% Text title            : prANAbharNa
% File name             : prANAbharNa.itx
% Category              : major\_works
% Location              : doc\_z\_misc\_major\_works
% Author                : paNDitarAjashrIjagannAtha
% Transliterated by     : Dhaval Patel drdhaval2785 at gmail.com
% Proofread by          : Dhaval Patel drdhaval2785 at gmail.com
% Description-comments  : The text is written by Jagannatha Pandita in honour of king Prananarayana of Kamarupa.  https://bsvprasad.wordpress.com/2013/09/23/jagannatha-pandita-raya/
% Latest update         : September 15, 2014
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Pranabharanam ..}##
\itxtitle{.. prANAbharaNaM paNDitarAjashrIjagannAthavirachitam ..}##\endtitles ##

atha paNDitarAjashrIjagannAthavirachitaM prANAbharaNam |
tatkR^itayaiva TippaNyA sametam |

vidvAMso vasudhAtale paravachaHshlAghAsu vAchaMyamA
bhUpAlAH kamalAvilAsamadironmIlanmadAghUrNitAH |
Asye ghAsyati kasya lAsyamadhunA dhanyasya kAmAlasa\-
svarvAmAdharamAdhurImadharayanvAchAM vilAso mama || 1||
vidvAMsa ityAdi prAyadarshanAbhiprAyametat | tena sahR^idayairna manAgapi
vimanAyitavyam | bhAvadhvanishchAyam | uttarArdhapratipAdyArthAlambanAyA
etatpadyaprayogAnubhAvAyAH kavigatachintAyAH prAdhAnyenAbhivyakteH |
anupAttobhayanimittako vyatirekaH sphuTo.alaMkAraH | kAmAlasatvaM
vAmAvisheShamadharamAdhurIprakarShakam ||

vidrANaiva guNaj~natA samudito bhUyAnasUyAbharaH
kAlo.ayaM kalirAjagAma jagatIlAvaNyakukShiMbhariH |
evaM bhAvanayA madIyakavite maunaM kimAlambase
jAgartu kShitimaNDale chiramiha shrIkAmarUpeshvaraH || 2||
kavigatarAjaviShayakaratibhAvadhvanishchAyam | ita Urdhvamayameva A
charamapadyamanuvartayiShyate | asya chAtra maunAnubhAvito varNanIyAlambano
nirvedo guNa iti preyolaMkArAspadam | atra chAchetanAyAM kavitAyAM
chetanatvAdhyavasAyamUlAsaMbandhe saMbandhAtmikAtishayoktirvivakShitA |
tena bhAvanAmaunanirvedAnAM saMbodhanasya cha nAnupapattiH ||

pArIndrANAM ghurINairavanitalaguhAgarbhataH sampatadbhiH
svApabhraMshAparAdhaprachalitanayanaprAntamAkarNyamAnaH |
tvatprasthAnAntarudyatpralayajaladharadhvAnadhikkAradhIro
ghR^iShTakShIrodatIro jagati vijayate dundubhidvandvanAdaH || 3||
atra rAjAlambanasya tAdR^ishanAdashravaNoddIpitasya
nayanaprachalanAnubhAvitasya giriguhAgarbhotpatanAbhivyaktenAmarSheNa
saMchAriNA paripoShitasya pArIndragatotsAhasya sthAyino
rAjaviShayakaratibhAvA~NgatvAdrasAlaMkAratvam | yadAhuH \- 'pradhAne.anyatra
vAkyArthe yatrA~NgaM tu rasAdayaH | kAvye tasminnalaMkAro rasAdiriti me
matiH ||' iti  | tR^itIyachaturthacharaNayostu sphuTAveva vyatirekAtishayau |
ghR^iShTAshabdena tAdR^ishanAdo velAchalapratibaddhatvAdagre na gataH |
anyathA lokAlokAchalamapi spR^ishediti gamyate | eva mR^iShTeti noktam |
tathA sati shaithilyapratyayApatteH ||

