% Text title : raghuvansha12 % File name : raghuvansha12.itx % Category : major\_works, kAlidAsa % Location : doc\_z\_misc\_major\_works % Author : kalidasa % Transliterated by : Arvind Kolhatkar akolhatkar at rogers.com % Proofread by : Arvind Kolhatkar akolhatkar at rogers.com % Latest update : August 23, 2005 % Send corrections to : sanskrit at cheerful dot c om % % This text is prepared by volunteers and is to be used for personal study % and research. The file is not to be copied or reposted for promotion of % any website or individuals or for commercial purpose without permission. % Please help to maintain respect for volunteer spirit. % \documentstyle[11pt,multicol,itrans]{article} #include=ijag.inc #endwordvowel=.h \portraitwide \parindent=100pt \let\usedvng=\Largedvng % for 1 column \pagenumbering{itrans} \def\engtitle#1{\hrule\medskip\centerline{\LARGE #1}} \def\itxtitle#1{\medskip\centerline{\LARGEdvng #1}\medskip\hrule} \def\endtitles{\medskip\obeyspaceslines} %% \begin{document} \engtitle{.. Raghuvansha 12 by Kalidas ..}## \itxtitle{.. raghuva.nshaM sargaH 12 kAlidAsakR^itam ..}##\endtitles ## nirdiShTaviShayasnehaH sa dashAntamupeyivAn | AsIdAsannanirvANaH pradIpArcirivoShasi|| 12\-1|| ta.n karNamUlamAgatya rAme shrIrnyasyatAmiti | kaikeyIsha~NkayeevAha palitacChadmanA jarA|| 12\-2|| sA paurAnpaurakAntasya rAmasyAbhyudayashrutiH | pratyeka.n hrAdayA.ncakre kulyenodyAnapAdapAn|| 12\-3|| tasyAbhiShekasa.nbhAre kalpita.n krUranishcayA | dUShayAmAsa kaikeyI shokoShNaiH pArthivAshrubhiH|| 12\-4|| sA kilAshvAsitA caNDI bhartrA tatsa.nshrutau varau | udvavAmendrasiktA bhUrbilamagnAvivoragau|| 12\-5|| tayoshcaturdashaikena rAma.n prAvrAjayatsamAH | dvitIyena sutasyaicChadvaidhavyaikaphalA.n shriyam|| 12\-6|| pitrA datta.n rudanrAmaH prA~NmahI.n pratyapadyata | pashcAdvanAya gacCheti tadAdnyA.n mudito.agrahIt|| 12\-7|| dadhato ma~NgalakShaume vasAnasya ca valkale | dadR^ishurvismitAstasya mukharAga.n sama.n janAH|| 12\-8|| sa sItAlakShmaNasakhaH satyAdgurumalopayan | vivesha daNDakAraNya.n pratyeka.n ca satA.n manaH|| 12\-9|| rAjApi tadviyogArtaH smR^itvA shApa.n svakarmajam | sharIratyAgamAtreNa shuddhilAbhamanyata|| 12\-10|| viproShitakumAra.n tadrAjyamastamiteshvaram | randhrAnveShaNadakShANA.n dviShAmAmiShatatA.n yayau|| 12\-11|| athAnAthAH prakR^itayo mAtR^ibandhunivAsinam | maulairAnAyayAmAsurbharata.n stambhitAshrubhiH|| 12\-12|| shrutvA tathAvidha.n mR^ityu.n kaikeyItanayaH pituH | mAturna kevala.n svasyAH shriyo.apyAsItparA~NmukhaH|| 12\-13|| sasainyashcAnvagAdrAma.n darshitAnAshramAlayaiH | tasya pashyansasaumitrerudashrurvasatidrumAn|| 12\-14|| citrakUTavanastha.n ca kathitasvargatirguroH | lakShmyA nimantrayA.ncakre tamanucChiShTasa.npadA|| 12\-15|| sa hi prathamaje tasminnakR^itashrIparigrahe | parivettAramAtmAna.n mene svIkaraNAdbhuvaH|| 12\-16|| tamashakyamapAkraShTu.n nideshAtsvargiNaH pituH | yayAce pAduke pashcAtkartu.n rAjyAdhidevate|| 12\-17|| sa visR^iShTastathetyuktvA bhrAtrA naivAvishatpurIm | nandigrAmagatastasya rAjya.n nyAsamivAbhunak|| 12\-18|| dR^iDhabhaktiriti jyeShThe rAjyatR^iShNAparA~NmukhaH | mAtuH pApasya bharataH prAyashcittamivAkarot|| 12\-19|| rAmo.api saha vaidehyA vane vanyena vartayan | cacAra sAnujaH shAnto vR^iddhekShvAkuvrata.n yuvA|| 12\-20|| prabhAvastambhitacChAyamAshritaH sa vanaspatim | kadAcida~Nke sItAyAH shishye ki.ncidiva shramAt|| 12\-21|| aindraH kila nakhaistasyA vidadAra stanau dvijaH | priyopabhogacihneShu paurobhAgyamivAcaran|| 12\-22|| tasminnasthadiShIkAstra.n rAmo rAmAvabodhitaH | AtmAna.n mumuce tasmAdekanetravyayena saH|| 12\-23|| rAmastvAsannadeshatvAdbharatAgamana.n punaH | Asha~NkyotsukasAra~NgA.n citrakUTasthalI.n jahau|| 12\-24|| prayayAvAtitheyeShu vasannR^iShikuleShu saH | dakShiNA.n dishamR^ikSheShu vArShikeShviva bhAskaraH|| 12\-25|| babhau tamanugacChantI videhAdhipateH sutA | pratiShiddhApi kaikeyyA lakShmIriva guNonmukhI|| 12\-26|| anasUyAtisR^iShTena puNyagandhena kAnanam | sA cakArA~NgarAgeNa puShpoccalitaShaTpadam|| 12\-27|| sa.ndhyAbhrakapishastasya virAdho nAma rAkShasaH | atiShThanmArgamAvR^itya rAmasyendoriva grahaH|| 12\-28|| sa jahAra tayormadhye maithilI.n lokashoShaNaH | nabhonabhasyayorvR^iShTimavagraha ivAntare|| 12\-29|| ta.n viniShpiShya kAkutsthau purA dUShayati sthalIm | gandhenAshucinA ceti vasudhAyA.n nicakhnatuH|| 12\-30|| pa~ncavaTyA.n tato rAmaH shAsanAtkumbhajanmanaH | anapoDhasthitistasthau vindhyAdriH prakR^itAviva|| 12\-31|| rAvaNAvarajA tatra rAghava.n madanAturA | abhipede nidAghArtA vyAlIva malayadrumam|| 12\-32|| sA sItAsa.nnidhAveva ta.n vavre kathitAnvayA | atyArUDho hi nArINAmakAladnyo manobhavaH|| 12\-33|| kalatravAnaha.n bAle kanIyA.nsa.n bhajasva me| iti rAmo vR^iShasyantI.n vR^iShaskandhaH shashAsa tAm|| 12\-34|| jyeShThAbhigamanAtpUrva.n tenApyanabhinanditAm | sA.abhUdrAmAshrayA bhUyo nadIvobhayakUlabhAk|| 12\-35|| sa.nrambha.n maithilIhAsaH kShaNasaumyA.n ninAya tAm | nivAtastimitA.n velA.n candrodaya ivodadheH|| 12\-36|| phalamasyopahAsasya sadyaH prApsyasi pashya mAm | mR^igyAH paribhavo vyAghryAmityavehi tvayA kR^itam|| 12\-37|| ityuktvA maithilI.n bhartura~Nke nivishatI.n bhayAt | rUpa.n shUrpaNakhA nAmnaH sadR^isha.n pratyapadyata|| 12\-38|| lakShmaNaH prathama.n shrutvA kokilAma~njuvAdinIm | shivAghorasvanA.n pashcAdbubudhe vikR^iteti tAm|| 12\-39|| parNashAlAmatha kShipra.n vikR^iShTAsiH pravishya saH | vairUpyapaunaruktyena bhIShaNA.n tAmayojayat|| 12\-40|| sA vakranakhadhAriNyA veNukarkashaparvayA | a~NkushAkArayA~NgulyA tAvatarjayadambare|| 12\-41|| prApya cAshu janasthAna.n kharAdibhyastathAvidham | rAmopakramamAcakhyau rakShaHparibhava.n navam|| 12\-42|| mukhAvayavalUnA.n tA.n nairR^itA yatpuro dadhuH | rAmAbhiyAyinA.n teShA.n tadevAbhUdama~Ngalam|| 12\-43|| udAyudhAnAtpatatastAndR^iptAnprekShya rAghavaH | nidadhe vijayAsha.nsA.n cApe sItA.n ca lakShmaNe|| 12\-44|| eko dAsharathiH kAma.n yAtudhAnAH sahasrashaH | te tu yAvanta evAjau tAvA.nshca dadR^ishe sa taiH|| 12\-45|| asajjanena kAkutsthaH prayuktamatha dUShaNam | na cakShame shubhAcAraH sa dUShaNamivAtmanaH|| 12\-46|| ta.n sharaiH pratijagrAha kharatrishirasau ca saH | kramashaste punastasya cApAtsamamivodyayuH|| 12\-47|| taistrayANA.n shitairbANairyathApUrvavishuddhibhiH | AyurdehAtigaiH pIta.n rudhira.n tu patatribhiH|| 12\-48|| tasminrAmasharotkR^itte bale mahati rakShasAm | utthita.n dadR^ishe.annyacca kabandhebhyo na ki.ncana|| 12\-49|| sA bANavarShiNa.n rAma.n yodhayitvA suradviShAm | aprabodhAya suShvApa gR^idhracChAye varUthinI|| 12\-50|| rAghavAstravidIrNAnA.n rAvaNa.n prati rakShasAm | teShA.n shUrpaNakhaivaikA duShpravR^ittiharA.abhavat|| 12\-51|| nigrahAtsvasurAptAnA.n vadhAcca dhanadAnujaH | rAmeNa nihita.n mene pada.n dashasu mUrdhasu|| 12\-52|| rakShasA mR^igarUpeNa va~ncayitvA sa rAghavau | jahAra sItA.n pakShIndraprayAsakShaNavighnitaH|| 12\-53|| tau sItAveShiNau gR^idhra.n lUnapakShamapashyatAm | prANairdasharathaprIteranR^iNa.n kaNThavartibhiH|| 12\-54|| sa rAvaNahR^itA.n tAbhyA.n vacasAcaShTa maithilIm | AtmanaH sumahatkarma vraNairAvedya sa.nsthitaH|| 12\-55|| tayostasminnavIbhUtapitR^ivyApatishokayoH | pitarIvAgnisa.nskArAtparA vavR^itire kriyAH|| 12\-56|| vadhanirdhUtashApasya kabandhasyopadeshataH | mumUrcCha sakhya.n rAmasya samAnavyasane harau|| 12\-57|| sa hatvA vAlina.n vIrastatpade cirakA~NkShite | dhAtoH sthAna ivAdesha.n sugrIva.n sa.nnyaveshayat|| 12\-58|| itastatashca vaidehImanveShTu.n bhartR^icoditAH | kapayashcerurArtasya rAmasyeva manorathAH|| 12\-59|| pravR^ittAvupalabdhAyA.n tasyAH sa.npAtidarshanAt | mArutiH sAgara.n tIrNaH sa.nsAramiva nirmamaH|| 12\-60|| dR^iShTA vicinvatA tena la~NkAyA.n rAkShasIvR^itA | jAnakI viShavallIbhiH pariteva mahauShadhiH|| 12\-61|| tasyai