n bahutvataH .
tattvavidyA tathA na syAdghaTAdInA.n yathA dR^iDhA .. 187..
AtmadhIreva vidyeti yadi tarhi sukhI bhava .
duShTachitta.n nirundhyAchchennirundhi tva.n yathAsukham .. 188..
tadiShTameShTavyamAyAmayatvasya samIkShaNAt .
ichChannapyaj~navannechChetkimichChanniti hi shrutam .. 189..
rAgo li~Ngamabodhasya santu rAgAdayo budhe .
iti shAstradvaya.n sArthameva.n satyavirodhataH .. 190..
jaganmithyAtvavat svAtmAsa~Ngatvasya samIkShaNAt .
kasya kAmAyeti vacho bhoktrabhAvavivakShayA .. 191..
patijAyAdika.n sarva.n tattadbhogAya nechChati .
kintvAtmabhogArthamiti shrutAvudghoShitaM bahu .. 192..
ki.n kUTasthashchidAbhAso.atha vA kimubhayAtmakaH .
bhoktA tatra na kUTastho.asa~NgatvAdbhoktR^itA.n vrajet .. 193..
sukhaduHkhAbhimAnAkhyo vikAro bhoga uchyate .
kUTasthasya vikArI chetyetanna vyAhata.n katham .. 194..
vikAribuddhyadhInatvAdAbhAse vikR^itAvapi .
niradhiShThAnavibhrAntiH kevalA na hi tiShThati .. 195..
ubhayAtmaka evAto loke bhoktA nigadyate .
tadR^igAtmAnamArabhya kUTasthaH sheShitaH shrutau .. 196..
AtmA katama ityukte yAj~navalkyo vibodhayan .
vij~nAnamayamArabhyAsa~Nga.n taM paryasheShayat .. 197..
ko.ayamAtmetyevamAdau sarvatrAtmavichArataH .
ubhayAtmakamArabhya kUTasthaH sheShyate shrutau .. 198..
kUTasthasatyatA.n svasminnadhyasyAtmA vivekataH .
tAtvikIM bhoktR^itAM matvA na kadAchijjihAsati .. 199..
bhoktA svasyaiva bhogAya patijAyAdimichChati .
eSha laukikavR^ittAntaH shrutyA samyaganUditaH .. 200..
bhogyAnAM bhoktR^isheShatvAnmA bhogyeShvanurajyatAm .
bhoktaryeva pradhAne.ato.anurAga.n ta.n vidhitsati .. 201..
yA prItiravivekAnA.n viShayeShvanapAyinI .
tvAmanusmarataH sA me hR^idayAnmApasarpatu .. 202..
iti nyAyena sarvasmAdbhogyajAtAdviraktadhIH .
upasa.nhR^itya tAM prItiM bhoktaryevaM bubhutsate .. 203..
srak.hchandanavadhUvastrasuvarNAdiShu pAmaraH .
apramatto yathA tadvanna pramAdyati bhoktari .. 204..
kAvyanATakatarkAdimabhyasyati nirantaram .
vijigIShuryathA tadvanmumukShuH sva.n vichArayet .. 205..
japayAgopAsanAdi kurute shraddhayA yathA .
svargAdivA~nChayA tadvachChraddadhyAtsve mumukShayA .. 206..
chittaikAgrya.n yathA yogI mahAyAsena sAdhayet .
aNimAdiprepsayaiva.n vivichyAtsvaM mumukShayA .. 207..
kaushalAni vivardhante teShAmabhyAsapATavAt .
yathA tadvadviveko.asyApyabhyAsAdvishadAyate .. 208..
vivi~nchatA bhoktR^itattva.n jAgradAdiShvasa~NgatA .
anvayavyatirekAbhyA.n sAkShiNyadhyavasIyate .. 29..
yatra yaddR^ishyate draShTA jAgratsvapnasuShuptiShu .
tatraiva tannetaratretyanubhUtirhi saMmatA .. 210..
sa yattatrekShate ki.nchittenAnanvAgato bhavet .
dR^iShTvaiva puNyaM pApa.n chetyeva.n shrutiShu DiNDimaH .. 211..
jAgratsvapnasuShuptyAdi prapa~ncha.n yatprakAshate .
tadbrahmAhamiti j~nAtvA sarvabandhaiH pramuchyate .. 212..
eka eva AtmA mantavyo jAgratsvapnasuShuptiShu .
sthAnatrayavyatItasya punarjanma na vidyate .. 213..
triShu dhAmasu yadbhogyaM bhoktA bhogashcha yadbhavet .
tebhyo vilakShaNaH sAkShI chinmAtro.aha.n sadAshivaH .. 214..
eva.n vivechite tattve vij~nAmayashabditaH .
chidAbhAso vikArI yo bhoktR^itva.n tasya shiShyate .. 215..
mAyiko.aya.n chidAbhAsaH shruteranubhavAdapi .
indrajAla.n jagatprokta.n tadantaHpAtyaya.n yataH .. 216..
vilopo.asya suShuptyAdau sAkShiNA hyanubhUyate .
etAdR^isha.n svasvabhAva.n vivinakti punaH punaH .. 217..
vivichya nAsha.n nishchitya punarbhoga.n na vA~nChati .
mumUrShuH shAyito bhUmau vivAha.n ko.abhivA~nChati .. 218..
jihreti vyavahartu.n cha bhoktAhamiti pUrvavat .
ChinnanAsha iva hritaH klishyannArabdhamashnute .. 219..
yadA svasyApi bhoktR^itvaM mantu.n jihretyaya.n tadA .
sAkShiNyAropayedetaditi kaiva kathA vR^ithA .. 220..
ityabhipretya bhoktAramAkShipatyavisha~NkayA .
kasya kAmAyeti tataH sharIrAnujvaro na hi .. 221..
sthUla.n sUkShma.n kAraNa.n cha sharIra.n trividha.n smR^itam .
avashya.n trividho.astyeva tatra tatrochito jvaraH .. 222..
vAtapittashleShmajanyA vyAdhayaH koTishastanau .
durgandhitva.n kurUpatva.n dAhabha~NgAdayastathA .. 223..
kAmakrodhAdayaH shAntidAntyAdyA li~NgadehagAH .
jvarAdvaye.api bAdhante prAptyAprAptyA nara.n kramAt .. 224..
svaM para.n cha na vettyAtmA vinaShTa iva kAraNe .
AgAmiduHkhabIja.n chetyetadindreNa darshitam .. 225..
ete jvarAH sharIreShu triShu svAbhAvikA matAH .
viyoge tu jvaraistAni sharIrANyeva nAsate .. 226..
tantorviyujyenna paTo vAlebhyaH kambalo yathA .
mR^ido ghaTastathA deho jvarebhyo.apIti dR^ishyatAm .. 227..
chidAbhAse svataH ko.api jvaro nAsti yatashchitaH .
prakAshaikasvabhAvatvameva dR^iShTa.n na chetarat .. 228..
chidAbhAse.apyasambhAvyA jvarAH sAkShiNi kA kathA .
evamevaikatAM mene chidAbhAso hyavidyayA .. 229..
sAkShisatyatvamadhyasya svenopete vapustraye .
tatsarva.n vAstava.n svasya svarUpamiti manyate .. 230..
etasminbhrAntikAle.aya.n sharIreShu jvaratsvatha .
svayameva jvarAmIti manyate hi kuTumbivat .. 231..
putradAreShu tR^ipyatsu tR^ipyAmIti yathA vR^ithA .
manyate puruShastadvadAbhAso.apyabhimanyate .. 232..
vivichya bhrAntimujjhitvA svamapyagaNayan sadA .
chintayansAkShiNa.n kasmAchCharIramanusa.njvaret .. 233..
ayathAvastusarpAdij~nAna.n hetuH palAyane .
rajjuj~nAne.ahidhIdhvastau kR^itamapyanushochati .. 234..
mithyAbhiyogadoShasya prAyashchittatvasiddhaye .
kShamApayannivAtmAna.n sAkShiNa.n sharaNa.n gataH .. 235..
AvR^ittapApanUtyartha.n snAnAdyAvartate yathA .
Avartayanniva dhyAna.n sadA sAkShiparAyaNaH .. 236..
upasthakuShThinI veshyA vilAseShu vilajjate .
jAnato.agre tathAbhAsaH svaprakhyAtau vilajjate .. 237..
gR^ihIto brAhmaNo mlechChaiH prAyashchitta.n charanpunaH .
mlechChaiH sa~NkIryate naiva tathAbhAsaH sharIrakaiH .. 238..
yauvarAjye sthito rAjaputraH sAmrAjyavA~nChayA .
rAjAnukArI bhavati tathA sAkShyanukAryayam .. 239..
yo brahma veda brahmaiva bhavatyeveti shrutim .
shrutvA tadekachittaH sanbrahma vetti na chetarat .. 240..
devatvakAmA hyagnyAdau pravishanti yathA tathA .
sAkShitvenAvasheShAya svavinAsha.n sa vA~nChati .. 241..
yAvatsvadehadAha.n sa naratva.n naiva mu~nchati .
tAvadArabdhadehaH syAnnAbhAsatvavimochanam .. 242..
rajjuj~nAne.api kampAdiH shanairevopashAmyati .
punarmandAndhakAri sA rajjuH kShiptoragI bhavet .. 243..
evamArabdhabhogo.api shanaiH shAmyati no haThAt .
bhogakAle kadAchittu martyo.ahamiti bhAsate .. 244..
naitAvatAparAdhena tattvaj~nAna.n vinashyati .
jIvanmuktivrata.n neda.n kintu vastusthitiH khalu .. 245..
dashamo.api shirastADa.n rudanbuddhvA na roditi .
shirovraNastu mAsena shanaiH shAmyati no tadA .. 246..
dashamAmR^itilAbhena jAto harSho vraNavyathAm .
tirodhatte muktilAbhastathA prArabdhaduHkhitAm .. 247..
vratAbhAvAdyadAdhyAsastadA bhUyo vivichyatAm .
rasasevI dine bhu~Nkte bhUyo bhUyo yathA tathA .. 248..
shamayatyauShadhenAya.n dashamaH svavraNa.n yathA .
bhogena shamayitvaitatprArabdhaM muchyate tathA .. 249..
kimichChanniti vAkyoktaH shokamokSha udIritaH .
AbhAsasya hyavasthaiShA ShaShThI tR^iptistu saptAmi .. 250..
sA~NkushA viShayaistR^iptiriya.n tR^iptirnira~NkushA .
kR^ita.n kR^ityaM prApaNIyaM prAptamityeva tR^ipyati .. 251..
aihikAmuShmikavrAtasiddhyai mukteshcha siddhaye .
bahu kR^ityaM purAsyAbhUttatsarvamadhunA kR^itam .. 252..
tadetatkR^itakR^ityatvaM pratiyogipuraHsaram .
anusandadhadevAyameva.n tR^ipyati nityashaH .. 253..
duHkhino.aj~nAH sa.nsarantu kAmaM putrAdyapekShayA .
paramAnandapUrNo.aha.n sa.nsarAmi kimichChayA .. 254..
anutiShThantu karmANi paralokAyiyAsavaH .
sarvalokAtmakaH kasmAdanutiShThAmi ki.n katham .. 255..
vyAchakShatAnte shAstrANi vedAnadhyApayantu vA .
ye.atrAdhikAriNo me tu nAdhikAro.akriyatvataH .. 256..
nidrAbhikShe snAnashauche nechChAmi na karomi cha .
draShTArashchetkalpayanti kiM me syAdanyakalpanAt .. 257..
gu~njApu~njAdi dahyeta nAnyAropitavahninA .
nAnyAropitasa.nsAradharmAnevamahaM bhaje .. 258..
shR^iNvantvaj~nAtatattvAste jAna.n kasmAchChR^iNomyaham .
manyantA.n sa.nshayApannA na manye.ahamasa.nshayaH .. 259..
viparyasto nididhyAsetki.n dhyAnamaviparyaye .
dehAtmatvaviparyAsa.n na kadAchidbhajAmyaham .. 260..
ahaM manuShya ityAdivyavahAro vinApyamum .
viparyAsa.n chirAbhyastavAsanAto.avakalpate .. 261..
prArabdhakarmaNi kShINe vyavahAro nivartate .
karmAkShaye tvasau naiva shAmyeddhyAnasahasrataH .. 262..
viralatva.n vyavahR^iteriShTa.n cheddhyAnamastu te .
abAdhikA.n vyavahR^itiM pashya dhyAyAmyaha.n kutaH .. 263..
vikShepo nAsti yasmAnme na samAdhistato mama .
vikShepo vA samAdhirvA manasaH syAdvikAriNaH .. 264..
nityAnubhavarUpasya ko me.atrAnubhavaH pR^ithak .
kR^ita.n kR^ityaM prApaNIyaM prAptamityeva nishchayaH .. 265..
vyavahAro laukiko vA shAstrIyo.apyanyathApi vA .
mamAkarturalepasya yathArabdhaM pravartatAm .. 266..
athavA kR^itakR^ityo.api lokAnugrahakAmyayA .
shAstrIyeNaiva mArgeNa varte.aha.n kA mama kShatiH .. 267..
devArchanasnAnashauchabhikShAdau vartatA.n vapuH .
tAra.n japatu vAktadvatpaThatvAmnAyamastakam .. 268..
viShNu.n dhyAyatu dhIryadvA brahmAnande vilIyatAm .
sAkShyaha.n ki.nchidapyatra na kurve nApi kAraye .. 269..
eva.n cha kalahaH kutra sambhavetkarmiNa mama .
vibhinnaviShayatvena pUrvAparasamudravat .. 270..
vapurvAgdhIShu nirbandhaH karmiNo na tu sAkShiNi .
j~nAninaH sAkShyalepatve nirbandho netaratra hi .. 271..
eva.n chAnyonyavR^ittAntAnabhij~nau badhirAviva .
vivadetAM buddhimanto hasantyeva vilokya tau .. 272..
ya.n karmI na vijAnAti sAkShiNa.n tasya tattvavit .
brahmatvaM budhyatA.n tatra karmiNaH ki.n vihIyate .. 273..
dehavAgbuddhayastyaktA j~nAninAnR^itabuddhitaH .
karmI pravartayavAbhirj~nAnino hIyate.atra kim .. 274..
pravR^ittirnopayuktA chennivR^ittiH kvopayujyate .
bodhe heturnivR^ittishchedbubhutsAyA.n tathetarA .. 275..
buddhashchenna bubhutseta nApyasau budhyate punaH .
abAdhAdanuvarteta bodho na tvanyasAdhanAt .. 276..
nAvidyA nApi tatkAryaM bodhaM bAdhitumarhati .
puraiva tattvabodhena bAdhite te ubhe yataH .. 277..
bAdhita.n dR^ishyatAmakShaistena bAdho na sha~Nkyate .
jIvannAkhurna mArjAra.n hanti hanyAtkathaM mR^itaH .. 278..
api pAshupatAstreNa vidvashchenna mamAra yaH .
niShphaleShuvitunnA~Ngo na~NkShyatItyatra kA pramA .. 279..
AdAvavidyayA chitraiH svakAryairjR^imbhamANayA .
yuddhvA bodho.ajayatsodya sudR^iDho bAdhyatA.n katham .. 280..
tiShThantuvaj~nAnatatkAryashavAbodhena mAritAH .
na hAnIrbIdha samrAjaH kIrtiH pratyuta tasya taiH .. 281..
ya evamatishUreNa bodhena na viyujyate .
nivR^ittyA vA pravR^ittyA vA dehAdigatayAsya kim .. 282..
pravR^ittAvAgraho nyAyyo bodhahInasya sarvathA .
svargAya vApavargAya yojitavya.n yato nR^ibhiH .. 283..
vidvA.nshchettAdR^ishAM madhye tiShThettadanurodhataH .
kAyena manasA vAchA karotyevAkhilAH kriyAH .. 284..
eSha madhye bubhutsAnA.n yadA tiShThettadA punaH .
bodhAyaiShA.n kriyAH sarvA dUShaya.nstyajatu svayam .. 285..
avidvadanusAreNa vR^ittirbuddhasya yujyate .
stanandhayAnusAreNa vartate tatpitA yataH .. 286..
adhikShiptastADito vA bAlena svapitA tadA .
na klishyati na kupyechcha bAlaM pratyuta lAlayet .. 287..
ninditaH stUyamAno vA vidvAnaj~nairna nindati .
na stauti kintu teShA.n syAdyathA bodhastathA charet .. 288..
yenAya.n naTanenAtra budhyate kAryameva tat .
aj~naprabodhAnnaivAnyatkAryamastyatra tadvidaH .. 289..
kR^itakR^ityatayA tR^iptaH prAptaprApyatayA punaH .
tR^ipyaneva.n svamanasA manyate.asau nirantaram .. 290..
dhanyo.aha.n dhanyo.aha.n nitya.n svAtmAnama~njasA vedmi .
dhanyo.aha.n dhanyo.ahaM brahmAnando vibhAti me spaShTam .. 291..
dhanyo.aha.n dhanyo.aha.n duHkha.n sA.nsArika.n na vIkShe.adya .
dhanyo.aha.n dhanyo.aha.n svasyAj~nAnaM palAyita.n kvApi .. 292..
dhanyo.aha.n dhanyo.aha.n kartavya.n me na vidyate ki~nchit .
dhanyo.aha.n dhanyo.ahaM prAptavya.n sarvamadya sampannam .. 293..
dhanyo.aha.n dhanyo.aha.n tR^iptirme kopamA bhavelloke .
dhanyo.aha.n dhanyo.aha.n dhanyo dhanyo dhanyaH punaH punaH .. 294..
aho puNyamaho puNyaM phalitaM phalita.n dR^iDham .
asya puNyasya sampatteraho vayamaho vayam .. 295..
aho shAstramaho shAstramaho gururaho guruH .
aho j~nAnamaho j~nAnamaho sukhamaho sukham .. 296..
tR^iptidIpamima.n nitya.n ye.anusandadhate budhAH .
brahmAnande  nimajjantaste tR^ipyanti nirantaram .. 297..

iti tR^iptidIponAma saptamaH parichChedaH .. 7..