kiM brUmastava vIratAM vayamamI yasmindharAkhaNDala
krIDAkuNDalitabhru shoNanayanaM dormaNDalaM pashyati |
mANikyAvalikAntidanturatarairbhUShAsahasrotkarai\-
rvindhyAraNyaguhAgR^ihAvaniruhAstatkAlamullAsitAH || 4||
atra vindhyAraNyagatAnAM guhAgR^ihANAmavaniruhAM cha vindhyagatAnAM
guhAgR^ihANAmaraNyagatAnAmavaniruhANAM vA bhUShaNena kAryeNAprastutena
tvadarinArINAM svanagarANi parityajya nishi guhAgR^iheShu tarutaleShu cha
vinyasya sakalAbharaNAni kR^itashayanAnAM prAtastvadAgamanasaMbhrameNa
tatkarmakaM vismaraNaM bhAravashAtparityAgo vA prastuto gamyata
ityaprastutaprashaMsA | kAryasya yathAkathaMchitprastutatve tu
paryAyoktamalaMkAraH ||

mAhAtmyasya paro.avadhirnijagR^ihaM gambhIratAyAH pitA
ratnAnAmahameka eva bhuvane ko vAparo mAdR^ishaH |
ityevaM parichintya mA sma sahasA garvAndhakAraM gamo
dugdhAbdhe bhavatA samo vijayate shrIprANanArAyaNaH || 5||
atropamAnasya guNavisheShaprayuktasAdR^ishyAbhAvanibandhanamutkarShaM
parihartuM varNyamAnasAdR^ishyAtmakaH pratIpAlaMkArabhedaH | sa chopamAvisheSha
ityeke | vichChittivailakShaNyAdatirikta evetyapare ||

tattvo janma sitAMshushekharatanujyotsnAnimagnAtmano
dugdhAmbhonidhimugdhavIchivalayaiH sAkaM parikrIDanam |
saMvAsaH suralokasindhupuline vAdaH sudhAMshoH karaiH
kasmAnnojjvalimAnama~nchatutamAM deva tvadIyaM yashaH || 6||
atra yashasi dhavalatAtishayastaddharmisaMbandhaprayuktatvena kathita
iti samasya viShayaH | aMshukR^itashchandre tatkR^itashcha bhagavati
bhagavatkR^itashcha rAjanItyevamuttarottaramupachIyamAno rAjagata utkarShaH
pratIyata iti sAraviShayaH ||

AbadhnAsyalakAnnirasyasitamAM cholaM rasAkA~NkShayA
la~NkAyAvashatAM tanoShi kuruShe ja~NghAlalATakShatam |
pratya~NgaM parimardanirdayamaho chetaH samAlambase
vAmAnAM viShaye nR^ipendra bhavataH prAgalbhyamadbhutam || 7||
atra prakR^itidharmigatayoH prakR^itAprakR^itayoH prakR^itayoreva vA
vR^ittAntayoH shleShaH | sa cha ShaTsu sthaleShu shabdanAnAtvanibandhano
dvayoshchArthanAnAtvanibandhanaH | dvAvapyetau shabdAlaMkArAviti
prA~nchaH | Adyo jatukAShThanyAyena shabdashleShaNAchChabdAlaMkAraH,
dvitIyastvekavR^intagataphaladvayanyAyenArthashleShaNAdarthAlaMkAra iti
navyAH ||

deva tvAM paritaH stavantu kavayo lobhena kiM tAvatA
stavyastvaM bhavitAsi yasya taruNashchApapratApo.anisham |
kroDAntaH kurutetarAM vasumatImAshAH samAli~Ngati
dyAM chumbatyamarAvatI cha sahasA gachChatyagamyAmapi || 8||
atra pratApagataH pR^ithivyAdisaMbandho
li~NgavisheShAvachChinnatattatsAdhAraNavisheShaNAbhivyaktakAmukavR^ittAntAbhinnatayA
sthita iti samAsoktiH kAryarUpadharmaprayuktashuddhasAdhAraNyena
visheShaNasAmyamAlambya pravR^ittA | sA cha nindotthApakatvAdadvyAjastutau
guNaH ||

lokAnAM vipadaM dhunoShi kuruShe sampattimatyutkaTA\-
mityalpetarajalpitairjaDadhiyAM bhUpAla mA gA madam |
yatkIrtistava vallabhA laghutarabrahmANDabhANDodare
piNDIkR^itya mahonnatAmapi tanuM kaShTena hA vartate || 9||
atrApi prAgvat | paraM
tvAdhArAdheyAnyataravistR^itatvasiddhiphalakAnyataranyUnatvakalpanAtsAdhikAlaMkAro.api
tasyAM guNaH ||

kShoNIM shAsati mayyupadravalavaH kasyApi na syAditi
prauDhaM vyAharato vachastava kathaM deva pratImo vayam |
pratyakShaM bhavato vipakShanivahairdyAmutpatadbhiH krudhA
yadyuShmatkulakoTimUlapuruSho nirbhidyate bhAskaraH || 10||
iha tvadhikasamAsoktibhyAmanAli~Ngitaiva sA [vyAjastutiH] ||