bharturabhidnyAnama~NgulIya.n dadau kapiH | pratyudgatamivAnuShNaistadAnandAshrubindubhiH|| 12\-62|| nirvApya priyasa.ndeshaiH sItAmakShavadhoddhataH | sa dadAha purI.n la~NkA.n kShaNasoDhArinigrahaH|| 12\-63|| pratyabhidnyAnaratna.n ca rAmAyAdarshayatkR^itI | hR^idaya.n svayamAyAta.n vaidehyA iva mUrtimat|| 12\-64|| sa prApa hR^idayanyastamaNisparshanimIlitaH | apayodharasa.nsargA.n priyAli~NgananirvR^itim|| 12\-65|| shrutvA rAmaH priyodanta.n mene tatsa~NgamotsukaH | mahArNavaparikShepa.n la~NkAyAH parikhAlaghum|| 12\-66|| sa pratasthe.arinAshAya harisainyairanudrutaH | na kevala.n bhuvaH pR^iShThe vyomni sa.nbAdhavartibhiH|| 12\-67|| niviShTamudadheH kUle ta.n prapAda bibhIShaNaH | snehAdrAkShasalakShmyeva buddhimAvishya coditaH|| 12\-68|| tasmai nishAcaraishvarya.n pratishushrAva rAghavaH | kAle khalu samAlabdhAH phala.n badhnanti nItayaH|| 12\-69|| sa setu.n bandhayAmAsa plavagairlavaNAmbhasi | rasAtalAdivonmagna.n sheSha.n svapnAya shAr~NgiNaH|| 12\-70|| tenottIrya pathA la~NkA.n rodhayAmAsa pi~NgalaiH | dvitIya.n hemaprAkAra.n kurvadbhiriva vAnaraiH|| 12\-71|| raNaH pravavR^ite tatra bhImaH plavagarakShasAm | digvijR^imbhitakAkutsthapaulastyajayaghoShaNaH|| 12\-72|| pAdapAviddhaparighaH shilAniShpiShTamudgaraH | atishastranakhanyAsaH shailarugNamata.ngajaH|| 12\-73|| atha rAmashirashChedadarshanodbhrAntacetanAm | sItA.n mAyeti sha.nsantI trijaTA samajIvayat|| 12\-74|| kAma.n jIvati me nAtha iti sA vijahau shucam | prA~NmatvA satyamasyAnta.n jIvitAsmIti lajjitA|| 12\-75|| garuDApAtavishliShTameghanAdAstrabandhanaH | dAsharathyoH kShaNakleshaH svapnavR^itta ivAbhavat|| 12\-76|| tato bibheda paulastyaH shaktyA vakShasi lakShmaNam | rAmastvanAhato.apyAsIdvidIrNahR^IdayaH shucA|| 12\-77|| sa mArutisamAnItamahauShadhihatavyathaH | la~NkAstrINA.n punashcakre vilApAcAryaka.n sharaiH|| 12\-78|| sa nAda.n meghanAdasya dhanushcendrAyudhaprabham | meghasyeva sharatkAlo na ki~ncitparyasheShayat|| 12\-79|| kumbhakarNaH kapIndreNa tulyAvasthaH svasuH kR^itaH | rurodha rAma.n shR^i~NgIva Ta~NkacChinnamanaHshilaH|| 12\-80|| akAle bodhito bhrAtA priyasvapno vR^ithA bhavAn | rAmeShubhiritIvAsau dIrghanidrA.n praveshitaH|| 12\-81|| itarANyapi rakShA.nsi peturvAnarakoTiShu | rajA.nsi samarotthAni tacChoNitanadIShviva|| 12\-82|| niryayAvatha paulastyaH punaryuddhAya mandirAt | arAvaNamarAma.n vA jagadadyeti nishcitaH|| 12\-83|| rAma.n padAtimAlokya la~Nkesha.n ca varUthinam | hariyugya.n ratha.n tasmai prajighAya pura.ndaraH|| 12\-84|| tamAdhUtadhvajapaTa.n vyomaga~NgormivAyubhiH | devasUtabhujAlambI jaitramadhyAsta