% Text title            : raghuvansha15
% File name             : raghuvansha15.itx
% Category              : major\_works, kAlidAsa
% Location              : doc\_z\_misc\_major\_works
% Author                : kalidasa
% Transliterated by     : Arvind Kolhatkar akolhatkar at rogers.com
% Proofread by          : Arvind Kolhatkar akolhatkar at rogers.com
% Latest update         : Octobber 11, 2005
% Send corrections to   : sanskrit at cheerful dot c om
%
% This text is prepared by volunteers and is to be used for personal study 
% and research. The file is not to be copied or reposted for promotion of 
% any website or individuals or for commercial purpose without permission. 
% Please help to maintain respect for volunteer spirit.
%
\documentstyle[11pt,multicol,itrans]{article}
#include=ijag.inc
#endwordvowel=.h
\portraitwide
\parindent=100pt                
\let\usedvng=\Largedvng      % for 1 column     
\pagenumbering{itrans} 
\def\engtitle#1{\hrule\medskip\centerline{\LARGE #1}}
\def\itxtitle#1{\medskip\centerline{\LARGEdvng #1}\medskip\hrule}
\def\endtitles{\medskip\obeyspaceslines}
%%
\begin{document}
\engtitle{.. Raghuvansha 15 by Kalidas ..}##
\itxtitle{.. raghuva.nshaM sargaH 15 kAlidAsakR^itam ..}##\endtitles ##


kR^itasItAparityAgaH sa ratnAkaramekhalAm |
bubhuje pR^ithivIpAlaH pR^ithivImeva kevalAm|| 15\-1||
lavaNena viluptejyAstAmisreNa tamabhyayuH |
munayo yamunAbhAjaH sharaNya.n sharaNArthinaH|| 15\-2||
avekShya rAma.n te tasminna prajahruH svatejasA |
trANAbhAve hi shApAstrAH kurvanti tapaso vyayam|| 15\-3||
pratishushrAva kAkutsthastebhyo vighnapratikriyAm |
dharmasa.nrakShaNArtheva pravR^ittirbhuvi shAr~NgiNaH|| 15\-4||
te rAmAya vadhopAyamAcakhyurvibudhadviShaH |
durjayo lavaNaH shUlI vishUlaH prArthyatAmiti|| 15\-5||
AdideshAtha shatrughna.n teShA.n kShemAya rAghavaH |
kariShyanniva nAmAsya yathArthamarinigrahAt|| 15\-6||
yaH kashcana raghUNA.n hi paramekaH para.ntapaH |
apavAda ivotsarga.n vyAvartayitumIshvaraH|| 15\-7||
agrajena prayuktAshIstato dAsharathI rathI |
yayau vanasthalIH pashyanpuShpitAH surabhIrabhIH|| 15\-8||
rAmAdeshAdanugatA senA tasyArthasiddhaye |
pashcAdadhyanArthasya dhAtoradhirivAbhavat|| 15\-9||
AdiShTavartmA munibhiH sa gacCha.nstapasA.n varaH |
virarAja rathapraShThairvAlakhilyairivA.nshumAn|| 15\-10||
tasya mArgavashAdekA babhUva vasatiryataH |
rathasvanotkaNThamR^ige vAlmIkIye tapovane|| 15\-11||
tamR^iShiH pUjayAmAsa kumAra.n klAntavAhanam |
tapaHprabhAvasiddhAbhirvisheShapratipattibhiH || 15\-12||