AsvAdena raso rasena kavitA kAvyena vaNI tayA
lokAntaHkaraNAnurAgarasikaH sabhyaH sabhA chAmunA |
dAridryAnaladahyamAnajagatIpIyUShadhArAdhara
kShoNInAtha tathA bhavAMshcha bhavatA bhUmaNDalaM bhAsate || 11||
mAlAdIpakametaditi prA~nchaH | dIpakasya sAdR^ishyamUlakatAniyamAnna
mAlAdIpakamapi tvekAvalIbheda iti tu vayam ||

amlAyanyadarAtikairavakulAnyamlAsiShuH satvaraM
dainyadhvAntakadambakAni parito neshustamAM tAmasAH |
sanmArgAH prasaranti sAdhunalinAnyullAsamAtanvate
tanmanye bhavataH pratApatapano deva prabhAtonmukhaH || 12||
iha rUpakaniShpAditali~NgakamanumAnaM nimittavirahAdutprekShAyA
ayogAdvAchakamanumitiparam ||

utkShiptAH kabarIbharaM vivalitAH pArshvadvayaM nyakkR^itAH
pAdAmbhojayugaM ruShA parihR^itA dUreNa chelA~nchalam |
gR^ihNanti tvarayA bhavatpratibhaTakShmApAlavAmabhruvAM
yAntInAM gahaneShu kaNTakachitAH ke ke na bhUmIrUhAH || 13||
atra kaNTakachitatvena kabarIgrahaNAdeH saMkIrNatvAtkAryadharmAntarA
saMkIrNashuddhasAdhAraNyena visheShaNasAmyamAlambya pravR^ittA samAsoktiH ||

dR^iShTiH saMbhR^itama~NgalA budhamayI deva tvadIyA sabhA
kAvyasyAshrayabhUtamAsyamaruNAdhAro.adharaH sundaraH |
krodhaste.ashanimUrudAradhiShaNa svAntaM tu somAspadaM
rAjannUnamanUnavikrama bhavAnsarvagrahAlambanam || 14||
atrotprekShyamAnasarvagrahAlambanatvasya samAnAdhikaraNeShu dharmeShu
tattadgrahAshritA~NgakatveShu visheShaNIbhUtaistattadgrahaiH saha
viShayasya rAj~no kalyANAshrayatvAdiShu visheShaNAnAM kalyANAdInAM
shleSheNAbhedasampAdanadvArA tAdR^ishadharmasAdhAraNatAsampattau
tannimittakotprekShAsiddhiH ||

sR^iShTiH sR^iShTibhuvA purA kila paritrAtuM jaganmaNDalaM
tvaM chaNDAtapanirdayaM tapasi yajjvAlAjaTAlaiH karaiH |
saMrambhAruNalochano raNabhuvi prasthAtukAmo.adhunA
jAnImo bhavatA na hanta viditaH shrIkAmarUpeshvaraH || 15||
atra rAjavarNanA~Ngatvena raverbhayotpAdane varNyatvena prastute
sAkShAttadananuguNatvenAprastutena prasthAnena sAkShAttadanuguNaM
ripukartR^ikaM sUryamaNDalabhedanaM kAryaM gamyate ||

AyAtA kamalAsanasya bhavanAddraShTuM trilokItalaM
gIrvANeShu dinAni kAnichidaho nItvA punaH kautukAt |
bhrAntvA bhUvalaye mahAkavikulopAsyA tavAsyAmbuje
rAjansamprati satyadhAmani girAM devI sukhaM vartate || 16||
atraikasyAdheyasyAnekAdhArasaMbandhAtparyAyaH | tatra
prathamacharaNagatamadhikaraNamArthavishleShAvadhikapa~nchamyA
vishleShasyopashleShApekShatvenaupashleShikAdhikaraNasyAkShepagamyatvAt |
satyadhAmanIti shleShabhittikAbhedAdhyavasAnena mukhasya satyalokatAsiddhau
sukhavartanasiddhiH ||