\section{8\. kUTasthadIponAma \- aShTamaH parichChedaH .}
khAdityadIpite kuDye darpaNAdityadIptivat .
kUTasthabhAsito deho dhIsthajIvena bhAsyate .. 1..
anekadarpaNAdityadIptInAM bahusandhiShu .
itarA vyajyate tAsAmabhAve.api prakAshate .. 2..
chidAbhAsavishiShTAnA.n tathAnekadhiyAmasau .
sandhi.n dhiyAmabhAva.n cha bhAsayanpravivichyatAm .. 3..
ghaTaikAkAradhIsthA chidghaTamevAvabhAsayet .
ghaTasya j~nAtatA brahmachaitanyenAvabhAsyate .. 4..
aj~nAtatvena j~nAto.aya.n ghaTo buddhyudayAtpurA .
brahmaNaivopariShTAttu j~nAtatvenetyasau bhidA .. 5..
chidAbhAsAntadhIvR^ittirj~nAna.n lohAntakuntavat .
jADyamaj~nAnametAbhyA.n vyAptaH kumbho dvidhochyate .. 6..
aj~nAto brahmaNA bhAsyo j~nAtaH kumbhastathA na kim .
j~nAtatvajananenaiva chidAbhAsaparikShayaH .. 7..
AbhAsahInayA buddhyA j~nAtatva.n naiva janyate .
tAdR^ig.hbuddhervisheShaH ko mR^idAdeH syAdvikAriNaH .. 8..
j~nAta ityuchyate kumbho mR^idA lipto na kutrachit .
dhImAtravyAptakumbhasya j~nAtatva.n neShyate tathA .. 9..
j~nAtatva.n nAma kumbhe.atashchidAbhAsaphalodayaH .
na phalaM brahmachaitanyaM manAtprAgapi satvataH .. 10..
parAgarthaprameyeShu yA phalatvena saMmatA
sa.nvitsaiveha meyo.artho vedAntokti pramANataH .
iti vArtikakAreNa chitsadR^ishya.n vivakShitam
brahmachitphalayorbhedaH sAhasryA.n vishruto yataH .. 11..
AbhAsa uditastasmAjj~nAtatva.n janayedghaTe .
tatpunaHrbrahmaNA bhAsyamaj~nAtatvavadeva hi .. 12..
dhIvR^ittyAbhAsakumbhAnA.n samUho bhAsyate chitA .
kumbhamAtraphalatvAtsa eka AbhAsataH sphuret .. 13..
chaitanya.n dviguNa.n kumbhe j~nAtatvena sphurettataH .
anye.anuvyavasAyAkhyamAhuretadyathoditam .. 14..
ghaTo.ayamityasAvuktirAbhAsasya prasAdataH .
vij~nAto ghaTa ityuktirbrahmAnugrahato bhavet .. 15..
AbhAsabrahmaNI dehAdbahiryadvadvivechite .
tadvadAbhAsakUTasthau vivichyetA.n vapuShyapi .. 16..
aha.nvR^ittau chidAbhAsaH kAmakrodhAdikAsu cha .
sa.nvyApya vartate tapte lohe vahniryathA tathA .. 17..
svamAtraM bhAsayettapta.n loha.n nAnyatkadAchana .
evamAbhAsasahitA vR^ittayaH svasvabhAsikAH .. 18..
kramAdvichChidya vichChidya jAyante vR^ittayo.akhilAH .
sarvA api vilIyante suptimUrchChAsamAdhiShu .. 19..
sandhayo.akhilavR^ittInAmabhAvAshchAvabhAsitAH .
nirvikAreNa yenAsau kUTastha iti gIyate .. 20..
ghaTe dviguNachaitanya.n yathA bAhye tathAntare .
vR^ittiShvapi tatastatra vaishadya.n sandhito.adhikam .. 21..
j~nAtatAj~nAtate na sto ghaTavadvR^ittiShu kvachit .
svasya svenAgR^ihItatvAttAbhishchAj~nAnanAshanAt .. 22..
dviguNIkR^itachaitanye janmanAshAnubhUtitaH .
akUTastha.n tadanyattu kUTasthamavikAritaH .. 23..
antaHkaraNatadvR^ittisAkShItyAdAvanekadhA .
kUTasthaH eva sarvatra pUrvAchAryairvinishchitaH .. 24..
AtmAbhAsAshrayashchaivaM mukhAbhAsAshrayA yathA .
gamyante shAstrayuktibhyAmityAbhAsashcha varNitaH .. 25..
buddhyavachChinnakUTastho lokAntaragamAgamau .
kartu.n shakto ghaTAkAsha ivAbhAsena ki.n vada .. 26..
shR^iNvasa~NgaH parichChedamAtrAjjIvo bhavenna hi .
anyathA ghaTakuDyAdyairavachChinnasya jIvatA .. 27..
na kuDyasAdR^ishI buddhiH svachChatvAditi chettathA .
astu nAma parichChede ki.n svAchChyena bhavettava .. 28..
prasthena dArujanyena kA.nsyajanyena vA na hi .
vikretustaNDulAdinAM parimANa.n vishiShyate .. 29..
parimANavisheShe.api pratibimbo vishiShyate .
kA.nsye yadi tadA buddhAvapyAbhAso bhavedbalAt .. 30..
IShadbhAsanamAbhAsaH pratibimbastathAvidhaH .
bimbalakShaNahInaH sanbimbavadbhAsate sa hi .. 31..
sasa~NgatvavikArAbhyAM bimbalakShaNahInatA .
sphUrtirUpatvametasya bimbavadbhAsana.n viduH .. 32..
na hi dhIbhAvabhAvitvAdAbhAso.asti dhiyaH pR^ithak .
iti chedalpamevokta.n dhIrapyeva.n svadehataH .. 33..
dehe mR^ite.api buddhishchechChAstrAdasti tathA sati .
buddheranyashchidAbhAsaH praveshashrutiShu shrutaH .. 34..
dhIyuktasya praveshashchennaitareye dhiyaH pR^ithak .
AtmA pravesha.n sa~Nkalpya praviShTa iti gIyate .. 35..
katha.n nvida.n sAkShadehaM madR^ite syAditIraNAt .
vidArya mUrdhnaH sImAnaM praviShTaH sa.nsaratyayam .. 36..
kathaM praviShTo.asa~NgashchetsR^iShTirvAsya katha.n vada .
mAyikatva.n tayostulya.n vinAshashcha samastayoH .. 37..
samuptyAyaiva bhUtebhyastAnyevAnuvinashyati .
vispaShTamiti maitreyya yAj~navalkya uvAcha hi .. 38..
avinAshyayamAtmeti kUTasthaH pravivechitaH .
mAtrAsa.nsarga ityevamasa~Ngatvasya kIrtanAt .. 39..
jIvApeta.n vAva kila sharIraM mriyate na saH .
ityatra na vimokSho.arthaH kintu lokAntare gatiH .. 40..
nAhaM brahmeti budhyeta sa vinAshIti chenna tat .
sAmAnAdhikaraNyasya bAdhAyAmapi sambhavAt .. 41..
yo.aya.n sthANuH pumAneSha pu.ndhiyA sthANudhIriva .
brahmAsmIti dhiyA sheShA hyahaM buddhirnivartate .. 42..
naiShkarmyasiddhAvapyevamAchAryaiH spaShTamIritam .
sAmAnAdhikaraNyasya bAdhArthatva.n tato.astu tat .. 43..
sarvaM brahmeti jagatA sAmAnAdhikaraNyavat .
ahaM brahmeti jIvena sAmAnAdhikR^itirbhavet .. 44..
sAmAnAdhikaraNyasya bAdhArthatva.n nirAkR^itam .
prayatnato vivaraNe kUTasthatvavivakShayA .. 45..
shodhitastvaM padArtho yaH kUTastho brahmarUpatAm .
tasya vaktu.n vivaraNe tathoktamitaratra cha .. 46..
dehendriyAdiyuktasya jIvAbhAsabhramasya yA .
adhiShThAnachitiH saiShA kUTasthAtra vivakShitA .. 47..
jagad.hbhramasya sarvasya yadadhiShThAnamIritam .
trayyanteShu tadatra syAdbrahmashabdavivakShitam .. 48..
etasminneva chaitanye jagadAropyate yadA .
tadA tadekadeshasya jIvAbhAsasya kA kathA .. 49..
jagattadekadeshAkhyasamAropyasya bhedataH .
tattvaMpadArthau bhinnau sto vastutastvekatA chitaH .. 50..
kartR^itvAdInbuddhidharmAnsphUrtyAkhyA.n chAtmarUpatAm .
dadhadvibhAti purata AbhAso.ato bhramo bhavet .. 51..
kA buddhiH ko.ayamAbhAsaH ko vAtrAtmA jagatkatham .
ityanirNayato mohaH so.aya.n sa.nsAra iShyate .. 52..
buddhyAdInA.n svarUpa.n yo vivinakti sa tattvavit .
sa eva mukta ityeva.n vedAnteShu vinishchayaH .. 53..
eva.n cha sati bandhaH syAtkasyetyAdikutarkajAH .
viDambanAdR^iDha.n khaNDyAH khaNDanoktiprakArataH .. 54..
vR^itteH sAkShitayA vR^itteH prAgabhAvasya cha sthitaH .
bubhutsAyA.n tathAj~no.asmItyAbhAsAj~nAnavastunaH .. 55..
asatyAlambanatvena satyaH sarvajaDasya tu .
sAdhakatvena chidrUpaH sadA premAspadatvataH .. 56..
AnandarUpaH sarvArthasAdhakatvena hetunA .
sarva sambandhavattvena sampUrNaH shivasa.nj~nitaH .. 57..
iti shaivapurANeShu kUTasthaH pravivechitaH .
jIveshatvAdirahitaH kevalaH svaprabhaH shivaH .. 58..
mAyAbhAsena jIveshau karotIti shrutatvataH .
mAyikAveva jIveshau svachChau tau kAchakumbhavat .. 59..
annajanyaM manodehAtsvachCha.n yadvattathaiva tau .
mAyikAvapi sarvasmAdanyasmAtsvachChatA.n gatau .. 60..
chidrUpatva.n cha sambhAvya.n chittvenaiva prakAshanAt .
sarvakalpanashaktAyA mAyAyA duShkara.n na hi .. 61..
asmannidrApi jIveshau chetanau svapnagau sR^ijet .
mahAmAyA sR^ijatyetAvityAshcharya.n kimatra te .. 62..
sarvaj~natvAdika.n cheshe kalpayitvA pradarshayet .
dharmiNa.n kalpayedyAsyAH ko bhAro dharmakalpane .. 63..
kUTasthe.apyatisha~Nkya syAditi chenmAtisha.nkyatAm .
kUTAsthamAyikatve tu pramANa.n na hi vartate .. 64..
vastutva.n ghoShayantyasya vedAntAH sakalA api .
sapatnarUpa.n vastvanyanna sahante.atra ki.nchana .. 65..
shrutyartha.n vishadIkurmo na tarkAnvachmi ki.nchana .
tena tArkikasha.nkAnAmatra ko.avasaro vada .. 66..
tasmAtkutarka.n santyajya mumukShuH shrutimAshrayet .
shrutau tu mAyAjIveshau karotIti pradarshitam .. 67..
IkShaNAdipraveshAntA sR^iShTirIshakR^itA bhavet .
jAgradAdivimokShantaH sa.nsAro jIvakartR^ikaH .. 68..
asa~Nga eva kUTasthaH sarvadA nAsya kashchana .
bhavatyatishayastena manasyeva.n vichAryatAm .. 69..
na nirodho na chotpattirna baddho na cha sAdhakaH .
na mumukShurna vai mukta ityeShA paramArthatA .. 70..
avA~Nmanasagamya.n ta.n shrutirbodhayitu.n sadA .
jIvamIsha.n jagadvApi samAshrityAvabodhayet .. 71..
yayA yayA bhavetpu.nsA.n vyutpattiH pratyagAtmani .
sA saiva prakriyeha syAtsAdhvItyAchAryabhAShitam .. 72..
shrutitAtparyamakhilamabudhvA bhrAmyate jaDaH .
vivekI tvakhilaM budhvA tiShThatyAnandavAridhau .. 73..
mAyAmegho jagannIra.n varShatveSha yathA tathA .
chidAkAshasya no hAnirna vA lAbha iti sthitiH .. 74..
ima.n kUTasthadIpa.n yo.anusandhatte nirantaram .
svaya.n kUTastharUpeNa dIpyate.asau nirantaram .. 76..

iti kUTasthadIpo nAma aShTamaH parichChedaH .. 8.