tasyAmevAsya yAminyAmantarvantI prajAvatI |
sutAvasUta sa.npannau koshadaNDAviva kShitiH|| 15\-13||
sa.ntAnashravaNAdbhrAtuH saumitriH saumanasyavAn |
prA~njalirmunimAmantrya prAtaryuktaratho yayau|| 15\-14||
sa ca prApa madhUpaghna.n kumbhInasyAshca kukShijaH |
vanAtkaramivAdAya sattvarAshimupasthitaH || 15\-15||
dhUmadhUmro vasAgandhI jvAlAbabhrushiroruhaH |
kravyAdgaNaparIvArashcitAgniriva ja.ngamaH || 15\-16||
apashUla.n tamAsAdya lavaNa.n lakShmaNAnujaH |
rurodha sa.nmukhIno hi jayo randhraprahAriNAm|| 15\-17||
nAtiparyAptamAlakShya matkukSheradya bhojanam |
diShTyA tvamasi me dhAtrA bhItenevopapAditaH|| 15\-18||
iti sa.ntarjya shatrughna.n rAkShasastajjighA.nsayA |
prA.nshumutpATayAmAsa mustAstambamiva drumam|| 15\-19||
saumitrernishitairbANairantarA shakalIkR^itaH |
gAtra.n puShparajaH prApa na shAkhI nairR^iteritaH|| 15\-20||
vinAshAttasya vR^ikShasya rakShastasmai mahopalam |
prajighAya kR^itAntasya muShTi.n pR^ithagiva sthitam|| 15\-21||
aindramastramupAdAya shatrughnena sa tADitaH |
sikatAtvAdapi para.n prapede paramANutAm|| 15\-22||
tamupAdravadudyamya dakShiNa.n dornishAcaraH |
ekatAla ivotpAtapavanaprerito giriH|| 15\-23||
kArShNena patriNA shatruH sa bhinnahR^idayaH patan |
aninAya bhuvaH kampa.n jahArAshramavAsinAm|| 15\-24||
vayasA.n pa~NktayaH peturhatasyopari vidviShaH |
tatpratidvandvino mUrdhni divyAH kusumavR^iShTayaH|| 15\-25||
sa hatvA lavaNa.n vIrastadA mene mahaujasaH |
bhrAtuH sodaryamAtmAnamindrajidvadhashobhinaH|| 15\-26||
tasya sa.nstUyamAnasya caritArthaistapasvibhiH |
shushubhe vikramodagra.n vrIDayAvanata.n shiraH|| 15\-27||
upakUla.n ca kAlindyAH purI.n pauruShabhUShaNaH |
nirmame nirmamo.artheShu mathurA.n madhurAkR^itiH|| 15\-28||
yA saurAjyaprakAshAbhirbabhau pauravibhUtibhiH |
svargAbhiShyandavamana.n kR^itvevopaniveshitA|| 15\-29||
tatra saudhagataH pashyanyamunA.n cakravAkinIm |
hemabhaktimatI.n bhUmeH praveNImiva pipriye|| 15\-30||
sakhA dasharathasyApi janakasya ca mantrakR^it |
sa.ncaskArobhayaprItyA maithileyau yathAvidhi|| 15\-31||
sa tau kushalavonmR^iShTagarbhakledau tadAkhyayA |
kaviH kushalavAveva cakAra kila nAmataH|| 15\-32||
sA~Nga.n ca vedamadhyApya ki.ncidutkrAntashaishavau |
svakR^iti.n gApayAmAsa kaviprathamapaddhatim|| 15\-33||
rAmasya madhura.n vR^itta.n gAyanto mAturagrataH |
tadviyogavyathA.n ki.ncicChithilIcakratuH sutau|| 15\-34||
itare.api raghorva.nshyAstrayastretAgnitejasaH |
tadyogAtpativatnIShu patnIShvAsandvisUnavaH || 15\-35||
shatrughAtini shatrughnaH subAhau ca bahushrute |
mathurAvidishe sUnvornidadhe pUrvajotsukaH|| 15\-36||