vidvaddainyatamastrimUrtirathavA vairIndravaMshATavI\-
dAvAgniH kimaho mahojjvalayashaHshItAMshudugdhAmbudhiH |
kiM vAna~NgabhujaMgadaShTavanitAjIvAturevaM nR^iNAM
keShAmeSha narAdhipo na janayatyalpetarAH kalpanAH || 17||
atra koTInAmAropAntaramUlakatvAtparamparitasaMshayaH sa chAhAryaH, mUlAropasya
tathAtvAt | kavAviva kavinibaddhapramAtrantare.apyAhAryabuddheravirodhAt ||

nadanti madadantinaH parilasanti vAjivrajAH
paThanti birudAvalImahitamandire bandinaH |
idaM tadavadhi prabho yadavadhi pravR^iddhA na te
yugAntadahanopamA nayanakoNashoNadyutiH || 18||
atra mukhyArthasya rAjaviShayAyAH kaviraterupakArakasya yadaiva tava
kopodayastadaiva tava ripUNAM sampado bhasmasAdbhaviShyantIti vastuna
upakArikA nayanakoNashoNadyuteryugAntadahanopamA ||

mayi tvadupamAvidhau vasumatIsha vAchaMyame
na varNayati mAmayaM kaviriti krudhaM mA kR^ithAH |
charAcharamidaM jagajjanayato vidhermAnase
padaM na vidadhetarAM tava samo dvitIyo naraH || 19||
atra tvatsamo.anyo nAstIti pratyayAdupamAnaluptopamA vya~Ngyeti prA~nchaH |
sarvathaiva sAmyasyApratiShThAnAnneyamupamA | anyathA vyatirekasyApi
tattvApatteH | 'DhuMDhollanto marisasi kaMTakakaliAiM keaivaNAim |
mAla\.ikusumasarichChaM bhamara bhamaMto Na pAvesi ||' ityatra tu na
prApsyasItyuktvA kvachittvadagochare sthale bhaviShyatIti pratIteH
sAdR^ishyapratiShThAnAlluptopamAstu | tasmAdasamAlaMkAra evAyamiti tu navyAH ||

bhujabhramitapaTTishoddalitadR^iptadantAvalaM
bhavantamarimaNDalakrathana pashyataH saMgare |
karAlakulishAhatisphuTavibhinnavindhyAchalo
na kasya hR^idayaM jhaTityadhiruroha jambhAhitaH || 20||
atra smaraNAlaMkAraH paraMtu lakShyaH ||

yamaH pratimahIbhR^itAM hutavaho.asi tannIvR^itAM
satAM khalu yudhiShThiro dhanapatirdhanAkA~NkShiNAm |
gR^ihaM sharaNamichChatAM kulishakoTibhirnirmitaM
tvameka iha bhUtale bahuvidho vidhAtrA kR^itaH || 21||
atra kavinA yamatvAdinA rUpeNa rAj~no rUpavataH karaNAdrUpakeNa
vipakShabhUpAlAdInAmetasminnAgate yamatvAdinA bhrAnterapi saMbhavAdbhrAntimatA
tairevAnekairgrahItR^ibhiranekairdharmairullekhanAdullekhavisheSheNa cha saha
saMkIrNo.api saMbandhiShaShThyantabhedaprayuktavarNyAnekavidhatvaka ullekhaH ||

dvinetra iva vAsavo mitakaro vivasvAniva
dvitIya iva chandramAH shritavapurmanobhUriva |
narAkR^itirivAmbudhirgururiva kShamAmAgato
nuto nikhilabhUsurairjayati kAmarUpeshvaraH || 22||
atra rAjagatAnAM dvinetratvAdInAM vAsavAditAdAtmyavirodhinAM virodhanivartanAya
viShayiShu vAsavAdiShvAropeNa sAdhAraNIkaraNAttannimittakotprekShA |
sA cheha mAlArUpA | na chAtropamA shakyarUpaNA |
dvinetratvAdyukterniShprayojanakatvApatteH | na chopamAniShpAdakaM teShAM
sAdhAraNyaM tadabhAve.api paramaishvaryAdibhiH pratIyamAnaistasyA niShpatteH |
asundaratvenopamAniShpAdakatayA kaveranabhipretatvAchcha | evaM dvitIyAdInAM
chandrAdiShvAropo.apyupamAyAM satyAmanarthaka eva syAt ||