\section{9\. dhyAnadIponAma \- navamaH parichChedaH .}
sa.nvAdibhramavadbrahmatattvopAstyApi muchyate .
uttare tApaniye.ataH shrutopAstiranekadhA .. 1..
maNipradIpaprabhayormaNibuddhyAbhidhAvatoH .
mithyAj~nAnAvisheShe.api visheSho.arthakriyAM prati .. 2..
dIpopavarakasyAntarvartate tatprabhA bahiH .
dR^ishyate dvAryathAnyatra tadvaddR^iShTA maNeH prabhA .. 3..
dUre prabhAdvaya.n dR^iShTvA maNibuddhyAbhidhAvatoH .
prabhAyAM maNibuddhistu mithyAj~nAna.n dvayorapi .. 4..
na labhyate maNirdIpaprabhAM pratyabhidhAvatA .
prabhAyA.n dhAvatAvashya.n labhyataiva maNirmaNeH .. 5..
dIpaprabhAmaNibhrAntirvisa.nvAdibhramaH smR^itaH .
maNiprabhAmaNibhrAntiH sa.nvAdibhrama uchyate .. 6..
bAShpa.n dhUmatayA budhvA tatrA~NgArAnumAnataH .
vahniryadR^ichChayA labdhaH sa sa.nvAdibhramo mataH .. 7..
godAvaryudaka.n ga~NgodakaM matvA vishuddhaye .
samprokShya shuddhimApnoti sa sa.nvAdibhramo mataH .. 8..
jvareNAptaH sannipAtaM bhrAntyA nArAyaNa.n smaran .
mR^itaH svargamavApnoti sa sa.nvAdibhramo mataH .. 9..
pratyakShasyAnumAnasya tathA shAstrasya gochare .
uktanyAyena sa.nvAdibhramAH santIha koTishaH .. 10..
anyathA mR^ittikAdArushilAH syurdevatAH katham .
agnitvAdidhiyopAsyAH katha.n vA yoShidAdayaH .. 11..
ayathAvastuvij~nAnAtphala.n labhyata Ipsitam .
kAkatAlIyataH so.aya.n sa.nvAdibhrama uchyate .. 12..
svayaM bhramo.api sa.nvAdI yathA samyakphalapradaH .
brahmatattvopAsanApi tathA muktiphalapradA .. 13..
vedAntebhyo brahmatattvamakhaNDaikarasAtmakam .
parokShamavagamyaitadahamasmItyupAsate .. 14..
pratyagvyaktimanullikhya shAstrAdviShNvAdimUrtivat .
asti brahmeti sAmAnyaj~nAnamatraM parokShadhIH .. 15..
chaturbhujAdyavagatAvapi mUrtimanullikhan .
akShaiH parokShaj~nAnyeva na tadA viShNumIkShate .. 16..
parokShatvAparAdhena bhavennAtattvavedanam .
pramANenaiva shAstreNa satyamUrtervibhAsanAt .. 17..
sachchidAnandarUpasya shAstrAdbhAne.apyanullikhan .
pratya.ncha.n sAkShiNa.n tattu brahma sAkShAnna vIkShate .. 18..
shAstroktenaiva mArgeNa sachchidAnandanirNayAt .
parokShamapi tajj~nAna.n tattvaj~nAna.n na tu bhramaH .. 19..
brahma yadyapi shAstreShu pratyaktvenaiva varNitam .
mahAvAkyaistathApyetaddurbodhamavichAriNaH .. 20..
dehAdyAtmatvavibhrAntau jAgR^ityA.n na haThAtpumAn .
brahmAtmatvena vij~nAtu.n kShamate mandadhItvataH .. 21..
brahmamAtra.n suvij~neya.n shraddhAloH shAstradarshinaH .
aparokShadvaitabuddhiH parokShadvaitabuddhyanut .. 22..
aparokShashilAbuddhirna parokSheshatA.n nudet .
pratimAdiShu viShNutve ko vA vipratipadyate .. 23..
ashraddhAloravishvAsoH nodAharaNamarhati .
shraddhAloreva sarvatra vaidikeShvadhikArataH .. 24..
sakR^idAptopadeshena parokShaj~nAnamudbhavet .
viShNumUrtyupadesho hi na mImA.nsAmapekShate .. 25..
karmopAstI vichAryete.anuShTheyAvinirNayAt .
bahushAkhAviprakIrNa.n nirNetu.n kaH prabhurnaraH .. 26..
nirNito.arthaH kalpasUtrairgrathitastAvatAstikaH .
vichAramantareNApi shakto.anuShThAtuma~njasA .. 27..
upAstInAmanuShThAnamArShagrantheShu varNitam .
vichArAkShamamartyAshcha tatshrutvopAsate guroH .. 28..
vedavAkyAni nirNetumichChanmImA.nsatA.n janaH .
AptopadeshamantreNa hyanuShThAna.n tu sambhavet .. 29..
brahmasAkShAtkR^itistveva.n vichAreNa vinA nR^iNAm .
AptopadeshamAtreNa na sambhavati kutrachit .. 30..
parokShaj~nAnamashraddhA pratibadhnAti netarat .
avichAro.aparokShasya j~nAnasya pratibandhakaH .. 31..
vichArApyaparokSheNa brahmAtmAna.n na vetti chet .
AparokShyAvasAnatvAdbhUyobhUyo vichArayet .. 32..
vichArayannAmaraNa.n naivAtmAna.n labheta chet .
janmAntare labhetaiva pratibandhakShaye sati .. 33..
iha vAmutra vA vidyetyeva.n sUtrakR^itoditam .
shR^iNvanto.apyatra bahavo yanna vidyuriti shrutiH .. 34..
garbha eva shayAnaH sanvAmadevo.avabuddhavAn .
pUrvAbhyastavichAreNa yadvadadhyayanAdiShu .. 35..
bahuvAramadhIte.api tadA nAyAti chetpunaH .
dinAntare.anadhItyaiva pUrvAdhIta.n smaretpumAn .. 36..
kAlena paripachyante kR^iShidarbhAdayo yathA .
tadvadAtmavichAro.api shanaiH kAlena pachyate .. 37..
punaHpunarvichAro.api trividhapratibandhataH .
na vetti tattvamityetadvArtike samyagIritam .. 38..
kutastajj~nAnamiti chettaddhi bandhaparikShayAt .
asAvapi cha bhUto vA bhAvI vA vartate tathA .. 39..
adhItavedavedArtho.apyata eva na muchyate .
hiraNyanidhidR^iShTAntAdidameva hi darshitam .. 40..
atItenApi mahiShIsnehena pratibandhataH .
bhikShustattva.n na vedeti gAthA loke pragIyate .. 41..
anusR^itya guruH snehaM mahiShyA.n tattvamuktavAn .
tato yathAvadvedaiSha pratibandhasya sa.nkShayAt .. 42..
pratibandho vartamAno viShayAsaktilakShaNaH .
praj~nAmAndya.n kutarkashcha viparyayadurAgrahaH .. 43..
shamAdyaiH shravaNAdyaishcha tatra tatrochitaiH kShayam .
nIte.asminpratibandhe.ataH svasya brahmatvamashnute .. 44..
AgAmipratibandhashcha vAmadeve samIritaH .
ekena janmanA kShINo bharatasya trijanmabhiH .. 45..
yogabhraShTasya gItAyAmatIte bahujanmani .
pratibandhakShayaH prokto na vichAro.apyanarthakaH .. 46..
prApya puNyakR^itA.n lokAnAtmatattvavichArataH .
shuchInA.n shrImatA.n gehe yogabhraShTo.abhijAyate .. 47..
athavA yoginAmeva kule bhavati dhImatAm .
nispR^ihaH brahmatattvasya vichArAttaddhi durlabham .. 48..
tatra taM buddhisa.nyoga.n labhate paurvadehikam .
yatate cha tato bhUyastasmAdetaddhi durlabham .. 49..
pUrvAbhyAsena tenaiva hriyate hyavasho.api saH .
anekajanmasa.nsiddhastato yAti parA.n gatim .. 50..
brahmalokAbhivA~nChAyA.n samyaksatyA.n nirudhyatAm .
vichArayedya AtmAna.n na tu sAkShAtkarotyayam .. 51..
vedAntavij~nAnasunishchitArthAH iti shAstrataH .
brahmaloke sakalpAnte brahmaNA saha muchyate .. 52..
keShA.nchitsa vichAro.api karmaNA pratibaddhyate .
shravaNAyApi bahubhiryo na labhya iti shruteH .. 53..
atyantabuddhimAndyAdvA sAmagryA vApyasambhavAt .
yo vichAra.n na labhate brahmopAsIta so.anisham .. 54..
nirguNabrahmatattvasya na hyupAsterasambhavaH .
saguNabrahmaNIvAtra pratyayAvR^ittisambhavAt .. 55..
avA~Nmanasagamya.n tannopAsyamiti chettadA .
avA~Nmanasagamyasya vedana.n cha na sambhavet .. 56..
vAgAdyagocharAkAramityeva.n yadi vettyasau .
vAgAdyagocharAkAramityupAsita no kutaH .. 57..
saguNatvamupAsyatvAdyadi vedyatvato.api tat .
vedya.n chellakShaNAvR^ittyA lakShita.n samupAsyatAm .. 58..
brahma viddhi tadeva tva.n natvida.n yadupAsate .
iti shruterupAsyatva.n niShiddhaM brahmaNo yadi .. 59..
viditAdanyadeveti shrutervedyatvamasya na .
yathA shrutyaiva vedya.n tattathA shrutyApyupAsyatAm .. 60..
avAstavI vedyatA chedupAsyatva.n tathA na kim .
vR^ittivyAptirvedyatA chedupAsyatve.api tatsamam .. 61..
kA te bhaktirupAstau chetkaste dveShastadIraya .
mAnAbhAvo na vAchyo.asyAM bahushrutiShu darshanAt .. 62..
uttarasmi.nstApanIye shaibyaprashne.atha kAThake .
mANDukyAdau cha sarvatra nirguNopAstirIritA .. 63..
anuShThAnaprakAro.asyAH pa~nchIkaraNa IritaH .
j~nAnasAdhanametachchenneti kenAtra varNitam .. 64..
nAnutiShThati ko.apyetaditi chennAnutiShThatu .
puruShasyAparAdhena kimupAstiH praduShyati .. 65..
ito.apyatishayaM matvA mantrAnvashyAdikAriNaH .
mUDhA japantu tebhyo.atimUDhAH kR^iShimupAsatAm .. 66..
tiShThantu mUDhAH prakR^itA nirguNopAstirIryate .
vidyaikyAtsarvashAkhAsthAnguNAnatropasa.nharet .. 67..
AnandAdervidheyasya guNasa~Nghasya sa.nhR^itiH .
AnandAdaya ityasminsUtre vyAsena varNitA .. 68..
asthUlAderniShedhyasya guNasa~Nghasya sa.nhR^itiH .
tathA vyAsena sUtre.asminuktAkSharadhiyAntviti .. 69..
nirguNabrahmatattvasya vidyAyA.n guNasa.nhR^itiH .
na yujyetetyupAlambho vyAsaM pratyeva mA.n tu na .. 70..
hiraNyasmashrusUryAdimUrtInAmanudAhR^iteH .
aviruddha.n nirguNatvamiti chettuShyatA.n tvayA .. 71..
guNAnA.n lakShakatvena na tattve.antaHpraveshanam .
iti chedastvevameva brahmatattvamupAsyatAm .. 72..
AnandAdibhirasthUlAdibhiHsvAtmAtra lakShitaH .
akhaNDaikarasaH so.ahamasmItyevamupAsate .. 73..
bodhopAstyorvisheShaH ka iti cheduchyate shR^iNu .
vastutatntro bhavedbodhaH kartR^itantramupAsanam .. 74..
vichArAjjAyate bodho.anichChA ya.n na nivartayet .
svotpattimAtrAtsa.nsAre dahatyakhilasatyatAm .. 75..
tAvatA kR^itakR^ityaH sannityatR^iptimupAgataH .
jIvanmuktimanuprApya prArabdhakShayamIkShate .. 76..
Aptopadesha.n vishvasya shraddhAluravichArayan .
chintayetpratyayairanyairanantaritavR^ittibhiH .. 77..
yAvachchintyasvarUpatvAbhimAnaH svasya jAyate .
tAvadvichintya pashchAchcha tathaivAmR^iti dhArayet .. 78..
brahmachArI bhikShamANo yutaH sa.nvargavidyayA .
sa.nvargarUpatA.n chitte dhArayitvA hyabhikShatA .. 79..
puruShasvechChayA kartumakartu.n kartumanyathA .
shakyopAstirato nitya.n kuryAtpratyayasantatim .. 80..
vedAdhyAyI hyapramatto.adhIte svapne.api vAsitaH .
japitA tu japatyeva tathA dhyAtApi vAsayet .. 81..
virodhipratyaya.n tyaktvA nairantaryeNa bhAvayan .
labhate vAsanAveshAtsvapnAdAvapi bhAvanAm .. 82..
bhu~njAno.api nija ArabdhamAsthAtishayato.anisham .
dhyAtu.n shakto na sandeho viShayavyasanI yathA .. 83..
paravyasaninI nArI vyagrApi gR^ihakarmaNi .
tadevAsvAdayatyantaH parasa~NgarasAyanam .. 84..
parasa~Nga.n svAdayantyA api no gR^ihakarma tat .
kuNThI bhavedapi tvetadApAtenaiva vartate .. 85..
gR^ihakR^ityavyasaninI yathA samyakkaroti tat .
paravyasaninI tadvanna karotyeva sarvathA .. 86..
eva.n dhyAnaikaniShTho.api leshAllaukikamAcharet .
tattvavittvavirodhitvAllaukika.n samyagAcharet .. 87..
mAyAmayaH prapa~ncho.ayamAtmA chaitanyarUpadhR^ik .
iti bodhe virodhaH ko laukikavyavahAriNaH .. 88..
apekShate vyavahR^itirna prapa~nchasya vastutAm .
nApyAtmajADya.n ki.ntveShA sAdhanAnyeva kA~NkShati .. 89..
manovAkkAyatadbAhyapadArthAH sAdhanAni tAn .
tattvavinnopamR^id.hnAti vyavahAro.asya no kutaH .. 90..
upamR^id.hnAti chitta.n cheddhyAtAsau na tu tattvavit .
na buddhiM marddayandR^iShTo ghaTatattvasya veditA .. 91..
sakR^itpratyayamAtreNa ghaTashchedbhAsate tadA .
svaprakAsho.ayamAtmA ki.n ghaTavachcha na bhAsate .. 92..
svaprakAshatayA ki.n te tadbuddhistattvavedanam .
buddhishcha kShaNanAshyeti chodya.n tulya.n ghaTAdiShu .. 93..
ghaTAdau nishchite buddhirnashyatyeva yadA ghaTaH .
iShTo netu.n tadA shakya iti chetsamamAtmani .. 94..
nishchitya sakR^idAtmAna.n yadApekShA tadaiva tat .
vaktu.n mantu.n tathA dhyAtu.n shaknotyeva hi tattvavit .. 95..
upAsaka iva dhyAya.n laukika.n vismaret yadi .
vismaratyeva sA dhyAnAdvismR^itirna tu vedanAt .. 96..
dhyAna.n tvaichChikametasya vedanAnmuktisiddhitaH .
j~nAnAdeva tu kaivalyamiti shAstreShu  DiNDimaH .. 97..
tattvavidyadi na dhyAyetpravarteta tadA bahiH .
pravartatA.n sukhenAya.n ko bAdho.asya pravartane .. 98..
atiprasa~Nga iti chetprasa~Nga.n tAvadIraya .
prasa~Ngo vidhishAstra.n chenna tattattvavidaM prati .. 99..
varNAshramavayovasthAbhimAno yasya vidyate .
tasyaiva hi niShedhAshcha vidhayaH sakalA api .. 100..
varNAshramAdayo dehe mAyayA parikalpitAH .
nAtmano bodharUpasyetyeva.n tasya vinishchayaH .. 101..
samAdhimatha karmANi mA karotu karotu vA .
hR^idayenAstasarvAstho mukta evottamAshayaH .. 102..
naiShkarmyeNa na tasyArthastasyArtho.asti na karmabhiH .
na samAdhAnajapyAbhyA.n yasya nirvAsanaM manaH .. 103..
AtmAsa~Ngastato.anyatsyAdindrajAla.n hi mAyikam .
ityacha~nchalanirNite kuto manasi vAsanA .. 104..
eva.n nAsti prasa~Ngo.api kuto.asyAtiprasa~njanam .
prasa~Ngo yasya tasyaiva sha~NkyetAtiprasa~njanam .. 105..
vidhyabhAvAnna bAlasya dR^ishyate.atiprasa~njanam .
syAtkuto.atiprasa~Ngo.asya vidhyabhAve same sati .. 106..
na ki.nchidvetti bAlashchetsarva.n vettyeva tattvavit .
alpaj~nasyaiva vidhayaH sarve syurnAnyayordvayoH .. 107..
shApAnugrahasAmarthya.n yasyAsau tattvavidyadi .
na tat shApAdisAmarthyaM phala.n syAttapaso yataH .. 108..
vyAsAderapi sAmarthya.n dR^ishyate tapaso balAt .
shApAdikAraNAdanyattapoj~nAnasya kAraNam ... 109..
dvaya.n yasyAsti tasyaiva sAmarthyaj~nAnayorjaniH .
ekaika.n tu tapaH kurvannekaika.n labhate phalam .. 110..
sAmarthyahIno nindyashchedyatibhirvidhivarjitaH .
nindyante yatayo.apyanyairanishaM bhogalaMpaTaiH .. 111..
bhikShAvastrAdi rakSheyuryadyete bhogatuShTaye .
aho yatitvameteShA.n vairAgyabharamantharam .. 112..
varNAshramaparAnmUrkhA nindantvityuchyate yadi .
dehAtmamatayo buddha.n nindantvAshramamAninaH .. 113..
tadittha.n tattvavij~nAne sAdhanAnupamardanAt .
j~nAninAcharitu.n shakya.n samyagrAjyAdi laukikam .. 114..
mithyAtvabuddhyA tatrechChA nAsti chettarhi mAstu tat .
dhyAyanvAtha vyavaharanyathArabdha.n vasatvayam .. 115..
upAsakastu satata.n dhyAyanneva vasediti .
dhyAnenaiva kR^ita.n tasya brahmatva.n viShNutAdivat .. 116..
dhyAnopAdAnaka.n yattaddhyAnAbhAve vilIyate .
vAstavI brahmatA naiva j~nAnAbhAve vilIyate .. 117..
tato.abhij~nApaka.n j~nAna.n na nitya.n janayatyadaH .
j~nApakAbhAvamAtreNa na hi satya.n vilIyate .. 118..
astyeva upAsakasyApi vAstavI brahmateti chet .
pAmarANA.n tirashchA.n cha vAstavI brahmatA na kim .. 119..
aj~nAnAdapumarthatvamubhayatrApi tatsamam .
upavAsAdyathA bhikShA vara.n dhyAna.n tathAnyathaH .. 120..
pAmarANA.n vyavahR^itervara.n karmAdyanuShThitiH .
tato.api saguNopAstirnirguNopAsana.n tataH .. 121..
yAvadvij~nAnasAmIpya.n tAvachChraiShThya.n vivardhate .
brahmaj~nAnAya te sAkShAnnirguNopAsana.n shanaiH .. 122..
yathA sa.nvAdivibhrAntiH phalakAle pramAyate .
vidyAyate tathopAstirmuktikAle.atipAkataH .. 123..
sa.nvAdibhramataH pu.nsaH pravR^ittasyAnyamAnataH .
prameti chettathopAstirmAntare kAraNAyatAm .. 124..
mUrtidhyAnasya mantrAderapi kAraNatA yadi .
astu nAma tathApyatra pratyAsattirvishiShyate .. 125..
nirguNopAsanaM pakva.n samAdhiH syAchChanaistataH .
yaH samAdhirnirodhAkhyaH so.anAyAsena labhyate .. 126..
nirodhalAbhe pu.nso.antarasa~Nga.n vastu shiShyate .
punaH punarvAsite.asminvAkyAjjAyeta tattvadhIH .. 127..
nirvikArAsa~NganityasvaprakAshaikapUrNatAH .
buddhau jhaTiti shAstroktA ArohantyavivAdataH .. 128..
yogAbhyAsastvetadartho.amR^itabindvAdiShu shrutaH .
eva.n cha dR^iShTadvArApi hetutvAdanyato varam .. 129..
upekShya tattIrthayAtrA.n japAdIneva kurvatAm .
piNDa.n samutsR^ijya kara.n leDhIti nyAya Apatet .. 130..
upAsakAnAmapyeva.n vichAratyAgato yadi .
bAdha.n tasmAdvichArasyAsambhave yoga IritaH .. 131..
bahuvyAkulachittAnA.n vichArAttattvadhIrna hi .
yogo mukhyastatasteShA.n dhIdarpastena nashyati .. 132..
avyAkuladhiyAM mohamAtreNAchChAditAtmanAm .
sA~NkhyanAmA vichArAH syAnmukhyo jhaTiti siddhitaH .. 133..
yatsA~NkhyaiH prApyate sthAna.n tadyogairapi gamyate .
eka.n sA~Nkhya.n cha yoga.n cha yaH pashyati sa pashyati .. 134..
tatkAraNa.n sA~NkhyayogAdhigamyamiti hi shrutiH .
yastu shruterviruddhaH sa AbhAsaH sA~NkhyayogayoH .. 135..
upAsana.n nAtipakvamiha yasya paratra saH .
maraNe brahmaloke vA tattva.n vij~nAya muchyate .. 136..
ya.n ya.n chApi smaranbhAva.n tyajatyante kalevaram .
ta.n tevaiti yachchittastena yAtIti shAstrataH .. 137..
antyapratyayato nUnaM bhAvijanma tathA sati .
nirguNapratyayo.api syAtsaguNopAsane yathA .. 138..
nitya.n nirguNarUpa.n tannAmamAtreNa gIyatAm .
arthatomokSha evaiSha sa.nvAdi bhramavanmataH .. 139..
tatsAmarthyAjjAyate dhIrmUlAvidyAnivartikA .
avimuktopAsanena tArakabrahma buddhivat .. 140..
sakAmo niShkAma iti hyasharIro nirindriyaH .
abhaya.n hIti muktatva.n tApanIye phala.n shrutam .. 141..
upAsanasya sAmarthyAdvidyotpattirbhavettataH .
nAnyaH panthA iti hyetachChAstra.n naiva virudhyate .. 142..
niShkAmopAsanAnmuktistApanIye samIritA .
brahmalokaH sakAmasya shaibyaprashne samIritaH .. 143..
ya upAste trimAtreNa brahmaloke sa nIyate .
sa etasmAjjIvaghanAtparaM puruShamIkShate .. 144..
apratIkAdhikaraNe tatkraturnyAya IritaH .
brahmalokaphala.n tasmAtsakAmasyeti varNitam .. 145..
nirguNopAstisAmarthyAttatra tattvamavekShaNat .
punarAvartate nAya.n kalpAnte tu vimuchyate .. 146..
praNavopAstayaH prAyo nirguNA eva vedagAH .
kvachitsaguNatA proktA praNavopAsanasya hi .. 147..
parAparabrahmarUpa o~NkAra upavarNitaH .
pippalAdena muninA satyakAmAya pR^ichChate .. 148..
etadAlambana.n j~nAtvA yo yadichChati tasya tat .
iti prokta.n yamenApi pR^ichChate nachiketase .. 149..
iha vA maraNe vAsya brahmaloke.athavA bhavet .
brahmasAkShAtkR^itiH samyagupAsInasya nirguNam .. 150..
artho.ayamAtmagItAyAmapi spaShTamudIritaH .
vichArAkShama AtmAnamupAsIteti santatam .. 151..
sAkShAtkartumashakto.api chintayenmAmasha~NkitaH .
kAlenAnubhavArUDho bhaveya.n phalato dhruvam .. 152..
yathAgAdhanidheHlabdhau nopAyaH khanana.n vinA .
mallabhe.api tathA svAtmachintAM muktA na chAparaH .. 153..
dehopalamapAkR^itya buddhikuddalakAtpunaH .
khAtvA manobhuvaM bhUyo gR^ihNIyAnmA.n nidhiM pumAn .. 154..
anubhUterabhAve.api brahmAsmItyeva chintyatAm .
apyasat prApyate dhyAnAnnityAptaM brahma kiM punaH .. 155..
anAtmabuddhishaithilyaM phala.n dhyAnAddine dine .
pashyannapi na cheddhyAyetko.aparo.asmAt pashurvada .. 156..
dehAbhimAna.n vidhvasya dhyAnAdAtmAnamadvayam .
pashyanmartyo mR^ito bhUtvA hyatra brahma samashnute .. 157..
dhyAnadIpamima.n samyakparAmR^iShati yo naraH .
muktasa.nshaya evAya.n dhyAyati brahma santatam .. 158..