bhUyastapovyayo mA bhUdvAlmIkeriti so.atyagAt |
maithilItanayodgItaniHspandamR^igamAshramam|| 15\-37||
vashI vivesha cAyodhyA.n rathyasa.nskArashobhinIm |
lavaNasya vadhAtpaurairIkShito.atyantagauravam|| 15\-38||
sa dadarsha sabhAmadhye sabhAsadbhirupasthitam |
rAma.n sItAparityAgAdasAmAnyapati.n bhuvaH|| 15\-39||
tamabhyanandatpraNata.n lavaNAntakamagrajaH |
kAlanemivadhAtprItasturAShADiva shAr~NgiNam|| 15\-40||
sa pR^iShTaH sarvato vArtamAkhyadrAdnye na sa.ntatim |
pratyarpayiShyataH kAle kaverAdyasya shAsanAt|| 15\-41||
atha jAnapado vipraH shishumaprAptayauvanam |
avatAryA~NkashayyAstha.n dvAri cakranda bhUpateH|| 15\-42||
shocanIyAsi vasudhe yA tva.n dasharathAccyutA |
rAmahastamanuprApya kaShTAtkaShTatara.n gatA|| 15\-43||
shrutvA tasya shuco hetu.n goptA jihrAya rAghavaH |
na hyakAlabhavo mR^ityurikShvAkupadamaspR^ishat|| 15\-44||
sa muhUrta.n kShamasveti dvijamAshvAsya duHkhitam |
yAna.n sasmAra kaubera.n vaivasvatajigIShayA|| 15\-45||
AttashastrastadadhyAsya prasthitaH sa raghUdvahaH |
uccacAra purastasya gUDharUpA sarasvatI|| 15\-46||
rAjan prajAsu te kashcidapacAraH pravartate |
tamanviShya prashamayerbhaviShyasi tataH kR^itI|| 15\-47||
ityAptavacanAdrAmo vineShyanvarNavikriyAm |
dishaH papAta patreNa veganiShkampahetunA|| 15\-48||
atha dhUmAbhitAmrAkSha.n vR^ikShashAkhAvalambinam |
dadarsha ka.ncidaikShvAkastapasyantamadhomukham|| 15\-49||
pR^iShTanAmAnvayo rAdnyA sa kilAcaShTa dhUmapaH |
AtmAna.n shambuka.n nAma shUdra.n surapadArthinam|| 15\-50||
tapasyanadhikAritvAtprajAnA.n tamaghAvaham |
shIrShacChedya.n paricChidya niyantA shastramAdade|| 15\-51||
sa tadvaktra.n himakliShTaki~njalkamiva pa~Nkajam |
jyotiShkaNAhatashmashru kaNThanAlAdapAtayat|| 15\-52||
kR^itadaNDaH svaya.n rAdnyA lebhe shUdraH satA.n gatim |
tapasA dushcareNApi na svamArgavila~NghinA|| 15\-53||
raghunAtho.apyagastyena mArgasa.ndarshitAtmanA |
mahaujasA sa.nyuyuje sharatkAla ivendunA|| 15\-54||
kumbhayonirala.nkAra.n tasmai divyaparigraham |
dadau datta.n samudreNa pItenevAtmaniShkrayam|| 15\-55||
sa dadhanmaithilIkaNThanirvyApAreNa bAhunA |
pashcAnnivavR^ite rAmaH prAkparAsurdvijAtmajaH || 15\-56||
tasya pUrvoditA.n nindA.n dvijaH putrasamAgataH |
stutvA nivartayAmAsa trAturvaivasvatAdapi|| 15\-57||
tamadhvarAya muktAshva.n rakShaHkapinareshvarAH |
meghAH sasyamivAmbhobhirabhyavarShannupAyanaiH|| 15\-58||
digbhyo nimantritAshcainamabhijagmurmaharShayaH |
na bhaumAnyeva dhiShNyAni hitvA jyotirmayAnyapi|| 15\-59||
upashalyaniviShTaistaishcaturdvAramukhI babhau |