dInavrAte dayArdrA nikhilaripukule nirdayA kiM cha mR^idvI
kAvyAlApeShu tarkaprativachanavidhau karkashatvaM dadhAnA |
lubdhA dharmeShvalubdhA vasuni paravipaddarshane kAMdishIkA
rAjannAjanmaramya sphurati bahuvidhA tAvakI chittavR^ittiH || 23||
atra viShayAnekatvaprayuktachittavR^itteranekavidhatvamityullekhaH | tatra
cha tadIyachittavR^ittitvenaikatvAdhyavasAnaM tantram ||

devAH ke pUrvadevAH samiti mama naraH santi ke vA purastA\-
deva jalpanti tAvatpratibhaTapR^itanAvartinaH kShatravIrAH |
yAvannAyAti rAjannayanaviShayatAmantakatrAsimUrte\-
rmugdhAriprANadugdhAshanamasR^iNaruchistvatkR^ipANo bhujaMgaH || 24||

atra shuddhaparamparitarUpakam ||

prAchIsaMdhyAsamudyanmahimadinamaNermAnamANikyakAnti\-
rjvAlAmAlA karAlA kavalitajagataH krodhakAlAnalasya |
AshAkAntApadAmbhoruhatalavigalanma~njulAkShArasAbhA
sA bhAti kShoNishobhAkaraNa tava dR^ishoH saMgare shoNimashrIH || 25||
atrApi tadeva paraMtu mAlAtmakam ||

tvAM sundarInivahaniShThuradhairyagarva\-
nirvAsanaikarasikaM samare nirIkShya |
kA vA ripukShitibhR^itAM bata rAjalakShmIH
svAmivratatvamapariskhalitaM babhAra || 26||
atra shatrUNAM rAjyalakShmIstvAM prApteti vivakShito.arthaH
pAtivratyaskhalitarUpeNAbhihita iti paryAyoktam | tachcha rAjyalakShmyA
nAyikAtvasiddhyarthaM samAsoktimapekShata iti sA tatra guNaH ||

nAsatyayogo vachaneShu kIrtau tathArjunaH karmaNi chApi dharmaH |
chitte jagatprANabhavo yadAste vashaMvadAste kimu pANDuputrAH || 27||
atra pANDuputreShu viShayeShu rAjavashaMvadatAdAtmyotprekShAyAM
rAjAshritatvarUpo viShayidharmaH shleSheNa viShayANAM tadAshritAnAM
chAsatyAbhAvashuklagunapuNyaparameshvarANAmabhedasampAdanadvArA
viShayasAdhAraNIkR^itaH ||

manthAchalabhramaNaveghavashaMvadA ye
dugdhAmbudherudapatannaNavaH sudhAyAH |
tairekatAmupagatairvividhauShadhIbhi\-
rdhAtA sasarja tava deva dayAdR^igantAn || 28||
atra dR^iganteShu na kevalaM saMjIvakatvAdayo.amR^itamAtraguNa eva
kaverbubodhayiShitA api tu nikhilajanavashIkAratvAdayo.anye.apIti
sudhAkaNeShvoShadhIsaMsargo.atishayArthamupAttaH ||

keshairvadhUnAmatha sarvakoShaiH prANaishcha sAkaM pratibhUpatInAm |
tvayA raNe niShkaruNena gADhaM chApasya jIvA chakR^iShe javena || 29||
atra chApakarShaNakAryANAnAM keshAkarShaNAdInAM
paurvAparyaviparyayAtmanAtishayenAnuprANitA sahoktiH ||

mahendratulyaM kavayo bhavantaM vadantu kiM tAniha vArayAmaH |
bhavAnsahasraiH samupAsyamAnaH kathaM samAnastridashAdhipena || 30||
atra shleShotthApitatridashatvasaMkhyAmAdAya vyatireka upAttobhayanimittakaH ||

sa tu varShatu vAri vAridastvamudArAshaya ratnavarShaNaH |
sa kuhUrajanImalImasastvamihAntarbahireva nirmalaH || 31||
atrApi sa eva paraM tu shleSho.atrAnutthApako niShidhyamAnaM sAmyaM cha na
shAbdamiti visheShaH ||