iti dhyAnadIpo nAma navamaH parichChedaH .. 9..

\section{10\. nATakadIponAma \- dashamaH parichChedaH .}
paramAtmAdvayAnandapUrNaH pUrva.n svamAyayA .
svayameva jagadbhUtvA prAvishajjIvarUpataH .. 1..
devAdyuttamadeheShu praviShTo devatAbhavat .
martyAdyadhamadeheShu sthito bhajati devatAm .. 2..
anekajanmabhajanAtsvavichAra.n chikIrShati .
vichAreNa vinaShTAyAM mAyAyA.n shiShyate svayam .. 3..
advayAnandarUpasya sadvayatva.n cha duHkhitA .
bandhaH proktaH svarUpeNa sthitirmuktiritIryate .. 4..
avichArakR^ito bandho vichAreNa nivartate .
tasmAjjIvaparAtmAnau sarvadaiva vichArayet .. 5..
ahamityabhimantA yaH kartAsau tasya sAdhanam .
manastasya kriye antarbahirvR^itti kramotthite .. 6..
antarmukhAhamityeShA vR^ittiH kartAramullikhet .
bahirmukhedamityeShA bAhya.n vastvidamullikhet .. 7..
idamo ye visheShAH syurgandharUparasAdayaH .
asA~NkaryeNa tAnbhidyAdghrANAdIndriyapa~nchakam .. 8..
kartAra.n cha kriyA.n tadvadvyAvR^ittaviShayAnapi .
sphorayedekayatnena yo.asau sAkShyatra chidvapuH .. 9..
IkShe shR^iNomi jighrAmi svAdayAmi spR^ishAmyaham .
iti bhAsayate sarva.n nR^ityashAlAsthadIpavat .. 10..
nR^ityashAlAsthito dIpaH prabhu.n sabhyA.nshcha nartakIm .
dIpayedavisheSheNa tadabhAve.api dIpyate .. 11..
aha~NkAra.n dhiya.n sAkShI viShayAnapi bhAsayet .
aha~NkArAdyabhAve.api svayaM bhAtyeva pUrvavat .. 12..
nirantaraM bhAsamAne kUTasthe j~naptirUpataH .
tadbhAsA bhAsyamAneyaM buddhirnR^ityatyanekadhA .. 13..
aha~NkAraH prabhuH sabhyA viShayA nartakI matiH .
tAlAdidhAriNyakShANi dIpaH sAkShyavabhAsakaH .. 14..
svasthAnasa.nsthito dIpaH sarvato bhAsayedyathA .
sthirasthAyI tathA sAkShI bahirantaH prakAshayet .. 15..
bahirantarvibhAgo.aya.n dehApekSho na sAkShiNi .
viShayA bAhyadeshasthA dehasyAntaraha~NkR^itiH .. 16..
antasthA dhIH sahaivAkShairbahiryAti punaH punaH .
bhAsyabuddhisthachA~nchalya.n sAkShiNyAropyate vR^ithA .. 17..
gR^ihAntaragataH svalpo gavAkShAdAtapo.achalaH .
tatra haste nartyamAne nR^ityatIvAtapo yathA .. 18..
nijasthAnasthitaH sAkShI bahirantargamAgamau .
akurvanbuddhichA~nchalyAtkarotIva tathA tathA .. 19..
na bAhyo nAntaraH sAkShI buddherdeshau hi tAvubhau .
buddhyAdyasheShasa.nshAntau yatra bhAtyasti tatra saH .. 20..
deshaH ko.api na bhAseta yadi tarhyastvadeshabhAk .
sarvadeshapraklR^iptyaiva sarvagatva.n na tu svataH .. 21..
antarbahirvA sarva.n vA ya.n deshaM parikalpayet .
buddhistaddeshagaH sAkShI tathA vastuShu yojayet .. 22..
yad.hyadrUpa Adi kalpyeta buddhyA tattatprakAshayan .
tasya tasya bhavetsAkShI svato vAgbuddhyagocharaH .. 23..
katha.n tAdR^i~NmayA grAhyamiti chenmaiva gR^ihyatAm .
sarvagrahopasa.nshAntau svayamevAvashiShyate .. 24..
na tatra mAnApekShAsti svaprakAshasvarUpataH .
tAdR^igvyutpattyapekShA chechChrutiM paTha gurormukhAt .. 25..
yadi sarvagR^ihatyAgo.ashakyastarhi dhiya.n vraja .
sharaNa.n tadadhIno.antarbahirvaiSho.anubhUyatAm .. 26..

iti nATakadIponAma dashamaH parichChedaH .. 10..