ayodhyA sR^iShTalokeva sadyaH paitAmahI tanuH|| 15\-60||
shlAghyastyAgo.api vaidehyAH patyuH prAgva.nshavAsinaH |
ananyajAneH saivAsIdyasmAjjAyA hiraNmayI|| 15\-61||
vidheradhikasa.nbhArastataH pravavR^ite makhaH |
Asanyatra kriyAvighnA rAkShasA eva rakShiNaH|| 15\-62||
atha prAcetasopadnya.n rAmAyaNamitastataH |
maithileyau kushalavau jagaturgurucoditau|| 15\-63||
vR^itta.n rAmasya vAlmIkeH kR^itistau ki.nnarasvanau |
ki.n tadyena mano hartumala.n syAtA.n na shR^iNvatAm|| 15\-64||
rUpe gIte ca mAdhurya.ntayostajdnyairniveditam |
dadarsha sAnujo rAmaH shushrAva ca kutUhalI|| 15\-65||
tadgItashravaNaikAgrA sa.nsadashrumukhI babhau |
himaniShyandinI prAtarnirvAteva vanasthalI|| 15\-66||
vayoveShavisa.nvAdi rAmasya ca tayostadA |
janatA prekShya sAdR^ishya.n nAkShikampa.n vyatiShThata|| 15\-67||
ubhayorna tathA lokaH prAvINyena visiShmiye |
nR^ipateH prItidAneShu vItaspR^ihatayA yathA|| 15\-68||
geye ko nu vinetA vA.n kasya ceya.n kR^itiH kaveH |
iti rAdnyA svaya.n pR^iShTau tau vAlmIkimasha.nsatAm|| 15\-69||
atha sAvarajo rAmaH prAcetasamupeyivAn |
UrIkR^ityAtmano deha.n rAjyamasmai nyavedayat|| 15\-70||
sa tAvAkhyAya rAmAya maithilIyau tadAtmajau |
kaviH kAruNiko vavre sItAyAH sa.nparigraham|| 15\-71||
tAta shuddhA samakSha.n naH snuShA te jAtavedasi |
daurAtmyAdrakShasastA.n tu nAtratyAH shraddadhuH prajAH|| 15\-72||
tAH svacAritryamuddishya pratyAyayatu maithilI |
tataH putravatImenA.n pratipatsye tvadAdnyayA|| 15\-73||
iti pratishrute rAdnyA jAnakImAshramAnmuniH |
shiShyairAnAyayAmAsa svasiddhi.n niyamairiva|| 15\-74||
anyedyuratha kAkutsthaH sa.nnipAtya puraukasaH |
kavimAhvAyayAmAsa prastutapratipattaye|| 15\-75||
svarasa.nskAravatyAsau putrAbhyAmatha sItayA |
R^icevodarciSha.n sUrya.n rAma.n munirupasthitaH|| 15\-76||
kAShAyaparivItena svapadArpitacakShuShA |
anvamIyata shuddheti shAntena vapuShaiva sA|| 15\-77||
janAstadAlokapathAtpratisa.nhR^itacakShuShaH |
tasthuste.avA~NmukhAH sarve phalitA iva shAlayaH|| 15\-78||
tA.n dR^iShTiviShaye bharturmunirAsthitaviShTaraH |
kuru niHsa.nshaya.n vatse svavR^itte lokamityashAt|| 15\-79||
atha vAlmIkishiShyeNa puNyamAvarjita.n payaH |
AcamyodIrayAmAsa sItA satyA.n sarasvatIm|| 15\-80||
vA~NmanaHkarmabhiH patyau vyabhicAro yathA na me |
tathA vishva.nbhare devi mAmantardhAtumarhasi|| 15\-81||
evamukte tayA sAdhvyA randhrAtsadyobhavAdbhuvaH |
shAtahradamiva jyotiH prabhAmaNDalamudyayau|| 15\-82||
tatra nAgaphaNotkShiptasi.nhAsananiSheduShI |
samudrarashanA sAkShAtprAdurAsIdvasu.ndharA|| 15\-83||
sA sItAma~NkamAropya bhartR^ipraNihitekShaNAm |