makarapratimairmahAbhaTaiH kavibhI ratnanibhaiH samanvitaH |
kavitAmR^itakIrtichandrayostvamihorvIramaNAsi bhAjanam || 33||
atra rAj~no jaladhyupamAyAH
shabdenAbhidhAne.apya~NgopamAbhirAkShepAdekadeshavivartinyupamA tenottarArdha
upamitasamAsa eva | visheShaNasamAsavedyasya tAdAtmyasya prakR^ite.anupayogAt
||

puraH purastAdaribhUpatInAM bhavanti bhUvallabha bhasmasheShAH |
anantaraM te bhrukuTIviTa~NkAtpatanti roShAnalavisphuli~NgAH || 34||
atra prayojakAtishayakR^itaH prayojyashaighryAtishayo gamyaH |
kAryakAraNapaurvAparyaviparyayarUpA cheyamatishayoktiH ||

bhuvanatritaye.api mAnavaiH paripUrNe vibudhaishcha dAnavaiH |
na bhaviShyati nAsti nAbhavannR^ipa yaste bhajate tulAspadam || 35||
atropamAnaluptopameti prA~nchaH | asamAkhyamalaMkArAntaramiti tu vayam ||

pIyUShayUShakalpAmalpAmapi te giraM nipItavatAm |
toShAya kalpate no yoShAdharabimbamadhurimodrekaH || 36||
atra saMbandhe.apyasaMbandha ityatishayoktibhedaH |
upameyopamAnavisheShaNAbhyAmalpatvodriktatvAbhyAmalpayApi saha bhUyAnapi
madhurimA sAmyaM kartuM yatrAnIshastatra kiM vAchyaM bhUyasyeti vailakShaNyAtmA
vyatirekashcha ||

bhAsayati vyomasthA jagadakhilaM kumudinIrvikAsayati |
kIrtistava dharaNigatA sagarasutAyAsamaphalatAM nayate || 37||
atra vyajamAnachandrikArUpakasaMkIrNa ullekhadhvaniH ||

bhAgyena saha ripUNAmuttiShThasi viShTarAtkR^idhAviShTaH |
sahasaiva patasi teShu kShitishAsana mR^ityunA sAkam || 38||
'keshairvadhUnAm' ityatra karmaNaH sahoktiH | iha tu karturiti visheShaH ||

tvayi pAkashAsanasame shAsati sakalaM vasuMdharAvalayam |
vipine vairivadhUnAM varShanti vilochanAni cha dinAni || 39||
atra varShavadAcharantItyAchArakvibantena shleShAchChleShamUlikA tulyayogitA |
ripukAminIvarNanaviShayatvenopamAnopameyayordvayorapi prakR^itatvAt ||

ahitApakaraNabheShaja naranAtha bhavAnkarasthito yasya |
tasya kuto.ahibhayaM syAdakhilAmapi medinIM charataH || 40||
atra shleShaniveditasya sarpabhayAbhAvasyopapAdakatayopAttasya
rAjani bheShajatAdAtmyAropasyApyupapAdakatayA sthitaM rAjasaMbandhini
dviShadapakaraNarUpe dharme shleShaniveditasarpatApakaraNatAdAtmyamiti
prathamacharaNe shliShTaparamparitarUpakaM tR^itIye tu shleSha eva |

kuvalayalakShmIM harate tava kIrtistatra kiM chitram |
yasmAnnidAnamasyA lokanamasyA~Nghripa~Nkajo hi bhavAn || 41||
atrotpAdakasamAnaguNatvAdutpAdyasyotpAdakasaMsargAnurUpaH samAlaMkAravisheShaH |
shleShashchAsminguNaH ||

dR^iShTaH sadasi chedugrAshchandrachandanachandrikAH |
atha tvaM saMgare saumyAH sheShakAlAnalAsayaH || 42||
atra dR^iShTaH sadasIti vAkye tvamityasyApakarShaNAt, atha tvaM saMgara
ityatra cha tvamityasyAnuvartanAdvAkyayoH padavinimayAtmAlaMkAraH
pUrvArdhe | uttarArdhe prakR^itAnekadharmasaMbandhAttulyayogitA |
upameyasyotkR^iShTaguNatvasiddhaya upamAnasya
tadviruddhaguNakalpanAtmakenAlaMkArAntareNa shabalitA ||

apAre khalu saMsAre vidhinaiko.arjunaH kR^itaH |
kIrtyA nirmalayA bhUpa tvayA sarve.arjunAH kR^itAH || 43||
iha shleShamUlo vyatirekaH ||