\section{11\. brahmAnande yogAnandonAma \- ekAdashaH parichChedaH .}
brahmAnandaM pravakShyAmi j~nAte tasminnasheShataH .
aihikAmuShmikAnarthavrAta.n hitvA sukhAyate .. 1..
brahmavitparamApnoti shoka.n tarati chAtmavit .
raso brahmarasa.n labdhvAnandI bhavati nAnyathA .. 2..
pratiShThA.n vindate svasminyadA syAdatha so.abhayaH .
kurute.asminnantara.n chedatha tasya bhayaM bhavet .. 3..
vAyuH sUryo vahnirindro mR^ityurjanmAntare.antaram .
kR^itvA dharma.n vijAnanto.apyasmAdbhItyA charanti hi .. 4..
AnandaM brahmaNo vidvAnna bibheti kutashchana .
etameva tapennaiShA chintA karmAgnisambhR^itA .. 5..
eva.n vidvAnkarmaNi dve hitvAtmAna.n smaretsadA .
kR^ite cha karmaNi svAtmarUpeNaivaiSha pashyati .. 6..
bhidyate hR^idayagranthishchChidyante sarvasa.nshayAH .
kShIyante chAsya karmANi tasmindR^iShTe parAvare .. 7..
tameva vidvAnatyeti mR^ityuM panthA na chetaraH .
j~nAtvA devaM pAshahAniH kShINaiH kleshairna janmabhAk .. 8..
devaM matvA harShashokau jahAtyatraiva dhairyavAn .
naina.n kR^itAkR^ite puNyapApe tApayataH kvachit .. 9..
ityAdishrutayo bahvyaH purANaiH smR^itibhiH saha .
brahmaj~nAne.anarthahAnimAnanda.n chApyaghoShayan .. 10..
Anandastrividho brahmAnando vidyAsukha.n tathA .
viShayAnanda ityAdau brahmAnando vivichyate .. 11..
bhR^iguH putraH pituH shrutvA varuNAdbrahmalakShaNam .
annaprANamanobuddhistyaktvAnanda.n vijaj~nIvAn .. 12..
AnandAdeva bhUtAni jAyante tena jIvanam .
teShA.n layashcha tatrAto brahmAnando na sa.nshayaH .. 13..
bhUtotpatteH purA bhUmA tripuTIdvaitavarjanAt .
j~nAtR^ij~nAnaj~neyarUpA tripuTI pralaye hi na .. 14..
vij~nAnamaya utpanno j~nAtA j~nAnaM manomayaH .
j~neyAH shabdAdayo naitattrayamutpattitaH purA .. 15..
trayAbhAve tu nirdvaitaH pUrNa evAnubhUyate .
samAdhisuptimUrchChAsu pUrNaH sR^iShTeH purA tathA .. 16..
yo bhUmA tatsukha.n nAlpe sukha.n tredhA vibhedini .
sanatkumAraH prAhaiva.n nAradAyAtishokine .. 17..
sapurANAnpa~ncha vedAn shAstrANi vividhAni cha .
j~nAtvApyanAtmavittvena nArado.atishushocha ha .. 18..
vedAbhyAsAtpurA tApatrayamAtreNa shokitA .
pashchAttvabhyAsavismArabha~Ngagarvaishcha shokitA .. 19..
so.aha.n vidvAnprashochAmi shokapAra.n nayasva mAm .
ityuktaH sukhamevAsya pAramityabhyadhAdR^iShiH .. 20..
sukha.n vaiShayika.n shokasahasreNAvR^itatvataH .
duHkhameveti matvAha nAlpe.asti sukhamityasau .. 21..
nanu dvaite sukhaM mAbhUdadvaite.apyasti no sukham .
asti chedupalabhyeta tathA cha tripuTI bhavet .. 22..
mAstvadvaite sukha.n kintu sukhamadvaitameva hi .
kiM mAnamiti chennAsti mAnAkA~NkShA svayaM prabhe .. 23..
svaprabhatve bhavadvAkyaM mAna.n yasmAdbhavAnidam .
advaitamabhyupetyAsminsukha.n nAstIti bhAShate .. 24..
nAbhyupaimyahamadvaita.n tvadvacho.anUdya dUShaNam .
vachmIti chettadA brUhi kimAsIddvaitataH purA .. 25..
kimadvaitamuta dvaitamanyo vA koTirantimaH .
aprasiddho na dvitIyo.anutpatteH shiShyate.agrimaH .. 26..
advaitasiddhiryuktyaiva nAnubhUtyeti chedvada .
nirdR^iShTAntA sadR^iShTAntA vA koTyantaramatra no .. 27.
nAnubhUtiHrna dR^iShTAnta iti yuktistu shobhate .
sadR^iShTAntatvapakShe tu dR^iShTAnta.n vada me matam .. 28..
advaitaH pralayo dvaitAnupalambhena suptivat .
iti chetsuptiradvaitetyatra dR^iShTAntamIraya .. 29..
dR^iShTAntaH parasuptishchedaho te kaushalaM mahat .
yaH svasupti.n na vettyasya parasuptau tu kA kathA .. 30..
nishcheShTatvAtparaH supto yathAhamiti chettadA .
udAhartuH suShupteste svaprabhatvaM balAdbhavet .. 31..
nendriyANi na dR^iShTAntastathApya~NgIkaroShi tAm .
idameva svaprabhatva.n yadbhAna.n sAdhanairvinA .. 32..
stAmadvaitasvaprabhatve vada suptau sukha.n katham .
shR^iNu duHkha.n tadA nAsti tataste shiShyate sukham .. 33..
andhaH sannapyanandhaH syAdviddho.aviddho.atha rogyapi .
arogIti shrutiH prAha tachcha sarve janA viduH .. 34..
na duHkhAbhAvamAtreNa sukha.n loShTashilAdiShu .
dvayAbhAvasya dR^iShTatvAditi chedviShama.n vachaH .. 35..
mukhadainyaprakAshAbhyAM paraduHkhasukhohanam .
dainyAdyabhAvato loShTe duHkhAdyUho na sambhavet .. 36..
svakIyasukhaduHkhe tu nohanIye tatastayoH .
bhAvo vedyo.anubhUtyaiva tadabhAvo.api nAnyataH .. 37..
tathA sati suShuptau cha duHkhAbhAvo.anubhUtitaH .
virodhiduHkharAhityAtsukha.n nirvighnamiShyatAm .. 38..
mahattaraprayAsena mR^idushayyAdisAdhanam .
kutaH sampAdyate suptau sukha.n chettatra no bhavet .. 39..
duHkhanAshArthamevaitaditi chedrogiNastathA .
bhavatvarogiNaste tatsukhAyaiveti nishchinu .. 40..
tarhi sAdhanajanyatvAtsukha.n vaiShayikaM bhavet .
bhavatyevAtra nidrAyAH pUrva.n shayyAsanAdijam .. 41..
nidrAyA.n tu sukha.n yattajjanyate kena hetunA .
sukhAbhimukhadhIrAdau pashchAnmajjetpare sukhe .. 42..
jAgradvyApR^itibhiH shrAnto vishramyAtha virodhini .
apanIte svasthachito.anubhavedviShaye sukham .. 43..
AtmAbhimukhadhIvR^ittau svAnandaH pratibimbati .
anubhUyainamatrApi tripuTyA shrAntimApnuyAt .. 44..
tat.hshramasyApanutyartha.n jIvo dhAvetparAtmani .
tenaikyaM prApya tatratyo brahmAnandaH svayaM bhavet .. 45..
dR^iShTAntAH shakuniH shyenaH kumArashcha mahAnR^ipaH .
mahAbrAhmaNa ityete suptyAnande shrutIritAH .. 46..
shakuniH sUtrabaddhaH sandikShu vyApR^itya vishramam .
alabdhvA bandhanasthAna.n hastastambhAdyupAshrayet .. 47..
jIvopAdhirmanastadvaddharmAdharmaphalAptaye .
svapne jAgrati cha bhrAntvA kShINe karmaNi lIyate .. 48..
shyeno vegena nIDaikalampaTaH shayitu.n vrajet .
jIvaH suptyai tathA dhAvedbrahmAnandaikalampaTaH .. 49..
atibAlastanaM pItvA mR^idushayyAgato hasan .
rAgadveShAdyanutpatterAnandaikasvabhAvabhAk .. 50..
mahArAjaH sArvabhaumaH sutR^iptaH sarvabhogataH .
mAnuShAnandasImAnaM prApyAnandaikamUrtibhAk .. 51..
mahAvipro brahmavedI kR^itakR^ityatvalakShaNAm .
vidyAnandasya paramA.n kAShThAM prApyAvatiShThate .. 52..
mugdhabuddhAtibuddhAnA.n loke siddhA sukhAtmatA .
udAhR^itAnAmanye tu duHkhino na sukhAtmakAH .. 53..
kumArAdivadevAyaM brahmAnandaikatatparaH .
strIpariShvaktavadveda na bAhya.n nApi chAntaram .. 54..
bAhya.n rathyAdika.n vR^itta.n gR^ihakR^itya.n yathAntaram .
tathA jAgaraNaM bAhya.n nADIsthaH svapna AntaraH .. 55..
pitApi suptAvapitetyAdau jIvatvavAraNAt .
suptau brahmaiva no jIva sa.nsAritvAsamIkShaNAt .. 56..
pitR^itvAdyabhimAno yaH sukhaduHkhAkaraH sa hi .
tasminnapagate tIrNaH sarvAn shokAnbhavatyayam .. 57..
suShuptikAle sakale vilIne tamasAvR^itaH .
sukharUpamupaitIti brUte hyAtharvaNI shrutiH .. 58..
sukhamasvApsamatrAha.n naiva ki.nchidavediSham .
iti dve tu sukhAj~nAne parAmR^ishati chottitaH .. 59..
parAmarsho.anubhUte.astItyAsIdanubhavastadA .
chidAtmatvatsvato bhAti sukhamaj~nAnadhIstataH .. 60..
brahmavij~nAnamAnandamiti vAjasaneyinaH .
paThantyataH svaprakAsha.n sukhaM brahmaiva netarat .. 61..
yadaj~nAna.n tatra lInau tau vij~nAnamanomayau .
tayorhi vilayAvasthA nidrAj~nAna.n cha saiva hi .. 62..
vilInaghR^itavatpashchAtsyAdvij~nAnamayo ghanaH .
vilInAvastha Anandamayashabdena kathyate .. 63..
suptipUrvakShaNe buddhivR^ittiryA sukhabimbitA .
saiva tadbimbasahitA lInAnandamayastataH .. 64..
antarmukho.ayamAnandamayo brahmasukha.n tadA .
bhu~Nkte chidbimbayuktAbhiraj~nAnotpannavR^ittibhiH .. 65..
aj~nAnavR^ittayaH sUkShmA vispaShTA buddhivR^ittayaH .
iti vedAntasiddhAntapAragAH pravadanti hi .. 66..
mANDukyatApanIyAdishrutiShvetadatisphuTam .
AnandamayabhoktR^itvaM brahmAnande cha bhogyatA .. 67..
ekIbhUtaH suShuptasthaH praj~nAnaghanatA.n gataH .
Anandamaya AnandabhukchetomayavR^ittibhiH .. 68..
vij~nAnamayamukhyairyo rUpairyuktaH purAdhunA .
sa layenaikatAM prApto bahutaNDulapiShTavat .. 69..
praj~nAnAni purA buddhivR^ittayo.atha ghano.abhavat .
ghanatva.n himabindUnAmudagdeshe yathA tathA .. 70..
tadghanatva.n sAkShibhAva.n duHkhAbhAvaM prachakShate .
laukikAstArkikA yAvadduHkhavR^ittivilopanAt .. 71..
aj~nAnabimbitA chitsyAnmukhamAnandabhojane .
bhuktaM brahmasukha.n tyaktvA bahiryAtyatha karmaNA .. 72..
karma janmAntare.abhUdyattadyogAdbuddhyate punaH .
iti kaivalyashAkhAyA.n karmajo bodha IritaH .. 73..
ka.nchitkAlaM prabuddhasya brahmAnandasya vAsanA .
anugachChedyatastUShNImAste nirviShayaH sukhI .. 74..
karmabhiH preritaH pashchAnnAnA duHkhAni bhAvayan .
shanairvismarati brahmAnandameSho.akhilo  janaH .. 75..
prAgUrdhvamapi nidrAyAH pakShapAto dine dine .
brahmAnande nR^iNA.n tena prAj~no.asminvivadeta kaH .. 76..
nanu tUShNI.n sthitau brahmAnandashchedbhAti laukikAH .
alasAshcharitArthAH syuH shAstreNa guruNAtra kim .. 77..
bADhaM brahmeti vidyushchetkR^itArthAstAvataiva te .
gurushAstre vinAtyanta.n gambhIraM brahma vetti kaH .. 78..
jAnAmyaha.n tvaduktyAdya kuto me na kR^itArthatA .
shR^iNvatra tvAdR^isha.n vR^ittaM prAj~naM manyasya kasyachit .. 79..
chaturvedavide deyamiti shR^iNvannavochata .
vedAshchatvAra ityeva.n vedmi me dIyatA.n dhanam .. 80..
sA~NkhyamevaiSha jAnAti na tu vedAnasheShataH .
yadi tarhi tamapyeva.n nAsheShaM brahma vetsi hi .. 81..
akhaNDaikarasAnande mAyAtatkAryavarjite .
asheShatvasasheShatvavArtAvasara eva kaH .. 82..
shabdAneva paThasyAho teShAmartha.n cha pashyasi .
shabdapAThe.arthabodhaste sampAdyatvena shiShyate .. 83..
arthe vyAkaraNAdbuddhe sAkShAtkAro.avashiShyate .
syAtkR^itArthatvadhIryAvattAvadgurumupAsva bhoH .. 84..
AstAmetadyatra yatra sukha.n syAdviShayairvinA .
tatra sarvatra viddhyetAM brahmAnandasya vAsanAm .. 85..
viShayeShvapi labdheShu tadichChoparame sati .
antarmukhamanovR^ittAvAnandaH pratibimbati .. 86..
brahmAnando vAsanA cha pratibimba iti trayam .
antareNa jagatyasminnAnando nAsti kashchana .. 87..
tathA cha viShayAnando vAsanAnanda ityamU .
Anandau janayannAste brahmAnandaH svayaMprabhaH .. 88..
shrutiyuktyanubhUtibhyaH svaprakAshachidAtmake .
brahmAnande suptikAle siddhe satyanyadA shR^iNu .. 89..
ya AnandamayaH suptau sa vij~nAnamayAtmatAm .
gatvA svapnaM prabodha.n vA prApnoti sthAnabhedataH .. 90..
netre jAgaraNa.n kaNThe svapnaH suptirhR^idambuje .
ApAdamastaka.n deha.n vyApya jAgarti chetanaH .. 91..
dehatAdAtmyamApannastaptAyaH piNDavattataH .
ahaM manuShya ityeva.n nishchityaivAvatiShThate .. 92..
udAsInaH sukhI duHkhItyavasthAtrayametyasau .
sukhaduHkhe karmakArye tvaudAsInya.n svabhAvataH .. 93..
bAhyabhogAnmanorAjyAtsukhaduHkhe dvidhA mate .
sukhaduHkhAntarAleShu bhavettUShNImavasthitiH .. 94..
na kApi chintA me.astyadya sukhamAsa iti bruvan .
audAsInye nijAnandabhAna.n vaktyakhilaH janaH .. 95..
ahamasmItyaha~NkArasAmAnyenAvR^itatvataH .
nijAnando na mukhyo.aya.n kintvasau tasya vAsanA .. 96..
nIrapUritabhANDasya bAhye shaitya.n na tajjalam .
kintu nIraguNastena nIrasattAnumIyate .. 97..
yAvadyAvadaha~NkAro vismR^ito.abhyAsayogataH .
tAvattAvatsUkShmadR^iShTernijAnando.anumIyate .. 98..
sarvAtmanA vismR^itaH sansUkShmatAM paramA.n vrajet .
alInatvAnna nidraiShA tato deho.api no patet .. 99..
na dvaitaM bhAsate nApi nidrA tatrAsti yatsukham .
sa brahmAnanda ityAha bhagavAnarjunaM prati .. 100..
shanaiH shanairuparamedbuddhyA dhR^itigR^ihItayA .
Atmasa.nsthaM manaH kR^itvA na ki.nchidapi chintayet .. 101..
yato yato nishcharati manashcha~nchalamasthiram .
tatastato niyamyaitadAtmanyeva vasha.n nayet .. 102..
prashAntamanasa.n hyena.n yogina.n sukhamuttamam .
upaiti shAntarajasaM brahmabhUtamakalmaSham .. 103..
yatroparamate chitta.n niruddha.n yogasevayA .
yatra chaivAtmanAtmAnaM pashyannAtmani tuShyati .. 104..
sukhamAtyantika.n yattadbuddhigrAhyamatIndriyam .
vetti yatra na chaivAya.n sthitashchalati tattvataH .. 105..
ya.n labdhvA chApara.n lAbhaM manyate nAdhika.n tataH .
yasmin sthito na duHkhena guruNApi vichAlyate .. 106..
ta.n vidyAdduHkhasa.nyogaviyoga.n yogasa.nj~nitam .
sa nishchayena yoktavyo yogo.anirviNNachetasA .. 107..
yu~njanneva.n sadAtmAna.n yogi vigatakalmaShaH .
sukhena brahmasa.nsparshamatyanta.n sukhamashnute .. 108..
utseka udadheryadvatkushAgreNaikabindunA .
manaso nigrahastadvadbhavedaparikhedataH .. 109..
bR^ihadrathasya rAjarSheH shAkAyanyo muniH sukham .
prAha maitrAkhyashAkhAyA.n samAdhyuktipuraHsaram .. 110..
yathA nirindhano vahniH svayonAvupashAmyati .
tathA vR^ittikShayAchchitta.n svayonAvupashAmyati .. 111..
svayonAvupashAntasya manasaH satyakAminaH .
indriyArthavimUDhasyAnR^itAH karmavashAnugAH .. 112..
chittameva hi sa.nsArastatprayatnena shodhayet .
yachchittastanmayo martyo guhyametatsanAtanam .. 113..
chittasya hi prasAdena hanti karma shubhAshubham .
prasannAtmAtmani sthitvA sukhamakShayamashnute .. 114..
samAsakta.n yathA chitta.n jantorviShayagochare .
yadyevaM brahmaNi syAttatko na muchyeta bandhanAt .. 115..
mano hi dvividhaM prokta.n shuddha.n chAshuddhameva cha .
ashuddha.n kAmasamparkAchChuddha.n kAmavivarjitam .. 116..
mana eva manuShyANA.n kAraNaM bandhamokShayoH .
bandhAya viShayAsaktaM muktyai nirviShaya.n smR^itam .. 117..
samAdhinirdhUtamalasya chetaso
     niveshitasyAtmani yatsukhaM bhavet .
na shakyate varNayitu.n girA tadA
     svaya.n tadantaHkaraNena gR^ihyate .. 118..
yadyapyasau chira.n kAla.n samAdhirdurlabho nR^iNAm .
tathApi kShaNiko brahmAnanda.n nishchAyayatyasau .. 119..
shraddhAlurvyasanI yo.atra nishchinotyeva sarvathA .
nishchite tu sakR^ittasminvishvasityanyadApyayam .. 120..
tAdR^ikpumAnudAsInakAle.apyAnandavAsanAm .
upekShya mukhyamAnandaM bhAvayatyeva tatparaH .. 121..
paravyasaninI nArI vyagrApi gR^ihakarmaNi .
tadevAsvAdayatyantaH parasa~NgarasAyanam .. 122..
eva.n tattve pare shuddhe dhIro vishrAntimAgataH .
tadevAsvAdayatyantarbahirvyavahArannapi .. 123..
dhIratvamakShaprAbalye.apyAnandAsvAdavA~nChayA .
tiraskR^ityAkhilAkShANi tachchintAyAM pravartanam .. 124..
bhAravAhI shirobhAraM muktvAste vishrama.n gataH .
sa.nsAravyApR^itityAge tAdR^igbuddhistu vishramaH .. 125..
vishrAntimM paramAM prAptastvaudAsInye yathA tathA .
sukhaduHkhadashAyA.n cha tadAnandaikatatparaH .. 126..
agnipraveshahetau dhIH shR^i~NgAre yAdR^ishI tathA .
dhIrasyodeti viShaye.anusandhAnavirodhinI .. 127..
avirodhisukhe buddhiH svAnande cha gamAgamau .
kurvantyAste kramAdeShA kAkAkShivaditastataH .. 128..
ekaiva dR^iShTiH kAkasya vAmadakShiNanetrayoH .
yAtyAyAtyevamAnandadvaye tattvavido matiH .. 129..
bhu~njAno viShayAnandaM brahmAnanda.n cha tattvavit .
dvibhAShAbhij~navadvidyAdubhau laukikavaidikau .. 130..
duHkhaprAptau na chodvego yathA pUrva.n yato dvidR^ik .
ga~NgAmagnArdhakAyasya pu.nsaH shItoShNadhIryathA .. 131..
ittha.n jAgaraNe tattvavido brahmasukha.n sadA .
bhAti tadvAsanAjanye svapne tadbhAsate tathA .. 132..
avidyAvAsanApyastItyatastadvAsanotthite .
svapne pUrvavadevaiSha sukha.n duHkha.n cha vIkShate .. 133..
brahmAnandAbhidhe granthe brahmAnandaprakAshakam .
yogipratyakShamadhyAye prathame.asminnudIritam .. 134..

iti brahmAnande yogAnandaH samAptaH .. 11..