mAmeti vyAharatyeva tasminpAtAlamabhyagAt|| 15\-84||
dharAyA.n tasya sa.nrambha.n sItApratyarpaNaiShiNaH |
gururvidhibalApekShI shamayAmAsa dhanvinaH|| 15\-85||
R^iShInvisR^ijya yadnyAnte suhR^idashca puraskR^itAn |
rAmaH sItAgata.n sneha.n nidadhe tadapatyayoH|| 15\-86||
yudhAjitasya sa.ndeshAtsa desha.n sindhunAmakam |
dadau dattaprabhAvAya bharatAya bhR^itaprajaH|| 15\-87||
bharatastatra gandharvAnyudhi nirjitya kevalam |
Atodya.n grAhayAmAsa samatyAjayadAyudham|| 15\-88||
sa takShapuShkalau putrau rAjadhAnyostadAkhyayoH |
abhiShicyAbhiShekArhau rAmAntikamagAtpunaH|| 15\-89||
a~Ngada.n candraketu.n ca lakShmaNo.apyAtmasa.nbhavau |
shAsanAdraghunAthasya cakre kArApatheshvarau|| 15\-90||
ityAropitaputrAste jananInA.n janeshvarAH |
bhartR^ilokaprapannAnA.n nivApAnvidadhuH kramAt|| 15\-91||
upetya muniveSho.atha kAlaH provAca rAghavam |
rahaHsa.nvAdinau pashyedAvA.n yasta.n tyajeriti|| 15\-92||
tatheti pratipannAya vivR^itAtmA nR^ipAya saH |
Acakhyau divamadhyAsva shAsanAtparameShThinaH|| 15\-93||
vidvAnapi tayordvAHsthaH samaya.n lakShmaNo.abhinat |
bhIto durvAsasaH shApAdrAmasa.ndarshanArthinA|| 15\-94||
sa gatvA sarayUtIra.n dehatyAgena yogavit |
cakArAvitathA.n bhrAtuH pratidnyA.n pUrvajanmanaH|| 15\-95||
tasminnAtmacaturbhAge prA~NnAkamadhitasthuShi |
rAghavaH shithila.n tasthau bhuvi dharmastripAdiva|| 15\-96||
sa niveshya kushAvatyA.n ripunAgA~Nkusha.n kusham |
sharAvatyA.n satA.n sUktairjanitAshrulava.n lavam|| 15\-97||
udakpratasthe sthiradhIH sAnujo.agnipuraHsaraH |
anvitaH pativAtsalyAdgR^ihavarjamayodhyayA|| 15\-98||
jagR^ihustasya cittadnyAH padavI.n harirAkShasAH |
kadambamukulasthUlairabhivR^iShTA.n prajAshrubhiH|| 15\-99||
upasthitavimAnena tena bhaktAnukampinA |
cakre tridivaniHshreNiH sarayUranuyAyinAm|| 15\-100||
yadgopratarakalpo.abhUtsa.nmardastatra majjatAm |
atastadAkhyayA tIrtha.n pAvana.n bhuvi paprathe|| 15\-101||
sa vibhurvibudhA.nsheShu pratipannAtmamUrtiShu |
tridashIbhUtapaurANA.n svargAntaramakalpayat|| 15\-102||
nirvartyaiva.n dashamukhashirashChedakArya.n surANA.n
viShvaksenaH svatanumavishatsarvalokapratiShThAm |
la~NkAnAtha.n pavanatanaya.n cobhaya.n sthApayitvA
kIrtistambhadvayamiva girau dakShiNe cottare ca|| 15\-103||

iti shrIraghuva.nshe mahAkAvye kavishrIkAlidAsakR^itau
shrIrAmasvargArohaNo nAma pa~ncadashaH sargaH ||
##
Encoded and Proofread by Arvind Kolhatkar akolhatkar at rogers.com
\medskip\hrule\obeylines

Please send corrections to sanskrit@cheerful.com
Last updated \today
https://sanskritdocuments.org

\end{document}