rAghavaH|| 12\-85|| mAtalistasya mAhendramAmumoca tanucChadam | yatrotpaladalaklaibyamastrANyApuH suradviShAm|| 12\-86|| anyonyadarshanaprAptavikramAvasara.n cirAt | rAmarAvaNayoryuddha.n caritArthamivAbhavat|| 12\-87|| bhujamUrdhorubAhulyAdeko.api dhanadAnujaH | dadR^ishe hyayathApUrvo mAtR^iva.nsha iva sthitaH|| 12\-88|| jetAra.n lokapAlAnA.n svamukhairarciteshvaram | rAmastulitakailAsamArAti.n bahvamanyata|| 12\-89|| tasya sphurati paulastyaH sItAsa.ngamasha.nsini | nicakhAnAdhikakrodhaH shara.n savyetare bhuje|| 12\-90|| rAvaNasyApi rAmAsto bhittvA hR^idayamAshugaH | vivesha bhuvamAkhyAtumuragebhya iva priyam|| 12\-91|| vacasaiva tayorvAkyamastramastreNa nighnatoH | anyonyajayasa.nrambho vavR^idhe vAdinoriva|| 12\-92|| vikramavyatihAreNa sAmAnyA.abhUddvayorapi | jayashrIrantarA vedirmattavAraNayoriva|| 12\-93|| kR^itapratikR^itaprItaistayormuktA.n surAsuraiH | parasparasharavrAtAH puShpavR^iShTi.n na sehire|| 12\-94|| ayaHsha~NkucitA.n rakShaH shataghnImatha shatrave | hR^itA.n vaivasvatasyeva kUTashAlmalimakShipat|| 12\-95|| rAghavo rathamaprAptA.n tAmAshA.n ca suradviShAm | ardhacandramukhairbANaishcicCheda kadalIsukham|| 12\-96|| amogha.n sa.ndadhe cAsmai dhanuShyekadhanurdharaH | brAhmamastra.n priyAshokashalyaniShkarShaNauShadham|| 12\-97|| tadvyomni shatadhA bhinna.n dadR^ishe dIptimanmukham | vapurmahoragasyeva karAlaphalamaNDalam|| 12\-98|| tena mantraprayuktena nimeShArdhAdapAtayat | sa rAvaNashiraHpa~NktimadnyAtavraNavedanAm|| 12\-99|| bAlArkapratimevApsu vIcibhinnA patiShyataH | rarAja rakShaHkAyasya kaNThacChedaparamparA|| 12\-100|| marutA.n pashyatA.n tasya shirA.nsi patitAnyapi | mano nAtivishasvAsa punaHsa.ndhAnasha~NkinAm|| 12\-101|| atha madagurupakShailokapAladvipAnA\- manugatamalivR^indairgaNDabhittIrvihAya | upanatamaNibandhe mUrdhni paulastyashatroH surabhi suravimukta.n puShpavarSha.n papAta|| 12\-102|| yantA hareH sapadi sa.nhR^itakArmukajya\- mApR^icChya rAghavamanuShThitadevakAryam | nAmA~NkarAvaNasharA~NkitaketuyaShTi\- mUrdhva.n ratha.n harisahasrayuja.n ninAya|| 12\-103|| raghupatirapi jAtavedovishuddhA.n pragR^ihya priyA.n priyasuhR^idi bibhIShaNe sa.ngamayya shriya.n vairiNaH | ravisutasahitena tenAnuyAtaH sasaumitriNA bhujavijitavimAnaratnAdhirUDhaH pratasthe purIm|| 12\-104|| iti shrIraghuva.nshe mahAkAvye kavishrIkAlidAsakR^itau rAvaNavadho nAma dvAdashaH sargaH || ## Encoded and proofread by Arvind Kolhatkar akolhatkar at rogers.com \medskip\hrule\obeylines Please send corrections to sanskrit@cheerful.com Last updated \today https://sanskritdocuments.org \end{document}