\section{12\. brahmAnande AtmAnandonAma \- dvAdashaH parichChedaH .}
nanveva.n vAsanAnandAdbrahmAnandAdapItaram .
vettu yogI nijAnandaM mUDhasyAtrAsti kA gatiH .. 1..
dharmAdharmavashAdeSha jAyatAM mriyatAmapi .
punaH punardehalakShaiH ki.n no dAkShiNyato vada .. 2..
asti vo.anujighR^ikShuvAddAkShiNyena prayojanam .
tarhi brUhi sa mUDhaH ki.n jij~nAsurvA parA~NmukhaH .. 3..
upAsti.n karma vA brUyAdvimukhAya yathochitam .
mandapraj~na.n tu jij~nAsumAtmAnandena bodhayet .. 4..
bodhayAmAsa maitreyI.n yAj~navalkyo nijapriyAm .
na vA are patyurarthe patiH priya itIrayan .. 5..
patirjAyA putravitte pashubrAhmaNabAhujAH .
lokA devA vedabhUte sarva.n chAtmArthataH priyam .. 6..
patyAvichChA yadA patnyAstadA prIti.n karoti sA .
kShudanuShThAnarogAdyaistadA nechChati tatpatiH .. 7..
na patyurarthe sA prItiH svArtha eva karoti tAm .
patishchAtmana evArthe na jAyArthe kadAchana .
anyo.anyapreraNe.apyeva.n svechChayaiva pravartanam .. 8..
shmashrukaNTakavedhena bAlo rudati tatpitA .
chumbatyeva na sA prItirbAlArthe svArtha eva sA .. 9..
nirichChamapi ratnAdi vitta.n yatnena pAlayan .
prIti.n karoti sA svArthe vittArthatva.n  na sha~Nkitam .. 10..
anichChati balIvarde vivAhayiShate balAt .
prItiH sA vaNigarthaiva balIvardArthatA kutaH .. 11..
brAhmaNyaM me.asti pUjyo.ahamiti tuShyati pUjayA .
achetanAyA jAterno santuShTiH pu.nsa eva sA .. 12..
kShatriyo.aha.n tena rAjya.n karomItyatra rAjatA .
na jAtervaishyajAtyAdau yojanAyedamIritam .. 13..
svargalokabrahmalokau stAM mametyabhivA~nChanam .
lokayornopakArAya svabhogAyaiva kevalam .. 14..
IshaviShNvAdayo devAH pUjyante pApanaShTaye .
na tanniShpApadevArtha.n svArthaM tattUpayujyate .. 15..
R^igAdayo hyadhIyante durbrAhmaNyAnavAptaye .
na tat prasakta.n vedeShu manuShyeShu prasajyate .. 16..
bhUmyAdipa~nchabhUtAni sthAnatR^iTpAkashoShaNaiH .
hetubhishchAvakAshena vA~nChantyeShA.n na hetave .. 17..
svAmibhR^ityAdika.n sarva.n svopakArAyA vA~nChati .
tattatkR^itopakArastu tasya tasya na vidyate .. 18..
sarvavyavahR^itiShvevamanusandhAtumIdR^isham .
udAharaNabAhulya.n tena svA.n vAsayenmatim .. 19..
atha keyaM bhavetprItiH shrUyate yA nijAtmani .
rAgo vadhvAdi viShaye shraddhA yAgAdi karmaNi .
bhaktiH syAdgurudevAdAvichChA tvaprAptavastuni .. 20..
tarhyastu sAtvikI vR^ittiH sukhamAtrAnuvartinI .
prApte naShTe.api sadbhAvAdichChato vyatirichyate .. 21..
sukhasAdhanatopAdherannapAnAdayaH priyAH .
AtmAnukulyAdannAdisamashchedamunAtra kaH .
anukulayitavyaH syAnnaikasminkarmakartR^itA .. 22..
sukhe vaiShayike prItimAtramAtmA tvatipriyaH .
sukhe vyabhicharatyeShA nAtmani vyabhichAriNI .. 23..
eka.n tyaktvAnyadAdatte sukha.n vaiShayika.n sadA .
nAtmA tyAjyo na chAdeyastasminvyabhicharetkatham .. 24..
hAnAdAnavihIno.asminnupekShA chettR^iNAdivat .
upekShituH svarUpatvAnnopekShyatva.n nijAtmanaH .. 25..
rogakrodhAbhibhUtAnAM mumUrShA vIkShyate kvachit .
tato dveShAdbhavettyAjya Atmeti yadi tanna hi .
tyaktu.n yogyasya dehasya nAtmatA tyaktureva sA .
na tyaktaryasti sa dveShastyAjye dveShe tu kA kShatiH .. 26..
AtmArthatvena sarvasya prIteshchAtmA hyatipriyaH .
yathA pituH putramitrAtputraH priyatarastathA .. 27..
mA na bhUvamaha.n kintu bhUyAsa.n sarvadetyasau .
AshIH sarvasya dR^isteti pratyakShA prItirAtmani .. 28..
ityAdibhistribhiH prItau siddhAyAmevamAtmani .
putrabhAryAdisheShatvamAtmanaH kaishchidirritam .. 29..
etadvivakShayA putre mukhyAtmatva.n shrutIritam .
AtmA vai putranAmeti tachchopaniShadi sphuTam .. 30..
so.asyAyamAtmA puNyebhyaH karmebhyaH pratidhIyate .
athAsyetara AtmAya.n kR^itakR^ityaH pramIyate .. 31..
satyapyAtmani loko.asti nAputrasyAta eva hi .
anushiShTaM putrameva lokyamAhurmanIShiNaH .. 32..
manuShyaloko jayyaH syAtputreNaivetareNa no .
mumUrShurmantrayetputra.n tvaM brahmetyAdimantrakaiH .. 33..
ityAdishrutayaH prAhuH putrabhAryAdisheShatAm .
laukikA api putrasya prAdhAnyamanumanyate .. 34..
svasminmR^ite.api putrAdirjIvedvittAdinA yathA .
tathaiva yatna.n kurute mukhyAH putrAdayastataH .. 35..
bAdhametAvatA nAtmA sheSho bhavati kasya chit .
gauNamithyAmukhyabhedairAtmAyaM bhavati tridhA .. 36..
devadattastu si.nho.ayamityaikya.n gauNametayoH .
bhedasya bhAsamAnatvAtputrAderAtmatA tathA .. 37..
bhedo.asti pa~nchakoSheShu sAkShiNo na tu bhAtyasau .
mithyAtmatAtaH koShANA.n sthANorchaurAtmatA yathA .. 38..
na bhAti bhedo nApyasti sAkShiNo.apratiyoginaH .
sarvAntaratvAt tasyaiva mukhyamAtmatvamiShyate .. 39..
satyeva.n vyavahAreShu yeShu yasyAtmatochitA .
teShu tasyaiva sheShitva.n sarvasyAnyasya sheShatA .. 40..
mumUrShorgR^iharakShAdau gauNAtmaivopayujyate .
na mukhyAtmA na mithyAtmA putraH sheShI bhavatyataH .. 41..
adhyetA vahnirityatra sannapyagnirna gR^ihyate .
ayogyatvena yogyatvAdbaTurevAtra gR^ihyate .. 42..
kR^isho.ahaM puShTimApsyAmItyAdau dehAtmatochitA .
na putra.n viniyu~Nkte.atra puShTihetvannabhakShaNe .. 43..
tapasA svargameShyAmItyAdau kartrAtmatochitA .
anapekShya vapurbhoga.n charetkR^ichChrAdika.n tataH .. 44..
mokShye.ahamityatra yukta.n chidAtmatva.n tadA pumAn .
tadvetti gurushAstrAbhyA.n na tu ki.nchichchikIrShati .. 45..
viprakShatrAdayo yadvadbR^ihaspatisavAdiShu .
vyavasthitAstathA gauNamithyAmukhyA yathochitam .. 46..
tatra tatrochite prItirAtmanyevAtishAyinI .
anAtmani tu tachCheShe prItiranyatra nobhayam .. 47..
upekShya.n dveShyamityanyat dvedhA mArgatR^iNAdikam .
upekShya.n vyAghrasarpAdi dveShyameva.n chaturvidham .. 48..
AtmA sheSha upekShya.n cha dveShya.n cheti chaturShvapi .
na vyaktiniyamaH kintu tattatkAryAttathA tathA .. 49..
syAdvyAghraH saMmukho dveShyo hyupekShyastu parA~NmukhaH .
lAlanAdanukUlashchedvinodAyeti sheShatAm .. 50..
vyaktInA.n niyamo mA bhUllakShaNAttuvyavasthitiH .
AnukUlyaM prAtikUlya.n dvayAbhAvashcha lakShaNam .. 51..
AtmA preyAnpriyaH sheSho dveShyopekShye tadanyayoH .
iti vyavasthito loko yAj~navalkyamata.n cha tat .. 52..
anyatrApi shrutiH prAha putrAdvittAttathAnyataH .
sarvasmAdAntara.n tattva.n tadetatpreya IkShatAm .. 53..
shrautyA vichAradR^iShTyAya.n sAkShyevAtmA na chetaraH .
koShAnpa~ncha vivichyAntarvastudR^iShTirvichAraNA .. 54..
jAgarasvapnasuptInAmAgamApAyabhAsanam .
yato bhavatyasAvAtmA svaprakAshachidAtmakaH .. 55..
sheShAH prANAdivittAntA AsannAstAratamyataH .
prItistathA tAratamyAtteShu sarveShu vIkShyate .. 56..
vittAtputraH priyaH putrAtpiNDaH piNDAttathendriyam .
indriyAchcha priyaH prANaH prANAdAtmA paraH priyaH .. 57..
eva.n sthite vivAdo.atra pratibuddhavimUDhayoH .
shrutyodAhAri tatrAtmA preyAnityeva nirNayaH .. 58..
sAkShyeva dR^ishyAdanyasmAtpreyAnityAha tattvavit .
preyAnputrAdirevemaM bhoktu.n sAkShIti mUDhadhIH .. 59..
Atmano.anyaM priyaM brUte shiShyashcha prativAdyapi .
tasyottara.n vAcho bodhashApau kuryAttayoH kramAt .. 60..
priya.n tvA.n rotsyatItyevamuttara.n vakti tattvavit .
svoktapriyasya duShTatva.n shiShyo vetti vivekataH .. 61..
alabhyamAnastanayaH pitarau kleshayechchiram .
labdho.api garbhapAtena prasavena cha bAdhate .. 62..
jAtasya graharogAdi kumArasya cha mUkatA .
upanIte.apyavidyatvamanudvAhashcha paNDite .. 63..
punashcha paradArAdi dAridrya.n cha kuTumbinaH .
pitroH duHkhasya na astyanato dhanI chenmriyate tadA .. 64..
eva.n vivichya putrAdau prIti.n tyaktvA nijAtmani .
nishchitya paramAM prIti.n vIkShate tamaharnisham .. 65..
AgrahAdbrahmaviddveShAdapi pakShamamu~nchataH .
vAdino narakaH prokto doShashcha bahuyoniShu .. 66..
brahmavidbrahmarUpatvAdIshvarastena varNitam .
yadyattattattathaiva syAttachChiShyaprativAdinoH .. 67..
yastu sAkShiNamAtmAna.n sevate priyamuttamam .
tasya preyAnasAvAtmA na nashyati kadAchana .. 68..
parapremAspadatvena paramAnandarUpatA .
sukhavR^iddhiH prItivR^iddhau sArvabhaumAdiShu shrutA .. 69..
chaitanyavatsukha.n chAsya svabhAvashchechchidAtmanaH .
dhIvR^ittiShvanuvarteta sarvAsvapi chitiryathA .. 70..
maivamuShNaprakAshAtmA dIpastasya prabhA gR^ihe .
vyApnoti noShNatA tadvachchiterevAnuvartanam .. 71..
gandharUparasasparsheShvapi satsu yathA pR^ithak .
ekAkSheNaika evArtho gR^ihyate netarastathA .. 72..
chidAnandau naiva bhinnau gandhAdyAstu vilakShaNAH .
iti chet tadabhedo.api sAkShiNyanyatra vA vada .. 73..
Adye gandhAdayo.apyevamabhinnAH puShpavartinaH .
akShabhedena tadbhede vR^ittibhedAttayorbhidA .. 74..
satvavR^ittau chitsukhaikya.n tadvR^itternirmalatvataH .
rajovR^ittestu mAlinyAtsukhA.nsho.atra tiraskR^itaH .. 75..
tintiNIphalamatyamla.n lavaNena yuta.n yadA .
tadAmlasya tiraskArAdIShadagna.n yathA tathA .. 76..
nanu priyatamatvena paramAnandatAtmani .
vivektu.n shakyatAmeva.n vinA yogena kiM bhavet .. 77..
yadyogena tadevaiti vadAmo j~nAnasiddhaye .
yogaH prokto vivekena j~nAna.n ki.n nopajAyate .. 78..
yat sA~NkhyaiH prApyate sthAna.n tadyogairapi gamyate .
iti smR^itaM phalaikatva.n yoginA.n cha vivekinAm .. 79..
asAdhyaH kasyachidyogaH kasyachijj~nAnanishchayaH .
ittha.n vichAryamArgau dvau jagAda parameshvaraH .. 80..
yoge ko.atishayaste.atra j~nAnamukta.n sama.n dvayoH .
rAgadveShAdyabhAvashcha tulyo yogivivekinoH .. 81..
na prItirviShayeShvasti preyAnAtmeti jAnataH .
kuto rAgaH kuto dveShaH prAtikUlyamapashyataH .. 82..
dehAdeH pratikUleShu dveShastulyodvayorapi .
dveSha.n kurvanna yogI chedavivekyapi tAdR^ishaH .. 83..
dvaitasya pratibhAna.n tu vyavahAre dvayoH samam .
samAdhau neti chettadvannAdvaitatvavivekinaH .. 84..
vivakShyate tadasmAbhiradvaitAnandanAmake .
adhyAye hi tR^itIye tatsarvamapyatima~Ngalam .. 85..
sadA pashyannijAnandamapashyannakhila.n jagat .
arthAdyogIti chettarhi santuShTo vardhatAM bhavAn .. 86..
brahmAnandabhidhe granthe mandAnugrahasiddhaye .
dvitIye.adhyAya etasminnAtmAnando vivechitaH .. 87..

iti brahmAnande AtmAnandaH samAptaH .. 12..