dadhIchibalikarNeShu himahemAchalAbdhiShu |
adAtR^itvamadhairyaM cha dR^iShTe bhavati bhAsate || 44||
atrApi saiva tathAvidhA | yathAsaMkhyasaMkarastu visheShaH ||

shAsati tvayi he rAjannakhaNDAvanimaNDalam |
na manAgapi nishchinte maNDale shatrumittrayoH || 45||
ihApi tulyayogitA mittrashabdashleShotthApitA vyAjastutishcha ||

bhAnuragniryamo vAyaM baliH karNo.athavA shibiH |
pratyarthino.arthinashchetthaM tvayi yAnti vikalpanAm || 46||
iha tu saMshaya ullekhAli~NgitaH ||

kamalAvAsakAsAraH kShamAdhR^itiphaNIshvaraH |
bhavAnkuvalayasyendurAnandayati mAnavAn || 47||
iha shliShTaparamparitaM rUpakaM mAlArUpam ||

gagane chandrikAyante himAyante himAchale |
pR^ithivyAM sAgarAyante bhUpAla tava kIrtayaH || 48||
iha mAlopamAli~Ngita ullekhaH ||

mR^igatAM harayanmadhye vR^ikShatAM cha paTIrayan |
nakShatratAM mahIpAnAM tvamindavasi bhUpate || 49||
iha shuddhaparamparitA mAlArUpopamA | AchArakvibantAchChatari rUpANi |
ti~Ni chaikam [indavasi] ||

madhye sudhAsamdurasya sitAmayagR^ihodare |
pUrNenduviShTare deva sthAtuM yogyAstavoktayaH || 50||
atra trayANAM sudhAsamudrAdInAM visheShaNavisheShyabhAvena madhurimaNi
parAM kAShThAmadhirUDhe tvadIyoktipadasaMbandho yukto na tu vishakalita
ityatishAyakAsadvisheShaNanibandhanaH prauDhoktiH ||

amR^italaharIchandrajyotsnAramAvadanAmbujA\-
nyadharitavato nirmaryAdaprasAdamahAmbudheH |
ubhayavadayaM deva tvattaH kathaM paramolbaNaH
pralayadahanajvAlAjAlAkulo mahasAM gaNaH || 51||
atra kAraNaguNaviruddhasvaguNasya kAryasyotpatterviShamAlaMkAraH |
amR^italaharyAdInAM  trayANAmadharIkaraNAtmanA vyatirekeNa
saMjIvakatvaparamashItalatvavishuddhatvasaundaryANAmatishayo gamyate |
evameShu padyeShu saMbhavanto.apyanye.alaMkArAH sphuTatvAnna vivechitAH |
sahR^idayAnAM prItyAvashyakaM kiMchidvyAkhyAtamanyattu tairevollAsanIyamityalaM
pallavitena ||

taila~NgAnvayama~NgalAlayamahAlakShmIdayAlalitaH
shrImatperamabhaTTasUnuranishaM vidvallalATaMtapaH |
saMtuShTaH kamatAdhipasya kavitAmAkarNya tadvarNanaM
shrImatpaNDitarAjapaNDitajagannAtho vyadhAsIdidam || 52||
dordaNDadvayakuNDalIkR^italasatkodaNDAchaNDAshuga\-
dhvastoddaNDavipakShamaNDalamiha tvAM vIkShya madhyeraNam |
valgadgANDivamuktakANDavalayajvAlAvalItANDava\-
bhrashyatkhANDavaruShTapANDavamaho ko na kShitIshaH smaret || 53||
atra smaraNAlaMkAraH | bhAva iti tu na bhrAmitavyam |
sAdR^ishyamUlakatvAtanmUlakatvAbhyAM bhAvatvAlaMkAratvayoriha vyavasthiteH
shabdavedyatvAchcha ||

iti paNDitarAjashrIjagannAthavirachitaM prANAbharaNaM tatkR^itayaiva TippaNyA
sametaM samAptam |

##

The text is written by Jagannatha Pandita
in honour of king Prananarayana of Kamarupa.
https://bsvprasad.wordpress.com/2013/09/23/jagannatha-pandita-raya/

Encoded and proofread by Dhaval Patel drdhaval2785 at gmail.com

\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}