\section{13\. brahmAnande.advaitAnandonAma \- trayodashaH parichChedaH .}
yogAnandaH purokto yaH sa AtmAnanda iShyatAm .
kathaM brahmatvametasya sadvayasyeti chechChR^iNu .. 1..
AkAshAdi svadehAnta.n taittirIyashrutIritam .
jagannAstyanyadAnandAtdadvaitabrahmatA tataH .. 2..
AnandAddhyeva tajjAta.n tiShThatyAnanda eva tat .
Ananda eva lIna.n chetyuktAnandAtkathaM pR^ithak .. 3..
kulAlAdghaTa utpanno bhinnashcheti na sha~NkyatAm .
mR^idvadeShaH upAdAna.n na nimitta.n kulAlavat .. 4..
sthitirlayashcha kumbhasya kulAle sto na hi kvachit .
dR^iShTau tau mR^idi tadvatsyAdupAdAna.n tayoH shruteH .. 5..
upAdAna.n tridhA bhinna.n vivarti pariNAmi cha .
Arambhaka.n cha tatrAntyau na nira.nshe.avakAshinau .. 6..
ArambhavAdino.anyasmAdanyasyotpattimUchire .
tantoH paTasya niShpatterbhinnau tantupaTau khalu .. 7..
avasthAntaratApattirekasya pariNAmitA .
syAt kShIra.n dadhi mR^itkumbhaH suvarNa.n kuNDala.n yathA .. 8..
avasthAntarabhAna.n tu vivarto rajjusarpavat .
nira.nshe.apyastyasau vyomni talamAlinyakalpanAt .. 9..
tato nira.nsha Anande vivarto jagadiShyatAm .
mAyAshaktiH kalpikA syAdaindra jAlikashaktivat .. 10..
shaktiH shaktAtpR^itha~NnAsti tadvaddR^iShTerna chAbhidA .
pratibandhasya dR^iShTatvAchChaktyabhAve tu kasya saH .. 11..
shakteH kAryAnumeyatvAdakArye pratibandhanam .
jvalato.agneradAhe syAnmantrAdi pratibandhatA .. 12..
devAtmashakti.n svaguNairnigUDhAM munayo.avidan .
parAsya shaktirvividhA kriyAj~nAnabalAtmikA .. 13..
iti vedavachaH prAha vasiShThashcha tathAbravIt .
sarvashaktiparaM brahma nityamApUrNamadvayam .. 14..
yathollasati shaktyAsau prakAshamadhigachChati .
chichChaktirbrahmaNo rAma##!## sharIreShUpalabhyate .. 15..
spandashaktishcha vAteShu dArDhyashaktistathopale .
dravashaktistathAmbhaHsu dAhashaktistathAnale .
shUnyashaktistathAkAshe nAshashaktirvinAshini .. 16..
yathANDAntarmahAsarpo jagadasti tathAtmani .
phalapatralatApuShpashAkhAviTapamUlavAn .
vR^ikShabIje yathA vR^ikShastathedaM brahmaNi sthitam .. 17..
kvachitkashchitkadAchichcha tasmAdudyanti shaktayaH .
deshakAlavichitratvAtkShmAtalAdiva shAlayaH .. 18..
sa AtmA sarvago rAma##!## nityoditamahAvapuH .
yanmanA~NmananI.n shakti.n dhatte tanmana uchyate .. 19..
Adau manastadanubandhavimokShadR^iShTI
     pashchAtprapa~ncharachanA bhuvanAbhidhAnA .
ityAdikA sthitiriya.n hi gatA pratiShThA\-
     mAkhyAyikA subhagabAlajanoditeva .. 20..
bAlasya hi vinodAya dhAtrI shakti shubhA.n kathAm .
kvachitsanti mahAbAho##!## rAjaputrAstrayaH shubhAH .. 21..
dvau na jAtau tathaikastu garbha eva hi na sthitaH .
vasanti te dharmayutA atyantAsati pattane .. 22..
svakIyAchChUnyanagarAnnirgatya vimalAshayAH .
gachChanto gagane vR^ikShAndadR^ishuH phalashAlinaH .. 23..
bhaviShyannagare tatra rAjaputrAstrayo.api te .
sukhamadya sthitA putra##!## mR^igayAvyavahAriNaH .. 24..
dhAtryaiva.n kathitA rAma##!## bAlakAkhyAyikA shubhA .
nishchaya.n sa yayau bAlo nirvichAraNayA dhiyA .. 25..
iya.n sa.nsAra rachanA vichArojjhitachetasAm .
bAlakAkhyAyikevetthamavasthitimupAgatA .. 26..
ityAdibhirupAkhyAnairmAyAshaktestu vistaram .
vasiShThaH kathayAmAsa saiva shaktirnirUpyate .. 27..
kAryAdAshrayataH saiShA bhavechChaktirvilakShaNA .
sphoTA~NgArau dR^ishyamAnau shaktistatrAnumIyate .. 28..
pR^ithubudhnodarAkAro ghaTaH kAryo.atra mR^ittikA .
shabdAdibhiH pa~nchaguNairyuktA shaktistvatadvidhA .. 29..
na pR^ithvAdirna shabdAdiH shaktAvastu yathA tathA .
ata eva hyachintyaiShA na nirvachanamarhati .. 30..
kAryotpatteH purA shaktirnigUDhA mR^idyavasthitA .
kulAlAdisahAyena vikArAkAratA.n vrajet .. 31..
pR^ithvyAdi vikArAnta.n sparshAdiguNamR^ittikAm .
ekIkR^itya ghaTaM prAhurvichAravikalA janAH .. 32..
kulAlavyApR^iteH pUrvo yAvAna.nsha sa no ghaTaH .
pashchAttu pR^ithubudhnAdimattve yuktA hi kumbhatA .. 33..
sa ghaTo na mR^ido bhinno viyoge satyanIkShaNAt .
nApyabhinnaH purA piNDadashAyAmanavekShaNAt .. 34..
ato.anirvachanIyo.aya.n shaktivattena shaktijaH .
avyaktavye shaktiruktA vyaktatye ghaTanAmabhR^it .. 35..
aindrajAlikaniShThApi mAyA na vyajyate purA .
pashchAdgandharvasenAdirUpeNa vyaktimApnuyAt .. 36..
evaM mAyAmayatvena vikArasyAnR^itAtmatAm .
vikArAdhAramR^idvastusatyatva.n chAbravIchChrutiH .. 37..
vA~NniShpAdya.n nAmamAtra.n vikAro nAsya satyatA .
sparshAdi guNayuktA tu satyA kevalamR^ittikA .. 38..
vyaktAvyakte tadAdhAra iti triShvAdyayordvayoH .
paryAyaH kAlabhedena tR^itIyastvanugachChati .. 39..
nistattvaM bhAsamAna.n cha vyaktamutpattinAshabhAk .
tadutpattau tasya nAma vAchA niShpAdyate nR^ibhiH .. 40..
vyakte naShTe.api nAmaitannR^ivaktreShvanuvartate .
tena nAmnA nirUpyatvAdvyakta.n tadrUpamuchyate .. 41..
nistattvatvAdvinAshitvAdvAchArambhaNanAmataH .
vyaktasya na tu tadrUpa.n satya.n ki~nchinmR^idAdivat .. 42..
vyaktakAle tataH pUrvamUrdhvamapyekarUpabhAk .
satattvamavinAsha.n cha satyaM mR^idvastu kathyate .. 43..
vyakta.n ghaTo vikArashchetyetairnAmabhirIritaH .
arthashchedanR^itaH kasmAnna mR^idbodhe nivartate .. 44..
nivR^itta eva yasmAtte tatsatyatvamatirgatA .
IdR^i~NnivR^ittirevAtra bodhajA na tvabhAsanam .. 45..
pumAnadhomukhaH nIre bhAto.apyasti na vastutaH .
taTasthamartyavattasminnaivAsthA kasyachitkvachit .
IdR^igbodhe pumarthatvaM matamadvaitavAdinAm .. 46
mR^idrUpasyAparityAgAdvivartatva.n ghaTe sthitam .
pariNAme pUrvarUpa.n tyajettatkShIrarUpavat .
mR^itsuvarNe nivartete ghaTakuNDalayorna hi .. 47..
ghaTe naShTe na mR^idbhAvaH kapAlAnAmavekShaNAt .
maiva.n chUrNe.asti mR^idrUpa.n svarNarUpa.n tvatisphuTam .. 48..
kShIrAdau pariNAmo.astu punastadbhAvavarjanAt .
etAvatA mR^idAdInA.n dR^iShTAntatva.n na hIyate .. 49..
ArambhavAdinaH kArye mR^ido dvaiguNyamApatet .
rUpasparshAdayaH proktAH kArya kAraNayoH pR^ithak .. 50..
mR^itsuvarNamayashcheti dR^iShTAntatrayamArUNiH .
prAhAto vAsayetkAryAnR^itatva.n sarvavastuShu .. 51..
kAraNaj~nAnataH kAryavij~nAna.n chApi so.avadat .
satyaj~nAne.anR^itaj~nA.n kathamatropapadyate .. 52..
samR^itkasya vikArasya kAryatA lokadR^iShTitaH .
vAstavo.atra mR^ida.nsho.asya bodhaH kAraNabodhataH .. 53..
anR^itA.nsho na boddhavyastadbodhAnupayogataH .
tattvaj~nAnaM pumartha.n syAnnAnR^ita a.nshAvabodhanam .. 54..
tarhi kAraNavij~nAnAtkaryaj~nAmitIrite .
mR^idbodhAnmR^ittikA buddhetyukta.n syAtko.atra vismayaH .. 55..
satya.n kAryeShu vastva.nshaH kAraNAtmeti jAnataH .
vismayo mAstvihAj~nasya vismayaH kena vAryate .. 56..
ArambhI pariNAmI cha laukikashchaikakAraNe .
j~nAte sarvamata.n shrutvA prApnuvantyeva vismayam .. 57..
advaite.abhimukhIkartumevAtraikasya bodhataH .
sarvabodhaH shrutau naiva nAnAtvasya vivakShayA .. 58..
ekamR^itpiNDavij~nAnAtsarvamR^iNmayadhIryathA .
tathaikabrahmabodhena jagadbuddhirvibhAvyatAm .. 59..
sachchitsukhAtmakaM brahma nAmarUpAtmaka.n jagat .
tApanIye shrutaM brahma sachchidAnandalakShaNam .. 60..
sadrUpamAruNiH prAha praj~nAnaM brahma bahvR^ichAH .
sanatkumAra Anandamevamanyatra gamyatAm .. 61..
vichintya sarvarUpANi kR^itvA nAmAni tiShThati .
aha.n vyAkaravANIme nAmarUpe iti shrutiH .. 62..
avyAkR^itaM purA sR^iShTerUrdhva.n vyAkrIyate dvidhA .
achintyashaktirmAyaiShA brahmaNyavyAkR^itAbhidhA .. 63..
avikriyabrahmaniShThA vikAra.n yAtyanekadhA .
mAyA.n tu prakR^iti.n vidyAnmAyina.n tu maheshvaram .. 64..
Adyo vikAra AkAshaH so.asti bhAtyapi cha priyaH .
avakAshastasya rUpa.n tanmithyA na tu tattrayam .. 65..
na vyakteH pUrvamastyeva na pashchAchcha vinAshataH .
AdAvante cha yannAsti vartamAne.api tattathA .. 66..
avyaktAdIni bhUtAni vyaktamadhyAni bhArata .
avyaktanidhanAneevetyAha kR^iShNo.arjunaM prati .. 67..
mR^idvatte sachchidAnandA anugachChanti sarvada .
nirAkAshe sadAdInAmanubhUtirnijAtmani .. 68..
avakAshe vismR^ite.atha tatra kiM bhAti te vada .
shUnyameveti chedastu nAma tAdR^igvibhAti hi .. 69..
tAdR^iktvAdeva tatsattvamaudAsInyena tatsukham .
AnukUlyaprAtikUlyahIna.n yattannija.n sukham .. 70..
AnukUlye harShadhIH syAtprAtikUlye tu duHkhadhIH .
dvayAbhAve nijAnando nija.n duHkha.n tu na kvachit .. 71..
nijAnande sthite harShashokayorvyatyayaH kShaNAt .
manasaH kShaNikatvena tayormAnasateShyatAm .. 72..
AkAshe.apyevamAnandaH sattAbhAne tu saMmate .
vAyvAdidehaparyantavastuShveva.n vibhAvyatAm .. 73..
gatisparshau vAyurUpa.n vahnerdAhaprakAshane .
jalasya dravatA bhUmeH kAThinya.n cheti nirNayaH .. 74..
asAdhAraNa AkAshe oShadhyannavapuHShvapi .
eva.n vibhAvya manasA tattadrUpa.n yathochitam .. 75..
anekadhA vibhinneShu nAmarUpeShu chaikadhA .
tiShThanti sachchidAnandAvisa.nvAdaH na kasyachit .. 76..
nistattve nAmarUpe dve janmanAshayute cha te .
buddhyA brahmaNi vIkShasva samudre budbudAdivat .. 77..
sachchidAnandarUpe.asmin pUrNe brahmaNi vIkShite .
svayamevAvajAnAti nAmarUpe shanaiH shanaiH .. 78..
yAvadyAvadavaj~nA syAttAvattAvattadIkShaNam .
yAvadyAvadvIkShyate tattAvattAvadubhe tyajet .. 79..
tadabhyAsena vidyAyA.n susthitAyAmayaM pumAn .
jIvanneva bhavenmukto vapurastu yathA tathA .. 80..
tachchintana.n tatkathanamanyonya.n tatprabodhanam .
etadekaparatva.n cha tadabhyAsa.n vidurbudhAH .. 81..
vAsanAnekakAlinA dIrghakAla.n nirantaram .
sAdara.n chAbhyasyamAne sarvathaiva nivartate .. 82..
mR^ichChaktivadbrahmashaktiranekAnanR^itAnsR^ijet .
yadvA jIvagatA nidrA svapnashchAtra nidarshanam .. 83..
nidrAshaktiryathA jIve durghaTasvapnakAriNI .
brahmaNyeShA tathA mAyA sR^iShTisthityantakAriNI .. 84..
svapne viyadgatiM pashyetsvamUrdhachChedana.n yathA .
muhUrte vatsaraugha.n cha mR^itaM putrAdikaM punaH .. 85..
ida.n yuktamida.n neti vyavasthA tatra durlabhA .
yathA yathekShyate yadyattattadyukta.n tathA tathA .. 86..
IdR^isho mahimA dR^iShTo nidrAshakteryadA tadA .
mAyAshakterachintyo.ayaM mahimeti kimadbhutam .. 87..
shayAne puruShe nidrA svapnaM bahuvidha.n sR^ijet .
brahmaNyeva.n nirvikAre vikArAnkalpayatyasau .. 88..
khAnilAgnijalorvyaNDalokaprANishilAdikAH .
vikArAH prANidhIShvantashchichChAyA pratibimbati .. 89..
chetanAchetaneShveShu sachchidAnandalakShaNam .
samAnaM brahma bhidyete nAmarUpe pR^ithakpR^ithak .. 90..
brahmaNyete nAmarUpe paTe chitramiva sthite .
upekShya nAmarUpe dve sachchidAnandadhIrbhavet .. 91..
jalasthe.adhomukhe svasya dehe dR^iShTe.apyupekShya tam .
tIrastha eva dehe sve tAtparya.n syAdyathA tathA .. 92..
sahasrasho manorAjye vartamAne sadaiva tat .
sarvairUpekShyate tadvadupekShA nAmarUpayoH .. 93..
kShaNe kShaNe manorAjyaM bhavatyevAnyathAnyathA .
gata.n gataM punarnAsti vyavahAro bahistathA .. 94..
na bAlya.n yauvane labhya.n yauvana.n sthavire tathA .
mR^itaH pitA punarnAsti nAyAtyeva gata.n dinam .. 95..
manorAjyAdvisheShaH kaH kShaNadhva.nsini laukike .
ato.asminbhAsamAne.api tatsatyatvadhiya.n tyajet .. 96..
upekShite laukike dhIrnirvighnA brahmachintane .
naTavatkR^itrimAsthAyA.n nirvahatyeva laukikam .. 97..
pravahatyapi nIre.adhaH sthirA prauDha shilA yathA .
nAmarUpAnyathAtve.api kUTasthaM brahma nAnyathA .. 98..
niShChidre darpaNe bhAti vastugarbhaM bR^ihadviyat .
sachchitghane tathA nAnAjagadgarbhamida.n viyat .. 99..
adR^iShTvA darpaNa.n naiva tadantasthe kShaNa.n yathA .
amatvA sachchidAnanda.n nAmarUpamatiH kutaH .. 100..
prathama.n sachchidAnande bhAsamAne.atha tAvatA .
buddhi.n niyamya naivordhva.n dhArayennAmarUpayoH .. 101..
eva.n cha nirjagadbrahma sachchidAnandalakShaNam .
advaitAnanda etasminvishrAmyantu janAshchiram .. 102..
brahmAnandAbhidhe granthe tR^itIye.adhyAya IritaH .
advaitAnanda eva syAjjaganmithyAtvachintayA .. 103..

iti brahmAnande.advaitAnandaH samAptaH .. 13..

\section{14\. brahmAnande vidyAnandonAma \- chaturdashaH parichChedaH .}
yogenAtmavivekena dvaitamithyAtvachintayA .
brahmAnandaM pashyato.atha vidyAnando nirUpyate .. 1..
viShayAnandavadvidyAnandodhIvR^ittirUpkaH .
duHkhAbhAvAdirUpeNa prokta eSha chaturvidhaH .. 2..
duHkhAbhAvashcha kAmAptiH kR^itakR^ityo.ahamityasau .
prAptaprApyo.ahamityeva.n chAturvidhyamudAhR^itam .. 3..
aihika.n cha AmuShmika.n chetyeva.n duHkha.n dvidheritam .
nivR^ittimaihikasyAha bR^ihadAraNyaka.n vachaH .. 4..
AtmAna.n chedvijAnIyAdayamasmIti pUruShaH .
kimichChankasya kAmAya sharIramanusa.njvaret .. 5..
jIvAtmA paramAtmA chetyAtmA dvividha IritaH .
chittAdAtmyAttribhirdehairjIvaH sanbhoktR^itA.n vrajet .. 6..
paramAtmA sachchidAnandastAdAtmya.n nAmarUpayoH .
gatvA bhogyatvamApannastadviveke tu nobhayam .. 7..
bhogyamichChanbhokturarthe sharIramanusa.njvaret .
jvarAstriShu sharIreShu sthitA na tvAtmano jvarAH .. 8..
vyAdhayo dhAtuvaiShamye sthUladehe sthitA jvarAH .
kAmakrodhAdayaH sUkShme dvayorbIja.n tu kAraNe .. 9..
advaitAnandamArgeNa parAtmani vivechite .
apashyanvAstavaM bhogya.n ki.n nAmechChetparAtmavit .. 10..
AtmAnandoktarItyAsminjIvAtmanyavadhArite .
bhoktA naivAsti ko.apyatra sharIrAnujvaraH kutaH .. 11..
puNyapApadvaye chintA duHkhamAmuShmikaM bhavet .
prathamAdhyAya evokta.n chintA naina.n tapediti .. 12..
yathA puShkaraparNe.asminnapAmashleShaNa.n tathA .
vedanAdUrdhvamAgAmikarmaNo.ashleShaNaM budhe .. 13..
iShIkAtR^iNatUlasya vahnidAhaH kShaNAdyathA .
tathA sa~nchitakarmAsya dagdhaM bhavati vedanAt .. 14..
yathaidhA.nsi samiddho.agnirbhasmasAtkurute.arjuna .
j~nAnAgniH sarvakarmANi bhasmasAtkurute tathA .. 15..
yasya nAha.nkR^ito bhAvo buddhiryasya na lipyate .
hatvApi sa imA.n lokAnna hanti na nibadhyate .. 16..
mAtApitrorvadhaH steyaM bhrUNahatyAnyadIdR^isham .
na mukti.n nAshayetpApaM mukhakAntirna nashyati .. 17..
duHkhAbhAvavadevAsya sarvakAmAptirIritA .
sarvAnkAmAnasAvApya hyamR^ito bhavadityataH .. 18..
jakShankrIDanratiM prAptaH strIbhiryAnaistathetaraiH .
sharIra.n na smaretprANa.n karmaNA jIvayedamum .. 19..
sarvAnkAmAnsahApnoti nAnyavajjanmakarmabhiH .
vartante shrotriye bhogA yugapatkramavarjitAH .. 20..
yuvA rUpI cha vidyAvAnnIrogo dR^iDhachittavAn .
sainyopetaH sarvapR^ithvI.n vittapUrNAM prapAlayan .. 21..
sarvairmAnuShyakairbhogaiH sampannastR^iptabhUmipaH .
yamAnandamavApnoti brahmavichcha tamashnute .. 22..
martyebhoge dvayornAsti kAmastR^iptirataH samA .
bhogAnniShkAmataikasya parasyApi vivekataH .. 23..
shrotriyatvAdvedashAstrairbhogyadoShAnavekShate .
rAjA bR^ihadratho doShA.nstAngAthAbhirudAharat .. 24..
dehadoShAshchittadoShA bhogyadoShA anekashaH .
shunA vAnte pAyase no kAmastadvadvivekinaH .. 25..
niShkAmatve same.apyatra rAj~naH sAdhana sa~nchaye .
duHkhamAsIdbhAvinAshAditibhIranuvartate .. 26..
nobhaya.n shrotriyasyAtastadAnando.adhiko.anyataH .
gandharvAnanda AshAsti rAj~no nAsti vivekinaH .. 27..
asminkalpe manuShyaH sanpuNyapApavisheShataH .
gandharvatva.n samApanno martyo gandharva uchyate .. 28..
pUrvakalpe kR^itAtpuNyAtkalpAdAveva chedbhavet .
gandharvatva.n tAdR^iSho.atra devagandharva uchyate .. 29..
agniShvAttAdayo loke pitarashchiravAsinaH .
kalpAdAveva devatva.n gatA AjAnadevatAH .. 30..
asminkalpe.ashvamedhAdi karma kR^itvA mahatpadam .
avApyAjAnadevairyAH pUjyAstAH karmadevatAH .. 31..
yamAgnimukhyAH devAH syurjAtAvindrabR^ihaspatI .
prajApatirvirAT prokto brahmA sUtrAtmanAmakaH .. 32..
sArvabhaumAdisUtrAntA uttarottarakAminaH .
avA~Nmanasagamyo.ayamAtmAnandastataH paraH .. 33..
taiHstaiH kAmyeShu sarveShu sukheShu shrotriyo yataH .
nispR^ihastena sarveShAmAnandAH santi tasya te .. 34..
sarvakAmAptireShoktA yadvA sAkShi chidAtmatA .
svadehavatsarvadeheShvapi bhogAnavekShate .. 35..
aj~nasyApyetadastyeva na tu tR^iptirabodhataH .
yo veda so.ashnute sarvAnkAmAnitiyabravIchChrutiH .. 36..
yadvA sarvAtmatA svasya sAmnA gAyati sarvadA .
ahamanna.n tathAnnAdashcheti sAmasvadhIyate .. 37..
duHkhAbhAvashcha kAmAptirubhe hyeva.n nirUpite .
kR^itakR^ityatvamanyachcha prAptaprApyatvamIkShyatAm .. 38..
ubhaya.n tR^iptidIpe hi samyagasmAbhirIritam .
ta evAtrAnusandheyAH shlokA buddhivishuddhaye .. 39..
aihikAmuShmikavrAtasiddhyai mukteshcha siddhaye .
bahu kR^ityaM purAsyAbhUttatsarvamadhunA kR^itam .. 40..
tadetatkR^itakR^ityatvaM pratiyogipuraHsaram .
anusandadhadevAyameva.n tR^ipyati nityashaH .. 41..
duHkhino.aj~nAH sa.nsarantu kAmaM putrAdyapekShayA .
paramAnandapUrNo.aha.n sa.nsarAmi kimichChayA .. 42..
anutiShThantu karmANi paralokayiyAsavaH .
sarvalokAtmakaH kasmAdanutiShThAmi ki.n katham .. 43..
vyAchakShatA.n te shAstrANi vedAnadhyApayantu vA .
ye.atrAdhikAriNo me tu nAdhikAro.akriyatvataH .. 44..
nidrAbhikShe snAnashauche nechChAmi na karomi cha .
draShTArashchetkalpayanti kiM me syAdanyakalpanAt .. 45..
gu~njApu~njAdi dahyeta nAnyAropitavahninA .
nAnyAropitasa.nsAradharmAnevamahaM bhaje .. 46..
shR^iNvantvaj~nAtatattvAste jAnankasmAchChR^iNomyaham .
manyantA.n sa.nshayApannA na manye.ahamasa.nshayaH .. 47..
viparyasto nididhyAsetki.n dhyAnamaviparyayAt .
dehAtmatvaviparyAsa.n na kadAchidbhajAmyaham .. 48..
ahaM manuShya ityAdivyavahAro vinApyamum .
viparyAsa.n chirAbhyastavAsanAto.avakalpate .. 49..
prArabdhakarmaNi kShINe vyavahAro nivartate .
karmAkShaye tvasau naiva shAmyeddhyAnasahasrataH .. 50..
viralatva.n vyavahR^iteriShTa.n cheddhyAnamastu te .
abAdhikA.n vyavahR^itiM pashyandhyAyAmyaha.n kutaH .. 51..
vikShepo nAsti yasmAnme na samAdhistato mama .
vikShepo vA samAdhirvA manasaH syAdvikAriNaH .. 52..
nityAnubhavarUpasya ko me vA.anubhavaH pR^ithak .
kR^ita.n kR^ityaM prApaNIyaM prAptamityeva nishchayaH .. 53..
vyavahAro laukiko vA shAstrIyo vA.anyathA.api vA .
mamAkarturalepasya yathA.a.arabdhaM pravartatAm .. 54..
athavA kR^itakR^ityo.api lokAnugrahakAmayA .
shAstrIyeNaiva mArgeNa varte.aha.n kA mama kShatiH .. 55..
devArchanasnAnashauchabhikShAdau vartatA.n vapuH .
tAra.n japatu vAktadvatpaThatvAmnAyamastakam .. 56..
viShNu.n dhyAyatu dhIryadvA brahmAnande vilIyatAm .
sAkShyaha.n ki~nchidapyatra na kurve nApi kAraye .. 57..
kR^itakR^ityatayA tR^iptaH prAptaprApyatayA punaH .
tR^ipyanneva.n svamanasA manyate.asau nirantaram .. 58..
dhanyo.aha.n dhanyo.aha.n nitya.n svAtmAnama~njasA vedmi .
dhanyo.aha.n dhanyo.ahaM brahmAnando vibhAti me spaShTam .. 59..
dhanyo.aha.n dhanyo.aha.n duHkha.n sA.nsArika.n na vIkShe.adya .
dhanyo.aha.n dhanyo.aha.n svasyAj~nAnaM palAyita.n kvApi .. 60..
dhanyo.aha.n dhanyo.aha.n kartavyaM me na vidyate ki~nchit .
dhanyo.aha.n dhanyo.ahaM prAptavya.n sarvamadya sampannam .. 61..
dhanyo.aha.n dhanyo.aha.n tR^ipterme kopamA bhavelloke .
dhanyo.aha.n dhanyo.aha.n dhanyo dhanyaH punaH punardhanyaH .. 62..
aho puNyamaho puNyaM phalitaM phalita.n dR^iDham .
asya puNyasya sampatteraho vayamaho vayam .. 63..
aho shAstramaho shAstramaho gururaho guruH .
aho j~nAnamaho j~nAnamaho sukhamaho sukham .. 64..
brahmAnandAbhidhe granthe chaturtho.adhyAya IritaH .
vidyAnandastadutpattiparyanto.abhyAsa iShyatAm .. 65..

iti brahmAnande vidyAnandaH samAptaH .. 14..

\section{15\. brahmAnande viShayAnando nAma \- pa~nchadashaH parichChedaH .}
athAtra viShayAnando brahmAnandA.nsharUpabhAk .
nirUpyate dvArabhUtastada.nshatva.n shrutirjagau .. 1..
eSho.asya paramAnando yo.akhaNDaikarasAtmakaH .
anyAni bhUtAnyetasya mAtrAmevopabhu~njate .. 2..
shAntA ghorAstathA mUDhA manaso vR^ittayastridhA .
vairAgya.n kShAntiraudAryamityAdyAH shAntavR^ittayaH .. 3..
tR^iShNA sneho rAgalobhAvityAdyA ghoravR^ittayaH .
saMmohobhayamityAdyAH kathitA mUDhavR^ittayaH .. 4..
vR^ittiShvetAsu sarvAsu brahmaNashchitsvabhAvatA .
pratibimbati shAntAsu sukha.n cha pratibimbati .. 5..
rUpa.n rUpa.n babhUvAsau pratirUpa iti shrutiH .
upamA sUryaketvAdi sUtrayAmAsa sUtrakR^it .. 6..
eka eva hi bhUtAtmA bhUte bhUte vyavasthitaH .
ekadhA bahudhA chaiva dR^ishyate jalachandravat .. 7..
jale praviShTashchandro.ayamaspaShTaH kaluShe jale .
vispaShTo nirmale tadvaddvedhA brahmApi vR^ittiShu .. 8..
ghoramUDhAsu mAlinyAtsukhA.nshasya tiraskR^itiH .
IShannairmalyatastatra chida.nshapratibimbanam .. 9..
yadvApi nirmale nIre vahnerauShNyasya sa.nkramaH .
na prakAshasya tadvatsyAchchinmAtrodbhUtiratra cha .. 10..
kAShThe tvauShNyaprakAshau dvAvudbhava.n gachChato yathA .
shAntAsu sukhachaitanye tathaivodbhUtimApnutaH .. 11..
vastusvarUpamAshritya vyavasthA tUbhayoH samA .
anubhUtyanusAreNa kalpyate hi niyAmakam .. 12..
na ghorAsu na mUDhAsu sukhAnubhava IkShyate .
shAntAsvapi kvachitkashchitsukhAtishaya IshyatAm .. 13..
gR^ihakShetrAdiviShaye yadA kAmo bhavettadA .
rAjasasyAsya kAmasya ghoratvAttatra no sukham .. 14..
siddhyenna vetyasti duHkhamasiddhau tadvivardhate .
pratibandhe bhavetkrodho dveSho vA pratibandhakaH .. 15..
ashakyashchetpratIkAro viShadaH syAtsa tAnasaH .
krodhAdiShu mahAduHkha.n sukhasha~NkApi dUrataH .. 16..
kAmyalAbhe harShavR^ittiH shAntA tatra mahatsukham .
bhoge mahattara.n lAbhaprasaktAvIShadeva hi .. 17..
mahattama.n viraktau tu vidyAnande tadIritam .
eva.n kShAntau tathaudArye krodhalobhanivAraNAt .. 18..
yadyatsukhaM bhavettattadbrahmaiva pratibimbanAt .
vR^ittiShvantarmukhA svasya nirvighnaM pratibimbanam .. 19..
sattA chitiH sukha.n cheti svabhAvA brahmaNastrayaH .
mR^ichChilAdiShu sattaiva vyajyate netaraddvayam .. 20..
sattA chitirdvaya.n vyakta.n dhIvR^ittyorghoramUDhayoH .
shAntavR^ittau traya.n vyaktaM mishraM brahmetthamIritam .. 21..
amishra.n j~nAnayogAbhyA.n tau cha pUrvamudIritau .
Adye.adhyAye yogachintA j~nAnamadhyAyordvayoH .. 22..
asattA jADyaduHkhe dve mAyArUpa.n traya.n tvidam .
asattA narashR^i~NgAdau jADya.n kAShThashilAdiShu .. 23..
ghoramUDhadhiyorduHkhamevaM mAyA vijR^imbhitA .
shAntAdi buddhivR^ittyaikyAnmishraM brahmeti kIrtitam .. 24..
eva.n sthite.atra yo brahma dhyAtumichChetpumAnasau .
nR^ishR^i~NgAdimupekSheta shiShTa.n dhyAyedyathAyatham .. 25..
shilAdau nAmarUpe dve tyaktvA sanmAtrachintanam .
tyaktvA duHkha.n ghoramUDhadhiyoH sachchidvichintanam .. 26..
shAntAsu sachchidAnandA.nstrInapyeva.n vichintayet .
kaniShThamadhyamotkR^iShTAstisrashchintAH kramAdimAH .. 27..
mandasya vyavahAre.api mishrabrahmaNi chintanam .
utkR^iShTa.n vyaktumevAtra viShayAnanda IritaH .. 28..
audAsInye tu dhIvR^itteH shaithilyAduttamottamam .
chintana.n vAsanAnande dhyAnamukta.n chaturvidham .. 29..
na dhyAna.n j~nAnayogAbhyAM brahmavidyaiva sA khalu .
dhyAnenaikAgryamApanne chitte vidyA sthirIbhavet .. 30..
vidyAyA.n sachchidAnandA akhaNDaikarasAtmatAm .
prApya bhAnti na bhedena bhedakopAdhivarjanAt .. 31..
shAntA ghorAH shilAdyAshcha bhedakopAdhayo matAH .
yogAd vivekato vaiShamupAdhInAmapAkR^itiH .. 32..
nirupAdhibrahmatattve bhAsamAne svayaMprabhe .
advaite tripuTI nAsti bhUmAnando.ata uchyate .. 33..
brahmAnanda abhidhe granthe pa~nchamo.adhyAya IritaH .
viShayAnanda etena dvAreNAntaH praveshyatAm .. 34..
prIyAddhariharo.anena brahmAnandena sarvadA .
pAyAchcha prANinaH sarvAnsvAshritA.n shuddhamAnasAn .. 35..

iti brahmAnande viShayAnandaH samAptaH .. 15..

iti shrImatparamaha.nsaparivrAjakAchArya
shrI vidyAraNyamunivirachitaH pa~nchadashI granthaH samAptaH .

##
Encoded and proofread by Sunder Hattangadi

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}